མིང་གཞིའི་ཡི་གེ་སྤྱིའི་རྟགས་ཀྱི་དབྱེ་བ་བཤད་པ།
སྐད་ཅིག་ཙམ་ཞིག་ཡིད་མཁར་ཤར་བས་ཀྱང་། །
ནང་གི་མུན་སྟུག་རྣམ་པར་སྙིལ་བྱེད་པ། །
འཇམ་དཔལ་དཔའ་བོའི་བྱིན་རླབས་ཉིན་མོར་བྱེད། །
བྱང་ཆུབ་བར་དུ་སྒོ་གསུམ་སྙིང་པོར་བསྟེན། །
ཞེས་ཤིས་པའི་ཚིག་སྔོན་དུ་བཏང་ནས་ད་ནི་རྟགས་ཀྱི་འཇུག་པ་ཞེས་ཡོངས་སུ་གྲགས་པའི་གཞུང་གི་ཚིག་དོན་ལ་རྣམ་པར་དཔྱད་ནས་ཅུང་ཟད་དགྲོལ་བར་བྱའོ། །དེ་ལ་རེ་ཞིག་གཞུང་འདིའི་སྤྱི་སྡོམ་གྱི་ས་བཅད་ནི།
མིང་གཞིའི་ཡི་གེ་སྤྱིའི་རྟགས་ཀྱི་དབྱེ་བ་བཤད་པ་དང་། སྔོན་འཇུག་གི་རྟགས་ཀྱི་འཇུག་པ་བཤད་པ་དང་། རྗེས་འཇུག་གི་རྟགས་ཀྱི་འཇུག་པ་བཤད་པ་སྟེ་གསུམ་དུ་རིག་པར་བྱའོ། །
དང་པོ་ནི།
ཕོ་ཡི་ཡི་གེ་འབའ་ཞིག་ལ། །
སྡེ་བ་ཕྱེད་དང་བརྒྱད་གནས་པའང་། །
སྡེ་ཚན་ལྔ་རུ་དྲིལ་བྱས་ནས། །
ཕོ་དང་མ་ནིང་མོ་དང་ནི། །
ཤིན་ཏུ་མོ་དང་བཞི་བཞི་རུ། །
སྡེ་བ་བཞི་པ་ཡན་ཆད་དབྱེ། །
ལྷག་མ་བཅུ་བཞི་གནས་པ་ལ། །
ཙ་སོགས་གསུམ་ནི་ཅ་སོགས་སྦྱར། །
ཝ་ནི་བ་དང་སྦྱར་བར་བྱ། །
ལྷག་མ་དྲུག་ནི་མོ་རུ་སྦྱར། །
ར་ལ་ཧ་ནི་མོ་གཤམ་སྟེ། །
ཨ་ནི་མཚན་མེད་ཅེས་ཀྱང་བྱ། །
ཞེས་པས་བསྟན་ཏེ། སྤྱིར་བོད་ཀྱི་སྐད་ལ་ཉེ་བར་གྲགས་པའི་ཡི་གེ་རྣམས་ལ་ཕོ་མོ་གཉིས་སུ་དབྱེ་བའི་དབང་དུ་བྱས་ན་དབྱངས་ཡིག་མཚོན་བྱེད་ཨི་ཨུ་ཨེ་ཨོ་བཞི་ནི་ཤེས་རབ་ཀྱི་རང་བཞིན་མོ་དང་ཀ་ནས་ཨའི་མཐར་ཐུག་པ་གསལ་བྱེད་སུམ་ཅུ་པོ་རྣམས་ནི་ཐབས་ཀྱི་རང་བཞིན་ཕོར་ཤེས་པར་བྱའོ། །དེས་ན་ཕོའི་ཡི་གེ་འབའ་ཞིག་སྟེ་གསལ་བྱེད་སུམ་ཅུ་པོ་ཁོ་ན་ལ་སྡེ་བ་ཕྱེད་དང་བརྒྱད་དུ་གནས་ཏེ། སྡེ་བ་དང་པོ། ཀ་ཁ་ག་ང་། གཉིས་པ། ཅ་ཆ་ཇ་ཉ། གསུམ་པ། ཏ་ཐ་ད་ན། བཞི་པ། པ་ཕ་བ་མ། ལྔ་པ། ཙ་ཚ་ཛ་ཝ། དྲུག་པ། ཞ་ཟ་འ་ཡ། བདུན་པ། ར་ལ་ཤ་ས། ཕྱེད་པ། ཧ་ཨ། རྣམས་སོ། །
དེ་རྣམས་སྡེ་ཚན་ལྔ་རུ་དྲིལ་བ་ནི་ཕོ་དང་མ་ནིང་དང་མོ་དང་ཤིན་ཏུ་མོ་དང་མོ་གཤམ་སྟེ་རྣམ་པ་ལྔའོ། །དེའང་སྡེ་བ་བཞི་པོ་རྣམས་ཀྱི་དང་པོ་ཀ་ཅ་ཏ་པ་རྣམས་ཕོ་དང་། གཉིས་པ་ཁ་ཆ་ཐ་ཕ་རྣམས་མ་ནིང་དང་། གསུམ་པ་ག་ཇ་ད་བ་རྣམས་མོ་དང་། བཞི་པ་ང་ཉ་ན་མ་རྣམས་ཤིན་ཏུ་མོར་དབྱེ་བར་བྱའོ། །དེར་མ་ཕྱེ་བའི་ལྷག་མ་ཙ་སྡེ་ཕྱེ་ན་ཡི་གེ་བཅུ་བཞིར་གནས་པ་ལ། ཙ་ལ་སོགས་པ་སྟེ་ཙ་ཚ་ཛ་གསུམ་ནི་རིམ་བཞིན་སྔར་བསྟན་པའི་ཅ་ལ་སོགས་པ་གསུམ་དང་སྦྱར་བར་བྱ་སྟེ། ཙ་ཕོ་ཚ་མ་ནིང་ཛ་མོར་ཤེས་པར་བྱའོ། །དེ་བཞིན་དུ་ཝ་ནི་བ་དང་སྦྱར་བས་མོ་དང་། ལྷག་མ་ཞ་ཟ་འ་ཡ་ཤ་ས་དྲུག་ཀྱང་མོའི་ཡི་གེར་སྦྱར་བར་བྱའོ། །ར་ལ་ཧ་གསུམ་ནི་མོ་གཤམ་གྱི་ཡི་གེ་ཞེས་བྱ་ཞིང་། ཨ་ཡིག་ནི་མོ་གཤམ་གྱི་ཡི་གེ་ཡིན་པར་མ་ཟད་མཚན་མེད་ཀྱི་ཡི་གེ་ཞེས་ཀྱང་བྱའོ། །ཞེས་པའི་དོན་ཏོ། །འདིར་མིང་གཞིའི་ཡི་གེ་རྣམས་ཕོ་ལ་སོགས་པར་རྒྱུ་མཚན་གང་གི་སྒོ་ནས་བཞག་པའང་འདི་ལྟར་ཤེས་དགོས་ཏེ། ཡི་གེ་རྣམས་སོ་སོར་ངག་ནས་བརྗོད་པའི་ཚེ་སོ་སོའི་སྐྱེ་གནས་མགྲིན་སོ་མཆུ་རྐན་སོགས་ལ་བྱེད་རྩོལ་གྱི་ཤུགས་ཆེ་ཆུང་ངམ་གྲིམས་ལྷོད་ཀྱི་དབང་གིས་ཤུགས་ཆེ་བའམ་གྲིམས་པ་རྣམས་ཕོ་ཡིག་དང་། རན་པ་རྣམས་མ་ནིང་དང་། ཅུང་ཟད་ཆུང་བའམ་ལྷོད་པ་རྣམས་མོ་དང་། དེ་ལས་ཀྱང་ཆུང་བའམ་ལྷོད་པ་རྣམས་ཤིན་ཏུ་མོ་དང་། ཤིན་ཏུ་རྩོལ་བ་ལྷོད་ཅིང་ཞན་པ་རྣམས་མོ་གཤམ་དུ་བཞག་པའོ། །དེས་ན་ཨ་ཡིག་རྩོལ་བ་ཤིན་ཏུ་ལྷོད་པའི་སྒོ་ནས་མོ་གཤམ་དུ་བཞག་མོད་ཀྱི་ར་ལ་ཧ་གསུམ་ལ་ལྟོས་པའི་དེ་ལས་ཀྱང་རྩོལ་བ་ཞན་པའི་ཕྱིར་མཚན་མེད་དུའང་བཞག་གོ། དེ་ལྟར་ཡིན་པ་ཅིས་ཤེས་ཤེ་ན་འདི་ཉིད་དུ། ཕོ་ནི་དྲག་པའི་ཚུལ་གྱིས་འཇུག། ཅེས་སོགས་ཀྱི་ཤུགས་ལས་ཀྱང་རྟོགས་ཤིང་། ཡི་གེ་རྣམས་ཀྱི་ཀློག་ཚུལ་རང་གིས་ཀྱང་བདེ་བླག་ཏུ་གོ་བར་ནུས་ཏེ། ཀ་སྡེ་སོགས་བཞི་པོའི་སྡེ་བ་སོ་སོའི་དང་པོ་ལས་གཉིས་པ་སོགས་རིམ་པར་རྩོལ་བ་ལྷོད་པ་དང་ཙ་ཚ་ཛ་གསུམ་ཡང་དེ་དག་གི་རིམ་པ་དང་མཚུངས་ཤིང་ཝ་ཞ་ཟ་འ་ཡ་ཤ་ས་རྣམས་ག་སོགས་དང་འདྲ་བ་དང་། ར་ལ་ཧ་ཨ་རྣམས་དེ་ལས་ཀྱང་ཅུང་ཟད་རྩོལ་བ་ལྷོད་པར་མངོན་སུམ་གྱིས་གྲུབ་པའི་ཕྱིར་དང་། ཨ་ཡིག་ནི་ཀློག་ཚུལ་གྱིས་མོ་གཤམ་གཞན་ལས་ལྷོད་པར་གྲུབ་ཅིང་། དེར་མ་ཟད་ཡི་གེའི་མདོར་སྲོག་ཆེན་གྱི་ཡི་གེ་གཞན་རྣམས་ཕྱེ་བའི་རྩོལ་བ་ཅན་དུ་བྱས་ཤིང་ཨ་ཁོ་ན་མགྲིན་པ་བཙུམ་པའི་རྩོལ་བ་ཅན་དུ་བཞག་པས་ཀྱང་གྲུབ་པའི་ཕྱིར་རོ། །
སྐབས་འདིར་འགྲེལ་བྱེད་སྔ་མ་ཁ་ཅིག་ཨ་ཡིག་རྟགས་མེད་དུ་འདོད་པ་དང་། ཁ་ཅིག་མོ་གཤམ་མམ་མ་ནིང་མཚན་མེད་དུ་འདོད་པ་དང་། ཁ་ཅིག་ཕོ་རྟགས་སུ་འདོད་པ་རྣམས་བྱུང་ཡང་། ལུགས་དང་པོ་ལྟར་ན་ཐུ་མི་ཉིད་ཀྱིས་སྡེ་བ་ཕྱེད་དང་བརྒྱད་པོ་སྡེ་ཚན་ལྔར་དྲིལ་བར་བསྟན་པ་དང་དངོས་སུ་འགལ་ཏེ་སྡེ་ཚན་ལྔར་མི་གཏོགས་པའི་རྟགས་མེད་ཀྱི་ཨ་ཡིག་ཁས་བླངས་པའི་ཕྱིར་རོ། །འདོད་པ་གཉིས་པ་ལྟར་ཡང་མི་ལེགས་ཏེ་འཆད་འགྱུར་ལྟར་གཞུང་གི་ཡི་གེ་ཉམས་པ་ཉིད་ཚད་མར་བཟུང་ནས་ཨ་ཡིག་ལ་འོལ་ཚོད་ཀྱིས་རིགས་འགྲེ་སྦྱར་བ་ཙམ་དུ་སྣང་བའི་ཕྱིར་རོ། །ལུགས་གསུམ་པ་ལའང་སྐྱོན་ཡོད་དེ་གཞུང་ཉིད་དུ་དམིགས་བསལ་གྱིས་ཕོ་ཡིག་རྣམས་གསལ་བར་ཕྱེས་པ་ལ་དབྱེ་བ་མཚན་ཉིད་པར་མ་སོང་བའི་སྐྱོན་གདགས་པར་འདོད་པས་སམ་བླུན་པ་ཉིད་ཀྱིས་སྤྱིར་བཏང་ཀཱ་ལི་སུམ་ཅུ་ཕོ་ཡིག་ཏུ་བཤད་པའི་སྒྲུབ་བྱེད་ཀྱིས་དམིགས་བསལ་སྐབས་སུ་ཨ་ཡིག་ཕོར་བསྒྲུབས་པའི་ཕྱིར་རོ། །ཡང་སྐབས་འདིར་འགྲེལ་བྱེད་ཕལ་ཆེར་མགྲིན་གཅིག་ཏུ་ར་ལ་ཧ་རྣམས་མོ་གཤམ་ཡིན་པར་མ་ཟད་མ་ནིང་མཚན་མེད་ཀྱང་ཡིན་པར་སྨྲ་བའང་འཐད་པར་མ་གོ་སྟེ། དེ་དག་གིས། ར་ལ་ཧ་ནི་མོ་གཤམ་སྟེ། །མ་ནིང་མཚན་མེད་ཅེས་ཀྱང་བྱ། །ཞེས་གཞུང་གི་ཡི་གེ་ཉམས་པ་ཉིད་སྒྲ་དྲང་ཐད་དུ་བཟུང་བས་ནོངས་པར་འདུག་པའི་ཕྱིར་རོ། །གཞུང་དེ་ལྟར་བཀླགས་པས་སྐྱོན་དུ་འགྱུར་བའི་ཚུལ་ཇི་ལྟ་བུ་ཞེ་ན། མོ་གཤམ་དང་མ་ནིང་གི་གཞི་མཐུན་ཁས་ལེན་དགོས་པའི་སྐྱོན་དེ་ཉིད་དང་། སྡེ་བ་ཕྱེད་དང་བརྒྱད་པོ་སྡེ་ཚན་ལྔ་རུ་དྲིལ་དགོས་པ་ལ་འདྲིལ་མི་ཐུབ་པའི་སྐྱོན་དུའང་འགྱུར་རོ། །དེ་ལ་མོ་གཤམ་དང་མ་ནིང་གི་གཞི་མཐུན་ཁས་བླངས་པས་ཅིར་འགྱུར་ཞེ་ན་བཤད་པར་བྱ་སྟེ། སྤྱིར་ག་ཡིག་ལྟ་བུ་སྤྱིར་བཏང་གསལ་བྱེད་རྣམས་ཕོ་ཡིག་ཏུ་བྱས་པའི་ཕོ་ཡིན་པ་དང་། ནང་གསེས་སྡེ་ཚན་ལྔར་དབྱེ་བའི་མོ་ཡིན་པ་ལྟ་བུ་མི་འགལ་ཡང་དབྱེ་སྒོ་གཅིག་ཉིད་ཀྱི་ཚེ་ནི་ཡི་གེའི་སྐྱེ་གནས་ཀྱི་རྩོལ་བ་ཆེ་ཆུང་ངམ་སྒྲ་གྲིམས་ལྷོད་སོགས་འབྱེད་ཆོས་ཐ་དད་པས་རྣམ་པར་བཞག་པའི་དབྱེ་བ་ཐ་དད་པ་རྣམས་ཆོས་ཅན་བྱེ་བྲག་པ་གཅིག་གི་སྟེང་དུ་འདུ་བར་རུང་བ་མ་ཡིན་ཏེ་དཔེར་ན་རྩོལ་བ་ཆེ་བའམ་སྒྲ་གྲིམས་པའི་སྒོ་ནས་བཞག་པའི་ཕོ་ཡིག་ཀ་ལྟ་བུ་ལ། སྐབས་དེའི་མ་ནིང་དང་མོ་སོགས་ཀྱི་འབྱེད་ཆོས་བྱེད་པ་དང་རྩོལ་བ་མཉམ་པ་དང་ལྷོད་པ་སོགས་ལྷན་ཅིག་ཏུ་འགལ་བ་འདུ་བའི་སྐབས་མེད་པ་བཞིན་ནོ། ། དེས་ན་མ་ནིང་བྱེད་རྩོལ་མཉམ་པའི་སྒོ་ནས་བཞག་པ་དང་། མོ་གཤམ་བྱེད་རྩོལ་ཤིན་ཏུ་ལྷོད་ཅིང་ཞན་པའི་སྒོ་ནས་བཞག་པ་གཉིས་དབྱེ་སྒོ་གཅིག་གི་ཚེ་ནམ་ཡང་མི་འགྲིག་སྟེ། དཔེར་བྱས་པའི་མོ་གཤམ་དང་མ་ནིང་སོགས་ཀྱང་གཞི་གཅིག་ལ་གཉིས་ཀ་དང་གསུམ་ག་སོགས་ཡིན་པ་མི་སྲིད་ཅིང་དེ་ལྟར་སྲིད་དོ་ཞེས་སྨྲ་ནའང་འཇིག་རྟེན་གྱི་གྲགས་པ་དང་འགལ་བ་བཞིན་དཔེ་ཅན་ལའང་མཚུངས་པའི་ཕྱིར་རོ། །ཡང་སྡེ་ཚན་ལྔར་འདྲིལ་མི་ཐུབ་པའི་སྐྱོན་མེད་དེ། ར་ལ་ཧ་གསུམ་མོ་གཤམ་དུ་བཤད་པས་ཨ་ཡིག་མོ་གཤམ་དུ་ཤུགས་ཀྱིས་གོ་ནུས་པའི་ཕྱིར། སྙམ་ནའང་མི་འཐད་དེ་ཡི་གེ་གཞན་ཐམས་ཅད་ཞིབ་མོར་ཕྱེ་ནས་བཤད་ཅིང་ཨ་ཡིག་གཅིག་པུ་ཤུགས་བསྟན་དུ་བཞག་པ་ལ་ཉན་པ་པོར་ཐེ་ཚོམ་སྐྱེད་པ་སོགས་ཀྱི་སྐྱོན་ལས་དགོས་པ་གཞན་ཅིའང་མེད་པའི་ཕྱིར་རོ། །དེས་ན་གོང་དུ་བཀོད་པ་བཞིན། ཨ་ནི་མཚན་མེད་ཅེས་ཀྱང་བྱ། །ཞེས་ཀློག་པ་ཉིད་དོན་དང་འབྱོར་ཏེ། ཀྱང་སྒྲའི་ནུས་པས་ཨ་ཡིག་ར་ལ་ཧ་བཞིན་དུ་མོ་གཤམ་ཡིན་པར་གྲུབ་ཅིང་། མཚན་མེད་ཅེས་པས་དེ་མོ་གཤམ་ཡིན་ཡང་མོ་གཤམ་གྱི་ཡི་གེ་གཞན་གྱི་བྱེད་རྩོལ་གྱི་མཚན་ཉིད་ཧ་ཅང་གསལ་བར་མཚོན་མི་ནུས་པའི་རྒྱུ་མཚན་གྱིས་མཚན་མེད་ཅེས་ཀྱང་མིང་དུ་གདགས་པར་བྱའོ་ཞེས་པ་འདི་གྲུབ་བོ། །དེ་ལྟ་ནའང་མཚན་མེད་ཅེས་པས་མ་ནིང་མཚན་མེད་ཉིད་བསྟན་པར་སོང་བས་སྔར་སྨོས་པའི་སྐྱོན་མི་ཁེགས་སོ་སྙམ་ན་དྭོགས་པ་སྐྱེ་མི་དགོས་ཏེ། མ་ནིང་ལ་འགྱུར་བ་དང་། མཚན་གཉིས་དང་མཚན་མེད་གསུམ་དུ་དབྱེ་བ་རྗེས་འཇུག་གི་སྐབས་སུ་ཡིན་གྱི་འདིར་མི་འགྲིག་བཞིན་དུ་དེ་ལྟར་ཚེགས་ཀྱིས་སྦྱོར་བ་དགོས་པ་མེད་པའི་ཕྱིར་རོ། །དེ་ལྟར་འདིར་ཡི་གེ་ཉམས་པའི་ཚུལ་དོན་གྱི་རྒྱུ་མཚན་དེ་དག་གི་སྒོ་ནས་ཤེས་པར་མ་ཟད་ཡིག་གཟུགས་ལས་ཀྱང་མ་ནིང་དང་ཨ་ནི་ཞེས་པ་ལ་འཁྲུལ་གཞི་འབྱུང་རིགས་པར་རྟོགས་སླ་བ་ཡིན་གྱི། འགའ་ཞིག་ཏུ། ར་ལ་ཧ་ཨ་མོ་གཤམ་སྟེ། །ཞེས་དག་པར་འདོན་པའི་ཁུལ་བྱེད་པ་རྣམས་ནི་མ་བརྟགས་པ་ཉིད་དོ། །
འདིར་སྨྲས་པ།
ཐེ་ཚོམ་མཚན་མོ་བསྟེན་བཞིན་དུ། །
ཐུ་མིའི་གཞུང་ལུགས་བལྟ་འདོད་རྣམས། །
སྔོན་ཆད་མཁས་པའི་ཁུར་འཛིན་པའི། །
འགྲེལ་བྱེད་འགའ་འགའི་ཡིད་མཁའ་ན། །
ནམ་ཡང་ཤར་ཞེས་མ་ཐོས་པའི། །
ཁོ་བོའི་ལེགས་བཤད་ཟླ་སྣང་འདི། །
གེགས་མེད་བསྟེན་ནས་རིག་པའི་ལམ། །
དྲང་པོའི་ཕྱོགས་སུ་འཇུག་པར་གྱིས། །ཞེས་སོ། །
མིང་གཞི་ལས་སྔོན་རྗེས་དབྱུང་བའི་ཚུལ།
གཉིས་པ་སྔོན་འཇུག་གི་རྟགས་ཀྱི་འཇུག་པ་བཤད་པ་ལ། མིང་གཞི་ལས་སྔོན་རྗེས་དབྱུང་བའི་ཚུལ། སྔོན་འཇུག་གི་རྟགས་ཀྱི་དབྱེ་བ། དེའི་འཇུག་ཚུལ་བཤད་པ་དང་གསུམ་གྱི།
དང་པོ་ནི།
མོ་ཡི་ཡི་གེའི་ནང་ནས་ནི། །
འཇུག་པའི་ཡི་གེ་བཅུ་དབྱུང་བྱ། །
འཇུག་པ་བཅུ་ཡི་ནང་ནས་ནི། །
སྔོན་འཇུག་ཡི་གེ་ལྔ་དབྱུང་བྱ། །
ཞེས་པས་བསྟན་ཏེ། མོའི་ཡི་གེ་ལ་བཤད་མ་ཐག་པ་ལྟར་མོ་ཙམ་དང་ཤིན་ཏུ་མོ་དང་མོ་གཤམ་དང་གསུམ་དུ་གནས་པ་སོ་སོར་མ་ཕྱེ་བའི་ནང་ནས་སྔར་སུམ་ཅུ་པར་བཤད་པ་ལྟར་རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་པོ་རྣམས་དབྱུང་བར་བྱ་ཞིང་། དེའི་ནང་ནས་ཀྱང་སྔོན་འཇུག་གི་ཡི་གེ་ག་ད་བ་མ་འ་ལྔ་པོ་རྣམས་དབྱུང་བར་བྱའོ། །ཞེས་སོ། །
སྔོན་འཇུག་གི་རྟགས་ཀྱི་དབྱེ་བ་བཤད་པ།
གཉིས་པ་སྔོན་འཇུག་གི་རྟགས་ཀྱི་དབྱེ་བ་བཤད་པ་ནི།
སྔོན་འཇུག་ཡི་གེ་ལྔ་པོ་ལ། །
ཕོ་དང་མ་ནིང་མོ་དང་ནི། །
ཤིན་ཏུ་མོ་དང་བཞི་རུ་དབྱེ། །
ཞེས་པས་བསྟན་ཏེ། བཤད་མ་ཐག་པའི་སྔོན་འཇུག་གི་ཡི་གེ་ལྔ་པོ་དེ་ལ། ཕོ་བ་ཡིག་དང་། མ་ནིང་ག་ད་གཉིས། མོ་འ་ཡིག། ཤིན་ཏུ་མོ་མ་ཡིག་བཅས་བཞིར་དབྱེ་བར་བྱའོ། །ཞེས་སོ། །
འདི་སྐབས་དབྱེ་ཚུལ་ལ་འཁྲུལ་གཞི་མེད་པས་འགྲེལ་བྱེད་རྣམས་ཀྱང་ངག་མཐུན་པར་སྣང་ལ། རྟགས་དེ་ལྟར་དབྱེ་བའི་རྒྱུ་མཚན་ནི་མིང་གཞི་ལྟར་སྔོན་འཇུག་གི་ཡི་གེ་རང་རང་ཀློག་པའི་སྒྲ་གྲིམས་ལྷོད་སོགས་ལས་ནི་མ་ཡིན་ཏེ་འཆད་འགྱུར་ལྟར་དེ་དག་འཇུག་ཡུལ་གྱི་མིང་གཞིའི་ཡི་གེ་དང་སྦྱར་ནས་ཀློག་པའི་ཚེ་སྒྲ་གདངས་ཤུགས་ཆེ་ཆུང་དུ་འགྱུར་བའི་ཆ་ནས་བཞག་པའོ། །
འཇུག་ཚུལ་རྟོགས་བྱེད་ཀྱི་ཡན་ལག་མདོར་བསྟན་པ།
གསུམ་པ་དེའི་འཇུག་ཚུལ་བཤད་པ་ལ། འཇུག་ཚུལ་རྟོགས་བྱེད་ཀྱི་ཡན་ལག་རྣམས་མདོར་བསྟན་པ་དང་། དྲི་ལན་གྱི་སྒོ་ནས་རྒྱས་པར་བཤད་པ་གཉིས་ཀྱི།
དང་པོ་ནི།
དེ་དག་རེ་རེའང་བཞི་བྱེད་དེ། །
གང་ལ་འཇུག་བྱེད་གང་གིས་བྱེད། །
ཇི་ལྟར་འཇུག་བྱེད་ཅི་ཕྱིར་བྱེད། །
ཅེས་པས་བསྟན་ཏེ། སྔོན་འཇུག་དེ་དག་གི་ཕོ་སོགས་རེ་རེའི་འཇུག་ཚུལ་ལའང་རྣམ་པ་བཞི་བཞིར་བྱེད་པ་སྟེ་བྱེད་པ་བཞི་བཞིའི་སྒོ་ནས་རྟོགས་པར་བྱེད་དགོས་སོ། །དེའང་འཇུག་ཡུལ་མིང་གཞིའི་ཡི་གེ་གང་དང་གང་ལ་འཇུག་པར་བྱེད་པ་དང་། འཇུག་པ་པོ་སྔོན་འཇུག་གང་གིས་འཇུག་པར་བྱེད་པ་དང་། སྒྲའི་ཚུལ་ཇི་ལྟ་བུས་འཇུག་པར་བྱེད་པ་དང་། དགོས་པ་ཅིའི་ཕྱིར་དུ་འཇུག་པར་བྱེད་པ་རྣམས་སོ། །
གང་ལ་འཇུག་པ་དང་གང་གིས་འཇུག་པར་བྱེད་པ་ཐུན་མོང་དུ་བསྟན་པ་ལ་དྲི་བས་མཚམས་སྦྱར་བ་དང་ལན་གྱིས་བསྙད་པ།
གཉིས་པ་དྲི་ལན་གྱི་སྒོ་ནས་རྒྱས་པར་བཤད་པ་ལ། གང་ལ་འཇུག་པར་བྱེད་པ་དང་གང་གིས་འཇུག་པར་བྱེད་པ་ཐུན་མོང་དུ་བསྟན་པ། ཇི་ལྟར་འཇུག་པར་བྱེད་པ་བསྟན་པ། ཅི་ཕྱིར་འཇུག་པར་བྱེད་པ་བསྟན་པ་སྟེ་གསུམ་མོ། །དང་པོ་ལ་དྲི་བས་མཚམས་སྦྱར་བ་དང་། ལན་གྱིས་བསྙད་པའོ། །
དང་པོ་ནི།
གང་ལ་འཇུག་པར་བྱེད་ཅེ་ན། །ཞེས་པའོ། །
གཉིས་པ་ལན་ལ། ལན་དངོས་དང་ཞར་བྱུང་མི་འཇུག་པ་བཤད་པ་གཉིས་ཀྱི་དང་པོ་ནི།
ཕོ་ནི་ཕོ་དང་མོ་ལ་འཇུག། །
མོ་ནི་མོ་དང་མ་ནིང་ལ། །
མ་ནིང་ཡང་ནི་ཕོ་མོ་ལའོ། །
ཤིན་ཏུ་མོ་ནི་མ་ནིང་དང་། །
མོ་དང་ཤིན་ཏུ་མོ་ཉིད་ལའོ། །
ཞེས་པས་བསྟན་ཏེ། དེ་ལ་གང་གིས་འཇུག་པར་བྱེད་པ་པོ་སྔོན་འཇུག་གི་ཕོའི་ཡི་གེ་བ་ནི། རང་གི་སྡེ་བ་མ་ཡིན་པའི་མིང་གཞིའི་ཕོ་ཡིག་ཀ་ཅ་ཏ་ཙ་རྣམས་དང་། མོ་ཡིག་ག་ང་ཇ་ཉ་ད་ན་ཛ་ཞ་ཟ་ར་ཤ་ས་རྣམས་ལ་འཇུག་གོ། དེའང་། ཀ་ག་གཉིས་ལ་བརྩེགས་འདོགས་རྐྱང་གསུམ་གར་དང་། ཏ་ཙ་ད་གསུམ་ལ་རྐྱང་བརྩེགས་གཉིས་ཀར་དང་། ང་ཇ་ཉ་ན་ཛ་རྣམས་ལ་བརྩེགས་མ་ཁོ་ནར་དང་། ཅ་ཞ་ཤ་གསུམ་ལ་རྐྱང་བ་ཁོ་ནར་དང་། ཟ་ས་གཉིས་རྐྱང་འདོགས་གཉིས་དང་། ར་འདོགས་ཅན་ཁོ་ན་སྟེ་དེ་རྣམས་ལ་འཇུག་པ་ཡིན་ནོ། །དེས་ན་འདི་སྐབས་སུ་རྐྱང་འཕུལ་གྱི་དབང་དུ་བྱས་ནས་ཕོ་ལ་བ་ཡིག་འཇུག་ཚུལ་ནི། བཀའ། བཅས། བཏགས། བཙགས། ལྟ་བུ་དང་། མོ་ལ། བགོས། བདག། བཞེད། བཟང་། བཤད། བསམ། ལ་སོགས་པ་ལྟ་བུ་རྣམས་དཔེར་བརྗོད་པར་བྱའོ། ། དེ་བཞིན་དུ་བརྩེགས་འཕུལ་གྱི་དབང་གིས། དཔེར་ན། ཕོ་ལ། བརྐོ། བསྐོན། བརྟས། བལྟའ། བསྟོད། བརྩེགས། སོགས་དང་། མོ་ལ། བརྒལ། བསྒོ། བརྔ། བསྔགས། བརྗོད། བརྙས། བསྙེན། བརྡ། བལྡད། བསྔོག། བརྣོག། བསྣན། བརྫང་། ལྟ་བུ་དང་། འདོགས་འཕུལ་གྱི་དབང་གིས་ཕོ་ལ། བཀྱེ། བརྐྱང་། བསྐྱེད། བཀྲག། བསྐྲུན། བཀླགས། སོགས་དང་། མོ་ལ། བརྒྱད། བསྒྱིངས། བགྲད། བསྒྲགས། བསྲང་། བཟླས། བརླབས། བསླངས། ལྟ་བུས་མཚོན་ཏེ་ཤེས་པར་བྱའོ། །དེ་བཞིན་དུ་སྦྱར་ཏེ། སྔོན་འཇུག་གི་མོ་འ་ཡིག་ནི། མིང་གཞིའི་མོ་ག་ཇ་ད་བ་ཛ་རྣམས་དང་མ་ནིང་ཁ་ཆ་ཐ་ཕ་ཚ་རྣམས་ལ་རྐྱང་འཕུལ་གྱིས་འཇུག་ཅིང་། དེ་རྣམས་ལས་ག་བ་ཁ་ཕ་རྣམས་ལ་འདོགས་འཕུལ་དུའང་འཇུག་གོ། དཔེར་ན་རྐྱ་འཕུལ་ལ། འགོད། འཇམ། འདམ། འབོལ། འཛོམ། འཁོར། འཆལ། འཐད། འཕགས། འཚལ། ལྟ་བུ་དང་། འདོགས་འཕུལ་ལ། འགྱེད། འབྱེད། འཁྱར། འགྲེལ། འབྲེལ། འཁྲེན། འཕྲད་ལྟ་བུའོ། །
སྔོན་འཇུག་གི་མ་ནིང་ག་ཡིག་ནི་མིང་གཞིའི་ཕོ་ཅ་ཏ་ཙ་རྣམས་དང་། མོ་ཉ་ད་ན་ཞ་ཟ་ཡ་ཤ་ས་རྣམས་ལ་རྐྱང་འཕུལ་ཁོ་ནས་འཇུག་སྟེ། དཔེར་ན། གཅིག། གཏམས། གཙང་། གཉེར། གདངས། གནས། གཞལ། གཟུགས། གཡས། གཤམ། གསལ། ལ་སོགས་པ་ལྟ་བུའོ། །སྔོན་འཇུག་གི་མ་ནིང་ད་ཡིག་ནི། མིང་གཞིའི་ཕོ་ཀ་པ་གཉིས་དང་། མོ་ག་བ་གཉིས་ཏེ་བཞི་ལ་རྐྱང་འདོགས་གཉིས་ཀར་འཇུག་ཅིང་། མོ་ང་མ་གཉིས་ལ་རྐྱང་འཕུལ་ཁོ་ནར་འཇུག་གོ། དཔེར་ན་རྐྱང་འཕུལ་ལ། དཀོན། དཔའ། དགའ། དབང་། དངར། དམར་ལྟ་བུ་དང་། འདོགས་ཅན་ལ། དཀྱིལ། དཔྱད། དགྱེས། དབྱངས། དཀྲོགས། དགྲམ། དབྲོག། ལྟ་བུའོ། །
སྔོན་འཇུག་གི་ཤིན་ཏུ་མོ་མ་ཡིག་ནི། མིང་གཞིའི་མ་ནིང་ཁ་ཆ་ཐ་ཚ་རྣམས་དང་། མོ་ཡིག་ག་ཇ་ད་ཛ་རྣམས་དང་། ཤིན་ཏུ་མོ་ང་ཉ་ན་རྣམས་ལ་རྐྱང་འཕུལ་གྱིས་འཇུག་ཅིང་། དེ་ལས་ཁ་ག་གཉིས་ལ་འདོགས་འཕུལ་དུའང་འཇུག་གོ། དཔེར་ན་རྐྱང་འཕུལ་ལ། མཁའ། མཆན། མཐོང་། མཚན། མགུ། མཇེད། མདོག། མཛད། མངོན། མཉེས། མནབས། ལྟ་བུ་དང་། འདོགས་འཕུལ་ལ། མཁྱེན། མཁྲངས། མགྱོགས། མགྲིན་ལྟ་བུའོ། །
སྐབས་འདིར་འགྲེལ་བྱེད་ཕྱི་མ་ཁ་ཅིག་གིས། ཕོ་ནི་ཕོ་དང་མོ་ལ་འཇུག། ཅེས་པའི་གཞུང་གིས་རྐྱང་བརྩེགས་གཉིས་ཀའི་འཕུལ་འཇུག་བསྟན་པར་འདོད་བཞིན་དུ་ང་ཇ་ཉ་ན་ཛ་རྣམས་ལ་བརྩེགས་འཕུལ་དང་། ར་ཡིག་ལ་འདོགས་འཕུལ་གྱི་འཇུག་ཚུལ་ཐོག་མར་འཆད་པར་མི་བྱེད་ཅིང་། ངག་དོན་གྱི་སྡོམ་ཚིག་འགོད་པའི་ཚེ་དེ་དག་ལས་ན་ར་གཉིས་ལ་འཇུག་ཚུལ་བཤད་པ་དང་། ཅི་ཕྱིར་འཇུག་གི་སྐབས་སུ་དེ་རྣམས་ཐམས་ཅད་ཀྱི་དཔེར་བརྗོད་རྒྱས་པར་འགོད་པའི་འགལ་བའི་ཕུང་པོ་ཆེན་པོ་སྤྲོ་བར་བྱེད་པ་ནི་ཤིན་ཏུ་མི་རིགས་ཏེ། སྤྱིར་རྒྱས་བཤད་དང་དེའི་ངག་དོན་བསྡུས་པའི་སྡོམ་ཚིག་མཐུན་དགོས་ཤིང་དེ་དག་དང་། དེ་དག་ཉིད་ཀྱི་རྣམ་གསལ་གྱི་དཔེར་བརྗོད་མཐུན་དགོས་པའི་ཕྱིར་དང་། རྒྱུ་མཚན་དེས་མོ་ལ་ཞེས་པའི་མོ་ཡིག་དེ་མོ་ཡིག་སྤྱི་ལ་མི་འདོད་པར་ག་ཇ་བ་ད་སོགས་མོ་ཡིག་བཅུ་གཉིས་པོ་ཁོ་ནར་བསམས་ནའང་། ཁྱེད་རང་གི་སྡོམ་ཚིག་ཏུ་ན་ར་གཉིས་བྱུང་བ་དང་འགལ་བར་མ་ཟད། གཤམ་གྱི་དཔེར་བརྗོད་དང་འགལ་བའི་ཕྱིར་དང་། ཕོ་ནི་ཕོ་དང་མོ་ལ་འཇུག། ཅེས་པས་སྔོན་འཇུག་གི་ཕོའི་འཇུག་ཡུལ་ཐམས་ཅད་བསྡུས་ནས་བསྟན་པར་འདོད་དགོས་པ་གང་ཞིག། དེའི་འཇུག་ཡུལ་འགའ་ཞིག་མ་ཚང་བར་བཤད་པས་གཞུང་དོན་དང་ཡང་འགའ་བའི་ཕྱིར་རོ། །དང་པོ་གྲུབ་སྟེ། གཞུང་འདིར་སྔོན་འཇུག་གི་མོ་དང་མ་ནིང་སོགས་ཀྱི་འཇུག་ཡུལ་ཐམས་ཅད་བསྟན་པར་ཁྱེད་རང་ཡང་འདོད་ཅིང་། དེ་ལས་ཕོ་ཡིག་གི་འཇུག་ཡུལ་ཚང་བར་མ་བསྟན་པར་འདོད་པ་ལ་དགོས་པ་སོ་སོར་ཅིའང་བཤད་དུ་མེད་པའི་ཕྱིར་རོ། །ཁ་ཅིག་འདིར་བསྟན་རྐྱང་འཕུལ་ཁོ་ནར་འདོད་པ་ཡོད་ཀྱང་གཞུང་གི་བསྟན་བྱ་རྫོགས་པར་མི་འགྱུར་བའི་ཕྱིར་ཁྱབ་ཆུང་བ་ཉིད་དུ་ཟད་ཅིང་། དེ་ལྟར་འདོད་པའང་མོ་ལ་ཞེས་པ་མོ་ཡིག་སྤྱི་ཙམ་ལ་མ་བསམས་པའི་སྐྱོན་ཉིད་དུ་གསལ་མོད། འོན་ཀྱང་དེ་དག་གིས་མ་ནིང་གི་འཇུག་པ་འཆད་པའི་ཚེ་ནི་མོ་ལ་ཞེས་པ་མོ་ཡིག་སྤྱིར་མི་འདོད་ཀ་མེད་བྱུང་སྣང་ངོ་། །ཡང་ཕྱི་དུས་གངས་ཅན་དུ་བརྡ་དག་གི་སྲོལ་ཆེར་བཏོད་པ་པོ་རྣམས་མགྲིན་གཅིག་ཏུ་ཡ་ར་ལ་གསུམ་གྱི་འདོགས་དང་འབྲེལ་བའི་ཀ་ལ་སོགས་པ་མིང་གཞིའི་ཡི་གེ་ཉིས་འབྲེལ་ཅན་རྣམས་འཕུལ་བྱེད་གང་གིས་ཕུལ་ཀྱང་རྐྱང་འཕུལ་དུ་བཞེད་སྣང་ཡང་། ཞིབ་མོར་དཔྱད་ན་དེ་ལྟར་འཐད་པ་མ་ཡིན་ཏེ། སྐབས་འདིར་རྐྱང་པའི་གོ་དོན་སྔོན་འཇུག་གི་འཇུག་ཡུལ་དུ་རྗེས་འཇུག་མི་བརྩི་བའི་མིང་གཞིའི་ཡི་གེ་ཉིད་རེ་རེ་ཡིན་ན་རྐྱང་བ་དང་། གཉིས་གསུམ་འབྲེལ་བ་ཡིན་ན་བརྩེགས་མའི་ཐ་སྙད་འཇུག་ཅིང་འདོགས་ཅན་ཞེས་ཐ་སྙད་ཟུར་དུ་བྱེད་པའང་བརྩེགས་མའི་བྱེ་བྲག་ཉིད་ཡིན་པའི་ཕྱིར། བཀྱེ། བསྲན། བཟླས། བརླན་སོགས་མིང་གཞི་ཉིས་འབྲེལ་ཅན་རྣམས་ལ་རྐྱང་བའི་སྒྲས་བརྗོད་ཚེ་ཐ་སྙད་ལ་རྨོངས་པའི་ངག་ཏུ་འགྱུར་ཞིང་། ཡ་ར་ལ་གསུམ་ཀཱ་ལིའི་ཡ་གྱལ་དུ་བསྟན་བཞིན་དུ་འདིར་ཨཱ་ལི་མཚོན་བྱེད་ཀྱི་གི་གུ་དང་ཞབས་ཀྱུ་སོགས་དང་མཚུངས་པར་ཡི་གེའི་ཡན་ལག་ཙམ་ལས་ཡི་གེ་དངོས་མི་པར་བྱས་ནས་དེ་རྣམས་ལྡན་པའི་ཡི་གེ་ལ་རྐྱང་པར་བརྩིས་པས་དོན་ལའང་འཁྲུལ་བ་དང་། དེ་ལྟ་ན་བརྩེགས་འཕུལ་གཞན་རྣམས་ལའང་རྒྱུ་མཚན་མཚུངས་པས་བྱེ་བྲག་མེད་པར་རྐྱང་འཕུལ་དུ་བརྗོད་དགོས་པར་ཡང་འགྱུར་རོ། །
