སློབ་དཔོན་ཟམ་གདོང་རིན་པོ་ཆེ་ནས་འགྲེལ་པ་ཆ་ཚང་། ཤེས་རིག་ལས་ཁུངས། · ལེགས་བཤད་བློ་གསར་མིག་འབྱེད། སློབ་དཔོན་ཟམ་གདོང་རིན་པོ་ཆེ། ༡) ཆོས་བྱེད་དགོས་པའི་རྒྱུ་མཚན། ༄༅། །ཆོས་རབ་ཏུ་རྣམ་པར་འབྱེད་པའི་མཐར་ཐུག་པའི་ཡེ་ཤེས་ལ་ཕྱག་འཚལ་ལོ། །དེ་ལ་འདིར་སྟོན་པ་རྣམ་འདྲེན་བཞི་པའི་བསྟན་པ་ལྔ་བརྒྱ་པ་ཕྲག་བཅུའི་ཚུལ་ཁྲིམས་ཀྱི་ལེའུའི་སྐབས་ཏེ་དུས་རབས་ཉི་ཤུ་པ་རྫས་མཚོན་གྱི་བསྐལ་པའི་དུས་འདིར་ཕྱི་དངོས་པོའི་རིག་གནས་འཕེལ་རྒྱས་བྱུང་བ་དང་འབྱུང་འགྱུར་བཞིན། ནང་བསམ་པའི་འཕེལ་རྒྱས་ཀྱང་ལྷན་ཅིག་ཏུ་དགོས་པ་ཤིན་ཏུ་གལ་མཁོ་ཆེ་ཞིང༌། དེ་ལ་ནང་དོན་རིག་པ་ནང་པ་སངས་རྒྱས་ཀྱི་ཆོས་ཚུལ་བསམ་དང་སྒོམ་པས་སྒྲུབ་པ་ལ། དེའི་ཚུལ་ཤེས་དགོས་པས། ཟབ་ཅིང་བརླིང་བའི་གཞུང་ཆེན་པོ་དག་བལྟ་བར་མ་ཁོམ་པའི་སྐྱེ་བོ་དག་གི་བསོད་ནམས་ཀྱི་བགོ་སྐལ་དུ་ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱི་སྣང་བ་རྒྱས་པར་བྱེད་པའི་བསྟན་བཅོས་ཚིག་ཉུང་གོ་བདེ་གཙོ་བོར་བྱས་པ་བློ་གསར་མིག་འབྱེད་ཅེས་བྱ་བ་འདི་བཤད་པར་བྱའོ། ། དེ་ལ་འགྲོ་བ་ཐམས་ཅད་བདེ་བ་འདོད་པ་དང༌། སྡུག་བསྔལ་མི་འདོད་པ་མཉམ་ཞིང༌། དེ་ཡང་རང་རེ་ཤེས་རིག་བཀྲ་བའི་མི་ཙམ་དུ་མ་ཟད། བླུན་ཞིང་གཏི་མུག་པ་ཐ་ན་སྲོག་ཆགས་འབུ་སྲིན་ཕྲ་མོ་ཡན་ཆད་ཀྱང་བདེ་བ་ཞིག་འདོད་པ་དང༌། སྡུག་བསྔལ་ཕྲ་མོ་ཙམ་ཡང་མི་འདོད་པ་ཤ་སྟག་ཡིན། དེས་ན་རང་གཞན་སུ་ཡིན་ཡང་བདེ་བ་འབྱུང་བ་དང༌། སྡུག་བསྔལ་མི་འབྱུང་བའི་ཐབས་ཤིག་བྱ་དགོས། དེ་མིན་རང་ལ་བདེ་བ་ཞིག་བྱུང་ན་སྙམ་པ་དང༌། སྡུག་བསྔལ་དེ་མེད་ན་ཅི་མ་རུང་སྙམ་པའི་རེ་འདོད་ཆེན་པོས་སྒུག་ནས་བསྡད་པ་ཙམ་གྱིས་བདེ་བ་འབྱུང་བ་དང༌། སྡུག་བསྔལ་སེལ་མི་ནུས་པས། བདེ་བ་གང་ལས་འབྱུང་བའི་རྒྱུ་སྒྲུབ་པ་དང༌། སྡུག་བསྔལ་འབྱུང་བའི་གཞི་སྤོང་ནུས་པ་ཞིག་དགོས། ཕན་པ་བདེ་བའི་རྒྱུ་སྒྲུབ་བྱེད་དང༌། གནོད་པ་སྡུག་བསྔལ་སྤོང་བའི་ཐབས་ནི་ཆོས་ལ་བརྟེན་ནས་བསྒྲུབས་པ་དང་འདྲ་བ་ཐབས་ ཚུལ་གཞན་ཇི་ལྟར་བྱས་ཀྱང་ཡང་དག་པ་དང༌། མཐར་ཕྱིན་པ་སྒྲུབ་མི་ནུས། ཆོས་ཀྱི་སྟེང་ནས་ཚེ་འདི་དང༌། སྐྱེ་བ་ཕྱི་མ། དེའི་ཡང་ཕྱི་མ་སོགས་འདི་ཕྱི་ཚེ་རབས་མང་པོའི་བདེ་བ་སྐྱེད་ཐུབ་ཅིང༌། སྡུག་བསྔལ་སེལ་ནུས། ཚེ་འདི་ལ་མཚོན་ནའང་བདེ་བ་སྐྱེད་པ་དང༌། སྡུག་བསྔལ་སྤོང་བ་ལ་ཆོས་ལས་ལྷག་པ་མེད་པ་ནི། དཔེར་ན་ལུས་ལ་ན་ཚ་ཞིག་བྱུང་ན་ཡང༌། ཆོས་ཀྱི་གནད་དོན་རྟོགས་པ་དང་མ་རྟོགས་པ་གཉིས་ལ་ལུས་སེམས་ཀྱི་སྡུག་བསྔལ་ཆེ་ཆུང་དང་དེ་སེལ་ནུས་མིན་གྱི་ཁྱད་པར་ཤིན་ཏུ་ཆེ་སྟེ། ཆོས་ཀྱི་གནད་མ་རྟོགས་པ་དང༌། ཆོས་ཀྱི་བྱིན་རླབས་ཀྱི་རྩི་གང་ཡང་མེད་པའི་མི་དེར་ལུས་ཀྱི་ནད་ཀྱི་ཚོར་བ་དྲག་པོའི་སྟེང་དུ་སེམས་ལ་ནད་དེ་མི་བཟོད་པའི་སྡུག་བསྔལ་ཆེན་པོ་ཞིག་གིས་ནོན་ནས་ལུས་སེམས་གཉིས་ཀ་བདེ་བའི་གོ་སྐབས་མེད་པར་སྡུག་བསྔལ་གྱིས་མནར་བ་རེད། ཆོས་ཀྱི་གནད་དོན་རྟོགས་པ་ཞིག་ཡིན་ན། ལུས་ལ་ན་ཚ་བྱུང་བ་དེ། སྔོན་བསགས་སྡིག་པའི་འབྲས་བུ་ཡིན་པ་དང༌། འཁོར་བའི་རང་བཞིན་དུ་མཐོང་ནས་ལས་བདག་གིར་བྱ་འདོད་ཀྱི་བསམ་པ་སོགས་ལ་བརྟེན་ནས་སྡུག་བསྔལ་དང་དུ་བླངས་པས་ཡིད་ཀྱི་སྡུག་བསྔལ་མི་འབྱུང༌། དེ་མི་འབྱུང་བས་ཕྱི་ལུས་ཀྱི་ནད་ཀྱི་སྡུག་བསྔལ་དེ་ནང་བསམ་པའི་སྟོབས་ཀྱིས་ཟིལ་གྱིས་མནན་ནས་སྡུག་བསྔལ་སེལ་ནུས་པ་འབྱུང༌། དེའི་རྒྱུ་མཚན་ལུས་སེམས་གཉིས་ཀྱི་ནང་ནས། སེམས་དེ་ལུས་ལ་དབང་སྒྱུར་བའི་གཙོ་བོ་ལྟ་བུ་དང༌། ལུས་དེ་སེམས་ཀྱི་དབང་བསྒྱུར་བྱ་ལྟ་བུར་གནས་པས་བདེ་སྡུག་གི་ཚོར་བ་སེམས་ཀྱི་དེ་མཐུ་ཆེ་བ་ཡིན། དེ་བཞིན་དུ། འགའ་ཞིག་གིས་ཕྱུག་པོའི་བདེ་སྐྱིད་ཅིག་འདོད་ནས་རྒྱུ་ནོར་གསོག་སྲུང་བྱེད་ཀྱང༌། ཐོག་མར་ལུས་སེམས་ཀྱི་ངལ་བ་ཆེན་པོས་འབད་རུང་རེ་འདོད་ལྟར་བསག་མི་ནུས་པའི་སྡུག་བསྔལ། བར་དུ་གཞན་གྱིས་འཕྲོག་པ་དང་། བོར་སྟོར་འབྱུང་བ་དང༌། ཆུད་ཟོས་སུ་འགྲོ་བ་སོགས་ཀྱིས་བསྲུང་མི་ནུས་པའི་སྡུག་བསྔལ། […]
