བཀྲ་ཤིས་ཚེ་རིང་། གཞི་གོང་བོད་དགེ།སེ་ལ་ཀུའི་བོད་ཁྱིམ་སློབ་གྲྭ། རྩོམ་པ་པོ། ནགས་ཚང་རྒད་པོའམ་ནགས་ཚང་ནུས་ལྡན་བློ་བཟང་། དཔེ་དེབ་ཀྱི་ནང་དོན་གནད་བསྡུས། སྤྱི་ལོ་ ༡༩༥༩ ལོའི་ཟླ་ ༡༢ པའི་ཚེས་ ༣༠ ཉིན་ནགས་ཚང་ནུས་བློ་ཆུ་དམར་ལེབ་ཀྱི་ཕྱུགས་ཟོག་འཚོ་སྐྱོང་བྱ་སའི་ཕྱུགས་ལས་ཁང་ཞིག་ལས་ཐོན་ཏེ། སློབ་གྲྭའི་ཕྱོགས་གསུམ་པོ་ཐོ་ཡིས་བརྩིགས་པའི་ཆུ་དམར་རྫོང་སློབ་འབྲིང་ཁང་དུ་སློབ་ཞུགས་བྱས་པའི་ཉིན་དང་པོ་ཡིན། བཀའ་དྲིན་ཅན་གྱི་དགེ་བའི་བཤེས་གཉེན་དགེ་རྒན་ལིའི་ཚེ་བརྟན་སོགས་ཀྱིས་བྱམས་སྐྱོང་འོག་ཏུ་འཚར་ལོངས་བྱས་པའི་གོ་སྐབས་བཟང་པོ་འདི་ནི་སྔོན་བསགས་ཀྱིས་བསོད་ནམས་ལས་གཞན་ཅི། སྐབས་དེར་བོད་རྒྱ་གཉིས་ཀྱི་དབར་དུ་འཐབ་འཛིང་བྱས་པའི་དུས་ཤིག་ཡིན་ལ་ཁྱད་པར་དུ་རྩོམ་པ་པོ་ནགས་ཚང་ནུས་བློ་སོགས་ཀྱི་ཕ་མ་ཕལ་མོ་ཆེ་གུང་ཁྲན་དམག་གིས་དམར་གསོད་བཏང་ཟིན་པས། བྱིས་པ་མང་པོ་ཞིག་དྭ་ཕྲུག་གི་འཚོ་བར་རོལ་དགོས་བྱུང་ཡོད་ཅིང་། ཕ་མ་མེད་མཁན་གྱི་དྭ་ཕྲུག་དུ་མ་ཞིག་ཆུ་དམར་རྫོང་སློབ་འབྲིང་ཁང་དུ་སྐྱེལ་བཞིན་ཡོད། ཆུ་དམར་རྫོང་སློབ་འབྲིང་ཁང་འདི་ནི་དྭ་ཕྲུག་ཚོ་ལ་མཚོན་ན་ཁྱིམ་ཚང་གཉིས་པ་ལྟ་བུ་ཞིག་དང་། ལྷག་པར་དུ་དགེ་རྒན་ལས་བྱེད་རྣམས་ཀྱིས་ཕ་མ་བཞིན་བྱིས་པ་ཚོར་བརྩེ་སེམས་བཅངས་ནས་གསོ་སྐྱོང་གནང་ཞིང་། དེ་དུས་འཚོ་བ་ལ་དཀའ་ཁག་ཆེ་ཞིང་སེམས་ཁམས་ལ་ན་ཟུག་ལྕི་མོ་ཞིག་གིས་དུས་རྟག་ཏུ་འགུལ་བརྡ་གཏོང་གིན་ཡོད་ཀྱང་། འཁང་ར་དང་ཞེ་འགྲས་གཏིང་ནས་སྐྱེས་མ་མྱོང་། ཉིན་ཞིག་དགེ་རྒན་གྱིས་དེ་རིང་ལོ་སར་རེད་གསུངས་ཏེ་སྔ་དྲོ་སློབ་མ་རེ་ལ་གོ་རེ་(བག་ལེབ་)ཆེན་པོ་རེ་བྱིན་ཞིང་། ད་དུང་དགེ་རྒན་ལིའི་ཚེ་བརྟན་གྱིས་སློབ་མ་རེ་ལ་བུ་རམ་ཉ་བྱི་རིལ་དང་། སིལ་རྟོག་དམར་རིལ་འགའ་རེ་བྱིན་ནས་གང་དགའ་ལོངས་སུ་སྤྱད་པ་ཡིན། སྐབས་དེར་སློབ་གྲྭར་སློབ་མ་བརྒྱ་ལྷག་ཡོད་ཟེར་མོད། དོན་དངོས་སུ་སློབ་མ་བརྒྱད་ཅུ་གྱ་ལྔ་ཙམ་ལས་མེད། འོན་ཀྱང་སློབ་མ་མང་ཆེ་བ་ནི་བླ་དཔོན་གྱི་ཁྱིམ་ཚང་དང་། ཕྱུག་བདག།ས་བདག་སོགས་ཀྱི་ཁྱིམ་མི་ཆེ་བ་ཚོ་ཚང་མ་བཙོན་ལ་བཅུག་པ་དང་དམར་གསོད་བཏང་བ་སོགས་ཀྱི་རྗེས། བྱིས་པ་ཚོ་བདག་པོ་མེད་པའི་དྭ་ཕྲུག་ལྟ་བུ་ཡིན་པས། སློབ་གྲྭ་འདིར་བསྐྱལ་ཡོང་བ་ཤ་སྟག་རེད་འདུག།ང་ཚོ་ཉིན་རེ་བཞིན་དགེ་རྒན་རྣམས་ཀྱི་བྱམས་བརྩེའི་ཐུགས་ཁུར་འོག་སློབ་སྦྱོང་བྱེད་པ་དང་རྩེད་མོ་རྩེ་བ་སོགས་ལས། གཞན་བསམ་རྒྱུ་དྲན་རྒྱུ་ཅི་ཡང་མེད་པའི་ངང་ནས་འཚོ་བ་ལ་རོལ་བཞིན་ཡོད། སྤྱི་ཚོགས་ལ་དུས་འགྱུར་བྱུང་བའི་རྐྱེན་གྱིས་རང་ཉིད་ཀྱི་ཁྱིམ་ཚང་མེད་སོང་བ་དང་། ཕ་མ་སྤུན་མཆེད་སོགས་ཚེ་ལས་འདས་པའི་སེམས་སྡུག་སོགས་ནི་ཡེ་ནས་བརྗེད་སོང་བ་འདྲ་ཞིག་རེད། དགུན་ཁའི་གུང་སེང་སྐབས་སུ་སློབ་མ་མང་པོ་ཁྱིམ་ནང་དུ་བཏང་རྗེས། སློབ་མ་མང་ཙམ་ཕྱིར་སློབ་གྲྭའི་ནང་དུ་ལོག་མ་ཐུབ་བྱུང་སོང་བས། དགེ་རྒན་གྱིས་ད་ཉེ་ས་ཚོས་ཡོང་མ་བཅུག་པ་ཡིན་རྒྱུ་རེད། ད་ལྟ་སློབ་གྲྭའི་ནང་དུ་ཐོན་ཡོད་པའི་སློབ་མ་ཚོ་ནི་དྭ་ཕྲུག་བདག་མེད་ཁོ་ན་རེད་གསུངས། དེ་ནས་གུང་ཁྲན་ཏང་གི་སྲིད་ཇུས་འོག་ཏུ་ཉིན་རེ་བཞིན་སློབ་གྲྭ་དང་མི་དམངས་སོགས་ལ་འཚོ་བའི་དཀའ་ཚེགས་ཛ་དྲག་ཅན་དུ་གྱུར་ནས་སྤྱི་ཚོགས་ཁྱོན་ཡོངས་ལ་ཉི་མ་སྤྲིན་འཁྲིགས་ལྟ་བུའི་གནས་བཅས་པ། རིམ་བཞིན་སྲིད་ཇུས་གུ་ཡངས་ཤིག་སླེབས་ནས་བོད་ས་ཡོངས་ལ་དམར་གསོད་ཀྱི་བྱ་བ་མཚམས་བཞག་རྗེས་སུ་སློབ་གྲྭའི་འཚོ་གནས་དང་། ཤེས་ཡོན་སྲིད་ཇུས་སོགས་ཀྱི་ལམ་ལུགས་ཀྱང་བཟང་དུ་ཕྱིན་པས་སློབ་སྦྱོང་ལ་འབད་བརྩོན་ཧུར་ཐག་བྱས་ཏེ་མ་འོངས་པའི་རེ་འདུན་ཁྲི་མ་འབུམ་གྱི་ལམ་འཕྲང་ལ་བསྐྱོད་པར་བྱས་ཁར། སྤྱི་ལོ་ ༡༩༦༤ ལོའི་ཟླ་ ༨ པའི་ཉིན་ཞིག་ལ་དགེ་བཀྲ་བྷོས་བཀོད་མངགས་འོག་ཏུ་སྐྱེད་དགུ་དགེ་ཐོན་སློབ་གྲྭར་འགྲོ་དགོས་བྱུང་སོང་། དགེ་རྒན་དང་ཇ་མ། སློབ་མ་ཡོངས་ཀྱིས་སློབ་གྲྭའི་རྒྱ་སྒོས་ནས་ང་ཚོ་སྐྱེལ་མ་བྱས་སོང་ལ། སློབ་གྲོགས་དུ་མ་ཞིག་ངུ་བཞིན་འདུག། རང་རོགས་གཉིས་ཀ་སེམས་སྐྱོ་ནས་ཁ་བྲལ་ཐབས་མེད་པ་འདྲ་ཞིག་རེད་མོད། འོན་ཀྱང་མ་སོང་ན་ཐབས་མེད་ཡིན་པས། ཅི་བྱ་གཏོལ་མེད་གྱུར་སོང་། ལྷད་མེད་ཀྱི་མཛའ་བརྩེ་གཏིང་ཟབ་པའི་དགེ་སློབ་རྣམ་པ་དཀའ་ཚེགས་ཧ་ཅང་ཆེ་བའི་སྐབས་སུ། རྒྱགས་ན་མཉམ་རྒྱགས་དང་། ལྟོགས་ན་མཉམ་ལྟོགས་ངང་། སྐྱིད་ཀྱི་རྟ་ཕོ་མཉམ་བཞོན་དང་། […]

པདྨ་ལྷུན་གྲུབ། གཞིང་གོང་བོད་དགེ།སྦེལ་ཀོབ་བོད་ཁྱིམ་སློབ་གྲྭ། རྩོམ་པ་པོ།  རྣམ་སྤེལ་ཚང་བློ་བཟང་སྦྱིན་པ། ༡) རྩོམ་པ་པོའི་ཁྱད་ཆོས་རགས་ཙམ་བརྗོད་པ། ༸རྒྱལ་བའི་མཛད་པ་ལས་འཕྲོས་པ་ཞེས་པའི་དཔེ་དེབ་མཛད་པ་པོ་རྣམ་སྤེལ་ཚང་བློ་བཟང་སྦྱིན་པ་ལགས་ནི་བཙན་བྱོོལ་ནང་གི་བོད་མིའི་སློབ་གྲྭ་ཐོག་མ་མ་སུ་རིའི་སློབ་ཕྲུག་རྣམས་ཀྱིས་ཁོང་ལ་བརྩི་མཐོང་གནང་བ་མ་ཟད་སློབ་གྲྭའི་པཱ་ལགས་ཞེས་ཞུ་སྲོལ་ཡོད་པ་དང། ཁོང་གིས་སློབ་གྲྭའི་ནང་རྒན་བདག་དང་།སྒྲིག་ཁྲིམས་འགོ་བ།བཅུ་དཔོན་བཅས་ཀྱི་ལས་འགན་གནང་ཡོད་འདུག ཁོང་གིས་ལས་འགན་དེ་དག་ལྷག་བསམ་རྣམ་དག་ཅིག་གནང་ཡོད་པས་ཁོང་ལ་པཱ་བློ་སྦྱིན་ལགས་ཞེས་འབོད་སྲོལ་ཡོད་པ་དང། སློབ་གྲྭ་ནས་མཐར་ཕྱིན་པའི་རྗེས་སུ་མཐོ་སློབ་ནས་གཙུག་ལག་རབ་འབྱམས་སློབ་མཐར་སོན་ཡོད། དེ་ནས་བཙན་བྱོལ་བོད་གཞུང་གི་སྲི་ཞུ་ཐེག་པ་རིམ་འཛེགས་ཀྱིས་སྐུ་ཚབ་དོན་གཅོད་དང་། སྐུ་སྒེར་དྲུང་ཆེ། བདེ་སྲུང་དྲུང་ཆེ། མཛད་རྣམ་སྡེ་ཚན་གྱི་ཞབས་གཡར་གནང་ཡོད་ཅིང། དབུས་གཞོན་ནུ་ལྷན་ཚོགས་ཀྱི་ཚོགས་གཙོ་དང་ཕྱི་ལོ་ ༡༩༨༠ ལོར་སྐུ་ཚབ་ཐེངས་གཉིས་པའི་ཁོངས་སུ་བོད་དུ་ཕེབས། མཐར་ ༢༠༠༨ ལོར་སྲི་ཞུ་བཟང་མཐར་འཁྱོལ་ཏེ་བགྲེས་ཡོལ་རྩ་དགོངས་ཞུས་པ་བཅས་ཀྱི་ལོ་རྒྱུས་སྙིང་བསྡུས་སུ་བཀོད་པ་ཡིན། ཁོང་ནི་དམིགས་བསལ་སྐུ་སྒེར་ཡིག་ཚང་དུ་ལོ་མང་རིང་ཞབས་ཞུ་མཛད་པའི་ཞོར་ལ་རྒྱུན་དུ་ནས་༸གོང་ས་མཆོག་གི་སྐུའི་གམ་བཅར་བ་ཞིག་ཡིན་སྟབས་༸གོང་ས་མཆོག་གི་གཞུང་འབྲེལ་མཛད་རྣམ་ལས་འཕྲོས་པའི་ཐུན་མོང་མ་ཡིན་པའི་ཡིད་དབང་འཕྲོག་པའི་གསང་བའི་མཛད་པ་རྣམས་ཟུར་དུ་བཀོད་པ་ནི་དཔེ་དེབ་འདིའི་དམིགས་བསལ་ཁྱད་ཆོས་ཤིག་ཆགས་འདུག ༢) དཔེ་དེབ་ཀྱི་ནང་དོན་དངོས་མདོར་ཙམ་བཤད་པ། སྤྱིར་བཏང་༸རྒྱལ་བའི་མཛད་པ་ལས་འཕྲོས་པ་ལས་ཐུང་མོང་མ་ཡིན་པའི་མཛད་པ་ཡིད་དུ་འོང་ཞིང་ངོ་མཚར་བའི་གནས་ཚུལ་མང་དག་ཅིག་བཀོད་འདུག་པ་ལས་ངོ་རང་སེམས་ལ་ངོ་མཚར་ཆེ་ཞིང་བརྗིད་ཉམས་ལྡན་པ། དད་པའི་ཡིད་རབ་འཕྲོག་པ་དག་མཛད་རྣམ་རྒྱས་པའི་ནང་གསལ་མེད་པའི་ཚོར་སྣང་བྱུང་བ་འགའ་ཤིག་བཏུས་ཏེ་བཀོད་པ་ལ། གནས་ཆུང་དང་རྒྱལ་ཡུམ་ངོ་ཤེས་གནང་བ། ཕྱི་ལོ་ ༡༩༣༩ ཟླ་བ་ ༩ ཚེས་ ༨ ཉིན་༸གོང་ས་མཆོག་ལྷ་ལྡན་གཙུག་ལག་ཁང་གི་གསུང་ཆོས་རྭ་བར་ཆིབས་སྒྱུར་སྐབས་གནས་ཆུང་ཆོས་རྒྱལ་ཆེན་པོ་ཐོག་མར་རྟེན་གཞིར་སྐུ་ཕེབས་ཀྱིས་༸རྒྱལ་བའི་ཕེབས་བྱམས་མདུན་དུ་ཕེབས་ཏེ་འཇིགས་སྣང་གི་རྣམ་པ་གང་ཡང་མེད་པར་སྔར་འདྲིས་ཀྱི་ངོ་ཤེས་རྙིང་པ་འཕྲད་པ་ལྟ་བུའི་དགྱེས་ཉམས་ཀྱི་མཇལ་དར་བཞེས་ཏེ་ཆོས་སྐྱོང་གི་མགུལ་དུ་རང་སློག་སྩལ་གནང་ཡོད། སྐབས་དེར་༸རྒྱལ་ཡུམ་ཆེན་མོས་ལྷ་འདི་ཆུང་སྲིད་རིན་པོ་ཆེ་སྐུ་བལྟམས་པ་ནས་ང་ཚོའི་ཁྱིམ་གྱི་ཉེས་འཁོར་ལ་ཡང་ཡང་ཕེབས་མཁན་དེ་རེད་འདུག ངས་ངོ་ཤེས་ཀྱི་ཡོད་ཅེས་བཀའ་གནང་ཡོད་འདུག ཐུགས་སྙིང་རྗེ་ཆེ་བའི་མཛད་པ། ༸གོང་ས་མཆོག་སྐུ་ན་ཕྲ་བའི་སྐབས་རྩེ་ཕོ་བྲང་དུ་བཞུགས་སྐབས་གཡག་དང་ར་ལུག་ཤ་རར་འདེད་པ་གཟིགས་དུས་ཐུགས་ལ་སྙིང་རྗེ་ཚད་མེད་འཁྲུངས་ཏེ་གསོད་ངེས་ཀྱི་སེམས་ཅན་རིགས་སྲོག་བླུ་ཚེ་ཐར་ཤིན་ཏུ་མང་པོ་བཏང་ནས་བར་སྐབས་ཤིག་ལ་ཁ་ཆེའི་ཤ་ཁང་དུ་ཤ་ཧ་ཅང་ཉུང་དུ་སོང་བ་དང་སྲོག་བླུ་བཏང་དྲགས་ནས་སྐབས་ཤིག་མཛོད་སྦུག་གི་ཕྱག་དངུལ་ལའང་སྐུ་ངལ་འཕྲད་པའི་གནས་ཚུལ་བྱུང་འདུག དུས་ཚོད་གཙིགས་ཆེར་གནང་བ། ༸གོང་ས་མཆོག་གིས་དུས་ཚོད་ལ་ཧ་ཅང་རྩ་ཆེར་བརྩིས་ཏེ་སྐར་ཆ་ཙམ་ཡང་འཕྲོ་བརླག་ཏུ་མ་འགྲོ་བར་གནང་གི་ཡོད། དཔེར་ན། ཉིན་དགུང་ལྗགས་སྨིན་གནང་བཞིན་དུ་ཕྱག་དཔེ་ལ་ཐུགས་ཞིབ་གནང་གི་ཡོོད། ཟས་ཞིམ་པོ་ཁས་ཟས་ཏེ་ལྕེས་དྲོ་བ་མྱོང་རྒྱུ་ལས་མིག་ལ་ལས་ཀ་མེད། མིག་གིས་དཔེ་ཆ་བལྟ་ཀློག་བྱས་ན་དུས་ཚོད་འཕྲོ་བརླག་མི་འགྲོ་བའི་ཁྱད་པར་ཡོད་གསུང་གི་ཡོད། ཐེངས་གཅིག་ཐུགས་བྲལ་ཆེ་བའི་སྐབས་ཤིག་འཁྲུས་ཁང་གི་སྒོ་ཕྱེ་སྟེ་ཕྱག་བསིལ་བཞིན་པའི་སྐབས་༸སྙན་ཞུ་རིགས་ཡོད་ན་ལབ་གིན་བྱས་ན་དུས་ཚོད་འཕྲོ་བརླག་ཏུ་མི་འགྲོ་བའི་ཁྱད་པ་ཡོད་གསུངས། ངོ་མཚར་ཆེ་བའི་རྣམ་ཐར། ཕྱི་ལོ་ ༡༩༨༡ ཕྱི་ཟླ་ ༡༠ ནང་ཉིན་ཞིག་འབྲས་ལྗོངས་སུ་གནས་བསྐོར་གནང་སྐབས་༸གོང་ས་མཆོག་ནས་བྲག་རྡོ་ཞིག་ལ་ཐུགས་ཞིབ་ཡུད་ཙམ་གནང་རྗེས་སྐབས་དེར་ཆིབས་ཞབས་ཁོངས་སུ་ཡོད་པ་ཆོས་དོན་དྲུང་ཆེ་སྒ་རྗེ་ཁམས་སྤྲུལ་རིན་པོ་ཆེ་བཀའ་འགུགས་ཀྱིས་འདིར་ལྟོས་དང་ཞེས་གསུངས་ཏེ་༸གོང་ས་མཆོག་ག་ལེར་ཕེབས། ཁམས་སྤྲུལ་རིན་པོ་ཆེས་གཟིགས་ཞིབ་གནང་སྐབས་གཟུགས་མཐོང་བརྙན་འཕྲིན་ལ་བལྟ་བ་བཞིན་ངོ་མཚར་གྱི་ལྟད་མོ་སྣ་ཚོགས་མཇལ་ཡོད། དེ་རྗེས་འབྲས་ལྗོངས་སྲས་མོ་འཕྲིན་ལས་དབང་མོ་ལགས་ཀྱིས་བལྟས་པས་ཡང་བསྐྱར་བྲག་རྡོ་མ་གཏོགས་གང་ཡང་མཇལ་རྒྱུ་བྱུང་མི་འདུག