རིག་འཛིན་རྣམ་རྒྱལ་རྨ་བྱ། དཔེ་སྟོན་སློབ་གྲྭ། འཛིན་གྲྭ་བརྒྱད་པ།
ཐེམ་སྤང་བཀའ་རྒྱའི་དུས་ནས་བཟུང་ཕྱི་ལོ་ ༢༠༢༢ བར་སློབ་གྲྭར་ཤེས་ཡོན་གནས་ལ་རོལ་རྒྱུ་ཕར་ཞོག ཐ་ན་ཁྱིམ་ནས་སྒོ་ཐེམ་བརྒལ་ཏེ་ཕྱིར་ཐོན་རྒྱུའི་གོ་སྐབས་ཀྱང་མེད་པར་གྱུར། ཡིན་ནའང་ད་ཆ་ནད་ཡམས་ཞི་འཇགས་སུ་སོང་བ་དང་ཆབས་ཅིག སློབ་གྲྭ་བསྐྱར་དུ་འགོ་ཚུགས་པ་མ་ཟད། ཁོ་བོའི་བརྩེ་བའི་དགེ་བའི་བཤེས་གཉེན་དང་ན་ཚོད་མཉམ་པའི་སློབ་ཕྲུག་ཚང་མ་མཉམ་དུ་སློབ་སྦྱོང་ལ་བརྩོན་འགྲུས་བྱས་ནས་རང་གི་ཕུགས་བསམ་མངོན་འགྱུར་ཡོང་བའི་གོ་སྐབས་བཟང་པོ་ཐོབ་བྱུང། ཉིན་ཤས་སྔོན་ང་ཚོ་བོད་དགེ་ཡིས་བོད་ཀྱི་སྐད་ཡིག་ངེས་པར་དུ་སྦྱོང་དགོས་པའི་བརྗོད་གཞིའི་སྐོར་རྩོམ་ཡིག་འགྲན་སྡུར་ཞིག་གི་ནང་ཞུགས་རྒྱུའི་གོ་སྐབས་གསེར་ལས་དཀོན་པ་ཞིག་གནང་བས། ཁོ་བོས་ཀྱང་བློ་རྩེ་གཅིག་སྒྲིམ་གྱིས་རྒན་རབས་པ་དང་རྒན་ལགས་རྣམས་ཀྱི་རེ་བ་ཆུད་ཟོས་སུ་མ་བཏང་བར་རྩོམ་ཡིག་དེ། རང་ནུས་ཅི་ལྕོགས་ཀྱིས་འབྲི་འགོ་བརྩམས་པ་ཡིན། ཐོག་མ་དེ་ལ་སློབ་ཕྲུག་སུ་འདྲ་ཞིག་ཡིན་རུང་བོད་ཀྱི་སྐད་ཡིག་ལ་སློབ་སྦྱོང་བྱེད་རྒྱུ་དེ་ང་ཚོའི་གཞོལ་དུ་མེད་པའི་འོས་འགན་ཞིག་ཡིན། གང་ལགས་ཞེ་ན། སྐད་ཡིག་ནི་མི་དང་མིའི་དབར་གྱི་འབྲེལ་མཐུད་ཀྱི་ཟམ་པ་ལྟ་བུ་ཡིན་པ་མ་ཟད་སློབ་ཚན་ཅི་འདྲ་ཞིག་ཡིན་རུང་སྐད་ཡིག་གི་ཤེས་ཚད་ཡག་པོ་མེད་ན་སྦྱོང་ཐབས་བྲལ་བ་ཞིག་རེད། དེ་བས་བོད་ཀྱི་སྐད་ཡིག་ནི་བོད་པའི་ཆོས་དང་རིག་གཞུང་སློབ་སྦྱོང་བྱེད་པའི་ལག་ཆ་ལྟ་བུ་དང་རྒྱུན་གཏན་གྱི་འཚོ་བའི་ནང