ཟླ་བ་ཚེ་རིང་། བོད་དགེ།མེས་དབོན་གཙུག་ལག་དཔེ་སྟོན་སློབ་གྲྭ།    སྤྱིར་རྒྱལ་ཁབ་ཅིག་གི་ཆབ་དཔལ་རིག་གསུམ་གྱི་མངའ་ཐང་དེ་དར་རྒྱས་འགྲོ་མིན་ནི། རྒྱལ་ཁབ་དེའི་སློབ་གསོ་ལ་རག་ལས་ཡོད་ལ། སློབ་གསོ་དེ་ཡང་སློབ་གྲྭའི་སློབ་གསོ་ལ་ཐུག་ཡོད་པར་མ་ཟད། གཙོ་བོ་སློབ་གྲྭའི་དགེ་རྒན་གྱི་ཤེས་ཚད་དང་འཇོན་ཐང་ལ་རག་ལས་ཡོད་པ་ནམ་ལངས་ཉི་ཤར་གྱི་དཔེ་ཡིན་པས། མཁས་པའི་དབང་པོ་སློབ་དཔོན་ཟམ་གདོང་རིན་པོ་ཆེ་མཆོག་གིས “མི་རིགས་དང་སྤྱི་ཚོགས་ཀྱི་འབྱུང་འགྱུར་གནས་བབ་ཤེས་ཡོན་ལ་རག་ལུས་ཤིང་། ཤེས་ཡོན་བཟང་ཞན་དགེ་རྒན་ལ་རག་ལུས་པས། དགེ་རྒན་ནི་སྤྱི་ཚོགས་ནང་གལ་གནད་ཆེ་ཤོས་ཡིན”་གསུངས་པ་ལྟར་དགེ་རྒན་ནི། མི་རིགས་ཤིག་གི་ཚེ་སྲོག་བཟོ་མཁན་གྱི་ལྷ་རྗེ་དེ་ཡིན་ལ། དགེ་རྒན་ནི་མི་རིགས་ཤིག་འགྱེལ་ས་ནས་ཡར་སློང་མཁན་གྱི་དཔའ་བོ་དེ་ཡང་ཡིན་པས། དགེ་རྒན་ཞིག་ཡིན་ན་རང་རིགས་ལ་བློ་དཀར་ཞིང་རང་སྐད་ལ་ཤ་ཞེན་ཆེ་བའི་མི་བུ་ཞིག་ཡིན་དགོས་མོད། དུས་ཚོད་ཀྱི་རྐྱེན་གྱིས་ཁ་སང་དེ་རིང་གི་དགེ་རྒན་ཚོ་ནི། ཡིག་ཆ་ཉར་མཁན་ཞིག་དང་ཐོ་འགོད་བྱེད་མཁན་ཞིག་མ་གཏོགས་བསམ་བློའི་དབང་ཚད་ཀྱི་ཁོར་ཡུག་མེད་ལ། ཡོད་པའི་དབང་དུ་བཏང་རུང་སྤྱི་དོན་འཕྱར་ཏེ་རང་དོན་སྒྲུབ་མཁན་གྱི་དུས་སུ་མཆིས་བས། རྒྱལ་ཁབ་ཅིག་དང་མི་རིགས་ཤིག་ལ་མཚོན་ནས་བཤད་ན་མི་རིགས་དེའི་སློབ་གསོ་ཡི་གྱོང་གུད་ཅིག་དང་གོད་ཆག་གི་ལམ་ཁ་ཞིག་ཡིན་པའི་སྐབས་འདིར། ད་རེས་ཤེས་རིག་ལས་ཁུངས་ཀྱིས་ “༸གོང་ས་མཆོག་གི་དགོངས་པའི་དགེ་རྒན་ལ་ཚང་དགོས་པའི་ཁྱད་ཆོས” ཟེར་བའི་བརྗོད་གཞི་འདི་ནི་རྣག་ཐོག་ཁབ་གཙགས་ཀྱི་ཚུལ་དུ་གདའ་བས། རང་སེམས་སྤྲོ་བས་བརྟས་ཤིང་དུང་པས་ཁེངས་ཏེ་གོང་གི་བརྗོད་གཞིའི་ཐོག་ལ་བསམ་ཚུལ་ཙམ་ཞིག་སྤུང་པར་བྱ་བ་ལ། དང་པོ། གཤིས་ཀ་འཇམ་ཞིང་ཀུན་སྤྱོད་ཡག་པོའི་དགེ་རྒན་ཞིག་ཡིན་དགོས་པ།    སྤྱིར་འགྲོ་བ་མིའི་རིགས་ཀྱི་ཆོས་ཉིད་ལྟར་གཤིས་ཀ་འཇམ་པོ་དང་ཀུན་སྤྱོད་གཙང་མའི་རིགས་ཀྱི་མི་བུ་ནི་མིའི་ནང་གི་མཆོག་ཏུ་བརྩི་སྲོལ་ཡོད་པ་ཇི་བཞིན་དགེ་བའི་བཤེས་གཉེན་རྣམས་ཀྱི་ཀུན་སྤྱོད་ནི། འཇམ་པོ་ཞིག་དང་གཙང་མ་ཞིག་ཡོད་དགོས་རྒྱུ་ནི་མདོ་སྡེ་རྒྱན་ལས་ “བཤེས་གཉེན་དུལ་བ་ཞི་བར་ཉེར་ཞི་བ།། ཡོན་ཏན་ལྷག་པ་བརྩོན་བཅས་ལུང་གིས་ཕྱུག། །དེ་ཉིད་རབ་ཏུ་རྟོགས་པ་སྨྲ་མཁས་ལྡན།། བརྩེ་བའི་བདག་ཉིད་སྐྱོ་བ་སྤངས་ལ་བརྟེན།།” ཞེས་གསུངས་པ་ལྟར། དགེ་རྒན་ཞིག་གི་མཚན་གནས་ཡོད་ཕྱིན་ཆད་རང་ཉིད་ཀྱི་འགྲོ་འདུག་སྤྱོད་གསུམ་ལ་གཟབ་ནན་གྱིས་ཀུན་སྤྱོད་ཡག་པོ་ཞིག་དང་གཤིས་འཇམ་ཞི་དུལ་གྱི་དགེ་རྒན་ཡག་པོ་ཞིག་བྱས་ཏེ། ཉེ་འཁོར་གྱི་སློབ་ཕྲུག་དང་ཕ་མ་རྣམས་ལ་མིག་དཔེ་ཡག་པོ་ཞིག་སྟོན་རྒྱུ་ནི། དགེ་རྒན་ཞེས་པའི་མཚན་གནས་འདིའི་མིང་གི་སྔོན་འགྲོ་རེད། ལྷག་པར་དུ་མིའི་གཤིས་ཀ་འཇམ་པོ་དང་ཀུན་སྤྱོད་ཡག་པོ་ཡོད་ན། མི་དང་མིའི་བར་འབྲེལ་འདྲིས་བདེ་བའི་ཁེ་ཕན་ཡོད་པར་མ་ཟད། སློབ་ཕྲུག་ཚོའི་ཡིད་ལ་ཞེད་སྣང་དང་འཚེར་སྣང་མེད་པར་སེམས་ཐག་ཇེ་ཉེ་དང་མཛའ་མཐུན་ཇེ་ཟབ་ཏུ་འགྲོ་བའི་ལམ་ཁ་དང་པོ་དེ་ཡིན་པས། སློབ་ཕྲུག་ཚོའི་སེམས་ཀྱི་འཚེར་སྣང་དང་ཞེད་སྣང་མེད་པར་ཆགས་ཚེ་ཅི་ཞིག་བསླབ་རུང་ཤེས་སླ་ལ་གང་ཞིག་སྦྱོང་ཡང་སྦྱོང་འདོད་ཀྱི་སེམས་བྱུང་རྙེད་སླ་བའི་རྐྱེན་གྱིས་དགེ་རྒན་ཚོས་ངེས་པར་དུ་དགེ་རྒན་ཞིག་གི་སྔོན་འགྲོའི་སློབ་གསོ་འདིར་བརྩི་སྲུང་དང་ལག་བསྟར་འཁྱེར་ཐུབ་པ་བྱ་དགོས། ཡང་ཕྱོགས་གཞན་གཅིག་ནས་བཤད་ན། ཡ་རབས་བཟང་སྤྱོད་ནི། རྡོག་རྡོག་རི་བོ་ནང་བཞིན་སྟོན་རྒྱུ་ཞིག་མ་ཡིན་པར་ཉིན་རེའི་འཚོ་བའི་ཁྲོད་ཀྱི་མིའི་གཤིས་ཀ་དང་ཀུན་སྤྱོད་ལས་ངོམ་དགོས་པའི་ན། དགེ་རྒན་ཚོའི་གཤིས་ཀ་དང་ཀུན་སྤྱོད་ནི། རྒྱ་ཆུང་ས་ནས་བཤད་ན་སློབ་ཕྲུག་ཅིག་གི་མི་ཚེའི་ཁ་ཕྱོགས་ལ་འབྲེལ་བ་ཡོད་ལ། རྒྱ་ཆེ་ས་ནས་བཤད་ན། མི་རིགས་ཤིག་གི་ཤེས་ཡོན་གྱི་དར་རྒུད་ལ་རག་ལས་པས་གལ་ཆེན་ནང་གི་དོན་ཆེན་དུ་མཐོང་ངོ་།། ཡང་ཁ་ཅིག་གིས་དགེ་རྒན་གྱི་ལས་ཀ་ནི། སློབ་ཚན་བསླབ་ཡ་རེད་བསམ་སྟེ་སྣང་མེད་གཏོང་སྲིད་མོད། བསམ་བློ་ཞིབ་ཚགས་ཀྱིས་གཞིགས་ཚེ་དགེ་རྒན་གྱི་ལས་འཁུར་ནི། འབྲི་ཀློག་ཁྲིད་མཁན་ཙམ་ཞིག་མ་ཡིན་པར་སློབ་ཕྲུག་ཅིག་གི་མི་ཚེའི་ཁ་ཕྱོགས་སྟོན་མཁན་གྱི་ལམ་སྟོན་པ་ཞིག་ཡིན་ཙང་། དགེ་རྒན་གྱི་འགྲོ་འདུག་སྤྱོད་གསུམ་ནི། སློབ་ཕྲུག་ཅིག་གི་མི་ཚེ་ཡི་རྒྱགས་ཕྱེ་དེ་ཡིན་པས། དགེ་རྒན་ཞིག་ཡིན་པའི་ཆ་ནས་སོ་སོའི་གཤིས་ཀ་དང་ཀུན་སྤྱོད་ལ་ཡང་ཡང་ཞིབ་འཇུག་དང་ཡར་རྒྱས་བཏང་སྟེ། སློབ་ཕྲུག་ཚོའི་མིག་ནང་གི་དགེ་རྒན་གཤིས་བཟང་ཅན་ཞིག་བྱ་རྒྱུ་ནི་༸གོང་ས་མཆོག་གི་དགོངས་པའི་དགེ་རྒན་ལ་ཚང་དགོས་པའི་ཆ་རྐྱེན་དང་པོ་དེ་ཡིན་ནོ།། གཉིས་པ། བྱམས་པའི་སེམས་དང་ལྡན་པའི་དགེ་རྒན་ཞིག་ཡིན་དགོས་པ།    ང་ཚོ་འགྲོ་བ་མི་ཞིག་ཡིན་པའི་ཆ་ནས་བྱམས་བརྩེ་དང་བདེ་སྐྱིད་འདོད་པ་ནི། […]