བསྲི་ཚགས་གནང་ཚུལ་གྱི་དཔེ་དོན། ཐེངས་གཅིག་ལས་དོན་སྙན་ཞུར་བཅར་སྐབས་ཞུ་སྒོའི་བཀའ་མངགས་གནང་བ་དང་བློ་བཟང་སྦྱིན་པ་ལགས་ཀྱིས་ཤོག་རྐྱང་དཀར་པོ་ཞིག་ཐོག་བརྗེད་ཐོ་འགོད་སྐབས་ཤོག་བུ་ཡག་པོ་འདི་ཡི་གེ་ཟིན་བྲིས་ལྟ་བུ་ཕན་ཐོགས་ཆེ་ས་ཞིག་ལ་བེད་སྤྱོད་འོས་པ་ཞིག་འདུག ཕར་གཟིགས་ཚུར་གཟིགས་གནང་སྟེ་ཡིག་སྐོགས་རྙིང་པ་ཞིག་བཞེས་ཏེ་ཕྱི་ནང་སློག་པ་གནང་སྟེ་བློ་བཟང་སྦྱིན་པ་ལགས་སུ་སྩལ་ནས་བརྗེད་ཐོ་འདིའི་སྒང་ལ་བྲིས་ན་མ་འགྲིག་པ་ག་རེ་འདུག་ཅེས་བཀའ་ཕེབས། གཞོང་པའི་(Bathtub)ནང་སྐུ་གཟུགས་བསིལ་རྒྱུ་ཆ་གྲོན་ཆེ་བ་ཙམ་དུ་མ་ཟད་ལས་མེད་འབྱོར་ལྡན་གྲལ་རིམ་པའི་བྱེད་སྟངས་ཤིག་རེད་ཅེས་གསུངས་ཏེ་གཞོང་པའི་ནང་སྐུ་གཟུགས་ནམ་ཡང་བསིལ་གྱི་མེད། […]

ཐར་ལམ་སྒྲོལ་མ་ལྕང་ར།འཛིན་གྲྭ་ལྔ་པ། ཀེ་ལཱཤ་པུ་ར་སཾ་བྷོ་ཊ་ཉིན་སློབ། འཇིག་རྟེན་འཁོར་བའི་ནང་ལས་རྒྱུ་འབྲས་ཀྱིས་འཁོར་ཚར་ན་དཀའ་ངལ་དང་སྐྱིད་སྡུག་ཡོང་རྒྱུ་ཤ་སྟག་རེད། བྱས་ཙང་། འགྲོ་བ་མི་ཚང་མའི་མི་ཚེའི་ནང་དཀའ་ངལ་ཡོད། དཀའ་ངལ་དེ་གདོང་ལེན་ཐུབ་པ་དང་དཀའ་ངལ་དེ་སེལ་རྒྱུར་སློབ་སྦྱོང་དང་།ཤེས་ཡོན། བློ་གྲོས། ཡོན་ཏན་སོགས་ཚང་དགོས། དེ་ནས་གལ་ཆེ་གཅིག་ནི་ཉམས་མྱོང་ཡིན།   ཉམས་མྱོང་ནི་སོ་སོའི་མི་ཚེའི་ནང་ཁྱེར་ནས་འགྲོ་ཡ་ཞིག་ཡིན། ཉམས་མྱོང་ནི་རང་ཉིད་ཀྱི་ནོར་འཁྲུལ་ནས་ལེན་ཐུབ་པ་དང་། མི་གཞན་ནས་ཡང་ལེན་ཐུབ། ཉམས་མྱོང་ནི་དེབ་ནས་ཀྱང་བསགས་ནས་རང་ཉིད་ལ་ཕན་ཐོགས་ཐུབ་པ་མ་ཟད་གཞན་ལ་ཡང་བསླབས་ན་གཞན་ལ་ཡང་ཕན། ཉམས་མྱོང་ཡོད་ན་དཀའ་ངལ་དེ་ག་འདྲ་སེལ་དགོས་མིན་ཤེས་པ་མ་ཟད། མ་འོངས་པར་དཀའ་ངལ་དེ་མ་ཕྲད་པའི་ཆེད་ཅི་ཞིག་བྱ་དགོས་པ་ཡང་ཤེས། གལ་སྲིད་མི་ཉམས་མྱོང་མ་ལེན་མཁན་ཞིག་ཡིན་ན། དཀའ་ངལ་མང་ཞིང་དཀའ་ངལ་རྣམས་ཀྱང་སེལ་མ་ཐུབ་པར་མ་ཟད་མི་ལ་ཡང་མ་ཕན། ཉམས་མྱོང་ནི་གཟབ་གཟབ་བྱས་ནས་ལེན་དགོས།  མི་སྡུག་བ་ནས་ལེན་རྒྱུ་མེད། མས་བྱམས་སྐྱོང་དང་བརྩེ་བ། བསླབ་བྱ་བཅས་ཀྱི་འོག་ནས་ང་རང་སུའི་འགྲམ་ནས་ག་དུས་ག་འདྲ་བྱས་ནས་ཉམས་མྱོང་ལེན་དགོས་མིན་བསླབས་སོང་། བྱས་ཙང་། ངས་དེ་བེད་སྤྱོད་བྱས་ཏེ་མི་ཡག་པོ་ཞིག་ལ་དཔེ་བལྟས་ནས་ཉམས་མྱོང་ལེན་ཏེ་ང་རང་གི་བློ་ལ་ཉར་གི་ཡོད།  ཉམས་མྱོང་ག་བར་ནས་ལེན་དགོས་པ་ཤེས་རྒྱུ་གལ་ཆེ། ཉམས་མྱོང་ནི་མི་ཡག་པོ་ནས་ལེན་དགོས། ང་རང་ཉམས་མྱོང་ལེན་སའི་མི་དང་པོ་ནི་ངའི་ཨ་མ་ཡིན། མས་བྱམས་སྐྱོང་བྱེད་སྟངས་དང་མི་ལ་རོགས་པ་བྱེད་སྟངས། བརྩེ་བ་སྤྲད་སྟངས། མི་ལ་ཡ་རབས་བྱེད་སྟངས་སོགས་ཐོགས་མར་མའི་འགྲམ་ནས་ཤེས་སོང་། ད་ལྟ་ང་ཚོ་དེ་འདྲ་ཆགས་པ་དེ་ནི་གཙོ་བོ་སྔོན་འགྲོ་ནས་ཡིན།  སྔོན་འགྲོའི་རྒན་ལགས་ཀྱིས་ང་ཚོ་ཐོག་མར་གང་ཡང་མ་ཤེས་པའི་དུས་ནས་ང་ཚོ་ལ་གང་ཐུབ་ཐུབ་ཀྱིས་བསླབ་བྱ་གནང་བ་དང་། ཞ་སྨྱུག་འཇུ་སྟངས། ཡི་གེ་ཀློག་སྟངས་དང་འབྲི་སྟངས་སོགས་བསླབས་ཡོད།  