གཞི་རིམ་འོག་མའི་བོད་དགེ། རྡོ་སྦིས་ཟླ་བ་ཚེ་རིང་། མེས་དབོན་གཙུག་ལག་དཔེ་སྟོན་སློབ་གྲྭ། སྔོན་དུ་གླེང་བའི་གཏམ། ཡོངས་གྲགས་ཀྱིས་སྐད་ཡིག་ནི་མི་རིགས་དེའི་དབུགས་རྔུབ་འབྱིན་བྱེད་ཀྱི་ཚེ་སྲོག་ངོ་མ་དེ་ཡིན་ཟེར་ནས་ཆུང་བྱིས་པ་སྣབས་ལུག་ཡན་ཆད་དང་རྒན་བགྲེས་པོ་མགོ་དཀར་མན་ཆད་ནས་ཁ་རུ་ཡིག་དྲུག་བཞིན་བགྲེང་གི་ཡོད་ནའང། དོན་དངོས་ཀྱིས་དེ་ལྟར་གལ་ཆེན་འགེངས་ཆེན་དུ་སེམས་མེད་པའི་གཟོད་ལྟ་ཞིག་ཡོད་དེ། སློབ་གྲྭ་ཁག་ཏུ་བོད་སྐད་ཡིག་གི་ཁྲིད་ཆས་དང་བོད་སྐད་ཡིག་འཛིན་གྲྭ་(language class)་སོགས་ཀྱི་ཆ་རྐྱེན་ནི་སྐད་ཡིག་གཞན་པ་ལས་ཧ་ཅང་ཞན་ཅིང་། སློབ་གྲྭ་ཁ་ཤས་ལ་ཁྱོན་ནས་མེད་ཟེར་ཀྱང་ཆོག མ་ཟད་གོང་རིམ་ནས་ཀྱང་སློབ་ཚན་གཞན་པ་ལ་འགྲོ་གྲོན་བཏང་སྟངས་ཤིག་བོད་ཀྱི་སྐད་ཡིག་དང་དེའི་ཁྲིད་ཆས་སམ་ཡོ་བྱད། དེབ་སོགས་ཀྱི་ཐོག་ལ་དེ་བཞིན་གྱི་འགྲོ་གྲོན་བཏང་མ་ཐུབ་པའི་ཚོར་བ་ཞིག་གིས་གཅུན་ནས་ཡོང་གི་འདུག གང་ཡིན་ཟེར་ན། ཁ་སང་དེ་རིང་གི་བོད་སྐད་ཡིག་གི་གནས་སྟངས་ལ་བསམ་བློ་རེ་བཏང་ཚེ་འགོ་སྐད་ཆ་འཆད་སྟངས་ནས་སློབ་གྲྭ་རུ་བསླབ་དགོས་ཙང་བོད་སྐད་ཡིག་ཁྲིད་ཐབས་ཀྱི་ཡོ་བྱད་སོགས་སྐད་ཡིག་གཞན་ལས་མཐུན་རྐྱེན་ཡག་ཏུ་བསྐྲུན་མ་ཐུབ་རུང་། དེ་དག་དང་དོ་མཉམ་པའི་མཐུན་རྐྱེན་ཞིག་གནང་དགོས་པ་ནི་ཐེངས་འདིའི་བསམ་བློ་སྔོན་དུ་སོང་བའོ། ། དང་པོ། བོད་སྐད་ཡིག་གི་ཉན་རྩལ་ཡར་རྒྱས་གཏོང་སྟངས། སྤྱིར་སྐད་ཡིག་གང་རུང་ཞིག་ཡུན་རུང་དེའི་ཉན་རྩལ་ཡར་རྒྱས་གཏོང་བར་སློབ་གྲྭའི་ཁོར་ཡུག་དང་ཁྱིམ་གྱི་ཁོར་ཡུག་གཉིས་ལ་བརྟེན་དགོས་པ་ཆོས་ཉིད་ཅིག་ཡིན་ནའང་། འུ་ཚང་གི་ཚོགས་སྤྱི་འདིས་སློབ་གྲྭའི་ཁོར་ཡུག་གཅིག་པོར་བརྟེན་པ་ལས་ཁྱིམ་གྱི་ཁོར་ཡུག་དེ་སྣང་མེད་དང་དོན་མེད་དུ་སོམས་པའི་སྲོལ་ཞིག་འདུག་སྟེ། ཕ་མ་དང་སྤུན་གཉེར་ནས་བཟུང་སྟེ་འགོ་སྐད་ཆ་(ར་མ་ལུག་གི་སྐད་)འཆད་སྟངས། ལྟད་མོ་(ཧིན་དྷི། དབྱིན་ཇི། རྒྱ་སྐད། )གཟིགས་སྟངས་སོགས་ནི་ཕྲུ་གུས་བོད་སྐད་ཡིག་གི་ཉན་རྩལ་ཡར་རྒྱས་གཏོང་བར་བཟློག་ཕྱོགས་རྐྱང་རྐྱང་དུ་ལངས་ཡོད་པ་འདི་རེད། འདི་འདྲའི་ཁོར་ཡུག་ཅིག་གི་ནང་དུ་བོད་སྐད་ཡིག་གི་ཉན་རྩལ་ཡར་རྒྱས་གཏང་རྒྱུ་ཟེར་ན་ཅུང་ཙམ་འུར་ཚ་བོ་མི་འདུག་གམ། གཅིག་བྱས་ན། ཁོང་ཚོས་རེ་བ་ཡོད་ཚད་སློབ་གྲྭའི་ཁོར་ཡུག་ལ་བཅོལ་ཡོད་སྲིད་མོད། འོན་ཏེ་བོད་ཀྱི་སྐད་ཡིག་ལ་བསམ་བློ་བཏང་ནས་བཤད་ཚེ་སློབ་གྲྭའི་ཁོར་ཡུག་ཀྱང་དེ་ག་རང་ལས་མ་འདས། ཅིའི་ཕྱིར་ཟེར་ན། འཚོ་བའི་དགོས་མཁོའི་དབང་གིས་སློབ་གྲྭ་མང་ཆེ་བ་རུ་བོད་ཀྱི་སྐད་ཡིག་གཅིག་པོ་མ་གཏོགས་སློབ་ཚན་(འཛིན་རིམ་དགུ་བ་ཡར་འདབ་ཀྱི་ཨང་རྩིས་དང་ཚན་རིག་སོགས། )གཞན་དག་དབྱིན་ཇིའི་བརྒྱུད་ལམ་ཡིན་པས་སོ། ཡང་གཅིག་བཤད་ན། ལག་པའི་ལྡོག་སྒྲ་གྲག་པར་ལག་ཟུང་གཉིས་ཀ་དགོས་པ་ལྟར་ཉན་རྩལ་ཡར་རྒྱས་གཏོང་བར་སློབ་གྲྭ་དང་ཁྱིམ་གྱི་ཁོར་ཡུག་གཉིས་ཟུང་འབྲེལ་བྱས་ཏེ་ཕྲུ་གུའི་ཉན་རྩལ་ཡར་རྒྱས་གཏང་དགོས་པ་རེད་མ་གཏོགས། སློབ་གྲྭ་ཁོ་ནར་རེ་བ་བཅིང་བ་ནི་རེ་བ་ཆིག་རྐྱང་ཅན་དང་ཆ་མ་ཚང་བའི་སློབ་གསོ་དེ་རེད། མ་གཞི་ནས་སློབ་གྲྭ་ནི་ཕྲུ་གུའི་ཤེས་ཡོན་བསླབ་ས་དེ་དང་ནང་ཁྱིམ་ནི་ཕྲུ་གུས་སློབ་གྲྭ་ནས་གང་བསླབ་པ་དེ་སྦྱོང་བརྡར་བྱེད་སའི་གང་སྟེགས་ཀྱི་ཁོར་ཡུག་གཙོ་བོ་དེ་ཡིན་པའི་ན། ཁྱིམ་གྱི་ཁོར་ཡུག་དང་སློབ་གྲྭའི་ཁོར་ཡུག་གཉིས་ཕྱར་གྲུ་མཉམ་འདེགས་ཀྱི་ཚུལ་དུ་དགོས་པ་ནི་ཁ་ཚ་དགོས་གཏུག་གི་ལས་ཁུར་ཞིག་ཡིན་པས། གཤམ་དུ་བདག་གིས་དེ་ཕྱོགས་ཀྱིས་ཕྲུ་གུའི་ཉན་རྩལ་ཡར་རྒྱས་གཏོང་ཐབས་སུ་བསམ་ཚུལ་ཙམ་འབྲི་བར་བྱའོ། ། ༡ ཁྱིམ་གྱི་ཕ་མས་རང་གི་ཕྲུ་གུའི་བོད་སྐད་ཡིག་གི་ཉལ་རྩལ་ཡར་རྒྱས་ཡོང་ཆེད་བོད་སྐད་གཙང་མ་དང་ངག་འཇམ་ཤ་ཚའི་ཐོག་ནས་བཀའ་མོལ་གནང་སྟེ་ཕྲུ་གུའི་རྣ་དབང་ལ་ཉན་རྩལ་གྱི་ས་བོན་གཙང་མ་ཐོག་མར་འདེབས་དགོས། གང་ཡིན་ཟེར་ན། ཕ་མ་ནི་ཕྲུ་གུའི་དགེ་རྒན་དང་པོའམ་ཕྲུ་གུ་དང་མཉམ་གཤིབ་ཀྱི་དུས་ཚོད་རང་ཤོས་དེ་ཡིན་པའི་ན། ཕ་མའི་བཀའ་མོལ་གནང་སྟངས་དང་འགྲོ་འདུག་སྥྱོད་གསུམ་གང་ཡིན་པ་དེ་ཕྲུ་གུའི་སེམས་ལ་འཇགས་སླ་བར་མ་ཟད། དེ་བཞིན་གྱིས་ལད་ཟློས་གནང་རྒྱུ་ནི་ཆོས་ཉིད་ཅིག་ཡིན་པས། ཕ་མས་རང་གི་ཕྲུ་གུའི་བོད་སྐད་ཡིག་གི་ཉལ་རྩལ་ཡར་རྒྱས་ཡོང་ཆེད་རང་ཉིད་ཀྱི་སྣང་བ་གང་ཤར་དང་དགའ་ཕྱོགས་མོས་ཕྱོགས་བློས་བཏང་གིས་ཕ་མ་བཟང་བོ་ཞིག་གི་མིག་དཔེ་སྟོན་རྒྱུ་ནི་ཁྱེད་རང་ཕ་མ་ཞིག་ཡིན་པའི་ལས་འགན་ཡིན་ནོ། ། ཡང་གཅིག་བཤད་ན། འུ་ཚང་གི་ཕ་མ་ཚོས་རེ་བ་ཆེན་པོ་ཞིག་བཅིང་ཡོད་ནའང་། དེ་ཚོད་ཀྱིས་བློས་བཏང་(དུས་ཚོད། སྤྲོ་སྐྱིད་ཀྱི་དུས་ཚོད། འགྲོ་གྲོན། )ཅི་ཡང་མི་བྱ་བར་རེ་བའི་འབྲས་བུ་སྨིན་པར་ངང་སྒུག་བྱེད་པ་ནི་ཡང་དག་པའི་ཕ་མ་ཞིག་གི་བསམ་བློ་མ་སྨིན་པའི་ཏན་རྟགས་རེད་དོ། ། ༢ ཕ་མས་རང་གི་ཕྲུ་གུའི་ཉལ་རྩལ་ཡར་རྒྱས་ཡོང་བར་གནའ་སྒྲུང་འཆད་པ་དང་དོན་སྙིང་ལྡན་པའི་ཁ་བའི་མི་སྣའི་ལོ་རྒྱུས་འཆད་པ། […]

གཞི་རིམ་འོག་མའི་དགེ་རྒན་འཇིག་མེད། ཀོ་ལེ་གྷལ་སཾ་བྷོ་ཊ་ཉིན་སློབ། ལྷག་པའི་ལྷ་དང་ངག་གི་ལྷ་ཡི་མཆོག། ། བདག་དང་འབྲེལ་བའི་སྨྱུག་འཛིན་སུ་མཆིས་ལ། སྐུ་གསུང་ཐུགས་ཀྱི་བྱིན་རླབས་རབ་བསྩལ་ནས། ། ངག་གི་དཔལ་ལ་རྫོགས་ལྡན་ཐོབ་པར་ཤོག། ། འཆད་བརྩོན་རྩོམ་ལ་མི་ལོ་ཉེར་གཉིས་རིང་། ། ངལ་བཞིན་འབད་པའི་མྱོང་བའི་ཕོར་པའི་ནང་། ། ཚད་ལྡན་མཁས་པའི་གསུང་གི་བདུད་རྩིའི་བཅུད། ། འབུལ་ལོ་གསོལ་ཅིག་སྐལ་ལྡན་དོན་གཉེར་ཅན། ། རང་གཞུང་དཔལ་ལྡན་ཤེས་རིག་ལས་ཁུངས་ཀྱི། ། མགོ་ལས་ཡོངས་དང་ཁྱད་པར་འདི་འབྲེལ་བའི། ། ཀུན་ལ་ཕན་པའི་ལས་གཞི་འདི་དག་ལ། ། ཡི་རིང་བསྔགས་བཞིན་ངལ་བས་འབད་པར་བྱ། ། དགེ་རྒན་རང་ཉིད་འབྲི་རྩལ་ལ་བྱང་བ་ཞིག་དགོས། དགེ་རྒན་རང་ཉིད་འབྲི་རྩལ་ལ་བྱང་བ་ཞིག་མིན་ན་སློབ་ཕྲུག་རྣམས་གྱི་འབྲི་རྩལ་ཡར་རྒྱས་སུ་ཇི་ལྟར་གཏོང་ཐུབ་བམ་མི་ཐུབ་པའི་ཕྱིར་རོ། ། དཔེར་ན། ལོང་བས་ལོང་བ་ལ་ལམ་སྟོན་མི་ནུས་པ་བཞིན་དགེ་རྒན་རྩོམ་ཡིག་མི་ཤེས་མཁན་ཞིག་གིས་སློབ་ཕྲུག་གི་རྩོམ་ཡིག་ཡར་རྒྱས་སུ་གཏོང་མི་ཐུབ་པ་ནི་མིག་མཐོང་ལག་ཟིན་ཡིན་ཡང་། དེ་སྐབས་ཨིན་བོད་སོགས་སྐད་ཡིག་གི་དགེ་རྒན་འགའ་རེས་སློབ་ཕྲུག་སོགས་ལ་རྩོམ་ཡིག་ཅིག་ཕྲིས་ཞེས་གང་ཡིན་འདི་ཡིན་མེད་པར་བཀའ་བཙན་པོ་རེ་བཏང་པས། སློབ་ཕྲུག་ཚོས་ཀྱང་གང་དྲན་དྲན་ཞིག་བྲིས་པ་ལ་དགེ་རྒན་གྱིས་ཀྱང་ཧམ་པས་ཀུན་ནས་བླངས་ནས་དག་བཅོས་བྱེད་ཁུལ་བྱས་པ་ཙམ་ལས། རྩོམ་ཡིག་དེའི་བརྗོད་བྱ་འགྲིག་མིན་དང་བརྗོད་སྙིང་ཡོད་མེད་ལ་སོགས་པ་ལ་སོགས་པ་ནི་དགེ་སློབ་གཉིས་ཀ་རི་བོང་གི་རྭ་ཡི་དཔེ་ལས་མ་འདས་པས་ན། ད་དུང་དགེ་རྒན་ཧམ་པ་ཅན་འགའ་རེས་སློབ་ཕྲུག་གི་རྩོམ་ཡིག་གི་ཡག་སྡུག་གླེང་བ་ནི་ཧ་ཅང་ཐད་དྲག་པ་ཡིན་མོད་དེ་ལྟ་བུ་ང་ཚོའི་སྤྱི་ཚོགས་ཁྲོད་མཐོང་རྒྱུ་དང་ཐོས་རྒྱུ་ཡོད་པའི་གནས་སྟངས་ཏེ་ལ་འགྱུར་བ་ཞིག་མ་ཕྱིན་