བསྟན་འཛིན་མེ་ཏོག འཛིན་གྲྭ་བདུན་པ།གུ་རུ་པུ་ར་སཾ་བྷོ་ཊ་སློབ་གྲྭ།    ༄༅། །ད་ལྟ་བར་༸གོང་ས་མཆོག་གིས་བཀའ་སློབ་མང་པོ་གསུངས་ཡོད་པ་རེད། ང་ཚོ་བོད་པ་ཞིག་ཡིན་པའི་ཆ་ནས་༸གོང་ས་མཆོག་གི་བཀའ་སློབ་གང་མང་མང་ཉན་རྒྱུ་དང་བཀའ་སློབ་དེ་ཚོ་སེམས་ལ་བཞག་ནས་ལག་ལེན་བསྟར་དགོས། ༸གོང་ས་མཆོག་གིས་ཆོས་འཇིག་རྟེན་གང་གི་ཐོག་ནས་བཤད་ཀྱང་གཅིག་གི་གཅིག་ལ་ཡིད་ཆེས་བྱེད་དགོས་གསུངས་ཡོད། སུ་ཡིན་ཡང་སྐྱོན་གཏན་ནས་མེད་པ་དཀོན་པོ་རེད། སྐྱོན་གཅིག་ཡོད་པའི་རྒྱུ་མཚན་དུ་བྱས་ཏེ་མི་དེ་ནག་པོ་ནག་རྐྱང་དང་། དགེ་མཚན་གཅིག་ཡོད་པའི་རྒྱུ་མཚན་གྱིས་མི་དེ་དཀར་པོ་དཀར་རྐྱང་ལ་བཏང་ན་ནོར་འཁྲུལ་རེད་ཅེས་གསུངས་ཡོད། ༸གོང་ས་མཆོག་གིས་བཀའ་སློབ་གསུངས་པ་དེ་ཚོ་ཐུགས་ལ་འཇོག་དགོས། བྱམས་བརྩེ་དང་། སྙིང་རྗེ། བཟོད་སྒོམ་བཅས་ཀྱིས་གཞན་སེམས་ལ་འགྱུར་བ་བཏང་ཐུབ། བྱམས་བརྩེ་དང་། སྙིང་རྗེ། བཟོད་སྒོམ་ནི་སེམས་ཀྱི་ནུས་ཤུགས་ཀྱི་འབྱུང་ཁུངས་རེད། བྱམས་བརྩེའི་ནུས་པ་ལ་བརྟེན་ནས་གྲོགས་པོ་གྲོགས་མོ་ཡག་པོ་བཟོ་ཐུབ་མ་གཏོགས་དངུལ་གྱིས་བཟོ་ཐུབ་ཀྱི་མ་རེད། ཆོས་ངོ་མ་དེ་བརྩེ་བ་དང་རྙིང་རྗེ་རེད། ༸གོང་ས་མཆོག་གི་བཀའ་སློབ་ལམ་སྟོན་ཡང་ཡང་ཉན་ནས་ལག་ལེན་བསྟར་ན། ང་ཚོའི་སེམས་ཀྱི་ཁོང་ཁྲོ་དང་ང་རྒྱལ་དེ་ཚོ་ཉུང་དུ་འགྲོ་གི་རེད། ཁོང་གིས་ཁོང་ཁྲོ་དེ་བཟོད་སྒོམ་གྱི་དགེ་རྒན་ཡག་ཤོས་དེ་རེད་གསུངས་ཡོད། མི་ཚེའི་རིན་ཐང་ཡག་ཤོས་དེ་སོ་སོའི་སྤྱོད་པ་ཡག་པོ་དེ་རེད། རང་ལ་དཀའ་ངལ་ཞིག་བྱུང་ན་སེམས་ཁྲལ་བྱས་ནས་དཀའ་ངལ་སེལ་ཐུབ་ཀྱི་མ་རེད། སེམས་ཁྲལ་བྱས་ནས་དཀའ་ངལ་སེལ་མ་ཐུབ་ན་སེམས་ཁྲལ་བྱས་པ་དེ་སོ་སོར་སྡུག་གྱོང་རེད་གསུངས་ཡོད། ༸གོང་ས་མཆོག་གིས་སྨོན་ལམ་བརྒྱབ་པ་ལས་ལག་ལེན་བསྟར་ཡ་དེ་གལ་ཆེ་བ་རེད་གསུངས་ཡོད། གལ་སྲིད་རང་ལ་བདེ་སྐྱིད་དང་ཞི་བདེ་དགོས་ན་གཞན་ལ་ཕན་སེམས་བྱེད་དགོས་གསུངས་ཡོད། རང་གིས་རང་ལ་བརྩེ་བ་བྱ་རྒྱུ་དེ་གལ་ཆེན་པོ་རེད། གལ་སྲིད་སོ་སོ་ལ་བརྩེ་བ་མེད་ན་གཞན་ལ་ཡང་བརྩེ་བ་སྤྲད་ཐུབ་ཀྱི་མ་རེད་གསུངས་ཡོད། མི་གཞན་ལ་བནོད་པ་བྱས་ན་སོ་སོ་ལ་སྡུག་བསྔལ་ཡོང་གི་རེད། ༸གོང་ས་མཆོག་གིས་བོད་ཀྱི་སྐད་ཡིག་དང་། རིག་གཞུང་། བོད་ཀྱི་ཁོར་ཡུག་ནི་བོད་མི་རིགས་ཀྱིས་བདག་པོ་བརྒྱབ་ནས་སྲུང་སྐྱོབ་བྱེད་དགོས་གསུངས་ཡོད། ཤེས་ཡོན་སྦྱངས་པའི་དགོས་དོན་སྙིང་པོ་ནི་མི་ལ་བདེ་སྐྱིད་འཐོབ་པའི་ཆེད་དུ་ཡིན། ཤེས་ཡོན་སྦྱངས་པའི་མི་དེ་རང་གཞན་གཉིས་ཀ་ལ་བདེ་སྐྱིད་སྤྲོད་མཁན་ཞིག་ཡིན་དགོས་གསུངས་ཡོད། སོ་སོའི་རོགས་པ་དང། འགྲོ་བ་མིའི་རིགས་ཚང་མར་ཕན་ཐོགས་མཁན་ཞིག་བྱུང་ན་ཤེས་ཡོན་སྦྱངས་པའི་དགོས་དོན་ཚང་བ་རེད་གསུངས་ཡོད། ན་གཞོན་ཚོས་སོ་སོར་གོ་སྐབས་ཡོད་པ་དེ་འཕྲོ་བརླག་ཏུ་མ་བཏང་བར་འཛམ་གླིང་གི་ས་ཕྱོགས་གང་དུ་གནས་ཀྱང་ཤེས་ཡོན་ལ་དོ་སྣང་བྱེད་རྒྱུ་དེ་ཧ་ཅང་གལ་ཆེན་པོ་ཡིན་པའི་ལམ་སྟོན་གནང་ཡོད། དེ་ཡང་སོ་སོའི་མི་རིགས་ཀྱི་སྐད་ཡིག་དང་། རིག་གཞུང་གི་ཁྱད་ཆོས་ཆ་ཚང་ཡོད་པའི་ཐོག་དེང་དུས་འཛམ་གླིང་གི་ཤེས་ཡོན་ཡོད་པ་ཞིག་ཡོང་ཐབས་བྱེད་རྒྱུ་གལ་ཆེར་བརྩི་དགོས་གསུངས་ཡོད། རྒན་པ་ཚོ་ཡིན་ན་ཡང་གང་ཐུབ་ཐུབ་ཀྱིས་ཤེས་ཡོན་ལ་འབད་བརྩོན་དང་དོ་སྣང་མ་བྱས་ན་མཐོང་རྒྱ་ཐོས་རྒྱ་གང་ཡང་ཡོང་གི་མ་རེད་ཅེས་བཀའ་གནང་ཡོད། ཤེས་ཡོན་གྱི་ཐོག་ནས་དཀའ་ངལ་གང་ཡོད་པ་དེ་སེལ་ཐུབ་པའི་ཐབས་ཤེས་འཚོལ་ཐུབ་ཀྱི་རེད། ༸གོང་ས་མཆོག་གིས་ཁོར་ཡུག་སྲུང་སྐྱོབ་ཀྱི་སྐོར་ལ་ཡང་བཀའ་སློབ་མང་པོ་གསུངས་ཡོད་པ་རེད། ང་རང་ཚོ་འཚོ་སྡོད་བྱེད་སའི་ཁོར་ཡུག་ལ་ཤིང་ནགས་གང་བྱུང་གཅོད་འབྲེག་དང་། ས་གཏེར་གང་བྱུང་སྔོག་འདོན་བྱེད་པ་སོགས་ཁོར་ཡུག་ལ་གནོད་པའི་བྱ་སྤྱོད་སྤང་དགོས། གད་སྙིགས་གང་བྱུང་གཡུགས་པའི་རྐྱེན་གྱིས་མིག་ལམ་དུ་མི་མཛེས་པ་ནད་རིགས་འཕེལ་བ་སོགས་སྐྱེ་འགྲོའི་འཕྲོད་བསྟེན་ལ་གནོད་ཚབས་ཤིན་ཏུ་ཆེ་བ་ཡིན་པ་གསུངས་ཡོད། ང་ཚོ་བོད་པ་ཚོས་༸གོང་ས་མཆོག་གི་བཀའ་སློབ་ལམ་སྟོན་གང་མང་མང་ཉན་ནས་ལག་ལེན་བསྟར་རོགས་གནང། བོད་རྒྱལ་ལོ།།

བསྟན་འཛིན་དབྱངས་ཅན། འཛིན་གྲྭ་བརྒྱད་པ།གུ་རུ་པུ་ར་སཾ་བྷོ་ཊ་བོད་སློབ།    ༄༅། །༸གོང་ས་མཆོག་ནི་བོད་མི་ཡོད་དོ་ཅོག་གི་ལྟ་བའི་མིག་དང་ཁོག་པའི་སྙིང་ལྟ་བུ་རེད། ཁོང་གིས་བོད་མི་མ་ཟད་འཛམ་གླིང་ཡོངས་ལ་ཕན་ཐོགས་ཡོང་བའི་ཆེད་ཐུགས་བརྩེ་བ་ཆེན་པོས་བཀའ་སློབ་སྣ་ཚོགས་གནང་ཡོད། ཁོང་གི་བཀའ་སློབ་དང་ལམ་སྟོན་རྩ་ཆེན་པོ་མང་པོ་གནང་བའི་ནང་ནས་ང་རང་གི་ཡག་ཤོས་ཤེས་པ་དེ་རྩོམ་གྱི་ཐོག་བྲི་རྒྱུ་ཡིན། དེར་བརྟེན། གུས་མོ་རང་ཉིད་ནས་བྱམས་སྙིང་རྗེ་དང་ཤེས་ཡོན་གལ་ཆེ་བ། ཁོར་ཡུག་སྲུང་སྐྱོབ་བཅས་ཀྱི་སྐོར་བྲི་རྒྱུ་ཡིན། ༸གོང་ས་མཆོག་གིས། “བྱམས་བརྩེ་དང་སྙིང་རྗེ་ནི་མིའི་གཞི་རྩའི་རང་བཞིན་ཡིན་པ་དང་། འགྲོ་བ་མི་རིགས་སྤྱི་ཡོངས་ཀྱི་བདེ་སྐྱིད་ཀྱི་རྩ་བ་ཡིན། བྱམས་སྙིང་རྗེ་ནི་སེམས་ཀྱི་བདེ་སྐྱིད་སྐྲུན་བྱེད་ཀྱི་ཐབས་ལམ་ཡག་ཤོས་དེ་ཡིན་པ་མ་ཟད་ཕན་ཐོགས་ཀྱང་ཆེ་ཤོས་དེ་ཡིན། གང་ལ་ཟེར་ན། སེམས་ནང་གི་ཁོང་ཁྲོ་དང་ཕྲག་དོག འདོད་རྔམ་སོགས་ནི་སྡིག་པ་གསོག་སའི་རྒྱུ་ཆེ་ཤོས་ཡིན་པས། བྱམས་དང་སྙིང་རྗེ་ནི་ཁོང་ཁྲོ་སོགས་འཇོམས་བྱེད་ཀྱི་གཉེན་པོ་ལྟ་བུ་རེད། མི་ཙམ་མ་ཡིན་པར་སྐྱེ་འགྲོ་ཆ་ཚང་ལ་བྱམས་དང་སྙིང་རྗེ་བྱེད་རྒྱུ་གལ་ཆེན་པོ་ཡིན།” ཞེས་གསུངས་ཡོད། ༸གོང་ས་མཆོག་གིས་འཛམ་གླིང་ཞི་བདེ་བསྐྲུན་ཆེད་བོད་མི་གཙོ་བོར་གྱུར་པའི་འཛམ་གླིང་ཡོངས་ལ་བཀའ་སློབ་ལམ་སྟོན་མང་པོ་གནང་ཡོད་། ཁོང་གིས་ཆོས་ལུགས་ཚང་མས་བྱམས་སྙིང་རྗེ་བསྟན་ཡོད་པ་དང་། ཆོས་ལུགས་ཀུན་གྱི་སྙིང་པོ་ཡང་དེ་རེད་གསུངས་ཡོད། ཁོང་གིས་དུས་རྒྱུན་དུ་གྲོགས་པོ་མ་ཟད་རང་ལ་གནོད་པ་བྱེད་མཁན་དགྲ་ལའང་སྙིང་རྗེ་སྐྱེ་དགོས་པ་གསུངས་ཡོད། བྱམས་དང་སྙིང་རྗེ་ལྡན་པའི་མི་ཞིག་རྒྱལ་ཁབ་སོགས་ཀྱི་དབུ་ཁྲིད་ཆགས་པ་ཡིན་ན་རྒྱལ་ཁབ་ཕན་ཚུན་དབར་གུས་བརྩི་དང་། བསམ་ཤེས། ཞི་བདེ་སོགས་སྐྲུན་ཐུབ། བྱམས་དང་སྙིང་རྗེ་ནི་ཤིན་ཏུ་གལ་ཆེན་པོ་ཡིན་པས་དང་པོ་རང་ཉིད་ལ་སྙིང་རྗེ་སྐྱེ་དགོས། རང་གིས་རང་ལ་སྙིང་རྗེ་མེད་ན་གཞན་ལ་སྙིང་རྗེ་སྐྱེ་མི་ཐུབ། རང་གི་ནོར་འཁྲུལ་ལ་འགྱོད་སེམས་སྐྱེ་དགོས་པ་ཤིན་ཏུ་གལ་འགངས་ཆེ། ༸གོང་ས་མཆོག་གིས་ང་ཚོ་ཆུང་དུས་ནས་བྱམས་དང་སྙིང་རྗེ་ལག་ལེན་བསྟར་བའི་ཆེད་དུ་བོད་པའི་སློབ་གྲྭ་མ་ཟད་འཛམ་གླིང་སྤྱི་ཡོངས་ཀྱི་སློབ་གྲྭ་ཁག་ལ་སཱི་ཤེས་ཡོན་ཟེར་བའི་ཆོས་དང་མ་འབྲེལ་བའི་བཟང་སྤྱོད་ཀྱི་སློབ་ཚན་གསར་པ་ཞིག་གསར་གཏོད་གནང་སྟེ་སློབ་ཁྲིད