ཀརྨ་གཡུ་འབྲུགའཛིན་རིམ་ལྔ་པ། གོ་པལ་པུར་བོད་ཁྱིམ་སློབ་གྲྭ། ཕྱི་ལོ་དུས་རབས་བདུན་པའི་སྐབས་སུ་བོད་ཀྱི་རྒྱལ་པོ་སོ་གསུམ་པ་སྲོང་བཙན་སྒམ་པོས་མཐའ་བཞིའི་རྒྱལ་ཁབ་དབང་དུ་འདུས་ནས་པོ་ཏ་ལ་རིའི་སྟེང་དུ་བཞེངས་ཤིང། བཞེངས་འགོ་ཚུགས་པ་ནས་ད་ལྟ་བར་ལོ་ངོ་ཆིག་སྟོང་གསུམ་བརྒྱ་ལྷག་ཙམ་ཕྱིན་ཡོད་པ་རེད། ཕོ་བྲང་པོ་ཏ་ལ་ལ་དབྱེ་བ་གཉིས་ཡོད། གཅིག་ལ་ཚོན་མདོག་དཀར་པོ་བྱུགས་ཡོད་པ་དང་གཞན་དེ་ལ་དམར་པོ་བྱུགས་ཡོད། དཀར་རག་བྱུགས་པ་ན་ཕོ་བྲང་དཀར་པོ་དང་བཙག་དམར་པོ་བྱུགས་པ་ནི་ཕོ་བྲང་དམར་པོ་རེད། དེའི་མཚོན་དོན་ནི་བོད་ཀྱི་ཆོས་སྲིད་ཉི་ཟླ་ཟུང་འབྲེལ་གྱི་རྣམ་པ་མཚོན་གྱི་ཡོད། བེད་སྤྱོད་ཀྱི་ངོས་ནས་བཤད་ན་ཕོ་བྲང་དཀར་པོ་ནི་སྲིད་གཞུང་གི་བྱ་བ་གཉེར་སའི་ཚོམས་ཆེན་དང་། གྲྭ་ཤག་བང་མཛོད་སོགས་དང་། ཕོ་བྲང་དམར་པོ་ནི་ཆོས་ཕྱོགས་ཀྱི་བྱེད་སྒོ་སྤེལ་སའི་མཆོད་ཁང་དང་ལྷ་ཁང་སོགས་ཡིན། ད་དུང་ཕོ་བྲང་པོ་ཏ་ལར་ཐོག་རྩེག་བཅུ་གསུམ་ཡོད་པ་དང། མཐོ་ཚད་ལ་མི་ཊར་ ༡༡༧ ལྷག་ཙམ་ཡོད། ཤར་ནུབ་གྱི་རིང་ཚད་ལ་མི་ཊར་ ༤༠༠ ལྷག་ཙམ་ཡོད། ལྷོ་བྱང་གི་རིང་ཚད་ལ་མི་ཊར་ ༢༧༠ ཙམ་ཡོད། ཤར་གྱི་རྩིག་པ་ནི་ལྷ་སའི་ཕྱོགས་ཀྱི་རྡོ་མཁན་གྱིས་བརྩིགས་ཤིང་རྩིག་རྡོང་ནི་གྲི་ལྟར་རྣོ་ཞིང་འདྲོང་པོ་ཡོད་པ་དང། ནུབ་ཀྱི་རྩིག་པ་ནི་གཙང་ཕྱོགས་ཀྱི་རྡོ་མཁན་གྱིས་བརྩིགས་ཡོད། རྩིག་པ་ཟླུམ་ཞིང་ངོས་འཇམ་པོ་ཡོད། ཕོ་བྲང་པོ་ཏ་ལར་ཁྱོན་བསྡོམས་ཁང་མིག་སྟོང་ལྷག་ཙམ་ཡོད་པ་དང། ཕལ་ཆེར་ཚང་མའི་རྩིག་ངོས་སུ་ལོ་རྒྱུས་ཀྱི་དོན་སྙིང་ལྡན་པའི་ལྡེབས་རིས་དང་ཐང་ཀ སྒྱུ་རྩལ་གྱི་ཁྱད་ཆོས་ལྡན་པའི་ཤིང་བརྐོས་རི་མོ་སོགས་ཀྱིས་ལེགས་པར་རྒྱན་ཡོད་ལ། དེ་སྔོན་གསེར་དངུལ་གཡུ་བྱུར་ལས་གྲུབ་པའི་སྐུ་གསུང་ཐུགས་རྟེན་བྱིན་རླབས་ཅན་དང་རིན་ཐང་གཞལ་དུ་མེད་པའི་གསེར་གྱི་བྲིས་པའི་བཀའ་འགྱུར་རིན་པོ་ཆེ་སྣ་བརྒྱད་ལས་བྲིས་པའི་བསྟན་འགྱུར་སོགས་ཧ་ཅང་མང་པོ་བཞུགས་ཡོད། ཕོ་བྲང་དཀར་པོ་བཞེངས་མཁན་ནི་༸རྒྱལ་དབང་ལྔ་པ་ཆེན་པོ་ཡིན་ཞིང་། ཕོ་བྲང་དཀར་པོ་ནི་བོད་གཞུང་དགའ་ལྡན་ཕོ་བྲང་གི་ཆབ་སྲིད་ཀྱི་ལྟེ་གནས་ཡིན། དེའི་ནང་ཚོམས་ཆེན་ཞིག་ཡོད། དེ་ནི་ཆོས་སྲིད་ཀྱི་མཛད་སྒོ་ཆེ་ཁག་གནང་ཡུལ་ཡིན། དེའི་རྩེ་ཐོག་གི་ནུབ་ཏུ་༸རྒྱལ་བ་སྐུ་ཕྲེང་གསུམ་པ་ཆེན་པོའི་གཟིམ་ཆུང་ཉི་འོད་བསོད་ལེགས་འཁྱིལ་དང། ། ཤར་དུ་༸གོང་ས་སྐྱབས་མགོན་སྐུ་ཕྲེང་བཅུ་བཞི་ཆེན་པོའི་གཟིམ་ཆུང་ཤར་རྒྱུད་ཉི་འོད་གཉིས་ཡོད། ཕོ་བྲང་དཀར་པོའི་ནང་གི་ལྡེབས་རིས་ཀྱི་ནང་དོན་ནི་བོད་མིའི་འབྱུང་ཁུངས་དང་། བོད་ཀྱི་ཆོས་ལུགས་གྲུབ་མཐའ་ཁག་གི་ལོ་རྒྱུས། དེ་བཞིན་༸རྒྱལ་དབང་སྐུ་ཕྲེང་ལྔ་པ་བར་གྱི་རྣམ་ཐར་མདོར་བསྡུས་སོགས་བྲིས་ཡོད། ཕ་བྲོང་དམར་པོ་བཞེངས་གནང་མཁན་ནི་སྲོང་བཙན་སྒམ་པོ་ཡིན་པ་དང་། སྡེ་སྲིད་སངས་རྒྱས་རྒྱ་མཚོའི་ཇུས་བཀོད་འོག་སླར་ཕོ་བྲང་དམར་པོའི་ནུབ་དང་ལྷོ་ཤར་བཅས་ནས་རྒྱ་བསྐྱེད་གནང་ཞིང་། དེའི་གྲུབ་ཆ་གཙོ་བོ་ནི་རྒྱལ་དབང་རིམ་བྱོན་གྱི་སྐུ་གདུང་ལྷ་ཁང་དང་མཆོད་ཁང་ཁག་རེད། དེར་ཁྱོན་བསྡོམས་སྐུ་གདུང་ཁག་བརྒྱད་ཡོད་པའི་ནང་ནས་རྒྱལ་དབང་ལྔ་པའི་གསེར་སྡོང་འཛམ་གླིང་རྒྱན་གཅིག་ནི་གདུང་རྟེན་ཆེ་ཤོས