༄༅། །ཤེས་རིག་ཚོགས་ཆེན་ཐེངས་གཉིས་པ་དེ་ཕྱི་ལོ་༡༩༧༢ ལོའི་ཟླ་ ༡༠ ཚེས་ ༢༠ ནས་ ༢༥ བར་ཉིན་གྲངས་ལྔའི་རིང་བཞུགས་སྒར་གངས་ཅན་སྐྱིད་གཤོངས་ཀྱི་བོད་ཀྱི་དཔེ་མཛོད་ཁང་དུ་ལྷན་ཚོགས་བསྐྱངས། ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་ཞལ་བསྒྱུར་ཏེ་བླང་དོར་བཀའ་སློབ་སྩལ་ཡོད་པ་དང། ཚོགས་འདུ་ཡི་གྲོས་ཆོད་གཏན་འབེབས་བསྐྱངས་རྗེས་ཚོགས་བཅར་བ་ཡོངས་ལ་དམིགས་བསལ་གྱི་དྲི་བ་དྲིས་ལན་གྱི་གོ་སྐབས་གནང་བ་མ་ཟད། ལམ་སྟོན་བཀའ་སློབ་ཀྱང་སྩལ་གནང་མཛད་པ་གཤམ་གསལ།

[sections]
[section][/section] [section title=”བཞུགས་སྒར་གངས་ཅན་སྐྱིད་གཤོངས་དཔེ་མཛོད་ཁང་དུ་ཤེས་རིག་ཚོགས་འདུ་ཐེངས་གཉིས་པར་གནང་བའི་བཀའ་སློབ།”]

(ཕྱི་ལོ་ ༡༩༧༢ ཟླ་ ༡༠ ཚེས་ ༢༠ ཉིན།)

ཤར་ནུབ་དང་ཕྱི་ནང་གི་ཡོན་ཏན་གང་ཡིན་རུང་རྩ་བའི་སྙིང་པོ་དེ་མི་ལ་བདེ་སྐྱིད་གསར་པ་ཐོབ་པ་དང༌མཐུན་རྐྱེན་འཛོམས་སུ་འགྲོ་བའི་དོན་དུ་རེད།

   དེ་རིང་འདིར་ཁྱོད་ཚོ་ངོ་འཛོམས་གནང་མཁན་ཚང་མར་ངས་བཀྲ་ཤིས་བདེ་ལེགས་ཞུ་རྒྱུ་དང༌། དོ་སྣང་ཆེན་པོ་བྱས་ནས་འདིར་ཕེབས་པ་ལ་ཐུགས་རྗེ་ཆེ་ཞེས་ཞུ་གི་ཡོད།
གཞན་དག་ང་ཞུ་རྒྱུ་མང་པོ་མི་འདུག ང་ཚོ་འདིར་ཚོགས་དགོས་པའི་རྒྱུ་མཚན་ད་ལྟ་ཁོང་རྣམ་གཉིས་ནས་ལབ་སོང༌། ང་ཚོ་ཚང་མས་ཤེས་གསལ་ལྟར། ང་ཚོ་མི་ཟེར་བ་འདི་ཐོག་མར་སྐྱེས་པའི་སྐབས་ཤེས་ཡོན་ཅན་བྱས་ཏེ་སྐྱེས་པ་མིན། ཤེས་ཡོན་ཞེས་པ་འདི་མི་ལ་རང་ཆས་སུ་ཡོད་པ་ཡང་མ་ཡིན། དེ་ཐབས་ཤེས་བྱས་ཏེ་གསར་དུ་བསྒྲུབ་དགོས། དེ་སྒྲུབ་པའི་དགོས་དོན་སྙིང་པོ་དེ་གང་ཡིན་ཟེར་ན་མི་ལ་བདེ་སྐྱིད་ཅིག་བྱུང་ན་བསམ་ནས་སྒྲུབ་པ་མ་གཏོགས། ང་ཚོར་རྙོག་དྲ་སྣོན་མ་བཟོ་རྒྱུའི་དོན་དུ་མིན་ལ། བྱེད་རྒྱུས་ཕོངས་ནས་བྱས་པ་ཡང་མིན། བདེ་སྐྱིད་བསྒྲུབ་རྒྱུའི་དོན་དུ་མི་ལ་རང་བཞིན་གྱི་བསམ་བློ་གཏོང་རྒྱུའི་ནུས་པ་ཞིག་ཡོད་པ་ཡིན་སྟབས། དེའི་ཁ་སྐོང་ལྟ་བུར་ཤེས་ཡོན་ཟེར་བ་ཞིག་བྱུང་བ་ཡིན། དེ་དུས་རབས་ནས་དུས་རབས་སྦྲེལ་ཏེ་ཡར་རྒྱས་ཕྱིན་ཡོད། ཡང་སྙིང་ཤར་ཕྱོགས་ཀྱི་ཡོན་ཏན་ཟེར་ནའང་རུང༌། ནུབ་ཕྱོགས་ཀྱི་ཡོན་ཏན་ཟེར་ནའང་རུང༌། ཕྱི་རོལ་གྱི་ཡོན་ཏན་ཟེར་ནའང་རུང༌། ནང་གི་ཡོན་ཏན་ཟེར་ནའང་རུང༌། གང་ལྟར་ཡང་སྙིང་ཤེས་ཡོན་གྱི་རིགས་ཚང་མའི་རྩ་བའི་སྙིང་པོ་དེ་མི་ལ་བདེ་སྐྱིད་ཅིག་ཡོང་བའི་དོན་དུ་ཕལ་ཆེར་རེད།
དེང་སང་འཛམ་གླིང་འདིའི་སྒང་ལ་ཤེས་ཡོན་གྱི་རིགས་ཧ་ཅང་མང་པོ་ཡོད། ཤེས་ཡོན་ཡར་རྒྱས་ཕྱིན་པའི་ལག་རྗེས་ལ་མི་ལ་བདེ་སྐྱིད་གསར་པ་ཐོབ་པ་དང༌། མཐུན་རྐྱེན་འཛོམས་སུ་འགྲོ་བའི་ཕན་ཐོགས་མང་པོ་བྱུང་ཡོད་ལ། དེ་དང་ཆབས་ཅིག་རྙོག་དྲ་ཡང་མང་པོ་ཡོང་གི་ཡོད་པ་རེད། དེང་དུས་ཤེས་ཡོན་ཡར་རྒྱས་ཕྱིན་པའི་ལུང་པ་ཚོའི་ནང་ལ་གང་འདྲ་ཞིག་ཡོང་གི་ཡོད་དམ་ཟེར་ན། སྔར་ཕན་མི་མང་པོ་ཞིག་གི་བསམ་བློའི་ནང་ལ་རང་རང་སོ་སོའི་ཤེས་ཡོན་གྱི་ལམ་ལུགས་ལྟ་བུ་ཡོད་པ་དེ་ནོར་འཁྲུལ་ཁྱོན་ནས་མེད་པ་ཞིག་ལ་ངོས་འཛིན་བྱས་ནས་བསྡད་ཡོད་ནའང༌། དེང་སང་གི་མི་ཚོར་གནས་ཚུལ་འདིས་མ་འདང་བའི་མཐོང་ཚུལ་ཡོང་གི་ཡོད་པ་རེད། འདི་འདྲ་ཡིན་སྟབས་ང་ཚོས་ཤེས་ཡོན་ཡར་རྒྱས་གཏོང་རྒྱུའི་དུས་སྐབས་འདིར་དཔེ་བལྟ་ས་དང༌། མིག་བལྟ་ས་མང་པོ་ཞིག་ཡོད་པ་ལྟ་བུ་ཞིག་འདུག
སྔོན་ཐོན་གྱི་ལུང་པ་ཚོར་མི་ཐོག་མང་པོས་དཀའ་ལས་བརྒྱབ་སྟེ་ཡར་རྒྱས་ཕྱིན་པ་དེས་མི་འདང་བའི་གནས་ཚུལ་གང་དང་གང་ཡོང་གི་འདུག ང་ཚོར་ཆ་བཞག་ན་ཤེས་ཡོན་མང་པོ་ཞིག་གི་ཐོག་ལ་ང་ཚོ་ཧ་ཅང་རྗེས་ལུས་རེད། ཡང་བསམ་བློ་ཡར་རྒྱས་ཀྱི་ཤེས་ཡོན་འགའ་ཤས་ཀྱི་ཐོག་ལ་ང་ཚོ་ཡར་རྒྱས་རེད། འོན་ཀྱང་ང་ཚོ་གཅིག་པུའི་འགྲོ་སྟངས་དེས་ཀྱང་འདང་མི་ཐུབ་ལ། མི་ཚོའི་འགྲོ་སྟངས་གཅིག་པུས་ཀྱང་མི་འདང་བ་ལྟ་བུ་ཞིག་མི་འདུག་གམ། གང་ལྟར་ཡང་སྙིང་ཤེས་ཡོན་ཟེར་བ་འདི་མི་ལ་བདེ་སྐྱིད་ཡོང་བའི་དོན་དག་ཡིན་པས། ང་ཚོས་གང་འདྲ་བྱས་ནས་ཤེས་ཡོན་སློབ་སྦྱོང་སྤྲོད་དགོས་པ་དང། ཤེས་ཡོན་སློབ་སྦྱོང་སྤྲད་པའི་མི་དེ་ཡོན་ཏན་ཅན་ཞིག་བཟོས་པ་ཙམ་མ་ཡིན་པར། དེ་ཡོན་ཏན་ཅན་ཞིག་བཟོས་པའི་ཐོག་ལ་ཁོ་རང་ལའང་བདེ་སྐྱིད་ཡོད་པ་ཞིག་དང༌། སེམས་སྐྱིད་པོ་ཞིག ཞོར་ལ་སེམས་ཅན་ཐམས་ཅད་བསམ་མ་ཐུབ་ཀྱང་སོ་སོའི་རོགས་པ་འགྲོ་བ་མིའི་རིགས་ཚང་མར་ཕན་ཐོགས་ཡོང་བ་ཞིག་དང༌། ཚང་མར་དངོས་གནས་དྲང་གནས་བློ་སེམས་དཀར་པོ་འཁྱེར་མཁན་ཞིག་བཟོ་ཐུབ་ན་ཤེས་ཡོན་སློབ་སྦྱོང་སྤྲད་པའི་དགོས་དོན་དེ་རེད། ང་རང་ཚོ་མ་གཞི་བཙན་བྱོལ་བ་ལུང་པ་མེད་པའི་མི་སྐྱོ་པོ་ཁ་ཐབས་ཞན་པོ་ཞིག་ཡིན་ནའང་བསམ་བློ་དེ་འདྲ་ཞིག་བཏང་ན་ཡག་པོ་མེད་དམ་བསམ་གྱི་འདུག