བདེ་ལེགས་དཔལ་མོ། གཞི་འོག་བོད་དགེ།སཾ་བྷོ་ཊ་ཀོ་ལེ་གྷལ་ཉིན་སློབ། ངོ་སྤྲོད།    ༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་གྱི་སྐོར་ལ་དགོངས་པ་གཏིང་ཟབ་བཞེས་གནང་གི་ཡོད། ཁོང་གིས་དེང་རབས་ཀྱི་ཤེས་ཡོན་ལམ་ལུགས་ནང་དགེ་རྒན་གྱི་བྱེད་སྒོ་ནི། སློབ་ཚན་སློབ་ཁྲིད་བྱེད་པ་ཙམ་མ་ཡིན་པར། སློབ་ཕྲུག་གི་བསམ་བློ་དང་སེམས་ཁམས་ཡར་རྒྱས་གཏོང་རྒྱུ་དེ་ཡང་ཤིན་ཏུ་གལ་ཆེན་པོ་ཡིན་པར་དགོངས་ཀྱི་ཡོད་པས་གུས་མོས་དེ་རིང་༧གོང་ས་མཆོག་གི་དགོངས་པ་བཞིན་དགེ་རྒན་ལ་ཚང་དགོས་པའི་ཁྱད་ཆོས་འགའ་ཞུ་རྒྱུ་ཡིན། དང་པོ། བྱམས་བརྩེའི་བསམ་པ་ལྡན་པ།    ༧གོང་ས་མཆོག་གི་དགོངས་པར་དགེ་རྒན་ཞིག་ལ་མེད་དུ་མི་རུང་བའི་ཁྱད་ཆོས་ནི། བྱམས་བརྩེའི་བསམ་པ་ཡིན། དགེ་རྒན་གྱིས་སློབ་ཕྲུག་ཚང་མར་གཅིག་མཚུངས་ཀྱི་བྱམས་སྐྱོང་དང་། སེམས་ཁུར། མ་ཡིས་རང་གི་བུ་ལ་གཅེས་པ་ལྟར་སློབ་ཕྲུག་གང་འདྲ་ཞིག་ཡིན་ཡང་དཀའ་ངལ་ལ་སེམས་ཁུར་དང་རོགས་རམ་བྱེད་ཐུབ་པ། ཁོང་ཚོའི་བདེ་སྡུག་ལ་སེམས་ཁུར་བྱེད་ཐུབ་པ་དགོས། དགེ་རྒན་ཞིག་ལ་ཆ་མཚོན་ན། བྱམས་བརྩེའི་བསམ་པ་མེད་ན་ནམ་ཡིན་ཡང་གདོང་པ་གནག་ནས་སློབ་ཚན་ཁྲིད་བསྡད་པ་ཡིན་ན་སློབ་ཕྲུག་ཚོའི་སེམས་ལ་ནམ་ཡང་བདེ་སྐྱིད་ཅིག་རག་རྒྱུ་ནི་དཀའ་མོ་རེད་དྲན་བཞིན་ཡོད། དགེ་རྒན་གྱིས་སློབ་ཕྲུག་ཚོ་ནི་རང་གི་གྲོགས་པོ་གྲོགས་མོ་ཡི་འདུ་ཤེས་གནང་ནས་སློབ་ཁྲིད་གནང་བ་ཡིན་ན་སློབ་ཕྲུག་ཚོའི་སེམས་ལ་བདེ་སྐྱིད་དང་སྤྲོ་བས་ཁེངས་ནས་སློབ་སྦྱོང་གནང་སྐབས་བྱམས་བརྩེའི་བསམ་པ་དེས་སློབ་མ་རྣམས་ཀྱི་སེམས་ནང་སྤོབས་པ་དང་བློ་སྟོབས་སྐྱེད་པར་ཕན་ཐོགས་ཆེན་པོ་ཡོད། གཉིས་པ། བཟོད་བསྲན་དང་གུ་ཡངས།    དགེ་རྒན་གྱིས་སློབ་ཕྲུག་སོ་སོའི་གཤིས་ཀ་དང་སློབ་སྦྱོང་གང་ཅིའི་ཐད་ནས་བཟོད་བསྲན་དང་གུ་ཡངས་པོ་གནང་དགོས། སློབ་ཕྲུག་ཚང་མ་གཅིག་པ་མིན་ལ། ཤེས་ཡོན་སྦྱོང་བའི་ཚད་དང་ནུས་པ་ཡང་མི་འདྲ་བས། དགེ་རྒན་གྱིས་སློབ་མ་རེ་རེའི་གཤིས་སྤྱོད་ཀྱི་ཁྱད་པར་ངོས་འཛིན་ཐུབ་པ་བྱས་ཏེ་ཁོང་ཚོར་འཚམས་པའི་སློབ་སྟོན་དང་རྒྱབ་སྐྱོར་སྤྲོད་དགོས། ༸གོང་ས་མཆོག་གིས་དགེ་རྒན་གྱིས་སློབ་ཕྲུག་ཚོར་ནོར་འཁྲུལ་བྱུང་སྐབས། ཁོང་ཁྲོ་མ་ལངས་པར་བྱམས་བརྩེ་དང་བཟོད་བསྲན་ཐོག་ནས་ལམ་སྟོན་བྱེད་དགོས་པ་ཡང་ནས་ཡང་དུ་གསུང་གནང་གི་ཡོད་པས་དགེ་རྒན་སུ་འདྲ་ཞིག་ཡིན་ཡང་སློབ་ཕྲུག་སུ་ཞིག་གིས་ནོར་འཁྲུལ་ཅི་བྱུང་ལ་བརྟག་དཔྱད་མ་གནང་བར་ཉེས་པ་གཏོང་པ་ནི་མ་འོས་པ་ཞིག་རེད་སྙམ། དེར་བརྟེན། དགེ་རྒན་གྱིས་སློབ་མ་རྣམས་ལ་བྱམས་བརྩེའི་ངང་ནས་སློབ་སྟོན་གནང་རྒྱུ་གལ་ཆེན་པོ་རེད་བསམ། གསུམ་པ། ཤེས་ཡོན་ཕུན་སུམ་ཚོགས་པ།    