ས་སྐྱ་ལེགས་བཤད་ཀྱི་རྩ་བ།

༄༅། །རྒྱ་གར་སྐད་དུ། སུ་བྷ་ཥ་ཏ་རཏྣ་ནི་དྷེ་ནཱ་མ་ཤཱ༔། བོད་སྐད་དུ།
ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས།
འཕགས་པ་འཇམ་དཔལ་གཞོན་ནུར་གྱུར་པ་ལ་གུས་པས་ཕྱག་འཚལ་ལོ། །

ལྷ་ཡི་མཆོག་དང་ཀླུ་དབང་གྲུབ་པ་རིག་འཛིན་གཙོ།།
དྲང་སྲོང་རྒྱས་པ་གྲོག་མཁར་པ་དང་རྐང་མིག་སོགས།།
ཀུན་ནས་དགའ་བའི་གཙུག་གི་ནོར་བུས་ཞབས་མཆོད་པ།།
འགྲོ་བའི་གཙོ་བོ་ཀུན་མཁྱེན་དེ་ལ་བདག་ཕྱག་འཚལ། །

རིགས་པས་དཔྱད་ན་ཆོས་ལུགས་མི་འགལ་ཞིང༌།།
འཇིག་རྟེན་བྱ་བ་ཀུན་ནས་ལེགས་བསྒྲུབ་པ།།
དམ་པ་རྣམས་ཀྱི་སྤྱོད་ཚུལ་ཇི་འདྲ་ཞིག།
བཤད་པ་འདི་ནི་ལེགས་བཤད་རིན་ཆེན་གཏེར། །

༡ མཁས་པ་བརྟགས་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་དང་པོ། མཁས་པ་བརྟགས་པ།


མཁས་པ་ཡོན་ཏན་མཛོད་འཛིན་པ།།
དེ་དག་ལེགས་བཤད་རིན་ཆེན་སྡུད།།
རྒྱ་མཚོ་ཆེན་པོ་ཆུ་བོའི་གཏེར།།
ཡིན་ཕྱིར་ཆུ་བོ་ཐམས་ཅད་འབབ། །

སྐྱེ་བོ་ཡོན་ཏན་ཡོད་མེད་པས།།
བླང་དོར་བློ་གྲོས་ལྡན་པ་མཁས།།
རྡུལ་དང་འདྲེས་པའི་ལྕགས་ཕྱེ་རྣམས།།
ཁབ་ལེན་རྡོ་ཡིས་ལེན་པར་ཤེས། །

ལེགས་བཤད་མཁས་པའི་བློ་གྲོས་ཀྱིས།།
གོ་ཡི་བླུན་པོས་དེ་ལྟ་མིན།།
ཉི་མའི་འོད་ཟེར་ཤར་བ་ན།།
འབྱུང་པོའི་བྱ་རྣམས་ལོང་བར་འགྱུར། །

ཤེས་རབ་ལྡན་པས་ཉེས་པ་དག།
སེལ་བར་ནུས་ཀྱི་བླུན་པོས་མིན།།
ནམ་མཁའ་ལྡིང་གིས་དུག་ཅན་སྦྲུལ།།
བསད་པར་ནུས་ཀྱི་ཁྭ་ཏས་མིན། །

བློ་གྲོས་ཆེན་པོ་རྒུད་ན་ཡང༌།།
ལྷག་པར་བློ་གྲོས་སྟོབས་ལྡན་འགྱུར།།
རི་དྭགས་རྒྱལ་པོ་བཀྲེས་པ་ན།།
གླང་ཆེན་སྤྱི་བོ་མྱུར་དུ་འགེམས། །

མཁས་པ་རྩད་ཅིང་མ་དྲིས་པ།།
དེ་ཡི་བར་དུ་གཏིང་མི་དཔོགས།།
རྔ་ལ་དབྱུག་གུས་མ་བསྣུན་པ།།
དེ་སྲིད་གཞན་དང་ཁྱད་ཅི་ཡོད། །

རིག་པ་ནང་པར་འཆི་ཡང་བསླབ།།
ཚེ་འདིར་མཁས་པར་མ་གྱུར་ཀྱང༌།།
སྐྱེ་བ་ཕྱི་མར་བཅོལ་བ་ཡི།།
ནོར་ལ་རང་ཉིད་ལེན་པ་འདྲ། །

ཡོན་ཏན་ལྡན་ན་སྐྱེ་བོ་ཀུན།།
མ་བསྡུས་པར་ཡང་རང་ཉིད་འདུ།།
དྲི་ལྡན་མེ་ཏོག་རྒྱང་རིང་ཡང༌།།
བུང་བ་སྤྲིན་གྱི་ཚོགས་བཞིན་འཁོར། །

མཁས་པ་ཡོན་ཏན་ཀུན་བསླབས་པ།།
མཐར་ཕྱིན་གཅིག་གིས་འཇིག་རྟེན་གསལ།།
བློ་ངན་ཤེས་པ་མང་ན་ཡང༌།།
རྒྱུ་སྐར་བཞིན་དུ་གསལ་མི་ནུས། །

མཁས་པ་ཡོན་ཏན་དཔག་མེད་ཀྱང༌།།
གཞན་གྱི་ཡོན་ཏན་ཆུང་ངུའང་ལེན།།
དེ་ལྟར་རྒྱུན་དུ་སྤྱད་པ་ཡིས།།
མྱུར་དུ་ཐམས་ཅད་མཁྱེན་པར་འགྲོ། །

མཁས་པ་ཤེས་རབ་ཀྱིས་བསྲུངས་ན།།
དགྲ་བོ་མང་ཡང་ག་ལ་ཚུགས།།
འཕགས་རྒྱལ་གྱི་ནི་བྲམ་ཟེའི་བུ།།
གཅིག་པུས་དགྲ་བོའི་ཚོགས་ཀུན་བཅོམ། །

བློ་ཆུང་གྲོས་ཉེས་འཁྲུགས་པའི་ཚེ།།
བློ་ལྡན་ཐབས་ཀྱིས་བདེ་བར་གསོ།།
ཆུ་ཀླུང་རྙོག་པས་ཆུད་གསན་པ།
ཆུ་མདྭངས་ནོར་བུས་དྭངས་པར་བྱེད། །

མཁས་པ་ཇི་ལྟར་ཐབས་རྡུགས་ཀྱང༌།།
བླུན་པོ་འཇུག་པའི་ལམ་མི་འགྲོ།།
ཆར་འདོད་བྱེའུ་སྐོམ་ན་ཡང༌།།
ས་ལ་བབས་པའི་ཆུ་མི་འཐུང༌། །

ཤེས་རབ་ལྡན་པ་མགོ་བསྐོར་ཡང༌།།
བྱ་བའི་ཆ་ལ་རྨོངས་མི་འགྱུར།།
སྲོག་ཆགས་གྲོག་མ་མིག་མེད་ཀྱང༌།།
མིག་ལྡན་གཞན་ལས་ལྷག་པར་མགྱོགས། །

བློ་གྲོས་ལྡན་པ་གཉིས་བགྲོས་ན།།
བློ་གྲོས་ལེགས་པ་གཞན་འབྱུང་སྲིད།།
ཡུང་བ་དང་ནི་ཚ་ལེ་ལས།།
ཁ་དོག་གཞན་ཞིག་སྐྱེ་བར་འགྱུར། །

ཁོང་མཛངས་བསོད་ནམས་བསགས་པའི་མི།།
གཅིག་པུ་ཡིན་ཡང་ཀུན་ལས་རྒྱལ།།
རི་དྭགས་རྒྱལ་པོ་སེངྒེ་དང༌།།
འཁོར་ལོས་བསྒྱུར་ལ་གྲོགས་མི་དགོས། །

ཐབས་ལ་མཁས་ན་ཆེན་པོ་ཡང༌།།
བྲན་དུ་བཀོལ་བ་ག་ལ་དཀའ།།
མཁའ་ལྡིང་མཐུ་རྩལ་ཆེ་ན་ཡང༌།།
གོས་སེར་ཅན་གྱི་བཞོན་པར་འགྱུར། །

འཇིག་རྟེན་འདི་དང་ཕ་རོལ་གྱི།།
བདེ་བ་བསྒྲུབ་པ་ཤེས་རབ་ཡིན།།
རྒྱལ་བུ་ཟླ་བའི་ཤེས་རབ་ཀྱིས།།
བྲན་བཟང་འདི་དང་ཕྱི་མར་བསྐྱབས། །

དཔའ་ཞིང་མཐུ་རྩལ་ཆེ་ན་ཡང༌།།
མཁས་པ་མིན་པས་དཔའ་མི་ཐོབ།།
འབྱོར་པ་ཐོབ་པར་གྱུར་ན་ཡང༌།།
བསོད་ནམས་མེད་ན་ག་ལ་རྟག །

ཡོན་ཏན་སྐྱོན་གཉིས་སུས་ཀྱང་གསལ།།
འདྲེས་པ་འབྱེད་ཤེས་མཁས་པ་ཡིན།།
བ་ལས་འོ་མ་ཀུན་གྱིས་ལོན།།
ཆུ་ལས་འོ་མ་ངང་པས་ཕྱེད། །

སྨྲས་ཤིང་བསྐུལ་བར་གྱུར་བ་ན།།
དུད་འགྲོ་ལ་ཡང་གོ་བ་སྐྱེས།།
མ་བསྐུལ་གཞན་གྱིས་མ་སྨྲས་པར།།
བསམ་པ་ཤེས་ན་མཁས་པ་ཡིན། །

བློ་དང་ལྡན་ན་མ་སྨྲས་ཀྱང༌།།
རྣམ་འགྱུར་ཉིད་ལས་བསམ་པ་གོ།
བལ་པོའི་སེའུ་མ་ཟོས་ཀྱང༌།།
ཁ་དོག་ཉིད་ལས་བྲོ་བ་ཤེས། །

མཁས་པ་རང་གི་ཡུལ་བས་ཀྱང༌།།
ཡུལ་ཁམས་གཞན་དུ་མཆོད་པ་ཐོབ།།
ནོར་བྱ་གཞན་དུ་བྲིན་པ་ཙམ།།
རྒྱ་མཚོའི་གླིང་དུ་ག་ལ་བྲིན། །

མཁས་པ་སློབ་པའི་དུས་ན་སྡུག།
བདེ་བར་སྡོད་ལ་མཁས་མི་སྲིད།།
བདེ་བ་ཆུང་ལ་ཆགས་པ་དེས།།
ཆེན་པོའི་བདེ་བ་ཐོབ་མི་སྲིད། །

བློ་དང་ལྡན་ན་ཉམ་ཆུང་ཡང༌།།
སྟོབས་ལྡན་དགྲ་བོས་ཅི་བྱར་ཡོད།།
རི་དྭགས་རྒྱལ་པོ་སྟོབས་ལྡན་ཡང་།།
རི་བོང་བློ་དང་ལྡན་པས་བསད། །

སེམས་ཅན་གཞན་དང་རྗེས་མཐུན་པའི།།
སྤྱོད་པ་ཤེས་ན་མཁས་པ་ཡིན།།
དུད་འགྲོ་ཡིན་ཡང་རིགས་མཐུན་རྣམས།།
ཁྱུ་གཅིག་ཏུ་ནི་མི་གནས་སམ། །

ངེས་པར་འགྲུབ་དགོས་བྱ་བ་འགའ།།
མ་གྲུབ་པ་ནས་དཔྱོད་པའི་ཚེ།།
མཁས་རྨོངས་གཉིས་ཀྱི་ཁྱད་པར་ཤེས།།
གྲུབ་ནས་དཔྱོད་པ་བླུན་པོའི་ཚུལ། །

མཁས་པ་རྣམས་ཀྱིས་དཔྱད་པ་ཡི།།
ཤེས་བྱ་ཤེས་ན་མཁས་པར་བགྲང༌།།
བ་ལང་རྒན་གཞོན་དཔྱོད་པ་ལ།།
བླུན་པོ་མཁས་ཀྱང་ཡོན་ཏན་མིན། །

རྒྱ་མཚོ་ཆུ་ཡིས་མི་ངོམས་ཤིང༌།།
རྒྱལ་པོའི་བང་མཛོད་ནོར་གྱིས་མིན།།
འདོད་ཡོན་སྤྱད་པས་མི་ངོམས་ཏེ།།
མཁས་པ་ལེགས་བཤད་ཀྱིས་མི་ངོམས། །

ལེགས་བཤད་བྱིས་པ་དག་ལས་ཀྱང༌།།
མཁས་པ་རྣམས་ནི་ཡོངས་སུ་ལེན།།
དྲི་ཞིམ་འབྱུང་ན་རི་དྭགས་ཀྱི།།
ལྟེ་བ་ལས་ཀྱང་གླ་རྩི་ལེན། །

ལེགས་པར་བཤད་པ་རིན་པོ་ཆེའི་གཏེར་ལས་མཁས་པ་བརྟགས་པ་སྟེ་རབ་ཏུ་བྱེད་པ་དང་པོའོ།། །།

༢ ཡ་རབས་བརྟགས་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་གཉིས་པ། ཡ་རབས་བརྟགས་པ།


རྟག་ཏུ་དམ་པའི་ཡོན་ཏན་རྣམས།།
སྐྱེ་བོ་དམ་པ་ལྷག་པར་སྒྲོགས།།
མ་ལ་ཡ་ཡི་ཙནྡན་དྲི།།
རླུང་གིས་ཕྱོགས་བཅུར་རྒྱས་པར་བྱེད། །

དམ་པ་དཔོན་དུ་བསྐོས་གྱུར་ན།།
དོན་གྲུབ་པ་དང་བདེ་སྐྱིད་འཐོབ།།
ནོར་བུ་རྒྱལ་མཚན་རྩེར་མཆོད་ན།།
ཡུལ་ཕྱོགས་དགེ་ཞེས་མཁས་རྣམས་སྒྲོགས། །

རྒྱལ་ངན་གཞན་གྱིས་གཙེས་པ་ན།།
ལྷག་པར་ཆོས་རྒྱལ་དྲན་པར་འགྱུར།།
རིམས་ཀྱིས་བཏབ་པའི་སེམས་ཅན་རྣམས།།
གངས་ཆུ་འབའ་ཞིག་ཡིད་ལ་བྱེད། །

སྡིག་སྤྱོད་རྒྱལ་པོས་གཙེས་པ་ལ།།
མི་དབང་ཆོས་སྤྱོད་ལྷག་པར་སྐྱོངས༌།།
འབྱུང་པོའི་གདོན་གྱིས་བཏབ་པ་ལ།།
གསང་སྔགས་གྲུབ་པས་རྗེས་སུ་འཛིན། །

དམ་པ་སྡིག་པ་ཆུང་ཡང་སྤོང༌།།
དམན་རྣམས་ཆེན་པོའང་དེ་ལྟ་མིན།།
ཞོ་ལ་རྡུལ་ཕྲན་འབྱར་བ་སེལ།།
ཆང་ལ་ཕབས་ཀྱང་ལྷག་པར་འདེབས། །

སྐྱེ་བོ་དམ་པ་རྒུད་གྱུར་ཀྱང༌།།
སྤྱོད་པའི་ཁྱད་པར་ལྷག་པར་མཛེས།།
མེ་ནི་ཐུར་དུ་ཁ་བསྟན་ཡང༌།།
མེ་ལྕེ་གྱེན་ལ་འབར་བ་མཐོང༌། །

དམ་པ་རྒྱང་ན་གནས་ན་ཡང༌།།
འཁོར་འདབ་ཕན་པས་རིང་ནས་སྐྱོང༌།།
མཁའ་ལ་སྤྲིན་ཆེན་འཁྲིགས་པ་ཡིས།།
ས་ཡི་ལོ་ཏོག་ཁྱད་པར་འཕེལ། །

གསོན་ཚེ་སྙན་གྲགས་དགའ་བའི་རྒྱུ།།
འཇིག་རྟེན་གཞན་དུ་བསོད་ནམས་དགའ།།
དེ་གཉིས་མེད་པའི་ནོར་ཙམ་གྱིས།།
མཁས་རྣམས་དགའ་བ་བསྐྱེད་མི་ནུས། །

ཕྱི་རྗེས་རིང་དུ་ལྟ་བ་དང༌།།
བག་ཡོད་པ་ལ་བཟོད་སྲན་ཆེ།།
བརྩོན་འགྲུས་ཆེ་ཞིང་བརྟན་ལ་གྲིམས།།
བྲན་གཡོག་ཡིན་ཡང་དཔོན་དུ་འགྱུར། །

སྦྱིན་ལ་རྟག་ཏུ་སེམས་སྤྲོ་བ།།
དེ་ཡི་གྲགས་པ་རླུང་བཞིན་ལྡང༌།།
ཕོངས་པ་སློང་བ་འདུ་བ་བཞིན།།
འབྱལ་བར་འདོད་རྣམས་དེ་བས་མང༌། །

བྱིན་ནས་སླར་ཡང་མི་ལེན་པའི།།
དམན་པའི་བརྙས་པ་དང་དུ་ལེན།།
ཕན་པ་ཆུང་ངུའང་མི་བརྗེད་པ།།
བདག་ཉིད་ཆེན་པོའི་ཆེ་རྟགས་ཡིན། །

དམ་པའི་ཡོན་ཏན་སྦས་གྱུར་ཀྱང༌།།
འཇིག་རྟེན་ཀུན་ལ་ཁྱབ་པར་གསལ།།
སྣ་མའི་མེ་ཏོག་ལེགས་བཀབ་ཀྱང༌།།
དྲི་ཞིམ་ཀུན་ཏུ་ཁྱབ་པར་འགྱུར། །

རྒྱལ་པོ་རང་ཡུལ་ཆེ་བ་ཙམ།།
དམ་པ་གང་དུ་ཕྱིན་སར་བཀུར།།
མེ་ཏོག་ཕལ་ཆེར་ཉིན་རེའི་རྒྱན།།
གཙུག་གི་ནོར་བུ་གང་དུའང་མཆོད། །

ལྗོན་ཤིང་དུལ་བ་འབྲས་བུ་མང༌།།
རྨ་བྱ་དུལ་བ་མཇུག་སྒྲོ་བཟང༌།།
རྟ་མཆོག་དུལ་བ་འགྲོ་མགྱོགས་ཏེ།།
དམ་པ་དུལ་བ་མཁས་པའི་རྟགས། །

དམ་པ་རྣམས་དང་ཕལ་བ་ལ།།
བྱས་པ་མཉམ་ཡང་དྲིན་མི་འདྲ།།
ཞིང་ལ་ས་བོན་ཁྱད་མེད་ཀྱང༌།།
ལོ་ཏོག་ཁྱད་པར་དཔག་ཏུ་མེད། །

བདག་ཉིད་ཆེ་ལ་ཕན་བཏགས་ན།།
ཅུང་ཟད་ཙམ་ལའང་འབྲས་བུ་འབྱིན།།
སྐྱུ་རུ་ར་གཅིག་བྱིན་པ་ལ།།
ཆོས་རྒྱལ་བུ་དང་མཉམ་ལ་ལྟོས། །

བཟང་པོའི་ཆོ་རིགས་སྤྱོད་པས་བསྲུང༌།།
སྤྱོད་པ་ཉམས་ན་རིགས་དོན་མེད།།
ཙནྡན་དྲི་བཟང་སྐྱེ་བོ་དགའ།།
དེ་བསྲེགས་སོལ་བ་སུ་ཞིག་ལེན། །

ཆེན་པོ་རེ་ཞིག་རྒུད་གྱུར་ཀྱང༌།།
དེ་ལ་གདུང་བ་བསྐྱེད་མི་དགོས།།
ཟླ་བ་རེ་ཞིག་གཟས་ཟིན་ཀྱང༌།།
དེ་མ་ཐག་ཏུ་གྲོལ་བར་འགྱུར། །

ཆེན་པོས་དགྲ་ལ་བྱམས་བྱས་ན།།
དགྲ་ཉིད་དེ་ཡི་དབང་དུ་འགྱུར།།
མང་པོས་བཀུར་བས་ཀུན་བསྐྱངས་པས།།
ཀུན་གྱིས་རྒྱལ་པོར་དབང་བསྐུར་རོ། །

དམ་པ་ཇི་ལྟར་རྒུད་གྱུར་ཀྱང༌།།
སྡིག་དང་འདྲེས་པའི་ཟས་མི་ཟ།།
སེང་གེ་བཀྲེས་ཀྱང་མི་གཙང་བའི།།
ངན་སྐྱུགས་ཟ་བར་མི་བྱེད་དོ། །

དམ་པ་སྲོག་ལ་བབས་ན་ཡང༌།།
རང་བཞིན་བཟང་པོ་ག་ལ་འདོར།།
ས་ལེ་སྦྲམ་ནི་བསྲེགས་བཅད་ཀྱང༌།།
དེ་ཡི་ཁ་དོག་ཉམས་མི་འགྱུར། །

སྐྱེས་མཆོག་རྣམས་ལ་དམན་པ་རྣམས།།
ཁྲོ་ཡང་ལན་དུ་ག་ལ་ཁྲོ།།
ཅེ་སྤྱང་དྲེགས་པས་སྐད་འབྱིན་ཡང༌།།
རི་དྭགས་རྒྱལ་པོ་སྙིང་རྗེ་སྐྱོ། །

བདག་ཉིད་ཆེ་ལ་སྐྱེ་བོ་རྣམས།།
སྐྱོན་འཚོལ་འགྱུར་གྱི་དམན་ལ་མིན།།
འཕན་ཟེལ་རིན་ཆེན་ལ་ལྟ་ཡི།།
མགལ་དུམ་ལ་ནི་སུ་ཞིག་དཔྱོད། །

