བསྟན་འཛིན་ཆོས་དབྱངས།་ འཛིན་གྲྭ་བཅུ་པ། སྦེལ་ཀོབ་སམ་བྷོ་ཊ། སློབ་གྲྭའི་ནང་དང་ཐོག་འགྲོ་བའི་དུས་ནས་ད་བར། མི་རྒན་པ་སུ་ཐུག་ཀྱང་དམིགས་ཡུལ་དང་འབྲེལ་བའི་དྲི་བ་འདྲི་ཡི་རེེད། དེ་གང་ཡིན་ཟེར་ན་མི་ཚང་མས་དམིགས་ཡུལ་དེ་གལ་ཆེན་པོ་ཡིན་པ་ཤེས་ཀྱི་ཡོད་ཙང་རེད། མི་མང་པོས་ཆུང་དུས་སྐབས་སུ་མི་གཞན་གྱི་དམིགས་ཡུལ་དང་འབྲེལ་བའི་དྲི་བ་འདྲི་དུས་བསམ་གཞིག་གང་ཡང་མ་བྱེད་ནས་ལན་ལས་སླ་པོའི་ངང་ལ་རྒྱག་པ་དང་། ཆེན་པོ་ཆགས་དུས་སོ་སོར་གང་བྱེད་འདོད་ཡོད་པ་མ་ཤེས་ནས་བེད་མེད་ལྷག་གི་ཡོད། ངའི་བསལ་བློའི་ནང་སོ་སོའི་མ་འོངས་པའི་དམིགས་ཡུལ་དེ་སོ་སོའི་དབྱིངས་དང་འབྲེལ་བ་ཞིག་བདམ་ཐུབ་ན། མ་འོངས་པ་ལས་ཀ་བྱེད་དུས་འདོད་བློ་ཁེངས་པ་ཚོར་བ་དང། དགའ་ཚོར་སྐྱེས་ཀྱི་རེད། དེ་འདྲ་སོང་ཙང་ང་རང་ཡང་ངའི་མ་འོངས་པའི་དམིགས་ཡུལ་དེ་སོ་སོའི་དབྱིངས་དང་འབྲེལ་བ་བྱེད་པའི་འཆར་གཞི་ཡོད། སྤྱིར་བཏང་ནས་ང་རང་ཚན་རིག་སློབ་ཚན་སྦྱང་བར་དགའ་པོ་ཡོད། རྒྱུན་དུ་ང་ཚོའི་རྒྱུགས་སྤྲོད་བཏང་རྗེས་གྲུབ་འབྲས་ནང་ངའི་ཚནརིག་གི་བྱས་འབྲས་དེ་ག་དུས་ཡིན་ཡང་ཡག་པོ་ཐོབ་ཀྱི་ཡོད། དེ་གང་ཡིན་ཟེར་ན། སོ་སོར་དེ་ལ་དབྱིངས་ཡོད་པའི་སློབ་ཚན་དེ་རྒྱུན་གཏན་དུ་སྦྱང་གི་ཡོད་དུས་རྒྱུགས་སྤྲོད་ལ་ཡང་བརྒྱ་ཆ་ཡག་པོ་ཐོབ་ཡོང་གི་འདུག ང་རང་ན་ཆུང་ནས་ད་བར་སྨན་པ་ཚད་ལྡན་ཞིག་ཆགས་འདོད་ཡོད། རྒྱུ་མཚན་ནི། སྨན་པའི་སློབ་སྦྱོང་དེ་ངའི་དབྱིངས་དང་མཐུན་པ་འདུག། ངས་མི་གཞན་ལ་སྨན་བཅོས་བྱེད་ནས་སྤྱི་ཚོགས་ལ་ཞབས་ཞུ་ཞུ་ཐུབ། སྨན་ཁང་ལ་སྨན་པས་གཞན་ལ་སྨན་བཅོས་བྱེད་ནས་རོགས་པ་བྱས་པ་མཐོང་དུས་ང་རང་གི་སེམས་ནང་དགའ་ཚོར་ཆེན་པོ་སྐྱེས་པ་དང། མ་འོངས་པ་དེའི་སྒང་ལ་ལས་ཀ་བྱེད་པའི་སེམས་ཤུགས་མང་བ་སྐྱེས་ཀྱི་འདུག