་ཚོང་ལས་སོགས་ཀྱི་ནང་ལའང་འབྲེལ་ཤུགས་དམ་ཟབ་ཡོད། ང་ཚོ་བོད་པའི་གཞོན་སྐྱེས་ཚོ་ལ་ཆ་མཚོན་ན་བོད་པའི་སྐད་ཡིག་ནི་མི་རིགས་ཀྱི་བླ་སྲོག་གི་སྲོག་ཤིང་ཞིག་དང་གཉིས་སུ་མ་མཆིས། མ་ཟད་ང་ཚོས་བོད་པའི་སྐད་ཡིག་ཁོ་ནའི་ཐོག་ནས་མ་གཏོགས་བོད་པའི་ཆོས་དང་རིག་གཞུང་ལ་སློབ་སྦྱོང་མཐིལ་ཕྱིན་པ་ཞིག་སྦྱངས་ཐུབ་ཀྱི་མེད་ཅིང་ང་ཚོ་བཙན་བྱོལ་དུ་འབྱོར་བ་ནས་བཟུང་བོད་ཕྱི་ནང་གཉིས་ཀར་བོད་ཀྱི་སྐད་ཡིག་ཐོག་ལ་ཉམས་རྒུད་ཧ་ཅང་ཆེན་པོ་ཕྱིན་ཡོད། ལྷག་པར་དུ་ཉེ་ཆར་བོད་པའི་སློབ་གྲྭ་ཁག་གི་བོད་ཕྲུག་རྣམས་བོད་ཡིག་གནས་ཚད་ཞན་པོར་གྱུར་བ་སོགས་ངོ་གནོང་དགོས་པའི་གནས་སུ་གྱར་ཡོད་པ་དེ་དངོས་གནས་བསམ་ཡུལ་ལས་འདས་པའི་དོན་དངོས་གནས་ཚུལ་ཞིག་རེད། དེ་འདྲ་སོང་ཙང། ང་ཚོ་བོད་པ་ཚོས་རྒྱ་དམར་གྱིས་བོད་ཀྱི་ནང་བོད་མི་རིགས་ཀྱི་ཆོས་དང་སྐད་ཡིག་རིག་གཞུང་རྩ་མེད་དུ་གཏོང་རྒྱུའི་ངན་བྱུས་བཤམས་པ་དེ་ལ་ཁ་གཏད་གཅོག་ཆེད་ང་ཚོས་བོད་པའི་རིག་གཞུང་དང་སྐད་ཡིག་སྦྱངས་ནས་བོད་ཕྲུག་ཚོའི་ལུས་སྟེང་ནས་རྩམ་དྲི་འཐུལ་བ་ཞིག་བཟོ་ཐུབ་པ་གནང་དགོས། ང་ཚོ་བོད་པ་ཞིག་ཡིན་པའི་ཆ་ནས་བོད་ཀྱི་སྐད་ཡིག་དང་བོད་སྐད་ནི་བོད་རིགས་ཀྱི་ངོ་བོ་མཚོན་ཆེད་མེད་དུ་མི་རུང་བ་ཞིག་ཡིན་པར་བརྟེན་བོད་ཀྱི་སྐད་ཡིག་མ་ཤེས་ན་བོད་པ་གཙང་མ་ཞིག་ཡིན་མིན་སྟབས་ང་ཚོ་ན་ཆུང་བོད་ཀྱི་སོན་རྩ་ཚོས་རང་ནུས་ཅི་ལྕོགས་ཀྱིས་རང་མི་རིགས་ཀྱི་སྐད་ཡིག་ལ་གཞན་ལས་ལྷག་པའི་དགའ་ཞེན་དང་སྦྱངས་བརྩོན་བྱེད་དགོས་པའི་རེ་སྐུལ་ཞུ་རྒྱུ་ཡིན། །
ད་བར་དཔྱད་མཆན་མེད།