བསྟོད་པས་དགའ་བར་མི་འགྱུར་ལ།།
སྨད་པས་མི་དགར་མི་འགྱུར་ཞིང༌།།
རང་གི་ཡོན་ཏན་ལེགས་གནས་པ།
སྐྱེ་བོ་དམ་པའི་མཚན་ཉིད་ཡིན། །

སྡིག་པ་དང་ནི་མཐུ་རྩལ་ལས།།
བྱུང་བའི་ལོངས་སྤྱོད་ལོངས་སྤྱོད་མིན།།
ཁྱི་དང་བྱི་ལ་འགྲངས་ན་ཡང༌།།
ངོ་ཚ་བོར་བའི་རྣམ་ཐར་ཡིན། །

འཁོར་ལ་ཕུན་སུམ་ཚོགས་གྱུར་ན།།
རྗེ་དཔོན་ཉིད་ཀྱི་ཆེ་བ་ཡིན།།
རྟ་ལ་རྒྱན་དུ་བྱས་པ་དེ།།
བདག་པོ་ཉིད་ལ་མི་མཛེས་སམ། །

ཇི་ལྟ་ཇི་ལྟར་རྗེ་དཔོན་གྱིས།།
འཁོར་ལ་དྲིན་གྱིས་བསྐྱངས་གྱུར་པ།།
དེ་ལྟ་དེ་ལྟར་འཁོར་གཡོག་རྣམས།།
རྗེ་དཔོན་ཉིད་ཀྱི་བྱ་བ་སྒྲུབ། །

བདག་ཉིད་ཆེན་པོ་གནས་པའི་སར།།
མཁས་པ་གཞན་དག་སུ་ཡིས་བརྩི།།
མཁའ་ལ་ཉི་མ་ཤར་བ་ན།།
རྒྱུ་སྐར་མང་ཡང་མཐོང་མི་འགྱུར། །

ལེགས་པར་བཤད་པ་རིན་པོ་ཆེའི་གཏེར་ལས་ཡ་རབས་བརྟག་པ་རབ་ཏུ་བྱེད་པ་གཉིས་པའོ།། །།

༣ བླུན་པོ་བརྟགས་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་གསུམ་པ། བླུན་པོ་བརྟགས་པ།


དམན་པ་ལོངས་སྤྱོད་ཆེ་ན་ཡང་།།
རིགས་ལྡན་རྒུད་པས་ཟིལ་གྱིས་གནོན།།
བཀྲེས་པ་སྟག་གི་ངར་སྒྲ་ཡིས།།
སྤྲེའུ་ཤིང་གི་རྩེ་ལས་ལྷུང་། །

བླུན་པོའི་ཡོན་ཏན་ཁར་འབྱིན་ཏེ།།
མཁས་པའི་ཡོན་ཏན་ཁོང་དུ་སྦེད།།
སོག་མ་ཆུ་ཡི་སྟེང་ན་འཕྱོ།།
ནོར་བུ་སྟེང་དུ་བཞག་ཀྱང་འབྱིང་། །

ཡོན་ཏན་ཆུང་རྣམས་ང་རྒྱལ་ཆེ།།
མཁས་པར་གྱུར་ན་དུལ་བར་གནས།།
ཆུ་ཕྲན་རྟག་ཏུ་ཀུ་ཅོ་ཆེ།།
རྒྱ་མཚོ་ཅ་ཅོ་ག་ལ་སྒྲོག །

སྐྱེ་བོ་དམན་རྣམས་དམ་པ་ལ།།
ཁྱད་གསོད་བྱེད་ཀྱིས་དམ་པས་མིན།།
སེང་གེས་ཝ་ཚོགས་ལེགས་སྐྱོང་གི།
ཝ་ཉིད་ཝ་ཡི་རིགས་ལ་འགྲན། །

དམ་པ་ཁྲོས་ཀྱང་བཏུད་ན་ཞི།།
དམན་ལ་བཏུད་ན་ལྷག་པར་རེངས།།
གསེར་དངུལ་སྲ་ཡང་བཞུ་ནུས་ཀྱི།།
ཁྱི་ལུད་བཞུས་ན་དྲི་ངན་འབྱུང་། །

མཁས་ལ་ཡོན་ཏན་ཀུན་ལྡན་ཏེ།།
བླུན་ལ་སྐྱོན་རྣམས་འབའ་ཞིག་ཡིན།།
རིན་པོ་ཆེ་ལས་དགོས་དགུ་འབྱུང་།།
སྦྲུལ་གདུག་ལས་ནི་ཉེས་ཀུན་བསྐྱེད།།

སྡིག་སྤྱོད་ནགས་ན་གནས་ཀྱང་ཉམས།།
དམ་པ་གྲོང་ན་གནས་ཀྱང་དུལ།།
ནགས་ཀྱི་གཅན་གཟན་ཁྲོ་བ་དང་།།
རྟ་མཆོག་གྲོང་གནས་དུལ་བར་མཐོང་། །

སྐྱེས་མཆོག་རང་གི་སྐྱོན་ལ་བལྟ།།
སྐྱེ་བོ་ངན་པ་གཞན་སྐྱོན་འཚོལ།།
རྨ་བྱ་རང་གི་ལུས་ལ་རྟོག།
སྲིན་བྱ་གཞན་ལ་ལྟས་ངན་གཏོང་། །

དམ་པ་དུལ་བས་རང་གཞན་སྐྱོང་།།
ངན་པ་རེངས་པས་རང་གཞན་སྡུག།
འབྲས་ལྡན་ཤིང་གིས་རང་གཞན་སྲུང་།།
ཤིང་སྐམ་རེངས་པས་རང་གཞན་སྲེག །

འབྱོར་པའི་དུས་ན་ཐམས་ཅད་གཉེན།།
གལ་ཏེ་རྒུད་ན་ཀུན་ཀྱང་དགྲ།།
རིན་ཆེན་གླིང་དུ་རིང་ནས་འདུ།།
མཚོ་བསྐམས་པ་ན་སུ་ཡང་སྤོང་། །

བླུན་པོ་འབྱོར་བ་ཐོབ་ན་བདེ།།
སྐྱེས་མཆོག་ཐམས་ཅད་བྱིན་ན་བདེ།།
མཛེ་ཅན་འཕྲུགས་ན་བདེ་བར་འཛིན།།
མཁས་པ་མཛེ་ལ་འཇིགས་པར་ལྟ། །

ཆེ་ལ་གནོད་བྱེད་གྲོགས་སུ་འགྱུར།།
དམན་ལ་གནོད་བྱེད་གནོད་པར་འགྱུར།།
ནགས་མེ་རླུང་གིས་སྦོར་མོད་ཀྱི།།
དེ་ཡིས་སྒྲོན་མེ་ཆུང་ངུ་གསོད། །

འདི་བཤེས་འདི་ནི་དགྲ་བོ་ཞེས།།
བློ་གྲོས་ཆུང་རྣམས་སོ་སོར་འབྱེད།།
བློ་ཆེན་ཀུན་ལ་བྱམས་པ་ལས།།
ཕན་བྱེད་གང་ཡིན་ངེས་པ་མེད། །

ཡོན་ཏན་ལྡན་པ་ཡོན་ཏན་ལ།།
དགའ་ཡི་ཡོན་ཏན་མེད་རྣམས་མིན།།
སྦྲང་རྩི་འཛིན་པ་མེ་ཏོག་ལ།།
དགའ་ཡི་ཤ་སྦྲང་དེ་ལྟ་མིན། །

མཁས་པ་མཁས་པའི་ནང་ན་མཛེས།།
བླུན་པོས་མཁས་པ་ཇི་ལྟར་གོ།
ཙན་དན་གསེར་བས་རིན་ཆེ་བ།།
བླུན་པོས་སོལ་བར་བྱས་ལ་ལྟོས། །

མཁས་པ་རང་གིས་དཔྱོད་ཤེས་ཀྱི།།
བླུན་པོ་གྲགས་པའི་རྗེས་སུ་འབྲང་།།
ཁྱི་རྒན་ཀུ་ཅོ་འདོན་པ་ན།།
རྒྱུ་མཚན་མེད་པར་གཞན་དག་རྒྱུག །

མཁས་པ་ཤིན་ཏུ་རྒུད་ན་ཡང་།།
ལེགས་བཤད་གཏམ་གྱིས་གཞན་དགའ་བྱེད།།
བླུན་པོ་འབྱོར་བར་གྱུར་ཚེ་ཡང་།།
རྩོད་པ་ཁོ་ནས་རང་གཞན་བསྲེག །

ཁ་ཅིག་སྨྲ་བས་གྲུབ་པར་བརྩི།།
ལ་ལ་མི་སྨྲ་དོན་ལ་འབད།།
ཁྱི་ངན་དགྲ་ལ་ཁུས་འདེབས་ཏེ།།
ཆུ་སྐྱར་བྱི་ལ་སྒྲ་མེད་འཇབ། །

དམ་པར་རྒོལ་ཡང་ཕན་པ་སྒྲུབ།།
སྐྱེ་བོ་ངན་པ་མཛའ་ཡང་གནོད།།
ལྷ་རྣམས་ཁྲོས་ཀྱང་སེམས་ཅན་བསྲུང་།།
གཤིན་རྗེ་འཛུམ་ཡང་ཕ་རོལ་གསོད། །

སྐྱེ་བོ་དམ་པ་རིན་ཆེན་བཞིན།།
རྣམ་པ་ཀུན་ཏུ་འགྱུར་ལྡོག་མེད།།
སྐྱེ་བོ་ངན་པ་སྲང་མདའ་བཞིན།།
ཅུང་ཟད་ཙམ་གྱིས་མཐོ་དམན་བྱེད། །

བློ་མཐུན་རིང་ན་གནས་ཀྱང་ཕན།།
མི་མཐུན་ཉེ་ན་ལྷག་པར་འབྲལ།།
འདམ་སྐྱེས་འདམ་གྱིས་མི་གོས་ལ།།
དེ་ཉིད་ཉི་མས་རྟག་ཏུ་སྐྱོང་། །

ཇི་སྲིད་ངོ་ཚ་ཡོད་གྱུར་པ།།
དེ་སྲིད་ཡོན་ཏན་རྒྱན་གྱི་མཆོག།
ངོ་ཚ་བརྒལ་ན་ཡོན་ཏན་ཉིད།།
ཕྱོགས་སུ་བྱས་ཏེ་གཏམ་ངན་འཕེལ། །

དམ་པ་མ་བཅོལ་ལེགས་པར་སྟོན།།
དམན་ལ་དྲིས་ཀྱང་ལོག་པར་ཤོད།།
རྒྱལ་བའི་སྲས་ལ་བརྙས་ཀྱང་བརྩེ།།
འཆི་བདག་མཆོད་ཀྱང་གསོད་པ་ཡིན། །

གཅིག་ལ་ཕན་པར་འགྱུར་པ་ཡི།།
བྱ་བ་གཞན་ལ་གནོད་པ་སྲིད།།
ཟླ་བ་ཤར་ན་ཀུ་མུ་ད།།
ཁ་འབྱེད་འགྱུར་གྱི་པདྨ་ཟུམ། །

ཉེས་པ་ལ་ཀྱས་དོན་གྲུབ་པ།།
བྱུང་ཡང་མཁས་རྣམས་ག་ལ་སྨོན།།
ལེགས་པར་བསྒྲུབས་ཀྱང་སྐྱོན་སྲིད་མོད།།
དེ་ལ་མཁས་རྣམས་ཁྲེལ་བ་མེད། །

རྙེད་པ་ལ་ལ་རྙེད་པ་སྟེ།།
རྙེད་པ་ལ་ལ་དགྲ་བོ་ཡིན།།
རྒོད་མ་མངལ་ལྡན་ནོར་འཕེལ་བྱེད།།
དྲེའུ་མོ་སྦྲུམ་ན་འཆི་བ་རྙེད། །

དམ་པ་དབྱེ་དཀའ་འདུམ་པ་སླ།།
དམན་པ་དབྱེ་སླ་འདུམ་པ་དཀའ།།
ལྗོན་ཤིང་དང་ནི་སོལ་བ་ཡི།།
གཅད་དང་སྦྱོར་བའི་ཁྱད་པར་ལྟོས། །

ཉམ་ཆུང་གྱུར་ཀྱང་ཟོན་བྱེད་ན།།
ཆེན་པོ་ཡིས་ཀྱང་གཞོམ་པར་དཀའ།།
ཆེན་པོ་ཡིན་ཡང་བག་ཕེབས་ན།།
ཉམ་ཆུང་རྣམས་ཀྱིས་བརླག་པ་མང་། །

ནོར་གྱིས་འབྱོར་ན་སྟོབས་ཀྱང་འཕེལ།།
ནོར་མེད་པ་ལ་སྟོབས་ཀྱང་འབྲི།།
བྱི་བས་དབྱིག་ལྡན་ནོར་ཕྲོགས་པས།།
བརྐུ་བའི་ནུས་པ་ཉམས་ཞེས་ཐོས། །

མི་གང་བསོད་ནམས་ལ་སྤྱོད་པ།།
བཏང་ཡང་ལོངས་སྤྱོད་ཆར་བཞིན་འབབ།།
བསོད་ནམས་མེད་པའི་ལོངས་སྤྱོད་དེ།།
བསགས་ཀྱང་སུ་ཡིས་ཟ་བ་སོམས། །

དམ་པ་རེ་ཞིག་རྒུད་གྱུར་ཀྱང་།།
ཟླ་བ་བཞིན་དུ་ཡར་ངོ་འབྱུང་།།
དམན་པ་ལན་ཅིག་རྒུད་གྱུར་ན།།
མར་མེ་བཞིན་དུ་མནལ་བར་འགྱུར། །

ཤེས་ལྡན་དགྲ་ལ་མིག་བསྲིངས་པས།།
ཐ་མར་དགྲ་བོ་དབང་དུ་སྡུད།།
དྲོད་ཆུང་དགྲ་ལ་ལན་བྱས་པས།།
དཀའ་བ་རྒྱུན་མི་འཆད་པ་ཐོབ། །

མཁས་པས་ཤིན་ཏུ་ཉམ་ང་བའི།།
གནས་ལ་འཛུར་ན་དཔའ་རྟགས་ཡིན།།
སེང་གེས་ཁྱུ་མཆོག་གསོད་པའི་ཚེ།།
རྭ་ལ་འཛུར་བ་ག་ལ་སྡར། །

རྣམ་པ་ཀུན་ཏུ་མི་དཔྱོད་པར།།
དགྲ་ལ་མཆོང་བ་བླུན་རྟགས་ཡིན།།
མར་མེའི་འོད་ལ་འཛིངས་པ་ཡིས།།
སྦྲང་བུ་དཔའ་བར་འགྲོ་འམ་ཅི། །

ངན་པ་རང་བརྟེན་ཁྱད་པར་འཇོམས།།
དམ་པ་གང་ལ་བརྟེན་པ་སྲུང་།།
སྲིན་བུ་རང་བརྟེན་ཟད་ཟད་ཟ།།
སེང་གེ་རང་གི་ཡུལ་འཁོར་སྲུང་། །

དམན་རྣམས་དགོས་པ་ཆུང་ངུ་གསང་།།
གསང་དགོས་དགོས་པ་མེད་པར་སྨྲ།།
དམ་པ་དགོས་མེད་གསང་མི་འགྱུར།།
གསང་དགོས་སྲོག་ལ་བབས་ཀྱང་བསྲུང་། །

དམན་པ་འབྱོར་ན་དྲེགས་པའི་རྒྱུ།།
དམ་པ་འབྱོར་ན་དུལ་བའི་རྒྱུ།།
ཝ་སྐྱེས་འགྲངས་ན་དྲེགས་པས་བརྒྱལ།།
སེང་གེ་འགྲངས་ན་བདེ་བར་ཉལ། །

དམ་པ་དང་ནི་དམན་པ་ཡི།།
སྤྱོད་པ་གཉིས་ཀ་གོམས་པའི་ཤུགས།།
བུང་བ་མེ་ཏོག་འཚོལ་བ་དང་།།
ངང་པ་ཆུར་འཇུག་བསླབ་ཅི་དགོས། །

རྒྱལ་ངན་དགྲ་དང་ཕྲད་པ་ན།།
རང་གི་འཁོར་ལ་ཆད་པས་གཅོད།།
དོན་མ་གྲུབ་པའི་བླུན་པོ་འགའ།།
རང་ཉིད་འགགས་ཏེ་འཆི་བ་ཡོད། །

ཆོས་རྒྱལ་དགྲ་དང་ཕྲད་པ་ན།།
ལྷག་པར་འཁོར་ལ་བྱམས་པ་སྐྱེས།།
ན་བའི་བུ་ལ་ཁྱད་པར་དུ།།
མ་ནི་གདུང་བ་སྐྱེ་བར་འགྱུར། །

སྐྱེ་བོ་དམ་པ་ངན་པ་དང་།།
འགྲོགས་ན་ངན་པའི་ཤན་དུ་འགྱུར།།
གངྒཱའི་ཆུ་ནི་རབ་ཞིམ་པ།།
རྒྱ་མཚོར་སླེབས་ན་བ་ཚྭར་འགྱུར། །

དམན་པས་སྐྱེ་བོ་མཆོག་བསྟེན་ན།།
སྐྱེ་བོ་དམ་པའི་སྤྱོད་པ་འབྱུང་།།
གླ་རྩི་བྱུགས་པའི་གང་ཟག་ལ།།
གླ་རྩིའི་དྲི་ཞིམ་འབྱུང་ལ་ལྟོས། །

ལྷུན་པོ་ཅིས་ཀྱང་མི་འགུལ་བ།།
དེ་བཞིན་བདག་ཉིད་ཆེན་པོ་བརྟན།།
ཤིང་བལ་ཆུང་ངུ་གཡོ་བ་ལྟར།།
དམན་པའི་སྤྱོད་པ་འགྱུར་ལྡོག་ཆེ། །

ལེགས་པར་བཤད་པ་རིན་པོ་ཆེའི་གཏེར་ལས་སྤེལ་མ་བརྟག་པ་སྟེ་རབ་ཏུ་བྱེད་པ་བཞི་པའོ།། །།

༤ སྤེལ་མ་བརྟག་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་བཞི་པ། སྤེལ་མ་བརྟག་པ།


དམན་པ་ལོངས་སྤྱོད་ཆེ་ན་ཡང་།།
རིགས་ལྡན་རྒུད་པས་ཟིལ་གྱིས་གནོན།།
བཀྲེས་པ་སྟག་གི་ངར་སྒྲ་ཡིས།།
སྤྲེའུ་ཤིང་གི་རྩེ་ལས་ལྷུང་། །

བླུན་པོའི་ཡོན་ཏན་ཁར་འབྱིན་ཏེ།།
མཁས་པའི་ཡོན་ཏན་ཁོང་དུ་སྦེད།།
སོག་མ་ཆུ་ཡི་སྟེང་ན་འཕྱོ།།
ནོར་བུ་སྟེང་དུ་བཞག་ཀྱང་འབྱིང་། །

ཡོན་ཏན་ཆུང་རྣམས་ང་རྒྱལ་ཆེ།།
མཁས་པར་གྱུར་ན་དུལ་བར་གནས།།
ཆུ་ཕྲན་རྟག་ཏུ་ཀུ་ཅོ་ཆེ།།
རྒྱ་མཚོ་ཅ་ཅོ་ག་ལ་སྒྲོག །

སྐྱེ་བོ་དམན་རྣམས་དམ་པ་ལ།།
ཁྱད་གསོད་བྱེད་ཀྱིས་དམ་པས་མིན།།
སེང་གེས་ཝ་ཚོགས་ལེགས་སྐྱོང་གི།
ཝ་ཉིད་ཝ་ཡི་རིགས་ལ་འགྲན། །

དམ་པ་ཁྲོས་ཀྱང་བཏུད་ན་ཞི།།
དམན་ལ་བཏུད་ན་ལྷག་པར་རེངས།།
གསེར་དངུལ་སྲ་ཡང་བཞུ་ནུས་ཀྱི།།
ཁྱི་ལུད་བཞུས་ན་དྲི་ངན་འབྱུང་། །

མཁས་ལ་ཡོན་ཏན་ཀུན་ལྡན་ཏེ།།
བླུན་ལ་སྐྱོན་རྣམས་འབའ་ཞིག་ཡིན།།
རིན་པོ་ཆེ་ལས་དགོས་དགུ་འབྱུང་།།
སྦྲུལ་གདུག་ལས་ནི་ཉེས་ཀུན་བསྐྱེད།།

སྡིག་སྤྱོད་ནགས་ན་གནས་ཀྱང་ཉམས།།
དམ་པ་གྲོང་ན་གནས་ཀྱང་དུལ།།
ནགས་ཀྱི་གཅན་གཟན་ཁྲོ་བ་དང་།།
རྟ་མཆོག་གྲོང་གནས་དུལ་བར་མཐོང་། །

སྐྱེས་མཆོག་རང་གི་སྐྱོན་ལ་བལྟ།།
སྐྱེ་བོ་ངན་པ་གཞན་སྐྱོན་འཚོལ།།
རྨ་བྱ་རང་གི་ལུས་ལ་རྟོག།
སྲིན་བྱ་གཞན་ལ་ལྟས་ངན་གཏོང་། །

