བསྟན་འཛིན་ཟླ་དཀར། དཔེ་སྟོན་སློབ་གྲྭ། འཛིན་གྲྭ་བརྒྱད་པ། དེང་དུས་བོད་ཕྲུག་རྣམས་ཆུང་བྱིས་པའི་དུས་ནས་སོ་སོའི་རིག་གཞུང་དང་དང་བོད་སྐད་གློག་བརྙན་ལ་ལྟ་རྒྱུར་དགའ་བ་ལས་ལྷག་པ་མི་རིགས་གཞན་གྱི་གློག་བརྙན་དང་གཞས་ཞབས་བྲོར་དགའ་བས། བོད་ཀྱི་སྐད་ཡིག་རིམ་གྱིས་ཉམས་རྒུད་དུ་འགྲོ་བཞིན་ཡོད། སྔར་དཔེ་སྟོན་སློབ་གྲྭའི་སློབ་ཕྲུག་ཚོས་བོད་པའི་གློག་བརྙན་ལྟ་བ་དང་རྒན་ལགས་ཚོས་ཀྱང་བོད་པའི་གློག་བརྙན་གང་མང་སྟོན་པའི་བཀའ་དྲིན་ལ་བརྟེན་ནས་ཁོ་ནས་བོད་སྐད་དྭངས་ཤིང་གཙང་བ་བཤད་ཐུབ་པ་དང། བོད་ཡིག་གི་རྩོམ་ཡིག་དང་ཚིག་དུམ་རེ་འབྲི་རྒྱུར་དཀའ་ངལ་འཕྲད་ཀྱི་མེད། དཔེ་སྟོན་སློབ་གྲྭའི་བོད་རིགས་རྒན་ལགས་ཚོས་བོད་ཡིག་སློབ་ཚན་ཧ་ཅང་ཞིབ་ཚགས་འཁྲིད་པ་དང། སློབ་ཕྲུག་ཚོས་ཀྱང་རྒན་ལགས་ཀྱིས་གནང་བའི་བོད་ཡིག་སློབ་ཚན་ཁག་གི་ནང་ནས་རྣ་བར་སྙན་ཞིང་ཡིད་དུ་འོང་བའི་ཚིག་གསར་ཧ་ཅང་མང་པོ་སློབ་ཁྲིད་གནང་སྟེ་ང་ཚོས་ཤེས་ཐུབ་ཀྱི་ཡོད། དཔེར་ན། བོད་ཡིག་གི་སློབ་ཚན་ནང། བརྩོན་འགྲུས་གནང་དང་ལེགས་གྲུབ་ཐུབ། འོས་འདེམས། རེ་བའི་སྐར་འོད། ཊེ་ཧོར་གྱིས་རི་བོའི་རྩེ་ནས་སྙན་ངག་བརྩམས། མངོན་མེད་ཀྱི་མཛད་རྗེས་སོགས་བོད་ཡིག་སློབ་ཚན་ཧ་ཅང་མང་པོ་ཁྲིད་གནང་གི་ཡོད། སྤྱིར་བཏང་དེང་དུས་སློབ་གྲྭ་ཁག་གི་ནང་བོད་ཕྲུག་ཚོས་སོ་སོའི་མི་རིགས་ཀྱི་སྐད་ཡིག་གཙང་མ་ཞིག་མ་བཤད་པར་སྐད་ར་མ་ལུག་ཤོད་ཀྱི་ཡོད་པ་ངས་མཐོང་ཐོས་བྱུང། དེང་དུས་ཀྱི་ཕ་མ་ཚོས་སོ་སོའི་ཕྲུ་གུ་རྣམས་བོད་པའི་སློབ་གྲྭར་གཏོང་རྒྱུའི་ཚབ་ལ་ཨིན་ཇིའི་སློབ་གྲྭར་མངགས་ནས་བོད་ཕྲུག་དེའི་རིགས་སོ་སོའི་སྐད་ཡིག་གི་རྨང་གཞི་ཡང་མེད་པའི་གནས་སུ་གྱར་ཡོད། ཕྱི་རྒྱལ་དུ་འཚར་ལོངས་བྱུང་བའི་བོད་ཕྲུག་རྣམས་ཀྱིས་བོད་སྐད་རྩ་བ་ནས་རྒྱག་ཤེས་ཀྱི་མེད། ང་ཚོ་བོད་ཕྲུག་ཚོས་གཞན་གྱིས་བཙན་དབང་བཏང་བའི་འདུ་ཤེས་དོར་ཏེ་༸གོང་ས་མཆོག་གི་བཀའ་དགོངས་བཞིན་བོད་པའི་སྐད་ཡིག་དང་ཆོས་དང་རིག་གཞུང་ལ་སེམས་གཏིང་ནས་དགའ་ཞེན་ཡོད་པའི་ཐོག་ནས་སྦྱོང་དགོས་ཀྱི་ཡོད། ང་ཚོ་བོད་ཆོལ་ཁ་གསུམ་གྱི་བོད་རིགས་སྤུན་ཟླ་རྣམས་ཀྱང་རྒྱ་དམར་གྱིས་བོད་ལ་བཙན་བཟུང་བྱས་པའི་དབང་གིས་བོད་མི་རྣམས་གཞིས་བྱེས་གཉིས་སུ་ཁ་གྱེས་པ་དང་བོད་ཀྱི་སྐད་ཡིག་དང་རིག་གཞུང་ལའང་གནོད་སྐྱོན་ཚབས་ཆེན་ཐེབས་ཡོད། དེ་ཡང་རྒྱ་དམར་གྱིས་བོད་ཀྱི་སྐད་ཡིག་དང་རིག་གཞུང་རྩ་མེད་དུ་གཏོང་རྒྱུའི་ངན་བྱུས་བཤམས་པ་ནས་བཟུང་བོད་པའི་སྐད་ཡིག་དང་རིག་གཞུང་ཉམས་པ་དང་བོད་མི་རིགས་ལའང་འགྱུར་བ་ཤུགས་ཆེན་ཐེབས་ཡོད། བོད་ཀྱི་སྐད་ཡིག་དང་རིག་གཞུང་ཉམས་རྒུད་དུ་སོང་ན་མི་རབས་ནས་མི་རབས་བར་གྱི་མཐུན་སྒྲིལ་གྱི་འབྲེལ་བ་དང་དེ་ཡང་ཉམས་པ་མ་ཟད་བོད་མི་རིགས་རྩ་མེད་དུ་འགྲོ་རྒྱུ་ཡིན་པ་ཏན་ཏན་རེད། བོད་མི་རིགས་ཀྱི་སྐད་ཡིག་དེ་མེད་ན་མི་རིགས་དེ་ཡང་མིང་ཙམ་ལས་ལྷག་མེད། ང་ཚོ་བོད་པ་རྣམས་ནི་སོ་སོའི་ལུང་པའི་ནང་མུ་གེ་བྱུང་བ་དང་ཁྲིམས་དང་འགལ་བའི་ལས་ཀ་བྱས་ཏེ་བཙན་བྱོལ་དུ་ཡོང་དགོས་བྱུང་བ་ཞིག་མ་རེད། རྒྱ་དམར་གྱི་བཙན་དབང་འོག་ནས་ང་ཚོའི་མི་རིགས་ཀྱི་ཐོབ་ཐང་དང་སོ་སོའི་མི་རིགས་ཀྱི་ཆོས་དང་རིག་གཞུང་སྲུང་སྐྱོབ་ཐུབ་རྒྱུའི་ཆེད་དུ་རང་དབང་ལུང་པར་བཙན་བྱོལ་དུ་ཡོང་དགོས་བྱུང་བ་རེད། དེར་བརྟེན་ང་ཚོ་བཙན་བྱོལ་དུ་ཡོད་པའི་བོད་རིགས་གཞོན་སྐྱེས་ཕོ་མོ་རྣམས་ཀྱིས་སོ་སོའི་འཕྲལ་སེལ་ལྟོ་གོས་གཏམ་གསུམ་དང་རང་དོན་གཅིག་པོར་མ་བསམ་པར་བོད་པའི་སྐད་ཡིག་དང་རིག་གཞུང་སྲུང་སྐྱོབ་བྱེད་རྒྱུ་ལས་འགན་གཙོ་བོ་ཞིག་ཡིན་པ་དུས་རྟག་ཏུ་སེམས་ནང་དྲན་ཞིང་ལག་བསྟར་གནང་དགོས། ང་ཚོ་བོད་མི་རྒན་གཞོན་དར་གསུམ་གྱིས་རང་