སྐལ་ལྡན། དགེ་ཆེའི་ལས་རོགས།སེ་ལ་ཀུའི་བོད་ཁྱིམ་སློབ་གྲྭ།    ༸གོང་ས་༸སྐྱབས་མགོན་ཆེན་པོ་མཆོག་ནི། བོད་མི་སྤྱི་བོ་གནམ་བསྟན་ཡོངས་ཀྱི་བླ་ན་མེད་པའི་ཆོས་སྲིད་གཉིས་ཀྱི་དབུ་ཁྲིད་དང་། འཛམ་གླིང་སྐྱེ་འགྲོ་ཀུན་གྱི་ཞི་བདེའི་ལམ་སྟོན་པ་ཆེན་མོ་བ། མཐའ་ཡས་སེམས་ཅན་གྱི་བདེ་སྡུག་ལྷམ་མེར་གཟིགས་པའི་སྐྱེས་མཆོག་དམ་པ། གནའ་དེང་ཤེས་བྱའི་གནས་ལུགས་མཁྱེན་པའི་བཤེས་གཉེན་ཆེན་མོ། བོད་མི་རིགས་ཀྱི་རིག་གཞུང་འཆི་གསོན་གྱི་གནས་ལས་སྐྱོབ་པའི་ཐབས་མཁས་བླ་མ། ཆོས་ལུགས་མཐུན་བསྒྲིལ་གྱི་ལམ་སྟོན་སྒྲོན་མེ། འགྲོ་བ་མི་གཅིག་གྱུར་གྱི་འདུ་ཤེས་སྐྱོང་བའི་ཡང་དག་སློབ་དཔོན་སོགས་ཐུགས་ཀྱི་མཁྱེན་ཡོན་དང་མཛད་འཕྲིན་རླབས་པོ་ཆེ་བསམ་ཡུལ་ལས་འདས་པ་བསྐྱངས་དང་སྐྱོང་མུས་ཀྱིས། འཇིག་རྟེན་འདིའི་སྟེང་ཆེས་རླབས་ཆེན་གྱི་དགེ་བའི་བཤེས་གཉེན་ཁོང་ལས་ལྷག་པ་ཞིག་ད་བར་བྱུང་མེད་ལ་ཕྱིས་འབྱུང་ཡང་འབྱུང་མི་སྲིད་པ་ལྟ་བུ་ཆགས་ཡོད། བདག་ཅག་ཁ་བ་རི་པ་རྣམས་ནི་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་བྱིན་མཐུ་དང་ལམ་སྟོན་བཟང་པོའི་བཀའ་དྲིན་ལས། རང་བཞིན་ལས་ལ་བརྩོན་ཞིང་དཔའ་ངར་ཆེ་བ། གཞུང་དྲང་ཞིང་སེམས་རྒྱུད་བཟང་བ། གཞན་ཕན་ཆེ་ལ་བློ་རྒྱ་ཡངས་པ་སོགས་འཇིག་རྟེན་གྱི་སྐྱེ་བོ་སྤྱི་ཡོངས་ཀྱི་ཁྲོད་ན། མི་གཤིས་ཀྱི་བཟང་པོའི་ཡོན་ཏན་དུ་མས་རྒྱན་པ་ཞིག་ཡིན་པ། འཛམ་གླིང་ཁྱོན་དུ་ལྷམ་མེར་གྲགས་པ་དེ་ཡིན། བོད་མི་ཚོས་རང་ཉིད་༸རྒྱལ་བ་རིན་པོ་ཆེའི་སྐུ་ཡི་སྐུ་ཚབ་དང་། གསུང་གི་གསུང་ཚབ་ཡིན་སྙམ་པའི་ཐོག་ཡུལ་གྲུ་གང་དུ་གནས་ཀྱང་གཞན་ཕན་དང་། སྙིང་རྗེ། བཟོད་སྒོམ། ཆོག་ཤེས་སོགས་དང་། ལུས་གུས་པ། ངག་འཇམ་པ། ཡིད་དྲང་བ་བཅས་མིག་དཔེར་འོས་པའི་བྱ་སྤྱོད་སྣ་ཚོགས་ཀྱིས་སྤྱི་ཚོགས་དེ་དང་དེའི་མཛེས་རྒྱན་དུ་གྱུར་བའི་ལོ་རྒྱུས་ཀྱི་རི་མོ་ལྷམ་མེར་བཀོད་ཡོད། དཔེར་ན། རྒྱ་གར་ནང་དགུན་ཚོང་གཉེར་མཁན་གྱི་བོད་མི་རྣམས་ལ། ལུ་ཐི་ཨཱ་ནའི་ལཱ་ལཱ་རྣམས་ཀྱིས་ཡིད་ཆེས་བློས་འགེལ་གྱིས་སྒོར་མོ་འབུམ་ཕྲག་མང་པོའི་ཚོང་ཟོག་བོགས་གཡར་བྱེད་པ་དང་། བོད་མི་རྣམས་ཀྱིས་ཀྱང་གཡོ་ཟོལ་གྱི་དྲི་མ་མེད་པར་བུ་ལོན་དུས་ཐོག་ཏུ་འཇལ་གྱི་ཡོད་པས། ལཱ་ལཱ་དེ་ཚོས་༸གོང་ས་ཏཱ་ལའི་བླ་མའི་མི་མང་དེ་ཚོ་དྲང་བདེན་བློས་འགེལ་ཆོག་པ་འདུག་ཅེས་བསྔགས་བརྗོད་ལན་མང་བྱས་པ་ལྟ་བུ་རེད། གནད་དོན་དེ་དག་གིས་༸གོང་ས་མཆོག་གིས་དུས་དང་རྣམ་པ་ཀུན་ཏུ་བོད་མི་རྣམས་ལ་ཡང་དག་པའི་ལམ་སྟོན་གནང་བའི་གྲུབ་འབྲས་ཡིན་པ་མངོན་གསལ་དོད་པོ་ཆགས་ཡོད། ད་ལྟའི་ཆར་འཛམ་གླིང་སྤྱིའི་སྤྱི་ཚོགས་འཁྲུག་ཆ་དོད་དུ་འགྲོ་བཞིན་ཡོད་པའི་ཁར། དེང་རབས་ཀྱི་ཤེས་ཡོན་ལམ་ལུགས་ཀྱང་ནུབ་ཕྱོགས་པའི་ལྟ་གྲུབ་ཀྱི་ཤན་ཤུགས་ཆེ་བས། རང་ཉིད་ཀྱི་ཁེ་ཕན་གཙོ་བོ་སྒྲུབ་ཐབས་དང་། དཔལ་འབྱོར་དང་ཡོང་འབབ་གསོག་སྒྲུབ་བྱེད་སྟངས། ཕྱི་དངོས་པོའི་མཐུན་རྐྱེན་གཙོ་སྒྲུབ་བྱེད་ཐབས། རང་རྒྱལ་གཞན་ཕམ་གྱི་བྱ་སྤྱོད་སྤེལ་ཐབས་སོགས་ཕྱོགས་ཀུན་ནས་སློོབ་གསོའི་ནུས་པ་ཚད་ལྡན་མི་ཡོང་བའི་སྟོང་ཆ་ཆེན་པོ་ཞིག་གིས། མི་དང་མིའི་བར་གྱི་བརྩེ་ཞེན་དང་། མི་དང་མིའི་བར་གྱི་མཐུན་སྦྲེལ། མི་དང་མིའི་བར་གྱི་བསམ་ཤེས། མི་དང་མིའི་བར་གྱི་གུས་ཞབས་སོགས་སྣུམ་ཟད་ཀྱི་མར་མེའི་སྣང་ཚུལ་དུ་གྱུར་བའི་ཡ་ང་བའི་དུས་སྐབས་ཤིག་འགྲིམ་མུས་ཡིན། ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་འདི་བཞིན་འགྲོ་བ་མི་ཡོངས་ལ་དབང་བ་ཞིག་ཡིན་པ་ལས། འགོ་ཁྲིད་རེ་ཟུང་དང་འབྱོར་ལྡན་པ་རེ་ཟུང་ལ་དབང་བ་ཞིག་ནམ་ཡང་མིན་ཞེས་དང། འགྲོ་བ་མི་སྤྱི་ཡོངས་ཀྱི་བདེ་སྡུག་ཕན་ཚུན་ལྟོས་གྲུབ་ཡིན་པས། རང་བདེ་གཞན་སྐྱིད་ཀྱི་འཚོ་བར་རོལ་འདོད་ན། དང་ཐོག་གཞི་རྩའི་ཤེས་ཡོན་ལམ་ལུགས་ནས་འགྱུར་བ་གཏོང་དགོས་གལ་ཡང་ཡང་ལམ་སྟོན་གནང་ཡོད། ཕྱི་དངོས་པོ་ཡར་རྒྱས་གཏོང་རྒྱུ་དང་ལྷན། ནང་སེམས་ཀྱི་ཞི་བདེ་སྐྲུན་ཐབས་ཀྱི་སློབ་གསོ་ནི་དེ་བས་གལ་ཆེ་བ་ཡིན་ཚུལ་ལམ་སྟོན་རབ་དང་རིམ་པ་གནང་ཡོད། ཁོང་གིས་མཛད་པའི་སྟོང་ལོ་གསར་པའི་བཟང་སྤྱོད་དང་། ཆོས་ལུགས་ལ་མ་བརྟེན་པའི་བཟང་སྤྱོད། བཅས་ཀྱི་ཕྱག་དཔེ་དེ་དག་ཀྱང་འགྲོ་བ་མིའི་གཞི་རྩའི་བདེ་སྐྱིད་སྐྲུན་ཐབས་ཀྱི་རྨད་བྱུང་ལམ་སྟོན་ཆགས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནི། འགྲོ་བ་མི་སྤྱིའི་བདེ་སྡུག་ལ་དགོངས་པ་བཞེས་ཏེ་ལམ་སྟོན་ཕྱིན་ཅི་མ་ལོག་པ་གནང་མཁན་ཞིག་ཡིན་པ་ལས། མགོ་ནག་བོད་མི་ཙམ་དང་ཆོས་བརྒྱུད་བྱེ་བྲག་གཅིག་ཁོ་ནའི་ཆེད་དུ་སྐུ་ལས་སྐྱོན་ནས་བཞུགས་མཁན་ཞིག་ག་ལ་ཡིན། ང་ཚོ་དགེ་རྒན་རྣམས་ནི་འབྱུང་འགྱུར་གྱི་མི་རབས་གསར་པ་གསོ་སྐྱོང་བྱེད་མཁན་གྱི་གལ་ཆེའི་མི་སྣ་ཤ་སྟག་ཆགས་ཡོད་ལ། […]

ཚེ་རིང་མགོན་པོ། དགེ་ཆེ།སེ་ལ་ཀུའི་བོད་ཁྱིམ་སློབ་གྲྭ།    རང་གཞན་ཀུན་བདེ་སྐྱིད་འདོད་ཅིང་སྡུག་བསྔལ་མི་འདོད་པར་སོང་བདེ་སྐྱིད་སྒྲུབ་བྱེད་ཀྱི་རྒྱུ་ཉམས་སུ་བླངས་པ་དང་། སྡུག་བསྔལ་འདོར་བྱེད་ཀྱི་རྒྱུ་ཡང་དག་པར་སྤོང་བ་སྟེ། དོན་དང་དོན་མ་ཡིན་པ་རྣམ་པར་འབྱེད་པའི་ཤེས་རབ་རྒྱུད་ལ་སྐྱེ་དགོས་ཤིང་། དེ་ཡང་། “ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ།།” ཞེས་གསུངས་པ་ལྟར་ལེགས་ཚོགས་ཡོན་ཏན་ཐམས་ཅད་འབྱུང་བའི་གཞི་གཙོ་བོ་ནི་དགེ་རྒན་ཡིན་པར་བརྟེན། དགེ་རྒན་ཞེས་པ་དེ་རང་དང་གཞན། སྒེར་དང་སྤྱི་ཚོགས་བཅས་ཚང་མར་ཧ་ཅང་གི་གལ་གནད་ཅན་ཞིག་ཡིན། ལེགས་ཉེས་རྣམ་པར་འབྱེད་པའི་ཤེས་རབ་ཡང་དག་པ་དེ་དགེ་རྒན་ཞིག་གི་སྐུ་དྲུང་ནས་རིག་པའི་གཞུང་ལུགས་རྣམས་ཐོས་པ་དང་། ཐོས་པའི་དོན་དེ་ཡང་ཡང་བསམ་ཞིང་བསྒོམས་པར་བྱས་པ། དེ་ལྟར་གོམས་འདྲིས་བྱས་ཏེ་གང་སྦྱངས་པའི་ཤེས་ཡོན་དེས་རང་དང་གཞན། སྤྱི་ཚོགས་བཅས་སུ་ཕན་བདེ་སྒྲུབ་ཐུབ་པ་ཞིག་དགོས་པ་ལགས། འོ་ན་༸རྒྱལ་བའི་དགོངས་པ་དང་མཐུན་པར་དགེ་རྒན་ལ་ཁྱད་ཆོས་གང་དང་གང་ཚང་དགོས་སམ་ཞེ་ན། ༡༽ དང་ཐོག་དགེ་རྒན་བྱེད་འདོད་ཀྱི་འདུན་པ་རྨ་མེད་པ་ཞིག་དགོས།    དགེ་རྒན་ཞེས་པ་དེ་མིག་མེད་ཀྱི་སྐྱེ་བོར་མིག་སྦྱིན་མཁན་ལྟ་བུ་ཞིག་དང་རླབས་ཆེན་གྱི་བྱ་བ་སྒྲུབ་མཁན་ཞིག་སྟེ། དགེ་རྒན་གྱི་བྱ་བ་དེ་འཚོ་བ་དོན་གཉེར་གྱི་ཆེད་དུ་མིན་པར་རྒྱལ་ཁབ་ཅིག་དང་འབྱུང་འགྱུར་ཞི་བདེ་ཅན་གྱི་འཛམ་གླིང་གསར་པ་སྐྲུན་མཁན་ཞིག་གསོ་སྐྱོང་བྱེད་མཁན་ཡིན་པ་ངོས་འཛིན་དགོས་པ་དང་། དེའི་ཕྱིར་དགེ་རྒན་གྱི་བྱ་བ་དོན་དུ་གཉེར་འདོད་ཀྱི་འདུན་པའི་རྦ་རླབས་དྲག་ཏུ་འཕྱུར་བ་ཞིག་དགོས། ༢༽ ཐོག་མར་དགེ་རྒན་རང་ཉིད་ལ་ཤེས་ཡོན་ཚད་དང་ལྡན་པ་ཞིག་དགོས།    དགེ་རྒན་རང་ཉིད་གང་བསླབ་པར་བྱ་བའི་སློབ་ཚན་ལ་མཁས་པ་ཞིག་དང་། དེང་གི་ལམ་ལུགས་དང་མཐུན་པ་དགེ་རྒན་འོས་སྦྱོང་གི་སློབ་མཐར་སོན་པ་ཞིག་དགོས་པ་མ་ཟད་སློབ་འཁྲིད་བྱེད་སྐབས་སློབ་དེབ་གཅིག་པོ་ལ་བསྙེས་བསྡད་པ་མིན་པར། སློབ་དེབ་ལ་ཕར་དབང་བསྒྱུར་བྱེད་ཐུབ་པའི་ཤེས་ཚད་ཡང་དག་ཅིག་དགོས་པར་གལ་འགངས་ཤིན་ཏུ་ཆེ། སློབ་དེབ་ལ་ཕར་དབང་བསྒྱུར་བྱེད་ཐུབ་པ་ཞེས་པའི་དོན་ཡང་སློབ་དེབ་ནང་གསལ་གྱི་ཚིག་དོན་རྣམས་འཁྲུལ་མེད་དུ་འགྲེལ་བརྗོད་ཐུབ་པ་ཞིག་དང་། སློབ་དེབ་དཔར་བསྐྲུན་སྐབས་ཡིག་ནོར་སོགས་ཡོང་སྲིད་པས་དེ་ལྟར་ཡོད་ཚེ་རིག་པའི་གཞུང་ལུགས་དང་མ་འགལ་བར་ཡིག་ནོར་ཡིན་པ་འགྲེལ་བརྗོད་ཐུབ་པ་ཞིག་དགོས། ༣༽ དགེ་རྒན་རང་ཉིད་སློབ་ཕྲུག་རྣམས་ལ་དམིགས་པའི་བརྩེ་བ་དང་ལྷག་བསམ་གྱིས་ཕྱུག་པ་ཞིག་དགོས།    རྒན་ལགས་ལ་སློབ་ཕྲུག་རྣམས་ལ་དམིགས་པའི་བྱམས་བརྩེ་དང་ལྷག་བསམ་གྱི་གོ་ཆ་བཙན་པོ་ཡོད་ན་སློབ་ཕྲུག་རྣམས་ལ་ཐབས་ཤེས་གང་ཡོད་ཀྱིས་སློབ་འཁྲིད་ཡང་དག་བྱེད་པར་ངེས། དཔེར་ན། ཨ་མས་རང་ཉིད་ཀྱི་ཕྲུ་གུར་བྱམས་པ་དང་བརྩེ་བ་ཇི་ཙམ་ཡོད་པ་དེའི་ཚོད་ཀྱིས་ཕྲུ་གུའི་མདུན་ལམ་བཟང་པོ་བསྐྲུན་པའི་ཆེད་དུ་ཐབས་ཤེས་ཡོད་རྒུ་རྩལ་འདོན་བྱེད་པ་བཞིན་ནོ། དེ་འབྲེལ་སློབ་འཁྲིད་བྱེད་སྐབས་སློབ་ཕྲུག་གིས་སློབ་སྦྱོང་མ་བྱས་པ་དང་སློབ་སྦྱོང་མ་ཤེས་པའི་དཀའ་ངལ་སོགས་མི་མཐུན་ཕྱོགས་ཀྱི་དཀའ་ངལ་ཇི་འདྲ་ཞིག་འཕྲད་ཀྱང་དགེ་