གཞི་རིམ་བར་མའི་བོད་དགེ་བསོད་ནམ་མཚོ། ཅོན་ཏཱ་ར་བོད་ཁྱིམ། སྤྱིར་བཏང་བོད་ཀྱི་སྐད་ཡིག་གི་རྩལ་བཞི་པོ་གལ་ཆེན་པོ་ཡིན་པ་དང་ཕན་ཚུན་འབྲེལ་ཐབས་རྩལ་མེད་པ་བཞི་ཡིན་ལ། གཅིག་ལས་གཅིག་གཏན་གྱི་ཚུལ་དུ་གནས་པ་ཤ་སྟག་ཡིན། རང་ཉིད་དགེ་རྒན་ཞིག་ཡིན་པའི་ཆ་ནས་ག་དུས་ཡིན་ཡང་སློབ་མ་ཀུན་ལ་དང་པོ་ཉན་རྩལ་གལ་ཆེན་པོ་རེད་ཟེར་ནས་བསླབ་བྱ་ཡང་སྲིད་རྒྱག་གི་ཡོད་པས། དེ་རིང་གི་བརྗོད་གཞི་འདི་ཐོག་བདག་གིས་ཉན་རྩལ་སྐོར་ལ་རགས་བསྡུས་ཙམ་ཞིག་བརྗོད་འདོད་བྱུང་། དེ་ཡང་བརྗོད་གླེང་གཞི་བདུན་གྱི་ཐོག་ནས་འབྲི་རྒྱུ་ཡིན། ༡༽ ཉན་རྩལ་སློབ་པའི་དམིགས་ཡུལ་གཙོ་བོ། ༢༽ ཉན་རྩལ་དེ་གལ་ཆེ་བའི་སྐོར། ༣༽ སློབ་གཉེར་བའི་ཉན་རྩལ་གོང་མཐོར་ཐད་དཔྱད་པ། ༤༽ ཉན་རྩལ་གོང་འཕེར་གཏོང་ཐབས། ༥༽ དགེ་རྒན་གྱི་ཉན་རྩལ་ཐོག་ལམ་སྟོན་དགོས་པ། ༦༽ སློབ་མའི་ངེས་པར་སྒྲུབ་དགོས་པ། ༧༽ ཉན་རྩལ་ཆེད་སྦྱོང་བརྡར་གང་མང་བསྐྲུན་དགོས། ༡༽ ཉན་རྩལ་སློབ་པའི་དམིགས་ཡུལ་གཙོ་བོ། སློབ་མར་སློབ་ཁྲིད་བྱེད་སྐབས་ངེས་པར་དགོས་མཁོ་ཆེ་བ་དང་མེད་ཐབས་མེད་པའི་ཐབས་ལམ་བཟང་པོ་ཞིག་ཡིན་པ་མངོན། དེ་ཡང་སྲོལ་རྒྱུན་རིག་པའི་གཞུང་ལུགས་ཐོག་ནས་བཤད་ན་ཡང་ཐོས་བསམ་སྒོམ་གསུམ་ཞེས་པའི་གོ་རིམ་གསུམ་ལས་དང་པོ་ཐོས་དགོས་པ་དེ་གལ་ཆེ་ཞིག་རྩིས་ཡོད། ང་རང་གི་ག་དུས་ཡིན་ཡང་ཐོས་པ་དང་ཉན་པའི་གོ་དོན་གཅིག་མཚུངས་ཡིན་པར་གོ་བ་ལེན་གྱི་ཡོད། བྱས་ཙང་སློབ་གཉེར་བ་རྣམས་ཀྱིས་ཡིན་ཅིག་གཞན་གྱི་གཏམ་སོགས་ཉན་ཐུབ་ཐབས་དང་ལྷག་པར་དུ་གང་བཤད་པ་དེའི་ནང་དོན་ཤེས་པའི་ཐོག་ནས་སྦྱོང་བརྡར་བྱ་རྒྱུ་དེ་ལས་ཀྱང་གལ་ཆེན་པོ་ཡིན། གང་ལྟར་ང་རང་གིས་སློབ་མ་ཚོར་ཉན་རྩལ་སློབ་པའི་དགོས་དམིགས་གཅིག་གི་གནས་ཚུལ་བཟང་ངན་དང་ཡག་སྡུག་ཇི་འདྲ་ཞིག་འཕྲད་ཀྱང་ཐོག་མར་རིག་པ་བསྒྲིགས་ནས་ཉན་ཤེས་དགོས་པ་དང་། དེ་རྗེས་རང་ཉིད་ཀྱིས་ངོས་ནས་བསམ་བློ་ལེགས་པར་བཏང་བས་ཉན་རྩལ་གྱི་བྱ་བ་དེ་མེད་དུ་མི་རུང་བ་ཞིག་ཡིན་པར་ཤེས་ཐུབ་པའི་འབད་བརྩོན་བྱེད་ཀྱི་ཡོད། ༢༽ ཉན་རྩལ་དེ་གལ་ཆེ་བའི་སྐོར། སྤྱིར་བཏང་གི་ང་རང་ཚོ་སྤྱི་ཚོགས་ཁྲིད་དུ་བསམ་བློ་བཏང་བ་ཡིན་ཡང་ཉན་པའི་བྱ་བ་དེ་སྔོན་དུ་མ་སོང་བར་ལས་ཀ་དེ་ཡག་པོའམ་ལེགས་པོ་ཞིག་སྒྲུབ་མི་ཐུབ་པ་ནི་ཡོངས་གྲགས་ཡིན། དཔེ་མཚོན་ཆུང་ཆུང་ཞིག་གི་ལམ་ནས་བརྗོད་ན། དགེ་རྒན་རྣམ་པའི་སློབ་མ་ཚོར་སྔ་དྲོའི་འདུ་འཛོམས་སྐབས་གཏམ་བརྗོད། དེ་བཞིན་དུ་བསྐྱོར་སྦྱོང་གང་འདྲ་ཞིག་བྱེད་ཀྱང་ཡག་པོ་ཆགས་མིན་སློབ་མའི་ཉན་རྩལ་ལ་རག་ལས་ཡོད། དགེ་རྒན་ཡག་པོ་ཇི་ཙམ་ཡོད་ཀྱང་སློབ་མའི་མ་ཉན་ཚེ་འབྲས་སུ་བཟང་པོ་ཐོབ་མི་སྲིད། གཞན་ཡང་། དཔེ་མཚོན་ཞིག་བརྗོད་ན། ཚན་རིག་དགེ་རྒན་གྱིས་ཚན་རིག་བརྟག་དཔྱད་ཁང་དུ་རྒན་ལགས་ཀྱིས་རྫས་སྦྱོར་གྱི་སློབ་ཁྲིད་བྱེད་སྒོ་ལས་སླ་པོ་ཞིག་སྤེལ་སྐབས། སློབ་ཕྲུག་གི་འཛིན་གྲྭའི་ནང་དགེ་རྒན་གྱིས་ལམ་སྟོན་དང་བྱེད་སྟངས་གང་འདྲ་ཡིན་མིན་ལེགས་པར་ཉན་མཁན་རྣམས་ཀྱིས་ཚན་རིག་བརྟག་དཔྱད་ཁང་དུ་སླེབས་མ་ཐག་ཏུ་བྱེད་སྒོ་གང་སྤེལ་བ་དེ་དུས་ཐོག་ལ་བྱེད་ཐུབ་པ་དང་། ནུས་པ་ལྡན་པ་ཞིག་སྟོན་ཐུབ་ཀྱང་། འཛིན་གྲྭའི་ནང་རྒན་ལགས་ཀྱིས་སློབ་སྟོན་གནང་སྐབས་མ་ཉན་པའི་སློབ་མ་ཚོའི་ཚན་རིག་བརྟག་དཔྱད་ཁང་དུ་སླེབས་ཀྱང་མ་ཤེས་པར་མགོ་བོ་རྨོངས་ནས་ལུས་སྲིད། དེར་བརྟེན་ཉན་པའི་བྱ་བ་དེ་ཧ་ཅང་གལ་འགེངས་ཆེ་བས། བདག་གིས་ག་དུས་ཡུན་ཡང་སློབ་མ་རྣམས་ལ་དུས་དང་རྣམ་པ་ཀུན་ཏུ་ཉན་པའི་བྱ་བ་དེ་སྔོན་དུ་འགྲོ་དགོས་པའི་བསླབ་བྱ་རྒྱག་གི་ཡོད། ༣༽ སློབ་གཉེར་བའི་ཉན་རྩལ་གོང་འཐོར་ཐད་དཔྱད་པ། སློབ་གཉེར་བར་ཉན་རྩལ་ལེགས་པོ་ཡོད་མེད་བརྟག་དཔྱད་བྱེད་སྐབས་ཉན་མཁན་རྣམས་ཀྱིས་ནང་ལས་དང་ལས་འཆར་སོགས་འབྲི་སྐབས་ནུས་པ་དང་ལྡན་པ་ཡོང་གི་འདུག བྱས་ཙང་ཉན་རྩལ་གོང་འཐོར་འགྲོ་བའི་བརྒྱུད་རིམ་གཙོ་བོ་ནི་སློབ་གཉེར་བ་རྣམས་ཀྱི་རྩོམ་ཡིག་འབྲི་རྩལ་ནུས་པ་དམིགས་བསལ་མངོན་ཐུབ་པ་དང་གྲུབ་འབྲས་བཟང་པོ་ཞིག་ཡོང་གི་འདུག དེར་བརྟེན་བདག་གི་སློབ་གཉེར་བ་རྣམས་ལ་ཉན་རྩལ་སྦྱོང་བརྡར་ཡོང་ཐབས་སུ་བྱེད་སྒོ་འདྲ་མིན་སྣ་ཚོགས་སྤེལ་ནས་སྐབས་རེ་སློབ་མ་ལ་ཤོད་དུ་བཅུག་ཀྱང་མང་ཆེ་བ་འབྲི་རུ་བཅུག་ནས་ཉན་རྩལ་གོང་མཐོར་གཏོང་ཐབས་བྱེད་ཀྱི་ཡོད། ༤༽ ཉན་རྩལ་གོང་འཕེར་གཏོང་ཐབས། དེ་ཡང་གཏམ་རྒྱུད་དང་སྒྲུང་བརྒྱུད་ནས་ཉན་རྩལ་གོང་འཕེར་གཏོང་སྐབས་སློབ་གཉེར་བའི་མདུན་དུ་ཁ་གསལ་པོ་དང་ཞིབ་ཕྲའི་ངང་ནས་་བཀླགས་ནས་མཇུག་ཏུ་དྲི་བ་ཁ་ཤས་ལ་ལན་འདེབས་སུ་བཅུག་སྐབས་ཉན་རྩལ་ལེགས་པོའི་སློབ་མ་དེ་དག་གི་དྲི་བ་ལ་དཔག་པའི་ལན་འདེབས་པ་དང་། མ་ཉན་མཁན་གྱིས་ལན་འདེབས་མི་ཐུབ་མ་ཟད། དོན་བདག་རྩ་ནས་མེད་ཞིག་ལན་འདེབས་ཀྱི་རེད། དེ་བཞིན་དུ་༸གོང་ས་མཆོག་གི་བཀའ་སློབ་ལས་ཆ་ཤས་ཐུང་ངུ་ཞིག་ཟུར་བཏོན་བྱས་ཏེ་སློབ་གཉེར་བ་རྣམས་ལ་ཉན་བཅུག་པ་དང་བཀའ་སློབ་ཀྱི་ནང་དོན་དེ་འབྲི་རུ་བཅུག་པ་དང་། […]

གཞི་རིམ་བར་མའི་བོད་དགེ་ངག་དབང་ཆོས་འཕེལ། གོ་པལ་པུར་བོད་ཁྱིམ། ཐོས་པའི་རྩལ་གྱི་ཤེས་རབ་མ་ཟིན་ན། ། བཤེས་ཀྱི་མན་ངག་རྒྱུད་ལ་མི་འཁོར་པས། ། དེ་ཕྱིར་འཇམ་དཔལ་དབྱངས་ཀྱི་ཤེས་རབ་ཀྱིས། ། ཉལ་རྩལ་རིག་པའི་སྒོ་གླེགས་རྡུངས་ཤིག་ཀྱེ། ། སྤྱིར་བཤད། དེང་སང་སྐད་ཡིག་ལེགས་པོ་ཞིག་དང་ཡང་དག་ཅིག་ཤེས་དགོས་ཚེ་ངེས་པར་དུ་རྩལ་བཞི་ཚང་དགོས་པ་ཡིན་ཞེས་ཉན་རྩལ་དང་། ཀློག་རྩལ། འབྲི་རྩལ། བཤད་རྩལ་བཅས་ལ་གལ་གནད་ཆེན་པོ་བརྩིས་ཏེ། དེ་དག་གི་ཐོག་ལ་གོ་རྟོགས་དང་དར་སྤེལ་གཏོང་ཅི་ཐུབ་བྱེད་ཀྱང་། རང་ཅག་ཁ་བ་གངས་ཅན་གྱི་ཡུལ་དུ་དེ་ནི་ཐབས་ལམ་གསར་པ་ཞིག་དང་རིག་པ་གསར་པ་ཞིག་མིན་སྟེ། རིག་གནས་དར་བ་ནས་བཟུང་ནས་རྩལ་དེ་དག་གནད་དུ་བརྩིས་ནས། སློབ་མ་གསོ་སྐྱོང་དང་ཤེས་རིག་གོང་མཐོར་གཏོང་ཆེད་ཀྱི་ཐབས་ལམ་འདི་ནི་མི་ལོ་སྟོང་ཕྲག་གོང་ནས་བེད་སྤྱོད་བྱས་དང་བྱེད་བཞིན་པ་ཞིག་ཡིན། དེ་ཡང་ཐོས་བསམ་སྒོམ་གསུམ་དང་ཡ་མ་བྲལ་བ་ཞིག་དང་། འཆད་རྩོད་རྩོམ་གསུམ་མཁས་པའི་རྟགས་ཞེས་ཡོངས་སུ་གྲགས་པས་སོ། ། གང་འདྲ་ཞིག་ལ་ཉན་རྩལ་ཟེར། དེ་ཡང་སྐྱེས་རབས་ལས། ཐོས་པ་གཏི་མུག་མུན་སེལ་སྒྲོན་མེ་ཡིན། ། རྐུན་པོ་ལ་སོགས་མི་འཁྱེར་ནོར་གྱི་མཆོག། ། ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན། ། ཐབས་ཚུལ་མན་ངག་སྟོན་པས་གྲོགས་ཀྱི་མཆོག། ། ཞེས་དང་། ཐོས་པའི་ཚོམས་ལས། ཐོས་པས་ཆོས་རྣམས་ཤེས་པར་འགྱུར། ། ཐོས་པས་སྡིག་ལས་གྲོལ་བར་འགྱུར། ། ཐོས་པས་དོན་མ་ཡིན་པ་སྤང་། ། ཐོས་པས་མྱ་ངན་འདས་པའང་ཐོབ། ། ཞེས་གསུངས་པ་ལྟར། བསླབ་པའི་སྒོ་དང་པོར་ཞུགས་པའི་སློབ་མ་ཞིག་ཡིན་ཚེ། ཆེས་ཐོག་མར་ཐོས་པའམ་ཉན་རྩལ་ནི་གནད་དམ་པ་ཞིག་དང་ཤེས་བྱ་ཀུན་ཀྱི་མགོ་ཁུངས་ཡིན་པས། དགེ་རྒན་དང་ཕ་མ་སོགས་ཀྱིས་བཤད་པའི་གནས་ཚུལ་རྣམས་རང་ཉིད་ཀྱི་ཡིད་ལ་འཆར་བའམ་ངེས་པ་གཏིང་ཚུགས་པའི་རིག་རྩལ་གྱི་རྩལ་རྫོགས་པའི་རྣམ་དཔྱོད་ཅིག་ངེས་པར་དུ་དགོས་པ་ཡིན། Stephen