བསྟན་འཛིན་ཀུན་གསལ། འཛིན་གྲྭ་དགུ་པ། དཔེ་སྟོན་སློབ་གྲྭ། ཚ་དྲོད་ཆེ་ཞིང་སྐད་ཅོར་ཆེ་བའི་བོད་ཡིག་ཚོགས་ཐེངས་ཀྱི་དུས་སྐབས་སུ་། གློ་བུར་དུ་བོད་ཡིག་དགེ་ལགས་མཆོག་གིས་འཛིན་གྲྭའི་ཕྲུ་གུ་ཚང་མར་གོང་དུ་བྲིས་པའི་བརྗོད་གཞི་འདིའི་ཐོག་ལ་རྩོམ་ཞིག་བྲིས་ཤོག་ཅེས་གསུངས་སྐབས་ཕྲུ་གུ་ཚང་མས་འུར་སྒྲ་ཆེན་པོའི་ངང་ལགས་སོ་རྒན་ལགས་ཞེས་ལན་བཏབ་སོང་། དེ་དུས་བདག་གི་ལམ་སང་བརྗོད་གཞི་དེར་ཡག་པོར་བལྟས་ནས་དེ་སྐོར་བསམ་བློ་ཞིབ་ཚགས་བཏང་བ་ཡིན། ཡིན་ཡང་དུས་ཡུན་ཅུང་ཙམ་སོང་བ་ན་བརྗོད་གཞི་དེ་ལས་སླ་པོ་ཞེ་དྲག་ཡིན་པ་བདག་གི་ཤེས་འདོད་བྱུང་། དེ་རྗེས་བདག་གིས་ལག་ཏུ་སྨྱུ་གུ་ཞིག་བཟུང་ནས་རྩོམ་འདི་འབྲི་འགོ་བཙུགས་པ་ཡིན། སྤྱིར་སྐད་ཡིག་གང་ཞིག་ཡིན་ཡང་དེ་གལ་ཆེན་པོ་ཞིག་ཡིན་པ་དང་དེ་ཡི་སོ་སོའི་རྒྱལ་ཁབ་ཀྱི་ངོ་བོ་དང་གཟི་བརྗིད་སྟོན་ཀྱི་ཡོད་། དེ་བཞིན་བོད་ཡིག་གིས་ཡང་བོད་པའི་ངོ་བོ་དང་གཟི་བརྗིད་མཚོན་གྱི་ཡོད་། གལ་སྲིད་བུ་མོ་ང་ལ་མཚོན་ན་ནམ་རྒྱུན་གྱི་སྐད་ཡིག་གཞན་དབྱིན་ཇི་དང་ཧིན་དྷིའི་ཡི་གེ་ཚོ་ལས་བོད་ཡིག་ལ་ལེགས་པ་དང་བོད་ཡིག་ནི། ང་ན་ཆུང་བྱིས་པའི་དུས་ནས་སྦྱངས་པའི་སྐད་ཡིག་ཅིག་ཡིན་ཙང་དེ་སྦྱོང་རྒྱུར་དགའ་འདོད་ཀྱང་ཆེ་བ་ཡོད་། མཚམས་རེ་ང་རང་བོད་ཡིག་འབྲི་བཞིན་པའི་སྐབས་ཕྱི་ལོགས་མི་ཚོས་མཐོང་ནས་འདི་ག་རེ་ཡི་གེ་རེད་ཅེས་འབྲི་སྐབས་བདག་གིས་སྤོབས་པའི་ངང་ནས་འདི་བོད་ཡིག་རེད་ཅེས་ལན་འདེབས་ཐུབ་པ་འདི་བོད་ཡིག་གི་བཀའ་དྲིན་རེད་། སྐད་ཀྱིས་རྒྱལ་ཁབ་གཞན་ལ་མཉམ་འབྲེལ་བྱེད་པ་དང་། སེམས་ཁམས་བརྗེ་རེས་། ཚོང་གི་འབྲེལ་ལམ་སོགས་མང་པོ་ལ་ཕན་ཐོགས་ཀྱི་ཡོད་། རྒྱལ་ཁབ་གང་ཞིང་ཡིན་ཡང་དེར་སྐད་ཡོད་ན་སྐད་དེ་སྲུང་སྐྱོབ་བྱ་རྒྱུ་ནི་རྒྱལ་ཁབ་དེའི་ཡུལ་མི་ཚོའི་ལས་འགན་རེད་། དེ་བཞིན་ང་བོད་པ་ཞིག་ཡིན་པའི་ཆ་ནས་བོད་ཡིག་སྲུང་སྐྱོབ་བྱ་རྒྱུ་ནི་ངའི་ལས་འགན་རེད་། ད་ལྟ་ང་ཚོ་དམངས་གཙོ་རྒྱལ་ཁབ་ཅིག་ཏུ་གནས་ཡོད་པ་དང་། སོ་སོའི་སྐད་ཡིག་སྦྱོང་རྒྱུའི་གོ་སྐབས་ཆ་ཚང་ཡོད་ཙང་དེ་གོ་སྐབས་བཟང་པོ་འདི་ང་ཚོས་ཆུད་ཟོས་སུ་མ་བཏང་བར་རང་ཉིད་ཀྱིས་སྐད་ཡིག་བོད་ཡིག་དེ་དགའ་དགའ་སྤྲོ་སྤྲོ་ངང་ནས་སྦྱངས་དགོས་། བདག་གི་ཕུགས་བསམ་ནི་བོད་ཡིག་ཡག་པོ་སྦྱངས་ནས་ནར་སོན་རྗེས་བོད་ཀྱི་ཆབ་སྲིད་དེ་འཛམ་གླིང་ཡོངས་ལ་སྤེལ་ཐུབ་པ་བྱ་རྒྱུ་དེ་ཡིན། ང་ཚོའི་འཛིན་གྲྭའི་ནང་དུའང་ཕྲུ་གུ་ཚང་མས་བོད་ཡིག་ཚོགས་ཐེངས་སླེབས་སྐབས་དགའ་སྤྲོ་དཔག་མེད་དུ་བྱས་པ་དང་ཚང་མས་བོད་ཡིག་ཚོགས་ཐེངས་སྐབས་དམིགས་བསལ་གྱི་དོ་སྣང་ཆེ་བ་ཡོད་། ད་དུང་ང་ཚོ་ཚང་མས་རང་ཉིད་ཀྱི་ཚིགས་བཅད་འབྲི་རྒྱུ་ནི་སྐྱིད་ཤོས་ཤིག་ཏུ་ངོས་འཛིན་བྱེས་ཀྱི་ཡོད། བོད་ཡིག་ནི་དམིགས་བསལ་གྱི་ང་ཚོ་ལ་ནང་ཆོས་གོ་རྟོགས་སླེབས་ཆེད་དུ་ཧ་ཅང་གལ་ཆེན་པོ་རེད་། དེ་སོང་ཙང་ང་ཚོ་ཚང་མས་བོད་ཀྱི་སྐད་ཡིག་དེ་