པར་སློབ་ཕྲུག་གི་འབྲི་རྩལ་ཡར་རྒྱས་འགྲོ་བ་དེ་ཡང་མོ་གཤམ་ལ་བུ་སྐྱེ་དགོས་ཞེས་བཀའ་བཏང་བ་དང་གཅིག་མཚུངས་སུ་སྣང་པས། མ་སྐུལ་དང་དུ་བླངས་ནས་དགེ་རྒན་རང་ཉིད་ཀྱི་རྩོམ་ཡིག་གི་ཤེས་ཚད་ཅུང་ཡར་རྒྱས་ཀྱི་ཕྱོགས་སུ་གོ་སྟབས་བསྒྱུར་བར་འབད་པ་བྱེད་དགོས་སོ། ། དེང་སང་དགེ་རྒན་ཕལ་ཆེ་བའི་སློབ་ཕྲུག་རྣམས་ལ་རྩོམ་ཡིག་འབྲི་འཇུག་གི་ཡོད་པ་ནི་ཤིན་ཏུ་དགའ་འོས་པ་ཞིག་ཡིན་མོད་ཀྱང་། དོན་དངོས་ཐོག་དགེ་རྒན་རང་ཉིད་ཀྱིས་ཀྱང་མཛུབ་མོ་རང་ལ་བཙུགས་ནས་བསམ་བློ་ཞིག་བཏང་ན། རང་ཉིད་ལ་རྩོམ་ཡིག་གི་ཤེས་ཚད་དང་མཉམ་མྱོང་རང་གི་བྲིས་པའི་རྩོམ་ཡིག་དྲ་ལམ་དང་ཚགས་དཔར་ཡང་ན་སྤྱི་ཚོགས་སོགས་སུ་འགྲེམ་སྤེལ་བྱེད་མྱོང་ཡོད་མེད་དང་། དེ་ལྟར་མེད་ཀྱང་རང་ཉིད་ཀྱིས་སློབ་ཕྲུག་ལ་རྩོམ་ཡིག་སོགས་འབྲི་རུ་འཇུག་པ་དང་དེ་ལ་དག་བཅོས་བྱེད་པའི་ཁྱོད་ལ་རྒྱབ་ལྗོངས་ཀྱི་རྩོམ་ཡིག་གི་ཤེས་ཚད་དང་གདེང་ཚོད་ཇི་འདྲ་ཡོད་མེད་ལ་བསམ་བློ་འཁོར་མྱོང་ངམ། སློབ་ཕྲུག་གི་རྩོམ་ཡིག་ལ་དག་བཅོས་ཡང་དག་པ་ཞིག་དང་རོགས་རམ་ངེས་ཅན་ཞིག་བྱེད་ཐུབ་པར། སྲོལ་རྒྱུན་རྐྱང་པའི་འབྲི་སྟངས་དང་། དེང་དུས་རྐྱང་པའི་འབྲི་སྟངས་དང་། དེང་སྲོལ་གཉིས་ཀྱི་ལམ་ནས་འབྲི་སྟངས་སོགས་ཐབས་ལམ་གང་ཞིག་སློབ་ཕྲུག་གི་འབྲི་རྩལ་ལ་ནུས་པ་ལྡན་པ་དང་རན་པ་ཡིན་མིན་ཁྱེད་ཀྱི་ཐུགས་བསམ་གཏོང་མྱོང་ངམ། མྱོང་ན་གང་ཞིག་ལེགས་པ་དང་རྒྱུ་མཚན་ཅི་ཞིག་ལ་བསྟེན་དེ་ལྟར་བྱུང་བ་སོགས་ཀྱི་དྲི་བ་འདི་དག་སློབ་ཕྲུག་ཅིག་གི་འབྲི་རྩལ་ཡར་རྒྱུས་སུ་གཏོང་མཁན་གྱི་དགེ་རྒན་རྣམས་ཀྱི་ཐུགས་ལ་ངེས་པར་དུ་ཤར་དགོས་པ་ཡིན། རྩོམ་ཡིག་ཅེས་པ་དེ་ག་འདྲ་ཞིག་ཡིན་མིན་དང་དེ་ཇི་ལྟར་འབྲི་དགོས་མིན་རྩོམ་ཡིག་ཅིག་མ་བྲིས་པའི་སྔོན་ལ་བསམ་བློ་ག་འདྲ་ཞིག་གཏོང་དགོས་པ་དང་། སློབ་ཕྲུག་ལ་ཡང་རྩོ་ཡིག་ནང་ལས་སོགས་འབྲི་རུ་འཇུག་སྐབས་ལམ་སྟོན་བཀོད་མངགས་ཇི་ལྟར་བྱེད་དགོས་སྐོར་དང་། དེ་ལྟར་བྱེད་པ་ལ་ཐབས་ཤེས་དང་ཐབས་ལམ་གང་ཡོད་སོགས་སྐབས་སྟུན་གྱི་ལམ་སྟོན་དཔྱིས་ཕྱིན་པ་ཞིག་བྱེད་དགོས་མོད། དགེ་རྒན་རང་ཉིད་ལ་ཡང་དེ་ཙམ་གྱི་ཆ་རྒྱུས་དང་མཉམ་མྱོང་ཅི་ཙམ་ཡོད་མེད་དྲི་པ་ཞིག་ཡིན་པ་མ་ཟད། རྩོམ་ཡིག་ཅེས་པའི་གོ་དོན་དང་སྒྲ་བཤད་ཙམ་འཇོག་ཤེས་མཁན་དང་མ་ཤེས་མཁན་གྱི་དགེ་རྒན་སློབ་ཚན་གཞན་གྱི་དགེ་རྒན་ཕར་ཞོག་སྐད་ཡིག་འཁྲིད་མཁན་གྱི་ཨིན་བོད་དགེ་རྒན་དག་གི་ནང་ན་ཡང་གྲངས་ཁ་བརྒྱག་དགོས་བྱུང་ན་ཤིན་ཏུ་ཉུང་བ་མ་ཟད་རྩོམ་ཡིག་ཐར་ཐོར་རེ་དྲ་ལམ་དང་ཚགས་པར་སོགས་ཀྱི་ཐོག་བཀོད་མྱོང་ཡོད་པའི་དགེ་རྒན་ཚོ་ལ་ཡང་རྩོམ་ཡིག་སྐོར་ལ་ཤེས་ཚད་ཅུང་ཞན་སྟབས་ངེས་པར་དུ་དགེ་རྒན་རང་ཉིད་རྩོམ་ཡིག་ལ་མཁས་པར་མ་གྱུར་ཀྱང་དེ་ལ་མྱོང་བ་ཟབ་མོ་ཞིག་དགོས་ངེས་ཡིན་པ་སྨོས་མ་དགོས། འབྲི་ཐབས་ལམ་སྟོན་བྱེད་སྟངས། དེང་སང་དགེ་རྒན་འགའ་རེས་རྩོམ་ཡིག་ཇི་ལྟར་འབྲི་སྟངས་སོགས་མི་བསླབ་པར་ཁ་བྱང་ཡང་སློབ་ཕྲུག་གི་གོ་བ་ལེན་ཐུབ་ལ་མི་ཐུབ་ལ་ཞིག་སྤྲད་ནས་འདིའི་སྐོར་རྩོམ་ཡིག་ཅིག་བྲིས་ཞེས་ནང་ལས་སོགས་བཀོད་པ་ནི་ཤིན་ཏུ་ནས་མི་འོས་ཏེ། རྩོམ་ཡིག་ཅིག་འབྲི་རུ་འཇུག་པ་ལ་དང་པོ་ལམ་བསྟོན་སོགས་ཁ་གང་གསལ་གསལ་དང་ཁ་བྱང་དེ་ཡང་སློབ་ཕྲུག་གིས་གོ་བ་ལེན་ཐུབ་པ་ཞིག་ཡིན་དགོས། དཔེར་ན་དྭངས་གསལ་ཆུ་ཡི་ནང་གི་རྡེའུ་མཐོང་སླ་བ་ལྟ་བུ་ཞིག་དགོས། རྩོམ་ལུས་ཀྱང་བཅད་ལྷུག་སྤེལ་མ་གང་ཡིན་དགོས་མིན་དང་། […]