དམ་པ་དུལ་བས་རང་གཞན་སྐྱོང་།།
ངན་པ་རེངས་པས་རང་གཞན་སྡུག།
འབྲས་ལྡན་ཤིང་གིས་རང་གཞན་སྲུང་།།
ཤིང་སྐམ་རེངས་པས་རང་གཞན་སྲེག །

འབྱོར་པའི་དུས་ན་ཐམས་ཅད་གཉེན།།
གལ་ཏེ་རྒུད་ན་ཀུན་ཀྱང་དགྲ།།
རིན་ཆེན་གླིང་དུ་རིང་ནས་འདུ།།
མཚོ་བསྐམས་པ་ན་སུ་ཡང་སྤོང་། །

བླུན་པོ་འབྱོར་བ་ཐོབ་ན་བདེ།།
སྐྱེས་མཆོག་ཐམས་ཅད་བྱིན་ན་བདེ།།
མཛེ་ཅན་འཕྲུགས་ན་བདེ་བར་འཛིན།།
མཁས་པ་མཛེ་ལ་འཇིགས་པར་ལྟ། །

ཆེ་ལ་གནོད་བྱེད་གྲོགས་སུ་འགྱུར།།
དམན་ལ་གནོད་བྱེད་གནོད་པར་འགྱུར།།
ནགས་མེ་རླུང་གིས་སྦོར་མོད་ཀྱི།།
དེ་ཡིས་སྒྲོན་མེ་ཆུང་ངུ་གསོད། །

འདི་བཤེས་འདི་ནི་དགྲ་བོ་ཞེས།།
བློ་གྲོས་ཆུང་རྣམས་སོ་སོར་འབྱེད།།
བློ་ཆེན་ཀུན་ལ་བྱམས་པ་ལས།།
ཕན་བྱེད་གང་ཡིན་ངེས་པ་མེད། །

ཡོན་ཏན་ལྡན་པ་ཡོན་ཏན་ལ།།
དགའ་ཡི་ཡོན་ཏན་མེད་རྣམས་མིན།།
སྦྲང་རྩི་འཛིན་པ་མེ་ཏོག་ལ།།
དགའ་ཡི་ཤ་སྦྲང་དེ་ལྟ་མིན། །

མཁས་པ་མཁས་པའི་ནང་ན་མཛེས།།
བླུན་པོས་མཁས་པ་ཇི་ལྟར་གོ།
ཙན་དན་གསེར་བས་རིན་ཆེ་བ།།
བླུན་པོས་སོལ་བར་བྱས་ལ་ལྟོས། །

མཁས་པ་རང་གིས་དཔྱོད་ཤེས་ཀྱི།།
བླུན་པོ་གྲགས་པའི་རྗེས་སུ་འབྲང་།།
ཁྱི་རྒན་ཀུ་ཅོ་འདོན་པ་ན།།
རྒྱུ་མཚན་མེད་པར་གཞན་དག་རྒྱུག །

མཁས་པ་ཤིན་ཏུ་རྒུད་ན་ཡང་།།
ལེགས་བཤད་གཏམ་གྱིས་གཞན་དགའ་བྱེད།།
བླུན་པོ་འབྱོར་བར་གྱུར་ཚེ་ཡང་།།
རྩོད་པ་ཁོ་ནས་རང་གཞན་བསྲེག །

ཁ་ཅིག་སྨྲ་བས་གྲུབ་པར་བརྩི།།
ལ་ལ་མི་སྨྲ་དོན་ལ་འབད།།
ཁྱི་ངན་དགྲ་ལ་ཁུས་འདེབས་ཏེ།།
ཆུ་སྐྱར་བྱི་ལ་སྒྲ་མེད་འཇབ། །

དམ་པར་རྒོལ་ཡང་ཕན་པ་སྒྲུབ།།
སྐྱེ་བོ་ངན་པ་མཛའ་ཡང་གནོད།།
ལྷ་རྣམས་ཁྲོས་ཀྱང་སེམས་ཅན་བསྲུང་།།
གཤིན་རྗེ་འཛུམ་ཡང་ཕ་རོལ་གསོད། །

སྐྱེ་བོ་དམ་པ་རིན་ཆེན་བཞིན།།
རྣམ་པ་ཀུན་ཏུ་འགྱུར་ལྡོག་མེད།།
སྐྱེ་བོ་ངན་པ་སྲང་མདའ་བཞིན།།
ཅུང་ཟད་ཙམ་གྱིས་མཐོ་དམན་བྱེད། །

བློ་མཐུན་རིང་ན་གནས་ཀྱང་ཕན།།
མི་མཐུན་ཉེ་ན་ལྷག་པར་འབྲལ།།
འདམ་སྐྱེས་འདམ་གྱིས་མི་གོས་ལ།།
དེ་ཉིད་ཉི་མས་རྟག་ཏུ་སྐྱོང་། །

ཇི་སྲིད་ངོ་ཚ་ཡོད་གྱུར་པ།།
དེ་སྲིད་ཡོན་ཏན་རྒྱན་གྱི་མཆོག།
ངོ་ཚ་བརྒལ་ན་ཡོན་ཏན་ཉིད།།
ཕྱོགས་སུ་བྱས་ཏེ་གཏམ་ངན་འཕེལ། །

དམ་པ་མ་བཅོལ་ལེགས་པར་སྟོན།།
དམན་ལ་དྲིས་ཀྱང་ལོག་པར་ཤོད།།
རྒྱལ་བའི་སྲས་ལ་བརྙས་ཀྱང་བརྩེ།།
འཆི་བདག་མཆོད་ཀྱང་གསོད་པ་ཡིན། །

གཅིག་ལ་ཕན་པར་འགྱུར་པ་ཡི།།
བྱ་བ་གཞན་ལ་གནོད་པ་སྲིད།།
ཟླ་བ་ཤར་ན་ཀུ་མུ་ད།།
ཁ་འབྱེད་འགྱུར་གྱི་པདྨ་ཟུམ། །

ཉེས་པ་ལ་ཀྱས་དོན་གྲུབ་པ།།
བྱུང་ཡང་མཁས་རྣམས་ག་ལ་སྨོན།།
ལེགས་པར་བསྒྲུབས་ཀྱང་སྐྱོན་སྲིད་མོད།།
དེ་ལ་མཁས་རྣམས་ཁྲེལ་བ་མེད། །

རྙེད་པ་ལ་ལ་རྙེད་པ་སྟེ།།
རྙེད་པ་ལ་ལ་དགྲ་བོ་ཡིན།།
རྒོད་མ་མངལ་ལྡན་ནོར་འཕེལ་བྱེད།།
དྲེའུ་མོ་སྦྲུམ་ན་འཆི་བ་རྙེད། །

དམ་པ་དབྱེ་དཀའ་འདུམ་པ་སླ།།
དམན་པ་དབྱེ་སླ་འདུམ་པ་དཀའ།།
ལྗོན་ཤིང་དང་ནི་སོལ་བ་ཡི།།
གཅད་དང་སྦྱོར་བའི་ཁྱད་པར་ལྟོས། །

ཉམ་ཆུང་གྱུར་ཀྱང་ཟོན་བྱེད་ན།།
ཆེན་པོ་ཡིས་ཀྱང་གཞོམ་པར་དཀའ།།
ཆེན་པོ་ཡིན་ཡང་བག་ཕེབས་ན།།
ཉམ་ཆུང་རྣམས་ཀྱིས་བརླག་པ་མང་། །

ནོར་གྱིས་འབྱོར་ན་སྟོབས་ཀྱང་འཕེལ།།
ནོར་མེད་པ་ལ་སྟོབས་ཀྱང་འབྲི།།
བྱི་བས་དབྱིག་ལྡན་ནོར་ཕྲོགས་པས།།
བརྐུ་བའི་ནུས་པ་ཉམས་ཞེས་ཐོས། །

མི་གང་བསོད་ནམས་ལ་སྤྱོད་པ།།
བཏང་ཡང་ལོངས་སྤྱོད་ཆར་བཞིན་འབབ།།
བསོད་ནམས་མེད་པའི་ལོངས་སྤྱོད་དེ།།
བསགས་ཀྱང་སུ་ཡིས་ཟ་བ་སོམས། །

དམ་པ་རེ་ཞིག་རྒུད་གྱུར་ཀྱང་།།
ཟླ་བ་བཞིན་དུ་ཡར་ངོ་འབྱུང་།།
དམན་པ་ལན་ཅིག་རྒུད་གྱུར་ན།།
མར་མེ་བཞིན་དུ་མནལ་བར་འགྱུར། །

ཤེས་ལྡན་དགྲ་ལ་མིག་བསྲིངས་པས།།
ཐ་མར་དགྲ་བོ་དབང་དུ་སྡུད།།
དྲོད་ཆུང་དགྲ་ལ་ལན་བྱས་པས།།
དཀའ་བ་རྒྱུན་མི་འཆད་པ་ཐོབ། །

མཁས་པས་ཤིན་ཏུ་ཉམ་ང་བའི།།
གནས་ལ་འཛུར་ན་དཔའ་རྟགས་ཡིན།།
སེང་གེས་ཁྱུ་མཆོག་གསོད་པའི་ཚེ།།
རྭ་ལ་འཛུར་བ་ག་ལ་སྡར། །

རྣམ་པ་ཀུན་ཏུ་མི་དཔྱོད་པར།།
དགྲ་ལ་མཆོང་བ་བླུན་རྟགས་ཡིན།།
མར་མེའི་འོད་ལ་འཛིངས་པ་ཡིས།།
སྦྲང་བུ་དཔའ་བར་འགྲོ་འམ་ཅི། །

ངན་པ་རང་བརྟེན་ཁྱད་པར་འཇོམས།།
དམ་པ་གང་ལ་བརྟེན་པ་སྲུང་།།
སྲིན་བུ་རང་བརྟེན་ཟད་ཟད་ཟ།།
སེང་གེ་རང་གི་ཡུལ་འཁོར་སྲུང་། །

དམན་རྣམས་དགོས་པ་ཆུང་ངུ་གསང་།།
གསང་དགོས་དགོས་པ་མེད་པར་སྨྲ།།
དམ་པ་དགོས་མེད་གསང་མི་འགྱུར།།
གསང་དགོས་སྲོག་ལ་བབས་ཀྱང་བསྲུང་། །

དམན་པ་འབྱོར་ན་དྲེགས་པའི་རྒྱུ།།
དམ་པ་འབྱོར་ན་དུལ་བའི་རྒྱུ།།
ཝ་སྐྱེས་འགྲངས་ན་དྲེགས་པས་བརྒྱལ།།
སེང་གེ་འགྲངས་ན་བདེ་བར་ཉལ། །

དམ་པ་དང་ནི་དམན་པ་ཡི།།
སྤྱོད་པ་གཉིས་ཀ་གོམས་པའི་ཤུགས།།
བུང་བ་མེ་ཏོག་འཚོལ་བ་དང་།།
ངང་པ་ཆུར་འཇུག་བསླབ་ཅི་དགོས། །

རྒྱལ་ངན་དགྲ་དང་ཕྲད་པ་ན།།
རང་གི་འཁོར་ལ་ཆད་པས་གཅོད།།
དོན་མ་གྲུབ་པའི་བླུན་པོ་འགའ།།
རང་ཉིད་འགགས་ཏེ་འཆི་བ་ཡོད། །

ཆོས་རྒྱལ་དགྲ་དང་ཕྲད་པ་ན།།
ལྷག་པར་འཁོར་ལ་བྱམས་པ་སྐྱེས།།
ན་བའི་བུ་ལ་ཁྱད་པར་དུ།།
མ་ནི་གདུང་བ་སྐྱེ་བར་འགྱུར། །

སྐྱེ་བོ་དམ་པ་ངན་པ་དང་།།
འགྲོགས་ན་ངན་པའི་ཤན་དུ་འགྱུར།།
གངྒཱའི་ཆུ་ནི་རབ་ཞིམ་པ།།
རྒྱ་མཚོར་སླེབས་ན་བ་ཚྭར་འགྱུར། །

དམན་པས་སྐྱེ་བོ་མཆོག་བསྟེན་ན།།
སྐྱེ་བོ་དམ་པའི་སྤྱོད་པ་འབྱུང་།།
གླ་རྩི་བྱུགས་པའི་གང་ཟག་ལ།།
གླ་རྩིའི་དྲི་ཞིམ་འབྱུང་ལ་ལྟོས། །

ལྷུན་པོ་ཅིས་ཀྱང་མི་འགུལ་བ།།
དེ་བཞིན་བདག་ཉིད་ཆེན་པོ་བརྟན།།
ཤིང་བལ་ཆུང་ངུ་གཡོ་བ་ལྟར།།
དམན་པའི་སྤྱོད་པ་འགྱུར་ལྡོག་ཆེ། །

ལེགས་པར་བཤད་པ་རིན་པོ་ཆེའི་གཏེར་ལས་སྤེལ་མ་བརྟག་པ་སྟེ་རབ་ཏུ་བྱེད་པ་བཞི་པའོ།། །།

༥ ངན་སྤྱོད་བརྟག་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་ལྔ་པ། ངན་སྤྱོད་བརྟག་པ།


གཡོན་ཅན་སྙན་པར་སྨྲ་བ་ནི།།
རང་དོན་ཡིན་གྱི་གུས་ཕྱིར་མིན།།
སྲིན་བྱ་སྙན་ནས་དགོད་པ་ནི།།
ལྟས་ངན་གཏོད་ཀྱི་དགའ་ནས་མིན། །

ངན་པས་ཐོག་མར་ཚིག་གིས་འབྲིད།།
བག་ཕེབས་གྱུར་ན་ཕྱི་ནས་བསླུ།།
ཉ་པས་ཟས་ཀྱིས་ཁ་བྲིད་ནས།།
ཉ་རྣམས་གསོད་པར་བྱེད་ལ་ལྟོས། །

དམན་པ་ཇི་སྲིད་ཉམ་ཆུང་བ།།
དེ་ཡི་བར་ལ་རང་བཞིན་བཟང་།།
དུག་གི་ཚེར་མ་མ་སྨིན་པའི།།
བར་དུ་གཞན་ལ་འབིགས་མི་ནུས། །

ཡིད་ལ་བསམ་པ་གཞན་བྱས་ནས།།
ཚིག་ཏུ་སྨྲ་བ་གཞན་བྱེད་པ།།
གཡོན་ཅན་ཞེས་སུ་གྲགས་པ་སྟེ།།
བླུན་པོ་མཁས་པར་འཆོས་པ་ཡིན། །





ཧ་ཅང་གཡོ་སྒྱུ་མང་དྲགས་ན།།
རེ་ཞིག་གྲུབ་ཀྱང་ཐ་མར་བརླག
གཟིག་ལྤགས་བཀབ་པའི་བོང་བུ་ཡིས།།
ལོ་ཏོག་ཟོས་མཐར་གཞན་གྱིས་བསད། །

ཤེས་རབ་ལྡན་ན་མངོན་སུམ་གྱི།།
རྫུན་གྱིས་ཕ་རོལ་བསླུ་བར་ནུས།།
རྐུན་པོ་རྣམས་ཀྱིས་ཁྱིར་བཏགས་པས།།
ར་སྐྱེས་ཁུར་བ་བྲམ་ཟེས་བོར། །

ཉེས་པ་མངོན་སུམ་བྱེད་བཞིན་དུ།།
གཡོན་ཅན་ཚིག་གིས་ཕ་རོལ་བསླུ།།
ལྷ་ཆེན་སྨྲེ་སྔགས་ཤོར་བ་ལ།།
སྡུག་བསྔལ་བདེན་པ་བསྒྲགས་སོ་ལོ། །

གཡོ་ཅན་ཚུལ་གཟོབ་ངག་འཇམ་ལ།།
མ་བརྟགས་བར་དུ་ཡིད་མི་བརྟན།།
རྨ་བྱ་གཟུགས་མཛེས་སྒྲ་སྙན་ཡང་།།
དེ་ཡི་ཁ་ཟས་དུག་ཆེན་ཡིན། །





གཡོ་ཅན་བཟང་པོའི་ཚུལ་བཟུང་ནས།།
ཕྱི་ནས་དོན་ལ་བསླུ་བ་ཡོད།།
རི་དྭགས་རྔ་མ་བསྟན་ནས་ནི།།
ཁྲེལ་འདས་བོང་བུའི་ཤ་དག་འཚོང་། །





ངོ་ཚ་ཆུང་རྣམས་གཞན་ནོར་ལ།།
བདག་གི་ཆེ་བ་སྒྲུབ་པ་ཡོད།།
མགྲོན་ལ་གྲོགས་ཀྱི་གོས་བཏིངས་ནས།།
བདག་གི་གུས་རྟགས་སྟོན་པར་བྱས། །





གཏིང་ནས་ཉམས་པའི་ཁྲེལ་འདས་རྣམས།།
རང་གི་གཏམ་ངན་ངོ་སོར་འཁྱེར།།
ཀཉྩའི་ཡུལ་གྱི་རྒྱལ་རིགས་འགའ།།
ཕ་བསད་པ་ལ་རྒྱལ་རྔ་རྡུང་། །





བློ་ཆུང་རྣམས་ཀྱིས་ཕན་བཏགས་པ།།
འགའ་ཞིག་གནོད་པ་ཆེན་པོར་འགྱུར།།
སྐྱ་ཀའི་ཕྲུ་གུས་མ་ཡི་སྤུ།།
འཐོག་པར་དྲིན་ལན་ཡིན་པར་སྒོམ། །





གཞུང་ངན་གཞན་གྱི་བཀའ་དྲིན་ལས།།
བྱུང་བ་རང་གི་ཆེ་བར་སྒོམ།།
ཀླུ་ཡིས་འབད་ནས་ཕབ་པའི་ཆར།།
ཞིང་པས་རང་གི་དཔལ་དུ་རྩི། །

བློ་ངན་ལས་ལ་སྤྱོད་པ་ལ།།
རང་གི་འབད་པས་ཐོབ་པར་སེམས།།
ཁྱི་རྒན་ཡ་རྐན་ཕུག་པའི་ཁྲག
རུས་པའི་བཅུད་དུ་བསྒོམས་ནས་འཆའ། །

མི་མཁས་པ་དག་གཉེན་བཅོམ་ནས།།
འབྲེལ་མེད་གཞན་དག་གསོ་བར་མཐོང་།།
མགོ་བོ་བཅད་ནས་མཇུག་མའི་རྒྱན།།
སྨྱོན་པ་མིན་པ་སུ་ཞིག་བྱེད། །





བླུན་པོས་དགོས་པའི་སར་མི་བྱིན།།
མི་དགོས་པ་ལ་ལྷུག་པར་འཆོར།།
ཆུ་མིག་ངན་པ་དབྱར་འབབ་ཀྱི།།
དཔྱིད་དུས་དགོས་པའི་ཚེ་ན་བསྐམས། །





སྐྱེ་བོ་དམ་པ་ཞི་བ་ལ།།
ངན་པ་ལྷག་པར་འཚེ་བར་བྱེད།།
སྣུམ་དང་ལྡན་པའི་སྡོང་པོ་ལ།།
མེ་ལྕེ་ཆགས་ཀྱི་གཞན་ལ་མིན། །





རྩུབ་པས་རྩུབ་པ་འཐུལ་འགྱུར་གྱི།།
ཞི་བས་འདུལ་བ་ག་ལ་ནུས།།
ཕོལ་མིག་བསྲེགས་དང་བཅད་པས་གདོན།།
ཞི་འཆོས་དེ་ཡི་དུག་ཏུ་འགྱུར། །





རྒྱལ་པོས་ཆོས་བཞིན་ས་སྐྱོང་སྟེ།།
མིན་ན་རྒྱལ་པོ་ཉམས་པའི་རྟགས།།
ཉི་མས་མུན་པ་མི་སེལ་ན།།
དེ་ནི་གཟའ་ཡིས་ཟིན་པའི་རྟགས། །





སྡིག་སྤྱོད་རྗེ་བོར་བསྐོས་པ་དང་།།
ཁང་པའི་ཡང་ཐོག་གྲུམས་པ་དང་།།
རི་རྩེ་ཤིན་ཏུ་ཞིག་པ་ཡི།།
འོག་ན་གནས་རྣམས་རྒྱུན་དུ་སྐྲག །

གལ་ཏེ་རིག་པ་ཡོད་ན་ཡང་།།
སྐྱེ་བོ་རང་བཞིན་ངན་པ་སྤང་།།
དུག་སྦྲུལ་ནོར་བུས་མགོ་བརྒྱན་ཡང་།།
མཁས་པ་སུ་ཞིག་པང་དུ་ལེན། །





སྙན་གྲགས་རྒྱལ་པོའི་བཞེད་བཞིན་དཀའ།།
བསྐྱེད་ན་ཐུགས་ཀྱིས་འཛིན་པ་དཀོན།།
བར་མར་གནས་པ་གཡང་ཟ་བས།།
རྒྱལ་པོ་ལ་ལ་མེ་ཆེན་འདྲ། །





ཆུང་མ་ངན་དང་མཛའ་བོ་ངན།།
རྒྱལ་པོ་ངན་པ་སུ་ཞིག་བསྟེན།།
གཅན་གཟན་གདུག་པའི་ནགས་ཁྲོད་དུ།།
སེམས་ཤེས་རྟག་ཏུ་སྡོད་དམ་ཅི། །





དྲེགས་པས་ཡོན་ཏན་ཉམས་འགྱུར་ཞིང་།།
འདོད་པས་ངོ་ཚ་ཉམས་པར་བྱེད།།
གཡོག་འཁོར་རྟག་ཏུ་སུན་བྱུང་ན།།
རྗེ་དཔོན་ཉམས་པར་འགྱུར་བ་ཡིན། །





