བསྟན་འཛིན་ཆོས་སྐྱིད། འཛིན་གྲྭ་ལྔ་པ། མེས་དབོན་གཙུག་ལག་དཔེ་སྟོན་སློབ་གྲྭ། ༄༅། །དེ་རིང་རེས་གཟའ་ཉི་མའི་ཉིན་རྩོམ་ཐུང་ཞིག་འབྲི་རྒྱུའི་བསམ་བློ་འཁོར་བྱུང་། ངས་རྩི་ཤིང་སྐོར་ལ་རྩོམ་ཞིག་འབྲི་རྒྱུ་ཡིན། རྩོམ་དེ་འབྲི་ཆེད་ངས་འབྲི་དེབ་ཅིག་དང་སྨྱུ་གུ་ཞིག་འཁྱེར་ཏེ་ཅོག་ཙེའི་སྟེང་བསྡད་ནས་བསམ་བློ་ཞིག་བཏང་པ་ཡིན། དེ་ནས་གློ་བུར་དུ་ང་ཚོས་འཛིན་གྲྭ་བཞི་པའི་སྐབས་རྩི་ཤིང་སྐོར་སྦྱངས་པ་དྲན་གསོས་སོང་། དེ་ནས་ཏོག་ཙམ་བསམ་བློ་བཏང་རྗེས་འབྲི་རྒྱུ་འགོ་བཙུགས་པ་ཡིན། ཐོག་མར་མིིའི་མི་ཚེ་ནང་རྩི་ཤིང་ནི་ཇི་ཙམ་གལ་ཆེན་པོ་ཡིན་པའི་སྐོར་ཞིག་འབྲི་འདོད་བྱུང་། རྩི་ཤིང་ནས་ང་ཚོར་ཟས་དང་འཚོ་རླུང་དང་དངོས་པོ་རིགས་འདྲ་མིན་བྱུང་གི་ཡོད། རྩི་ཤིང་ནི་རང་འཚོ་ཅན་ཞིག་ཡིན། ང་ཚོ་འཚོ་བར་ཟས་དང་ཆུ་དང་དྲོད་དགོས་ཀྱི་ཡོད་པ་ནང་བཞིན་རྩི་ཤིང་ལ་ཡང་ཆུ་དང་རྫས་བཅུད་དང་དྲོད་བཅས་དགོས་ཀྱི་ཡོད། ང་ཚོས་ནམ་རྒྱུན་དུ་བེད་སྤྱོད་གཏོང་བའི་དངོས་པོ་རྐུབ་བརྐྱག ཅོག་ཙེ། ཉལ་ཁྲི་དང་། ཤོག་བུ་དང་ཞ་སྨྱུག་ཀྱང་རྩི་ཤིང་ནས་བྱུང་གི་ཡོད། རྩི་ཤིང་ནི་སྲོག་ཆགས་མང་པོའི་སྡོད་གནས་ཀྱང་ཡིན། རྩི་ཤིང་འཚར་ལོངས་ཡག་པོ་བྱུང་བར་གཙོ་བོ་ཉི་འོད་ལ་བརྟེན་དགོས་ཀྱི་ཡོད། རྩི་ཤིང་ལ་ཉི་འོད་མ་ཕོག་པ་ཡིན་ན་རྩི་ཤིང་འཚར་ལོངས་བྱེད་ཐུབ་ཀྱི་མེད། རྩི་ཤིང་དང་ཤིང་ཏོག་ནི་མིང་གི་ཁྱད་པར་ཙམ་མ་གཏོགས་གཟུགས་པོར་ཕན་པ་གཅིག་པ་ཡིན། ཤིང་ཏོག་ནི་སོན་ཡོད་པའི་རྩི་ཤིང་གི་ཡན་ལག་ལ་གོ་ཡི་ཡོད། སྔོན་དུས་སུ་ཕྱི་དངོས་པོ་ཡར་རྒྱས་དེ་ཙམ་མེད་པའི་སྐབས་འཛམ་གླིང་དེ་ཆུ་དང་རྩི་ཤིང་གིས་ཁེངས་ཡོད། དེ་རྗེས་མཐུན་རྐྱེན་ཡག་ཏུ་ཕྱིན་པ་དང་ཁང་ཐོག་དང་མོ་ཊ། ཁ་པར་དང་འཕྲུལ་ཆས་རིགས་མང་པོ་གསར་གཏོད་བྱས་ཡོད། དེར་བརྟེན་མོ་ཊའི་རིགས་ལས་རླུང་འབགས་བཙོག་ཆགས་པ་དང་རྩི་ཤིང་དེ་ཚོ་གནས་མི་ཐུབ་པར་མི་ནད་པ་ཆགས་པ་སོགས་ཀྱི་དཀའ་ངལ་བྱུང་གི་ཡོད། ཁང་ཐོག་དང་མོ་ཊ་འགྲོ་སའི་ལམ་ཆེན་སོགས་བཟོས་པའི་ཆེད་རྩི་ཤིང་བཏུབ་དགོས་བྱུང་བས་སེམས་ཅན་མང་པོའི་སྡོད་གནས་ཀྱང་འཕྲོག་གི་ཡོད། ང་ཚོས་རྩི་ཤིང་སྲུང་སྐྱོབ་བྱེད་པ་དང་རྩི་ཤིང་མང་པོ་འདེབས་རྒྱུའི་ཐབས་ཤེས་བྱེད་དགོས། རྩི་ཤིང་ནི་ང་ཚོའི་སྤུན་མཆེད་ཡིན་བསམ་ཏེ་ལྟ་སྐྱོང་བྱེད་དགོས། ངའི་ནང་དུ་རྩི་ཤིང་མང་པོ་བཏབ་ཡོད། ཁ་ཤས་ཚལ་དང་ཁ་ཤས་མེ་ཏོག་གི་རིགས་ཡིན། ངའི་ནང་དུ་ཡོད་པའི་རྩི་ཤིང་ནང་ནས་དགའ་མོས་མང་ཤོས་བྱེད་ས་དེ་ནི་མེ་ཏོག་མུ་མེན་དེ་ཡིན། དེ་ནི་ངའི་ཚོན་དགའ་ཤོས་ཡིན་པ་དང་དབྱིབས་ཀྱང་སྙིང་རྗེ་མོ་ཡོད། ངའི་གྲོགས་མོ་ཚང་མས་སློབ་གྲྭའི་ནང་མེ་ཏོག་རེད་མ་རེད་ཅེས་པའི་དྲི་བ་གཏང་རྒྱུའི་རྩེད་མོ་ཡང་རྩེ་ཡི་ཡོད། ང་ཚོས་ནམ་རྒྱུན་མི་ཚེའི་ནང་བེད་སྤྱོད་བྱེད་རྒྱུའི་དངོས་པོ་མང་ཆེ་བ་ཚང་མ་རྩི་ཤིང་ལས་བྱུང་བ་ཞིག་ཡིན་པ་དང་། ང་ཚོས་རི་མོ་བྲིས་ཚར་རྗེས་ཚོན་མཐོང་རྒྱུའི་ཚོན་དེ་དག་ཀྱང་རྩི་ཤིང་ནས་བྱུང་བ་རེད། སྔོན་མ་ང་ཆུང་དུས་སྐབས་སུ་ཚོན་བདེ་སྤྱོད་མ་བཏང་བར་ནང་གི་ཕྱི་ནས་མེ་ཏོག་བཏོགས་ཏེ་ཤོག་བུའི་སྒང་ལ་བཞག་པ་དང་དེའི་སྟེང་དུ་རས་ཤིག་བཀབ་ཀྱི་ཡོད། དེ་རྗེས་དེ་སྒང་ལ་ཤུགས་ཀྱིས་མནན་པ་དང་རས་དེ་ཡར་བཀྱག་དུས་ཚོན་སླེབས་པ་དང་རི་མོ་ཡང་སྙིང་རྗེ་མོ་ཞིག་ཀྱང་ཡོང་གི་ཡོད། དེ་འདྲ་སོང་ཙང་ང་རྩི་ཤིང་ལ་དགའ་པོ་ཡོད་པ་མ་ཟད་དེའི་ཁྱད་ཆོས་ལ་ཡང་དགའ་པོ་ཡོད།

བསྟན་འཛིན་སྒྲོན་གསལ། འཛིན་གྲྭ་བཞི་པ། གུ་རུ་པུ་ར་སམ་བྷོ་ཊ་ཉིན་སློབ། ཚང་མ་ལ་བཀྲ་ཤིས་བདེ་ལེགས། དེ་རིང་ངས་ང་རང་གི་པཱ་ལགས་ཀྱི་སྐོར་ལ་རྩོམ་ཐུང་ངུ་ཞིག་རྒྱག་རྒྱུ་ཡིན། ངའི་པཱ་ལགས་ཀྱི་མཚན་ལ་བསྟན་འཛིན་ཤེས་རབ་ཟེར་གྱི་ཡོད། ངའི་རྨོ་མོ་ལ་ཕྲུ་གུ་བརྒྱད་ཡོད་པའི་ནང་ནས་ཆེ་ཤོས་བཞི་པ་དེ་རེད། ངའི་པཱ་ལགས་ཀྱིས་མི་སྐྱོ་པོ་མཐོང་ཚད་ལ་རྔན་པ་དང་དངུལ་ཅ་ལག་སོགས་གནང་གི་ཡོད་པ་དེ་ད་ལྟའང་ངའི་སེམས་ནང་གསལ་པོར་དྲན་ཡོང་གི་འདུག། ང་དང་འདྲ་བ་ངའི་པ་ལགས་ཀྱང་སོ་སོའི་སྐད་ཡིག་བོད་ཡིག་ལ་ཧ་ཅང་དགའ་པོ་མ་ཟད་ཡིག་གཟུགས་ཀྱང་ཧ་ལས་པའི་ཡག་པོ་ཡོད། ངའི་རྨོ་མོ་ལགས་ཀྱིས་གསུངས་ན་ངའི་པཱ་ལགས་ངའི་སྤོ་བོ་ལགས་དང་རྨོ་མོ་ལགས་ལ་ཧ་ཅང་གི་བརྩེ་བ་ཆེན་པོ་དང་གུས་ཞབས་ལྡན་པ་དེ་བཞིན་པཱ་ལགས་རང་ཉིད་ཀྱི་གཅེན་གཅུང་རྣམས་ལའང་སེམས་གཏིང་ནས་བརྩེ་བ་ཚ་པོ་ཡོད་པའི་སྐོར་ཡང་ནས་ཡང་དུ་གསུངས་བསྡད་ཀྱི་འདུག། ད་དུང་ངའི་གོ་ཐོས་ལ་ངའི་པཱ་ལགས་ཁོ་རང་རང་ལོ་བཅུ་དྲུག་ཡིན་པའི་སྐབས་སུ་དམག་མི་བྱེད་དུ་ཕྱིན་འདུག། དུས་ད་ལྟའང་ངའི་པཱ་ལགས་དམག་སྒར་ལ་ཡོད་རེད་ཟེར་བ་མ་གཏོགས་རྒྱུན་རིང་པོ་ནས་ངས་ང་རང་གི་པཱ་ལགས་མཐོང་ཐུབ་མ་བྱུང་། བྱས་ཙང་པཱ་ལགས་ཐུག་ཐུབ་ན་བསམས་ཏེ་མ་འོངས་པར་ང་རང་ཡང་ཆེན་པོ་ཆགས་ན་དམག་མི་བྱེད་དགོས་བསམ་གྱི་འདུག། ངའི་པཱ་ལགས་ཆང་ས་མ་རྒྱབས་སྔོན་ནས་དམག་མི་ལ་ཕྱིན་འདུག།། ཆུང་དུས་ང་རང་པཱ་ལགས་དང་མཉམ་དུ་སྡོད་པའི་སྐབས་ཀྱི་སྐད་ཆ་དེ་ཚོ་ཚང་མ་ངའི་སེམས་ནང་གསལ་ཐིང་ངེར་དྲན་པ་སོས་ཀྱི་འདུག པཱ་ལགས་ཀྱིས་ང་ཁོ་རང་གི་དཔུང་པའི་སྟེང་དུ་བཞག་སྟེ་འཆམ་འཆམ་ལ་འཁྲིད་པའང་ཡང་སེ་དྲན་གྱི་འདུག