ནོར་འཛིན། འཛིན་གྲྭ་བཅུ་པ། བདེ་སླར་སམ་བྷོ་ཊ་སཱི་ཝི་པི་ཉིན་སློབ། ང་ཚོའི་འཛམ་གླིང་འདིའི་ནང་ལུང་པ་ཆེ་ཆུང་འདྲ་མིན་མང་པོ་ཡོད། ལུང་པ་མང་པོ་ཡོད་པ་ནང་བཞིན་སྐད་ཡིག་ཀྱང་མི་འདྲ་མང་པོ་ཡོད། ལུང་པ་ཚང་མའི་སྐད་ཡིག་ལ་ཐུན་མོང་མ་ཡིན་པའི་ཁྱད་ཆོས་རེ་ཡོད། ང་ཚོ་བོད་པའི་ལུང་པ་ལ་ཡང་བོད་སྐད་དང་ཡི་གེ་ཡོད། བོད་ལ་སྐད་དུས་སྔ་མོ་ནས་ཡོད། བོད་ཀྱི་ས་ཕྱོགས་སོ་སོ་ལ་སྐད་མི་འདྲ་བ་རེ་རེ་ཡོད། དཔེར་ན་མདོ་སྟོད་ལ་མདོ་སྟོད་སྐད་དང་། མདོ་སྨད་ལ་མདོ་སྨད་སྐད། དབུས་གཙང་ལ་དབུས་གཙང་སྐད་ཡོད། སྐད་རིགས་མི་འདྲ་བ་ཡོད་ན་ཡང་བོད་ཡོངས་ལ་དུས་རབས་བདུན་པའི་ནང་ཐོན་མི་སམ་བྷོ་ཊས་བཟོས་པའི་ཡི་གེ་དེ་བེད་སྤྱོད་བྱེད་ཀྱི་ཡོད། ང་ཚོ་བོད་ཀྱི་སྐད་གལ་ཆེན་པོ་དང་དེ་བདག་པོ་བརྒྱབ་དགོས་པའི་སྐོར་ཤོད་འདོད་ཡོད། གང་ཡིན་ཟེར་ན། སྐད་ཡིག་ཚང་མའི་ནང་ནས་བོད་ཡིག་དེ་གལ་ཆེ་ཤོས་ཡིན། ད་ལྟ་ང་ཚོ་བོད་པ་ཚོ་འཛམ་གླིང་འདིའི་ནང་མིང་ཡོད་པ་དེ་བོད་ཀྱི་སྐད་ཡིག་ལས་བྱུང་བ་རེད། ང་ཚོ་བོད་པ་ཡིན་པའི་ཆ་ནས་བོད་ཀྱི་སྐད་ཡིག་དེ་སོ་སོའི་སྲོག་ལས་གལ་ཆེ་བ་རེད། སྲོག་མེད་ན་མི་ལུས་ལ་བེད་སྤྱོད་མེད་པ་བཞིན་ནོ། བོད་ཀྱི་སྐད་ཡིག་དེ་ང་ཚོ་བོད་པ་ཙམ་མ་ཟད་འཛམ་གླིང་ཡོངས་ལ་གལ་ཆེན་པོ་རེད། མི་ཚང་མ་སྐད་དང་ཤ་མདོག་ཆ་ནས་མི་འདྲ་བ་རེད། ཡིན་ན་ཡང་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་པ་རེད། བདེ་བ་དངོས་གནས་གང་ཡིན་པ་དང་སྡུག་བསྔལ་མེད་པ་བཟོ་དགོས་ན་ནང་ཆོས་ལས་ལྷག་པ་མེད། ནང་ཆོས་སྦྱོང་བ་ལ་བོད་ཡིག་ཤེས་དགོས། ནང་ཆོས་སྦྱངས་ན་མིའི་བསམ་བློ་ཡག་པོ་ཆགས་ནས་གཞན་ལ་ཕན་པའི་ལས་ཀ་མང་པོ་བྱེད་ཐུབ། གཞན་