དགེ་རྒན་ལ་རང་ཉིད་ཀྱིས་སློབ་ཁྲིད་བྱེད་སའི་སློབ་ཚན་གྱི་ཐོག་ལ་ཤེས་ཡོན་ཕུན་སུམ་ཚོགས་པ་ཞིག་དགོས། ༧གོང་ས་མཆོག་གིས་དགེ་རྒན་རྣམས་ཀྱིས་དུས་རྟག་ཏུ་ཤེས་ཡོན་གསར་པ་སྦྱོང་བརྡར་དང་། དེང་དུས་ཀྱི་ཤེས་ཡོན་ལམ་ལུགས་དང་མཐུན་པའི་ཤེས་ཡོན་གོང་མཐོར་གཏོང་དགོས་པའི་བཀའ་སློབ་གནང་གི་ཡོད། དགེ་རྒན་ནི་ཤེས་ཡོན་གྱི་འབྱུང་ཁུངས་ཤིག་ཡིན་པས། རང་ཉིད་ཀྱི་ཤེས་ཡོན་ཡར་རྒྱས་གཏོང་རྒྱུར་འབད་བརྩོན་བྱེད་དགོས། དགེ་རྒན་རང་ཉིད་ཤེས་ཡོན་ཕུན་སུམ་ཚོགས་པ་ཞིག་མེད་ན། སློབ་ཕྲུག་རྣམས་ཀྱི་གྲུབ་འབྲས་ཀྱང་གཟེངས་སུ་ཐོན་པ་ཞིག་ཡོང་རྒྱུ་ནི་ཉིན་མོའི་རྨི་ལམ་རེད། དེ་འདྲ་སོང་ཙང་དགེ་རྒན་ལ་རྒྱུན་དུ་ཡར་རྒྱས་ཀྱི་སེམས་པ་དང་རྟག་ཏུ་དེབ་ནང་མགོ་རྒྱུས་ཐུབ་མཁན་ཞིག་དགོས་ཀྱི་ཡོད། བཞི་པ། ལྷག་བསམ་རྣམ་དག    དགེ་རྒན་ལ་ལྷག་བསམ་རྣམ་དག་ཡོད་དགོས། ལྷག་བསམ་རྣམ་དག་ཅེས་པ་ནི། རང་གི་ལས་འགན་ངོ་ཤེས་པའི་ཐོག སློབ་མའི་དོན་དུ་སྒེར་གྱི་དུས་ཚོད་དང་ནུས་པ་གཏོང་ཕོད་པ། སློབ་ཁྲིད་བྱེད་པ་ཁོ་ན་མ་ཡིན་པར་རྒྱུན་དུ་སློབ་གྲྭ་དང་སློབ་ཕྲུག་གི་མ་འོངས་པར་སེམས་ཁུར་བྱེད་ཐུབ་མཁན་ཞིག་དང་སློབ་གྲྭ་དང་སློབ་མ་རྣམས་ཀྱི་ལས་ཀ་གང་ཡིན་ལ་མདུན་མཆོངས་ཐུབ་མཁན་ཞིག་ངེས་པར་དུ་དགོས་ངེས་ཡིན། ༸གོང་ས་མཆོག་གིས་དགེ་རྒན་གྱི་ལས་ཀ་ནི། ཚོང་ལས་སམ་དཔལ་འབྱོར་གྱི་ཁེ་ཕན་རྐྱང་པའི་ཆེད་དུ་མ་ཡིན་པར། མི་རབས་གསར་པ་རྣམས་ལ་ཤེས་ཡོན་དང་བཟང་སྤྱོད་སློབ་གསོ་སྤྲོད་པའི་ཆེད་དུ་ཡིན་པས། ལྷག་བསམ་རྣམ་དག་གལ་ཆེན་པོ་ཡིན་པར་གསུངས། ལྔ་པ། མིག་དཔེར་འོས་པའི་དགེ་རྒན་བཟང་པོ་ཞིག    ༸གོང་ས་མཆོག་གིས་དགེ་རྒན་ནི། སློབ་ཕྲུག་གི་མིག་དཔེ་ཡིན་པས། ཁོང་ཚོའི་སྤྱོད་ལམ་དང་སྨྲ་བརྗོད། ལྟ་བ་བཅས་ཚང་མས་སློབ་ཕྲུག་ལ་ཤུགས་རྐྱེན་ཐེབས་ཀྱི་ཡོད་པས་དགེ་རྒན་གྱི་སྒོ་གསུམ་གྱི་སྤྱོད་པ་ཁྱེར་སྟངས་ལ་དུས་རྟག་ཏུ་དོ་སྣང་བྱེད་དགོས་ལ། […]

མིག་དམར་དོན་གྲུབ། གཞི་བར་བོད་དགེ།ཀ་སྦུག་སཾ་བྷོ་ཊ་གཏན་སློབ། གླིང་འདིར་ཞི་བདེའི་ལམ་བུ་ཡང་དག་བསྟན།།རིས་མེད་འགྲོ་བ་ཀུན་ལ་ཐུགས་རྗེས་འཛིན།།རྒྱ་གར་འཕགས་པའི་ཡུལ་དུ་མཛད་འཕྲིན་དག།མཚོ་མོ་ལས་ཀྱང་ཟབ་པ་ཨེ་མ་མཚར།། གངས་ཅན་ལྷ་གཅིག་ཕྱག་ན་པད་མོ་མཆོག།བགྲང་བྱ་དགུ་བཅུར་ཕེབས་པའི་སྐལ་བཟང་གི།།གོ་སྟོན་རྟེན་འབྲེལ་འཛོམས་པའི་དུས་བཟང་ལ།།སྡེ་བཞིའི་ཕུན་ཚོགས་དཔལ་ཡོན་རྒྱས་པར་སྨོན།། ཞེས་འགྲོ་བ་ལྷ་དང་བཅས་པའི་སྐྱབས་གནས་དམ་པ་༸འཕགས་མཆོག་ཕྱག་ན་པདྨོ་དྲང་སྲོང་ངུར་སྨིག་འཛིན་པ་ཤཱཀྱའི་དགེ་སློང་༸སྐྱབས་མགོན་བསྟན་འཛིན་རྒྱ་མཚོ་མཆོག་ལ་སྒོ་གསུམ་གུས་པས་གུས་ཕྱག་སྔོན་དུ་བཏང་སྟེ། ༸མགོན་པོ་གང་ཉིད་ཀྱི་དགོངས་པར་དགེ་རྒན་ལ་ཚང་དགོས་པའི་ཁྱད་ཆོས་གལ་ཆེ་བ་འགའ་ཞིག་བརྗོད་པར་བྱའོ། ༡། ཡ་རབས་བཟང་སྤྱོད་ལྡན་པའི་སློབ་མ་ཚད་ལྡན་ཞིག་སྐྱེད་སྲིང་གནང་རྒྱུ།    