བསྟན་འཛིན་བདེ་ཆེན།འཛིན་རིམ་གསུམ་པ། སཾ་བྷོ་ཊ་སི་ལྦི་པི་ཉིན་སློབ། ང་ཚོའི་སློབ་གྲྭའི་མིང་ལ་སཾ་བྷོ་ཊ་སི་ཝི་པི་ཡིན། སློབ་གྲྭའི་ནང་ཕྲུ་གུ་ ༡༢༣ ཙམ་ཡོད། ང་ཚོའི་སློབ་གྲྭ་ལ་འཛིན་གྲྭ་དང་པོ་ནས་བཅུ་པ་བར་དུ་ཡོད། ང་ཚོའི་སློབ་གྲྭའི་སྒོ་ནི་ནག་པོ་ཡིན། སློབ་གྲྭའི་སྒོ་ནས་འཛུལ་བ་དང་གཡས་ཕྱོགས་ལ་ཡི་གེ་སྦྱང་ས་དང་ཀློག་ས། སྡོད་ས་སྐྱིད་མདོག་ཁ་པོ་ཞིག་དང་གཡོན་ཕྱོགས་ལ་རྐང་རྩེད་སྤོ་ལོ་ཐང་ཆེན་པོ་ཞིག་ཡོད། དེ་ནས་ཡར་མདུན་ཕྱོགས་སུ་འགྲོ་ན་གཡོན་ལ་སློབ་ཕྲུག་ཆུང་བའི་རྩེད་མོ་རྩེས་ས་དང་གཡས་ཕྱོགས་ལ་འཛིན་རིམ་དང་པོ་ནས་ལྔ་པ་བར་གི་འཛིན་ཁང་ཡོད། འཛིན་གྲྭ་ལྔ་པའི་ཟུར་ལ་རི་མོ་ཁང་དང་དབྱིན་ཇི་ཁང་ཡང་ཡོད། ང་ཚོའི་འཛིན་གྲྭའི་མདུན་ཕྱོགས་ལ་བོད་ཡིག་ཁང་དང་དེ་ནས་དགེ་ལས་ཁང་ཆེན་པོ་ཞིག་ཡོད། དགེ་ལས་ཁང་གི་འཁྲིས་ལ་འཛིན་རིམ་ཆུང་བའི་ཨང་རྩིས་ཁང་དང་རྩེད་མོ་ཁང་ཡོད། དེ་ནས་ཡར་འགྲོ་བ་ཡིན་ན། མེ་ཏོག་ལྡུམ་རྭ་དང་མདུན་ལ་ཁ་ལག་ཟ་ས་དང་། ཡར་གཏོགས་ཙམ་འགྲོ་ན་ཐབ་ཚང་སླེབ་ཀྱི་རེད། ཐབ་ཚང་གི་གཡས་ཕྱོགས་ལ་སྤྱི་ཚོགས་རིག་གནས་ཁང་དང་མདུན་ལམ་སློབ་སྟོན་ཁང་། ཟློས་གར་ཁང་པ་བཅས་ཡོད། ཐབ་ཚང་གི་གཡོན་ཕྱོགས་ལ་ཚོགས་ཁང་ཆེན་པོ་ཞིག་ཀྱང་ཡོད། དགེ་ལས་ཁང་གི་རྒྱབ་ལ་བསིལ་སྤོལ་ཐང་དང་བསིལ་སྤོལ་ཐང་གི་གཡས་ཕྱོགས་ལ་སློབ་སྤྱི་ཡིག་ཚང་དང་འཛིན་རིམ་བརྒྱད་པ་ནས་བཅུ་པ་བར་གྱི་འཛིན་ཁང་ཡོད། དེ་ཚོའི་ཐོག་ཏུ་སློབ་ཕྲུག་ཆེ་བའི་དཔེ་མཛོད་ཁང་དང་ཨང་རྩིས། ཚན་རིག་བརྟག་དཔྱད་ཁང་། ཀློག་ཀླད་ཁང་བཅས་ལྷན་ཁང་མང་པོ་ཡོད། བསིལ་སྤོལ་ཐང་གི་ཟུར་དུ་འཛིན་རིམ་དྲུག་པ་དང་བདུན་པ་ཡོད་པ་མ་ཟད་བུ་དང་བུ་མོའི་གསང་སྤྱོད་ཀྱང་ཡོད། སློབ་སྤྱི་ཡིག་ཚང་རྒྱབ་ལ་ཚལ་འདེབས་ས་དང་ཟུར་དུ་ལས་བྱེད་ཀྱི་མོ་ཊ་དང་སྦག་སྦག་བཞག་ས་ཡོད། ང་ཚོ་སློབ་གྲྭ་ལ་དཔེ་ཁུག་ནག་པོ་འཁྱེར་དགོས་རེད། སློབ་གྲྭ་ལ་སྔ་དྲོ་ཆུ་ཚོད་བརྒྱད་པ་ལ་འབྱོར་ནས་ཐོག་མར་ཞལ་འདོན་ཚོགས་པ་དང་དེ་རྗེས་རང་སྦྱོང་སྐར་མ་ ༤༥ ཚར་བ་དང་བར་གསེང་སྐར་མ་ ༥ བཞག་ནས་ཚོགས་ཁང་ནང་དུ་ཞོགས་པའི་ཞོགས་འཛོམས་བྱེད་ཀྱི་ཡོད། དེ་ནས་ཚོགས་ཐེངས་དང་པོ་ནས་བརྒྱད་པ་བར་ཚོགས་ནས་ཆུ་ཚོད་ ༤ པ་ལ་འཛིན་གྲྭ་གྲོལ་གྱི་ཡོད། ང་ཚོའི་སློབ་གྲྭ་ལ་ཁང་ཚན་བཞི་ཡོད་པ་ནི་པད་མ། གུར་ཀུམ། ཨུཏ་པལ། རྒྱ་སེ། བཅས་རེད། ང་ཚོའི་སློབ་གྲྭ་ལ་ལོ་ལྟར་ཁང་ཚན་བཞི་དབར་རྩེད་འགྲན་བྱེད་ཀྱི་ཡོད། དེ་ཉིན་ཧ་ཅང་སྐྱིད་པོ་ཡོད། ང་ཚོའི་སློབ་གྲྭའི་སློབ་ཕྲུག་ཆེ་བ་ཚོས་ཆུང་བ་ལ་རོགས་པ་དང་བྱམས་སྐྱོང་བྱེད་པ་དང་ཆུང་བའི་ཆེ་བ་ལ་གུས་ཞབས་བྱེད་ཀྱི་ཡོད། ང་ཚོའི་སློབ་སྤྱི་མཚན་ལ་ཚེ་རིང་ཆོས་འཕེལ་ཞུ་ཡི་ཡོད། ཁོང་ནི་སློབ་ཕྲུག་ལ་ཧ་ཅང་བྱམས་སྐྱོང་གནང་མཁན་དང་ཁོང་གི་རྣམ་དཔྱོད་ནི་ཧང་སང་ཡས་ཡག་པོ་ཡོད་ཙང་། ང་ཚོའི་སློབ་གྲྭའི་ཁོར་ཡུག་སྙིང་རྗེ་མོ་ཡོད་པ་མ་ཟད་ཤེས་ཡོན་སྦྱང་སའི་གནས་ཧ་ཅང་ཡག་པོ་བཟོས་ཡོད། ང་རང་ཉིན་ལྟར་སློབ་གྲྭར་འགྲོ་རྒྱུ་ཧ་ཅང་དགའ་པོ་འདུག