་བྱེད་ཀྱི་ཡོད། སློབ་ཚན་དེའི་ནང་སློབ་ཕྲུག་ཚོ་སེམས་པ་བཟང་པོ་བྱེད་སྟངས་དང་མི་གཞན་ལ་བྱམས་དང་སྙིང་རྗེ་བྱེད་སྟངས་སོགས་སློབ་གསོ་གནང་བ་མ་ཟད། ལག་བསྟར་བྱེད་སྟངས་སོགས་ལའང་བཀའ་སློབ་གནང་ཡོད། ཁོང་གི་དགོངས་པར་ཤེས་ཡོན་ནི་མིའི་རྣམ་དཔྱོད་གོང་འཕེལ་གཏོང་བ་ཙམ་མ་ཟད་བྱམས་བརྩེ་དང་སྙིང་རྗེ་སྐྱེད་དགོས་པ་གསུངས་ཡོད། ཁོང་གིས་སཱི་ཤེས་ཡོན་སློབ་གསོས་སྤྱི་ཚོགས་བཟང་པོ་ཞིག་སྐྲུན་པར་ཕན་ཐོགས་ཆེན་པོ་ཡོད་པ་ཡིད་ཆེས་གནང་གི་ཡོད། ༸གོང་ས་མཆོག་གི་དགོངས་པར་ཤེས་ཡོན་གྱི་དམིགས་ཡུལ་གཙོ་བོ་ནི་བདེ་སྐྱིད་སྐྲུན་ཐབས་དང་སྤྱི་ཚོགས་བཟང་པོ་ཞིག་བཟོ་རྒྱུ་དེ་ཡིན། མི་ཚེ་དོན་དང་ལྡན་པ་ཞིག་སྐྱེལ་འདོད་ན་སཱི་ཤེས་ཡོན་གྱི་སློབ་གསོ་ངེས་པར་དུ་དགོས་པ་གསུངས་ཡོད་། སཱེ་ཤེས་ཡོན་གྱི་ཕན་ནུས་མང་པོ་ཡོད་པ་ནི། སྤྱི་ཚོགས་ནང་ཕན་ཚུན་མཐུན་སྒྲིལ་ཡོང་བ་དང་། བཟང་སྤྱོད་ཀྱི་རིག་སྟོབས་འཕེལ་བ། སེམས་དུལ་བ། གཞན་ལ་རིན་ཐང་དང་གུས་བརྩི་བྱེད་སྟངས་འཕེལ་བ། སེམས་ཀྱི་དཀའ་ངལ་ནས་གྲོལ་ཐུབ་པ་སོགས་ཁེ་ཕན་མང་པོ་ཡོད། ཁོང་གི་དམིགས་བསལ་ང་ཚོ་བོད་མི་ལ་བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་གལ་ཆེ་ཡིན་པའི་སྐོར་བཀའ་སློབ་གསུངས་ཡོད། ཁོང་གིས་རྒྱུན་དུ་འཛམ་གླིང་ཁོར་ཡུག་སྲུང་སྐྱོབ་དང་རང་བྱུང་ཁམས་ལ་བརྩི་བཀུར་བྱེད་རྒྱུ་གལ་ཆེན་པོ་ཡིན་པས་སྔོན་ལ་བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་དེ་གལ་གནད་ཆེན་པོ་ཡིན་པ་གསུངས་ཡོད། དེ་འདྲ་སོང་ཙང་། ཁོང་གིས་བོད་ཀྱི་ཁོར་ཡུག་བདག་གཅེས་བྱེད་དགོས་པ་དེ་རང་ཉིད་ཀྱི་ཁེ་ཕན་ཙམ་མ་ཡིན་པར་མ་འོངས་པའི་མི་རབས་ཚང་མའི་བདེ་ཐང་ལ་བསམ་བློ་གཏོང་དགོས་ཞེས་གསུངས་ཡོད། ཁོང་གིས་ང་ཚོ་འཛམ་གླིང་འདིའི་སྒང་གི་སྐྱེ་ལྡན་ཚང་མ་དང་འབྲེལ་བ་ཡོད་པས་ཚང་མས་ཁོར་ཡུག་སྲུང་སྐྱོབ་བྱེད་རྒྱུར་འགན་འཁུར་དགོས་ཤིང་། བོད་ཀྱི་ཁོར་ཡུག་གནས་སྟངས་ནི། ཨེ་ཤཱི་ཡའི་ཆུ་བོ་མང་ཆེ་བའི་འབྱུང་ཁུངས་དང་མི་འབོར་ཐེར་འབུམ་མང་པོའི་འཚོ་བ་དང་ཐད་ཀར་འབྲེལ་བ་ཡོད་པ་དང་། དེ་བཞིན་ཤིང་ནགས་དང་རྩི་ཤིང་མེད་པ་ཡིན་ན་དཀའ་ངལ་འཕྲད་རྒྱུ་ཡིན་པ་གསལ་པོ་ཡིན་སྟབས། མི་སྒེར་སོ་སོའི་འགན་ཁུར་བླངས་ནས་ཤིང་སྡོང་སོགས་འདེབས་འཛུགས་བྱེད་དགོས་པ་ཤིན་དུ་གལ་ཆེན་པོ་ཡིན་ལུགས་སོགས་གསུངས་ཡོད། ༸གོང་ས་མཆོག་གི་མཐར་ཐུག་གི་དགོངས་པ་ནི་ང་ཚོ་ཚང་མའི་བསམ་བློ་གཏིང་ཟབ་པོ་བཏང་སྟེ་ཁོར་ཡུག་སྲུང་སྐྱོབ་བྱེད་སྟངས་སྐོར་གོ་རྟོགས་སྤེལ་རྒྱུ་དེ་ཡིན། ༸གོང་ས་མཆོག་གིས་འཛམ་གླིང་ཞི་བདེ་ཡོང་ཐབས་སུ་ལམ་སྟོན་མང་པོ་གསུངས་ཡོད། ཁོང་ཆུང་དུས་ནས་ད་བར་དུ་བོད་མི་རིགས་དང་། འཛམ་གླིང་ཡོངས་ལ་ཞི་བདེ་ཐོབ་པའི་ཆེད་དུ་བཀའ་སློབ་དང་ལམ་སྟོན་གོ་སྐབས་ནམ་ཡོད་ལ་གནང་གི་ཡོད། […]

