བསྟན་འཛིན་ཚེ་འཕེལ།
འཛིན་གྲྭ་དགུ་པ། གུ་རུ་པུ་ར་སཾ་བྷོ་ཊ་ཉིན་སློབ།

རྩོམ་འདི་འགོ་མ་ཙུགས་གོང་ལ་བོད་ཀྱི་སྐོར་ཏོག་ཙམ་བཤད་པ་ཡིན་ན། བོད་ནི་ཨེ་ཤེ་ཡའི་ནང་ནས་རྒྱལ་ཁབ་ཆེ་ཤོས་གཉིས་པ་ཆགས་ཡོད་། བོད་ཀྱི་མཐའ་སྐོར་ནི་རི་ཆེན་པོ་ཤ་སྟག་གིས་སྐོར་ཡོད། བོད་ཀྱི་ཆུ་དང་། རླུང་། ཁོར་ཡུག་ཧ་ཅང་གཙང་མ་ཡོད་རེད། བོད་ནང་བརྒྱ་ཆ་ ༥༠ ཙམ་ནང་པ་ཆགས་ཀྱི་ཡོད་རེད།སེམས་པ་བཟང་བའི་ཆོས་དད་པ་ཆེ་བའི་བོད་མི་རྣམས་བོད་དུ་གནས་སྡོད་བྱེད་ཀྱི་ཡོད། བོད་ནང་ལ་རིག་གཞུང་འདྲ་མིན་སྣ་ཚོགས་ཡོད། ང་བོད་ལ་འགྲོ་མྱོང་མེད་ཀྱང་། ངའི་རྨོ་མོ་ལགས་ཀྱི་བོད་སྐོར་དང་། ཁོང་གི་དུས་སྐབས་དཀའ་ལས་བརྒྱབ་སྟེ་ནང་མི་དང། རོགས་པ། སྤུན་མཆེད་བཅས་མཉམ་དུ་སེམས་ཁྲལ་མེད་པའི་ཐོགས་དགའ་དགའ་སྤྲོ་སྤྲོའི་ངང་ཞིང་པ་དང་འབྲོག་པའི་འཚོ་བ་སྐྱེལ་གྱི་ཡོད། བོད་ཀྱི་ལོ་རྒྱུས་ཉན་སྐབས་ང་བོད་ལ་འགྲོ་སྡོད་ཧ་ཅང་ཆེན་པོ་བྱུང་སོང་། ང་ཚོའི་མ་འོངས་བོད་ཀྱི་སོན་རྩ་གཞོན་སྐྱེས་མང་ཆེ་བ་ད་ལྟ་རྒྱ་གར་སོགས་རང་དབང་ལུང་པའི་ནང་སྐྱབས་བཅོལ་བྱས་ནས་སེམས་ཁྲལ་མེད་པའི་ཐོག་སྐྱིད་པོ་བྱས་ནས་བསྡད་ཡོད། དེ་ནི་བོད་མི་ཚོས་སོ་སོའི་རིག་གཞུང་དང་། ཆོས། སྐད་ཡིག་བཅས་ལ་དོ་སྣང་མེད་པར་སྣང་མེད་འཐུས་ཤོར་ཧ་ཅང་ཆེན་པོ་ཞིག་འགྲོ་ཡི་ཡོད་པ་མཐོང་གི་འདུག བོད་མི་ཚང་མའི་རེ་འདོད་ནི། ཚེ་འདི་ཕྱི་གཉིས་ཀྱི་སྐྱབས་གནས་༧གོང་ས་༧སྐྱབས་མགོན་ཆེན་པོ་མཆོག་མཉམ་དུ་བོད་རང་བཙན་ཐོབ་ནས་བོད་དུ་ལོག་འགྲོ་རྒྱུ་དེ་རེད་། བུ་མོ་ང་རང་བོད་ལ་འགྲོ་འདོད་པའི་རྒྱུ་མཚན་གཅིག བོད་ཀྱི་རྒྱལ་ས་ལྷ་སར་ཡོད་པའི་ཕོ་བྲང་པོ་ཏ་ལ་སོགས་དགོན་པ་ཁག་མཇལ་འདོད་ཆེན་པོ་འདུག