ཡང་སྐབས་འདིར་བརྩེགས་མ་དང་། འདོགས་ཅན་རྣམས་ལ་འཕུལ་ཡིག་འཇུག་པའི་ཚེ་མགོ་འདོགས་ཀྱི་ཡི་གེ་རྣམས་འཕུལ་ཡིག་གི་ཡུལ་ཡིན་མིན་ལ་སྔོན་ཆད་སུས་ཀྱང་དངོས་སུ་དཔྱད་པ་མ་མཐོང་མོད། ཞེན་དོན་ལ་བརྟགས་ན་མགོ་ཅན་དང་འདོགས་ཅན་གྱི་ཡི་གེ་དངོས་གཞི་དེ་ཉིད་ལས་གཞན་རྣམས་འཕུལ་འཇུག་གི་ཡུལ་དུ་མི་འདོད་པར་སྣང་བ། གཙོ་ཆེ་ཆུང་གི་དབང་དུ་བྱས་ན་ནི་དེ་བཞིན་འཐད་པའང་ཡིན་ཏེ། བ་ཡིག་གི་འཇུག་ཡུལ་གྱི་རྗེས་འཇུག་མི་བརྩི་བའི་མིང་གཞིའི་ཡི་གེ་གཉིས་གསུམ་འབྲེལ་བ། བཀྱེ། བརྒལ། བསྐྱེད། ལྟ་བུ་ལ་རིམ་པར་ཀ་ཡ་དང་ར་ག་དང་ས་ཀ་ཡ་རྣམས་སོ་སོར་ཀཱ་ལིའི་ཡི་གེ་རང་རྐྱ་ཐུབ་པ་རེ་ཡིན་པར་མཚུངས་ཀྱང་བརྗོད་པའི་ཚེ་དེ་དག་ལས། རང་སྡེའི་ཀ་དང་ག་དང་ཀ་རྣམས་ཀྱི་སྒྲ་གཙོ་བོར་འབྱུང་བའི་ཕྱིར་གཞུང་འདིར་ཡང་དེའི་དབང་དུ་མཛད་ནས་སྔོན་འཇུག་རྣམས་ཡི་གེ་གང་ལ་འཇུག་ཚུལ་གསུངས་པར་སྣང་བ། རང་གི་སྡེ་དང་འཕྲད་པ་ན། །ཕོ་ཡང་མོ་ལ་འཇུག་མི་འགྱུར། །ཞེས་བསྟན་པས་ཤེས་པར་ནུས་པའི་ཕྱིར་ཏེ། གཞན་དུ། འགྱེད། ཅེས་པ་ལྟ་བུ་འ་ཡིག་རང་སྡེའི་ཡ་ལ་འཇུག་པར་འགྱུར་བའི་ཕྱིར་རོ། །སྤྱིར་ནི་དེ་འདྲའི་མགོ་འདོགས་ཀྱི་ཡི་གེ་རྣམས་འཕུལ་ཡིག་གི་འཇུག་ཡུལ་ཙམ་ཡིན་པར་འདོད་པ་འགལ་བ་མེད་པར་མ་ཟད་ངེས་པར་ཁས་ལེན་དགོས་ཏེ། བསྐྱེད། ཅེས་པ་ལྟ་བུའི་བ་ཡིག་སྔོན་འཇུག་དང་ད་ཡིག་རྗེས་འཇུག་དང་ས་ཀ་ཡ་གསུམ་མིང་གཞིར་འགྱུར་ཞིང་། མིང་གཞི་དེ་གསུམ་ག་སྔོན་རྗེས་དེ་དག་གི་འཇུག་ཡུལ་ཡིན་པ་ཙམ་དུ་མཚུངས་པའི་ཕྱིར་ཏེ་མིང་གཞིའི་ཡི་གེ་ཡིན་ན་སྔོན་རྗེས་གཉིས་ཀའམ་གང་རུང་གི་འཇུག་ཡུལ་ཡིན་པས་ཁྱབ་པའི་ཕྱིར་རོ། །དེ་ལྟ་བུའི་ས་ཡ་གཉིས་པོ་དེ་རྗེས་འཇུག་གི་ཡུལ་དུ་རུང་གི་སྔོན་འཇུག་གི་ཡུལ་དུ་མི་རུང་ངོ་ཞེ་ནའང་གོང་སྨོས་ལྟར་འདིར་བསྟན་གཙོ་ཆེ་ཆུང་གི་འཇུག་ཚུལ་གྱི་དབང་དུ་བྱས་ན་བདེན་མོད། སྤྱིར་བཏང་ཙམ་ལ་མི་རུང་བའི་རྒྱུ་མཚན་ཅིའང་བཤད་དུ་མེད་དོ། །
ཞར་བྱུང་མི་འཇུག་པ་བཤད་པ།
གཉིས་པ་ཞར་བྱུང་དུ་མི་འཇུག་པ་བཤད་པ་ནི།
ཕོ་ནི་མ་ནིང་ལ་མི་འཇུག །
མོ་ནི་ཕོ་ལ་འཇུག་པ་མིན། །
མ་ནིང་རང་ལ་རང་མི་འཇུག།
རང་གི་སྡེ་དང་འཕྲད་པ་ན། །
ཕོ་ཡང་མོ་ལ་འཇུག་མི་འགྱུར། །
མ་ནིང་མོ་ཡང་དེ་བཞིན་ནོ། །
ཞེས་པས་བསྟན་ཏེ། སྔོན་འཇུག་གི་ཕོ་བ་ཡིག་ནི་མིང་གཞིའི་མ་ནིང་ཁ་ཆ་ཐ་ཕ་ཚ་རྣམས་ལ་མི་འཇུག་ཅིང་། སྔོན་འཇུག་གི་མོ་འ་ཡིག་དང་དེའི་ཤུགས་ཀྱིས་ཤིན་ཏུ་མོ་མ་ཡིག་དག་ནི་མིང་གཞིའི་ཕོ་ཀ་ཅ་ཏ་པ་ཙ་རྣམས་ལ་མི་འཇུག་པ་དང་། སྔོན་འཇུག་གི་མ་ནིང་ག་ད་གཉིས་ནི་མིང་གཞིའི་འང་མ་ནིང་ཁ་ཆ་ཐ་ཕ་ཚ་རྣམས་ལ་མི་འཇུག་གོ། ཡང་སྔར། ཕོ་ནི་ཕོ་དང་མོ་ལ་འཇུག ཅེས་སོགས་བཤད་པའི་དམིགས་བསལ་སྔོན་འཇུག་རྣམས་རང་རང་གནས་པའི་སྡེ་བ་སྟེ་བཞི་སོ་སོའི་མིང་གཞིའི་ཡི་གེ་རྣམས་དང་འཕྲད་པའི་ཚེ་སྔོན་འཇུག་གི་ཕོ་བ་ཡིག་ནི་མིང་གཞིའི་མོ་བ་མ་དག་ལ་མི་འཇུག་ཅིང་ཡང་སྒྲས་ཕོ་ཡིག་བ་ལའང་མི་འཇུག་པར་བསྟན་པ་དང་། དེ་བཞིན་དུ་སྔོན་འཇུག་གི་མ་ནིང་ག་ད་གཉིས་ཀྱང་རང་སྡེའི་ཕོ་མོ་དག་ལ་མི་འཇུག་པས་ག་ཡིག་མིང་གཞིའི་ཀ་ག་ང་རྣམས་དང་། ད་ཡིག་ཏ་ད་ན་རྣམས་ལ་མི་འཇུག་ཅིང་། སྔོན་འཇུག་གི་མོ་ཡིག་འ་ནི་རང་སྡེའི་མིང་གཞིའི་མོ་ཞ་ཟ་འ་ཡ་རྣམས་ལ་མི་འཇུག་པ་དང་། ཡང་སྒྲའི་ཤུགས་ཀྱིས་སྔོན་འཇུག་གི་ཤིན་ཏུ་མོ་མ་ཡིག་ནི་རང་སྡེའི་མིང་གཞིའི་མོ་དང་མ་ནིང་ཕ་བ་མ་རྣམས་ལ་འཇུག་པ་མ་ཡིན་ནོ། །ཞེས་སོ། །
འགྲེལ་བྱེད་ཁ་ཅིག་གིས་སྐབས་འདིར་གང་གིས་འཇུག་བྱེད་འཆད་པའི་གཞུང་ཆད་པར་འདོད་པ་ཡོད་ཀྱང་གོང་སྨོས་བཞིན་འདིར་འཇུག་བྱེད་དང་འཇུག་ཡུལ་ལྷན་ཅིག་ཏུ་གསལ་བར་བསྟན་པ་མཐོང་བཞིན་དེ་ལས་ལྡོག་སྟེ་སྨྲ་བ་ལ་དགོས་ཅི་ཞིག་ཡོད་བསམ་དགོས་ཤིང་། ས་བཅད་ཟུར་བ་ཞིག་ངེས་པར་དགོས་སོ་སྙན་ནའང་འཇུག་བྱེད་ཀྱི་དོན་གསལ་བར་མཚོན་པའི་ངག་བཀོད་ཟིན་ནས་སླར་ཡང་དེ་ཉིད་བསྐྱར་བ་ནི་ཟློས་པའི་སྐྱོན་དུ་འགྱུར་རོ། །
ཇི་ལྟར་འཇུག་པར་བྱེད་པ་བསྟན་པ་ལ་དྲི་བས་མཚམས་སྦྱར་བ་དང་ལན་གྱིས་བསྙད་པ། ཅི་ཕྱིར་འཇུག་པར་བྱེད་པ་བསྟན་པར་དྲི་བས་མཚམས་སྦྱར་བ་དང་གཞུང་དོན་བདེ་བླག་ཏུ་རྟོཌ་ཕྱིར་འདིར་བསྟན་བདག་གཞན་དུས་གསུཾ་སྤྱིར་བསྟན་པ། དེའི་མཐའ་དཔྱད་པ།
གཉིས་པ་ཇི་ལྟར་འཇུག་པར་བྱེད་པ་བསྟན་པ་ལ་དྲི་བས་མཚམས་སྦྱར་བ་དང་། ལན་གྱིས་བསྙད་པ་གཉིས།
དང་པོ་ནི།
ཇི་ལྟར་འཇུག་པར་བྱེད་ཅེ་ན། །ཞེས་པའོ། །
གཉིས་པ་ནི།
ཕོ་ནི་དྲག་པའི་ཚུལ་གྱིས་ཏེ། །
མ་ནིང་རན་པར་འཇུག་པ་ཡིན། །
མོ་ནི་ཞན་པའི་ཚུལ་གྱིས་ཏེ། །
ཤིན་ཏུ་མོ་ནི་མཉམ་པས་སོ། །
ཞེས་གསུངས་ཏེ། སྔོན་འཇུག་གི་ཕོ་ཡིག་བ་ནི་མིང་གཞིའི་ཡི་གེ་རང་གི་འཇུག་ཡུལ་དུ་གྱུར་པ་རྣམས་ལ་སྒྲ་དང་བྱེད་རྩོལ་དྲག་པའི་སྒོ་ནས་འཇུག་པ་དང་། མ་ནིང་ག་ད་གཉིས་ནི་སྒྲ་སྩོལ་རན་པས་འཇུག་པ་དང་། མོ་ཡིག་འ་ནི་སྒྲ་སྩོལ་ཞན་པས་འཇུག་པ་དང་། ཤིན་ཏུ་མོ་མ་ནི་སྒྲ་སྩོལ་མཉམ་པ་སྟེ་ཤིན་ཏུ་ལྷོད་པའི་ཚུལ་གྱིས་འཇུག་པར་བྱེད་དོ། །ཞེས་སོ། །
གཞན་དག་འདིར་མཉམ་པ་ཞེས་པ་དྲག་ཞན་མཉམ་པར་འདོད་པ་ཡོད་ཀྱང་། དེ་ལྟ་ན་མ་ནིང་གི་འཇུག་ཚུལ་དང་ཟློས་པར་འགྱུར་ཞིང་། སྤྱིར་གོང་དུ་བཤད་པ་ལྟར་ཤིན་ཏུ་མོ་ཞེས་པ་མོ་ཡིག་ཏུ་འདོད་དགོས་པས་སྒྲ་རྩོལ་ཞན་པས་འཇུག་པ་ལས་འོས་མེད་ཅིང་ལྷག་པར་ཤིན་ཏུའི་སྒྲས་སྒྲ་རྩོལ་ཤིན་ཏུ་ཞན་པས་འཇུག་པ་ཉིད་དེ་མཉམ་པ་ཞེས་པ་ཉམ་ཆུང་བ་ལ་འཇུག་པ་ཡོད་ཅིང་ད་ལྟ་ཡུལ་འགའི་སྐྱེ་བོ་ལ་དེ་ལྟ་བུའི་བརྡ་ཆགས་པའང་མཐོང་ངོ་། །འགྲེལ་བྱེད་ཕལ་མོ་ཆེས་སྐབས་འདིའི་འཇུག་ཚུལ་དྲག་ཞན་སོགས་སྒྲ་གདངས་ཁོ་ནའི་སྒོ་ནས་བཞག་པར་འདོད་ཀྱང་ལེགས་པ་མ་ཡིན་ཏེ། ཕོ་དང་མ་ནིང་གི་འཇུག་ཚུལ་ལ་སྒྲ་དྲག་ཞན་གྱི་དབྱེ་བ་ཆེར་མེད་ཀྱང་གཙོ་བོར་བྱེད་རྩོལ་ཆེ་ཆུང་གི་སྒོ་ནས་འབྱེད་དགོས་ཤིང་། གཞན་རྣམས་ལའང་སྒྲ་གདངས་དྲག་ཞན་དུ་མ་ཟད་བྱེད་རྩོལ་ཆེ་ཆུང་གི་ཁྱད་པར་རེའང་ཞིབ་མོའི་བློས་དཔྱད་ན་མངོན་སུ་གྱིས་གྲུབ་པའི་ཕྱིར་རོ། །
གསུམ་པ་ཅི་ཕྱིར་འཇུག་པར་བྱེད་པ་བསྟན་པ་ལ་དྲི་བས་མཚམས་སྦྱར་བ་དང་། ལན་གྱིས་བསྙད་པའོ། །
དང་པོ་ནི།
ཅི་ཕྱིར་འཇུག་པར་བྱེད་ཅེ་ན། །ཞེས་པའོ། །
གཉིས་པ་ལ། གཞུང་དོན་བདེ་བླག་ཏུ་རྟོགས་པའི་ཕྱིར་འདིར་བསྟན་གྱི་བདག་གཞན་དང་དུས་གསུམ་སྤྱིར་བཤད་པ་དང་། གཞུང་དོན་གྱི་ལན་དངོས་བཤད་པ་སྟེ་གཉིས་ལས། དང་པོ་ལ། དངོས་དང་མཐའ་དཔྱད་གཉིས།
དང་པོ་ནི།
འཆད་པར་འགྱུར་བ། ཕོ་ནི་འདས་དང་གཞན་བསྒྲུབ་ཕྱིར། །ཞེས་སོགས་ཀྱི་གོ་དོན་དཔྱིས་ཕྱིན་པར་བྱེད་པ་ལ། ཐོག་མར་འདི་ཤེས་དགོས་ཏེ། ལས་གང་ཞིག་བྱེད་པ་པོ་གཞན་དང་དངོས་སུ་འབྲེལ་བའི་དབང་དུ་བྱས་ནས། བྱེད་པ་པོའི་དངོས་པོ་དེ་ཉིད་དང་དེའི་བྱེད་པ་དང་བཅས་པ་ལ་ནི་བདག་ཅེས་བྱ་ཞིང་། དེས་བསྒྲུབ་པར་བྱ་བའི་ཡུལ་གྱི་དངོས་པོ་བྱ་བ་དང་བཅས་པ་ལ་ནི་གཞན་ཞེས་བྱའོ། །དེ་བཞིན་དུ་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་ཇི་ལྟར་ཡང་རུང་བྱ་བ་བྱས་ཟིན་པ་ནི་དུས་འདས་པ་དང་། བྱ་བ་བྱེད་པར་འགྱུར་བ་ནི་དུས་མ་འོངས་པ་དང་། བྱ་བ་བྱེད་བཞིན་པ་ནི་དུས་ད་ལྟ་བ་ཡིན་ནོ། །གཞན་དུ་བྱེད་པའི་ལས་དང་བྱ་བའི་ལས་ཞེས་ལས་ཀྱི་ཚིག་ལ་གཉིས་སུ་དབྱེ་བའང་དབྱེ་བ་དེ་དག་ཏུ་འདུས་ཏེ་དུས་གསུམ་གྱི་དབང་གིས་བྱེད་པའི་ལས་ནི་དུས་ད་ལྟ་བ་དང་། བྱ་བའི་ལས་ནི་དུས་མ་འོངས་པར་འདུ་ཞིང་བདག་གཞན་གྱི་དབང་གིས་བྱེད་པོ་གཞན་དང་དངོས་སུ་འབྲེལ་བའི་བྱེད་པ་བདག་དང་བྱ་བ་གཞན་ཡིན་པ་བཤད་མ་ཐག་པ་ལྟར་རོ། །
རྒྱུ་མཚན་འདིས་དུས་གསུམ་གྱི་དབྱེ་བས་ནི་བྱེད་ལས་དང་འབྲེལ་བའི་ངག་གི་སྦྱོར་བ་ཐམས་ཅད་ལ་ཁྱབ་ཅིང་། བདག་གཞན་གྱི་དབྱེ་བས་ནི་དེ་ཙམ་དུ་ཁྱབ་བ་མ་ཡིན་ཡང་། གཞུང་འདིར་བྱེད་པ་པོ་དང་བྱ་བའི་ཡུལ་གྱི་སྒྲ་རྣམས་བསྡུ་བའི་ཕྱིར་བདག་གཞན་གྱི་དབྱེ་བ་ཟུར་དུ་མཛད་པ་ཡིན་ཞིང་། དེའི་ཞར་ལས་བདག་གཞན་དང་འབྲེལ་བའི་བྱ་བྱེད་ཀྱི་ཚིག་ཕན་ཚུན་ཤེད་མཚུངས་པ་རྣམས་ཀྱང་བསྡུས་པ་ཡིན་ནོ། །དེས་ན་ཅི་ཕྱིར་འཇུག་གི་གཞུང་འདི་འཆད་པའི་སྐབས་སུ་དུས་གསུམ་གྱི་དབྱེ་བས་བཤད་པ་རྣམས་ནི། བདག་གཞན་གྱི་དབྱེ་བས་མ་ཁྱབ་པའི་ལྷག་མ་རྣམས་བསྡུ་བའི་དོན་དུ་བལྟ་བར་བྱའོ། །དེ་ལྟར་ངེས་པར་བྱས་ནས་དབྱེ་བ་དེ་དག་གི་དཔེར་བརྗོད་རྒྱས་པར་གཤམ་དུ་འཆད་འགྱུར་རྣམས་མ་འཛིངས་པར་རྟོགས་པར་བྱ་དགོས་མོད་ཀྱི། འདིར་ཡང་གོ་བདེ་བའི་ཕྱིར་རྣམ་གསལ་གྱི་དཔེར་བརྗོད་ཅུང་ཟད་འགོད་ན། བྱེད་པ་པོ་བདག་གི་དངོས་པོའི་སྒྲ་ནི། སྒྲུབ་པ་པོ། སྟོན་པ་པོ། གཅོད་པ་པོ། འབྱིན་པ་པོ། སྒྲུབ་བྱེད། སྟོན་བྱེད། གཅོད་བྱེད། འབྱིན་བྱེད་ལྟ་བུ་དང་། དེའི་བྱེད་པའི་ཚིག་གསལ་བར་བྱེད་པ། སྒྲུབ་པར་བྱེད། སྟོན་པར་བྱེད། གཅོད་པར་བྱེད། འབྱིན་པར་བྱེད། སྒྲུབ་བོ། །སྟོན་ཏོ། །གཅོད་དོ། །འབྱིན་ནོ། །ལྟ་བུ་དང་། བྱ་བའི་ཡུལ་གཞན་གྱི་དངོས་པོའི་སྒྲ་ནི། བསྒྲུབ་པར་བྱ་བ། བསྟན་པར་བྱ་བ། གཅད་པར་བྱ་བ། དབྱུང་བར་བྱ་བ། བསྒྲུབ་བྱ། བསྟན་བྱ། གཅད་བྱ། དབྱུང་བྱ། ལྟ་བུ་དང་། དེའི་བྱ་བའི་ཚིག། བསྒྲུབ་པར་བྱ། བསྟན་པར་བྱ། གཅད་པར་བྱ། དབྱུང་བར་བྱ། བསྒྲུབ་བོ། ། བསྟན་ནོ། །གཅད་དོ། །དབྱུང་ངོ་། །ལྟ་བུ་དང་། དབྱེ་བ་དེ་གཉིས་སུ་མ་འདུས་པའི་དུས་གསུམ་ལས་བྱས་ཟིན་འདས་པའི་སྒྲ་ནི། བསྒྲུབས། བསྟནད། བཅད། ཕྱུང་། གྲུབ། ཆད། བྱུང་། ལྟ་བུ་དང་། བྱེད་བཞིན་ད་ལྟ་བའི་སྒྲ་ནི། ད་ལྟ་སྒྲུབ་བཞིན་པ། སྟོན་བཞིན་པ། གཅོད་བཞིན་པ། འབྱིན་བཞིན་པ། འགྲུབ་པར་བྱེད། འཆད་པར་བྱེད། འབྱུང་བར་བྱེད། འགྲུབ་བཞིན་པ། འཆད་བཞིན་པ། འབྱུང་བཞིན་པ་ལྟ་བུ་དང་། བྱ་འགྱུར་མ་འོངས་པའི་སྒྲ་ནི། འགྲུབ་པར་འགྱུར། འཆད་པར་འགྱུར། འབྱུང་བར་འགྱུར། འགྲུབ་བོ། །འཆད་དོ། །འབྱུང་ངོ་། །འགྲུབ་པར་བྱ། འབྱུང་བར་བྱ་ལྟ་བུ་སྟེ། འདི་དག་གིས་མཚོན་ནས་ཀུན་ལ་བསྒྲེ་བར་བྱའོ། །འདིར་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་ཞེས་སྨོས་པ་ནི། དངོས་པོ་གང་ཞིག་ལ་ལས་གང་ཞིག་བྱེད་པ་པོ་གཞན་གྱིས་དངོས་སུ་སྒྲུབ་པར་བྱེད་པ་དེ་ནི་བྱེད་པ་པོ་གཞན་དང་དངོས་སུ་འབྲེལ་བའི་ལས་ཏེ། དཔེར་ན། ལྕགས་གསེར་དུ་བསྒྱུརད་ཟིན། བསྒྱུར་བར་བྱ། སྒྱུར་བར་བྱེད། ཤིང་བཅད་ཟིན། གཅར་པར་བྱ། གཅོད་པར་བྱེད། འབྱུང་ཁུངས་ནས་ཕྱུང་ཟིན། དབྱུང་བར་བྱ། འབྱིན་པར་བྱེད་ལྟ་བུ་དུས་གསུམ་གྱི་དབྱེ་བས་ཤེས་པར་བྱ་ཞིང་། དངོས་པོ་གང་ཞིག་ལ་ལས་གང་ཞིག་བྱེད་པོ་གཞན་དངོས་སུ་མེད་པར་རང་གི་ངང་གིས་འགྲུབ་པར་སྣང་བ་འདི་ནི་བྱེད་པ་པོ་གཞན་དང་དངོས་སུ་མ་འབྲེལ་བའི་ལས་ཏེ། དཔེར་ན། ལྕགས་གསེར་དུ་གྱུརད་ཟིན། འགྱུར་བཞིན་པ། འགྱུར་བར་འགྱུར་རོ། །ཤིང་ཆད་ཟིན། འཆད་བཞིན་པ། འཆད་པར་འགྱུར་རོ། །གནས་ནས་བྱུང་། འབྱུང་བཞིན་པ། འབྱུང་བར་འགྱུར་རོ། །ཞེས་སོགས་ཀྱི་བསྒྲེས་ནས་རྟོགས་པར་བྱའོ། །དེ་ལས་སྔ་མའི་དོན་ནི་རྟོགས་སླ་ལ་ཕྱི་མ་ནི་དཔེར་ན་སྐྱེ་བུ་ཞིག་གི་མདུན་དུ་ལྕགས་གོང་རང་བཞིན་གྱིས་གསེར་དུ་གྱུར་པའི་ཚེ། ལྕགས་རང་ཉིད་ལ་ཡོད་པའི་འབྱུང་བ་རྣམས་ཀྱི་བྱེད་པས་དེ་བཞིན་དུ་གྱུར་ཀྱང་གཞན་གྱིས་མ་ཡིན་ལ། སྐྱེས་བུ་དེ་ཡི་བསོད་ནམས་ཀྱིས་དེ་བཞིན་དུ་གྲུབ་པས་བསོད་ནམས་ཉིད་བྱེད་པ་པོ་གཞན་ཡིན་མོད་ཀྱི་དེ་ནི་དངོས་སུ་མི་སྣང་བ་ལྟ་བུ་དང་། སྐྱེས་བུ་གང་ཞིག་གནས་ནས་འབྱིན་པ་པོ་མེད་པར་རང་ཉིད་གནས་ནས་འབྱུང་བའི་ཚེ་རང་ཉིད་བྱེད་པ་པོ་ཡིན་མོད་ཀྱི་བྱེད་པ་པོ་གཞན་མེད་པ་སོགས་ཀྱིས་མཚོན་ནས་ཞིབ་མོའི་བློས་ངེས་པར་བྱའོ། །
སྐབས་འདིར་འགྲེལ་བྱེད་སྔ་མ་ཕལ་ཆེར་གྱིས་ངེས་པ་སྟེར་བའི་ཞིབ་བཤད་མ་མཛད་ལ་ཅུང་ཟད་བཤད་པ་རྣམས་ཀྱང་དོན་དང་མི་འབྱོར་བ་མང་ཞིང་། བཤད་པ་འགྲིག་ཏུ་རུང་བ་རྣམས་ཀྱང་བློ་རྩེ་གཏད་མཚམས་ཀྱི་དཔེར་བརྗོད་ལོག་པར་བཀོད་པ་མང་བས། དེ་དག་སོ་སོ་ནས་ཞིབ་མོར་བཤད་ན་ཡི་གེ་མང་བས་འཇིགས་པའི་ཕྱིར་སྐྱོན་གྱི་ཕྱོགས་མཐོང་བའི་སླད་དུ་བསྡུས་ཏེ་ཅུང་ཟད་བརྗོད་ན། འགའ་ཞིག་གིས། འདིར་བསྟན་བདག་གཞན་གྱི་ཟླས་ཕྱེ་བའི་གཞན་དང་བྱ་བའི་སྒྲ་གཉིས་དབྱེ་བའི་ཡ་གྱལ་རེ་རེ་བར་འདོད་ཅིང་གཞན་གྱི་ངོས་འཛིན་གསལ་པོར་མ་བྱས་པ་དང་། འགའ་ཞིག་གིས་བདག་བྱེད་པ་དང་གཞན་བྱ་བ་གཉིས་ཉིད་དུ་ཁ་ཚོན་བཅད་པ་དང་། འགའ་ཞིག་གིས་མིང་རྐྱང་རྣམས་ཀྱང་འདི་སྐབས་སུ་བསྟན་པའི་དུས་གསུམ་གྱི་དབྱེ་བའི་ཁོངས་སུ་སྡུད་པ་རྣམས་མཐོང་བ་ལས། འདོད་པ་དང་པོ་དེ་མི་འཐད་དེ། བྱ་བའི་སྒྲ་ལ་བྱེད་པོ་གཞན་དང་དངོས་སུ་འབྲེལ་མི་འབྲེལ་གཉིས་ཡོད་པའི་སྔ་མ་ལ་དངོས་པོ་གཞན་གྱི་མཚན་གཞི་མི་བྱེད་ན་དེ་ལས་གཞན་དུ་མཚན་གཞི་འཐད་ལྡན་རྙེད་པར་མི་འགྱུར་ཞིང་། དེ་ལ་དབྱེ་ན་གཞན་དང་བྱ་བའི་སྒྲ་གཉིས་ཤེས་སོ་སོར་ཆེ་ཐང་དུ་དབྱེ་བ་བྱེད་པ་འགལ་བའི་ཕྱིར་དང་། ཡང་ན་བྱེད་པོ་གཞན་དང་དངོས་སུ་འབྲེལ་བའི་བྱ་བའི་སྒྲ་ལ་གཞན་དང་གཅིག་ཤོས་ལ་བྱ་བ་ཉིད་དུ་ཐ་སྙད་འདོགས་ན་ནི་སྔ་མ་ཕྱོགས་གཅིག་ནས་འགྲིག་ཀྱང་། ཕྱི་མ་གཞུང་འདིའི་དངོས་བསྟན་དང་དོན་འཐོབ་གཉི་གར་ཕོ་ཡིག་གི་འཇུག་ཡུལ་དུ་མ་བྱུང་ཞིང་འབྱུང་བའང་མི་སྲིད་པས་འབྲེལ་མེད་དུ་འགྱུར་བའི་ཕྱིར་དང་། དངོས་བསྟན་ཕོ་ཡིག་གི་དོན་གྱི་འཇུག་ཡུལ་གཞན་གྱི་ངོས་འཛིན་གསལ་པོ་བྱེད་རྒྱུ་མེད་བཞིན་དུ། མ་བསྟན་པའི་བྱ་བའི་དབྱེ་བ་གསར་དུ་བསྣན་པ་ལ་དགོས་པ་ཅིའང་མེད་པའི་ཕྱིར། འདོད་པ་གཉིས་པ་དེའང་མི་འཐད་དེ། དེ་ལྟར་ན་བྱེ་བྲག་ཕྱེས་ནས་མ་བཤད་པས་བྱེད་པའི་སྒྲ་ཡིན་ཚད་བདག་དང་། བྱ་བའི་སྒྲ་ཡིན་ཚད་གཞན་དུ་ཁས་བླངས་པར་སོང་བས་འདིར་བསྟན་དུས་གསུམ་གྱི་ད་ལྟ་བ་དང་མ་འོངས་པའི་སྒྲ་འཆད་པའི་ཚེ་ཟློས་པའི་སྐྱོན་དུ་འགྱུར་བར་མ་ཟད་དབྱེ་སྒོ་དེ་དག་ཕན་ཚུན་འཛིངས་པས་དབྱེ་བ་དགོས་མེད་དུ་ཐལ་བའི་ཕྱིར་དང་། རྒྱུ་མཚན་དེས་མཁས་པའི་གཞུང་ལུགས་ཆུད་གསན་པར་འགྱུར་བའི་ཕྱིར་དང་། བསྟན་བྱའི་གཙོ་བོ་བྱེད་པ་པོ་དང་བྱ་བའི་ཡུལ་གཉིས་ཆད་པའི་སྐྱོན་ཡོད་པའི་ཕྱིར་རོ། །འདོད་ཚུལ་གསུམ་པ་དེའང་མི་འཐད་དེ། སྐབས་འདིའི་དུས་གསུམ་གྱི་དབྱེ་བ་ནི་བྱེད་ལས་སམ་བྱ་ཚིག་གི་སྒོ་ནས་འབྱེད་དགོས་ཤིང་། མིང་རྐྱང་ལ་བྱ་བྱེད་ཀྱི་ཐ་སྙད་མི་འཇུག་པས་བྱ་བྱེད་མེད་པ་བྱ་བྱེད་ཅན་དུ་སྡུད་པ་ལས་མཚང་ཆེ་བ་ཅི་ཞིག་ཡོད། ཁྱད་པར་མིང་རྐྱང་རྣམས་བདག་གཞན་གྱིས་ཟླས་ཕྱེ་བའི་བདག་ཡིན་པར་བསམས་ནས་མ་ནིང་དང་མོའི་སྔོན་འཇག་གི་འཇུག་པ་འཆད་པའི་ཚེ་ག་ད་འའི་འཕུལ་ཅན་གྱི་མིང་རྐྱང་རྣམས་བདག་གི་དཔེར་བརྗོད་དུ་བཀོད་འདུག་པ་དེ་ལྟ་ན་ཕོ་ཡིག་བས་འཕུལ་ཅན་གྱི་མིང་རྐྱང་ཡང་མང་པོ་ཡོད་ན་སློབ་དཔོན་ཐུ་མིས་ཕོ་ཡིག་བདག་སྒྲུབ་ལ་འཇུག་པར་མ་གསུངས་པའི་རྒྱུ་མཚན་ཅི་ཡོད། སེམས་རྣལ་དུ་ཕབ་ནས་ལེགས་པར་བསམ་དགོས་སོ། །དེ་ན་མཁས་པ་གཞན་གྱིས་མིང་ལ་བདག་དང་དུས་གསུམ་ལ་གཞན་གྱིས་ཐ་སྙད་བྱས་པ་དང་། མིང་རྐྱང་ཉིད་དུས་གསུམ་ལས་ད་ལྟ་བར་འདོད་པ་སོགས་ཡོད་པ་ནི་གཞུང་གཞན་དང་གཞན་གྱི་འཆད་ཚུལ་ཡིན་གྱི་སྐབས་འདི་དང་འབྲེལ་བའི་དོན་མེད་ལ། མི་འབྲེལ་བཞིན་དུ་བསྒྲིག་པར་རློམ་པ་ནི་གཡག་གི་རྭ་རྟའི་མགོ་ལ་སྦྱོར་བ་དང་མཚུངས་སོ། །གཞན་ཡང་འགའ་ཞིག་གིས་བདག་བྱེད་པ་པོ་ཁོ་ནར་འདོད་པ་དང་། ལ་ལས་བྱེད་པ་ཁོ་ནར་འདོད་པ་མཐོང་བས་དེ་དག་ལ་ནི་གང་བཤད་པ་དཔྱིས་མ་ཕྱིན་པ་དང་གཞུང་གི་བསྟན་བྱ་མ་རྫོགས་པའི་སྐྱོན་ཡང་འཇུག་གོ །ཡང་འགའ་ཞིག་གིས། བྱེད་པ་པོ་ལ་ཡོད་པའི་ལས་ཐམས་ཅད་ལ་བདག་དང་། བྱ་བ་གཞི་ལ་ཡོད་པའི་ལས་ཐམས་ཅད་ལ་གཞན་དུ་ངོས་བཟུང་ཞིང་། ཕྱི་མ་ལ་དུས་གསུམ་གྱི་དབྱེ་བ་བྱེད་པར་འདུག་མོད། ལས་དེ་དག་ཀྱང་ངོས་མ་ཟིན་པས་དཔེར་བརྗོད་དུ་མིང་རྐྱང་སྒྲིག་པར་བྱེད་པ་རྣམས་ལ་ནི་དཔྱད་དུ་ཅི་ཞིག་ཡོད་དེ། འཕེན་ཟན་རིན་ཆེན་ལ་བལྟ་ཡི། །འགལ་དུམ་ལ་ནི་སུ་ཞིག་དཔྱོད། །ཅེས་པ་ལྟར་བས་པའི་ཕྱིར། འོན་ཀྱང་སྐྱོན་གྱི་ཕྱོགས་མཚོན་པ་ཙམ་ཞིག་འོག་ཏུ་འཆད་པར་བྱ་ཞིང་། གཞན་དུ་ན། བདག་གཞན་གྱི་འཆད་ཚུལ་དེའང་ལེགས་པར་བསམས་པའི་ངག་མ་ཡིན་ཏེ། ལས་དེ་དག་སྟོན་པའི་ཚིག་ཐམས་ཅད་ལ་འདིར་བསྟན་བདག་གཞན་གྱི་སྒྲ་འཇུག་པས་མ་ཁྱབ་པའི་ཕྱིར་ཏེ། སྐབས་འདིའི་བདག་གཞན་གྱི་སྒྲ་ནི་དངོས་སུ་བྱེད་པོ་དང་བྱ་བ་ངེས་པར་ཐ་དད་པ་ཞིག་གི་སྒོ་ནས་གཞག་དགོས་པ་བཤད་ཟིན་དང་འཆད་འགྱུར་ལྟར་ངེས་པའི་ཕྱིར། དངོས་སུ་བྱེད་པོ་དང་བྱ་བ་ཐ་མི་དད་པའི་ལས་ཀྱི་ཚིག་རྣམས་ལ་ནི་ལས་དེ་དག་གང་རུང་སྟོན་པའི་ཚིག་ཡིན་པས་ཁྱབ་ཀྱང་ངོ་བོ་གཅིག་པ་ལ་བདག་གཞན་གྱི་དབྱེ་བ་མི་རུང་བས་འདིར་བསྟན་བདག་གཞན་གྱི་སྒྲ་མི་འཇུག་པའི་ཕྱིར་རོ། །ཁྱེད་རང་གིས་གཞན་དུ་ངོས་འཛིན་རྒྱུའི་བྱ་བ་གཞིའི་ལས་ལ་དུས་གསུམ་དུ་དབྱེ་བའང་ཆེས་མི་འཐད་དེ། དེ་ལྟ་ན། ཕོ་ནི་འདས་དང་གཞན་བསྒྲུབ་ཕྱིར། །ཞེས་པའི་གཞུང་འདི་འཆད་པའི་ཚེ་སྔོན་རྗེས་ཀྱི་ཕོ་ཡིག་བྱེད་ལས་ཀྱིས་དབྱེ་བའི་དུས་གསུམ་ག་ལ་འཇུག་པ་ཞིག་ཁས་མི་ལེན་ཀ་མེད་དུ་སོང་བས། འདས་དང་ཞེས་ལོགས་སུ་བཀར་ནས་གསུངས་པ་དགོས་མེད་དུ་ཐལ་བའི་ཕྱིར་དང་། དེའི་ཤུགས་ཀྱིས་མ་ནིང་ག་ད་གཉིས་ཀྱང་དུས་གསུམ་ག་ལ་འཇུག་པར་འདོད་དགོས་པ་སོགས་ཀྱིས་དབྱེ་བ་ཕལ་ཆེར་བྱེ་བྲག་མེད་པར་འགྱུར་བའི་ཕྱིར་རོ། །སྤྱིར་ཡང་བྱ་བ་གཞི་ལ་ཡོད་པའི་ལས་ལ་དུས་གསུམ་དུ་དབྱེར་རུང་བ་མ་ཡིན་ཏེ། ཤིང་གཅད་པར་བྱ། གཅོད་པར་བྱེད། བཅད་ཟིན། ལྟ་བུར་མཚོན་ན་གཅད་བྱ་མ་འོངས་པ་དང་བཅད་ཟིན་འདས་པ་གཉིས་བྱ་བའི་གཞི་དང་འབྲེལ་མོད་ཀྱི་གཅོད་བྱེད་ད་ལྟ་བ་བྱེད་པ་པོ་དང་འབྲེལ་བ་ལས་བྱ་བའི་གཞིར་འབྲེལ་བའི་སྐབས་མེད་དོ། །འདིར་བྱ་གཞིའི་ལས་ད་ལྟ་བའི་དཔེར་བརྗོད་དུ། ཆུ་དགག། བུམ་པ་དགང་། བཅིངས་པ་དགྲོལ། གདུགས་དབུབ། གྱེན་དུ་གདེག། བསྟོད་པ་གདོན། གསལ་གདབ་སོགས་བཀོད་པ་མཐོང་བ་ནི་བྱ་གཞིའི་ལས་ཀྱི་ཚིག་ཡིན་མོད་ཀྱང་དུས་མ་འོངས་པ་ཡིན་གྱི་ད་ལྟ་བར་ནམ་ཡང་མི་འགྱུར་ཏེ། དེ་རྣམས་ལ་དུས་གསུམ་དུ་དབྱེ་བའི་ཚེ། བཀག། འགེགས། དགག། བཀང་། འགེངས། དགང་། བཀྲོལ། འགྲོལ། དགྲོལ། ཕུབ། འབུབས། དབུབ། བཏེག། འདེགས། གདེག། བཏོན། འདོན། གདོན། བཏབ། འདེབས། གདབ་སོགས་རིམ་པ་བཞིན་འདས་ད་ལྟ་མ་འོངས་གསུམ་གྱི་དཔེར་བརྗོད་དུ་མཁས་པ་རྣམས་ལ་ཡོངས་སུ་གྲགས་པའི་ཕྱིར་རོ།
།ཡང་འགྲེལ་བྱེད་སྔ་མ་ཐམས་ཅད་ཀྱིས་འདི་སྐབས་ལས་ཀྱི་ཚིག་ལ་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་གྱི་རྣམ་དབྱེ་མ་མཛད་པ་ནི་ཤིན་ཏུ་མི་ལེགས་ཏེ། དེ་མ་ཤེས་ན་བྱེད་པོ་དང་བྱ་བ་ཐ་དད་པ་དང་ཐ་མི་དད་པའི་ལས་ཀྱི་ཚིག་སོ་སོར་ངོས་མི་ཟིན་ཅིང་། དེ་མ་ཟིན་པས་འདིར་བསྟན་བདག་གཞན་གྱི་ཐ་སྙད་གང་ལ་འཇུག་པ་ཚུལ་བཞིན་མ་རྟོགས་པར་ལོང་བའི་འཁར་བ་བཞིན་གར་འཛུགས་མེད་པའི་ཅལ་ཅོལ་མང་པོ་བྱུང་བར་སྣང་ངོ་། །དེས་ན་གནད་འདི་རྟོགས་པ་གཞུང་དོན་ཇི་བཞིན་མ་འཛིངས་པར་འཆད་བདེ་བར་འགྱུར་བའི་ཕྱིར་གལ་ཤིན་ཏུ་ཆེ་ཞིང་། འགའ་ཞིག་གིས། བྱེད་པོ་དང་བྱ་ཡུལ་ངོ་བོ་གཅིག་པའི་ལས་ཀྱི་ཚིག་ཀྱང་འཐད་དམ་སྙམ་པ་སྲིད་ན་དེ་འདྲ་མང་དུ་འབྱུང་སྟེ། གོང་དུ་སུམ་ཅུ་པར་ལ་དོན་དེ་ཉིད་ལ་འཇུག་ཚུལ་གྱི་སྐབས་སུའང་ཕྱོགས་ཙམ་སྨོས་པ་ལྟར། དཔེར་ན། བདག་འགྲོའོ། །ཞེས་པའི་འགྲོ་བའི་སྒྲ་དེ་བྱ་བའི་ལས་ཀྱི་ཚིག་ཡིན་ཡང་བྱེད་པ་པོ་དང་བྱ་བའི་གཞི་ཐ་དད་དུ་མེད་དེ་འགྲོ་བར་བྱེད་པ་པོའང་བདག་ཡིན་ཞིང་འགྲོ་བར་བྱ་བའང་བདག་ཉིད་ཡིན་པ་དང་། ལྕགས་རང་བཞིན་གྱིས་གསེར་དུ་འགྱུར། ཞེས་པར་འགྱུར་བྱེད་དང་འགྱུར་བྱ་གཉི་ག་ལྕགས་ཉིད་ལས་གཞན་དུ་མི་དམིགས་པ་ལྟ་བུ་རྒྱ་ཆེར་ཤེས་པར་བྱ་ཞིང་། ཤིན་ཏུ་ཞིབ་མོར་དཔྱོད་པའི་ཚེ་དངོས་པོ་རྣམས་ཀྱི་རང་མཚན་སོ་སོ་ནས་རང་གིས་རང་ལ་བྱ་བ་འགལ་ཡང་སྤྱི་ལྡོག་རགས་པ་ནས་ཐ་སྙད་ཙམ་ལ་འཇིག་རྟེན་གྱི་གྲགས་པ་དང་མཐུན་པར་རང་གིས་རང་ལ་བྱ་བ་འབྱུང་བའང་གོ་དགོས་སོ། །དེ་དག་ཏུ་དཔེར་བརྗོད་ལོག་པ་ནི་ཤིན་ཏུ་མང་བས་སྨོས་ཀྱིས་མི་ལང་མོད། འོང་ཀྱང་སྔོན་དུ་འགའ་ཞིག་གི་མཚང་བརྟོལ་ཟིན་ཅིང་འདིར་ཡང་ཕྱོགས་ཙམ་སྨོས་ན། སྔོན་འཇུག་གི་ཕོ་ཡིག་བྱ་བའི་ཡུལ་ལ་འཇུག་པའི་དཔེར་བརྗོད་ལ། སྤ་བཀོང་། མགོ་བཀད། སོགས་བྱ་བའི་ཡུལ་དང་འབྲེལ་བའི་བྱ་ཚིག་དང་། སྣོད་བཀང་། ཤིང་བཀས། ཆུ་བཀག། སོགས་འདས་ཚིག་དང་། རྣམ་པར་བཀྲ། སྨན་བཀུ། སོགས་མིང་རྐྱང་རྣམས་བཀོད་པ་ལས། བྱ་བའི་ཡུལ་ཉིད་ཀྱི་དཔེར་བརྗོད་སྣ་གཅིག་ཀྱང་མེད་པ་དང་། མ་ནིང་ག་ཡིག་བྱེད་པ་པོ་ལ་ཡོད་པའི་ལས་ཀྱི་དོན་ལ་འཇུག་པའི་དཔེར་བརྗོད་དུ། རང་ཉིད་གཅིག་པུ། གཅུད་ལ་བོར་བ། ཡིད་གཅུགས་པ། ཕངས་པའི་གཅེས་སོགས་ལས་ཀྱི་ཚིག་མ་ཡིན་པའི་མིང་རྐྱང་ཁོ་ན་བཀོད་པ་དང་། ག་ཡིག་བྱ་བ་གཞི་ལ་ཡོད་པའི་ལས་ལ་འཇུག་པའི་དཔེར་ཡང་། གཅན་གཟན། ལ་གཅན་པ། སྒྲ་གཅན། རུས་ཀྱི་གཉོས། དུད་འགྲོ་གཉན་སོགས་ཕལ་ཆེར་མིང་རྐྱང་ཁོ་ན་བཀོད་པ་ལྟ་བུས་མཚོན་མ་བརྟགས་པའི་བབ་ཅོལ་མང་དུ་སྤྲོས་པའི་རྫོབ་རྣམས་བློ་གྲོས་ཀྱི་པད་མ་རྒྱས་པ་རྣམས་ཀྱིས་ཅུང་ཟད་དཔྱད་པས་འཇིག་པར་འགྱུར་བ་ཉིད་ན་ཇི་སྙེད་པ་འདིར་ཡི་གེར་སྤེལ་བའི་དཀའ་ཚེགས་ཀྱིས་ཅི་ཞིག་བྱ།
འདིར་སྨྲས་པ།
ཐུ་མའི་ལུགས་རྟོགས་པར་དཀའ་བ་རིན་པོ་ཆེ་ཡི་གཏེར་གྱི་སྒོ། །
ཕྱི་དུས་འདི་ན་བློ་མིག་མི་གསལ་བློ་ལྡན་ཚུལ་ཅན་དུ་མ་ཡིས། །
དབྱེ་བར་རློམ་ནས་དོན་མིན་ཚིག་ཕྲེང་ཏོག་རྩེ་རྟུལ་པོས་གནས་མིན་དུ། །
ལན་བརྒྱར་བརྡེགས་ཀྱང་རང་ཉིད་ངལ་ལས་གཞུང་དོན་རིན་ཆེན་རྙེད་འོས་ཅི། །
དེང་དུས་ལེགས་བཤད་གཏེར་སྟོན་འདི་བྱུང་ནས། །
གཞན་གཞུང་ཚར་གཅོད་རིགས་པའི་ཞུགས་ཆེན་གྱིས། །
ལོག་བཤད་ཚང་ཚིང་སྟུག་པོ་རྣམ་པར་བསྲེགས། །
འཐད་ལྡན་རྣམ་དཔྱོད་གཟོང་རྣོན་ལེགས་ཐོགས་ཏེ། །
དཀའ་གནས་གོར་མའི་བུ་ག་གསལ་བྱས་པས། །
ད་སྟེ་བློ་གསལ་གཞུང་ལུགས་དོན་གཉེར་དག། །
ལ་འུར་སྤྱོན་ལ་རྟགས་ཀྱི་འཇུག་པ་ཡི། །
གཞུང་དོན་ནོར་བུའི་ཚོགས་ལ་ཅི་དགར་རོལ། །ཅེས་སོ། །
གཞུང་དོན་གྱི་ལན་དངོས་བཤད་པ་ལ་ཕོ་ཡིག་དགོས་པ་ཅི་ཕྱིར་འཇུག་པ་བཤད་པ།
གཉིས་པ་ལ། ཕོ་ཡིག་གི །མ་ནིང་གི། མོ་ཡིག་གི །ཤིན་ཏུ་མོའི་འཇུག་དོན་བཤད་པ་སྟེ་བཞི་ལས།
དང་པོ་སྔོན་འཇུག་གི་ཕོ་ཡིག་དགོས་པ་ཅིའི་ཕྱིར་འཇུག་པ་ནི།
ཕོ་ནི་འདས་དང་གཞན་བསྒྲུབ་ཕྱིར། །
ཞེས་པས་བསྟན་ཏེ། སྔོན་འཇུག་གི་ཕོ་ཡིག་བ་ནི་དགོས་པ་དུས་གསུམ་ལས། བྱེད་པ་པོ་གཞན་དང་དངོས་སུ་འབྲེལ་བའི་བྱ་བ་བྱས་ཟིན་འདས་པ་བསྒྲུབ་པའི་ཕྱིར་དང་། དངོས་པོ་བདག་གཞན་གཉིས་ལས་གཞན་ཏེ་བྱེད་པ་པོ་གཞན་དང་དངོས་སུ་འབྲེལ་བའི་བྱ་བའི་ཡུལ་དང་བྱ་བ་བསྒྲུབ་པའི་ཕྱིར་འཇུག་པ་ཡིན་ནོ། །ཞེས་སོ། །དེ་ལས་འདས་པ་ལ་འཇུག་པ་ནི། དཔེར་ན།
༈ ཆུས་བཀང་། གོས་བཀབ། ལོགས་སུ་བཀར། ལམ་བཀག། ལག་པ་བཀན། ཁལ་བཀལ། ཤིང་བཀས། སྲད་བུ་བཀལ། ཁྲལ་བཀལ། གཞུ་བཀང་། གོང་དུ་བཀུར་ཏོ། ། ཤིང་བཀུག། སྨན་བཀུས། སྲོག་བཀུམས། སྤ་བཀོང་། རྩ་བ་བཀོག། ལྷས་བཀོད། ཟུར་དུ་བཀོལ་ཏོ། །གཡོག་ཏུ་བཀོལ་ཏོ། །ཐག་པས་བཀྱིགས། སྤྲུལ་བ་བཀྱེས། རྒྱ་བཀྱེད། མེ་ཏོག་བཀྲམ། དགོངས་པ་བཀྲལ། ཁྲལ་བཀྲལ། རྒྱལ་པོས་བཀྲབས། ཐར་པར་བཀྲིས། དྲི་མ་བཀྲུས། དགྲ་བཅོམ་བཀྲོངས། ཚིག་གིས་བཀྲོས། མདོ་བཀླགས། འདོད་པ་ལ་བརྐམ། ནོར་བརྐུས། ལག་པ་བརྐྱངས། ས་བརྐོས། ཁ་བསྐངས། ཐུགས་དམ་བསྐངས། ཆུ་བསྐམས། ཡང་ཡང་བསྐྱར། སྲོག་བསྐྱབས། ཆུ་བསྐྱམས། དྲིན་གྱིས་བསྐྱངས། རུ་བ་བསྐྱས། གནས་སུ་བསྐྱལ་ཏོ། །ཕྱིར་བསྐྲད། ཆུ་བསྐྱིལ་ཏོ། །ནོར་བསྐྱིས། སྣུམ་བསྐུས། དབང་བསྐུར་ཏོ། །ལག་བསྐུམས། ནོར་བསྐུངས། ཆོས་ལ་བསྐུལ་ཏོ། །རྒྱབ་ཏུ་བསྐྱུར་ཏོ། །སེམས་ཀྱིས་བསྐྱུད་དོ། །གཅོམ་བསྐྱུངས། ཁེངས་པ་བསྐྱུངས། ཟས་བསྐྲུས། ལོ་ཏོག་བསྐྲུན་ཏོ། །སེམས་བསྐྱེད། རྒྱ་བསྐྱེད། སྨན་བཀོལ་ཏོ། །རྒྱལ་སར་བསྐོས། འཁོར་གྱིས་བསྐོར་ཏོ། །གོས་བསྐོན་ཏོ། །རྟར་བསྐྱོན་ཏོ། །རླུང་གིས་བསྐྱོད་དོ།
༈ གད་མོ་བགད། ལམ་བགགས། ཚོད་བགམ། གཡང་ལ་བགྲིལ། གོ་བགོས། གོས་བགོས། གོམ་པ་བགོམས། སྐལ་བ་བགོས། ལམ་དུ་བགོར་ཏོ། །དུས་བགྱངས། ལས་བགྱིས། མིག་བགྲད། ཕྲེང་བ་བགྲངས། གྲངས་བགྲངས། ཆུ་བགྲུངས། འབྲས་བགྲུས། བཀའ་བགྲོས། ལམ་བགྲོད། ཆུ་བརྒལ། རྒྱན་གྱིས་བརྒྱན་ཏོ། །དྲན་མེད་བརྒྱལ་ཏོ། །མཚོན་བརྒྱབ། འོ་བརྒྱལ་ཏོ། །ནོར་གྱིས་བརྒྱགས། ཀོ་བ་བརྒྱངས། རྒྱུད་མར་བརྒྱུད། ཕྲེང་བ་བརྒྱུས། བང་བརྒྱུགས། བུ་རམ་བསྒར། མནའ་བསྒགས། ནོར་གྱིས་བསྒབ། ལམ་དུ་བསྒུགས། ལག་པས་བསྒུལ་ཏོ། དྲིས་བསྒོས། བསམ་གཏན་བསྒོམས། ཟན་བསྒོངས། བཀའ་བསྒོས། རྣམ་པར་བསྒྱིངས། ལེགས་པར་བསྒྱུར་ཏོ། །ཕྱིར་བསྒྱེལ་ཏོ། །ཆོས་བསྒྲགས། ཆུ་བསྒྲལ་ཏོ། །རྔན་བསྒྲངས། གྲལ་བསྒྲིགས། བློ་བསྒྲིམས། སྐུད་པ་བསྒྲིམས། སྐྱོན་བསྒྲིབས། ཐི་གུ་བསྒྲིལ་ཏོ། ། དེ་ཡིས་བསྒྲུན་ཏོ། །དོན་བསྒྲུབས། རྡོ་བསྒྲུགས། རིགས་བསྒྲེས། གྱེན་དུ་བསྒྲེངས། བུད་མེད་བསྒྲོད།
༈ ནོར་གྱིས་བརྔན་ཏོ། ། བཙས་མ་བརྔས། དུ་བ་བརྔུབས། རི་དྭགས་བརྔོན་ཏོ། །བུད་མེད་བརྔོད། ཡོན་ཏན་བསྔགས། དགེ་བ་བསྔོས། མཚང་བསྔོགས།
༈ ལོགས་སུ་བཅར་ཏོ། །ཕྱག་བཅབས། ཞབས་ཀྱིས་བཅགས། ཤིང་བཅག། དུམ་བུར་བཅད། མིག་བཅར། འཁྲུལ་འཁོར་བཅས། དམ་བཅས། བློས་བཅལ། ནོར་བཅལ། ལག་ཏུ་བཅངས། ཕྱིར་བཅིལ། ཞགས་པས་བཅིངས། ཆིབས་བཅིབས། སྣོད་དུ་བཅུག། ཆུ་བཅུས། སྲང་དུ་བཅུར་ཏོ། ། ཤིང་བཅེར་ཏོ། ནོར་བཅོལ། དགྲ་བཅོམ། ཡུར་བ་བཅོས། ལས་བཅོལ།
༈ ཕན་ཚུན་བརྗེས། མཆོད་ཅིང་བརྗེད་དོ། བདག་གིས་བརྗོད་ཟིན།
༈ གོས་བརྙན་ཏོ། ། རྗེས་སུ་བསྙགས། ལག་པས་བསྙབས། འཕྲེད་ལ་བསྙལ་ཏོ། ཆང་བསྙལ་ཏོ། ཁོད་བསྙམས། གཞན་ལ་བསྙད། ཕྱིར་བསྙིལ་ཏོ། མར་ཁུ་བསྙུགས། ཡོ་བྱད་བསྙུངས། ནད་ཀྱིས་བསྙུན་ཏོ། ཉེ་བར་བསྙེན་ཏོ། ཚངས་བར་བསྙེམས། གནས་སུ་བསྙེངས། ཆུ་བསྙོགས། གཞན་ལ་བསྙོན་ཏོ།
༈ རྒྱན་བཏགས། ཁ་བཏགས། ནོར་བཏང་། རྒྱས་བཏབ། ཞལ་དུ་བཏབ། ཐིགས་པ་བཏིག། གདན་བཏིང་། མེ་ཏོག་བཏུས། སྔགས་བཏུས། ཆང་བཏུངས། སྤྱི་བོས་བཏུད། བྱེས་སུ་བཏེག། བདུད་བཏུལ། ཐུར་མས་བཏུར། གྱེན་དུ་བཏེག། སྲང་ལ་བཏེག། བཅོན་ལས་བཏོན། མགོ་བཏོན། སྤུ་བཏོགས། སྲོལ་བཏོད། ལྟས་བརྟགས། སྡིག་པ་ལ་བརྟབས། བྱ་བ་བརྟུལ། དེར་བརྟེན་ཏོ། ཐག་པས་བརྟོད། གནས་སུ་བརྟོལ། རྣག་བརྟོལ་ཏོ། སྐུ་བལྟམས། བཅུད་ཀྱིས་བལྟམས། མིག་གིས་བལྟས། གོས་བལྟབས། ས་གཞི་བསྟར། ཆོས་བསྟན་ཏོ། འགྲོ་ཆས་བསྟད། ཁ་ཟས་བསྟབས། ལྷ་བསྟིམས། ཚིག་གིས་བསྟིངས། ཐག་བསྟུངས། གྲོས་བསྟུན། བཤེས་གཉེན་བསྟེན་ཏོ། མངོན་པར་བསྟོད།
༈ མདུན་དུ་བདར་ཏོ། རྗེས་སུ་བདས། ཕྱག་བདར་ཏོ། ཕྱེ་མར་བདར་ཏོ། ནོར་བདལ། བདུག་པས་བདུགས། གཞུ་བདུངས། ཐང་མར་བརྡལ་ཏོ། མཚོན་བརྡར་ཏོ། ལག་པ་བརྡབས། རྔ་བརྡུངས། བྲོ་བརྡུངས། དུལ་མོ་བརྡུལ་ཏོ། ཡང་ཡང་བལྡབས། སྐྱོ་མ་བལྡགས། ཁ་ཟས་བལྡད། སར་བསྡད། ཉེས་པ་བསྡམས། ཐག་པས་བསྡམས། འཇིགས་ཚུལ་གྱིས་བསྡིགས། དབང་དུ་བསྡུས། ཕན་ཚུན་བསྡུར་ཏོ། འགྲས་པ་བསྡུམས། ཕན་ཚུན་བསྡེབས། སྣ་ཐག་བསྡོགས། སྟ་གོན་བསྡོགས། གྲོགས་དང་བསྡོངས། ཕྱོགས་གཅིག་བསྡོམས། སྲོག་དང་བསྡོས། དགྲ་ལ་བསྡོས།
༈ ནན་གྱིས་བརྣན་ཏོ། ཡིད་ལ་བརྣགས། ཟས་ཀྱིས་བརྣངས། ནོར་བརྣོག། རྫས་ལ་བརྣབས། སྟེང་དུ་བསྣན་ཏོ། མཇུག་བསྣར་ཏོ། ཕྱག་ཏུ་བསྣམས། གནད་དུ་བསྣུན་ཏོ། དྲི་བ་བསྣམས། དུས་ཚོད་བསྣུར་ཏོ། སྣག་ཚ་བསྣུར་ཏོ། སྲོལ་བསྣུབས། ནེམ་པར་བསྣེམས། གོང་འོག་བསྣོར་ཏོ། ཕན་ཚུན་བསྣོལ་ཏོ། ཟན་བསྣོས།
༈ བུ་བཙས། ནོར་བཙལ་ཏོ། ཚགས་ཀྱིས་བཙགས། རུས་པ་བཙབས། གསེབ་ཏུ་བཙངས། གཅེས་པར་བཙས། ཐོ་བཙམས། དམ་པོར་བཙིར་ཏོ། ཤིང་བཅུགས། སྣོད་དུ་བཙུད། མིག་བཙུམས། ལྭ་བ་བཙེམས། གནོད་པས་བཙེས། ཆོས་ཀྱིས་བཙོས། ནོར་བཙོངས། རྡོས་བཙོགས། བསྟན་བཅོས་བརྩམས། དྲིས་ཤིང་བརྩད། འགོ་བརྩམས། རྩིག་པ་བརྩིགས། གྲངས་བརྩིས། སྟེང་དུ་བརྩེགས། རྩེད་མོ་བརྩེས།
༈ གཞན་དུ་བརྫངས། སྣོད་དུ་བརྫངས། རྐང་བས་བརྫིས། ཟན་བརྫིས། ཁྲོ་བོར་བརྫུས། རལ་བ་བརྫེས།
༈ དལ་བུས་བཞབས། གནས་སུ་བཞག། སྐྲ་བཞར་ཏོ། ཁུ་བ་བཞིབས། ལམ་དུ་བཞུད། གདན་ལ་བཞུགས། མར་ཁུ་བཞུར་ཏོ། ལྕག་གིས་བཞུས། སྟན་ལས་བཞེངས། བཟའ་བ་བཞེས། ཤིང་བཞོགས། བཞོན་མ་བཞོས།
༈ ཟས་བཟས། ཞབས་ཐོག་བཟབས། ཕྲག་པར་བཟར། སྔགས་བཟླས། ལ་བཟླས། ལག་པས་བཟུང་། འཕྲང་ལས་བཟུར། རྣ་བར་བཟླུགས། ཚོགས་བཟླུམས། གཅིག་ཏུ་བཟླུམས། སྣོད་བཟེད། ཤིང་བཟོས། གཡུལ་བཟློག །
༈ བྱིན་གྱིས་བརླབས། ཆུས་བརླན་ཏོ། འབྱུང་པོས་བརླམས། དགྲ་བརླག །
༈ སྦུབས་བཤངས། ཆུས་བཤལ། བྲེས་བཤར། འཕྲང་ལ་བཤར། ལུག་བཤས། སྡིག་པ་བཤགས། ལེགས་པར་བཤད། བཀོད་པ་བཤམས། ཤིང་བཤགས། མཉམ་པོར་བཤིབས། མཁར་བཤིག། པགས་པ་བཤུས། མེས་བཤུར་ཏོ། སྐྱོ་བས་བཤུམས། ནོར་བཤུགས། དཔེ་བཤུས། ཕན་ཚུན་བཤུད། གཏམ་བཤེར་ཏོ། ཕྱིར་བཤོས། རི་དྭགས་བཤོར་ཏོ། འགྲོས་བཤོལ་ཏོ།
༈ ཚོགས་བསགས། དྲི་མ་བསངས། སྐྱོན་བསལ་ཏོ། དོན་བསམས། དྲིན་ལན་བསབས། སྲོག་ཆགས་བསད། ཡོ་བྱད་བསར་ཏོ། ལག་གིས་བསིགས། མདེའུ་བསིར། དུམ་བུར་བསིལ་ཏོ། རྗེས་བསུབས། ཁ་བསུམ། མདུན་བསུས། ཞིབ་མོར་བསེད། ནོར་བསོགས། ངལ་བསོས། སྒྲིབ་པ་བསྲབས། ཡོ་བ་བསྲངས། གཞུང་བསྲངས། སེམས་ཀྱིས་བསྲན་ཏོ། ཡི་གེ་བསྲིངས། ཚེ་བསྲིངས། ནོར་བསྲིས། ཞོ་བསྲུབས། བསྲུང་བྱ་བསྲུངས། ཆུང་མ་བསྲེལ་ཏོ། ཕན་ཚུན་བསྲེས། མེས་བསྲེགས། མེར་བསྲོས། རིག་པ་བསླབས། ནོར་བསླངས། གཞན་གྱིས་བསླད། ཕྱོགས་སུ་བསླན་ཏོ། གྱེན་དུ་བསླངས། བསླུ་བྱ་བསླུས། ཕྱིར་བསློག། ཅེས་པ་ལ་སོགས་པ་རྣམས་ཏེ་དེ་དག་ལ་སླར་བསྡུའི་སྒྲ་སྦྱར་བ་རྣམས་ད་ཡིག་གི་ཡང་འཇུག་ཡོད་པར་ཤེས་དགོས་སོ། །དེ་རྣམས་ཀྱང་དཔེར་ན་བུམ་པ་ཆུས་བཀང་ལྟ་བུ་སྔོན་འཇུག་ཁོ་ནའི་བྱེད་པས་འདས་ཚིག་ཏུ་གྲུབ་པ་དང་། ཐུགས་དམ་བསྐངས་ལྟ་བུ་སྔོན་འཇུག་ཕོ་ཡིག་དང་འབྲེལ་བ་ཙམ་ལས་གཙོ་བོར་རྗེས་འཇུག་གི་བྱེད་པས་འདས་ཚིག་ཏུ་གྲུབ་པ་སོགས་བྱེ་བྲག་ཕྱེས་ནས་ཤེས་པར་བྱའོ། །
༈ བ་ཡིག་གཞན་བྱ་བའི་ཡུལ་བསྒྲུབ་པའི་ཕྱིར་འཇུག་པ་ནི། དཔེར་ན། བཀན་བྱའི་ལག་པ། བཀྱིག་བྱའི་དགྲ། བཀོལ་བྱའི་དོན། བཀྱོན་བྱའི་འབངས། བཀྲབ་བྱའི་འབངས། བཀྲུ་བྱའི་རས། བཀླག་བྱའི་ཡི་གེ། བསྐམ་བྱའི་དངོས་པོ། བརྐུ་བྱའི་ནོར། བརྐོ་བྱའི་ས། བརྐྱང་བྱའི་ལག་པ། བསྐང་བྱའི་དམ་ཚིག།།བསྐུ་བྱའི་སྣུམ། བསྐུལ་བྱའི་ལས། བསྐོར་བྱའི་འཁོར་ལོ། བསྐོན་བྱའི་ཞྭ། བསྐྱམ་བྱའི་སྣོད། བསྐྱ་བྱའི་ནོར། བསྐྱར་བྱའི་ཚིག། བསྐྱི་བྱའི་དངོས་པོ། བསྐྱིལ་བྱའི་རྫིང་། བསྐུར་བྱའི་ཉེས་པ། བསྐྲད་བྱའི་འདྲེ། བསྐྲུན་བྱའི་བསོད་ནམས།
༈ བགམ་བྱའི་ཚོད། བགད་བྱའི་གད་མོ། བགོ་བྱའི་གོས། བགྱི་བྱའི་ལས། བགྲང་བྱའི་གྲངས། བགྲད་བྱའི་འདོམས། བཀྲུ་བྱའི་འབྲས། བགྲོ་བྱའི་གྲོས། བགྲོད་བྱའི་ལམ། བརྒལ་བྱའི་ལ། བརྒྱན་བྱའི་གཟུགས། བརྒྱལ་བར་བྱ་བའི་དགྲ། བརྒྱང་བྱའི་ཐག་པ། བརྒྱུག་བྱའི་རྟ། བརྒྱུད་བྱའི་འཕྲེང་བ། བསྒག་བྱའི་བུ་ག། །བསྒབ་བྱའི་རྡོ་བ། བསྒོ་བྱའི་ངག། བསྒང་བྱའི་ཟན། བསྒྱུར་བྱའི་མགྲོན། བསྒུལ་བྱའི་རྡོ་བ། བསྒོ་བྱའི་ངག།།བསྒང་བྱའི་ཟན། བསྒྱུར་བྱ། བསྒྱེལ་བྱ། བསྒྲག་བྱའི་ཆོས། བསྒྲིམ་བྱའི་བློ། བསྒྲིབ་བྱའི་སྐྱོན། བསྒྲིག་བྱའི་གྲལ། བསྒྲིལ་བྱའི་ཐི་གུ། བསྒྲུབ་བྱའི་དོན། བསྒྲུན་བྱའི་དཔེ། བསྒྲུག་བྱའི་རྡོ། བསྒྲེ་བྱའི་ཆོས་མཚུངས། བསྒྲེང་བྱའི་རྒྱལ་མཚན། བསྒྲོད་བྱའི་བུད་མེད།
༈ བརྔན་བྱའི་གྲོགས། བརྔའ་བྱའི་ལོ་ཏོག། བརྔུབ་བྱའི་སྨན། བརྔོད་བྱའི་ནས། བསྔག་བྱའི་ཡོན་ཏན། བསྔོ་བྱའི་དགེ་བ། བརྔོག་བྱའི་མཚང་།
༈ བཅར་བྱའི་མིག། བཅང་བྱའི་སྨན། བཅག་བྱའི་ས། བཅའ་བྱའི་འཁྲུལ་འཁོར། བཅའ་བྱའི་ལྷུང་བ། བཅིང་བྱའི་རྐུན་པོ། བཅིབ་བྱའི་རྟ། བཅུར་བྱའི་འཕྲང་། བཅུ་བྱའི་ཆུ། བཅོལ་བྱའི་ནོར། བཅོ་བྱའི་གཏོར་མ།
༈ བརྗེ་བྱའི་དངོས་པོ། བརྗེད་བྱའི་དམ་པ། བརྗོད་བྱའི་གཏམ།
༈ བརྙན་བྱའི་གོས། བསྙག་བྱའི་བུ་ལོན། བསྙབ་བྱའི་དངོས་པོ། བསྙལ་བྱའི་ཤིང་། བསྙམ་བྱའི་རིང་ཐུང་། བསྙད་བྱའི་གཏམ། བསྙིལ་བྱའི་བྲག། བསྙུག་བྱའི་མར་ཁུ། བསྙུང་བྱའི་ཡོད་བྱད། བསྙུན་བྱའི་ལུས། བསྙེན་བྱའི་ལྷབསྙིམ་བྱའི་ཡོན་ཏན། བསྙོག་བྱའི་ཆུ།
༈ བཏིག་བྱའི་ཐིགས་པ། བཏུ་བྱའི་སྔགས། བཏུང་བྱའི་ཆང་། བརྟག་བྱའི་ལྟས། བརྟའ་བྱའི་ལུས། བརྟེན་བྱའི་ཡུལ། བརྟོད་བྱའི་རྟ། བརྟོལ་བྱའི་རྣག། བལྟ་བྱའི་གཟུགས། བལྟམ་བྱའི་གནས། བལྟབ་བྱའི་གོས། བསྟན་བྱའི་ཆོས། བསྟད་བྱའི་ཕྱོགས། བསྟད་བྱའི་སྒ། བསྟིམ་བྱའི་ལྷ། བསྟུང་བྱའི་ཐག། བསྟེན་བྱའི་བཤེས་གཉེན། བསྟོད་བྱའི་ཡོན་ཏན།
༈ མདུན་དུ་བདར་བྱའི་རྫས། བདའ་བྱའི་ཕྱུགས། བདར་བྱའི་ཙནྡན། བདམ་བྱའི་ནོར། བདུག་བྱའི་སྤོས། བདུང་བྱའི་གཞུ། བརྡལ་བྱའི་ཕྱེ་མ། བརྡར་བྱའི་མཚོན། བརྡབ་བྱའི་ཐལ་མོ། བརྡུང་བྱའི་རྔ། བལྡབ་བྱའི་ཚིག། བལྡག་བྱའི་སྐྱོ་མ། བལྡད་བྱའི་ཟས། བསྡམ་བྱའི་ཉེས་པའམ་ངག། བསྡིག་བྱའི་སྐྱེ་བོ། བསྡུ་བྱའི་འཁོར། བསྡུམ་བྱའི་མཁོན། བསྡུར་བྱའི་དངོས་པོ། བསྡེབ་བྱའི་གྲོགས། བསྡོག་བྱའི་ཐག་པ། བསྡོག་བྱའི་ཆས་གོས། བསྡོང་བྱའི་གྲོགས། བསྡོམ་བྱའི་གྲངས། བསྡོ་བྱའི་དགྲ།
༈ བརྣན་བྱའི་དོན། བརྣག་བྱའི་དོན། བསྣན་བྱའི་ནོར། བསྣམ་བྱའི་དྲིའམ་ཕྱག་མཚན། བསྣར་བྱའི་མཇུག། བསྣུན་བྱའི་མཚོན་ནམ་ནུ་མ། བསྣུབ་བྱའི་སྲོལ་ངན། བསྣུར་བྱའི་དུས། བསྣོར་བྱའི་གོ་རིམ། བསྣོལ་བྱའི་གོ། བསྣོ་བྱའི་ཟན།
༈ བཙའ་བྱའི་བུ། བཙལ་བྱའི་ནོར། བཙག་བྱའི་ཆུ། བཙའ་བྱའི་སྙིང་སྡུག། བཙུམ་བྱའི་ཁ། བཙིར་བྱའི་གཡོག། བཙེམ་བྱའི་གོས། བཙོ་བྱའི་གསེར། བཙོང་བྱའི་ཟོང་། བཙོག་བྱའི་མཆིག། བརྩམ་བྱའི་བྱ་བ། བརྩད་བྱའི་ཞལ་ལྕེ། བརྩིག་བྱའི་རྡོ། བརྩི་བྱའི་གྲངས། བརྩེ་བྱའི་གྲོགས།
༈ བརྫང་བྱའི་ཕོ་ཉ། སྣོད་དུ་བརྫང་བྱའི་ནོར། བརྫི་བྱའི་གདན་ནམ་ཟན། བརྫུ་བྱའི་ཁྲོ་བོ། བརྫེ་བྱའི་སྐྲ།
༈ བཞར་བྱའི་སྐྲ། བཞབ་བྱའི་ནོར། བཞུ་བྱའི་མར། བཞུར་བྱའི་ཤིང་། བཞོག་བྱའི་ཤིང་། བཞོ་བྱའི་འོ་མ།
༈ བཟའ་བྱའི་ཟས། བཟབ་བྱའི་མགྲོན། བཟླ་བྱའི་སྔགས། བཟླུག་བྱའི་གཏམ། བཟེད་བྱའི་ཟས། བཟློག་བྱའི་བྱད། བཟློ་བྱའི་གཏམ། བཟོ་བྱའི་ཤིང་།
༈ བྱིན་གྱིས་བརླབ་བྱ། བརླག་བྱའི་དགྲ། བརླམ་བྱའི་ཁོག་པ། བརླན་བྱའི་རྫས། བརླིང་བྱའི་རྨང་།
༈ བཤའ་བྱའི་ལུག །བཤད་བྱའི་ཆོས། བཤལ་བྱའི་སྣོད། བཤར་བྱའི་ནས། བཤང་བྱའི་སྦུབས། བཤག་བྱའི་སྡིག། བཤམ་བྱའི་སྟོན་མོ། བཤིག་བྱའི་རྫོང་། བཤུ་བྱའི་པགས་པ། མེར་བཤུར་བྱའི་རྫས། བཤུམ་བྱའི་སྡུག་བསྔལ། བཤུད་བྱའི་མཁུར་ཚོས། བཤུག་བྱའི་ནོར། བཤེར་བྱའི་ཚིག། བཤོལ་བྱའི་འགྲུལ་། བཤོར་བྱའི་རི་དྭགས།
༈ བསང་བྱའི་དྲི་མ། བསམ་བྱའི་དོན། བསག་བྱའི་ཚོགས། བསལ་བྱའི་སྐྱོན། བསར་བྱའི་ཆས། བསབ་བྱའི་དྲིན། བསིག་བྱའི་རལ་བ། བསིར་བྱའི་མདེའུ། བསུབ་བྱའི་རྗེས། བསུམ་བྱའི་ཁ། བསུ་བྱའི་མགྲོན། བསེད་བྱའི་བལ། བསོག་བྱའི་ནོར། བསྲང་བྱའི་མདའ། བསྲབ་བྱའི་བག་ཆགས། བསྲན་བྱའི་རྐྱེན། བསྲིང་བྱའི་འཕྲིན། བསྲིང་བྱའི་ཚེ། བསྲི་བྱའི་ཟས། བསྲུབ་བྱའི་ཞོ། བསྲུང་བྱའི་མི། བསྲེལ་བྱའི་ཆུང་མ། བསྲེ་བྱའི་རྫས། བསྲེག་བྱའི་བུད་ཤིང་། བསྲོ་བྱའི་ཚོད་མ། བསླབ་བྱའི་རིག་པ། བསླད་བྱའི་ཟས། བསླང་བྱའི་བསོད་སྙོམས། བསླན་བྱའི་ཕྱོགས། གྱེན་དུ་བསླང་བྱའི་ཤིང་། བསླུ་བྱའི་སྲོག། ཕྱིར་བསློག་བྱ། ཞེས་པ་ལ་སོགས་པ་རྣམས་སོ། ། དེ་ལྟར་བྱ་བའི་ཡུལ་ལ་འཇུག་པའི་སྒྲ་འདི་རྣམས་ལ་ཚིག་གྲོགས་དང་སྦྱར་ནས་དཔེར་བརྗོད་པ་ནི་གོ་སླ་བའི་ཕྱིར་ཏེ་གཞན་དུ། བཀན་བྱ། བཀོལ་བྱ། བགམ་བྱ། བགད་བྱ། བཅར་བྱ། བཅང་བྱ། ཞེས་སོགས་སྨོས་པ་ཉིད་ཀྱིས་བྱ་བའི་ཡུལ་གྱི་སྒྲ་ཡིན་པ་རྟོགས་པར་ནུས་པའི་ཕྱིར་སྐབས་ཐོབ་ཀྱི་དཔེར་བརྗོད་དངོས་ནི་དེ་རྣམས་ཉིད་ཡིན་ནོ། ། དེ་བཞིན་དུ་འཆད་འགྱུར་གྱི་འཇུག་པ་ཕྱི་མ་རྣམས་ཀྱི་སྐབས་སུའང་ཤེས་པར་བྱའོ། ། ཡང་སྐབས་འདི་དག་ཏུ་བྱ་ཚིག་གིས་གསལ་མི་དགོས་པར་ཡུལ་གྱི་སྒྲ་མཚོན་ནུས་པ། གོས་སོགས་ལ་བགོ་བ་དང་། རྟ་ལ་བཅིབ་པ། ཆང་སོགས་ལ་བཏུང་བ། སྤོས་ལ་བདུག་པ། བྱ་བ་ལ་བརྩམ་པ། ཟས་ལ་བཟའ་བ། བསླབ་བྱ་ལ་བསླབ་པ་སོགས་དང་འཆད་འགྱུར་མ་ནིང་གི་འཇུག་པའི་སྐབས་སུ། གདམ་བྱ་ལ་གདམ་པ། རྩྭ་ལ་གཟན་པ། ཡུལ་ལ་གཟུང་བ་སོགས་དང་། མོ་དང་ཤིན་ཏུ་མོའི་འཇུག་པའི་སྐབས་སུའང་དེ་འདྲ་མང་དུ་འབྱུང་བ་གོ་དགོས་སོ། ། དེ་བཞིན་དུ་བ་ཡིག་དངོས་པོ་གཞན་བྱ་བའི་ཡུལ་དང་འབྲེལ་བའི་བྱ་བ་ཉིད་ལ་འཇུག་པ་ནི། བཀལ་བར་བྱའོ། བཀལ་ལོ། བཀོལ་བར་བྱ། བཀོལ་ལོ། བཀན་པར་བྱ། བཀན་ནོ། བཀྱིག་པར་བྱ། བཀྱིག་གོ། བཀྱོན་པར་བྱ། བཀྱོན་ནོ། བཀྲབ་པར་བྱ། བཀྲབ་བོ། བཀྲུ་བར་བྱ། བཀྲུའོ། བཀླག་པར་བྱ། བཀླག་གོ། བསྐམ་པར་བྱ། བསྐམ་མོ། བརྐུ་བར་བྱ། བརྐུའོ། བརྐོ་བར་བྱ། བརྐོའོ། བརྐྱང་བར་བྱ། བརྐྱང་ངོ་། བསྐང་བར་བྱ། བསྐང་ངོ་། བསྐུ་བར་བྱ། བསྐུའོ། བསྐུལ་བར་བྱ། བསྐུལ་ལོ། བསྐོར་བར་བྱ། བསྐོར་རོ། བསྙོན་པར་བྱ། བསྙོན་ནོ། བསྐྱམ་པར་བྱ། བསྐྱམ་མོ། བསྐྱ་བར་བྱ། བསྐྱའོ། བསྐྱར་བར་བྱ། བསྐྱར་རོ། བསྐྱི་བར་བྱ། བསྐྱིའོ། བསྐྱིལ་བར་བྱ། བསྐྱིལ་ལོ། བསྐྱུར་བར་བྱ། བསྐྱུར་རོ། བསྐྲད་པར་བྱ། བསྐྲད་དོ། བསྐྲུན་པར་བྱ། བསྐྲུན་ནོ།
