བཀྲ་ཤིས་ལྡིང་བཟང། དཔེ་སྟོན་སློབ་གྲྭ། འཛིན་གྲྭ་བརྒྱད་པ།
སྐད་ཡིག་ནི་མི་རིགས་ཀྱི་བླ་སྲོག་ཡིན་པས་ང་ཚོ་དེ་དང་ནམ་ཡང་བྲལ་མི་ཉན། གུས་པ་ཕྱི་ལོ་ ༢༠༠༨ ཟླ་༨ ཚེས་ ༡༤ ཉིན་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཆེན་པོ་བེངྒ་ལོར་དུ་སྐྱེས་པ་དང་གྲོང་ཁྱེར་དེའི་ཉེ་འགྲམ་དུ་བོད་པའི་སློབ་གྲྭ་སོགས་མེད་སྟབས་ཕ་མས་བུ་བཅོལ་ཁང་དང་སྔོན་འགྲོ་དང་པོ་གཉིས་རྒྱ་གར་སློབ་གྲྭརགཏོང་དགོས་བྱུང་། འོན་ཀྱང་བདག་གི་ཕ་མས་བོད་པ་ཞིག་ཡིན་པའི་ཆ་ནས་ངའི་བུ་ཡིས་བོད་སྐད་བཤད་མ་ཤེས་ན་ངོ་ཚ་བའི་རྒྱུར་ངོས་འཛིན་བྱས་ཏེ་རྒྱ་གར་གྱི་རྒྱལ་ས་ལྡི་ལི་རུ་གནས་སྤོས་ཞུས། ལྡི་ལི་དང་རྡ་རམ་ས་ལ་ཉེ་པོ་ཡོད་པའི་ཁར་རྡ་རམ་ས་ལ་རུ་བོད་པའི་སློབ་གྲྭ་ཧ་ཅང་མང་བས་ངའི་སློབ་སྦྱོང་ཆེད་ཕ་མ་གཉིས་ཁ་བྲལ་ཏེ་སྡོད་དགོས་བྱུང་། ཨ་མ་ལགས་དང་བུ་ཆུང་ང་རྡ་རམ་ས་ལར་བསྐྱོད་དེ་དཔེ་སྟོན་སློབ་གྲྭར་སློབ་འཇུག་བྱས།
བོད་ཡིག་ནི་སྐད་ཡིག་གཞན་ལས་ཧ་ཅང་གཏིང་ཟབ་པོ་ཡོད་པ་མ་ཟད། གུས་པར་མཚོན་ན་བོད་ཡིག་གི་རྨང་གཞི་ཧ་ཅང་ཞན་པས་ཐོག་མར་བོད་ཡིག་འབྲི་ཀློག་སོགས་སྦྱོང་དུས་ཁག་པོ་ཞེ་དྲག་བྱུང་། དེའི་ཁར་ང་ཚོ་ཡིས་ཁ་སྐད་མང་པོ་བེད་སྤྱོད་བྱེད་དུས་དེ་དག་ཡིག་ཐོག་ཏུ་འབྲི་རྒྱུར་དཀའ་ངལ་ཆེན་པོ་བྱུང་། ༸གོང་ས་མཆོག་གིས་བོད་ཀྱི་སྐད་ཡིག་གལ་ཆེན་པོ་ཡིན་པའི་སྐོར་བཀའ་སློབ་ཡང་ཡང་གནང་པས་བོད་པ་རྒན་གཞོན་ཚང་མས་བོད་ཡིག་ལ་དམིགས་བསལ་དོ་སྣང་ཆེན་པོ་གནང་གི་ཡོད། དེང་སང་ཕྱི་རྒྱལ་ལ་སྡོད་མཁན་གྱི་བོད་པ་ཕ་མ་ཚོས་ཀྱང་རང་གི་ཕྲུ་གུ་སློབ་གྲྭའི་གུང་གསེང་དང་བསྟུན་ཟླ་བ་གཅིག་གཉིས་རིང་རྒྱ་གར་དུ་བོད་པའི་སློབ་གྲྭའི་ནང་བོད་ཡིག་སྦྱོང་དུ་གཏོང་གི་ཡོད། དེ་བཞིན་བོད་གཞུང་གི་ལས་བྱེད་ཅིག་བྱེད་པར་འདོད་ན། བོད་སྐད་འབྲི་ཀློག་ཤེས་རྒྱུ་ནི་ཆ་རྐྱེན་གལ་ཆེན་པོ་ཞིག་ཡིན། ང་ཚོ་བོད་པ་ཞིག་ཡིན་པའི་ཆ་ནས་བོད་སྐད་ཤེས་པར་བྱ་རྒྱུ་ཧ་ཅང་གལ་ཆེན་པོ་ཡིན། དེང་དུས་ཀྱི་གཞོན་སྐྱེས་ཚོས་རང་ནུས་ཅི་ལྕོག་གིས་བོད་ཀྱི་ཆོས་དང་རིག་གཞུང་། སྐད་ཡིག་ལ་སོགས་མི་ཉམས་པའི་ཆེད་དུ་རུས་སྦལ་གྱིས་ཁང་པ་རྒྱབ་ཏུ་འཁྱེར་ནས་སྡོད་པ་བཞིན་ཉིན་ལྟར་དཔེ་ཁུག་ཆེན་པོ་རེ་རྒྱབ་ཏུ་འཁུར་ཏེ་སློབ་གྲྭར་འགྲོ་ཡི་ཡོད། ང་ཚོའི་དཔེ་སྟོན་སློབ་གྲྭ་རུ་བོད་ཡིག་ཙམ་མིན་པར་ཨིན་ཇི་དང་། རྒྱ་ཡིག། ཧིན་དྷི་སོགས་སྐད་ཡིག་གཞན་སློབ་ཁྲིད་བྱས་ཀྱང་བོད་ཀྱི་སྐད་ཡིག་གལ་ཆེ་ཤོས་སུ་བརྩིས་ཏེ་ནམ་ཡང་མ་བརྗེད་པ་དང་སྐད་བསྲེས་ལྷད་མ་ཡོང་བའི་འབད་བརྩོན་བྱེད་ཀྱི་ཡོད། བོད་ཡིག་ནི་བལ་ཡུལ་དང་འབྲུག་ཡུལ། འབྲས་ལྗོངས། ལ་དྭགས་སོགས་ལ་ཡང་བེད་སྤྱོད་བྱེད་ཀྱི་ཡོད།
༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་དུས་རྟག་ཏུ་བོད་ལུང་པ་རྒྱ་མིས་བཙན་བཟུང་བྱ་རྒྱུ་གཙོ་བོ་ནི་ང་རང་ཚོའི་རྩ་ཆེ་བའི་བོད་ཀྱི་སྐད་དང་རིག་གཞུང་། ཆོས་སོགས་རྩ་མེད་གཏང་རྒྱུའི་འཆར་གཞི་ཡིན་པས་དེར་བརྟེན་ང་ཚོ་བོད་པ་ཚོས་སྐད་ཡིག་ནི་མི་རིགས་ཀྱི་བླ་སྲོག་ལྟར་བརྩིས་ཏེ་སྦྱངས་བརྩོན་བྱ་དགོས་པ་ལས་གལ་སྲིད་བླ་སྲོག་དེ་དང་ཁ་བྲལ་སོང་ན་མི་རིགས་དེ་ཤི་ཚར་བ་རེད་ཅེས་བཀའ་སློབ་ལམ་སྟོན་ཡང་ཡང་གནང་གི་ཡོད།
བོད་ནང་རྒྱ་མིའི་བཙན་གནོན་འོག་བོད་པ་རྒན་གཞོན་ཚོ་ལ་རང་དབང་མེད་ཀྱང་ད་དུང་ཁོ་ཚོས་རང་སྲོག་བློས་བཏང་སྟེ་རང་མི་རིགས་ཀྱི་སྐད་ཡིག་ལ་སྦྱངས་བརྩོན་བྱེད་ཀྱི་ཡོད་ན། ང་ཚོ་རྒྱ་གར་དང་ཕྱི་རྒྱལ་རང་དབང་ལུང་པར་སྡོད་མཁན་གྱི་བོད་པ་ན་གཞོན་ཚོ་ལ་རང་གི་སྐད་ཡིག་སྦྱང་རྒྱུ་དང་བེད་སྤྱོད་བྱ་རྒྱུའི་རང་དབང་ཆ་ཚང་ཡོད་པས་ང་ཚོས་རང་ལ་འཁྲི་པའི་ལས་འགན་མ་བརྗེད་པའི་ཐོག་བོད་ཀྱི་སྐད་ཡིག་ལ་སྦྱངས་བརྩོན་གྱིས་སྐད་ཡིག་སྲུང་སྐྱོབ་བྱ་རྒྱུ་ལ་བརྩོན་པ་ཧུར་ལེན་བྱ་དགོས། སྐད་ཡིག་ནི་མི་རིགས་ཀྱི་བླ་སྲོག་ཡིན་པ་སེམས་ལ་ངེས་དགོས་གལ་ཆེའོ།
ད་བར་དཔྱད་མཆན་མེད།