བསྟན་འཛིན་ཀུན་ཁྱབ། དཔེ་སྟོན་སློབ་གྲྭ། འཛིན་གྲྭ་དྲུག་པ།
བདག་གི་མིང་ལ་བསྟན་འཛིན་ཀུན་ཁྱབ་ཟེར། ངས་བསམ་ན་བོད་པ་ཚོས་བོད་ཡིག་སྦྱོང་དགོས་དོན་ནི་བོད་ཡིག་མི་ཉམས་རྒྱུན་འཛིན་དང་གོང་འཕེལ་གཏོང་རྒྱུའི་ཆེད་དུ་རེད་བསམ་གྱི་འདུག དེར་བརྟེན་ང་ཚོ་བོད་པ་ཞིག་ཡིན་པའི་ཆ་ནས་བོད་ཡིག་ངེས་པར་དུ་སྦྱོང་དགོས། ང་ཚོའི་སྐད་ཡིག་མི་ཉམས་གོང་འཕེལ་ཡོང་རྒྱུའི་ཆེད་དུ་འབྲི་ཀློག་བཤད་གསུམ་ལ་འབད་བརྩོན་དང་ཡར་རྒྱས་གཏོང་ཐབས་བྱེད་རྒྱུ་དང་བོད་ཡིག་ལ་མོས་པའི་བསམ་བློ་མཐོར་འདེགས་གཏོང་དགོས། ང་ཚོས་སློབ་གྲྭའི་ནང་བོད་ཡིག་སློབ་ཚན་སྦྱོང་ཐབས་ནི་སློབ་ཚན་ཐེངས་གཅིག་ལྗགས་ཀློག་གནང་རྗེས་གོ་དཀའ་བའི་ཚིག་གསར་བརྗོད་པ་ཁག་ཤེས་པར་བྱས་ཏེ་ཡང་ཡང་ཀློག་འདོན་བྱ་རྒྱུ་དེ་ཡིན། ང་ཚོའི་གནས་སྐབས་ཀྱི་དམིགས་ཡུལ་ནི་སློབ་ཚན་མཐིལ་ཕྱིན་པ་ཤེས་པའི་རྨང་གཞིའི་ཐོག་ལ་རྩོམ་ཡིག་འབྲི་རྒྱུར་དགའ་མོས་སྐྱེ་བའི་བསམ་བློ་སྐྱེེད་སྲིངས་བྱ་རྒྱུ་དེ་ཡིན། ང་ཚོའི་ཕུགས་ཀྱི་དམིགས་ཡུལ་ནི་སློབ་ཚན་གྱི་བསམ་བློའི་རྨང་གཞི་བརྒྱུད་དེ་བོད་པའི་རྩོམ་རིག་གི་བསམ་བློའི་སྣེ་ཁྲིད་པའི་རྩོམ་པ་པོ་ཞིག་བྱ་དགོས། སྤྱིར་བཏང་ང་རང་ལ་ཆ་མཚོན་ན་བོད་པའི་དམངས་ཁྲོད་སྒྲུང་གཏམ་དང་བོད་ཡིག་ཡིག་གཟུགས་འབྲི་རྒྱུར་ཧ་ཅང་དགའ་པོ་ཡོད། ང་བོད་ཡིག་དཔེ་དེབ་ཀློག་རྒྱུ་དང་ཡིག་གཟུགས་འབྲི་རྒྱུར་དགའ་བའི་རྒྱུ་མཚན་ནི་ཆུང་དུས་ནས་སྤྲོ་སྣང་དང་གོམས་འདྲིས་བཟང་པོ་ཐེབས་པ་དང། བོད་པའི་རིག་གཞུང་ལ་དགའ་ཞེན་ཡོད་པས་ཡིན། འཁྲུག་ཆ་དོད་པའི་འཇིག་རྟེན་འདིའི་ཐོག་སྐད་ཡིག་རིགས་སྣ་ཚོགས་ཡོད་ནའང་ང་ཚོ་བོད་པའི་སྐད་ཡིག་དེ་དམིགས་བསལ་ཞིག་རེད། གལ་ཡིན་ཞེ་ན། བོད་ཡིག་ནི་ནང་པའི་ཆོས་དང་རིག་གཞུང་དང་འབྲེལ་བ་ཧ་ཅང་ཆེན་པོ་ཡོད་པས་ཡིན། ང་ཚོས་ངེས་པར་དུ་བོད་པའི་སྐད་ཡིག་དང་རིག་གཞུང་ལ་ཞིབ་འཇུག་བྱ་དགོས། སློབ་ཕྲུག་ཚོས་ཀྱང་སློབ་གྲྭའི་ནང་བོད་ཡིག་སྦྱོང་བ་དང་རྩོམ་ཡིག་གང་མང་འབྲི་དགོས། ང་ཚོའི་ན་ཆུང་བོད་ཕྲུག་རྣམས་སྤྱི་ཚོགས་དྲ་རྒྱའི་ནང་གི་གློག་རྡུལ་རྩེད་རིགས་དང་ཁྲ་ཁྲ་ཟིང་ཟིང་ལ་ཧ་ཅང་དགའ་པོ་བྱེད་ཀྱི་འདུག དེ་ལས་བོད་ཡིག་གི་དཔེ་དེབ་གང་མང་ལྟ་བ་དང་རྩོམ་ཡིག་གང་ཐུབ་འབྲི་བར་འབད་དགོས་སོ། །
ད་བར་དཔྱད་མཆན་མེད།