སྔོན་མ་ང་རང་བུ་བཅོལ་ཁང་ཡིན་པའི་སྐབས་སུ་དམག་སྒར་དུ་པཱ་ལགས་འགྲམ་ལ་གུང་གསེང་ལ་ཕྱིན་པ་ཡིན། དམག་སྒར་དེར་ལི་ཅིའི་ཤིང་ཏོག་དཔེ་མང་པོ་སྐྱེ་ཡི་འདུག པཱ་ལགས་ཀྱིས་ཁོ་རང་གི་དཔུང་པའི་སྟེང་དུ་ང་བཞག་སྟེ་ཤིང་ཏོག་ལི་ཅི་བཀོག་བཅུག་པ་དེ་ཡི་དགའ་སྣང་དང་སེམས་སྤྲོ་སྣང་དེ་དུས་ནམ་ཡང་བརྗེད་མི་ཐུབ་པའི་ཚོར་བ་ཞིག་རེད་འདུག དེ་བཞིན་ང་དང་པཱ་ལགས་དགོང་དྲོ་དམག་སྒར་ལ་སྐོར་བ་སྐོར་གྱི་ཡོད། གུང་གསེང་རྫོགས་ནས་ང་དམག་སྒར་ནས་གཞིས་ཆགས་སུ་མ་ལོག་སྔོན་དུ་པ་ལགས་ཀྱིས་ང་ལོ་དྲུག་ལ་སླེབས་སྐབས་ཐུག་ཏུ་སླེབས་ཡོང་གསུངས་བྱུང་། འོན་ཀྱང་ད་ལྟ་བར་བར་དུ་ང་ཐུག་པར་ཕེབས་མ་བྱུང་། དེ་ཙམ་དུ་མ་ཟད་ཁ་པར་ཙམ་ཡང་གཏོང་མཁན་མི་འདུག་ལ་ང་ཚོ་ལ་ཁ་པར་ཨང་གྲངས་ཀྱང་སྤྲད་མ་བྱུང་། ང་རང་པཱ་ལགས་དཔེ་དྲན་གྱི་འདུག།། སྔོན་མ་པཱ་ལགས་ཀྱི་ཅ་ལག་སྤྲད་པ་དེ་ཚོ་དཔེ་ཡག་པོ་བྱས་ནས་བདག་པོ་བརྒྱབས་ནས་ཉར་ཡོད། དམིགས་བསལ་དེང་སང་གི་དུས་ཚོད་ལ་ང་རང་གི་བྱིས་པའི་གནས་སྐབས་ཀྱི་དུས་ཚོད་བཟང་པོ་དེ་ཚོ་སེམས་ནང་དཔེ་དྲན་ནས་སེམས་ནང་སྐྱོ་སྣང་ཁྱད་ཚར་དེ་འདྲ་སླེབས་བཞིན་འདུག གང་ལྟར་ང་རང་གི་བསམ་པར་ང་རང་གི་པཱ་ལགས་ནི་འཛམ་གླིང་ནས་པཱ་ལགས་ཡག་ཤོས་དེ་རེད་ཟེར་ནའང་མི་འགྲིག་པ་མིན་འདུག།། ངའི་པཱ་ལགས་ཀྱི་མིང་ཤེས་རབ་ཀྱི་གོ་དོན་ལ་འགྲེལ་བརྗོད་ཐུང་ཙམ་ཞུས་ན་པཱ་ལགས་ཁོ་རང་རིག་པ་རྣོ་པོ་ཡོད་པའི་རྒྱུ་མཚན་གྱི་མིང་དེ་འདྲ་བཏགས་ཡིན་ས་རེད་བསམ་གྱི་འདུག། ངས་ད་ལྟ་པཱ་ལགས་དྲན་པ་ནང་བཞིན་པཱ་ལགས་ཀྱིས་ཀྱང་ང་དཔེ་དྲན་གྱི་ཡོད་པ་ལ་ཐེ་ཚོམ་མེད། འཚམ་འཚམ་ངས་ང་རང་གི་པཱ་ལགས་སྨག་སྒར་ལ་ཨེ་ཡོད་དང་ཡང་ན་དམག་སྒར་ག་བ་ལ་ཡོད་ན་བསམ་གྱི་འདུག གལ་སྲིད་དེ་ཚོ་ཧ་གོ་ཐུབ་ན་ང་ད་ལྟ་རང་དམག་སྒར་ལ་འགྲོ་དགོས་པའི་ཚོར་སྣང་ཡང་སེ་སེམས་ནང་འཁོར་བཞིན་འདུག ང་དང་ངའི་ནང་མིས་གལ་སྲིད་ངའི་པཱ་ལགས་ཐེངས་གཅིག་ཐུག་ཐུབ་ན་དེ་ལས་དགའ་བའི་ཉིན་མོ་ཅིག་ང་ལ་ནམ་ཡང་ཡོད་པ་མིན་འདུག མཐའ་དོན་ངའི་སྨོན་འདུན་ཆེ་ཤོས་དེ་ནི་ང་རང་གང་མགྱོགས་མགྱོགས་པཱ་ལགས་ཐུག་པ་དང་མཉམ་དུ་སྐྱིིད་པོར་སྡོད་རྒྱུའི་སྨོན་ལམ་ཉིན་ལྟར་རྒྱག་བཞིན་ཡོད།

བསྟན་འཛིན་འཛོམས་སྐྱིད། འཛིན་གྲྭ་ལྔ་པ། མེས་དབོན་གཙུག་ལག་དཔེ་སྟོན་སློབ་གྲྭ། གནའ་སྔ་མོ་ལུང་པ་ཆུང་ཆུང་ཞིག་གི་ནང་ལ་ཁྱིམ་ཚང་སྐྱོ་བོ་ཞིག་ཡོད། ཁྱིམ་ཚང་དེའི་ནང་བུ་མོ་ཆུང་ཆུང་ཞིག་ཡོད། མོས་མིག་གིས་མཐོང་མི་ཐུབ་པར་ལོང་བ་ཡིན། མོའི་ཕ་མ་གཉིས་ནི་མོ་རང་ལོ་ན་ཆུང་དུས་སྐབས་ནས་ནད་གཞི་ལྕི་མོ་ཞིག་ཕོག་སྟེ་འདས་གྲོངས་སུ་གྱུར་པ་རེད། དེར་བརྟེན་མོ་རང་གཅིག་པོ་ནང་ལ་སྡོད་ཀྱི་ཡོད། ཉིན་ཞིག་མོས་དཀོན་མཆོག་གསུམ་ལ་“ང་ལ་མིག་གཉིས་གནང་རོགས་གནང་། ངས་ཕྱི་ཡི་ཡུལ་ལྗོངས་ལ་ལྟ་འདོད་འདུག” ཅེས་སྨོན་ལམ་བཏབ་པ་རེད། མོ་རང་སེམས་པ་སྐྱོ་ནས་ངུ་དུས་གྲོད་ཁོག་ཀྱང་ལྟོགས་ནས་གཉིད་ཤོར་བ་རེད། བུ་མོ་དེ་གཉིད་དུ་ཡུར་བའི་སྐབས་ནམ་མཁའི་ལྷ་མོ་ཞིག་གིས་རྫུ་འཕྲུལ་ཅན་གྱི་མིག་ཤེལ་ཞིག་འཁྱེར་ནས་མོའི་སྔས་མགོའི་སྟེང་དུ་བཞག་པ་རེད། ཕྱི་ཉིན་བུ་མོ་དེ་གཉིད་ལས་ཡར་ལངས་ནས་ལག་པ་རྐྱང་ཤེད་བྱེད་དུས་ལག་ཏུ་མིག་ཤེལ་དེ་ཐུག མོས་གང་ཡིན་ན་བསམས་ཏེ་ཡ་མཚན་ཆེན་པོས་མིག་ཤེལ་དེ་ལ་ལག་པས་ཉམས་ཞིབ་མང་པོ་བྱས། མིག་ཤེལ་དེ་མོའི་ངོ་གདོང་གི་ཉེ་སར་བཞག་དུས་མོ་ལ་རྒྱུན་གཏན་དང་མི་འདྲ་བར་མིག་ལ་འོད་ཅིག་ཕོག མོས་གང་ཡིན་ན་བསམས་ཏེ་དོགས་པ་ཞིག་གིས་མིག་ཤེལ་དེ་མིག་ལ་གྱོན་མ་ཐག་མོའི་མི་ཚེ་མུན་ནག་ལས་གྲོལ་ཏེ་མིག་གིས་མཐོང་ཐུབ་པར་གྱུར། མོ་རང་དགའ་སྟེ་ཧང་སངས་སངས་ཀྱིས་གཡས་གཡོན་གྱི་ལས་ཀ་ཚང་མ་མགྱོགས་པོ་མགྱོགས་པོ་བྱས། ཐེངས་ཤིག་མོ་ཉེ་འཁྲིས་ཀྱི་ཚོང་ཁང་ཞིག་ལ་ཉོ་ཆ་རྒྱག་ཏུ་ཕྱིན། ཚོང་བདག་གིས་མོས་མིག་གིས་མཐོང་ཐུབ་པ་ཤེས་དུས་ཧང་སངས་ཏེ་དེ་དག་ཇི་ལྟར་བྱུང་བའི་རྒྱུ་མཚན་དྲིས་པ་ན། མོས་གོང་གི་གནས་ཚུལ་ཚང་མ་དྲང་པོར་བཤད། ཚོང་བདག་དེ་ལ་ཡང་མིག་གིས་མཐོང་མི་ཐུབ་པའི་གཅུང་མོ་ཞིག་ཡོད་པས། ཁོའི་སེམས་ནང་མིག་ཤེལ་རྫུ་འཕྲུལ་ཅན་དེ་ང་ལ་ཡང་བྱུང་ན་བསམས་ནས་དེ་དག་བརྐུ་རྒྱུའི་སེམས་ངན་བཅངས་ཏེ། དེའི་མཚན་མོར་བུ་མོ་དེ་གཉིད་ཁུག་པའི་སྐབས། ཁོས་རྐུ་མ་བཞིན་མོའི་ནང་དུ་སྒེའུ་ཁུང་ནས་ཁུ་སིམ་འཛུལ་ཏེ་མིག་ཤེལ་དེ་བརྐུས། ཁོས་ནང་དུ་འབྱོར་བ་དང་དུས་ཚོད་ཐུང་ངུ་ཙམ་ཡང་མི་འགོར་བར་གཅུང་མོ་གཉིད་ལས་བསླངས་ཏེ་མོ་ལ་མིག་ཤེལ་དེ་གྱོན་དུ་བཅུག ཁོས་མོའི་ཁ་ནས་“གཅེན་པོ། ངས་ཁྱེད་རང་མཐོང་ཐུབ་ཀྱི་འདུག” ཅེས་པའི་སྐད་ཆ་ཚིག་ཁ་ཤས་དེ་ཉན་འདོད་སྐྱེས། འོན་ཀྱང་མོས་མིག་ཤེལ་དེ་གྱོན་པ་དང་མིག་ལ་སྔར་མེད་ཀྱི་ན་ཟུག་ཅིག་ལངས་ཏེ་མིག་གིས་མཐོང་རྒྱུ་ཕར་ཞོག་ད་དུང་མིག་རིལ་གཉིས་ཕྱིར་འདོན་གྲབས་བྱས། མོས་ལམ་སང་མིག་ཤེལ་དེ་ས་ལ་གཡུགས་ཏེ། “གཅེན་པོ་ལགས་འདི་ག་རེ་རེད། ཁྱེད་རང་གིས་ང་གསོད་མཁན་འདོད་ཀྱི་འདུག་གམ།” ཞེས་ངུས་ནས་བཤད། གཅེན་པོས་དེ་དག་ཚང་མ་མཐོང་དུས་དངངས་སྐྲག་དང་འགྱོད་གདུང་གིས་གཅུང་མོ་ལ་“དགོངས་དག” ཅེས་བཤད་དེ་ལམ་སང་བུ་མོ་དེ་ལ་མིག་ཤེལ་ཕྱིར་སློག་བྱས། དུས་དེ་ནས་བཟུང་། བུ་མོ་དེས་ཐག་རིང་ནས་ཐག་རིང་དུ་ཡོད་པའི་དངོས་པོ་ཚང་མ་མཐོང་ཐུབ་པའི་ནུས་པ་རྒྱས་སོ།