ངས་སྐད་ཆ་དེ་ཁ་ནས་གང་བྱུང་་ལབ་པ་ཞིག་མིན། ང་རང་སེམས་པ་གཏིང་ནས་པསྨན་པ་བྱེད་འདོད་ཡོད། ངའི་མཐོང་སྣང་ལ་སྨན་པ་ཚད་ལྡན་ཞིག་ཡིན་ན། མི་ལ་ཕན་ནུས་ལྡན་པ་དང་གུས་ཞབས་ཅན། བློ་གཏད་བཅོལ་ཆོག་མཁན། རང་ཤེད་མེད་མཁན་བཅས་ཆ་རྐྱེན་ཚང་དགོས་པ་རེད། གལ་སྲིད་མི་ཞིག་སྨན་པའི་སློབ་སྦྱོང་ཆ་ཚང་ཚར་ནས་སྨན་པ་ཞིག་ཆགས་པ་རེད། ཡིན་ཡང་ཁོང་ལ་ཆ་རྐྱེན་དེ་རྣམས་ནས་གཅིག་ཀྱང་ཚང་མེད་ན། མི་དེ་སྨན་པ་ཚད་ལྡན་ཞིག་ཆགས་མི་ཐུབ། གལ་སྲིད་མི་ཞིག་ཆ་རྐྱེན་དེ་ཚང་མ་ཚངས་ཡོད་ན་སྤྱི་ཚོགས་ནང་ལ་ལས་ཀ་གང་བྱས་ཀྱང་ལམ་ལྷོང་ཅན་གྱི་མི་ཚེ་ཞིག་སྐྱེལ་ཐུབ། ད་ལྟ་ང་རང་འཛིན་གྲྭ་བཅུ་པའི་ནང་སློབ་སྦྱོང་བྱེད་བཞིན་ཡོད། དེང་སང་ང་ཚོའི་སློབ་གྲྭའི་དབྱར་ཁའི་གུང་སེང་ཡིན་ཙང་ང་རང་ད་ལོའི་དབྱར་ཁའི་གུང་སེང་དེ་ལ་ཕྱུགས་ནད་སྨན་ཁང་གི་ནང་ལ་ལས་ཀ་བྱེད་པའི་གོ་སྐབས་བཟང་པོ་ཞིག་ཐོབ་བྱུང། དེར་ངོས་རང་ནས་ཉམས་མྱོང་མང་པོ་བསགས་པ་ཡིན། དཔེར་ན། ངས་ཁྱི་དང་ཞི་མི་ལ་སྨན་ཁབ་རྒྱག་པ་དང་སེམས་ཅན་ལ་རྨ་བཟོས་བ་ཡིན་ན་དེ་ལ་སྨན་བཅོས་གང་འདྲ་བྱེད་དགོས་མིན་ཤེས་སོང། སེམས་ཅན་ཁྱི་དང་ཞི་མི་ཡི་ཁ་ལག་བཟའ་མ་ཐུབ་ན་ནུས་ཤུགས་སྤེལ་བྱེད་དེ་གང་འདྲ་དགོས་མིན་དང། སེམས་ཅན་གྱི་སྐྱུག་པ་སྐྱུག་ནད་སྨན་ཁབ་གང་རྒྱག་དགོས་པ་ལ་སོགས་པའི་སེམས་ཅན་གྱི་ན་ཚ་འདྲ་མིན་གྱི་བཅོས་ཐབས་དང་སྨན་གྱི་སྐོར་ལ་གསར་པ་མང་པོ་ཤེས་སོང། དེ་མ་ཡིན་པར་ང་རང་གིས་སེམས་ཅན་ནད་པ་རྣམས་ལ་སྨན་བཅོས་བྱས་རྗེས་དྲག་པ་མཐོང་དུས་སེམས་ནང་དགའ་ཚོར་ཆེན་པོ་སྐྱེས་ཀྱི་འདུག