རྒྱལ་ཁབ་དང་མི་རིགས་ཤིག་གི་ཆགས་འཇིག་ནི། དེའི་འབྱུང་འགྱུར་གྱི་མི་རབས་གསར་པ་རྣམས་ལ་ཐུག་ཡོད་པ་དང། འབྱུང་འགྱུར་གྱི་མི་རབས་གསར་པ་ཇི་ལྟར་གསོ་སྐྱོང་ཐུབ་མིན་ནི། སྐབས་བབ་ཀྱི་དགེ་རྒན་དག་ལ་ཐུག་ཡོད་ན། དགེ་རྒན་ཞེས་པ་ནི། རྒྱལ་ཁབ་དང་མི་རིགས་ཤིག་གི་འཛུགས་སྐྲུན་ལ་རླབས་ཆེན་གྱི་མི་སྣ་གལ་ཆེན་པོ་ཞིག་ཆགས་ཡོད་པ་གདོན་མི་ཟ། ཡང་སྒོས་སུ་རང་རེའི་བོད་མི་རྣམས་ལ་ཕ་མེས་བརྒྱུད་ནས་ཡོད་པའི་ཡ་རབས་བཟང་སྤྱོད་ཀྱི་གོམས་གཤིས་ཕྱུག་པོ་མི་རིགས་གཞན་ལ་ངོམས་སུ་ཆོག་པ། ཀུན་གྱིས་ཡིད་སྨོན་གྱི་གཞིར་གྱུར་བ་དེ་འབྱུང་འགྱུར་གྱི་མི་རབས་ཕྱི་མ་རྣམ་པའི་རྒྱུད་ལ་རྒྱུན་གནས་ཐུབ་མིན་ནི་མི་རིགས་དེ་དག་སྐྱེད་སྲིང་བྱེད་མཁན་དགེ་རྒན་དག་འགན་ཁྲི་ཡོད་པས། རང་རེའི་དགེ་རྒན་རྣམ་པས་ཡ་རབས་བཟང་སྤྱོད་ལྡན་པའི་སློབ་མ་ཚད་ལྡན་ཞིག་སྐྱེད་སྲིང་གནང་རྒྱུར་གཙིགས་ཆེ་བར་འཛིན་གལ་ཆེ། ༢། གནའ་དེང་ཟུང་འབྲེལ་ལམ་འདབ་གཤོག་གཉིས་ལྡན་གྱི་ཤེས་ཡོན་དང་ལྡན་པའི་སློབ་མ་སྐྱེད་སྲིང་།    བོད་བསིལ་ལྡན་ལྗོངས་འདི་བཞིན་ཆོས་རྒྱལ་མེས་དབོན་རྣམ་གསུམ་གྱི་སྐུ་དུས་ནས་འགོ་བརྩམས་ཏེ་ད་ལྟའི་བར་བོད་ཀྱི་སྲོལ་རྒྱུན་གྱི་རིག་གཞུང་ཕྱུག་པའི་རྒྱལ་ཁབ་ཅིག་ཆགས་ཡོད། འོན་ཀྱང་འདས་པའི་མི་ལོ་བརྒྱ་ཕྲག་འགའི་རིང་བོད་ནས་དེང་དུས་ཀྱི་དངོས་པོ་ཡར་རྒྱས་དང་འབྲེལ་བའི་ཤེས་ཡོན་ཚད་མཐོ་ཤོས་ཡོད་པ་ནུབ་ཕྱོགས་པ་དེ་ཚོ་ལ་ལྟ་སྟངས་ཞན་པོ་བཟུང་ནས་རྒྱང་ཐག་རིང་པོ་བྱས་ཏེ་བསྡད་པའི་རྐྱེན་གྱིས་ང་རང་ཚོ་བོད་པས་དེང་དུས་ཀྱི་ཤེས་ཡོན་ཐོག་འཐུས་ཤོར་ཆེན་པོ་ཕྱིན་པ་མ་ཟད། ང་ཚོས་དེང་དུས་ཀྱི་ཤེས་ཡོན་མ་འདང་བའི་རྐྱེན་གྱིས་ཐ་མ་དུས་འགྱུར་ཡོང་བའི་སྐབས་སུ་ང་ཚོ་གྲ་སྒྲིག་གང་ཡང་མེད་པར་ལུས་ཏེ་ད་ལྟའི་གནས་སྟངས་འདི་བྱུང་ཡོད། དུས་འགྱུར་དབང་གིས་རང་ཅག་བཙན་བྱོལ་དུ་འབྱོར་འཕྲལ་བོད་པའི་སློབ་གྲྭ་ཁག་ཟུར་དུ་བཙུགས་ཏེ་དེའི་ནང་སྲོལ་རྒྱུན་དང་དེང་རབས་ཟུང་དུ་སྦྲེལ་བའི་ཐོག་ནས་ཤེས་ཡོན་སྤྲོད་འགོ་བཙུགས་ཡོད། དེ་དང་ཕྱོགས་མཚུངས་རང་རེའི་དགེ་རྒན་ཚོས་སློབ་ཕྲུག་རྣམས་ལ་གནའ་དེང་ཟུང་སྦྲེལ་གྱི་ཤེས་ཡོན་ཡ་མ་བྲལ་བ་ཞིག་སྦྱོར་སྤྲོད་ཀྱིས་བོད་རིགས་སློབ་ཕྲུག་རྣམས་མ་འོངས་པ་རྒྱལ་སྤྱིའི་སྡིངས་ཆར་དཔུང་པ་མཉམ་ཤིབ་ཐོག་མདུན་བསྐྱོད་བྱེད་ཐུབ་པ་ཞིག་སྐྱེད་སྲིང་བྱེད་ཐུབ་པའི་འགན་ཁྲི་ཡོད། ༣། བོད་པའི་རྣམ་པ་མ་ཡལ་བའི་བོད་པ་ཤེས་ཡོན་ཅན་བཟོ་དགོས།    ངེད་ཅག་རྩམ་ཟན་པ་རྣམས་དུས་འགྱུར་དབང་གིས་ཕ་ཡུལ་ལས་གྱར་ཏེ་བཙན་བྱོལ་དུ་འབྱོར་མ་ཐག་༸གོང་ས་༸སྐྱབས་མགོན་ཆེན་པོ་མཆོག་ནས་ཕུགས་རྒྱང་རིང་པོའི་དགོངས་པ་ཆེར་བཞེས་ཀྱིས་བོད་ཀྱི་ཐུན་མོང་མ་ཡིན་པའི་རྩ་ཆེའི་སྐད་ཡིག་དང་རིག་གཞུང་དེ་དག་འཛིན་སྐྱོང་སྤེལ་གསུམ་སླད་བོད་པའི་སློབ་གྲྭ་ཁག་ཟུར་དུ་གསར་འཛུགས་གནང་ཡོད། ༸མགོན་པོ་གང་ཉིད་ཀྱི་དགོངས་དོན་བཞིན་ད་བར་བགྲང་བྱ་བཅུ་ཕྲག་དྲུག་ལྷག་རིང་སློབ་ཁག་དེ་དག་ནང་བོད་ཀྱི་རྩ་ཆེའི་རིག་གཞུང་འཛིན་སྐྱོང་སྤེལ་གསུམ་གང་དྲག་བྱུང་ཡོད། འོན་ཀྱང་འདས་པའི་མི་ལོ་ཉི་ཤུ་ལྷག་ནས་བོད་མི་མང་པོ་ཞིག་ཕྱི་རྒྱལ་ཡུལ་གྲུ་ཁག་ཏུ་གནས་སྤོས་བྱས་པ་དང། ལྷག་པར་དུ་དེ་སྔ་བོད་ནས་གསར་དུ་འབྱོར་བའི་བོད་མིའི་གྲངས་འབོར་ཡང་ལོ་རེ་ནས་ལོ་རེར་ཇེ་ཉུང་དུ་ཕྱིན་ཏེ་ཉིན་མོའི་སྐར་མ་ལྟར་ཆགས་ཡོད། ད་ལྟའི་ཆར་སློབ་ཁག་དེ་དག་ནང་བོད་རིགས་སློབ་ཕྲུག་གི་གྲངས་འབོར་ཆེས་ཉུང་ཤས་ལས་མེད་རྐྱེན། སློབ་གྲྭ་དེ་དག་གི་ནང་བོད་རིགས་མིན་པའི་སློབ་ཕྲུག་མང་པོ་ཞིག་ཡོད་པའི་ཉེར་ལེན་གྱིས་བོད་སྐད་བསྲེ་ལྷད་མེད་པ་དག་གཙང་སྨྲ་མཁན་ཉུང་དུ་ཕྱིན་པ་དང། བོད་ཡིག་འབྲི་ཀློག་གི་ཆུ་ཚད་ཀྱང་ཇེ་ཞན་དུ་འགྲོ་བའི་བོད་པའི་སྐད་ཡིག་གཉིས་པོ་ཆགས་འཇིག་གི་མཚམས་ལ་སླེབས་པའི་ཉག་ཕྲ་བའི་དུས་སྐབས་འདིར། བོད་རིགས་དགེ་རྒན་རྣམས་ནས་རང་རེའི་སློབ་མ་ཚོའི་རྒྱུད་ལ་ང་ཚོའི་ཕ་མེས་བརྒྱུད་ནས་མཆེད་པའི་རིག་གཞུང་ཕྱུག་པོ་དེ་འཛིན་སྐྱོང་སྤེལ་གསུམ་བྱ་གལ་ཆེ་བ། རང་ཉིད་བོད་པ་ཡིན་པའི་སྤོབས་སེམས་ལྡན་པ། བོད་རིགས་ཀྱི་ལ་རྒྱ་དང། བོད་པའི་རིག་གཞུང་ལ་དགའ་ཞེན་གྱི་ཚོར་བ་བསྐྲུན་རྒྱུའི་ལྡོག་ཐབས་བྲལ་བའི་ལས་འགན་ལྕི་བོ་ཞིག་ཡོད་པའི་ཐོག་སློབ་ཕྲུག་དེ་དག་ལ་བོད་པའི་རྣམ་པ་མ་ཡལ་བ་ཞིག་གསོ་སྐྱོང་བྱ་གལ། ༤། སློབ་ཕྲུག་རྣམ་པར་བྱམས་བརྩེའི་ཚོར་སྣང་སྐྱེད་ཐབས་བྱེད་དགོས།    དགེ་རྒན་གྱི་ངོས་ནས་སློབ་མར་སློབ་ཁྲིད་གནང་སྐབས་བྱམས་བརྩེའི་ཚོར་བ་གཏན་ནས་མེད་པར་སློབ་ཁྲིད་གནང་བ་ནི་གཞི་རྩ་ནས་འགྲིག་མེད། གཞན་དོན་ཁུར་དུ་འཁྱེར་བའི་ལྷག་བསམ་དེ་ཚོའི་ཚོར་སྣང་དེ་དག་དགེ་རྒན་གྱི་རྣམ་འགྱུར་སྤྱོད་ལམ་གྱི་ཐོག་ནས་ཕྲུ་གུ་ལ་མྱོང་ཚོར་སླེབས་ཐུབ་པ་ཞིག་བྱུང་བ་ཡིན་ན་དགེ་མཚན་ཤིན་ཏུ་ཆེན་པོ་ཡོད། ཕྲུ་གུའི་ངོས་ནས་ཡིན་ནའང། དགེ་རྒན་དེས་ཕྲུ་གུའི་མི་ཚེའི་མདུན་ལམ་ལ་སེམས་ཁུར་ཡོད་པའི་ཐོག་ནས་སློབ་གསོ་ཡང་དག་པ་ཞིག་སྤྲད་པ་དེ་དག་ཕྲུ་གུའི་སེམས་ཀྱི་གཏིང་ལ་ཟུག་ཐུབ་པའི་ཁྱད་པར་ཡོང་ཐུབ་པ་མ་ཟད། ཕྲུ་གུ་ཚོས་ཀྱང་སེམས་ཀྱི་གཏིང་ནས་དགེ་རྒན་དེ་ལ་