བསྟན་འཛིན་དཔལ་མོ། འཛིན་རིམ་ལྔ་པ། སཾ་བྷོ་ཊ་གུ་རུ་པུ་ཉིན་སློབ། ༄༅། ། ༸གོང་ས་མཆོག་ནི་ཕྱི་ལོ་ ༡༩༣༥ ལོའི་ཟླ་བ་ ༧ ཚེས་ ༦ ཉིན་བོད་མདོ་སྨད་སྟག་འཚེར་ཞེས་པའི་ས་ཆ་ཞིག་ལ་སྐུ་འཁྲུངས་པ་དང་། ཁོང་གི་ཡབ་ཀྱི་མཚན་ལ་ཆོས་སྐྱོང་ཚེ་རིང་དང་། ཡུམ་གྱི་མཚན་ལ་བདེ་སྐྱིད་ཚེ་རིང་ཞུ་བ་རེད། ཁོང་ནི་འཛམ་གླིང་ཞི་བདེའི་དེད་དཔོན་ཡིན་པ་དང་། སྤྱན་རས་གཟིགས་ཀྱི་རྣམ་སྤྲུལ་ཡང་རེད། སྔར་ཁོང་གིས་བོད་ཀྱི་ཆོས་སྲིད་གཉིས་ཀྱི་སྐུ་དབང་བཞེས་པ་རེད། ཕྱི་ལོ་ ༡༠༥༩ ལོར་ཁོང་གིས་ཉིན་མཚན་མང་པོར་སྐུ་ལས་བསྐྱོན་ཏེ་བོད་ནས་རྒྱ་གར་དུ་ཕེབས་གནང་བ་རེད། ཕྱི་ལོ་༡༩༨༩ ལོའི་ཟླ་༡༢ ཚེས ༡༠ ཉིན་ཁོང་ལ་ནོ་སྦེལ་ཞི་བདེའི་གཟེངས་རྟགས་ཕུལ་བ་དང་རྒྱལ་ཁབ་མང་པོས་ཁོང་ལ་དགའ་བསུ་སྨོན་འདུན་དང་རྒྱབ་སྐྱོར་གནང་ཡོད་པ་རེད། ད་ཆ་ང་ཚོ་སྐྱིད་པོ་དང་རང་དབང་ངང་སྡོད་རྒྱུ་ཡོད་པ་ནི་ཁོང་གི་བཀའ་དྲིན་ཁོ་ན་ཡིན། ཁོང་གིས་ང་ཚོར་འགྲོ་བ་མི་ཚང་མ་ལ་བྱམས་པ་དང་སྙིང་རྗེ་བྱེད་དགོས་པའི་བཀའ་སློབ་ཡང་ཡང་གནང་གི་ཡོད། ཁོང་གི་བཀའ་སློབ་ནང་དུས་རྟག་ཏུ་མི་དང་སེམས་ཅན་གཞན་སུ་ལ་ཡང་ཕན་མ་ཐོགས་ན་ཡང་གནོད་མ་བྱེད་ཞེས་ཡང་ཡང་གསུང་གནང་གི་ཡོད། ཕྱི་ལོ་ ༢༠༡༡ ལོར་ཁོང་གིས་ཆོས་སྲིད་གཉིས་ཀྱི་འགན་དབང་བཞག་གནང་སྟེ། འགན་དབང་དེ་ཆ་ཚང་མི་མང་ལ་ཕུལ་གནང་བ་རེད། ཁོང་སྐུ་ན་ཆུང་དུས་སྐབས་སུ་དགུན་ཁར་ལྷ་སར་བཞུག་པ་དང་། དབྱར་ཁར་ནོར་བུ་གླིང་ག་ལ་བཞུག་གནང་གི་ཡོད། ད་ཆ་ཁོང་བཞུག་སྒར་དྷ་རམ་ས་ལར་བཞུག་གནང་གི་ཡོད། ཁོང་གིས་ད་བར་འཛམ་གླིང་ནང་བྱམས་བརྩེའི་ནུས་སྟོབས་སྤེལ་ཐབས་ཆེད་སྐུ་ལས་མང་པོ་བསྐྱོན་ཡོད་པ་ནི་འགྲོ་བ་ཡོངས་ལ་ཕན་ཐོགས་པའི་ཆེད་དུ་གནང་བ་ཞིག་རེད། ༸གོང་ས་མཆོག་ཁོང་གིས་གསུངས་པ་བཞིན་ད་ཆ་རྒྱ་ནག་ནང་དུ་ནང་པའི་ཆོས་བྱེད་མཁན་མང་དུ་འགྲོ་བཞིན་ཡོད་པ་ནི་ཁོང་གིས་ད་བར་ཐུན་མོང་མ་ཡིན་པའི་ཆོས་དེ་གོང་སྤེལ་གནང་བའི་བཀའ་དྲིན་གྱིས་ཡིན། ཁོང་གིས་བོད་པའི་ཕྲུ་གུ་ཚོས་དུས་རྒྱུན་ནས་ནང་པའི་ཆོོས་དང་རིག་གཞུང་རྣམས་གོང་སྤེལ་དང་སྲུང་སྐྱོབ་བྱེད་དགོས་ཞེས་གསུངས་གནང་གི་ཡོད། ཡང་ཁོང་གིས་མ་འོངས་པར་འཛམ་གླིང་འདི་ཧ་ཅང་གི་ཚ་དྲོད་ཆེན་པོ་ཆག་ཉེན་ཡོད་ཞེས་གསུང་གི་ཡོད་པས། རྒྱུ་མཚན་དེར་བརྟེན་ང་ཚོས་ཁོང་གི་འཁྲུངས་སྐར་ཉིན་མོ་ལ་ཤིང་སྡོང་མང་པོ་བཙུག་གི་ཡོད། ཁོང་གིས་དུས་རྒྱུན་དུ་ང་ཚོས་རང་བྱུང་ཁོར་ཡུག་ལ་སྲུང་སྐྱོབ་བྱེད་དགོས་ཞེས་ཡང་ཡང་གསུང་གནང་གི་ཡོད། ཁོང་ནི་༸གོང་ས་སྐུ་ཕྲེང་བཅུ་བཞི་པ་ཡིན་པ་དང་། ཁོང་ནི་བྱམས་བརྩེའི་རང་གཟུགས་ཞིག་ཡིན་ལ་ང་ཚོ་བོད་མི་ཡོངས་ལ་བཀའ་དྲིན་བླ་ན་མེད་པ་ཞིག་ཡིན།