རྒན་རང་ཉིད་ལ་བྱམས་བརྩེ་དང་ལྷག་བསམ་གྱི་གོ་ཆ་བཙན་པོ་ཡོད་ན། ཡི་ཐང་ཆད་པ་སོགས་མི་མཐུན་པའི་ཕྱོགས་ལས་རྣམ་པར་རྒྱལ་ཏེ་ཤིང་ཞུམ་པ་མེད་པའི་སྙིང་སྟོབས་སྔར་ལྷག་བསྐྱེད་ངེས་པ་ཡིན། དགེ་རྒན་རང་ཉིད་ལ་སློབ་སྦྱོང་ཇི་ཙམ་ཡོད་ཀྱང་སློབ་འཁྲིད་བྱེད་པའི་ལྷག་བསམ་དང་བྱམས་བརྩེ་སོགས་ཀྱི་གྲོགས་དང་ལྡན་པའི་རྒྱུའི་ཀུན་སློང་ཡང་དག་ཅིག་མེད་ན་སློབ་ཕྲུག་རྣམས་ཀྱི་མ་འོངས་མདུན་ལམ་ལ་སྨན་པའི་ཤེས་ཡོན་གྱི་མྱུ་གུ་བཟང་པོ་བསྐྲུན་ཐབས་བྲལ། བྱམས་བརྩེ་དང་ལྷག་བསམ་ལྡན་པའི་རྒྱུའི་ཀུན་སློང་བཟང་པོའི་ཐོག་སློབ་འཁྲིད་བྱས་པ་ཡིན་ན། སློབ་ཕྲུག་ཚོའི་མ་འོངས་མདུན་ལམ་གྱི་མཁའ་དབྱིངས་སུ་གྲུབ་འབྲས་འོད་སྟོང་འབར་བ་འབྱུང་བ་གདོན་མི་ཟ། རྒྱུ་མཚན་ནི་དེང་དུས་ཚན་རིག་པ་རྣམས་ཀྱིས་ཞལ་ལག་བཟོ་མཁན་མ་བྱན་གྱིས་ཀུན་སློང་དང་བསམ་པ་བཟང་པོའི་ཐོག་ཞལ་ལག་བཟོས་པ་ཡིན་ན་ཞལ་ལག་རོ་བཅུད་ལྡན་པ་ཡོང་གི་ཡོད་གསུངས་ཀྱི་ཡོད་པ་བཞིན་ཡིན། དེའི་ཕྱིར་དགེ་རྒན་རང་ཉིད་སློབ་ཕྲུག་ལ་དམིགས་པའི་ལྷག་བསམ་དང་བྱམས་བརྩེ་སོགས་ཀྱི་གྲོགས་དང་ལྡན་པའི་རྒྱུའི་ཀུན་སློང་ཡང་དག་ཅིག་དགོས་པ་གནད་ཀྱི་དོན་པོར་ལགས། ༤༽ དགེ་རྒན་གྱི་ཤེས་ཚད་དང་ཉམས་མྱོང་ཉིན་རེ་བཞིན་ཡར་རྒྱས་གཏོང་དགོས།    དགེ་རྒན་རང་ཉིད་ཀྱིས་སློབ་འཁྲིད་མ་བྱས་པའི་སྔོན་དུ་གྲ་སྒྲིག་འཐུས་སྒོ་ཚང་བ་དགོས་ཤིང་། དེའི་རྗེས་སུ་སློབ་འཁྲིད་བྱས་པའི་ཉམས་མྱོང་གི་བརྒྱུད་རིམ་ལས་སློབ་ཕྲུག་ལ་ཇི་ཙམ་ཕན་ཐོགས་ཡོད་མེད་རྟོག་ཞིབ་ཀྱིས་ཤེས་ཡོན་གྱི་གནས་ཚད་དང་སློབ་ཐབས་ཡར་རྒྱས་གཏོང་དགོས་ཤིང་། དེ་ལྟར་བྱུང་ན་དགེ་རྒན་རང་ཉིད་ཀྱི་ཤེས་ཡོན་དང་ཉམས་མྱོང་། སློབ་འཁྲིད་ཀྱི་རྩལ་ཇེ་རྒྱས་སུ་འགྲོ་བ་དང་། དེ་ལྟར་འགྲོ་བས་སློབ་ཕྲུག་རྣམས་ཀྱི་མ་རིག་པའི་མུན་པ་སེལ་ཞིང་ཤེས་ཡོན་གྱི་འོད་སྣང་ཕྱོགས་བརྒྱར་འཕྲོ་བར་ངེས། ༥༽ རྒན་ལགས་ཀྱིས་སློབ་ཕྲུག་མི་རེ་ངོ་རེའི་གནས་སྟངས་རྒྱུས་ལོན་ཡག་པོ་དགོས་པ།    རྒན་ལགས་ཀྱིས་སློབ་འཁྲིད་གནང་སྐབས་གང་བསླབ་པར་བྱ་བའི་ཡུལ་སློབ་ཕྲུག་གི་ཁམས་དང་མོས་པ། བསམ་སྤྱོད། ཤེས་ཡོན་གྱི་གནས་ཚད་བཅས་ཇི་ཙམ་ཡོད་མེད་མཁྱེན་རྟོགས་དགོས་པ་ཤིན་ཏུ་གལ་ཆེ་བ་སྟེ། ཁམས་དང་མོས་པ་བསམ་སྤྱོད། ཤེས་ཡོན་གྱི་གནས་ཚད་བཅས་མཁྱེན་རྟོགས་ཡག་པོ་བྱུང་ན་དེ་ལ་དཔགས་པའི་སློབ་གསོ་དང་ཤེས་ཡོན་སློབ་འཁྲིད་ཀྱི་འཇུག་པ་སྤུས་ཚད་ལྡན་པར་འགྱུར་ངེས་ཡིན། གཞན་ཡང་སློབ་ཕྲུག་རྣམས་ཀྱི་རྒྱབ་ལྗོངས་ཏེ་ཕ་མ་དང་ནང་མིའི་གནས་སྟངས་མཁྱེན་རྟོགས་དགོས་པ་གལ་འགངས་ཆེ་བ་སྟེ། ཕ་མ་ཁ་བྲལ་དང་ནང་མིའི་གནས་སྟངས་ཞན་པ་སོགས་ཀྱི་དཀའ་ངལ་གྱི་རྐྱེན་པས་སློབ་ཕྲུག་གི་གཤིས་སྤྱོད་སོགས་ལ་ཤུགས་རྐྱེན་ཆེན་པོ་ཐེབས་སྲིད་པ་ཡིན། […]

ཚེ་རིང་བཀྲ་ཤིས། བོད་དགེ།གོ་པལ་པུར་བོད་ཁྱིམ་སློབ་གྲྭ།    ༄༅། །བོད་མི་གཞིས་བྱེས་གཉིས་ཀྱི་བླ་ན་མེད་པའི་དབུ་ཁྲིད་མེ་ཏོག་གང་ལ་ཕོག་པའི་ལྷ་སྐལ་༸རྒྱལ་བ་སྐུ་ཕྲེང་རིམ་བྱོན་སྤྱི་དང། ཡང་སྒོས་འཛམ་གླིང་ཞི་བདེའི་དེད་དཔོན་ཆེན་པོ། འགྲོ་བ་ཡོངས་ཀྱི་བླང་དོར་ལམ་སྟོན་པ། གངས་ལྗོངས་མང་གཙོའི་སྲོལ་འབྱེད། རང་ཅག་གངས་ཅན་པ་རྣམས་ཀྱི་འདི་ཕྱིའི་སྐྱབས་གནས་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག དོན་གྱི་སླད་དུ་མཚན་ཡོངས་སུ་སྨྲོས་ན་༸རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་དགུང་གྲངས་དགུ་བཅུ་བཞེས་པའི་༸སྐུའི་གོ་སྟོན་གྱི་འཁྲུངས་སྐར་ལ་གཞིས་བྱེས་བོད་མི་ཡོངས་ཀྱིས་ཚབ་ཞུས་ཏེ་སེམས་ཀྱི་ཀློང་ནས་བཀྲ་ཤིས་བདེ་ལེགས་དང་འཚམས་འདྲི་ཞུ་རྒྱུ་ཡིན། རང་ཅག་བོད་མི་རྣམས་ལ་༸རྒྱལ་བའི་བཀའ་དྲིན་ནི་ནམ་མཁའ་ལས་རྒྱ་ཆེ་ཞིང། རྒྱ་མཚོ་ལས་གཏིང་དཔག་དཀའ་བ་ཞིག་ཡིན་པས་ང་ཚོས་༸རྒྱལ་བའི་བཀའ་དྲིན་གྱི་ཆ་ཤས་ཕྲ་མོ་ཙམ་ཡང་གཞལ་ག་ལ་ནུས། འོན་ཀྱང་ངོ་ཚ་དང་ཁྲེལ་གྱི་གོས་དང་བྲལ་བའི་བོད་མི་རེ་ཟུང་གིས་༸རྒྱལ་བའི་བཀའ་དྲིན་མ་ཚོར་བར་ཤེས་རྒྱུད་གདོན་འདྲེས་བརླམས་ནས་མཚན་སྨད་ཞུ་མཁན་དག་ལ་མཐའ་གཅིག་ཏུ་ངོ་རྒོལ་དང་། གདོང་ལེན་བྱེད་རྒྱུའི་ཆོད་སེམས་བརྟན་པོ་ཡོད་ཞུ་རྒྱུ་ཡིན། ༸རྒྱལ་བའི་བཀའ་དྲིན་རྗེས་སུ་དྲན་པ་དང་། ཡི་རང་བསྔགས་བརྗོད་ཀྱི་སྒོ་ནས་གཙོ་བོ་རང་ཉིད་ཀྱིས་བསོད་ནམས་གསོག་པའི་སླད། ༸གོང་ས་མཆོག་གི་དགོངས་པའི་དགེ་རྒན་ལ་ཚང་དགོས་པའི་ཁྱད་ཆོས་ཞེས་པའི་བརྗོད་གཞིའི་ཐོག་རང་ཉིད་ལ་རྣམ་དཔྱོད་ཀྱི་བློ་རྩལ་ཅུང་ཟད་ལས་མེད་ཀྱང་། མེ་ཏོག་ཆུང་ཡང་མཆོད་པའིི་རྫས་ཞེས་པ་ལྟར་གང་ཡོད་བཏོན་ནས་རྒྱ་མཚོ་ལས་ཆུ་ཐིགས་ཙམ་ཞིག་དོན་ཚན་དྲུག་གི་ཐོག་བྲི་བར་བྱ། དགེ་རྒན་གྱི་གལ་གནད།    ཤེས་ཡོན་སྲིད་བྱུས་ལས། “མི་རིགས་དང་སྤྱི་ཚོགས་ཀྱི་འབྱུང་འགྱུར་གནས་བབས་ཤེས་ཡོན་ལ་རག་ལུས་ཤིང་། ཤེས་ཡོན་བཟང་ཞན་དགེ་རྒན་ལ་རག་ལུས་པས། དགེ་རྒན་ནི་སྤྱི་ཚོགས་ནང་གལ་གནད་ཆེ་ཤོས་ཡིན་སྟབས། མི་གཤིས་དང་སྤྱོད་ལམ་ལེགས་ཤོས། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་བྱ་རྒྱུ་དང་། དགེ་རྒན་གྱི་ཆེ་མཐོང་དང་མཐུན་རྐྱེན་བཟང་པོ་ཡོང་ཐབས་སུ་ཁྲིམས་ལུགས་ཀྱི་ཆ་རྐྱེན་བསྐྲུན་དགོས།” ཞེས་འཁོད་ཡོད་ཀྱང་། དེ་སྔ་ཡང་དེ་འདྲའི་མཐུན་རྐྱེན་བསྐྲུན་ཐུབ་མེད་ལ། ཤེས་ཡོན་སྲིད་བྱུས་གཏན་ལ་ཕབ་པའི་རྗེས་སུའང་དེ་ལྟར་ཕྱག་བསྟར་གནང་ཐུབ་མེད་སྟབས། ང་ཚོས་༸རྒྱལ་བའི་དགོངས་པ་དང་མཐུན་པའི་འདབ་གཤོག་གཉིས་ལྡན་གྱི་སློབ་ཕྲུག་མང་པོ་གསོ་སྐྱོང་གནང་ཐུབ་མེད། དངོས་གནས་བྱས་ན་ད་བར་མོ་ལོ་ ༦༥ རིང་གི་དུས་ཡུན་དང་། བོད་མི་རིགས་ཆགས་འཇིག་གི་ཛ་དྲག་གནས་སྟངས་ལ་གཞིགས་ན་ཤེས་ཡོན་ཐོག་གྲུབ་འབྲས་རླབས་ཆེན་གཟེངས་སུ་ཐོན་པ་ཞིག་དགོས་ཀྱང་། དེ་འདྲ་ཞིག་ཐོན་ཐུབ་མེད་པ་ཐག་གིས་ཆོད། རྒྱུ་མ་བསྒྲུབས་པར་འབྲས་བུ་ཡོང་ཐབས་མེད་པ་ཆོས་ཉིད་ཡིན་པས་བྱེད་ཐབས་མེད་སྙམ། ༡༽ ༸གོང་ས་མཆོོག་གི་དགོངས་པའི་དགེ་རྒན་གྱི་ཁྱད་ཆོས་གལ་འགངས་ཆེ་ཤོས་ཤིག་ནི། དགེ་རྒན་རང་བཞིན་བཟང་ལ་བཟོད་བསྲན་ཆེ་བ་ཞིག་དགོས།    མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཞེས་གསུངས་པ་ལྟར་༸རྒྱལ་བ་རིན་པོ་ཆེའི་དགོངས་པར་ཡང་དེ་ཉིད་གལ་ཆེའི་ནང་གི་དོན་ཆེན་ཞིག་ཏུ་དགོངས་བཞེས་གནང་མོད།  དགེ་རྒན་རྣམས་ལོ་ལྟར་སློབ་ཕྲུག་བརྒྱ་ཕྲག་ལ་སློབ་འཁྲིད་དང་ལམ་སྟོན་གནང་མཁན་ཞིག་ཡིན་པས། རང་བཞིན་བཟང་ལ་བཞིན་རས་འཛུམ་བག་དང་ལྡན་ལ། ངག་འཇམ་པ། སློབ་ཕྲུག་ཡོངས་ལ་ཉེ་རིང་དང་བྲལ་ཞིང་སྤྱི་སྙོམས་སུ་བལྟ་བ། ནང་གི་ཀུན་སློང་དང་ཕྱིའི་ལུས་ངག་གི་རྣམ་འགྱུར་བཟང་ཞིིང་། ཐ་ན་མིག་གིས་ལྟ་སྟངས་ཡན་ནས་སློབ་ཕྲུག་ཀུན་ལ་གཅིག་མཚུངས་སུ་ལྟ་བའི་མཛའ་བརྩེའི་བསམ་པ་ལྡན་པ།  དགེ་རྒན་གྱིས་བསླབ་གཞི་གང་ཡིན་ཡང་དེ་དག་བསླབས་པ་ཙམ་མིན་པར། གཙོ་བོ་དགེ་རྒན་རང་ཉིད་ཀྱི་སྒོ་གསུམ་གྱི་ཀུན་སྤྱོད་བཟང་ལ་བཟོད་བསྲན་ཆེ་བ་ཞིག་ངེས་པར་དགོས། སློབ་ཕྲུག་སྤྱི་དང་། ལས་རོགས་དགེ་རྒན་དང་ལས་བྱེད། འཛིན་སྐྱོང་བཅས་སྤྱི་ཡོངས་ལ་ཞལ་ནས་གསུངས་པ་ལྟར་མིག་དཔེ་བཟང་པོ་སྟོན་ཐུབ་པ། སློབ་ཕྲུག་རྣམས་ཀྱིས་དགེ་རྒན་དེ་མཇལ་བ་དང་དགའ་སྣང་དང་སྤྲོ་སྣང་འདྲེན་ཐུབ་ཅིང། སློབ་ཕྲུག་ཉམ་ཐག་དག་ལ་བར་གསེང་སྐབས་རྔན་པ་བཟའ་རྒྱུ་མེད་པ་དང་། འཛིན་གྲྭའི་ནང་དུ་སྨྱུ་གུ་དང་སྣག་ཚའང་མེད་པ་དག་ལ་དུས་ནས་དུས་སུ་གང་ཐུབ་ཅི་ཐུབ་ཀྱིས་རོགས་ཕན་བྱེད་མཁན་ཞིག་བྱུང་ན་དེ་ལས་ལྷག་པའི་དགེ་རྒན་ཅི་ཞིག་དགོས། […]

མིག་དམར། གཞི་གོང་བོད་དགེ།ཧར་པ་པུར་སཾ་བྷོ་ཊ་ཉིན་སློབ།    