ལྷ་སྒྲོན་རྟ་མང་།འཛིན་རིམ་དགུ་པ། སཾ་བྷོ་ཊ་མ་སུ་རི་གཏན་སློབ། དུས་རབས་འདིར་ཚན་རིག་པ་རྣམས་ཀྱིས་རིག་རྩལ་གསར་རྙེད་ལ་བརྟེན་ནས་དངོས་རིགས་གསར་བཟོས་མཚོན་འཇིག་རྟེན་མི་ཡི་གནས་སྟངས་ལ་འགྱུར་ལྡོག་ཆེན་པོ་ཕྱིན་པ་དང།  སྤྱི་ཚོགས་ཡར་རྒྱས་ཕྱིན་སྟབས་མི་མང་ཆེ་བས་འཕྲུལ་ཆས་ལ་བརྟེན་ཏེ་རང་ཉིད་ཀྱི་ནུས་ཤུགས་ངོ་མ་དེ་ཧ་མི་གོ་བར་འཚོ་བ་སྐྱེལ་བཞིན་ཡོད་པ་དང་། དེང་དུས་ཀྱི་སྤྱི་ཚོགས་ནང་མི་ཡི་ནུས་སྟོབས་དེ་རྒྱུ་ནོར་ལོངས་སྤྱོད་མང་ཉུང་ཡོད་མེད་བལྟས་ནས་ཐག་གཅོད་ཀྱི་ཡོད། དངོས་གནས་བཤད་ན་ནུས་སྟོབས་ཅན་ཟེར་བ་དེ་འཕྲུལ་ཆས་ལ་མ་བརྟེན་པར་རང་བྱུང་ཁམས་དང་མཛའ་འབྲེལ་གྱི་ནུས་ཤུགས་བེད་སྤྱོད་བཏང་ནས་འཇིག་རྟེན་འདིར་འཚོ་བ་སྐྱེལ་མཁན་ལ་ཟེར་ན་འགྲིག་པར་འདོད། དེ་འདྲའི་རོང་འབྲོག་གི་འཚོ་བ་སྐྱེལ་མཁན་དེ་རང་རེའི་བོད་པ་ཉག་གཅིག་ཡིན།    སྤྱིར་བོད་ཀྱི་ས་ཆ་དེ་འཛམ་གླིང་གི་བྱང་ཕྱོགས་སུ་ཡོད་པས་གནམ་གཤིས་ཧ་ཅང་གྲང་ཞིང་རྩི་ཤིང་ཞེ་དྲག་སྐྱེ་ཡི་མེད་པར་བརྟེན། བོད་མི་མང་ཆེ་བའི་བྱ་བ་གཙོ་བོ་འབྲོག་ལས་བྱེད་ཀྱིན་ཡོད། དེར་བརྟེན་འབྲོག་ལས་བྱེད་མཁན་རྣམས་ལ་འབྲོག་པ་ཟེར་གྱི་རེད། འབྲོག་པ་རྣམས་ནི་རི་མཐོ་ས་གཙང་གི་མདོ་དབུས་མཐོ་སྒང་འཛམ་གླིང་གི་གྲང་ངར་ཆེ་བའི་ས་གནས་དམིགས་བསལ་ལ་གནས་སྡོད་ཐུབ་པའི་མི་རིགས་ཤིག་ཡིན་ཞིང་། མི་རིགས་གཞན་དང་མི་འདྲ་བའི་ཁྱད་ཆོས་ཡོད།  མི་རིགས་འདི་ནི་རང་བྱུང་ཁམས་ཀྱི་གྲང་ངར་རླུང་འཚུབ་སོགས་ལ་ཇི་མི་སྙམ་པའི་དཔའ་ངར་ཆེ་བ་ཞིག་ཡིན། བོད་ཀྱི་འབྲོག་པ་རྣམས་ཉིན་ལྟར་སྒོ་ཕྱུགས་གསོ་སྐྱོང་གིས་འཚོ་བཞིན་ཡོད། སྡོད་གནས་མང་ཆེ་བ་རི་ལུང་རྩྭ་ཐང་སྟེང་འཚོ་སྡོད་བྱེད་ཀྱི་ཡོད།  ཡིན་ནའང། འབྲོག་པ་རྣམས་ས་གཅིག་ཏུ་མ་སྡོད་པར་གནམ་གཤིས་དང་དུས་བཞིའི་འགྱུར་བ་དང་བསྟུན་ནས་ཐག་ཉེའི་རི་ལུང་མི་འདྲ་བར་གནས་སྤོ་བྱེད་ཀྱི་ཡོད། འབྲོག་པའི་ཟ་ཆས་གཙོ་བོ་ཤ་དང།  རྩམ་པ། མར། ཆང། བོད་ཇ། འོ་མ་བཅས་ཡིན། འབྲོག་པ་རྣམས་ནི་ཧ་ཅང་ནུས་ཤུགས་ཆེ་ཞིང་བློ་ཁོག་ཆེན་པོ་ཡོད། སྤྱིར་ན་འབྲོག་པ་ཚོས་རི་དྭགས་གཅན་གཟན་སོགས་ལ་དོན་མེད་གནོད་པ་དང་སྲོག་གཅོད་པ་སོགས་བྱེད་པར་དགའ་བོ་མི་བྱེད། ང་ཚོ་བོད་ཀྱི་འབྲོག་པ་རྣམས་འབྲོག་ལས་བྱས་ཏེ་གཞན་ལ་ཇུས་གཏོགས་མི་བྱེད་པར། རང་རང་གི་འཚོ་བ་སྐྱེལ་བྱེད་སྒོ་ཕྱུགས་སེམས་ཅན་མཉམ་དུ་ཞི་བདེ་ལམ་ནས་མི་ཚེ་སྐྱེལ་གྱི་ཡོད་རེད།  རང་གི་འཚོ་གནས་ཆེད་ཉིན་མཚན་མེད་པར་དཀའ་ལས་རྒྱག་པ་དང་། གནས་ཚུལ་གང་འདྲ་སྡུག་པོ་འཕྲད་ན་ཡང་སོ་སོ་མཉམ་དུ་ཡོད་པའི་མི་གཞན་ལ་རོགས་རམ་བྱེད་ཡ་ནམ་ཡང་དྲན་པ་བརྗེད་ཀྱི་མ་རེད། འབྲོག་པ་རྣམས་ས་ཆ་གཅིག་ཏུ་གཏན་དུ་སྡོད་པ་མེད་ཀྱང་ཕ་ཡུལ་ལ་གུས་ཞབས་དང་སྲུང་སྐྱོབ་བྱེད་ཅིང།  གལ་སྲིད་ལུང་པར་དཀའ་ངལ་འཕྲད་ན་རང་ཉིད་ཀྱི་ལས་ཀ་ཆ་ཚང་བཞག་ནས་རོགས་རམ་ཆེད་དུ་ཚང་མ་མཉམ་རུབ་བྱེད་ཀྱི་རེད། སྤྱིར་ང་ཚོ་བོད་ལ་འབྲོག་པ་མང་པོ་ཡོད་མོད།  ཕྱི་ལོ་ ༡༩༥༩ ལོའི་གོད་ཆག་གནས་ཚུལ་གྱིས་འབྲོག་པ་མང་ཆེ་བས་ལུང་པ་སྲུང་སྐྱོབས་ཆེད་རང་གི་སྲོག་ལ་མི་བལྟ་བར་རང་ཡུལ་སྲུང་སྐྱོབ་སླད་ཚེ་སྲོག་མང་པོ་བློས་བཏང་བས།  དེང་སང་བོད་ནང་དུ་འབྲོག་པ་ཉུང་དུ་སོང་ཡོད། བོད་ཀྱི་འབྲོག་པའི་དཀའ་ཁག་གི་འཚོ་བ་སྐྱེལ་སྟངས་ལ་ཕྱི་རྒྱལ་གྱི་མི་རྣམས་ཧང་སང་ཡོད། ད་ལྟ་ང་ཚོ་གཞན་གྱི་ལུང་པར་བཅའ་སྡོད་བྱས་ཡོད་ནའང་རང་ཉིད་ནི་ཁྱད་འཕགས་ནུས་སྟོབས་ལྡན་པའིི་བོད་རིགས་འབྲོག་པ་ཞིག་ཡིན་པ་ནམ་ཡང་དྲན་དགོས་པ་ཧ་ཅང་གལ་འགངས་ཆེན་པོ་རེད།  ང་ཚོ་ཚང་མ་ནི་བརྗིད་ཉམས་དཔའ་བརྟུལ་ཅན་གྱི་བོད་པའི་རིགས་ཡིན།

ཀརྨ་རང་བྱུང་།འཛིན་རིམ་བཅུ་གཅིག མོན་གྷོ་སཾ་བྷོ་ཊ་གཏན་ཉིན་སློབ་གྲྭ། འབྲོག་པ་ཞེས་པ་ནི་རང་ཉིད་འཚོ་སྡོད་ཀྱི་ས་ཆ་གཏན་འཇགས་མེད་པར་རྟ་ནོར་ལུག་གསུམ་དབྱར་ས་དང་དགུན་སར་དེད་ནས་འཚོ་བ་སྐྱེལ་མཁན་ཞིག་ལ་གོ ང་ཚོ་བོད་ཀྱི་འབྲོག་པ་ནི་རྒྱལ་ཁབ་གཞན་གྱི་འབྲོག་པ་དང་མི་འདྲ་བ་ཡོད། སྤྱིར་བོད་ལྗོངས་ཀྱི་མི་རྣམས་ཀྱི་འཚོ་བ་སྐྱེལ་སྟངས་ལ་ཞིང་པ་དང་། འབྲོག་པ། ས་མ་འབྲོག ཚོང་པ་བཅས་ཡོད། སྐབས་འདིར་བདག་གིས་འབྲོག་པའི་སྐོར་མདོར་ཙམ་བརྗོད་པར་འདོད། འབྲོག་པའི་འཚོ་བ་རོལ་སྟངས་ནི་གཞན་རྣམས་དང་མི་འདྲ། འབྲོག་པ་རྣམས་ལ་དབྱར་དགུན་སྟོད་དཔྱིད་ཀྱི་དུས་སོ་སོར་མཚེར་ས་མི་འདྲ་བ་ཡོད་འདུག དེ་ཡང་དབྱར་དུས་སུ་འབྲོག་སྡེ་སོ་སོས་རུ་སྐོར་ཆེ་ཆུང་སྣ་ཚོགས་བྱས་ཏེ་བྱང་ཐང་དུ་སྡོད་ཅིང་། རྩ་ཐང་ནི་ཡུལ་ཁག་སོ་སོར་ཁོངས་གཏོགས་ཀྱི་ས་མཚམས་སམ། འགའ་ཞིག་ལ་རུ་ཤོག་རང་ཉིད་ལ་སྒེར་བདག་གི་ས་མཚམས་ཡོད་འདུག་པར་རང་དབང་དུ་གནས་སྡོད་ཆོག་པ་ལས་མི་ཚང་སོ་སོར་སྒེར་དབང་ས་ཆ་ཆུང་ཆུང་དེ་འདྲའི་མཚམས་ཡོད་སྲོལ་མི་འདུག སྟོན་དུས་སུ་སྒོ་ཕྱུགས་རྣམས་དམའ་སར་དེད་དེ་སྐམ་རྩ་ཡོད་ས་དང་གངས་རླུང་གི་གནོད་སྐྱོན་མེད་སའི་གནས་ཡུལ་དག་འཚོ་སྡོད་བྱེད་དགོས། དབྱར་དུས་བསྡད་སར་དབྱར་མཚེར་དང་དགུན་དུས་བསྡད་པར་དགུན་མཚེར་ཞེས་འབོད་པར་བྱེད། འབྲོག་པ་དག་ལ་སྤྱིར་བཏང་གཏན་སྡོད་ཀྱི་ས་ཆ་ཞིག་རྩ་བ་ནས་ཡོད་སྲོལ་མི་འདུག་ཅིང་། ཁོང་ཚོའི་འཚོ་བ་གཙོ་བོ་ནོར་ཕྱུགས་ལ་བརྟེན་ནས་ཡོད་སྟབས་རྩྭ་ཆུ་གར་བཟང་གི་གནས་སུ་འཚོ་བ་བསྐྱལ་ནས་སེམས་ཅན་དག་འཚོ་སྐྱོང་བྱ་དགོས། བོད་ཟླ་ལྔ་པའི་ཚེས་བཅོ་ལྔ་ཡས་མས་སུ་ས་ཁད་མཐོ་ཤོས་སུ་འདུག་པ་དང་། དགུན་ཟླ་གསུམ་གྱི་རིང་རི་མགོ་ཁ་བས་བཟུང་ཞིང་རྩྭ་རྣམས་གངས་ཀྱིས་གཡོགས་ཏེ་ཕྱུགས་རིགས་ཀྱིས་རྩྭ་ཟ་མི་ཐུབ་སྟབས་རུ་པ་རྣམས་ཅུང་དྲོ་ས་དང་སྐམ་རྩ་ཡོད་སའི་གནས་སུ་སྤོས་ནས་རི་འདབས་སུ་འདུག་གི་ཡོད། གནའ་རབས་བོད་ཀྱི་འབྲོག་པ་ཚོར་ཁྲིམས་ལུགས་བཟང་པོ་མང་པོ་ཡོད། དཔེར་ན། རི་དྭགས་ཀྱི་རིགས་གང་བྱུང་གསོད་མི་ཆོག་པ་དང་། དབྱར་རྩྭ་དགུན་འབུ་དང་། སྨན་རྩའི་རིགས་གང་བྱུང་བརྐོ་འདོན་མི་ཆོག་པ། འབྲོག་སྡེ་ནང་ཁུལ་ཇག་བཅོམ་དང་ཁ་རྩོད་སོགས་རྒྱག་མི་ཆོག་པ་དང་། ཁྲིམས་ལུགས་དེ་དག་ཕལ་ཆེ་བ་ལྷ་ཆོས་དགེ་བ་བཅུ་དང་། མི་ཆོས་གཙང་མ་བཅུ་དྲུག་དང་འབྲེལ་བ་དམ་ཟབ་ཡོད། དེ་དག་ལས་བརྒལ་ཏེ་བྱ་བ་བྱས་ན་ཉེས་པ་ཡང་ལྕི་མོ་འཁུར་དགོས། འབྲོག་པའི་ཅ་དངོས་འགའ་ཞིག་གི་སྐོར་བརྗོད་ན། ཐོག་མར་སྦྲ་གུར་ནི་འབྲོག་པའི་ཁང་ཁྱིམ་གཙོ་བོ་དེ་ཡིན་ཞིང་དེ་ནི་གཡག་གི་རྩིད་པ་དང་ཁུ་ལུ་ལས་བཟོས་པ་ཞིག་རེད། འུར་ཆ། ལ་ལས་འུར་རྡོ་ཡང་འབོད། དེ་ཡང་གཡག་གི་རྩིད་པ་དང་ར་ཡི་སྤུ་ལས་བཟོས་པ་ཞིག་ཡིན་ཞིང་། དེ་ནི་སེམས་ཅན་འཚོ་བྱེད་དང་གཅན་གཟན་སོགས་དགྲ་ལ་ཐུག་དུས་ཀྱི་ལག་ཆ་ཡོད་ན་མེད་ན་དེ་རེད། གྲོ་ཁུག་ནི་འབྲོག་པ་རྣམས་ཀྱིས་དཔྱིད་དུས་གྲོ་མ་འཐུ་སྐབས་བེད་སྤྱོད་བྱེད་སྲོལ་ཡོད། ཁལ་མ་ནི་སེམས་ཅན་ཏེ། འབྲོག་པ་རྣམས་རི་མཐོ་ལུང་ཟབ་ན་སྡོད་ཀྱི་ཡོད་པས་ལམ་ཐག་རིང་མོར་ཚོང་འགྲོས་སྐབས་སེམས་ཅན་དེ་དག་ལ་ཁལ་བཀལ་ཏེ་འདེད་འགྲོ་གི་ཡོད་པས་ཁལ་མ་ཞེས་འབོད། དེ་བཞིན་གླང་སྒ་དང་རྟ་སྒ་ཞེས་པ་ཞིག་ཀྱང་ཡོད། དེ་ནི་ཤིང་ལས་བཟོས་པ་ཤིག་སྟེ་ཁལ་མ་ལ་བསྟད་ནས་ཁལ་འགེལ་བྱེད་དང་། མི་བཞོན་བྱེད་ལ་བེད་སྤྱོད་བྱེད། འོན་ཀྱང་ད་ལྟའི་དུས་སུ་བོད་མཐོ་སྒང་གི་འབྲོག་པའི་རིག་གནས་རིན་ཐང་མེད་པར་བཟོ་བའི་རྒྱུ་མཚན་ལ་བརྟེན་ནས་བོད་ཀྱི་འབྲོག་པའི་འཚོ་བ་ལ་དཀའ་ངལ་ཆེན་པོ་འཕྲད་བཞིན་ཡོད། བོད་ཀྱི་འབྲོག་པ་འཚོ་གནས་ཐུབ་ན་བོད་ཀྱི་སྲོལ་རྒྱུན་རིག་གནས་མང་པོ་རྒྱུན་འཛིན་བྱེད་ཐུབ། འོན་ཀྱང་དེང་སང་བོད་ཀྱི་འབྲོག་པ་ཚོར་སྔོན་དང་མི་འདྲ་བར་ས་གནས་གང་སར་གནས་སྤོ་མི་ཆོག་པའི་ཁྲིམས་དང་། ཁྲལ་མང་པོ་ཞིག་སྡུ་བཞིན་ཡོད་ལ། འཚོ་བའི་ཐོན་ཁུངས་སྒོ་ཕྱུགས་དག་ཀྱང་གོ་ལའི་ཚ་དྲོད་དབང་གིས་ཉུང་དུ་འགྲོ་བཞིན་ཡོད་འདུག

ཡེ་ཤེས་པདྨ།འཛིན་རིམ་བཅུ་གཅིག མོན་གྷོ་སཾ་བྷོ་ཊ་གཏན་ཉིན་སློབ་གྲྭ། སྤྱིར་འབྲོག་པ་ཞེས་པར་མི་རེ་རེས་འགྲེལ་བཤད་མི་འདྲ་བ་རེ་རེ་གནང་གི་ཡོད་ངེས། གུས་མོ་བདག་གི་བསམ་ཚུལ་ལ་འབྲོག་པ་ཞེས་པ་ནི་མི་ཡི་ནང་ནས་འཚོ་གནས་ཁྱད་པར་དུ་འཕགས་པ་ཞིག་རེད་འདོད། འབྲོག་པ་ཚོ་ས་གནས་གཅིག་ཏུ་གཞིས་ཆགས་ནས་འཚོ་སྡོད་བྱེད་ཀྱི་མེད་པར་རྩ་དང་ཆུ་ལ་བལྟས་ནས་ས་གནས་གཅིག་ནས་གཞན་ལ་ཡང་ཡང་གནས་སྤོས་བྱེད་པའི་རིགས་ཤིག་རེད། ཁོང་ཚོས་ས་གནས་འདྲ་མིན་གྱི་སྐོར་ཤེས་དགོས་ཤིང་ཉམས་མྱོང་ཡང་མང་པོ་བསྡུ་གསོག་བྱེད་དགོས། འགྲོ་བ་མི་ཙམ་མ་ཟད་སེམས་ཅན་རྣམས་ཀྱི་འཚོ་སྟངས་སྐོར་ལ་ཡང་ཤེས་དགོས། འཇིག་རྟེན་འདིའི་སྟེང་མིའི་རིགས་བྱུང་བ་ནས་ད་བར་མི་རྣམས་ཀྱིས་འཚོ་གནས་དང་འཚོ་ཐབས་སྣ་ཚོགས་སྤྱད་ཡོད། མགོ་ནག་མི་ཚོས་རང་རང་གི་ཁོར་ཡུག་དང་འཇོན་ཐང་ལ་བརྟེན་ནས་ཟས་གོས་གནས་མལ་འཚོལ་རྒྱུ་འགོ་བཙུགས་པ་རེད། རང་རང་གི་འཇོན་ནུས་དང་རང་བྱུང་ཁམས་ཆེན་པོའི་ཐོན་འབབ་ལ་བརྟགས་ནས་ཞིང་པ་དང་། འབྲོག་པ། ས་མ་འབྲོག །གྲོང་རྡལ། གྲོང་ཁྱེར་སོགས་ཀྱི་འཚོ་བ་སྐྱེལ་སྟངས་མི་འདྲ་བ་མང་པོ་བྱུང་ཞིང་། དེ་དག་ལ་གཞིགས་པའི་ཐ་སྙད་ཀྱང་སྣ་ཚོགས་ཤིག་བྱུང་ཡོད། ཞིང་པ་ཞེས་པ་ནི་ས་གནས་གཅིག་རང་དུ་གནས་སྡོད་ཀྱིས་ཞིང་ལས་གཙོ་བོར་བྱས་ཏེ་འཚོ་ཐབས་བྱེད་པ་དང་། འབྲོག་པ་ནི་གཙོ་བོ་སྒོ་ཕྱུགས་གསོ་ཉར་ལ་བརྟེན་ནས་འཚོ་ཐབས་བྱེད་ཅིང་། སྒོ་ཕྱུགས་རྣམས་རྩ་ཆུ་བཟང་སར་དེད་དེ་ཡང་ཡང་གནས་སྤོ་བྱེད་བཞིན་འཚོ་བ་སྐྱེལ་ཐབས་བྱེད་མཁན་ཞིག་རེད། ས་མ་འབྲོག་ནི་གོང་གི་འཚོ་ཐབས་གཉིས་འདྲེས་མ་སྟེ་ཞིང་ལས་དང་སྒོ་ཕྱུགས་གསོ་ཉར་མཉམ་དུ་བྱས་ནས་འཚོ་ཐབས་བྱེད་མཁན་རེད། དེང་གི་ཚན་རྩལ་རིག་པར་ཡར་རྒྱས་གོང་འཕེལ་ཤུགས་ཆེ་མ་བྱུང་སྔོན་གྱི་ལོ་རབས་དེ་དག་ལ་འབྲོག་པའི་འཆོ་གནས་ལ་ཡར་རྒྱས་དབྱར་གྱི་མཚོ་མོ་ལྟར་རྒྱས་པའང་བྱུང་ཡོད་ངེས། འོན་ཀྱང་ཁོང་ཚོའི་ཡར་རྒྱས་ནི་ཐོག་བརྩེགས་ཁང་ཆེན་བཞེངས་ནས་འབྱོར་ལྡན་གྱི་འཚོ་བ་སྐྱེལ་བ་མ་ཡིན་པར། འོ་མར་ཕྱུར་བ་སོགས་བཟང་པོ་ཡོང་ཆེད་སྒོ་ཕྱུགས་དེ་དག་གི་ཤ་ཤེད་ལེགས་པོ་ཡོང་ཆེད་རྩ་ཆུའི་ཆེད་ས་ཕྱོགས་གང་སར་འགྲོ་བསྐྱོད་ཀྱིས་གནས་སྤོ་བྱེད་དགོས་པ་གལ་ཆེ། འཛམ་གླིང་ཤར་ནུབ་གང་སར་འབྲོག་པའི་འཚོ་བ་སྐྱེལ་སྟངས་མི་འདྲ་བ་ཏོག་ཙམ་རེ་ཡོད་ན་མ་གཏོགས། སྤྱིའི་ཆ་ནས་སྒོ་ཟོག་སེམས་ཅན་རྣམས་རྩ་ཆུ་འཛོམས་སར་དེད་ནས་གནས་སྤོ་ཡང་ཡང་བྱེད་ཅིང་འཚོ་ཐབས་བྱེད་པ་གཅིག་མཚུངས་རེད་འདོད། དེའི་ནང་ནས་མཐོ་སྒང་གི་མི་རིགས་དེ་ལ་མཚོན་ན་ཞིང་འབྲོག་གི་འཚོ་བོ་ནི་ཡུན་རིང་གོམས་འདྲིས་སུ་གྱུར་བའི་འཚོ་ཐབས་ཤིག་ཡིན། བོད་རྒྱལ་ཁབ་རྒྱ་དམར་གྱི་དབང་འོག་ཏུ་མ་ཤོར་གོང་བོད་དུ་འབྲོག་པའི་གྲངས་ཚད་ཧ་ཅང་མཐོ་པོ་ཡོད་ཅིང་། ཁོང་ཚོས་ནམ་དུས་གྱི་འགྱུར་འགྲོས་དང་བསྟུན་ནས་སྒོ་ཟོག་རྣམས་དེད་དེ་ས་ཕྱོགས་གང་སར་འགྲོ་གི་ཡོད་པ་ལྟར། ལ་ལས་ཁྱིམ་མཚེས་རྒྱལ་ཁབ་བལ་ཡུལ་དང་། འབྲུག རྒྱ་གར། རྒྱ་ནག་སོགས་ནས་ཐོན་སྐྱེད་གསར་པ་ཉོ་ཚོང་ངམ་བརྗེ་ལེན་བྱས་ཏེ་བོད་ཁུལ་དུ་ཕྱིའི་རྒྱལ་ཁབ་ཀྱི་ཅ་དངོས་ནང་འདྲེན་བྱས་མྱོང་བར་གྲགས། སྔོན་དུས་བོད་རང་གི་ཚོང་ལས་བོད་ཁུལ་རང་དུ་གཉེར་བ་ལས་ཕྱིའི་རྒྱལ་ཁབ་ཁག་དང་འབྲེལ་འདྲིས་དེ་ཙམ་བྱེད་སྲོལ་མེད་ཀྱང་། འབྲོག་པ་ཚོས་ས་མཚམས་ཁག་ཏུ་ཕྱོགས་བསྐྱོད་ཀྱིས་རང་གི་སྒོ་ཟོག་འབྲི་གཡག་ལུག་སོགས་ལས་བྱུང་བའི་འོ་ཕྱུར་མར་གསུམ་དང་། རྩིད་པ། དེ་བཞིན་སྤགས་པ་སོགས་ཅ་དངོས་རྣམས་ཡུལ་ལུང་གཞན་གྱི་ཚོང་པ་དང་བརྗེ་ལེན་ནམ་ཚོང་སྒྱུར་བྱེད་པའི་ལམ་སྲོལ་དར་ཡོད་པ་རེད། འོན་ཀྱང་བོད་ས་རྒྱ་དམར་གྱི་ལག་ཏུ་ཤོར་རྗེེས་རིམ་གྱིས་རང་བྱུང་ཁམས་ལ་གཏོར་བརླག་ཤུགས་ཆེན་བཏང་ཡོད་ཅིང་། ལྷག་པར་བོད་ཀྱི་འབྲོག་པའི་རྒྱུན་ལྡན་འཚོ་བར་བརྡབ་གསིག་ཚད་ལས་བརྒལ་བ་བཏང་ཡོད། རྒྱ་དམར་གྱིས་བོད་ཀྱི་འབྲོག་པ་ཚོར་འཚོ་བ་དེང་རབས་ཅན་དུ་འགྱུར་དགོས་ཚུལ་གླེང་ནས་གྲོང་ཁྱེར་དུ་ཁང་པ་སྤྲད་ནས་བཙན་དབང་གིས་གནས་སྤོ་བྱེད་དུ་བཅུག་ནས་བོད་ཀྱི་གདོད་པའི་རིག་གཞུང་རྩ་མེད་དུ་གཏོང་རྒྱུའི་བྱུས་ངན་ཕྱོགས་འདྲ་མིན་ནས་བྱེད་བཞིན་ཡོད། མཐའ་དོན། བོད་ཀྱི་འབྲོག་པ་རྣམས་ནི་སྔོན་དུས་རང་བཙན་མ་ཤོར་གོང་ནས་ཤིན་ཏུ་བཀའ་དྲིན་ཆེན་པོ་ཡིན་ཅིང་། ད་ལྟའི་དུས་སུ་ཡང་གནའ་བོའི་རིག་གཞུང་སྲུང་སྐྱོབ་ཆེད་ཧ་ཅང་བཀའ་དྲིན་ཆེ་བར་སེམས་སོ། །