ང་ཚོའི་དཔེ་མཛོད་ཁང་ལ་སྒྲུང་དེབ་ཧ་ཅང་མང་པོ་ཡོད། ང་རང་སྤྱི་བཏང་སྒྲུང་དེབ་བཀླག་རྒྱུ་ཧ་ཅང་དགའ་པོ་ཡོད་ཙང་། ངའི་ཨ་མ་ལགས་ཀྱིས་ང་ལ་སྒྲུང་དེབ་སློབ་གྲྭ་ལ་མེད་པ་དེ་འདྲ་ཕྱི་ནས་མངགས་ནས་མང་པོ་ཉོ་ཡི་ཡོད། ང་རང་ནང་ལའང་དཔེ་མཛོད་ཆུང་ཆུང་ཞིག་ཡོད། སློབ་གྲྭ་གུང་གསེང་སྐབས་ང་རང་སྒྲུང་དེབ་བཀླགས་ནས་ཨ་མ་ལགས་ལ་སྒྲུང་བཤད་ཀྱི་ཡོད། ང་རང་སློབ་གྲྭ་ལ་འགྲོ་རྒྱུ་ཧ་ཅང་དགའ་པོ་ཡོད་གང་ཡིན་ཟེར་ན། སློབ་གྲྭའི་ཁོར་ཡུག་ཧ་ཅང་སྙིང་རྗེ་མོ་ཡོད་པས་ང་ཚོ་དུས་ཚོད་སྟོང་པ་ལ་གྲོགས་མོ་མཉམ་དུ་སྒྲུང་དེབ་བཀླགད་ནས་སྡོད་ཀྱི་ཡོད། སློབ་གྲྭའི་དགེ་ལགས་ཚོ་ཡང་ཧ་ཅང་ཞི་འཇམ་པོའི་ངང་སློབ་ཚན་འཁྲིད་པ་མ་ཟད་དུས་ནས་དུས་སུ་ང་ཚོ་ལ་བསླབ་བྱ་རྒྱག་པ་དང་སྒྲུང་སྙན་པོ་དེ་འདྲ་ཡང་བཤད་ཀྱི་རེད། འཚམས་རེ་ང་ཚོའི་དགེ་ལགས་ཀྱི་ཕྱི་ལ་ཡི་གེ་སྦྱང་དུ་ཁྲིད་པ་དང་དགེ་ལགས་མཉམ་དུ་རྩེད་མོ་ཡང་མང་པོ་རྩེ་ཡི་ཡོད། སློབ་གྲྭའི་དགེ་ལགས་ཚང་མ་ཧ་ཅང་ཡག་པོ་ཡོད་པ་མ་ཟད་དགེ་རྒན་ཚང་མ་ནང་ཁུལ་མཐུན་པོ་ཡོད་རེད། དགེ་ལགས་ཚོས་སློབ་ཕྲུག་སློབ་སྦྱོང་ཞན་པ་ཚོ་ལ་སློབ་གྲྭ་གྲོལ་ཙར་བའི་རྗེས་ཡང་ན་དུས་ཚོད་སྟོང་པའི་སྐབས་ཟུར་དུ་སློབ་ཚན་སློབ་ཀྱི་ཡོད།

བསྟན་འཛིན་བདེ་གསལ།འཛིན་རིམ་ལྔ་པ། སཾ་བྷོ་ཊ་ཀེ་ལཱཤ་པུ་ར་ཉིན་སློབ། ངའི་ཕ་མ་གཉིས་ཀྱི་མཚན་ལ་ཚེ་རིང་སྒྲོལ་དཀར་ལགས་དང་བཀྲ་ཤིས་ལགས་ཟེར། ཨ་མ་ལགས་ནི་ང་ཚོ་དང་ལྷན་དུ་གནས་བཞུགས་ཡིན། པ་ལགས་ནི་ཨ་རིར་ཕྱག་ལས་གནང་བཞིན་ཡོད། ང་དང་ངའི་གཅེན་པོ་གཉིས་ཨ་མ་ལགས་ཀྱིས་ལྟ་སྐྱོང་གནང་བཞིན་ཡོད། ངའི་ཕ་མ་གཉིས་ལས་ངའི་ཨ་མ་ལགས་ནི། སྐུ་གཟུགས་སྐམ་ལོད་འཚམ་ལ་དབུ་སྐྲ་དཀར་པོ་ཐར་ཐོར་དང་། སྤྱན་དཀྱུས་རིང་ལ། བྱམས་བརྩེའི་འོད་འཕྲོད་པའི་སྤྱན་བཟུང་ལྡན་པ། ཞལ་རས་དཀར་ལ་ཡིད་དུ་འོང་བའི་ཀུན་གྱིས་བསྔགས་ཡུལ་གྱི་ཨ་མ་ཡོན་ཏན་གྱིས་རྒྱན་པ་ཞིག་ཡིན། ཨ་མ་ལགས་ནི་ང་དང་ངའི་གཅེན་པོའི་མདུན་ལམ་གྱི་ཆེད་དུ། སྐར་ཆ་རེ་རེའི་བདེ་སྐྱིད་བློས་གཏོང་བྱས་ནས། ཞོགས་པ་ཉི་མ་འཆར་བ་ནས་མ་ནུབ་པར་ནང་ལས་ཙག་ཙིག་ལ་བཞུགས་བཞིན། ཉིན་མ་ག་འདྲས་འདས་མིན་མི་ཚོར་བའི་ཨ་མ་ཁྱིམ་ལས་ལ་རྣམ་དག་བཞུགས་མཁན་ཞིག་ཡིན། ངའི་ཨ་མས་ཕྱག་ལས་གནང་སྟངས་ལ་མཚོན་ན། ཁོ་མོས་ཞོགས་པ་སྔ་ལངས་དང་དགོང་མི་ཕྱི་ཉལ་གྱིས། ང་དང་གཅེན་པོ་གཉིས་གསོ་སྐྱོང་གནང་བཞིན་ཡོད། ཁོང་ནི་ང་སྤུན་གཉིས་ཀྱི་མི་ཚེའི་ནང་གི་མིག་དཔེ་བཟང་ཤོས་ཤིག་ཡིན། ཁོང་གིས་ཁྱིམ་ལས་ཙམ་མ་ཡིན་པར། ང་དང་གཅེན་པོ་གཉིས་ཀྱི་སློབ་སྦྱོང་བྱེད་པའི་དུས་སུ། ཨ་མ་ལགས་ང་ཚོ་དང་མཉམ་ཞུགས་ཀྱིས་དོ་སྣང་ཆེན་པོ་གནང་གི་ཡོད། ཨ་མ་ལགས་ཀྱིས་ཕྱག་ལས་གནང་སྟངས་དེ་ལ་བལྟས་ནས་ང་སྤུན་གཉིས་སློབ་སྦྱོང་མ་བྱེད་ན་མི་འགྲིག་ཅེས་ཕན་ཚུན་བཤད་མྱོང་ཡོད་། ང་དང་གཅེན་པོ་གཉིས་སློབ་གྲྭ་ལས་ཡོང་བ་དང་དུས་ཚོད་འཕྲོ་བརླག་མ་གཏོང་བར་སློབ་སྦྱོང་དུས་ཐོག་ལ་བྱེད་པ་དང་ཕན་ཚུན་འཆམ་པོ་བྱེད་ཀྱི་ཡོད། གཅེན་པོས་བྱམས་སྐྱོང་བྱེད་པ་དང་སློབ་སྦྱོང་བྱེད་སྐབས་རོགས་པ་ཧུར་ཐག་གནང་གི་ཡོད། ངས་གཅེན་པོར་བརྩི་བཀུར་དང་གཅེན་པོའི་ལམ་སྟོན་གང་གནང་བ་རྣམས་ལ་ལག་བསྟར་སྐྱོད་ཀྱི་ཡོད། ཨ་མ་ལགས་ཀྱིས་ང་དང་གཅེན་པོ་གཉིས་ཀར་བྱམས་སྐྱོང་སྤྱི་སྙོམས་གནང་གི་ཡོད། སྤུན་ང་གཉིས་ཀྱིས་ཨ་མ་ལགས་ཀྱི་བྱམས་སྐྱོང་དང་མི་དཔེ་བཟང་པོ་ཞིག་གི་འོག་འཚར་ལོངས་བྱུང་བ་ལ་བརྟེན་ནས། སློབ་གྲྭ་ནང་དུ་སློབ་མ་གཞན་ཚོར་བྱམས་བརྩེ་དང་དགེ་རྒན་རྣམ་པར་གུས་བརྩི་བྱེད་ཤེས་པའི་སློབ་མ་ཞིག་ཡིན། ངའི་པ་ལགས་བཀྲ་ཤིས་ལགས་ནི་ང་ཚོ་དང་ཐག་རིང་ནུབ་ཕྱོགས་ལུང་པར་གནས་སྡོད་བྱེད་ཀྱི་ཡོད་ཀྱང་། ཨ་མ་ལགས་དང་ཁྱད་མེད། སྤུན་གཉིས་ཀར་སེམས་འཚབ་ཆེན་པོ་གནང་གི་ཡོད། པ་ལགས་ཀྱིས་ལས་ཀ་འབྲེལ་བ་ཆེན་པོ་དེ་འདྲ་ཞིག་གི་གནས་སྟངས་འོག་ཏུའང་ཨ་མ་ལགས་དང་སྤུན་གཉིས་ལ་ཁ་པར་གཏོང་གི་ཡོད། ང་ཚོའི་ཁྱིམ་ཚང་གི་འཚོ་ཐབས་བཟང་དུ་ཡོང་བའི་ཆེད་དུ་པ་ལགས་ང་ཚོ་དང་ཐག་རིང་སྡོད་དགོས་ཀྱི་ཡོད། པ་ལགས་ལོ་ལྟར་ང་ཚོ་ཐུག་འཕྲད་ཆེད་ཡོང་སྐབས་སུ། ཁོང་གིས་ང་ཚོའི་འདོད་པ་དང་མཐུན་པའི་འཕྲུལ་རིགས་དང་གོས་ལྷམ་སོགས་རིན་ཐང་ཅན་རིགས་སྣ་མང་ཞིག་ཁྱེར་བ་དེ་ཚོ་ལས། ཁོང་ནི་ང་ཚོ་དང་ཐག་རིང་གི་ཡུལ་དུ་སྐྱོད་དགོས་པའི་དགོས་པ་ཁ་གསལ་རྟོགས་བྱུང་། ངའི་པ་ལགས་ནི་པ་ལགས་གཞན་དང་ཁྱོན་ནས་མི་མཚུངས། པ་ལགས་ཀྱིས་ཨ་མ་ལགས་ཀྱི་ཁྱིམ་ཚང་སྐྱོང་ཕྱོགས་ལ་བསྔགས་བརྗོད་མང་པོ་གནང་གི་ཡོད། དེ་ཙམ་མ་ཡིན་པ། ངའི་པ་ལགས་ཟླ་བ་གཉིས་ཀྱི་གུང་གསེང་དུས་སུ། ཨ་མ་ལགས་ཀྱི་ཁྱིམ་ལས་ཆ་ཚང་ཞིག་གནང་གིན་ཨ་མ་ལགས་ཉལ་གསོའི་བྱེད་རྒྱུའི་དུས་ཚོད་སྤྲད་གནང་གི་ཡོད། ངའི་ཕ་མ་གཉིས་ཕན་ཚུན་བསམ་ཤེས་དང་གུས་བརྩི་ཆེན་པོ་གནང་ཚུལ་དེས། ངའི་སྤུན་གཉིས་ཀྱི་སེམས་སུ་བདེ་བ་ཆེན་པོ་ཞིག་སྟེར། ང་གཉིས་ཀྱང་ཕ་མ་ཁྱེད་ཀྱི་ང་ཚོར་བཅངས་པའི་རེ་བ་བསྒྲུབ་པར་འབད་བརྩོན་བྱེད་བཞིན་ཡོད། ངའི་གྲོགས་པོ་གྲོགས་མོ་ཚང་མར་འཛམ་གླིང་འདིའི་ནང་རང་ལ་བརྩེ་བ་དང་བྱམས་སྐྱོང་བྱེད་མཁན་ག་ཚོད་ཡོད་ཀྱང་། ཕ་མ་གཉིས་ལས་ལྷག་པ་རྙེད་རྒྱུ་རྩ་བ་ནས་མེད་པས། ཕ་མའི་བཀའ་དྲིན་བསམ་ཤེས་ཐུབ་པའི་སྒོ་ནས། ཕ་མ་རྣམས་ལ་ཁྱིམ་ལས་ལ་རོགས་པ་བྱེད་པ་དང་ཕ་མའི་བསླབ་བྱ་རྣམས་བློ་ལ་བཞག་ནས་ལག་ལེན་བསྟར་རྒྱུ་ནི་ཁྱེད་ཀྱི་མི་ཚེ་ནང་གི་དམིགས་ཡུལ་དང་པོ་དེ་ཡིན། རང་གི་ཕ་མ་མ་འདས་གོང་དུ་བསམ་བློ་འཁོར་ཐུབ་ན། ང་ཚོའི་མི་ཚེ་ནང་གི་བྱས་རྗེས་ཆེན་ཤོས་ཞིག་ཡིན། འཛམ་གླིང་ནང་གི་ཕ་མ་ཚང་མ་མི་ཚེ་བདེ་སྐྱིད་ངང་འཚོ་བའི་སྨོན་ལམ་ཡོད། ཕ་མ་གཉིས་ཚེ་རིང་།

བསོད་ནམས་ཆོས་སྒྲོན།འཛིན་རིམ་བཞི་པ། སཾ་བྷོ་ཊ་སི་ལྦི་པི་ཉིན་སློབ། ཕ་མ་མེད་ན་ང་ཚོ་འཛམ་གླིང་འདིའི་ནང་ཡོང་ཐབས་མེད། ཕ་མ་གཉིས་ཀྱི་བཀའ་དྲིན་ལ་བརྟེན་ནས་ང་འཛམ་གླིང་འདིའི་ནང་ལ་སླེབས་ཐུབ་པ་བྱུང་བ་མ་ཟད་ཕ་མ་གཉིས་ཀྱི་བྱམས་བརྩེ་དང་བལྟ་སྐྱོང་ཡག་པོ་དེའི་འོག་ལ་ང་ད་ལྟ་དེ་འདྲ་ཡག་པོ་ཆགས་ཐུབ་ཡོད། ཕ་མའི་བྱམས་བརྩེ་ལ་བརྟེན་ནས་ང་ཚོ་འཚར་ལོངས་བྱུང་བ་ཞིག་རེད། ཕ་མས་ང་ཚོ་