བཀྲ་ཤིས་ཆོས་སྒྲོན། འཛིན་གྲྭ་བརྒྱད་པ།ཤིམ་ལ་སཾ་བྷོ་ཊ་གཏན་སློབ། བྱ་དཀར་པོ་མ་འཁྲུངས་དཀར་པོ་འཁྲུངས།། བྱ་དཀར་པོ་ཡུལ་ལྗོངས་བོད་ལ་འཁྲུངས།།བོད་ཆོས་ལྡན་དམ་པའི་ཞིང་ཁམས་ནས།། བྱ་དཀར་པོ་འཚེ་མེད་གཤོག་ཟུང་རྒྱས།།བྱ་དཀར་པོ་མ་རེད་དཀར་པོ་རེད།། བྱ་དཀར་པོ་ཞི་བདེ་ལྷ་བྱ་རེད།།ལྷོ་འཛམ་བུ་གླིང་གི་ཉི་མ་རེད།། བོད་ཁ་བ་ཅན་གྱི་ནོར་བུ་རེད།།    གསེར་དངུལ་རིན་ཆེན་ལས་ལྷག་པའི་ངའི་སེམས་ནང་འགངས་ཆེ་བ་དང་རྩ་ཆེ་བ་༸གོང་ས་རྒྱལ་བ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་ཡིན། ཁོང་ནི་ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་འཇིག་རྟེན་དེའི་ནང་ལ་སྐུ་འཁྲུངས། བོད་མི་རྣམས་ཀྱིས་ཁོང་གི་གསུང་སྐད་ཐོས་པ་དང་ཞལ་རས་མཇལ་དུས་མིག་ནས་མིག་ཆུ་རང་དབང་མེད་པར་ཤོར་གྱི་ཡོད། འོན་ཀྱང་། བོད་ལ་ཡོད་པའི་བོད་མི་རྣམས་དེ་ལས་སེམས་སྐྱོ་ཞིང་༸གོང་ས་མཆོག་གི་སྐུ་པར་ཡང་ཉར་ཆོག་གི་མེད། ཡིན་ནའང་། ང་ཚོ་བཙན་བྱོལ་བ་ཚོར་རང་དབང་ཆ་ཚང་ཡོད་པས། ༸གོང་ས་མཆོག་གི་ལམ་སྟོན་འོག་ཤར་སྐྱོད་བྱེད་རྒྱུ་དེ་ཧ་ཅང་གལ་ཆེན་པོ་རེད། དེར་བརྟེན། ཁོང་གིས་རྒྱུན་གཏན་ནས་ལམ་སྟོན་རབ་དང་རིམ་པ་མང་པོ་གནང་གི་ཡོད། དེ་དག་ལས་གུས་མོས་རྒྱ་མཚོ་ནང་གི་ཆུ་ཐིགས་ཙམ་ཞིག་གི་སྐོར་བརྗོད་པ་ཡིན། ༡༽ ༸གོང་ས་མཆོག་གིས་སློབ་གཉེར་བ་རྣམ་ལ་ལམ་སྟོན་གནང་བའི་སྐོར།    ཁོང་གིས་ག་དུས་ཡིན་ནའང་མི་མང་དང་སློབ་ཕྲུག་ཚོར་ཤེས་བྱ་ཡོན་ཏན་ཡོད་ན། མིའི་མི་ཚེའི་ནང་ལ་ལག་ཆ་ཡོད་པ་ལྟ་བུ་ཞིག་དང་། གལ་ཏེ། མི་ཞིག་ལྷག་བསམ་རྣམ་དག་དང་སྤུས་དག་ཞིག་ཡོད་ན་ལག་ཆ་དེ་བེད་སྤྱོད་གཏོང་ཤེས་ཤིང་། མི་ཞིག་ལྷག་བསམ་རྣམ་དག་དང་སྤུས་དག་ཞིག་ཡོད་ན། མི་དེ་མ་འོངས་པར་ནར་སོན་དུས་དཀའ་ངལ་མ་འཕྲད་པ་དང་། མི་དེ་ཚང་མས་བརྩི་བཀུར་ཞུ་ས་ཞིག་ཏུ་འགྱུར་གྱི་ཡོད། གལ་སྲིད། མི་ཞིག་ལ་ཤེས་བྱ་གཅིག་པུ་ལས་ཡ་རབས་སྤྱོད་བཟང་མེད་ན། མི་དེ་རང་བཞིན་གྱིས་མ་རབས་ཤིག་ཏུ་འགྱུར་འགྲོ། དེ་འདྲ་ཆགས་ན། གོ་ལ་འདིའི་ནང་གནས་པའི་འགྲོ་བ་རིགས་དྲུག་སེམས་ཅན་ཐམས་ཅད་ལ་ཕན་མི་ཐོགས། རྒྱུ་མཚན་ནི། མི་རྣམས་ལ་ཤེས་བྱ་ཡོན་ཏན་ག་ཚོད་ཀྱི་ཕུན་སུམ་ཚོགས་པོ་ཡོད་ནའང་། ཁོ་མི་ཞིག་ཡིན་པའི་ཆ་ནས་གཞི་རྩ་མིའི་ལྷག་བསམ་དང་བཟང་སྤྱོད་མེད་ན་སྤྱི་ཚོགས་ལ་གནོད་པ་ལས་ཕན་མི་ཐོགས། དེའི་རྐྱེན་པས་སྤྱི་ཚོགས་ལ་ཞི་བདེ་མེད་པ་ཆགས་ཀྱི་རེད། ཤེས་བྱ་ཡོན་ཏན་ཡོད་ན།། ལག་ཆ་ཡོད་པ་ལྟ་བུ།།ལྷག་བསམ་དག་པོ་ཡོད་ན།། བཟང་སྤྱོད་ཡོད་པ་ལྟ་བུ།། ༢༽ ༸གོང་ས་མཆོག་གི་ཐུགས་བསྐྱེད་དམ་བཅའ་བཞི།    ༸གོང་ས་མཆོག་གིས་ཁོང་ནི་འགྲོ་བ་མི་ཞིག་ཡིན་པའི་ཆ་ནས་རྒྱུན་གཏན་ནས་མི་ལ་བཟང་སྤྱོད་ཐོག་ལ་བཀའ་སློབ་གནང་ཡོད། དེ་ནི་མི་སྒེར་དང་ཁྱིམ་ཚང་སྤྱི་ཚོགས་སོགས་ལ་བདེ་སྐྱིད་འབྱུང་བའི་གཞི་ཡིན་པར་གསུང་གི་ཡོད། དེར་བརྟེན། ང་ཚོས་རང་གི་རྒྱུད་ལ་ཡོད་པའི་ཡ་རབས་བཟང་སྤྱོད་དེས་གཞན་ལ་ཕན་པ་སྒྲུབ་དགོས། མ་ཟད། ཁོང་གིས་ཁོང་ནི་ཆོས་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་བར་འབྲེལ་བ་བྱེད་ཀྱི་ཡོད། བྱས་ཙང་། ཁོང་གིས་བྱམས་དང་བརྩེ་བ། […]

བསྟན་འཛིན་མི་ཕམ། འཛིན་གྲྭ་དྲུག་པ།ཧར་པ་པུར་སཾ་བྷོ་ཊ་ཉིན་སློབ། ཁོང་གི་བཀའ་སློབ་ལམ་སྟོན་བདུད་རྩི།།མཚོ་ལས་ཟབ་ཅིང་རི་ལས་མཐོ་བ།།གསུང་ནི་འཇམ་ཞིང་རྣ་བར་སྙན་པ།།རྟག་ཏུ་བཀའ་སློབ་སྙིང་ལ་བཅང་དགོས།།    ༄༅། །སྐལ་བ་བཟང་བའི་དུས་ཤིག་ལ་ངའི་ཕ་ཡུལ་ནི་རང་བཞིན་ཁོར་ཡུག་མཛེས་སྡུག་ལྡན་ལ་ཕྱོགས་བཞི་གངས་རི་ར་བས་ཡོངས་སུ་བསྐོར་བའི་ཞིང་ཁམས་ནི། ངའི་མཛེས་སྡུག་གི་ཕ་ཡུལ་གངས་ཅན་ས་ལའི་སྨན་ལྗོངས་བོད་ཡིན། ལས་ལ་བརྩོན་ཞིང་ཆོས་དད་ཆེ་བའི་བོད་མི་རྣམས་འཇིགས་པ་དང་དངངས་སྐྲག་སྤུ་ཙམ་མེད་པར་རང་བྱུང་ཁོར་ཡུག་གི་དཔལ་ལ་ལོངས་སུ་སྤྱད་ནས་ཞི་བདེའི་ངང་བསྡད་ཀྱི་ཡོད། དེ་བཞིན་བོད་མི་རྣམས་སྔར་ནས་ཆོས་ལ་དད་པ་ཆེ་ཞིང་གཞན་ལ་ཕན་སེམས་ཆེ་བ་། རང་བཞིན་སེམས་བཟང་བ། སྙིང་རྗེ་ཆེ་བ། རང་གི་ས་ཐོག་ན་ཡོད་པའི་རང་བྱུང་རྒྱུ་ནོར་གང་ཡོད་པ་དེའི་འདོད་པ་ཁེངས་ཤིང་འདོད་ཆུང་ཆོག་ཤེས་ཀྱང་ཡིན། འོན་ཀྱང་སྟབས་ཤིན་ཏུ་མ་ལེགས་པ་ཞིག་ལ། ཕྱི་ལོ་ ༡༩༥༩ ལོར་ཞི་བདེར་དགའ་བའི་བོད་མི་རྣམས་ཀྱི་བསམ་ཡུལ་ལས་འདས་པའི་དོན་རྐྱེན་ཐབས་སྡུག་པོ་ཞིག་བྱུང་བ་ནི། ཤར་ཕྱོགས་ནས་རྒྱ་མི་དམར་པོའི་དྲག་པོའི་དམག་དཔུང་འབུམ་ཕྲག་མང་པོ་སླེབས་ནས་དྲག་པོའི་མཚོན་ཆ་ཅི་ཡང་མེད་པའི་བོད་མི་མང་པོ་ཞིག་དམར་གསོད་བཏང། རྒྱུ་ནོར་ཡོད་ཚད་འཕྲོག་བཅོམ་བྱས། ལོ་ངོ་སྟོང་ཕྲག་གི་ལོ་རྒྱུས་དང་རྩ་ཆེའི་དགོན་པ་དང་ལྷ་སྐུ་ཕོན་ཆེན་པོར་རིན་ཐང་ཅི་ཡང་མ་བརྩིས་པར་གཏོར་བཤིག་བཏང་བ་རེད། ཡིན་ན་ཡང་། སྐབས་དེར་སྟབས་ལེགས་པ་ཞིག་ལ་རྒྱ་མི་དམར་པོའི་གཡོ་འཕྲུལ་དང་མགོ་སྐོར་ལ་མ་ཚུད་པར་རྒྱ་ལག་ལ་༸གོང་ས་མཆོག་འཛིན་བཟུང་ཐུབ་མེད། ཁོང་དང་སྐུ་འཁོར་གཙོས་པའི་བོད་བརྒྱ་ཕྲག་ལྷག་མཉམ་དུ་བོད་ཀྱི་ཁྱིམ་མཚེས་རྒྱལ་ཁབ་རྒྱ་གར་ནང་བཙན་བྱོལ་ལ་བདེ་བར་ཕེབས་ཐུབ་པ་བྱུང་ཡོད། སྐབས་དེར། རྒྱ་གར་ཡང་མཐུན་རྐྱེན་དང་གནས་སྟངས་ཡག་པོ་རང་མེད། གང་ཡིན་ཟེར་ན། དབྱིན་ཇིའི་བཙན་འོག་ནས་རང་བཙན་ཐོབ་ནས་ལོ་མང་པོ་འགྲོ་ཡི་མེད།    ༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ལ་སྐུ་ངལ་ཧ་ཅང་མང་པོ་འཕྲད་ཀྱང་དཔའ་ངར་ཞུམ་མེད་དང་སྙིང་སྟོབས་ཆེར་བསྐྱེད་ཀྱིས་ཁོང་གིས་བོད་དོན་ཐོག་ལ་ཕུགས་རྒྱང་རིང་པོའི་དགོངས་པ་བཞེས་ནས་སྐུ་ལས་ཚད་མེད་པ་བསྐྱོན་གནང་ཡོད། ༸མགོན་པོ་མཆོག་རྒྱ་གར་དུ་ལོ་ངོ་ ༦༥ ལྷག་བཙན་བྱོལ་ནང་སྐྱབས་བཅོལ་དུ་བཞུགས་ནས་བོད་མི་གཙོས་པའི་ཕྱི་རྒྱལ་བ་ཁག་ལ་འཚེ་མེད་ཞི་བའི་ལམ་སྟོན་མང་པོ་གནང་ཡོད། ང་ཚོ་རྒྱ་གར་ནང་བཙན་བྱོལ་དུ་སླེབ་དུས་དེང་རབས་ཤེས་ཡོན་གྱིས་མ་འདང་བ་ལ་གཟིགས་ཏེ་མ་སུ་རིར་བཙན་བྱོལ་ནང་གི་བོད་སློབ་ཐོག་མ་འདི་གསར་འཛུགས་གནང་། ཁོང་གིས་བོད་མི་རྣམས་ལ་ཤེས་ཡོན་ཡར་རྒྱས་ཐོག་ལ་བཀའ་སློབ་རབ་དང་རིམ་པ་གསུངས་གནང་ཡོད། གཙོ་བོ་སློབ་སྦྱོང་བྱེད་དུས། “འདབ་གཤོག་གཉིས་ལྡན་གྱི་སློབ་སྦྱོང་བྱེད་དགོས།” སྐོར་བཀའ་སློབ་ལམ་སྟོན་ཡང་ཡང་གནང་གི་ཡོད། འདབ་གཤོག་གཉིས་ལྡན་ནི། གཅིག་ང་རང་ཚོ་ཆོས་དང་རིག་གཞུང་སྐད་ཡིག་གི་སྲོལ་རྒྱུན་སློབ་སྦྱོང་དང། གཉིས་པ་དེ། དེང་དུས་ཀྱི་སློབ་སྦྱོང་ཚན་རིག་དང་རིག་གསར་ལ་སློབ་སྦྱོང་གནང་དགོས་པའི་སྐོར་བཀའ་ཡང་ཡང་གནང་གི་ཡོད། དེ་བཞིན་དུ་བཟང་སྤྱོད་ཡ་རབས་གཞན་ཕན་གྱི་བསམ་བློ་ཡག་པོ་དགོས་པའི་སྐོར་ལ་བཀའ་སློབ་ཡང་ཡང་གནང་གི་ཡོད་པའི་སྙིང་པོ་ནི། “མི་གཞན་ལ་ཕན་མ་ཐོགས་ན་གནོད་པ་མ་སྐྱེལ།” ཞེས་པའི་ཐོག་ལ་ཡང་ཡང་ལམ་སྟོན་གནང་གི་ཡོད། དེ་བཞིན་གཞན་ལ་སེམས་པ་བཟང་པོ་བྱེད་དགོས་པ་དང་། ཕན་སེམས་བྱེད་དགོས་སྐོར་བཀའ་སློབ་རིན་ཐང་བྲལ་བ་མང་པོ་གནང། བྱམས་བརྩེའི་འབྱུང་ཁུངས་ཕ་མ་བཀའ་དྲིན་ཆེན་པོ་ཡིན་པ་མ་ཟད་དགེ་རྒན་དང་པོ་ཡང་ཡིན་བཅས་ཀྱི་སྐོར་ལ་བཀའ་སློབ་ལམ་སྟོན་ཧ་ཅང་མང་པོ་གནང་ཡོད། ངས་བསམ་པར་ཁོང་ནི་བྱང་ཆུབ་སེམས་དཔའ་དངོས་གཞི་དང་འཕགས་པ་སྤྱན་རས་གཟིགས་ཀྱི་རྣམ་སྤྲུལ་དངོས་རེད། ང་ཚོས་ཁོང་སྐྱབས་གནས་བསླུ་བ་མེད་པ་ཞིག་ཡིན་པའི་ཡིད་ཆེས་བརྟན་པོའི་ངང་ཁོང་གི་བཀའ་སློབ་རྣམས་སྙིང་ལ་བཅང་དགོས། ང་ཚོ་ཚང་མས་ཁོང་གི་བཀའ་སློབ་ལམ་སྟོན་གང་གནང་བ་དེ་དག་ལག་ལེན་བསྟར་ནས་མི་ཚེ་ནང་ལ་འཁྱེར་ཐུབ་ན། ང་ཚོ་ཚང་མ་ཤེས་ཡོན་ལྡན་པའི་མི་བཟང་པ་པོ་དང་བོད་མི་ཡག་པོ་ཞིག་ཀྱང་ཆགས་ཀྱི་རེད། ཐུགས་རྗེ་ཆེ།།

བསྟན་འཛིན་ཆོས་འཛོམས། དགུ་པ།མ་སུ་རི་སཾ་བྷོ་ཊ་གཏན་སློབ།    སྤྱིར་༸རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ང་ཚོ་ལ་ཐུགས་ཀྱི་གཏིང་ནས་རེ་བ་མང་པོ་གནང་ཡོད་རེད། རེ་བ་དེ་དག་གང་ཡིན་པ་ཤེས་ཐུབ་མཁན་ང་ཚོ་བོད་ཕྲུག་ནང་ལ་བརྒྱ་ཆ་མང་པོ་མེད། ང་ཚོ་བོད་པ་ཚང་མ་བཙན་བྱོལ་བ་ཡིན་པས་ག་དུས་ཡིན་ནའང་རྒྱལ་ཁབ་གཞན་དང་མི་མཚུངས་བ་ཞིག་བྱེད་དགོས། ང་ཚོ་བཙན་བྱོལ་བ་རེད། ཡིན་ནའང་། ང་ཚོའི་སྐད་དང་རིགས་གཞུང་ནི་ད་ལྟ་དུས་རྒྱུན་དུ་ཡར་རྒྱས་འགྲོ་བསྡད་ཡོད། དེ་ནི་༸གོང་ས་མཆོག་གི་བཀའ་དྲིན་རེད། ཁོང་གིས་ང་ཚོའི་ཆེད་དུ་སློབ་གྲྭ་གསར་པ་མང་པོ་བཙུགས་ཡོད། སློབ་གྲྭ་ཐོག་མ་དེ་ནི་མ་སུ་རི་བོད་ཁྱིམ་སློབ་གྲྭ་ཡིན་པས། དེ་ནང་སྡོད་མཁན་ཚོ་ངེས་པར་དུ་ལྷག་བསམ་ཅན་ཞིག་དགོས་ཀྱི་རེད་བསམ་གྱི་འདུག གུས་མོ་ང་རང་སློབ་གྲྭ་དེའི་སློབ་ཕྲུག་ཡིན་པས་ཆ་ནས་བསོད་ནམས་ཆེན་པོ་ཞིག་ཏུ་ཚོར་གྱི་འདུག་པས། གཞན་ལ་ཕན་ཐོགས་ཡོད་པའི་སློབ་ཕྲུག་ཅིག་བྱེད་དགོས་པའི་བསམ་བློ་ཞིག་རྒྱུན་དུ་གཏོང་གི་ཡོད། ང་ཚོ་བོད་པའི་སློབ་ཕྲུག་སུ་ཞིག་ཡིན་ནའང་བསམ་པ་བཟང་པོ་དང་ལྷག་བསམ་དཀར་པོ་ཞིག་བྱེད་ཐུབ་ན་ཡག་པོ་རེད་བསམ་། རྒྱལ་ཁབ་གཞན་པའི་སློབ་མ་རྣམས་ལའང་མིག་དཔེ་ཡག་པོ་ཞིག་ཆགས་ཐུབ་པར་ཕན་ཐོགས་མང་པོ་ཡོང་གི་ཡོད།  ༸གོང་ས་མཆོག་གིས་རྟག་པར་ང་ཚོ་སློབ་ཕྲུག་དང་ཁོང་ལ་དད་པ་ཡོད་མཁན་རྣམས་ལ་རེ་བ་འདི་འདྲ་གནང་བཞིན་ཡོད་པས་བོད་མི་ཚང་མས་ཁོང་གི་ཞལ་གསུང་ལ་ཉན་རྒྱུ་དེ་ལས་འགན་དང་པོ་དེ་ཡིན་པར་འདོད། བདག་གི་བསམ་ཚུལ་ལ་༸གོང་ས་མཆོག་གི་བོད་པའི་སློབ་གྲྭ་མང་པོ་བཙུགས་པའི་དགོས་དོན་ནི། བོད་ཕྲུག་ཚང་མས་རང་ཉིད་ཀྱི་བོད་ཀྱི་སྐད་དང་རིགས་གཞུང་། ནང་ཆོས། རིགས་ལམ་སོགས་ཀྱི་ཐོག་ལ་སློབ་སྦྱོང་བྱས་ཏེ་ཤེས་དགོས་པར་མ་ཟད། དེང་དུས་ཀྱི་ཤེས་ཡོན་ཡང་ཡོད་མཁན་གྱི་སློབ་མ་ཞིག་བྱེད་ཐུབ་པ་བཅས་ལ་རེ་བ་གནང་གི་ཡོད་པ་དེ་རེད་བསམ། ༸གོང་ས་མཆོག་གིས་དེ་སྐོར་ནས་བཀའ་སློབ་ཐེངས་མང་པོ་གསུངས་ཡོད། འཛམ་གླིང་ནང་གི་སློབ་གྲྭའི་ད་ལྟའི་སློབ་ཚན་གང་ཡོད་པ་རྣམས་དང་། བོད་ཀྱི་རིག་གཞུང་ནང་ཆོས་གཉིས་ལ་སློབ་སྦྱོང་བྱེད་ཐུབ་ན་ལུས་དང་སེམས་གཉིས་སྐྱིད་པོ་བྱས་ཏེ་བསྡད་ཐུབ་པར་༸གོང་ས་མཆོག་ཁོང་གིས་གལ་ཆེན་པོ་བྱས་ནས་གསུང་གི་ཡོད་པ་ང་རང་གིས་མི་གཞན་གྱི་ཁ་ནས་མང་པོ་གོ་མྱོང་། སློབ་མ་ཞིག་ཡིན་ན་ངེས་པར་དུ་སློབ་སྦྱོང་བྱེད་དུས་བློ་རྩེ་གཅིག་ཏུ་སྒྲིམ་ནས་སློབ་སྦྱོང་ལ་ཤུགས་རྒྱག་དགོས་། ང་ཚོར་གལ་ཆེན་ཞིག་ཧ་གོ་དགོས་པ་ནི། ཤེས་ཡོན་སྦྱང་པའི་དགོས་པ་གཙོ་བོ་འདི་ནི་མི་སེམས་པ་བཟང་པོ་ཞིག་ཏུ་འགྱུར་ཐུབ་པ་བྱེད་རྒྱུ་དེ་རེད་བསམ། སེམས་པ་བཟང་པོ་བྱེད་པ་