གི་བོད་སྐད་གཙང་མ་བཤད་པར་མི་རིགས་གཞན་གྱི་སྐད་ཡིག་ལ་སྐྱབས་བཅོལ་དགོས་པ་ནི་ངོ་ཚའི་གནས་ཤིག་ཡིན་པ་ཤེས་པར་བྱས་ཏེ་བོད་ཡིག་ལ་ལྷག་པར་དུ་དོ་སྣང་དང་སྦྱང་བརྩོན་བྱེད་རྒྱུ་དེ་ཧ་ཅང་གལ་འགངས་ཆེན་པོ་ཡིན། སྔར་དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོའི་སྐུ་དུས་སུ་སློབ་དཔོན་ཐོན་མི་སམ་བྷོ་ཊ་ཁོང་གིས་རྒྱ་གར་འཕགས་པའི་ཡུལ་དུ་ཕེབས་ནས་སྐུ་ལས་ཚད་མེད་བསྐྱོན་ཏེ་བོད་པའི་སྐད་གདངས་ལ་ཞིབ་འཇུག་གནང་ནས་བོད་མི་རིགས་ཚང་མས་ཀློག་ཐུབ་པ་དང་གོ་ཐུབ་པའི་བོད་ཡིག་དང་ཡིག་གཟུགས་མཛད་པ་ཚང་མས་མཁྱེན་གསལ་རེད། སྐབས་དེ་དུས་ནས་བཟུང་ང་ཚོ་ནི་སྐད་ཡིག་གཉིས་ལྡན་གྱི་རྒྱལ་ཁབ་ཅིག་ཡིན། ང་ཚོ་བོད་མི་ཚོའི་ལྟ་བའི་མིག་དང། ཁོག་པའི་སྙིང་ལྟ་བུ་༸གོང་ས་སྐྱབས་མགོན་ཆེན་པོ་མཆོག་གིས་ཀྱང་དུས་ནམ་ཡིན་ཡང་ང་ཚོ་བོད་ཕྲུག་ན་གཞོན་རྣམས་ལ་རང་མི་རིགས་ཀྱི་སྐད་ཡིག་དང་ཆོས་དང་རིག་གཞུང་བཅས་ལ་དོ་སྣང་དང་སློབ་སྦྱོང་བྱེད་དགོས་ཤིང་སྲུང་སྐྱོབ་བྱེད་དགོས་པའི་བཀའ་སློབ་ཡང་ཡང་བསྩལ་གནང་གི་ཡོད། དེར་བརྟེན་ང་ཚོ་རྒྱ་གར་དང་ཡུལ་གྲུ་གཞན་ནང་བཙན་བྱོལ་དུ་གྱར་བའི་བོད་ཕྲུག་ཚང་མས་བོད་པའི་སྐད་ཡིག་དང་རིག་གཞུང་ལ་སྔར་ལས་ལྷག་པའི་འབད་བརྩོན་བྱེད་དགོས་སོ། ༸ཀུན་གཟིགས་པཎ་ཆེན་རིན་པོ་ཆེ་མཆོག་གིས་ཀྱང་བོད་རིགས་རྣམས་ལ་མི་རིགས་གཞན་གྱི་སྐད་ཡིག་ཤེས་ན་དེ་ནི་སོ་སོའི་འཇོན་ཐང་དང་རྒྱན་ཆ་རེད། འོན་ཀྱང་རང་མི་རིགས་ཀྱི་སྐད་ཡིག་མ་ཤེས་ན་ངོ་ཚ་དགོས་པ་ཞིག་རེད། ཅེས་བཀའ་སློབ་གནང་བ་དེ་ང་ཚོས་དུས་རྟག་ཏུ་ཡིད་ལ་དྲན་དགོས། ཀུན་དང་མཐུན་པ་རྩ་བ་ཡིན་མོད་ཀྱང། ། མཐོང་ཚད་ལད་མོ་བྱས་ན་ཀླད་མེད་ཡིན། ། སྐད་ཡིག་སྣ་ཚོགས་ཤེས་ན་བཟང་མོད་ཀྱང། ། རང་གི་ཕ་སྐད་བརྗེད་ན་ངོ་ཚ་ཡིན། ། ཞེས་རྗེ་ཞང་སྟོན་ནས། །