བཀྲ་ཤིས་འབྲུག་གྲགས། འཛིན་གྲྭ་ལྔ་པ། མེས་དབོན་གཙུག་ལག་དཔེ་སྟོན་སློབ་གྲྭ། ད་ལོའི་སྟོན་ཟླ་བཅུ་པའི་ཕྱི་ཚེས་ ༨ དང་ ༩ ཉིན་གཉིས་རིང་ཨ་མདོའི་དབྱར་སྐྱིད་ཆེན་མོ་བཏང་སོང་། སྐབས་དེར་ང་རང་ཧ་ཅང་སྐྱིད་པོ་བྱུང་སོང་ལ་ངའི་མི་ཚེ་ནང་གི་བརྗེད་དཀའ་བའི་ཉིན་མོ་ཞིག་ཀྱང་ཡིན། ངས་ཨ་མདོའི་དབྱར་སྐྱིད་སྐོར་ལ་རྩོམ་ཡིག་ཅིག་འབྲི་རྒྱུ་ཡིན། འབྲུག་སྒྲ་འུར་འུར་དུ་གྲགས་ཤིང་། ཆར་པ་ཤག་ཤག་ཏུ་འབབ་པའི་ཞོགས་པ་ཞིག་ལ་ང་རང་གཉིད་ལས་སད་སྐབས། ངའི་ཨ་མ་ལགས་སྔ་པོ་ནས་ཡར་ལངས་ཏེ་ཕྱིན་ཚར་འདུག དེ་ནི་ཨ་མ་ལགས་ཉིན་མ་ཁ་ཤས་སྔོན་ནས་ཨ་མདོའི་དབྱར་སྐྱིད་ལ་གྲ་སྒྲིག་བྱེད་དུ་འགྲོ་བཞིན་ཡོད་པ་ངས་ཤེས་ཀྱི་ཡོད། མོ་རང་ཞབས་བྲོ་འཁྲབ་མཁན་ཡང་རེད། ཞོགས་པ་ཆུ་ཚོད་༨པ་ཙམ་ལ་པ་ལགས་དང་གཅུང་མོ་གངས་ཅན་གསེར་བཟང་། ང་ཚོ་གསུམ་མལ་ལས་ལངས་ཏེ་ཨ་མདོའི་དབྱར་སྐྱིད་ལ་འགྲོ་རྒྱུར་གྲ་སྒྲིག་བྱས་པ་ཡིན། དེ་དུས་གནམ་ངོ་ཡང་རིམ་གྱིས་དྭངས་ཏེ་དྷ་རམ་ས་ལའི་རི་ལུང་ཐང་གསུམ་མཛེས་སྡུག་ལྡན་པ་ཞིག་རེད། པ་ལགས་ཀྱི་སྦག་སྦག་རྒྱབ་ཏུ་ང་དང་གཅུང་མོ་གཉིས་བཞོན་ཏེ། ང་ཚོས་ལམ་བར་དུ་སྐད་ཆ་ཅི་འཕྲོས་མོོོལ་འཕྲོས་ཤོད་བཞིན་ཕྱིན་པ་ཡིན། ཨ་མདོའི་དབྱར་སྐྱིད་གཏོང་ས་དེར་ལམ་སེང་སླེབས་སོང་། དེ་ནི་གོ་པལ་པུར་སློབ་གྲྭ་ལ་འགྲོ་སའི་ལམ་ཁ་ཞིག་རེད་འདུག གཞུང་ལམ་གཡོན་ཟུར་དུ་སྤང་ཐང་ཆེན་པོ་ཞིག་འདུག་པ་དང་། སྤང་ཐང་དེའི་མཐའ་འཁོར་དུ་ཤིང་སྡོང་ཡང་མང་པོ་འདུག མི་མང་པོ་སྔ་པོ་ནས་སླེབས་ཚར་འདུག ང་ཚོ་དེར་འབྱོར་སྐབས་མི་རྒན་པ་ཁ་ཤས་ཀྱིས་བསང་གཏོང་གི་འདུག དེ་ནས་ཕར་ཅུང་ཙམ་ཕྱིན་ན་སྒོ་ཆེན་པོ་ཞིག་བཟོས་འདུག་པ་དང་། དེའི་སྟེང་དུ་འཕྲེད་དར་ཞིག་འཐེན་འདུག་པའི་སྟེང་དྷ་སའི་མདོ་སྨད་དབྱར་སྐྱིད་ཆེན་མོ།༽ ཞེས་བྲིས་འདུག་ལ། སྒོའི་གཡས་གཡོན་གཉིས་ལ་བོད་པ་དང་རྒྱ་གར་གྱི་རྒྱལ་དར་རེ་བསྒྲེངས་འདུག རྒྱལ་སྒོ་དེའི་ཕར་ཕྱོགས་སུ་བྱིས་པ་ཚོ་རྩེད་མོ་རྩེ་སའི་གནམ་མཆོང་ལྡིང་ར་གཉིས་བཞག་འདུག་པ་དེར་ང་ཧ་ཅང་དགའ་སོང་། ང་ཚོའི་སློབ་གྲྭའི་ཁྲོམ་འདུས་སྐབས་ཀྱི་རྩེད་མོ་རྩེ་ས་ཚང་མ་འདི་ལ་ཡོད་ན་ཅི་མ་རུང་དྲན་སོང་། སྤང་ཐང་དེའི་དཀྱིལ་དུ་བཀྲ་ཤིས་རྟགས་བརྒྱད་ཀྱི་རི་མོ་ཡོད་པའི་གུར་ཆེན་པོ་ཞིག་ཕུབ་འདུག གུར་ཆེན་པོ་དེའི་མཐའ་རུ་ད་དུང་གུར་ཆུང་ཆུང་ཡང་མང་པོ་ཞིག་ཕུབ་འདུག པ་ལགས་དང་ངེད་གཉིས་གུར་ཡོད་ས་དེར་འབྱོར་མ་ཐག རིན་པོ་ཆེ་ཆིབས་བསྒྱུར་བསྐྱངས་སོང་ཞེས་མི་མང་པོ་ཞིག་གིས་བོད་ཆས་གཙང་མ་གྱོན་ཞིང་། ལག་པར་ཁ་བཏགས་བཟུང་སྟེ་བང་སྒྲིག་བཞིན་འདུག