དགེ་རྒན་ནི་ཤེས་ཡོན་གྱི་སྒོ་མོ་འབྱེད་མཁན་གྱི་ལྡེ་མིག་དང་། འཇིག་རྟེན་མུན་པ་སེལ་བའི་སྒྲོན་མེ། མི་ཚེ་ཡི་ལམ་སྟོན་པ་ཞིག་སྟེ། མི་རིགས་དང་སྤྱི་ཚོགས་ཀྱི་ཆབ་དཔལ་རིག་གསུམ་ཁ་ཕྱོགས་གང་དུ་བསྐྱོད་མིན་དགེ་རྒན་གྱི་ལས་གནས་ལ་རག་ལས་ཡོད། སྤྱིར་འཇིག་རྟེན་གྱི་གོ་ལ་ཁྱོན་ལ་དགེ་རྒན་གྱི་ལས་གནས་ཐོག་གདེང་འཇོག་ཚད་ལྡན་བྱེད་བཞིན་ཡོད་ལ། ངོས་འཛིན་ཀྱང་བྱེད་བཞིན་ཡོད། ང་ཚོ་བོད་མི་རིགས་འདི་ཆབ་སྲིད་ཀྱི་ཤེས་བྱས་ཕོངས་ཏེ་བཙན་བྱོལ་གྱི་མི་རིགས་ཤིག་ཆགས་པ་ནས་བཟུང་། ངོ་ཤེས་པ་གནམ་དང་ས་ལས་མེད་པའི་དུས་མཚམས་འདིར། བདག་ཅག་གི་བླ་ན་མེད་པའི་དབུ་ཁྲིད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་འཐུས་ཤོར་གྱི་ལོ་རྒྱུས་ལ་གཟིགས་ཞིབ་དང་། མ་འོངས་ཕུགས་རྒྱང་ལ་དགོངས་ཏེ་མི་ཡུལ་གྱི་ས་ཐོག་ཏུ་ཕེབས་མཚམས་ཤེས་ཡོན་གྱི་སྡེ་ཁག་གསར་བཙུགས་གནང་ཞིང་། ཤེས་ལྡན་པ་གསོ་སྐྱོང་གནང་སྟེ་ང་ཚོའི་མི་རིགས་འདིའི་མ་འོངས་པའི་འཐབ་རྩོད་ཤེས་བྱ་ཡོན་ཏན་ལ་རག་ལས་ཡོད་པའི་བཀའ་སློབ་ལམ་སྟོན་དུས་ནས་དུས་སུ་གནང་ཡོད། ཤེས་ཡོན་གྱི་སྤུས་ཚད་དང་། ཤེས་ལྡན་པའི་གནས་ཚད། འཐབ་རྩོད་ཀྱི་ངར་ཤུགས། མི་རིགས་ཀྱི་འཆི་གསོན་ནི་གཙོ་བོ་ཆུ་འགོ་གངས་ལ་ཐུག་ཅེས་པ་བཞིན་དགེ་རྒན་གྱི་ཤེས་ཚད་དང་སྤུས་ཚད་ལ་རག་ལས་ཡོད་པས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྔ་ཕྱི་བར་གསུམ་དུ་ཐུགས་བརྩེ་བ་ཆེན་པོས་དགེ་རྒན་གང་འདྲ་ཞིག་དགོས་མིན་ཐད་ཐུགས་ཁུར་ཆེ་ཤོས་ཀྱིས་བཀའ་སློབ་ལམ་སྟོན་གནང་ཡོད། དེས་ན་ང་ཚོས་རྟོག་བཟོ་དང་འུར་བརྗོད་བྱས་པ་མ་ཡིན་པར། ༸གོང་ས་མཆོག་གི་ལམ་སྟོན་བཀའ་སློབ་གཞི་རྩར་བྱས་ཏེ་༸གོང་ས་མཆོག་གི་དགོངས་པའི་དགེ་རྒན་ལ་ཚང་དགོས་པའི་ཁྱད་ཆོས་གང་དག་དགོས་མིན་ཐད་རང་ཉིད་ཀྱི་བསམ་ཚུལ་འགའ་ཞིག་མཉམ་སྤྱོད་ཞུ་རྒྱུ་ཡིན། ༡། རང་མི་རིགས་ཀྱི་ཐུན་མིན་རིག་གཞུང་ལ་དགའ་ཞེན་ཅན་གྱི་དགེ་རྒན།    ལོ་ངོ་སྟོང་ཕྲག་གི་ལོ་རྒྱུས་ལྡན་ཞིང་འཛམ་བུའི་གླིང་འདིའི་སྒང་ལ་གནའ་རབས་ཀྱི་སྐད་ཡིག་རྙིང་ཤོས་བཅུ་ཡི་གྲངས་སུ་ཚུད་པའི་བོད་ཀྱི་ཡི་གེ་འདི་ནི་རང་མི་རིགས་ཀྱི་སྲོག་རྩ་དང་། སྐད་ཡིག་འདི་སྲོག་རྩར་བྱས་པའི་བོད་ཀྱི་ཐུན་མོང་མིན་པའི་རིག་གཞུང་འདི་ནི། བོད་མི་རིགས་ཀྱི་ངོ་བོ་དང་། ཁྱད་ཆོས། གོམས་གཤིས་སོགས་མཚོན་པར་བྱེད་ཀྱི་ཡོད། དེས་ན། རང་རེ་བོད་མི་རིགས་ཀྱི་དགེ་རྒན་ཞིག་ཡིན་ན་དེ་འདྲའི་རིག་གཞུང་ལ་དགའ་ཞེན་དང་། དོ་སྣང་ཡོད་མཁན་ཞིག་ངེས་པར་དུ་དགོས། ༸གོང་ས་མཆོག་ནས། “ང་ཚོས་བདེན་དོན་རྩོད་ཡས་རྒྱུ་མཚན་གཙོ་བོ་དེ་ང་ཚོ་སོ་སོར་བོད་མི་རིགས་ཀྱི་རྣམ་པ་ཐོན་པའི་སྐད་དང་ཡི་གེས་ཤན་བྱས་པའི་རིག་གཞུང་ཐུན་མོང་མ་ཡིན་པ་དེ་སྲུང་སྐྱོབ་བྱེད་དགོས་ཀྱི་ཡོད།“[༡] ཅེས་དགེ་རྒན་འོས་སྦྱོང་བྱེད་མཁན་རྣམས་ལ་བཀའ་སློབ་གནང་པ་བཞིན།  རང་མི་རིགས་ཀྱི་ཐུན་མོང་མིན་པའི་རིག་གཞུང་ལ་དགའ་ཞེན་དང་། དོ་སྣང་གནང་མཁན་གྱི་དགེ་རྒན་དེ་འདྲ་ཞིག་བྱུང་ན། མི་རབས་གསར་པའི་སློབ་ཕྲུག་རྣམས་ཀྱང་རང་མི་རིགས་ཀྱི་རིག་གཞུང་ལ་དགའ་ཞེན་བྱེད་མཁན་དང་། བག་ཆགས་ཡོད་མཁན་གྱི་གཞོན་སྐྱེས་ཤིག་ཏུ་གསོ་སྐྱོང་གནང་ཐུབ། དེ་ནི་༸གོང་ས་མཆོག་གི་ཐུགས་ཀྱི་དགོངས་པ་ཡིན་སྟབས། གཞོན་སྐྱེས་གསོ་སྐྱོང་གནང་མཁན་གྱི་དགེ་རྒན་ཡང་དེ་འདྲ་ཞིག་དགོས། ༢། རང་དབང་འཐབ་རྩོད་སེམས་ལ་བཅངས་པའི་དགེ་རྒན།    ང་ཚོའི་མི་རིགས་འདི་ནི་ཆབ་སྲིད་ཀྱིས་ཕོངས་ཤིང་རང་དབང་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པས། ཤེས་བྱ་ཡོན་ཏན་གྱི་ལམ་ནས་རང་མི་རིགས་ཀྱི་དྲང་བདེན་གྱི་ལོ་རྒྱུས་རྣམས་གསལ་སྟོན་བྱས་ཏེ་རང་དབང་འཐབ་རྩོད་ཀྱི་འགུལ་ཤུགས་མི་རབས་ནས་མི་རབས་རྒྱུན་གནས་ཐུབ་པ་བྱེད་དགོས། དེ་ལྟར་རང་དབང་འཐབ་རྩོད་རྒྱུན་གནས་ཐུབ་པ་བྱེད་དགོས་ན་མི་རབས་གཞོན་པ་རྣམས་ཤེས་ཡོན་གྱི་ལམ་བུར་སྣེ་འཁྲིད་བྱེད་མཁན་གྱི་དགེ་རྒན་རྣམས་ང་ཚོའི་མི་རིགས་འདི་རང་དབང་འཐབ་རྩོད་བྱེད་མཁན་གྱི་མི་རིགས་ཤིག་ཡིན་བསམ་པའི་ཚོར་སྣང་ཡོད་པའི་དགེ་རྒན་ཞིག་ངེས་པར་དུ་དགོས། མི་རབས་གཞོན་པའམ་སློབ་ཕྲུག་རྣམས་རང་མི་རིགས་ཀྱི་རང་དབང་འཐབ་རྩོད་ཆེད་དུ་སློབ་སྦྱོང་བྱེད་དགོས་པའི་སྐུལ་ལྕག་གཏོང་ཐུབ་མཁན་གྱི་དགེ་རྒན་ཞིག་ཀྱང་དགོས། ༸གོང་ས་མཆོག་ནས། “ང་ཚོ་ཆབ་སྲིད་ཀྱི་བཙན་བྱོལ་པ་ཆགས་བསྡད་ཡོད། ང་ཚོ་འགྱེལ་ས་ནས་ཡར་ལངས་ཡས་ཀྱི་ཐོབ་ཐང་དེ་ང་ཚོ་ལ་ཡོད་པ་རེད། དེ་འགྲུབ་པ་ལ་ང་ཚོས་འཁྲུག་པ་བརྒྱབ་ནས་རང་དབང་རྩོད་ལེན་བྱེད་ཀྱི་ཡིན་ཟེར་གི་ཡོད་མ་རེད། ང་ཚོ་གོ་མཚོན་གྱི་རང་དབང་རྩོད་ལེན་བྱེེད་ཀྱི་ཡིན་ཟེར་གྱི་ཡོད་མ་རེད། བདེན་པ་དང་འཚེ་མེད་ཞི་པའི་ལམ་ནས་བདེན་དོན་རྩོད་ཀྱི་ཡིན་ཟེར་གྱི་ཡོད། ལྷག་པར་དུ་ཡང་ཤེས་བྱ་ཡོན་ཏན་གྱི་ལམ་ནས་བདེན་པ་མཐའ་སྐྱེལ་དགོས་ཀྱི་ཡོད།”[༢] ཅེས་བཀའ་སློབ་གནང་བ་བཞིན། ང་ཚོ་བཙན་བྱོལ་ནང་ཤེས་ཡོན་གྱི་སྡེ་ཁག་བཙུགས་ཤིང་ཤེས་བྱ་ཡོན་ཏན་སྦྱོང་དགོས་དོན་ཡང་རང་མི་རིགས་ཀྱི་རིག་གཞུང་སྲུང་སྐྱོབ་དང་། […]