དེ་ཡང་༸གོང་ས་མཆོག་གི་རེ་བ་ཨང་དང་པོ་དེ་ཡང་ཡིན་པར་མ་ཟད། སེམས་པ་བཟང་ན་ས་དང་ལམ་ཡང་བཟང་ཞེས་ཁ་དཔེ་ཡང་ཡོད། བོད་ཕྲུག་ང་ཚོ་ཚང་མ་ལ་༸གོང་ས་མཆོག་གིས་རེ་བ་དེ་ལྟར་གནང་གི་ཡོད་པ་དེ་ནི། གུས་མོ་ང་རང་གི་ཐོས་པ་དང་ཡིད་དབང་འཕྲོག་བྱུང་། ཁོང་གི་ཐུགས་རེ་གཞན་པ་ཞིག་ཀྱང་ཡོད་པ་ཡང་གོ་མྱོང་། དེ་ནི་ང་ཚོ་བོད་ཕྲུག་ཚང་མ་མེ་ཏོག་ལྡུམ་ར་ནང་གི་མེ་ཏོག་ནང་བཞིན་མ་ཡིན་པར་། ཤིང་ནག་ནང་གི་མེ་ཏོག་དང་རི་ཡི་མགོ་ཡི་མེ་ཏོག་འདྲ་བོ་དགོས་གསུངས་པ་དེ་རེད། རྒྱུ་མཚན་ནི། ལྡུམ་རའི་ནང་གི་མེ་ཏོག་ལ་བདག་བཅེས་བྱེད་དགོས་ཀྱི་ཡོད། ཡིན་ཡང་། ཤིང་ནགས་ནང་གི་མེ་ཏོག་ལ་དེ་འདྲ་བྱེད་དགོས་མེད་པར་ཁོ་རང་ཁོ་རང་སྐྱེ་ཐུབ་ཀྱི་ཡོད་པ་རེད། ཆར་རླུང་སོགས་ཀྱིས་ཞེ་དྲག་གནོད་འཚེ་སྐྱེལ་ཐུབ་ཀྱི་མེད་པ་རེད། གཞོན་ནུ་མ་ང་རང་དེ་དག་ཐོས་པ་ནས་བཟུང་ཤིང་ནགས་ནང་གི་མེ་ཏོག་ནང་བཞིན་བྱེད་པར་འབད་བརྩོན་བྱེད་ཀྱི་ཡོད། བོད་པའི་རིག་གཞུང་གང་ཡིན་པ་ངོས་འཛིན་བྱེད་ཤེས་པ་དེ་ཡང་༸གོང་ས་མཆོག་གི་བོད་ཕྲུག་ང་ཚོ་ལ་བཅངས་པའི་རེ་བ་ཞིག་རེད། བོད་པའི་རིག་གཞུང་ངོ་མ་ནི་ནང་པའི་ཆོས་ལ་སློབ་སྦྱོང་བྱེད་པ་དེ་ཚང་མའི་ནང་ནས་གལ་ཆེ་ཤོས་དེ་རེད་བསམས། ཁོང་གིས་འཛམ་གླིང་མི་མང་གི་ཆེད་དུ་དེབ་མང་པོ་ལྗགས་རྩོམ་གནང་ཡོད། ཁོང་གིས་ལྗགས་རྩོམ་གནང་བའི་གསུང་རྩོམ་གྲངས་ལས་འདས་པ་ཡོད ཕྱག་དེབ་ཁ་ཤས་ཀྱི་ནང་དོན་ནི་བོད་ཕྲུག་ང་ཚོའི་ཆེད་དུ་ལས་སླ་པོ་གསུངས་ཡོད། ང་ཚོ་༸གོང་ས་མཆོག་གི་རྗེས་འབྲང་པ་ཡིན་པས་ཁོང་གི་གསུང་རྩོམ་དང་། མཛད་རྣམ། བཀའ་སློབ། སོགས་ལ་མ་བལྟས་ན་གཞན་པ་སུ་ཡིག་ལྟ་ཤེས། བོད་ཕྲུག་ང་ཚོ་མ་འོངས་བོད་ཀྱི་སོན་རྩ་ཡིན་པས། ༸གོང་ས་མཆོག་གི་ལམ་སྟོན་གང་གནང་བ་དེ་ལ་ཡག་པོ་བྱས་ནས་ལག་ལེན་བསྟར་དགོས།

བསྟན་འཛིན་ནམ་མཁའ། བཅུ་གཉིས།མ་སུ་རི་སཾ་བྷོ་ཊ་གཏན་སློབ།    ཁ་སང་ངའི་སེམས་པ་ཉམ་དམའ་བོ་ཚོར་དུས་ངས་ཉི་ནུབ་ལ་བལྟས་ནས་སེམས་ཁམས་ཀྱི་ཚོར་བ་ཡར་རྒྱས་གཏོང་བར་འབད་བརྩོན་བྱས་པ་ཡིན། ཉི་ནུབ་ཀྱི་མཛེས་སྡུག་གིས་ངའི་སེམས་ཁམས་སྐྱིད་པོ་བཟོ་ཐུབ་པས་ང་ཉལ་ཁང་ནང་དུ་ཕྱིན་ནས་ཆུ་ཕོར་པ་གང་བཏུངས་ནས་ཉལ་རྒྱུའི་ཐབས་ཤེས་བྱས་པ་ཡིན། ང་གཉིད་ཤོར་ནས་སྐར་མ་ཁ་ཤས་རྗེས་ལ་ངའི་རྨི་ལམ་ནང་ངའི་རྩ་བའི་བླ་མ་ཏཱ་ལའི་བླ་མ་མཆོག་མཇལ་བའི་སྐལ་བཟང་གོ་སྐབས་ཐོབ་བྱུང། ཁོང་གིས་བོད་ཕྲུག་ཚོར་ཐུགས་རེ་མང་པོ་ཡོད་པའི་ནང་ནས་གལ་ཆེ་ཤོས་དྲུག་ཙམ་སྐོར་ང་ལ་བཀའ་མངགས་གནང་བྱུང་བ་དག་རིམ་པས་འོག་ཏུ་བཤད་ན། དང་པོ་ནི། བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་སྐོར།    བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་བྱེད་པ་དེས་བོད་མི་རིགས་ཀྱི་ངོ་བོ་དང་ལོ་རྒྱུས། ཆོས་ལུགས་ཕྱུག་པོ་དག་རྒྱུན་སྐྱོང་བྱེད་པར་ཧ་ཅང་གི་གལ་ཆེན་པོ་རེད། དུས་རབས་ཁ་ཤས་རིང་བོད་ཀྱི་ནང་ཆོས་ནང་སྙིང་རྗེ་དང། འཚེ་མེད་ཞི་བ། རང་བྱུང་ཁམས་ཀྱི་འབྲེལ་བ་དམ་ཟབ་ཡོད་པའི་ཐུན་མོང་མ་ཡིན་པ་དང་གཏིང་ཟབ་པའི་ཆོས་ལུགས་ཤིག་གསོ་སྐྱོང་བྱས་ཡོད། ཡིན་ན་ཡང་ཆབ་སྲིད་ཀྱི་འགྱུར་བ་དང། གོ་ལ་ཧྲིལ་པོར་དེང་རབས་ཀྱི་ཤུགས་རྐྱེན་གྱིས་སྔོན་གྱི་ཤུལ་གཞག་དེར་ཉེན་ཁ་ཆེན་པོ་བཟོས་ཡོད། རིག་གནས་ཀྱི་ངོ་བོ། སྐད་ཡིག་ནི་རིག་གནས་གང་རུང་གི་སྙིང་པོ་ཡིན། བོད་ཀྱི་སྐད་ཡིག་དེ་དུས་རབས་ཁ་ཤས་རིང་གི་ཤེས་རབ་དང། དེ་མེད་ན་བོད་ཀྱི་རིག་གཞུང་མང་ཆེ་བ་ཉམས་རྒུད་གོ་ནོར་ཐེབས་པའི་ཉེན་ཁ་ཡོད། ༸གོང་ས་མཆོག་གིས་ཐུགས་འགན་ཆེ་བཞེས་ཀྱིས་བོད་ཀྱི་རིག་གནས་དང་སྐད་ཡིག་སྲུང་སྐྱོབ་བྱེད་པར་སྐུལ་འདེད་གཏོང་བར་གལ་ཆེའི་ནུས་པ་འདོན་གནང་ཡོད། སྡོམ་ཚིག