དགའ་པོ་བྱས་ཏེ་བློ་གཏད་བཅོལ་ནས་བརྩི་བཀུར་བྱེད་པ་ཞིག་ཡོང་ཐུབ། དགེ་རྒན་ཚོས་ཕྲུ་གུ་ལ་བྱམས་བརྩེ་ཟེར་བ་འདིའི་རིན་ཐང་དང་ཕན་ཐོགས་ཇི་ལྟར་ཡོད་པ་རྣམས་སོ་སོའི་སྤྱོད་ལམ་གྱི་ཐོག་ནས་ཕྲུ་གུ་ལ་ངོ་སྤྲོད་བྱེད་དགོས། ལྷག་དོན་དུ་སློབ་ཕྲུག་ཚོའི་ངོས་ནས་བཤད་ནའང་ཁོང་ཚོས་ལོ་མང་རྗེས་ལ་དགེ་རྒན་ཞིག་ནས་སློབ་ཚན་ག་རེ་འཁྲིད་པ་དེ་ཚོ་སེམས་ལ་དེ་ཙམ་མ་ངེས་པར། དགེ་རྒན་ཞིག་གིས་བྱམས་བརྩེའི་ངང་སློབ་ཁྲིད་གནང་ཚུལ་དེའི་བག་ཆགས་བརྟན་པོ་འཇོག་ཐུབ་པ་མ་ཟད། སློབ་མ་རང་ཉིད་ནས་ཀྱང་དགེ་རྒན་དེའི་བྱམས་བརྩེ་ལྡན་པའི་གཤིས་སྤྱོད་བཟང་པོ་དེར་མིག་ལྟོས་ཀྱིས་དང་དེ་ལ་རྗེས་སུ་འབྲང་བའི་དགེ་མཚན་ལྡན་ཡོད། ༥། དགེ་རྒན་རང་ཉིད་ནས་དུས་ཀྱི་དགོས་མཁོ་དང་འཚམས་པའི་ཁྱད་ལས་གོང་སྤེལ་ལ་གཞོལ་དགོས་གལ།    དུས་རབས་ཉེར་གཅིག་པའི་སློབ་མར་དུས་ཀྱི་དགོས་མཁོར་འཚམས་པའི་ཤེས་ཡོན་སྦྱོར་སྤྲོད་གལ་ཆེར་གྱུར་ན། དགེ་རྒན་གང་ཞིག་ལ་མདོ་སྡེ་རྒྱན་ལས་གསུངས་པའི་བཤེས་གཉེན་གྱི་ཁྱད་ཆོས་བཅུ་པོ་ཚང་རྒྱུ་ལྟ་ཅི། ཡང་སྒོས་སུ་དུས་རབས་ཉེར་གཅིག་པའི་དགེ་རྒན་ཞིག་ལ་ཚང་དགོས་པའི་ཆ་རྐྱེན་དག་ཀྱང་ངེས་པར་དུ་ཚང་རྒྱུ་ཤིན་ཏུ་གལ་འགངས་ཆེ། དཔལ་ལྡན་ཤེས་རིག་ལས་ཁུངས་ངོས་ནས་ཀྱང་དགེ་རྒན་གྱི་ཁྱད་ལས་དེ་བཞིན་གལ་གནད་གཙོ་འཛིན་ཐོག་དགེ་རྒན་རྣམ་པའི་ཆེད་ལས་གོང་མཐོར་གཏོང་སླད། དགེ་རྒན་ཆེད་ལས་ཡར་རྒྱས་ཀྱི་ཟབ་སྦྱོང་རབ་དང་རིམ་པས་ཕུལ་བ་མ་ཟད། […]

ལྷུན་གྲུབ་རྡོ་རྗེ། གཞི་བར་བོད་དགེ།སེར་བྱེས་འབྲིང་རིམ་སློབ་གྲྭ། ངོ་སྤྲོད་སྤྱི་བཤད།    སྤྱིར་བཏང་ཕྲན་ལྟ་བུ་སོ་སྐྱེས་ཐ་མ་བ་ཞིག་གིས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་དགོངས་པར་རྒྱུས་ལོན་ཞུས་ཏེ་ཡིག་རིས་སུ་འབེབས་པ་ནི། རྗེ་བདག་ཉིད་ཆེན་པོས། མཁའ་ལྡིང་དབང་པོས་མཁའ་ལ་བགྲོད་བགྲོད་ནས། ། ནམ་ཞིག་རང་སྟོབས་བྲི་བས་ལྡོག་འགྱུར་གྱི། ། ནམ་མཁའ་ཟད་པས་ལྡོག་པར་མི་འགྱུར་བཞིན། ། ཞེས་གསུངས་པའི་དཔེ་ཟླར་འགྱུར་རྒྱུ་ཉག་གཅིག་ལས་མ་འདས་མོད། འོན་ཀྱང་འདིར་ཁོང་གི་དགོངས་བཞེས་དང་འབྲེལ་བའི་དཔྱད་རྩོམ་སྣ་གཅིག་བྲིས་ན་རང་ཉིད་ལ་དགེ་བ་རླབས་ཆེན་འབྱུང་ངེས་པར་མ་ཟད། རྩོམ་འབྲིའི་གོ་སྐབས་བཟང་པོ་ཞིག་ཀྱང་མཐོང་བས་ཕྲན་གྱིས་སྐབས་བབ་ཀྱི་བརྗོད་གཞི་གཤམ་དུ་འཁོད་པ་ལྟར་ཚན་པ་སྟེ་དང་པོ། ཕན་སེམས་ཀྱི་བསམ་བློ་ཡོད་པ། གཉིས་པ། མི་གཤིས་བཟང་པོར་བསྒྱུར་བའི་འདུན་པ་ལྡན་པ། གསུམ་པ། ངལ་བ་ཁྱད་གསོད་ཀྱི་ཆོད་སེམས་ཡོད་པ། བཞི་པ། སྲོལ་རྒྱུན་གྱི་རིག་གནས་ལ་དགའ་ཞེན་ལྡན་པ། ལྔ་པ། དེང་རབས་ཀྱི་ཤེས་ཡོན་ཡོད་པ་ཞེས་ལྔ་རུ་བཀར་ནས་འབྲི་བ་ལ། དང་པོ། ཕན་སེམས་ཀྱི་བསམ་བློ་ཡོད་པ།    