གལ་ཆེན་ཞིག་ཏུ་ངོས་འཛིན་བྱས་ནས་དགའ་སྤྲོའི་ངང་ནས་སྦྱངས་དགོས་། མཇུག་བསྡུས་ན་ངས་དེ་རིང་རྩོམ་འདི་བྲིས་པའི་དགོས་པ་གཙོ་བོ་ནི་རྩོམ་འདི་བརྒྱུད་ནས་ང་དང་འདྲ་བའི་སློབ་ཕྲུག་རྣམས་ལ་བོད་ཡིག་སྦྱངས་འདོད་སླེབས་པ་དང་ནར་སོན་རྗེས་བོད་ཀྱི་ཆབ་སྲིད་དེ་འཛམ་གླིང་ཡོངས་ལ་སྤེལ་རྒྱུའི་རེ་བ་བྱེད་ཀྱི་ཡོད་། ང་ཚོ་ཚང་མ་བོད་པ་ཞིག་ཡིན་པའི་ཆ་ནས་བོད་ཡིག་སྦྱོང་རྒྱུ་དེ་ང་ཚོའི་ལས་འགན་ཡིན་པ་དང་། མཐར་ངས་བོད་ཀྱི་ཡི་གེ་དེ་གལ་ཆེན་པོ་ཞིག་ཏུ་ངོས་འཛིན་བྱས་ནས་དེར་དགའ་དགའ་སྤྲོ་སྤྲོའི་ངང་སྦྱོང་རོགས་ཞེས་རེ་སྐུལ་དང་བཅས། ངའི་ལག་ཏུ་བཟུང་བའི་སྨྱུ་གུ་དེ་མཚམས་བཞག་གི་ཡིན།

ཚེས་བཅུ་དབང་མོ། འཛིན་གྲྭ་དགུ་པ། དཔེ་སྟོན་སློབ་གྲྭ། འཇིག་རྟེན་འདི་ཡི་ནང་སྐད་ཡིག་སྦྱོང་རྒྱུ་ཧ་ཅང་གལ་ཆེན་པོ་ཡིན་པ་མ་ཟད་སོ་སོའི་སྐད་དེ་དང་ཡི་གེ་མ་ཤེས་ན་ཧ་ཅང་ངོ་ཚ་པོ་རེད་དོ། དེང་སང་སློབ་ཕྲུག་ཁ་ཤས་ཀྱིས་སོ་སོའི་ཕ་སྐད་ལ་ཤུགས་མི་བསྐྱོན་པར་གཞན་སྐད་ལ་ཤུགས་སྐྱོན་གྱི་ཡོད་པ་དེ་ནི་ངོ་ཚ་དང་སོ་སོའི་སྐད་ངོ་མ་ཤེས་པའི་རྟག་རེད། ང་རང་ལ་ཆ་བཞག་ན་ང་རང་ཆུང་དུས་ནས་བོད་པའི་སྤྱི་ཚོགས་ཞིག་གི་ནང་འཚོ་བ་སྐྱེལ་ཡོད་པའི་ཆ་ནས་བོད་ཡིག་སྦྱངས་ཡ་དང་བོད་སྐད་བཤད་ཡ་ནི་ངའི་གོམས་གཤིས་ཤིག་རེད། ང་བོད་པ་ཡིན་པའི་ཆ་ནས་བོད་སྐད་སྦྱོང་དགོས་པ་ངའི་ལས་འགན་ཡིན་པའི་རྒྱུ་མཚན་དང་པོ་དེ་ནི་ང་རང་བོད་པ་ཞིག་ཡིན་པ་མ་ཟད་བོད་པའི་སྐད་ཡིག་དང་གོམས་གཤིས་རྩ་མེད་མ་འགྲོ་བའི་ཆེད་དུ་བོད་ཡིག་སྦྱོང་དགོས་པ་དང་རྒྱུ་མཚན་གཉིས་པ་དེ་ནི་བོད་པའི་སྐད་ཡིག་དེ་རྒྱལ་ཁབ་གཞན་གྱི་དོ་སྣང་ཡོང་པའི་ཆེད་དུ་ང་ཚོས་བོད་ཡིག་སྦྱངས་ནས་བོད་ཡིག་ལ་མཁས་པ་ཞིག་ཆགས་ན་རྒྱལ་ཁབ་གཞན་གྱིས་ང་ཚོའི་སྐད་ཡིག་ལ་རིན་ཐང་སྤྲད་ཀྱི་རེད། རྒྱུ་མཚན་གསུམ་པ་ནི་བོད་མི་ས་ཡ་མང་པོའི་མ་འོངས་པའི་བདེ་སྐྱིད་ཆེད་དུ་ང་ཚོས་བོད་ཡིག་དེ་དར་སྤེལ་བཏང་དགོས་ངེས་རེད། རྒྱུ་མཚན་བཞི་པ་དེ་ནི་༸གོང་ས་མཆོག་གི་བཀའ་དགོངས་སྒྲུབ་པའི་ཆེད་ང་ཚོས་བོད་སྐད་ཡིག་སྦྱངས་དགོས་པ་དང་བོད་སྐད་གཙང་མ་བཤད་དགོས་པ་དེ་ང་ཚོ་སློབ་ཕྲུག་ཡིན་པའི་ཆ་ནས་ལས་འགན་རེད། རྒྱུ་མཚན་མཐའ་མ་དེ་ནི་བདག་དང་བདག་གི་ཕ་མ་མ་འོངས་པའི་འཚོ་བ་བདེ་སྐྱིད་ངང་སྐྱེལ་བའི་ཆེད་དུ། ངས་བོད་ཡིག་སྦྱོང་དགོས་བ་དེ་ངའི་འགན་འཁུར་ཡིན་ལ། ངས་བོད་ཡིག་སྦྱངས་ནས་མ་འོངས་པ་ང་བོད་ཀྱི་སྐད་ཐོག་མཁས་པ་ཞིག་ཆགས་དགོས་པ་དེ་ངའི་དམིགས་ཡུལ་དང་རེ་བ་ཡིན།

