བློ་བཟང་འོད་སྲུང་། འཛིན་གྲྭ་དགུ་པ། རྫོང་ཆོས་འབྲིང་རིམ་སློབ་གྲྭ།
༄༅། ། བོད་གཞུང་ཤེས་རིག་ལས་ཁུངས་ནས་སློབ་གྲྭ་དང་དགོན་སྡེ་ཁག་ལ་བཀའ་ཕེབས་པ་བཞིན་ཁོ་བོས་བརྗོད་གཞི་དེ་རྣ་བར་གོ་མ་ཐག་དགའ་དགའ་སྤྲོ་སྤྲོའི་ངང་ནས་གོ་སྐབས་བཟང་པོ་ཞིག་ཐོབ་བྱུང་སྙམ་པའི་སེམས་ཚོར་དྲག་པོ་ཞིག་སྐྱེས་སོང་།
ལར་ནས་ང་ཚོའི་ཤ་ཁྲག་རུས་གསུམ་གདུང་རྒྱུད་བོད་པ་རྩམ་ཟན་ཡིན་པའི་ཆ་ནས་བོད་ཀྱི་རིག་གཞུང་བདག་གཉེར་བྱེད་དགོས་པ་དང་ཉམས་པ་སླར་གསོ་དང་མི་ཉམས་རྒྱུན་འཛིན་བྱ་དགོས་པ་དེ་ནི་རང་རང་སོ་སོའི་ཕྲག་པའི་སྟེང་ལས་འགན་ལྕི་མོ་ཞིག་མཆིས། ཨུ་རུ་སུའི་མཁས་དབང་ Stalin གྱིས་”དང་པོ་རྒྱལ་ཁབ་ཞིག་མེད་པ་བཟོ་འདོད་ན། དང་ཐོག་རྒྱལ་ཁབ་དེའི་སྐད་ཡིག་རྩ་མེད་བཟོ་དགོས་ཞེས་གསུངས། དེ་ལས་སྐད་ཡིག་དེ་གལ་འགངས་ཆེ་ཆུང་ཡིན་མིན་དཔོག་ཐུབ།
དེ་དང་འབྲེལ་ནས་ཀློག་པ་པོ་ཡོངས་ལ་དྲི་བ་ཞིག་གཏང་བར་འདོད། དེ་ནས་ཅི་སྟེ་རྒྱབ་ཁབ་ཞིག་ལ་སྐད་ཡིག་མེད་པར་གྱུར་ན་རྒྱལ་ཁབ་དེའི་མི་རིགས་དང་རྒྱལ་ཁབ་འདི་ཡིན་ཞེས་མཚོན་ཐུབ་ཀྱི་ཡོད་དམ། གུས་པས་བསམ་ན་སྐད་ཡིག་མེད་ན་མི་རིགས་དང་རྒྱལ་ཁབ་ཐ་སྙད་ཙམ་ཡང་མཚོན་མ་ཐུབ་སྙམ།
དེ་བཞིན་དུ་སྤྱིར་གཏང་རང་དབང་ལ་འདྲ་མིན་མཆིས་ཏེ། དཔེར་ན།
སྨྲ་བརྗོད་རང་དབང་དང་། སྐད་ཡིག་རང་དབང་། ཆབ་སྲིད་རང་དབང་། ཆོས་དད་རང་དབང་སོགས་ཡོད། བོད་ཀྱི་མཁས་དབང་དགེ་འདུན་སྦྱིན་པས་ཀྱང་།
གང་ཞིག་ཡུལ་གྱི་རང་དབང་གི །
གཞི་རྟེན་གྱུར་པའི་རིག་གཞུང་དག །
ཅི་སྟེ་ཉམས་པར་གྱུར་པས་ན། །
ཡུལ་དེར་རང་དབང་ཡོངས་སུ་བརླགས། ། ཅེས་གསུངས་སོ། །
ཕྱི་ལོ་༡༩༥༩ལོར་རང་རྒྱལ་ཁབ་རྒྱ་མི་ཀླ་ཀློའི་འོག་ཏུ་ཚུད་ནས་༸གོང་ས་ལྷ་མི་རྣམ་འདྲེན་དང་བོད་མི་ཕལ་མོ་ཆེ་རྒྱ་གར་འཕགས་པའི་ཡུལ་དུ་བཙན་བྱོལ་དུ་འགྲོ་དགོས་བྱུང་སྟེ་མགོན་པོ་གང་ཉིད་ནས་སྲིད་བློན་ནེ་རུ་དང་མཇལ་ཕྲད་བྱུང་སྐབས་དགོངས་པ་ཆེ་བཞེད་ཀྱི་ཐོག་ནས་ཐོག་མ་སློབ་གྲྭ་གསར་བཙུགས་དགོས་པ་རྒྱུ་མཚན་གཙོ་བོ་བཟུང་གནང་བ་རེད།