ཕན་པར་སྨྲ་བ་དཀོན་པ་སྟེ།།
དེ་དག་བས་ཀྱང་ཉན་པ་དཀོན།།
སྨན་པ་མཁས་པ་རྙེད་དཀའ་སྟེ།།
དེ་ཡི་ཚིག་བཞིན་བྱེད་པ་ཉུང་། །

ཧ་ཅང་རློམས་པ་ཆེ་དྲགས་ན།།
སྡུག་བསྔལ་བརྒྱུད་མར་ཐོག་ཏུ་འབབ།།
སེངྒེ་ང་རྒྱལ་ཆེས་པའི་རྒྱུས།།
ཝ་ཡིས་ཁུར་པོ་བསྐུར་ཞེས་ཐོས། །





བྱ་རོག་དག་གིས་བསྐུངས་པ་དང་།།
གཞུང་ངན་པ་ལ་ཕན་བཏགས་དང་།།
ཞིང་ངན་ས་བོན་བཏབས་པ་རྣམས།།
རེ་བ་མང་སྟེ་སྤྱོད་པ་ཉུང་། །





མ་བརྟགས་པར་ནི་སུ་ལ་ཡང་།།
ཡིད་ཆེས་པ་དང་བསྒོ་མི་བྱ།།
བག་ཕེབས་པ་ལས་སྐྱོན་བྱུང་དང་།།
གྲོས་བཏབ་པ་ལས་དགྲར་གྱུར་མང་། །





འཇིག་རྟེན་ངན་པ་མང་མོད་ཀྱང་།།
སྐྱེ་བོ་ངན་འདྲའི་འཇིགས་པ་མེད།།
ངན་པ་གཞན་དག་བཅོས་རུང་གི།
སྐྱེ་བོ་ངན་པ་བཅོས་ན་འཇིག །





སྐྱེ་བོ་ངན་པ་ཡོན་ཏན་བརྒྱས།།
ཕན་པར་བྱས་ཀྱང་མགུ་མི་ནུས།།
གང་ཞིག་བརྟེན་པ་དགྲར་འགྱུར་འདི།།
སྐྱེ་བོ་ངན་པའི་ཁྱད་ཆོས་ཡིན། །





ངན་པ་ཇི་ལྟར་བཅོས་གྱུར་ཀྱང་།།
རང་བཞིན་བཟང་པོ་འབྱུང་མི་སྲིད།།
སོལ་བ་འབད་དེ་བཀྲུས་ན་ཡང་།།
ཁ་དོག་དཀར་བ་མི་སྲིད་དོ། །





སྐྱེ་བོ་ངན་པས་སུན་ཕྱུང་བའི།།
ས་དེར་དམ་པ་མཐོང་ཡང་སྤོང་།།
སྦྲུལ་གྱིས་གཙེས་པའི་ས་ཕྱོགས་སུ།།
གསེར་གྱི་ཉག་ཐག་མཐོང་ཡང་འབྲོས། །





མཆོད་པ་དམ་པ་ལ་བྱ་ཡི།།
དམན་པ་མཆོད་ན་ཉེས་པའི་གཞི།།
འོ་མ་སྐྱེས་བུའི་བདུད་རྩི་སྟེ།།
སྦྲུལ་ལ་བྱིན་ན་དུག་འཕེལ་ལོ། །





འབད་དེ་ཀུན་ནས་བསྟན་བྱས་ཀྱང་།།
ངན་པ་བློ་དང་ག་ལ་འདྲེས།།
མཆིལ་པ་ཇི་ལྟར་གསོས་གྱུར་ཀྱང་།།
བག་ཕེབས་འགྱུར་བ་མི་སྲིད་དོ། །

རྟག་ཏུ་འབྱེད་ལ་བརྩོན་པའི་མིས།།
མཛའ་བོ་བརྟན་པའང་ཕྱེད་འགྱུར་ཏེ།།
ཆུ་ཡིས་རྟག་ཏུ་བཅོས་གྱུར་ན།།
བྲག་ལ་སེར་ག་མི་འབྱུང་ངམ། །





བདག་གིས་བསླུས་དང་ངན་བྱས་དང་།།
མཁན་སློབ་གྲོགས་ཀྱི་སྐྱོན་བརྗོད་པ།།
རྫུན་ན་རྫུན་པས་ཡིད་བརྟན་མེད།།
བདེན་ན་ལྷག་པར་འཇིགས་པ་སྐྱེ། །





མི་གང་བརྗོད་བྱ་མ་ཡིན་པ།།
གཞན་གྱི་དྲུང་དུ་སུས་བརྗོད་པ།།
བདེན་ནམ་འོན་ཏེ་རྫུན་ཀྱང་རུང་།།
མཁས་པས་དེ་ལ་བག་ཟོན་བྱ། །





གཞུང་ངན་ནོར་ལ་གཅེས་འཛིན་པ།།
མཛའ་བཤེས་ཡིན་ཡང་ཡིད་མི་བརྟན།།
ཆེན་པོ་རྣམས་ལ་གསུག་ཟོས་ནས།།
གཉེན་གྱིས་བརླགས་པར་བྱས་པ་མང་། །





གནོད་པའི་མཚན་མ་ཁར་འབྱིན་པའི།།
དགྲ་བོ་དེ་དག་གཞོམ་པར་སླ།།
ཕན་པའི་བཟློག་རྟགས་ཁར་འབྱིན་པའི།།
དགྲ་བོ་དེ་དག་ཇི་ལྟར་གཞོམ། །





རྨ་གཞན་མཁས་ན་འཚོ་སྲིད་ཀྱི།།
ཉེས་པའི་ཚིག་སྨྲ་འགྲུབ་པ་མེད།།
ཁྭ་ཏས་འུག་པ་དམའ་ཕབ་པས།།
བསྐལ་པའི་བར་དུ་འགྲས་ལ་ལྟོས། །





སྙིང་ལ་ཁོན་དུ་དམ་བཟུང་ནས།།
ཁ་ལ་ཚིག་བཟང་སྨྲ་བ་ཞེས།།
དྲང་སྲོང་གདུག་པའི་གདམས་ངག་སྟེ།།
དམ་པའི་ཚུལ་དང་འགལ་བ་ཡིན། །

དུག་གི་རྩ་བ་འདོན་པ་ལྟར།།
དགྲ་བོ་རྩད་ནས་གཅོད་དོ་ཞེས།།
རྒྱལ་པོའི་ལུགས་ལས་འབྱུང་མོད་ཀྱི།།
བུ་བཞིན་བསྐྱངས་ན་བུ་བཞིན་བྱེད། །

རང་དོན་འབའ་ཞིག་བསྒྲུབ་པ་ཡི།།
མི་དང་འགྲོགས་པར་སུ་ཡིས་ནུས།།
སོ་ནམ་བརྩོན་པའི་ཞིང་གསེབ་ཏུ།།
ལྡུམ་གཞན་སྨིན་པའི་གོ་སྐབས་དཀའ། །





མི་གང་བྱས་པ་མི་གཟོ་བ།།
དེ་ལ་གྲོགས་བྱེད་ག་ལ་སྲིད།།
འབད་ཀྱང་འབྲས་བུ་མི་སྨིན་པའི།།
ཞིང་ལ་སོ་ནམ་སུ་ཡིས་ནུས། །

གཟུ་ལུམ་དག་གིས་སྤྱོད་པ་ཡིས།།
སྐྱེ་བོ་མྱུར་དུ་རྒུད་པར་འགྱུར།།
སྤྱི་བརྟོལ་ཅན་གྱི་གླང་རྒོད་ཀྱིས།།
གཅད་བྱ་མྱུར་དུ་མི་གཅོད་དམ། །





དམན་ལ་ཇི་ལྟར་ཕར་བྱིན་ཡང་།།
ཚུར་ལ་དགོས་ན་ག་ལ་སྟེར།།
སྐམ་པས་རྟག་ཏུ་བཟུང་ན་ཡང་།།
ལྕགས་གོང་ཚུར་ལ་འཛིན་ནམ་ཅི། །





ངན་པས་གཞན་དོན་སྒྲུབ་བོ་ཞེས།།
སྙད་བཏགས་ནས་ནི་སྡིག་ལ་སྦྱོར།།
གཞན་དོན་ལྟར་སྣང་སྒྲུབ་དོན་དུ།།
མཁས་པ་སུ་ཞིག་རང་ཉིད་འཇོམས། །





བུ་ལོན་ལྷག་མ་དགྲ་བོའི་ཐེད།།
ཁྲིམས་ངན་རྣམས་དང་གཏམ་ངན་དང་།།
རིགས་རྒྱུད་ངན་དང་སྤྱོད་ངན་རྣམས།།
མ་སྤེལ་བར་ཡང་རང་ཉིད་འཕེལ།།





ལེགས་པར་བཤད་པ་རིན་པོ་ཆེའི་གཏེར་ལས་ངན་སྤྱོད་བརྟག་པ་སྟེ་རབ་ཏུ་བྱེད་པ་ལྔ་པའོ།། །།

༦ རང་བཞིན་གྱི་ཚུལ་བརྟག་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་དྲུག་པ། རང་བཞིན་གྱི་ཚུལ་བརྟག་པ།


བདག་ཉིད་དཔོན་དུ་བསྐོས་གྱུར་ན།།
དེ་ཡི་བྱ་བ་ཤེས་པ་དཀོན།།
གཞན་ལ་ལྟ་བའི་མིག་ཡོད་ཀྱང་།།
རང་ཉིད་ལྟ་ན་མེ་ལོང་དགོས། །

ཤེས་རབ་ཕྱོགས་གཅིག་ལྡན་པས་ཀྱང་།།
བྱ་བ་ཀུན་ལ་མཁས་པ་དཀའ།།
ཤིན་ཏུ་གསལ་བའི་མིག་གིས་ཀྱང་།།
སྒྲ་ལ་ཉན་པར་ནུས་མ་ཡིན། །

དྲང་པོར་སྨྲ་བ་སྐྱོན་བཅས་དང་།།
འཁྱོག་སྨྲ་ཡོན་ཏན་ལྡན་པ་སྲིད།།
ལམ་དྲང་འགའ་ཞིག་ནོར་འཇིགས་ལ།།
དུང་དཀར་གཡས་འཁྱིལ་བཀྲ་ཤིས་བྱེད། །

བསོད་ནམས་མེད་ན་ཡོན་ཏན་འགའ།།
ཡོན་ཏན་ཉིད་ཀྱིས་རང་ཉིད་འཇོམས།།
མུ་ཏིག་འཛིན་པའི་ཉ་ཕྱིས་རྣམས།།
མུ་ཏིག་ཉིད་ཀྱིས་སྲོག་དང་འབྲལ། །

ཡོན་ཏན་ལྡན་ཡང་བསྟེན་དྲགས་ན།།
ཕལ་ཆེར་སྐྱོ་བ་སྐྱེ་བ་སྲིད།།
བུར་ཤིང་ཤིན་ཏུ་ཞིམ་པ་ཡང་།།
རྒྱུན་དུ་བསྟེན་ན་ཕལ་ཆེར་འདོར། །

རང་བཞིན་བཟང་པོ་རྣམས་ལའང་།།
རྒྱུན་དུ་གཙེས་ན་གནོད་སེམས་སྐྱེ།།
ཙན་དན་བསིལ་བ་ཡིན་མོད་ཀྱི།།
གཙུབས་པར་གྱུར་ན་འབར་བར་འགྱུར། །

རྒྱལ་པོ་ཤིན་ཏུ་མང་མོད་ཀྱི།།
ཆོས་བཞིན་སྐྱོང་བ་ཤིན་ཏུ་ཉུང་།།
མཁའ་ལ་ལྷག་གནས་མང་ན་ཡང་།།
འོད་གསལ་ཉི་ཟླ་ལྟ་བུ་མེད། །

གང་ཞིག་གནོད་པ་བྱེད་ནུས་པ།།
དེ་ཡི་ཕན་པ་བྱེད་པར་ནུས།།
མགོ་བོ་གཅོད་པར་ནུས་པ་ཡི།།
རྒྱལ་པོས་རྒྱལ་སྲིད་སྦྱིན་པར་ནུས། །

བློན་པོ་བློ་ལྡན་དྲང་པོ་ཡིས།།
རྗེ་དང་འབངས་ཀྱི་དོན་ཀུན་འགྲུབ།།
མདའ་དྲང་མཁས་པས་འཕངས་གྱུར་ན།།
གང་ལ་གཏད་པར་འཕོག་པ་ཡིན། །

རྒྱལ་པོ་ཉིད་ཀྱིས་མ་བརྩིས་ན།།
ཐམས་ཅད་མཁྱེན་པའང་བཀུར་མི་འགྱུར།།
སྲོག་གི་དབང་པོས་མ་བཟུང་བའི།།
མི་རོ་བཟང་ཡང་སུ་ཞིག་ལེན། །

མང་པོ་གཅིག་ཏུ་བློ་མཐུན་ན།།
ཉམ་ཆུང་གིས་ཀྱང་དོན་ཆེན་འགྲུབ།།
སྲོག་ཆགས་གྲོག་མའི་ཚོགས་འདུས་པས།།
སེང་གེའི་ཕྲུ་གུ་བསད་ཅེས་གྲགས། །

ཞུམ་བཅས་སྩོལ་བ་དོར་བའི་མི།།
མཐུ་སྟོབས་ལྡན་ཡང་རྒུད་པར་འགྱུར།།
གླང་པོ་ཤིན་ཏུ་སྟོབས་ལྡན་ཡང་།།
གླང་རྫི་ཆུང་ངུས་བྲན་བཞིན་འཁོལ། །

ང་རྒྱལ་རྩོལ་བ་ཆེར་བསྐྱེད་ན།།
ཆེན་པོ་རྣམས་ཀྱང་ཟིལ་གྱིས་གནོན།།
དུང་དཀར་ཤིན་ཏུ་ལུས་ཆུང་ཡང་།།
ཆུ་སྲིན་ཆེན་པོའི་གཤེད་མ་ཡིན། །

ཆེན་པོས་ང་རྒྱལ་བྱ་མི་དགོས།།
ངན་པས་ང་རྒྱལ་བྱས་ཅི་ཕན།།
རིན་ཆེན་ཚིག་གིས་སྒྲག་མི་དགོས།།
མཆིང་བུ་བསྒྲགས་ཀྱང་སུ་ཞིག་ཉོ། །

བདག་ཉིད་ཆེན་པོའི་འབྱོར་པ་རྟག
སྐྱེས་ངན་ཕུན་ཚོགས་རྒུད་ལ་ཉེ།།
ཉི་མ་རྒྱུན་དུ་འོད་འབྱིན་ཏེ།།
ཟླ་བ་ཉ་བར་གྱུར་ནས་འབྲི། །

རྒྱལ་ངན་གོ་འཕང་བསྟོད་དྲགས་ན།།
དེ་ཡི་ཐ་མ་བརླག་པའི་རྒྱུ།།
སྒོ་ང་མཁའ་ལ་འཕངས་གྱུར་ན།།
ཆག་པ་ཉིད་ལས་གཞན་ཅི་འབྱུང་། །

སྐྱེ་བོ་ཕལ་ཆེར་རང་ཉིད་དང་།།
མཐུན་པའི་རིགས་ཀྱིས་གནོད་པ་བསྐྱེལ།།
ཉི་མའི་འོད་ཟེར་ཤར་བ་ན།།
འོད་ཟེར་གཞན་རྣམས་བརླག་པར་འགྱུར། །

ཕན་བྱེད་དགྲ་བོ་ཡིན་ཡང་བསྟེན།།
གཉེན་ཡང་གནོད་ན་སྤང་བར་བྱ།།
རྒྱ་མཚོའི་ནོར་བུ་རིན་གྱིས་ཉོ།།
ཁོང་པའི་ཟུག་རྔུ་སྨན་གྱིས་འབྱིན། །

ནང་དུ་ཅུང་ཟད་འབྱོར་གྱུར་ན།།
ཕྱི་རུ་དྲེགས་པའི་རྣམ་འགྱུར་སྟོན།།
ཆུ་ཡིས་ཡོངས་སུ་གང་བའི་ཚེ།།
སྤྲིན་རྣམས་གཡོ་ཞིང་འབྲུག་སྒྲ་སྒྲོག །

ཡོན་ཏན་ཀུན་ལྡན་དཀོན་པ་ལྟར།།
ཡོན་ཏན་ཅི་ཡང་མེད་པའང་དཀོན།།
སྐྱོན་དང་ཡོན་ཏན་འདྲེས་པ་ལས།།
ཡོན་ཏན་གཙོ་ཆེ་མཁས་པས་བསྟེན། །

དང་པོ་ཉིད་ནས་དགྲ་བོ་དང་།།
མཛའ་བོ་ཉིད་དུ་ངེས་པ་མེད།།
ཁ་ཟས་མ་ཞུ་དུག་ཏུ་འགྱུར།།
དུག་ཀྱང་ཤེས་ན་སྨན་དུ་འགྱུར། །

གང་ན་ལས་མཐུན་ཡོད་དེ་འབྱོར།།
ལས་ཀྱི་འདུ་འཕྲོ་མེད་དེ་རྒུད།།
ཁྱིམ་དུ་བཟུང་ཡང་མི་ཆགས་པའི།།
ངང་པ་མཚོ་ལས་བསྐྲད་ཀྱང་འཁོར། །

མཁས་རྣམས་རིག་པ་ཡོན་གྱིས་སློབ།།
བླུན་པོ་རིག་པ་བསླབས་ཀྱང་སྤོང་།།
ཕལ་ཆེར་ན་བར་སྨན་ཟ་ཡང་།།
ལ་ལ་གསོན་པོར་ལྕེབས་པ་ཡོད། །

རང་དབང་ཐམས་ཅད་བདེ་བ་སྟེ།།
གཞན་དབང་ཐམས་ཅད་སྡུག་བསྔལ་ཡིན།།
ཐུན་མོང་བ་ནི་རྩོད་གཞི་སྟེ།།
དམ་བཅས་པ་ནི་འཆིང་བའི་རྒྱུ། །

ནང་ན་ཡོན་ཏན་ཀུན་ལྡན་ཡང་།།
ཆ་ལུགས་ངན་ན་ཀུན་གྱིས་བརྙས།།
པགས་བྱིའུ་མཁས་ཀྱང་སྤུ་མེད་པས།།
འདབ་ཆགས་ཀུན་གྱིས་སྤངས་ཞེས་གྲགས། །

གནས་མིན་ཧ་ཅང་དྲང་པོ་ཡང་།།
རང་གཞན་གཉིས་ཀ་བརླག་པ་ཡོད།།
མདའ་ཡིས་ཕ་རོལ་གསོད་པའམ།།
ཡང་ན་རང་ཉིད་འཆག་པར་འགྱུར། །

ཆར་དང་ཆུ་བོ་རྒྱ་མཚོར་འབབ།།
བློ་དང་རིག་པ་མཁས་ལ་འགོ།
ནོར་དང་སྐྱེ་བོ་རྒྱལ་པོས་སྡུད།།
དྲོ་ཞིང་བརླན་པར་ནགས་ཚལ་སྐྱེ། །

དབྱར་གྱི་ཆུ་མིག་རྩྭ་ཡི་མེ།།
སྤྲིན་པར་ཉི་མ་ཟླ་བ་ཉ།།
བློ་ངན་རིག་པ་ངན་དང་མཛའ།།
དགོས་ཚེ་འབྱུང་བའི་ངེས་པ་མེད། །

བླུན་པོ་སྨྲ་བ་ཉུང་ན་མཛེས།།
རྒྱལ་པོ་ལྐོག་ཏུ་འདུག་ན་མཛེས།།
སྒྱུ་མ་བརྒྱ་ལམ་མཐོང་ན་མཛེས།།
ནོར་ཆེན་དཀོན་ན་རིན་ཐང་ཆེ། །

ཧ་ཅང་བྱམས་པ་ཆེ་དྲགས་ན།།
དེ་ཉིད་འཁོན་པའི་རྒྱུ་རུ་འགྱུར།།
འཇིག་རྟེན་རྩོད་པ་ཕལ་ཆེ་བ།།
འབྲེལ་བ་ཉིད་ལས་བྱུང་བ་མང་། །

ཤིན་ཏུ་རྩོད་པ་ཆེན་པོ་ཡང་།།
ལྷག་པར་མཛའ་བའི་རྒྱུ་སྲིད་དེ།།
རྩོད་པ་བྱུང་བའི་མཐའ་ཕལ་ཆེར།།
འདུམ་པར་གྱུར་པ་མང་བར་མཐོང་། །

སེར་སྣ་ཅན་གྱི་ནོར་རྣམས་དང་།།
ཕྲག་དོག་ཅན་གྱི་གྲོགས་པོ་དང་།།
བློ་ངན་གྱི་ནི་རིག་པ་རྣམས།།
ཡོད་ཀྱང་དགའ་བ་སྐྱེད་མི་ནུས། །

བརྐམ་ཆགས་ཅན་ནི་ནོར་གྱིས་དགའ།།
ང་རྒྱལ་ཅན་ནི་བསྟོད་པས་མགུ།།
བླུན་པོ་རང་དང་མཐུན་པས་དགའ།།
དམ་པ་བདེན་པ་སྨྲས་བས་མགུ། །