བློ་བཟང་མཐུ་སྟོབས། རྫོང་ཆོས་འབྲིང་རིམ་སློབ་གྲྭ། འཛིན་རིམ་བཅུ་པ། ངས་ཐོག་མར་ཤ་ཁྲག་གཅིག་པའི་བོད་རིགས་སྤུན་ཟླ་ཚོ་ལ། པཎ་ཆེན་རིན་པོ་ཆེའི་ཞལ་ནས་བོད་རིགས་ཚོ་ལ་བོད་ཡིག་སྦྱོང་རོགས་ཞེས་རེ་སྐུལ་ཞིག་གནང་འདུག ང་ཚོ་ཚང་མ་བོད་པ་རེད། སྔོན་ལ་བོད་ཡིག་ཡག་པོ་སྦྱོང་དགོས། ངས་རྒྱུན་དུ་ང་ཚོ་བོད་རིགས་ཀྱིས་རང་གི་སྐད་ཡིག་སྦྱོང་དགོས་ཀྱི་འདུག་ཅེས་གང་ས་གང་དུ་སྐད་རྒྱག་གི་ཡོད། ཏོག་ཙམ་ཡར་རྒྱས་ཕྱིན་ཡོད་ཀྱང་ཡག་པོ་རང་མི་འདུག འདོད་པ་ཚིམ་པོ་ཞིག་མི་འདུག ཚང་མས་བོད་ཡིག་དེ་ཡག་པོ་སྦྱོངས་རོགས་ཞུ། བརྩེ་བའི་བོད་རིགས་སྤུན་ཟླ་ཚོ། བོད་པ་ཞིག་ཡིན་པའི་ཆ་ནས་བོད་ཡིག་སྦྱོང་དགོས་པ་དེ་ང་ཚོས་ནམ་ཡང་བརྗེད་མི་རུང་ལ། ཤིན་ཏུ་ལྕི་བའི་འགན་འཁྲི་ཡིན་པ་སེམས་ལ་བཅངས་ནས་བོད་ཡིག་སྦྱོང་བའི་འབད་བརྩོན་ལ་གཞོལ་དང་། བོད་རིགས་ངོ་མ་ཞིག་ཡིན་ཕྱིན་ཆད་བོད་སྐད་ཡིག་དག་མ་ཞིག་ངེས་པར་དུ་ཤེས་དགོས། ཤེས་པ་དེ་སྤྱོད་ཤེས་དགོས། སྐྱེས་བུ་དམ་པ་ཁོང་རྣམ་པས་གསུངས་པ་བཞིན་སོ་སོ་བོད་མི་ཞིག་ཡིན་པའི་ཆ་ནས་ལོ་ངོ་སྟོང་ཕྲག་མང་པོའི་ལོ་རྒྱུས་ཡོད་པའི་རང་མི་རིགས་ཀྱི་སྐད་ཡིག་དེ་ལ་སྦྱང་བརྩོན་དང་བཀོལ་སྤྱོད་བྱས་ནས་རྒྱུན་འཛིན་བྱས་ཏེ། མི་རབས་ཕྱི་མ་གཞོན་ནུ་རྣམས་ལ་ངོ་སྤྲོད་བྱ་དགོས་པ་ནི་མི་ཐོག་སོ་སོ་ལ་འཕྲད་པའི་འོས་འགན་ཞིག་ཡིན། བོད་ཀྱི་སྐད་ཡིག་དེ་མི་ཉམས་འགྱུན་འཛིན་དང་གོང་སྤེལ་འདོད་ན་བོད་མི་རིགས་ཀྱིས་བོད་ཡིག་སྦྱངས་ནས་ཉམས་པ་སླར་གསོ་བྱས་ནས་ཁྱབ་གདལ་དུུ་གཏོང་དགོས་ལ། རྒྱལ་ཁབ་གཞན་དང་མི་རིགས་གཞན་གྱིས་བོད་ཡིག་དེ་སྲུང་སྐྱོབ་བྱེད་མི་སྲིད་ལ་བོད་ཡིག་སྦྱངས་ཡང་ཤིན་ཏུ་དཀའ། བོད་ཀྱི་སྐད་ཡིག་ནི་བོད་མི་རིགས་ཀྱི་ངོ་བོ་དང་བོད་རྒྱལ་ཁབ་ཀྱི་སྲོག་ལྟར་མཚོན་ལ། གལ་ཏེ་བོད་རྒྱལ་ཁབ་དགོས་ན་བོད་ལ་སྐད་ཡིག་ཅིག་དགོས། བོད་ཀྱི་སྐད་ཡིག་ནི་བོད་མི་རིགས་སམ་རྒྱལ་ཁབ་དེ་སྲ་བརྟན་དང་གསོན་གནས་ཐུབ་པར་བླ་སྲོག་ལྟ་བུ་ཞིག་ཡིན་ལ། མི་རིགས་དེ་ཡུན་རིང་གནས་དགོས་ན་མི་རིགས་ལ་སྐད་ཡིག་དགོས། ང་ཚོ་ལ་སྐད་ཡིག་ཡོད་པ་ཙམ་གྱིས་མི་ཕན་པར་དེ་དག་སྲུང་སྐྱོབ་བྱེད་མཁན་དང་སྦྱོང་མཁན་ཞིག་ངེས་པར་དུ་དགོས། བོད་རིགས་ང་ཚོ་སྐྱོ་དགོས་པ་ཞིག་ལ། མེས་པོ་དྲིན་ཅན་རྣམས་ཀྱིས་བཞག་པའི་སྐད་ཡིག་ཚད་ལྡན་དེ། རྒྱ་དམར་ཚོས་བོད་ཡུལ་སྐྱིད་པའི་ཡུལ་བཙན་འཕྲོག་བྱས་པ་ནས་བཟུང་། བོད་ཀྱི་སྐད་ཡིག་ཉམས་རྒུད་དུ་འགྲོ་ཡི་ཡོད་ལ། བོད་མི་རིགས་ཡང་རིམ་པས་ཡལ་འགྲོ་ཡི་ཡོད། རྒྱ་དམར་རྣམས་ཀྱི་བོད་མི་རིགས་རྩ་གཏོར་གཏོང་སླད་འཆར་གཞི་ངན་པ་གཏིང་ནས་ཐོག་མ་བོད་མི་རིགས་ཀྱི་བླ་སྲོག་སྐད་ཡིག་དེ་རྩ་མེད་བཟོ་རྒྱུའི་ཐབས་ཇུས་རིམ་པ་སྣ་ཚོགས་སྤེལ། སི་ཏཱ་ལིན་གྱིས། མི་རིགས་ཤིག་རྩ་མེད་གཏོང་དགོས་ན་སྔོན་ལ་མི་རིགས་དེའི་སྐད་ཡིག་བེད་སྤྱོད་མེད་པར་བཟོས་ན་མི་རིགས་དེ་རང་བཞིན་གྱིས་མེད་པ་འགྱུར་ཞེས་བཤད་པ་བཞིན། རྒྱ་ནག་གཞུང་གི་སྲིད་བྱུས་ཀྱིས་བོད་ཀྱི་སྐད་ཡིག་སོགས་སྦྱང་སའི་ལྟེ་གནས་ཁག་ལ་བཀག་སྡོམ་བྱས་དང་བྱེད་བཞིན་མཆིས། དཔེར་ན། མི་རིགས་སློབ་གྲྭ་ཆེན་མོས་གཙོས་བོད་ཀྱི་སྐད་ཡིག་སློབ་གླིང་མང་ཆེ་བའི་ནང་སློབ་མ་བསྡུ་ཚད་ཉུང་དུ་བཏང་བ། བོད་ལྗོངས་སློབ་གྲྭ་ཆེན་མོའི་ནང་བོད་ཡིག་ཆེད་