ཚེ་རིང་གཡུ་སྒྲོན།འཛིན་རིམ་བཅུ་གཅིག མོན་གྷོ་སཾ་བྷོ་ཊ་གཏན་ཉིན་སློབ་གྲྭ། སྤྱིར་བོད་ཁ་བ་གངས་ཅན་གྱི་ལྗོངས་དེ་འཛམ་གླིང་སྟེང་གི་ས་གནས་མཐོ་ཤོས་སུ་ཆགས་ཡོད། དེར་བརྟེན་བོད་ལ་གངས་ལྗོངས་ས་མཐོའི་ཡུལ་ལྗོངས་དང་། འཛམ་གླིང་གི་སྣེ་གསུམ་པ་ཡང་ཟེར། སྔོན་མ་སྐལ་བ་མ་ཆགས་གོང་དུ་བོད་དེ་མཚོ་ཆེན་པོ་ཞིག་ཡིན་པར་གྲགས། རིམ་པས་འགྱུར་བ་བྱུང་སྟེ་ཧི་མ་ལ་ཡའི་རི་རྒྱུད་རྣམས་བྱུང་ཞིང་མཛེས་སྡུག་ལྡན་པའི་བོད་ཡུལ་གྱི་བཀོད་པ་དེ་བྱུང་། དེ་ནས་སེམས་ཅན་གྱི་རིགས་བྱུང་ཞིང་། ག་ལེར་འགྲོ་བ་མིའི་རིགས་བྱུང་། དེ་ཡང་བོད་མི་རིགས་འདི་ཉིད་ཕ་སྤྲེལ་རྒན་བྱང་ཆུབ་སེམས་དཔའ་དང་། མ་བྲག་སྲིན་མོ་གཉིས་ལས་མཆེད་པར་གྲགས་པ་ནི། དེང་རབས་ཚན་རིག་པ་ཌ་ཝིན་གྱིས་མིའི་རིགས་སྤྲ་རིགས་ལས་བྱུང་བར་བཤད་པ་དང་ཡོངས་སུ་མཐུན། བོད་ལ་མི་འབོར་མང་ཤོས་ཇི་ཙམ་བྱུང་མྱོང་བ་བཤད་ཚོད་དཀའ་ཡང་དུས་རབས་བཅུ་གཅིག་པའི་རྗེས་ནས་ད་བར་ས་ཡ་བདུན་ཡོད་པར་སྨྲ་བཞིན་ཡོད། བོད་མི་རྣམས་ཀྱི་འཚོ་བ་སྐྱེལ་སྟངས་ལ་རིགས་མི་འདྲ་བ་བཞི་སྟེ་ཞིང་པ་དང་། ཚོང་པ། ས་མ་འབྲོག །འབྲོག་པ་བཅས་ཡིན། དེ་དག་ནི་གོ་ལ་སྤྱི་དང་ཕལ་ཆེར་མཚུངས་པར་སྣང་། ཞིང་པས་ཞིང་ལས་བྱས་ནས་འཚོ་ཐབས་བྱེད་ཅིང་། ཚོང་པས་ཐོན་རྫས་བརྗེ་ཚོང་བྱས་ནས་འཚོ་ཐབས་བྱེད། ས་མ་འབྲོག་ནི་ཞིང་ལས་དང་འབྲོག་ལས་གཉིས་ཀར་བྱེད་བཞིན་འཚོ་ཐབས་བྱེད། འབྲོག་པ་ནི་འཚོ་ཐབས་གཞན་གསུམ་དང་ཁྱད་པར་ཧ་ཅང་ཆེན་པོ་ཡོད་པ་ཞིག་སྟེ། གཙོ་བོ་སྒོ་ཕྱུགས་གསོ་སྐྱོང་བྱས་ནས་འཚོ་ཐབས་བྱེད་ཅིང་། སྒོ་ཕྱུགས་ལ་དགོས་པའི་རྩ་དང་ཆུ་བཟང་ས་ལ་དེད་ནས་གནས་སྤོ་བྱེད་པ་ལས་ས་གནས་གཅིག་ལ་གཞིས་ཆགས་ཏེ་སྡོད་ཀྱི་མེད། འབྲོག་པས་སྒོ་ཕྱུགས་གཡག་དང་། འབྲི། ར། ལུག །མཛོ་ཕོ་མོ་སོགས་ལ་བརྟེན་ནས་འཚོ་བ་སྐྱེལ་གྱི་ཡོད། འབྲོག་པའི་ཟས་རིགས་ནི་གཙོ་བོ་ཤ་དང་། མར། ཕྱུར་བ་དང་། ཞིང་པའི་ས་ནས་ཉོས་པའི་རྩམ་པ་བཅས་རེད། ཟས་རིགས་དེ་དག་ནི་གཅིག་ལས་གཅིག་ཞིམ་པ་དང་བྲོ་བ་ཆེ་བ། བཅུད་ཆེ་བ་ཡོད། དེར་བརྟེན་ཞིང་པ་དང་ཚོང་པ། གྲོང་ཁྱེར་བ་བཅས་ཀྱིས་འབྲོག་པའི་ཐོན་རྫས་ཉོ་རུ་ཡོང་གི་ཡོད། ངའི་མཐོང་སྣང་ལ་འབྲོག་པ་ནི་འདོད་ཆུང་ཆོག་ཤེས་ཅན། ཞི་འཇམ་བག་ཕེབས་ངང་གནས་མཁན་ཞིག་རེད། འབྲོག་པ་རྣམས་ལ་སྡོད་གནས་ས་རྡོ་ཡིས་གྲུབ་པའི་ཁང་པ་གཏན་འཇགས་མེད་པར་གུར་གྱི་ནང་སྡོད་ཀྱི་ཡོད། འབྲོག་པའི་གུར་ལ་ང་ཚོས་སྦྲ་གུར་ཟེར་ཞིང་། རྒྱུ་གཡག་གི་རྩིད་པ་ལས་གྲུབ་པ་ཞིག་རེད། དེ་ལ་དམིགས་བསལ་ཁྱད་ཆོས་ཤིག་ཡོད་པ་ནི་དབྱར་དུས་ཆར་པ་ཁོག་ཅིང་། དགུན་དུས་རླུང་བུ་ཁོག་པའི་ནུས་པ་ཡོད་ཅིང་། གནས་སྤོས་བྱེད་པའི་སྐབས་སྣ་ལོའི་སྟེང་བཀལ་ནས་འཁྱེར་བདེ་པོ་ཞིག་ཡོད། དེའི་ནང་ས་རྡོ་ལས་བཟོས་པའི་ཐབ་ཆེན་པོ་ཞིག་ཡོད་པ་དེས་དགུན་དུས་དྲོད་སྦྱིན་པ་ལ་ཕན་ཐོགས་ཆེ། འབྲོག་པ་ཚོས་རང་གི་འཚོ་བའི་མཐུན་རྐྱེན་ཆེད་ཁོར་ཡུག་ལ་དོ་ཕོག་མི་གཏོང་ཞིང་། སོ་སོའི་དགོས་མཁོ་སོ་སོས་བསྐྲུན་ཐབས་བྱས་ནས་འཚོ་བ་ཉམ་ཆུང་ངང་སྐྱེལ་གྱི་ཡོད། འོན་ཀྱང་སྟབས་མི་ལེགས་པ་ཞིག་ལ་རྒྱ་དམར་གུང་འདྲེན་ཟེར་བས་བོད་ནང་བཙན་འཛུལ་བྱས་རྗེས། བོད་ཀྱི་སྐད་ཡིག་དང་། རིག་གཞུང་གཉིས་ཉམས་ཆགས་བཏང་དང་གཏོང་བཞིན་པའི་ཁོངས་འབྲོག་པའི་རིག་གཞུང་དང་ཡུལ་སྲོལ་ཡང་གཏོར་བཤིག་གཏོང་གི་ཡོད། དེ་ཡང་རྒྱ་གཞུང་གིས་འབྲོག་པ་ཚོར་བཙན་དབང་གིས་འབྲོག་ལས་མཚམས་འཇོག་དགོས་ཚུལ་དང་། ཡར་རྒྱས་ཀྱི་ཕྱོགས་སུ་སྐྱོད་དགོས་ཚུལ་གླེང་ནས་གྲོང་ཁྱེར་ནང་ཁང་པ་སྤྲད་ནས་སྤོ་རུ་འཇུག་གི་ཡོད། དེ་ནི་བོད་ཀྱི་འབྲོག་པའི་རིག་གནས་དང་། ཡུལ་སྲོལ་གོམས་གཤིས་སོགས་རྩ་མེད་དུ་གཏོང་རྒྱུའི་འཆར་གཞི་ཉག་གཅིག་རེད། […]

བསྟན་འཛིན་དབང་མོ།འཛིན་རིམ་བཅུ་པ། སཾ་བྷོ་ཊ་ཧར་པ་པུར་ཉིན་སློབ། སྤང་ལྗོངས་རྩྭ་ཐང་ཡངས་པོ་གོས་དང་འདྲ། །དཀར་དམར་མེ་ཏོག་སྣ་ཚོགས་ཁྲ་ལམ་བཞད།སྦྲ་གུར་གྲུ་བཞི་འབྲོག་པའི་འཚོ་ཁྱིམ་ཡིན། །རྩམ་པ་ཤ་མར་འབྲོག་པའི་འཚོ་བ་ཡིན། ། ཞེས་ཚིགས་སུ་བཅད་པས་མདུན་བསུས་ཏེ། དེ་རིང་གི་བརྗོད་གཞི་འདིའི་སྒང་ལ་རང་མོས་ཚིག་འགའ་བརྗོད་འདོད་སྐྱེས། ང་ཚོའི་བོད་ཀྱི་འབྲོག་པ་ནི་ཡུལ་གངས་ཅན་གྱི་ངོ་བོ་གལ་ཆེན་ཞིག་ཏུ་ཆགས་ཡོད། ཕ་ཡུལ་གངས་རི་ར་བས་སྐོར་བའི་ཞིང་ཁམས་སུ་གནས་བཅས་པའི་འབྲོག་མི་རྣམས་ལ། ང་ནི་སུས་བཤད་ཀྱང་བོད་པ་གཙང་མ་ཞིག་ཡིན། ཞེས་པའི་ལོ་རྒྱུས་ཐོག་གི་མཚོན་རྟགས་གལ་ཆེན་ཞིག་དེ་ལ་ལྡན་ཡོད་པས་ང་ཚོའི་འབྲོག་པའི་ལོ་རྒྱུས་ཀྱི་རི་མོ་ནི་ང་ཚོའི་མཚོན་བྱེད་གལ་ཆེན་ཡིན། ས་བབ་མཐོ་བའི་ཡུལ་ལྗོངས་དེའི་ནང་གནས་བཞིན་ཡོད། ཡུལ་ལྗོངས་དེ་ནི་འཛམ་གླིང་གཞན་དང་མི་འདྲ་བའི་མཁའ་རླུང་གཙང་ཞིང་གངས་ཆུ་ཞིམ་པས། ལུས་ལ་ནད་ཚ་དཀོན་ཞིང་སེམས་ལ་ཞི་བདེས་ཁྱབ་ཡོད། འབྲོག་པའི་རྩ་ཐང་རྣམས་ནི་ལྗང་ཐིང་ངེར་ཡོད་པས་མི་ཡུལ་གྱི་བདེ་ལྡན་ཞིང་ཁམས་ཞིག་ཡིན། མཛེས་ཤིང་ཡིད་འཕྲོག་པའི་སྤང་ལྗོངས་དང་གངས་རིའི་ཕྲེང་བས་ཡོངས་སུ་བསྐོར་བའི་ཡུལ་ལྗོངས་དེའི་ནང་། བོད་ཀྱི་འབྲོག་པ་རྣམས་འཚོ་བ་སྐྱེལ་བཞིན་ཡོད་ལ། འབྲོག་པ་རྣམས་ཀྱི་ཉིན་ལྟར་གྱི་འཚོ་བ་དེ་རང་བྱུང་ཁམས་ཆེན་པོ་ལ་བརྟེན་ནས་ཡོད། དེར་མ་ཟད་སྒོ་ཕྱུགས་སེམས་ཅན་འབྲི་གཡག་ར་ལུག་མང་བས་སེམས་ཅན་གྱི་སྤུ་ཡིས། འབྲོག་པ་རྣམས་ཀྱི་དགོས་མཁོ་ལྟར་གྱོན་ཆས་མཐུག་པོ་བཟོ་བ་དང་སེམས་ཅན་གྱི་ཤ་ཡིས་ཟས་ནང་དུ་བླུགས་ཏེ་ཐུག་པ་སོགས་ཁ་ལག་གཡོ་བསྐོལ་བྱེད། ཞལ་ཟས་གཙོ་བོ་ནི་རྩམ་པ་ཡིན། རྩམ་པ་དེ་ནི་ཟས་སྟབས་བདེ་ཞིག་དང་འཚོ་བཅུད་ལྡན་པ་ཞིག་ཡིན། དེང་དུས་སྤྱི་ཚོགས་ནང་དུ་འཕྲུལ་རིག་འདྲ་མིན་བེད་སྤྱོད་བྱེད་ཀྱི་ཡོད་པ་ལ་བརྟེན་ནས། སྤྱིར་བཏང་མིའི་འཚོ་བ་འཕྲུལ་ཆས་མེད་པ་ཡིན་ན། འཚོ་བ་འགྲོ་མི་ཐུབ་པ་ལྟ་བུ་ཡིན་ན་ཡང་འབྲོག་པའི་འཚོ་བའི་ནང་དུ་འཕྲུལ་རིག་བེད་སྤྱོད་མ་བྱས་ན་ཡང་། རང་བྱུང་ཁམས་དང་སྲོལ་རྒྱུན་གྱི་འཚོ་བ་བརྟེན་ནས། རང་གི་དགོས་མཁོ་རྣམས་ཡོངས་རྫོགས་འགྲུབ་ཐུབ་ཀྱི་ཡོད། དེར་མ་ཟད་ཁོང་ཚོ་ཁོར་ཡུག་གཙང་མ་ལ་སྡོད་ཀྱི་ཡོད་པས། མི་ཚང་མའི་ལུས་དང་སེམས་ཁམས་འཕྲོད་བསྟེན་ཡང་ཧ་ཅང་ཡག་པོ་ཡོད། བོད་ཀྱི་འབྲོག་པ་རྣམས་ནམ་དུས་བཞིའི་འགྱུར་འགྲོས་ལ་བརྟེན་ནས། རྟ་ནོར་ལུག་གསུམ་འཚོ་སྐྱོང་བྱེད། དཔེར་ན། དཔྱིད་ཀ་སླེབས་པ་དང་། དགུན་གྱི་འཁྱག་རོམ་རྣམས་བཞུར་ནས་ས་གཞི་ཆེན་པོར་དྲོད་རྒྱས་ཏེ། མེ་ཏོག་ཤར་བའི་སྐབས་སུ་རྩྭ་ཆུ་བཟང་སར་སྤོས་པ་དང་རྩ་ཐང་འདྲ་མིན་ཡོད་པས། སྒོ་ཕྱུགས་སེམས་ཅན་རྣམས་ལ་ཡང་རྩྭ་ཆུ་གང་བཟང་གི་ཁ་ལག་ཞིམ་པོ་རག་ཐུབ་ཀྱི་ཡོད། དབྱར་ཁ་ཉི་མ་ཧ་ཅང་ཚ་པོས་གངས་ཆུ་རྣམས་ཞུར་ཏེ་རྒྱུག་ཆུ་དང་འདྲེས་ནས་ཆུ་བོའི་གཞུང་རྒྱས། སྤང་ལྗོངས་ལ་མེ་ཏོག་གིས་ཁེངས། རྩྭ་ཆུ་བཟང་བས་རྟ་ནོར་ལུག་གསུམ་ཤ་ཤེད་རྒྱས། སྟོན་ཁ་མེ་ཏོག་རྣམས་ལྷུང་ནས་ལྗང་མདོག་གི་ས་གཞི་ལ་མི་རྟག་པའི་སེར་ཐིག་ཆགས། ཡང་འབྲོག་པ་རྣམས་ཀྱིས་དགུན་ཁའི་གྲང་ངར་ལ་གདོང་ལེན་གྱི་གྲ་སྒྲིག་བྱེད་དགོས་ཀྱི་ཡོད། གཡག་རྩིད་ལས་བཟོས་པའི་སྦྲ་གུར་ནང་མཐའ་ལ་སྒྱེ་མོ་རྣམས་བརྩིགས་ནས་ནང་དྲོན་མོ་བཟོས་ཡོད། དགུན་ཁའི་སྐབས་སུ་གནམ་གཤིས་གྲང་བས་གངས་མཐུག་པོ་བརྒྱབ་ནས་རྩ་ཐང་ཆ་ཚང་ཁ་བས་གཡོགས། དེར་མ་ཟད་དགུན་ཁའི་གྲང་ངར་ཆེ་བས་ལས་ཀ་མང་ཆེ་བ་མཚམས་བཞག་དགོས་ཀྱི་ཡོད། འབྲོག་པའི་སྦྲ་གུར་ནང་དུ་འབྲོག་ཐབ་ཞིག་ཡོད་ལ་དེའི་ནང་མེ་བཏང་ནས་ཁ་ལག་བཟོ་གི་ཡོད། གཡག་གི་ལྕི་བ་དང་ལུག་གི་རིལ་མ་བསྐམས་ནས་དེར་མེ་གཏོང་བར་བེད་སྤྱོད་བྱེད། སྦྲ་གུར་ནི་འབྲོག་པའི་ཁང་པ་ཡིན་ལ་དེའི་ནང་མི་རབས་ནས་མི་རབས་བར། འཚོ་བ་བསྐྱལ་ནས་ཡོང་བ་ཞིག་རེད། འབྲོག་ཁྱིམ་གྲུ་བཞིའི་ནང་དུ་འབྲོག་ཐབ་ཀྱི་བུ་མོ་སྡོད་སའི་གཡས་ཕྱོགས་སུ་སྒམ་ཆུང་གྲུ་བཞི་ནར་མོ་ཞིག་ཡོད་ལ་དེའི་ནང་བཅད་གསུམ་བརྒྱབ་ནས་བཟོས་ཡོད། བཅད་གཅིག་གི་ནང་དུ་རྩམ་པ་བླུགས། གཞན་དེ་གཉིས་ནང་མར་དང་ཕྱུར་བ་བླུགས་ནས་ཡོད། ཞོགས་པ་དང་ཉིན་གུང་རྩམ་པ་དང་བག་ལེབ་མཆོད། དགུང་ཟས་ནི་ཐུག་པ་དང་མོག་མོག་ཡིན་ལ་ད་དུང་ཟས་ཀྱི་མཆོད་པ་དཀོན་མཆོག་གསུམ་ལ་འབུལ། དུག་ལོག་མཐུག་པོ་ལུག་པགས་སོགས་ཀྱིས་བཟོས་པའི་སློག་པ་གྱོན་ནས་རང་ཉིད། […]

བསྟན་འཛིན་རིག་འཛིན།འཛིན་རིམ་བཅུ་གཅིག མོན་གྷོ་སཾ་བྷོ་ཊ་གཏན་ཉིན་སློབ་གྲྭ། ཡ་རབས་བཟང་སྤྱོད་ནི་རྒྱལ་ཁབ་དང་མི་རིགས། ཆོས་ལུགས་དང་ལྟ་གྲུབ་ཀྱི་དབྱེ་བ་མེད་པར་འགྲོ་བ་མིའི་རིགས་ཐམས་ཅད་ལ་མཁོ། དེ་ནི་འབྲོག་པའི་སྲོལ་རྒྱུན་གྱི་རིག་གནས་ལ་ཡོད། རོགས་རེས་མཉམ་ལས་ནི་འབྲོག་པའི་གཤིས་ཀ་ཡིན། འབྲོག་པ་ནི་ལས་ཀ་ཅི་ཞིག་བསྒྲུབ་དགོས་ཀྱང་ཐེ་ཚོམ་མེད་པར་རོགས་པ་བྱེད་མཁན་ཞིག་རེད། དེ་ཡང་དགའ་ཉེ་དང་། སྤུན་མཆེད་ཙམ་མིན་པར་ཐག་ཉེའི་ཁྱིམ་མཚེས་དང་ཡུལ་མི་སུ་འདྲ་ཞིག་ལ་དཀའ་ངལ་འཕྲད་སྐབས་ཕན་ཚུན་རོགས་རམ་བྱེད་པ་དེ་འབྲོག་པའི་འཚོ་བའི་ཁྲོད་སིམ་ནས་ཡོད། འབྲོག་པ་དག་གིས་དབྱར་དགུན་སྟོན་དཔྱིད་ནམ་དུས་བཞི་ལ་བལྟས་ནས་ས་གནས་གཅིག་ནས་གཞན་ལ་གནས་སྤོས་བྱེད་ཀྱི་ཡོད། དབྱར་དུས་འབྲོག་པ་ཚོ་ས་མཐོ་སར་འགྲོ་ཞིང་། དགུན་དུས་དམའ་སར་མར་འབབ་ཀྱི་ཡོད། དེ་ལྟར་བྱེད་དོན་གཙོ་བོ་ནི་སྒོ་ཟོག་གི་རྩྭ་ཆུའི་ཆེད་དུ་ཡིན་པ་རེད། བོད་ཀྱི་འབྲོག་པར་སྒོ་ཕྱུགས་ནི་གཡག་དང་འབྲི། མཛོ་དང་མཛོ་མོ། ར་དང་ལུག་སོགས་ཡོད་ཅིང་། ཁྱི་ལུས་སྟོབས་ཆེན་པོ་དེ་འདྲ་ཡོད་པ་དེ་ལ་འབྲོག་ཁྱི་ཟེར། ཁྱི་དེ་དག་གིས་འབྲོག་པའི་སྦྲ་གུར་དང་སྡོད་གནས་སྲུང་སྐྱོབ་བྱེད་ཀྱི་ཡོད། འབྲོག་ཁྱི་ནི་གཅན་གཟན་གཞན་འདེད་ཐུབ་པའི་བློ་སྟོབས་ཅན་ཞིག་རེད། དེང་སང་བོད་ཀྱི་འབྲོག་ཁྱི་འཛམ་གླིང་ཡོངས་ལ་སྐད་གྲགས་ཆེན་པོར་གྱུར་ཡོད། ལུག་ནི་འབྲོག་པའི་སེམས་ཅན་གལ་ཆེ་ཤོས་ཤིག་རེད། བལ་ལས་འབྲོག་པ་ཚོས་གྱོན་གོས་བཟོ་གི་ཡོད། བལ་གོས་ཀྱིས་འབྲོག་པ་ཚོ་གནམ་གཤིས་གྲང་མོ་ལས་སྲུང་སྐྱོབ་བྱེད་ཐུབ་ཀྱི་ཡོད། འབྲོག་པའི་འཚོ་བའི་ཐོན་ཁུངས་གལ་ཆེ་ཤོས་ནི་གཡག་དང་འབྲི་རེད། གཡག་ལས་ཁུ་ལུ་དང་། རྩིད་པ། ཚགས་ཤ། པགས་པ་སོགས་འབྱུང་། གཡག་ལ་ལ་འབྲོག་པ་ཚོས་གནས་སྤོ་བྱེད་སྐབས་ཅ་དངོས་དགལ་སར་བེད་སྤྱོད་བྱེད་པ་དང་། བཞོན་པར་ཡང་བེད་སྤྱོད་བྱེད་ཀྱི་ཡོད། གཡག་དེ་ཚོའི་རིགས་ལ་སྣ་ལོ་ཡང་ཟེར། འབྲི་ཡི་འོ་མ་ལས་ཞོ་དང་། མར། ཕྱུར་བ་སོགས་འཚོ་བཅུད་ཆེ་བའི་ཟས་རིགས་དག་འབྱུང་གི་ཡོད། བོད་ཀྱི་འབྲོག་པ་ནི་སྐལ་བ་ཡ་ཐོག་ནས་དེ་རིང་གི་བར་དུ་ཁོར་ཡུག་སྲུང་སྐྱོབ་ལ་འབྲེལ་བའི་བསམ་བློ་ཡོད་མཁན་དང་། སྐྱེས་པ་ནས་མ་འཆི་བར་ཁོར་ཡུག་སྲུང་སྐྱོབ་ཀྱི་ལས་འགུལ་དངོས་སུ་སྤེལ་མཁན་གྱི་མིའི་རིགས་གཅིག་བུ་དེ་ཡིན། ནང་པའི་ཆོས་ཀྱི་གཞུང་དུ་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་རྣམས་གཅིག་ལ་གཅིག་བརྟེན་གྱི་འཚོ་གནས་དང་འབྲེལ་བ་དམ་ཟབ་ཡོད་པར་གསུངས་ཡོད་པ་བཞིན། བོད་ཀྱི་འབྲོག་པ་ཚོས་དགའ་དད་སྤྲོ་གསུམ་གྱི་སྒོ་ནས་ཁོར་ཡུག་སྲུང་སྐྱོབ་དངོས་ཤུགས་བརྒྱུད་གསུམ་གྱི་སྒོ་ནས་བྱེད་ཀྱི་ཡོད། དེ་ནི་རླབས་ཆེན་གྱི་བསམ་བློ་དང་། ཀུན་སྤྱོད། གོམས་གཤིས་ཤིག་རེད་འདོད། ཐབས་སྡུག་པའི་གནས་ཚུལ་ཞིག་ལ་ད་ལྟའི་ཆར་བོད་ཀྱི་འབྲོག་པའི་གྲངས་འབོར་ཤུགས་ཆེན་པོས་ཇེ་ཉུང་འགྲོ་གིན་ཡོད། དེའི་རྒྱུ་མཚན་ནི་རྒྱ་ནག་གཞུང་གིས་ཡར་རྒྱས་ཀྱི་ཕྱོགས་སུ་འགྲོ་ཞེས་པའི་སྲིད་བྱུས་ངན་པ་དེའི་འོག་འབྲོག་པ་ཚོར་གྲོང་རྡལ་དང་གྲོང་ཁྱེར་ནང་ཁང་པ་སྤྲད་དེ། བཙན་དབང་གིས་འབྲོག་ལས་སྤངས་ཏེ་ཚོང་ལས་བྱེད་དུ་འཇུག་གི་ཡོད། དེར་བརྟེན་འབྲོག་པའི་རིག་གནས་ཉམས་དམས་སུ་འགྲོ་བ་མ་ཟད། གྲོང་ཁྱེར་ནང་སྤོས་ཟིན་པའི་འབྲོག་པ་ཚོས་འཚོ་ཐབས་གསར་པར་གོམས་ལོབ་མེད་པའི་དཀའ་ངལ་ཆེན་པོ་འཕྲད་བཞིན་ཡོད། འབྲོག་པ་མེད་པ་བཟོ་རྒྱུ་ནི་རྒྱ་དམར་གཞུང་དམིགས་ཡུལ་གལ་ཆེན་ཞིག་ཡིན་ཞིང་། བོད་ཀྱི་ཡུལ་སྲོལ་གོམས་གཤིས་རིག་གཞུང་བཅས་མེད་པ་བཟོ་བའི་འགག་རྩ་ལྟ་བུར་གྱུར་ཡོད། བོད་དུ་འབྲོག་པ་མེད་པ་ཆགས་ན་རྒྱ་དམར་ལ་ཁེ་ཕན་ཆེན་པོ་འབྱུང་གི་ཡོད། དེ་ཡང་འབྲོག་ས་ཁག་རྒྱ་མིར་བགོ་འགྲེམས་བྱས་ནས་ཞིང་ས་བཟོ་རྒྱུ་དང་། ས་གཏེར་གང་འདོད་དུ་བསྔོགས་ནས་རྒྱ་ནག་མུ་མཐུད་ཕྱུག་ལམ་དུ་སྐྱོད་རྒྱུ་དང་། བོད་ས་ཡོངས་རྫོགས་སྤྲང་ཁྱིམ་དུ་བསྒྱུར་རྒྱུ་རེད། དེར་བརྟེན་ཁོང་ཚོས་ཐབས་བརྒྱ་བྱུས་སྟོང་གིས་ང་ཚོ་བོད་ཀྱི་འབྲོག་པ་རྩ་མེད་བཏང་དང་གཏོང་བཞིན་ཡོད། བོད་ཀྱི་འབྲོག་པ་སྟོང་སོང་ན་བོད་ཙམ་མ་ཟད་འཛམ་གླིང་སྤྱི་ལ་གྱོང་གུད་ཧ་ཅང་ཆེན་པོ་ཞིག་ཕོག་རྒྱུ་རེད། […]