གློག་ཀླད་དགེ་རྒན་ངག་དབང་ཚུལ་ཁྲིམས། མེས་དབོན་གཙུག་ལག་དཔེ་སྟོན་སློབ་གྲྭ། སྒྲུང་ཉན་སློབ་མའི་འབྲི་རྩལ་གྱི་མན་ངག་ཡིན། སྒྲུང་བཤད་སློབ་མའི་ཀློག་རྩལ་གྱི་མན་ངག་ཡིན། སྒྲུང་ཀློག་སློབ་མའི་རྩལ་འབྱུང་གི་མན་ངག་ཡིན། སྒྲུང་བྲིས་སློབ་མའི་རྩལ་གྱི་འབྱུང་ཁུངས་ཡིན། སྤྱིར་བཤད་པ། སྤྱི་བཏང་ཉན་རྩལ་དང་འབྲི་རྩལ་གཉིས་དཔེ་ཀློག་བྱེད་དུ་འཇུག་པ་དང་སྒྲུང་ཉན་དུ་འཇུག་པ་དང་སྒྲུང་འབྲི་རུ་འཇུག་པའི་་རྒྱུད་ནས་ཡར་རྒྱས་གཏོང་ཐབས་ཡོད་ཀྱང་། དང་པོ་སློབ་མ་རྣམས་ཉན་རྒྱུ་དང་འབྲི་རྒྱུའི་ཐད་དགའ་མོས་དང་སྤྲོ་བ་ཡང་ན་བློ་འདོད་ཡོད་པའི་གཞི་བརྟེན་གྱི་ས་བོན་ཞིག་བཟོས་པའི་འབད་བརྩོན་གནང་རྒྱུ་དེ་གོམ་པ་དང་པོ་ཡང་ན་ཐབས་ལམ་དང་པོ་དེ་ཡིན། ཟིན་བྲིས་ཐོ་བཀོད་རྒྱག་རྒྱུ་ནི་སྐད་དང་སྒྲ་རྣམས་ཡིག་དབྱིབས་སུ་ཡང་ན་ཡིག་ཐོག་བཀོད་པ་ཟེར་པའི་དཔེ་ལྟར། ཉིན་ལྟར་བྱེད་ཐུབ་པའི་གོམས་གཤིས་ངེས་པར་དུ་ཡོད་པ་ཞིག་བཟོ་དགོས། དེ་ལྟར་བྱེད་མ་ཐུབ་ན་འབྲི་རྩལ་ཡར་རྒྱས་གཏོང་ཐུབ་པ་ཁག་པོ་རེད། དེར་བརྟེན་སྒྲུང་བཤད་དང་སྒྲུང་ཉན་གཉིས་ནི་ཉན་རྩལ་དང་འབྲི་རྩལ་གྱི་དགོས་ངེས་ཆེ་པའི་ལག་ཆ་ཧ་ཅང་གལ་གནད་ཆེ་ཤོས་ཤིག་ཆགས་ཡོད། ཉན་དང་འབྲི་གཉིས་ཀྱི་འབྲེལ་བ་ནི་གཅིག་ལ་བརྟེན་ནས་སྒྲུབ་དགོས་པ་ལས་གཅིག་རྐྱང་གི་དོན་དག་སྒྲུབ་མི་ངེས། དེ་གཉིས་ནི་ཕ་མ་བུ་ཕྲུག་གི་འབྲེལ་བ་ལྟར་ཡིན། བརྡ་སྤྲོད་དང་ལེགས་བཤད་ལྗོན་དབང་གཉིས་ནི་འབྲི་རྩོམ་གྱི་ཡིད་བཅོལ་ས་གདན་གྱི་དངོས་དགོས་ལག་ཆ་གལ་ཆེ་པ་ཞིག་ཡིན་པས་དེ་དག་རྣམས་སློབ་མ་རྣམས་ངེས་པར་དུ་ཤེས་རྒྱུད་ལ་འཇགས་ཐུབ་པ་ཞིག་དགོས། འབྲི་རྩོམ་གྱི་སྒྲོམ་གཞི་འགྲོ་སྟངས་དང་བྲིས་སྟངས་ལ་སོགས་སྔོན་ཚོད་ནས་སློབ་ཕྲུག་རྣམས་དམངས་གཞི་ས་བརྟེན་སློབ་ཁྲིད་གནང་ནས་སློབ་མའི་ངེས་པར་དུ་ཤེས་ཏུ་འཇུག་དགོས། སྒྲུང་ཉན་པ་དང་བྲིས་པ་ཙམ་མ་ཟད་འདིར་མཉམ་དུ་དཔེ་ཀློག་བྱེད་དུ་བཅུག་པ་བྱ་རྒྱུ་ནི་ཉལ་རྩལ་དང་འབྲི་རྩལ་གྱི་རྒྱབ་བརྟེན་གྱི་གལ་ཆེ་ལག་ཆ་གཅིག་ཡིན་པས་དཔེ་ཀློག་ཡང་བྱེད་དུ་འཇུག་པ་བྱེད་རྒྱུ་གལ་གནད་ཆེ། རྒྱ་བཤད་དང་སྟོང་བྲིས་ན་འདྲ་ཡང་ན་ཕྱོགས་བཞི་མཚམས་བརྒྱད་བློ་སྟོབས་སྒྲིམ་ནས་སློབ་ཁྲིད་བྱེད་པ་ལས་བློ་དཀར་ལྷག་བསམ་ལྡན་པའི་ངང་སློབ་ཁྲིད་བྱེད་ཐུབ་པ་ཞིག་ངེས་པར་དགོས། དགེ་རྒན་ཀྱི་སློབ་མ་ཡོངས་ལ་མིག་བལྟ་དང་རྒྱབ་བསྐྱོར་དང་སློབ་ཁྲིད་གཅིག་མཚུངས་གནང་རྒྱུ་དེ་ནི་ཤིན་ཏུ་གལ་ཆེ། མྱོང་ཚོར་སྙིང་བསྡུས་དང་བཅས་བཤད་ན། ཉམས་མྱོང་ནི་ཆེད་གཞི་བརྟེན་གྱི་བློ་དད་འཁེལ་བའི་དགེ་རྒན་ཞིག་ཡིན་ཟེར་པའི་དཔེ་ལྟར། ཉམས་མྱོང་གི་གཏམ་བཤད་ཐུང་ཙམ་ཞིག་ཞུ་ན། ལ་དག་བོད་ཁྱིམ་སློབ་མ་ནང་ཁུལ་བོད་སྐད་ཡག་སྡུག་གི་ཁྱད་པར་ལ་ཆ་མཚོན་ན། འབྲོག་ཕྲུག་རྣམས་བོད་སྐད་གཙང་བཞིན་དྭངས་པ་དང་ལེགས་པར་འབྲི་ཐུབ། དེ་སྔོན་རང་ཉིད་སློབ་གྲྭ་ཐོན་རྗེས་འབྲོག་སྡེ་སློབ་གྲྭ་གཅིག་ནང་ལོ་གཉིས་ཙམ་རིང་དྭང་བླངས་ཐོག་སློབ་ཁྲིད་བྱེད་སྐབས་བོད་ཡིག་སློབ་སྐབས་བཀའ་ངལ་གཅིག་ཀྱང་མེད་པ་མ་ཟད་སློབ་མ་རྣམས་ཡང་ལས་སླ་པོའི་ནང་ཤེས་ཐུབ་ཀྱི་འདུག རྒྱུ་མཚན་ནི། གནས་སྡོད་ཡུལ་མི་རྣམས་བོད་སྐད་ལྷད་མེད་བཤད་མཁན་ཤ་སྟག་ཡིན་པ། བུ་ཕྲུག་རྣམས་གཉིད་ལ་མ་ཉལ་གོང་ཕ་མའམ་སྤོ་སྤོ་རྨོ་རྨོ་རྣམས་ཀྱིས་ཉིན་ལྟར་སྒྲུང་རེ་བཤད་ཀྱི་རེད། སྒྲུང་བཤད་པའི་སྐབས་བོད་སྐད་གཙང་མ་གཅིག་པོ་མིན་པ་བརྡ་སྙིང་གི་མིང་ཚིག་བེད་སྤྱོད་གནང་གི་ཡོད། དེར་བརྟེན་སློབ་ཁྲིད་སྐབས་འབྲོག་ཕྲུག་རྣམས་ལ་བོད་ཡིག་ལས་སླ་བའི་ངང་སློབ་གནང་། རང་ཉིད་ཀྱི་མྱོང་ཚོར་ཐད་སློབ་གྲྭའི་དུས་དཔེ་ཀློག་བྱ་རྒྱུ་དགའ་མོས་འདི་ཙམ་མེད་ཡང་༸གོང་ས་མཆོག་གི་མཛད་པའི་དཔེ་དེབ་ངའི་ཡུལ་དང་ངའི་མི་དམངས་ཐེངས་གཅིག་བཀླགས་ནས་ངའི་ཡིད་དབང་འཕྲོག་ནས་དཔེ་དེབ་འདི་རང་ཚར་ལྔ་བཀླགས་པ་ཡིན། ཚར་རེ་ལ་ནང་དོན་ལོག་ཁ་རེ་ཤར་གྱི་འདུག དེ་ནས་ཨིན་ཇི་ནང་ཕབས་འགྱུར་གནང་པའི་དེབ་འདི་ཀློག་སྐབས་ནང་དོན་ལས་སླ་བའི་ངང་དགོས་དོན་ཤེས་ཐུབ་ཀྱི་འདུག དེ་ནས་བཟུང་ང་དཔེ་ཀློག་ལ་དགའ་བཞིན་སྤྲོ་པའི་ངང་ཉིན་ལྟར་དཔེ་ཀློག་བྱེས་ཀྱི་ཡོད། གྲུབ་ཆའི་ཆ་རྐྱེན་ཚང་དགོས་པ། སློབ་ཕྲུག་ནི་མཛངས་པའི་ཡོན་ཏན་དཔག་ཏུ་མེད་པའི་ཉི་འོད་ཀྱི་འཛུམ་མདངས་ལྟར་ལེགས་ཚོགས་དང་འཐུས་མི་སྐུ་ཚབ་ཅིག་ཡིན་ཡང་ནག་ནོག་འགོ་བ་རྣམས་ནས་ཐར་རྒྱུའི་འགྲུབ་སྲིད་པ་ཉིད་ཆགས་ཡོད། དགེ་རྒན་གྱིས་དེ་ལྟར་ངོས་འཛིན་ཐོག་སློབ་མ་རྣམས་ལ་སློབ་ཁྲིད་གནང་གལ་ཆེ། སློབ་ཕྲུག་གི་སློབ་སྦྱོང་བྱེད་སྐབས་ཀྱི་རྣམ་འགྱུར་དང་སློབ་ཕྲུག་སྒེར་གྱི་དགའ་ཕྱོགས་ལ་རྒྱུས་ལོན་གྱིས་ཤེས་པར་བྱས་ནས་ལྟ་ཞིབ་བྱེད་པའི་བརྒྱུད་ནས་སློབ་ཁྲིད་བྱེད་དགོས། སློབ་ཕྲུག་སློབ་སྦྱོང་བྱེད་པའི་དུས་སུ་སློབ་ཕྲུག་རེ་རེའི་ནུས་པར་རྒྱུས་ལོན་བྱས་ཏེ་ཐབས་ཤེས་གང་མང་གིས་བསམ་བློའི་འགྲོ་སྟངས་ཡང་ན་ཆགས་སྟངས་ཐོག་སློབ་ཁྲིད་བྱས་ནས་སློབ་ཕྲུག་གི་གོམས་སྲོལ་ལམ་གོམས་གཤིས་བཟང་པོ་འཛུགས་པ་ཞིག་བཟོ་དགོས། སློབ་ཕྲུག་གི་བསམ་ཚུལ་དང་སློབ་ཕྲུག་སྒེར་རེ་རེའི་སྙིང་སྟོབས་དང་ལུས་ཕུང་བདེ་ཐང་ཐོག་རྒྱུས་ལོན་དང་ཤེས་པར་བྱས་ཏེ་རོགས་རམ་ཇི་ཐུབ་གནང་དགོས། ་དང་ཐོག་སློབ་མའི་གནང་སྡོད་ཁོར་ཡུག་གི་ཤུགས་རྐྱེན་རག་ལས་ཡོད་པས་བོད་སྐད་གཙང་བཤད་དང་བོད་སྐད་རང་ཐད་བློ་འདོད་ཡོད་པའི་ཁོར་ཡུག་སྤྲུན་དགོས། སློབ་ཁྲིད་གནས་མཁན་གྱི་དགེ་རྒན་རྣམས་ཐ་སྙད་དང་མིང་ཚིག་(དོན་གཅིག་མིང་གི་རྣམ་གྲངས་)ཕྱུག་པ་ཞིག་དགོས། དགེ་རྒན་གྱི་ཁ་སྐད་དང་ཡི་སྐད་གཉིས་ཀྱི་ཁྱད་པར་འདི་ངེས་པར་ཏུ་སློབ་སྟོན་གནང་དགོས་པ་ནི་གཞི་རྩའི་སྒྲུང་འབྲི་པའི་སྐབས་ཀྱི་འགྲོ་ལུགས་ཡང་ན་་འགྲོ་སྟངས་ཆགས་ཡོད། སློབ་མ་རེ་ལ་དཔེ་དེབ་རེ་འདང་ངེས་དགོས། བོད་སྐད་གཙང་མ་བཤད་པའི་བརྙན་ཐུང་ཇི་མང་དགོས། སློབ་ཁྲིད་འཆར་འགོད། འཛིན་གྲྭ་གཅིག་ལ་དཔེ་གཞི་བཞག་པ་ཡིན་ན། དང་པོ། སློབ་མ་རྣམས་དང་པོ་ཉན་རྒྱུ་ལ་དགའ་མོས་དང་འབྲི་རྒྱུ་ལ་བློ་སྤྲོ་ཡོང་པའི་ཆེད་དུ། ཐོག་མ་སློབ་མའི་གནས་རིམ་ལ་གཞིར་བཟུང་ནས་སྒྲུང་ཐུང་ཐུང་གོ་བདེ་པོ་དང་སྙན་པོ་ཅིག་སློབ་མ་རྣམས་ལ་སྐར་མ་༥ ནས་༡༠ བར་ཉིན་ལྟར་བཤད་དགོས། སྒྲུང་བཤད་པའི་སྐབས་དག་ཆ་དང་བརྗོད་བྱའི་ནོར་འཁྲུལ་ལ་མ་བལྟོས་བར་སློབ་མ་རྣམས་ངེས་པར་དུ་སྒྲུང་དེ་ཡིག་ཐོག་དུ་བྲིས་ཏུ་བཅུག་དགོས། སློབ་མས་བྲིས་པའི་སྒྲུང་རྣམས་ཐབས་མཁས་པའི་ངང་སྐྱོན་ཆ་འབྱུང་སླ་བའི་ཐད་ལ་དག་བཅོས་བཟང་པོ་བྱེད་དགོས། […]