སྦྱོང་འཛིན་གྲྭ་བསྡུ་མཚམས་བཞག་པ། བོད་ནང་ལ་བོད་ཀྱི་སྐད་ཡིག་སྦྱོང་བའི་གོ་སྐབས་ཉུང་བ་དང་། བོད་ཡིག་སྦྱངས་ན་ཁྲིམས་འགལ་དང་ཉེས་དམིགས་སུ་བརྩིས་ནས་བརྩོན་དུ་བཅུག་པ་སོགས་བོད་སྐད་ཉམས་རྒུད་དུ་གཏོང་གི་ཡོད། བོད་རིགས་རྣམས་འུ་ཐུག་ཐབས་ཟད་ནས་མཐར་༸རྒྱལ་བ་རིན་པོ་ཆེས་དབུས་པའི་བོད་རིགས་མང་པོ་ཞིག་གིས་བོད་ཀྱི་སྐད་དང་། རིག་གཞུང་། དེ་བཞིན་བོད་མི་རིགས་འཛམ་བུ་གླིང་འདིའི་ནང་གནས་ཐུབ་པའི་ཆེད་བཙན་བྱོལ་དུ་བྲོས་དགོས་ཆགས། ཡིན་ན་ཡང་བཙན་བྱོལ་དུ་ཡོང་ནས་བོད་རིགས་མང་ཆེ་བས་རང་གི་ལྟོ་གོས་ལས་མ་བསམ་པར་བོད་ཀྱི་སྐད་ཡིག་དང་ཆོས་སོགས་ལ་སྲུང་སྐྱོབ་བྱེད་མཁན་ཇེ་ཉུང་དུ་ཕྱིན་ཡོད། དེང་དུས་སུ་བཙན་བྱོལ་ནང་བོད་ཕྲུག་མང་པོ་ཞིག་གིས་རང་ཉིད་བོད་པ་ཡིན་ཡང་། བོད་ཡིག་སྦྱོང་མཁན་ཉུང་ལ་སོ་སོའི་སྐད་ཡིག་ལ་མི་དགའ་བ་དང་། དེར་མཐོང་ཆུང་གིས་འབད་བརྩོན་མི་བྱེད་མཁན་ཇེ་མང་དུ་ཕྱིན་པ་དང། གཞན་སྐད་ལ་མཐོང་ཆེར་འཛིན་ཏེ་་འབད་བརྩོན་ལྷོད་མེད་ངང་སྦྱོང་བཞིན་ཡོད། ད་དུང་རྒྱུན་དུ་ཤོད་སྲོལ་ལ་བོད་ཡིག་སྦྱངས་ན་འཚོ་བ་སྐྱེལ་ཐུབ་ཀྱི་མ་རེད་ཟེར་བ་སོགས་ཡོངས་བསྒྲགས་ཡིན། ཡང་བོད་པས་བོད་སྐད་མ་བཤད་པ་དང་བོད་སྐད་བརྒྱབ་ཀྱང་གཙང་མ་མི་བརྗོད་པ། བོད་ཡིག་ལ་དོ་སྣང་མི་བྱེད་པ་དང་བོད་ཡིག་ཡག་པོ་མི་སྦྱོང་བ། ཕ་མ་ཚོས་ཕྲུ་གུ་བོད་པའི་སློབ་གྲྭར་མི་གཏོང་བ་མ་ཟད། རྒྱུན་དུ་སྐད་ཀྱང་གཞན་གྱི་སྐད་སོགས་བརྒྱབ་ཏུ་བཅུག་ན། བོད་ཀྱི་སྐད་ཡིག་དང་འབྲེལ་བ་ཡོད་པའི་ལམ་དང་ལུགས་སྲོལ་བཟང་པོ་སྲུང་བརྩི་ཞུ་སྲོལ་ཡོད་པ་དེ་དག་ཀྱང་མེད་པ་ཆགས་པ་མ་ཟད། དེའི་ཚབ་ལ་རྒྱལ་ཁབ་གཞན་གྱི་ལམ་ལུགས་སྲོལ་སོགས་ལ་བརྩི་མཐོང་ཆེན་པོ་བྱེད་མཁན་མང་དུ་འགྱུར་བར་གདོན་མི་ཟའོ། ཀུན་གཟིགས་༸པཎ་ཆེན་རིན་པོ་ཆེའི་ཞལ་ནས། […]

བསྟན་འཛིན་ཆོས་དབྱངས། འཛིན་གྲྭ་དགུ་པ། སྦེལ་ཀོབ་སམ་བྷོ་ཊ་བོད་སློབ། འཛམ་གླིང་འདི་ཡི་ནང་ལ་ས་ཆ་འདྲ་མིན་ཡོད་པ་མ་ཟད་ས་ཆ་འདྲ་མིན་ལ་སྐད་ཡིག་ཀྱང་འདྲ་མིན་ཡོད། སྐད་ཡིག་ནི་མི་ཕན་ཚུན་བར་ལ་འབྲེལ་བ་དང་འབྲེལ་ལམ་བྱེད་པར་བེད་སྤྱོད་བྱེད་ཀྱི་ཡོད། ས་ཆ་ཁ་ཤས་ལ་སྐད་ཡིག་གཅིག་ཡོད། ཡིན་ནའང་ས་ཆ་ཁ་ཤས་ལུང་པ་གཅིག་ཡིན་ཡང་སྐད་ཡིག་མི་འདྲ་བ་བེད་སྤྱོད་བྱེད་ཀྱི་ཡོད། ང་ཚོ་བོད་པ་ཚོས་བོད་སྐད་ཐོག་ནས་སྐད་ཆ་ཤོད་ཀྱི་ཡོད། ཡིན་ནའང། བོད་ཀྱི་ས་ཆ་མི་འདྲ་བ་ལ་བོད་སྐད་ཤོད་སྟངས་མི་འདྲ་བ་ཡོད། ཡིན་ཡང་བོད་པ་མང་པོ་ཞིག་རྒྱ་གར་ནང་དུ་སྡོད་ཀྱི་ཡོད་ཙང་མི་མང་པོས་བོད་སྐད་དེ་རྒྱ་སྐད་དང་ཨིན་སྐད་གཉིས་མཉམ་སྡེབ་བྱས་ནས་ཤོད་ཀྱི་ཡོད། དེ་འདྲ་བྱས་ནས་དེང་སང་ང་ཚོ་བོད་པའི་ཕྲུ་གུའི་བོད་ཡིག་གི་གནས་ཚད་ཧ་ཅང་སྐྱོ་བོ་ཡོད། དེང་སང་གི་བོད་པའི་ཕ་མ་རྣམས་ཀྱིས་སོ་སོའི་ཕྲུ་གུ་རྒྱ་གར་གྱི་སློབ་གྲྭ་ཡག་པོའི་ནང་གཏོང་གི་ཡོད། ཕྲུ་གུ་དེ་ཚོ་སློབ་སྦྱོང་ཡག་པོ་ཆགས་ཀྱང་སོ་