བསྟན་འཛིན་འཕེལ་བཟང་།
འཛིན་གྲྭ་དྲུག་པ། གོ་པལ་པུར་བོད་ཁྱིམ།
འབྲོག་པ་ཟེར་ན། སྒོ་ཕྱུགས་སེམས་ཅན་གསོ་སྐྱོང་བྱས་ཏེ་གནས་ངེས་མེད་དུ་འཚོ་བ་སྐྱེལ་མཁན་ལ་འབྲོག་པ་ཟེར་གྱི་ཡོད། འབྲོག་པ་སྡོད་སའི་གུར་ལ་སྦྲ་གུར་ཟེར་བ་དང་། དེ་ནི་གཡག་གི་ཙིད་པའི་སྐུད་པ་འཁེལ་བ་དང་སྐུད་པའི་རེ་ལྡེ་འཐག་སྟེ་བཟོས་པ་ཞིག་ཡིན། སྦྲ་གུར་ལ་ཆེ་ཆུང་འདྲ་མིན་སྣ་ཚོགས་ཡོད། འབྲོག་པའི་ཟས་གཙོ་བོ་ནི་ཞོ་དང་། འོ་མ། མར། ཕྱུར་བ་སོགས་དཀར་ཟས་ཀྱི་རིགས་དང་། གཡག་ཤ་དང་། ལུག་ཤ་སོགས་དམར་ཟས་རིགས་ཀྱི་གཙོ་བོ་ཡིན། གཞན་ཡང་ཞིང་པས་འབྲོག་པར་རྩམ་པ་དང་། གྲོ། འབྲས་སོགས་ཞིང་པའི་སྟོན་འབྲས་དང་། འབྲོག་པས་ཞིང་པར་ཤ་དང་། མར། ཕྱུར་བ་མཁོ་འདོན་བྱས་ཏེ་བརྗེ་ཚོང་ལམ་ལུགས་ཀྱི་སྲོལ་ཡང་ཡོད། གནའ་སྔ་མོ་འབྲོག་པའི་གོས་ནི་སེམས་ཅན་གྱི་ལྤགས་པའི་བཟོས་པ་དང་། བུད་མེད་དང་སྐྱེས་པའི་གོས་ཀྱི་མཐའ་གཤམ་ལའང་མཐའ་ལྕགས་སྔོན་པོ་དང་། སེར་པོ། དཀར་པོ། དམར་པོ། ལྗང་ཁུ་བཅས་ས་ཆ་སོ་སོའི་ལུགས་སྲོལ་ལྟར་འཇའ་གཏོང་སྲོལ་ཡོད། དེ་བཞིན་སྐྱེས་པའི་གོས་ཀྱི་མཐའ་གཤམ་ལའང་སྟག་ལྤགས་དང་། གཟིག་ལྤགས། ཝ་ལྤགས། སྲམ་ལྤགས་སོགས་རྒྱན་པའི་དར་སྲོལ་ཆེན་པོ་ཡོད་ནའང་། ཕྱི་ལོ་ ༢༠༠༦ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྩ་ཆེན་སྲོག་ཆགས་སྲུང་སྐྱོབ་ཀྱི་བཀའ་སློབ་ལ་བརྟེན་ནས་སེམས་ཅན་གྱི་ལྤགས་པ་སོགས་བེད་སྤྱོད་བྱེད་རྒྱུ་མཚམས་འཇོག་བྱས་པ་རེད།