༈ དེ་བཞིན་དུ། བགམ་བྱ། བགད་བྱ་སོགས་སྔར་སྨོས་པ་རྣམས་དང་གཞན་ལའང་སྦྱར་ནས། བགམ་པར་བྱ། བགམ་མོ། བགད་པར་བྱ། བགད་དོ། སོགས་རྒྱས་པར་དཔེར་བརྗོད་པར་བྱ་ཞིང་། འདི་སྐབས། བརྒྱན། བསྒར། བརྒལ། ལྟ་བུ་ན་ར་ལའི་མཐའ་ཅན་རྣམས་ནི་འདས་ཚིག་མ་ཡིན་པའི་ཕྱིར་ད་དྲག་མི་འཐོབ་པས། བརྒྱན་ནོ། བསྒར་རོ། བསྒལ་ལོ། ཞེས་བརྗོད་པར་བྱའི། བརྒྱན་ཏོ་ཞེས་སོགས་སུ་མི་འགྱུར་བར་ཤེས་པར་བྱའོ། །དེ་བཞིན་དུ་མ་ནིང་གི་འཇུག་པའི་སྐབས་སོགས་འཆད་འགྱུར་གྱི་བྱེད་པ་དང་བྱ་བའི་ཚིག་རྣམས་ཀྱི་སླར་བསྡུའི་སྒྲ་ལའང་དེ་དག་གི་ན་ར་ལའི་མཐའ་རྟེན་གྱི་རྗེས་སུ་འཛིན་ཏོ། །ལྟ་བུ་དམིགས་བསལ་འགའ་ཞིག་ལས་ཕལ་ཆེར་ལ་ད་དྲག་མི་འཐོབ་པར་ངེས་པས་ཏོ་ཡིག་གི་སྒྲ་བརྗོད་པ་མེད་པ་ཉིད་དུ་ཤེས་པར་བྱ་ཞིང་འདི་རིགས་ཀྱི་རྣམ་དབྱེ་དང་ཕྲད་གཞན་རྣམས་སྦྱོར་བའིཚེའང་འདིས་མཚོན་ནས་རྗེས་སུ་དཔག་པར་བྱའོ། །
མ་ནིང་དགོས་པ་ཅི་ཕྱིར་འཇུག་པ་བཤད་པ།
གཉིས་པ་སྔོན་འཇུག་གི་མ་ནིང་དགོས་པ་གང་གི་ཕྱིར་འཇུག་པ་ནི།
མ་ནིང་གཉིས་ཀ་ད་ལྟར་ཆེད། །
ཅེས་པས་བསྟན་ཏེ། སྔོན་འཇུག་གི་མ་ནིང་ག་ད་གཉིས་ནི་དངོས་པོ་བདག་དང་གཞན་གཉི་ག་ལ་འཇུག་པ་དང་། དེར་མ་གཏོགས་པའི་དུས་གསུམ་ལས་ད་ལྟ་བ་སྟོན་པའི་ཕྱིར་འཇུག་གོ །དེ་དག་ཀྱང་རིམ་པ་བཞིན་དཔེར་བརྗོད་ན། ག་ཡིག་བདག་བྱེད་པ་པོ་ལ་འཇུག་པ་ནི།
༈ ལོགས་སུ་གཅོར་བ་པོ། གཅོར་བྱེད། གཅིན་གཅི་བ་པོ། གཅི་བྱེད། བར་དུ་གཅིར་བ་པོ། གཅིར་བྱེད། སྲང་དུ་གཅུར་བ་པོ། གཅུར་བྱེད། ལག་པ་གཅུ་བ་པོ། གཅུ་བྱེད། གཅོད་པ་པོ། གཅོད་བྱེད། རྡོ་བ་གཅོག་པ་པོ། གཅོག་བྱེད།
༈ བཟང་ངན་གཉུལ་བ་པོ། གཉུལ་བྱེད། དོན་གཉེར་བ་པོ། གཉེར་བྱེད། བཟང་ཕྱིར་གཉོག་པ་པོ། གཉོག་བྱེད།
༈ ཁྲག་གཏར་བ་པོ། གཏར་བྱེད། ནོར་གཏམ་པ་པོ། གཏམ་བྱེད། ཆུ་གཏིག་པ་པོ། གཏིག་བྱེད། མགོ་གཏུམ་པ་པོ། གཏུམ་བྱེད། ཤིང་གཏུབ་པ་པོ། གཏུབ་བྱེད། མགོ་གཏུམ་པ་པོ། གཏུམ་བྱེད། ཤིང་གཏུབ་པ་པོ། གཏུབ་བྱེད། ཞབས་ལ་གཏུག་པ་པོ། གཏུབ་བྱེད། སེ་གོལ་གཏོག་པ་པོ། གཏོག་བྱེད། གཞན་ལ་གཏོད་པ་པོ། གཏོད་བྱེད། ནོར་གཏོང་བ་པོ། གཏོང་བྱེད། དམིགས་པ་གཏོད་པ་པོ། གཏོད་བྱེད།
༈ ཁ་གདང་བ་པོ། གདང་བྱེད། གདུང་བ་པོ། གདུང་བྱེད། ཐུག་པ་གདུ་བ་པོ། གདུ་བྱེད། མཚོན་གདེང་བ་པོ། གདེང་བྱེད།
༈ འོག་ཏུ་གནོན་པ་པོ། གནོན་བྱེད།
༈ གཙག་བུས་གཙག་པ་པོ། གཙག་བྱེད། ཤིང་གཙུབ་བྱེད། གཙུབ་པ་པོ། གནོད་པས་གཙེར་བྱེད། གཙེར་བ་པོ།
༈ བློས་གཞིག་པ་པོ། གཞིག་བྱེད། ལམ་དུ་གཞུག་པ་པོ། གཞུག་བྱེད། ཤ་གཞུར་བ་པོ། གཞུར་བྱེད། ལྕག་གིས་གཞུ་བ་པོ། གཞུ་བྱེད།
༈ ཕྲག་ལ་གཟར་བ་པོ། གཟར་བྱེད། གཟིར་བ་པོ། གཟིར་བྱེད། ལམ་དུ་གཟུར་བ་པོ། གཟུར་བྱེད། གཡེང་བ་པོ། གཡེང་བྱེད། གཡབ་གཡུག་གཡོབ་པ་པོ། གཡོབ་བྱེད། ཟས་གཡོ་བ་པོ། གཡོ་བྱེད། གོས་གཡོག་པ་པོ། གཡོག་བྱེད། མིག་གཡོར་བ་པོ། གཡོར་བྱེད།
༈ གྲལ་གཤིབས་པ་པོ། གཤིབས་བྱེད།
༈ ཆུ་གཤོ་བ་པོ། གཤོ་བྱེད། ཤིང་གཤོག་པ་པོ། གཤོག་བྱེད། བྲེས་གཤོར་བ་པོ། གཤོར་བྱེད། མཆོད་པ་གཤོམ་པ་པོ། གཤོམ་བྱད།
༈ དྲིལ་བུ་གསིལ་བ་པོ། གསིལ་བྱེད། ལུས་གསིག་པ་པོ། གསིག་བྱེད། གསུང་བ་པོ། གསུང་བྱེད། ཤིང་གསེ་བ་པོ། གསེ་བྱེད། ནོར་གསོག་པ་པོ། གསོག་བྱེད། གསོད་པ་པོ། གསོད་བྱེད། མདུང་གསོར་བ་པོ། གསོར་བྱེད། གསང་གཏམ་གསོང་བ་པོ། གསོང་བྱེད། ཆུད་གསོན་པ་པོ། གསོན་བྱེད། ཅེས་པ་ལ་སོགས་པ་རྣམས་སོ། །
དེ་བཞིན་དུ་ག་ཡིག་བྱེད་པ་པོ་བདག་ལ་ཡོད་པའི་ལས་སམ་བྱེད་པ་ཙམ་ལ་འཇུག་པ་ནི། གཅར་བར་བྱེད། གཅར་རོ། གཅི་བར་བྱེད། གཅིའོ། གཅིར་བར་བྱེད། གཅིའོ། གཅུར་བར་བྱེད། གཅུར་རོ། གཅུ་བར་བྱེད། གཅུའོ། གཅོད་པར་བྱེད། གཅོད་དོ། གཅོག་པར་བྱེད། གཅོག་གོ།
༈ གཉུལ་བར་བྱེད། གཉུལ་ལོ། གཉེར་བར་བྱེད། གཉེར་རོ། ཞེས་སོགས་རིམ་པ་བཞིན་དུ་སྦྱར་ཏེ་དཔེར་བརྗོད་པར་བྱའོ། །ག་ཡིག་གཞན་བྱ་བའི་ཡུལ་ཉིད་ལ་འཇུག་པ་ནི། གཅད་བྱའི་ཤིང་། གཅི་བྱའི་ཆུ། གཅིར་བྱའི་རྫས། གཅོག་བྱའི་རྡོ།
༈ གཉག་བྱའི་ཟས། གཉུལ་བྱའི་སྐྱོན། གཉེར་བྱའི་དོན།
༈ གཏད་བྱའི་རྫས། གཏང་བྱའི་ནོར། གཏམས་བྱའི་སྣོད། གཏིགས་བྱའི་ཆུ། གཏིབ་བྱའི་སྤྲིན། གཏུབ་བྱའི་ཤིང་། གཏུམ་བྱའི་མགོ། གཏུར་བྱའི་རྫས། གཏུག་བྱའི་ཞབས། གཏོར་བྱའི་མེ་ཏོག།
༈ གསོལ་བ་གདབ་བྱའི་ཡུལ། རྒྱས་གདབ་བྱའི་དངོས་པོ། གདགས་བྱའི་མིང་། གདབ་བྱའི་ས་བོན། གདམས་བྱའི་གྲོས། གདམ་བྱའི་ནོར། གདིང་བྱའི་སྟན། གདུལ་བྱའི་སེམས་ཅན། གདུ་བྱའི་ཐུག་པ། མེས་གདུང་བྱ། སྲང་ལ་གདེག་བྱ། ངན་སོང་ལས་གདོན་བྱའི་སེམས་ཅན། གདོན་བྱའི་འདོན་པ།
༈ གཙག་བྱའི་ཤ། གཙུབ་བྱའི་མེ། གཙེར་བྱའི་དགྲ།
༈ གཞལ་བྱའི་ཚད། གཞག་བྱའི་དངོས་པོ། གཞིག་བྱའི་དོན། གཞིབ་བྱའི་ཁུ་བ། གཞིལ་བྱའི་ནད། གཞིབས་བྱའི་གྲལ། ནང་དུ་བཞུག་བྱའི་མི། གཞུར་བྱའི་དངོས་པོ། བྱེད་དུ་གཞུག་བྱའི་ལས། ལྕག་གིས་གཞུ་བྱ། གཞོམ་བྱའི་དགྲ། གཞོག་བྱའི་ཤིང་། གཞོལ་བྱའི་ལས།
༈ གཟར་བྱའི་གོས། གཟབ་བྱའི་ལས། གཟན་བྱའི་གཟན་པ། གཟད་བྱའི་གོས། གཟགས་བྱའི་བཅུད། གཟིར་བྱའི་བགེགས། གཟུགས་བྱའི་གཟེར་བུ། གཟུང་བྱའི་ཡུལ། ཆོས་ལ་གཟུད་བྱའི་སྐྱེ་བོ། ལམ་གཟུར་བྱ། གཟེད་བྱའི་གཟན།
༈ གཡབ་བྱའི་གཡབ་མོ། གཡེང་བྱའི་ཡིད། གཡོ་བྱའི་ཟས། གཡོག་བྱའི་གོས། གཡོགས་ཞེས་པ་འདས་ཚིག་གོ། གཤག་བྱའི་ཤིང་། གཤིབས་བྱའི་གྲལ། གསད་བྱའི་བགེགས། གསང་བྱའི་སྔགས། གསིལ་བྱའི་དྲིལ་བུ། དུམ་བུར་གསིལ་བྱ། གསོ་བྱའི་བུ། ལ་སོགས་པ་རྣམས་སོ། །ག་ཡིག་གཞན་བྱ་བའི་གཞི་དང་འབྲེལ་བའི་ལས་སམ་བྱ་བ་ཙམ་ལ་འཇུག་པ་ནི། གཅད་པར་བྱ། གཅད་དོ། གཅི་བར་བྱ། གཅིའོ། གཅིར་བར་བྱ། གཅིར་རོ། གཅོག་པར་བྱ། གཅོག་གོ། གཉག་པར་བྱ། གཉག་གོ། གཉུལ་བར་བྱ། གཉུལ་ལོ། གཉེར་བར་བྱ། གཉེར་རོ། གཏད་པར་བྱ། གཏད་དོ། གཏང་བར་བྱ། གཏང་ངོ་། སོགས་རིམ་བཞིན་སྦྱར་ནས་དཔེར་བརྗོད་པར་བྱའོ། །
ད་ཡིག་བདག་བྱེད་པ་པོ་ལ་འཇུག་པ་ནི། སྣལ་མས་དཀྲི་བ་པོ། དཀྲི་བྱེད། རྟ་དཀྱུ་བ་པོ། དཀྱུ་བྱེད།
༈ གཞན་དུ་དགར་བ་པོ། དགར་བྱེད། གད་མོ་དགོད་པ་པོ། དགོད་བྱེད། དར་དཔྱོང་བ་པོ། དཔྱོང་བྱེད། མཚན་མར་དཔྱོད་པ་པོ། དཔྱོད་བྱེད། གཏིང་དཔོག་པ་པོ། དཔོག་བྱེད།
༈ དབྱིག་གིས་དབུར་བ་པོ། དབུར་བྱེད། རལ་གྲི་དབྱུག་པ་པོ། དབྱུག་བྱེད། པགས་པ་དབྲོལ་བ་པོ། དབྲོལ་བྱེད།
༈ སྙིང་ནས་དམོད་པ་པོ། དམོད་བྱེད་ལ་སོགས་པའོ། །
༈ ད་ཡིག་བྱེད་པ་ཙམ་ལ་འཇུག་པ་ནི། དཀྲི་བར་བྱེད། དཀྲིའོ། དགར་བར་བྱེད། དགར་རོ། སོགས་སྔ་མ་བཞིན་དུ་སྦྱར་རོ། ། དེ་བཞིན་དུ་ད་ཡིག་གཞན་བྱ་བའི་ཡུལ་ལ་འཇུག་པ་ནི། དཀྲི་བྱའི་མདོས་རིས། དཀྱུ་བྱའི་རྟ། དགར་བྱའི་གནས། དགག་བྱའི་སྐྱོན། དགས་བྱའི་ཤིང་། དགལ་བྱའི་ཁལ་མ། དགབ་བྱའི་སྣོད། དགྲམ་བྱའི་ཟོང་། དགང་བྱའི་བུམ་པ། དགུག་བྱའི་མགྲོན། དགོད་བྱའི་ཡི་གེ། དགྲོལ་བྱའི་མདུད་པ།
༈ དཔག་བྱའི་ལྐོག་གྱུར། དཔྱང་བྱའི་དར། དཔྱད་བྱའི་ཡུལ། དཔྱའ་བྱའི་སྐྱོན།
༈ དབྲལ་བྱའི་པགས་པ། དབབ་བྱའི་ཆར། དབྲི་བྱའི་གྲངས། དབྱི་བྱའི་རི་མོ། དབྱུང་བྱའི་ཚེར་མ། དབུག་བྱའི་ཤིང་། དབུལ་བྱའི་རྫས། དབུབ་བྱའི་ཁྱིམ། དབུབ་བྱའི་གདུགས། དབྱུག་བྱའི་རལ་གྲི། དབུར་བྱའི་རས། དབྱེ་བྱའི་ཁ། དབོ་བྱའི་ཆུ། དབྲོག་བྱའི་ནོར། དཔོག་བྱའི་ལུང་། དམད་བྱའི་ཉམ། ལ་སོགས་པ་རྣམས་སོ། །ད་ཡིག་གཞན་བྱ་བ་ཙམ་ལ་འཇུག་པ་ནི། དཀྲི་བར་བྱ། དཀྲིའོ། དཀྱུ་བར་བྱ། དཀྱུའོ། དགར་བར་བྱ། དགར་རོ། དགག་པར་བྱ། དགག་གོ། དགལ་བར་བྱ། དགལ་ལོ། དགྲོལ་བར་བྱ། དགྲོལ་ལོ། སོགས་སྔ་མ་བཞིན་དུ་སྦྱར་ནས་རྟོགས་པར་བྱའོ། ། མ་ནིང་གི་སྔོན་འཇུག་གཉིས་པོ་དེ་བཤད་མ་ཐག་པའི་བདག་གཞན་གཉིས་པོ་དེར་མི་གཏོགས་པའི་དུས་ད་ལྟ་བ་ལ་འཇུག་པའི་ཚུལ་ནི། བྱེད་པ་པོ་བདག་དང་འབྲེལ་བའི་བྱེད་པའི་ཚིག་གི་དཔེར་བརྗོད་པ་དེ་རྣམས་ཉིད་ཚིག་གྲོགས་ཀྱིས་བསྒྱུར་བ་ལས་ཤེས་པར་བྱའོ། །དེའང་དཔེར་ན། གཅར་བར་བྱེད། གཅར་རོ། དཀྲི་བར་བྱེད། དཀྲིའོ། ལྟ་བུ་ད་ལྟ་བའི་སྒྲ་ཡིན་མོད་ཀྱི་གཟུང་བར་བྱ། གཟུང་ངོ་། དགང་བར་བྱ། དགང་ངོ་། ལྟ་བུ་གཞན་གྱི་སྒྲ་ལའང་དེ་དང་ཤེད་མཚུངས་ཡོད་པས་སྔར་སྟོབས་མཚུངས་ཀྱིས་བདག་གཞན་དུ་ཟླས་ཕྱེ་བའི་བདག་སྒྲའི་ཁོངས་སུ་བསྡུས་ནས་བརྗོད་ཟིན་པས་འདིར་ནི་དོན་གྱིས་བདག་བྱེད་པའི་ཚིག་ཡིན་ཡང་གཞན་གྱི་སྒྲ་ལ་དེ་དང་ཤེད་མཚུངས་སྦྱར་རྒྱུ་མེད་པས་གོང་སྨོས་བདག་སྒྲའི་ཁོངས་སུ་སྡུད་པར་མི་འོས་པའི། གཅར་གྱིན་སྣང་ངོ་། །གཅར་བཞིན་པའོ། །དཀྲི་ཡིན་འདུག་གོ། དཀྲི་བཞིན་པའོ། །ལྟ་བུ་སྔར་སྨོས་པའི་བདག་སྒྲའི་བྱེད་ཚིག་དེ་རྣམས་ཉིད་བརྗོད་ཚུལ་ཚིག་གྲོགས་ཀྱི་ཁྱད་པར་དང་བཅས་པས་དཔེར་བརྗོད་པར་བྱའོ། །
མོ་ཡིག་དགོས་པ་ཅི་ཕྱིར་འཇུག་པ་བཤད་པ།
གསུམ་པ་སྔོན་འཇུག་གི་མོ་ཡིག་དགོས་པ་གང་གི་ཕྱིར་འཇུག་པ་ནི།
མོ་ནི་བདག་ད་མ་འོངས་ཕྱིར། །
ཞེས་པས་བསྟན་ཏེ། སྔོན་འཇུག་གི་མོ་ཡིག་འ་ནི། དངོས་པོ་བདག་དང་། དུས་ད་ལྟ་བ་དང་མ་འོངས་པ་དག་བསྒྲུབ་པའི་ཕྱིར་འཇུག་གོ། དེ་ལ་བདག་བྱེད་པ་པོ་ལ་འཇུག་པ་ནི། སྐུད་པ་འཁལ་བ་པོ། འཁལ་བྱེད། ཁུར་འཁུར་བ་པོ། འཁུར་བྱེད། ལུས་ལ་འཁྱུད་པ་པོ། འཁྱུད་བྱེད། ཐག་པས་འཁྱིག་པ་པོ། འཁྱིག་བྱེད། གཞན་དུ་འཁྱེར་བ་པོ། འཁྱེར་བྱེད། གནས་སུ་འཁྲ་བ་པོ། འཁྲ་བྱེད། བྲོ་འཁྲབ་བ་པོ། འཁྲབ་བྱེད། ལམ་དུ་འཁྲིད་པ་པོ། འཁྲིད་བྱེད། ཤིང་ལ་འཁྲིལ་བ་པོ། འཁྲིལ་བྱེད། ཆགས་པས་འཁྲིག་པ་པོ། འཁྲིག་བྱེད། དྲི་མ་འཁྲུད་པ་པོ། འཁྲུད་བྱེད། ཁྱིམ་ལ་འཁྲེན་པ་པོ། འཁྲེན་བྱེད།
༈ ཕྱེ་འགམ་བྱེད། འགམ་པ་པོ། འགུགས་པ་པོ། འགུགས་བྱེད། སྣོད་འགེངས་པ་པོ། འགེངས་བྱེད། མགོ་འགེམས་པ་པོ། འགེམས་བྱེད། འགོག་པ་པོ། འགོག་བྱེད། འགོད་པ་པོ། འགོད་བྱེད། འོད་འགྱེད་པ་པོ། འགྱེད་བྱེད། གཡུལ་འགྱེད་པ་པོ། འགྱེད་བྱེད། གྱེན་དུ་འགྱོག་པ་པོ། འགྱོག་བྱེད། ཆུ་འགྲེམ་པ་པོ། འགྲེམ་བྱེད། མདུད་པ་འགྲོལ་པ་པོ། འགྲོལ་བྱེད།
༈ ཆོས་འཆད་བྱེད། འཆད་པ་པོ། ཉེས་པ་འཆབ་པ་པོ། འཆབ་བྱེད། གནས་འཆའ་བ་པོ། འཆའ་བྱེད། འཆང་བ་པོ། འཆང་བྱེད། ཁྲིམས་འཆའ་བ་པོ། འཆའ་བྱེད། ཞགས་པས་འཆིང་བ་པོ། འཆིང་བྱེད། དལ་གྱིས་འཆུ་བ་པོ། འཆུ་བྱེད། ཁས་འཆེ་བྱེད། འཆེ་བ་པོ། ལས་འཆོལ་བ་པོ། འཆོལ་བྱེད། རྒྱུད་འཆོས་བྱེད། འཆོས་པ་པོ།
༈ བློའམ་ཚད་ཀྱིས་འཇལ་བ་པོ། འཇལ་བྱེད། ཁུ་བ་འཇིབ་པ་པོ། འཇིབ་བྱེད། མཆོད་རྟེན་འཇིག་པ་པོ། འཇིག་བྱེད། གོས་ལ་འཇུ་བ་པོ། འཇུ་བྱེད། ནང་དུའམ་བྱེད་དུ་འཇུག་པ་པོ། འཇུག་བྱེད། ཐབས་ཀྱིས་འཇུན་པ་པོ། འཇུན་བྱེད། གནས་སུ་འཇོག་པ་པོ། འཇོག་བྱེད། ཤིང་འཇོག་པ་པོ། འཇོག་བྱེད། དགྲ་འཇོམས་པ་པོ། འཇོམས་བྱེད།
༈ དགྲ་ལ་འཐབ་པ་པོ། འཐབ་བྱད། ཕྱེ་མར་འཐག་པ་པོ། འཐག་བྱེད། ཟས་ལ་འཐུ་བ་པོ། འཐུ་བྱེད། དུམ་བུར་འཐུབ་པ་པོ། འཐུབ་བྱེད། ཆུ་འཐུང་བ་པོ། འཐུང་བྱེད། ཐུན་བུ་འཐུ་བ་པོ། འཐུ་བྱེད། ཐག་པས་འཐེན་པ་པོ། འཐེན་བྱེད། ཤ་འཐོག་པ་པོ། འཐོག་བྱེད། ཆུ་འཐོར་བ་པོ། འཐོར་བྱེད།
༈ སྐྱོ་མ་འདག་པ་པོ། འདག་བྱེད། ནོར་འདམ་བྱེད། འདམ་པ་པོ། འདུན་བྱེད། འདུན་པ་པོ། འདུད་བྱེད། འདུད་པ་པོ། འདུལ་བྱེད། འདུལ་བ་པོ། འདུ་བྱེད། འདུ་བ་པོ། འདེགས་བྱེད། འདེགས་པ་པོ། རྗེས་སུ་འདེད་པ་པོ། འདེད་བྱེད། འདེབས་བྱེད། འདེབས་པ་པོ། སྲད་བུ་འདོགས་བྱེད། འདོགས་པ་པོ། ཕྱིར་འདོན་པ་པོ། འདོན་བྱེད། གདམས་ངག་འདོམས་པ་པོ། འདོམས་བྱེད། གོམས་པའམ་དྲི་མ་འདོར་བྱེད། འདོར་བ་པོ། དྲ་བ་འདྲལ་བྱེད། འདྲལ་བ་པོ། ཁ་སྐད་འདྲི་བ་པོ། འདྲི་བྱེད། ནོར་གྱིས་འདྲིད་པ་པོ། འདྲིད་བྱེད། ཤིང་འདྲུད་བྱེད། འདྲུད་པ་པོ། ཁུང་འདྲུ་བ་པོ། འདྲུ་བྱེད། སྐྲ་འདྲེག་པ་པོ། འདྲེག་བྱེད། གནས་ནས་འདྲེན་པ་པོ། འདྲེན་བྱེད།
༈ ཕྱིར་འཕུལ་བ་པོ། འཕུལ་བྱེད། མདའ་འཕེན་པ་པོ། འཕེན་བྱེད། དར་འཕྱར་བ་པོ། འཕྱར་བྱེད། གཞན་ལ་འཕྱ་བ་པོ། འཕྱ་བྱེད། ཐལ་བ་འཕྱག་པ་པོ། འཕྱག་བྱེད། ནོར་འཕྲོག་པ་པོ། འཕྲོག་བྱེད།
༈ ལས་ལ་འབད་པ་པོ། འབད་བྱེད། སྐྲ་འབལ་བ་པོ། འབལ་བྱེད། ཤིང་འབིགས་པ་པོ། འབིགས་བྱེད། ནོར་འབུལ་བ་པོ། འབུལ་བྱེད། ཁྱིམ་འབུབས་པ་པོ། འབུབས་བྱེད། དུང་ངམ་རླུང་འབུད་པ་པོ། འབུད་བྱེད། ཆར་འབེབས་པ་པོ། འབེབས་བྱེད། གདམས་ངག་འབོགས་བྱེད། འབོགས་པ་པོ། མིང་ནས་འབོད་པ་པོ། འབོད་བྱེད། ཕྱིར་འབོར་བ་པོ། འབོར་བྱེད། རི་མོ་འབྱིད་པ་པོ། འབྱིད་བྱེད། གནས་ནས་འབྱིན་པ་པོ། འབྱིན་བྱེད། ཚོན་འབྱུག་པ་པོ། འབྱུག་བྱེད། སྒོ་འབྱེད་པ་པོ། འབྱེད་བྱེད། འབྱེ་བ་པོ། འབྱེ་བྱེད། ལྕེས་འབྱོག་པ་པོ། འབྱོག་བྱེད། ཆུ་འབྱོ་བ་པོ། འབྱོ་བྱེད། ས་ལ་འབྲད་པ་པོ། འབྲད་བྱེད། ཆུ་འབྱོ་བ་པོ། འབྱོ་བྱེད། ས་ལ་འབྲད་པ་པོ། འབྲད་བྱེད། གྲངས་འབྲིད་པ་པོ། འབྲིད་བྱེད། ཡི་གེ་འབྲི་བ་པོ། འབྲི་བྱེད། འཚང་འབྲུ་བ་པོ། འབྲུ་བྱེད། ཁུང་བུ་འབྲུད་པ་པོ། འབྲུད་བྱེད། རྗེས་སུ་འབྲེང་བ་པོ། འབྲེང་བྱེད།
༈ཕྱག་འཚལ་བ་པོ། འཚལ་བྱེད། སྐྱིན་པ་འཚབ་པ་པོ། འཚབ་བྱེད། ཆུ་འཚག་པ་པོ། འཚག་བྱེད། ཏིལ་འཚིར་བ་པོ། འཚིར་བྱེད། ཟས་འཚེད་པ་པོ། འཚེད་བྱེད། གཞན་ལ་འཚེ་བ་པོ། འཚེ་བྱེད། ནོར་འཚོལ་བ་པོ། འཚོལ་བྱེད། ཟོང་འཚོང་བ་པོ། འཚོང་བྱེད། ཕྱུགས་འཚོ་བ་པོ། འཚོ་བྱེད། རྡོ་བས་འཚོག་པ་པོ། འཚོག་བྱེད། ལུས་འཚོ་བ་པོ། འཚོ་བྱེད།
༈ དངོས་པོ་འཛིན་པ་པོ། འཛིན་བྱེད། སྣོད་དུ་འཛུད་པ་པོ། འཛུད་བྱེད། རྩ་བ་འཛུགས་པ་པོ། འཛུགས་བྱེད། ཁུང་དུ་འཛུལ་བ་པོ། འཛུལ་བྱེད། སྣོད་འཛེད་པ་པོ། འཛེད་བྱེད། གྱེན་དུ་འཛེག་པ་པོ། འཛེག་བྱེད། ལ་སོགས་པ་རྒྱ་ཆེར་ཤེས་པར་བྱའོ། །དེ་ལྟར་བཀོད་པ་རྣམས་ནི་གོང་སྨོས་ལྟར་གང་ཞིག་ལས་སམ་བྱ་བ་དེ་ལས་ངེས་པར་ཐ་དད་པར་གྱུར་པའི་བདག་བྱེད་པ་པོའི་ཚིག་སྟེ། འདིར་བསྟན་གྱི་དཔེར་བརྗོད་དངོས་ཡིན་ལ། ཞར་ལས་གང་ཞིག་ལས་སམ་བྱ་རྒྱུ་དེ་དང་ཐ་མི་དད་པ་ལྟར་སྣང་བའི་བྱེད་པ་པོའི་ཚིག་རྣམས་ཀྱང་ཕལ་ཆེར་འས་འཕུལ་ཅན་དུ་ཤེས་དགོས་ཏེ། དཔེར་ན། རྟེན་ལ་འཁར་བ་པོ། འཁར་བྱེད། ངག་འཁུན་པ་པོ། འཁུན་བྱེད། གདན་ལ་འཁོད་པ་པོ། འཁོད་བྱེད། འཁོར་བར་འཁོར་བ་པོ། འཁོར་བྱེད། ལུས་འཁྱར་བ་པོ། འཁྱར་བྱེད། ཡུལ་དུ་འཁྱམས་པ་པོ། འཁྱམས་བྱེད། གཡས་སུ་འཁྱིལ་བ་པོ། འཁྱིལ་བྱེད། མྱུར་བར་འཁྱུག་པ་པོ། འཁྱུག་བྱེད།
༈ འགྱིང་བ་པོ། འགྱིང་བྱེད། རྟོག་པ་འགྱུ་བ་པོ། འགྱུ་བྱེད། གནས་འགྱུར་བ་པོ། འགྱུར་བྱེད། ཁྱིམ་དུ་འགྲིམ་པ་པོ། འགྲིམ་བྱེད། ལམ་དུ་འགྲོ་བ་པོ། འགྲོ་བྱེད།
༈ འཆག་སར་འཆག་པ་པོ། འཆག་བྱེད། ཤར་ནས་འཆར་བ་པོ། འཆར་བྱེད། འཆི་བ་པོ། འཆི་བྱེད། འཇུག་པ་པོ། འཇུག་བྱེད། ཕྱིར་འཐོན་པ་པོ། འཐོན་བྱེད།
༈ མྱ་ངན་འདའ་བ་པོ། འདའ་བྱེད། ཚོགས་སུ་འདུ་བ་པོ། འདུ་བྱེད། སྟན་ལ་འདུག་པ་པོ། འདུག་བྱེད། ལྗོངས་སུ་འདེང་བ་པོ། འདེང་བྱེད། བློ་འདྲོག་པ་པོ། འདྲོག་བྱེད།
༈ གནས་ལས་འཕག་པ་པོ། འཕག་བྱེད། འཕར་བ་པོ། འཕར་བྱེད། གནམ་དུ་འཕུར་བ་པོ། འཕུར་བྱེད། གོང་དུ་འཕོ་བ་པོ། འཕོ་བྱེད། ལྗོངས་སུ་འཕྱན་པ་པོ། འཕྱན་བྱེད། རྐང་མེད་འཕྱེ་བ་པོ། འཕྱེ་བྱེད། ནམ་མཁར་འཕྱོ་བ་པོ། འཕྱོ་བྱེད།
༈ སར་འབབ་པ་པོ། འབབ་བྱེད། རང་ཉིད་འབར་བ་པོ། འབར་བྱེད། འབྱུང་བ་པོ། འབྱུང་བྱེད། འབྱོན་པ་པོ། འབྱོན་བྱེད། གཞན་དུ་འབྱོལ་བ་པོ། འབྱོལ་བྱེད། རྗེས་སུ་འབྲང་བ་པོ། འབྲང་བྱེད། འབྲོས་བྱེད། འབྲོས་པ་པོ།
༈ འཛུལ་བ་པོ། འཛུལ་བྱེད། བཞིན་འཛུམ་པ་པོ། འཛུམ་བྱེ། ལ་སོགས་པ་ལྟ་བུའོ། །དེའང་དཔེར་ན་འཁོར་བར་འཁོར་རྒྱུ་སེམས་ཅན་རྣམས་ཡིན་ཞིང་། འཁོར་བ་པོའམ་འཁོར་བྱེད་ཀྱང་འཁོར་བཞིན་པའི་གནས་སྐབས་དེར་སེམས་ཅན་ཉིད་ལས་གཞན་དུ་མི་དམིགས་པས་བྱེད་པོ་དངབྱ་བ་ཐ་མི་དད་པའི་ཆ་ནས་འཁོར་བ་པོའམ་འཁོར་བྱེད་ཅེས་འ་འཕུལ་ཅན་དུ་ཀློག་པ་ཡིན་གྱི་བྱེད་པ་པོ་གཞན་ཞིག་ཡོད་པའི་ཆ་ནས་ནི་དེ་ལྟར་ཀློག་པ་མ་ཡིན་ནོ། །དེ་བཞིན་དུ་རྫ་མཁན་གྱིས་འཁོར་ལོ་སྐོར་བའི་ཚེ་སྤྱི་ལྡོག་ནས་འཁོར་བ་བྱེད་པ་པོ་ལ་ལྟོས་ཀྱང་དེ་མི་བརྗོད་པར་འཁོར་བཞིན་པའི་གནས་སྐབས་ཙམ་བརྗོད་པའི་ཚེ་བྱེད་པོ་དང་བྱ་བ་གཉིས་ཀ་ཐ་མི་དད་པའི་དབང་གིས་རྫ་མཁན་གྱི་འཁོར་ལོ་འཁོར་བ་ཞེས་བརྗོད་པ་ཡིན་ནོ། །དེས་མཚོན་ནས་བརྗོད་བྱའི་གནས་སྐབས་དང་བསྟུན་ཏེ་རྗོད་བྱེད་ཀྱི་ཚིག་སྦྱོར་བའི་ཚུལ་རྣམས་ཁོང་དུ་ཆུད་པར་བྱ་དགོས་སོ། །སྔོན་འཇུག་མོ་ཡིག་བདག་དང་འབྲེལ་བའི་བྱེད་པ་ཙམ་ལ་འཇུག་པ་ནི། སྐུད་པ་འཁལ་བར་བྱེད། འཁལ་ལོ། འཁུར་བར་བྱེད། འཁུར་རོ། འཁྱུད་པར་བྱེད། འཁྱུད་དོ། འཁྱིག་པར་བྱེད། འཁྱིག་གོ། འཁྱེར་བར་བྱེད། འཁྱེར་རོ། འཁྲབ་པར་བྱེད། འཁྲབ་བོ། འཁྲིད་པར་བྱེད། འཁྲིད་དོ། འཁྲིལ་བར་བྱེད། འཁྲིལ་ལོ། འཁྲིག་པར་བྱེད། འཁྲིག་གོ། འཁྲུད་པར་བྱེད། འཁྲུད་དོ། འཁྲེན་པར་བྱེད། འཁྲེན་ནོ། འགམ་པར་བྱེད། འགམ་མོ། འགུགས་པར་བྱེད། འགུགས་སོ། ཞེས་སོགས་སྔ་མ་བཞིན་ཐམས་ཅད་ལ་རིགས་འགྲེ་བར་བྱའོ། །