བོད་དུ་རིག་གནས་དར་ཚུལ།
ན་ག་སངས་རྒྱལ་བསྟན་དར་ནས་འགྲེལ་པ་ཆ་ཚང་། ཤེས་རིག་ལས་ཁུངས། · བོད་དུ་རིག་གནས་དར་ཚུལ། ན་ག་སངས་རྒྱས་བསྟན་དར་ནས་འགྲེལ་བ། བོད་དུ་རིག་གནས་དར་ཚུལ་མདོར་བསྡུས་བཤད་པ། << དམུ་དགེ་བསམ་གཏན་གྱི་བརྩམས།>> བསྟན་པ་སྔ་དར་གྱི་སྐབས་སུ་བོད་དུ་རིག་གནས་དར་ཚུལ། བོད་སྤྱི་ལ་དབང་བའི་རྒྱལ་པོའི་ཐོག་མ་གཉའ་ཁྲི་བཙན་པོ་ཡིན་ལ། དེ་ནས་མུ་ཁྲི་བཙན་པོ། དེང་ཁྲི་བཙན་པོ། ཤོ་ཁྲི་བཙན་པོ། (སོ་ཁྲིའང་ཟེར་) མེ་ཁྲི་བཙན་པོ། གདགས་ཁྲི་བཙན་པོ། སྲིབ་ཁྲི་བཙན་པོ་སྟེ་གནམ་གྱི་ཁྲི་བདུན་དུ་གྲགས་པ་འདི་དག་གི་དུས་སུ་རིག་གནས་ སོགས་དར་ཚུལ་གྱི་ལོ་རྒྱུས་མ་མཐོང༌། དེ་ནས་གྲི་གུམ་བཙན་པོ། རྒྱལ་པོ་འདིས་བློན་པོ་དང་འཐབ་པའི་དུས་སུ་ཁྲབ་བླངས་པས་ཁྲབ་སྤྱོད་པའི་ཐོག་མ་ཡིན་ཟེར། དེ་ནས་སྤུ་དེ་གུང་རྒྱལ། དེའི་བློན་པོ་རུ་ལས་སྐྱེས་ནི་འཕྲུལ་བློན་མཛངས་པའི་མི་བདུན་གྱི་ཐོག་མ་ཡིན་ལ། རྒྱལ་བློན་དེ་གཉིས་ཀྱི་རིང་ལ་ཐོང་གཤོལ་བཟོ་བ་དང་ཞིང་ལ་ཆུ་འདྲེན་པ་སོགས་ཞིང་ ལས་དར་བའི་འགོ་ཚུགས་པ་དང༌། གསེར་དངུལ་ཟངས་ལྕགས་ཀྱི་རྡོའི་གཏེར་ཁ་ཕུད་དེ་བཞུ་ལེན་སོགས་བཟོ་ལས་ཅུང་དར་བ་ དང༌། ཆུ་ལ་ཟམ་འཛུགས་པ་སོགས་འགྲིམ་འགྲུལ་གྱི་ལམ་སོགས་ལའང་ཡར་རྒྱས་ཆེ་ཙམ་བྱུང་བ་ དང༌། ཡང་འདིའི་དུས་བོན་སྒྲུང་ལྡེའུ་གསུམ་བྱུང་བ་རིག་གནས་ཀྱི་གྲངས་སུ་བརྩི། བོན་ནིདགེ་སྒྲུབ་ལྷ་མཆོད་འདྲེ་འདུལ་མོ་རྩིས་སོགས་དང༌། སྒྲུང་ནི། རོ་ལངས་གསེར་སྒྲུབ་ཀྱི་སྒྲུང་དང༌། མ་སངས་སྒྲུང་དང༌། མཆིལ་བའི་སྒྲུང་སོགས་ཉན་བཤད་དང༌། ལྡེའུ་ནི་ཁེད་འཇོག་པ་སྟེ། དཔེར་ན། ཐེམ་གཉེར་ཝ་བ་ཆེ། (སྲང་།) ཅི་ཡིན་ཞེས་འདྲི་བ་ལྟ་བུའོ།། དེ་ནས་ཨེ་ཤོ་ལེགས། འདིའི་བློན་པོ་ལྷ་བུ་མགོ་དཀར་ནི༑ འཕྲུལ་བློན་མཛངས་མི་བདུན་གྱི་གཉིས་པ་ཡིན། ཞིང་ལ་དོར་ཁ་བརྩིས། འབྲོག་ལ་ཐུར་རྩིས་བྱས། ཕུ་ཆུ་མདའ་རུ་དྲངས་ཏེ་མདའ་ཞིང་ཆུ་མ་རྒྱ་ཆེར་བཟོས། ཨེ་ཤོ་ལེགས། དེ་ནས་དེ་ཤོ་ལེགས། ཐི་ཤོ་ལེགས། གུ་རུ་ལེགས། འབྲོང་ཞི་ལེགས། ཨི་ཤོ་ལེགས་ཏེ་སའི་ལེགས་དྲུག་དང༌། དེ་ནས་ཟ་ནམ་ཟིན་ལྡེ། ལྡེ་འཕྲུལ་ནམ་གཞུང་བཙན། སེ་སྣོལ་ནམ་ལྡེ༑ སེ་སྣོལ་བོ་ལྡེ། […]
བཤེས་སྤྲིངས།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་འགྲེལ་པ། ཤེས་རིག་ལས་ཁུངས། · བཤེས་སྤྲིངས་ཀྱི་བཀའ་ཁྲིད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་འགྲེལ་པ། སློབ་དཔོན་ཟམ་གདོང་རིན་པོ་ཆེ་མཆོག་ནས་འགྲེལ་པ། ཤེས་རིག་ལས་ཁུངས། · བཤེས་པའི་སྤྲིངས་ཡིག ཟམ་གདོང་རིན་པོ་ཆེའི་འགྲེལ་བ། དགེ་བའི་བཤེས་གཉེན་ཆེན་མོ་དགའ་ལྡན་སྙན་གྲགས་མཆོག་གིས་འཆད་ཁྲིད་གནང་། ཤེས་རིག་ལས་ཁུངས། · བཤེས་སྤྲིངས། དགེ་བའི་བཤེས་གཉེན་ཆེན་མོ་དགའ་ལྡན་སྙན་གྲགས་མཆོག་གིས་འཆད་ཁྲིད་གནང་། ༄༅། །རྒྱ་གར་སྐད་དུ། སུ་ཧྲྀ་ད་ལེ་ཁ། བོད་སྐད་དུ། བཤེས་པའི་སྤྲིངས་ཡིག འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།། རྩ་བ་ ༡-༣ མཉན་པར་གདམས་པ། ཡོན་ཏན་རང་བཞིན་དགེ་འོས་བདག་གིས་ནི། །བདེ་བར་གཤེགས་པའི་གསུང་བསྙད་ལས་བྱུང་བའི། །བསོད་ནམས་འདུན་སླད་འཕགས་པའི་དབྱངས་འདི་དག །ཅུང་ཟད་ཅིག་བསྡེབས་ཁྱོད་ཀྱིས་གསན་པའི་རིགས། ༡ ། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང༌། །བགྱིས་པ་ཅི་འདྲའང་རུང་སྟེ་མཁས་པས་མཆོད། །དེ་བཞིན་བདག་གི་སྙན་ངག་འདི་ངན་ཡང༌། །དམ་ཆོས་བརྗོད་ལ་བསྟེན་སླད་སྨད་མི་བགྱི། ༢ ། ཐུབ་པ་ཆེན་པོའི་བཀའ་ནི་སྙན་དགུ་ཞིག །ཁྱོད་ཀྱི་ཐུགས་སུ་ལྟ་ཡང་ཆུད་མོད་ཀྱི། །རྡོ་ཐལ་ལས་བགྱིས་དགུང་ཟླའི་འོད་ཀྱིས་ནི། །ཆེས་དཀར་ཉིད་དུ་ཅི་སྟེ་མི་བགྱིད་ལགས། ༣ ། རྩ་བ་ ༤ གཞུང་དངོས་ལས་རྗེས་དྲན་དྲུག་ལ་སློབ་པར་གདམས་པ། རྒྱལ་བས་སངས་རྒྱས་ཆོས་དང་དགེ་འདུན་དང༌། །གཏོང་དང་ཚུལ་ཁྲིམས་ལྷ་རྗེས་དྲན་པ་དྲུག །རབ་ཏུ་བཀའ་སྩལ་དེ་དག་སོ་སོ་ཡི། །ཡོན་ཏན་ཚོགས་ཀྱིས་རྗེས་སུ་དྲན་པར་བགྱི། ༤ ། རྩ་བ་ ༥ སྤྱིར་དགེ་བའི་ལས་དང་འཚོ་བ་ལ་གནས་པར་གདམས་པ། དགེ་བའི་ལས་ལམ་བཅུ་པོ་ལུས་དང་ནི། །ངག་དང་ཡིད་ཀྱིས་རྟག་ཏུ་བསྟེན་བགྱི་ཞིང༌། །ཆང་རྣམས་ལས་ལྡོག་དེ་བཞིན་དགེ་བ་ཡི། […]
བློ་སྦྱོང་ཚིགས་བརྒྱད་མ།
ཤེས་རིག་ལས་ཁུངས། · བློ་སྦྱོང་ཚིགས་བརྒྱད་མ། ༄༅། །བདག་ནི་སེམས་ཅན་ཐམས་ཅད་ལ། །ཡིན་བཞིན་ནོར་བུ་ལས་ལྷག་པའི། །དོན་མཆོག་སྒྲུབ་པའི་བསམ་པ་ཡིས། །རྟག་ཏུ་གཅེས་པར་འཛིན་པར་ཤོག ། གང་དུ་སུ་དང་འགྲོགས་པའི་ཚེ། །བདག་ཉིད་ཀུན་ལས་དམན་བལྟ་ཞིང༌། །གཞན་ལ་བསམ་པ་ཐག་པ་ཡིས། །མཆོག་ཏུ་གཅེས་པར་འཛིན་པར་ཤོག ། སྤྱོད་ལམ་ཀུན་ཏུ་རང་རྒྱུད་ལ། །རྟོག་ཅིང་ཉོན་མོངས་སྐྱེས་མ་ཐག །བདག་གཞན་མ་རུང་བྱེད་པས་ན། །བཙན་ཐབས་གདོང་ནས་ལྡོག་པར་ཤོག ། རང་བཞིན་ངན་པའི་སེམས་ཅན་རྣམས། །སྡིག་སྡུག་དྲག་པོས་ནོན་མཐོང་ཚེ། །རིན་ཆེན་གཏེར་དང་ཕྲད་པ་ལྟར། །རྙེད་པར་དཀའ་བས་གཅེས་འཛིན་ཤོག ། བདག་ལ་གཞན་གྱིས་ཕྲག་དོག་གིས། །གཤེ་སྐུར་ལ་སོགས་མི་རིགས་པའི། །གྱོང་ཁ་རང་གིས་ལེན་པ་དང༌། །རྒྱལ་ཁ་གཞན་ལ་འབུལ་བར་ཤོག ། གང་ལ་བདག་གིས་ཕན་བཏགས་པའི། །རེ་བ་ཆེ་བ་འགའ་ཞིག་གིས། །ཤིན་ཏུ་མི་རིགས་གནོད་བྱེད་ནའང༌། །བཤེས་གཉེན་དམ་པར་བལྟ་བར་ཤོག ། མདོར་ན་དངོས་སམ་བརྒྱུད་པ་ཡིས། །ཕན་བདེ་མ་རྣམས་ཀུན་ལ་འབུལ། །མ་ཡི་གནོད་དང་སྡུག་བསྔལ་ཀུན། །གསང་བས་བདག་ལ་ལེན་པར་ཤོག ། དེ་དག་ཀུན་ཀྱང་ཆོས་བརྒྱད་ཀྱི། །རྟོག་པའི་དྲི་མས་མ་སྦགས་ཤིང༌། །ཆོས་རྣམས་སྒྱུ་མར་ཤེས་པ་ཡིས། །ཞེན་པའི་འཆིང་བ་ལས་གྲོལ་ཤོག། །།