གཞི་རིམ་འོག་མའི་བོད་དགེ་བསྟན་འཛིན་སྒྲོལ་མ། མེས་དབོན་གཙུག་ལག་དཔེ་སྟོན་སློབ་གྲྭ། སྔོན་གླེང་། བོད་མི་རིགས་ངོ་མ་ཞིག་ཡིན་ཕྱིན། བོད་ཀྱི་སྐད་ཡིག་དག་མ་ཞིག་ངེས་པར་དུ་ཤེས་དགོས། ཤེས་པ་དེ་སྤྱད་དགོས། བོད་རང་གི་ཆས་ཀྱང་གོས་སུ་མ་བྱེད། སྐད་ཡིག་དག་ཀྱང་མ་སྤྱོད་ན། དེའི་ཚེ་བོད་ཅེས་པའི་མིང་བོར་ཚར་བ་རེད། ཅེས་པ་ལྟར་མི་རིགས་ཤིག་སོན་པོ་གནས་པར་སྐད་ཡིག་ནི་སྲོག་གི་རྩ་བ་ཡིན། དེ་ཡང་རྒྱ་མིས་བོད་བཙན་འཛུལ་བྱས་པ་ལ་བརྟེན་ནས་ཏན་ཏན་ང་ཚོའི་ལག་ནས་བོད་ལུང་པ་ཤོར་བ་རེད། འོན་ཀྱང་རང་མི་རིགས་ཀྱི་སྐད་ཡིག་དང་རིག་གཞུང་ནི་རང་ཉིད་ཀྱི་རྒྱུད་ལ་འཇགས་ནས་ཡོད་སྟབས་དེ་དག་སུས་བཙན་འཕྲོག་བྱེད་ཐུབ་བམ། སུས་ཀྱང་བཙན་འཕྲོག་བྱེད་མི་ཐུབ། འོན་ཀྱང་ད་ཆ་བོད་པའི་མི་ལ་བོད་ཡིག་སྦྱོང་དགོས་པའི་སློབ་གསོ་དང་སྐུལ་མ་ཡང་ཡང་བྱ་དགོས་པའི་གནས་སྟངས་ཤིག་ཏུ་གྱུར་ཡོད་ཚེ། དེ་ནི་ང་རང་ཚོ་བོད་པའི་མི་ཅུང་མགོ་སླ་དྲགས་པའི་རྐྱེན་གྱིས་ཕྱི་རྒྱལ་བའི་སྐད་དང་རིག་གཞུང་ཅུང་ཤེས་པ་དང་རང་མི་རིགས་ཀྱི་སྐད་ཡིག་དྲན་པ་བརྗེད་ཁུལ་བྱས་པས་རེད། ང་ཚོས་དུས་རྟག་ཏུ་སྐད་འབོད་དང་ཕྱི་རྒྱལ་སྡིངས་ཆ་ཁག་གང་ལའང་བོད་ཀྱི་བདག་པོ་བོད་པ་ཡིན་པ་དང་རྒྱ་མི་བོད་ནས་ཕར་རྒྱུགས་ཤིག་ཅེས་འབོད་སྒྲ་སྒྲོག་བཞིན་ཡོད། དེ་ལ་བརྟེན་ནས་ང་ཚོར་བོད་ཀྱི་ལུང་པ་ཐོབ་པའི་དབང་དུ་བཏང་ཡང་དེའི་ནང་གནས་པའི་མི་དེ་ཚོས་རྒྱ་སྐད་དང་ཨིན་སྐད། ཧིན་སྐད་སོགས་ར་མ་ལུག་གི་སྐད་བེད་སྤྱོད་བྱས་པ་མ་ཟད་ཆ་ལུགས་ཀྱང་རྒྱལ་ཁབ་གཞན་གྱི་མི་བཞིན་ཡོད་པས་ན་མི་དེ་ཚོ་བོད་པ་རེད་ཅེས་ཇི་ལྟར་བརྗོད་ཐུབ་བམ། མི་རིགས་ཤིག་གནས་པར་སྐད་ཡིག་སྲོག་རྩ་ཡིན་པས་སྲོག་དེ་དང་ཁ་བྲལ་ཚེ་མི་རིགས་དེ་ཤི་ཚར་བ་རེད། ཤི་ཚར་བའི་མི་རིགས་ཤིག་ལ་ས་དང་ལུང་པ་ཞིག་ཅིའི་ཕྱིར་དགོས་སམ། གལ་ཏེ་དགོས་ཚེ། རང་མི་རིགས་ཀྱི་སྐད་ཡིག་ལ་བརྩོན་དགོས། ང་ཚོ་བོད་པ་ཞིག་ཡིན་པའི་ཆ་ནས་བོད་ཡིག་ཤེས་པར་བྱ་རྒྱུ་ཧ་ཅང་གལ་ཆེ། སྤྱིར་བོད་པ་ཞིག་ཡིན་པའི་ཆ་ནས་རང་མི་རིགས་ཀྱི་སྐད་ཡིག་ལ་དོ་སྣང་བྱ་དགོས་པ་བརྗོད་མི་དགོས་ཀྱང་། དེང་གི་ཆར་དེ་དག་ཡང་ནས་ཡང་དུ་དྲན་སྐུལ་བྱ་དགོས་པའི་རྒྱུ་རྐྱེན་གང་ལ་ཐུག་ཡོད་པ་ང་ཚོས་ངེས་པར་དུ་ཤེས་ཏེ་ཉམས་པ་སླར་གསོ་ཡོང་བར་འབད་བརྩོན་བྱེད་དགོས། སྐད་ཡིག་ཅི་འདྲ་ཞིག་ཡིན་རུང་དེ་དག་ཡར་རྒྱས་ཡོང་བར་རྩལ་བཞི་སྟེ། ཉན་རྩལ། བཤད་རྩལ། ཀློག་རྩལ་དང་འབྲི་རྩལ་བཅས་ཡིན། མཁས་པ་དང་སློབ་གསོའི་ལས་དོན་པ་མང་པོ་ཞིག་གིས་ཀློག་རྩལ་དང་འབྲི་རྩལ་ཡར་རྒྱས་གཏོང་ཐབས་ཐད་བཀའ་སློབ་ལམ་སྟོན་རབ་དང་རིམ་པ་གནང་ཡོད་ལ་དཔེ་དེབ་ཀྱང་མང་པོ་བརྩམས་ཡོད། བོད་མི་སྒྲིག་འཛུགས་ཤེས་རིག་ལས་ཁུངས་ནས་ཀྱང་ཀློག་རྩལ་ཐོག་ཐུགས་ཁུར་ཆེན་པོས་དམའ་རིམ་དགེ་རྒན་ཡོངས་ལ་བྱིས་པའི་ཀློག་རྩལ་ཟབ་སྦྱོང་ཡང་ཐེངས་མང་གནང་ཡོད། འོན་ཀྱང་ཉན་རྩལ་དང་བཤད་རྩལ་ཐོག་གསུངས་མཁན་ཅུང་ཉུང་བ་ཚོར། དེར་སོང་ད་ལན་གུས་མོས་རང་ཉིད་ཀྱི་སློབ་ཁྲིད་ཉམས་མྱོང་དང་སྤྱི་ཚོགས་ཀྱི་གནས་སྟངས་ལ་གཞིགས་ཏེ་བཤད་རྩལ་ཡར་རྒྱས་གཏོང་ཐབས་སྐོར་མདོར་བསྡུས་ཤིག་བྲིས་ན་བསམས། ཐོག་མར་ང་ཚོས་བཤད་རྩལ་ཡར་རྒྱས་ཡོང་བར་འགོག་རྐྱེན་བྱེད་མཁན་གྱི་རྒྱུ་ངོས་བཟུང་པའི་ཐོག་ནས་ཐབས་ལམ་འཚོལ་དགོས། བཤད་རྩལ། སློབ་སྦྱོང་གྱི་བརྒྱུད་རིམ་ནང་ང་ཚོས་དུས་རྟག་ཏུ་ཐོས་བསམ་སྒོམ་གསུམ་ཞེས་པའི་ཐ་སྙད་ཅིག་ཐོས་ཡོད། དེ་ཡང་ཕྲུ་གུ་ཨ་མའི་མངལ་ནང་འཁོར་བ་ནས་བཟུང་ཨ་མས་བཤད་པའི་སྐད་ཆ་དང་སྙན་པའི་རོལ་དབྱངས་ལ་རོལ་བ་ཆ་ཚང་ཐོས་པ་དང་ཚོར་ཐུབ་ཀྱི་ཡོད་ཅེས་ང་ཚོར་བཤད་སྲོལ་དེ་འདྲ་ཞིག་ཡོད། ཕྲུ་གུ་མ་འབྱར་ལོ་གཉིས་ལ་ལོན་དུས་སྐད་ཆ་བཤད་འགོ་བརྩམས་པ་དེ་ཡང་ཁོས་སྐྱེས་ནས་བཟུང་ཐོས་པའི་ཚིག་དེ་རྣ་བར་གོམས་པ་དང་ཡིད་ལ་འཇགས་ཏེ་ཁ་ནས་བཏོན་པ་ཞིག་