ཉམས་མྱོང་དེ་མིས་བསགས། ལེགས་ཆ་དེ་ང་ཚོས་ལེན་ཐུབ་པ་བྱུང་ན་ཁེ་བཟང་རེད།

   མི་ལ་བདེ་སྐྱིད་ཡོང་བ་ཞིག་དང༌། འབྲས་བུ་བཟང་པོ་ཞིག་ཡོང་བའི་དོན་དུ་ཤེས་ཡོན་སློབ་སྦྱོང་སྤྲོད་ཀྱི་ཡོད་ཡིན་སྟབས། ང་ཚོས་ལམ་ལུགས་རྒྱུན་འཛིན་བྱེད་དགོས་དོན་མེད། ཡས་ཡས་ཀྱི་ལུགས་སྲོལ་དང༌། མས་མས་ཀྱི་ལུགས་སྲོལ་རེད་ཅེས་བརྗོད་དྲགས་ན། དེ་དངོས་ཡོད་གནས་ཚུལ་ཐོག་རན་མི་ཐུབ་པ་དང༌། དེས་ཕན་ཐོགས་ཡོང་མི་ཐུབ། ལུགས་སྲོལ་ཟེར་བ་འདི་ཡང་མིས་བཟོས་པ་རེད། ངའི་ལྟ་བའམ་བསམ་ཚུལ་དེ་འདྲ་ཞིག་ཡིན།
ལུགས་སྲོལ་ཟེར་བ་མིས་བཟོ་དགོས་དོན་ནི། མི་ལ་བདེ་སྐྱེད་ཅིག་བྱུང་ན་བསམ་ནས་བཟོས་པ་རེད། མཐའ་མ་ལུགས་སྲོལ་དེས་མི་ལ་ཕན་གྱི་མི་འདུག་ན་ལུགས་སྲོལ་དེར་བརྩི་དགོས་པ་མེད་ཅིང༌། ལམ་ལུགས་དེ་འཛིན་དགོས་པ་མེད། ང་རང་ཚོས་ཁ་ཡོད་ལག་ཡོད་དུ་མི་ལ་གང་འདྲ་བྱས་ན་ཕན་པ་འདུག གང་འདྲ་བྱས་ན་བདེ་སྐྱིད་ཅིག་སྤྲོད་ཐུབ་པ་འདུག རྩ་དོན་འདི་ལ་ང་ཚོས་བསམ་བློ་གཏོང་རྒྱུ་གལ་ཆེན་པོ་མིན་ནམ་བསམ་གྱི་འདུག
འཛམ་གླིང་འདིར་གཞུང་གི་ལུགས་སྲོལ་འདྲ་མི་འདྲ་དང༌། དཔལ་འབྱོར་ལུགས་སྲོལ་འདྲ་མི་འདྲ། སྤྱི་ཚོགས་ཀྱི་ལུགས་སྲོལ་འདྲ་མི་འདྲ་ཧ་ཅང་མང་པོ་ཡོད་པ་འདི་རྣམས་ངོ་ཐོག་མིའི་བདེ་སྐྱིད་ཀྱི་རྩ་བ་ལ་བྱུང་བ་ཡིན་ན་ཡང༌། ད་ཆ་གོ་ལྡོག་ནས་མིའི་བདེ་སྐྱིད་དེ་བློས་བཏང༌། ལམ་ལུགས་དེ་གཙོ་ཆེར་འཛིན་མཁན་འདྲ་ཡང་ཡོང་གི་ཡོད་པ་རེད། དེ་འདྲའི་རྐྱེན་པས་འཛམ་གླིང་དུ་རྙོག་དྲ་གང་འདྲ་འདུག
ཚང་མས་མཁྱེན་གསལ་རེད། ཤར་ཕྱོགས་ལུང་པའི་ནང་དུ་རྙོག་དྲ་དེ་འདྲ་ཞིག་ཡོང་གི་ཡོད་རེད། དཔེར་ན། བྷི་ཀྲི་ནམ་ནང་གི་གནས་ཚུལ་ཨེ་ཡིན། ག་ས་ག་ལ་དགོངས་པ་བཞེས་དང༌། ཆོས་ལུགས་ཀྱི་འཐེན་འཁྱེར་བྱེད་ཀྱི་ཡོད་པ་འདྲ་པོ། ལམ་ལུགས་ཀྱི་འཐེན་འཁྱེར་བྱེད་ཀྱི་ཡོད་པ་ལྟ་བུ་འདུག དེ་ཚོ་ང་རང་སྒེར་གྱི་བསམ་ཚུལ་ཡིན། ངས་བལྟས་ན། རྩ་བ་དང་སྙིང་པོ་མིའི་བདེ་སྐྱིད་དེ་བརླག་པའི་བཟོ་ལྟ་བུ་མཐོང་གི་འདུག
གང་འདྲ་བྱས་ན་བདེ་སྐྱིད་ཡོང་གི་འདུག འདི་ལ་བསམ་བློ་བཏང༌། འདི་དངོས་ཡོད་གནས་ཚུལ་དང་སྦྲེལ་ནས་དེ་ལ་གང་སྨན་པ་གཅིག་དང༌། དེ་ལ་ལེགས་ཆ་ཡོད་པ་ཞིག་འདུག་ན་ལམ་ལུགས་གང་འདྲ་ཞིག་ཡིན་ནའང་ཁྱད་ཁྱོན་ནས་མེད། ལམ་ལུགས་འདྲ་མི་འདྲ་འདི་རྣམས་རྩ་དོན་སྒྲུབ་པའི་ཐབས་རེད་མ་གཏོགས། བསྒྲུབ་བྱ་དེ་མ་རེད། བསྒྲུབ་བྱ་དེ་མིའི་བདེ་སྐྱིད་རེད། བསྒྲུབ་བྱ་མིའི་བདེ་སྐྱིད་ལ་བསམ་བློ་མ་བཏང་བར་སྒྲུབ་བྱེད་ཀྱི་ཐབས་ཤེས་འདྲ་མི་འདྲར་མགོ་འཁོར་བསྡད་ན་ནོར་འཁྲུལ་རེད། ངས་དེ་འདྲ་ཞིག་དྲན་གྱི་འདུག
ང་ཚོ་དེ་སྔོན་ལྷ་སར་ཡོད་པའི་སྐབས་རྒྱ་མིས་འགྲེལ་བཤད་རྒྱག་གི་ཡོད། ད་ལྟ་བོད་ཞིང་བྲན་ལམ་ལུགས་ལ་བསྡད་ཡོད་ཀྱང༌། རོགས་རེས་མཉམ་སྦྲེལ་ཟེར་བ་སོགས་བར་བརྒལ་གྱི་ལམ་ལུགས་མང་པོ་ཞིག་བརྒྱུད་མ་དགོས་པར་ཐད་ཀར་སྤྱི་ཚོགས་རིང་ལུགས་ལ་འགྲོ་ཐུབ་པའི་རེ་བ་ཡོད་པ་རེད། གང་ཡིན་ཞེ་ན། རྒྱལ་ཡོངས་ཚང་མ་སྤྱི་ཚོགས་རིང་ལུགས་ལ་འགྲོ་གི་ཡོད་པའི་གནས་ཚུལ་གྱི་ཆ་ནས་རྒྱབ་རྟེན་ལྟ་བུ་ཤུགས་ཆེན་པོ་ཞིག་ཡོད་པའི་སྟབས་ཀྱིས་རེད་ཅེས་ཟེར་གྱི་ཡོད། དེ་བཞིན་དུ་གཅིག་བྱས་ན་ང་ཚོར་ཁེ་ཕན་ཞིག་མེད་དམ་སྙམ། ང་རང་ཚོ་ད་ལྟ་བར་དུ་གཞི་མང་པོ་ཞིག་ནས་རྗེས་ལུས་སུ་བསྡད་དེ་ད་ཆ་ང་ཚོ་ཕྱིར་ཐོན་པའི་སྐབས་ལ། ང་ཚོར་མིག་བལྟ་ས་ཧ་ཅང་མང་པོ་ཞིག་ཡོད། ཤར་ནུབ་ག་ས་ག་ལ་མིག་བལྟས། མི་ཚོར་རྙོག་དྲ་ཡོང་ས་དེ་ག་རེའི་ཐོག་ནས་ཡོང་གི་འདུག དཔེར་ན། ཡུ་རོབ་ནང་ཆ་བཞག་ན། དངོས་གནས་གཞི་གཅིག་གི་ནང་ནས་ཤེས་ཡོན་ཡར་རྒྱས་ཆེན་པོ་ཚད་ལོངས་པ་ཞིག་ཡིན་ན་ཡང༌། དེང་སང་ཤེས་ཡོན་གྱི་ཐོག་ནས་མ་འགྲིགས་པར་འཁོས་སུ་མ་ཕབ་པ་ཡོང་གི་འདུག་པ་འདིའི་ཡོང་སའི་རྩ་བ་གང་འདྲ་ཞིག་ལ་ཐུག་གི་འདུག འདིར་ཐབས་ཤེས་ག་རེ་འདུག ང་ཚོས་དེ་ཚོར་རྩད་གཅོད་ཡག་པོ་བྱས་ནས་ཤེས་ཐུབ་པ་བྱུང་ཚེ། ཁོང་ཚོ་འགྲོ་སའི་ལམ་ལ་སྐྱོན་ཡོད་ནའང༌། ང་ཚོ་སྐྱོན་དེ་བརྒྱུད་མ་དགོས་པར། ཉམས་མྱོང་དེ་མིས་བསགས། ལེགས་ཆ་དེ་ང་ཚོས་ལེན་ཐུབ་པ་བྱུང་ན་ཁེ་བཟང་རེད། དེ་འདྲའི་ཆ་ནས་ཁེ་ཕན་མེད་དམ་སྙམ་པ་འདུག ང་ཚོར་དཔེ་བལྟ་ས་མང་པོ་ཞིག་ཡོད་པ་ཡིན་སྟབས༌། དེ་འདྲའི་ཐོག་ལ་དགོངས་པ་བཞེས་དགོས།

གོང་ནས་མར་རྩད་གཅོད་བྱེད་མཁན་མ་བྱུང་ན། ལས་ཀ་འགྲིགས་པའི་བཟོ་ལྟ་བུ་དེ་འདྲ་བྱས་ན་མི་འགྲིགས།

   རྡོ་དོན་ཡང་སྙིང་ང་ཚོས་ཤེས་ཡོན་སློབ་སྦྱོང་སྤྲོད་པ་འདི་མིའི་བདེ་སྐྱིད་ཀྱི་རྩ་བ་རེད། དེ་རིང་འདིར་ཡོད་ཚང་མ་ཤེས་ཡོན་དང་འབྲེལ་བ་ཡོད་མཁན་གྱི་མི་སྣ་ཤ་སྟག་ཡིན། དངོས་གནས་བྱ་བ་དེ་རླབས་ཆེན་རེད། བཟང་པོ་རེད། མི་ལ་ཕན་སེམས་བྱས། སོ་སོའི་ལྟོ་ཕོགས་དང༌། སོ་སོའི་ཁེ་གྱོང་གི་བསམ་བློ་མིན་པར། འགྲོ་བ་མིའི་རིགས་ཀྱི་ཞབས་ཕྱི་ཞུ་གི་ཡོད་བསམ་ནས་ལས་ཀ་ཞིག་བྱེད་ཀྱི་ཡིན་ན་རླབས་ཆེན་རེད། ལས་ཀ་ཧ་ཅང་ཡག་པོ་རེད། དཔེར་ན། ང་ཆོས་པ་གཅིག་གི་ཐོག་ནས་སྐད་ཆ་བཤད་པ་ཡིན་ན། ཆོས་ཁྲིའི་སྒང་ལ་བསྡད་ནས་ཆོས་བཤད་པ་དེ་དུས་དུས་སུ་རེད། སློབ་གྲྭའི་ནང་ལ་ཕྲུ་གུ་དང་མཉམ་དུ་འགྲོགས་ནས་ལོ་དང་ཟླ་བ་སྦྲེལ་ཏེ་ཕྲུ་གུ་ཡ་རབས་འབྱུང་ཐུབ་པ་དང༌། དེའི་མི་ཚེ་བཟང་པོ་ཞིག་གི་མཐའ་འཁྱོལ་བ་ཡོང་བའི་འགན་སོ་སོས་བླངས་ནས་བསམ་བློ་བཏང་ན་དེ་ལས་རླབས་ཆེ་བ་མེད། དངོས་གནས་དྲང་གནས་ལས་ཀ་དེ་རྩ་ཆེན་པོ་རེད། མཁྱེན་སོང་ངམ། འདི་དགོངས་པ་བཞེས་དགོས།
སྤྱིའི་ཆ་ནས་མི་ཞིག་གི་འདུ་ཤེས་བཞག མི་ལ་བདེ་སྐྱིད་ཡག་པོ་ཞིག་ཡོང་རྒྱུའི་དོན་དུ་ཡིན་བསམ་དགོས་པ་མ་གཏོགས། ང་ཡས་ཡས་ཀྱིས་བསྐོས་པ་རེད། དེ་འདྲ་ཡིན་སྟབས་ངས་དེ་མ་བྱས་ན་འགྲིགས་ཀྱི་མ་རེད་ཟེར་བ་ལྟ་བུ། གོང་ནས་མར་རྩད་གཅོད་བྱེད་མཁན་ཞིག་མ་བྱུང་ན། དེ་ལས་ཀ་འགྲིགས་པའི་བཟོ་ལྟ་བུ་དེ་འདྲ་བྱས་ན་མི་འགྲིགས། སོ་སོ་སོ་སོས་བསམ་བློ་ཡག་པོ་བཏང༌། སོ་སོའི་འོག་ལ་ཡོད་མཁན་སོ་སོས་མཛུབ་སྟོན་བྱས་ནས་འགོ་འཁྲིད་པའི་ཕྲུ་གུ་དེ་ཡ་རབས་ཀྱི་ཐོག་ནས་འགྲོ་ཐུབ་པ་གང་འདྲ་བྱས་ནས་བྱེད་དགོས་ཀྱི་འདུག འདི་ལ་བསམ་བློ་གཏོང་རྒྱུ་གལ་ཆེན་པོ་ཞིག་མཐོང་གི་འདུག
དེ་ནས་གནས་ཚུལ་གཉིས་པ་དེ། ང་རང་ཚོ་བོད་མི་རྣམས་ལ་སྒོས་སུ་སྲིད་དོན་གྱི་གནས་ཚུལ་ཞིག་འདྲེས་ཡོད། ང་ཚོས་སྲིད་དོན་དེ་བློས་གཏོང་ཐབས་མེད། གང་ཡིན་ཞེ་ན། བོད་ནང་གི་རྒྱ་ཆེའི་མི་མང་རྣམས་ད་ལྟའི་སྲིད་དོན་གྱི་གནས་ཚུལ་དེས་མ་འགྲིགས་པར་དངོས་གནས་འ་ཆད་འུ་ཐུག་ནས་སྙིང་ཁོང་རུས་པའི་གཏིང་ནས་ད་ལྟའི་གནས་ཚུལ་དེ་ལ་འགྱུར་བ་གཏོང་རྒྱུའི་འདོད་པས་རྐྱེན་བྱས་ནས་ང་ཚོས་སྲིད་དོན་གྱི་ལས་ཀ་འདི་མ་བྱས་པར་ཐབས་མེད་པ་ཞིག་ཡོང་གི་ཡོད་པ་རེད། ང་ཚོས་རྙོག་དྲ་སྣོན་མ་དེའི་གནས་ཚུལ་ལ་ངེས་པར་དུ་བསམ་བློ་གཏོང་དགོས་ཀྱི་འདུག ཕྲུ་གུ་མི་རེ་ངོ་རེའི་མི་ཚེ་བཟང་པོ་ཞིག་མཐའ་འཁྱོལ་བ་མ་ཟད། ང་ཚོ་བོད་སྤྱི་པའི་དོན་དག་དེ་ལ་སྨན་པ་ཞིག་ཡོང་བའི་བསམ་བློ་ངེས་པར་གཏོང་དགོས་ཀྱི་འདུག སྤྱིར་བཏང་ཤེས་ཡོན་ཙམ་དུ་མ་ཟད། སྲིད་དོན་ཐོག་ལ་ཡང་ཤུགས་ཆེ་ཙམ་བསམ་བློ་གཏོང་དགོས། མི་ལ་ཤེས་ཡོན་ཡོད་པ་གཅིག་པུས་འགྲིགས་ཀྱི་མི་འདུག ང་ཚོ་བོད་པའི་ཕྲུ་གུ་རྣམས་ཤེས་ཡོན་གྱི་ཐོག་ནས་སོ་སོ་གཅིག་པུ་མི་ཚེ་བཟང་པོ་མཐའ་འཁྱོལ་བ་ཙམ་ཞིག་མ་ཡིན་པར་ང་ཚོ་བོད་སྤྱིའི་དོན་དག་དེ་དང། དོན་དག་དེ་ལ་སྨན་པ་ཞིག་ཇི་ལྟར་བྱས་ན་ལེགས། ངེས་པར་དུ་དགོངས་པ་བཞེས་དགོས། འདི་ལ་ཚང་མས་དོ་སྣང་བྱེད་དགོས། ཤེས་ཡོན་དང༌། སྲིད་དོན་གྱི་གནས་ཚུལ་ཐ་དད་བྱས་ཏེ། སྲིད་དོན་གྱི་བསམ་བློའི་ལམ་ཕྱོགས་སྟོན་སྟངས་ཐོག་ལ་ལྷོད་ཡངས་སུ་ཕྱིན་ན་ཕངས་པོ་རེད། ཉེན་ཁ་རེད། དེ་ཡང་ངེས་པར་དུ་དགོངས་པ་བཞེས་དགོས་ཀྱི་འདུག