ལ་གོམ་པ་རྒྱག་སྟངས་དང་སྐད་ཅ་བཤད་སྟངས་ལ་སོགས་པ་ཐོག་མ་ནས་སློབ་ཀྱི་ཡོད། ཕ་མ་ནི་ང་ཚོའི་དགེ་རྒན་དང་ཤོས་དེ་ཡིན་པ་མ་ཟད། ང་ཚོ་ལ་རོགས་སྐྱོར་གནང་མཁན་རྩ་ཆེ་ཤོས་དེ་ཡང་ཡིན། ང་ཚོར་དཀའ་ངལ་ག་འདྲ་ཞིག་བྱུང་ཡང་དང་པོ་ཉིད་ནས་ཕ་མས་ང་ཚོར་རོགས་པ་བྱེད་དུ་ཡོང་གི་ཡོད། ཕ་མས་ང་ཚོར་ཐོག་མ་ཉིད་ནས་ཡག་སྡུག་གང་ཡིན་བསླབ་བྱ་ཉིན་ལྟར་རྒྱག་གི་ཡོད། ང་ཚོར་དཀའ་ངལ་བྱུང་ན་ཕ་མ་སེམས་ཁྲལ་གྱིས་གཉིད་མ་ཁུག་པ་དེ་འདྲ་འབྱུང་གི་ཡོད། ང་ཚོ་ཕྲུ་གུ་མ་འབྱར་སྐབས་ཕ་མ་གཉིས་ཀྱིས་ཉིན་མཚན་ང་ཚོར་ལྟ་སྐྱོང་བྱེད་ཀྱི་ཡོད་པས། སོ་སོ་རང་ཉིད་ཆེད་དུ་དུས་ཚོད་གཏང་རྒྱུ་མ་རག་པ་མ་ཟད་མཚན་མོ་གཉིད་ཀྱང་ཁུག་རྒྱུ་རག་གི་མེད་པ་དེ་འདྲ་དཀའ་ངལ་མང་པོ་འབྱུང་གི་ཡོད། ང་ཚོར་ཡར་ཏོག་ཙམ་ཆེན་པོ་ཆགས་ན་སློབ་སྦྱོང་མ་སྦྱང་བའི་དཀའ་ངལ་སོགས་ཕ་མ་ལ་དཀའ་ངལ་རྫོགས་རྒྱུ་མེད་པ་དེ་འདྲ་ང་རང་མང་པོ་མཐོང་སོང་། ཕ་མས་སྤྲད་པའི་ཅ་ལག་ཚང་མ་གལ་ཆེན་པོ་རེད། གལ་ཏེ་ཕ་མ་མེད་ན་ང་ཚོ་ཡང་འཚོ་མི་ཐུབ། ཕ་མ་ནང་བཞིན་འཛམ་གླིང་འདིའི་ནང་དུ་གལ་ཆེན་པོ་དང་རྩ་ཆེན་པོ་སུ་གང་ཡང་མེད། ཕ་མས་ང་ཚོའི་ཆེད་དུ་སྐུ་ལས་ཧ་ཅང་མང་པོ་བསྐྱོན་ཡོད། ཕ་མས་ཕྲུ་གུའི་ཆེད་དུ་སོ་སོའི་སྐྱིད་པོ་གཏང་རྒྱུ་ཡང་བློས་གཏོང་གི་ཡོད། ཕ་མས་རང་གི་ཕྲུ་གུའི་ངོ་གདོང་ལ་གད་མོ་མཐོང་ན་སེམས་པ་ཧ་ཅང་དགའ་ཡི་ཡོད། ཕ་མའི་དཔེ་ཁུག་ནང་དངུལ་མེད་ཀྱང་དཀའ་ལས་མང་པོ་བརྒྱབ་ནས་དངུལ་བསགས་ནས་ང་ཚོ་ལ་གང་དགོས་པ་དེ་ཉོས་ནས་སྤྲོད་ཀྱི་ཡོད། ཕ་མས་ཕྲུ་གུ་ལ་གྱོན་ཆས་དང་རྔན་པ་ལ་སོགས་ཆ་ཚང་ཉོ་ཡི་རེད། གང་ཡིན་ཟེར་ན། སོ་སོའི་ཕྲུ་གུ་དེ་རྫིག་པོ་དང་སྙིང་རྗེ་མོ་མཐོང་བའི་ཆེད་དུ་རེད། ཕ་མས་ང་ཚོས་ལས་ཀ་སྡུག་ཅག་བྱས་པ་མཐོང་ན་མ་བྱེད་ལབ་ནས་བསླབ་བྱ་བཟང་པོ་རྒྱག་གི་རེད། ཕ་མ་གཉིས་ཀྱི་སེམས་ནང་ཕྲུ་གུ་རང་སྐྱིད་པོ་བྱུང་ན་དང་ཕྲུ་གུའི་འདོད་པ་བསྒྲུབ་རྒྱུ་ཤ་སྟག་བསམས་ནས་མི་ཚེ་སྐྱེལ་གྱི་ཡོད། ཕ་མས་བརྩེ་བ་དེ་འདྲ་སུ་གང་ལའང་སྤྲོད་མི་སྲིད། དེ་འདྲ་སོང་ཙང་། ཕྲུ་གུ་ང་ཚོའི་ཕ་མ་གཉིས་ཀྱི་བཀའ་དྲིན་ནམ་ཡང་བརྗེད་རྒྱུ་མེད། སོ་སོ་ད་ལྟ་ཕ་མའི་འཁྲིས་ལ་ཡོད་དུས་ཕ་མའི་བཀའ་དྲིན་བསམས་ནས་ཕ་མ་ལ་རོགས་པ་བྱེད་དགོས་པ་དང་ཕ་མ་མཉམ་དུ་དུས་ཚོད་བསྐྱལ་ནས་སེམས་ཀྱི་ཚོར་བ་བཤད་དགོས། ཕ་མས་སོ་སོ་ལ་བསླབ་བྱ་གང་བརྒྱབ་པ་དེ་སེམས་ནང་བཞག་ནས་ལག་ལེན་འཁྱེར་དགོས། ང་ལ་རྨ་ཆུང་ཆུང་གཅིག་བཟོས་ཀྱང་ཕ་མ་ཁོང་གཉིས་ཀྱི་སེམས་ཁྲལ་བྱེད་ཀྱི་འདུག ངའི་ཨ་མ་ལགས་བུ་བཅོལ་ཁང་གི་མ་མའི་ལས་ཀ་བྱེད་ཀྱི་ཡོད། ཨ་མས་ཉིན་ལྟར་བུ་བཅོལ་ཁང་དུ་འགྲོ་ནས་ཕྲུ་གུ་ཆུང་ཆུང་ཚོ་མ་འོངས་བོད་ཀྱི་སོན་རྩ་རེད་ཟེར་ནས་གཅེས་སྐྱོང་ཧ་ཅང་ཡག་པོ་བྱེད་ཀྱི་ཡོད། ཨ་མ་ལ་གླ་ཆ་ཞེ་དྲག་མེད་ཀྱང་ང་ལ་གང་དགོས་པ་ཚང་མ་ཨ་མས་ཉོས་ནས་སྤྲོད་ཀྱི་ཡོད། ངའི་པ་ལགས་ནི་ཁ་ལོ་བ་ཞིག་ཡིན། ཁོང་གིས་ང་ལ་ཧ་ཅང་བྱམས་སྐྱོང་གནང་གི་ཡོད། ང་རང་ཡང་པ་ལགས་དང་ཨ་མ་ལགས་ལ་ཧ་ཅང་བརྩེ་བ་ཡོད། ང་རང་མ་འོངས་པ་ཆེན་པོ་ཆགས་སྐབས་ཕ་མ་ཁོང་གཉིས་སྐྱིད་པོ་ཞིག་གཞག་རྒྱུ་དེ་ངའི་དམིགས་ཡུལ་དང་པོ་དེ་ཡིན། ངའི་ཕ་མའི་ཆེད་དུ་སྙན་ཚིག་ཆུང་ཆུང་ཞིག་བྲིས་ཡོད། ངའི་སྙིང་ནས་བརྩེ་བའི་ཕ་མ་གཉིས།།    