ཐག་གཅོད་ཚེ་རིང་། གཞི་གོང་བོད་དགེ།སིམ་ལ་སཾ་བྷོ་ཊ་གཏན་ཉིན་སློབ་གྲྭ། སྟོན་པའི་བསྟན་པ་ཉིན་མོར་བྱེད་པའི་གཉེན།།མགོན་པོ་ཐུགས་རྗེ་ཅན་གྱི་སྐུ་ཚེ་བརྟན།།བོད་འབངས་ཡོངས་ཀྱི་རེ་སྨོན་འགྲུབ་པའི་ཕྱིར།།གོ་སྟོན་རྟེན་འབྲེལ་དགའ་སྟོན་དབྱངས་སུ་ལེན།།    ཞེས་ཤིས་བརྗོད་སྔོན་དུ་ཕུལ་བའི་སྒོ་ནས་༸གོང་ས་མཆོག་གི་དགོངས་པ་ལྟར་ན། དགེ་རྒན་བཟང་པོ་ཞིག་ནི་སློབ་ཕྲུག་ཚོར་ཤེས་ཡོན་སྤྲོད་པ་ཙམ་མ་ཡིན་པར་བྱམས་བརྩེ་དང་བཟོད་བསྲན་གྱི་སྒོ་ནས།ནང་སེམས་ཀྱི་གཤིས་རྒྱུད་བཟང་པོ་སློབ་སྟོན་དང་ཡ་རབས་མིག་དཔེ་སྟོན་མཁན་ཞིག་ཡིན་དགོས། དེ་བཞིན་ཤེས་ཡོན་བྱེད་སྒོ་ནི། འཛམ་གླིང་ཕྱི་ནང་གི་ཤེས་ཡོན་གཉིས་ཀ་སློབ་ཕྲུག་གི་གནས་ཚད་དང་འཚམས་པར་སློབ་སྟོན་བྱེད་ཐུབ་མཁན་ཞིག་ཡིན་དགོས། གཙོ་བོ་ནི་དགེ་རྒན་གྱིས་སློབ་ཕྲུག་ཚོར་རྒྱུན་དུ་གཞན་ཕན་གྱི་སེམས་བསྐྱེད་དགོས་པ་སློབ་སྟོན་བྱེད་པ་དང་སྤྱི་ཚོགས་ལ་ཞབས་ཞུ་བྱེད་སེམས་འཕེལ་བར་བྱེད་རྒྱུ་དེ་ཡིན་དགོས་པའི་ཁྱད་ཆོས་ཁག་གཤམ་གསལ་ལྟར། ༡ ༽ བྱམས་བརྩེའི་བསམ་པ་དང་ལྡན་པ།    ཞིབ་འགྲེལ། བྱམས་བརྩེ་དང་སྙིང་རྗེ་ནི། དགེ་རྒན་གྱི་རྩ་བའི་ཡོན་ཏན་ཡིན། ༸གོང་ས་མཆོག་གིས་བྱམས་བརྩེ་གཞི་རྩར་བཟུང་བའི་ཤེས་ཡོན་ལམ་ལུགས་ཤིག་གལ་ཆེར་བརྩིས་གནང་མཛད། དགེ་རྒན་གྱིས་སློབ་ཕྲུག་སོ་སོའི་དཀའ་ངལ་ལ་སེམས་ཐག་ཉེ་པོས་ཤེས་རྟོགས་གནང་སྟེ། ཕྲུ་གུ་སོ་སོའི་དགོས་མཁོ་དང་བསྟུན་པའི་སློབ་སྟོན་གནང་དགོས། དཔེ་མཚོན། ཀ) སློབ་ཕྲུག་ཅིག་ཤེས་ཡོན་སློབ་སྦྱོང་ལ་དཀའ་ངལ་འཕྲད་སྐབས་སྐྱོན་བརྗོད་མི་བྱེད་པར་གདེང་སྤོབས་སྐྱེད་སྟངས་ལ་རོགས་རམ་བྱེད་པ། ཁ) ནང་གི་དཀའ་ངལ་ཡོད་པའི་སློབ་ཕྲུག་ལ་དམིགས་བསལ་དུས་ཚོད་བཏང་སྟེ་རོགས་རམ་བྱེད་པ། ག) སློབ་ཕྲུག་ཅིག་ལ་ནད་གཞི་ཕོག་པའམ་དཀའ་ངལ་འཕྲད་ཚེ་ཁོང་ཚོའི་གནས་སྟངས་ལ་སེམས་འཁུར་བྱེད་པ་དང་གཞན་ལའང་སེམས་ཁུར་བྱེད་རྒྱུར་སྐུལ་མ་གཏོང་བ། ༢ ༽ བཟོད་བསྲན་དང་སེམས་ཀྱི་སྟོབས་ཤུགས།    ཞིབ་འགྲེལ། བཟོད་བསྲན་ནི་སློབ་ཕྲུག་སོ་སོའི་སློབ་སྦྱོང་བྱེད་སྟངས་དང་ཤེས་ཡོན་ལེན་པའི་ནུས་པ་མི་འདྲ་བ་ཡོད་པ་ངོས་འཛིན་གྱིས་དེ་དང་བསྟུན་པའི་སློབ་ཁྲིད་བྱེད་པའི་ཡོན་ཏན་ཡིན། ༸གོང་ས་མཆོག་གིས་དགེ་རྒན་ཚོས་སློབ་ཕྲུག་སོ་སོར་དགོས་ངེས་ཀྱི་དུས་ཚོད་སྤྲོད་དགོས་པ་དང་སེམས་ཁྲལ་དང་འཚབ་འཚུབ་མེད་པར་བཟོད་བསྲན་གྱིས་སློབ་སྟོན་གནང་དགོས་པར་གསུངས། དཔེ་མཚོན། ཀ) སློབ་ཕྲུག་གིས་གནད་དོན་ཞིག་ཐེངས་མང་དྲིས་ཀྱང་སེམས་ཁྲལ་དང་ཁོང་ཁྲོ་མེད་པར་སྐྱར་ཟློས་ཀྱིས་འགྲེལ་བཤད་རྒྱག་པ། ཁ) སློབ་ཕྲུག་རྣམས་ཀྱི་སྦྱངས་འབྲས་མི་འདྲ་བ་མཐོང་ཡང་སོ་སོའི་སློབ་སྦྱོང་ཡར་རྒྱས་ལ་དམིགས་པའི་སེམས་ཤུགས་མ་ཆག་པ། ག) སློབ་ཕྲུག་གི་སྤྱོད་པ་ལ་དཀའ་ངལ་འཕྲད་ཚེ་ཁོང་ཁྲོ་བྱེད་རྒྱུའི་ཚབ་ཏུ་དེའི་རྒྱུ་རྐྱེན་འཚོལ་བ་དང་རོགས་རམ་བྱེད་པ། ༣ ༽ ཤེས་ཡོན་དང་ཆེད་མཁས།    ཞིབ་འགྲེལ། དགེ་རྒན་གྱིས་རང་གི་སློབ་ཚན་དང་སྦྱོང་བརྡར་བྱེད་སྒོའི་སྐོར་ཆེད་མཁས་ཤེས་ཡོན་ཡོད་པ་དགོས། ༸གོང་ས་མཆོག་གིས་ཤེས་ཡོན་མེད་ན་གཞན་ལ་ཤེས་ཡོན་སྤྲོད་མི་ཐུབ་པས་ཤེས་ཡོན་ནི་དགེ་རྒན་གྱི་སྙིང་པོ་ཡིན་པར་གསུངས། དེ་བཞིན་དགེ་རྒན་གྱིས་རང་གི་སློབ་ཚན་དང་འབྲེལ་བའི་རྒྱལ་སྤྱིའི་ཡར་རྒྱས་སྐོར་རྒྱུས་མངའ་དང་འབྲེལ་བ་ཡོད་དགོས། དཔེ་མཚོན། ཀ) སློབ་ཚན་འཁྲིད་སྐབས་གཞི་རྩའི་རྣམ་གཞག་ལ་གསལ་བཤད་ཟབ་མོ་བྱེད་ཐུབ་པ། ཁ) སློབ་ཕྲུག་གི་དྲི་བ་རྣམས་ལ་གསལ་བཤད་ཆ་ཚང་བྱེད་ཐུབ་པ། ག) རང་གི་སློབ་ཚན་དང་འབྲེལ་བའི་དུས་རབས་དང་མཐུན་པའི་ཤེས་ཡོན་རྒྱུན་དུ་ཐོབ་ཐབས་དང་སློབ་ཕྲུག་ལ་སྤྲོད་ཐབས་བྱེད་པ། ༤ ༽ ཕྱི་དེང་རབས་དང་ནང་གནའ་བོའི་ནང་ཆོས་ཤེས་ཡོན་ཟུང་འབྲེལ།    ཞིབ་འགྲེལ། ༸གོང་ས་མཆོག་གི་དགོངས་པ་ལྟར་ན། སློབ་ཕྲུག་ཚོར་དེང་རབས་ཀྱི་ཤེས་ཡོན་དང་བོད་ཀྱི་ནང་ཆོས་ཀྱི་ལྟ་གྲུབ་གཉིས་ཀ་ཟུང་འབྲེལ་གྱིས་སློབ་སྟོན་བྱེད་དགོས། དགེ་རྒན་གྱིས་ཚན་རིག་གི་ཤེས་ཡོན་དང་ནང་པའི་སེམས་ཁམས་རིག་པ་གཉིས་ཀ་ཤེས་པའི་སྒོ་ནས་སློབ་ཕྲུག་གི་སེམས་རྒྱུད་ལ་བཟང་པོའི་སྐུལ་མ་ཐེབས་ངེས་ཀྱི་སློབ་ཁྲིད་བྱེད་ཐུབ་དགོས། དཔེ་མཚོན། […]

ཚེ་རིང་ལྷ་འཛོམས། གཞི་འོག་བོད་དགེ།བདེ་སླར་སཾ་བྷོ་ཊ་སི་ཝི་པི་ཉིན་སློབ།    མི་རིགས་ཤིག་ཤེས་སྤྱོད་དང་རིག་གནས་ལྡན་དགོས་ན་དགེ་རྒན་ནི་གལ་ཆེ་ཞིག་ཡིན། ང་ཚོའི་སྤྱི་ཚོགས་ནང་དགེ་རྒན་གྱི་ལས་གནས་ལ་བཞུགས་མཁན་ཧ་ཅང་མང་པོ་ཡོད། དེ་ཡང་རང་ཉིད་ལ་ཆ་མཚོན་ན་ཆུང་བྱིས་པའི་དུས་ནས་དགེ་རྒན་གྱི་ལས་གནས་ལ་དོ་དབྱིངས་ཡོད་པ་ཞིག་ཡིན། དམིགས་བསལ་དེང་སང་གི་དུས་ལ་དགེ་རྒན་ནི་ལས་སླ་པོ་ཞིག་རྩ་བ་ནས་མིན། གང་ལ་ཞུ་ན་དུས་རྣམས་འགྱུར་བ་བཞིན་མིའི་རང་བཞིན་འགྱུར་ཡོད་པས་སྔར་དང་མི་འདྲ་བ་སློབ་མའི་སྤྱོད་ལམ་ལ་འགྱུར་ལྡོག་ཆེན་པོ་ཕྱིན་ཡོད། དེ་ཙམ་དུ་མ་ཟད། སྤྱི་ཚོགས་ཁྲ་ཟིང་དེའི་ཁྲོད་དུ་མི་མང་པོ་ཞིག་དགེ་རྒན་གྱི་ལས་གནས་ལས་ལྷག་པའི་ཕྱི་རྒྱལ་ལ་འགྲོ་མཁན་ལ་དམིགས་ནས་དགེ་རྒན་ལ་བཞུགས་མཁན་དཀོན་པོ་ཡིན། གང་ལྟར་དགེ་རྒན་གྱི་ལས་གནས་ལ་བཞུགས་པ་ཡིན་ན་མི་ཚེ་གང་པོ་བྱེད་དགོས་བསམ་མཁན་ཡང་ཉུང་ཉུང་ཡིན། ཡིན་ན་ཡང་ང་རང་ལ་ཆ་མཚོན་ན་དགེ་རྒན་གྱི་ལས་གནས་འདི་རྩ་ཆེན་པོ་ཞིག་དང་གལ་ཆེན་པོ་ཞིག་ཏུ་མཐོང་གིན་ཡོད། དགེ་རྒན་གྱི་ལས་ཀ་བཟང་པོ་ཞིག་ཡིན་པ་དང་དགེ་རྒན་ལ་ཆ་རྐྱེན་མང་པོ་ཞིག་ཚང་དགོས་པ་གནའ་དེང་གཉིས་ཀྱི་ཤེས་ཡོན་ལམ་སྟོན་ནང་ཁ་གསལ་བཀོད་ཡོད། དེའི་ནང་ནས་གཙོ་བོ་ང་ཚོའི་ལྟ་བའི་མིག་དང་ཁོག་པའི་སྙིང་ལྟ་བུ་རྒྱལ་བ་རིན་པོ་ཆེ་མཆོག་གི་དགོངས་པ་བཞིན་དགེ་རྒན་ལ་ཚང་དགོས་པའི་ཆ་རྐྱེན་གལ་ཆེ་ཤོས་ཤིག་ནི། སློབ་མ་ག་འདྲ་ཞིག་ཡིན་རུང་སྙིང་རྗེ་དང་བརྩེ་བའི་སྒོ་ནས་སློབ་ཁྲིད་གནང་དགོས་པ་དང་སློབ་མ་བཟང་པོ་ཞིག་བསྐྱང་དགོས་པར་བཀའ་སློབ་མང་པོ་སྩལ་གནང་ཡོད། ༡ ༽ སློབ་མ་བཟང་པོ་ཞིག་སྐྱོང་དགོས་པ།    དེ་ཡང་འགྲོ་བ་མི་ཞིག་དང་སེམས་ལྡན་ཡིན་པའི་ཆ་ནས་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་ཡིན་པས། རྒྱལ་བ་རིན་པོ་ཆེས་དུས་རྟག་ཏུ་དགེ་རྒན་རྣམས་ཀྱིས་རང་ཉིད་སློབ་མ་རྣམས་ལ་བྱམས་བརྩེ་དང་སེམས་ཚོར་ཡོད་པའི་ཐོག་ནས་སློབ་ཁྲིད་དང་སློབ་མ་བཟང་པོ་ཞིག་སྐྱོང་དགོས་པ་བཀའ་སློབ་ཕེབས་ཡོད། དེ་བཞིན་ངས་སློབ་མ་རྣམས་ལ་བྱམས་བརྩེའི་ངང་ནས་སློབ་ཁྲིད་དང་རྒྱབ་ལྗོངས་ཀྱི་དཀའ་ངལ་མང་དག་ཞིག་ལ་དཔྱད་པའི་ཐོག་ནས་སློབ་མ་ཡག་པོ་ཞིག་ཡོང་ཐབས་འབད་བརྩོན་བྱེད་བཞིན་ཡོད། སྤྱིར་སློབ་གྲྭའི་ནང་སློབ་ཕྲུག་གི་རྒྱབ་ལྗོངས་མི་འདྲ་བ་དང་ཁྱིམ་ཚང་གི་གནས་སྟངས་མི་འདྲ་བ་ཤ་སྟག་ཡིན་པས་ཚང་མ་ལ་སྤྱི་སྙོམས་ལྟ་ཚུལ་དང་སློབ་ཁྲིད་གཙོས་པའི་ཤེས་ཡོན་ག་འདྲ་ཞིག་ཡིན་རུང་གང་ཐུབ་གཅིག་མཚུངས་ཡོང་བའི་འབད་འབུངས་བྱེད་བཞིན་ཡོད། དེ་བཞིན་སློབ་མ་སུ་ཞིག་ཡིན་རུང་མ་འོངས་པར་མི་བཟང་པོ་ཞིག་ཡོང་ཐབས་སུ་རྟག་ཏུ་བསླབ་བྱ་དང་མིག་དཔེ་བཟང་པོ་སྟོན་གྱིན་ཡོད། གཙོ་བོ་ང་ཚོ་དགེ་རྒན་གྱི་སྤྱོད་ལམ་བཟང་པོ་དང་སྐད་ཆ་ཤོད་སྟངས་སོགས་དངོས་གནས་སློབ་མའི་མདུན་ལ་མིག་དཔེ་ཡག་པོ་སྟོན་དགོས་པ་གལ་ཆེ་ཞིག་མཐོང་བྱུང་། སློབ་མ་ག་འདྲ་ཞིག་སྐྱོང་མིན་སློབ་ཁྲིད་ཀྱི་དགེ་རྒན་ལ་རག་ལས་ཡོད། སློབ་ཕྲུག་ནི་མི་རྒན་པའི་ལད་ཟློས་ལ་བལྟ་རྒྱུ་རང་བཞིན་ཞིག་ཡིན། ང་ཚོ་དགེ་རྒན་ནམ་འགོ་འཁྲིད་སུ་ཞིག་ཡིན་རུང་ཀུན་སྤྱོད་ལེགས་པོ་སྟོན་དགོས་པ་གལ་ཆེའི་འགན་འཁྲི་ཆེན་པོ་ཞིག་ཆགས་ཡོད་པས་ང་ཚོ་ངེས་པར་དུ་ཡིད་ལ་བཅངས་ནས་ལས་ཀ་བྱ་དགོས། ༢ ༽ དགེ་རྒན་རང་ཉིད་སློབ་ཚན་ག་འདྲ་ཞིག་ཡིན་རུང་ངེས་པ་རྙེད་པ་ཞིག་དགོས།    ང་ཚོ་ནི་སློབ་མ་རྣམས་ཀྱི་མི་ཚེ་མདུན་ལམ་བཟོ་མཁན་ཡིན་སྟབས། སློབ་ཕྲུག་ཚོའི་མི་ཚེའི་ནང་དགེ་རྒན་ཡག་སྡུག་ག་འདྲ་ཞིག་ཡིན་རུང་བརྗེད་མི་ཐུབ། བྱས་ཙང་ང་ཚོ་དགེ་རྒན་རྣམས་ཀྱི་ལས་འགན་གཙོ་བོ་ནི། སློབ་ཚན་གང་ཡིན་རུང་དེ་ལ་ངེས་པ་རྙེད་དགོས་པ་དང་བཟང་སྤྱོད་སོགས་ཀྱི་མིག་དཔེ་བཟང་པོ་སྟོན་དགོས་པ་ཧ་ཅང་གལ་ཆེན་པོ་ཆགས་ཡོད། དེ་བཞིན་གལ་ཆེ་ཤོས་ཤིག་ནི་རང་ཉིད་སློབ་ཚན་ག་འདྲ་ཞིག་བསླབ་པ་ཡིན་ན་དེ་སྤུས་དག་དང་ཞིབ་ཚགས་བྱས་ནས་སློབ་འཁྲིད་བྱ་དགོས་པ་ཡང་འོས་འགན་ཡིན། ང་ཚོའི་རྩ་བའི་བླ་མའི་དགོངས་པ་ལྟར་སློབ་མ་རྣམས་ལ་བརྩེ་བ་དང་ལྡན་པ་ཚོར་བ་ཡོད་པའི་སྒོ་ནས་སློབ་ཁྲིད་དགོས་པ་ཡང་ཡང་གསུངས་གནང་ཡོད་པས། ང་ཚོ་ངེས་པར་དུ་ཡིད་ལ་བཅངས་ནས་ལག་ལེན་དུ་འཁེལ་ཐུབ་པ་ཞིག་དགོས། སློབ་ཚན་གང་ཞིག་ཡིན་རུང་དེང་དུས་དང་མཐུན་པའི་སྒོ་ནས་སློབ་མ་ལ་དོ་དབྱིངས་ཡོང་ཐབས་སུ་ཐབས་ཤེས་སྣ་ཚོགས་ཀྱི་ཐོག་ནས་འཁྲིད་དགོས། སློབ་མ་རྣམས་ལ་གནའ་དེང་གཉིས་ཀྱི་ཤེས་བྱ་སྤྲོད་ཐབས་བྱ་དགོས་ལ་དེ་དག་ཡོང་བ་ལ་འབད་བརྩོན་ལྷུག་པོ་གནང་དགོས། དམིགས་བསལ་གྱི་ང་ཚོ་བོད་མི་རིགས་ཀྱི་སྐད་ཡིག་གི་ཆེད་དུ་ཐབས་ཤེས་ཡོད་རྒུ་སྩལ་སྤྲུགས་ཀྱི་ལམ་ནས་བོད་མི་ཞིག་བཟོ་དགོས་ལ་བོད་ཡིག་ལ་དབྱིངས་ཡོང་ཐབས་བྱ་དགོས། ༣ ༽ དགེ་རྒན་ཞེས་པ་ལྷག་བསམ་གྱི་ཀུན་སློང་ལྡན་པ།    སྤྱི་ཚོགས་ནང་ལས་གནས་སྣ་ཚོགས་ཡོད་ན་ཡང་རང་ཉིད་ཀྱི་འདོད་པ་དང་མདུན་ལམ་ལྟར་དགེ་རྒན་ཞེས་པ་ཞིག་བདམས་ཟིན་པ་ན་ངེས་པར་དུ་རང་གི་ཀུན་སློང་ལ་ལས་རིགས་དེ་རྩ་ཆེན་པོ་ཞིག་དང་མཐོང་ཆེན་ཞིག་ཡིན་པ་ཤེས་དགོས། ༸རྒྱལ་བ་རིན་པོ་ཆེའི་དགོངས་པ་བཞིན་རང་གི་སློབ་མ་དང་ལས་ཀ་བྱེད་སའི་སློབ་གྲྭའི་ཁོར་ཡུག་ནང་ལས་ཀ་ག་འདྲ་ཞིག་ཡིན་ན་བསམ་བློ་བཏང་སྟངས་དེ་གཞན་ལ་ལྷག་བསམ་ཡོད་པ་ཡིན་ན་དཀའ་ངལ་ཅི་ཡིན་རུང་བསལ་མ་ཐུབ་པ་མེད་པའི་བཀའ་སློབ་ཕེབས་ཡོད། དེར་བརྟེན་ང་ཚོ་དགེ་རྒན་རྣམས་གླ་ཕོགས་གཅིག་པུ་བསམ་པ་མ་ཡིན་པར་དངོས་གནས་མ་འོངས་བོད་ཀྱི་སོན་རྩ་རྣམས་ལ་ཤེས་སྤྱོད་གཉིས་ལྡན་ཡོད་པ་ཞིག་བཟོ་དགོས། ང་ཚོས་འགོ་འཁྲིད་པའི་ཐོག་ནས་མིག་སྟོས་བཟང་པོ་དང་ལྷག་བསམ་གྱི་སྒོ་ནས་ངེས་པར་དུ་བྱ་དགོས། ང་རང་གི་ལས་ཀའི་ཉམས་མྱོང་དང་འབྲེལ་ནས་སློབ་མ་རྣམས་ལ་ལྷག་བསམ་དང་ཀུན་སློང་བཟང་པོ་འཁྱེར་བའི་གནས་སྟངས་ལ་སློབ་མས་དགའ་པོ་བྱེད་སྟངས་དང་དཀའ་ངལ་ཅི་རིགས་ཞེད་སྣང་མེད་པ་བཤད་ཐུབ་པ་སོགས་ཀྱི་མིག་མཐོང་ལག་ཟིན་བྱུང་སོང་། ང་ཚོ་ལས་ཀ་གང་ཞིག་ཡིན་རུང་ལྷག་བསམ་ལྡན་པ་དང་ཀུན་སློང་བཟང་པོ་ཞིག་ཡོད་ན་སློབ་མ་ཡིན་ན་དགེ་རྒན་ལ་མཐོང་ཆེན་དང་ཡིད་ཆེས་ཆེན་པོ་འཇོག་གི་ཡོད་པའི་སྣང་བ་བྱུང་། ༤ ༽ སྒོ་གསུམ་གྱི་སྤྱོད་ལམ་མིག་དཔེར་འོས་པ།    ང་ཚོ་བོད་རིགས་ཤིག་གི་བརྒྱུད་ནས་ཡུལ་སྲོལ་ཡ་རབས་བཟང་སྤྱོད་ཀྱི་གོམས་གཤིས་སྔར་ནས་ཡོད་པ་ཞིག་ཡིན། དེ་ཡང་བོད་མི་ཞེས་པ་ནི་རང་བཞིན་སེམས་བཟང་པོ་དང་གཤིས་སྤྱོད་ཉམ་ཆུང་ལྡན་པའི་མི་རབས་ཤིག་ཡིན་པ་བཤད་སྲོལ་ཡོད། ཡིན་ན་ཡང་ད་ཆ་དུས་ཚོད་དང་ཕྱིའི་དངོས་པོ་ཡར་རྒྱས་ཤུགས་ཆེན་ཕྱིན་པ་སོང་ཙང་སྔར་གྱི་ཡ་རབས་གོམས་གཤིས་དེ་ག་ལེར་འགྱུར་འགྲོ་བཞིན་ཡོད། བྱས་ཙང་འཛམ་གླིང་ཞི་བདེའི་དེད་དཔོན་མཆོག་གི་དགོངས་པ་ལྟར་གོ་ལ་ཁྱོན་ཡོངས་ཆ་སྙོམས་བཟོ་ཐབས་སུ་སཱི་ཤེས་ཡོན་ཞེས་པ་སློབ་གྲྭ་དང་མཐོ་རིམ་སློབ་ཁག་ལ་སློབ་ཁྲིད་བྱེད་བཞིན་ཡོད། དེ་ནི་གཙོ་བོ་ནང་སེམས་ཀྱི་ཁྱད་ཆོས་ཡར་རྒྱས་གོང་སྤེལ་དང་སྤྱོད་ལམ་བཟང་པོ་འདྲ་བསྐྲུན་ཐབས་ཤིག་ཡིན། ང་ཚོ་དགེ་རྒན་ཞིག་ལ་ཆ་མཚོན་ན་སྒོ་གསུམ་གྱི་སྤྱོད་ལམ་དེ་ཧ་ཅང་གི་གལ་ཆེན་ཆགས་ཡོད། གང་ལ་ཞུ་ན་ང་ཚོ་ལ་མིག་དཔེ་ལྟ་མཁན་སློབ་ཕྲུག་སྟོང་ཕྲག་མང་པོས་དགེ་རྒན་རྣམས་ཀྱི་བྱེད་སྟངས་ལ་ལྟ་བཞིན་ཡོད། དགེ་རྒན་གྱིས་སྒོ་གསུམ་སྤྱོད་ལམ་ཡག་པོ་ཞིག་བསྲུང་ཐུབ་པ་ཡིན་ན་སློབ་མ་དེ་གཤིས་སྤྱོད་དེ་ག་རང་འགྱུར་གྱི་ཡོད་པ་གསལ་པོ་རེད། […]