ངས་པ་ལགས་ལ་རིན་པོ་ཆེ་སུ་རེད་ཅེས་འདྲི་སྐབས། ཀིརྟི་རིན་པོ་ཆེ་དང་ཇོ་ནང་རྒྱལ་ཚབ་རིན་པོ་ཆེ་རེད། ཁོང་གཉིས་དེ་རིང་གི་སྐུ་མགྲོན་གཙོ་བོ་རེད་ཟེར། རིན་པོ་ཆེ་རྣམ་གཉིས་བཞུགས་ཁྲིའི་སྟེང་དུ་བཞུགས་རྗེས་དབྱར་སྐྱིད་མཛད་སྒོ་ཚོགས་སོང་། ཤིང་ཏོག་དང་མངར་ཟས་རིགས། ཤིང་ཏོག་ཁུ་བ་སོགས་སྡེར་ཁ་མང་པོ་བསྒྲིགས་འདུག སྐབས་དེར་ཀིརྟི་རིན་པོ་ཆེ་མཆོག་གིས་བཀའ་སློབ་མང་པོ་ཞིག་གནང་སོང་ཡང་། ང་རང་གིས་གོ་བ་ནི་བོད་པ་ཚང་མས་༸རྒྱལ་བ་རིན་པོ་ཆེ་མཆོག་གི་བཀའ་ལ་བརྩི་དགོས་པ་དང་། བོད་ཡིག་བོད་སྐད་དང་བོད་པའི་རིག་གཞུང་ལ་བདག་པོ་རྒྱག་དགོས་པ། བོད་མི་ཚོས་འཆམ་པོ་མཐུན་པོ་གནང་དགོས་པ་སོགས་གསུངས་སོང་། ད་དུང་། དེ་རིང་བོད་ཆས་གྱོན་མཁན་ཚོ་ཡག་པོ་འདུག དབྱར་སྐྱིད་སྐབས་ཨ་རག་མང་པོ་འཐུང་ནས་འཁྲུག་པ་རྒྱག་པ་དང་། ཤོ་དང་རྒྱན་སོགས་རྩེས་ནས་སྤྱོད་པ་མ་རབས་དེ་འདྲ་མ་བྱེད་རོགས་གསུངས་སོང་། དེའི་རྗེས་ལ་ཇོ་ནང་རྒྱལ་ཚབ་རིན་པོ་ཆེ་མཆོག་གིས་ཀྱང་བཀའ་སློབ་མང་པོ་ཞིག་གནང་སོང་ཡང་ང་རང་གིས་ཡག་པོ་ཞིག་གོ་མ་སོང་། རིན་པོ་ཆེ་གཉིས་ཀྱིས་བཀའ་སློབ་གནང་ཚར་རྗེས། གཞས་དང་ཞབས་བྲོ་འཁྲབ་འགོ་བརྩམས་སོང་། ངའི་ཨ་མ་ལགས་ཀྱང་ཞབས་བྲོ་འཁྲབ་མཁན་གྲས་རེད། […]

ཐུབ་བསྟན་བཟོད་པ། འཛིན་གྲྭ་ལྔ་པ། ཛོང་ཆོས་འབྲིང་རིམ་སློབ་གྲྭ། སའི་གོ་ལ་འདིའི་སྒང་ལ་ཡོད་པའི་སེམས་ཅན་སུ་ཡིན་རུང་སོ་སོ་ལ་བྱམས་བརྩེས་བསྐྱངས་པའི་བཀའ་དྲིན་ཅན་ཞིག་ཡོད་པ་ངས་བཤད་མ་དགོས་པར་ཚང་མས་ཤེས་པའི་རེ་བ་ཡོད། སྤྱིར་བཏང་མི་སོ་སོར་བྱམས་བརྩེས་བསྐྱངས་པའི་བཀའ་དྲིན་ཅན་གྱི་མི་སྣ་ཚོགས་ཡོད་སྲིད། བདག་ལ་བྱམས་བརྩེས་བསྐྱངས་པའི་བཀའ་དྲིན་ཅན་གྱི་མི་སྣ་གལ་ཆེན་གཉིས་ཡོད་། དང་པོ་ཨ་མ་དང་། གཉིས་པ་པ་ལགསཡིན། འཛམ་གླིང་འདིའི་ཐོག་ཁོང་གཉིས་ལས་ལྷག་པའི་མི་སྣ་ཡོད་རེད་ཟེར་མཁན་སུའང་མིན་འདུག མ་འོངས་པར་ཡང་འབྱུང་མི་སྲིད་། དང་པོ་ངའི་ཨ་མ་ནི་མི་སུ་དང་ཐུག་རུང་འཛུམ་མདངས་ཀྱི་བཞིན་རས་ཡོད་། ངའི་ཕྲུ་གུ་དང་གཞན་གྱི་ཕྲུ་གུ་རེད་ཟེར་བའི་དབྱེ་བ་མེད་། ཚང་མར་གཅིག་པར་ལྟ་ཡི་ཡོད། རང་ཉིད་ཀྱི་ཟ་མ་རྣམས་དབུལ་པོའི་ཕྲུ་གུ་ལ་བྱིན་། ངས་བྱིས་པའི་དུས་སུ་ཨ་མ་བྱམས་བརྩེ་ཆེན་པོ་ཡིན་པ་མི་ཤེས་། ད་ཆ་ངས་མ་ཡིས་བྱམས་བརྩེས་བསྐྱངས་པའི་བཀའ་དྲིན་དྲན་དུས། གལ་སྲིད་ཁོང་མེད་ན་མཇེས་པའི་འཛམ་གླིང་འདི་མཐོང་ག་ལ་སྲིད། ཁོང་གིས་བཅངས་པའི་བྱམས་བརྩེ་དེ་སྦྲང་རྩི་ལས་མངར་བ་ཡིན་པ་དང། ཁོང་མེད་ན་ངའི་ལུས་མེད། ཁྱེད་མེད་ན་ངའི་མདུན་ལམ་མེད། ཞེས་པའི་ཚིག་དེ་ཡང་སེམས་ལ་དྲན་སོང།  