སྐྱེ་བོ་ངན་པའི་ཡོན་ཏན་དང་།།
སྨྲ་སྤོབས་ཞན་པའི་རིག་པ་དང་།།
རྗེ་དཔོན་ངན་པའི་བཀའ་དྲིན་རྣམས།།
གཞན་ལ་ཕན་པའི་གོ་སྐབས་དཀའ། །

གང་ལ་ནོར་ཡོད་སྨྲ་བ་མཛེས།།
ནོར་མེད་སྨྲ་བ་བདེན་ཡང་སྤོངས།།
མ་ལ་ཡ་ལས་བྱུང་གྱུར་ན།།
སྡོང་དུམ་ཕལ་ལའང་རིན་ཐང་ཆེ། །

སྨྲ་མང་ཉེས་པ་འཛིན་པའི་རྒྱུ།།
མི་སྨྲ་ཉེས་པ་སྤོང་བའི་གཞི།།
ནེ་ཙོ་སྨྲ་བས་གཟེབ་ཏུ་ཚུད།།
འདབ་ཆགས་ལྐུགས་པ་བདེ་བར་རྒྱུ། །

མི་གང་དགྲ་ལ་གཡོ་མེད་པས།།
རྣམ་པ་ཀུན་ཏུ་ཕན་བཏགས་ན།།
དགྲ་ཡང་དེ་ལ་གཡོ་མེད་པས།།
འདུད་པ་དངོས་པོའི་ཆེ་བ་ཡིན། །

སྟོབས་བྲལ་མི་ཡིས་ཁྲོས་ཅི་ཕན།།
སྟོབས་ལྡན་དོན་ལ་ཁྲོ་ཅི་དགོས།།
དེས་ན་བྱ་བ་སྒྲུབ་པ་ལ།།
ཁྲོ་བ་དོན་མེད་རང་སྲེག་ཡིན། །

སྦྱིན་པས་བསྡུས་ན་དགྲ་ཡང་འདུ།།
སྦྱིན་མེད་གཉེན་ཡང་རིང་དུ་སྤོང་།།
བ་ཡི་འོ་མ་ཟད་པ་ན།།
བེའུ་བཟུང་ཡང་འཆོར་བར་འགྱུར། །

བྱ་བ་འགའ་ལ་མཁས་པ་ཡིས།།
གཞན་དག་ཤེས་པའི་ངེས་པ་མེད།།
ཆུ་ལས་འོ་མ་འབྱེད་ཤེས་པའི།།
ངང་པས་གཟུགས་བརྙན་ཟས་སུ་སྒོམ། །

རྟག་ཏུ་བྱམས་པས་སྐྱོང་བ་ཡི།།
རྗེ་བོས་བྲན་གཡོག་རྙེད་པར་སླ།།
པདྨའི་མཚོ་ལ་ངང་པ་དག
མ་བསྡུས་པར་ཡང་རང་ཉིད་འདུ། །

ལོངས་སྤྱོད་ལྡན་པས་སྤྱོད་པ་དང་།།
མཁས་པར་གྱུར་ནས་དུལ་བ་དང་།།
ཆེན་པོས་དམན་པ་ལེགས་སྐྱོང་བ།།
གསུམ་པོ་གཞན་བདེ་རང་ལ་ཕན། །

བསོད་ནམས་ཤུགས་ཀྱིས་དོན་བསྒྲུབ་པ།།
ཉི་མའི་འོད་བཞིན་ལྟོས་པ་མེད།།
འབད་པའི་ཤུགས་ཀྱིས་དོན་བསྒྲུབ་པ།།
མར་མེའི་འོད་བཞིན་ཀུན་ལ་ལྟོས། །

ཆེན་པོ་རྣམས་ལ་རྟེན་བཅས་ན།།
དམན་པ་རྣམས་ཀྱང་ཆེན་པོ་ཐོབ།།
ལྗོན་ཤིང་ཆེ་ལ་བརྟེན་པ་ཡིས།།
འཁྲི་ཤིང་རྩེ་མོར་ཕྱིན་ལ་ལྟོས། །

ཡོན་ཏན་ལྡན་ལ་སྐྱོན་ཡོད་ཀྱང་།།
ཡོན་ཏན་དགའ་རྣམས་ཉེ་བར་བསྟེན།།
ཆར་གྱིས་མཁར་ལ་གནོད་ན་ཡང་།།
འཇིག་རྟེན་པ་རྣམས་དགའ་བ་སྐྱེད། །

ཡོན་ཏན་མེད་ན་ཆ་ལུགས་ཀྱིས།།
མཁས་རྣམས་དགའ་བ་བསྐྱེད་མི་ནུས།།
རྟ་མཆོག་འགྲོས་དང་མི་ལྡན་ན།།
ཤིན་ཏུ་བརླིང་ཡང་རིན་ཐང་ཆུང་། །

ནོར་ལྡན་བླུན་པོའི་ནང་ན་མང་།།
དཔའ་བོ་གཅན་གཟན་ཁྲོད་ན་མོད།།
ལེགས་བཤད་མཁས་པའི་ཁྲོད་འབྱིན་པའི།།
དམ་པ་འཇིག་རྟེན་འདི་ན་དཀོན། །

གང་དང་གང་ལ་དེ་ཡོད་པ།།
དེ་ཡིས་དེ་ཡི་གྲགས་པ་ཐོབ།།
མཁས་པའི་གྲགས་པ་མཁས་པ་དང་།།
དཔའ་བོས་དཔའ་བོ་ཐོས་པ་བཞིན། །

ཆེན་པོ་རྣམས་ཀྱི་མཆོད་བྱ་བ།།
དམན་པ་རྣམས་ཀྱིས་བརྙས་པར་འགྱུར།།
དབང་ཕྱུག་ཆེན་པོའི་སྤྱི་བོའི་རྒྱན།།
ཟླ་བ་ལྷ་མིན་ཟས་སུ་བྱེད། །

རིག་པ་གླེགས་བམ་ནང་ལུས་དང་།།
མ་བསྒྲུབས་པ་ཡི་གསང་སྔགས་དང་།།
བརྗེད་ངས་ཅན་གྱིས་བསླབས་པ་རྣམས།།
དགོས་པའི་ཚེ་ན་བསླུ་བ་མང་། །

བློ་ལྡན་ནོར་གྱིས་འབྱོར་ན་ཡང་།།
ལེ་ལོ་ཅན་ལ་མཐོན་པོ་དཀའ།།
རྣ་བ་ཐོག་མར་སྐྱེས་ན་ཡང་།།
རྭ་རྩེ་མཐོ་བར་མ་མཐོང་ངམ། །

ཁྱི་ཕག་རྣམས་ལ་དྲི་ཞིམ་དང་།།
དམུས་ལོང་བ་ལ་སྒྲོན་མེ་དང་།།
མ་ཞུ་བ་ལ་ཁ་ཟས་དང་།།
བླུན་པོ་རྣམས་ལ་ཆོས་ཅི་དགོས། །

ཡོན་ཏན་ཅན་དང་གསེར་བཟང་པོ།།
གཡུལ་ངོར་དཔའ་དང་རྟ་བཟང་པོ།།
སྨན་པ་མཁས་དང་རྒྱན་བཟང་པོ།།
གང་དུ་ཕྱིན་པ་དེ་རུ་བྲིན། །

བློ་དང་བརྩོན་འགྲུས་ཡོད་གྱུར་པ།།
དེ་ཡིས་བསྒྲུབ་པར་མི་ནུས་གང་།།
དགྲ་ངན་དཔུང་ཚོགས་བཅུ་གཉིས་པོ།།
སྐྱ་བསེང་བུ་ཡིས་བཅོམ་ཞེས་ཐོས། །

ཕལ་ཆེར་བུ་ཚའི་སྤྱོད་པ་ནི།།
རིགས་རྒྱུད་སྔ་མའི་རྗེས་སུ་འབྲང་།།
ཁུ་བྱུག་ཕྲུ་གུ་བྱེའུ་ཁྲ་རུ།།
འགྲོ་བ་བརྒྱ་ལམ་སྲིད་པ་ཙམ། །

རི་དང་ཆུ་བོ་གླང་པོ་རྟ།།
ཤིང་དང་འོད་ཟེར་ནོར་བུ་རྡོ།།
སྐྱེས་པ་བུད་མེད་རིགས་གཅིག་ཀྱང་།།
མཆོག་དང་དམན་པའི་ཁྱད་པར་ཡོད། །

བསོད་ནམས་ལྡན་པའི་ཚིག་ཙམ་ཡང་།།
ཉམ་ཆུང་རྣམས་ཀྱིས་བཟོད་པར་དཀའ།།
གོ་ཌའི་རྒྱལ་པོའི་ཚིག་ཙམ་གྱིས།།
རྒྱ་མཚོའི་རྒྱལ་པོ་བཅིངས་ཞེས་གྲགས། །

བྱ་བ་འབད་ནས་ཀུན་བསྒྲུབས་ཀྱང་།།
འགྲུབ་པ་བསོད་ནམས་ཤུགས་ལ་རག
ཚོང་པས་རྒྱ་མཚོར་མ་རྙེད་པའི།།
ནོར་བུ་རྒྱལ་པོའི་མཛོད་ན་སྤྱོད། །

བླུན་པོའི་བྱམས་སྡང་རྟགས་ཀྱིས་གོ།
སྒྲིན་པོའི་བྱམས་སྡང་ལོག་པར་སྟོན།།
ཁྱི་རྒན་འཛུམ་ན་རྨུག་རྟགས་ཏེ།།
གཤིན་རྗེ་འཛུམ་ན་གསོད་པའི་རྟགས། །

ནོར་གྱི་མཆོག་ནི་སྦྱིན་པ་སྟེ།།
བདེ་བའི་མཆོག་ནི་སེམས་བསྐྱེད་པ།།
རྒྱན་གྱི་མཆོག་ནི་ཐོས་པ་སྟེ།།
གྲོགས་པོའི་མཆོག་ནི་མི་བསླུ་བའོ། །

ནོར་གྱིས་མ་གདུངས་སུ་ཞིག་ཡོད།།
རྟག་ཏུ་བདེ་བར་བསྡད་པ་སུ།།
བདེ་དང་སྡུག་བསྔལ་ཐམས་ཅད་ཀྱང་།།
དབྱར་དགུན་བཞིན་དུ་བརྗེ་བར་འགྱུར། །

ཉམ་ཆུང་རྣམས་ཀྱིས་ཆེན་པོའི་མིང་།།
བཟུང་བ་ཙམ་ལ་གཞན་གྱིས་བསྲུང་།།
སོར་མོའི་ཕྲེང་བའི་མིང་བཟུང་བས།།
ལོག་འདྲེན་ཕལ་གྱིས་བསྲུང་བར་བཤད། །

སེམས་ཅན་གང་དང་གང་འབྲེལ་བ།།
བྱ་བ་སྔོན་གྱི་ལས་ཀྱིས་བྱེད།།
བྱ་རྒོད་འཕྱི་བ་ཁུར་བ་དང་།།
སྲམ་གྱིས་འུག་པ་མཆོད་ལ་ལྟོས། །

ལོངས་སྤྱོད་གསོག་པར་འདོད་རྣམས་ཀྱིས།།
འཕེལ་ན་གཏོང་བ་བསྲུང་བའི་མཆོག
ཆུ་ཆེན་རྫིང་དུ་ལྡུགས་འདོད་ན།།
འབྲིད་པ་བཞག་པའི་རྫིང་གི་གསོས། །

ལེགས་པར་བཤད་པ་རིན་པོ་ཆེའི་གཏེར་ལས་རང་བཞིན་གྱི་ཚུལ་བརྟག་པ་སྟེ་རབ་ཏུ་བྱེད་པ་དྲུག་པའོ།། །།

༧ མི་རིགས་པའི་ཚུལ་དཔྱད་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་བདུན་པ། མི་རིགས་པའི་ཚུལ་དཔྱད་པ།


བྲན་གཡོག་ང་རྒྱལ་ཆེ་བ་དང་།།
དཀའ་ཐུབ་ལྡན་པ་ཆས་གཟོབ་དང་།།
རྒྱལ་པོ་ཆོས་བཞིན་མི་སྤྱོད་པ།།
གསུམ་པོ་ཚུལ་མིན་ཞུགས་པ་ཡིན། །

མི་ལྕོགས་བྱ་བ་རྩོམ་པ་དང་།།
མང་དང་འཁོན་ཞིང་སྟོབས་ལྡན་རྩོད།།
བུད་མེད་ཡིད་རྟོན་ངན་དང་མཛའ།།
ལྔ་བོ་མྱུར་དུ་བརླག་པའི་རྒྱུ། །

ནོར་མེད་ཟས་གོས་མཆོག་འདོད་དང་།།
གཞན་ལ་སློང་ཞིང་ང་རྒྱལ་ཆེ།།
བསྟན་བཅོས་མི་ཤེས་རྩོད་པར་འདོད།།
གསུམ་པོ་འགྲོ་བའི་བཞད་གད་གནས། །

ཡུལ་བཟང་ཡོད་བཞིན་ཡུལ་ངན་ལ།།
སྐྱེ་བོ་ངན་པ་ཕོངས་ཤིང་ཆགས།།
ཀིང་ཤུའི་མེ་ཏོག་ཤ་ཡིན་ཞེས།།
ཅེ་སྤྱང་ལས་གཞན་སུ་ཞིག་རེ། །

ཆེན་པོ་རྣམས་ལ་དགྲ་བས་ཀྱང་།།
རང་གི་འཁོར་གྱིས་གནོད་པ་མང་།།
སེང་གེ་ལུས་ཀྱི་འབུ་མིན་པ།།
སྲོག་ཆགས་གཞན་གྱིས་ག་ལ་ཟ། །

རྗེ་བོས་བདག་ལ་གནོད་བྱེད་ན།།
དེ་ལ་སྐྱོབས་པར་བྱེད་པ་སུ།།
སྣང་བས་གཟུགས་ལ་སྒྲིབ་བྱེད་ན།།
དེ་ལ་ལྟ་བའི་ཐབས་གཞན་མེད། །

ཆོས་སྤྱོད་ཞི་བར་གནས་པ་ལ།།
འཚེ་བྱེད་ཤིན་ཏུ་ཐ་ཤལ་ཡིན།།
རང་ལ་སྐྱབས་འོང་བསད་པ་ལ།།
དཔའ་བོ་ཡིན་ཞེས་སུ་ཞིག་སྒྲོག །

སྐྱེ་ངན་རང་ལ་མི་ཕན་ཡང་།།
གཞན་ལ་གནོད་པར་བྱེད་པ་ཡོད།།
སྦྲུལ་གདུག་ཟས་སུ་རླུང་ཟ་ཡང་།།
ཕ་རོལ་མཐོང་ན་མི་གསོད་དམ། །

འདོད་པ་བདེའོ་སྙམ་སེམས་ཀྱང་།།
བདེ་སྤྱོད་སྡུག་བསྔལ་ཁོ་ནའི་རྒྱུ།།
ཆང་འཐུང་བདེའོ་སྙམ་པ་དེ།།
སྨྱོ་བ་བདེ་བར་བསྒོམ་པ་ཡིན། །

ཡོན་ཏན་ཅན་ལ་འཇིག་རྟེན་གུས།།
ཡོན་ཏན་འབད་པའི་ཤུགས་ལ་གནས།།
འབད་ནས་ཡོན་ཏན་མི་བསྒྲུབ་པར།།
གཞན་ལ་འཁངས་པས་ཅི་ཞིག་ཕན། །

མི་རྣམས་ཚེ་རིང་བ་ལ་སྨོན།།
རྒས་པར་གྱུར་ལ་འཇིགས་པར་ལྟ།།
རྒས་ལ་འཇིགས་ཤིང་ཚེ་རིང་བར།།
འདོད་པ་བླུན་པོའི་ལོག་ལྟ་ཡིན། །

གང་ཞིག་མཁས་པ་ཡོད་བཞིན་དུ།།
དེ་ལས་ཡོན་ཏན་མི་ལེན་ན།།
མི་དེ་གདོན་གྱིས་བཏབ་པའམ།།
ཡང་ན་ལས་གྱིས་མནར་བ་ཡིན། །

གང་ལ་ལོངས་སྤྱོད་ཡོད་བཞིན་དུ།།
སྤྱོད་དམ་སྦྱིན་པར་མི་བྱེད་ན།།
མི་དེ་ནད་ཀྱིས་བཏབ་པའམ།།
ཡང་ན་ཡི་དྭགས་མངོན་སུམ་ཡིན། །

ཆོས་ལུགས་ཤེས་ཀྱང་མི་སྒྲུབ་ན།།
དེ་ཡི་ཆོས་ཀྱིས་ཅི་ཞིག་བྱ།།
ལོ་ཏོག་ཕུན་སུམ་ཚོགས་ན་ཡང་།།
གཅན་གཟན་དགའ་བ་ག་ལ་སྐྱེ། །

ལས་ཀྱིས་མནར་བའི་སེམས་ཅན་ལ།།
ལོངས་སྤྱོད་ཡོད་ཀྱང་སྤྱོད་མི་ནུས།།
བྱ་རོག་ལྟོགས་ཀྱང་སྐུངས་མོད་ཀྱི།།
འགྲངས་པར་ཟ་བར་ག་ལ་ནུས། །

སྤྱོད་དམ་སྦྱིན་པར་མི་ནུས་པའི།།
ནོར་དེས་ཕྱུག་པོར་བསྒོམ་ན་ནི།།
རི་བོ་གསེར་དུ་བསྒོམ་པ་ཡི།།
ཕྱུག་པོ་བསྒྲུབ་པ་ཤིན་ཏུ་སླ། །

ཆོས་དང་ཆོས་མིན་སྨྲ་བ་ལ།།
མཁས་པ་ཤིན་ཏུ་མང་ན་ཡང་།།
དེ་ལྟར་ཤེས་ནས་ཉམས་ལེན་པ།།
འཇིག་རྟེན་འདི་ན་ཤིན་ཏུ་དཀོན། །

རིགས་གཟུགས་ལང་ཚོ་ལྡན་ན་ཡང་།།
ཡོན་ཏན་མེད་ན་མཛེས་མ་ཡིན།།
རྨ་བྱ་སྤུ་སྡུག་ཡིད་འོང་ཡང་།།
ཆེན་པོའི་རྒྱན་དུ་འོས་སམ་ཅི། །

སྣ་ཡི་ཚབ་དང་ཉོས་པའི་བུ།།
གཡར་པོའི་རྒྱན་དང་བརྐུས་པའི་ནོར།།
སློབ་དཔོན་མེད་པའི་རིག་པ་རྣམས།།
ཡོད་ཀྱང་གཞན་གྱིས་བརྩི་བ་མེད། །

མི་གང་བྱས་པ་མི་གཟོ་བ།།
དེ་ནི་གཞན་པས་རང་ལ་གནོད།།
ལྟས་ངན་སྒྲུབ་པ་ཉེས་པ་འགའ།།
དགྲ་ཡི་ཐོག་མར་རང་ལ་འབྱུང་། །

ལོངས་སྤྱོད་འགྲུབ་པར་མཐོང་ན་ཡང་།།
གནས་མ་ཡིན་ལས་སུ་ཞིག་ལེན།།
ལུག་ཐུག་འཐབ་པའི་ཁྲག་བལྡགས་པས།།
ཝ་སྐྱེས་མགོ་བོ་བཀས་ཞེས་ཐོས། །

འབྲེལ་བ་འགའ་ཡི་ངོར་བྱས་ནས།།
གཞན་ལ་སྟེས་ཀྱིས་དོར་མི་བྱ།།
བརྒྱ་བྱིན་ཡིན་ཡང་འཁོར་འདབས་རྣམས།།
ག་བུར་བཞིན་དུ་འབྲོས་པར་འགྱུར། །

རྒྱུན་དུ་འགྲོགས་པའི་གྲོགས་སྤངས་ནས།།
གསར་བུ་འགའ་ལ་ཡིད་མི་རྟོན།།
འུག་པའི་རྒྱལ་པོས་བྱ་རོག་གི།
བློན་པོ་བསྟེན་པས་ཕུངས་ཞེས་གྲགས། །

མི་ངན་འབད་པས་བསྟེན་བྱས་ཀྱང་།།
རང་གི་མི་རུ་འགྲོ་བ་མེད།།
ཆུ་ནི་ཇི་ལྟར་བསྐོལ་གྱུར་ཀྱང་།།
མེ་རུ་འབར་བ་མི་སྲིད་དོ། །

རྒྱུ་མཚན་བརྟགས་ནས་ཁྲོ་བ་ནི།།
ཅུང་ཟད་རིགས་ཤིང་སེལ་བའང་ཤེས།།
རྒྱུ་མེད་པར་ནི་གང་ཁྲོ་བ།།
དེ་ཡི་བསལ་ཐབས་སུ་ཡིས་ཤེས། །

དགྲ་བོའི་ནུས་པ་མ་བརྟགས་པར།།
ཉམ་ཆུང་ན་ཡང་བརྙས་མི་བྱ།།
ཏ་ཌི་བྷ་ལ་བརྙས་པ་ཡིས།།
ནམ་མཁའ་ལྡིང་གིས་རྒྱ་མཚོ་བཅོམ། །

བསོད་ནམས་འཛད་ན་ངན་སེམས་སྐྱེ།།
རིགས་འཛད་པ་ན་བུ་ངན་སྐྱེ།།
ནོར་འཛད་པ་ན་བརྐམ་ཆགས་སྐྱེ།།
ཚེ་འཛད་པ་ན་འཆི་རྟགས་འབྱུང་། །