སོའི་ལུང་པའི་སྐད་ཡིག་ཤེས་ཀྱི་མེད། སོ་སོའི་སྐད་ཡིག་ཤེས་པ་དང་། གཞན་གྱི་སྐད་ཡིག་ཀྱང་ཤེས་ན་དེ་ནི་ཕུན་སུམ་ཚོགས་པ་ཡིན་པ་དང། གཞན་གྱི་སྐད་ཡིག་ཤེས་པ་དང་སོ་སོའི་སྐད་ཡིག་མ་ཤེས་ན། དེ་ནི་ངོ་ཚ་དགོས་པ་དང་ཞབས་འདྲེན་ཡིན། ང་ཚོ་ག་དུས་ཡིན་ཡང་སོ་སོའི་ཕ་ཡུལ་གྱི་སྐད་ཡིག་དེ་ནམ་ཡང་བརྗེད་རྒྱུ་མེད། བོད་མི་མང་པོ་ཞིག་ཕྱི་རྒྱལ་ལ་ཕྱིན་ནས་སོ་སོའི་ཕྲུ་གུ་ལ་བོད་སྐད་མ་བསླབ་པར་རྒྱལ་ཁབ་གཞན་གྱི་སྐད་ཡིག་སློབ་ཀྱི་ཡོད། ངས་ཕྱི་རྒྱལ་ནས་སླེབས་པའི་ཕྲུ་གུ་མང་པོ་མཐོང་བྱུང་། ཕྲུ་གུ་མང་པོས་བོད་ཡིག་ཡག་པོ་ཤེས་ཀྱི་མེད། ཡིན་ནའང་ཁ་ཤས་ཀྱིས་ཡག་པོ་བཤད་ཐུབ་ཀྱི་ཡོད། དེ་གང་ཡིན་ཟེར་ན་ཕ་མ་ཁ་ཤས་ཀྱིས་རང་ཉིད་ཀྱི་ཕྲུ་གུ་ཁོང་ཚོ་དང་མཉམ་དུ་བོད་སྐད་ཐོག་ནས་སྐད་ཆ་ཤོད་པ་དང་ཕྱི་རྒྱལ་ལ་ཡོད་པའི་བོད་ཡིག་འཛིན་གྲྭ་ལ་གཏོང་གི་ཡོད། ཕ་མས་དེ་འདྲ་བྱས་ནས་སོ་སོའི་ཕྲུ་གུ་དང་སོ་སོའི་སྐད་ཡིག་ལ་དོ་སྣང་བྱས་ན་ཡག་པོ་ཡོད། ང་ཚོ་བོད་པ་ལ་སྐད་ཡིག་གཅིག་ལས་མེད་པ་དེ་ཡང་ང་ཚོས་སྣང་མེད་དུ་བཏང་ན་ཡག་པོ་མེད། ང་ཚོའི་སྐད་ཡིག་ཡིན་ཡང་བེད་སྤྱོད་བྱེད་དགོས་པ་དང་། སོ་སོའི་སྐད་ཡིག་དེ་སྲུང་སྐྱོབ་བྱེད་དགོས་པ་དེ་ང་ཚོའི་ལས་འགན་ཡིན། ང་ཚོའི་སློབ་གྲྭའི་ནང་ལ་ཡང་སློབ་ཕྲུག་ཁ་ཤས་བོད་ཡིག་སྦྱོང་རྒྱུར་ཧ་ཅང་གི་དགའ་པོ་བྱེད་ཀྱི་ཡོད་པ་དང་། བོད་ཡིག་ཡང་ཧ་ཅང་ཡག་པོ་ཡོད། ཕྱོགས་གཞན་ཞིག་ནས་སློབ་ཕྲུག་ཁ་ཤས་སློབ་ཚན་གཞན་ལ་ཡག་པོ་ཡོད་ཀྱང་བོད་ཡིག་ལ་དོ་སྣང་མ་བྱས་པ་དང་བོད་ཡིག་སྦྱོང་འདོད་ཀྱང་བྱེད་ཀྱི་མེད། ཡིན་ཡང་ང་ཚོའི་སློབ་གྲྭ་ལ་བྱེད་སྒོ་འདྲ་མིན་གོ་སྒྲིག་བྱེད་ཀྱི་ཡོད། དེའི་ནང་ལ་བོད་ཡིག་དང་འབྲེལ་བའི་བྱེད་སྒོ་ཡང་གོ་སྒྲིག་ཞུས་ཀྱི་ཡོད། དཔེར་ན། བོད་ཡིག་གི་དག་ཆ། སྙན་ཚིག་ངག་འདོན། གཏམ་བཤད་སོགས་བྱེད་སྒོ་སྣ་མང་ཡོད། ཡིན་ཡང་བྱེད་སྒོ་ཚང་མའི་ནང་ནས་ང་རང་དག་ཆ་འགྲན་བསྡུར་བྱ་རྒྱུར་དགའ་པོ་ཞེ་དྲགས་ཡོད། གང་ཡིན་ཟེར་ན་དེའི་སྐབས་སུ་ང་རང་གིས་ཚིག་མང་པོ་ཤེས་ཀྱི་འདུག དེ་འདྲ་སོང་ཙང་ང་རང་འདྲ་བའི་སློབ་ཕྲུག་མང་པོ་དག་ཆ་འགྲན་བསྡུར་བྱ་རྒྱུར་དགའ་པོ་བྱེད་ཀྱི་ཡོད། ང་ཚོ་བོད་པ་ཞིག་ཡིན་པའི་ཆ་ནས་བོད་ཡིག་སྦྱོང་དགོས་པ་ང་ཚོའི་ལས་འགན་ཡིན། ང་ཚོའི་ཕ་ཡུལ་གྱི་ཡི་གེ་དེ་ང་ཚོས་མ་སྦྱངས་ན་ཉིན་གཅིག་ང་ཚོའི་སྐད་ཡིག་དེ་མེད་པ་ཆགས་ཀྱི་རེད། ང་ཚོའི་སྐད་ཡིག་དེ་མེད་པ་ཆགས་ན་ང་ཚོ་བོད་མི་ཡང་མེད་པ་ཆགས་ཀྱི་རེད། བོད་མི་མེད་པ་ཆགས་ན་ང་ཚོའི་བོད་ཀྱི་རིག་གཞུང་ཀྱང་མེད་པ་ཆགས། རིམ་བཞིན་ང་ཚོའི་ལྷ་ཡུལ་ལྟ་བུའི་བོད་ཀྱང་མེད་པ་ཆགས་སྲིད། དེ་འདྲ་སོང་ཙང་ང་ཚོ་བོད་མི་རྣམས་ས་ཆ་གང་དུ་གནས་ཀྱང་སོ་སོའི་ཕ་ཡུལ་གྱི་སྐད་ཡིག་དེ་ནམ་ཡང་བརྗེད་རྒྱུ་མེད། ང་ཚོའི་སྐད་ཡིག་སྲུང་སྐྱོབ་བྱ་རྒྱུ་ནི་ང་ཚོ་་བོད་པ་ཚང་མའི་ལས་འགན་རེད། ང་ཚོའི་དགེ་རྒན་མང་པོ་