ང་ཚོས་ཤེས་རིག་སྲུང་སྐྱོབ་བྱས་ཟེར་བ་དེ་སྔའི་ལམ་ལུགས་སྲོལ་དང་འགྲོ་སྟངས་གྲ་གྲུ་མ་ཉམས་པར་སྲུང་སྐྱོབ་བྱེད་དགོས་ཟེར་བ་མིན།

   དེ་བཞིན་ང་ཚོའི་རིག་གཞུང་སྲུང་སྐྱོབ་བྱེད་དགོས་པའི་སྐོར་སྐད་ཆ་རྟག་ཏུ་ཡོང་གི་ཡོད། ང་ཚོས་ངོ་ཤེས་པའི་མི་མང་པོས་བོད་མིའི་བསམ་བློ་གཏོང་སྟངས་དང༌། གཤིས་ཀ་དེ་ཡག་པོ་འདུག་ཅེས་བསྟོད་བསྔགས་བྱེད་མཁན་མང་པོ་འདུག དེ་མི་གཅིག་གཉིས་ཙམ་མིན་པར། མི་མང་པོས་ཁ་གཅིག་གྲགས་ཤོད་ཀྱི་འདུག དེ་ལ་གཞིགས་ན་ང་ཚོ་བོད་མིའི་རིགས་ལ་རང་བཞིན་གྱི་ཀུན་སྤྱོད་འཁྱེར་སྟངས་དང༌། བསམ་བློ་གཏོང་ཕྱོགས་ལ་དགེ་མཚན་ཞིག་དངོས་གནས་ཡོད་པ་མིན་ནམ་སྙམ། གང་ལྟར་ཉིན་རེ་ཉིན་རེའི་འཚོ་བ་སྐྱེལ་བའི་སྐབས་ལ་སེམས་བག་ཕེབས་པོ་དང༌། སེམས་ལྷོད་ལྷོད་ཅིག་ང་ཚོ་ལ་ཡོང་གི་ཡོད་པ་རེད། དེ་དངོས་པོ་ནང་བཞིན་རྡོག་རྡོག་ཅིག་མིག་ལ་སྟོན་རྒྱུ་མེད་ཀྱང། ཆུ་ཚོད་༢༤ ནང་འདི་འདྲའི་སེམས་ཞི་བདེ་བག་ཕེབས་ཡོད་པ་དེ་ཁེ་བཟང་རེད། སོ་སོར་ཡོད་པའི་ལེགས་ཆ་འདི་གྲས་ཀྱི་གོམས་གཤིས་བཟང་པོ་རྣམས་སྲུང་སྐྱོབ་བྱེད་འོས་པ་རེད།
ང་ཚོས་ཤེས་རིག་སྲུང་སྐྱོབ་བྱེད་དགོས་ཞེས་རང་བཞིན་ཁ་སྦར་མོ་གང་བཤད་པས་མི་འགྲིགས། དེའི་ངོ་བོ་གང་འདྲ་ཞིག་ཡོད་པ་དང༌། དེ་གང་འདྲ་བྱས་ནས་ཡོང་གི་ཡོད་པ། དེ་ཡོང་བའི་ཐབས་ཤེས་གང་འདྲ་བྱེད་དགོས་པ་བཅས་ལ་བསམ་བློ་གཏོང་དགོས། དེ་སྐོར་དེབ་བྲིས་པས་འགྲིགས་ཀྱི་ཡོད་མ་རེད། ཕྱི་རོལ་ཡི་གེའི་ཐོག་ཡོད་པས་ཀྱང་འགྲིགས་ཀྱི་མི་འདུག རྡོ་དོན་ཡང་སྙིང་མི་རེ་ངོ་རེའི་བསམ་བློའི་ནང་ལ་གནས་ཚུལ་དེ་ཚང་བ་ཞིག་ཡོད་དགོས། འདི་བཟོ་ས་སློབ་གྲྭའི་ནང་ལ་བཟོ་དགོས།
ང་ཚོས་ཤེས་རིག་སྲུང་སྐྱོབ་བྱས་ཟེར་བ་དེ་སྔའི་ལམ་ལུགས་སྲོལ་དང་འགྲོ་སྟངས་གྲ་གྲུ་མ་ཉམས་པར་སྲུང་སྐྱོབ་བྱེད་དགོས་ཟེར་བ་མིན། དེ་ལྟར་བྱེད་དགོས་དོན་མེད། ངའི་མཐོང་ཚུལ་ལ་ཤེས་རིག་ཟེར་བ་འདི་ཧ་ཅང་གཞི་རྒྱ་ཆེན་པོ་ཞིག་ཡིན། རིགས་འགའ་ཤས་དེའི་ཚེ་དེའི་དུས་ཀྱི་སྤྱི་ཚོགས་གནས་ཚུལ་ལ་གཞིགས་ནས་ལམ་ལུགས་དང༌། འགྲོ་ལུགས་ཆགས་པ་ཞིག་ཏན་ཏན་ཡོད་མདོག་ཁ་པོ་རེད། འདི་ཚོའི་གྲས་ང་ཚོས་སྲུང་སྐྱོབ་བྱེད་ཐུབ་ཀྱི་ཡང་མ་རེད་ལ། བྱས་ནས་དགོས་པ་ཡང་མེད། འདི་ཚོ་སྲུང་སྐྱོབ་བྱེད་ཀྱིན་བསྡད་ན་ལྐུགས་པའི་ལས་ཀ་རེད། སྤྱི་ཚོགས་འགྱུར་འགྲོ་གི་རེད། མིའི་བསམ་བློ་གཏོང་སྟངས་འགྱུར་འགྲོ་གི་རེད། འཛམ་གླིང་གི་གནས་ཚུལ་འགྱུར་འགྲོ་གི་རེད། དེ་ཚོའི་གྲས་བརྗེ་དགོས་ཀྱི་རེད་མ་གཏོགས། བསྡད་ནས་ཕན་ཐོགས་གང་ཡང་མེད།
ཡང་དེ་མིན་ཤེས་ཡོན་གྱི་རིགས་གཅིག་དངོས་གནས་མིའི་རྩ་བའི་བདེ་བ་སྡུག་བསྔལ་དང་འབྲེལ་བ་ཡོད་མཁན། ད་ལྟ་ཞུས་པ་བཞིན་ཉིན་རེ་ཉིན་རེའི་བསམ་བློའི་ནང་བག་ཕེབས་པོ་ཡོང་བའི་ཆ་རྐྱེན་འདི་ཚོའི་གྲས་རྩ་བའི་མིའི་བདེ་སྡུག་གི་ཐོག་ལ་ཕན་གནོད་འབྲེལ་གྱི་ཡོད་པ་ཡིན་སྟབས༌། དེ་ཚོ་ང་ཚོས་སྲུང་སྐྱོབ་བྱེད་འོས་པ་རེད། འདི་ནི་ང་ཚོ་བོད་པ་ཙམ་དུ་མ་ཟད། འཛམ་བུ་གླིང་གི་མི་ཚང་མར་དེ་འདྲ་ཞིག་བྱུང་ན་ཡག་པོ་རེད།
ང་ཚོའི་མིག་ལྟོས་བཟང་པོ་བྱེད་སྟངས་ཀྱི་གནད་འགག་དེ་རྩད་ཆོད་ནས། ལམ་སྟོན་ཡག་པོ་བྱས་ན་བོད་པའི་སློབ་གྲྭའི་ཕྲུ་གུ་གཅིག་གི་དོན་དག་ཙམ་མིན་པར། འཛམ་བུ་གླིང་གི་མི་ཚང་མར་ང་ཚོའི་མིག་ལྟོས་དེ་བསྟན་ཆོག་པ་ཞིག་རེད། མིག་དཔེ་བསྟན་ཐུབ་པ་ཞིག་གཅིག་བྱས་ན་ང་ཚོར་བྱེད་རྒྱུ་ཡོང་མདོག་ཁ་པོ་རེད།
རྡོ་དོན་ཡང་སྙིང་མི་ཞིག་ཡིན་ཕྱིན་ཆད་དེ་ལ་རང་བཞིན་གྱིས་སྡུག་བསྔལ་མང་པོ་ཞིག་ཡོང་གི་ཡོད་པ་དང༌། སྡུག་བསྔལ་དེ་དང་འབྲེལ་བའི་བསམ་བློ་གཏོང་ཕྱོགས་ཀྱི་ཐབས་ཤེས་ཤིག་ཡོད་ན་ཤིན་ཏུ་ཡག་པོ་རེད། འདིས་ང་ཚོར་ཕན་པ་རེད། ཤར་ནུབ་མི་སུ་དང་སུ་ཡིན་ཀྱང་རུང༌། ཤ་མདོག་ཚོས་གཞི་ལའང་ཁྱད་པར་མེད། སྤྱི་ཚོགས་གནས་ཚུལ་ལའང་ཁྱད་པར་མེད། གང་ལྟར་ཡང་སྙིང་མི་ཞིག་ཡིན་ཕྱིན་ཆད་དེ་ལ་རང་ཆས་སུ་འབྲེལ་བའི་སྡུག་བསྔལ་མང་པོ་ཡོང་གི་ཡོད། དེ་ལ་ཕན་པ་ཞིག་ཡོད་ན་ང་ཚོ་བོད་པ་གཅིག་པུའི་དོན་ཙམ་མིན་པར། འཛམ་བུ་གླིང་གི་མི་ཚང་མའི་དོན་དུ་ཕན་པ་རེད། ཤེས་རིག་ལ་ཆ་གཉིས་སུ་དབྱེ་ན། འདི་འདྲའི་རིགས་ཀྱི་ཆ་ལྟ་བུ་ཞིག་མེད་དམ་བསམ་གྱི་འདུག འདི་ལ་དགོངས་པ་བཞེས་དགོས་ཀྱི་འདུག དཔེར་ན། ང་ལ་ཆ་བཞག་ན། དེ་འདྲའི་གནས་ཚུལ་བསམ་བློར་འཁོར་ན་ཡང་འདང་གི་མི་འདུག དེ་སྐོར་ལ་བསམ་བློ་གཏོང་དགོས་པ་ཞིག་དང༌། དོ་སྣང་བྱེད་དགོས་པ་ཞིག་ནི་ཤེས་ཀྱི་འདུག