ད་ལྟའི་བར་ལོ་ངོ་ ༦༠ ལྷག་གི་རིང་རྒྱ་མི་ཚོས་བོད་མི་མང་ལ་བརྙས་བཅོས་དང་གདུག་རྩུབ་འདྲ་མིན་བྱས་ཡོད་ཀྱང་༸གོང་ས་མཆོག་གིས་ཀྱང་ངན་སེམས་འཆང་གི་མེད་ཞེས་ངོས་ཀྱི་ཡུལ་དང་ངོས་ཀྱི་མི་མང་ཞེས་པའི་དཔེ་དེབ་འདིའི་གླེང་གཞི་རུ། བོད་ནང་རྒྱ་དམར་གྱི་སྐུ་ཚབ་ཚོས་ཀླ་ཀློ་ལྟ་བུའི་སྤྱོད་ཚུལ་ངན་པ་བྱས་ཡོད་ཀྱང་ང་ཚོ་བོད་མི་མང་ནས་སྙན་གྲགས་ཅན་གྱི་རྒྱ་ནག་མི་རིགས་ལ་ངན་སེམས་འཆང་གི་མེད། ང་ཚོའི་རེ་འདོད་ནི་རྒྱ་མི་སོགས་ཁྱིམ་མཚེས་རྒྱལ་ཁབ་ཚོ་དང་མཛའ་མཐུན་ཞི་བའི་ངང་སོ་སོའི་མི་ཚེ་སྐྱེལ་ཐུབ་པ་ཞིག་དགོས་པ་ཡིན་ཞིང་དེ་ལྟར་ཡོང་བའི་ཆེད་དུ་དཀའ་ཐུབ་དང་བྱམས་བརྩེ་ལྡན་པའི་འཛམ་གླིང་མི་མང་ཕོ་མོ་རྣམས་ལ་ཞུ་འབོད་ཞུ་བཞིན་ཡོད། ཞེས་དང་། ཡང་༸པཎ་ཆེན་རིན་པོ་ཆེ་མཆོག་གིས་ཀྱང་ལོ་ཆུང་བྱིས་པ་མ་ལུས་པ་ཐམས་ཅད་སློབ་གྲྭར་བསྐྱོད་དགོས་པ་དང་། སློབ་གྲྭའི་ནང་བོད་ཡིག་སློབ་ཚན་ངེས་པར་དུ་འཁྲིད་དགོས་ཞེས་གསུངས་ཡོད། དེ་བཞིན་དུ་སྐྱེས་ཆེན་དམ་པ་རྣམས་ཀྱིས་ཀྱང་ཡང་ནས་ཡང་དུ་བཀའ་ཕེབས་ཀྱི་ཡོད། དེང་གི་དུས་སུ་ཁ་བ་གངས་ལྗོངས་སུ་གནས་པའི་བོད་མི་སྤྱི་བོ་གནམ་བསྟན་ཚོ་ལ་ཆ་བཞག་ན་སྐད་ཡིག་གི་རང་དབང་བྲལ་ནས་ལུས་ཀྱི་ལྕོག་ཀྱང་སེམས་ཀྱི་མི་ལྕོག་པ་ཤ་སྟག་ཡིན།
ངེད་ཚོ་རང་དབང་ལུང་པ་རྒྱ་གར་ནང་དུ་གནས་སྡོད་བྱེད་མཁན་བོད་མི་རྩམ་གཟན་པ་ཚོ་ལ་ལས་འགན་དམིགས་བསལ་ཞིག་ལྡན་ཡོད། གཞན་ཡང་༸པཎ་ཆེན་རིན་པོ་ཆེ་མཆོག་གིས་ཁྱེད་ཅག་ངའི་འདྲ་གཟུགས་ལྷ་ཁང་དུ་བཤམས་ཏེ་དད་པ་ཡོད་མདོག་གི་ཕྱག་འབུལ་དང་སྤོས་ཀྱི་འདུག་པ་ལས། ངའི་ཁར་ཉན་ནས་བོད་ཡིག་སྦྱོངས་བོད་སྐད་ཤོད། ཁས་ལེན་ཚིག་བརྩིས་མེད་པར་དད་པ་དེ་འདྲ་ང་ལ་མི་མཁོ་ཞེས་བློ་ཕམ་ངང་གསུངས་འདུག །
མཐར་དོན་གུས་པས་ཀློག་པ་པོ་ཡོངས་ལ་དྲི་བ་ཞིག་བསྐུར་འདོད་པ་ནི། རང་ཉིད་བོད་པ་ཞིག་ཡིན་པའི་ཆ་ནས་བོད་པའི་སྐད་དང་ཡི་གེ་མི་ཉམས་པའི་སླད་དུ་ལོ་དང་དབང་ཐང་ཅན། གཞུང་སྒེར། དགེ་རྒན་དང་སློབ་ཕྲུག་ཚང་མ་ལ་་ལས་འགན་ཡོད་ན་གང་ཡོད་དམ། གལ་ཏེ་ལས་འགན་མེད་ཟེར་ན་རང་ཉིད་བོད་པ་ཞིག་ཡིན་པ་དོན་མེད་ཡིན་སྙམ། །
ཕྲན་གྱི་ལག་ཟུང་སྙིང་གར་བཟུང་ནས་བོད་མི་ཚོ་ལ་རེ་བ་ཆུང་ཆུང་ཞིག་ལ་སྔར་གྱི་མེས་པོ་ཚོས་སྐུ་ལས་གནང་བཞག་པ་དེ་ལ་མནོ་བསམ་གང་ལེགས་བཏང་ནས་ང་ཚོའི་བོད་ཀྱི་སྐད་ཡིག་དང་རིག་གཞུང་བདག་གཉེར་ང་ཚོས་མ་བྱས་ན་སུས་བྱེད་ཀྱི་རེད་དམ། །
ད་བར་དཔྱད་མཆན་མེད།