སྔོན་འཇུག་གི་མོ་ཡིག་སྔར་བཤད་བདག་གཞན་གྱི་དབྱེ་བས་མ་བསྡུས་པའི་དུས་ད་ལྟ་བར་འཇུག་པ་ནི། མ་ནིང་གི་འཇུག་པའི་སྐབས་སུ་བཤད་པ་ལྟར་སྨོས་མ་ཐག་པའི་བྱ་བྱེད་ཐ་དད་པ་དང་ཐ་མི་དད་པ་གཉི་གའི་བྱེད་ཚིག་རྣམས་ལ་ཚིག་གྲོགས་ཀྱིས་བསྒྱུར་བ། འཁལ་བཞིན་པ། འཁལ་གྱིན་སྣང་། འཁུར་བཞིན་པ། འཁུར་གྱིན་སྣང་། འཁྱུད་བཞིན་པ། འཁྱུད་གྱིན་འདུག་སོགས་དང་། འཁར་བཞིན་པ། འཁར་གྱིན་འདུག། འཁུན་བཞིན་པ། འཁུན་གྱིན་འདུག། འཁོད་བཞིན་པ། འཁོད་གྱིན་སྣང་། སོགས་སྔ་མ་བཞིན་རྒྱས་པར་སྦྱར་ནས་རྟོགས་པར་བྱའོ། །
སྔོན་འཇུག་གི་མོ་ཡིག་སྔར་བཤད་བདག་གཞན་གྱི་དབྱེ་བས་མ་བསྡུས་པའི་དུས་མ་འོངས་པའི་དོན་ལ་འཇུག་པ་ནི། རང་གི་ངང་གིས་འབྱུང་བ་ལྟ་བུ་བྱེད་པོ་གཞན་མེད་པ་དང་རགས་པར་བྱ་བྱེད་ཐ་དད་དུ་མི་སྣང་བའི་འབྱུང་འགྱུར་གྱི་ཚིག་རྣམས་ཏེ། དཔེར་ན། ཁྱིམ་ལ་འཁར་བར་འགྱུར། གཞན་དུ་འཁྱར་བར་འགྱུར། ཡུལ་དུ་འཁྱམས་པར་འགྱུར། འོད་འཁྱིམས་པར་འགྱུར། ཆུ་འཁྱིལ་བར་འགྱུར། གོས་ལ་འཁྲི་བར་འགྱུར། གཡོག་ཏུ་འཁུལ་བར་འགྱུར། རང་བཞིན་འཁུན་པར་འགྱུར། བག་འཁུམས་པར་འགྱུར། གལ་གྱིས་འཁྱུ་བར་འགྱུར། གློག་འཁྱུག་པར་འགྱུར། དྲི་མ་འཁྲུ་བར་འགྱུར། སྐུ་འཁྲུང་བར་འགྱུར། ལུས་ལ་འཁྲེམ་པར་འགྱུར། འཁོར་བར་འཁོར་བར་འགྱུར། གདན་ལ་འཁོད་པར་འགྱུར། བྲན་དུ་འཁོལ་བར་འགྱུར། ཤིང་འཁྱོག་པར་འགྱུར། ལུས་འཁྱོར་བར་འགྱུར། རྒྱ་མཚོ་འཁྱོམ་པར་འགྱུར། གནས་སུ་འཁྱོལ་བར་འགྱུར། རོལ་མོ་འཁྲོལ་བར་འགྱུར། སོགས་དང་།
༈ དེ་བཞིན་དུ། འགག། འགས། འགྲིམ། འགྲིབ། འགྲིལ། འགུལ། འགུམ། འགྱུ། འགྱུར། འགྲུབ། འགྱེས། འགྱེལ། འགྲེ། འགོ། འགྲོ།
༈ འཆར། འཆད། འཆག། འཆབ། འཆི། འཆུས།
༈ འཇགས། འཇིག། འཇུ། འཇུག། འཇོ།
༈ འཐོན། འཐོབ།
༈ འདའ། འདག། འདུ། འདུག། འདོང་།
༈ འཕར། འཕག། འཕྱན། འཕྱང་། འཕྲད། འཕྱི། འཕྱུག། འཕྱེ། འཕྱོ། འཕྲོ།
༈ འབབ། འབྱམ། འབྱར། འབྱང་། འབྲལ། འབྲང་། འབྱིང་། འབྱི། འབྲི། འབྲིམ། འབྱུང་། འབྱེད། འབྱེར། འབྱོངས། འབྱོར། འབྲོས།
༈ འཚལ། འཚོ། འཚོབ།
༈ འཛག། འཛུར། འཛོམ། ལ་སོགས་པ་རྒྱ་ཆེར་ཤེས་པར་བྱ་ཞིང་། དེ་དག་ལའང་འགའ་ཞིག་ནི་ཚིག་གྲོགས་སམ་བྱ་ཚིག་གིས་གསལ་མི་དགོས་པར་སྐབས་འདིའི་དཔེར་བརྗོད་དུ་རུང་བ་དཔེར་ན། འགག། འགྱུར། འགྲུབ། འདུ་ལྟ་བུ་སྟེ། དེ་དག་བྱེད་པ་པོ་གཞན་དང་དངོས་སུ་འབྲེལ་བ་ཡིན་ན། དགག། བསྒྱུར། བསྒྲུབ། བསྡུ་ལྟ་བུ་སྡེབ་སྦྱོར་གཞན་འཐོབ་ཅིང་། བྱེད་པ་ད་ལྟ་བ་བརྗོད་ན། འགོག་པར་བྱེད། འགྱུར་བར་བྱེད། འགྲུབ་པར་བྱེད་སོགས་ཐོབ་པས་འཁྲུལ་གཞི་མེད་པ་དང་། འགའ་ཞིག་ནི་ཚིག་གྲོགས་སམ་བྱ་ཚིག་དང་བཅས་པས་འདི་སྐབས་ཀྱི་དཔེར་རུང་བ། དཔེར་ད། འཁུན། འཆག། འདག། ལྟ་བུ་སྟེ། དེ་དག་ལ་རང་བཞིན་གྱིས་འཁུན་པར་འགྱུར། རང་ཉིད་འཆག་པར་འགྱུར། རང་འདག་པར་འགྱུར། ཞེས་པ་ལྟ་བུར་སྦྱར་ན། བྱེད་པོ་གཞན་མི་མངོན་པ་སོགས་གསལ་བའི་ངག་ཏུ་འགྱུར་བས་སྐབས་འདིའི་དཔེར་རུང་ཞིང་གཞན་དུ་དེ་རྣམས་ཚིག་གྲོགས་མེད་པ་ཉིད་བྱ་ཚིག་སྤྱི་ཙམ་དུ་གྱུར་པས་དཔེར་མི་རུང་བ་དང་། ནད་ཀྱིས་འཁུན་པར་བྱེད། རྐང་བས་འཆག་པར་བྱེད། འདག་ཆལ་གྱིས་འདག་པར་བྱེད། སོགས་སྦྱར་ནའང་མི་རུང་བ་ལྟ་བུ་ཞིབ་མོར་བྱེ་བྲག་ཕྱེ་ནས་རྟོགས་དགོས་ཤིང་འདིར་སོ་སོའི་དཔེར་བརྗོད་རྒྱས་པར་འགོད་པ་ཡི་གེས་འཇིགས་པས་སྤྲོས་པ་སྐྱུང་ངོ་། །
འདིར་གཞུང་གི་ཡིག་ཆ་རྣམས་སུ། མོ་ནི་བདག་དང་མ་འོངས་ཕྱིར། །ཞེས་པ་ཡོད་ཅིང་འགྲེལ་བྱེད་སྔ་མ་རྣམས་ལའང་དོགས་པ་མ་ཤར་མོད། དེ་ནི་འདིར་བསྟན་གྱི་བདག་གཞན་དང་དུས་གསུམ་གྱི་དབྱེ་བ་གཞུང་གི་དགོངས་པ་བཞིན་མ་ཕྱེད་པས་ནོངས་ཏེ། བདག་གི་ཐ་སྙད་ཀྱིས་མ་བསྟན་པའི་ད་ལྟ་བའི་ཚིག་འ་འཕུལ་ཅན་མང་དུ་ཡོད་པ་སྐབས་འདིར་བསྟན་དགོས་པ་མ་ཤེས་པར་འདུག་པའི་ཕྱིར་རོ། །དེས་ན་གཞུང་དེ་ལྟར་བཀླགས་པ་གཞུང་གི་བསྟན་བྱ་མ་རྫོགས་པའི་སྐྱོན་དུ་འགྱུར་བས་ཡིག་ནོར་བརྒྱུད་པར་ཤེས་པར་བྱོས་ལ་དཀྱུས་སུ་བཀོད་པ་བཞིན་གཟུང་བར་བྱའོ། །
ཤིན་ཏུ་མོ་དགོས་པ་ཅི་ཕྱིར་འཇུག་པ་བཤད་པ།
བཞི་པ་སྔོན་འཇུག་གི་ཤིན་ཏུ་མོ་དགོས་པ་གང་གི་ཕྱིར་འཇུག་པ་ནི།
ཤིན་ཏུ་མོ་ནི་མཉམ་ཕྱིར་རོ། །
ཞེས་པས་བསྟན་ཏེ། སྔོན་འཇུག་གི་ཤིན་ཏུ་མོ་མ་ཡིག་ནི་སྔར་བཤད་པའི་བདག་གཞན་དང་དུས་གསུམ་གྱི་བྱེ་བྲག་མེད་པར་ཐམས་ཅད་ལ་མཉམ་པ་སྟེ་མཚུངས་པ་ཉིད་བསྒྲུབ་པའི་ཕྱིར་འཇུག་གོ། དེས་ན་དཔེར་བརྗོད་ཀྱང་བདག་གཞན་དང་དུས་གསུམ་ལ་སོ་སོར་མི་དགོས་པས་ཅི་རིགས་པར་ཕྱོགས་གཅིག་ཏུ་འགོད་ན། མཁས་པར་བྱས། མཁས་པ། མཁས་པར་བྱེད། མཁས་བྱ། མཁས་པར་བྱ། མཁས་པར་གྱུར། མཁས་བཞིན་པ། མཁས་པར་འགྱུར། ལྟ་བུ་ཀུན་ལ་སྦྱར་ཏེ། མཁང་། མཁྲང་། མཁྱེན། མཁྲེགས། མཁོ།
༈ མགར། མགུ། མགྱོགས།
༈ མངའ། མངག།
༈ མངགས། མངོན།
༈ མཆི། མཆིས། མཆེད། མཆོད།
༈ མཇལ།
༈ མཉན། མཉམ། མཉེས། མཉེན། མཉེ།
༈ མཐུན། མཐུད། མཐོ། མཐོལ། མཐོང་།
༈ མདུད།
༈ མཚན། མཚར། མཚུངས། མཚོན།
༈ མཛད། མཛའ། མཛངས། མཛེས། ལ་སོགས་པ་རྣམས་སོ། །དེར་ཡང་མངགས་དང་མཆིས་སོགས་འདས་ཚིག་ལ་ཁྱད་པར་ཡོད་པ་རྣམས་ནི་རྗེས་འཇུག་གི་བྱེད་པ་ཡིན་པས་སྔོན་འཇུག་མ་ཡིག་གི་འཇུག་པ་མི་མཉམ་པར་ཐལ་བའི་སྐྱོན་མེད་དོ། །
རྗེས་འཇུག་གི་རྟགས་ཀྱི་འཇུག་པ་བཤད་པ་ལ་སྤྱིར་རྟགས་གསུམ་དུ་དབྱེ་བ།
༈ གསུམ་པ་རྗེས་འཇུག་གི་རྟགས་ཀྱི་འཇུག་པ་བཤད་པ་ལ་གཉིས། རྟགས་སོ་སོར་ངོས་འཛིན་པ་དང་། དེའི་འཇུག་པ་རྒྱས་པར་འཆད་པའོ། །དང་པོ་ལ་གཞུང་དོན་འཐད་པ་དང་བཅས་ནས་བཤད་པ་དང་། གཞན་གྱི་ནོར་བ་འགོག་པ་གཉིས། དང་པོ་ལ། སྤྱིར་རྟགས་གསུམ་དུ་དབྱེ་བ་དང་། ནང་གསེས་བརྒྱད་དུ་དབྱེ་བ་གཉིས་ཀྱི།
དང་པོ་ནི།
རྗེས་འཇུག་ཡི་གེ་བཅུ་པོ་ལ། །
ཕོ་མོ་མ་ནིང་གསུམ་དུ་དབྱེ། །
ཞེས་པས་བསྟན་ཏེ། རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་པོ་དེ་རྣམས་ལའང་ཕོ་མོ་མ་ནིང་གསུམ་དུ་དབྱེ་བར་བྱའོ། །ཞེས་སོ། །
དེ་ལ་ཕོ་ནི་ག་ད་བ་ས་བཞིའོ། ། མོ་ནི་ང་མ་འ་གསུམ་མོ། ། མ་ནིང་ནི་ན་ར་ལ་གསུམ་མོ། །
དེ་ལྟར་ཡིན་པ་ཅིས་ཤེས་ཤེ་ན་བཤད་པར་བྱ་སྟེ། རྗེས་འཇུག་ལ་ཕོ་མོ་མ་ནིང་གསུམ་དུ་དབྱེ་བ་ནི་རྗེས་འཇུག་དེ་ཉིད་མི་གཞིའི་ཡི་གེ་གང་ལ་ཞུགས་པ་ལས་བརྗོད་པའི་སྒྲ་གདངས་དྲག་ཞན་བར་མར་འགྱུར་བའི་ཆ་ནས་གཞག་དགོས་ཏེ། ཕོ་གསུམ་མོ་གཉིས་མ་ནིང་གསུམ། །དྲག་གཞན་བར་མ་གསུམ་དུ་འཇུག། ཅེས་གཞུང་འདིར་དངོས་སུ་བསྟན་པའི་རྒྱུ་མཚན་གྱིས་སོ། །དེ་ལྟར་བཞག་པའི་ཚེ་མིང་གཞི་གང་གི་མཐར་ཡང་རུང་ག་ད་བ་ས་རྣམས་ཞུགས་པ་སྒྲ་དྲག་པ་དང་། ང་མ་འ་རྣམས་ཞུགས་པ་སྒྲ་ཞན་པ་དང་། ན་ར་ལ་རྣམས་ཞུགས་པ་སྒྲ་བར་མར་འགྱུར་བ་ཞིབ་མོའི་བློས་བརྟགས་ན་མངོན་སུམ་གྱིས་གྲུབ་ཅིང་། དེའང་བརྗོད་པ་ལྡབ་ལྡིབ་མ་ཡིན་པར་ཡི་གེའི་སྐྱེ་གནས་བྱེད་རྩོལ་སོགས་དང་མཐུན་པར་ཟུར་ཕྱིན་པར་བཀླགས་པ་ལས་སོ། །འདིར་ཁ་ཅིག་ཕོ་གསུམ་ཞེས་སོགས་ཀྱི་གཞུང་གི་སྒྲའི་འཇུག་པ་ཙམ་བསྟན་གྱི་རྟགས་གསུམ་དུ་དབྱེ་བའི་རྒྱ་མཚན་ནི་གཙོ་བོར་མིང་མཐའ་འདྲེན་ཚུལ་སོགས་ལས་ངེས་དགོས་སོ། །སྙམ་པ་སྲིད་ཀྱང་གཞུང་དེས་སྒྲ་འཇུག་བསྟན་པ་ཉིད་ཀྱིས་རྟགས་ཀྱི་དབྱེ་བ་བྱེད་པའི་རྒྱུ་མཚན་བསྟན་པར་གྲུབ་སྟེ། རྟགས་ཀྱི་དབྱེ་བ་སྒྲའི་འཇུག་པ་ལ་ལྟོས་ཀྱི་སྒྲ་འཇུག་ཙམ་རྟགས་ལ་ལྟོས་པ་མ་ཡིན་པའི་ཕྱིར་དང་། མིང་མཐའ་འདྲེན་ཚུལ་སོགས་ཀྱང་རྟགས་ཀྱི་རྒྱུ་མཚན་དུ་མི་འགྱུར་ཏེ། དེ་རྣམས་རྗེས་འཇུག་གི་རྟགས་ལ་ལྟོས་པ་ཡོད་ཀྱང་རྗེས་འཇུག་དེ་རྣམས་ལ་མི་ལྟོས་པའི་ཕྱིར་རོ། །
ནང་གསེས་བརྒྱད་དུ་དབྱེ་བ། གཞན་གྱི་ནོར་བ་འགོག་པ།
གཉིས་པ་དེའི་ནང་གསེས་ཀྱི་དབྱེ་བ་ནི།
ཕོ་ལ་སྐྱེས་བུ་རབ་འབྲིང་གསུམ། །
མོ་ལ་མོ་དང་ཤིན་ཏུ་མོ། །
མ་ནིང་འགྱུར་དང་མཚན་གཉིས་དང་། །
མཚན་མེད་དག་དང་གསུམ་དུ་འདོད། །
ཅེས་པས་བསྟན་ཏེ། དེ་ལྟར་རྗེས་འཇུག་ལ་རྟགས་གསུམ་དུ་ཕྱེས་པ་དེ་ལ་སླར་ཡང་ནང་གསེས་ཀྱི་སྒོ་ནས་རྣམ་པ་བརྒྱད་དུ་དབྱེ་སྟེ། ཕོ་ལ་སྐྱེས་བུ་རབ་འབྲིང་ཐ་གསུམ་དང་། མོ་ལ་མོ་ཙམ་དང་ཤིན་ཏུ་མོ་གཉིས་དང་། མ་ནིང་ལ་འགྱུར་བ་མ་ནིང་མཚན་གཉིས་མ་ནིང་མཚན་མེད་མ་ནིང་གསུམ་དུ་དབྱེ་བར་འདོད་དོ། །ཞེས་སོ། །
དེའང་རྗེས་འཇུག་གི་ཕོ་ག་ཡིག་ལ་ཡང་འཇུག་ས་ཡིག་ཞུགས་པ་ནི་རྗེས་འཇུག་ནང་ཕྲད་ཀྱི་སྟོབས་ལས་སྒྲ་དྲག་པའི་དྲག་པར་འགྱུར་བས་སྐྱེས་བུ་རབ་ཡིན་ནོ། །དེ་བཞིན་དུ་རྗེས་འཇུག་བ་ལ་ས་ཡིག་ཞུགས་པ་ནི་སྒྲ་དྲག་པའི་འབྲིང་དུ་འགྱུར་བས་སྐྱེས་བུ་འབྲིང་པོའོ། །ག་བ་གཉིས་ཀྱི་མཐར་ཡང་འཇུག་མ་ཞུགས་པ་དང་ས་དའི་མཐའ་རྣམས་ནི་སྒྲ་དྲག་པའི་ཞན་པར་འགྱུར་བས་སྐྱེས་བུ་ཐ་མའོ། །མོ་ཡིག་ང་མ་གཉིས་ལ་ཡང་འཇུག་ཞུགས་པ་ནི་སྒྲ་ཞན་པའི་དྲག་པར་འགྱུར་བས་མོ་ཙམ་དང་། དེ་གཉིས་ལ་ཡང་འཇུག་མ་ཞུགས་པ་དང་འ་ཡིག་གི་མཐའ་རྣམས་ནི་སྒྲ་ཤིན་ཏུ་ཞན་པར་འགྱུར་བས་ཤིན་ཏུ་མོའོ། །མ་ནིང་གི་ཡི་གེ་ན་ར་ལ་གསུམ་ནི་མིང་གཞིའི་ཕོ་ཡིག་གི་མཐར་ཡང་འཇུག་ཡོད་མེད་གང་རུང་དང་མོ་ཡིག་གི་རྗེས་སུ་ཡང་འཇུག་མེད་པར་ཞུགས་པའི་ཚེ་ནི་སྒྲ་བར་མའི་དྲག་པའམ་ཞན་པར་འགྱུར་བས་འགྱུར་བ་མ་ནིང་དང་། མིང་གཞིའི་མོ་ཡིག་གི་མཐར་ཞུགས་ཤིང་ཡང་འཇུག་ད་དང་བཅས་པར་གྱུར་པའི་ཚེ་ནི་སྒྲ་བར་མ་ལས་དྲག་ཞན་གཉི་གའི་ཆ་དང་ལྡན་པར་འགྱུར་བས་མ་ནིང་མཚན་གཉིས་པ་དང་། མིང་གཞིའི་མ་ནིང་གི་མཐར་ཞུགས་པའི་ཚེ་ཡང་འཇུག་ཡོད་མེད་ཇི་ལྟར་རུང་སྒྲ་བར་མ་ཙམ་ལས་དྲག་ཞན་གང་དུའང་མི་འགྱུར་བའི་ཕྱིར་མཚན་མེད་མ་ནིང་ངོ་། །དེ་ལྟར་སྔོན་ཆད་འགྲེལ་བྱེད་སུས་ཀྱང་མ་བསྟན་པའི་སྤྱི་རྟོལ་འདི་ནི་འཕྱོན་མའི་བུ་བཞིན་དུ་སུ་ཞིག་ཡིད་ཆེས་པར་འགྱུར་སྙམ་ན། སྔར་སྤྱིར་བཏང་རྟགས་ཀྱི་དབྱེ་བའི་རྒྱུ་མཚན་སྨོས་པ་བཞིན་དུ་གཞུང་འདི་ཉིད་ལས། དྲག་པ་གསུམ་ནི་ནང་འཕྲད་དམ། །ཞེས་སོགས་འཆད་འགྱུར་ལྟར་ནང་གསེས་ཀྱི་དབྱེ་བ་འདིའི་རྒྱུ་མཚན་གསལ་བོར་གསུངས་པ་ཉིད་ཁུངས་སུ་བྱས་ནས་བཤད་པ་ཡིན་པས་ཡིད་རྟོན་དུ་ངེས་པར་རུང་བ་ཡིན་གྱི། སྔ་འགྲེལ་རྣམས་ཀྱིས་གཞུང་གི་དངོས་བསྟན་གསལ་བ་རྣམས་རང་རང་གི་ཀྱོག་བཤད་ཀྱིས་བསྒྲིབས་ནས་གར་འགྲོ་གཏོལ་མེད་ཀྱི་མུན་པར་ཞུགས་ཏེ་སྨྲེ་སྔགས་ཀྱི་ཕྲེང་བ་ར་ཐོན་ལུག་ཐོན་དུ་སྤྲོ་བར་བྱེད་པ་རྣམས་ལ་དེ་བས་ཀྱང་སུ་ཞིག་ཡིད་ཆེས་པར་འགྱུར། ལེགས་པར་བསམ་དགོས་སོ། །
གཉིས་པ་གཞན་གྱི་ནོར་བ་འགོག་པ་ནི།
རྗེས་འཇུག་གི་རྟགས་ཀྱི་དབྱེ་བ་བཤད་པའི་སྐབས་འདིར་འགྲེལ་བྱེད་རྣམས་མི་མཐུན་པ་མང་ཡང་བསྒྲུབ་བྱ་དང་སྒྲུབ་བྱེད་ཀྱི་ཚིག་གི་ཕྲེང་བ་ཕལ་ཆེར་མི་འཐད་པའི་ཕྱོགས་ཤས་ཆེ་བར་མཐོང་མོད། འོན་ཀྱང་དེ་རྣམས་སོ་སོར་ངོས་འཛིན་ཅིང་སུན་འབྱིན་པ་ནི་ཡི་གེའི་ལས་སུ་ཆེ་ཞིང་དགོས་པའང་ཆེར་མེད་པས་བཞག་ལ། བློ་གསལ་རྣམས་ཀྱིས་མི་ཤེས་སུ་མི་རུང་བའི་མཚང་འགའ་ཞིག་འཆད་འགྱུར་རྣམས་ལས་ཀྱང་གསལ་བར་འགྱུར་མོད་ཀྱི་འདིར་ཡང་ཕྱོགས་ཙམ་མཚོན་པའི་ཕྱིར་ཅུང་ཟད་དཔྱད་ན། སྤྱིར་གོང་སྨོས་ལྟར་སྐབས་འདིའི་སྤྱི་བྱེ་བྲག་གི་རྟགས་ཀྱི་ངོས་འཛིན་སྒྲའི་འཇུག་ཚུལ་གྱི་སྒོ་ནས་རྟོགས་ནུས་པ་ལ་དེའི་གོ་བ་ངེས་ཅན་མ་ལོངས་པར་རྟགས་འགའ་ཞིག་མིང་མཐའ་དང་རྣམ་དབྱེ་སོགས་འདྲེན་ཚུལ་གྱི་སྒོ་ནས་དང་། འགའ་ཞིག་སྔོན་འཇུག་བཞིན་དུ་འདས་དང་གཞན་སྒྲུབ་སོགས་ཀྱི་དོན་སྟོན་ཚུལ་གྱི་སྒོ་ནས་དང་། འགའ་ཞིག་སྒྲ་འཇུག་དྲག་ཞན་གྱི་སྒོ་ནས་ཀྱང་འབྱེད་པར་རློམ་ཞིང་དེར་ཡང་འབྱེད་ཚུལ་འདྲ་མིན་མང་དུ་བྱུང་ངོ་། །དེ་ལ་སྔ་མ་མིང་མཐའ་སོགས་འདྲེན་ཚུལ་གྱིས་འབྱེད་པ་དེ་ནི་སྐབས་འགར་འགྲིག་ཏུ་རུང་ཡང་ཕལ་ཆེར་ལ་མི་འགྲིག་པ་མང་བས་མི་འཐད་དོ། །དཔེར་ན་མིང་མཐའ་འདྲེན་ཚུལ་གྱིས་འབྱེད་པའི་ཚེ།
གཞུང་སྔ་ཕྱི་གཞན་དང་། ཕོ་ཡིས་ཕོ་ཡི་མིང་མཐའ་དྲང་། །ཞེས་སོགས་ཀྱི་དགོངས་པ་ལེན་ཚུལ་མ་ནོར་བའི་སྒོ་ནས་དཔྱད་པ་ན་། རྟག་པ། བཅད་པ། སྒྲུབ་པ། བྱས་པ། བཟང་བ། བྱ་བ་སོགས་ཕོ་མོའི་རྟགས་ཕལ་ཆེར་ལ་དམིགས་བསལ་ཁ་ཤས་མ་གཏོགས་འགྲིག་ཀྱང་མོ་ཡིག་མ་མཐའ་ཅན་དང་མ་ནིང་གི་མཐའ་ཅན་རྣམས་ལ་འགྲིག་མི་འགྲིག་ཅི་རིགས་སུ་འགྱུར་བ་འཆད་འགྱུར་ལྟར་དང་། ཕོ་མོ་མ་ནིང་གི་ངོས་འཛིན་གཞན་དང་གཞན་བྱེད་པ་རྣམས་ལའང་དེ་བཞིན་དུ་མོས་ཕོའམ་མོས་མ་ནིང་ངམ་མ་ནིང་གིས་མོའི་མིང་མཐའ་དྲངས་པ་སོགས་སུ་འགྱུར་བ་དང་། རྣམ་དབྱེ་དྲུག་སྒྲ་ཕོ་ཡིག་ཅན་དང་མཐུན་པའི་སྒྲུབ་བྱེད་ཀྱིས་ད་བ་ས་གསུམ་ཕོར་སྒྲུབ་པ་སོགས་རྣམ་དབྱེ་འདྲེན་ཚུལ་གྱི་སྒོ་ནས་འབྱེད་པའི་ཚེའང་། རང་རང་གི་རྟགས་ངོས་འཛིན་ཚུལ་དང་མི་འགྲིག་པའི་འགལ་བ་མང་དུ་འབྱུང་སྟེ། ད་བ་ས་གསུམ་ཕོ་དང་། ག་ང་ན་མ་ར་ལ་མོར་འདོད་པ་རྣམས་གསུམ་པ་དང་དྲུག་པའི་སྒྲ་ལ་འགྲིག་ཀྱང་ལ་དོན་རྣམས་ལ་མི་འགྲིག་པ་མང་བ་དང་། འ་མ་ནིང་དུ་འདོད་པ་ནི་གསུམ་ག་ལ་མི་འགྲིག་པ་དང་། ག་ཡིག་ཕོར་འདོད་པ་ལ་དོན་ལ་འགྲིག་ཀྱང་གསུམ་པ་དྲུག་པ་ལ་མི་འགྲིག་པ་དང་། ག་ང་ན་མ་ར་མ་ནིང་དུ་འདོད་པ་ནི་རྣམ་དབྱེ་ཐམས་ཅད་ལ་མི་འགྲིག་པ་སོགས་སྨོས་ཀྱིས་མི་ལང་ཞིང་། འཕྲད་འདྲེན་ཚུལ་གྱིས་འབྱེད་པའི་ཚེའང་། ཅིང་ཅེས་ཞིང་ཞེས་སོགས་ག་ད་བ་ཕོར་འདོད་པ་དང་ང་ན་མ་འ་ར་ལ་མོར་འདོད་པ་རྣམས་ཀྱི་ཕྱོགས་ལ་འགྲིག་ཀྱང་ས་ཕོ་དང་ང་ན་མ་འ་ར་ལ་མོར་འདོད་པ་རྣམས་ཀྱི་ཕྱོགས་ལ་མི་འགྲིག་ཀྱང་ས་ཕོ་དང་ང་ན་མ་འ་ར་ལ་མ་ནིང་དུ་འདོད་པ་རྣམས་ལ་མི་འགྲིག་པ་དང་དེ་བཞིན་དུ་རྒྱན་སྡུད་སླར་བསྡུ་ལྷག་བཅས་སོགས་དང་སྦྱོར་བའི་ཚེའང་འགྲིག་མི་འགྲིག་ཅི་རིགས་སུ་འགྱུར་བ་ཞིབ་མོར་དཔྱད་ནས་ཤེས་པར་བྱའོ། །ཅི་སྒོ་ཐམས་ཅད་ནས་མ་འགྲིག་ཀྱང་གང་འགྲིག་འགྲིག་གི་ཐད་ནས་རྟགས་ངོས་བཟུང་བས་ཅི་སྟེ་སྙམ་ན། ཁྱེད་ཅག་གི་དགོངས་པ་དེ་བཞིན་དུ་ཡིན་པ་ངེད་ཀྱིས་ཀྱང་འཁུམས་མོད་ཀྱི། བསྒྲུབ་བྱ་སྒྲུབ་བྱེད་ངེས་པ་ལ་ལྟོས་པ་རིགས་པ་མཁྱེན་པ་རྣམས་ཀྱི་གཞུང་ལུགས་བཞིན་དུ་མཁན་པོའི་བསྟན་བཅོས་ལ་བཀུར་སྟི་བྱ་བར་འདོད་པ་ལས། སྒྲུབ་བྱེད་མ་ངེས་པས་བསྒྲུབ་བྱ་འདྲ་མིན་མང་པོ་སྤེལ་ཏེ་མཁས་པའི་བསྟན་བཅོས་ཆུད་གསན་པར་མི་བྱེད་དོ། །སྤྱིར་ཡང་རྣམ་དབྱེ་དང་འཕྲད་རྣམས་རྟགས་མཚུངས་ཁོ་ནས་འདྲེན་པར་འདོད་པ་གཞུང་གི་དགོངས་པར་མི་འགྱུར་ཏེ་རྒྱུ་མཚན་སྔར་སུམ་ཅུ་བར་ཡང་བཤད་ལ་གཤམ་དུའང་འཆད་པར་འགྱུར་རོ། །
གཉིས་པ་སྔོན་འཇུག་བཞིན་དུ་དོན་ལ་འཇུག་ཚུལ་གྱིས་འབྱེད་པ་དེའང་མི་ལེགས་ཏེ། ཚུལ་དེས་རྟགས་འབྱེད་པར་མི་ནུས་པའི་ཕྱིར་ཏེ། རྗེས་འཇུག་གི་དོན་གྱི་འཇུག་ཚུལ་ཕྱོགས་གཅིག་ལ། སྔ་མ་སྔོན་འཇུག་ལྔ་བཞིན་སྦྱར། །ཞེས་གསུངས་པའང་རྗེས་འཇུག་རྣམས་སྔོན་འཇུག་ལྟར་གཙོ་བོར་རང་དབང་གིས་འདས་དང་གཞན་སྒྲུབ་སོགས་ཀྱི་དོན་སྟོན་བྱེད་སོ་སོར་ངེས་པ་ཅན་དུ་འཇུག་པར་འཆད་པའི་གཞུང་མ་ཡིན་པ་གཤམ་དུ་བརྗོད་པར་འགྱུར་བ་ལྟར་ཡིན་པས་རྗེས་འཇུག་གིས་བདག་གཞན་དང་དུས་གསུམ་གྱི་དོན་ཐམས་ཅད་རང་དབང་དུ་སྟོན་པའི་ལུང་མེད་ཅིང་རིགས་པས་ཀྱང་མི་འགྲུབ་པའི་ཕྱིར་ཏེ། དཔེར་ན་འདས་དང་གཞན་སྒྲུབ་ལ་འཇུག་པའི་རྒྱུ་མཚན་གྱིས་ཕོ་ཡིག་ཏུ་སྒྲུབ་པར་བྱེད་པ་རྣམས་ཀྱིས་ད་བ་ས་གསུམ་ཕོ་ཡིག་ཏུ་ངོས་འཛིན་པ་ན། ས་ད་གཉིས་ཀྱིས་འདས་པ་རང་དབང་དུ་སྒྲུབ་པ་མང་དུ་ཡོད་ཀྱང་བ་ཡིག་གིས་འདས་པ་སྒྲུབ་པ་མེད་ཅིང་། དེ་གསུམ་གས་བྱ་བ་གཞན་སྒྲུབ་པའང་མེད་པས་བབ་ཅོལ་དུ་སྨྲས་པར་ཟད་པའི་ཕྱིར་རོ། །དེ་ལ་བ་ཡིག་འདས་ཚིག་གི་མཐར་འབྱུང་བ་བཀབ་བཏབ་ལྟ་བུ་དང་། བ་ས་ད་གསུམ་ག་གཞན་བྱ་བ་འཇུག་པ་གཟབ་བྱ། གཙུབ་བྱ། གདགས་བྱ། འདམས་བྱ། གཅད་བྱ། གསད་བྱ་སོགས་འབྱུང་བས་སྐྱོན་མེད་སྙམ་ནའང་མི་འཐད་དེ། དེ་དག་ཐམས་ཅད་སྔོན་འཇུག་གི་ནུས་པས་འདས་པ་དང་དངོས་པོ་གཞན་སྒྲུབ་ལ་འཇུག་པ་ཡིན་གྱི་རྗེས་འཇུག་གི་ནུས་པས་མ་ཡིན་པའི་ཕྱིར་རོ། །རྗེས་འཇུག་གི་ནུས་པས་དེ་ལྟར་བསྒྲུབས་པ་མ་ཡིན་ཀྱང་འདས་ཚིག་དང་གཞན་སྒྲུབ་ལ་དེ་དག་བྱུང་བ་ཉིད་ཀྱིས་དོན་འགྲུབ་བོ་སྙམ་ནའང་མི་འཐད་དེ། དེ་ལྟར་ན། འདོགས། གཅོད། འཚོབ། ལྟ་བུ་བྱེད་པ་བདག་གི་ཚིག་ཅན་གྱི་ད་བ་སའི་མཐའ་དུ་མ་འབྱུང་བ་རྣམས་རྒྱུ་མཚན་དུ་བྱས་ནས་རྗེས་འཇུག་དེ་རྣམས་བདག་སྒྲུབ་ལ་འཇུག་པར་རང་དབང་དུ་སྨྲས་ཀྱང་སྐྱོན་ཅི་ཞིག་ཡོད་དེ་རྒྱུ་མཚན་མཚུངས་པའི་ཕྱིར་རོ། །དེ་བཞིན་དུ་བདག་གཞན་གཉི་ག་དང་ད་ལྟ་བ་བསྒྲུབ་པའི་ཕྱིར་འཇུག་པའི་རྟགས་ཀྱིས་མ་ནིང་དང་། བདག་དང་མ་འོངས་པ་བསྒྲུབ་པའི་ཕྱིར་འཇུག་པའི་རྟགས་ཀྱིས་མོར་སྒྲུབ་པ་དག་ཀྱང་མི་འཐད་དེ། འ་ཡིག་བདག་དང་མ་འོངས་པའི་སྒྲུབ་བྱེད་དུ་འཇུག་པ་ཙམ་མཐོང་གི་གཞན་དེ་དག་དེ་དང་དེའི་སྒྲུབ་བྱེད་དུ་ངེས་པར་འཇུག་པ་མ་མཐོང་ཞིང་དོན་དེ་དག་དང་ལྡན་པའི་ཚིག་གི་མཐར་རྗེས་འཇུག་དེ་དག་བྱུང་བ་ཙམ་གྱིས་ཀྱང་ཞེན་དོན་མི་འགྲུབ་པའི་ཕྱིར་ཏེ། དེ་ལྟ་ན། བཀང་། གང་། བདར། བསྟར། ཤར། བཙལ། ཉལ། བཀྲམ་སོགས་མོའམ་མ་ནིང་དུ་འདོད་པའི་ཡི་གེའི་མཐའ་ཅན་གྱི་འདས་ཚིག་མང་དུ་འབྱུང་བས་ཡི་གེ་དེ་རྣམས་འདས་པ་བསྒྲུབ་པའི་ཕྱིར་འཇུག་པའང་མི་འདོད་བཞིན་དུ་ཁས་ལེན་དགོས་པར་འགྱུར་བའི་ཕྱིར་རོ། །དེ་བཞིན་དུ་ཁ་ཅིག་ནས་གསེས་ཀྱི་རྟགས་ངོས་འཛིན་པར་དོན་ལ་འཇུག་ཚུལ་གྱི་སྒོ་ནས་རྒྱས་བཤད་བྱེད་པ་དག་སྣང་ཡང་། རྟགས་ཀྱིས་བསྒྲུབ་བྱ་བདག་གཞན་དང་དུས་གསུམ་གྱི་དོན་རྣམས་རྟགས་ཉིད་དུ་འཁྲུལ་ནས། ཕོས་ཕོའི་རྟགས་སྟོན་པ་ཕོས་མོའི་རྟགས་སྟོན་པ་ཞེས་སོགས་རང་བཟོའི་གཟུ་ལུམ་གྱིས་བསྟན་བཅོས་ལ་དབང་ཟ་བར་ཟད་དེ། བཤད་པ་དེ་ལ་ལེགས་པར་བརྟགས་པའི་ཚེའཐད་པའི་ཕྱོགས་ཅུང་ཟད་ཀྱང་མི་སྣང་ངོ་། །འོན་ཀྱང་ཐམས་ཅད་དཔྱད་པ་ཡི་གེའི་ལས་སུ་ཆེ་བས་ཕྱོགས་ཙམ་མཚོན་ན་ཕྱོགས་སྔ་དེས་མིང་ལས་གཞན་པ་བྱ་བྱེད་ལས་གསུམ་མི་སྟོན་པ་ལ་ཕོ་མོ་གཉིས་ཀའི་རྟགས་མེད་པའི་སྒྲུབ་བྱེད་ཀྱིས་རང་ཉིད་ཀྱིས་མ་ནིང་དུ་ཁས་བླངས་པའི་རྗེས་འཇུག་རྣམས་མིང་རྐྱང་གི་མཐར་བྱུང་བ་མཚན་མེད་མ་ནིང་དུ་བསྒུབས་མོད། དེ་ལྟ་ན་མིང་རྐྱང་གི་འ་མཐའ་རྣམས་ཤིན་ཏུ་མོར་འདོད་པ་དང་འགལ་ཞིང་། ས་དའི་མཐའ་ཅན་གྱི་མིང་རྐྱང་ཡང་ཡོད་པས་དེ་འདྲའི་ས་དང་ད་རྣམས་མ་ནིང་མཚན་མེད་དུ་ཐལ་བར་འགྱུར་རོ། །ཡང་ན་དེས་མིང་རྐྱང་གི་མཐའི་ས་ད་ལ་རྟགས་ཀྱི་ངོས་འཛིན་ལོགས་སུ་མ་བྱས་པས་དེ་དག་ལ་ཕོ་མཚན་མེད་ཅེས་པ་ལྟ་བུའི་རྣམ་གཞག་གསར་པ་ཞིག་མཛད་པར་བཞེད་ཀྱང་ལུས་པ་ཡིན་འདྲ་སྙམ་མོ། །ཧེ་ཧེ། དེས་མཚོན་ནས་སྐྱོན་གཞན་ཡང་རྟོགས་པར་བྱའོ། །