འབྲོག་པ་ཕོ་མོ་ལ་ཡང་ལས་ཀ་ཁག་ཁག་ཡོད། སྐྱེད་པ་རྣམས་ཚོང་རྒྱག་ཏུ་འགྲོ་བ་དང་བུད་མེད་རྣམས་ནང་གི་ལས་ཀ་བྱེད་ཀྱི་ཡོད། གནང་སྔ་མོར་འབྲོག་པ་ཕོ་མོའི་ལས་ཀར་དབྱེ་མཚམས་འབྱེད་སྲོལ་ཡོད་ཀྱང་། དེང་སྐབས་ཕོ་མོ་ལ་དབྱེ་བ་མེད་པར་དགའ་ཕྱོགས་དང་འཇོན་ཐང་ལ་དཔག་སྟེ་ལས་ཀ་བྱེད་ཡོད། འབྲོག་པ་ལ་ང་ཚོ་ནང་བཞིན་དུས་སྟོན་ཡོད་པ་དང་དུས་སྟོན་སྐབས་འབྲོག་པ་རྣམས་དགའ་དགའ་སྤྲོ་སྤྲོ་བྱེད་བཞིན། དུས་སྟོན་སྐབས་འབྲོག་པ་རྣམས་ས་ཁུལ་གཅིག་ཏུ་འཛོམས་ཏེ་བདུན་ཕྲག་གཉིས་རིང་རྟ་རྒྱུག་དང་གཡག་རྒྱུག མི་རྒྱུ། མདའ་རྩལ། གཡག་རྡུང་ག་འགྲན་པ་བཅས་བྱེད་པ་མ་ཟད། གཞས་དང་ཞབས་བྲོ་འཁྲབ་སྟེ་དུས་སྟོན་ལ་རོལ་གྱི་ཡོད། འབྲོག་པ་རྣམས་ས་གནས་གཅིག་ཏུ་གཞིས་ཆགས་ནས་མི་སྡོད་པར། ནམ་དུས་དང་བསྟུན་ནས་རུ་སྤོར་ནས་འགྲོ་ཡི་ཡོད། དཔྱིད་ཀ་ནི་མ་མོ་ལ་ལུ་གུ་དང་། ར་མ་ལ་རེའུ། འབྲི་ལ་བེའུ་སྐྱེས་པའི་སྐབས་ཡིན་པས། བྲེལ་བ་ཆེ་ཞིང་སྒོ་ཕྱུགས་འཚོ་སྐྱོང་ལ་དཀའ་ལས་ཆེ་ཤེས་ཀྱི་དུས་ཡིན། དབྱར་ཁའི་དུས་སུ་རྩྭ་ཆུ་བཟང་བས་ནོར་ཕྱུགས་རྣམས་དེད་ནས་ས་བབ་མཐོ་སར་སྤོར་བ་དང་། ས་དེ་ལ་དབྱར་ས་ཟེར། སྟོན་ཀའི་དུས་སུ་འབྲོག་པས་ནོར་ལུག་རྣམས་ས་བབ་ཅུང་དམའ་བར་སྤར་ནས་འགྲོ་བ་དང་། དེ་དུས་དཀར་ཆུ་འོ་མ་བཟང་ཞིང་། ཤ་ཤེད་བརྒྱད་པས་འབྲོག་པ་སྐྱེས་པའི་ཚོ་ཚོང་རྒྱག་ཏུ་འགྲོ་བའི་དུས་ཚོད་ཡིན། དགུན་ཁའི་དུས་སུ་གནམ་གཤིས་ཧ་ཅང་གྲང་བས་ས་ཆ་དམའ་སར་སྡོད་ལ། ས་དེ་ལ་དགུན་ས་དང་དགུན་མཚེར་ཡང་ཟེར།
འབྲོག་པ་ལ་སེམས་ཅན་མང་པོ་ཡོད་པ་དང་། དེ་དག་ནས་གཡག་ནི་སེམས་ཅན་སྟོབས་ཤུགས་ཆེ་ཤེས་རེད། གཡག་ནི་གཟུགས་སྟོབས་ཆེན་པོ་ཡོད་པའི་ནུ་གསོ་སྲོག་ཆགས་ཤིག་ཡིན། གཡག་སྤྱིའི་གཟུགས་པོའི་རིང་ཚད་ལ་མི་ཊར་ ༡༡ ནས་ ༡༥ བར་དང་། ལྗིད་ཚད་ནི་ཀི་ལོ་ ༣༢༠ ནས་ ༤༦༠ ཙམ་ཡིན། མིས་བདག་སྐྱོང་བྱས་པ་ལ་གཡག་དང་། བདག་སྐྱོང་མ་བྱས་པར་བྱང་ཐང་དུ་གནས་པ་ལ་འབྲོང་ཟེར། གཡག་ནི་གནམ་གཤིས་གྲང་མོ་དང་ས་ཆ་སྐམ་པོ། ཆ་སྙོམས་མཐོ་ཚད་རྒྱ་མཚོ་ལས་མི་ཊར་ལྔ་སྟོང་ཡན་གྱི་ས་ཆར་སྡོད་ཐུབ་ཀྱི་ཡོད། དེ་ལྟར་སྡོད་ཐུབ་པའི་རྒྱུ་མཚན་ནི། གཡག་གི་ལུས་ལ་སྐྱེས་པའི་ཁུ་ལུ་དང་རྩིད་པ་མཐུག་པོ་ཡོད་པས་ཡིན། འབྲོག་པ་རྣམས་ཀྱིས་བོད་མཐོ་སྒང་གི་ས་མཐོར་གཡག་ལ་ཁལ་བཀལ་ནས་འགྲུལ་བཞུད་བྱེད་ཀྱི་ཡོད་སྟབས། ཕྱི་རྒྱལ་ཚོས་གཡག་ལ་མཐོ་སྒང་གི་གྲུ་གཟིངས་ཞེས་ཀྱང་འབོད་སྲོལ་འདུག ང་ཚོའི་བོད་ལ་ཁྱི་ཡོད་པ་དང་འབྲོག་པའི་ཁྱི་ལ་འབྲོག་ཁྱི་ཟེར། དེ་ནི་མཐོ་སྒང་ནས་བྱུང་བའི་ཁྱི་རྒྱུད་ཅིག་ཡིན། དེའི་གཟུགས་ཕུང་ཆེ་ཞིང་རིང་ཚད་ལ་མི་ཊར་ ༠་༦༦ ནས་ ༠་༧༦ བར་དང་། ལྗིད་ཚད་ལ་ཀི་ལི་ ༥༠ ནས་ ༧༠ ཙམ་ཡོད། འབྲོག་ཁྱི་ནི་དཀྱིལ་ཤར་ཨེ་ཤེས་ཡའི་ས་སྒང་དང་རི་བོ། ཐང་གཤོངས། རི་བོ་ཧི་མ་ལ་ཡའི་འདབས་རོལ་གྱི་མཐོ་སྒང་གི་མི་དང་མཉམ་དུ་འཚོ་སྡོད་བྱེད་ཀྱི་ཡོད། བོད་ས་མཐོ་རུ་འཚོ་བའི་འབྲོག་ཁྱི་འདི་སྦྲ་ཁྱིམ་དང་དགོན་སྡེ་སྲུང་ཆེད་གསོ་ཉར་བྱེད་པ་དང་། ཉིན་མོ་ལྕགས་ཐག་དང་ཀོ་ཐག་གིས་འདོགས་པ་དང་། མཚན་མོ་གློད་ཀྱི་ཡོད། འབྲོག་པ་དགུན་ས་ནས་དབྱར་སར་སྤོ་དུས་འབྲོག་ཁྱི་ཁ་ཤས་དགུན་ས་རུ་ཡོད་པའི་དགེ་རྒན་དང་བྱིས་པ། བཞོན་མ། བཞོན་རྟ་སོགས་སྲུང་སྐྱོབ་བྱེད་དུ་འཇུག་གི་ཡོད། འབྲོག་པ་རྣམས་རྩྭ་ཐང་རྒྱ་ཆེ་ས་དང་མཛེས་ཤིང་ཡིད་དུ་འོང་བའི་རྩྭ་ཐང་དུ་སྡོད་ཀྱི་ཡོད། ང་རང་ཡང་འབྲོག་པ་བྱེད་འདོད་ཡོད།
ད་བར་དཔྱད་མཆན་མེད།