རེད་མ་གཏོགས་ཕྲུ་གུ་ལོ་གཉིས་ཟིན་མ་ཐག་དང་ཚིག་གསར་པ་ཞིག་ཤེས་ཏེ་ཁ་ནས་བཏོན་པ་ཞིག་མ་རེད། དེར་སོང་། ཕྲུ་གུའི་བཤད་རྩལ་ཡར་རྒྱས་ཡོང་བར་ང་ཚོ་སུ་འདྲ་ཞིག་ཡིན་རུང་ཐོག་མར་རང་ཉིད་ཀྱི་ཕྲུ་གུ་འཚར་ལོངས་བྱུང་སའི་ཁོར་ཡུག་( ཁྱིམ་ཚང་དང་སློབ་གྲྭ། ) ནང་བོད་སྐད་གཙང་མའམ་སྐད་ཆ་ཚིག་སྦྱོར་ལེགས་པོའི་ནང་བཤད་རྒྱུ་འབད་བརྩོན་གནང་དགོས་པ་གལ་ཆེར་མཐོང་། དེ་ཡང་ཐོས་བསམ་སྒོམ་གསུམ་གྱི་སྐོར་ལ་ཞུས་པ་ན། ང་ཚོས་བརྒྱུད་ལམ་ཅི་འདྲ་ཞིག་གི་ཐོག་ནས་གང་ཐོས་པ་དེར་དཔྱད་པ་བྱས་རྗེས་ཡང་ཡང་ལག་བསྟར་གྱིས་གོམས་པ་བྱེད་ཀྱི་ཡོད། འོན་ཀྱང་འཚར་ལོངས་བྱུང་བཞིན་པའི་ཕྲུ་གུ་ཆུང་ཆུང་ཞིག་ལ་མཚོན་ན་ཐོས་བསམ་སྒོམ་གསུམ་ལས་ཐོས་པའིནུས་པ་ལྡན་ཡང་བསམ་བློ་གཏང་རྒྱུའམ་དཔྱད་པ་བྱ་རྒྱུའི་ནུས་པ་ལྡན་མེད་སྟབས་གཞན་ནས་གང་ཐོས་པ་དེ་ཡང་དག་ཅིག་ལ་ངོས་འཛིན་ཏེ་དེ་དག་ལག་བསྟར་བྱེད་ཀྱི་རེད། དེ་དག་ཁྱིམ་ཚང་དང་སློབ་གྲྭའི་ཁོར་ཡུག་ལ་དཔེ་བླངས་ཏེ་བརྗོད་པ་ན། ༡། ཁྱིམ་ཚང་། ཕྲུ་གུ་ཆུང་དུས་སྐབས་ཕ་མས་ཕྲུ་གུ་ལ་གཅིན་པ་ཡོད་པས་ཡང་ན་གཅིན་པ་ཐོངས་ཞེས་མ་ལབ་པར་དེའི་ཚབ་ཏུ་ཆུའི་ཡོད་པས། ཡང་ན་ཆུའི་བྱས་ཞེས་ཟེར་བ་དང་། གྲང་མོ་ལ་ཨ་ཆུའུའུ་འདུག ཡར་ལོངས་ཤིག་ལ་ཨཱཔ་བྱས། ལྷམ་ལ་ཏོ་ཏོ་དང་། ཚ་པོ་ལ་ཨ་ཚ་ཞེས་སྐད་ཆ་གཙང་མ་མ་བཤད་པར་མིང་ཚབ་བེད་སྤྱོད་བྱས་པར་བརྟེན་ཕྲུ་གུས་ཀྱང་གྲང་གི་འདུག་ལ་ཨ་ཆུ་བྱེད་ཀྱི་འདུག […]

གཞི་རིམ་འོག་མའི་བོད་དགེ་བློ་བཟང་བསྟན་རྒྱས། སཾ་བྷོ་ཊ་གུ་རུ་པུ་ར་ཉིན་སློབ། དངོས་པོའི་གནས་ལུགས་ཅི་འདྲ་ཞིག་ཡིན་ནའང་གཞན་དབང་དུ་མ་གྱུར་པ་གཅིག་ཀྱང་མེད་པ་ནི་རྒྱུ་འབྲས་དང་ལྟོས་གྲུབ་ཀྱི་རྒྱ་ལས་བྲལ་ཐབས་མེད་པའི་བསྡོམས་ཚིག་གོ། འོན་ཀྱང་། སྐབས་སུ་བབས་པར་ང་ཚོ་དགེ་རྒན་ཞིག་གིས་སློབ་ཁྲིད་བྱེད་པའི་སྐབས་སུ་གཞན་དབང་དུ་མི་འགྲོ་བར་སོ་སོར་ལྡོག་ཏུ་མེད་པའི་གདེང་ཚོད་ཅིག་མེད་པ་ཡིན་ན། དགེ་རྒན་རང་ཉིད་ཀྱི་སློབ་ཁྲིད་དེ་གཞན་གྱི་རྗེས་སུ་འབྲངས་བ་དང་། གཞན་གྱི་མཐོང་ཚུལ་ཆེད་དུ་སློབ་ཁྲིད་ལ་འབད་བརྩོན་དང་། སློབ་ཕྲུག་རྣམས་ལ་བཙན་ཁྲིད་བྱས་པ་ཡིན་ན་ཕྲལ་དུ་ཕན་པ་ཞིག་མཐོང་གིན་ཡོད་པ་ལས་ཕུགས་སུ་ཕན་པ་ཡོང་བའི་སློབ་ཁྲིད་ཅིག་ཆགས་ཀྱིན་ཡོད་མེད་ཁ་ཚོན་གཅོད་མི་ཐུབ། འོན་ཀྱང་། དགེ་རྒན་རང་ཉིད་ཀྱི་གཏམ་སྙན་བཟང་པོ་ཁྱབ་ཐབས་ཞིག་ཆགས་ཀྱིན་ཡོད། ངས་འདིར་སྤྱིར་བཏང་དགེ་རྒན་ཚང་དགོས་པའི་ཆ་རྐྱེན་སྐོར་ང་རང་གི་ལྟ་སྣང་ཡང་དག་དང་ཕྱིན་ཅི་ལོག་ཅི་ཡིན་རུང་། གང་ལྟར། ངས་གནད་དོན་ཁ་ཤས་ཤིག་མངོན་པར་བྱེད་འདོད་བྱུང་། དགེ་རྒན་གྱིས་སློབ་དེབ་ནང་དུ་ཡོད་པའི་ཆོས་ཚན་(སློབ་ཚན་) རྣམས་ལ་དཔྱད་ཞིབ་བྱེད་པའི་ནུས་པ་མེད་པ་ཡིན་ན། སློབ་དེབ་ཏུ་གང་བཀོད་པ་རྣམས་སློབ་ཁྲིད་བྱས་པ་ཡིན་ན་དགེ་རྒན་རང་ཉིད་ལ་སློབ་ཚན་དེ་འཁྲིད་པར་སྤྲོ་སྣང་ཡོད་པ་བརྗོད་མི་ཐུབ། གལ་སྲིད་སྤྲོ་སྣང་མེད་པ་ཡིན་ན་དགེ་རྒན་རང་ཉིད་ཀྱི་ནུས་པ་དང་སྤྲོ་བ་དེ་དངོས་སུ་མངོན་པར་བྱེད་ཐུབ་ཀྱིན་མེད་པར་བརྟེན་སློབ་ཁྲིད་དེ་དྲོད་དང་ལྡན་པའི་བྱེད་པ་ཞིག་ཆགས་ཀྱིན་མེད། དེ་ཡང་། Topic-sentence