ཡིན་ན་ཡང། བྱེད་ཕྱོགས་གང་འདྲ་ཞིག་བྱེད་དགོས་པ་དང༌། ཐབས་ཤེས་གང་འདྲ་ཞིག་སྤྲོད་དགོས་ཀྱི་ཡོད་མེད་མི་གཅིག་གི་ནུས་པས་འདང་ཐབས་མེད། འདི་མུར་ལྷོད་ཡངས་བྱས་ནས་ལུས་པ་ཡིན་ན་ལས་དོན་འདི་ཚོའི་གྲས་ཁང་པ་ཞིག་པ་ལྟ་བུའི་ཛ་དྲག་གི་གནས་ཚུལ་གང་ཡང་མེད་པ་ལྟ་བུར་སྣང་ཡང༌། དེའི་ཉམས་ཆག་དང་འཐུས་ཤོར་འགྲོ་ལུགས་འདི་ཉིན་རེ་ཉིན་རེ་བཞིན་ཤོག་བུ་སྣུམ་ཐིག་ལྟ་བུར་ཕྱིན་ནས་ལོ་མང་པོ་ཞིག་དང༌། གཅིག་བྱས་ན། མི་ཐོག་གཅིག་གཉིས་ཤིག་ཕྱིན་པའི་མཇུག་ལ་མངོན་གསལ་དོད་པོའི་ཉམས་ཆག་ཕྱིན་པ་དང༌། འཐུས་ཤོར་ཕྱིན་པ་ཞིག་གཞི་ནས་མཐོང་གི་རེད། དེ་དུས་འཕྱིས་ཚར་བ་རེད། དེ་འདྲ་ཡིན་སྟབས་ཤེས་རིག་གི་སྐོར་འདི་ཧ་ཅང་གི་ཛ་དྲག་པོ་ཞིག་དང༌། གལ་ཆེ་དོན་ཆེ་ཡིན་པའང་ཤེས། བྱེད་ཕྱོགས་གང་འདྲ་ཞིག་བྱེད་དགོས་མིན་ཚོད་ཀྱང་མི་ཐིག་པའི་སྐབས་འདིར་བློ་སྦུག་སྲུབ་དོག་དྲགས་ནས་སྐད་ཆ་བཤད་ནའང་མི་འགྲིགས། སོ་སོའི་ལམ་ལུགས་དང༌། སོ་སོའི་འགྲོ་སྟངས་དེ་རྣམས་ཡག་པོ་འབའ་ཞིག་ཡོད་ཟེར་ན་རྒྱ་མིའི་སྐད་ཆའི་ཤོད་སྟངས་ལྟར་དོན་ཕན་ཡོང་རྒྱུ་ནམ་ཡང་མེད།
ཡང་མི་གཞན་དག་གི་འགྲོ་སྟངས་དེ་དག་ཚང་མ་བརྒྱ་ཆ་བརྒྱ་ཐམ་པ་བཟང་པོ་ཞེ་གཅིག་རེད་ལབ་ཀྱང་འགྲིགས་ཀྱི་མི་འདུག གནས་ཚུལ་ཚང་མར་བལྟས། གནས་ཚུལ་མང་པོ་ཞིག་གི་ཐོག་ལ་བསམ་བློ་གཏིང་རིང་པོ་ཞིག་བཏང༌། ནང་པ་སངས་རྒྱས་པའི་ཆོས་ཀྱི་ཐོག་ནས་མིའི་བསམ་བློའི་འགྲོ་སྟངས་དང༌། མིའི་ཀུན་སྤྱོད་འགྲོ་སྟངས་ཀྱི་འགྲེལ་བཤད་ཅིག་རྒྱག་གི་ཡོད་པ། དེ་ཚོའི་ཐོག་ནས་ཀྱང་ལེགས་ཆ་བླངས། དེང་སང་མི་ཚོས་སྤྱིར་བཏང་འགྲོ་བ་མི་ཡི་རིགས་ཀྱི་བསམ་བློ་གཏོང་སྟངས་དང༌། སྤྱི་ཚོགས་ཀྱི་གནས་ཚུལ་འགྲོ་སྟངས། རྒྱལ་རབས་ཀྱི་གནས་ཚུལ་འགྲོ་སྟངས་འདི་གྲས་ཀྱི་ཐོག་ནས་འགྲེལ་བཤད་ཅིག་རྒྱག་གི་ཡོད་པ་དེ་རྣམས་ལའང་ཉམས་ཞིབ་བྱས། ཕྱོགས་ཚང་མའི་གནས་ཚུལ་ལ་བརྟག་དཔྱད་དང་ཉམས་ཞིབ་མཐིལ་ཕྱིན་པ་བྱས་ཏེ། ང་ཚོས་རིམ་པས་ལམ་སྟོན་གསལ་པོ་ཞིག་བྱས་ན་བྱེད་ཨེ་ཐུབ་བསམ་གྱི་འདུག འདི་དངོས་གནས་གལ་ཆེན་པོ་ཞིག་དང༌། ཛ་དྲག་གི་གནས་ཚུལ་ཞིག་ཡིན་སྟབས། ཚོགས་འདུ་ཞིག་ཚོགས་ནས་ལག་ལེན་སྐོར་གྱི་དཀའ་ངལ་སེལ་ཕྱོགས་དང༌། དེ་དང་ཆབས་ཅིག་རྩ་བའི་བསམ་བློ་གཏོང་ཕྱོགས་ཀྱི་སྐོར་འདི་ཚོའི་གྲས་གོ་བསྡུར་བྱེད་རྒྱུ་དང༌། བསམ་བློ་གཏོང་རན་པ་མིན་ནམ་ཞེས་ཁ་སང་སྐད་ཆ་བྱུང༌།
རྩ་བའི་ང་ཚོའི་ཤེས་རིག་སྲུང་སྐྱོབ་གཏིང་རིང་པོའི་ཆ་ནས་བསམ་བློ་གཏོང་ཕྱོགས་ཀྱི་སྐོར་རྗེས་སུ་ཚོགས་འདུ་འཚོག་རྒྱུ་དང༌། སྔོན་ལ་སློབ་གྲྭ་ཁག་བཙུགས་ནས་ཚུགས་པ་དང༌། འཛུགས་མུས་སུ་ཡོད་པ་དེ་རྣམས་ཀྱི་དཀའ་ངལ་སེལ་ཕྱོགས་སྐོར་ལ་གོ་བསྡུར་བྱ་རྒྱུ་བཅས་ཁག་གཉིས་སུ་བགོས་ཏེ། དེ་རིང་འདིར་སློབ་གྲྭ་ཡོད་བཞིན་པའི་ནང་དཀའ་ངལ་སེལ་ཕྱོགས་སྐོར་ལ་ཚོགས་པ་རེད།
དེ་ལ་ངས་སློབ་གྲྭའི་འཕྲལ་སྒང་གི་དཀའ་ངལ་སེལ་ཐབས་སྐོར་ལ་གོ་བསྡུར་བྱེད་གཞི་ཟེར་ནའང་རུང༌། རྩ་བའི་ང་ཚོའི་ཤེས་ཡོན་དང་འབྲེལ་བ་ཡོད་པའི་སྐོར་ལ་ང་རང་གི་བསམ་ཚུལ་གང་ཡོད་ཞུས་པ་ཡིན། ངས་ཞུས་པའི་ནང་ལ་ཡང་དག་པ་ཡོད་ལ། ཡང་མ་དག་པ་ཡང་ཡོད། འདི་ལ་ཁྱེད་རང་ཚོས་ངེས་པར་དུ་དགོངས་པ་བཞེས།
ང་ཚོས་རྩ་བའི་བསམ་བློ་གཏོང་ཕྱོགས་དེ་གཞི་རྒྱ་ཆེན་པོ་ཞིག་གི་ཐོག་ནས་དགོངས་པ་བཞེས་ཐུབ་ན་དྲན་གྱི་འདུག གནས་ཚུལ་འདི་སྐོར་ང་རང་ཚོ་བོད་པའི་ཤེས་ཡོན་གཅིག་པུ་ཡོད་པའི་མིའི་ཀླད་པས་འདང་ཐབས་མེད། ཕྱི་རྒྱལ་གྱི་ཤེས་ཡོན་གཅིག་པུ་ཡོད་པའི་མིའི་ཀླད་པས་ཀྱང་ཕལ་ཆེར་འདང་ཐབས་ཨེ་ཡོད་སྙམ། ང་ཚོས་འདི་ཉིན་གཅིག་ལ་གོ་བསྡུར་བྱས་ནས་བཟོ་ལྟ་ཆགས་ཐུབ་རྒྱུ་ཕལ་ཆེར་ཁག་པོ་རེད། ཡིན་ནའང་ཚང་མས་དོ་སྣང་བྱས། བསམ་བློའི་ནང་ལ་བཞག་ནས་དེང་སང་འཛམ་གླིང་གི་དངོས་པོ་ཡར་རྒྱས་ཕྱིན་པའི་དུས་རབས་ཉི་ཤུ་པ་འདིའི་གནས་ཚུལ་ལ་གཞིགས་པས། ནང་བསམ་བློའི་ཡར་རྒྱས་གང་འདྲ་བྱས་ནས་གཏོང་ཐུབ་ཀྱི་འདུག གང་འདྲ་བྱས་ནས་ང་ཚོས་ལམ་ཕྱོགས་སྟོན་ཐུབ་ཀྱི་འདུག འདི་ནི་ང་ཚོས་སྦུག་སྲུབ་དོག་པོ་བྱས་པ་མིན་ལ། ལྐུགས་པ་ཨུ་ཚུགས་བྱས་པ་ཡང་མིན། རྒྱ་མིའི་སྐད་ཆ་ལྟར་མི་རིགས་གུ་དོག་རིང་ལུགས་ཀྱི་བསམ་བློ་བཏང་བ་ཡང་མིན། ང་ཚོ་འཛམ་གླིང་འདིའི་སྒང་གི་མི་ཡིན་སྟབས༌། མིས་མི་ལ་བྱུས་གཏོགས་བྱེད་པ་བབ་འོས་ཡིན། ཤེས་སོང་ངམ། འདི་ལ་དགོངས་བཞེས་གནང༌། ཚང་མས་སེམས་ལ་བཞག ཤེས་རིག་སྐོར་ལ་ཁུར་དང་དོ་སྣང་ལས་འགན་འཁྲི་མཁན་ཚོས་བསམ་བློ་གཏོང་རྒྱུ་དེ་ཧ་ཅང་གལ་ཆེན་པོ་མིན་ནམ་སྙམ། རིམ་པ་བཞིན་སོ་སོའི་ཉམས་མྱོང་དང༌། དེ་འདྲའི་གནས་ཚུལ་བརྟག་དཔྱད་མང་པོ་ལོ་བསྟུད་ནས་བྱས་པའི་མཇུག་ལ་གཅིག་བྱས་ན་ལམ་སྟོན་ཡག་པོ་དེ་འདྲ་ཏན་ཏན་ཡོང་སྲིད་ཀྱི་རེད། དེ་འདྲ་ཞིག་བྱུང་ན་བསམ་པའི་རེ་བ་ཡོད།