R.Covey མཆོག་གིས། མི་མང་ཆེ་བས་ཤེས་བྱའི་གནས་ལུགས་མགོ་ཚོས་པ་ཡི་ཆེད་དུ་མི་ཉན་པར། ལན་སློག་རྒྱུའི་ཆེད་དུ་ཉན་པ་ནི་ནོར་འཁྲུལ་ཞིག་ཡིན། ཞེས་གསུངས། དེས་ན་ང་ཚོས་ངེས་པར་དུ་ཤེས་བྱའི་གནས་ལུགས་ཡོངས་སུ་ཁོང་དུ་ཆུད་པ་ཞིག་དགོས་ན། ངེས་པར་དུ་སེམས་གནད་དུ་ཕབ་སྟེ་རི་དྭགས་སྒྲ་ལ་ཆགས་པ་བཞིན་ཤེས་བྱའི་གནས་ལུགས་ལ་ཉན་ཐུབ་པ་ཞིག་དགོས་པ་ལས། གོ་ལོ་ཐོས་ལོ་ཙམ་གྱིས་མི་འགྲིག་པ་ཡིན། […]

གཞི་རིམ་བར་མའི་བོད་དགེ་བདེ་ཆེན་རྡོ་རྗེ། བདེ་སླར་སམ་བྷོ་ཊ་ཉིན་སློབ། འགྲོ་བ་མི་བྱུང་བ་ནས་བཟུང་ཕན་ཚུན་གོ་བརྡ་སྤྲོད་བྱེད་དུ་ཆེས་ཐོག་མར་ལག་བརྡ་ནས་རིམ་བཞིན་མིའི་རྣམ་དཔྱོད་དང་ཕྱི་ནང་གི་མཐུན་རྐྱེན་དུ་མའི་རྐྱེན་གྱིས་སྐད་བྱུང་བ་ཚང་མས་ཤེས་གསལ་རེད། སྐད་ནམ་བྱུང་བའི་ཐད་ལ་ད་བར་ཁ་ཚོན་བཅད་ནས་གསུངས་མཁན་སུ་ཞིག་ཀྱང་བྱུང་མེད་ན་ཡང་། སྐད་ཡིག་ནམ་བྱུང་བ་དང་རྒྱ་སྐྱེད་དང་འཕེལ་རྒྱས་དང་འགྱུར་བ་ཇི་ལྟར་ཕྱིན་པའི་སྐོར་གསུངས་མཁན་མང་པོ་ཡོད། དེ་བཞིན་སྤྱིར་སྐད་ཡིག་སྦྱོང་ཚུལ་ལ་ཐབས་ལམ་སྣ་ཚོགས་ཤིག་ཡོད་ཀྱང་། དེ་རིང་ཁོ་བོས་བོད་ཀྱི་སྐད་ཡིག་སྦྱོང་དགོས་པ་དང་ཇི་ལྟར་སྦྱངས་ན་གྲུབ་འབྲས་བཟང་པོ་སྨིན་ཐུབ་པའི་སྐོར་བསམ་ཚུལ་འགའ་བརྗོད་འདོད་བྱུང་། ཐོག་མར་བརྗོད་གཞི་དངོས་འགོ་འཛུགས་མ་བྱས་གོང་སྐད་ཡིག་སྦྱང་དགོས་པའི་རྒྱུ་མཚན་གང་ལགས་ཞེ་ན། དེ་ཡང་སྐད་ཡིག་སྦྱང་བ་ཙམ་མ་ཡིན་པར་མཐར་ཕྱིན་པ་སྦྱང་དགོས་དོན་ནི་སྨྲ་བ་པོས་གང་བརྗོད་པར་འདོད་པ་དེ་ཡིག་ཐོག་གམ་ངག་ཐོག་གང་རུང་གི་སྒོ་ནས་ཕ་རོལ་པོས་གོ་བདེ་ཞིང་ལས་སླ་པོའི་ངང་གོ་བརྡ་འཕྲོད་ཐུབ་པ་དང་། དེ་བཞིན་གཞན་གྱིས་བྲིས་པའམ་ངག་ཐོག་ནས་སྨྲས་པའི་ཚིག་དོན་རྣམས་མ་ནོར་བར་རང་ཉིད་ཀྱིས་ཤེས་ཐུབ་པའི་ཆེད་དུ་ཡིན། སྤྱིར་སྐད་ཡིག་སྦྱོང་བར་ཐབས་ལམ་འདྲ་མིན་སྣ་ཚོགས་ཤིག་ཡོད་ངེས་ཀྱང་། སྐད་ཡིག་སོ་སོའི་ཐུན་མོང་མ་ཡིན་པའི་ཁྱད་ཆོས་དང་འགྲོ་ལུགས་འགྲོ་སྟངས་ཀྱང་མི་འདྲ་བ་ཡོད། དེ་བཞིན་སྐད་ཡིག་སྦྱོང་མཁན་གྱི་སློབ་གཉེར་རྣམས་ཀྱང་རང་རང་སོ་སོའི་ཁམས་དང་མོས་པ་མི་འདྲ་བ་ཡོད་པ་ཡིན། དེས་ན་སྐད་ཡིག་སྦྱོང་སྐབས་ཐབས་ལམ་མི་འདྲ་བ་དུ་མ་ཡོད་པ་དང་ངེས་པར་ཡོད་དགོས་པ་ཞིག་ཀྱང་ཡིན། སྐད་ཡིག་མཐར་ཕྱིན་པ་ཞིག་ཤེས་དགོས་ན། ངེས་པར་དུ་སྐད་ཡིག་གི་རྩལ་བཞི་མཐར་ཕྱིན་པར་ཤེས་དགོས། དེ་ནི་ཕྱི་ནང་གི་མཁས་པ་ཚང་མས་བཞེད་པ་གཅིག་མཐུན་དུ་གསུང་གི་ཡོད། མ་ཟད་དེང་སང་གི་སྐད་ཡིག་སློབ་ཚན་ཕལ་མོ་ཆེ་ཡང་རྩལ་བཞི་སློབ་འཁྲིད་བྱ་ཐབས་གཞི་ལ་བཞག་ནས་བཟོས་ཡོད། སྐབས་དོན་བཤད་པར་བྱ་བ་ནི་། ཕྲན་ནས་ད་བར་སློབ་མ་རྣམས་ལ་སྐད་ཡིག་སློབ་ཁྲིད་བྱས་པའི་ཉམས་མྱོང་ཐོག་ནས་ཐབས་ལམ་བཞི་པོ་གང་དང་གང་ཡིན་པ་དང་དེ་དག་གོ་རིམ་ཇི་ལྟར་བྱས་ན་ལེགས་པ་དང་འོས་ཞིང་འཚམས་པའི་སྐོར་ཞུ་རྒྱུའི་འབད་བརྩོན་བྱ་རྒྱུ། ཐོག་མར་སྐད་ཡིག་གི་རྩལ་བཞི་གང་དག་ཞེ་ན། ཉན་རྩལ། ཀློག་རྩལ། ཤོད་རྩལ། འབྲི་རྩལ་བཅས་སོ། སྐད་ཡིག་སློབ་པར་ངེས་མཁོའི་ཐབས་ལམ་མམ་རྩལ་བཞི་པོ་དེ་དག་གི་གོ་རིམ་ཐད་དགོངས་ཚུལ་དང་འགྲེལ་བརྗོད་བྱེད་སྟངས་ལའང་མི་གཅིག་པ་མང་པོ་ཡོད། རྩལ་བཞི་པོ་དེ་དག་ལས་གང་རུང་ཞིག་མེད་ན། འབྱུང་བ་བཞི་ལས་གང་རུང་ཞིག་མེད་པ་བཞིན་དུ། གཏང་འགྲོ་བཞག་སྡོད་འཕེར་བའི་སྐད་ཡིག་ཕུན་སུམ་ཚིགས་པ་ཞིག་ཤེས་ཐུབ་པ་ཧ་ཅང་ཁག་པོ་ཡིན། འོ་ན་སྐད་ཡིག་གི་རྩལ་བཞི་པོ་འདི་དག་སློབ་པའི་གོ་རིམ་ཡོད་དམ་ཞེ་ན། ཆེད་ལས་མཁས་པ་ཀུན་གྱིས་སྐད་ཡིག་ཐོག་མར་ཉན་པའམ་ཐོས་པའི་སྒོ་ནས་སྦྱང་དགོས་པར་གསུངས། ཕལ་ཆེར་འགྲོ་བ་མིས་སྐད་ཡིག་སྦྱོང་སྟངས་ཐོག་མར་ཡང་ཉན་པའི་སྒོ་ནས་ཡིན་པར་ངེས། གཞན་གྱིས་གང་བཤད་པའི་ཚིག་དོན་རྣམས་ཐོས་མ་ཐག་གོ་དོན་མ་ནོར་བར་ཤེས་ཐུབ་ན་ཉན་པའི་རྩལ་རྫོགས་པ་ཡིན། དེ་ནས་རིམ་བཞིན་ཡི་གེ་ངོ་ཐག་ཆོད་ནས་ཀློག་ཤེས་པ་དགོས། ཨ་ལག་ཤ་བསྟན་དར་ལྷ་རམས་ཀྱིས་ཡི་གེའི་བཤད་པ་མཁས་པའི་ཁ་རྒྱན་དུ། ཀློག་ཕྱེད་གོ་བས་ཤེས། ཞེས་གསུངས་པ་ལྟར་སྒྲ་དག་གསལ་གསུམ་ལྡན་པའི་ཀློག་རྩལ་ཡག་པོ་ཞིག་ཆགས་དགོས་ན། གང་བྲིས་པའི་ཚིག་དང་ཡིག་འབྲུ་བཀླག་པའི་སྐབས་དུ་དབུགས་ཀྱི་འཇིགས་མཚམས་དེ་ཚོ་ཤེས་དགོས་པའི་ཐོག གོ་དོན་ཡང་གང་ཙམ་རྟོགས་དགོས་པ་གནད་འགགས་ཆེན་པོ་ཡིན། དེ་ནས་འབྲི་རྩལ་ཏེ། འབྲི་རྩལ་ཕུན་སུམ་ཚོགས་པ་ཞིག་ཡོང་བར་བྱེད་པ་ལ། སྐད་ཡིག་ཤེས་པ་ཙམ་མ་ཡིན་པར། སྐད་ཡིག་དེའི་བདག་པོ་ལྟ་བུར་འགྱུར་པའི་སྐད་ཡིག་དེ་ཉིད་སྨྲ་མཁན་རྣམས་ཀྱི་བསམ་བློའི་འཁྱེར་སོ། ལོ་རྒྱུས། རིག་གཞུང་། ཡུལ་གོམས་གཤིས་ལུགས་སོགས་ཚང་མར་རྒྱུས་མངའ་ཡོད་ན་རོ་ཉམས་ཕུན་ཚོགས་པའི་རྩོམ་ཡིག་འབྲི་ཐུབ་པའི་རྩལ་འཐོབ་ནུས་པ་ཡིན། མ་ཟད་འབྲི་རྩལ་ནི་སྒྱུ་རྩལ་ཞིག་ཀྱང་ཡིན་པར་བརྟེན། མཐའ་གཅིག་ཏུ་དགེ་རྒན་གྱིས་སློབ་མར་ཨང་རྩིས་སློབ་པ་ནང་བཞིན་བསླབ་རྒྱུ་མེད་པར། རང་གི་མྱོང་ཚོར་དང་། ཁོར་ཡུག་སོགས་མང་པོ་ཞིག་ལ་རག་ལུས་ཡོད་པར་སྙམ། དེ་ནས་ཤོད་རྩལ་ནི། ཚོགས་པ་དང་། གྲོགས་སོགས་ཀྱི་དཀྱིལ་དུ་གཏམ་སྨྲ་བའི་སྐབས་སུ་བཞད་གད་སོགས་ཉམས་འགྱུར་སྣ་ཚོགས་འདྲེན་ཐུབ་པའི་སྐད་ཆ་ཤོད་པའི་ནུས་པ་ཞིག་ཟེར་བར་སྙམ། དེ་འདྲ་ཞིག་ཡོང་བ་ལ་ཕྱོགས་གང་ཅིའི་ཐད་ནས་ཐོས་པ་གསག་དགོས་རྒྱུ་དེ་ཧ་ཅང་གལ་ཆེར་མཐོང་། རང་ཉིད་ཀྱི་ཉམས་མྱོང་གི་ཐོག་ནས་ཞུས་ནའང་། […]

ལྟ་གྲུབ་དགེ་རྒན་བྱམས་པ་འཕྲིན་ལས། མ་སུ་རི་སཾ་བྷོ་ཊ་སློབ་གྲྭ། ང་རང་ལོ་ ༡༡ ལ་སོན་རེག་པར་ཕ་ཡུལ་ནས་ལུག་རྫི་བྱས་ཤིང་། དེ་དུས་ནས་ང་ནི་དཔེ་ཀློག་ལ་ཧ་ཅང་དགའ་བའི་ལུག་རྫི་ཞིག་ཡིན། ཕལ་ཆེར་ལོ་དྲུག་བདུན་ཞིག་ནས་བཟུང་ང་རང་བོད་ཡིག་ཀློག་པ་ལ་ཐོགས་པ་མེད། དེ་ནི་པ་ལགས་ཁོ་ནའི་སྐུ་དྲིན་རེད། ཕ་ཡུལ་གྱི་རི་ལུང་ཐང་གསུམ་ནི་རྫི་བོ་ཆུང་ཆུང་ངའི་དཔེ་ཀློག་གི་རང་བྱུང་སློབ་གྲྭ་དེ་ཡིན་ཟེར་ཆོག བདག་གི་ལུག་ཁྱུ་འཚོ་ཞོར་གྱི་འགྲོ་ས་དང་སྡོད་ས་དག་ཏུ་དཔེ་དེབ་རེ་བདག་གི་གྲོགས་སུ་ཡོད་ཡོད་ཡིན། འདི་ནི་ངའི་མི་ཚེ་ནང་སྙིང་དུ་སྡུག་ཤོས་ཀྱི་དུས་སྐབས་ཤིག་རེད། ལོ་རབས་བརྒྱད་ཅུ་བའི་ནང་དེ་འདྲར། ང་ལ་འབད་མེད་ལྷུན་གྲུབ་ལྟ་བུར་དཔེ་དེབ་དེ་དག་གང་ལས་རེག་ཚུལ་ནི། བདག་གིས་ཆེས་བརྗོད་འདོད་པ་དེ་ཡིན་ལ། འདི་ནས་ཁྱེད་ཚོས་བདག་གི་པ་ལགས་ནི་ཆེས་རླབས་ཆེ་བའི་ཨ་ཕ་ཞིག་ཡིན་པར་ཤེས་ཐུབ་པར་རེ་བ་བྱེད་ཀྱི་ཡིན། རང་ཉིད་ལ་མཚོན་ན། ཐེངས་དང་པོའི་མི་ཚེའི་ལམ་སྟོན་གྱི་སྒྲོན་མེ་ཉག་གཅིག་ནི་ངའི་པ་ལགས་ཡིན། ཁོང་ནི་འོད་ལམ་ལམ་ངང་ངའི་སེམས་སུ་ནམ་ཡང་གཟིམས་མི་སྲིད་པར་བཞུགས་ཡོད། ཨ་ཕའི་མཆོད་བཤམ་ཀྱི་སྒམ་གཉིས་ནང་ན། རྗེ་བཙུན་མི་ལ་དང་། རྗེ་ཞབས་དཀར་བ་སོགས་དམ་པ་གོང་མའི་རྣམ་ཐར་འདྲ་མིན་ཡོད་ལ། གཞན་ཡང་ཆོས་འབྱུང་། ལམ་རིམ། ལེགས་བཤད། གླིང་སྒྲུང་བཅས་ཀྱི་དཔེ་དེབ་རྩ་ཆེ་བ་ཤིན་ཏུ་མང་པོ་ཡོད། དེ་དག་རེ་རེ་ནི། ཨ་ཕས་ང་ལ་གནང་བའི་བྱིན་རླབས་ཀྱི་འོད་ཟེར་རེ་རེ་ཡིན། དེ་དག་ལས་བདག་གིས་མུན་སེལ་གྱི་སྣང་བ་ཅི་བས་མང་བ་འཐུང་མྱོང་། འདི་ནས་ངའི་པ་ལགས་ནི། འདི་ལྟར་འཇིག་རྟེན་གྱི་ཕ་མ་སུ་ལས་ཀྱང་ལྷག་པར་བཀའ་དྲིན་ཆེ་བ་ཞིག་ཡིན་པ་ད་ལྟ་སེམས་ལ་ཡང་ཡང་འཁོར་གྱིན་འདུག དེ་དུས་ཀྱི་སྤྱི་ཚོགས་ཀྱི་ངོས་ནས་བལྟས་ན་ཨ་ཕའི་དཔེ་སྒམ་དེ་ནི་མི་སྒེར་གྱི་ཉར་བའི་དཔེ་མཛོད་ཁང་ཆུང་ངུ་ཞིག་རེད་ཟེར་ན་མི་འགྲིག་པ་ཆེར་མེད། ཨ་ཕས་ནི་ལྷ་ཡི་ཕོ་ཉ་ཞིག་དང་འདྲ་པར་བདག་ལ་དཔེ་མཛོད་དེ་འདྲ་ཞིག་གི་དངོས་གྲུབ་གནང་བ་རེད། དཔེ་དེབ་དེ་དག་གིས། རྫི་བོ་ཆུང་ཆུང་ངའི་དབྱར་དགུན་གྱི་ཉི་མ་བསྐྱལ་རོགས་དང་། དཀའ་ངལ་གྱི་འདུ་ཤེས་མང་པོ་སེལ་རོགས་བྱས་པར་མ་ཟད། ཁོ་བོས་མི་ཚེ་དང་ཕྱི་མའི་ལམ་བུ་ལ་ཡང་ཤིན་ཏུ་འོད་སྣང་ལྡན་པར་བྱས་ཡོད། འདི་ལྟར་ཨ་ཕས་བདག་གི་ལམ་བུ་དེ་འོད་སྣང་དཀར་པོའི་ལམ་ཞིག་ཏུ་བཟོས་པ་རེད། ཆུང་དུས་དེར་ཡང་ངས་ནི་རང་རེ་བོད་ཀྱི་རྣམ་ཐར་ཆེན་མོ་བརྒྱད་དང་རྣམ་ཐར་གཞན་སོགས་བཀླགས་པ་ཡིན། དེ་དག་གི་རྗོད་བྱ་དག་ལ་དངོས་ཡོད་ཀྱི་ཡིད་ཆེས་བྱས་པ་མང་དྲག་པས་ཡིན་ནམ། ཧ་ཅང་ཟེར་བའི་བདུད་མོ་དང་། ཨ་མཆོད་ཧ་རི། ཨ་ནེ་སྙིད་མོ་དང་། རིགས་ངན་བུ་མོ། རུ་ནང་དཔོན་པོ་གྲགས་པ་བསམ་འགྲུབ། རྗེ་བཙུན་མི་ལའི་ཨ་ཞང་དང་ཨ་ནེ་སོགས་བྱ་སྤྱོད་མི་ལེགས་པའི་མི་དེ་ཚོར་ང་རང་ཞེན་པ་གཏིང་ནས་ལོག་ཏེ། ཡང་ཡང་འཚིག་པ་ཟ་བ་སོགས་ཀྱང་བྱས་མྱོང་། གསོན་ཉམས་འབར་བའི་གཏམ་རྒྱུད་དེ་དག་གི་ཁྲོད་དུ། ངས་ནི་དབྱར་ཆར་ཆུས་སྦངས་པ་དང་། དགུན་ཙག་རླུང་གིས་འཁྱགས་པ་སོགས་ལུག་རྫི་ཞིག་གི་དངོས་སུ་མྱོང་ཞིང་བརྒྱུད་དགོས་པའི་དུས་བཞིའི་ངོ་གདོང་དང་། གནམ་གཤིས་སོགས་ཕྱི་ཡི་འགྱུར་བ་དག་ལའང་། དེ་ཙམ་དོ་སྣང་བྱེད་རྒྱུ་བྱུང་མེད། ལྷ་གླིང་གི་རྟོགས་བརྗོད་རིང་མོ་སྟེ«གླིང་རྗེ་གེ་སར་རྒྱལ་བོའི་སྒྲུང་། »གི་བརྗོད་བྱ་རྣམས་ནི། བདག་གི་སེམས་ནང་གི་ངོ་མཚར་བཀྲ་བའི་འཇིག་རྟེན་ཆེ་ཤོས་དེ་ཡིན། འཇིག་རྟེན་དེའི་ནང་། […]

གཞི་རིམ་བར་མའི་བོད་དགེ་ལྷག་པ་ཚེ་རིང་། ཅོན་ཏ་ར་བོད་ཁྱིམ། རྗེ་སྲོང་བཙན་སྒམ་པོའི་ཐུགས་དགོངས་བཞེས་པ་བཞིན། བློན་ཐོན་མིས་རྒྱ་གར་བྱོན་ཏེ་མཁས་དབང་བསྟེན། ། ཕྱིས་བོད་དུ་ཕེབས་ཏེ་སྐད་འཚམ་བོད་ཡིག་བརྩམས། ། ཆེས་ངོ་མཚར་ཅན་གྱི་ལོ་རྩ་་ཁྱེད་ལ་བཏུད། ཞེས་མཆོད་བརྗོད་སྔོན་དུ་བསུས་ཏེ་ད་རིང་གི་རྩོམ་ཡིག་གི་བརྗོད་གཞིའི་དེའི་ཐོག་ལ་བདག་ལ་ལོ་མང་མྱོང་ཚོར་གང་བྱུང་བ་རྣམས་མདོར་བསྡུས་ནས་རིམ་བཞིན་བཀྲོལ་བར་བྱ། སློབ་ན་སོན་པའི་སློབ་ཕྲུག་སྔོན་འགྲོའི་འཛིན་གྲྭའི་སྐབས་ནས་ཀྱང་བོད་ཀྱི་སྐད་ཡིག་སྦྱངས་དུས་རྩལ་བཞིའི་ནང་ནས་ངེས་པར་དུ་ལག་བསྟར་མཁོ་བ་ནི་ཀློག་རྩལ་དང་འབྲི་རྩལ་གཉིས་ཀྱི་ཐོག་ནས། དབྱངས་བཞི་དང་གསལ་