སློབ་དེབ་ནང་དུ་ཡོད་པ་དེ་མི་གཞན་ཞིག་གི་བསམ་ཚུལ་དང་ཉམས་མྱོང་དང་། ཡང་ན་ཚོད་དཔགས་བྱས་པ་ལས་བྱུང་བའི་བརྗོད་གཞི་དང་འབྲེལ་བའི་ཐབས་ཤེས་ཞིག་རེད། མཐའ་ན་སློབ་དེབ་རྩོམ་སྒྲིག་བྱེད་མཁན་གྱི་དགའ་ཆོས་རྣམས་བསྒྲིགས་ཡོད་སྲིད་པ་རེད། སློབ་དེབ་ནང་དུ་ཡོད་པའི་བརྗོད་དོན་རྣམས་སློབ་གྲྭ་ཆགས་ཡུལ་གྱི་ས་ཆ་འདྲ་མིན་ཡོད་པ་ཚང་མར་འོས་ཤིང་འཚམ་པ་ཡོང་ཐུབ་ཀྱིན་མ་རེད། བརྗོད་གཞི་དེ་དང་དེའི་བསླབ་སྟངས་བཀོད་པ་དེ་དག་སློབ་མའི་ཁམས་དང་ཁོར་ཡུག་གཉིས་ཀར་འབྲེལ་བ་ཆགས་ཀྱིན་འདུག་མི་འདུག་བསམ་གཞིགས་སྔོན་སོང་བྱེད་པ་དང་བྱེད་ཤེས་པ་དགོས། གལ་སྲིད་དགེ་རྒན་ཞིག་གིས་དེ་འདྲ་བའི་དབྱེ་འབྱེད་བྱེད་པའི་ནུས་པ་མེད་པ་ཡིན་ན་སློབ་ཁྲིད་གང་བྱས་པ་ཐམས་ཅད་གཞན་དབང་དུ་འགྱུར་གྱིན་ཡོད་པ་རེད། དགེ་རྒན་ཞིག་ཡིན་པའི་ཆ་ནས་སོ་སོའི་སློབ་ཁྲིད་དང་སོ་སོའི་བསམ་སྤྱོད་དེ་གཞན་དབང་དུ་མིི་འགྲོ་བའི་ནུས་པ་ཞིག་མེད་པ་ཡིན་ན་དགེ་རྒན་དེས་སློབ་མ་རྣམས་ལ་ནུས་པ་བཟང་པོ་ཞིག་ཐོབ་ཐུབ་པར་མི་མངོན་པའི་གེགས་ཆེན་པོ་ཞིག་རེད། ཅི་ཕྱིར་ཞེ་ན། སློབ་ཁྲིད་ཟེར་བ་ནི་ནུས་པ་ཞིག་གཞན་ལ་སྤྲོད་ཀྱིན་ཡོད་པ་རེད། ནུས་པ་སྤྲོད་རྒྱུ་་རང་ཉིད་ལ་འབེལ་པོ་དང་། སྤྲོད་ཐབས་དང་། སྤྲོད་སྟོབས་དང་ལྡན་པ་ཞིག་མེད་པ་ཡིན་ན་གཞན་ལ་ནུས་པ་ཡག་པོ་ཞིག་སྤྲོད་ཐུབ་ཀྱིན་མ་རེད། ལོ་ངོ་ཉི་ཤུ་ལས་མང་བའི་ཉམས་མྱོང་དང་རྒྱུན་དཔྱད་བྱས་པ་རྣམས་བྲིས་ན་པོ་ཏི(པུ་ཏི)་ཁ་ཤས་ཤིག་ཆགས་སྲིད་པ་རེད། མང་པོར་བྲིས་ན་ཀློག་མཁན་ཚོ་ཉོབ་སྣང་ཡོང་གིན་རེད། དེར་བརྟེན། གོང་དུ་བརྗོད་པའི་རང་དབང་དང་ནུས་པ་གཉིས་ཡོད་པའི་ཐོག་ནས་དངོས་སུ་སློབ་ཁྲིད་ཅི་འདྲ་བྱེད་དགོས་མིན་སྐོར་མདོར་བསྡུས་ཞིག་སྨྲ་བ་བྱའོ། ནུས་པ་མེད་ན་རང་དབང་མེད། དེ་གཉིས་ནི་ལུགས་འབྱུང་ལུགས་ལྡོག་ཏུ་གྲུབ་ཀྱིན་ཡོད། དགེ་རྒན་ཞིག་གི་ནུས་པ་ནི་རྣམ་དཔྱད་དེ་རེད། གནས་བབ་འཁུམས་པའི་རྣམ་དཔྱད་ཡོད་པ་ཡིན་ན་དགེ་རྒན་ལ་རང་དབང་ཡོད་པ་རེད། དགེ་རྒན་ཞིག་ཡིན་པའི་ཆ་ནས་ཤེས་ཡོན་ནམ་ཡང་ན་རིག་གནས་སམ་དེ་ལས་གཞན་པའི་ཐ་སྙད་སློབ་སྦྱོང་ལ་དགའ་སྤྲོ་གཤར་མ་(authentic educational attitude) ཞིག་མེད་པ་ཡིན་ན་གོང་གི་ཆ་རྐྱེན་དེ་དག་ཚང་ཐུབ་པ་དཀའ་བོ་ཡིན་གྱི། དེེ་འདྲ་ཚང་བ་ལ་ནི་ཤེས་ཡོན་དེ་ནོར་བུ་དངོས་གནས་ཡིན་པ་དང་ནོར་བུ་དེ་དུས་ནས་དུས་ནས་མི་ཉམས་བསྐྱར་སྦྱོང་དང་གསར་པ་གོང་འཕེལ་གཏོང་བའི་བསམ་བློ་ལྡོག་ཏུ་མེད་པ་ཞིག་དགོས་ཀྱིན་འདུག། དེང་སྐབས་སྤྱི་ཚོགས་དེ་དངོས་གཙོ་རིང་ལུགས་ཅན་དུ་འགྱུར་བཞིན་ཡོད་ཙང་། མི་མང་ཆེ་བ་དེའི་ཁྱབ་ཁོངས་སུ་རང་བཞིན་ནས་འཛུལ་འགྲོ་བ་ལས་རང་ཚུགས་ཐུབ་མཁན་དཀོན་པོ་ཆགས་ཀྱིན་ཡོད་པ་རེད། དེའི་ངན་ཤུགས་ཀྱིས་སློབ་གཉེར་བ་དང་མཁས་པར་ཆེ་མཐོང་ཡང་སྔ་ལས་གཙིགས་ཆུང་དུ་འགྲོ་བཞིན་ཡོད་པ་མཐོང་། དཔེར། མི་ཞིག་གིས་དགེ་རྒན་རང་ཉིད་ལ་གདམ་ཀ་ཞིག་སྤྲོད་པ་ཡིན་ན་ཁྱེད་ཀྱིས་ག་རེ་བདམ་རྒྱུ་རེད། དེ་ནི་མིང་ཚིག་གསར་པ་གཅིག་དང་གོར་མོ་བརྒྱ་གཉིས་ཀྱི་བར་རེད། ག་རེ་འདེམ་འདོད་འདུག་སོ་སོར་བསམ་གནོ་ཟབ་མོ་བཏང་ནས་སོ་སོར་ལན་ཐོབས། ཕྱིའི་གནས་ལུགས་ཅི་འདྲ་ཞིག་འགྱུར་བ་ཕྱིན་ནའང་། ང་ཚོ་སློབ་གཉེར་བྱེད་སྟངས་ཉན་ལྟ་བསམ་གསུམ་ནི་འགྱུར་བ་མེད་པ་ཚང་མར་ཁྱབ་ཀྱིན་ཡོད། ཉན་ལྟ་བསམ་གསུམ་དང་བྲལ་ན་སེམས་མེད་ཀྱི་བེམ་པོའི་རྫས་སྦྱོར་ཀྱི་ནུས་པས་བྱེད་སྟངས་དེ་རེད། རང་ཉིད་དགེ་རྒན་ཞིག་ཡིན་པའི་ཆ་ནས་ག་དུས་ཡིན་ན་གནས་ཚུལ་གསར་པ་སོགས་སོ་སོའི་ཐོས་རྒྱ་དང་བསམ་བློ་རྒྱ་བསྐྱེད་དང་དཔྱད་པ་ཞིབ་མོར་བྱེད་རྒྱུ་དེ་མི་ཚེ་ནང་གི་རིན་ཐང་ཆེ་ཤོས་ཡིན་པ་ངོས་འཛིན་ཐུབ་པ་ཞིག་དགོས་ཀྱིན་འདུག། […]