དེ་ཡང་སྐྱེས་རབས་ལས། ཐོས་པ་གཏི་མུག་མུན་སེལ་སྒྲོན་མེ་ཡིན། ། ཞེས་གསུངས་པ་ལྟར་སློབ་མ་སུ་འདྲ་ཞིག་གིས་ཐོས་པའམ་སློབ་སྦྱོང་འཐུས་སྒོ་ཚང་བ་ཞིག་བྱ་ཐུབ་ཚེ། རང་རྒྱུད་ཀྱི་གཏི་མུག་གམ་རྨོངས་པ་མ་རིག་པའི་ཆ་རིམ་གྱིས་སེལ་བར་འགྱུར་བ་ནི། དཔྱོད་ལྡན་ཀུན་གྱི་མཐུན་སྣང་དུ་གྲུབ་ཅིང་། དེ་ལྟ་བུའི་མ་ཤེས་པའི་མུན་པའི་དངོས་གཉེན་ཐོས་པའི་སྒྲོན་མེ་འོད་མདངས་གསལ་ཞིང་། དངོས་གཉེན་དུ་འགྲོ་ངེས་པ་ཞིག་ཡོང་བར། ཐོག་མའི་ཆ་རྐྱེན་ནི། དགེ་རྒན་ཡག་པོ་ཞིག་བསྟེན་རྒྱུ་གནད་ཀྱི་དོན་པོ་ཡིན། འོན་ཀྱང་། སློབ་མས་བསྟེན་པའི་དགེ་རྒན་དེ་ལ་རིག་གནས་ཀྱི་གཟུངས་གཞུག་ལེགས་པར་ལྡན་ཡང་། ཕྱོགས་གཞན་ཞིག་ནས་ཕ་རོལ་པོ་ལ་ཕན་སེམས་ཀྱི་བསམ་བློ་མེད་ཚེ། རང་གིས་སློབ་མ་གཞན་ལ་སློབ་ཁྲིད་བྱེད་སྐབས་བུམ་པ་གང་བྱོའི་ཚུལ་གྱིས་སློབ་ཁྲིད་གནང་རྒྱུ་དེ་བས་དཀའ། རྒྱུ་མཚན་དེའི་ཕྱིར་གལ་སྲིད་སློབ་དགེ་དེ་ལ་འཁྲིད་གཞིའི་སློབ་ཚན་ཀུན་ལ་མཁྱེན་པ་ཡངས་ཁར། ནང་བསམ་བློའི་གཟུངས་གཞུག་ཕན་འདོགས་པའི་ཀུན་སློང་བཟང་པོ་ཞིག་མཆིས་ན། དེ་ལྟ་བུའི་དགེ་རྒན་དེས་རང་ལ་འཁྲིས་པའི་ལས་སྐལ་གལ་འགངས་ཆེ་བར་བརྩི་བཞིན་གཞན་ཕན་གྱི་བསམ་བློའི་རྩིས་ཟིན་པར་བྱས་ཏེ་སློབ་ཁྲིད་བྱ་ངེས་ལ། སློབ་ཁྲིད་དེ་ནི་སློབ་མ་ཀུན་གྱི་སྣང་བར་འགྲོ་བར་ཐེ་ཚོམ་མེད་པར་ཀུན་གྱིས་དགའ་མོས་བྱས་ཏེ་སློབ་མ་བསྐྱེད་སྲིང་གི་གྲུབ་འབྲས་རླབས་པོ་ཆེ་ཞིག་ཡོང་ངེས་སོ། ། གཉིས་པ། མི་གཤིས་བཟང་པོར་བསྒྱུར་བའི་འདུན་པ་ལྡན་པ།    ནམ་རྒྱུན་༸གོང་ས་༸སྐྱབས་མགོན་ཆེན་པོ་མཆོག་གིས། ང་ཚོ་བོད་རིགས་ཀྱི་ནང་དུ་ཆ་བཞག་ན། མ་རབས་ཅན་གྱི་མི་གཅིག་ཡིན་ནའང་མང་དྲགས་པ་དང་། ཡ་རབས་ཅན་གྱི་མི་བརྒྱ་ཐམ་པ་ཡོད་ཀྱང་ཉུང་དྲགས་པ་རེད་[1]ཅེས་དང་། དེ་བཞིན་དུ་ཡ་རབས་བཟང་སྤྱོད་ཡོད་ན་དངོས་གནས་མིའི་མཚན་ཉིད་ཚང་གི་ཡོད་པས་ང་རང་ཚོ་དུས་རྒྱུན་ལྡན་ནས་བཟང་པོའི་སྤྱོད་པ་དང་ཡ་རབས་ཀྱི་གོམས་གཤིས་རྒྱུན་དུ་འཇགས་པ་བྱེད་རྒྱུ་དང་གོང་འཕེལ་ཡོང་ཐབས་བྱེད་རྒྱུ་ཤིན་ཏུ་གལ་ཆེན་པོ་འདུག[2]ཅེས་གསུངས་པ་ལྟར། ཁོང་གིས་ཀུན་སྤྱོད་སློབ་གསོ་དང་འབྲེལ་བའི་བཀའ་སློབ་གནང་གི་ཡོད་ལ། ལྷག་པར་དུ་མགོན་པོ་གང་ཉིད་ཀྱིས་སློབ་སྦྱོང་བྱེད་པའི་དགོས་དམིགས་ནི། མི་བཟང་པོ་ཞིག་བྱ་རྒྱུ་དེ་ཡིན་ཞེས་གསུངས་དང་གསུང་མུས་ཡིན་སྟབས། ང་ཚོ་དགེ་རྒན་ཚོས་སློབ་མ་རྣམས་ལ་སྐབས་བབ་ཀྱི་སློབ་ཚན་འཁྲིད་ཞོར། […]