ཅི་མཛད་ལེགས་མཐོང་གི་སྒང་ལ་ཕྱིན་ན། ང་ཚོའི་ལས་ཀ་དེ་མགོ་རུལ་སྣ་བས་མ་ཚོར་བ་ཡོང་རྒྱུ་ཐག་ཆོད།

   སྔོན་མ་ང་ཚོ་སློབ་གྲྭ་ཚུགས་པའི་སྐབས་ལ་ཡིན་ན། སྔོན་ལ་འགྲོ་ལུགས་འགྲོ་སྟངས། སློབ་གྲྭའི་སྒྲོམ་ལྟ་བུ་དེ་མ་ཆགས་པའི་དཀའ་ངལ་ཁོ་ནའི་དོན་དུ་འགོར་བ་རེད། ད་ཆ་དེའི་ངོ་བོ་དེ་བརྗེས་ནས་རྩ་བའི་བསམ་བློའི་ལམ་སྟོན་བྱེད་ཕྱོགས་དེ་གང་འདྲ་ཞིག་གི་ཐོག་ལ་འགྲོ་དགོས་ཀྱི་འདུག ད་ལྟ་བར་བསམ་བློའི་ལམ་སྟོན་བྱེད་ཕྱོགས་དེས་འདང་གི་འདུག་གམ་མི་འདུག ལྟ་བའི་དུས་སྐབས་རིམ་པ་གཉིས་པ་ལྟ་བུ་དེར་ཕལ་ཆེར་སླེབས་ཀྱི་མེད་དམ་བསམ་གྱི་འདུག དེ་ནི་གཏིང་རིང་པོ་ཡིན་པས་གོང་དུ་ཞུས་པའི་གནས་ཚུལ་དང་འབྲེལ་བ་ཡོད།
ང་ཚོ་བོད་པའི་ཕྲུ་གུ་ཚོ་གཞི་ནས་བསམ་བློའི་ཚད་མཐོ་རུ་ཕྱིན་ནས་གནས་ཚུལ་མང་པོ་མཐོང་གི་ཡོད་པ་རེད། ལོ་གཅིག་མ་སུ་རི་ལ་ཕྱིན་པའི་སྐབས་སུ་ཕྲེང་རིང་ཁོ་རང་གཉིས་དང་སྐད་ཆ་བྱུང་དོན། ད་ཆ་ཕྲུ་གུ་ཚོ་འཚར་ལོངས་གང་འཚམ་ཡོང་དུས་བོད་ཀྱི་དེ་སྔའི་སྤྱི་ཚོགས་ཀྱི་གནས་ཚུལ་དང༌། བོད་ལུང་པ་འཐུས་ཤོར་འགྲོ་གཞི་ཆོས་ཀྱི་ཐོག་ལ་མགོ་འཁོར་ནས་བྱུང་བ་ཡིན་ནམ་ཞེས་དྲི་བ་ཁྱད་མཚར་པོ་དེ་འདྲ་ཡོང་གི་འདུག་པས། ངས་ཕྲུ་གུ་རྒན་པ་ཚོར་ཐུག་ན་ཞེས་སྐད་ཆ་བྱུང་དོན་ལྟར་ཕྲུ་གུ་རྒན་པ་ཚོར་ཟུར་དུ་ཐུག་པ་ཡིན། དེ་ཚོ་དངོས་གནས་རླབས་ཆེན་རེད། ང་ཚོར་རླབས་ཆེན་གྱི་མེ་ཏོག་གཞི་ནས་ཤར་གྱི་ཡོད་པ་དེ་ཡག་པོ་རེད། ང་དེ་དུས་ཧ་ཅང་དགའ་པོ་བྱུང༌།
སོ་སོའི་རང་སྟོབས་ཀྱིས་དགེ་སྐྱོན་ལ་བརྟག་ཞིབ་བྱེད་མཁན་བྱུང་ན། དེ་རིགས་དང་ང་ཚོ་གཤིབས་གཏུགས་བརྒྱབ་ནས་རྩོད་པ་བརྩད་དེ་བརྡར་ཤ་བཅད་པའི་རྗེས་ལ། ང་ཚོས་ཐག་གཅོད་བྱས་པ་རྣམས་བསྲེགས་བཅད་བརྡར་བའི་གསེར་བཞིན་ཆགས་པ་རེད། དེ་མ་གཏོགས་ྋརྒྱལ་བ་རིན་པོ་ཆེའི་བཀའ་རེད་ཟེར་བ་དང༌། ཅི་མཛད་ལེགས་མཐོང་ཟེར་བ། སངས་རྒྱས་ཀྱི་བཀའ་རེད་ཟེར་བ་ལྟ་བུ། བཀའ་ཕེབས་བཞིན་དང༌། བཀའ་གནང་རང་ཞེས་པའི་སྐད་ཆ་དེ་ཚོའི་སྒང་ལ་ཕྱིན་པ་ཡིན་ན། ང་ཚོའི་ལས་ཀ་དེ་མགོ་རུལ་རྣ་བས་མ་ཚོར་བ་ཞིག་ཡོང་རྒྱུ་ཐག་ཆོད་པ་མ་གཏོགས་ཁྱོན་ནས་ཡག་པོ་མི་འདུག
ང་ཚོ་ཡང་ཡང་ཚོགས་འདུར་སྐད་ཆ་ཡོང་གི་འདུག ཅི་མཛད་ལེགས་མཐོང་ཟེར་བའི་སྐད་ཆ་དེ་དུག་རང་རེད། ང་ཚོ་ཡར་རྒྱས་འགྲོ་དགོས་པ་དང༌། ང་ཚོ་དེང་སང་འཛམ་གླིང་འདིའི་སྒང་ལ་ཆབ་སྲིད་ཀྱི་ལས་ཀ་དང་དངོས་ཡོད་གནས་ཚུལ་གྱི་ལས་ཀ་བྱེད་མཁན་ཞིག་ཡིན་ན་ཅི་མཛད་ལེགས་མཐོང་ཟེར་བའི་སྐད་ཆ་དེ་དུག་རེད། ཧ་ཅང་ཉེན་ཁ་ཆེན་པོ་རེད། ད་ཆ་ཉེན་ཁ་དེ་སེལ་གྱི་ཡོད་པ་རེད། དངོས་གནས་རང་སྟོབས་ཀྱི་བསམ་བློ་གཏོང་བའི་ནུས་པ་ཞིག་སླེབས་པ་དེ་ཧ་ཅང་རྩ་ཆེན་པོ་རེད།
དེ་དུས་མ་སུ་རི་ལ་ཕྲུ་གུ་ཚོར་ཐུག འགྲེལ་བཤད་བྱེད་རྒྱུ་བྱུང༌། ངས་ལེགས་པོ་མི་ཤེས་ཀྱང༌། ང་རང་གི་བསམ་ཚུལ་རྣམས་བཤད་པ་ཡིན།
དེ་བཞིན་དེ་རིང་དེ་ནས་འཕྲོས་པའི་སྐད་ཆ་སྣོན་མ་ལྟ་བུ་ཆགས་སོང་སྟེ། དཔེར་ན། ཟླ་བ་ནོར་བུའི་བསམ་བློ་ལྟ་བུ་ཡིན་ན། དངོས་གནས་དགའ་བསུ་ཞུ་དགོས་པའི་བསམ་བློ་ཧ་ཅང་གི་རླབས་ཆེན་པོ་རེད། བོད་པ་ཞིང་པ་སྐྱོ་པོའི་ཕྲུ་གུ་ཞིག་གི་སོ་སོས་སློབ་སྦྱོང་བྱས། གཞི་ནས་བསམ་བློའི་ཚད་གང་འཚམ་སོན་ནས་གཏིང་རིང་པོའི་བསམ་བློ་བཏང་སྟེ་སྐད་ཆ་བཤད་ཡོང་དུས་ཧ་ཅང་རྩ་བ་ཆེན་པོ་མཐོང་གི་འདུག སྐབས་རེར་བཀའ་ཤག་ལའང་སྐད་ཆ་བྱུང༌། ཟླ་བ་ནོར་བུ་དང་ཟུར་དུ་ཐུག་འཕྲད་བྱས་ཏེ་ངས་བསྔགས་བརྗོད་བྱེད་རྒྱུ་བྱུང༌། ཧ་ཅང་ཡག་པོ་རེད། རླབས་ཆེན་རེད། འདི་འདྲ་ཞིག་བྱུང་ན་བསམ་ནས་བསྡད་ཡོད། བསམ་ཕོད་པ་དང་ཤོད་ཕོད་པ། བྱེད་ཕོད་པ་དགོས་ཞེས་ངས་རྒྱུན་དུ་ཤོད་དོན་དེ་རེད། ད་དངོས་གནས་ང་ཚོར་མེ་ཏོག་ལྟ་བུ་ཤར་ཡོང་གི་ཡོད་རེད།
འོ་དེ་འདྲ་ཞིག་གི་དུས་ཚོད་ལ་སླེབས་ཀྱི་ཡོད་པ་ཡིན་སྟབས། འགོ་བྱེད་མཁན་ཚོས་ཡིན་ན་ཡང༌། ང་འགོ་བྱེད་མཁན་ཡིན་པས་ངས་ལབ་པ་དེ་ཁོང་ཚོས་ཉན་དགོས། མ་ཉན་ན་མི་འགྲིགས། ཁོང་ཚོ་མ་ཉན་རང་ཉན་རེད་བསམ་པ་དང༌། ངས་མཛུབ་མོ་གར་བསྟན་ཤར་བརྩི་གི་རེད་བསམ་པའི་ཐོག་ནས་ཟོམ་འཇོག་དང༌། ལྷོད་ཡངས་སུ་ཕྱིན་པ་ཡིན་ན། དངོས་གནས་དྲང་གནས་བོད་སྤྱི་པའི་དོན་དག་ཕུང་ལ་སྦྱོར་གྱི་རེད། འདིའི་དུས་ཚོད་དེ་ཡོལ་ནས་སློབ་ཕྲུག་ཚོའི་ནང་ནས་མིའི་ནུས་པ་འདི་ལྟར་སླེབས་ཡོང་དུས་ཧ་ཅང་ཡག་པོ་རེད། དཔེ་མི་སྲིད་པའི་རྩ་བ་ཆེན་པོ་མཐོང་གི་འདུག འདི་འདྲ་ཡིན་སྟབས་ལས་ཀ་བྱེད་མཁན་དང༌། སྒང་ནས་བསམ་བློའི་ལམ་སྟོན་བྱས་ནས་འགོ་འཁྲིད་མཁན་ཚོར་དེ་ལ་དཔག་པའི་འཁུར་འགན་སླེབས་ཡོད་པ་དང༌། དེ་ལ་དཔག་པའི་གཟབ་གཟབ་བྱེད་དགོས་པའི་དུས་ཚོད་ལ་སླེབས་ཡོད། དེ་ཚོར་ངེས་པར་དུ་བསམ་བློ་གཏོང་དགོས་ཀྱི་འདུག
དཔེར་ན། ཕྱི་རྒྱལ་ཁག་ལ་སྔོན་མ་ནས་ཡིན་ན་དགེ་རྒན་ཚོས་སློབ་སྦྱོང་སྤྲོད་དུས། སློབ་ཕྲུག་ཚོས་དགེ་རྒན་གྱི་བཀོད་འདོམས་དེ་གའི་འོག་ཏུ་ཤར་བསྐྱོད་འགྲོ་གི་ཡོད་ནའང༌། དེང་སང་སློབ་ཕྲུག་ཚོ་དབང་དང༌། སྤོབས་པ་ཆེན་པོ་ཆགས། དགེ་རྒན་ལ་བརྩི་མེད་བྱས་ནས་དགེ་རྒན་མང་པོ་ཁག་པོ་བྱེད་ཀྱི་འདུག་ཟེར་མཁན་འདུག གཅིག་བྱས་ན་སྡུག་ཅག་ཁྲིམས་མེད་ལུགས་མེད་བྱེད་མཁན་ལྟ་བུ་ཡོད་ཀྱང། གཅིག་བྱེད་དུས་དངོས་ཡོད་གནས་ཚུལ་དེ་འདྲ་ཆགས་ཡོང་གི་ཡོད་པ་རེད། ང་རང་ཚོ་བོད་པའི་ནང་ལ་འཁྲུག་ཆ་དོད་པོ་དེ་འདྲ་མེད་ན་འང༌། བཟོ་ལྟ་དེ་འདྲ་ཡོང་གི་ཡོད་པ་ཡག་པོ་རེད། དེ་འདྲའི་དུས་ཚོད་གཉན་འཕྲང་ཞིག་གི་སྒང་དུ་སླེབས་ཡོང་གི་ཡོད་པས། ཚང་མས་ངས་སློབ་གྲྭའི་ནང་ལས་ཀ་འདི་ལྟར་བྱེད་ཀྱི་ཡོད་ཅེས་ལས་བསྡོམས་ཞུས་པ་ལྟ་བུ་མ་ཡིན་པར་སོ་སོས་ན་ཚ་ཚང་མ་མཉམ་དུ་འཁྱེར་ནས། སྤྱིར་འགྲོ་བ་མིའི་རིགས་ཀྱི་ཞབས་ཕྱི་ཞུ་རྒྱུ་དང༌། བྱེ་བྲག་བོད་མི་རིགས་ཀྱི་ཞབས་ཕྱི་ཞུ་རྒྱུ། ཡང་སྒོས་དུས་གཉན་འཕྲང་ཞིག་ལ་སླེབས་པའི་གནས་ཚུལ་ཚང་མར་དགོངས་པ་བཞེས་པའི་ཐོག་ནས། རྡོ་དོན་ང་ཚོར་ཁ་ཡོད་ལག་ཡོད། ཕུགས་རྒྱང་རིང་པོའི་བསམ་བློའི་ལམ་སྟོན་ལ་ཕན་པའི་སློབ་སྟོན་ཡག་པོ་ཞིག་བྱེད་ཐུབ་ན་ཡག་པོ་མིན་ནམ་སྙམ་པ་འདུག
འདི་གཞི་ལ་བཞག་པའི་ལག་ལེན་གང་འདྲ་བྱེད་དགོས་ཀྱི་འདུག ཁ་ཤས་ནི་ལམ་སང་ལམ་སང་ལག་ལེན་འཁེལ་ཐུབ་པ་ཡོང་གི་རེད། ཁ་ཤས་ནི་རིམ་བཞིན་མ་གཏོགས་ལམ་སང་ལག་ལེན་མི་ཐུབ་པ་ཡང་ཡོང་གི་རེད། དེ་ནི་གནས་ཚུལ་ཁག་ཁག་རེད། དངོས་ཡོད་ཐོག་ལ་མ་འགྲུབ་ན་དེ་ག་རེད། འགྲུབ་ཚོད་དེ་ལག་ལེན་བྱེད་དགོས། ངས་སྐད་ཆ་མང་དྲགས་པ་དང༌། ནོར་འཁྲུལ་བྱུང་ཡོད་ན་དགོངས་དག ཅེས་བཀའ་སློབ་སྩལ།། །།[/section] [section title=”དྷ་ས་དཔེ་མཛོད་ཁང་དུ་ཤེས་རིག་ཚོགས་ཆེན་ཐེངས་གཉིས་པའི་ཚོགས་བཅར་བ་ཚོར་དམིགས་བསལ་དྲི་བ་དྲིས་ལན་གྱི་གོ་སྐབས་བཀའ་དྲིན་བསྐྱངས་སྐབས་སྩལ་བའི་བཀའ་སློབ།”]

(ཕྱི་ལོ ༡༩༧༢ ཟླ་ ༡༠ ཚེས་ ༢༤ ཉིན།)

གནས་ཚུལ་འགྱུར་བའི་སྐབས་སུ་བསམ་བློས་རྗེས་ཟིན་དགོས་པ་དང། དེ་ལ་གཞིགས་པའི་མཐའ་གཉིས་སུ་མ་ལྷུང་བའི་འཚོ་ཐབས་ལ་བསམ་བློ་གཏོང་དགོས།

   དེ་རིང་འདིར་བརྗོད་རྒྱུར། ཁྱེད་ཚོ་ཚོགས་འདུའི་སར་འབྱོར་མཁན་ཚང་མ་སློབ་གྲྭའི་ནང་ལས་ཀ་བྱེད་མཁན་ཡིན་ཞིང། དེ་ཡང་སློབ་གྲྭའི་ནང་གི་གད་ཕྱིས་བྱེད་མཁན་དང༌། མ་བྱན་ལྟ་བུ་དེ་འདྲ་མིན་པར་དགེ་རྒན་ཤ་སྟག་རེད། དགེ་རྒན་ཚོས་ག་རེ་བྱེད་ཀྱི་ཡོད་ཟེར་ན། ཕྲུ་གུའི་བསམ་བློའི་སྣེ་ཁྲིད་ཀྱི་ཡོད་པ་རེད། མ་གཞི་དགེ་རྒན་ཚོ་འགའ་ཤས་སུམ་རྟགས་སློབ་མཁན་དང། ཁ་ཤས་རྒྱལ་རབས་སློབ་མཁན་གྱི་དགེ་རྒན་སོ་སོར་དམིགས་བཀར་གྱི་ཕྲུ་གུར་སློབ་སྦྱོང་སྤྲོད་རྒྱུའི་ལས་འགན་ཡོད་ན་ཡང། རྩ་བའི་སོ་སོའི་བསམ་བློ་ག་ཚོད་ཀྱི་གནས་ཚད་མཐོ་བ་དང༌། གུ་ཡངས་པ་ཞིག་བྱུང་ན་དེའི་ཚོད་ཀྱིས་སོ་སོར་བློ་ལྟ་མཁན་ཕྲུ་གུ་ཚོར་ཞར་དང་ཞོར་ལ་ལམ་སྟོན་བྱེད་ཕྱོགས་ཡོང་གི་རེད་བསམ་གྱི་འདུག དེ་ཧ་ཅང་གལ་ཆེན་པོ་རེད། དེ་རྒྱུ་མཚན་གཅིག་བྱས།
དེ་ནས་རྩ་བའི་རྒྱུ་མཚན་གཞན་ཞིག་ནི་བར་ལམ་འཛམ་གླིང་གི་དུས་རབས་འཕོ་འགྱུར་འགྲོ་གི་ཡོད་པ་དང༌། དུས་རབས་རེ་རེའི་མི་དེ་ཚོ་ཧ་ལམ་ལོ་བཅུ་གྲངས་ནང་དུ་འགྱུར་བ་འགྲོ་གི་ཡོད་རེད། དེ་ལས་མགྱོགས་པ་ལོ་གཅིག་གཉིས་ནང་ལ་འགྱུར་བ་འགྲོ་གི་རེད། དེ་འདྲའི་དུས་ཚོད་ལ་ང་རང་བོད་པ་ཚོ་ནི་དེ་བས་ཀྱང་འགྱུར་བ་ཆེན་པོ་འགྲོ་གི་ཡོད། འགྱུར་བ་ཕྱིན་པའི་སྐབས་ལ་གནས་ཚུལ་དེ་བསམ་བློས་རྗེས་ཟིན་པ་ཞིག་དགོས་ཀྱི་ཡོད་པ་དང༌། དངོས་ཡོད་གནས་ཚུལ་དེ་ལ་གཞིགས་པའི་མཐའ་གཉིས་སུ་མ་ལྷུང་བའི་ཐོག་ནས་ང་ཚོ་འཚོ་ཐབས་བསམ་བློ་གཏོང་དགོས་པ་མ་གཏོགས། ང་རང་ཚོར་བདེན་པ་ཡོད་པའི་དཔའ་བློ་ཁོག་ཅིག་དང༌། ལྷག་བསམ་གཅིག་པུས་འདང་གི་ཡོད་པ་མ་རེད། དངོས་ཡོད་གནས་ཚུལ་ལ་རན་པ་ཞིག་དགོས།
དཔེར་ན། ང་ལ་ཆ་བཞག་ན། གནས་ཚུལ་ག་ས་ག་ལ་དོ་སྣང་བྱས་ནས་བལྟས་པའི་སྐབས་བསམ་བློ་མང་པོ་ཞིག་འཁོར་གྱི་འདུག དེ་འདྲའི་བསམ་བློ་འཁོར་བའི་ནང་ཏན་ཏན་ལེགས་ཆ་ཡང་ཡོད། དངོས་ཡོད་གནས་ཚུལ་དང་མ་མཐུན་པ་དང༌། སོ་སོའི་ཉམས་མྱོང་གིས་མ་འདང་བའི་སྐྱོན་ཡང་མང་པོ་ཡོད། དཔེར་ན། ང་རང་ཚོ་དཔེ་ཆ་བ་ཚོས་ཤེས་གསལ་ལྟར། རྩོད་པ་རྩོད་པའི་སྐབས་ལ་ཅི་ཙམ་གྱིས་མཐའ་དཔྱོད་མང་བ་དེ་ཙམ་གྱིས་ངེས་པ་རྙེད་རྒྱུ་ལེགས་པ་ལྟ་བུ། དཔེར་ན། ཡིག་ཆ་མང་ཆེ་བའི་ནང་ལ། གཞན་ལུགས་དགག་པ། རང་ལུགས་བཞག་པ། རྩོད་པ་སྤོང་བ་བཤད་ཡོད། ཅི་ཙམ་དགག་བཞག་སྤོང་གསུམ་གྱི་རྣམ་གཞག་མང་བའི་ཚོད་ཀྱིས་རང་ལུགས་ལ་ངེས་པ་ཆེན་པོ་རྙེད་ཐུབ་ཀྱི་ཡོད། དེ་འདྲ་མིན་པའི་སྤམ་བཤད་ཅིག་ཡིན་ན་དེའི་ཚོད་ཙམ་མ་གཏོགས་ཡོང་གི་ཡོད་མ་རེད། སོ་སོའི་དགེ་སྐྱོན་གྱི་ཕྱོགས་མང་པོར་བསམ་བློ་བཏང་ནས་བསམ་བློ་འདྲ་མི་འདྲ་ག་ཚོད་ཀྱིས་མང་བ་འཁོར་ན་དེའི་ཚོད་ཀྱིས་ཕན་ཐོགས་ཡོང་རྒྱུ་རེད་བསམ་གྱི་འདུག

རྒྱལ་བ་རིན་པོ་ཆེའི་བསམ་བློ་གང་འདྲ་ཞིག་ཡོད་མེད། ཕྱི་རྒྱལ་མིས་ཨིན་ཇི་ནང་རྩོམ་བྲིས་བྱས་པ་ལས་མ་གཏོགས་ཤེས་མི་ཐུབ།

   ཕྱི་རྒྱལ་ལ་སོགས་པའི་མི་མང་པོར་ཐུག ཁོང་ཚོས་སྐད་ཆ་འདྲ་མི་འདྲ་དྲིས། དཔེར་ན་ང་ལ་རྒྱལ་བ་རིན་པོ་ཆེས་སྐྱེ་བ་སྔོན་མ་དྲན་གྱི་འདུག་གམ་ཟེར་བ་དང། ཉིན་གཅིག་ལ་ཉམས་ལེན་ག་རེ་བྱེད་ཀྱི་ཡོད་དམ་ཟེར་བ། བསམ་བློ་ག་རེ་འཁོར་གྱི་འདུག་གམ་ཟེར་བ། དེ་བཞིན་རྒྱལ་བ་སྐུ་ཕྲེང་བཅུ་བཞི་པ་ཤི་བ་ཡིན་ན་སྐུ་ཕྲེང་བཅོ་ལྔ་པ་ཡོང་གི་རེད་དམ་མ་རེད་ཟེར་མཁན་འདྲ་པོ་དེ་འདྲའི་དྲི་བ་མང་པོ་ཡོང་གི་འདུག ཁོ་རང་ཚོས་འཚེར་སྣང་འདྲ་བྱས་ནས་འདྲི་བཞིན་འདུག གང་ལྟར་ཡང་སྙིང་སྐད་ཆ་འདྲ་མི་འདྲ་འདྲི་སྐབས་དེ་གའི་གནས་ལུགས་དང་འཚམས་པའི་འགྲེལ་བཤད་ཅིག་རྒྱག་གི་ཡོད། དེ་བརྒྱབ་དུས་ཁོང་ཚོས་རྒྱལ་བ་རིན་པོ་ཆེའི་བསམ་ཚུལ་གང་འདྲ་ཞིག་ཡོད་པ་དང༌། རྒྱལ་བ་རིན་པོ་ཆེའི་འཕྲལ་ཕུགས་ཀྱི་བསམ་བློ་ག་རེ་ཡོད་པ་དེ་ཤེས་ཀྱི་ཡོད་པ་རེད། ཡི་གེའི་ནང་ལ་ཡང་བཀོད་ཐུབ་ཀྱི་ཡོད།
ཚུར་ཕྱོགས་ང་ཚོ་བོད་རིགས་ནང་ལ་ཆ་བཞག་ན་ཤེས་ཀྱི་ཡོད་མ་རེད། ཚུར་འདྲི་མཁན་མ་བྱུང་ན་ང་ཡས་ཡས་དྲན་གྱི་འདུག མས་མས་དྲན་གྱི་འདུག་ཅེས་ལབ་མི་ཤེས། གལ་ཏེ་དེ་འདྲ་ལབ་ན། ྋརྒྱལ་བ་རིན་པོ་ཆེ་བསམ་བློ་བདེ་པོ་རང་མེད་པ་འདྲ། བསམ་བློའི་སྨན་ཁང་ལ་འཁྲིད་དགོས་ཀྱི་མེད་དམ་སྙམ་པ་དྲན་སྲིད་ཀྱི་རེད། ཚོགས་འདུ་འདྲ་ཚུགས་ནས་སྐད་ཆ་བཤད་པའི་སྐབས་ལ་ནི་ཁོ་རང་འབྲེལ་ཡོད་ཀྱི་སྐད་ཆ་ཤོད་རྒྱུ་རེད་མ་གཏོགས་དེ་ལྷག་བཤད་དོན་མེད། དེ་འདྲ་ཡིན་པས་སོ་སོའི་བསམ་བློ་ངོ་མ་དེ་ཐོན་གྱི་མེད། མ་ཐོན་ན་ཤེས་ཀྱི་མ་རེད།
ཁྱེད་རང་ཚོ་ཚང་མར་གཞན་སེམས་ཤེས་པའི་མངོན་ཤེས་ཡོད་ན་འགྲིགས་པ་རེད། དེ་ནི་ཡོད་མ་རེད། ང་བོད་པ་རེད། ད་ལྟ་ྋརྒྱལ་བ་རིན་པོ་ཆེའི་མིང་འཁྱེར་ནས་བོད་པའི་འགོ་འཁྲིད་ཀྱི་ཡོད། དཔེར་ན་ངས་སྐྱེ་བ་བླངས་པ་འདི་ཕལ་ཆེར་བོད་པའི་དོན་དག་ལ་སྐྱེས་པ་ལྟ་བུ་རེད། དེས་ན་ངས་ཤ་ཚ་ན་བོད་པར་ཤ་ཚ་གི་རེད་མ་གཏོགས་གཞན་སུ་ཞིག་ལ་ཚ། སྤྱིར་སེམས་ཅན་ཐམས་ཅད་གཉེན་དུ་བལྟ་དགོས་པ་དང༌། སེམས་ཅན་ཐམས་ཅད་བསམ་དགོས་ན་ཡང༌། སྒོས་སུ་བོད་འབངས་ཀྱི་སེམས་ཅན་དེ་ཚོའི་ཆེད་དུ་ང་སྐྱེས་པ་ཞིག་ཆགས་ཡོད་པས་ངས་ཤ་སུ་ལ་ཚ་ཟེར་ན། བོད་པ་ཚོར་ཚ་དགོས། འོན་ཀྱང་ཤ་ཚ་སའི་ཡུལ་དེ་ཚོས་ྋརྒྱལ་བ་རིན་པོ་ཆེའི་བསམ་བློར་གང་ཡོད་ཤེས་ཀྱི་ཡོད་པ་མ་རེད། གཞན་དག་ཚོས་ྋརྒྱལ་བ་རིན་པོ་ཆེའི་བསམ་བློ་གང་འདྲ་ཞིག་ཡོད་པ་དཔྱིས་ཕྱིན་པར་ཤེས་ཀྱི་ཡོད། དེ་ག་ཕྱི་ག་ལོག་མ་རེད་དམ།
དཔེར་ན། ཁྱེད་རང་ཚོ་བོད་རིགས་ནང་ནས་ྋརྒྱལ་བ་རིན་པོ་ཆེའི་བསམ་བློ་གང་འདྲ་ཞིག་ཡོད་པ་དང༌། ཆོས་ཐོག་ནས་ྋརྒྱལ་བ་རིན་པོ་ཆེའི་བསམ་བློ་གང་འདྲ་ཡོད། སྲིད་ཐོག་ནས་བསམ་བློ་གང་འདྲ་ཡོད། སྤྱི་ཚོགས་ཀྱི་གནས་ཚུལ་ཐོག་བསམ་བློ་གང་འདྲ་ཞིག་ཡོད་མེད་གལ་སྲིད་ཁྱེད་རང་ཚོའི་ནང་ཕྲུ་གུ་གཞོན་པ་ཞིག་གི་བསམ་བློའི་ནང་ཤེས་འདོད་ཡོད་པ་དང༌། ད་ལྟའི་གནས་སྐབས་ལ་རྩད་གཅོད་བྱེད་དགོས་བྱུང་ན། ྋརྒྱལ་བ་རིན་པོ་ཆེ་ཐུག་མྱོང་བའི་ཕྱི་མི་གཅིག་གིས་དྲི་བ་དྲིས་ལན་བྱས་པའི་རྩོམ་བྲིས་ཨིན་ཇིའི་ཡི་གེ་ཞིག་ལ་བལྟས་ན་མ་གཏོགས་ཕལ་ཆེར་ཤེས་ཀྱི་མ་རེད། བོད་ཡིག་ནང་ལ་སྤྱིར་བཏང་གཞིས་སྒར་ཁག་ཏུ་སྐད་ཆ་བཤད་པ་དེ་འདྲ་ཕྲན་བུ་མ་གཏོགས་གཞན་ཤེས་ཐབས་མེད་པ་རེད། གོ་ལྡོག་ནས་ཤེས་དགོས་མཁན་ཚོས་མ་ཤེས། གནས་ཚུལ་འབྲེལ་བ་དེ་ཙམ་མེད་བསྡད་མཁན་ཚོས་ཤེས་པ་དེ་འོས་པོ་དང༌། འཇུག་པོ་ཞིག་མི་འདུག
ངས་བར་ལམ་དེ་འདྲ་ཞིག་དྲན་ཡོང་གི་འདུག དཔེར་ན། ཕྲུ་གུ་སློབ་གྲྭ་བ་གཅིག་གིས་གནས་ཚུལ་ཞིག་མཐོང་སྟེ། ྋརྒྱལ་བ་རིན་པོ་ཆེས་ཁ་སང་འདི་འདྲ་གསུངས་འདུག ཕྱི་རྒྱལ་ཞིག་ལ་འདི་ལྟར་གསུངས་འདུག འདི་གང་འདྲ་ཡིན་ནམ་བསམས་ནས་ཁོའི་བསམ་བློར་ཤེས་འདོད་ཅིག་བྱུང་ནས་སློབ་སྤྱི་ཞིག་ཨེ་ཡིན། ཡང་ན་དགེ་རྒན་ཞིག་ལ་དེ་གང་འདྲ་ཡིན་ནམ་ཞེས་དྲིས་ན་ཤེས་མ་བྱུང་ཟེར་རྒྱུ་རེད། ཁྱེད་རང་ཚོ་མང་ཆེ་བ་ཚོས་སྐབས་དེར་བསམ་བློ་དེའི་ཡོང་སའི་གཞི་རྩ་ཁོ་རང་ཤེས་ཀྱི་མ་རེད། གནས་ཚུལ་འདི་གོ་ལྡོག་པའི་སྐྱོན་འདུག་བསམ་པ་དྲན་བྱུང༌།
གནས་ཚུལ་ཤེས་པར་བྱེད་པའི་ཐབས་ཤེས་ཕྱོགས་གཅིག་ནས་སྐད་ཆ་བཤད་པ་དེ་ཚོའི་གྲས་ཡི་གེའི་ཐོག་བཀོད་ནས་ཕར་ཚུར་ལྟ་ཀློག་བྱེད་རྒྱུ་དེ་ཐབས་ཤེས་གཅིག་རེད། ཐབས་ཤེས་དྲག་ཤོས་དང༌། ལས་སླ་ཤོས་ནི་འདི་ལྟར་མཉམ་དུ་འཛོམས་པའི་སྐབས་ལ་དྲི་བསྡུར་སྐད་ཆ་བཤད་ན། ང་དེར་སྤམ་ཤོར་རྒྱུ་དང༌། ངོ་ཚ་རྒྱུ་གང་ཡང་མི་འདུག ངས་ཤེས་པ་ནི་ཤེས་པ་རེད། མ་ཤེས་པ་ནི་མ་ཤེས་པ་རེད། སོ་སོའི་བསམ་ཚུལ་ཡོད་པ་དེ་ཐག་ཆོད་པ་ནི་ཆོད་པ་རེད། ཐག་མ་ཆོད་པ་ནི་མ་ཆོད་པ་རེད། ང་རང་ཚོ་ཚང་མ་ནང་ཁུལ་རེད། འདི་ལྟར་ཐུག་འཕྲད་སྐབས་དྲི་བ་དྲིས་ལན་ལྟ་བུ་བྱས་ན་ཡག་པོ་ཡོང་གི་རེད་བསམ་པ་ངས་དེ་འདྲ་དྲན་པ་རེད། དེ་ཡང་དངོས་ཡོད་གནས་ཚུལ་ལ་རན་དང་མ་རན་གྱི་དགེ་སྐྱོན་འདྲ་ཡོང་སྲིད་ཀྱི་རེད། དེར་བརྟེན། བཀའ་ཤག་དང་ཚོགས་གཙོ་གཉིས་ཡར་ཕེབས་ནས་སྐུ་སྒེར་ཡིག་ཚང་གི་ལས་ཀ་བྱེད་མཁན་ཚོ་མཉམ་དུ་གོ་བསྡུར་བྱས། དེ་ལ་དགེ་སྐྱོན་འདྲ་མི་འདྲ་གང་འདྲ་འདུག་ཞུས་པར་ཚང་མའི་དགོངས་འཆར་ལ་ཡག་པོ་འདུག་གསུང་གི་འདུག དེ་གནས་ལུགས་འགྲེལ་བཤད་ཡིན། ཞེས་སྩལ།།[/section] [/sections]