བྱེད་སུམ་ཅུའི་ཡི་གེ་རེ་རེ་བཞིན་སྒྲ་གདངས་མ་ནོར་བར་ཀློག་ཤེས་ཐབས་དང། ཆབས་ཅིག་ཏུ་ཀ་མེད་སུམ་ཅུའི་ཡི་གེ་རེ་རེ་བཞིན་ངོ་ཐག་ཆོད་པའི་ཐོག་འབྲི་ཤེས་པར་དགོས་རྒྱུ་ནི་མེད་དུ་མི་རུང་བ་ཞིག་ཡིན་ཞིང། ལྷག་པར་དུ་བྱིས་པ་ལོ་ན་ཆུང་དུས་ནས་བོད་ཀྱི་ཡི་གེ་ཀློག་ཁྲིད་པའི་སྐབས་སུ་སློབ་ཁྲིད་བྱེད་མཁན་གྱི་དགེ་ལགས་ཀྱིས་ཐབས་ལ་མཁས་པའི་སྒོ་ནས་སྦྱོར་ཀློག་གང་མང་སྦྱོང་བརྡར་སྤྲོད་དགོས་ངེས་དང། བསྡུས་ཀློག་བརྒྱབ་སྟངས་ཀྱང་ཁྲིད་ཐུབ་ན་དགེ་ཚན་ཆེ་བར་སྣང། གང་ལྟར་ཀློག་རྩལ་རྨང་གཞི་ཚུགས་ཐབས་སུ་ཡི་གེ་སྦྱོར་ཀློག་བརྒྱབ་སྟངས་དང། བསྡུས་ཀློག་བརྒྱབ་སྟངས་གཉིས་ལ་ཐུག་ཡོད་ཅིང། སྦྱོར་ཀློག་ཐོགས་པ་མེད་པར་བརྒྱབ་ཤེས་སོང་ན། བསྡུས་ཀློག་བརྒྱབ་རྒྱུར་དཀའ་འཛེགས་གང་ཡང་མེད་ཅིང་གོ་བ་ཡང་གང་ལ་གང་འཚམས་ཤིག་རྟོགས་ཐུབ་ངེས་ཡོང་རྒྱུར་གོར་མ་ཆག དེ་བཞིན་དུ་འབྲི་རྩལ་ལའང་སྔོན་འགྲོའི་འཛིན་གྲྭའི་སྐབས་ནས་ཀྱང་ཚུགས་རིང་གི་ཡི་གེ་ཆེན་པོ་འབྲི་སྲོལ་ནས་འགོ་འཛུགས་ཞུ་གི་ཡོད་ཅིང། རིམ་བཞིན་འཛིན་གྲྭ་འཕར་རིམ་བཞིན་དུ་བོད་ཡིག་ཡིག་གཟུགས་ལའང་ཆེ་ཆུང་འགྱུར་བ་གཏོང་དགོས་ཀྱི་ཡོད། དམའ་རིམ་ནས་བོད་ཡིག་ཡིག་གཟུགས་ཚུགས་རིང་ཚུགས་ཐུང་། ཡིག་ཆུང་བཅས་འབྲི་སྟངས་སློབ་དགོས་ཀྱི་ཡོད། འཛིན་གྲྭ་གཞི་རིམ་བར་མ་དང་གོང་མའི་སློབ་ཕྲུག་རྣམས་ཀྱིས་བོད་ཡིག་ཡིག་གཟུགས་ཚུགས་མ་འཁྱུག་དེ་ཉིད་ཐོག་ལ་ལག་བསྟར་བྱེད་བཞིན་ཡོད། འཛིན་གྲྭ་སོ་སོར་མཐུན་པའི་བོད་ཡིག་ཏག་ཏག་བྲིས་ཐུབ་སོང་ན་འབྲི་རྩལ་རང་བཞིན་གྱིས་ཡག་པོ་ཆགས་ངེས་ཡིན། གལ་ཏེ་འཛིན་གྲྭ་སོ་སོར་མཐུན་པའི་བོད་ཡིག་ཡིག་གཟུགས་ཏག་ཏག་བྲིས་མ་ཐུབ་ན་འབྲི་རྩལ་ཡོང་རྒྱུ་ག་ལ་ཡིན། འབྲི་རྩལ་ཡག་པོ་ཡོང་བར་སློབ་ཕྲུག་ཚོས་གང་བསམ་པ་དང་དྲན་པ། དཔེ་དེབ་ཀློག་ནས་སློབ་མ་སོ་སོས་གང་རྟོགས་པ་རྣམས་བྲིས་ཐུབ་པ་ཞིག་ལ་རང་སྐྱ་འཕེར་བ་ཟེར་ཆོག འབྲི་རྩལ་དང་ཀློག་རྩལ་གྱི་རྨང་གཞི་བརྟན་པོ་ཞིག་དམའ་རིམ་འཛིན་གྲྭ་ཁག་ནས་གོམས་འདྲིས་བཟང་པོ་ཞིག་བཟོས་ཐུབ་སོང་ན། བཤད་རྩལ་དང་མཉན་རྩལ་གཉིས་རང་བཞིན་གྱིས་སླེབས་འོང། སློབ་ཕྲུག་གང་ཞིག་གིས་དཔེ་དེབ་བཀླག་རྒྱུར་དོ་དབྱིངས་གོམས་འདྲིས་ཡོད་མཁན་འདི་བཤད་རྩལ་ཀྱང་གཞན་དང་མི་འདྲ་བ་ཡོད་ཅིང། སོ་སོས་གང་རྟོགས་པ་རྣམས་གཞན་ལ་བཤད་ཐུབ་པར་ཡོང་རྒྱུ་ནི་གདོན་མི་ཟ། ཕྲུ་གུ་ཚར་ལོངས་ཀྱི་སྐབས་ནས་ཕ་མ་དང། དགེ་རྒན་ཚོས་བཀའ་མོལ་གནང་དུས་བཟང་སྤྱོད་ཐོག་ན་ས་བཤད་པ་ཡིན་ན་མ་འོངས་པར་སློབ་ཕྲུག་དེ་ཚོ་ཆེན་པོ་ཆགས་ཏེ་རང་གི་རྐང་པའི་སྒང་ལ་ལངས་དུས་མང་ཚོགས་ལ་གང་ཡིན་ན་ཡང་ཐོགས་པ་མེད་པར་བཤད་ཐུབ་པར་ཡོང་། ལྷག་པར་དུ་ཀློག་སྦྱོང་བརྡར་ཡག་པོ་ཞིག་བྱུང་བར་སློབ་ཁྲིད་སྐབས་སུ་ཐོག་མ་དེ་ལ་དགེ་རྒན་རང་ཉིད་ཀྱིས་ཤོག་གྲངས་གཅིག་ཙམ་ཀློག་སྟངས་ཀྱི་དཔེ་མཚོན་ཞིག་གི་བསྟན་ཏེ་གཞིས་ནས་ཡི་གེ་བཅད་མཚམས་འཇོག་སྟངས་མ་ནོར་བའི་ཐོག་ནས་བསྡུས་ཀློག་སྒྲ་དག་གསལ་གསུམ་བརྒྱབ་བཀླག་བཅུག་རྒྱུ་དེ་ནི་ཀློག་རྩལ་ལ་གལ་འགངས་ཆེན་པོ་ཞིག་འདུག