ཁྱེད་ནི་བདག་ལ་ཤིན་ཏུ་གལ་ཆེ།།ཁྱེད་མེད་ན།།    ཉིན་མོ་ནི་ཟླ་བ་ལས་རིང་བ།།    ཁེར་རྐྱང་གི་ཚོར་བའི་ཡིད་སེམས་ཞུམ།།ཁྱེད་དང་ང་གཉིས་ཀྱི་བརྩེ་བ་ནི།།    དྲི་མེད་ཀྱི་ཙན་དན་བཞིན་ཡིན།།ངས་ཁྱེད་ཀྱི་དཀའ་ངལ་དེ་དག་ནི།།    དམར་རྗེན་སེམས་ཀྱི་དབུས་སུ་བཞག་ཡོད།།

པདྨ་ཚེ་རིང་།འཛིན་རིམ་ལྔ་པ། གོ་པལ་པུར་བོད་ཁྱིམ་སློབ་གྲྭ། ང་ཆུང་དུས་ཕ་མས་གྲོད་ཁོག་ནས་དོན་པའི་སྐབས་སུ་ངས་བུ་མོ་ཆུང་ཆུང་གཅིག་སྨན་ཁང་ནང་མཐོང་བས་ངའི་སེམས་ནང་ཚོར་བ་ཧ་ཅང་སྐྱིད་པོ་ཞིག་བྱུང་སོང་། ངའི་བསམ་བློའི་ནང་མོ་དང་ང་གཉིས་བར་ཚེ་སྔོན་མའི་འབྲེལ་བ་ཧ་ཅང་ཤུགས་ཆེན་པོ་ཞིག་ཡོད་པའི་ཚོར་བ་སྐྱེས་བྱུང་། ང་རང་ལོ་ན་ལྔ་ལ་སླེབ་དུས་ངའི་དྲིན་ཆེན་ཕ་མས་ང་རང་འཇིག་རྟེན་འདིའི་ནང་དཀའ་ངལ་མ་འཕྲད་པའི་ཆེད་དུ་ང་རང་སློབ་གྲྭ་ཞིག་ལ་བཏང་བྱུང་། ང་རང་ཐོག་མར་སློབ་གྲྭ་དེར་སླེབ་དུས་ང་ལ་གྲོགས་མོ་གཅིག་ཀྱང་མེད་པས་ང་རང་བར་གསེང་ལ་ལྟོགས་ཟས་གཅིག་པུ་ཟ་ཡི་ཡོད། ཉིན་ཞིག་ང་སློབ་གྲྭར་རྩེད་མོ་རྩེ་དུས་ང་གཡང་ལ་ཟག་གྲབས་བྱས་སོང་བ་ང་ཞེད་སྣང་སྐྱེས་སོང་། གློ་བུར་དུ་ངའི་ལག་པ་མི་ཞིག་གིས་འཇུས་ཙང་ངས་རྒྱབ་ལ་ལྟ་དུས་བུ་མོ་ཞིག་གིས་ངའི་ལག་པ་འཇུས་ནས་བསྡད་འདུག རྗེས་སུ་ངེད་གཉིས་གྲོགས་མོ་ཧ་ཅང་འཆམ་པོ་ཆགས་པས་ངེད་གཉིས་ཀྱི་བརྩེ་བ་རྡོ་ལ་རི་མོ་བཀོད་པ་ལྟར་ཡོད་པས་སློབ་གྲྭ་ནས་གྲོགས་མོ་ཡག་ཤོས་དེ་རེད། ངའི་མཐོང་སྣང་ལ་མོ་ནི་སྐུ་གཟུགས་རྩ་རི་སྨུག་དང་འདྲ། མདོང་ནི་གངས་ལས་དཀར་བ། སེམས་ནི་སྤྲིན་ལས་དཀར་བའི་བུ་མོ་སྙིང་རྗེ་མོ་ཞིག་ཡོད། མོས་སེམས་ཅན་རྣམས་ཀྱི་ཤ་ཟ་དུས་སྙིང་རྗེའི་ཚིག་རང་བཞིན་འདོན་གྱི་ཡོད། མི་སུ་ཞིག་ཡིན་ཡང་ངེད་གཉིས་ཀྱི་བརྩེ་བ་དེ་བྲལ་ཐུབ་པ་དཀའ་བ་ཡོད། ངེད་གཉིས་བཟའ་མ་ཟ་དུས་དང་ལས་བྱེད་དུས་ཀྱང་མཉམ་དུ་བྱེད་ཀྱི་ཡོད། མོ་ནི་སློབ་སྦྱོང་ཧ་ཅང་ཡག་པོ་ཡོད། ཉིན་ཞིག་ངའི་པ་ལགས་ཀྱིས་ང་ལ། གལ་ཏེ་ཁྱོད་ཀྱིས་ཡིག་ཚད་ཡག་པོ་བཏང་ན། ཁྱེད་རང་སློབ་གྲྭ་གཞན་དུ་གཏོང་གི་ཡིན་གསུངས་པས། ངས་ཡིག་ཚད་ཨང་གཉིས་པ་བླངས་པ་ཡིན། མོས་ཀྱང་ཨང་གསུམ་པ་བླངས་པར་བརྟེན། པ་ལགས་ཀྱིས་ ༢༠༡༩ ལ་ང་རང་གོ་པལ་པུར་བོད་ཁྱིམ་སློབ་གྲྭ་ལ་སློབ་སྦྱོང་སྦྱང་དུ་བཏང་སོང། ངས་མོ་ཧ་ཅང་དྲན་པས་དེ་དུས་ང་ཆུང་ཆུང་ཡིན་ཙང་ངས་མོ་ལ་ཁ་པར་གཏོང་དགོས་བསམས་ནའང་གཏོང་ཐུབ་མ་སོང་། ང་ལ་ཕ་མ་ལའང་ཁ་པར་གཏང་ཡ་རག་གི་མི་འདུག