་དང་སྔ་ཤོས་དེ་རེད། གསེར་གདུང་ཁང་དེའི་མདོང་དུ་ཚོམས་ཆེན་ཞིག་ཡོད་ཅིང། ཚོམས་ཆེན་དེའི་ཕྱོགས་བཞིའི་སྐུ་སྡེབསས་སུ་རྒྱལ་མཆོག་ལྔ་པའི་སྐུ་ཚེ་ཧྲིལ་པོའི་མཛད་རྣམ་བཀོད་ཡོད། ཕོ་བྲང་པོ་ཏ་ལ་ནི་ཕྱོ་ལོ་གཅིག་སྟོང་དྲུག་བརྒྱ་བཞི་བཅུ་ཞེ་དགུ་ནས་བོད་རང་བཙན་མ་ཤོར་བར་དུ་༸གོང་ས་སྐྱབས་མགོན་སྐུ་ཕྲེང་སོགས་ཀྱིས་དགུན་དུས་ཀྱི་བཞུགས་ས་རེད། སྔོན་མ་ཡིན་ན་ཕོ་བྲང་པོ་ཏ་ལ་དེ་རྒྱལ་ཁང་ཆེ་ཤོས་དེ་ནི་ཡིན་པ་མ་ཟད་ང་ཚོ་བོད་པ་ཚོས་ཕོ་བྲང་པོ་ཏ་ལ་མཇལ་དུས་སོ་སོའི་ཆོས་དང་རིག་གཞུང་དྲན་གྱི་ཡོད། ཕོ་བྲང་པོ་ཏ་ལ་ཡི་ཐོག་ནས་མར་ལྟ་དུས་ལྷ་སའི་ས་ཆ་ཆ་ཚང་མཐོང་གི་ཡོད། ཕོ་བྲང་པོ་ཏ་ལ་ནི་ང་ཚོ་བོད་ཀྱི་མཚོན་རྟགས་ཤིག་རེད། ཕོ་བྲང་པོ་ཏ་ལའི་མདུན་ཕྱོགས་སུ་རྡོ་རིང་ཞིག་ཡོད། དེ་དུས་རབས་བརྒྱད་པའི་ནང་བོད་རྒྱལ་ཁྲི་སྲོང་ལྡེ་བཙན་སྐབས་བློན་ཆེན་སྟག་སྒྲ་ཀླ་གོང་གི་སྣེ་འཁྲིད་པའི་བོད་དམག་གི་རྒྱ་ནག་རྒྱལ་ས་ཁྲང་ཧན་བླངས་པར་བརྟེན། ཁོང་གི་མཛད་རྗེས་ལ་བསྟོད་བསྔགས་ཆེད་དུ་བཞེངས་པ་རེད། དེང་སང་ང་ཚོ་བོད་ཀྱི་ཕོ་བྲང་པོ་ཏ་ལ་དེ་རྒྱ་མི་ཡི་འགྲེམས་སྟོན་ཁང་ཞིག་ཏུ་བཟོས་ཡོད་པ་དང་དེའི་ནང་གནས་རྩ་ཆེ་ཡང་མཇལ་ཡ་ཡོད། ཕོ་བྲང་པོ་ཏ་ལ་ནི་འཛམ་གླིང་ནང་ནས་ཕོ་བྲང་སྐད་གྲགས་ཆེ་ཤོས་དེ་ཡིན། སྔོན་ལ་དམག་རྒྱག་དུས་ཕོ་བྲང་པོ་ཏ་ལར་སྨས་སྐྱོན་ཏོག་ཙམ་ཞིག་བྱུང་ཡོད་པས་༸རྒྱལ་བ་ལྔ་པས་བསྐྱར་བཟོ་བྱས་པ་རེད། ༸གོོང་ས་སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་དགུང་ལོ་ལྔ་ལ་ཕེབས་སྐབས་གསེར་ཁྲིར་བཞུགས་པ་རེད། […]