ཕྱུགས་ནད་སྨན་ཁང་གི་སྨན་ཞབས་པས་སེམས་ཅན་དང་མི་གཉིས་མི་འདྲ་བ་རེད། ཡིན་ཡང་དེ་གཉིས་ཀྱི་སྨན་ཁབ་རྒྱག་སྟངས་དང་ནུས་ཤུགས་སྤེལ་བྱེད་སྤྲོད་སྟངས་དེ་འདྲ་བོ་ཡོད་པ་བཤད་བྱུང། ངས་དེར་ལས་ཀ་བྱས་ནས་མ་འོངས་པ་ང་ལ་ཕན་ཐོགས་པ་དང་སྨན་པའི་བྱེད་ལས་རྣམས་སྦྱངས་ན་ང་རང་ལ་དཀའ་ངལ་ཞེ་དྲག་འཕྲད་ཀྱི་མ་རེད། དེ་འདྲ་སོང་ཙང་ཕྱུགས་ནད་སྨན་ཁང་གི་ནང་སྨན་ཞབས་པས་སེམས་ཅན་གཞན་ལ་སྨན་བཅོས་བྱེད་དུས་ང་རང་གིས་དོ་སྣང་བྱས་ནས་བལྟས་པ་དང་། དེ་རྗེས་ངས་ཉིན་ལྟར་གང་ཤེས་པ་དེ་དག་དྲྭ་བའི་ནང་ལ་འབྲི་ཡི་ཡོད། ང་རང་འཛིན་གྲྭ་བཅུ་པ་ཐོན་རྗེས་འཛིན་གྲྭ་བཅུ་གཅིག་དང་བཅུ་གཉིས་ཚན་རིག་གི་སློབ་ཚན་སྦྱངས་པ་དང་། འཛིན་གྲྭ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུགས་ལ་བོད་པ་ཡོངས་ནས་བརྒྱ་ཆ་ཡག་པོ་བླངས་ཡོད། དེ་དག་ནི་༸གོང་ས་༸སྐྱབས་མགོན་ཆེན་པོ་མཆོག་དང་བོད་གཞུང་ཤེས་རིག་ལས་ཁུངས་ཀྱི་བཀའ་དྲིན་ལས་བྱུང་བ་ཞིག་རེད། སྤྱིར་བཏང་ཤེས་རིག་ལས་ཁུངས་ནས་སློབ་ཕྲུག་མང་པོ་ལ་སློབ་ཡོན་འཐོབ་ཀྱི་ཡོད་རེད། སློབ་ཡོན་གལ་ཆེན་པོ་མང་པོའི་ནང་ནས་སྨན་པའི་སློབ་སྦྱོང་ཐོག་གི་སློབ་ཡོན་དེ་ཚན་རིག་སྡེ་ཚན་གྱི་སློབ་མ་ལྔ་ལ་མ་གཏོགས་ཐོབ་ཀྱི་མེད། སྤྱིར་བཏང་ནས་སློབ་ཕྲུག་མང་པོ་སྨན་པ་བྱེད་འདོད་ཡོད་ཀྱང། དེའི་ཐོག་ལ་སློབ་སྦྱོང་བྱེད་ཐུབ་ཀྱི་མེད། གང་ཡིན་ཟེར་ན། དེང་སང་སྨན་པའི་སློབ་སྦྱོང་ལ་དངུལ་ཧ་ཅང་མང་པོ་འགྲོ་ཡི་ཡོད་ཙང་ཕྲུ་གུ་མང་པོས་སོ་སོའི་ནང་མི་ཡི་གནས་སྟངས་ལ་བལྟས་ནས་སྨན་པ་བྱེད་པའི་དམིགས་ཡུལ་དེ་བློས་གཏོང་གི་ཡོད། དེ་འདྲ་སོང་ཙང་སློབ་ཡོན་དེ་སློབ་ཕྲུག་མང་པོ་ལ་གལ་ཆེན་པོ་ཆགས་ཀྱི་ཡོད། […]