རྒན་ལགས་ཀྱིས་ང་ཚོ་ལ་ལས་ཀར་དབྱེ་བ་མེད་པར་དང་ཆེ་ཆུང་མེད་པར་བྱེད་དགོས་པའི་དམིགས་དཔེ་བཟང་པོ་ཞིག་བསྟན་སོང་།  རྒན་ལགས་རྣམ་པས་ཕྲུ་གུ་བརྡབས་ན་སྨན་བཅོས་བྱས་པ། ང་ཚོའི་འཛིན་ཁང་གཙང་མ་བཟོས་པ།  སློབ་གྲའི་ཁོར་ཡུག་གཙང་མ་ཉར་པ་སོགས་བྱེད་ཀྱི་རེད། མ་བྱན་མེད་དུས་རྒན་ལགས་ཀྱིས་ཞལ་ལག་བཟོ་ཡི་རེད། ཞོགས་པ་རྟག་པར་ང་ཚོ་ལ་ཕྱགས་མ་འཕྱག་སྟངས་བསླབས་པ་དང་མཉམ་དུ་ཡོན་ཆབ་འབུལ་སྟངས།  ཁ་ལག་ཟ་དུས་མཆོད་པ་འབུལ་སྟངས་སོགས་ང་ཚོ་ལ་མང་པོ་བསླབས་སོང་།   བྱས་ཙང་། ང་རང་གིས་གང་ཤེས་སོང་ལབ་ན། ང་རང་རྗེས་མ་སུ་ལ་བསླབ་བྱ་བརྒྱབ་ན་ང་རང་ཡང་དེ་ལག་བསྟར་བྱ་རྒྱུ་དང་། ལས་ལ་དབྱེ་བ་མེད་པ་ཤེས་སོང་། གལ་ཆེ་གཞན་ཞིག་ནི་ང་ཚོའི་སློབ་གྲྭ་མཐོ་བའི་རིམ་པ་ཀེལྰཤ་པུ་ར་ཡན་ལག་སློབ་གྲྭ་དེ་ཡིན། ཐོག་མར་ང་ཚོའི་སློབ་གྲྭའི་ཁོར་ཡུག་ནི་མཛེས་སྡུག་ལྡན་པ་ཞིག་དང་།  དེའི་ནང་ལ་མེ་ཏོག་ཚང་མ་དྲི་ཞིམ་ཞིང་། ཚང་མ་སྙིང་རྗེ་མོ་ཡོད།   དེར་རྒྱལ་པོ་ཐོག་མ་གཉའ་ཁྲི་བཙན་པོས་བཞེངས་པའི་ཕོ་བྲང་ཡུམ་བུ་བླ་སྒང་ཆུང་ཆུང་གཞི་ཡང་ཡོད།   རྒྱབ་ལ་ཐང་ཀ་ཆེན་པོ་ཞིག་དང་ཁ་ལག་ཟ་ས་ཞིག་ཡོད། ང་རང་རྗེས་མ་ཁོར་ཡུག་སྙིང་རྗེ་མོ་དང་རྩི་ཤིང་མང་པོ་ཡོད་པ་ཞིག་བཟོ་འདོད་ཆེ། ང་ཚོའི་སློབ་གྲྭའི་ཁོར་ཡུག་ནང་མང་གཙོའི་ལྟ་བ་དང་ཕྲུ་གུ་ཚང་མ་འདྲ་མཉམ་ཡིན། སྔོན་མ་ཡིན་ན། སློབ་གྲྭར་ཕྲུ་གུ་ལ་རང་དབང་ཉུང་ཉུང་དང་ཕྲུ་གུ་རྣམས་དགེ་ལགས་ལ་ཞེད་དེ་དགེ་ལགས་ཚོར་དྲི་བ་སྐུལ་མ་ཐུབ་པ་མ་ཟད་སོ་སོའི་ཚོར་བ་ཚང་མའང་བཤད་ཐུབ་ཀྱི་མེད། འོན་ཀྱང་། […]

བསོད་ནམས་སྒྲོལ་མ།འཛིན་གྲྭ་བརྒྱད་པ། མེས་དབོན་གཙུག་ལག་དཔེ་སྟོན་སློབ་གྲྭ། རྩོམ་པ་པོ། གཞོན་ནུ་མགོ་སེ། དཔར་ཁང་། བོད་ཀྱི་དཔེ་མཛོད་ཁང། དང་པོ། སྒྲུང་གི་ནང་དོན། ག་རེའི་སྐོར་ལ་བྲིས་འདུག་ཟེར་ན། བརྩམས་སྒྲུང་འདིའི་ནང་གི་མི་སྣ་གཙོ་བོ་བཀྲ་ཤིས་ཞེས་པ་ཞིག་གིས། སྐལ་བཟང་དོན་གྲུབ་ཀྱིས་ཕྱག་རྩོམ་གནང་བའི་སྒྲོལ་མ་ཉེར་གཅིག་ཅེས་པའི་སྙན་དེབ་དེ་བཀླགས་རྗེས། བཀྲ་ཤིས་ཀྱི་ཡིད་སེམས་དུས་རྟག་ཏུ་སྒྲོལ་མ་ཉེར་གཅིག་གི་ཕྱོགས་སུ་དབང་བ་དང་། དེ་བཞིན་ཤོ་ལོ་ཀ་རེ་རེའི་གསང་བ་དེ་དུས་ནམ་ཞིག་ལ་ཤེས་རྟོགས་ཐུབ་ན་སྙམ་ནས་རྩོམ་ཡིག་དེའི་རྒྱབ་ལོགས་སུ་གསང་བ་ཅི་འདྲ་ཞིག་ཡོད་མེད་ལ་སོགས་པ་དང་། དེ་བཞིན་ཕོ་ཧྲེང་ཞིག་གི་རང་ཉིད་ཀྱི་མི་ཚེ་གཅིག་གི་ནང་སྙིང་སྡུག་ཉི་ཤུ་རྩ་གཅིག་བྱུང་ཡོད་པས། ཁོའི་བརྩེ་གདུང་ངོ་མ་དེ་སུ་ལ་ཡོད་མེད་དག་གི་དྲི་བ་རྣམས་བཀྲ་ཤིས་ལ་མཚོན་ན་ལན་འདེབས་དེ་དག་ཤེས་འདོད་ཀྱི་འདུན་པ་དྲགས་པོ་དེ་དོར་དཀའ་བའི་གནས་ཚུལ་བྲིས་འདུག གང་ཡིན་ཟེར་ན། དང་ཐོག་བཀྲ་ཤིས་ཀྱིས་སྒྲུང་ནང་གི་གསང་བ་དེ་དག་ཤེས་ཆེད་རྩོམ་པ་པོ་སྐལ་བཟང་དོན་གྲུབ་ཀྱི་སྐྱེ་ཡུལ་བླ་བྲང་བཀྲ་ཤིས་འཁྱིལ་དུ་ཕྱིན་ཡང་། སྐལ་བཟང་དོན་གྲུབ་ཀྱི་ནུ་བོ་ཚེ་རིང་དོན་གྲུབ་ཀྱིས་སྐལ་བཟང་ཁོང་འདས་གྲོངས་སུ་ཕྱིན་པའི་གནས་ཚུལ་དེ་སྨྲས་མོད། འོན་ཀྱང་། གནས་ཚུལ་དེ་ཡིས་བཀྲ་ཤིས་ཀྱི་འདོད་པ་དང་འདུན་པའི་ལམ་ཁ་དེ་ནམ་ཡང་བཀག་ཐུབ་མེད་ཅིང་ཤོ་ལོ་ཀ་གཅིག་ཙམ་མ་གཏོགས་གཞན་རྣམས་ཀྱི་གསང་བ་བརྟོལ་ཐུབ་པ་བྱུང་ཡོད་པའི་སྐོར་བྲིས་འདུག