བསྟན་འཛིན་ཀུན་བཟང། འཛིན་གྲྭ་བཅུ་གཅིག སྦེལ་ཀོབ་སཾ་བྷོ་ཊ།
ང་ཡི་རྩ་བའི་བླ་མ། །
༸གོང་ས་༧སྐྱབས་མགོན་ཆེན་པོ། །
ཁྱེད་ཀྱིས་བསྐྱངས་བའི་བཀའ་དྲིན། །
ནམ་ཡང་ཡིད་ལ་བཅངས་ཡོད། །
བདག་ཅག་གི་འདི་ཕྱི་གཉིས་ཀྱི་སྐྱབས་གནས་༧སྐྱབས་མགོན་ཡིད་བཞིན་ནོར་བུ་མཆོག་ཕྱི་ལོ་ ༡༩༥༩ ལོར་མི་འདོད་བཞིན་དུ་རྒྱ་གར་འཕགས་པའི་ཡུལ་དུ་སྐྱབས་བྱོལ་དུ་བསྐྱོད་དགོས་བྱུང་བ་རེད། ང་ཚོའི་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་དང་བོད་མི་བཙན་བྱོལ་བ་ཚོའི་ཆེད་གཞིས་ཆགས་ཁག་དང་། བོད་ཕྲུག་ཚོའི་ཆེད་དུ་སློབ་གྲྭ་ཁག ཆོས་པ་ཚོའི་ཆེད་དུ་དགོན་པ་དང་བཤད་གྲྭ་ཁག་སོགས་གསར་བཙུགས་མང་པོ་གནང་སྟེ་སྐུ་ལས་ཧ་ཅང་ཆེན་པོ་བསྐྱོན་གནང་ཡོད།
ང་ཚོ་བོད་མི་ཚོ་ཕྱི་རྒྱལ་ཁབ་གང་དུ་འགྲོ་ནའང་དཀའ་ངལ་དེ་ཙམ་མེད་པ་དང། རྒྱ་བལ་འབྲུག་གསུམ་གྱི་ནང་ཆབ་སྲིད་དང་དཔལ་འབྱོར་གྱི་རང་དབང་ལ་ལོངས་སུ་སྤྱོད་པ་ཐུབ་པ་སོགས་ཁོང་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བྱུང་བ་ཞིག་ཡིན་པས། ཁོང་གིས་བཀའ་སློབ་གང་གནང་བ་རྣམས་གུས་མོས་སྙིང་དབུས་སུ་བཅངས་ནས་ཡོད།
ཚ་གཟེར་ཉི་མ་འདྲ་བ། །
ང་ཡི་བརྩེ་བའི་ཡབ་ཡུམ། །
ཁྱེད་ཀྱིས་བསྐྱངས་བའི་བཀའ་དྲིན། །
གུས་མོས་ཡིད་ལ་བཅངས་ཡོད། །
འཛམ་གླིང་འདིའི་སྟེང་ན་བྱམས་ལྡན་གྱི་ཕ་མ་ནི་ཕྲུ་གུའི་དགེ་རྒན་ཆེས་ཐོག་མ་དེ་ཡིན་པ་དང། ཕྲུ་གུར་ཟ་སྟངས་དང། འགྲོ་སྟངས། སྡོད་སྟངས་སོགས་བསླབས་གནང་བ་མ་ཟད། ཐ་ན་རང་གི་ཟས་དང་གཉིད་བློས་བཏང་སྟེ་ཉིན་མཚན་མེད་པར་ཕྲུ་གུ་ཁོ་ནའི་ཆེད་དཀའ་ལས་བརྒྱབས་ནས་ལྟ་སྐྱོང་གནང་བཞིན་ཡོད། ད་ཆ་ང་དང་ང་འདྲ་བའི་ཕྲུ་གུ་མང་པོ་མི་བཟང་པོ་ཞིག་ཆགས་པ་དེ་ཕ་མ་གཉིས་ཀྱི་བཀའ་དྲིན་ཡིན་པ་དེ་བློ་ལ་གསལ་བར་འཆར་བའི་འགོ་ནས་ཕ་མའི་བཀའ་བཞིན་སྒྲུབ་རྒྱུ་ཡིན།