པ་ཕན་པ་ནི་ཚང་མས་ཡག་པོ་མཐོང་གི་རེད། དེང་སང་འཛམ་གླིང་ནང་མི་གཅིག་གི་གཅིག་ལ་དང་། ལུང་པ་གཅིག་གི་གཅིག་ལ་འཁྲུག་པ་དང་། རྫུན་མ་ཕྲག་དོག་མ་དགའ་བ་ཚང་མ་བསམ་བློ་ཡག་པོ་བཏང་མ་ཤེས་པ་སོང་ཙང་བྱུང་བ་རེད། བསམ་བློ་ཡག་པོ་གཏོང་ཡ་ལ་བོད་ཡིག་སྦྱང་ནས་ནང་ཆོས་སྦྱང་དགོས། བོད་ཡིག་བདག་པོ་མ་བརྒྱབས་ན་དང་པོ་བོད་པ་རྣམས་འཛམ་གླིང་ནང་ནས་བརླག་འགྲོ་གི་རེད། དེ་ནས་འཛམ་གླིང་ནང་ཞི་བདེ་དང་བདེ་སྐྱིད་མེད་པ་ཆགས་ཀྱི་རེད། སངས་རྒྱས་ཀྱི་ཆོས་དངོས་གནས་དེ་ཡང་བརླགས་འགྲོ་གི་རེད། བོད་ཡིག་བདག་པོ་བརྒྱབ་ཡ་དེ་སུ་ཡི་ལས་འགན་རེད་དམ། བདག་པོ་རྒྱབ་སྟངས་གང་དང་གང་རེད་དམ་ཟེར་ན། བོད་ཡིག་དེ་བོད་པ་ཚོས་བདག་པོ་བརྒྱབ་དགོས། བདག་པོ་རྒྱབ་སྟངས་ཀྱི་ཐབས་ལམ་མང་པོ་ཡོད། དཔེར་ན་ནམ་རྒྱུན་དུ་བོད་སྐད་བེད་སྤྱོད་བྱེད་དགོས་པ་མ་ཟད་བོད་སྐད་ནང་སྐད་གཞན་མེད་པའི་ཐབས་ཤེས་བྱ་དགོས། རྟག་པར་བོད་ཡིག་ནང་བྲིས་པའི་དེབ་དང་སྒྲུང་སོགས་ཀློག་དགོས། བོད་སྐད་ཀྱི་གློག་བརྙན་གང་མང་ལྟ་དགོས། ༸གོང་ས་མཆོག་གི་བཀའ་སློབ་ཐུང་ཐུང་རྣམས་ཀློག་དགོས། བོད་ཕྲུག་ཚོ་བོད་པའི་སློབ་གྲ་ལ་འགྲོ་དགོས། བོད་སྐད་བཤད་ཡ་ལ་རྒྱབ་སྐྱོར་དང་སྟོད་སྔགས་བྱེད་དགོས། སློབ་གྲྭ་ལ་དགེ་རྒན་ཚོས་སློབ་ཚན་གཞན་དག་རྣམས་བོད་སྐད་ནང་འགྲེལ་བཤད་བྱེད་དགོས། དགེ་རྒན་དང་མི་མཐོ་བ་ཚོས་གཏམ་བཤད་བོད་སྐད་ནང་གནང་དགོས། སློབ་གྲྭའི་ནང་བོད་སྐད་ཐོག་ནས་གཏམ་བརྗོད་དང་བགྲོ་གླེང་སོགས་མང་པོ་བྱེད་དགོས། གལ་སྲིད་རང་གི་རྒྱལ་ཁབ་དང་མི་རིགས་ལ་དགའ་པོ་ཡོད་ན། བོད་པ་ཚོས་བོད་ཡིག་སྦྱངས་ནས་བདག་པོ་བརྒྱབ་དགོས། བོད་སྐད་བེད་སྤྱོད་བྱེད་པ་ལ་ངོ་ཚ་དགོས་མ་རེད།