གཉིས་པ། སྒྲུང་འདི་ནང་གི་མི་སྣ་ཡི་སྐོར། རྩོམ་པ་པོས་མི་སྣ་ཉི་ཤུ་རྩ་གཅིག་ཚིགས་བཅད་ནང་བཀོད་པ་རྣམས་སྐལ་བཟང་དོན་གྲུབ་ཀྱི་མཛའ་མོ་ཤ་སྟག་ཡིན་འདུག་ལ། དེ་ལས་གཞན་པ་ནི་སྐལ་བཟང་ཁོ་རང་དང་བཀྲ་ཤིས་ཚེ་རིང་དང་། ཚེ་རིང་དོན་གྲུབ། ཨ་ཁུ་རྡོ་རྗེ་བཀྲ་ཤིས་བཅས་ནི་མི་སྣ་གཙོ་བོ་བཟུང་ནས་བྲིས་འདུག གསུམ་པ། སྒྲུང་འདི་བཀླགས་ནས་ཕན་ཐོགས་ཀྱི་སྐོར། ངས་དཔེ་དེབ་འདི་ཐོག་མར་ལག་ཏུ་ལེན་སྐབས། རེ་བ་ཅི་ཡོད་མི་ཤེས་པའི་ཚོར་སྣང་བྱུང་། ངས་ཀློག་འདོད་ཆེན་པོ་ཡོད་ནའང་། རང་ཉིད་ཀྱིས་གོ་རྟོགས་དང་ནུས་པ་ཇི་ཙམ་ཞིག་ཐོབ་ཐུབ་མིན་ཐད་དོགས་པ་ཞིག་ཀྱང་རང་བཞིན་གྱིས་སྐྱེས་ནས་སླེབས་སོང་མོད། འོན་ཀྱང་། ངས་ཨུ་ཚུགས་ཀྱིས་མུ་མཐུད་ནས་་བཀླགས་པ་ན། རང་ཉིད་ཀྱི་གོ་རྟོགས་དང་ནུས་པ་གཉིས་ཀར་འགྱུར་བ་ཆེན་པོ་ཞིག་འགྲོ་བཞིན་པ་མཐོང་བྱུང་། ངས་ཐོག་མར་དོ་སྣང་བྱུང་བའི་གནད་དོན་དང་པོ་ནི། རང་གི་མིང་ཚིག་གི་ཤེས་ཚད་ཡར་རྒྱས་ཕྱིན་པ་དེ་རེད། ངས་ཇི་ཙམ་མང་བ་ཀློག་པ་དེ་ཙམ་གྱིས་སྔར་མཐོང་མ་མྱོང་བའི་མིང་ཚིག་མང་དུ་འཕྲད་ཀྱི་འདུག ངས་རྒྱུས་མངའ་མེད་པའི་མིང་ཚིག་རྣམས་འཚོལ་བར་ཆེད་འབད་བརྩོན་བྱས་པ་དང་། དེའི་འབྲས་བུར་རང་གི་མིང་ཚིག་གི་མཛོད་ནང་དུ་མིང་ཚིག་གསར་པ་མང་པོ་བསྣན་ཐུབ་པ་བྱུང་། དཔེ་དེབ་འདིས་ངའི་བསམ་བློ་དང་མཐོང་རྒྱ་བསམ་ཡུལ་ལས་འདས་པའི་ཆེ་རུ་བཏང་སོང་། ལེའུ་རེ་རེ་ཀློག་སྐབས་ངས་རྒྱུས་མངའ་མེད་པའི་བརྗོད་གཞི་དང་ལྟ་ཚུལ་གསར་པ་ཤེས་རྟོགས་བྱུང་སོང་། དཔེ་དེབ་གཅིག་གིས་བསམ་བློ་དང་། དངོས་དོན། ལྟ་ཚུལ་བཅས་ཀྱི་འཇིག་རྟེན་གསར་པ་ཞིག་གི་སྒོ་མོ་ཕྱེ་བ་ནི་ངོ་མཚར་ཆེ་བ་ལ་ཨང་བསམ་བྱུང་། མཐར་ང་ལ་ཤེས་བྱ་གསར་པ་མང་པོ་ཞིག་ཐོབ་པ་དང་མཉམ་དུ་སྤོབས་པ་ཡང་ཇེ་ཆེར་ཕྱིན། ད་ཆ་ངས་དེབ་འདིའི་བརྗོད་གཞི་དང་འབྲེལ་བའི་བརྗོད་གཞི་ཁག་གི་སྐོར་ལ་གླེང་མོལ་བྱེད་སྐབས་སེམས་ཀྱི་ཞི་བདེ་རྙེད་སོང་། མཇུག་བསྡོམས་སུ། དཔེ་དེབ་འདི་བཀླགས་ནས་ང་ལ་གྲུབ་འབྲས་ཆེ་བའི་ཉམས་མྱོང་མང་པོ་ཞིག་རེག་བྱུང། ངས་རང་གི་ཤེས་ཡོན་རྒྱ་བསྐྱེད་བྱས་པ་ཙམ་མ་ཡིན་པར། དཔྱད་ཞིབ་བྱེད་རྒྱུའི་བསམ་བློའི་ནུས་རྩལ་ཡང་གོང་འཕེལ་བཏང་ཐུབ་པ་བྱུང་སོང་། དེ་བཞིན་ཚིག་ཀྱང་ཕྱུག་ཏུ་ཕྱིན་པ་དང་ངས་མུ་མཐུད་དེ་དཔེ་དེབ་ཀློག་པའི་ལམ་བུར་ཞུགས་ནས་རང་ཉིད་གང་ཙམ་སླེབས་ཐུབ་མིན་ལྟ་རྒྱུར་དགའ་སྒུག་ཆེ་ཤིན་ཏུ་ཆེ། བཞི་བ། སྒྲུང་གི་ཚིག་གསར། ལྔ་བ། […]