བཀའ་དྲིན་གཡོ་མེད་བསྐྱངས་བའི། །
ང་ཡི་བརྩེ་བའི་དགེ་རྒན། །
ཁྱེད་ཀྱིས་བསླབས་པའི་སློབ་སྦྱོང་། །
བློ་མུན་བསལ་བའི་སྒྲོན་མེ། །
ང་ཚོ་སློབ་ཕྲུག་ཡོངས་ཀྱི་བློ་མིག་ཐོག་མར་འབྱེད་མཁན་ནི་བཀའ་དྲིན་བླ་ན་མེད་པའི་དགེ་རྒན་རྣམ་པ་ཡིན། ཁོང་རྣམ་པས་སློབ་ཕྲུག་ཚོར་དང་ཐོག་ཀ་ཁ་ནས་བསླབས་གནང་བའི་བཀའ་དྲིན་ལ་བརྟེན་ནས་ད་ཆ་འབྲི་ཀློག་རང་སྐྱ་འཕེར་བ་ཞིག་ཆགས་ཐུབ་ཡོད། སློབ་ཕྲུག་ཚོས་ཟླ་བ་དང་ལོ་མང་པོ་དགེ་རྒན་བསྟེན་པའི་སྐབས། ཁོང་རྣམ་པས་ཀྱང་སློབ་ཕྲུག་རྣམས་སྒོ་ང་ལྟར་གཟབ་གཟོན་གྱིས་གསོ་སྐྱོང་དང་ལམ་སྟོན་གནང་གི་ཡོད། ད་དུང་དུས་ཚོད་འཕར་མ་བཏང་སྟེ་སེམས་ཤུགས་ཆེན་པོས་སློབ་ཁྲིད་གནང་བར་གུས་མོས་སྙིང་ཐག་པ་ནས་བཀའ་དྲིན་ཆེ་ཞུ།
རྒྱ་གར་འཕགས་པའི་ཡུལ་ནི། །
བོད་མིའི་ཕ་ཡུལ་གཉིས་པ། །
ཁྱིམ་ཚང་གཉིས་པ་དེ་ལ། །
བོད་མི་མང་པོ་གནས་ཡོད། །
ང་ཚོ་རང་ཡུལ་དགྲ་ལག་ཏུ་ཤོར་ནས་རྒྱ་གར་གི་ས་ཕྱོགས་གང་སར་གྱར་ནས་གནས་པའི་སྐབས་རྒྱ་གར་གྱི་སྲིད་བློན་ནེཧ་རུ་མཆོག་གིས་ང་ཚོ་བོད་མི་ཚོར་ཟས་གོས་གནས་མལ་སོགས་གང་ཅིའི་ཐད་ནས་རྒྱབ་སྐྱོར་གནང་བར་བརྟེན། ང་ཚོ་བོད་མི་ཡོད་དོ་ཅོག་གི་ནང་གཉིས་པ་ལྟ་བུ་ཆགས་ཡོད། དེ་ཙམ་མ་ཟད་ས་ཞིང་འདེབས་ལས་ཆེད་དུ་ས་ཞིང་དང། སློབ་ཕྲུག་ཚོའི་ཆེད་དུ་སློབ་གྲྭ་སོགས་མཐུན་འགྱུར་གང་ལེགས་གནང་བར་བཀའ་དྲིན་འཇལ་ཐབས་བྲལ་ཡང། རྟག་ཏུ་སེམས་ནང་བཀའ་དྲིན་དྲན་དགོས་པ་གལ་གནད་ཆེའོ། །
ད་བར་དཔྱད་མཆན་མེད།