བསྟན་འཛིན་མེ་ཏོག འཛིན་གྲྭ་དགུ་བ། དཔེ་སྟོན་སློབ་གྲྭ
དེ་རིང་ཚོགས་ཐེངས་དྲུག་པའི་ཐོག་བོད་ཡིག་རྒན་ལགས་ཀྱིས་ང་ཚོ་དབྱར་ཁའི་གུང་གསེང་སྐབས་ཁྱིམ་སྦྱོང་རྩོམ་ཡིག་ཅིག་འབྲི་དགོས་པའི་བཀའ་གནང་སོང་མོད། འོན་ཀྱང་ངས་དབྱར་ཁའི་གུང་གསེང་ཉིན་གཉིས་མ་གཏོགས་གཞན་ཉིན་ཚང་མ་གྲོགས་མོ་དང་ལྷན་དུ་ཕྱི་ལ་འགྲོ་བ་དང་གཙུག་ལག་ཁང་དུ་འགྲོ་བ་སོགས་བྱས་ཏེ། ངའི་གུང་གསེང་གི་དུས་ཚོད་འདི་ལྟར་རྫོགས་བཏང་བ་ཡིན། ད་ཉིན་གཉིས་ལས་ལྷག་མེད་པས་ངས་དུས་ཚོད་ཆུད་ཟོས་སུ་མ་བཏང་བར་ལག་ཏུ་སྨྱུ་གུ་བླངས་ཏེ་རྒན་ལགས་ཀྱིས་གནང་བའི་རྩོམ་གྱི་འགོ་བརྗོད་དེ་༼ང་བོད་པ་ཞིག་ཡིན་པའི་ཆ་ནས་བོད་ཡིག་སྦྱོང་དགོས་པ་ངའི་ལས་འགན་ཡིན༽ཟེར་པའི་བརྗོད་གཞིའི་ཐོག་ལ་འབྲི་འགོ་ཚུགས་པ་ཡིན། ང་བོད་པ་ཞིག་ཡིན་པའི་ཆ་ནས་བོད་ཡིག་སྦྱོང་རྒྱུ་དེ་ང་གཅིག་པོའི་ལས་འགན་མ་ཡིན་པར། ང་ཚོ་བོད་མི་ཚང་མའི་ལས་འགན་ཞིག་རེད་འདུག རྒྱུ་མཚན་དེས་ང་ལ་ཆ་བཞག་ན་ངའི་ཕ་མ་གཉིས་ཀྱིས་ང་ཆུང་དུས་ནས་བོད་ཡིག་སྦྱོང་ས་དཔེ་སྟོན་སློབ་གྲྭ་རུ་བཏང་སྟེ། ང་འཛིན་རིམ་ལྔ་པ་སྐབས་ནས་བོད་ཡིག་གི་སློབ་ཚན་འདི་གཞན་པའི་སློབ་ཚན་ལས་མང་བ་དགའ་པོ་ཡོད་པ་མ་ཟད་ཤེས་ཀྱི་ཡང་ཡོད། ད་ལྟ་ཡང་བོད་ཡིག་སློབ་ཚན་ལ་དགའ་པོ་ཡོད་པར་མ་ཟད་འཛིན་གྲྭའི་སློབ་ཁྲིད་སྐབས་བོད་ཡིག་སློབ་ཚན་ནང་གི་བོད་ཀྱི་སྐོར་དང་བོད་ཀྱི་ལོ་རྒྱུས་སོགས་སྦྱངས་བར་དགའ་བོ་ཡོད་ལ། ད་དུང་ང་ལ་ཚིག་གསར་ད་བར་གོ་མ་མྱོང་བའི་ཚིག་གསར་མང་པོ་ཤེས་སོང་། ཡིན་ནའང་དེང་སང་གི་ངའི་སློབ་གྲོགས་ཚོ་དང་བོད་མི་རྣམས་ཀྱི་སོ་སོའི་སྐད་དང་ཡི་གེ་མི་སྦྱོང་བར་ཕྱིའི་རྒྱལ་ཁབ་ཀྱི་སྐད་དང་རིག་གཞུང་ལ་མགོ་འཁོར་ནས་བསྡད་ཡོད་པ་འདི་ངོ་ཚ་དགོས་པ་ཞིག་རེད། ད་དུང་མི་ཁ་ཤས་ཀྱིས་སོ་སོའི་སྐད་ཡིག་དང་ཡང་ན་བོད་ཀྱི་སྐོར་ལ་དུས་ཚོད་ཏོག་ཙམ་ཡང་གཏོང་གི་མེད་པ་དང་། ལོ་གཞོན་ཁ་ཤས་ཀྱིས་སོ་སོའི་སྐད་ཡིག་ཡག་པོ་མེད་པར་མ་ཟད། ད་དུང་བོད་ཀྱི་སྐད་ཡིག་སྦྱོང་རྒྱུའི་འདོད་པ་སྐྱེས་ཀྱི་མེད། ང་ཚོས་བོད་ཡིག་སྦྱོང་དགོས་དོན་ནི་རང་གི་རིག་གཞུང་སྲུང་སྐྱོབ་བྱེད་པའི་ཆེད་དུ་དང་བོད་ཀྱི་སྐད་ཡིག་འཕེལ་རྒྱས་གཏོང་རྒྱུའི་ཆེད་དུ་ཡིན། གལ་སྲིད་ང་ཚོས་སོ་སོའི་སྐད་ཡིག་ཡག་པོ་སྦྱངས་པ་ཡིན་ན། དག་ཆ་ཡར་རྒྱས་འགྲོ་བར་མ་ཟད་བོད་ཀྱི་སྐོར་ལ་རྒྱལ་ཁབ་གཞན་གྱིས་དོ་སྣང་དང་རོགས་རམ་ཡོང་གི་རེད། བྱས་ཙང་ང་ཚོས་བོད་ཡིག་སྦྱོང་དགོས་པ་དེ་ང་དང་ང་ཚོ་ཚང་མའི་ལས་འགན་ཞིག་ཡིན། རྒྱལ་ཁབ་གཞན་གྱི་ལོ་རྒྱུས་དང་ཤེས་ཡོན་མང་པོ་ཤེས་དགོས་པ་དང་། ལྷག་པར་དུ་བོད་པ་ཞིག་ཡིན་པའི་ཆ་ནས་བོད་ཡིག་ཤེས་དགོས་པ་དེ་ངའི་ལས་འགན་རེད། སོ་སོ་ཆུང་དུས་ནས་རང་གི་ཕ་མ་དང་ལྷན་དུ་བོད་ཀྱི་སྐོར་དང་ལོ་རྒྱུས་སོགས་ཉན་དགོས་པ་མ་ཟད། ཨིན་སྐད་གཞས་མ་ཡིན་པར་བོད་གཞས་སྦྱངས་ཏེ་རང་གིས་བོད་རང་དབང་ཐོབ་པའི་ཆེད་བོད་ཡིག་སློབ་ཚན་ཡག་པོ་སྦྱངས་དགོས། གལ་སྲིད་ང་ཚོས་བོད་ཡིག་སློབ་ཚན་མ་སྦྱངས་པར་ད་དུང་དེ་ལ་མཐོང་མ་སྤྲད་ན་ང་ཚོའི་བོད་ཀྱི་རིག་གཞུང་དང་སྐད་ཡིག་རྩམེད་དུ་འགྲོ་སྲིད། དེ་འདྲ་མ་ཡོང་བའི་ཆེད་དུ་བོད་ཡིག་སྦྱངས་ནས་རང་གི་ལས་འགན་ཏག་ཏག་བྱེད་དགོས།
ད་བར་དཔྱད་མཆན་མེད།