ད་ལྟ་ངའི་མ་ཡུམ་གྱི་དབུ་་སྐྲ་དུང་ལས་དཀར་ལ། གདོང་གཉེང་མས་ཁེངས་པ་མཐོང་དུས་ངའི་སེམས་ལ་སྡུག་བསྔལ་ཚད་མེད་སྐྱེས། ཡིན་ན་ཡང་འདི་ནི་འཇིག་རྟེན་གྱི་ཆོས་ཉིིད་ཡིན་པས་། བྱེད་ཐབས་གང་ཡང་མེད་། དེ་ལས་ཨ་མའི་དྲིན་གསོ་བའི་ཆེད་དུ་ཁོང་གི་རེ་བ་སྒྲུབ་དགོས་བསམ། ཁོང་གི་མ་འོངས་པའི་རེ་བ་ནི་རང་གཞན་གཉིས་ལ་ཕན་པའི་བྱ་བ་བྱ་རྒྱུ་ནི་ཁོང་གི་རེ་བ་དང་དམིགས་ཡུལ་རེད། དེ་འདྲ་སོང་ཙང་ཁོང་གི་དམིགས་ཡུལ་སྒྲུབ་ཆེད་ང་མ་ཤི་བར་རང་གཞན་གཉིས་ལ་ཕན་པའི་ལས་ཀ་ལ་བརྩོན་རྒྱུ་ཡིན། གཉིས་པ་ངའི་ཨ་ཕ་ནི་ནང་གི་འཚོ་བའི་རྟེན་གཞི་གཙོ་བོ་ཡིན།  ཁོང་ནི་ནང་ལ་ཡོང་རྒྱུ་ང་ཚོས་མཐོང་དཀའ་བས།  ངའི་བསམ་པར་ཨ་ཕ་ལགས་སོ་སོའི་ཕྲུ་་གུ་དང་སྤུན་མཆེད།  ཨ་མ་ལ་བརྩེ་བ་མེད་ནས་ཕྱི་ལ་གཡོལ་ནས་སྡོད་ཀྱི་ཡོད་རེད་དྲན།  ཁོང་སླེབས་པའི་དུས་གཅིག་ཡོད།  དེ་ནི་ལོ་གསར་ལ་ཡིན།  དེ་ཡང་ཉིན་བདུན་ཙམ་ཡིན།  དེ་ནི་ཁོང་ཡུན་རིང་ཤོས་བཞུགས་པའི་དུས་དེ་ཡིན།  དེ་ནས་ཕྱི་ལ་ང་ཚོའི་མཐོང་ས་མེད་པར་འགྲོ། ཉིན་གཅིག་ཨ་མ་ལ་སྨན་ཁང་ནས་ཁ་པར་འབྱོར་སོང།  ཁ་པར་ནས་ཁྱོད་ཀྱི་བཟའ་ཟླ་ནད་པ་ཆགས་འདུག་པས་མྱུར་མགྱོགས་ཕེབས་རོགས་ཞེས་བརྗོད་སོང།  དེ་མ་ཐག་ཨ་མ་བྲེལ་འཚུབ་བྱས་ནས་ཕྱིན་སོང།  དགོང་དྲོ་ཆུ་ཚོད་བདུན་དང་ཕྱེད་ཀར་་ནང་ལ་སླེབས་སོང།  ཨ་མའི་གདོང་ནི་ཧ་ཅང་མི་བདེ་བའི་ངང་ནས་ང་ཚོ་ཕྲུ་གུ་རྣམས་ལ་ཟ་མ་གཡོས་ནས་སྤྲད་པ་དང།  ཁོང་གིས་སང་ཉིན་པ་ལགས་ཐུག་འཕྲད་ལ་འགྲོ་དགོས་ཟེར་ནས་ཚང་མ་ཉལ། སང་ཞོགས་ཆུ་ཚོད་བཞི་པ་ལ་སྨན་ཁང་ནས་ཁ་པར་སླེབས་ཏེ་ཁྱོད་ཚོ་ནང་མི་གང་མགྱོགས་ཕེབས་རོགས་ཞེས་གསུངས་སོང།  ཨ་མས་ལམ་སང་ང་ཚོ་སྤྱི་སྤྱོད་གླང་འཁོར་ནང་འཁྱེར་སྟེ་དེ་མ་ཐག་སྨན་ཁང་ལ་འབྱོར།  ཕ་ཁོང་ཉལ་ཁྲིའི་སྒང་ལ་བཞུགས་ཏེ་ཞལ་ནས་འདི་ལྟར། ངའི་བརྩེ་བའི་བཟའ་ཟླ་དང་བུ་ཕྲུག སྤུན་མཆེད་ཚང་མའི་གདོང་མཐོང་ཡ་དེ་ཉིན་མཐའ་མ་ཡིན་སྲིད།  གང་ཡིན་ཟེར་ན།  ཕལ་ཆེར་ཉིན་ཁ་ཤས་རྗེས་སུ་ང་འཇིག་རྟེན་འདི་ནས་འཇིག་རྟེན་གཞན་ལ་ལས་དོན་ཆེད་འགྲོ་དགོས་འདུག་པས། ཁྱོད་ཚོས་ངའི་དོན་དུ་སེམས་ཁྲལ་མ་བྱེད།  དེ་ལས་ཁྱོད་ཚོའི་མ་འོངས་པའི་མདུན་ལམ་གང་འདྲ་སྐྱེལ་དགོས་དང་མི་རིགས་དང་རྒྱལ་ཁབ་ལ་ཕན་པའི་ལས་མང་ཙམ་བགྱི།  དེ་ལས་ལྷག་པའི་བྱ་བ་གང་ཡང་མེད་གསུངས་སོང། ངའི་བརྩེ་བའི་ཨ་ཕས་དེ་འདྲ་ལབ་དུས་ང་དང་ངའི་འགྲམ་ལ་ཡོད་པའི་སྨན་གཡོག་ཡན་ཆད་མིག་ཆུ་རང་དབང་མེད་པ་ཤོར་ནས་ཧ་ཅང་ངུས། ཕ་དམ་པ་འཇིག་རྟེན་གཞན་ལ་གཤེགས་ནས་ཟླ་བ་དྲུག་ཙམ་རྗེས་སུ་ང་ཚོའི་ནང་གི་འཚོ་བའི་གནས་སྟངས་ཧ་ཅང་སྐྱོ་རུ་ཕྱིན་པ་མ་ཟད་གྲོང་རྡལ་གྱི་འཚོ་བ་ཡང་སྐྱོ་རུ་ཕྱིན།  […]