ང་ས་ཆ་ཐག་རིང་ལ་སློབ་སྦྱོང་སྦྱོང་བར་སླེབས་ཡོད། དེ་ནས་རྒྱ་ནག་གི་ན་ཚ་མི་མང་པོ་ལ་འགོས་ཙང་སློབ་གྲྭ་སྒོ་བརྒྱབ་པ་རེད། དེ་ནས་ངས་ཨ་མར་ངའི་གྲོགས་མོ་དེ་ག་པར་ཟེར། ཨ་མས་ཁྱེད་སློབ་གྲྭ་གཞན་ལ་འགྲོ་བ་ལྟར་མོ་ཡང་སློབ་གྲྭ་མ་ན་ལི་ལ་ཕྱིན་པ་རེད། ཅེས་གསུངས་སོང་། ང་རང་སེམས་པ་ཧ་ཅང་སྐྱོ་ནས་མོ་ག་དུས་སླེབས་ཀྱི་རེད་ལབ་པ་ཡིན། མོ་ཟླ་བ་ཁ་ཤས་རྗེས་ལ་སླེབ་ཀྱི་རེད་ཅེས་གསུངས་སོང་། ངས་མོ་ཉིན་མང་པོ་བསྒུགས་ནས་བསྡད་པ་ཡིན། རྗེས་སུ་མོ་སླེབས་འདུག་ཟེར་བའི་གནས་ཚུལ་ཞིག་གོ་བྱུང་བས་ང་ལམ་སང་ནང་ནས་དོན་ནས་རྔན་པ་ཁྱེར་སྟེ་ཧ་ཅང་དགའ་པོའི་ངང་ཕྱིན་པ་ཡིན། ངས་མོའི་ནང་ལ་མགྱོགས་པོ་སོང་ཏེ་མོའི་འགྲམ་ལ་ཕྱིན་པ་ཡིན། ངས་མོའི་ལག་པ་འཐམས་ཏེ་བསྡད་པ་ཡིན། ལམ་སང་ངས་མོ་ལ་ང་ངོ་ཤེས་སོང་ངམ། ཞེས་སྐད་ཆ་དྲིས་པ་ཡིན། ངས་མོ་ལ་ང་ཁྱེད་ཀྱི་ཆུང་དུས་ཀྱི་གྲོགས་མོ་པད་མ་ཡིན། ཞེས་ལབ་པ་ཡིན། མོས་ཁྱེད་སུ་ཡིན་ནམ་ཞེས་ལབ་སོང་། ང་ད་ལྟ་བར་དུ་པད་མ་ཟེར་བ་བུ་མོ་མཐོང་མྱོང་མེད། ཅེས་གསུངས་སོང་། ངའི་སེམས་ལ་རྡོ་ནག་པོ་ཞིག་འཛུལ་བའི་འཚོ་བ་སྐྱེས་ནས་དྭོགས་པ་ཟ་བས་མོས་མིག་ནང་མིག་ཆུ་མང་པོ་འཁོར་ནས་ངས་མོའི་ཨ་ནེ་ལ་ལབ་དུས། ཁོང་གིས་མོ་ད་ལྟ་རི་ལུང་ནས་གོམ་པ་བརྒྱབ་ནས་སླེབས་པ་རེད། ཞེས་གསུངས་སོང་བས་ང་སེམས་པ་ཧ་ཅང་སྐྱོ་ནས་ནང་དུ་མགྱོགས་པོ་སོང་བ་ཡིན། ཨ་མ་ལ་གནས་ཚུལ་ཚང་མ་ལབ་པ་དང་ང་ངུས་ནས་བསྡད་པ་ཡིན། ངའི་བསམ་བློའི་ནང་དུ་སྙིང་ལ་གྲི་ཟུག་པ་ལྟ་བུར་ཚོར་སོང་། རྗེས་སུ་ངས་མོ་ལ་ངའི་མིང་དྲན་པ་གསོ་ཡི་མི་འདུག བོད་ཁྱིམ་གོ་པུར་ལ་ང་ལ་གྲོགས་མོ་གསར་པ་ཞིག་རག་སོང་། མོ་ནི་སློབ་སྦྱོང་ཡག་པོ་དང་སྤྱོད་པ་ཡང་བཟང་པོ་ཡོད། མོའི་མིང་ལ་བསྟན་འཛིན་བདེ་སྐྱིད་རེད་འདུག མོ་ནི་མི་གཞན་ལ་རོགས་པ་བྱ་རྒྱུར་དགའ་པོ་དང་སྙིང་རྗེ་ཆེ་བའི་གྲོགས་མོ་ཞིག་ཡིན། ངས་མོ་མཐོང་མ་ཐག་རང་བཞིན་གྱིས་ཆོས་སྐྱིད་སྒྲོལ་མ་ཟེར་བའི་མིང་དེ་ཁ་ནས་དོན་སོང་། […]

ཟླ་མཛེས་བླ་བྲང་ཆང་ག་ཚང་།འཛིན་རིམ་བཞི་པ། སཾ་བྷོ་ཊ་ཀེ་ལཱཤ་པུ་ར་ཉིན་སློབ། ངའི་ཕ་ཡུལ་བོད་ནི། དཔེ་དེབ་ཀྱི་ནང་དུ་ལྷའི་ཞིང་ཁམས་ཤིག་དང་མཚུངས་ཞེས་བཀོད་འདུག་པ་དང་། ངའི་སྤོ་པོ་ལགས་དང་རྨོ་མོ་ལགས་གཉིས་ཀྱིས་ཞལ་ནས་དེ་བཞིན་འགྲེལ་བརྗོད་སྐྱོན་གནང་གི་འདུག ངས་པར་རིས་ནང་དུའང་དེ་བཞིན་མཐོང་བྱུང་། བོད་དེ་འཛམ་གླིང་ནང་གི་ས་ཆ་མཐོ་ཤོས་ཤིག་གི་ངོས་སུ་ཆགས་པ་གསལ་པོ་རེད་འདུག། བོད་ཀྱི་གནམ་གཤིས་ནི་ཧ་ཅང་གྲང་མོ་དང་ཚལ་རིགས་སོགས་མང་པོ་མེད་པ་གོ་མྱོང་ཡོད། བོད་ཀྱི་ནང་དུ་འཚོ་གནས་བྱེད་པའི་སེམས་ཅན་དང་འགྲོ་བ་མི་ཚོ་ཞི་བདེ་བག་ཕེབས་ངང་གནས་པ་དང་རང་འབྱུང་གཏེར་སྣ་འཛོམས་པའི་རྒྱལ་ཁབ་ཕྱུག་པོ་ཞིག་ཡིན། ང་རང་དཔེ་ཀློག་བྱ་རྒྱུ་ཧ་ཅང་དགའ་པོ་ཡོད། ངས་དཔེ་ཀློག་གི་བརྒྱུད་ནས་བོད་ཀྱི་སྐོར་མང་པོ་ཞིག་ཤེས་སོང་། བོད་ཀྱི་ལུང་པ་ཆགས་སྟངས། བོད་ཀྱི་རྒྱལ་པོ་ཐོག་མའི་འབྱུང་ཚུལ། བོད་དུ་ནང་ཆོས་དར་ཚུལ། འཛམ་གླིང་ནང་གི་རྒྱལ་ཁབ་གཞན་ཚོས་བོད་ཅེས་ཐོས་དུས་སྐྲག་སྣང་དང་འཇིགས་ཚུལ་སོགས་བྱས་ཏེ་སྟོབས་ལྡན་རྒྱལ་ཁབ་ཞིག་ཡིན་པ་དཔེ་དེབ་ནང་བཀོད་འདུག། དེ་ཙམ་མ་ཡིན་པ། ང་རང་བོད་ཀྱི་གནའ་བོའི་ཁ་རྒྱུན་སྒྲུང་གཏམ་བརྒྱུད་ནས་བོད་ཀྱི་ལོ་རྒྱུས་མང་པོ་ཞེ་དྲག་ཉན་མྱོང་ཡོད། རྩོམ་འདིའི་ནང་ངས་ཐོས་པའི་ང་ཚོ་ཕ་ཡུལ་གྱི་གཟི་བརྗིད་རེ་རེ་བཞིན་བརྗོད་འདོད་ཆེན་པོ་བྱུང་། བོད་དེ་ས་ཧ་ཅང་རྒྱ་ཁྱོན་ཆེ་ནའང་། གནས་སྡོད་བྱེད་མཁན་བོད་མི་ཉུང་ཉུང་ལས་མེད། བོད་ཀྱི་རྒྱལ་པོ་ཐོག་མར་ནི་གཉའ་ཁྲི་བཙན་པོ་དང་རྒྱལ་པོ་༤༣ ཕེབས་ཡོད། བོད་ཀྱི་རྒྱལ་པོ་སྐད་གྲགས་ཆེ་ཤོས་ནི། རྒྱལ་པོ་སྲོང་བཙན་སྒམ་པོ། རྒྱལ་པོ་ཁྲི་སྲོང་ལྡེའུ་བཙན། རྒྱལ་པོ་ཁྲི་རལ་གསུམ་ཡིན། རྒྱལ་པོ་ཁོང་གསུམ་གྱི་དུས་སུ་བོད་རྒྱལ་ཁབ་དེ་སྐད་གྲགས་ཆེན་པོ་ཡོད། རྒྱལ་པོ་སུམ་ཅུ་སོ་གསུམ་པ་སྲོང་བཙན་སྒམ་པོའི་སྐབས་སུ་བོད་ཡིག་བཟོས་གནང་། ཐོན་མི་སཾ་བྷོ་ཊ་རྒྱ་གར་ལ་ཕེབས་ནས་བོད་ཡིག་བཟོས་ཏེ་ང་ཚོའི་བོད་ཡིག་ཅེས་པ་དེ་བྱུང་བ་རེད། ང་ཚོའི་བོད་ཀྱི་རྒྱལ་པོ་ཚོ་གཟི་བརྗིད་ཆེ་བས། རྒྱལ་ཁབ་གཞན་གྱི་རྒྱལ་པོ་ཚོའི་རང་གི་སྲས་མོ་རྣམས་གནའ་མར་སྤྲད་པ་སོགས་བྱུང་མྱོང་བའི་ལོ་རྒྱུས་ཡོད། དཔེར་ན། རྒྱ་ས་ཀོང་ཇོ། བལ་ས་ཁྲི་བཙུན་སོགས་མང་པོ་བྱུང་ཡོད། བོད་ཀྱི་ནང་དུ་རྩ་ཆེ་བའི་ནང་ཆོས་དར་ཁྱབ་ཆེན་པོ་བྱུང་ཡོད། ནང་ཆོས་བྱེད་མཁན་བོད་མི་ཚོའི་བསམ་བློ་འཁྱེར་གསོ་ནི། དངོས་གནས་སྒོ་གསུམ་གྱི་སྤྱོད་པ་བཟང་པོ་དང་དགེ་བ་བསྒྲུབ་རྒྱུ་ལ་སྤྲོ་སྣང་ཆེན་པོ་ཡོད། སེམས་ཅན་གཞན་ལ་འཚེ་བ་བྱས་ན་སྡིག་པའི་ལས་སུ་གྱུར་བ་དང་གཞན་ལ་རོགས་པ་བྱས་ན་དགེ་བའི་ལས་ཤིག་ལ་བརྩི་སྲོལ་ཆེན་པོ་ཡོད། བོད་མི་ཚོའི་གཤིས་ཀ་བཟང་པོ་དང་དྲང་པོ་ཡོད། སྤྱི་ལོ་ ༡༩༥༩ ལོ་ནས་བོད་ནང་ལ་རྒྱ་ནག་གིས་དམག་མི་བཏང་ནས་བོད་ཆ་ཚང་རྒྱ་མིས་བཟས་པ་རེད། ང་རང་ལོ་རྒྱུས་དེ་ཉན་དུས་སེམས་པ་ཧ་ཅང་སྐྱོ་བ་དང་ལྷན་དུ་རྒྱ་མི་རེ་རེ་ལ་དགྲ་ཤ་བླང་རྒྱུའི་བསམ་བློ་འཁོར་མྱོང་ཡོད། རྒྱ་མིས་རང་གི་མི་འབོར་ཚོ་བོད་ནང་དུ་སྐྱིད་པོའི་འཚོ་བ་ཞིག་སྐྱེལ་བཅུག་པའི་ཆེད་དུ་བོད་དེ་བཟས་པ་རེད། རྒྱ་ནག་གིས་བོད་ཀྱི་དགོན་པ་མང་པོ་ཞིག་གཏོར་བཤིག་བཏང་ནས། ང་ཚོའི་དགོན་པ་དང་ལྷ་སྐུ་རྩ་ཆེན་མང་པོ་ཞིག་མཐོང་རྒྱུ་མེད་པ་རྩ་བརླག་བཏང་། ཡིན་ནས། རྒྱ་གར་ལུང་པའི་ནང་བོད་ཀྱི་དགོན་པ། ལྷ་སྐུ། དཔེ་ཆ་མང་པོ་ཞིག་བསྐྱར་གསོ་བྱས་ནས་མཇལ་རྒྱུ་ཡོད། ད་ལྟའི་དུས་སུ། བོད་ནང་དུ་ལྷག་པའི་བོད་མི་ཚོ་ལ་རང་དབང་གང་ཡང་མེད་པ། དཔེར་ན། བོད་ཡིག་མི་སློབ་པ། ནང་ཆོས་བྱེད་མི་ཆོག་པ། རང་གི་རྩ་བའི་བླ་མའི་སྐུ་པར་ཉར་མི་ཆོག་པ། […]

བསྟན་འཛིན་འཛོམས་པ།འཛིན་རིམ་བཞི་པ། སཾ་བྷོ་ཊ་ཀེ་ལཱཤ་པུ་ར་ཉིན་སློབ། ངའི་རྩོམ་གྱི་བརྗོད་གཞི་དེ་ནི། ངའི་ཕ་མ་རྣམ་པ་གཉིས་ཀྱིས། ང་ལ་དུས་རྟག་ཏུ་སློབ་གསོ་སྐྱོན་པའི་ཁྲོད་ལས་སློབ་གསོ་གལ་ཆེན་པོ་ཞིག་ཡིན། དེ་ནི་སེམས་བཟང་པོ་བྱེད་དགོས་གསུངས་པ་དེ་ཡིན། ངའི་ཕ་མ་ཚོ་ནི་ང་ཚོའི་གྲོང་སྔེའི་མི་ཚོ་དང་འཆམ་མཐུན་ཆེ་བ་དང་ཕན་ཚུན་རོགས་པ་སོགས་བྱ་རྒྱུའི་གོམས་གཤིས་བཟང་པོ་ཞིག་ཡོད། ཁོང་ཚོས་ང་ལ་རྒྱུན་དུ་མི་དང་འཆམ་མཐུན་དང་གཞན་ཕན་བྱེད་དགོས་པ་ཡང་ཡང་སློབ་གསོ་གནང་གི་ཡོད་པས། ངའི་བསམ་བློ་ནང་དེ་ནི་གཏན་དུ་འཇགས་པའི་གོམས་གཤིས་ཤིག་ཡིན། ང་རང་སེམས་པ་བཟང་པོ་བྱ་རྒྱུ་དགའ་པོ་ཡོད། ངས་ནང་དུ་ཕ་མ་ཚོའི་ཞལ་ལ་ཉན་པོ་བྱེད་པ་དང་ཁྱིམ་ལས་ཙག་ཙིག་རིགས་ཕ་མ་ཚོ་ལ་རོགས་པ་བྱེད་ཀྱི་ཡོད། ཕ་མས་ཡང་ཡང་དྲན་སྐུལ་བྱེད་མི་དགོས་པའི་སྒོ་ནས། རང་གི་ལས་འགན་རྣམས་དུས་ཐོག་ལ་བྱེད་ཀྱི་ཡོད། དེ་ནི་ངའི་ཕ་མ་ཚོའི་བཀའ་དྲིན་ལས་ཡིན། དེ་འདྲ་སོང་ཙང་། གཙོ་བོ་རང་གི་ཕ་མ་ཚོ་ཐུགས་མི་ཕམ་པ་ཞིག་བཟོ་རྒྱུ་ནི་གལ་ཆེན་པོ་ཞིག་ཡིན། རྒྱུ་མཚན་ནི། ང་ཚོ་ཚང་མ་ཕ་མའི་བྱམས་སྐྱོང་གིས་གསོ་སྐྱོངས་བྱས་པ་རྐྱང་རྐྱང་ཡིན། ཕ་མས་རང་གི་འདོད་པ་ཡོངས་སུ་སྤངས་ནས། ང་ཚོའི་ཆེད་དུ་ཉིན་མཚན་མེད་པར། དཀའ་ལས་བརྒྱབ་ནས། དངུལ་བསོགས་པ་དེ་ཚོ་ང་ཚོའི་ཆེད་དུ་བེད་སྤྱོད་གཏོང་གི་ཡོད། ཕ་མས་ང་ཚོ་དཀའ་ལས་གཅིག་རྐྱང་མྱོང་མི་དགོས་པའི་ཆེད་དུ་དེ་འདྲ་གནང་གི་ཡོད། སེམས་བཟང་པོ་བྱེད་སའི་ཡུལ་དང་པོ་དེ་རང་གི་ཕ་མ་དེ་ཡིན། རང་གི་ཕ་མ་ལ་གུས་ཞབས་དང་བཀའ་དྲིན་ཚོར་ཤེས་མཁན་ཞིག་ཡིན་ན། མི་དེས་མི་ཀུན་ལ་སེམས་བཟང་པོ་བྱེད་ཐུབ་རྒྱུ་ཐེ་ཚོམ་མེད་པ་ཞིག་ཡིན། ང་རང་སློབ་ཕྲུག་ཞིག་གི་ངོས་ནས། སློབ་གྲྭའི་ནང་དུ་རང་གི་སློབ་སྦྱོང་གནང་མཁན་དགེ་ལགས་རྣམས་ལ་སེམས་གཏིང་ནས་གུས་ཞབས་དང་ཁོང་ཚོས་གསུངས་པའི་བཀའ་སློབ་རྣམས་ལ་འབད་བརྩོན་བྱེད་ཀྱི་ཡོད། ང་ཚོའི་སློབ་གྲྭའི་དགེ་ལགས་རྣམས་ནི་སེམས་པ་དཔེ་བཟང་པོ་ཡོད། དགེ་ལགས་ཚོས་སློབ་སྦྱོང་དང་མཉམ་དུ་སྤྱོད་པ་བཟང་པོ་བྱེད་དགོས་པ་གསུང་གི་ཡོད། ཆ་མཚོན་ན། སློབ་གྲོགས་ཕན་ཚུན་འཁྲུག་འཛིང་མི་བྱེད་པ། ཕན་ཚུན་ཅ་ལག་གཡར་རེས་བྱེད་པ། གཞན་ལ་ཐུབ་ཚོད་བྱ་རྒྱུ་མེད་པ་སོགས་དྲན་སྐུལ་གནང་གི་ཡོད། དགེ་ལགས་ཀྱིས་གསུང་པ་བཞིན། ངས་སློབ་གྲྭར་སློབ་གྲོགས་ཚོ་དང་འཆམ་མཐུན་དང་ཕན་ཚུན་རོགས་པ་བྱེད་ཀྱི་ཡོད། སློབ་གྲོགས་ཚོ་དང་མཉམ་དུ་འབྲེལ་བ་ཡག་པོ་ཡོད། ངས་སློབ་གྲོགས་ཆུང་བ་ཚོས་འབུ་སྲིན་རིགས་ལ་རྡོག་བཙིར་གཏོང་སྐབས་སུ། ཁོང་ཚོར་བསླབ་བྱ་བརྒྱབ་པའི་སྒོ་ནས་གོམས་གཤིས་བཟང་པོ་ཕྱོགས་ལ་འཁྲིད་ཐབས་བྱེད་བཞིན་ཡོད། སློབ་གྲྭའི་ནང་གི་ཅ་ལག་རྣམས་བདག་ཉར་བྱེད་ཀྱི་ཡོད། འཛིན་ཁང་གི་ཅོག་ཙེའི་དངོས་སུ་ཞ་སྨྱུག་གིས་རི་མོ་བྲིས་པ་སོགས་ངས་བར་གསེང་དུས་སྐབས་འགྱིག་བསུབ་ཀྱིས་གཙང་མ་བཟོ་ཡི་ཡོད། འཛིན་དགེས་ང་ལ་སློབ་མ་ཚང་མའི་མདུན་དུ་སྟོད་བསྔགས་དང་དགའ་ཚོར་ཆེན་པོ་གནང་བྱུང་། དེ་ནི་ངའི་ཕ་མའི་གནང་བའི་བསླབ་བྱ་ཞིག་ཡིན། གཙོ་བོ་ངའི་རྨོ་ལགས་ནི། ཆོས་དད་ཆེན་པོ་ཞིག་ཡོད། ང་དང་གཅེན་མོ་ཚོ་ལ། གཞན་ལ་ཕན་པ་སྒྲུབ་མ་ཐུབ་ནའང་། གནོད་པ་བྱ་རྒྱུ་མེད་པ་དཔེ་དང་སྦྱར་ནས་བསྐྱར་ཟློས་མང་པོ་གནང་གི་ཡོད། ཁོང་གིས་གསུངས་པ་ཙམ་མ་ཡིན་པར། རྨོ་མོས་ང་ཚོས་མཚམས་རེ་ནོར་འཁྲུལ་སོགས་འབྱུང་སྐབས། རྨོ་མོས་བཟོད་སྒོམ་གྱིས་ཁོང་ཁྲོ་དང་བཀའ་བཀྱོན་རིགས་མ་གནང་བའི་སྒོ་ནས་བསླབ་བྱ་མིག་དཔེ་ལྡན་པ་ཞིག་གནང་གི་ཡོད། ངའི་རྨོ་ལགས་ནི། རྨོ་མོ་བློ་རྒྱ་ཡངས་པོ་ཞིག་ཡིན། ངའི་རྨོ་ལགས། ཁྱི་ཟ་མ་མ་རག་པ་ཚོ་ལ་ཟས་ཀྱི་སྦྱིན་པ་ཉིན་ལྟར་གཏོང་གི་ཡོད། […]