ཞིག་གིས་སློབ་ཕྲུག་རྣམས་ལ་སྒྲུང་དེབ་མང་པོ་ཀློག་དགོས་བཅས་གསུང་གི་ཡོད། དམིགས་བསལ་བོད་ཡིག་སྒྲུང་དེབ་ཀློག་ན་ཚིག་གསར་རྣམས་བེད་སྤྱོད་བྱས་ནས་རྩོམ་དང་སྙན་ངག་སོགས་འབྲི་ཐུབ་པ་དང་། ང་ཚོས་དེ་འདྲ་བྱས་ནས་སོ་སོའི་སྐད་ཡིག་ཡར་རྒྱས་གཏོང་ཐུབ། མི་མང་པོས་སོ་སོའི་རྩོམ་གྱི་ལམ་ནས་དག་ཆ་དང་བོད་སྐད་ཐོག་སྐད་ཆ་ཤོད་སྟངས་ཡང་ཡར་རྒྱས་འགྲོ་ཡི་ཡོད། ད་ལྟ་ང་ཚོ་བོད་མི་རྣམས་ལ་རང་བཙན་དང་སོ་སོའི་རྒྱལ་ཁབ་མེད་ན་ཡང་སོ་སོའི་སྐད་ཡིག་དེ་ཡག་པོ་སྦྱོང་དགོས། ས་ཆ་ཁ་ཤས་ལ་སྐད་ཡོད་ཀྱང་སྐད་ཡིག་མེད། ང་ཚོ་ལ་སོ་སོའི་ལུང་པར་ཡི་གེ་ཡོད་པ་དེ་ནམ་ཡང་བརྗེད་རྒྱུ་མེད། ཐོན་མི་སམ་བྷོ་ཊས་དཀའ་ལས་བརྒྱབས་ནས་ང་ཚོ་ལ་རྒྱ་གར་གྱི་སྐད་ཡིག་ནས་དཔེ་བླངས་ཏེ་བོད་ཀྱི་ཡི་གེ་བཟོས་པ་བཞིན། […]

བསྟན་འཛིན་ཆོས་འཛོམས་། འཛིན་གྲྭ་བཅུ་པ། དཔེ་སྟོན་སློབ་གྲྭ། གངས་རི་རྭ་བས་བསྐོར་བའི་ཞིང་ཁམས་སུ། ། ཕན་དང་བདེ་བ་མ་ལུས་འབྱུང་བའི་གནས། ། སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། ། ཞབས་པད་སྲིད་མཐའི་བར་དུ་བརྟན་འགྱུར་ཅིག ། ཅེས་བཀྲ་ཤིས་མཆོད་པའི་གུས་ཕྱག་སྔོན་དུ་བཏང་ནས་བཙན་བྱོལ་དུ་བཞུགས་པའི་ཀློག་པ་པོ་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག དེ་རིང་དབྱར་ཁའི་གུང་གསེང་ཚར་སོང་བས་བདག་གི་འཛིན་ཁང་ནང་གི་ཉིན་དང་པོ་དེ་ཆགས་ཀྱི་ཡོད་པ་དང་། ཚོར་བ་ཉོབ་སྣང་གིས་བཟི་བའི་སྐབས་སུ་སྐད་ཡིག་རྒན་ལགས་ཀྱིས་བརྗོད་གཞི་འདིའི་སྒང་ལ་རྩོམ་ཡིག་ཅིག་འབྲི་རུ་བཅུག་སོང་། འོན་ཀྱང་གུས་མོ་ང་རང་སམ་བྷོ་ཊའི་སློབ་གྲྭའི་ནང་སྦྱངས་བརྩོན་བྱེད་མཁན་ཞིག་ཡིན་པའི་ཆ་ནས། རང་ཉིད་ཀྱི་དཔུང་པའི་སྟེང་ན་ལས་འགན་དང་དམིགས་གསལ་གྱིས་བོད་རིགས་སྤུན་ཟླ་ཞིག་ཡིན་པའི་ཆ་ནས་བོད་ཡིག་སྦྱོང་དགོས་པའི་ལས་འགན་ནམ་རྒྱུ་མཚན་ནི་ལྷ་ལམ་ལས་རྒྱ་ཆེ་བ་ཞིག་བཤད་རྒྱུ་ཡོད། གུས་མོ་ངས་བརྗོད་བྱ་གཉིས་ཀྱི་སྟེང་རང་ཉིད་ཀྱི་མངར་སྐྱུར་ལྡན་པའི་མྱོང་ཚོར་དང་དེང་དུས་ཀྱི་དངོས་ཡོད་གནས་ཚུལ་གྱི་མྱོང་བ་གཞི་རུ་བཞག་ནས་རྩོམ་ཐུང་འདི་འབྲི་རྒྱུ་དབུ་འཛུགས་བྱེད་ཀྱི་ཡིན། དང་པོ་རང་ཉིད་ཀྱི་ངོ་མི་ཤེས་པ་དེང་གི་དུས་ལ་བལྟས་ན་ལྷག་པས་ལུང་པ་ཁྱེར་བ་ལྟར་ག་དུས་སླེབས་ཡོང་ག་དུས་འགྲོ་ཡོང་གི་གནས་སྟངས་དང་། འཇིག་རྟེན་འདི་འགྱུར་བ་ཤུགས་ཆེན་པོ་འགྲོ་བཞིན་པ་དེའི་ཐོག་གོ་རྟོགས་ཤུགས་ཆེན་པོ་ཡོད། དེས་རྐྱེན་པས་དམིགས་བསལ་གྱི་ང་ཚོ་བོད་མི་ཚོས་རང་གྱི་ཕྲུ་གུ་ཕྱིའི་རྒྱལ་ཁབ་ཁག་ཏུ་སློབ་སྦྱོང་བྱེད་པར་གཏོང་བའི་གནས་ཚུལ་མང་པོ་མཐོང་རྒྱུ་ཡོད། མ་ཟད་ངའི་སེམས་པའི་གཏིང་ནས་རྗེས་སུ་ཡི་རང་ཡོད། ཡིན་ནའང་ཕྱོགས་གཅིག་ནས་ཡག་པོ་བལྟས་ན་ཕྲུ་གུ་དེ་རྣམས་ཀྱིས་རྗེས་སུ་རང་ཉིད་ཀྱི་ཕ་སྐད་གཙང་མ་མ་ཤོད་པ་དང་། བོད་སྐད་ཤོད་པའི་སྐབས་སྐད་རིགས་བཞན་མང་པོ་བསྲེས་ནས་ར་མ་ལུག་གི་སྐད་ཡིག་བེད་སྤྱོད་བྱེད་པ་དང་། ཁོ་ཚོར་སོ་སོའི་ཆོས་དང་རིག་གཞུང་ཐོག་ལ་གོ་རྟོགས་ཧ་ཅང་ཞན་པོ་ཡོད་པ་གུས་མོ་ངས་མཐོང་ཐོས་བྱུང་སོང་། མདོར་བསྡུས་ནས་བཤད་ན་ང་རང་ཚོ་རང་ཉིད་བོད་པ་ཚད་ལྡན་ཞིག་ཡིན་པ་ཤེས་ཐུབ་ཀྱི་མེད། གནས་ཚུལ་དེ་ངས་ཤེས་དུས་བློ་ཕམ་གཏིང་ཟབ་ཅིག་བྱུང་། ངས་རྣམས་པ་ཚོར་རེ་བ་ཞུ་རྒྱུ་ནི་ང་རང་ཚོ་བོད་པ་ཞིག་ཡིན་པའི་ཆ་ནས་རང་ཉིད་ཀྱི་སྐད་ཡིག་དང་རིག་གཞུང་དེ་སྤོབས་པའི་ངང་ནས་སྲུང་སྐྱོབ་བྱ་ཐུབ་པ་ཞིག་བྱེད་དགོས། གཉིས་པ་༸གོང་ས་མཆོག་ཁོང་གིས་སློབ་ཕྲུག་རྣམས་ནི་མ་འོངས་བོད་ཀྱི་སོན་རྩ་ཡིན་པ་བརྗོད་དོན་ཙམ་མིན་པར་དེ་དག་གལ་ཆེན་གཟིགས་རྗེས་སློབ་ཕྲུག་རྣམས་ཀྱི་དོན་དུ་སྐུ་ངལ་ཚད་མེད་བསྐྱོན་གནང་གི་ཡོད། གོང་དུ་གསལ་བ་ལྟར་བོད་མི་རྣམས་བཙན་བྱོལ་དུ་སླེབས་པའི་རྗེས། ཕྲུ་གུ་མང་དག་ཅིག་ལ་ལས་ཀ་མེད་པ་དང་ཕ་མ་མེད་པ་སོགས་ཀྱི་དཀའ་ངལ་དེ་དག་གཟིགས་རྗེས་༸གོང་ས་མཆོག་ནས་དམིགས་ཡུལ་ཞིག་བཟུང་སྟེ་ཕྲུ་གུ་རྣམས་ལ་རོགས་རམ་བྱེད་ཆེད་བོད་ཁྱིམ་དང་སློབ་ཁག་མང་པོ་གསར་འཛུགས་གནང་བ་དང་༸གོང་ས་༸སྐྱབས་མགོན་མཆོག་ཁོང་གིས་བོད་མི་རིགས་ཀྱི་འཆི་གསོན་ནི་སྐད་ཡིག་དང་རིག་གཞུང་ལ་སོགས་མི་ཉམས་གོང་འཕེལ་དང་ཉམས་པ་སླར་གསོའི་ཆེད་དུ་སློབ་མ་རྣམས་གཤོག་རྩལ་གཉིས་ལྡན་གྱི་སློབ་མ་ཞིག་ཏུ་འགྱུར་བ་དང་། མི་རིགས་ཀྱི་སོན་རྩ་གཙང་མ་ཞིག་ཡོང་བར་རེ་བ་གནང་གི་ཡོད། ལྷག་པར་དུ་འུ་ཚོས་ཁོང་གིས་སྐུ་ལས་བསྐྱོན་གནང་བ་དེ་དག་ལ་གཅིག་བལྟས་ན་ང་རང་ཚོའི་ལས་འགན་དེ་འགྲན་ཟླ་བྲལ་བ་ཞིག་རེད། ང་རང་ཚོ་བོད་རིགས་གཅིག་ཡིན་པའི་ཆ་ནས་རང་ཉིད་ཀྱི་སྐད་ཡིག་དང་རིག་གཞུང་བདག་པོ་མ་རྒྱབ་ན་འུ་ཚོའི་ངོ་བོ་དེ་རྩ་མེད་དུ་འགྲོ་བའི་ཉེན་ཁ་ལ་སླེབས་ཡོད་པ་མ་ཟད་ང་ཚོའི་ལྟ་བའི་མིག་དང་ཁོག་པའི་སྙིང་ལྟ་བུ་ནི་༸གོང་ས་མཆོག་ལས་གཞན་མེད་ཅིང་། ང་ཚོས་ལས་རིགས་ཇི་འདྲ་ཞིག་བྱས་ཀྱང་མིག་དང་སྙིང་ནི་དགོས་ངེས་ཡིན་པ་་བཞིན་ང་ཚོར་༸སྐྱབས་གནས་མགོན་པོ་ཁོང་ལས་མེད་ཅིང་ཁོང་གི་བཀའ་དེ་ལྷག་བསམ་རྣམ་དག་ངང་སྒྲུབ་ཐུབ་པ་བྱ་དགོས། སློབ་མ་ང་རང་ཡང་བོད་པའི་སྐད་ཡིག་དང་རིག་གཞུང་ཐོག་ལ་སྤོབས་པ་ཆེན་པོ་ཡོད་ཅིང་། རྟག་ཏུ་འདི་ལ་སྲུང་སྐྱོབ་དང་ཉམས་སུ་བླངས་མཁན་ཞིག་ཡིན་པས་སློབ་ཕྲུག་གང་མང་ནས་ཀྱང་དེ་ལྟར་འཕེལ་བའི་སྨོན་ལམ་ཡང་ཡང་ཞུ། །

ཟླ་བ་བློ་བཟང་། འཛིན་གྲྭ་དགུ་པ་གདུགས། ཅོན་ཏ་ར་བོད་ཁྱིམ། སྤྱིར་གོ་ལ་ཟླུམ་པོ་འདིའི་ནང་མི་རིགས་ཕུན་སུམ་ཚོགས་པ་འདྲ་མིན་གནས་བཞིན་ཡོད། བདག་གི་ཁ་བ་ཅན་གྱི་ཡུལ་ལྗོངས་སུ་ཡུལ་གྲུ་གཞན་ལས་ལྷག་པའི་བརྗིད་ཉམས་དང་ལྡན་པའི་སྐད་ཡིག་ཡོད། ཡིན་ནའང་སྟབས་མ་ལེགས་པ་ཞིག་ལ་ངོས་ཀྱི་ལྟ་ན་སྡུག་པའི་ཕ་ཡུལ་བོད་ལྗོངས་དེ་དགྲ་བོ་རྒྱ་དམར་གྱི་ལག་ཏུ་ཤོར་བས་རྒྱ་དམར་དག་གིས་གཙོ་བོ་བོད་མི་རིགས་ཤུལ་མེད་གཏོང་ཐབས་སུ་དང་ཐོག་བོད་ཀྱི་སྐད་ཡིག་གཙང་དག་བཟོ་རྒྱུའི་ཆེད་སྒོ་གསུམ་གྱི་བྱ་སྤྱོད་ཀྱི་ཐོག་ནས་གྲལ་བསྒྲིགས་ཡོད། རང་དབང་ལུང་པའི་ནང་གནས་བཞིན་པའི་བྱེས་འབྱོར་མི་རིགས་སྤུན་ཟླ་རྣམས་ཀྱིས་དེའི་ཐོག་ལ་དགོངས་པ་རྒྱ་ཆེར་བཞེས་ཏེ། མི་རིགས་ཀྱི་སྲོག་རྩ་བོད་ཀྱི་སྐད་ཡིག་འདི་མི་ཉམས་རྒྱུན་འཛིན་བྱ་རྒྱུའི་ལས་འགན་ལྗིད་པོ་ཞིག་ཡོད། བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་སྐུ་ཚེ་ཧྲིལ་པོ་བོད་ཀྱི་ཆོས་དང་རིག་གཞུང། དེ་བཞིན་སྐད་ཡིག་དང་གོམས་གཤིས་ལ་སོགས་པ་མ་བརླག་པའི་ཆེད་དུ་སྐུ་ངལ་ཚད་མེད་བསྐྱོན་ཏེ་རྒྱ་གར་གཞུང་དང་འབྲེལ་བ་གནང་སྟེ། རྒྱ་གར་ནང་དུ་བོད་མིའི་གཞིའི་ཆགས་སློབ་གྲྭ་ཁག། དགོན་སྡེ་ཁག བོད་མིའི་སྒྲིག་འཛུགས་ཀྱི་ལྷན་ཁང་བཅས་འཛུགས་ཐུབ་པ་བྱུང་ཡོད། རང་དབང་ལུང་པ་ཁག་གི་ནང་གནས་བཞིན་པའི་བོད་མི་རྩམ་གཟན་ཡོད་དོ་ཅོག་ལ། ང་རང་ཚོས་རང་དབང་ལུང་པའི་ནང་རང་ཉིད་ཀྱི་ཆོས་དང། རིག་གཞུང། སྐད་ཡིག་སོགས་མི་ཉམས་གོང་འཕེལ་དང་། དེ་དག་བདག་གཅེས་ཐུབ་ཆེད་ང་རང་ཚོར་གོ་སྐབས་བཟང་པོ་ཞིག་ཐོབ་པར་ཆུད་ཟོས་སུ་མི་བཏང་བར་དེ་དག་ལ་སློབ་སྦྱོང་བྱས་ཏེ། སྲུང་སྐྱོབ་བྱ་རྒྱུ་འདི་བོད་པ་ཞིག་ཡིན་པའི་ཆ་ནས་ལས་འགན་གལ་ཆེན་པོ་ཞིག་ཆགས་ཡོད། བོད་པའི་མི་ཡིས་རང་གི་ཆོས་དང་རིག་གཞུང། སྐད་ཡིག་སོགས་མ་སྦྱངས་ན་རྒྱལ་ཁབ་གཞན་གྱི་མི་ཡིས་ག་ལ་སྦྱངས། ནམ་ཞིག་བོད་པའི་མི་ཡིས་ཕྱི་རྒྱལ་མགོ་སེར་ལས་རང་གི་ཆོས་དང། རིག་གཞུང། སྐད་ཡིག་སོགས་སློབ་དགོས་ཤར་ཚེ། ང་ཚོ་ངོ་ཚའི་གནས་སུ་ལྷུང་ངེས་རེད། གཞིས་ལུས་སྤུན་ཟླ་རྣམས་ཀྱིས་དགྲ་བོ་རྒྱ་དམར་གྱིས་གདུག་རྩུབ་དང་དྲག་གནོན་ཇི་ལྟར་བྱས་ཀྱང་། གདུག་རྩུབ་དང་དྲག་གནོན་དེ་དག་ལ་མ་བལྟོས་པར་ཉིན་མཚན་སྦྲེལ་ཏེ་རང་གི་ཆོས་དང་རིག་གཞུང་། སྐད་ཡིག་སོགས་ལ་བདག་གཅེས་སྲུང་སྐྱོབ་བྱེད་བཞིན་ཡོད། རྒྱ་དམར་ཀླ་ཀླ་དག་གིས་བོད་འདི་འཆར་གཞི་ལྡན་པའི་ཐོག་ནས་རྒྱ་ཡུལ་དུ་སྒྱུར་ཐབས་སུ། བོད་ནང་སྔོན་འགྲོ་ནས་བོད་ཀྱི་སྐད་ཡིག་བསླབས་མི་ཆོག་པར་རྒྱ་ཡིག་རྐྱང་རྐྱང་བསླབ་རྒྱུ་བཟོས་ཏེ། བོད་ཀྱི་སྐད་ཡིག་ཉམས་བརླག་གཏོང་རྒྱུའི་ངན་བྱུས་བརྩམས་ཡོད། བོད་ནང་དུ་བོད་པའི་རྩོམ་སྒྲིག་པ་དང། སྒྱུ་རྩལ་པ། བོད་པའི་སྐད་ཡིག་ལ་ཤ་ཞེན་ཡོད་མཁན་མང་པོ་ཞིག་ལ་ནག་ཉེས་ཁ་གཡོགས་བྱས་ཏེ་འཛིན་བཟུང་གིས་བཙོན་དུ་བཅུག་སྟེ། ཉེས་རྡུང་ཚད་མེད་མྱང་མུས་ཡིན། མདོར་ན་རྒྱལ་ཁབ་གཅིག་ཡུན་རིང་གནས་དགོས་ན་རྒྱལ་ཁབ་དེ་ཡི་སྐད་ཡིག་ཀྱང་གནས་དགོས་པ་ཡིན་ཞིང། རྒྱ་མིས་བོད་ནང་བོད་ཀྱི་རྩ་ཆེན་ཆོས་དང་རིག་གཞུང་། སྐད་ཡིག་ལ་སོགས་པ་རྩ་མེད་གཏོང་བཞིན་ཡོད་ན། ང་རང་ཚོ་རང་དབང་ལུང་པའི་ནང་ཡོད་པའི་བྱེས་འབྱོར་སྤུན་ཟླ་རྒན་བྱིས་ཡོངས་ནས་རང་གི་ཆོས་དང། རིག་གཞུང། སྐད་ཡིག་སོགས་ལ་དོ་སྣང་བྱས་ཏེ་སྦྱོང་དགོས་རྒྱུ་ནི་ང་ཅག་བོད་རིགས་སློབ་མ་རྣམས་ཀྱིས་འགན་ཞིག་རེད་ཨང།