བོད་ཡིག་སྐད་ཡིག་ཁྱོན་ནས་ཀློག་མི་ཐུབ་མཁན་གྱི་སློབ་མ་ཞིག་ཡོད་ན། ཁོ་པས་ཀློག་རྩལ་ཐོག་ལ་ག་ལ་བཞུགས་ཐུབ། མགོ་སེར་ཕྱི་གླིང་བའི་མི་ཞིག་ལ་ཆ་བཞག་ན་བོད་ཀྱི་ཡི་གེ་སྔོན་ཆད་མཐོང་མ་མྱོང་བར་མ་ཟད། ད་ལྟ་རང་ཡི་གེ་འདི་ཀློག་ཟེར་ན་མགོ་འཐོམ་རྒྱུ་ཉག་ཅིག་རེད། དེ་བཞིན་དུ་བོད་ཡིག་སྐད་ཡིག་གི་འབྲི་རྩལ་ཡར་རྒྱས་འགྲོ་བར་གཙོ་བོ་གཅིག་ནི་འཛིན་རིམ་སོ་སོའི་བོད་ཡིག་མ་མཐའི་ཤེས་ཚད་དང་མཐུན་པར་བོད་ཡིག་སྐད་ཡིག་གང་ལ་གང་འཚམས་ཤིག་སློབ་མ་སོ་སོའི་ངོས་ནས་རང་སྐྱ་འཕེར་བ་ཞིག་བྲིས་ཐུབ་སོང་ན་འབྲི་རྩལ་གྱི་ཐོག་ནས་དྲི་བ་གང་འདྲ་ཞིག་བསྐུར་རུང་བདེ་བླག་ཏུ་བྲིས་ཐུབ་པར་ཡོང་ངེས་མཆིས། དཔེ་དེབ་མང་པོ་བཀླགས་ནས་བྲོ་བ་ཞིག་རྙེད་སོང་ན། སློབ་མ་རང་ངོས་ནས་ཀྱང་གང་ཐུབ་ཐུབ་ཀྱིས་སྒོ་ནས་རྩོམ་བརྗོད་གཞི་སྣ་མིན་དང། བཟང་སྤྱོད་ཀྱི་ཕྱུག་པའི་སྒྲུང་རིགས་ལ་སོགས་པ་བརྩམས་་ཐུབ་སོང་ན་འབྲི་རྩལ་གོང་མཐོར་འགྲོ་རྒྱུར་འདོན་མི་ཟ། བོད་ཡིག་སྐད་ཡིག་འདི་ཡར་རྒྱས་འགྲོ་བར་རྩལ་གཙོ་བོ་དེ་གཉིས་ལ་ཐུག་ཡོད་ལ། དེ་གཉིས་ནང་དངོས་སུ་བཞུགས་ཏེ་སྦྱོང་བརྩོན་བྱས་ནས་ལག་བསྟར་བྱས་ན་མ་གཏོགས་ཁ་ཙམ་བཤད་པས་འགྲིགས་ཐབས་ནམ་ཡང་མེད་ཅིང། རྒྱུན་དུ་འབྲི་ཀློག་ལ་སྦྱོང་བརྡར་བྱས་ཏེ། ། གང་ཐུབ་ཤུགས་སྣོན་ལ་འབད་འབུངས་ཐུབ་ན། ། བོད་ཡིག་སྐད་ཡིག་འདི་ཡར་རྒྱས་ཕྱོགས་སུ། ། རང་སྐྱ་འཕེར་བ་ཞིག་ཡོང་ངེས་ཆོས་ཉིད། སློབ་མ་གང་ཞིག་ལ་བོད་ཡིག་སྐད་ཡིག་གི་འབྲི་རྩལ་དང་ཀློག་རྩལ་གཉིས་དོ་མཉམ་པར་ལྡན་འགྱུར་ན། བོད་ཡིག་སྐད་ཡིག་ཡར་རྒྱས་འགྲོ་རྒྱུ་ཉག་ཅིག་ཅིག་ཡིན་ཞིང། རྩལ་གཞན་གཉིས་བཤད་རྩལ་དང་ཉན་རྩལ་ཡང་གཙོ་བོ་འབྲི་ཀློག་གཉིས་ཀྱི་རྩལ་དང་འབྲེལ་བ་ཡོད་པ་ཞིག་ཆགས་ཡོད། བོད་ཡིག་སྐད་ཡིག་ཀློག་ཐུབ་པ་་བརྟེན་ནས་རྩོམ་ཡིག་གི་ནང་དོན་གང་ལ་གང་འཚམས་ཤིག་མགོ་ཚོས་པ་ཡོང་རྒྱུ་དང། […]

གཞི་རིམ་འོག་མའི་བོད་དགེ། རྡོ་སྦིས་ཟླ་བ་ཚེ་རིང་། མེས་དབོན་གཙུག་ལག་དཔེ་སྟོན་སློབ་གྲྭ། སྔོན་དུ་གླེང་བའི་གཏམ། ཡོངས་གྲགས་ཀྱིས་སྐད་ཡིག་ནི་མི་རིགས་དེའི་དབུགས་རྔུབ་འབྱིན་བྱེད་ཀྱི་ཚེ་སྲོག་ངོ་མ་དེ་ཡིན་ཟེར་ནས་ཆུང་བྱིས་པ་སྣབས་ལུག་ཡན་ཆད་དང་རྒན་བགྲེས་པོ་མགོ་དཀར་མན་ཆད་ནས་ཁ་རུ་ཡིག་དྲུག་བཞིན་བགྲེང་གི་ཡོད་ནའང། དོན་དངོས་ཀྱིས་དེ་ལྟར་གལ་ཆེན་འགེངས་ཆེན་དུ་སེམས་མེད་པའི་གཟོད་ལྟ་ཞིག་ཡོད་དེ། སློབ་གྲྭ་ཁག་ཏུ་བོད་སྐད་ཡིག་གི་ཁྲིད་ཆས་དང་བོད་སྐད་ཡིག་འཛིན་གྲྭ་(language class)་སོགས་ཀྱི་ཆ་རྐྱེན་ནི་སྐད་ཡིག་གཞན་པ་ལས་ཧ་ཅང་ཞན་ཅིང་། སློབ་གྲྭ་ཁ་ཤས་ལ་ཁྱོན་ནས་མེད་ཟེར་ཀྱང་ཆོག མ་ཟད་གོང་རིམ་ནས་ཀྱང་སློབ་ཚན་གཞན་པ་ལ་འགྲོ་གྲོན་བཏང་སྟངས་ཤིག་བོད་ཀྱི་སྐད་ཡིག་དང་དེའི་ཁྲིད་ཆས་སམ་ཡོ་བྱད། དེབ་སོགས་ཀྱི་ཐོག་ལ་དེ་བཞིན་གྱི་འགྲོ་གྲོན་བཏང་མ་ཐུབ་པའི་ཚོར་བ་ཞིག་གིས་གཅུན་ནས་ཡོང་གི་འདུག གང་ཡིན་ཟེར་ན། ཁ་སང་དེ་རིང་གི་བོད་སྐད་ཡིག་གི་གནས་སྟངས་ལ་བསམ་བློ་རེ་བཏང་ཚེ་འགོ་སྐད་ཆ་འཆད་སྟངས་ནས་སློབ་གྲྭ་རུ་བསླབ་དགོས་ཙང་བོད་སྐད་ཡིག་ཁྲིད་ཐབས་ཀྱི་ཡོ་བྱད་སོགས་སྐད་ཡིག་གཞན་ལས་མཐུན་རྐྱེན་ཡག་ཏུ་བསྐྲུན་མ་ཐུབ་རུང་། དེ་དག་དང་དོ་མཉམ་པའི་མཐུན་རྐྱེན་ཞིག་གནང་དགོས་པ་ནི་ཐེངས་འདིའི་བསམ་བློ་སྔོན་དུ་སོང་བའོ། ། དང་པོ། བོད་སྐད་ཡིག་གི་ཉན་རྩལ་ཡར་རྒྱས་གཏོང་སྟངས། སྤྱིར་སྐད་ཡིག་གང་རུང་ཞིག་ཡུན་རུང་དེའི་ཉན་རྩལ་ཡར་རྒྱས་གཏོང་བར་སློབ་གྲྭའི་ཁོར་ཡུག་དང་ཁྱིམ་གྱི་ཁོར་ཡུག་གཉིས་ལ་བརྟེན་དགོས་པ་ཆོས་ཉིད་ཅིག་ཡིན་ནའང་། འུ་ཚང་གི་ཚོགས་སྤྱི་འདིས་སློབ་གྲྭའི་ཁོར་ཡུག་གཅིག་པོར་བརྟེན་པ་ལས་ཁྱིམ་གྱི་ཁོར་ཡུག་དེ་སྣང་མེད་དང་དོན་མེད་དུ་སོམས་པའི་སྲོལ་ཞིག་འདུག་སྟེ། ཕ་མ་དང་སྤུན་གཉེར་ནས་བཟུང་སྟེ་འགོ་སྐད་ཆ་(ར་མ་ལུག་གི་སྐད་)འཆད་སྟངས། ལྟད་མོ་(ཧིན་དྷི། དབྱིན་ཇི། རྒྱ་སྐད། )གཟིགས་སྟངས་སོགས་ནི་ཕྲུ་གུས་བོད་སྐད་ཡིག་གི་ཉན་རྩལ་ཡར་རྒྱས་གཏོང་བར་བཟློག་ཕྱོགས་རྐྱང་རྐྱང་དུ་ལངས་ཡོད་པ་འདི་རེད། འདི་འདྲའི་ཁོར་ཡུག་ཅིག་གི་ནང་དུ་བོད་སྐད་ཡིག་གི་ཉན་རྩལ་ཡར་རྒྱས་གཏང་རྒྱུ་ཟེར་ན་ཅུང་ཙམ་འུར་ཚ་བོ་མི་འདུག་གམ། གཅིག་བྱས་ན། ཁོང་ཚོས་རེ་བ་ཡོད་ཚད་སློབ་གྲྭའི་ཁོར་ཡུག་ལ་བཅོལ་ཡོད་སྲིད་མོད། འོན་ཏེ་བོད་ཀྱི་སྐད་ཡིག་ལ་བསམ་བློ་བཏང་ནས་བཤད་ཚེ་སློབ་གྲྭའི་ཁོར་ཡུག་ཀྱང་དེ་ག་རང་ལས་མ་འདས། ཅིའི་ཕྱིར་ཟེར་ན། འཚོ་བའི་དགོས་མཁོའི་དབང་གིས་སློབ་གྲྭ་མང་ཆེ་བ་རུ་བོད་ཀྱི་སྐད་ཡིག་གཅིག་པོ་མ་གཏོགས་སློབ་ཚན་(འཛིན་རིམ་དགུ་བ་ཡར་འདབ་ཀྱི་ཨང་རྩིས་དང་ཚན་རིག་སོགས། )གཞན་དག་དབྱིན་ཇིའི་བརྒྱུད་ལམ་ཡིན་པས་སོ། ཡང་གཅིག་བཤད་ན། ལག་པའི་ལྡོག་སྒྲ་གྲག་པར་ལག་ཟུང་གཉིས་ཀ་དགོས་པ་ལྟར་ཉན་རྩལ་ཡར་རྒྱས་གཏོང་བར་སློབ་གྲྭ་དང་ཁྱིམ་གྱི་ཁོར་ཡུག་གཉིས་ཟུང་འབྲེལ་བྱས་ཏེ་ཕྲུ་གུའི་ཉན་རྩལ་ཡར་རྒྱས་གཏང་དགོས་པ་རེད་མ་གཏོགས། སློབ་གྲྭ་ཁོ་ནར་རེ་བ་བཅིང་བ་ནི་རེ་བ་ཆིག་རྐྱང་ཅན་དང་ཆ་མ་ཚང་བའི་སློབ་གསོ་དེ་རེད། མ་གཞི་ནས་སློབ་གྲྭ་ནི་ཕྲུ་གུའི་ཤེས་ཡོན་བསླབ་ས་དེ་དང་ནང་ཁྱིམ་ནི་ཕྲུ་གུས་སློབ་གྲྭ་ནས་གང་བསླབ་པ་དེ་སྦྱོང་བརྡར་བྱེད་སའི་གང་སྟེགས་ཀྱི་ཁོར་ཡུག་གཙོ་བོ་དེ་ཡིན་པའི་ན། ཁྱིམ་གྱི་ཁོར་ཡུག་དང་སློབ་གྲྭའི་ཁོར་ཡུག་གཉིས་ཕྱར་གྲུ་མཉམ་འདེགས་ཀྱི་ཚུལ་དུ་དགོས་པ་ནི་ཁ་ཚ་དགོས་གཏུག་གི་ལས་ཁུར་ཞིག་ཡིན་པས། གཤམ་དུ་བདག་གིས་དེ་ཕྱོགས་ཀྱིས་ཕྲུ་གུའི་ཉན་རྩལ་ཡར་རྒྱས་གཏོང་ཐབས་སུ་བསམ་ཚུལ་ཙམ་འབྲི་བར་བྱའོ། ། ༡ ཁྱིམ་གྱི་ཕ་མས་རང་གི་ཕྲུ་གུའི་བོད་སྐད་ཡིག་གི་ཉལ་རྩལ་ཡར་རྒྱས་ཡོང་ཆེད་བོད་སྐད་གཙང་མ་དང་ངག་འཇམ་ཤ་ཚའི་ཐོག་ནས་བཀའ་མོལ་གནང་སྟེ་ཕྲུ་གུའི་རྣ་དབང་ལ་ཉན་རྩལ་གྱི་ས་བོན་གཙང་མ་ཐོག་མར་འདེབས་དགོས། གང་ཡིན་ཟེར་ན། ཕ་མ་ནི་ཕྲུ་གུའི་དགེ་རྒན་དང་པོའམ་ཕྲུ་གུ་དང་མཉམ་གཤིབ་ཀྱི་དུས་ཚོད་རང་ཤོས་དེ་ཡིན་པའི་ན། ཕ་མའི་བཀའ་མོལ་གནང་སྟངས་དང་འགྲོ་འདུག་སྥྱོད་གསུམ་གང་ཡིན་པ་དེ་ཕྲུ་གུའི་སེམས་ལ་འཇགས་སླ་བར་མ་ཟད། དེ་བཞིན་གྱིས་ལད་ཟློས་གནང་རྒྱུ་ནི་ཆོས་ཉིད་ཅིག་ཡིན་པས། ཕ་མས་རང་གི་ཕྲུ་གུའི་བོད་སྐད་ཡིག་གི་ཉལ་རྩལ་ཡར་རྒྱས་ཡོང་ཆེད་རང་ཉིད་ཀྱི་སྣང་བ་གང་ཤར་དང་དགའ་ཕྱོགས་མོས་ཕྱོགས་བློས་བཏང་གིས་ཕ་མ་བཟང་བོ་ཞིག་གི་མིག་དཔེ་སྟོན་རྒྱུ་ནི་ཁྱེད་རང་ཕ་མ་ཞིག་ཡིན་པའི་ལས་འགན་ཡིན་ནོ། ། ཡང་གཅིག་བཤད་ན། འུ་ཚང་གི་ཕ་མ་ཚོས་རེ་བ་ཆེན་པོ་ཞིག་བཅིང་ཡོད་ནའང་། དེ་ཚོད་ཀྱིས་བློས་བཏང་(དུས་ཚོད། སྤྲོ་སྐྱིད་ཀྱི་དུས་ཚོད། འགྲོ་གྲོན། )ཅི་ཡང་མི་བྱ་བར་རེ་བའི་འབྲས་བུ་སྨིན་པར་ངང་སྒུག་བྱེད་པ་ནི་ཡང་དག་པའི་ཕ་མ་ཞིག་གི་བསམ་བློ་མ་སྨིན་པའི་ཏན་རྟགས་རེད་དོ། ། ༢ ཕ་མས་རང་གི་ཕྲུ་གུའི་ཉལ་རྩལ་ཡར་རྒྱས་ཡོང་བར་གནའ་སྒྲུང་འཆད་པ་དང་དོན་སྙིང་ལྡན་པའི་ཁ་བའི་མི་སྣའི་ལོ་རྒྱུས་འཆད་པ། […]