བསྟན་འཛིན་འཇམ་དབྱངས།འཛིན་གྲྭ་དགུ་པ། དྷ་སྟེང་བོད་ཁྱིམ་སློབ་གྲྭ། གསུང་མཁན། ༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག ཕྱོགས་སྒྲིག་དང་ཟུར་འདོན་བྱེད་མཁན། རྣམ་གྲྭ་ཐུབ་བསྟན་ཡར་འཕེལ། བསྟན་དོན་གཙོ་བོ། དཔེ་ཆ་འདི་ནི་ཀློག་བདེ་ཞིང་ནང་དོན་ཤེས་སླ་བ། ཐུང་ཐུང་ཡིན་ན་ཡང་། བསླབ་བྱའི་ནང་དོན་རྒྱ་ཆེ་ལ་དོན་ཟབ་པ། དཔེར་ན། གནང་ཡུལ། སློབ་གྲྭ་ཁག་དང་ཚོགས་པ། སྐྱིད་སྡུག་ཁག མཐོ་སློབ། ཤེས་ཡོན་ཅན། དགེ་རྒན་དང་ལས་བྱེད་ལ་སོགས་ལ་གནང་བ་རྐྱང་རྐྱང་རེད་འདུག ཤེས་ཡོན་དང་། བཟང་སྤྱོད། ཡུལ་སྲོལ་གོམས་གཤིས། གཞན་ཕན་ལྷག་བསམ་སོགས་ཧ་ཅང་མང་པོ་འདུག སྡེ་ཚན། བཀའ་སློབ་འདིའི་ནང་སྡེ་ཚན་ཀ་ནས་ཐ་བར་དབྱེ་བ་ཕྱེ་ནས་ནང་གསེས་དབྱེ་བ་མི་འདྲ་བ་མང་པོ་ཡོད་པ་མ་ཟད། ནང་དོན་ཆ་ནས་རིགས་མི་འདྲ་བ་ཧ་ཅང་མང་པོ་འདུག དེ་ཡང་གཙོང་བོ་༸གོང་ས་མཆོག་གིས་རྒྱ་གར་ས་གནས་མི་འདྲ་བར་དང་། ཟླ་ཚེས་མི་འདྲ་བར་གནང་བའི་བཀའ་སློབ་རེད་འདུག དཔེར་ན། སྡེ་ཚན་ཀ་པ་བཟང་སྤྱོད་ལམ་སྟོན། ཞི་བདེའི་བསྟི་གནས་དང་། ཡ་རབས་སྤྱོད་བཟང་། ཕྱི་ལོ་ ༡༩༩༤ ཟླ་བ་ ༤ ཚེས་ ༡ ཉིན་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་བཞི་པའི་ཐོག་སྩལ་བའི་བཀའ་སློབ། འདི་ལྟ་བུའི་བཀའ་སློབ་མི་འདྲ་བ་མང་པོ་འདུག ངས་ངོ་དེབ་ཐོག་རེས་གཟའ་ལྷག་པར་ལྷག་དཀར་སྲུང་བརྩིའི་ཆེད་དེབ་བཀླགས་ནས་འགྲེམས་སྤེལ་ཡང་ཞུ་ཡི་ཡོད། (དེབ་འདིར་ཤོག་གྲངས། ༣༢༣ འདུག) ཚིག་གསར། བསྟི་གནས། ལེགས་སྐྱེས། ཞབས་འདེན། གདེང་སྤོབས། ཁོག་ཡངས། རྒྱས་སྤྲོས། ཁུར་མཉམ་ལེན། མངའ་ཐང། སེམས་རྒྱུད། བློ་བག་ཡངས་པོ། མངའ་ཐང་། བློ་གཟུ་པོ། […]

བསྟན་འཛིན་དབྱངས་སྒྲོན།འཛིན་གྲྭ་དགུ་པ། སཾ་བྷོ་ཊ་གུ་རུ་པུ་ར། བོད་སྒྱུར་བ། ཨཙཱརྱ་ཀརྨ་སྨོན་ལམ། སྒྲུང་གི་ནང་དོན་སྙིང་བསྡུས། ཆེས་སྔ་མོ་བཅོམ་ལྡན་འདས་ཞལ་བཞུགས་པའི་སྐབས་དང་། གཉན་ཡོད་ཀྱི་རྒྱལ་པོ་གསལ་རྒྱལ་གྱིས་ཡུལ་ཀོ་ས་ལར་དབང་སྒྱུར་བའི་དུས་ན། མཚན་གཅིག་རྒྱལ་པོ་སྐུ་གཟུགས་ལྷོད་ཞིང་བདེ་བའི་ངང་གཉིད་ལ་རོལ་བཞིན་པའི་སྐབས། གློ་བུར་དུ་རང་ཉིད་ཀྱི་མལ་ཁང་འོད་ཀྱིས་ཁེངས་པར་བརྟེན་གཉིད་ལས་སད་པ་རེད། རྒྱལ་པོ་ལམ་སེང་རང་ཉིད་ཀྱི་མལ་ལས་ལངས་ཏེ་ཡ་མཚན་སྐྱེས་ཏེ་ཡུད་ཙམ་རིང་བསམ་བློ་ཞིབ་མོ་ཞིག་གཏང་། འོན་ཀྱང་། སྣང་བ་ཐམས་ཅད་རང་ཡལ་དུ་སོང་བས་ཁོས་སོ་སོའི་སྣང་བ་འཁྲུལ་བ་རེད་སྙམ་པ་རེད། ཡིན་ན་ཡང་། སང་ཞོགས་མདང་ནུབ་གང་བྱུང་བའི་དོགས་པ་རྣམས་ཡལ་ཟིན། ཁ་སང་མཚན་མོར་རང་ཉིད་ཀྱི་མཆོད་གནས་ལ་བུ་ཕྲུག་ཅིག་འཁྲུངས་པ་རེད། ཡ་མཚན་ཞིག་ལ་བྱིས་པ་དེ་བཙས་མ་ཐག་ཏུ་ལུང་པ་དེའི་ནང་གི་མཚོན་ཆ་དག་ལས་ཡ་མཚན་ཅན་གྱི་འོད་ཟེར་འཕྲོ་བ་མཐོང་འདུག དེ་ནས་ཉིན་ཞིག་གི་ཞོགས་པ་ཕ་དེས་མཚན་མཁན་ལ་བསྟན་ནས་གཏམ་ངན་ཞིག་ཐོས། དེ་ནི་བྱིས་ཆུང་དེ་ནར་སོན་སྐབས་མི་གསོད་ལག་དམར་ཉེས་ཅན་པ་ཞིག་ཏུ་གྱུར་ཏེ་དེ་གའི་ཡུལ་གྱི་ཉེས་མེད་མི་སེར་རྣམས་ལ་འཚེ་བ་བྱེད་མཁན་ཞིག་ཏུ་ཆགས་ཀྱི་རེད་གསུངས། དེ་ནས་མཆོད་གནས་དེ་རྒྱལ་པོའི་སར་བཅར་ནས། མཚན་མཁན་གྱིས་གང་གསུངས་པ་དེ་དྲང་བདེན་ངང་བཤད་དེ། རང་ཉིད་ཀྱི་ཕྲུ་གུའི་ཚེ་སྲོག་བློས་གཏོང་བྱེད་ཀྱི་ཡིན་ཞེས་བཤད། ཡིན་ན་ཡང་། རྒྱལ་པོས་ལུང་བསྟན་པ་རྣམས་ཆ་ཚང་བདེན་པ་མ་ཡིན་ཞིང་། ད་དུང་སངས་རྒྱས་ཀྱིས་སེམས་ཅན་ཐམས་ཅད་ཀྱི་རྒྱུད་ལ་ཐར་པའི་ས་བོན་ཡོད་ཅེས་གསུངས་པ་ཁོས་ཐོས་བྱུང་བས། བྱིས་པ་དེ་གསོ་སྐྱོང་ཡག་པོ་དང་བྱམས་སྙིང་རྗེ་ལྡན་པ་ཞིག་བཟོ་དགོས་བཅས་བཀའ་གནང་། དེ་ནས་ཕ་དེ་ཡིས་སོ་སོའི་ཕྲུ་གུ་ལ་ཤེས་བྱའི་ལྡུམ་རྭ་སྐྲུན་ནས་བུ་དེས་རིག་རྩལ་སྣ་ཚོགས་སྦྱངས་བ་མ་ཟད། སངས་རྒྱས་ཀྱི་གསུང་རབ་དག་ལ་བརྩོན་འགྲུས་ཀྱིས་གོ་ཆ་བསྟན་པོས་འབད་ཀྱི་ཡོད། དེ་ནས་མི་གདུང་བ་ནར་སོན་ཏེ་ཡུལ་གཞན་ཞིག་ཏུ་སློབ་སྦྱོང་བྱེད་སྦྱང་དུ་ཕྱིན། ཁོ་ཡུལ་རྡོ་འཇོག་དུ་སླེབས་ནས་སློབ་དཔོན་མཁས་པ་ཞིག་གི་དྲུང་ནས་རིག་རྩལ་རྣམས་བྱང་ཆུབ་པར་སྦྱངས་ནས་ཕུལ་བྱུང་སློབ་མ་ཞིག་ཏུ་གྱུར། ཡིན་ན་ཡང་། སློབ་མ་གཞན་རྣམས་མི་གདུང་བའི་རིག་སྟོབས་ལ་ཕྲག་དོག་སྐྱེས་ནས། ཁོང་ཚོས་མི་གདུང་བ་དང་རྒན་ལགས་དབར་དཀྲུག་ཤིང་བྱུས་ངན་བཤམས་ཏེ་མཐར་བྱུས་ངན་དེ་བསྒྲུབས་ཏེ། རྒན་ལགས་དེ་ཡིས་རང་ཉིད་ཀྱི་ངག་རྒྱལ་གྱི་གོ་འཕང་མཐོ་དྲག་ནས་མི་གདུང་བ་ལ། མིའི་ལག་པ་གཡས་ཕྱོགས་ཀྱི་མཐེ་བོང་༡༠༨ ཡོད་པའི་ཕྲེང་བ་ཞིག་བཟོས་ན་ཁོ་ལ་ནུས་པ་གཞན་དང་མི་འདྲ་བ་ཐོབ་སྲིད་པ་དང་། ད་དུང་མི་འདས་པ་རྣམས་གསོ་ཐུབ་པའི་ནུས་པ་ཡང་ཐོབ་ཀྱི་རེད། ཅེས་བཀའ་ངན་ཞིག་རྩལ། མི་གདུང་བ་ནི་རང་གི་སློབ་དཔོན་གྱིས་གང་གསུངས་བ་རྣམས་བློ་དཀར་གྱིས་རྗེས་སུ་འབྲང་མཁན་ཞིག་ཡིན་པས། ཁོས་ལས་ངན་དེ་བྱེད་འགོ་བཙུགས། ཁོས་བྱམས་སྙིང་རྗེ་དང་བྲལ་ནས་ཉེས་མེད་མི་སེར་མང་པོའི་སྲོག་བཅད་ནས་ཁྲག་དྲི་དྲོ་བའི་ནགས་ཚལ་ནང་མི་མཐའ་མ་ཞིག་གིས་མརྫུབ་མོ་དགོས་པའི་སྐབས། སྙི་རྗེ་ཆེན་པོ་སངས་རྒྱས་བཅོམ་ལྡན་འདས་དང་འཕྲད། ཁོས་རང་གི་ཤུགས་ཡོད་ཚད་ཀྱི་རྒྱུགས་ཀྱང་སངས་རྒྱས་རྗེས་མ་ཟིན། མཐར་ཁོས་སངས་རྒྱས་ལ་སྡོད་དང་བཅས་ཞུ་བ་བརྒྱབ། སངས་རྒྱས་ནི་རྟག་ཏུ་སྡོད་ཡོད་པ་དང་མི་སྡོད་པ་དེ་ཁོ་ཡིན། སངས་རྒྱས་ནི་ཉོན་སྒྲིབ་དང་ཆོགས་ཤེས་ཆ་ཚང་སྤངས་ཚར་བ་དང་། མི་གདུང་བ་ནི་སྡིག་པའི་ཁེངས་ནས་མི་སྡོད་པར་མི་གསོད་པའི་ལས་བྱེད་ཀྱི་ཡོད། དེ་ནས་སངས་རྒྱས་ཀྱི་གདམས་ངག་ཉན་རྗེས་ཚུལ་ཁྲིམས་ཀྱི་སྡོམ་པ་བཞེས་ནས་ནང་པའི་ཆོས་དང་རིག་གནས་ལ་བྱང་ཆུབ་པར་སྦྱངས། འོན་ཀྱང་། རྒྱལ་པའི་བློན་པོ་རྣམས་མི་གདུང་བ་བཙན་བཟུང་བྱེད་དུ་སླེབ་སྐབས་མི་གདུང་བ་བཙུན་པ་ཞིག་ཡིན་པ་ཤེས་པས་ཁོང་རྣམས་པས་གློད་བཏང་བ་རེད། ཉིན་ཞིག་མི་གདུང་བ་གྲོང་གསེབ་ནང་བཟས་ཚོལ་བར་འགྲོ་སྐབས་སྐྱེས་པ་མང་པོ་ཡོངས་ཏེ་ཁོང་ལ་ཉེས་རྡུང་དྲག་པོ་བཏང་། ཁོང་ལ་རྨས་སྐྱོན་དྲག་པོ་ཕོག་པས་མཐར་ཁོང་ཚེལས་འདས་སོ། མྱོང་ཚོར། སྒྲུང་དེབ་འདི་བཀླགས་པའི་རྗེས་སུ་སེམས་ལ་ཚོར་བ་ཤུགས་ཆེན་པོ་ཞིག་སྐྱེས་བྱུང་། དེ་ནི་གལ་སྲིད་ཁྱེད་ལ་དགེ་རྒན་བཟང་པོ་ཞིག་མ་འཕྲད་ན་སོ་སོའི་མི་ཚེ་སྟོང་ཟད་དུ་འགྲོ་བ་མ་ཟད། མུན་ནག་གི་ཁྲོད་ཁྱར་ཁྱོར་གྱི་གོམ་སྟབས་སྤོ་བཞིན་པ་གཉིས་སུ་མ་མཆིས། […]