བོད་པའི་རིག་གཞུང་དང་སྐད་ཡིག་སྲུང་སྐྱོབ་བྱེད་རྒྱུ་དེ་བོད་པ་ཙམ་མ་ཡིན་པར་འཛམ་བུ་གླིང་གི་ཁྱོན་ཡོངས་ལ་གལ་ཆེན་ཆགས་ཡོད། དེས་འཛམ་གླིང་གི་རིག་གནས་རྣམས་ལ་ཕན་ཐོགས་ཡོད་ལ་ཆོས་ལུགས་ཀྱི་ཤེས་ཡོན་སྤྲོད་པ་དང། འགྲོ་བ་མིའི་རིགས་ལ་སྙིང་རྗེ་དང། འཆམ་མཐུན། རྒྱལ་སྤྱིའི་རྒྱབ་སྐྱོར་བཅས་བརྒྱུད་ནས་རིན་ཐང་ཆེ་བའི་ཤུལ་བཞག་འདི་སྲུང་སྐྱོབ་བྱེད་ཐུབ་པ་དང་མ་འོངས་པའི་མི་རབས་ལ་རྩིས་སྤྲོད་ཐུབ་པ་དགོས། གཉིས་པ། སློབ་གསོ་དོན་དུ་གཉེར་བའམ་འཚོལ་སྙེག་བྱེད་པ།    ཤེས་ཡོན་གྱི་འཚོལ་ཞིབ་ནི་མི་སྒེར་གྱི་འཕེལ་རྒྱས་དང་སྤྱི་ཚོགས་ཡར་རྒྱས་གྱི་ལག་ཆ་ཤུགས་ཆེན་པོ་ཞིག་རེད། དེས་ཤེས་བྱ་དང་ལག་རྩལ། གོ་སྐབས་བཅས་སྒོ་ཕྱེ་ནས་མི་ཚེར་འགྱུར་བ་གཏོང་བ་དང་སྤྱི་ཚོགས་ཧྲིལ་པོ་ཡར་རྒྱས་གཏོང་ཐུབ། ཤེས་ཡོན་གྱིས་མི་སྒེར་ལ་སྐྱོན་བརྗོད་ཀྱི་བསམ་བློ་གཏོང་བའི་ནུས་པ་དང་ཤེས་རྟོགས་ལྡན་པའི་ཐག་གཅོད་བྱེད་པ་དང། དེས་མི་རྣམས་དབུལ་ཕོངས་ཀྱི་ཁོར་ཡུག་ནས་ཐར་ཏེ་རང་ཁ་རང་གསོ་བྱེད་པར་ཕན་ཐོགས། དེང་སང་སྤྱི་ཚོགས་ནང་དཔལ་འབྱོར་གྱི་དཀའ་ངལ་འཕྲད་ནས་ཁྱིམ་ཚང་ཁ་ཤས་ཀྱིས་ཕྲུ་གུ་སློབ་གྲྭར་གཏོང་མི་ཐུབ་པ་དང། ཁོ་ཚོ་ལས་ཀ་བྱེད་དགོས་པའམ་ཡང་ན་ཁྱིམ་དུ་བསྡད་ནས་རོགས་སྐྱོར་བྱེད་དགོས་པ་རེད། བོད་ཀྱི་དབུ་ཁྲིད། ༸གོང་ས་མཆོག་གིས་དུས་རྟག་ཏུ་དེང་རབས་དང་སྲོལ་རྒྱུན་གྱི་ཤེས་ཡོན་གཉིས་བར་གལ་འགངས་ཆེ་བའི་གནད་ལ་ནན་བཤད་གནང་གི་ཡོད། ཁོང་གིས་བོད་རིགས་ན་གཞོན་ཚོར་ཚན་རིག་དང་ལག་རྩལ། རྒྱལ་སྤྱིའི་སློབ་ཚན་ཁག་ལ་སློབ་སྦྱོང་བྱེད་རྒྱུའི་སྐུལ་མ་གནང་གི་ཡོད། ཁོང་གིས་ཤེས་ཡོན་ཡག་པོ་ཞིག་གི་ཤེས་རྟོགས་ལྡན་པའི་མི་སྒེར་ཙམ་མ་ཡིན་པར་བྱམས་བརྩེ་དང་འགན་འཁྲི་ཡོད་པའི་འགྲོ་བ་མིའི་རིགས་ཀྱང་བསྐྲུན་པར་ཡིད་ཆེས་བྱེད་ཀྱི་ཡོད། སྡོམ་ཚིག ཤེས་ཡོན་གྱི་སྙེག་འདོད་ནི་མི་ཚེ་གཅིག་གི་འགྲུལ་བཞུད་ཅིག་ཡིན་ཞིང། མི་སྒེར་དང་སྤྱི་ལ་དམིགས་བསལ་གྱི་དཀའ་སྡུག་དང་བཙན་བྱོལ་བ་ཚོར་ཤེས་ཡོན་གྱི་རེ་བའང་ཆེའོ། གསུམ་པ། སྙིང་རྗེ་དང་བཟང་སྤྱོད་ཀྱི་ཉམས་ལེན།    སྙིང་རྗེ་དང་ཀུན་སྤྱོད་ཀྱི་ལག་ལེན་དེ་ཞི་བདེ་དང་འཆམ་མཐུན། དོན་སྙིང་ལྡན་པའི་འཚོ་བ་ཞིག་གི་སྙིང་པོ་ཡིན། རིན་ཐང་དེ་དག་ནི་བོད་བརྒྱུད་ནང་བསྟན་ཁོ་ན་མ་ཡིན་པར་ཡོངས་ཁྱབ་འགྲོ་བ་མིའི་བདེ་སྐྱིད་ལ་མཚོན་ན་ཡང་ལྟེ་བ་དེ་ཡིན། དེང་སང་གི་འཛམ་གླིང་ནང་འཁྲུག་འཛིང་དང་རང་བཙན། དངོས་པོའི་རིང་ལུགས་བཅས་མང་ཆེ་བས་དབང་བསྒྱུར་བྱེད་པ་སོང་ཙང་སྙིང་རྗེ་དང་ཀུན་སྤྱོད་ཀྱི་བྱ་སྤྱོད་དེ་སྔར་ལས་གལ་ཆེ་བ་ཡིན། སློབ་གྲྭ་ཁག་གི་སློབ་ཚན་ནང་འཁོད་པའི་འབྲི་ཀློག་གི་ཤེས་ཡོན་ཁོ་ན་མ་ཡིན་པར་བྱམས་བརྩེ་དང། དྲང་བདེན། བརྩི་བཀུར་ལྟ་བུའི་རིན་ཐང་ཡང་སློབ་ཁྲིད་བྱེད་དགོས། དཔེར་ན། ཕ་མ་དང་སློབ་དཔོན། […]