གསུམ་པ་ཁ་ཅིག་སྒྲ་འཇུག་དྲག་ཞན་གྱི་སྒོ་ནས་རྟགས་འབྱེད་པ་ནི་རིགས་པ་ཡིན་ཡང་། དེ་དག་གིས་སྒྲ་འཇུག་དྲག་ཞན་ཉིད་མ་ཕྱེད་པས་ནོངས་ཏེ། ད་བ་ས་གསུམ་སྤྱིར་སྒྲ་འཇུག་དྲག་པར་ངོས་འཛིན་པ་ཙམ་འགྲིག་ཀྱང་། ག་ཡིག་སྒྲ་འཇུག་དྲག་པར་མངོན་སུམ་དུ་གྲུབ་བཞིན་དུ་མ་ནིང་དུ་བསྐྱལ་བ་དང་། ན་ར་ལ་རྣམས་ལས་ང་འ་མ་རྣམས་ཀྱི་འཇུག་པ་སྒྲ་ཞན་པར་རྟོགས་སླ་བ་ཡིན་ཡང་དེ་དག་གི་དབྱེ་བ་འཁྲུགས་པ་དང་། གཞན་ཡང་ནོར་བ་མང་ཞིང་རྒྱུ་མཚན་དེ་རྣམས་ཀྱིས་དང་། ནས་གསེས་སྟོན་བྱེད་ཀྱི་གཞུང་ལོག་པར་བཀྲལ་བའི་དབང་གིས་ནང་གསེས་ཀྱི་སྒྲ་འཇུག་རྣམས་ལའང་འཁྲུལ་བའི་ཕྱིར་རོ། །
རྗེས་འཇུག་གི་རྟགས་ཀྱི་འཇུག་པ་རྒྱས་པར་བཤད་པ་ལ་མདོར་བསྟན་པ།
གཉིས་པ་རྟགས་དེ་རྣམས་ཀྱི་འཇུག་པ་རྒྱས་པར་འཆད་པ་ལ་མདོར་བསྟན་པ་དང་རྒྱས་པར་བཤད་པ་གཉིས།
དང་པོ་ནི།
དེ་ཡང་བྱེད་པ་བཞི་བྱེད་དེ། །
གང་ལ་འཇུག་བྱེད་གང་གིས་བྱེད། །
ཇི་ལྟར་འཇུག་བྱེད་ཅི་ཕྱིར་བྱེད། །
ཅེས་པས་བསྟན། དེའང་རྗེས་འཇུག་ཕོ་མོ་མ་ནིང་གསུམ་རེ་རེ་ལའང་བྱེད་པ་བཞི་བཞིའི་སྒོ་ནས་འཇུག་ཚུལ་ཤེས་པར་བྱ་སྟེ། འཇུག་ཡུལ་ཡི་གེ་གང་ལ་འཇུག་པར་བྱེད་པ་དང་། འཇུག་པ་པོ་གང་གིས་འཇུག་པར་བྱེད་པ་དང་། ཚུལ་ཇི་ལྟར་འཇུག་པར་བྱེད་པ་དང་། དགོས་ཅིའི་ཕྱིར་འཇུག་པར་བྱེད་པ་རྣམས་ཀྱིས་སོ། །
རྒྱས་པར་བཤད་པ་ལ་གང་ལ་འཇུག་པ་བཤད་པ།
གང་ལ་ཡི་གེ་ཐམས་ཅད་ལ། །
ཞེས་པས་བསྟན་ཏེ། རྗེས་འཇུག་གི་ཡི་གེ་བཅུ་པོ་དེ་དག་འཇུག་ཡུལ་ཡི་གེ་གང་དང་གང་ལ་འཇུག་ན་མིང་གཞིའི་ཡི་གེ་ཐམས་ཅད་ལ་བྱེ་བྲག་མེད་པར་འཇུག་གོ། ཞེས་སོ། ། དཔེར་ན། བཀག། བཀང་། བཀད། བཀན། བཀབ། བཀུམ། བཀའ། བཀར། བཀལ། བཀས་ལྟ་བུ་ཀ་ཡིག་གི་མཐར་རྗེས་འཇུག་ཐམས་ཅད་འཇུག་པ་སོགས་ཀུན་ལ་བསྒྲེ་བར་བྱའོ། །
སྐབས་འདིར་རྗེས་འཇུག་གི་འཇུག་ཡུལ་གྱི་ཡི་གེ་ཡིན་ན་འདིར་བསྟན་མིང་གཞིའི་ཡི་གེ་ཡིན་པས་ཁྱབ་བམ་ཞེ་ན་མ་ཁྱབ་སྟེ། ས་ཡིག་རྗེས་འཇུག་ག་ང་བ་མ་རྣམས་ཀྱི་མཐར་ཡང་འཇུག་ཅིང་། ད་ཡིག་ན་ར་ལ་རྣམས་ལ་འཇུག་པའི་ཕྱིར་རོ། །
གང་གིས་འཇུག་པ་བཤད་པ།
གཉིས་པ་གང་གིས་འཇུག་པ་ནི།
གང་གིས་བཅུ་པོ་དེ་དག་གིས། །
ཞེས་པས་བསྟན་ཏེ། ཡི་གེ་ཐམས་ཅད་ཀྱི་རྗེས་སུ་འཇུག་པ་པོ་ཡི་གེ་གང་དང་གང་ཞིག་གིས་འཇུག་པར་བྱེད་ཅེ་ན་སྔར་བཤད་པའི་རྗེས་འཇུག་ཡི་གེ་བཅུ་པོ་དེ་དག་གིས་འཇུག་གོ། ཞེས་སོ། །
འདིར་འགྲེལ་བྱེད་ཁ་ཅིག་གིས་གཞན་གྱིས་ནི་མ་ཡིན་པར་རྗེས་འཇུག་ཉིད་ཁོ་ནས་དུས་གསུམ་དང་བླང་དོར་གྱི་གནད་ཐམས་ཅད་སྟོན་བྱེད་དུ་འཇུག་གོ། ཞེས་ཟེར་ཡང་བབ་ཅོལ་དུ་སྨྲས་པར་ཟད་དེ། སྔོན་འཇུག་སོགས་གཞན་གང་ལའང་མ་ལྟོས་པར་རྗེས་འཇུག་ཁོ་ནས་རང་དབང་གིས་ཁྱེད་འདོད་པའི་རྗེས་འཇུག་རང་རང་གི་བསྟན་བྱ་ཐམས་ཅད་སྟོན་པའི་ཕྱིར་འཇུག་པ་མེད་པའི་ཕྱིར་ཏེ། གོང་དུ་སྨོས་པ་བཞིན་སྔོན་འཇུག་ལ་མ་ལྟོས་པར་ས་ད་གཉིས་ཀྱི་འཇུག་པས་འདས་པ་དང་སྐུལ་ཚིག་སྟོན་པ་དང་། འ་ཡིག་གིས་མ་འོངས་པའི་ཁྱད་པར་འགའ་ཞིག་སྟོན་པ་ཙམ་མཐོང་ཡང་དེ་རྣམས་མིང་གཞི་ལ་མི་ལྟོས་པ་ནི་མི་སྲིད་པས་རང་སྟོབས་དང་གཞན་དབང་གཉིས་ཀས་ཡིན་ལ་དེ་རྣམས་ཀྱིས་དེ་དག་ལས་གཞན་པ་མི་སྟོན་ཅིང་རྗེས་འཇུག་ལྷག་མ་རྣམས་ཀྱིས་ནི་རང་སྟོབས་གཙོ་བོར་གྱུར་པས་གང་ཡང་བསྟན་པ་མ་མཐོང་བའི་ཕྱིར་རོ། །
ཇི་ལྟར་འཇུག་པ་འཆད་པ་ལ་མདོར་བསྟན་པ།
གསུམ་པ་ཇི་ལྟར་འཇུག་པ་འཆད་པ་ལ་མདོར་བསྟན་པ་དང་རྒྱས་བཤད་གཉིས།
དང་པོ་ནི།
ཇི་ལྟར་རྣམ་པ་གཉིས་ཡིན་ཏེ། །
སྒྲ་ཡི་འཇུག་ཚུལ་དོན་གྱི་ཚུལ། །
ཞེས་པས་བསྟན་ཏེ་རྗེས་འཇུག་རྣམས་ཚུལ་ཇི་ལྟར་འཇུག་པའང་རྣམ་པ་གཉིས་ཀྱི་སྒོ་ནས་ཤེས་པར་བྱ་སྟེ། རྗེས་འཇུག་ཞུགས་ཚུལ་གྱིས་སྒྲ་དྲག་ཞན་དུ་འགྱུར་བ་སྒྲའི་འཇུག་ཚུལ་དང་། དེ་ལྟར་ཞུགས་པས་དོན་ཅི་ཞིག་སྟོན་པ་དོན་གྱི་འཇུག་ཚུལ་ལོ། །ཞེས་སོ། །འདིར་ཡང་ཁ་ཅིག་རྗོད་བྱེད་སྒྲ་དང་བརྗོད་བྱ་དོན་ཞེས་གསལ་བཏོད་པ་ཡོད་མོད། སྒྲའི་འཇུག་པ་རྣམས་རྗོད་བྱེད་ཡིན་དུ་ཆུག་ཀྱང་། སྐབས་འདིའི་དོན་གྱི་འཇུག་ཚུལ་གྱི་དོན་ཡིན་ན་བརྗོད་བྱ་ཡིན་པས་མ་ཁྱབ་སྟེ། རྟགས་མཚུངས་དང་སྒྲ་མཐུན་འདྲེན་ཚུལ་གྱི་སྐབས་སུ་དོན་འདྲེན་བྱ་དང་འདྲེན་བྱེད་ཡི་གེ་མཐུན་མི་མཐུན་སྟོན་པ་ཡིན་པས་དེ་སྐབས་ཀྱི་དོན་གྱི་འཇུག་པ་དེ་སྒྲའམ་ཡི་གེའི་འཇུག་པ་ཡིན་གྱི། མིང་ཚིག་དེ་དག་གིས་དོན་གང་ཞིག་བརྗོད་པར་འགྱུར་བའི་བརྗོད་བྱ་མ་ཡིན་པའི་ཕྱིར་རོ། །
རྒྱས་བཤད་ལ་སྒྲ་དྲག་ཞན་སྤྱིར་འཇུག་ཚུལ་བཤད་པ།
གཉིས་པ་རྒྱས་བཤད་ལ་སྒྲའི་འཇུག་ཚུལ་དང་དོན་གྱི་འཇུག་ཚུལ་གཉིས། དང་པོ་ལ་དྲག་ཞན་སྤྱིར་འཇུག་ཚུལ། ནང་གསེས་ཞིབ་ཏུ་འཇུག་ཚུལ། ཐུན་མོང་དུ་དེ་དག་གི་དཔེར་བརྗོད་བསྟན་པའོ། །
དང་པོ་ནི།
ཕོ་གསུམ་མོ་གཉིས་མ་ནིང་གསུམ། །
དྲག་ཞན་བར་མ་གསུམ་དུ་འཇུག།
ཅེས་པ་སྟེ། རྗེས་འཇུག་གི་ཡི་གེ་བཅུ་ལས་ཕོ་སྐྱེས་བུ་རབ་འབྲིང་ཐ་གསུམ་དང་། མོ་མོ་ཙམ་དང་ཤིན་ཏུ་མོ་གཉིས། མ་ནིང་འགྱུར་དང་མཚན་གཉིས་མཚན་མེད་གསུམ་སྟེ་འཇུག་ཚུལ་གྱི་སྒོ་ནས་དབྱེ་བ་དེ་རྣམས་རིམ་པ་བཞིན་དུ་ཕོ་གསུམ་མིང་གཞིའི་ཡི་གེ་གང་ལ་ཞུགས་ཀྱང་བརྗོད་པའི་སྒྲ་གདངས་དྲག་པར་འགྱུར་བས་དྲག་པར་འཇུག་པ་དང་། དེ་བཞིན་དུ་མོ་གཉིས་ཞན་པར་འཇུག་པ་དང་། མ་ནིང་གསུམ་བར་མ་སྟེ་རན་པར་འཇུག་པ་ཡིན་ནོ། །ཞེས་སོ། །དེ་ལྟར་དྲག་ཞན་བར་མ་གསུམ་དུ་འཇུག་པའི་རྒྱུ་མཚན་དེས། སྤྱིར་བཏང་རྗེས་འཇུག་ལ་ཕོ་མོ་མ་ནིང་གསུམ་དུ་རྣམ་པར་བཞག་པའང་ཡིན་ནོ་ཞེས་ཞར་ལས་བསྟན་པར་གྲུབ་བོ། །
ནང་གསེས་ཞིབ་ཏུ་འཇུག་ཚུལ་མདོར་བསྟན་པ། གཞུང་དོན་ཇི་ལྟར་བཤད་པ། དེའི་འཐད་པ་སྒྲུབ་པ། ཐུན་མོང་དུ་དེ་དག་གི་དཔེར་བརྗོད་བསྟན་པ།
གཉིས་པ་ནང་གསེས་ཀྱི་འཇུག་ཚུལ་ནི།
དྲག་པ་གསུམ་ཉིད་ནང་ཕྲད་དམ། །
གལ་ཏེ་ཞན་པ་ནང་ཕྲད་ན། །
དེ་ལའང་ནང་གི་ཆ་ཤས་ཀྱིས། །
དེ་ཡང་དྲག་ཞན་གཉིས་སུ་དབྱེ། །
མ་ནིང་གསུམ་དུ་གང་གཏོགས་པ། །
དྲག་དང་ཕྲད་ན་དྲག་པར་འགྱུར། །
ཞན་དང་ཕྲད་ན་ཞན་པར་འགྱུར། །
གཉིས་ཀ་དག་དང་ཕྲད་གྱུར་ན། །
དེ་ནི་གཉིས་ཀ་ཅན་དུ་འགྱུར། །
གཉིས་ཀ་དག་དང་མ་ཕྲད་ན། །
གང་དུ་ཡང་ནི་མི་འགྱུར་རོ། །
དེས་ན་འགྱུར་དང་མཚན་གཉིས་དང་། །
མཚན་མེད་དག་དང་གསུམ་དུ་འདོད། །
དེ་ནི་སྒྲ་ཡི་འཇུག་ཚུལ་ལོ། །
ཞེས་ཤླཽ་ཀ་གསུམ་དང་རྐང་བ་གཉིས་ཀྱིས་བསྟན་ཏེ། དེ་ལ་གཉིས། གཞུང་དོན་ཇི་ལྟར་བཤད་པ་དང་། དེའི་འཐད་པ་སྒྲུབ་པའོ། །
དང་པོ་ནི།
རྟགས་ངོས་འཛིན་གོང་དུ་སོང་བ་ལྟར་རྗེས་འཇུག་ལ་ནང་གསེས་ཀྱིས་རྟགས་བརྒྱད་དུ་དབྱེ་བ་ནི་སྒྲའི་འཇུག་ཚུལ་གྱི་དབང་གིས་ཡིན་པས་དེ་རྣམས་ལ་སྒྲའི་འཇུག་ཚུལ་ཐ་དད་པ་བརྒྱད་དུ་ཇི་ལྟར་དབྱེ་ཞེ་ན། དྲག་པ་གསུམ་སྟེ་ཕོ་ཡིག་སྐྱེས་བུ་རབ་འབྲིང་ཐ་གསུམ་ནི་རྗེས་འཇུག་ཉིད་ནང་འཕྲད་དུ་གྱུར་པ་ལ་ལྟོས་ནས་དབྱེ་སྟེ། མིང་གཞི་གང་གི་མཐར་ཡང་རུང་རྗེས་འཇུག་གི་ཕོ་ཡིག་རྣམས་ཡང་འཇུག་དང་བཅས་ཞུགས་པས་སྒྲ་དྲག་པ་གཞིར་བཞག་པའི་ནང་གསེས་དྲག་འབྲིང་གང་རུང་དུ་འགྱུར་བའི་ཆ་ནས་སྐྱེས་བུ་རབ་འབྲིང་གཉིས་སུ་འབྱེད་ཅིང་། ཡང་འཇུག་མེད་པ་ཞུགས་པས་སྒྲ་དྲག་པའི་ཞན་པར་འགྱུར་བའི་ཆ་ནས་སྐྱེས་བུ་ཐ་མར་འབྱེད་པའི་ཕྱིར། འདིར་དམ་ཞེས་པ་སྡུད་པའི་ཚིག་འཕྲད་དེ་གཤམ་དུ་དབྱེ་ཞེས་གསུངས་པ་དང་སྦྲེལ་བའི་སླད་དུའོ། །དེ་བཞིན་དུ་གལ་ཏེ་ཞན་པ་སྟེ་མོ་ཡིག་རྣམས་རྗེས་འཇུག་ནང་འཕྲད་ཀྱིས་མིང་གཞིར་ཞུགས་པ་ཡོད་ན་དེར་ལྟོས་པས། དེ་དག་ལ་ནང་གི་ཆ་ཤས་སྒྲ་འཇུག་དྲག་ཞན་གྱི་དབང་གིས་སྤྱིར་ཞན་པ་དེ་ལའང་ནང་གསེས་དྲག་ཞན་གཉིས་སུ་དབྱེ་སྟེ། ཡང་འཇུག་དང་བཅས་པའི་མོ་ཡིག་ཞུགས་པ་མོ་ཙམ་དང་། ཡང་འཇུག་མེད་ན་ཤིན་ཏུ་མོར་འབྱེད་པའི་ཕྱིར། དེ་བཞིན་དུ་འགྱུར་བ་སོགས་མ་ནིང་གསུམ་དུ་གང་ཞིག་གཏོགས་པར་གྱུར་པའི་རྗེས་འཇུག་གི་ཡི་གེ་དེ་རྣམས་ནི་མིང་གཞིར་འཇུག་ཚུལ་དང་རྗེས་འཇུག་ནང་འཕྲད་གཉིས་ཀ་ལ་ལྟོས་ནས་དབྱེ་སྟེ། དེ་རྣམས་མིང་གཞིའི་ཡི་གེ་དྲག་པ་དང་འཕྲད་ན་ཡང་འཇུག་ཡོད་མེད་ཇི་ལྟར་རུང་སྒྲ་དྲག་པར་འགྱུར་ཞིང་། ཞན་པ་དང་འཕྲད་ན་ཡང་འཇུག་མེད་པའི་ཚེ་ཞན་པར་འགྱུར་བ་དང་། མིང་གཞི་ཞན་ཅིང་ཡང་འཇུག་དྲག་པའི་བར་དུ་ཆུད་པས་དྲག་ཞན་གཉི་ག་དང་ཕྲད་པར་གྱུར་ན། མ་ནིང་དེ་རྣམས་སྒྲ་དྲག་ཞན་གཉིས་ཀ་ཅན་དུ་འགྱུར་བ་དང་། མིང་གཞི་དྲག་ཞན་གཉིས་ཀ་དང་མ་ཕྲད་པ་སྟེ་བར་མ་མ་ནིང་གི་ཡི་གེ་རྣམས་ལ་ཞུགས་པའི་ཚེ་ཡང་འཇུག་ཡོད་མེད་ཇི་ལྟར་རུང་སྒྲ་དྲག་ཞན་གང་དུའང་མི་འགྱུར་བར་བར་མ་ཉིད་དུ་གནས་པ་སྟེ། དེ་ལྟར་གསུམ་དུ་འགྱུར་བའི་རྒྱུ་མཚན་གྱིས་རིམ་པ་བཞིན་དུ། འགྱུར་བ་མ་ནིང་། མཚན་གཉིས་མ་ནིང་། མཚན་མེད་མ་ནིང་གསུམ་དུ་འབྱེད་པར་འདོད་པའི་ཕྱིར་རོ། །ཞེས་སོ། །
གཉིས་པ་ནི།
སྔོན་གྱི་འགྲེལ་བྱེད་ཕལ་མོ་ཆེས། སྐབས་འདིར་དྲག་པ་གསུམ་ནང་ཕྲད་པ་ནི། སྔོན་འཇུག་མིང་གཞི་རྗེས་འཇུག་གསུམ་གྱི་ཕོ་ཡིག་འདུས་པ་དང་། ཞན་པ་ནང་འཕྲད་ཀྱང་དེ་གསུམ་གྱི་མོ་ཡིག་འདུས་པ་ལ་འདོད་མོད། དེ་ནི་ངེས་པར་ཁས་བླང་དུ་རུང་བ་མ་ཡིན་ཏེ། དེ་འཆད་པའི་སྐབས་མ་ཡིན་པ་དང་། བཤད་པ་མི་འཐད་པ་དང་། སྐབས་དོན་ཆད་པའི་སྐྱོན་གསུམ་ཡོད་པའི་ཕྱིར་རོ། །དེ་ལ་སྐོན་དང་པོ་ཡོད་དེ། འདི་སྐབས་སྤྱིར་རྗེས་འཇུག་གི་འཇུག་པ་འཆད་པའི་སྐབས་དང་། ཁྱད་པར་སྒྲའི་འཇུག་པ་འཆད་པའི་སྐབས་དང་། དེ་ལས་ཀྱང་ནང་གསེས་འཆད་པའི་སྐབས་ཡིན་པས་འདིར་བླ་རྡོལ་དུ་སྔོན་རྗེས་མིང་གསུམ་གའི་ཐུན་མོང་གི་སྒྲ་འཇུག་འཆད་པ་མི་འབྲེལ་བའི་ཕྱིར་རོ། །སྐྱོན་གཉིས་པའང་ཡོད་དེ། ཁྱད་དག་གི་འགྲེལ་ཚུལ་གྱི་དབང་དུ་བྱས་ནས་གཞུང་དོན་ལ་བརྟགས་པའི་ཚེ། དྲག་པ་གསུམ་དང་ཞན་པ་གསུམ་ནང་ཕྲད་པ་གཞིར་བཞག་ནས་དེ་དག་ལ་ནང་གསེས་དྲག་ཞན་གཉིས་སུ་དབྱེ་བ་ཙམ་ཞིག་ལས་མ་བསྟན་པས། དངོས་བསྟན་དེ་ལྟར་དུ་འདོད་ན་ནི་སྔོན་རྗེས་མིང་གསུམ་འདུས་པའི་སྒྲ་འཇུག་སྤྱིར་བསྟན་པའང་སྐབས་འདིར་དགོས་པ་མེད་ན། ཉི་ཚེ་བ་དེ་དག་བསྟན་པ་ལྷག་པར་ཡང་དགོས་མེད་དུ་འགྱུར་བའི་ཕྱིར་དང་། སྔོན་རྗེས་མིང་གསུམ་དྲག་ཞན་བར་མ་སྣ་ཚོགས་འཕྲད་པའི་དབང་དུ་བྱས་ནས། དྲག་པའི་དྲག་ཞན་འབྲིང་གསུམ་སོགས་དབྱེ་བ་མང་པོ་བྱེད་པ་ནི་རང་བཟོ་ཉིད་དུ་ཟད་པས་རང་འདོད་ཀྱི་གཞུང་དོན་འགྲེལ་ཚུལ་དང་ཡང་འགལ་བའི་ཕྱིར་ཏེ། དྲག་གཞན་བར་མ་སྣ་ཚོགས་འདུས་པ་དབྱེ་གཞིར་བཟུང་བས་ནང་ཕྲད་ཅེས་པའི་ཚིག་གི་ནུས་པ་དང་འགལ་ཞིང་། རྣམ་པ་མང་པོར་ཕྱེས་པས་གཉིས་སུ་དབྱེ་ཞེས་པ་དང་འགལ་བའི་ཕྱིར་རོ། །སྐྱོན་མེད་དེ་སྔ་མ་ཤུགས་བསྟན་གྱི་དབང་དུ་བྱས་ཤིང་། ཕྱི་མ་སྔོན་རྗེས་དྲག་ལ་མིང་གཞི་ཞན་པ་སོགས་མང་པོར་ཕྱེ་ནའང་དྲག་ཞན་སོ་སོར་དྲག་ཞན་གཉིས་གཉིས་སུ་ཕྱེ་བས་བསྡུས་པའི་ཕྱིར། སྙམ་ནའང་རིམ་པ་བཞིན་མི་འཐད་དེ་གཞུང་དུ་ནང་ཕྲད་ཅེས་ངེས་གཟུང་མཛད་པ་ལ་ནང་མི་མཐུན་ཤུགས་བསྟན་དུ་འབྱུང་བ་འགལ་བའི་ཕྱིར་དང་། སྔོན་རྗེས་མིང་གསུམ་སོ་སོར་ཕོ་མོ་མ་ནིང་གསུམ་གསུམ་དུ་རྒྱུ་མཚན་དང་བཅས་ནས་གསུངས་པ་ལས་བརྒལ་ནས་དེ་དག་གི་མོ་དང་མ་ནིང་དག་སྒྲ་ཞན་པར་ཕྱོགས་གཅིག་ཏུ་བསྡུས་ནས་དྲག་ཞན་གཉིས་གཉིས་སུ་དབྱེ་བ་དེ་སྐབས་འདིར་མ་འགྲིག་པས་རང་བཟོ་མི་བྱད་ཀ་མེད་དུ་གྱུར་པ་ལས་རྒྱུ་མཚན་གང་ཡང་མེད་པའི་ཕྱིར་རོ། ། སྐྱོན་གསུམ་པའང་ཡོད་དེ། གཞུང་འདིའི་གོང་དུ་རྗེས་འཇུག་གི་རྟགས་གསུམ་སྤྱིར་དབྱེ་བའི་སྒྲ་འཇུག་བཤད་ཅིང་། མཇུག་ཏུ་ནང་གསེས་མ་ནིང་ལ་གསུམ་དུ་དབྱེ་བའི་སྒྲ་འཇུག་གསུངས་པའི་བར་དུ། ཕོ་མོ་གཉིས་ཀྱི་ནང་གསེས་ཀྱི་སྒྲ་འཇུག་ངེས་པར་སྟོན་རིགས་པ་ལ་དེ་མ་བཤད་པའི་ཕྱིར་རོ། །སྐྱོན་མེད་དེ་ཕོ་གསུམ་མོ་གཉིས་ཀྱི་ཡི་གེ་དེ་རྣམས་ཉིད་སྔོན་འཇུག་དང་མིང་གཞི་ལ་སྦྱོར་བས་སྒྲ་གདངས་འབྱུང་ཚུལ་ཉིད་འཆད་པའི་ཕྱིར་རོ། །སྙམ་ནའང་མི་འཐད་དེ་གཉིས་སུ་དབྱེ་ཞེས་ངེས་གཟུང་མཛད་པ་ལས་བརྒལ་བའི་སྐྱོན་དང་ཐུན་མོང་གི་འཇུག་པ་བསྟན་པའི་སྐྱོན་གཉིས་སེལ་བར་མི་ནུས་པའི་ཕྱིར་རོ། །དེ་ལྟར་གཞན་གྱི་འདོད་པ་ལ་དཔྱད་པས་རང་ལུགས་འཐད་པར་གྲུབ་སྟེ་སྐབས་དོན་ཡིན་པ་དང་། བཤད་པ་གཞུང་དོན་དང་མཐུན་པ་དང་། གཞུང་གི་བསྟན་བྱ་རྫོགས་པར་གྲུབ་པའི་ཕྱིར་རོ། །
གསུམ་པ་ཐུན་མོང་དུ་དེ་དག་གི་དཔེར་བརྗོད་བསྟན་པ་ནི།
རྟགས་གསུམ་སྤྱིར་འཇུག་ཚུལ་གྱི་དཔེར་བརྗོད་ཞར་ལ་རྟོགས་པའི་དབང་དུ་བྱས་ནས་འདིར་ནང་གསེས་བརྒྱད་ཀྱི་འཇུག་ཚུལ་གྱི་དཔེར་བརྗོད་ཕྱོགས་ཙམ་འགོད་པ་ལ།
༈ སྐྱེས་བུ་རབ་ནི། སྐྱོགས། དཀྲིགས། དཀྲོགས། དཀྲུགས། བཀླགས། བཀྱིགས། འཁྱགས། འཁྲུགས། གྲགས། གྲོགས། སྒྲོགས། བསྒྲགས། འགགས། ངོགས། བསྔགས། ལྕགས། བཅགས། འཆགས། འཇགས། འཇིགས། གཉགས། སྙོགས། བསྙེགས། སྙིགས། རྟགས། རྟོགས། བརྟགས། གཏོགས། གཏུགས། བཏགས། སྟེགས། ཐོགས། ཐེགས། ཐུགས། དོགས། འདོགས། འདེགས། གདགས། ནགས། བརྣོགས། པགས། ལྤགས། སྤགས། སྤྱུགས། ཕྱགས། འཕྱུགས། བགས། བོགས། བླུགས། བླགས། དབུགས། སྦགས། བྲེགས། དབགས། སྦྲགས། མྱགས། དམིགས། དམྱུགས། རྨུགས། གཙིགས། བཙུགས། བཙགས། བརྩིགས། བརྩེགས། ཚོགས། ཚགས། ཚེགས། འཛུགས། རྫོགས། ཞབས། ཞུགས། གཞོགས། བཞུགས། གཟུགས། གཟིགས། གཟགས། བཟླུགས། གཡོགས། གཡིགས། རིགས། རླུགས། ལེགས། ལགས། ཤགས། གཤེགས། གཤགས། བཤགས། སོགས། བསྲེགས། ཧྭགས། ཞེས་སོ།
༈ སྐྱེས་བུ་འབྲིང་ནི། སྐབས། ཀླུབས། བཀྲབས། སྐྱབས། བསྐྱབས། སྐོབས། འཁོབས། བསྒྲུབས། སྒྲུབས། བརྔུབས། བཅབས། བཅིབས། ཆབས། ཆིབས། འཇབས། འཇེབས། བསྙབས། སྙོབས། སྟབས། སྟོབས། གཏིབས། བསྟབས། ཐབས། འཐིབས། དྲུབས། ལྡེབས། བསྡེབས། སྣབས། བསྣུབས། སྣུབས། མནབས། སྤབས། ཕེབས། བྱབས། བྲབས། བྲུབས། སྦུབས། གཙུབས། རྩིབས། རྩབས། ཚབས། འཚབས། ཞབས། གཞིབས། གཞབས། གཟབས། གཡབས། རབས། བརླབས། རློབས། ཤུབས། གཤིབས། སྲུབས། བསླབས། བསབས། ལ་སོགས་པ་རྣམས་སོ།
༈ སྐྱེས་བུ་ཐ་མ་ནི། སྐས། སྐད། བཀག། བཀབ། མཁས། འཁྲིད། ཁྲག། ཁྲབ། འགས། བགྲད། སྒྲོག། གྲུབ། སྔས། ངག། རྔབ། ལ་སོགས་པའོ།
༈ མོ་ཙམ་ནི། བསྐངས། བསྐུམས། ཁེངས། ཁམས། གངས། བགོམས། དངངས། བརྔསམ། ལ་སོགས་པའོ།
༈ ཤིན་ཏུ་མོ་ནི། བསྐང་། ཀོང་། སྐོམ། བཀའ། ཁོང་། ཁམ། མཁའ། གང་། སྒྲོམ། འགའ། ངང་། དངོམ། སྔའ་ལ་སོགས་པའོ།
༈ འགྱུར་བ་མ་ནིང་ནི། བསྟནད། རྐུན། བསྐོརད། བསྟར། སྩལད། བཙལ། འགྲན། འགོར། འགུལ། ལ་སོགས་པའོ།
༈ མཚན་གཉིས་པ་ནི། འཛིནད། བརྒྱནད། གྱུརད། འབྱོརད། རོལད། བསལད་ལ་སོགས་པའོ།
༈ མཚན་མེད་ནི། ཕྱིནད། མཐུན། ཐརད། འཐོར། འཕྲུལད། འཁྲུལ་ལ་སོགས་པ་རྣམས་ཏེ་དེ་དག་གིས་མཚོན་ནས་རྒྱ་ཆེར་ཤེས་པར་བྱའོ།
དོན་གྱི་འཇུག་ཚུལ་མདོར་བསྟན་པ།
གཉིས་པ་དོན་གྱི་འཇུག་ཚུལ་ལ། མདོར་བསྟན་དང་རྒྱས་བཤད་གཉིས།
དང་པོ་ནི།
དོན་ནི་རྣམ་པ་གཉིས་ཡིན་ཏེ། །
སྔ་མ་གང་ལྟར་གྱུར་པ་དང་། །
ཕྱི་མ་གང་ལྟར་འགྱུར་བ་འོ། །
ཞེས་པས་བསྟན་ཏེ། རྗེས་འཇུག་རྣམས་དོན་གང་དང་གང་ལ་འཇུག་པར་འགྱུར་བའི་ཚུལ་ནི་རྣམ་པ་གཉིས་ཡིན་ཏེ། སྔ་མ་རྗེས་འཇུག་ཉིད་གང་ལ་ཞུགས་ཤིང་གནས་པའི་མིང་དེའི་དོན་གང་ལྟར་ཏེ་ཇི་ལྟ་བུ་ཞིག་ཏུ་འགྱུར་བ་དང་། ཕྱི་མ་རྗེས་འཇུག་གམ་མཐའ་དེས་མིང་མཐའ་ལ་སོགས་པ་འདྲེན་ཚུལ་གྱིས་དོན་གང་ལྟར་འགྱུར་བའོ། །ཞེས་སོ། །
སྔ་མ་གང་ལྟར་འགྱུར་བ་འཆད་པ་ལ་གཞུང་དོན་དཔེར་བརྗོད་བཅས། གཞན་གྱི་འདོད་པ་ནོར་བར་བསྟན་པ།
གཉིས་པ་དེ་རྒྱས་པར་འཆད་པ་ལ་གཉིས་ལས། དང་པོ་སྔ་མ་གང་ལྟར་འགྱུར་བ་འཆད་པ་ལ། གཞུང་དོན་དཔེར་བརྗོད་དང་བཅས་དགོད་པ་དང་། གཞན་གྱི་འདོད་པ་ནོར་བར་བསྟན་པ་གཉིས་སོ།།
དང་པོ་ནི།
སྔ་མ་སྔོན་འཇུག་ལྔ་བཞིན་སྦྱར། །
ཞེས་པས་བསྟན་ཏེ། རྗེས་འཇུག་རྣམས་གང་ལ་ཞུགས་པའི་མིང་དེ་ཉིད་མིང་མཐའ་སོགས་ལ་ལྟོས་ནས་སྔ་མར་གྲུབ་པས་དེས་བདག་གཞན་སོགས་དོན་ཅི་ཞིག་སྟོན་པ་ནི་མིང་དེའི་སྔོན་དུ་གནས་པ་སྔོན་འཇུག་ལྔ་ལས་གང་ཞིག་ཡིན་པ་དེའི་དོན་དང་ཇི་ལྟ་བ་བཞིན་དུ་སྦྱར་ནས་རྟོགས་པར་བྱའོ། །ཞེས་པའོ། །དེས་ན་གཙོ་བོར་སྔོན་འཇུག་གི་ནུས་པ་དང་སྦྱར་ནས་རྗེས་འཇུག་རྣམས་ཀྱིས་ཀྱང་ཅི་རིགས་པར་བདག་གཞན་དང་དུས་གསུམ་གྱི་དོན་རྣམས་དེ་དང་མཚུངས་པར་སྟོན་པར་འགྱུར་པ་ཡིན་གྱི་སྐབས་འགའ་ཞིག་ཏུ་མ་གཏོགས་པར་རྗེས་འཇུག་གི་ནུས་པ་གཙོ་ཆེ་བས་ནི་མ་ཡིན་ནོ། །ཞེས་པ་ནི་འདིར་ཤེས་པར་བྱ་བའི་གནད་དམ་པའོ། །
འདིར་ཁ་ཅིག་སྔོན་འཇུག་ལ་མི་ལྟོས་པར། བྱས། ཟོས། གྲགས། ཆད། ཐརད། ཐོནད། ཕོག། དག། ཕབ། ལྟ་བུ་ཕོ་ཡིག་གིས་འདས་པ་སྟོན་པ་དང་། གྱིས། བྱོས། ཁོས། ནོནད། རོལད། ཆོད། རྒྱོབ། ཤོག། ལྟ་བུ་ཕོ་ཡིག་གིས་སྐུལ་ཚིག་སྟོན་པ་དང་། སྔོན་འཇུག་ལ་ལྟོས་ཀྱང་རྗེས་འཇུག་གི་ནུས་པ་གཙོ་བ། བསྐངས། བསྒྲུབས། བསམས། བསགས། བསད། བཅད། བསྟནད། བསྐྱརད། བསལད། ལྟ་བུ་ཕོ་ཡིག་གིས་འདས་པ་སྒྲུབ་པ་སོགས་མང་དུ་ཡོད་པས་འདིར་རྗེས་འཇུག་གི་ནུས་པ་གཙོ་བོར་མི་འཆད་པ་མི་ལེགས་སོ་སྙམ་པ་དག་ཡོད་པར་མངོན་ཡང་། དོགས་པ་མི་དགོས་ཏེ། སྐུལ་ཚིག་གི་འཇུག་ཚུལ་ནི་གཞུང་འདིར་དངོས་ཤུགས་གང་དུའང་མ་བསྟན་པ་དེར་བས། སྔོན་འཇུག་ལ་མ་ལྟོས་པར་རྗེས་འཇུག་རྣམས་ཉིད་བདག་གཞན་དང་དུས་གསུམ་སོགས་བྱ་བྱེད་དང་འབྲེལ་བའི་མིང་ཚིག་ཐམས་ཅད་ལ་འཇུག་པ་ཡོད་ཀྱང་སྔོན་འཇུག་ཅན་ལ་ལྟོས་ན་ཤས་ཆུང་བས་ཞར་ལ་གོ་བའི་དབང་དུ་མཛད་ཅིང་། སྔོན་འཇུག་ལས་རྗེས་འཇུག་གི་ནུས་པ་གཙོ་བ་འདས་པ་སྒྲུབ་པའི་ས་ཡིག་གི་འཇུག་ཡང་འཇུག་གཉིས་ཀ་དང་ད་ཡིག་གི་ཡང་འཇུག་ཁོ་ན་ཙམ་ལ་ཡོད་ཀྱི་གཞན་རྣམས་སྔོན་འཇུག་གི་ནུས་པ་གཙོ་བ་ཁོ་ན་ཡིན་པའི་ཕྱིར་སྔོན་འཇུག་གི་འཇུག་པས་བདག་གཞན་སོགས་སྟོན་པ་ཁྱབ་ཆེ་བས་གཙོ་བོར་གྱུར་པ་དགོངས་ནས་འདིར་སྔོན་འཇུག་ལྔ་བཞིན་སྦྱར་ཞེས་ངེས་གཟུང་གིས་གསུངས་པ་ལྟར་ཁོ་བོས་ལེགས་པར་བཤད་པ་ཡིན་པའི་ཕྱིར་རོ། །