རང་གིས་ངན་སྤྱོད་མ་བྱས་ན།།
བརྒྱ་བྱིན་གྱིས་ཀྱང་སྨད་མི་ནུས།།
ཆུ་མིག་རང་ཉིད་མ་བསྐམས་ན།།
ས་ཡིས་མནན་པས་ག་ལ་ཐུབ། །

བྱ་བ་མི་འདྲ་བརྒྱ་ཕྲག་རྩོམ།།
མཐར་ཕྱིན་བྱ་བ་གཅིག་ཀྱང་མེད།།
བློ་རྒོད་ཕལ་ཆེར་གྲོང་བར་གྱི།།
ཁྱི་རྒན་འདྲ་བར་རྒྱུན་དུ་འཁྱམས། །

ལས་ཀྱི་ཤུགས་ཀྱིས་ཁྲིད་པ་ན།།
བློ་ཆེན་ལོག་པའི་ལམ་ནས་འགྲོ།།
མུ་སྟེགས་བྱེད་པའི་སྟོན་པ་མཆོག
དབང་ཕྱུག་སྨྱོན་པའི་བརྟུལ་ཞུགས་འཛིན། །

མི་གང་ཁྲིམས་ལས་གང་འདའ་བ།།
རེ་ཞིག་རྒྱལ་ཡང་ཕམ་པ་ཡིན།།
ཆུ་སྐྱར་ཁྲིམས་ལས་འདས་པ་ཡིས།།
ས་ཀུན་ཐོབ་ཀྱང་སེང་གེས་བསད། །

ཧ་ཅང་ཤེས་རབ་ཆེ་དྲགས་པས།།
བྱ་བ་མང་ན་བདག་ཉིད་བརླག
རྒྱལ་པོ་དྲན་རྒྱ་ཆེ་བ་ཡིས།།
རྒྱལ་སྲིད་ཉམས་པ་ཤིན་ཏུ་མང་། །

ཧ་ཅང་ལོངས་སྤྱོད་བསགས་དྲགས་པའི།།
ནོར་ནི་རང་གི་གཤེད་མ་ཡིན།།
ཕུང་ཁྲོལ་ཕལ་ཆེར་ཕྱུག་པོ་ལ།།
འབྱུང་གི་སྤྲང་པོ་བདེ་བར་རྒྱུ། །

ཧ་ཅང་མཐུ་རྩལ་ཆེ་དྲགས་ན།།
ལྕེབ་པའི་སྟ་གོན་བྱེད་པ་ཡིན།།
གཡུལ་དུ་བསད་པ་ཕལ་ཆེར་ནི།།
མཐུ་རྩལ་ཅན་ལ་བྱུང་བ་མང་། །

འབྱོར་དང་ཤེས་རབ་སྟོབས་ལ་སོགས།།
བསོད་ནམས་ལྡན་ལ་གྲོགས་སུ་འགྱུར།།
བསོད་ནམས་མེད་ན་དེ་དག་ཀུན།།
བདག་ཉིད་བརླག་པའི་རྒྱུ་རུ་འགྱུར། །

མཁས་པས་བྱ་བ་ཅི་བྱེད་ཀྱང་།།
རང་གི་བསོད་ནམས་བརྟགས་ཏེ་བྱ།།
རྩོད་དུས་བསོད་ནམས་ཕུན་ཚོགས་པ།།
སྐྱེ་བོ་བརྒྱ་ཡི་ནང་ན་དཀོན། །

རྫིང་ངན་ཆུ་ཡིས་ཁེངས་པ་ན།།
ཕྱོགས་གཅིག་ཅི་ནས་འཇིག་པ་ལྟར།།
གང་ལ་ནོར་དང་ལྡན་གྱུར་པ།།
དེ་ལ་རིགས་རྒྱུད་ཤིན་ཏུ་དཀོན། །

བུ་དང་ལྡན་ལ་ནོར་ཆེན་དཀོན།།
དེ་དང་ལྡན་ན་དགྲ་བོས་འཇོམས།།
ཐམས་ཅད་ཕུན་སུམ་ཚོགས་གྱུར་ན།།
མི་དེ་མྱུར་དུ་འཆི་བ་མང་། །

དེས་ན་མཁས་པས་བསོད་ནམས་བསག
བསོད་ནམས་ཁོ་ན་ཕུན་ཚོགས་རྒྱུ།།
སུ་ཞིག་གང་ན་ཕུན་ཚོགས་པ།།
དེ་ནི་བསོད་ནམས་བསགས་པའི་རྟགས། །

བརྫུན་གྱིས་ཕ་རོལ་བསླུས་སོ་ཞེས།།
སྙམ་ན་རང་ཉིད་བསླུས་པ་ཡིན།།
ལན་ཅིག་རྫུན་དུ་སྨྲ་བ་དེས།།
བདེན་པར་སྨྲས་ཀྱང་དྭོགས་པ་སྐྱེ། །

ལེགས་ཉེས་རྣམ་པར་མི་དཔྱོད་པར།།
ཁྲོས་ཤིང་ཕ་རོལ་གནད་འབེབས་པ།།
ཆུང་མ་བསད་པའི་ཐི་བ་ལྟར།།
གྲོགས་དང་བྲལ་བའི་མྱ་ངན་ཐོབ། །

མ་འོངས་པ་ལ་མི་དཔྱོད་པར།།
བྱུང་བའི་ཚེ་ན་འབད་དེ་བཙལ།།
ཆུ་དང་ཕྲད་ན་ལྷམ་ཕུད་ཀྱི།།
མ་ཕྲད་པ་ན་ག་ལ་འབུད། །

ཕུགས་སུ་བསྒྲུབ་པར་མི་ནུས་པའི།།
བྱ་བ་ལེགས་ཀྱང་འཇུག་མི་རུང་།།
ཁོང་པའི་ནང་དུ་མི་འཇུ་བའི།།
ཁ་ཟས་ཞིམ་ཡང་སུ་ཞིག་ཟ། །

རྩོལ་བ་དོར་ནས་འདུག་པ་ལ།།
འདི་ཕྱི་གཉིས་ཀ་འགྲུབ་མི་འགྱུར།།
འབད་པ་མེད་ན་ཞིང་བཟང་ཡང་།།
ལོ་ཏོག་ཐོབ་པར་མི་འགྱུར་རོ། །

གནས་མ་ཡིན་པའི་དུལ་དྲགས་ན།།
ཐམས་ཅད་ཀྱིས་ནི་བཀོལ་བར་འགྱུར།།
ཤིང་བལ་སྟན་དུ་བྱེད་མོད་ཀྱི།།
ཡལ་ག་སུ་ཞིག་སྟན་དུ་གདིང། །

བྱ་བ་ངན་དང་མི་འགྲུབ་པ།།
ཕ་རོལ་བསྒོ་ཡང་བྱེད་ན་བླུན།།
སྦྱར་དུག་ཉོ་ལ་སུ་ཡིད་རྟོན།།
ཐམས་ཅད་སྦྱིན་ཞེས་སུས་སྨྲ་ནུས། །

ནོར་རྣམས་གསོག་ཅིང་མི་སྤྱོད་པ།།
རང་བསྲེག་བུད་ཤིང་གསོག་པ་ཡིན།།
བུང་བ་སྦྲང་རྩི་མི་ཟ་བར།།
གཞན་གྱིས་ཁྱེར་ན་ལྕེབ་པར་རྩོམ། །

ལེགས་པར་བཤད་པ་རིན་པོ་ཆེའི་གཏེར་ལས་མི་རིགས་པའི་ཚུལ་དཔྱད་པ་སྟེ་རབ་ཏུ་བྱེད་པ་བདུན་པའོ།། །།

༨ བྱ་བ་བརྟག་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་བརྒྱད་པ། བྱ་བ་བརྟག་པ།


བློ་ལྡན་བྱ་བ་ཅུང་ཟད་ཀྱང་།།
རྒྱུན་དུ་གྲོས་ཀྱིས་བསྒྲུབ་པར་བྱ།།
གྲུབ་པར་གྱུར་ན་ལྟ་ཅི་སྨོས།།
མ་གྲུབ་ན་ཡང་མཛེས་པའི་རྒྱུ། །

སེམས་ཅན་མོས་པ་སྣ་ཚོགས་པས།།
ཐམས་ཅད་མགུ་བ་སུས་ཀྱང་དཀའ།།
རང་ཉིད་ཡོན་ཏན་ལྡན་བྱས་ན།།
ཐམས་ཅད་དགའ་བ་དེ་ལ་ཉེ། །

ཤིན་ཏུ་རྒས་པར་གྱུར་ཚེ་ཡང་།།
ཐོས་པ་མང་དུ་གསག་པར་བྱ།།
ཕྱི་མར་ཐོས་པས་ཕན་པ་ཙམ།།
སྦྱིན་པ་ཡིས་ཀྱང་ག་ལ་ཕན། །

ཡོན་ཏན་ཀུན་རྫོགས་སྐྱེ་བོ་བསྟེན།།
ཡང་ན་ཐ་མལ་འགྲོགས་པ་བདེ།།
བུམ་པ་ཆུ་ཡིས་གང་བ་འམ།།
ཡང་ན་སྟོང་པ་འཁུར་བ་སླ། །

ཡོན་ཏན་ཅུང་ཟད་བསླབས་པའི་མི།།
སུ་ཞིག་གིས་ནི་བསྟེན་པར་ནུས།།
ཆུས་ཕྱེད་གང་བའི་བུམ་པ་དེ།།
མགོ་ལ་འཁུར་བ་སུ་ཡིས་ནུས། །

མི་གང་སྐྱེ་བོ་དམ་པ་དང་།།
དམན་པའི་ཁྱད་པར་ལེགས་ཤེས་ནས།།
དེ་ཡི་བྱ་བ་བསྒྲུབ་ཤེས་པ།།
ཕུན་སུམ་ཚོགས་པའི་གཞི་ཆེན་ཡིན། །

བློ་གྲོས་ལྡན་པས་ལེགས་བསྐྱངས་ན།།
སྐྱེ་བོ་དམན་པའང་མཆོག་ཏུ་འགྱུར།།
སློབ་ཤེས་དག་གིས་ནེ་ཙོ་ལ།།
བསླབས་ན་འདོན་པ་ཤེས་པར་འགྱུར། །

ཉམ་སྟོབས་ཆུང་བའི་སྐྱེ་བོས་ཀྱང་།།
ཆེན་པོ་གཞན་ལ་བསྟེན་ན་འགྲུབ།།
ཆུ་ཡི་ཐིགས་པ་ཉམ་ཆུང་ཡང་།།
མཚོ་དང་འདྲེས་ན་སྐེམ་མི་ནུས། །

རང་ལ་བློ་གྲོས་མི་ལྡན་ན།།
བློ་ཆེན་གཞན་ལ་ལེགས་པར་འདྲི།།
ལག་པས་དགྲ་བོ་མི་གསོད་ན།།
མཚོན་ཆ་ལེན་པར་མི་བྱེད་དམ། །

གནོད་པར་བྱེད་པའི་དགྲ་བོ་ཡང་།།
ཐབས་དང་ལྡན་ན་གྲོགས་སུ་འགྱུར།།
དུག་ཆེན་ལུས་ལ་གནོད་མོད་ཀྱི།།
སྦྱོར་བ་ཤེས་ན་སྨན་དུ་འགྱུར། །

རིགས་པས་རྙེད་པའི་ཟས་ནོར་བླང་།།
མི་འོས་གཞན་ལ་རློམ་སེམས་སྤང་།།
ཤིང་ཏོག་ཤིང་རྩེ་ལས་བླང་གི།
དེ་ལས་ཐལ་ན་ས་ལ་ལྷུང་། །

མཁས་པས་སྒྲིམ་པར་མི་བྱེད་པ།།
དེ་ཡི་བར་ལ་ཉེས་པ་འབྱུང་།།
བློ་དང་ལྡན་པས་རབ་བསྒྲིམས་ན།།
ཉེས་པ་འབྱུང་བའི་གོ་སྐབས་དཀའ། །

ཇི་སྲིད་རང་སྟོབས་མ་རྫོགས་པར།།
དེ་ཡི་བར་དུ་དགྲ་རྣམས་བཀུར།།
ནུས་པ་རྫོགས་ནས་གང་རིགས་པ།།
བྱ་ཞེས་བསྟན་བཅོས་གཞན་དག་སྨྲ། །

དགྲ་བོ་སྙན་པར་སྨྲ་ན་ཡང་།།
བློ་དང་ལྡན་པས་ཡིད་མི་རྟོན།།
ཆུ་སྐྱར་བྱི་ལ་དེས་པ་ཡིས།།
ཕ་རོལ་གསོད་ལ་རྟག་ཏུ་བརྩོན། །

ཡུལ་གྱི་བདག་པོར་ཞེ་སྡང་ཡང་།།
དེ་ལ་དགའ་བས་བསྟེན་ཏེ་བསྡད།།
ས་ལ་རྐང་པ་འདྲེད་གྱུར་ན།།
ས་ཉིད་ལ་ནི་བརྟེན་པ་བཞིན། །

ཧ་ཅང་འདོད་ལ་བརྐམ་པ་ཡིས།།
སྐྱེ་བོ་མྱུར་དུ་བརླག་པར་འགྱུར།།
མཆིལ་པའི་ཤ་ལ་ཆགས་པ་ཡིས།།
ཉ་རྣམས་དེ་མ་ཐག་ཏུ་གསོད། །

མཆོད་འོས་པ་དང་འཁོར་རྣམས་ཀྱང་།།
རྟག་ཏུ་སྦྱིན་པས་བསྡུ་བར་བྱ།།
མཆོད་གཏོར་ལ་ནི་ལྷ་རྣམས་དང་།།
ཡི་དྭགས་བར་དུ་མགུ་བས་བསྲུང་། །

ཆེན་པོ་རྣམས་ཀྱིས་རྩེད་མོ་དང་།།
བདེ་དང་ཟས་ལ་ཆགས་པ་སྤང་།།
འདོད་ལ་ཆགས་པའི་ལེ་ལན་གྱིས།།
འབོད་གྲོགས་ལངྐར་བསད་ཅེས་གྲགས། །

བྱམས་རྩོད་གཉིས་ཀ་ཆེན་པོ་དང་།།
བྱ་ཡི་དམན་དང་ནམ་ཡང་མིན།།
ཉོ་ཚོང་རིན་ཆེན་ལ་བྱ་ཡི།།
སྦྱར་དུག་ལ་ནི་དེ་ལྟར་མིན། །

དཔྱ་བ་མང་ཕྱིན་རྒྱལ་པོའི་མཛོད།།
ཧ་ཅང་མི་བསྡུ་ཉུང་ངུས་ཁེངས།།
གྲོག་མཁར་སྦྲང་རྩི་ཡར་ངོ་ཡི།།
ཟླ་བ་ཉུང་ངུ་ཉུང་ངུས་གང་། །

རྗེ་བོས་འབངས་ལ་མི་གནོད་པར།།
རིགས་པའི་ལམ་གྱི་དཔྱ་རྣམས་བསྡུ།།
སཱ་ལའི་ཤིང་ལས་སྤོས་ཀྱི་བཅུད།།
གཟགས་པ་མང་ན་བསྐམ་པར་འགྱུར། །

རྗེ་བོ་ལྷག་པར་དེས་པ་དགོས།།
རྒྱུ་མཚན་ཆུང་ངུས་ཁྲོ་མི་རུང་།།
སྦྲུལ་ལ་ནོར་བུ་ཡོད་ན་ཡང་།།
སེམས་ཤེས་སུ་ཞིག་དྲུང་དུ་སྡོད། །

གང་ཞིག་ནོར་འདོད་སྐྱེ་བོས་ཀྱང་།།
ཆོས་ཉིད་གཙོ་བོར་བསྲུང་བར་བྱ།།
ཆོས་ལས་ཉམས་པའི་ནོར་ཙམ་ནི།།
འཇིག་རྟེན་འདིར་ཡང་ག་ལ་རྟག །

ཧ་ཅང་བྱམས་ཐལ་གཉེན་ལའང་མིན།།
ཤིན་ཏུ་གནོད་ཆེན་དགྲ་ལའང་མིན།།
གཉེན་ལ་རེ་བ་འཁོན་གཞི་སྟེ།།
གནོད་ལན་ཀུན་གྱིས་བསྒྲུབ་པར་སླ། །

འཇམ་པོས་འཇམ་པོ་འཇོམས་བྱེད་ཅིང་།།
འཇམ་པོས་རྩུབ་པའང་འཇོམས་པར་བྱེད།།
འཇམ་པོས་ཀུན་འགྲུབ་དེ་ཡི་ཕྱིར།།
འཇམ་ཉིད་རྣོ་ཞེས་མཁས་རྣམས་སྨྲ། །

སུ་ཡང་བདག་གི་དགྲ་ཡིན་དང་།།
འགའ་ཡང་བདག་ལ་མི་བྱམས་ཞེས།།
མི་བྱམས་ན་ཡང་དེ་མི་བསྒྲག
བསྒྲགས་ན་དེ་ཉིད་འབྱེད་པའི་སེལ། །

ངོ་ཚ་ཁྲེལ་ལ་མི་ལྟ་ཞིང་།།
མཆོད་དང་བརྙས་པའི་ཁྱད་མི་ཤེས།།
ཟས་དང་ནོར་ལ་ཆགས་ལྡན་པ།།
དེ་འདྲའི་གནས་སུ་བསྡད་མི་བྱ། །

ཡུལ་གཞན་ལེགས་པར་མ་བརྟགས་པར།།
སྔ་མའི་གནས་ནི་འདོར་མི་བྱ།།
རྐང་པ་ཡ་གཅིག་མ་བཙུགས་པར།།
གཉིས་ཀ་བཏེག་ན་འགྱེལ་བའི་རྒྱུ། །

རང་སྤྱོད་འབད་པས་སྦ་བར་བྱ།།
ཕལ་ཆེར་གསལ་བར་བསྟན་པས་ཉམས།།
སྤྲེའུས་ཟློས་གར་མི་བྱེད་ན།།
མགུལ་དུ་ཐག་པ་ཅི་སྟེ་འདོགས། །

ཉེས་པ་མངོན་སུམ་མཐོང་ན་ཡང་།།
གནས་མ་ཡིན་ལ་སྨྲ་མི་བྱ།།
ལྟས་ངན་མཐོང་ན་སྨྲ་བ་པོའི།།
ཐོག་ཏུ་འབྱུང་ཞེས་འཇིག་རྟེན་སྒྲོག །

གཞན་ལ་བརྙས་པར་འགྱུར་བ་ཡི།།
ནོར་དང་ཟས་ཀྱིས་ཅི་ཞིག་བྱ།།
ཁྱི་ཕག་མི་གཙང་ཟ་བ་ལ།།
མཁས་པ་སུ་ཞིག་ཡིད་སྨོན་བྱེད། །

ཕ་རོལ་གནད་དུ་འབེབས་པའི་ཚིག
དགྲ་བོ་ལ་ཡང་སྨྲ་མི་བྱ།།
བྲག་ཆ་བཞིན་དུ་རང་ཉིད་ལ།།
དེ་མ་ཐག་ཏུ་ལེ་ལན་འབྱུང་། །

གལ་ཏེ་དགྲ་ལ་གནོད་འདོད་ན།།
རང་ཉིད་ཡོན་ཏན་ལྡན་པར་བྱ།།
དེ་ཡིས་དགྲ་ཡང་སེམས་བསྲེག་ཅིང་།།
རང་ཡང་བསོད་ནམས་འཕེལ་བར་འགྱུར། །

མི་བསྲུན་འགྲོ་ལ་བྱམས་སེམས་བསྐྱེད།།
རྩུབ་སྤྱོད་ཁོ་ནས་གདུལ་བར་བྱ།།
རང་གི་ལུས་ལ་ཕན་འདོད་རྣམས།།
གཏར་དཔྱད་ཀྱིས་ནི་ནད་རྣམས་འདོན། །

གནོད་པར་བྱེད་པ་ཆུང་ངུ་ཡང་།།
མྱུར་དུ་བསལ་ལ་འདུམ་པར་བྱ།།
ཡུར་བ་ཆུང་ངུའི་རྗེས་ཞུགས་ནས།།
འོད་པ་ཆེན་པོ་མ་མཐོང་ངམ། །

མཁས་པས་བྱ་བ་མ་ཡིན་པའི།།
བྱ་བ་ཤེས་ཀྱང་མི་བྱའོ།།
གླང་པོས་དགྲ་སྡེ་བཅོམ་པ་ཡིས།།
རྒྱུན་དུ་རྒྱལ་པོས་བཅིངས་ལ་ལྟོས། །

རང་ཕྱོགས་སྡང་ཡང་སྤང་མི་བྱ།།
དགྲ་བོ་བྱམས་ཀྱང་འཁུ་མི་བྱ།།
བྱ་རོག་བྱ་རོག་གིས་འཚེ་ཡང་།།
ཉིན་མོ་ལོང་བ་བསྟེན་ན་ཕུང་། །

བྱ་བ་ཆེ་ཆུང་གང་བྱེད་ཀྱང་།།
མཁས་པས་རྟག་ཏུ་བསྒྲིམས་ཏེ་བྱ།།
སེང་གེས་རི་བོང་གླང་ཆེན་གཉིས།།
གསོད་པའི་ཚེ་ན་སྒྲིམས་ལྷོད་མེད། །