ཕྱི་ལོ་ ༡༩༧༢ བོད་མིའི་གཏན་འཇགས་སློབ་གྲྭ་ཁག་དང༌། ཉིན་མོའི་སློབ་གྲྭ་ཁག གཞན་ཡང་རྒྱ་གར་དང་ཕྱི་རྒྱལ་ཡུལ་ཁག་ནང་བཅས་པར་ཡོད་པའི་སློབ་ཕྲུག་རྣམས་ཀྱི་ཤེས་ཡོན་སློབ་སྦྱོང་བྱ་སྟངས་བོད་མི་རང་ཉིད་ཀྱི་རིག་གཞུང་དང་མཐུན་པར་ཡར་རྒྱས་གཏོང་ཐབས་སྐོར། བཞུགས་སྒར་གངས་ཅན་སྐྱིད་གཤོངས་སུ། ༧༢ ཟླ་ ༡༠ ཚེས་ ༢༠ ནས་ཚེས་ ༢༥ བར་ཤེས་རིག་ཚོགས་ཆེན་ཐེངས་གཉིས་པ་བསྐྱངས་པའི་གྲོས་གཞིའི་དོན་ཚན་ཁག་ལ་གྲོས་བསྡུར་ཟབ་ལྷིང་འབྱུང་སླད་ཚོགས་ཆུང་ཁག་དྲུག་ཏུ་དབྱེ་སྟེ་ཚོགས་ཆུང་སོ་སོ་ནས་བསམ་གྲོས་ཞིབ་བསྡུར་གྱིས་གྲོས་ཆོད་ཁག་ཕྱོགས་བསྡོམས་ཞུས་ཏེ་སླར་ཡང་ཚོགས་ཆེན་ཐོག་བཀའ་བསྡུར་དང་འབྲེལ་ཞིབ་འཇུག་སྣོན་འཕྲི་བསྐྱར་བཅོས་ཞུ་འོས་ཞུས་ཏེ་མཐའ་མའི་གྲོས་ཆོད་ཟིན་པ་གཤམ་གསལ།

གྲོས་གཞི་དོན་ཚན་དང་པོ།

ཤེས་རིག་ལྷན་ཁང་ནས་ཕྱོགས་སྒྲིགས་ཟིན་པའི་བོད་ཡིག་སློབ་དེབ་འཛིན་གྲྭ་སྔོན་འགྲོ་ ༡ དང་པོ་ ༡ གཉིས་པ་ ༡ གསུམ་པ་ ༡ བཞི་པ་ ༡ ལྔ་པ་ ༡་༢ དྲུག་པ་ ༡་༢་༣ བདུན་པ་ ༡་༢་༣ བརྒྱད་པ་ ༡་༢་༣ དགུ་པ། བཅུ་པ། བཅུ་གཅིག་པ་བཅས་ཁག་གསུམ་ལ་ཨུ་ཊ་ཡ་ནའི་རྟོགས་བརྗོད་དང༌། ཆུ་ཤིང་བསྟན་བཅོས། ྋགོང་ས་མཆོག་གི་མཛད་རྣམ་བཅས་ཀྱི་ཐོག ཁ་སྐོང་བོད་མཁས་པའི་སྙན་འགྲེལ། སི་ཏུ་འགྲེལ་ཆེན། རིག་གནས་སྐོར། གྲུབ་མཐའི་སྐོར། ཆོས་འབྱུང་དང་རྒྱལ་རབས་བཅས་ཡོད་པ་དེ་རྣམས་གསར་རྩོམ་ཕྱོགས་སྒྲིགས་གནང་ནས་ད་ཕན་ལོ་བཅུ་ཙམ་འགྲོ་གི་ཡོད་པར་བརྟེན་ད་ཆ་ཕལ་ཆེར་བསྒྱུར་བཅོས་དགོས་དང་མ་དགོས་དགེ་རྒན་ཚོའི་ས་ནས་ཉམས་མྱོང་ལེགས་ཆའི་བསམ་འཆར་ལེན་རྒྱུ་དེ་རང་གལ་གནད་ཆེ་ཤོས་ལ་བརྟེན། དགེ་རྒན་རེ་རེའི་ངོས་ནས་སློབ་དེབ་སྐོར་རྒྱུས་མངས་ད་ཡོད་སློབ་དེབ་འདི་རྣམས་ཀྱིས་སློབ་ཕྲུག་ལ་སློབ་སྦྱོང་སྤྲོད་སྐབས་རྒྱས་བསྡུས་ཇི་བྱེད། ཕལ་ཚིག་དང་ཆོས་ཚིག་གི་མཐོ་དམན་ཇི་བྱེད། དགེ་རྒན་ཚོས་འགྲེལ་བཤད་བྱེད་སྐབས་སློབ་ཕྲུག་ཚོས་གོ་དོན་ལེགས་རྟོགས་ཐུབ་ཀྱི་ཡོད་མེད་ཀྱིས་མཚོན་དཀའ་གནད་ཇི་ཡོད་རྒྱུས་མངའི་འགྲེལ་བཤད་གསལ་པོའི་ཐོག གོང་གསལ་སློབ་དེབ་ཁག་ལ་བསྒྱུར་བཅོས་དགོས་མིན་སྐོར།

ད་ཡོད་བོད་ཡིག་སློབ་དེབ་རྣམས་བརྩམས་སྒྲིགས་གནང་ནས་ལོ་རྒྱུན་གང་ཙམ་སོང་བར་བརྟེན་སློབ་དེབ་ཀྱི་བརྗོད་དོན་ཁག སློབ་དེབ་སྟེང་འོག་གོ་བརྗེས་བསྐྱར་སྒྲིགས་དགོས་རིགས་དང་གསར་སྣོན། དེ་བཞིན་དུས་བསྟུན་སློབ་ཚུལ་སོགས་ད་ཆ་ལེགས་བཅོས་དགོས་གལ་ཆེ་ལུགས་དགོངས་པ་གཅིག་མཐུན་བྱུང་བ་ལྟར་སློབ་དེབ་བསྐྱར་བཅོས་ཕྱག་ལེན་དངོས་བསྟར་སྐབས་ད་ལམ་དགེ་རྒན་སོ་སོའི་ངོས་ནས་ཕུལ་བའི་ལོ་མང་ཉམས་མྱོང་བསགས་པའི་བསམ་ཤོག་ཁག་དང༌། ཚོགས་མིའི་དགོངས་འཆར་ཚིག་ཐོ་ཟུར་ཡོད་ཁག་བཅས་ལ་བསྐྱར་ཞིབ་ཀྱིས་ལེགས་བཅོས་གནང་སྟེ་ཟིན་བྲིས་འབྲེལ་ཡོད་སློབ་གྲྭ་ཁག་ལ་འགྲེམ་སྤེལ་གྱིས་ལེགས་ཆ་བསྐྱར་བསྡུས་ཐོག་པར་འདེབས་གནང་རྒྱུ།

གྲོས་གཞི་དོན་ཚན་གཉིས་པ།

ད་ཕན་སློབ་གྲྭའི་ནང་སྒྲིག་བཙུགས་དང༌། ཤེས་ཡོན་གང་ཅིའི་སྐོར་ལ་བོད་རིགས་དགེ་ལས་ཚོས་རང་མི་རང་ལས་ཀྱི་སེམས་ཤུགས་ཆེན་པོས་འགན་འཁུར་རྐང་ལེན་བྱེད་བཞིན་པ་དེ་ལྟར་ཡང༌། ཕྱིས་སུ་མིག་ལྟོས་ངན་ལྷོད་ལྟ་བུས་ལས་དབར་དང༌། གུང་སེང་སྐབས་འཚོལ། རྒྱུན་དུ་སྤྱིའི་ལས་དོན་ལ་དོ་སྣང་དང༌། སེམས་འཁུར་མེད་པའི་སྐྱོན་གནད་ཀྱི་རྣམ་པ་ཐོན་གྱི་ཡོད་པ་དེ་དག་སེལ་ནས་སློབ་གྲྭའི་ལས་དོན་ལ་གཙོ་བོ་བོད་རིགས་དགེ་སློབ་སྤྱི་རུབ་ཀྱིས་སེམས་ཤུགས་སྤེལ་ཐབས་སྐོར་ལ་ཇི་དགེའི་ཐབས་བྱུས།

སློབ་གྲྭ་ཁག་གི་སྒྲིག་བཙུག་ཡར་རྒྱས་འབྱུང་ཐབས་སུ་ཤེས་རིག་ལྷན་ཁང་ནས་ལྟ་རྟོག་ཚོགས་པ་དམིགས་བཀར་ཟུར་འཛུགས་ཀྱིས་རྒྱུན་དུ་ལེགས་སྤེལ་ཉེས་འགོག་གི་སློབ་སྟོན་དང༌། སློབ་གྲྭའི་ལས་བྱེད་ཆེ་ཕྲ་སུ་ཐད་ནས་ལས་དོན་ཐོག་འགལ་འཛོལ་དང༌། འཁུར་ལེན་མ་བྱུང་ཕྱིན་དོ་བདག་སོ་སོར་ཐད་ཀར་བཀའ་བརྩད་སྐྱོན་སེལ་གནང་རྒྱུ།

ཉིན་སློབ་ཁག་ལ་སློབ་སྤྱི་ལས་ཚབ་རེ་ཡོང་ཐབས་དབུས་བོད་སློབ་འཛིན་སྐྱོང་ཚོགས་པར་བཀའ་བསྡུར་ཞུ་བསྐུལ་གནང་རྒྱུ།

གཏན་འཇགས་སློབ་གྲྭ་ཁག་དང༌། གཞིས་ཆགས་ཉིན་མོའི་སློབ་གྲྭ་ཁག་གི་སློབ་སྤྱི་དང༌། རྒྱ་བོད་དགེ་རྒན་གང་ཅིར་བརྟག་ཞིབ་ནན་ཏན་གྱིས་དྲག་གྲས་ལྷག་བསམ་དང༌། ཤེས་ཚད་ལྡན་ངེས་བསྐོ་བཞག་གནང་ཐུབ་པ་བྱུང་ན་ཡར་རྒྱས་འགྲོ་ངེས།

གྲོས་གཞི་དོན་ཚན་གསུམ་པ།

ཟློས་གར་སློབ་ཚན་སྐོར་ལ་སློབ་གྲྭ་མང་ཆེར་ཟློས་དགེ་བཟའ་ཚོ་ཆབས་སྦྲགས་རེར་ཕོགས་ཐོབ་ཀྱང་དགེ་རྒན་སྤྱི་མཚུངས་ཡོད་པས་མཚོན་ཁེ་ཕན་ཆེ་ཐོབ་ཡོད་བཞིན་པར་ཆོག་ཤེས་ཀྱིས་རང་གི་རིག་གཞུང་ཟློས་གར་གྱི་སློབ་ཚན་ཡར་རྒྱས་ཆེ་ཐོན་དགོས་པ་དེ་ལྟར་ཡང༌། ད་ལྟའི་ཆར་ཡར་རྒྱས་ཀྱི་རྣམ་པ་དེ་ཙམ་ཐོན་པའི་རང་རྟགས་ཆེར་མི་མངོན་པས་དེ་རིགས་ཀྱི་སྐྱོན་ཆ་སེལ་ནས་ཡར་རྒྱས་གཏོང་ཐབས་རྒྱུས་སྟོན་ཇི་དགེའི་སྐོར།

སློབ་གྲྭ་ཁག་གི་ནང་ཟློས་གར་ཡར་རྒྱས་ཚད་ལྡན་ཡོང་ཐབས་སྐོར། ཟློས་གར་སློབ་ཚན་ཕྱོགས་སྒྲིག་དང༌། སློབ་ཚན་སྤྱི་མཚུངས་རྒྱུགས་སྤྲོད་གནང་ཕྱོགས། གཞིས་སློབ་ཟློས་དགེ་མེད་རིགས་ཁག་ལ་ཟློས་དགེ་གསར་གཏོང་གནང་ཕྱོགས་སོགས་ཞིབ་པ་ཟློས་གར་ཚོགས་པ་ནས་ཕུལ་བའི་བསམ་ཤོག་ཟུར་ཡོད་ལ་གནད་འགག་བབས་བསྟུན་གྱིས་ཇི་དགེ་ཤེས་རིག་ལྷན་ཁང་ནས་ཟུར་དུ་དགོངས་བཞེས་གནང་རྒྱུ།

གྲོས་གཞི་དོན་ཚན་བཞི་པ།

ཤེས་རིག་པར་ཁང་འདི་བཞིན་ཐོག་མར་འཛུགས་གནང་གི་དགོངས་གཞི་དགོས་པ་ཕུགས་ཡུལ་སློབ་དེབ་ཀྱི་ཕྱག་གྲོན་ལ་སྨན་པའི་ཐུགས་རེ་ཡིན་ནའང༌། བར་སྐབས་ཤིག་ནས་པར་ཁང་རང་ཁ་རང་གསོའི་འཛིན་སྐྱོང་ལ་གནས་སྟབས། ད་ཕན་ཁེ་གྱོང་རྩིས་ཁྲ་ཁ་གསལ་མ་ཕུལ་བར་བསྡད་ཡོད་པའི་གཏོང་ཡོང་གསལ་མཁྱེན་ཐུབ་པ་དགོས་རྒྱུའི་ཐོག རང་གཞུང་ལ་ཕྱག་གྲོན་གྱི་སྐུ་ངལ་ཡོད་བཞིན་དུ་ལོ་ལྟར་སློབ་དེབ་རིན་འབབ་གཞུང་གྲོན་རྒྱ་ཆེ་པར་ཁང་ལ་གནང་མུས་ཀྱི་མཐུན་རྐྱེན་ལ་སྨན་ཐབས་ལེགས་བཅོས་ཇི་དགེའི་སྐོར།

ཤེས་རིག་པར་ཁང་འདི་བཞིན་ད་མུས་རང་ཁ་རང་གསོའི་འཛིན་སྐྱོང་འོག་གནས་ན། རྩ་བའི་པར་ཁང་ཡར་རྒྱས་དང༌། དངུལ་གྲོན་ལ་སྨན་པ་དེ་ཙམ་ཡོང་བཟོ་མ་མངོན་པས། ད་ཕན་པར་ཁང་གིས་གཏོང་ཡོང་ཇི་བྱས་རྣམས་ཤེས་རིག་ལྷན་ཁང་ནས་རྩིས་ཞིབ་ཁམས་དྭངས་གནང་རྗེས་པར་ཁང་གཞུང་འཛིན་གནང་སྟེ་ཤེས་རིག་པར་ཁང་གི་ལས་བྱེད་རྣམས་ལ་གཞུང་སྲོལ་ལས་བྱེད་སྤྱི་མཚུངས་ཕོགས་ཐོབ་གནང་ན། སློབ་གྲྭ་ཁག་གི་སློབ་དེབ་དང་གཞུང་མཁོ་དཔེ་དེབ་ཡིག་རིགས་པར་འདེབས་གནང་རྒྱུ་ཐུགས་ཕན་གསོས་པོ་ཡོང་རྒྱུ།

བོད་ཡིག་སློབ་དེབ་ཁག་གི་འགྲོ་གྲོན་ད་མུས་བཞིན་བོད་གཞུང་ནས་ནར་གཏོང་གནང་མ་དགོས་པར་རྒྱ་གར་གཞུང་དང༌། རོགས་ཚོགས་ཁག་ནས་རོགས་རམ་ཡོང་ཐབས་འབོད་སྐུལ་གནང་རྒྱུ།

གྲོས་གཞི་དོན་ཚན་ལྔ་པ།

བོད་མིའི་སློབ་ཕྲུག་རྣམས་ཕྱི་ནང་གང་སར་རང་གཞུང་ནས་དངོས་སུ་ཕྱག་གྲོན་རྒྱ་ཆེ་གནང་ཡོད་པའི་ཐོག་རྒྱ་གར་གཞུང་དང༌། ཕྱི་རྒྱལ་རོགས་ཚོགས་བཅས་ནས་མཐུན་རྐྱེན་རོགས་རམ་ཐོབ་སྟེ་སློབ་སྦྱོང་གི་གོ་སྐབས་བཟང་པོ་ཐོབ་ནས་ད་མཚམས་འབྲིང་རིམ་དང་(ཀོ་ལི་ཇི་)མཐོ་རིམ་སློབ་གྲྭར་ཚུད་ཞུགས་ཇི་སྙེད་ཡོད་པ་རྣམས་ནས་ཕུགས་ཡུལ་རང་རིགས་གསར་སྐྱེས་མྱུ་གུ་རྣམས་ཀྱི་སློབ་ཡོན་མཐུན་རྐྱེན་ལ་སྨན་ཐབས་བཀའ་དྲིན་བསམ་ཤེས་ངེས་པར་མ་བྱས་ཐབས་མེད་ཡོང་རྒྱུར་དེ་དག་གི་མཐུན་རྐྱེན་ཆེད་དུ་མཐོ་རིམ་དང༌། འབྲིང་རིམ་སློབ་ཐོན་རྣམས་ནས་རང་རང་འཁོས་དཔག་གི་ལས་ཀའི་ཕོགས་ཐོག་ནས་ཟླ་རེ་བརྒྱ་ཆ་གང་འགབ་བསྡུ་འབུལ་དགོས་རྒྱུའི་རྒྱས་དཔྱད་ཅིག་གནང་འགབ་ཆེ་མིན་སྐོར།

རང་གཞུང་གི་དངོས་ཤུགས་རོགས་རམ་ལ་བརྟེན་ནས་བོད་རིགས་སློབ་ཐོན་རྣམས་ལས་ཀར་འཁོད་མཚམས་འབྱུང་འགྱུར་གཞོན་ནུ་རྣམས་ཀྱི་ཤེས་ཡོན་གྱི་དོན་དུ་སྤྱི་སྲོལ་བཞིན་ཕོགས་ཐོབ་ཐོག་ནས་བརྒྱ་ཆའི་ཚད་གཞི་དགོས་ངེས་ཤིག་ལོ་དུས་རྒྱས་བཅད་གཏན་འབེབས་ཀྱིས་བསྡུ་བཞེས་མཛད་ན་གང་ཅིར་དགེ་མཚན་ཆེ་བ་བཞིན་དུ་བསྡུ་ཕྱོགས་དང༌། སློབ་ཡོན་གནང་ཕྱོགས་ཐད་ལམ་སེང་ཚོགས་འདུ་ནས་ཐག་གཅོད་བྱེད་སྟབས་དཀའ་བས་ཤེས་རིག་ལྷན་ཁང་ནས་ཁྲིམས་མཐུན་འཆར་གཞི་བཟོ་འགོད་གནང་སྟེ་གོང་གསལ་དངུལ་འབབ་དང༌། ཕྱི་ནང་རོགས་ཚོགས་ཁག་ནས་བོད་མིའི་ཤེས་རིག་ལ་སྨན་པའི་རོགས་རམ་ཇི་ཐོབ་རྣམས་ཡིད་ཆེས་སློབ་ཡོན་ཁང་ཆེད་འཛུགས་ཀྱིས་དེ་ནས་བསྡུ་བཞེས་གནང་ཐབས་ཕྱག་ལེན་འཁེལ་རྒྱུ།

ད་ཡོད་ཕྱི་རྒྱལ་རོགས་ཚོགས་ཁག་ནས་བོད་རིགས་སློབ་ཕྲུག་ཚོར་ཐད་ཀར་སློབ་ཡོན་རོགས་རམ་གནང་མུས་ཁག་རང་གཞུང་ཤེས་རིག་ལྷན་ཁང་བརྒྱུད་ཡོང་ཐབས་འབྲེལ་ཡོད་རོགས་ཚོགས་ཁག་ལ་འབྲེལ་ལམ་གནང་རྒྱུ།

གྲོས་གཞི་དོན་ཚན་དྲུག་པ།

དགེ་རྒན་རྣམ་པ་ཚོ་དང༌། མཁས་པ་རྣམ་པ་ཚོས་བོད་ཡིག་སློབ་དེབ་དང༌། སྒྲུང་དེབ། ཨང་རྩིས་སོགས་གང་ཅིའི་ཐད་ནས་རང་མོས་དོ་འཁུར་གྱིས་གསར་དུ་རྩོམ་པ་དང༌། སྐད་ཡིག་གཞན་དག་ཐོག་ནས་སྒྱུར་སྒྲིག་ཁུངས་དག་བྱུང་ན་རང་གཞུང་ནས་བྱ་དགའ་བདག་རྐྱེན་གསོལ་རས་སྩལ་རྒྱུའི་ལམ་སྲོལ་གཏོད་ཐབས་ཇི་དགེའི་སྐོར།

སློབ་གྲྭ་ཁག་གི་དགེ་རྒན་དང་འབྲེལ་ཡོད་མཁས་དབང་ཁག་ནས་རང་རང་ཉམས་མྱོང་ལ་གཞིགས་ཏེ་བོད་ཡིག་སློབ་དེབ་གསར་རྩོམ་བྱུང་རིགས་ལ་ཤེས་རིག་ལྷན་ཁང་ནས་དཔྱད་ཞིབ་ཀྱིས་བརྗོད་དོན་དང༌། སྒྲིག་སྟངས་དུས་མཐུན་ཚད་འཕེར་བྱུང་རིགས་ཁག་ལ་གཟེངས་བསྟོད་དང༌། སེམས་ཤུགས་སྤེལ་ཐབས་གནང་རྒྱུ། དེ་བཞིན་མཁས་པ་དང་དགེ་རྒན། སློབ་ཕྲུག་སོགས་བོད་མི་སུ་ཐད་ནས་སྤྱིར་བཏང་བོད་ཀྱི་ཆོས་དང༌། རིག་གཞུང༌། རྒྱལ་རབས། སྒྲུང་དེབ་བསྟན་བཅོས་གསར་དུ་བརྩམས་པའམ། ཕྱི་རྒྱལ་སྐད་ཡིག་ནས་ཁུངས་དག་བསྒྱུར་ཐུབ་བྱུང་རིགས་ལ་རང་གཞུང་ནས་བདག་རྐྱེན་གཟེངས་བསྟོད་གནང་སྲོལ་གཏན་འབེབས་ཕྱག་བཞེས་གནང་རྒྱུ།

གྲོས་གཞི་དོན་ཚན་བདུན་པ།

སློབ་ཐོན་རྣམས་ལ་ལས་ཀའི་དམིགས་ཡུལ་གསར་འཚོལ་གྱི་ཐབས་ཤེས་ཇི་དགེའི་སྐོར།

སློབ་ཐོན་ཡོང་བཞིན་པའི་སློབ་ཕྲུག་རྣམས་ལ་ལས་ཀའི་དམིགས་ཡུལ་གསར་འཚོལ་སྐོར། ཕྱི་ནང་གང་སར་ལས་ཀ་བྱ་ཡུལ་ཇི་ཙམ་ཐོན་མིན་དང༌། ལས་རིགས་ཇི་ཙམ་དགོས་མཁོ་ཡོད་མེད་རང་གཞུང་འབྲེལ་ཡོད་ལས་ཁུངས་ནས་ལས་དོན་འདི་ཐོག་ལ་མཁས་པའི་ལས་བྱེད་ཁ་སྣོན་གསར་འཛུགས་གནང་འོས་སམ་ལས་བྱེད་སོགས་འབྲེལ་ཡོད་ལ་གོ་བསྡུར་གནང་ཐོག་དེ་དག་ལ་གཞིགས་པའི་དགེ་རྒན་དང༌། ལས་བྱེད་སློབ་སྦྱོང་དང༌། གཞན་ཡང་ཞི་དྲག་སློབ་སྦྱོང༌། བོད་ཀྱི་ལག་རྩལ་འདྲ་མིན་སྣ་ཚོགས་ཀྱི་ལས་གྲྭ་གསར་འཛུགས་ཀྱིས་སློབ་སྦྱོང་གནང་ཐུབ་པ་བྱུང་ན་དེ་ནས་ཐོན་མཚམས་སོ་སོའི་ཤེས་ཚད་འཇོན་ཐང་ལ་གཞིགས་པའི་གཞུང་སྒེར་གང་གི་ཁོངས་སུའང་ལས་ཀ་བྱ་ཡུལ་གྱི་ཕོངས་པ་ཡོང་མིན་ལ་དེ་དག་གི་ལས་ཀ་འཚོལ་རྒྱུའི་དཀའ་ངལ་སེལ་ཐུབ་ངེས་མ་ཟད། རང་རེའི་ཐུན་མོང་མ་ཡིན་པའི་ལག་རྩལ་འཇིམ་བཟོ། ཤིང་བརྐོས། གསེར་བཟོ། ཚག་རིགས། རི་མོ་སོགས་ཉམས་ཆག་ཏུ་མ་སོང་བར་སླར་གསོ་ཡར་རྒྱས་ཡོང་རྒྱུའི་དགེ་མཚན་ཆེ་བས་དེ་དོན་ཕྱག་ལེན་འཁེལ་རྒྱུ་བཅས་ལ་གྲོས་འཆམས་བྱུང་སོང་ལགས་པའི་གྲོས་ཆོད་ྋསྙན་ཞུར། སྐབས་གཉིས་པའི་བོད་ཀྱི་ཤེས་རིག་ཚོགས་ཆེན་ནས། ༧༢ ཟླ་ ༡༠ ཚེས་ ༢༥ ལ།