དེ་བཞིན་གངས་རི་ཆེན་པོ་མཆོད་མཇལ་དང་། དེའི་ཞབས་ནས་རྒྱུགས་པའི་གངས་ཆུ་རྒྱུག་ཆུ་གཙང་མ་འཐུང་རྒྱུ་བྱུང་ན་བསམ་གྱི་འདུག། བོད་ལ་རང་དབང་གི་ཉི་མ་ཤར་ན། ༧གོང་ས་སྐྱབས་མགོན་ཆེན་པོ་མཆོག་དང་ལྷན་བཙན་བྱོལ་བོད་མི་ཚང་མ་བོད་དུ་ལོག་ནས་བོད་གཞིས་བྱེས་གཉིས་མཉམ་འཛོམས་ཀྱིས་དགའ་བོ་སྐྱིད་པོའི་ངང་ནས་གནས་ཐུབ་ཀྱི་རེད། དེ་འདྲའི་དུས་བཟང་བྱུང་ན། བོད་ཀྱི་ཆོས་དང་རིག་གཞུང། སྐད་ཡིག རྒྱལ་ཁབ་ཀྱི་སྐོར་དམིགས་བསལ་དངོས་སུ་སྦྱང་རྒྱུའི་གོ་སྐབས་རག་གི་རེད་བསམ་གྱི་འདུག།

འཛམ་གླིང་འདིའི་ནང་མི་སུ་ཡིན་པ་ཡིན་ན་ཡང་སོ་སོའི་མཛའ་ཞིང་བརྩེ་བའི་སྤུན་ཟླ་དང་། བདེ་ཞིང་སྐྱིད་པའི་ཕ་ཡུལ་ལ་འགྲོ་རྒྱུ་འདོད་པ་ཡོད་མཁན་ཧ་ཅང་མང་པོ་ཡོད་རེད། ང་རང་ལས་དབང་གིས་ཕ་ཡུལ་དང་ཁ་བྲལ་ཏེ་བཙན་བྱོལ་ལ་སྐྱེ། ས་གཙང་བ། རླུང་དྭངས་མ། རང་འབྱུང་གི་མཛེས་སྡུག་ལྡན་པའི་ཁོར་ཡུག་ཅན་གྱི་བོད་ལ་ང་སྐྱེས་ཡོད་ན་སྐྱིད་པ་ལ་ཨང། དམ་པའི་ཆོས་དར་ས། ངའི་ཕ་མེས་ཡང་མེས་འཁྲུངས་ས། བོད་མི་རིགས་ཀྱི་འབྱུང་ས། ཇོ་བོ་ཡིད་བཞིན་ནོར་བུ་སོགས་རྩ་ཆེན་གྱི་རྟེན་དང་ལྷ་ཁང་གི་བྱིན་རླབས་ཡོད་སའི་བོད་ལ་ལོག་ན་འདོད། སྦགས་བཙོག་གིས་མ་འགོས་པའི་ཟས་ཞིམ་ལ་བཅུད་ཆེ་བ། ཤ་མར་ཐུད་དང་། ནས་རྩམ་བྲོག་མ་སོགས་ཟ་རྒྱུ་ཡོད་ས་ཡོད་པའི་བོད་ལ་ལོག་ན་འདོད། འབྲི་གཡག་ར་ལུག་སོགས་ཀྱིས་ཐུན་མིན་སྲོག་ཆགས་སྙིང་རྗེ་པོས་གང་བའི་བོད་ལ་ཡོད་ན་འདོད། མི་རྒྱུད་བྱམས་པས་ཕྱུག་ཅིང་། ཡ་རབས་བཟང་སྤྱོད་བྱམས་བརྩེས་ཁྱབ་པའི་ཞིང་ས་བོད་ལ་ཡོད་ན་འདོད་། བོད་ཀྱི་རྩ་ཐང་ལ་རྩེད་མོ་དང་། གཙང་ཆུ་ལ་རྐྱལ་རྒྱག་ཅིག རྟ་རྒོད་བཞོན་ནས་གནས་མཇལ་དུ་འགྲོ་བར་འདོད། བཙན་རྒྱལ་རྒྱ་ནག་དམར་པོའི་དབང་ཤུགས་ཉམས་ནས་བོད་ལ་རང་དབང་བདེན་པའི་ཉི་མ་གསར་པ་ཤར་བའི་སྨོན་ལམ་འདེབས་ཀྱི་ཡོད། སྐྱབས་མགོན་རྒྱལ་བའི་དབང་པོ་དང་ལྷན་བོད་རང་ཡུལ་ལ་ལོག་ནས་རང་སྐད་བརྒྱབ། རང་གོས་གྱོན། རང་མི་རིགས་ཀྱི་ལ་རྒྱའི་སྤོབས་པ་ཡོད་སའི་བོད་ལ་ལོག་ན་འདོད།

བོད་པའི་ཆབ་སྲིད། དཔལ་འབྱོར། རིག་གནས་སླར་གསོའི་ཆེད་ང་བོད་ལ་ཡོད་ན་སྡོད། བོད་ལ་ཡོད་ན་བཙན་བྱོལ་ལ་ཡོད་པ་ལས་བོད་མི་རིགས་ཀྱི་རྒྱལ་ཞེན་ཆེ་བ་ཡོང་ཤས་ཆེ། བོད་ལྗོངས་ལྷ་ས་ལ་བཞུགས་པའི་བྱིན་རླབས་ཆེ་བའི་ཇོ་བོ་རྣམ་གཉིས་ཀྱི་གཙོས་པའི་བོད་ཆོལ་ཁ་གསུམ་གྱི་སྐུ་རྟེན་རྩ་ཆེན་རྣམས་མཇལ་འདོད། དེ་བཞིན་གནམ་གཤིས་ཧ་ཅང་སྐྱིད་པའི་བོད་ལ་ལོག་ན་འདོད། ཆུ་དྭངས་བསིལ་རོ་མངར་ལྡན་པའི་བོད་ལ་ལོག་ན་འདོད། བོད་ལ་ལོག་ན་འདོད་རུང་། རྒྱ་དམར་ཀླ་ཀློའི་མཐུ་བཙན་པས། བོད་གཞི་ས་རང་དབང་གཏན་བརླགས་ཏེ། བོད་ལ་ལོག་ཐབས་བྲལ་། གཞན་ཡུལ་ག་ཚོད་སྐྱིད་ཀྱང་རང་ཡུལ་འདྲ་བོ་མི་འདུག ཟ་ཉལ་འགྲོ་འདུག་མཚུངས་ཀྱང་རིག་གཞུང་དང་། སྐད་ཡིག། སེམས་ཀྱི་གཤིས་ཀ་མི་གཅིག་པས་དཀའ་ལས་རེད་འདུག མི་རིགས། གོམས་གཤིས། ཆོས་ལུགས་མི་གཅིག་པའི་དཀྱིལ་དུ་བྱ་རོག་ནང་དུ་ངང་པ་ལྟ་བུ་ཆགས་ནས་སྡོད་འདོད་མི་འདུག དེར་བརྟེན། ང་བོད་ལ་ཡོད་ན་འདོད་། མི་རིགས། གོམས་གཤིས། ཆོས་ལུགས་གཅིག་པའི་བོད་རྒྱལ་ཁབ་ཏུ་ལོག་ནས་བསྡད་པར་འདོད། སོ་སོའི་སྐད་ཡིག་དེ་དཔེ་གལ་ཆེན་པོ་རེད། སྐད་ཡིག་ནི་མི་རིགས་ཤིག་གི་ངོ་བོ་རེད། བོད་རིགས་ཚང་མ་གཅིག་གིས་གཅིག་ལ་རོགས་རམ་དང་། ཆིལ་སྒྲིལ་བྱས་ཏེ་བོད་ཀྱི་ཐུན་མོང་མ་ཡིན་བའི་སྐད་ཡིག་དང་། རིག་གཞུང། ནང་ཆོས་བཅས་སྲུང་སྐྱོབ་བྱེད་དགོས།