ཡོན་ཏན་ལྡན་པ་མི་བཀུར་བའི།།
གནས་དེར་མཁས་པ་སུ་ཞིག་སྡོད།།
ཆུ་ཤེལ་མེ་རྡོར་བྱེད་པ་ཡི།།
ཡུལ་དེར་ཆུ་ཤེལ་འཚོང་ངམ་ཅི། །

མཁས་པས་གཞན་ལ་བཤད་པའམ།།
ཡང་ན་ཞི་བའི་ནགས་སུ་བསྒྲུབ།།
ནོར་བུ་སྤྱི་གཙུག་རྒྱན་བྱེད་པའམ།།
མིན་ན་རྒྱ་མཚོའི་གླིང་ན་གནས། །

བདག་བས་མཐོ་བའི་དམ་པ་ལ།།
བསྙེན་ན་བདག་ལ་ཕན་པ་སྒྲུབ།།
ལྷུན་པོའི་ངོས་ལ་གནས་པ་ཡི།།
བྱ་རྣམས་གསེར་དུ་སྣང་བར་འགྱུར། །

ཆེན་པོ་ཕྲག་དོག་ལྡན་པ་ལ།
བརྟེན་ན་ཆེན་པོ་ཐོབ་མི་འགྱུར།།
ཉི་མའི་འོད་ལ་ཉེ་བ་ཡིས།།
ཟླ་བ་མར་ངོར་གྱུར་ལ་ལྟོས། །

མི་གང་མཛའ་བ་མི་བརྟན་པ།།
དེ་དང་འགྲོགས་པར་སུ་ཞིག་ནུས།།
ནམ་མཁའི་འཇའ་ཚོན་མདོག་མཛེས་ཀྱང་།།
རྒྱན་དུ་རེ་བ་བླུན་པོ་འཁྲུལ། །

བདག་ཉིད་གང་ལ་མི་དགའ་བ།།
གཞན་ལ་ཀུན་ཏུ་དེ་མི་བྱ།།
གཞན་གྱིས་ཅུང་ཟད་གཙེས་པའི་ཚེ།།
རང་ལ་བསམ་པ་ཅི་འབྱུང་སོམས། །

གང་ཞིག་བདག་ཉིད་གང་དགའ་བ།།
དེ་ཉིད་གཞན་ལ་སྦྱར་བྱས་ན།།
གཞན་གྱིས་བདག་ལ་གང་དགའ་བ།།
དེ་ཡི་ཚུལ་གྱིས་མཆོད་པར་གྱུར། །

དམུ་རྒོད་རྣམས་དང་མཛའ་བ་དང་།།
རྩོད་པ་གཉིས་ཀ་མཁས་པས་སྤང་།།
འགྲས་པ་དང་ནི་འདྲིས་པའི་ཚུལ།།
གཉིས་ཀ་བརྟག་ལ་བྱར་མི་རུང་། །

དམ་པ་དག་ལ་བརྟེན་པ་དང་།།
མཁས་པ་བདག་ལ་འདྲི་བ་དང་།།
གཞུང་བཟང་པ་དང་འགྲོགས་པ་ནི།།
སུ་ལ་ཡོད་པ་རྒྱུན་དུ་བདེ། །

དུས་སུ་མ་བབ་པ་ཡི་གཏམ།།
གང་སྨྲས་དེ་ལ་ཀུན་གྱིས་བརྙས།།
མང་པོ་སྨྲ་བའི་གཏམ་ཚིག་ལས།།
སྨྱོན་པར་རྗེས་སུ་མི་དཔོག་གམ། །

ཉམ་ཆུང་རྣམས་ཀྱིས་རང་ཉིད་ཀྱི།།
སྨྲ་བ་ཐམས་ཅད་འཁྲུལ་བར་བསམ།།
དེ་ལྟར་གོ་ནས་མི་སྨྲ་བའི།།
མི་ལ་གཞན་གྱིས་བཀུར་བ་ཉེ། །

ཡུལ་དང་དུས་ལ་བབ་པའི་ཚེ།།
རབ་ཏུ་བསྒྲིམས་ཏེ་ལན་འགའ་སྨྲ།།
ལེགས་བཤད་ཡིན་ཡང་མངས་གྱུར་ན།།
ཚོང་ཟོང་ལྷགས་བཞིན་བྲིན་མི་འགྱུར། །

རང་སྐྱོན་མཁས་པ་རྣམས་ཀྱིས་ཀྱང་།།
སྐྱོན་དུ་གོ་བ་ཤིན་ཏུ་དཀའ།།
མང་པོས་བདག་ལ་དེ་སྒྲོགས་ན།།
སྐྱོན་ཅན་ཡིན་པར་རྗེས་སུ་དཔག །

གོ་ཡང་སྐྱོན་དེ་མི་འདོར་ན།།
མི་དེ་གདོན་གྱིས་བཏབ་པ་ཡིན།།
ད་དུང་གཉེན་པོ་མི་འཇུག་ན།།
མི་ཡིན་སྙམ་དུ་མ་སེམས་ཤིག །

ཅུང་ཟད་བསམ་པ་ཡོད་རྣམས་ཀྱིས། །
སྐྱོན་དེ་བརྟགས་ལ་འདོན་པར་བྱ། །
དེ་ལྟར་གཉེན་པོ་སྤྱོད་པ་ཡི། །
མི་དེ་གོང་ནས་གོང་དུ་འགྲོ། །

བློ་དང་ལྡན་པའམ་བྱམས་ཀྱང་རུང་།།
བསྒོ་བ་ཉན་པའམ་དཔའ་ཡང་རུང་།།
གཞན་གྱི་བྱ་བ་མི་ཤེས་ཀྱང་།།
དེ་དང་དེ་ཡི་སྤྱོད་པ་སྐྱོང་། །

མི་བསྲུན་པ་ཡི་འབྲེལ་བ་དང་།།
རིང་ནས་འགྲོགས་ཀྱང་སྤངས་ན་བདེ།།
རྟག་ཏུ་འགུལ་བའི་སོ་བཟང་ཡང་།།
བཏོན་ན་བདེ་ཞེས་རྒད་པོ་སྨྲ། །

རྒྱུན་དུ་འཁང་ཞིང་འཁོར་བ་ཡི།།
འབྲེལ་བ་ཅུང་ཟད་བྱིན་ལ་བསྐྲད།།
སྦྲུལ་གྱིས་ཟིན་པའི་རྨ་དག་ནི།།
གཅོད་མ་ནུས་ན་སྲོག་དང་འབྲལ། །

གལ་ཏེ་ཆེན་པོ་ཐོབ་གྱུར་ན།།
ཕྲན་ཚེགས་གཞན་ལ་སེར་སྣ་སྤང་།།
ཡུལ་འཁོར་དབང་དུ་འདུ་བ་ན།།
དབྱིག་ལ་སེར་སྣ་བྱེད་དམ་ཅི། །

མཁས་པ་ལོངས་སྤྱོད་གསོག་འདོད་ན།།
ཆ་ཤས་སྦྱིན་པ་སྲུང་བ་ཆེ།།
ཁྲོན་པའི་ཆུ་ནི་འཕེལ་འདོད་ན།།
འཆུ་བ་ཉིད་ནི་གདམས་ངག་ཡིན། །

གང་ཞིག་ཕུན་སུམ་ཚོགས་འདོད་ན།།
དེ་ཡིས་འདུ་འགོད་མང་དུ་བྱ།།
འདུ་འཛི་སྡུག་བསྔལ་རྒྱུར་མཐོང་ན།།
ཕུན་སུམ་ཚོགས་པའི་རེ་བ་ཐོངས། །

བྱ་བ་གང་ཞིག་བསྒྲུབ་ན་ཡང་།།
སྐྱོན་དང་ཡོན་ཏན་གཉིས་གཉིས་སོམས།།
གཉིས་ཀ་མཉམ་ཡང་སྤང་དགོས་ན།།
ཉེས་པ་ཤས་ཆེ་སྨོས་ཅི་དགོས། །

མཁས་པ་དྲང་པོ་གུས་པས་བསྟེན།།
མཁས་པ་གཡོ་ཅན་ཤེས་ན་གཟབ།།
རྨོངས་པ་དྲང་པོ་བྱམས་པས་བསྐྱང་།།
རྨོངས་པ་གཡོ་ཅན་མྱུར་དུ་སྤང་། །

ནོར་དང་གཡོ་འཁོར་མེད་ན་ཡང་།།
མཛའ་བོ་བློ་ལྡན་གྲོགས་ཡོད་ན།།
དུད་འགྲོས་ཀྱང་ནི་དོན་གྲུབ་ན།།
མི་ཡི་འགྲོ་བས་སྨོས་ཅི་དགོས། །

གང་ཞིག་ཤེས་པའི་བྱ་བ་བསྒོ།།
མི་ནུས་པ་ལ་འགའ་མི་སྦྱར།།
ཆུ་ལ་ཤིང་རྟས་མི་བགྲོད་དེ།།
ཐང་ལ་གྲུ་ཡིས་ཇི་ལྟར་བགྲོད། །

ཡུན་རིང་འཁོན་པའི་དགྲ་བོ་དང་།།
མཛའ་བ་བྱེད་ཀྱང་བསྲེ་མི་བྱ།།
ཤིན་ཏུ་ཁོལ་བའི་ཆུ་ཡིས་ཀྱང་།།
མེ་དང་ཕྲད་ན་མི་གསོད་དམ། །

གཞུང་བཟང་ངོ་ཚ་ཁྲེལ་ཡོད་ན།།
དགྲ་བོ་ལ་ཡང་ཡིད་བརྟན་རུང་།།
གཞུང་བཟང་དགྲ་ལ་སྐྱབས་སོང་བས།།
སྲོག་གི་བར་དུ་བསྐྱབས་པ་ཐོས། །

རང་ལ་ངན་སེམས་མེད་ཅེས་ཏེ།།
ཕལ་པ་ཀུན་ལ་ཡིད་མི་བརྟན།།
རི་དྭགས་རྒྱུན་དུ་སེམས་བཟང་ཡང་།།
མཆེ་བ་ཅན་རྣམས་ཟས་སུ་བསྒོམ། །

བླུན་པོ་ལོག་པའི་ལམ་འགྲོ་ན།།
བླུན་པོ་ཉིད་དུ་གོ་བས་ཆོག
མཁས་པ་ལོག་པའི་ལམ་འགྲོ་ན།།
རྒྱུ་མཚན་གང་ཞིག་དཔྱད་དགོས་སོ། །

མཁས་པས་ལོངས་སྤྱོད་ལྷག་པར་སྤྱད།།
མི་སྟེར་ན་ཡང་འཕྲོག་པ་མེད།།
ལོངས་སྤྱོད་ཉམས་པའི་ས་ཕྱོགས་སྤང་།།
མི་འཕྲོད་ན་ཡང་གཉའ་སྐྱིས་འཇོམས། །

རང་གིས་ལེགས་པར་ཤེས་ན་ཡང་།།
བྱ་མ་ཐམས་ཅད་གྲོས་ཀྱིས་བསྒྲུབ།།
མི་གང་གྲོས་ལ་མི་དགའ་བ།།
འགྱོད་པ་རིན་གྱིས་ཉོ་བ་ཡིན། །

ཉམ་ངའི་གྲོས་དག་བྱེད་པ་ན།།
མཛའ་ཡང་གསུམ་དུ་གྲོས་མི་བྱ།།
རོ་ལངས་སྒྲུབ་པའི་གྲོགས་ངན་ན།།
ཐོག་མར་སྒྲུབ་པོ་ཟ་བར་འགྱུར། །

ལེན་ཤེས་སྙོམས་པར་གཏོང་ལ་མཁས།།
དུལ་ཞིང་ཀུན་གྱི་ངོ་བསྲུང་བ།།
འཇིགས་མེད་བྱས་པ་ཆུད་མི་གཟན།།
མི་དེ་འདོད་ན་ས་ཀུན་ཐོབ། །

གལ་ཏེ་དགྲ་བོ་སྐྱབས་འོང་ན།།
དེ་ལ་མཆོད་ནས་སྙན་པ་བརྗོད།།
ཁྭ་ཏས་བྱི་བ་ལ་བརྟེན་ནས།།
བདེ་བ་ཐོབ་ཅེས་སྔོན་རབས་སྨྲ། །

གྲོགས་པོ་ངན་དང་ཐོས་པ་ངན།།
རྟོག་པ་ངན་དང་བྱ་བ་ངན།།
མཁས་པ་རྣམས་ཀྱིས་མི་བྱ་སྟེ།།
བྱེད་ན་བླུན་པོ་གུད་ན་མེད། །

ལེགས་པར་བརྟགས་ནས་བྱེད་པ་ལ།།
བྱ་བ་ཉམས་པ་ག་ལ་སྲིད།།
མིག་ལྡན་བརྟགས་ནས་འགྲོ་བ་ན།།
གཡང་སར་གོམ་པ་འདོར་རམ་ཅི། །

རང་གཞན་གཉིས་ཀ་འཕེལ་འགྱུར་བའི།།
ཡོན་ཏན་སློབ་ན་མཁས་པའི་རྟགས།།
རིག་པ་འགའ་ཞིག་མདའ་མཁན་ལྟར།།
ཤེས་པ་ཉིད་ན་ཆོ་འབྲང་འཇིག །

རང་ཉིད་ཅིས་ཀྱང་མཐོ་འདོད་ན།།
གཞན་ལ་ཕན་པ་འབའ་ཞིག་གྱིས།།
བྱད་ལ་བྱི་དོར་བྱེད་པ་རྣམས།།
སྔོན་དུ་མེ་ལོང་མི་འབྱིད་དམ། །

ཕ་རོལ་ཅི་ནས་གཞོམ་འདོད་ན།།
རང་གི་ཡོན་ཏན་འབད་པས་སྒྲུབ།།
དགྲ་བོ་གསོད་པར་འདོད་པ་རྣམས།།
མཚོན་ཆ་འབད་ནས་སྒྲུབ་ལ་ལྟོས། །

གཡོན་ཅན་ཚིག་ལ་དྲོན་འཇུག་པས།།
དྲང་པོས་དེ་ལ་བརྟག་དཔྱད་དགོས།།
བསླུས་རྗེས་ཁོ་བོ་དྲང་ངོ་ཞེས།།
རང་ལ་བསྟོད་པས་ཅི་ཞིག་ཕན། །

གཡོན་ཅན་སོགས་ལ་གཡོ་སོགས་དང་།།
དྲང་པོ་སོགས་ལ་དྲང་པོ་སྟེ།།
མི་བརྟན་པ་ལ་བརྟན་དགོས་ཞེས།།
བྱ་བ་སྔོན་གྱི་ཡིག་ཚངས་ཡིན། །

མཁས་པས་རྟག་ཏུ་དགྲ་ལ་ཡང་།།
གཉེན་དེས་རྐྱེན་དུ་བྱས་ན་ལེགས།།
དེ་ཡིས་འདུམ་ལ་མི་ཕན་ཡང་།།
ངེས་པར་གནོད་སེམས་འཇིལ་བའི་སྨན། །

ཚིག་ངན་བརྗོད་པས་འཇིག་རྟེན་ན།།
འདོད་པ་འགྲུབ་པ་མི་སྲིད་ཀྱིས།།
ཡིད་ལ་རང་འདོད་བསྒྲུབ་ན་ཡང་།།
ངག་གིས་ཀུན་དང་མཐུན་པར་གྱིས། །

རང་དང་གཞན་གྱི་དོན་གྲུབ་ན།།
འཇམ་རྩུབ་ཇི་ལྟར་བྱས་ཀྱང་རུང་།།
ཐབས་ལ་མཁས་པའི་སྤྱོད་པ་ལ།།
གཡོ་སྒྱུ་ཐུབ་པས་མ་གསུངས་སོ། །

ཐ་མར་ཤིན་ཏུ་ཕན་པའི་གྲོས།།
འཕྲལ་ལ་སྡུག་ཀྱང་མཁས་པས་བསྟེན།།
རྒས་ཤིང་གདུངས་ན་ཡོན་ཏན་རྣམས།།
བུ་གཅིག་པ་ལ་མཁས་རྣམས་སློབ། །

ལོངས་སྤྱོད་ཧ་ཅང་སྤེལ་དྲགས་ན།།
དེ་ལ་རྒུད་པ་ཤིན་ཏུ་ཉེ།།
ཆུ་ཡིས་ཤིན་ཏུ་གང་བ་ཡི།།
རྫིང་བུ་སྟོང་ངམ་ཡང་ན་འབྲལ། །

སྐྱེ་བོ་འགའ་ལ་ཕན་པའི་ལས།།
ལ་ལས་དེ་ལ་འཇུག་མི་རུང་།།
སྒོག་སྐྱ་རླུང་ལ་ཕན་མོད་ཀྱི།།
མཁྲིས་པའི་ནད་ལ་དུག་ཏུ་འགྱུར། །

ཉམ་ཆུང་རྟག་ཏུ་བསྐྱང་དགོས་དང་།།
འགྲོགས་ན་ཆེན་པོ་ཉམས་དོགས་ཡོད།།
ཞུན་མར་སྣོད་དུ་བཞག་གྱུར་ན།།
སྣོད་ལ་བྱི་བས་མི་རྨུག་གམ། །

ངན་པ་རྣམས་ལ་བརྟེན་བྱས་ན།།
ངན་པའི་ཤན་གྱིས་རང་ལ་གནོད།།
ཡུར་བའི་ཆུ་ལ་བརྟེན་པ་ཡི།།
ཉ་རྣམས་ཞིང་ལ་འགྲེམས་ལ་ལྟོས། །

གཞུང་ངན་བདག་ལ་བརྟེན་འཆའ་ན།།
དེ་ལ་ཅུང་ཟད་བྱིན་ཏེ་བསྐྲད།།
ཁྱིམ་དུ་ལྟས་ངན་བྱུང་གྱུར་ན།།
ནོར་ལས་ཕྲིས་ཏེ་བཟློག་པ་དགོས། །

དམ་པ་གཞན་དུ་འགྲོ་ན་ཡང་།།
བསྙེན་བཀུར་བྱས་ཏེ་ཉེ་བར་བཞག
ནོར་བུ་རིན་ཆེན་རྟག་མཆོད་ན།།
བཀྲ་ཤིས་དཔལ་དང་བསམ་པ་འགྲུབ། །

དམན་པའི་སྐྱེ་བོ་བསྟོད་དྲགས་ན།།
ཕྱི་ནས་དེ་ཉིད་ཁྱད་དུ་གསོད།།
མཁའ་ལ་མི་གཙང་གཏོར་གྱུར་ན།།
འཐོར་བ་པོ་ཡི་སྤྱི་བོར་བབ། །

སྐྱེ་བོ་བློ་ལྡན་མགོ་སྨད་ན།།
སྨོད་བྱེད་ཉིད་ལ་ཉེས་པ་འཕོག
མར་མེ་ཐུར་དུ་ཁ་བསྟན་ན།།
སྟོན་པ་པོ་ཡི་ལག་པ་སྲེག །།

གང་དང་གང་གི་གནས་ཡིན་པར།།
དེ་དང་དེ་ཡི་གནས་སུ་བཞག
གཙུག་རྒྱན་རྐང་པར་མི་གདགས་ཏེ།།
རྐང་པའི་རྐང་རྒྱན་སྤྱི་གཙུག་མིན། །

བྱ་བ་ཆེན་པོ་སྒྲུབ་པའི་ཚེ།།
འབད་པ་ཡིས་ནི་གྲོགས་བཟང་བསྟེན།།
ནགས་ཚལ་ཆེན་པོ་མེས་བསྲེག་ན།།
རླུང་ཞིག་ཅི་ནས་གྲོགས་སུ་དགོས། །

བྱམས་པས་ཁྱབ་པའི་ཚིག་སྨྲ་བ།།
བསྒྲུབ་སླ་གཞན་དགའ་སྡུད་པའི་མཆོག
ནོར་གྱིས་མགུ་བར་སུ་ཡིས་ནུས།།
ལུས་སྲོག་བཏང་ཡང་ཕྱེད་མི་ཚིམ། །

ཕོངས་ཀྱང་གདུང་བར་མི་བྱ་སྟེ།།
འབྱོར་ཡང་དགའ་བས་དྲེགས་མི་བྱ།།
ལས་ཀྱི་འཕེན་པ་རྒྱང་རིང་བས།།
སྐྱིད་སྡུག་སྣ་ཚོགས་ད་གདོད་འབྱུང་། །

ལེགས་པར་བཤད་པ་རིན་པོ་ཆེའི་གཏེར་ལས་བྱ་བ་བརྟག་པ་སྟེ་རབ་ཏུ་བྱེད་པ་བརྒྱད་པའོ།། །།

༩ ཆོས་བརྟགས་པ།

༄༅། །ལེགས་པར་བཤད་པ་རིན་པོ་ཆེའི་གཏེར་གྱི་དོན་འགྲེལ་བློ་གསལ་བུང་བའི་བསྟི་གནས་ཞེས་བྱ་བ་བཞུགས་སོ།།
མཛད་པ་པོ། འཇམ་མགོན་ས་སྐྱ་པཎྡི་ཏ་ཀུན་དགའ་རྒྱལ་མཚན།
རབ་བྱེད་དགུ་པ། ཆོས་བརྟགས་པ།


འགྲོ་མགོན་སངས་རྒྱས་བཞུགས་བཞིན་དུ།།
སྟོན་པ་གཞན་ལ་གུས་བྱེད་པ།།
ཡན་ལག་བརྒྱད་ལྡན་ཆུ་འགྲམ་དུ།།
བ་ཚྭའི་ཁྲོན་པ་བརྐོ་བ་ཡིན། །