སྔོན་འཇུག་མེད་པར་རྗེས་འཇུག་གི་དོན་བསྟན་པ་ཆེས་མང་སྟེ་མིང་རྐྱང་ཕལ་ཆེར་དེ་འདྲ་ཡིན་པའི་ཕྱིར་སྙམ་ན། དེ་འདྲའི་མིང་རྐྱང་རྣམས་རྗེས་འཇུག་གིས་མིང་དུ་གྲུབ་པ་ཡིན་ཀྱང་དེས་བདག་གཞན་དང་དུས་གསུམ་སོགས་བསྟན་པ་མེད་པས། སྤྱིར་རྟགས་འཇུག་གི་གཞུང་འདིའི་བསྟན་བྱའི་གཙོ་བོ་མ་ཡིན་ལ། ཁྱད་པར་སྔོན་འཇུག་ལྔ་བཞིན་སྦྱར། །ཞེས་པའི་སྦྱར་བྱ་མ་ཡིན་པར་ངེས་པས་སྐྱོན་དུ་མི་འགྱུར་རོ། །དེས་ན་སྐབས་འདིའི་དངོས་བསྟན་གྱི་དབང་དུ་བྱས་པའི་དཔེར་བརྗོད་ནི་སྔོ་ནའཇུག་གི་སྐབས་སུ་རྒྱས་པར་བསྟན་པ་ཉིད་ལས་ལོགས་སུ་མི་དགོས་ནའང་ཕྱོགས་མཚོན་པའི་ཕྱིར་རྗེ་འཇུག་གི་རྟགས་ཀྱི་གོ་རིམ་དང་མཐུན་པར་ཅུང་ཟད་བཀོད་པས་གོ་བདེ་བ་ལ་བསམས་ནས་དཔེར་བརྗོད་ན། སྐྱེས་བུའི་རྟགས་རབ་འབྲིང་ཐ་གསུམ་ཅི་རིགས་པར་དུས་འདས་པ་ལ་འཇུག་པ་ནི། བརྟགས། བཏགས། བཅགས། བསགས། བསྒྲུབས། བསྐྱབས། བསྟབས། བཀག། བལྟས། བརྒྱབ། བཅད། ལྟ་བུ་དང་། དེ་རྣམས་བྱེད་པ་བདག་ལ་འཇུག་པ་ནི། འདོགས་བྱེད། འདེགས་བྱེད། འཛུགས་བྱེད། འགུགས་བྱེད། གཞིབས་བྱེད། གཤིབས་བྱེད། གནུབས་བྱེད། འཇོག་བྱེད། འགས་བྱེད། འགྲུབ་བྱེད། གཅོད་བྱེད། ལྟ་བུ་དང་། དེ་རྣམས་བྱ་བ་གཞན་ལ་འཇུག་པ་ནི། གདགས་བྱ། བསྡིགས་བྱ། བསྡོགས་བྱ། གཏུབས་བྱ། དགག་བྱ། བརྟས་བྱ། གཟབ་བྱ། བསྒྲུབ་བྱ། བསྟབ་བྱ། བསྐྱབ་བྱ། བསྐྱེད་བྱ། ལྟ་བུ་དང་། དེ་རྣམས་བདག་གཞན་གྱི་དབྱེ་བས་མ་བསྡུས་པའི་ད་ལྟ་དང་མ་འོངས་པ་ཅི་རིགས་པར་འཇུག་པ་ནི། འདེགས་བཞིན་པ། འདོགས་བཞིན་པ། གཏུབས་བཞིན་པ། འགོག་བཞིན་པ། གཅོད་བཞིན་པ། རང་བཞིན་གྱིས་གཤེགས་པར་འགྱུར། རང་བཞིན་གྱིས་འགྲུབ་པར་འགྱུར། འཆད་པར་འགྱུར། འཐས་པར་འགྱུར། ལྟ་བུ་རྣམས་སོ། །
དེ་བཞིན་དུ་མོ་རྟགས་གཉིས་འདས་པ་ལ་འཇུག་པ། བསྐངས། བརྐྱངས། བསྐུམས། བཀྲམ། ལྟ་བུ་དང་།
༈ བདག་ལ་འཇུག་པ། འདོམས་བྱེད། འགེངས་བྱེད། མཆོངས་བྱེད། འདོད་བྱེད། འཁྱོམ་བྱེད། གསོའ་བྱེད། ལྟ་བུ་དང་།
༈ གཞན་ལ་འཇུག་པ། གདམས་བྱ། འཁུམས་བྱ། བསྐང་བྱ། དགང་བྱ། གཏམས་བྱ། བཟའ་བྱ། ལྟ་བུ་དང་།
༈ ད་ལྟ་དང་མ་འོངས་པར་འཇུག་པ། འདོམས་བཞིན་པ། འགེངས་བཞིནཔ། འདོད་བཞིན་པ། གསོའ་བཞིན་པ། རང་བཞིན་གྱིས་འདོམས་པར་འགྱུར། འགྲོ་བར་འགྱུར། འགོང་པར་འགྱུར། འདམ་པར་འགྱུར། ལྟ་བུའོ།
༈ མ་ནིང་གསུམ་འདས་པ་ལ། བསྟནད། བཀནད། བཀརད། བསྟརད། བཅལད། མནནད། བགརད། བསལད། མཁྱེནད། མཚརད། འཁྲུལད། ལྟ་བུ་དང་།
༈ བདག་ལ། བསྟུནད་བྱེད། བརྩོན་བྱེད། གནོད་བྱེད། གཏོང་བྱེད། གསོར་བྱེད། བཀོལད་བྱེད། འགྲོལ་བྱེད། འདུནད་བྱེད། འཛེརད་བྱེད། གསོལད་བྱེད། མཐརད་བྱེད། འཁོར་བྱེད། འཕེནད་བྱེད། མཐུན་བྱེད། འཐུལ་བྱེད། ལྟ་བུ་དང་།
༈ གཞན་ལ། བསྟེན་བྱ། བསྐུར་བྱ། དགར་བྱ། བསྐོལ་བྱ། བསྐྱལ་བྱ། མཁྱེན་བྱ། འཚིར་བྱ། འཁོལ་བྱ། ལྟ་བུ་དང་།
༈ ད་ལྟ་དང་མ་འོངས་པར། བསྟུནད་བཞིན་པ། གནོན་བཞིན་པ། གཏོར་བཞིན་པ། འཛིནད་བཞིན་པ། གསོལད་བཞིན་པ། འགྲེལད་བཞིན་པ། འཐོརད་བཞིན་པ། མཁྱེནད་བཞིན་པ། རང་བཞིན་གྱིས། དཀོནད་པར་འགྱུར། འདུནད་པར་འགྱུར། མཐུན་པར་འགྱུར། གསལ་བར་འགྱུར། འཁུལ་བར་འགྱུར། ལྟ་བུ་རྒྱ་ཆེར་ཤེས་པར་བྱའོ། །
དེ་ལྟར་སྔོན་འཇུག་ལ་ལྟོས་པ་གཙོ་བོར་གསུངས་པའི་ཞར་ལས་སྔོན་འཇུག་མེད་པའི་དོན་རྣམས་ལ་ཇི་ལྟར་འཇུག་པའང་ཤེས་པར་བྱ་སྟེ། དཔེར་ན། སྐྱེས་པའི་རྟགས་འདས་པ་ལ་འཇུག་པ། གྲགས། ཐོགས། ཞུགས། བྱབས། བྱས། གས། བྲོས། ཕོས། ནོས། སྤྲས། ཟོས། ཕོག། ནོག། ཐུབ། གྲུབ། སྤྲད། ཆད། ཁོད། ནོད། སོགས་དང་།
༈ བདག་ལ། སྒྲོགས་བྱེད། སྙོགས་བྱེད། སྟོབས་བྱེད། ཀླུབས་བྱེད། ལྕིབས་བྱེད། སྒྲུབ་བྱེད། སྐྲོད་བྱེད། སྡོང་བྱེད། རྗེད་བྱེད། སྙེག་བྱེད། རྡེག་བྱེད། ལྟོས་བྱེད། སོགས་དང་།
༈ གཞན་ལ། རྟོགས་བྱ། ཐབས་བྱ། ཤེས་བྱ། སྒུག་བྱ། གློད་བྱ་སོགས་དང་།
༈ དེ་དག་ལས་གཞན་ད་ལྟ་དང་མ་འོངས་པར་འཇུག་པ། རྟོགས་བཞིན་པ། ཤེས་བཞིན་པ། སྡོད་བཞིན་པ་སོགས་དང་། རྟོགས་པར་འགྱུར། སྒུག་པར་འགྱུར། ཤེས་པར་འགྱུར། ཞེས་སོགས་ཀྱིས་མཚོན་པར་བྱའོ། །
དེ་བཞིན་དུ་མོ་གཉིས་འདས་པ་ལ་འཇུག་པ། སྤངས། ཁེངས། ཐེངས། གོམས། ཁྲེམས། གང་། སོང་། ཕམ། གུམ། ཆོམ། ཐེམ་སོགས་དང་།
༈ བདག་ལ། སྟོངས་བྱེད། རེངས་བྱེད། སྟེམས་བྱེད། ཉམས་བྱེད། མྱོང་བྱེད། སྣང་བྱེད། ཟློ་བྱེད། སྲའ་བྱེད། རྒྱུའ་བྱེད། ༈གཞན་ལ། སྤུངས་བྱ། སྤང་བྱ། སྤྲིང་བྱ། བླང་བྱ། རློམ་བྱ། སྨྲའ་བྱ། སོགས་དང་།
༈ ད་ལྟ་དང་མ་འོངས་པར། རེངས་བཞིན་པ། སྟེམས་བཞིན་པ། མྱོང་བཞིན་པ། ཟློའ་བཞིན་པ། ངང་གིས་སྟོངས་པར་འགྱུར། ཉམས་པར་འགྱུར། གང་བར་འགྱུར། དམ་པར་འགྱུར། སྲའ་བར་འགྱུར། སོགས་སོ། །
༈ མ་ནིང་གསུམ་འདས་པར་འཇུག་པ། སྩལད། རོལད། དུལ། ཤར། པོར། སྦྲནད། བྲནད། སྨིནད། བྱིནད། ཕྱིནད། ཐརད། ཚརད། ཚོར། ཐལ་སོགས་དང་།
༈ བདག་ལ། སྟོནད། སྟེནད། རྟེནད། སྦྱིན། སྒྲུན། སྦྲོན། སྐུརད། སྤྲུལད། སྒྱུར། སྤེལ། ལེནད། སྨོནད། སེལད། ཉནད། ཁུར། ཕན་བྱེད་སོགས་དང་།
༈ གཞན་ལ། སྤང་བྱ། སྤེལ་བྱ། སྦར་བྱ། སྦྱིན་བྱ། མྱུལ་བྱ། སྨོན་བྱ། རྒལ་བྱ་སོགས་དང་།
༈ ད་ལྟ་དང་མ་འོངས་པར་ཡང་། སྟོནད་བཞིན་པ། སྟེནད་བཞིན་པ། སྒྲོལ་བཞིན་པ། མྱུལ་བཞིན་པ། གྲོལ་བར་འགྱུར། སྨན་པར་འགྱུར། ཕྱིནད་པར་འགྱུར། ཐར་པར་འགྱུར། སོགས་ཏེ་འདི་དག་གིས་འདི་རིགས་ཐམས་ཅད་ལ་མཚོན་པར་བྱའོ། ། དེ་ལྟར་དཔེར་བརྗོད་པ་དེ་རྣམས་ལས་སྔོན་འཇུག་གི་ཤིན་ཏུ་མོ་བདག་གཞན་སོགས་ཐམས་ཅད་ལ་མཉམ་པར་འཇུག་པར་གསུངས་པ་བཞིན་དུ་སྔོན་འཇུག་ལ་ལྟོས་པར། མཐུན་མཁྱེན་སོགས་མང་པོ་དང་། སྔོན་འཇུག་མེད་པར་ཡང་། རྟོགས། སྤུངས། སྣང་། སྟེགས། རེངས། སྤྲུལད། སོགས་མང་པོ་བདག་གཞན་དུས་གསུམ་ཀུན་ལ་གཟུགས་ཐ་དད་མེད་པར་འཇུག་པས་འཇུག་ཡུལ་བདག་གཞན་སོགས་གང་ཡིན་ཚིག་གྲོགས་ལས་ཤེས་པར་བྱ་དགོས་པ་རྣམས་ཀྱང་བློ་གྲོས་དང་ལྡན་པ་རྣམས་ཀྱིས་རྟོགས་པར་བྱའོ། །
གཞན་ཡང་གཞུང་འདིར་དམིགས་བསལ་དུ་མ་བསྟན་ཀྱང་རྗེས་འཇུག་ས་ཡིག་གི་འཇུག་ཡང་འཇུག་གཉི་ག་དང་། ད་ཡིག་གི་ཡང་འཇུག་གིས་དུས་འདས་པ་སྟོན་པ་ཤིན་ཏུ་མང་ཞིང་། འ་ཡིག་འདས་པ་ལ་མི་འཇུག་པའི་ཁྱད་པར་ཙམ་ནི་གསལ་བར་མཐོང་བ་སྔོན་རྗེས་ཀྱི་དཔེར་བརྗོད་བཀོད་པ་རྣམས་སུ་གསལ་ཞིང་། གྲགས་ཆེ་བ་དེར་ཟད། རྗེས་འཇུག་རྣམས་སྐུལ་ཚིག་ལ་འཇུག་པའི་ཚུལ་ནི། གཞུང་འདིའི་དངོས་ཤུགས་གཉི་གར་མ་བསྟན་པས་བཤད་བྱར་མ་གྱུར་མོད། འོན་ཀྱང་དེའི་རྣམ་གཞག་ཞར་ལས་རྟོགས་པར་བྱ་བའི་ཕྱིར་དཔེར་བརྗོད་ན། ས་ད་གཉིས་དང་ཁྱད་པར་ས་ཡིག་བསྐུལ་ཚིག་ལ་འཇུག་པ་མང་བར་མཐོང་སྟེ། སྙོགས་ཤིག། ཀློགས་ཤིག། སྒྲོགས་ཤིག། རྟོགས་ཤིག། རྩིགས་ཤིག། ཞུགས་ཤིག། སྲེགས་ཤིགཚིགས་ཤིགརློགས་ཤིགརློབས་ཤིག། སྒྲུབས་ཤིགརྩིས་ཤིག། གྱིས་ཤིག། བྱོས་ཤིག། རྒྱུས་ཤིག། རྔོས་ཤིག། སྔོས་ཤིག། ལྟོས་ཤིག། ནོས་ཤིགསྐོས་ཤིག། རྐུས་ཤིག། ཁོས་ཤིག། ཆོས་ཤིག། དྲོངས་ཤིག། སྲོངས་ཤིག། ཆིངས་ཤིག། སྲུངས་ཤིག། དེངས་ཤིག། སྐྱོངས་ཤིག། སྡོམས་ཤིག། སྙོམས་ཤིག། སོམས་ཤིག། རྩོམས་ཤིག། སྟོནད་ཅིག། ཐོནད་ཅིག། ནོནད་ཅིག། སོལད་ཅིག། ཉོནད་ཅིག། སྟེནད་ཅིག། སྙེནད་ཅིག། རོལད་ཅིག། རྩོལད་ཅིག། ཕྲོལད་ཅིག། སྒྲོལད་ཅིག། སྐུརད་ཅིག། སྤོརད་ཅིག། སྟོརད་ཅིག། ཆོད་ཅིག། སོད་ཅིག། ཁོད་ཅིག། སྡོད་ཅིག། སློད་ཅིག། ཅེས་པ་ལསོགས་པ་དང་། རྗེས་འཇུག་གཞན་དེར་འཇུག་པ་ན། ཤོག་ཅིག། ཁོག་ཅིག། ཟློག་ཅིག། ཕོབ་ཅིག། ཐོབ་ཅིག། རྒྱོབ་ཅིག། སྒོང་ཞིགསྣུན་ཞིག། སྐྲུན་ཞིག། ཕྱོར་ཞིག། སྦྱོར་ཞིག། ཚོལ་ཞིག། སྐོལ་ཞིག། ལྟ་བུ་སྟེ་འདི་རྣམས་ཀྱིས་མཚོན་ནས་རྒྱ་ཆེར་ཤེས་པར་བྱའོ། །
དེ་ན་སྐུལ་ཚིག་ཕལ་ཆེར་ལ་སྔོན་འཇུག་མེད་པ་མང་ཞིང་སྔོན་འཇུག་སྦྱོར་དགོས་པའང་ཡོད་དེ། བཀྲོས་ཤིག། བསྟོད་ཅིག། བརྩོན་ཞིག། བསྣོས་ཤིག། གཏོརད་ཅིག། གདུངས་ཤིག། གསོངས་ཤིག། དཀྲུགས་ཤིག། དགོངས་ཤིག། དཔྱོད་ཅིག། མཆོད་ཅིག། མཆོང་ཞིག། མཛོད་ཅིག། འགོམས་ཤིག། མ་འགྲོའ་ཤིག། མ་འཆེའ་ཤིག། ཅེས་པ་ལྟ་བུ་རྣམས་སོ། །
གཉིས་པ་གཞན་གྱི་འདོད་པ་ནོར་བར་བསྟན་པ་ནི།
སྐབས་འདིར་འགྲེལ་བྱེད་སྔ་མ་ཕལ་ཆེར་གྱིས། སྔ་མ་སྔོན་འཇུག་ལྔ་བཞིན་སྦྱར། །ཞེས་པའི་དོན་སྔོན་འཇུག་ལྟར་རྗེས་འཇུག་གི་ཕོ་ཡིག་རྣམས་འདས་པ་དང་། གཞན་སྒྲུབ་ལ་འཇུག་པ་སོགས་རྟགས་ཀྱི་བྱེ་བྲག་གིས་འཇུག་ཡུལ་སོ་སོར་སྦྱར་རྒྱུར་འདོད་མོད། དེ་ལྟར་སྦྱོར་བ་སྐབས་རེ་གཉིས་ལ་འགྲིག་པ་ལྟར་སྣང་ཡང་ཕལ་མོ་ཆེར་ངེས་པ་མེད་པའི་སྦྱོར་ཚུལ་དུ་འགྱུར་བས་མི་འཐད་པའི་ཚུལ་གོང་དུ་རྟགས་ངོས་འཛིན་གྱི་སྐབས་སུ་བཤད་ཟིན་ཅིང་། གཞན་ཡང་དེ་ལྟར་འདོད་པ་ལ་སྐྱོན་མང་དུ་ཡོད་དེ། གཞུང་གི་སྤྱིའི་ས་བཅད་དང་མི་འགྲིག་པ་དང་། བྱེ་བྲག་མདོར་བསྟན་དང་འགལ་བ་དང་། ཞེན་དོན་གྱི་དཔེར་བརྗོད་མི་འཐད་པའི་སྐྱོན་རྣམས་ཡོད་པའི་ཕྱིར། དང་པོ་གྲུབ་སྟེ། སྔ་མ་སྔོན་འཇུག་སོགས་ཀྱི་གཞུང་འདི། སྤྱིའི་ས་བཅད་ཇི་ལྟར་འཇུག་བྱེད་འཆད་པའི་སྐབས་དང་། དེ་ལས་ཀྱང་དོན་གྱི་ཇི་ལྟར་འཇུག་བྱེད་འཆད་པའི་སྐབས་ཡིན་པ་ལ། དེ་དང་མི་འགྲིག་པའི་ཅི་ཕྱིར་འཇུག་བྱེད་བཤད་པའི་ཕྱིར་ཏེ། རྗེས་འཇུག་རྣམས་སྔོན་འཇུག་གི་ཅི་ཕྱིར་འཇུག་པ་བཤད་པ་ལྟར། རྟགས་ཀྱི་ཁྱད་པར་གྱིས་བདག་གཞན་དང་དུས་གསུམ་གྱི་ཁྱད་པར་ངེས་པར་སྟོན་པའི་སླད་དུ་འཇུག་པར་བཤད་པའི་ཕྱིར། སྔ་མ་མ་གྲུབ་སྟེ། ཇི་ལྟར་འཇུག་པ་དང་ཅི་ཕྱིར་འཇུག་པ་གཉིས་ཀ་དང་མཐུན་པར་བཤད་དུ་ཡོད་པའི་ཕྱིར། སྙམ་ནའང་མ་ཡིན་ཏེ། ཅི་ཕྱིར་འཇུག་པ་ནི་དོན་དེ་སྟོན་བྱེད་དུ་ངེས་པར་འཇུག་པ་ཞིག་དགོས་ལ། ཇི་ལྟར་འཇུག་པ་ནི། སྒྲ་དོན་དེ་དང་དེར་འཇུག་པ་ཙམ་དུ་ཟད་པའི་ཕྱིར་རོ། །གཞན་ཡང་ཇི་ལྟར་དང་ཅི་ཕྱིར་འཇུག་པ་གཉིས་སྐབས་འདིར་མཐུན་པར་བཤད་ན། གཤམ་དུ་ཅི་ཕྱིར་འཇུག་པ་གསུངས་པ་ཟློས་པའམ་དབྱེ་བ་འཁྲུགས་པའི་སྐྱོན་དུ་འགྱུར་ཞིང་། གལ་ཏེ། ཕོ་ནི་འདས་དང་གཞན་བསྒྲུབ་ཕྱིར། །སོགས་སྔོན་འཇུག་གི་སྐབས་ཅི་ཕྱིར་འཇུག་འཆད་བྱེད་ཡིན་ཡང་འདིར་མིན་ནོ་ཟེར་ནའང་། ས་བཅད་མ་འགྲིག་པས་ཅི་བྱ་གཏོལ་མེད་ཀྱིས་བྱུང་རྒྱལ་དུ་སྨྲས་པར་ཟད་དེ། རྒྱུ་མཚན་མེད་པར་མ་ཟད་དོན་ཅིའི་ཕྱིར་འཇུག་པ་འཆད་བཞིན་པ་དང་དངོས་སུ་འགལ་བའི་ཕྱིར་རོ། །གཉིས་པ་གྲུབ་སྟེ། བྱེ་བྲག་དོན་གྱི་འཇུག་ཚུལ་ལ་གཉིས་སུ་དབྱེ་བའི་སྔ་མ་གང་ལྟར་འགྱུར་བ་ཞེས་མདོར་བསྟན་པ་འཆད་པའི་སྐབས་ཡིན་པ་གང་ཞིག །དེ་ལ་ཁྱེད་ཀྱིས་རྗེས་འཇུག་རྣམས་རང་དབང་གིས་དོན་སྟོན་བྱེད་དུ་འཇུག་པར་བཤད་པ་འགལ་བའི་ཕྱིར་ཏེ། འགྱུར་བ་ཞེས་པའི་དོན་རྗེས་འཇུག་རྣམས་རང་དབང་མི་བཙན་པར་སྔོན་འཇུག་ལ་སོགས་པའི་དོན་བཞིན་དུ་འགྱུར་འགྲོ་བ་ལ་འཆད་དགོས་པའི་ཕྱིར། དེ་མ་གྲུབ་སྙམ་ན། དེ་ལྟར་འཆད་རིགས་ཏེ་སྔ་མ་རྗེས་འཇུག་གི་དོན་གཙོ་བོར་སྔོན་འཇུག་གི་རྗེས་སུ་འགྲོ་ཞིང་ཕྱི་མ་མིང་མཐའ་དང་རྣམ་དབྱེ་སོགས་ཀྱི་དོན་རྗེས་འཇུག་དང་ཚིག་ཕྱི་མ་དག་གི་རྗེས་སུ་འགྲོ་བ་གཞུང་དུ་གང་ལྟར་འགྱུར་བ་ཞེས་པའི་སྒྲས་མཚུངས་པར་བསྟན་པའི་ཕྱིར་ཏེ། དེ་ལྟར་མ་བཤད་པས་སྔར་སྨོས་པའི་སྐྱོན་དེ་རྣམས་ཀྱང་སྤོང་མི་ནུས་པའི་ཕྱིར་རོ། །གསུམ་པ་གྲུབ་སྟེ། ཁྱེད་རྣམས་ཀྱིས་སྐབས་འདིར་ད་བ་ས་གསུམ་གྱིས་འདས་པ་སྟོན་པའི་དཔེར་བཀོད་པ། བཅད། བཀབ། བཀས། ཞེས་པ་རྣམས་ལས་ཕྱི་མ་ས་ཡིག་གིས་འདས་པ་བསྟན་དུ་ཆུག་ཀྱང་། སྔ་མ་གཉིས་འདས་ཚིག་ཏུ་གྲུབ་པ་རྗེས་འཇུག་གི་ནུས་པས་མ་ཡིན་པའི་ཕྱིར་ཏེ། དེ་གཉིས། གཅད། གཅོད། དགབ། འགེབ། ཞེས་བྱ་བྱེད་ཀྱི་ཚིག་ལ་སྦྱར་བའི་ཚེ་ནའང་རྗེས་འཇུག་དེ་ཁོ་ན་ལས་གཞན་དུ་མི་འགྱུར་བའི་ཕྱིར་ཏེ། སྔོན་འཇུག་གི་ནུས་པ་ཁོ་ནས་བྱ་བྱེད་ཀྱི་ཚིག་ཏུ་གྲུབ་པའི་ཕྱིར་རོ། །དེས་ན་དཔེར་བརྗོད་དེ་ཙམ་ལའང་ཡིད་བརྟན་ཕེར་བ་མ་བྱུང་ན། རང་ཉིད་ཀྱིས་བཤད་པ་དང་མཐུན་པའི་དཔེར་བརྗོད་གཞན་རྣམས་འགོད་པར་ལྟ་ག་ལ་ནུས་པས་འགོད་མ་ནུས་པ་དེར་ཟད་དོ། །
གཞན་ཡང་། ལུགས་དེ་ཁས་ལེན་པའི་ཕྱིས་བྱུང་ཞིག་གིས་སྐབས་འདིར་དཔེར་བརྗོད་ཅུང་ཟད་མང་བར་འགོད་པའི་ཁུལ་དུ་བྱས་ཏེ། བྱ་བ་བྱས། ཆར་བ་ཕོབ། མེ་ཏོག་ཕོག། ན་ཚ་ཆད་ཅེས་སོགས་འདས་པ་ལ་འཇུག་པ་དང་། སྲས་པོ། སྲབ། སྲོག། སྲིད་ལྟ་བུ་དངོས་པོ་གཞན་དང་། གདམས་པར་བྱ། བསྒྲུབ་པར་བྱ། བཀླག་པར་བྱ། བརྗོད་པར་བྱ་ལྟ་བུ་ཚིག་དང་དངོས་སུ་འབྲེལ་བ་དང་། རྒྱས་པར་བྱས། ས་བོན་བཏབ། ལམ་འགོག། སྣོད་འཛེད་ལྟ་བུ་དངོས་སུ་མ་འབྲེལ་ཡང་བྱ་བ་བསྒྲུབ་པ་ལ་འཇུག་པ་དང་། ནམ་མཁའ་ལྟ་བུ་གཞན་དང་། ཡོད་པའི་གདའ་སོགས་ད་ལྟར་བ་སྟོན་པ་དང་། འགྱུར། འཇལ། འབྱུང་། འདྲེན། འགྲམ། བློ་གསར། ཆུ་སྐོར། བགྲང་ཕྲེང་། མདུན། མཚལ་སོགས་བདག་དང་མ་འོངས་པ་ལ་འཇུག་པ་ལྟ་བུའོ། ། ཞེས་བྲིས་མོད། དེ་རྣམས་ཟེར་རྒྱུས་ཕོངས་པའམ་བློ་རྣལ་དུ་མི་གནས་པའི་སྐྱོན་ཉིད་ཀྱིས་བྱུང་རྒྱལ་དུ་སྨྲས་པ་སྟེ། འདས་པའི་དཔེར་སྐུལ་ཚིག་བྲིས་པ་དང་། གཞན་གྱི་དཔེར་མིང་རྐྱང་དང་འདས་ཚིག་དང་བྱེད་ཚིག་བཀོད་པ་དང་། བདག་དང་མ་འོངས་པའི་དཔེར་མིང་རྐྱང་བཀོད་པ་སོགས་ཕལ་ཆེར་འགལ་བ་ཁོ་ནར་སྣང་བའི་ཕྱིར་རོ། །ཁྱད་པརམིང་རྐྱང་རྣམས་འདིའི་དཔེར་བརྗོད་དུ་བཀོད་པ་ནི་ཤིན་ཏུ་མཚང་ཚེ་སྟེ། མིང་རྐྱང་ཙམ་དེ་འདིར་བསྟན་གྱི་བདག་གཞན་དང་དུས་གསུམ་གྱིས་མ་བསྡུས་པ་སྔོན་འཇུག་གི་སྐབས་སུ་བཤད་པ་ལྟ་བུའི་ཕྱིར་དང་། མིང་རྐྱང་རྣམས་ལ་རྗེས་འཇུག་ཐམས་ཅད་བྱེ་བྲག་མེད་པར་འཇུག་པ་ཡིན་པས་རྟགས་ཀྱི་འཇུག་དོན་གྱི་དབང་གིས་ཐ་དད་དུ་འབྱེད་པའི་རྒྱུ་མཚན་ཅིའང་མེད་པའི་ཕྱིར་རོ། །སྟེས་དབང་གིས་དཔེར་བརྗོད་འགྲིག་པ་དེ་རྣམས་ཀྱང་གོང་སྨོས་བཞིན་རང་གི་ཞེན་དོན་གྱི་སྒྲུབ་བྱེད་དུ་མི་འགྲེོ་སྟེ། འ་ཡིག་འདས་པ་ལ་མི་འཇུག་པ་དང་། ས་ད་གཉིས་འདས་པ་ལ་འཇུག་པ་མང་བ་ཙམ་ལས་གཞན་བྱེ་བྲག་ཆེར་མེད་པར་རྗེས་འཇུག་རྣམས་བདག་གཞན་དང་དུས་གསུམ་ཐམས་ཅད་ལ་འཇུག་པའི་ཕྱིར་རོ། །འདིར་སྨྲས་པ།
མཁས་རློམ་ཕལ་ཆེར་རི་བོང་ཅལ་རྗེས་སྙོགས། །
སྨིག་རྒྱུའི་ཆུར་སྲེད་བྲག་ཅའི་གླུ་དབྱངས་ལེན། །
མཁས་པ་རྣམས་ཀྱང་དེ་འདྲའི་འབབ་སྟེགས་ལ། །
གཞོལ་ཞིང་ངལ་བ་ཅི་ཡང་བསྟེན་པ་མཐོང་། །
འདི་དང་འདི་འདྲའི་ཚུལ་ལ་བརྟགས་པའི་ཚེ། །
ནམ་ཡང་གཞན་དྲིང་ཁོ་ནར་མི་བསྟེན་ཅིང་། །
གཞན་ཟེར་ཁོ་ནའི་ལད་མོའང་མི་ཟློ་བས། །
ཁོ་བོའི་བློ་གྲོས་སྐལ་བ་བཟང་སྙམ་བགྱིད། །
མཁས་པའི་བསྟན་བཅོས་རང་བཞིན་དག་པའི་དངོས། །
གསལ་བྱེད་མཁས་པ་ཉིད་ལ་རག་ལས་ཏེ། །
འདོད་སྦྱིན་དབྱིག་མཆོག་ནོར་བུ་བཻཌཱུཪྻ། །
དེད་དཔོན་མཁས་པས་ཡོངས་སུ་སྦྱངས་ལ་ལྟོས། །ཞེས་སོ། །
ཕྱི་མ་གང་ལྟར་འགྱུར་བ་འཆད་པ་མདོར་བསྟན་པ།
གཉིས་པ་ཕྱི་མ་གང་ལྟར་འགྱུར་བ་འཆད་པ་ལ་གཉིས། ། མདོར་བསྟན་པ་དང་། རྒྱས་པར་བཤད་པའོ། །
དང་པོ་ནི།
ཕྱི་མ་དག་གི་འདྲེན་ཚུལ་ནི། །
ཞེས་པ་སྟེ། ཕྱི་མ་མིང་མཐའ་དང་རྣམ་དབྱེ་སོགས་ཀྱི་ཐོབ་ཐང་གི་དོན་ཇི་ལྟར་འཇུག་པར་འགྱུར་བའི་ཚུལ་ནི་སྔ་མའི་རྗེས་འཇུག་དང་ཕྱི་མའི་བརྗོད་བྱ་དག་ལ་ཅི་རིགས་པར་ལྟོས་པའི་སྒོ་ནས་འདྲེན་པའི་ཕྱིར་དེའི་ཚུལ་སྨོས་པ་ནི། ཞེས་མདོར་བསྟན་པའོ། །
རྒྱས་པར་བཤད་པ་ལ་མིང་མཐའ་འདྲེན་ཚུལ།
གཉིས་པ་རྒྱས་བཤད་ལ་མིང་མཐའ་འདྲེན་ཚུལ་དང་། རྣམ་དབྱེ་སོགས་འདྲེན་ཚུལ་འཆད་པ་སྟེ་གཉིས་སོ། །
དང་པོ་ནི།
ཕོ་ཡིས་ཕོ་ཡི་མིང་མཐའ་དྲང་། །
མོ་ཡིས་མོ་ཡི་མིང་མཐའ་དྲང་། །
མ་ནིང་གིས་ནི་མ་ནིང་ངོ་། །
ཞེས་པས་བསྟན་ཏེ། མིང་སྔ་མའི་མཐའི་རྗེས་འཇུག་ཕོ་ཡིག་གིས། དེ་ཉིད་ཀྱི་མིང་མཐའ་གཞན་གྱི་མིང་གཞིའི་ཕོ་ཡིག་དྲང་བར་བྱ་ཞིང་། དེ་བཞིན་དུ་མོ་ཡིག་གིས་མོའི་མིང་མཐའ་དྲང་བ་དང་། མ་ནིང་གིས་མ་ནིང་གི་མིང་མཐའ་དྲང་བར་བྱའོ། །ཞེས་སོ། །དེས་ན་མིང་སྔ་མའི་མཐའི་རྗེས་འཇུག་རྣམས་ཀྱང་མིང་མཐའ་ཡིན་མོད་ཀྱི་འདིར་བསྟན་གྱི་མིང་མཐའ་ཞེས་པ་ནི་རྗེས་འཇུག་གིས་མིང་དུ་གྲུབ་པའི་མིང་སྔ་མ་དེ་ཉིད་ཀྱི་ཆ་ཤས་མིང་དེའི་མཐར་སྦྱར་རྒྱུ་ཞིག་ལ་ངོས་འཛིན་དགོས་སོ། །
དེ་དག་གི་དཔེར་བརྗོད་པ་ནི། ཕོས་ཕོའི་མིང་མཐའ་དྲངས་པ། དཔྱིད་ཀ། སྟོན་ཀ། སྟོད་ཀོར། ཀླད་ཀོར། བེརད་ཀ། བསྟོད་པ། མཁྱེནད་པ། བཅད་པ། ཕནད་པ། ཕྱིནད་པ། སྟེནད་པ། སྡོད་པ། རྩོད་པ། ནོད་པ། གློད་པ། ཁྱབ་པ། ཆུབ་པ། གྲུབ་པ། སྒྲུབ་པ། སྐྱོབ་པ། གདབ་པ། ཐོབ་པ། འགྲུབ་པ། ཐུབ་པ། སོས་ཀ། གཉིས་ཀ། །བྱས་པ། བསྒྲུབས་པ། བརྟགས་པ། དགོངས་པ། གཏམས་པ། དངོས་པོ། དགོས་པ། གོམས་པ། བཟླས་པ། དམིགས་པ། ཆགས་པ། མཁྲིས་པ། པགས་པ། སྐྱེས་པ། རྟག་པ། འཕྲག་པ། ཟག་པ། ལྟག་པ། དག་པ། རེག་པ། ལག་པ། བདུག་པ། གདུག་པ། གཅིག་པུ། ཅིག་ཅར། བདག་ཅག་ལ་སོགས་པ་ཤིན་ཏུ་མང་ངོ་། །
མོས་མོའི་མིང་མཐའ་དྲངས་པ་ནི། གང་བ། བྱུང་བ། མཐོང་བ། གསུང་བ། འབྱུང་བ། འདྲོང་བ། གཏོང་བ། བསྐང་བ། དགང་བ། བཟང་བ། སྙིང་ག། མཐོང་ག། མཐིང་ག། ལྗང་ག། སྤང་མ། དང་མ། གདུང་མ། གསིང་མ། འདུང་མ། འདེམ་ག། གསུམ་ག། ཐམ་ག། ཟླ་བ། འདྲ་བ། དཔའ་བ། སྲ་བ། དགའ་བ། འཆའ་བ། བདེ་བ། རེ་བ། མཛའ་བ། བཀྲ་བ། གདའ་བ། ཉི་མ། དགའ་མ། གཏའ་མ། འདའ་ག། ཡ་ག། ཉ་ག། འདི་ག། གྲོ་ག། ཁྱི་གུ། ལུ་གུ། སོགས་སོ། །
མ་ནིང་གིས་མ་ནིང་དྲངས་པ་ནི། སྟོན་ཁ། དགུན་ཁ། མོན་ཁ། དབྱར་ཁ། སེར་ཁ། གཏར་ཁ། ཤར་ཁ། མྱུར་ཁ། རལ་ཁ། ཐལ་ཁ། མཚལ་ཁ། རྒྱལ་ཁ། གསལ་ཁ། དཔལ་ཁ། སོགས་སོ། །
དེ་ལྟར་མིང་མཐའ་རྟགས་མཚུངས་ཁོ་ན་འདྲེན་པ་ལྟ་བུར་གསུངས་པ་ནི་ཕོ་མོའི་རྟགས་ཕལ་ཆེར་གྱིས་དེ་ལྟར་འདྲེན་པས་གཙོ་ཆེ་བ་ཙམ་ལ་དགོངས་པ་སྟེ་འཆད་འགྱུར་ལྟར། དེ་ཉིད་རང་གི་སྒྲ་མཐུན་པའི། །ཞེས་གསུངས་པ་དང་སྦྱར་ན་འདྲེན་ཚུལ་གཞན་ཡང་ཡོད་པར་གྲུབ་ཅིང་། མངོན་སུམ་གྱིས་ཀྱང་འགྲུབ་པའི་ཕྱིར་རོ། །དེས་ན་མ་ནིང་གི་རྟགས་རྣམས་ཀྱིས་རྟགས་མཚུངས་འདྲེན་པ་དཔེར་བརྗོད་བཀོད་པ་འདི་འདྲ་ཐོར་བུ་ལས། ཕལ་ཆེར་བརྗོད་བདེ་བས་སྒྲ་མཐུན་པ་མོ་རྟགས་ཉིད་དྲངས་པ་མཐོང་སྟེ། མངོན་པ། མཐུན་པ། བསྟར་བ། ཤར་བ། དར་བ། འཐུལ་བ། གསལ་བ། རྒྱལ་བ། ཞེས་པ་ལྟ་བུ་དང་། མོ་རྟགས་མ་ཡིག་གིས་ཀྱང་བརྗོད་བདེ་རང་སྡེའི་སྐྱེས་པའི་རྟགས་དྲངས་པ། དམ་པ། བསམ་པ། རྔམ་པ། སྐམ་པ། རམ་པ། རིམ་པ། ལྕམ་པ། རྣམ་པ། བུམ་པ། ལྟ་བུ་མང་དུ་སྣང་བས་བྱེ་བྲག་སོ་སོར་མ་འཛིངས་པར་རྟོགས་པར་བྱའོ། །གཞན་དུ་རྐང་བ། ཁང་པ། སྟོང་པ། སོགས་ང་ཡིག་གིས་ཕོ་དྲངས་པ་འགའ་ཞིག་སྣང་བ། ཁ་ཅིག་གིས། བདག་པོའི་སྒྲ་ཡིན་པར་འདོད་ཀྱང་མི་འཐད་པ་རྟོགས་སླ་བས་དེད་ག་དང་། གཞན་ཡང་། ལྷས་མ། བཙས་མ། ལྟད་མོ། སྟག་མ། སོགས་ཕོས་མོ་དྲངས་པ་ལྟ་བུ་དམིགས་བསལ་དེ་འདྲ་ཐར་ཐོར་ལ་ངེས་པ་མེད་དེ། ཀ་ལཱ་པར། ལྷག་མ་འཇིག་རྟེན་པའི་ཉེར་སྤྱོད་ལས་འཛིན་པ་གྲུབ་བོ། །ཞེས་གསུངས་པ་བཞིན་འཇིག་རྟེན་པའི་གྲགས་པ་དང་བསྟུན་དགོས་པའི་ཕྱིར་རོ། །
འདིར་ཁ་ཅིག །ཁྱོད་ཀྱིས་རྟགས་མཚུངས་འདྲེན་པའི་དཔེར་བཀོད་པ་འདི་རྣམས་ལ་ཁྱོད་ཉིད་ཀྱིས་ཁས་བླངས་པ་དང་འགལ་བ་ཡོད་དེ། སྔར་ཡང་འཇུག་དང་བཅས་པའི་ན་ར་ལ་རྣམས་མ་ནིང་དང་། ང་མ་ཡང་འཇུག་ཅན་རྣམས་མོ་རྟགས་སུ་ཁས་བླངས་པ་གང་ཞིག། འདིར་དེ་རྣམས་ཀྱིས་ཕོ་ཡིག་དྲངས་པ། ཕོས་ཕོའི་མིང་མཐའ་དྲངས་པའི་དཔེར་བརྗོད་དུ་བཀོད་པའི་ཕྱིར། སྙན་ན་སྐྱོན་མེད་དེ། སྔར་སྒྲ་གདངས་དྲག་ཞན་གྱི་འཇུག་ཚུལ་གྱི་དབང་གིས་བཤད་ཅིང་། འདིར་ཡང་འཇུག་མེད་ན་མིང་མཐའི་རྗེས་འཇུག་དེ་ཉིད་དང་ཡོད་ན་ཡང་འཇུག་ཉིད་ཀྱི་རྟགས་གང་ཡིན་པ་དང་སྦྱར་ནས་མིང་མཐའ་ཕྱི་མ་འདྲེན་ཚུལ་ཙམ་འཆད་པ་ཡིན་གྱི། སྔ་མ་ལྟར་འཇུག་ཡང་འཇུག་གཉི་ག་བསྡེབས་པའི་སྒྲ་གདངས་དེའི་ནུས་པ་འཆད་པའི་སྐབས་མ་ཡིན་པའི་ཕྱིར་རོ། །
སྐབས་འདིར་འགྲེལ་བྱེད་སྔ་མ་རྣམས་ཀྱིས་མིང་གཞི་ཕྱི་མས་མིང་མཐའ་སྔ་མ་འདྲེན་པར་འདོད་ཀྱང་། ཤིན་ཏུ་མི་འཐད་དེ། སྐབས་འདིའི་འདྲེན་ཚུལ་ནི་ངག་གི་བརྗོད་པ་དང་སྦྱར་ནས་རྟོགས་དགོས་པའི་ཕྱིར་འདྲེན་བྱེད་སྔོན་དུ་མ་བརྗོད་པར་དེ་ལ་ལྟོས་པའི་འདྲེན་བྱའི་བརྗོད་པ་འབྱུང་བ་མི་སྲིད་དེ། དཔེར་ན། རྟག་ལྟ་བུའི་ངག་སྔོན་དུ་ཡོད་ན་དེའི་མིང་མཐའ་ག་ལ་ལྟོས་པའི་མིང་མཐའ་ཕྱི་མ་པ་ཡིག་འདྲེན་པར་འགྱུར་བ་ལྟ་བུ་ཁོ་ན་ཡིན་པའི་ཕྱིར་ཏེ། ཁྱེད་རྣམས་ལྟར་ན་ལྟོས་ས་མ་བྱུང་བའི་སྔོན་དུ་ལྟོས་ཆོས་གྲུབ་ཟིན་པ་དང་། འདྲེན་བྱེད་མ་བྱུང་བའི་སྔོན་དུ་དེ་ལྟོས་པའི་འདྲེན་བྱ་གྲུབ་ཟིན་པ་སོགས་ཕྱིན་ཅི་ལོག་མང་པོ་ཁས་ལེན་དགོས་པར་འགྱུར་བའི་ཕྱིར་ཏེ། འདྲེན་བྱེད་རྣམ་དབྱེ་དང་ཚིག་ཕྲད་སོགས་སུ་བྱས་ཤིང་། འདྲེན་བྱ་མིང་སྔ་མའི་མཐར་འདོད་པ་དེ་ལས། མིང་མཐའ་དེ་དག་ཉིད་ཀྱིས་ཀྱང་། ། སོགས་ཀྱི་གཞུང་འཆད་པའི་ཚེ་དངོས་འགལ་དུའང་སྨྲ་དགོས་པར་བྱུང་སྣང་བའི་ཕྱིར་རོ། །སྤྱིར་ཡང་མིང་མཐའ་སྔ་མས་ཕྱི་མ་འདྲེན། མིང་མཐའ་སྔ་ཕྱི་གཉི་གས་རྣམ་དབྱེ་སོགས་འདྲེན་པ་འདིའི་རྒྱུ་མཚན་ལ་ངེས་པ་མ་རྙེད་པས། འདྲེན་བྱའི་མིང་མཐའ་ངོས་མ་ཟིན་པ་དང་། འདྲེན་ཚུལ་གོ་ཟློག་དང་རྣལ་མ་གཉིས་ཐོན་པ་འདི་ལགས་སོ། །
གཞན་ཡང་སྐད་གཉིས་སྨྲ་བ་འགའ་ཞིག་གིས། དཀོནད་ཅོག། །རིནད་ཅེན། ཐབས་ཅིག། ལྷནད་ཅིག། ཡུངས་ཀར་ལ་སོགས་པ་རྣམས། དེེ་དག་གི་སྐད་དོད་ལེགས་སྦྱར་ལ་དཀོན་པའི་མཆོག་དང་རིན་ཐང་ཆེན་པོ་དང་གྲངས་ཀྱི་གཅིག་དང་ཁ་དོག་དཀར་པོ་སོགས་ཀྱི་དོན་མེད་པས་དེ་དང་དེའི་དོན་དུ་མི་འཁྲུལ་བའི་ཕྱིར་ཕོས་ཕོའི་མིང་མཐའ་དྲངས་པར་བཞེད་པ་མཁས་པའི་གསུང་ཡིན་ཡང་ཞིབ་མོར་དཔྱད་ན་གོ་བ་མི་བཟང་སྟེ། སྤྱིར་སྔར་བོད་དུ་མ་གྲགས་པའི་བརྡ་གསུང་རབ་སྒྱུར་བ་ན་དགོས་པར་བྱུང་ནས་ལེགས་སྦྱར་གྱི་སྐད་དང་སྦྱར་ཏེ་གསར་དུ་བཏགས་པ་རྣམས་ལ་ལེགས་སྦྱར་གྱི་བྱིངས་སོགས་དང་བསྟུན་ནས་དཔྱད་པས་སྣང་ལ་མ་ངེས་པའི་དོགས་པ་སེལ་ཞིང་བརྗོད་དོན་ཇི་བཞིན་དུ་རྟོགས་པར་འགྱུར་བ་ཡིན་མོད། འོན་ཀྱང་ཐམས་ཅད་ལ་དེས་མ་ཁྱབ་སྟེ། སྒྲ་དོན་དང་སྦྱར་ནས་བཏགས་པ་མ་ཡིན་པར་མཚོན་དོན་གྱི་སྒོ་ནས་མིང་གསར་དུ་སྦྱར་བ་དག་ཀྱང་ཡོད་ཅིང་དེ་འདྲ་ལ་སྐད་དོད་ཡོད་མེད་དང་ཁམས་དང་རྐྱེན་གྱི་ནུས་པས་འགྲུབ་མི་འགྲུབ་དཔྱད་དུ་མེད་པའི་ཕྱིར་ཏེ། ཀཱ་རི་ཀཱ། ཞེས་པ་ཚིག་ལེའུར་བྱས་པར་བསྒྱུར་ན་དེར་ཚིག་དང་ལེའུ་གཉི་གའི་སྐད་དོད་མེད་པ་དང་། པཉྫི་ཀཱ། དཀའ་འགྲེལ་དུ་བསྒྱུར་ན་དེར་དཀའ་བ་དང་འགྲེལ་བ་གཉི་གའི་སྐད་དོད་མེད་པ་སོགས་ཤིན་ཏུ་མང་བའི་ཕྱིར་རོ། །
གཞན་དུ་བོད་ཉིད་ལ་སྔར་ནས་གྲགས་པའི་བརྡ་འདོད་རྒྱལ་དང་རྗེས་སྒྲུབ་གང་ཡིན་ཡང་རུང་། དེ་འདྲའི་སྡེབ་སྦྱོར་ལ་ལེགས་སྦྱར་གྱིས་ཞུས་དག་བགྱིད་མི་གཏུབ་སྟེ། དེ་འདྲ་དེ་ལེགས་སྦྱར་ནས་བསྒྱུར་བ་ཡིན་ཡང་སྐད་གཉིས་པོའི་འཇུག་ཡུལ་མཚུངས་ཕྱིན། སྒྲ་དོན་གྱི་ཟུར་ཡན་ཆད་གཅིག་ཤོས་ལ་གང་ཡོད་གཅིག་ཤོས་ལ་ཡོད་པར་བར་བཀབ་ཅིའང་མི་དགོས་པའི་ཕྱིར་རོ། །དེས་ན། རཏྣ་ཞེས་པ་དཀོན་མཆོག་ཏུ་བསྒྱུར་བ་ནི། བོད་དུ་དམ་ཆོས་མ་དར་གོང་དུ་དཀོན་མཆོག་གི་བརྡ་མེད་པ་ལ་ལོ་ཙཱ་བས་རིན་ཆེན་དུ་བསྒྱུར་ན་དབྱིག་གི་མཆོག་དང་ཐུན་མོང་དུ་འགྱུར་བའི་ཕྱིར་ཐུན་མོང་མིན་པའི་དོན་མཚོན་པར་འདོད་ནས་ལུང་དང་སྦྱར་ཏེ་དཀོན་པ་དང་སྒྲ་དོན་དང་སྦྱར་ནས་མཆོག་ཅེས་བསྡེབས་ནས་མིང་གཅིག་ཏུ་མཛད་པ་ཡིན་ནོ། །དེ་ལྟ་ན་དཀོན་ཅོག་ཅེས་འདོན་པར་རུང་ངམ་ཞེ་ན། དེ་ལྟར་ཤིན་ཏུ་རུང་སྟེ་དཀོན་ཅོག་ཅེས་མིང་གཅིག་ཏུ་བྱེད་པའི་ཚེ་མཆོག་གི་སྒྲ་མིང་མཐར་འགྱུར་བས་ཕོས་ཕོའི་མིང་མཐའ་དྲང་བའི་ཕྱིར་སྔོན་འཇུག་མོ་ཡིག་ཕྱིས་ནས་མིང་གཞིའི་མ་ནིང་རང་སྡེའི་ཕོ་ཡིག་ཏུ་བསྒྱུར་བར་ཟད་ཀྱི་དོན་བསྒྱུར་བ་མ་ཡིན་པའི་ཕྱིར། ལེགས་སྦྱར་ལ་ཏྲི་ཏི་སྲྀདུ་བསྒྱུར་བ་བཞིན་ནོ། །དེས་ན་དཀོན་པ་དང་མཆོག་གི་སྒྲ་དོན་ལུང་ལ་བརྟེན་ནས་བཤད་དུ་ཡོད་པའི་ཕྱིར་དཀོན་མཆོག་ཅེས་འདོན་པ་འཐད་ཀྱི་དཀོན་ཅོག་ཅེས་མི་རུང་ངོ་ཟེར་བའང་གནད་འདི་མ་རྟོགས་པའི་ཅལ་ཅོལ་ཙམ་མོ། །རཏྣའི་སྒྲ་མཆོག་ལ་མི་འཇུག་པའང་མ་ཡིན་ཏེ། རང་རིགས་ཀྱི་མཆོག་ལ་འཇུག་པའི་ཕྱིར་ཏེ། རཏྣ་རང་རིགས་གཙོ་བོ་ལ། །ཞེས་འབྱུང་བའི་ཕྱིར། རཏྣའི་སྒྲ་ལ་མཆོག་གི་སྐད་དོད་དངོས་སུ་མེད་ཟེར་བ་དང་། ཙནྡྲ་པའི་ཨུཎ་སོགས་སུ་རཏྣ་ནི་གང་མཆོག་ཏུ་གྱུར་པ་དེའོ། །ཞེས་འབྱུང་བ་ལུང་འདྲེན་པའང་འགལ་བ་ཡིན་ཏེ། རཏྣཱི་སྒྲ་མཆོག་གི་སྐད་དོད་དངོས་སུ་འགྱུར་བར་ལུང་དེ་ཉིད་ཀྱིས་གྲུབ་པའི་ཕྱིར། །དཀོན་ཅོག་ཅེས་པ་བོད་ཀྱི་འདོད་རྒྱལ་ཡིན་ཟེར་བའང་མི་འཐད་དེ། དེ་བོད་དུ་ཐོག་མ་ནས་མ་གྲགས་ཤིང་མཁས་པ་དག་གིས་དོན་དང་བསྟུན་ནས་རྒྱུ་མཚན་དང་བཅས་པར་གསར་དུ་བཏགས་པའི་མིང་ཡིན་པའི་ཕྱིར་རོ། །དེ་བཞིན་དུ་རིན་པོ་ཆེའི་སྒྲ་བསྡུས་པས་རིན་ཅེན་ཞེས་པ་ནི་བོད་བརྡ་རྙིང་པ་ཡིན་ཞིང་རིན་ཐང་ཆེ་བའི་དོན་ཡང་ཡིན་མོད། དེའི་སྐད་དོད་ཀྱང་རཏྣ་ཡིན་པས་དེ་ལ་རིན་ཆེ་བའི་སྒྲ་བཤད་བྱེད་དུ་མེད་ཀྱང་དེ་དག་གི་འཇུག་ཡུལ་རང་རིགས་ཀྱི་གཙོ་བོ་ཡིན་པར་མཚུངས་པས་རིན་ཆེན་དུ་བསྒྱུར་བ་མི་འགལ་ཞིང་རིན་ཐང་ཆེ་བའི་དོན་ཉིད་མི་གཏོང་བ་ཕོས་ཕོའི་མིང་མཐའ་དྲང་བའི་དགོས་པས་རིནད་ཅེན་དུ་གྲུབ་པའང་ཡིན་ནོ། །བོད་སྐད་རིན་ཐང་ཆེ་བ་ཙམ་རང་རིགས་ཀྱི་མཆོག་ལ་མི་འཇུག་པའང་མ་ཡིན་ཏེ། དཔེར་ན། སྐྱེས་བུ་འགང་ཆེན་བུད་མེད་འགང་ཆེན་ནོར་འགང་ཆེན་ཞེས་གྲོང་པ་ལ་གྲགས་པའང་རིན་ཐང་ཆེ་བའི་ཚིག་ཙམ་ཡིན་པ་བཞིན་ནོ། །ཐབས་ཅིག་གམ། ལྷནད་ཅིག་གི་སྒྲའང་། དེའི་སྐད་དོད་ལ་གྲངས་གཅིག་གི་དོན་མེད་རུང་། བོད་བརྡ་རྙིང་པ་ཕྱོགས་གཅིག་གམ་ཆབ་གཅིག་གམ་ཚོམ་གཅིག་གི་དོན་ཅན་ཡིན་པས་གྲངས་ཀྱི་སྒྲར་ངེས་པ་དང་། ཡུངས་ཀར་ཞེས་པའང་ཡུངས་དཀར་ནག་གི་ཟླས་ཕྱེ་བའི་ཡུངས་ཞི་དཀར་པོ་ཡིན་པས་དཀར་ཞེས་པ་ཁ་དོག་ཉིད་དུ་གོར་མ་ཆག་པས་དེ་དག་གི་གཅིག་དང་དཀར་ལ་འཕུལ་བྱེད་དོར་བའང་མིང་མཐའ་འདྲེན་ཚུལ་ཉིད་དོ། །རྒྱུ་མཚན་འདིས། སྐད་དོད་དང་བོད་སྐད་གཉིས་ཀ་མཐུན་པའི་སྒོ་ནས་གྲངས་སུ་ངེས་པ་ལནད་གཅིག་ལྟ་བུ་ལའང་ག་འཕུལ་མི་འབྱུང་བའི་གནད་ཀ་དང་། སྐད་ཅིག་གི་ད་ཡིག་འབྱིད་མི་དགོས་པ་སོགས་ཀྱང་ཤེས་པར་འགྱུར་རོ། །གཞན་ཡང་རྒྱ་གར་ཞེས་པ་རྒྱ་ལས་ལོགས་སུ་གར་བའི་དོན་ཡིན་ཞེས་འཆད་ཅིང་རྒྱ་དཀར་པོའི་དོན་དུ་འདོད་པ་རྣམས་ལ་གཏི་ཐུག་ལུང་མེད་དུ་རྩི་བར་མཛད་ཀྱང་། ལེགས་པར་བརྟགས་ན་ཅིར་འགྱུར་མི་ཤེས་ཏེ། རྒྱ་ནག་པོ་ཞེས་པ་ཡུལ་དེའི་མི་རྣམས་ཞྭ་གོས་སོགས་ནག་པོ་ཤས་ཆེ་བ་ལས་གྲགས་ཤིང་གཅིག་ཤོས་དེ་ལས་བཟློག་པའི་ཕྱིར། རྒྱ་ནག་གི་ཟླས་དྲངས་པའི་རྒྱ་དཀར་པོ་ཞེས་བོད་དུ་གྲགས་པར་ཟད་མོད། འོན་ཀྱང་མིང་མཐའ་འདྲེན་ཚུལ་གྱིས་སྔོན་འཇུག་མ་ནིང་ད་ཡིག་ཕྱིས། མིང་གཞི་རང་སྡེའི་མོ་ཡིག་ཏུ་བར་སྒྱུབས་རྒྱ་གར་ཞེས་གྲུབ་པར་འཁུམས་པས་སོ། །དེ་བཞིན་དུ་ཀླད་ཀོར་དང་། སྟོད་ཀོར་དང་། པད་ཀོར་སོགས་ཀྱང་སྐོར་བའི་དོན་ལ། སྔ་མའི་རྗེས་འཇུག་གི་དབང་ལས་མགོ་མོ་ཡིག་ཡིན་པས་ཕྱིས་པ་སྟེ་སྐོར་བའི་སྐད་དོད་ཡོད་མེད་རྩད་གཅོད་མི་དགོས་ཤིང་ཐོ་སྐོར་ཉེ་སྐོར་སོགས་ལ་ས་མགོ་ངེས་པར་སྦྱར་དགོས་པ་ལྟ་བུའང་གོ་བར་བྱའོ། །དེས་ན་འདི་འདྲའི་རིགས་མིང་མཐའ་རྟགས་མཚུངས་འདྲེན་ཚུལ་སྔོན་གྱི་བརྡ་རྙིང་ལ་ཤིན་ཏུ་མང་བ་ཞིག་ཡོད་པ་འདྲའང་གསར་བཅད་ཀྱི་ཞུས་དག་མངས་པས་ད་ལྟ་ཕལ་ཆེར་ནུབ་པར་གདོན་མི་ཟ་བས་དཔེར་བརྗོད་ཀྱང་ཆེར་མི་སྣང་ལ། འདིས་ཐམས་ཅད་ལ་རིགས་འགྲེ་སྦྱར་ཆོག་པའང་མིན་པར་མངོན་ཏེ། འདི་རིགས་མིང་མཐའ་འདྲེན་ཚུལ་རྟགས་མཚུངས་བརྗོད་བདེ་མི་བདེ་སོགས་དང་བསྟུན་པའི་ཚིག་སྡུད་ལས་བྱུང་བའི་དམིགས་བསལ་གྱི་ཡི་གེའི་རྣམ་འགྱུར་ཞིག་ཏུ་མངོན་པའི་ཕྱིར་རོ། །དེས་ན། པད་ཅེས་པའི་ད་ཡིག་ཕོ་ཡིན་པས་ས་མགོ་མི་འཐོབ་ཅེ་ནའང་མི་འཐད་དེ། སྒྲུབ་སྐོར་དང་བཤད་སྒྲུབ་དང་མཛད་སྤྱོད་སོགས་མཐའ་ཡས་པ་ཞིག་ལ་ས་མགོ་མི་ཐོབ་པར་ཐལ་བའི་ཕྱིར་རོ། །ཞེས་ཟེར་བའང་སྙིང་པོས་དབེན་པར་རྟོགས་སོ། །
རྣམ་དབྱེ་སོགས་སྤྱིར་འདྲེན་ཚུལ།
གཉིས་པ་རྣམ་དབྱེ་སོགས་འདྲེན་ཚུལ་ལ། སྤྱིར་འདྲེན་ཚུལ་དང་། ནང་གསེས་འཇུག་ཚུལ་བཤད་པ་གཉིས།
དང་པོ་ནི།
མིང་མཐའ་དེ་དག་ཉིད་ཀྱིས་ནི། །
དེ་ཉིད་རང་གི་སྒྲ་མཐུན་པའི། །
ཆོས་དངོས་ལས་དང་བྱེད་པ་དང་། །
སྦྱིན་དང་འབྱུང་ཁུངས་འབྲེལ་བ་དང་། །
གནས་དང་བོད་པའི་སྒྲ་ཡང་དྲང་། །
གཞན་ཡང་སླར་བསྡུ་ལྷག་བཅས་དང་། །
འབྱེད་སྡུད་བསྣན་དང་བདག་པོ་དང་། །
དགག་སྒྲུབ་རྒྱན་དང་དུས་ལའང་འཇུག།
དེ་དག་སྔ་ཤུགས་འདྲེན་པས་འབྱུང་། །
ཞེས་པས་བསྟན་ཏེ། བཤད་མ་ཐག་པའི་མིང་མཐའ་སྔ་ཕྱི་དེ་དག་ཉིད་ཀྱིས། མིང་མཐའ་དེ་དག་ཉིད་རང་གི་རྟགས་མཚུངས་པའམ་བརྗོད་པ་བདེ་བས་སྒྲ་མཐུན་པར་གྱུར་པའི་རྣམ་དབྱེ་དང་པོ་ཆོས་དངོས་ཏེ་ངོ་བོ་ཙམ་བརྗོད་པ་དང་། གཉིས་པ་ལས་སུ་བྱ་བ་དང་། གསུམ་པ་བྱེད་པ་པོའམ་བྱེད་པ་ཙམ་དང་། བཞི་པ་སྦྱིན་པའི་ཡུལ་གྱིས་མཚོན་ནས་ཆེད་དུ་བྱ་བ་དང་། ལྔ་པ་འབྱུང་ཁུངས་དང་། དྲུག་པ་འབྲེལ་བ་དང་། བདུན་པ་གནས་གཞི་དང་། བརྒྱད་པ་བོད་པའི་སྒྲ་རྣམས་ཀྱང་དྲང་བར་བྱ་ཞིང་། དེ་བཞིན་དུ་གཞན་ཡང་རྣམ་དབྱེའི་ཡན་ལག་ཏུ་གྱུར་པའམ་མ་གྱུར་པའི་ཚིག་ཕྲད། སླར་བསྡུ་དང་། ལྷག་བཅས་དང་། འབྱེད་སྡུད་དང་། བསྣན་པ་དང་། བདག་པོ་དང་། དགག་པ་དང་། སྒྲུབ་པ་དང་། ཚིག་རྒྱན་དང་། དུས་ཏེ་ཚེ་སྐབས་ལ་འཇུག་པའི་སྒྲ་ལ་སོགས་པ་དེ་དག་རྣམས་ཀྱང་སྔ་མ་མིང་མཐའི་ཤུགས་ཀྱིས་འདྲེན་པར་བྱེད་པ་ན་སྦྱོར་ཚུལ་ལེགས་པར་འབྱུང་བ་ཡིན་ནོ། །ཞེས་སོ། །དེ་རྣམས་ཀྱི་དཔེར་བརྗོད་པ་ནི་སུམ་ཅུ་པའི་སྐབས་སུ་རྒྱས་པར་སྨོས་ཟིན་པ་དང་གཤམ་དུའང་ཕྱོགས་ཙམ་འཆད་པར་འགྱུར་བས་འདིར་མི་སྤྲོ་ཞིང་། སྐབས་འདིར་སྒྲ་མཐུན་ཞེས་པའི་དོན་རྟགས་མཚུངས་ཁོ་ན་ལ་ཕལ་ཆེར་གྱིས་བཞེད་ཀྱང་རྣམ་དབྱེ་དང་ཕྲད་སོགས་རྟགས་མཚུངས་ཁོ་ནས་འདྲེན་པར་མ་ངེས་ཤིང་གཙོ་བོར་བརྗོད་བདེ་བའི་སྒྲ་མཐུན་འདྲེན་པ་ཤས་ཆེ་བས་སྣང་བ་དང་། སུམ་ཅུ་པར། དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར། །བདུན་པ་ཉིད་ལ་བདུན་པ་སྟེ། ། ལྷག་མ་རྣམས་ལ་གྱ་སྦྱར་བ། །དེ་དག་ཨི་སྦྱར་འབྲེལ་བའི་ས། །ཞེས་སྒྲ་མཐུན་ཚུལ་གསལ་བར་གསུངས་པའང་། ད་བ་ས་ང་རྣམས་ཀྱི་མཐར་རྟགས་མཚུངས་འདྲེན་པ་འགྲིག་ཀྱང་གཞན་རྣམས་བརྗོད་བདེ་བ་ཙམ་ལ་དགོངས་པར་སྣང་བས། རྒྱུ་མཚན་འདི་རྣམས་དང་སྦྱར་ན་ཁོ་བོའི་འགྲེལ་ཚུལ་འདི་ཉིད་ལེགས་བཤད་དུ་རྟོགས་པར་འགྱུར་རོ། །
ནང་གསེས་འཇུག་ཚུལ་མདོར་བསྟན་པ།
གཉིས་པ་ནང་གསེས་ཀྱི་འཇུག་ཚུལ་འཆད་པ་ལ། མདོར་བསྟན། རྒྱས་བཤད་གཉིས་ལས།
དང་པོ་ནི།
དེ་དག་ནང་གསེས་གང་འཇུག་པ། །
མཐར་སྦྱར་འོག་མའི་མིང་དོན་ལས། །
ཞེས་པ་སྟེ། དེ་ལྟར་རྣམ་དབྱེ་དང་ཚིག་ཕྲད་དེ་དག་གི་ནང་གསེས་གང་དང་གང་ཞིག་འཇུག་པ་ནི་གཙོ་བོར་རྣམ་དབྱེའམ་འཕྲད་དང་བཅས་པའི་མིང་ཚིག་དེའི་མཐར་སྦྱར་རྒྱུའི་མིང་དོན་འོག་མ་ལས་ཤེས་པར་བྱའོ། །ཞེས་སྤྱིར་བསྟན་པའོ། །
རྒྱས་བཤད་ལ་རྣམ་དབྱེའི་ནང་གསེས་གང་ཞིག་འཇུག་པ།
གཉིས་པ་རྒྱས་བཤད་ལ་གཞུང་དོན་དང་། འཕྲོས་དོན་ནོ། །དང་པོ་ལ། རྣམ་དབྱེའི་ནང་གསེས་གང་ཞིག་འཇུག་པ་དང་། འཕྲད་ཀྱི་ནང་གསེས་གང་ཞིག་འཇུག་པ་གཉིས།
དང་པོ་ནི།
སྤྱི་འཇུག་ཡོད་དམ་བྱེད་པ་ཡོད། །
དེ་བཞིན་ཆེད་བྱེད་རྟེན་བྱེད་དང་། །
ལས་བྱ་བླང་བྱ་བསྒྲུབ་པར་བྱ། །
སྔོན་དུ་འོས་པ་གནས་པའམ། །
ཞེས་པས་བསྟན་ཏེ། དེ་ལ་རྣམ་དབྱེའི་ནང་གསེས་གང་དང་གང་འཇུག་པ་ནི་རྣམ་དབྱེ་སྦྱར་སའི་མིང་བདུད་རྩི་ལྟ་བུ་ལ་དེའི་རྗེས་སུ་སྤྱི་ལ་འཇུག་པའི་སྒྲ་གང་ཞིག་ལྟ་བུ་ཡོད་ན་མིང་སྔ་མ་ལ་རྣམ་དབྱེ་དང་པོ་འཇུག་པ་ཡིན་ཡང་བོད་སྐད་ལ་མིང་རྐྱང་དང་རྣམ་དབྱེ་དང་པོ་སོ་སོར་མཚོན་མི་ནུས་པས་མིང་རྐྱང་དེ་གར་གནས་པ་བདུད་རྩིས་གང་ཞིག་ལྟ་བུར་འགྱུར་བ་དང་། མིང་དེའི་མཐར་འཚོ་བར་བྱེད་ལྟ་བུ་བྱེད་པའི་སྒྲ་ཡོད་ན་རྣམ་དབྱེ་གསུམ་པ་འཇུག་པས་བདུད་རྩིས་འཚོ་བར་བྱེད། ཅེས་པར་འགྱུར་བ་དང་། དེ་བཞིན་དུ་སྦྱར་ཏེ་མིང་དེའི་མཐར་ཆེད་དུ་བྱེད་པའི་སྒྲ་མོས་པ་ལྟ་བུ་ཡོད་ན་རྣམ་དབྱེ་བཞི་པ་འཇུག་པས་བདུད་རྩི་ལ་མོས་པ་ཞེས་སུ་འགྱུར་བ་དང་། བརྟེན་ལྟ་བུ་རྟེན་བྱེད་ཀྱི་སྒྲ་ཡོད་ན་བདུན་པ་འཇུག་པས་བདུད་རྩི་ལ་བརྟེན་བཅས་དང་། བསྒྱུར་ལྟ་བུ་ལས་སུ་བྱ་བའི་སྒྲ་ཡོད་ན་གཉིས་པ་ཐོབ་པས་བདུད་རྩིར་བསྒྱུར་ཅེས་དང་། བླང་བར་བྱ་ལྟ་བུ་བླང་བྱའི་སྒྲ་ཡོད་ན་ལྔ་པ་འཇུག་པས་བདུད་རྩི་ལས་བླང་བར་བྱ་ཞེས་དང་། བསྒྲུབ་བྱ་རྒྱ་མཚོ་ལྟ་བུའི་སྒྲ་ཡོད་ན་དྲུགཔ་འཇུག་པས་བདུད་རྩིའི་རྒྱ་མཚོ་ཞེས་དང་། སྔོན་དུ་འབོད་པར་འོས་པའི་མིང་བདུད་རྩི་མ་ལྟ་བུ་ཡོད་ལ་དེ་ལའང་ལས་བཅོལ་རྒྱུ་ལྟ་བུ་འབོད་པར་འོས་པའི་དོན་ཡོད་ནའང་རྣམ་དབྱེ་དང་པོ་འཇུག་ཅིང་བོད་པ་གསལ་བྱེད་ཀྱི་སྒྲའང་སྦྱར་བར་བྱ་སྟེ། བདུད་རྩི་མ་ཀྱེ་བདག་ལ་འཆི་མེད་སྩོལ། །ཞེས་པར་འགྱུར་བ་སོགས་ཤེས་པར་བྱའོ། །ཞེས་པའོ། །འམ་ཞེས་པ་ནི་ཕྱི་མ་དང་སྦྲེལ་བའི་ཕྱིར་སྡུད་པའི་ཚིག་ཕྲད་དོ། །དེ་དག་ལ་དཔེར་བརྗོད་གཞན་ཡང་། མིང་མཐའ་ཙམ་གྱིས་རྣམ་དབྱེ་དྲངས་པ་དང་། མིང་མཐས་མིང་མཐའ་གཞན་དྲངས། དེས་རྣམ་དབྱེ་དྲངས་པའི་དབྱེ་བས་སོ་སོར་གཉིས་གཉིས་ཏེ། ལྷ་གང་། རྟག་པ་གང་། ལྷས་སྲུང་། དཀོནད་ཅོག་གིས་སྐྱོབ། འཚོལ་དུ་འགྲོ། སློང་བ་ལ་སྦྱིན། ཤིང་ལ་གནས། བརྟན་པ་ལ་གནས། ཆུར་འཆུ། གསལ་བར་བྱེད། ལས་ལས་འབྲས་བུ་འབྱུང་། བདེ་བ་ལས་དགའ་བ་སྐྱེ། གསེར་གྱི་བུམ་པ། རྟག་པའི་གོ་འཕང་། ཞེས་སོགས་རྒྱ་ཆེར་སྦྱར་བར་བྱའོ། །དེ་ལྟར་འདིར་གཉིས་པ་བཞི་པ་དྲུག་པ་བརྒྱད་པ་རྣམས་ཀྱི་འཇུག་དོན་མ་གཏོགས་པའི་སྤྱི་འཇུག་དང་བྱེད་པ་སོགས་གསུངས་པ་ནི་རྣམ་དབྱེ་དེ་རྣམས་ཀྱི་འཇུག་དོན་ཕྱོགས་རེའི་ཆ་ནས་དཔེར་བརྗོད་པའི་ཆེད་དུ་གསུངས་པ་ཡིན་གྱི་མཐའ་དག་པ་ནི་མ་ཡིན་ཏེ་དེ་དག་ཏུ་མི་གཏོགས་པའི་འཇུག་དོན་གཞན་ཡང་ཡོད་པའི་ཕྱིར་རོ། །དཔེར་ན། བདུད་རྩི་ཞེས་པའི་མིང་མཐར་ངེས་གཟུང་སོགས་ཀྱི་སྒྲ་ཡོད་ནའང་སྔ་མར་དང་པོ་འཇུག་པས་མིང་རྐྱང་ཉིད་དུ་གནས་པ། བདུད་རྩི་དེ། བདུད་རྩི་འདི་ལྟ་བུ་དང་། མིང་སྔ་མ་དེས་བསྒྲུབ་པར་བྱ་བའི་མིང་དོན་འོག་ཏུ་གནས་པ་ལ་སྔ་མར་བྱེད་པ་པོ་དང་མཚུངས་པའི་རྒྱུ་མཚན་གྱིས་གསུམ་པ་འཇུག་པ། བརྗིད་པས་ཉི་མ་དང་མཚུངས། དུ་བའི་རྟགས་ཀྱིས་མེ་ཡོད་པར་གྲུབ། ལྟ་བུ་དང་། མིང་མཐར་དེ་ལས་བྱུང་བའི་སྒྲའམ། དགར་བྱའི་སྒྲའམ། བསྒྲུབ་བྱའི་སྒྲ་ཡོད་ན་འབྱུང་ཁུངས་སོགས་ཀྱི་ལྔ་པ་འཇུག་པ། ས་གཞི་ལས་མྱུ་གུ་འཁྲུངས། རྒྱ་མཚོ་ནས་རིན་པོ་ཆེ་འབྱུང་། ཚངས་པ་ལས་སངས་རྒྱས་ཁྱད་པར་འཕགས། ནག་པ་ལས་སྲིད་སྒྲུབ་འཕོང་སྐྱེན། མི་རྟག་པ་ལས་དངོས་པོར་གྲུབ། ལྟ་བུ་དང་། མིང་མཐར་རྟེན་བྱེད་ཀྱི་སྒྲ་དངོས་མ་ཡིན་ཡང་རྟེན་བྱེད་ལྟར་སྣང་བའི་བྱ་བའི་ཚིག་ལ་སོགས་པ་ཡོད་པ་འགའ་ཞིག་ལའང་བདུན་པ་འཇུག་པ། མཛུབ་རྩེར་གླང་ཆེན་མཐོང་། མཚོན་ཁར་བསད། ལྟ་བུ་སྟེ་འདིས་མཚོན་ནས་འཇུག་དོན་དང་སྦྱོར་ཚུལ་གཞན་ཡང་རྒྱས་པར་རྟོགས་པར་བྱའོ། །
སྐབས་འདིར་ཡང་། ཁ་ཅིག་གིས། སྤྱི་འཇུག་གང་ལྟ་བུར་ངོས་བཟུང་ནས་དེས་རྣམས་དབྱེ་འདྲེན་པ་དང་། དྲུག་པ་མ་གཏོགས་པའི་བྱེད་པ་ལ་སོགས་པའི་སྒྲ་རྣམ་དབྱེར་ངོས་བཟུང་ནས་དེས་ཕྱི་ཚིག་འདྲེན་པར་འདོད་པ་ནི་ཤིན་ཏུ་མི་རིགས་ཏེ་གཞུང་དོན་དང་དངོས་སུ་འགལ་བའི་ཕྱིར་ཏེ། མཐར་སྦྱར་རྒྱུའི་འོག་མའི་མིང་དོན་སྤྱི་འཇུག་ནས་བསྒྲུབ་བྱའི་བར་གང་ཡང་རུང་བ་ཡིན་པར་དེ་ལས་མིང་སྔ་མའི་མཐར་རྣམ་དབྱེ་དང་པོ་ནས་དྲུག་པའི་བར་གང་ཡང་རུང་བ་འཇུག་པར་དཀྱུས་གཅིག་ཏུ་གསལ་བར་བསྟན་པ་ལས་ཕྱིན་ཅི་ལོག་ཏུ་སྨྲས་པའི་ཕྱིར། གཞན་ཡང་དེ་ལྟར་འདོད་ན། དེ་དག་ནང་གསེས་གང་འཇུག་པ། །ཞེས་པ་དང་འགལ་ཏེ། སྤྱི་འཇུག་གིས་རྣམ་དབྱེ་འདྲེན་ཟེར་བ་ཙམ་དང་། བྱེད་པ་སོགས་རྣམ་དབྱེས་རང་རང་དང་འབྲེལ་བའི་ཕྱི་ཚིག་འདྲེན་ཟེར་བ་ཙམ་ལས་རྣམ་དབྱེའི་ནང་གསེས་གང་འཇུག་ཕྱོགས་ཙམ་ཡང་མ་བསྟན་པར་ཐལ་བའི་ཕྱིར་རོ། །གཞན་ཡང་ཁྱེད་ལྟར་ན། གཞུང་འདིར་བྱེད་པའི་སྒྲས་བསྟན་པའི་བྱེད་ལས་དེ་བྱེད་པ་པོ་དང་། ཆེད་དུ་བྱེད་པའི་ལས་དེ་ཆེད་དུ་བྱ་བ་དང་། རྟེན་པར་བྱེད་པ་དེ་བརྟེན་བྱ་དང་། ལས་ཀྱི་བྱ་བ་དེ་ལས་བྱ་རྒྱུ་དང་། བླང་བྱ་དེ་གང་ལས་བླང་བའི་གནས་སུ་ཁས་བླངས་པར་སོང་བས། གཞུང་འདི་དང་འགལ་བ་ལྟ་ཅི་སྨོས་ཐ་སྙད་ཀྱི་གཙུག་ལག་ཕྱོགས་ཙམ་ཡང་མ་རྟོགས་པའི་རྫོབ་ཐམས་ཅད་བསྟན་པར་ཟད་དོ། །གཞན་ཡང་སྔོན་དུ་བོད་པ་གནས་པའམ། ཞེས་པར། བོད་པའི་སྒྲ་ཀྱེ་སོགས་སྔོན་དུ་གནས་པས་འབོད་རྒྱུའི་མིང་འདྲེན་པར་འབྲུ་གཉེར་བའང་མི་འཐད་དེ། སྤྱིར་སུམ་ཅུ་པར་འབོད་པའི་སྒྲ་མིང་གི་སྔོན་དུ་སྦྱར་བ་ཤས་ཆེར་བར་གསུངས་ཀྱང་། འདིར་དམིགས་བསལ་དུ་མིང་གི་མཐར་སྦྱར་ཚུལ་གསུངས་པ་ཡིན་པའི་ཕྱིར། གྲུབ་སྟེ་འདིར་མིང་མཐའི་རྗེས་འཇུག་གིས་རྣམ་དབྱེ་བརྒྱད་ཀ་འདྲེན་ཚུལ་འཆད་པའི་སྐབས་ཡིན་པ་གང་ཞིག། སྔོན་དུ་འོས་པ་ཞེས་པའང་གང་ལ་འབོད་པར་འོས་པའི་མིང་སྔོན་དུ་གནས་པ་ལ་དགོངས་པའི་ཕྱིར། ཕྱི་མ་གྲུབ་སྟེ། རྣམ་དབྱེ་གཞན་རྣམས་མཐར་སྦྱར་རྒྱུའི་མིང་དོན་ལ་ལྟོས་དགོས་ཀྱང་བོད་པའི་སྒྲ་དེ་རྣམས་དང་མི་མཚུངས་པའི་དམིགས་བསལ་བསྟན་པའི་ཕྱིར་དེ་ལྟར་གསུངས་པར་ངེས་པའི་ཕྱིར་རོ། །