དངོས་པོ་གང་དང་གང་ལ་ཡང་།།
གོམས་ན་དཀའ་བ་ཅི་ཡང་མེད།།
བཟོ་ཡི་རིག་བྱེད་སྦྱངས་པ་ལྟར།།
དམ་ཆོས་དཀའ་བ་མེད་པར་འགྲུབ། །

གང་ཞིག་ཉུང་ངུས་ཆོག་ཤེས་པ།།
དེ་ཡི་ལོངས་སྤྱོད་ཟད་མི་ཤེས།།
ཆོག་ཤེས་མེད་པར་འཚོལ་བ་ལ།།
སྡུག་བསྔལ་ཆར་བཞིན་རྒྱུན་དུ་བབ། །

ནམ་དགོས་ཚེ་ན་ལེན་པ་ཡི།།
ནོར་ནི་སྦྱིན་པར་ཐུབ་པས་གསུངས།།
བསགས་པའི་ནོར་ནི་སྦྲང་རྩི་ལྟར།།
ནམ་ཞིག་གཞན་གྱིས་སྤྱོད་པར་འགྱུར། །

འཇིག་རྟེན་འདི་ན་བུན་བཏང་བས།།
དངོས་པོ་ཐོབ་པའི་ངེས་པ་མེད།།
སློང་ལ་བྱིན་ན་འབད་མེད་པར།།
ཆུང་ཡང་བརྒྱ་འགྱུར་ཐོབ་པ་ཡིན། །

འཇུངས་ལ་ཕྱུག་པོ་མི་སྲིད་ཅིང་།།
གཏོང་ལ་དབུལ་པོ་མི་སྲིད་པས།།
འཇུངས་པ་ནོར་དད་ཆུང་བ་དང་།།
གཏོང་བ་ནོར་ལ་རྔམས་པ་འདྲ། །

བྱིན་ན་དབུལ་གྱུར་དོགས་པ་ཡིས།།
འཇུངས་པས་སྦྱིན་པ་མི་གཏོང་ལ།།
སེར་སྣས་ངེས་པར་ཕོངས་འགྱུར་བས།།
བློ་ལྡན་ཅུང་ཟད་རྙེད་པ་གཏོང་། །

བཞག་ན་ནོར་བསྐྱེད་མི་འཕེལ་བས།།
ཚོང་པས་ཟོང་རྣམས་འགྲེམས་པ་ལྟར།།
བསངས་ན་དབང་ཕྱུག་མི་ཐོབ་པས།།
མཁས་པས་ཚོང་བཞིན་ཕྱོགས་བཅུར་སྟེར། །

བྱེ་བ་སྟོང་ཕྲག་གཏེར་ཡོད་ཀྱང་།།
སུ་ཞིག་ལ་ཡང་གཏོང་མི་བྱེད།།
དེ་དག་འཇིག་རྟེན་འདི་དབུལ་ཞེས།།
ཐོས་མང་རྣམས་ཀྱིས་དེ་སྐད་བཤད། །

རིགས་རྒྱུད་རྒུད་ཀྱིས་དོགས་པས་ན།།
བློ་ཆུང་ཅུང་ཟད་རྙེད་པ་གསོག
མཁས་པ་རིགས་རྒྱུད་མཐོ་ཐོབ་ཕྱིར།།
གསུག་བཞིན་གཞན་ལ་སྦྱིན་པ་གཏོང་། །

རིགས་རྒྱུད་ཕྱུག་པོར་བྱ་སྙམ་ནས།།
རང་ཉིད་བཙོངས་ནས་བུ་ལ་སྟེར།།
བུ་ངན་ཕ་ལ་རྒོལ་བཞིན་དུ།།
ནོར་རྣམས་བརླགས་ནས་ཁྱི་བཞིན་འཁྱམས། །

ཇི་ལྟར་ཕ་མ་བུར་བྱམས་ཀྱང་།།
དེ་ལྟར་བུ་ཚས་ཕ་མ་མིན།།
ཕ་མས་བུ་ཚ་བསྐྱངས་བསྐྱངས་ནས།།
ཕ་མ་རྒས་ནས་བུ་ཚས་བརྙས། །

ནོར་གསོག་འཇུངས་པའི་ཕྱུག་པོ་དང་།།
དགོས་སར་གཏོང་བའི་ཕྱུག་པོ་གཉིས།།
རང་དང་རིགས་རྒྱུད་གཉིས་ཀ་ལ།།
འཇིག་རྟེན་གཞན་གྱི་བྱེ་བྲག་འབྱེད། །

སྲིད་པའི་ཁོལ་པོར་གྱུར་པ་རྣམས།།
སྲོག་དང་བསྡོས་ནས་ནོར་ཕྱིར་འབྲེང་།།
ཆོག་ཤེས་ཅན་གྱིས་ནོར་རྙེད་ཀྱང་།།
དེས་པ་བཞིན་དུ་གཞན་ལ་སྟེར། །

བདོག་པ་བཏང་བས་སྦྱིན་པ་རྫོགས།།
དེ་ལ་ཁྲོ་ན་བཟོད་པ་འཕེལ།།
ཚིམ་ན་རྗེས་སུ་ཡི་རང་བསྒོམ།།
དེས་ན་སྦྱིན་པ་ཆོས་ཀྱི་མཆོག །

སྡུག་བསྔལ་རྒྱ་མཚོའི་སྣོད་གྱུར་པའི།།
ལུས་འདི་དགྲ་དང་འདྲ་མོད་ཀྱི།།
བློ་དང་ལྡན་པས་འཁོལ་ཤེས་ན།།
འདི་ལ་བསོད་དམས་རྟེན་དུ་རུང་། །

སྐད་ཅིག་འཇིག་པའི་ཚེ་ལ་ཡང་།།
དགེ་བའི་བག་ཆགས་རིང་དུ་ཁྱེར།།
རླུང་གིས་བསྒོས་པའི་ཙན་དན་དྲི།།
རིང་དུ་ཐུལ་ཡང་དགའ་བ་བསྐྱེད། །

ཡུན་རིང་བདེ་བ་སྤྱད་སྤྱད་ཀྱང་།།
འབྲལ་བའི་སྡུག་བསྔལ་ལྷག་པར་ཆེ།།
རང་དབང་མེད་པར་འཆི་དགོས་པ།།
འདི་ལ་རྟག་འཛིན་དེ་དག་བརླག །

གཉེན་བཤེས་ཀུན་གྱིས་མཐའ་བསྐོར་ཏེ།།
བཅོམ་བསྐྱུངས་མིག་རྩ་ཤིན་ཏུ་ཞན།།
གང་ཕྱོགས་འགྲོ་བའི་གཏོལ་མེད་པ།།
དེ་ཚེ་དགེ་བ་གཞན་རྣམས་ཕུང་། །

ངན་སོང་གསུམ་གྱི་ནད་རྣམས་ནི།།
མ་བྱུང་བ་ནས་གསོ་བར་བྱ།།
གནམ་ལྕགས་མགོ་ལ་བབ་པ་ལྟར།།
ཐོག་ཏུ་བབས་ན་ཅི་བྱར་ཡོད། །

མཛའ་བཤེས་ཀུན་དང་བྲལ་བ་དང་།།
ངེས་པར་འཆི་བ་ཤེས་བཞིན་དུ།།
ད་དུང་བདེ་བར་གཉིད་ཕེབས་པ།།
བདག་ཉིད་སྙིང་ལ་ཅི་ཞིག་ཞུགས། །

གང་གིས་བརྩོན་པར་མི་ནུས་ཀྱང་།།
ཅི་ནས་ངན་འགྲོར་མི་ལྟུང་བྱ།།
དཔའ་བོས་དགྲ་སྡེ་མ་བསད་ནའང་།།
རང་ཕྱོགས་གསོད་པར་བྱེད་དམ་ཅི། །

འཕྲལ་དུ་ཅུང་ཟད་སྡུག་ན་ཡང་།།
རྒྱུན་དུ་བདེ་བ་མཁས་པས་བསྟེན།།
གཏར་བསྲེག་དག་གིས་ནད་འདོན་པ།།
སྨན་པ་མཁས་པའི་གཞུང་ལུགས་ཡིན། །

གལ་ཏེ་གཞན་དག་ཕུན་ཚོགས་པས།།
བདག་གི་ཡིད་ལ་མི་བཟོད་ན།།
དེ་ཡིས་རང་འབྱོར་འཇོམས་པའི་ཕྱིར།།
རང་ལ་ཕྲག་དོག་བྱེད་པར་ཟད། །

གནོད་པ་བྱ་ཕྱིར་དགྲ་འཇོམས་ན།།
ཁྱེད་ཀྱིས་ཁྲོ་བ་ཁོ་ན་ཆོམས།།
ཁྲོ་བས་འཁོར་བ་ཐོག་མེད་ནས།།
བདག་ལ་གནོད་པ་མཐའ་ལས་འདས། །

གལ་ཏེ་དགྲ་ཀུན་བརླག་འདོད་ན།།
བསད་པས་དེ་ཀུན་ག་ལ་འཛད།།
རང་གི་ཁྲོ་བ་གཅིག་བཅོམ་པས།།
དགྲ་ཀུན་ཅིག་ཅར་བསད་པ་ཡིན། །

མཐུ་ཆེན་གཟུ་ལུམ་སྤྱོད་པ་ལ།།
ཁྲོས་ན་རང་ལ་ལྷག་པར་གནོད།།
དམ་པ་ཉེ་བར་ཞི་བ་ལ།།
ཁྲོ་བར་བྱ་རྒྱུ་ག་ལ་ཡོད། །

སྡོང་བུ་གཅིག་ལས་སྐྱེས་པ་ཡི།།
རྩྭ་རྣམས་རླུང་གིས་ཕྱོགས་བཅུར་སྟོར།།
དེ་བཞིན་ལྷན་ཅིག་སྐྱེས་པ་ཡིས།།
སྐྱེ་བོ་ལས་ཀྱིས་སོ་སོར་འབྲལ། །

སྔོན་ཆད་མ་མཐོང་འབྲེལ་བར་འཐམ།།
དེ་ནས་སླར་ཡང་གཞན་འགྲོ་བའི།།
མི་དེ་བདག་དང་ཅིར་འབྲེལ་ན།།
ཤི་ནས་མྱ་ངན་ཆེན་པོ་བྱེད། །

རང་དོན་འབད་པས་བསྒྲུབ་འདོད་ན།།
དེ་ཡིས་དང་པོར་གཞན་དོན་སྒྲུབས།།
རང་དོན་ཁོ་ན་གཙོར་བྱེད་པ།།
དེ་ཡིས་རང་དོན་འགྲུབ་མི་སྲིད། །

མི་གང་གཞན་དོན་གཙོར་བྱས་ན།།
གཡོ་ཅན་རང་དོན་སྒྲུབ་པ་འདྲ།།
རང་དོན་འབའ་ཞིག་གཙོར་བྱེད་པ།།
གཞན་མགོ་འདོན་ཕྱིར་དྲང་པོ་འདྲ། །

བློ་ལྡན་ཚེ་འདི་བསྒྲུབ་ན་ཡང་།།
ཆོས་ཀྱིས་བསྒྲུབ་ན་བདེ་བར་འགྲུབ།།
དམ་པ་རྣམས་དང་ཆོམ་རྐུན་གྱི།།
ཕུན་སུམ་ཚོགས་པའི་ཁྱད་པར་ལྟོས། །

མི་རྣམས་ཚེ་ཐུང་དེ་ཡི་ཕྱེད།།
མཚན་མོ་གཉིད་ལོག་ཤི་དང་འདྲ།།
ན་རྒས་སྡུག་བསྔལ་སྣ་ཚོགས་ཀྱིས།།
ཕྱེད་པོའང་བདེ་བར་སྤྱད་དུ་མེད། །

སྐྱེ་བོ་ཀུན་གྱི་དྲུང་སྡོད་པའི།།
འཆི་བདག་གལ་ཏེ་མངོན་སུམ་མཐོང་།།
བྱ་བ་གཞན་དག་ལྟ་ཅི་སྨོས།།
ཟ་བར་དྲན་པའི་ནུས་པ་མེད། །

ཁྱོད་ཀྱིས་བྱ་བ་ཟིན་ནམ་ཞེས།།
འཆི་བདག་སྡོད་པར་མི་འགྱུར་གྱིས།།
ངེས་པར་བྱ་དགོས་ཡོད་ན་ནི།།
དེ་རིང་ཉིད་དུ་བརྟུན་ལ་གྱིས། །

བདག་གིས་བྱ་བ་མ་ཟིན་པས།།
རེ་ཞིག་དེ་རིང་ཁྱོད་བཞུགས་ཞེས།།
མཆི་མས་བརྣངས་ཏེ་གསོལ་བཏབ་ཀྱང་།།
འཆི་བདག་བཅོས་སུ་ག་ལ་རུང་། །

འདུ་འཛི་སྤངས་པ་བདེ་བ་སྟེ།།
མིན་ན་བཟང་པོ་རྣམས་དང་འགྲོགས།།
དུག་སྦྲུལ་གསོ་བ་གང་ལ་རུང་།།
གསོ་ན་བཟླས་བརྗོད་བརྩོན་པར་བྱ། །

སེམས་ནི་རྣམ་པར་གཡེངས་པ་ལ།།
དམ་ཆོས་སྒྲུབ་པའི་གོ་སྐབས་མེད།།
ཉེ་བར་ཞི་བར་གནས་པ་ལ།།
སེམས་ནི་ལས་རུང་ཤིན་ཏུ་ཉེ། །

དམིགས་པ་ཀུན་ལ་རབ་མཁས་ཤིང་།།
ཏིང་ངེ་འཛིན་གྱིས་སེམས་དུལ་བ།།
འཕགས་པའི་ཆོས་ལ་རབ་སྦྱངས་པ།།
ཡོན་ཏན་ཀུན་གྱི་ཞིང་ས་ཡིན། །

བླུན་པོ་སློབ་པ་ངོ་ཚར་འཛིན།།
མཁས་རྣམས་མ་བསླབས་ངོ་ཚར་འཛིན།།
དེས་ན་མཁས་པ་རྒས་གྱུར་ཀྱང་།།
ཕྱི་མའི་དོན་དུ་རིག་པ་སློབ། །

ཤེས་རབ་མེད་པའི་རྒྱུ་མཚན་གྱིས།།
བླུན་པོ་ཡོན་ཏན་མི་སློབ་ལོ།།
བརྟགས་ན་ཤེས་རབ་མེད་ཉིད་ཀྱིས།།
བླུན་པོས་འབད་པ་ལྷག་པར་དགོས། །

སྐྱེ་བ་སྔ་མར་མ་བསླབས་པས།།
ཚེ་འདིར་བླུན་པོར་མཐོང་ནས་ནི།།
ཕྱི་མར་བླུན་པོར་སྐྱེ་དོགས་པས།།
ཚེ་འདིར་དཀའ་ཡང་འབད་དེ་མཉན། །

བསྒོམས་ན་ཐོས་པ་མི་དགོས་ཞེས།།
བླུན་པོ་བློ་རྒྱ་ཆུང་ངུ་སྨྲ།།
ཐོས་པ་མེད་པར་བསྒོམ་པ་ཙམ།།
འབད་ཀྱང་དུད་འགྲོའི་སྒྲུབ་ཐབས་ཡིན། །

རྒྱུ་འབྲས་བསླུ་བ་མེད་པ་འདི།།
ཐམས་ཅད་མཁྱེན་པའི་ཁྱད་ཆོས་ཡིན།།
མ་བསླབས་པ་ལ་ཀུན་མཁྱེན་དུ།།
འགྲོ་ན་རྒྱུ་འབྲས་ག་ལ་བདེན། །

ཐོས་པ་མེད་པའི་བསྒོམ་པ་དེ།།
རེ་ཞིག་གྲུབ་ཀྱང་མྱུར་དུ་འཇིག
གསེར་དངུལ་ལེགས་པར་བཞུ་ན་ཡང་།།
མེ་དང་བྲལ་ན་སྲ་བར་འགྱུར། །

ཤེས་རབ་ཀྱིས་ནི་གཏིང་བརྟགས་ནས།།
ཉེས་རྒྱུ་སྤོང་བ་སྒོམ་པ་ཡིན།།
ལུས་ཀྱི་དྲི་མ་བཀྲུས་པ་ལྟར།།
བསྒོམས་ཀྱང་རིང་ཞིག་ལོན་ནས་ལྡོག །

རྒྱུ་འབྲས་ཕུལ་བྱུང་མ་ཚོགས་པར།།
བདག་མེད་རྟོགས་ཀྱང་འཚང་མི་རྒྱ།།
ཐབས་མཆོག་དག་གིས་མ་བསྒྲུབས་པའི།།
བདེན་པར་མཐོང་ཡང་དགྲ་བཅོམ་མིན། །

དེས་ན་ཆོས་རྣམས་ལེགས་རྟོགས་ཏེ།།
ཏིང་ངེ་འཛིན་ལ་སེམས་བཞག་ན།།
ཉེས་པ་བག་ཆགས་དང་བཅས་པ།།
གང་གིས་སྤངས་པ་རྫོགས་འཚང་རྒྱ། །

གང་ལ་བློ་གྲོས་མི་ལྡན་ན།།
བསྟན་བཅོས་ལེགས་ཀྱང་སུ་ཞིག་ལེན།།
ནོར་བུས་སྤྲས་པའི་གསེར་གྱི་རྒྱན།།
མཛེས་ཀྱང་བ་ལང་ག་ལ་བལྟ། །

མཁས་པ་རྣམས་ཀྱིས་ལེགས་བཤད་ཀུན།།
ཤིན་ཏུ་བདེན་པར་གོ་བཞིན་ཏུ།།
དེ་དོན་ཉམས་སུ་མི་ལེན་ན།།
བསྟན་བཅོས་ཤེས་ཀྱང་ཅི་ཞིག་བྱ། །

རང་ལ་དགོས་པའི་བསྟན་བཅོས་རྣམས།།
ཉི་མ་རེ་རེར་ཚིག་རེ་བཟུང་།།
གྲོག་མཁར་དང་ནི་སྦྲང་རྩི་ལྟར།།
རིང་པོར་མི་ཐོགས་མཁས་པར་འགྱུར། །

ལེགས་པར་སྤྱོད་ལ་འཇུག་འདོད་ན།།
ཅི་ནས་འདི་ཡི་ཁ་མཉན་ཏེ།།
དམ་པ་ཀུན་ཏུ་སྲན་བཙུགས་ནས།།
སྲོག་ལ་བབས་ཀྱང་ལུགས་བཞིན་བསྐྱང་། །

དེ་ལ་འབད་པས་གཞུང་ལུགས་ནས།།
འབྱུང་བཞིན་གཉེན་པོས་བསྒྲུབ་ནུས་ན།།
མཁས་རྣམས་རྫུན་པ་མི་གསུང་གིས།།
འདི་ཡི་ཕན་ཡོན་ཕྱི་ནས་ལྟོས། །

སྔོན་ཡང་འདི་བཞིན་སྤྱད་རྣམས་འཕེལ།།
ད་ལྟ་ན་ཡང་དེ་ལྟར་མཐོང་།།
གཏན་ཚིགས་བཟང་པོ་འདི་ཡིས་ནི།།
མ་འོངས་རྣམས་ཀྱང་ཕུན་ཚོགས་འཐོབ། །

བློ་ལྡན་རང་གིས་ཤེས་ན་ཡང་།།
མཁས་པའི་གཞུང་ལུགས་གུས་པས་བལྟ།།
རིན་ཆེན་ཤིན་ཏུ་བཟང་པོ་ཡང་།།
མ་བཙོངས་བར་དུ་རིན་ཐང་ཆུང་། །

ནགས་ཚལ་ཤིན་ཏུ་མང་མོད་ཀྱང་།།
ཙན་དན་ས་མཆོག་སྐྱེ་བ་ཉུང་།།
དེ་བཞིན་མཁས་པ་མང་ན་ཡང་།།
ལེགས་བཤད་འབྱུང་བ་ཤིན་ཏུ་དཀའ། །

རྟ་མཆོག་འགྲོ་བའི་ཚེ་ན་ཤེས།།
གསེར་དངུལ་བཞུ་ན་ཤེས་པར་འགྱུར།།
གླང་ཆེན་གཡུལ་ངོར་ཤེས་འགྱུར་ཏེ།།
མཁས་པ་ལེགས་བཤད་རྩོམ་ན་ཤེས། །

གང་ཞིག་འཇིག་རྟེན་ཐམས་ཅད་ཀྱིས།།
རང་ལ་ཚད་མར་བྱེད་འདོད་ན།།
དེ་ཡིས་གཞུབ་འདི་ལེགས་བརྟགས་ཏེ།།
གཉེན་པོ་བསྐྱེད་ལ་འབད་དེ་བསྒྲུབ། །

འཇིག་རྟེན་བྱ་བ་ལེགས་ཤེས་པ།།
དེ་ཡིས་དམ་པའི་ཆོས་ལུགས་འགྲུབ།།
དེས་ན་ཆོས་ལུགས་སྤྱོད་པ་དེ།།
བྱང་ཆུབ་སེམས་དཔའི་རྣམ་ཐར་ཡིན། །

ལེགས་པར་བཤད་པ་རིན་པོ་ཆེའི་གཏེར་ལས་ཆོས་བརྟག་པ་ཞེས་བྱ་བ་རབ་ཏུ་བྱེད་པ་དགུ་པའོ།། །།

WordPress Lightbox