མེ་ཏོག་བཏོགས་པ།

དྲི་ཞིམ་འཐུལ་བ། མེ་ཏོག་བཏོག་པ། རྣམ་འགྱུར་སྟོན་པ། ཁོང་ཁྲོ་ཟ་བ། བེད་སྤྱད་པ། དཀའ་ལས་བརྒྱབ་པ། གཏོར་བཤིག་གཏོང་བ། སྐྱོན་བརྗོད་བྱེད་པ།
རེས་གཟའ་ཉི་མའི་ཉིན། ཕུར་བུ་ངེད་གཉིས་གླིང་ཁའི་ནང་འཆམ་འཆམ་དུ་ཕྱིན་པ་ཡིན། གླིང་ཁའི་སྒོ་འཛུལ་མ་ཐག་མེ་ཏོག་གི་དྲི་ཞིམ་ལྷང་ལྷང་འཐུལ་བྱུང་བས་མེ་ཏོག་ལ་ལྟ་བར་ཐལ་སོང། མེ་ཏོག་ལ་བལྟ་དུས་གཡས་གཡོན་ལ་མི་མེད་པ་དང་སྟབས་བསྟུན་ནས་ངས་རྒྱ་སེ་མེ་ཏོག་དམར་པོ་རྐང་གཅིག་བཏོགས་པ་ཡིན། ཕུར་བུས་དེ་མཐོང་ནས་མི་དགའ་བའི་རྣམ་འགྱུར་སྟོན་བཞིན་ཁྱོད་རང་མེ་ཏོག་བཏོག་ནས་ཅི་ཞིག་བྱེད་རྩིས་ཡོད་དམ་ཅེས་དྲིས་བྱུང་བས། ངས་ང་དེར་ཧ་ཅང་དགའ་པོ་ཡོད། ཁྱོད་རང་ལའང་གཅིག་བཏོག་ཆོག་ཅེས་བཤད་པས། ཕུར་བུ་ཁོང་ཁྲོ་ཟ་ནས་འཐོག་མི་དགོས་ཞེས་བཤད་པ་དང་ཆབས་གཅིག་ངའི་ལག་པའི་མེ་ཏོག་དེའང་འཕྲོག་ནས་གླིང་ཁའི་ནང་གི་མེ་ཏོག་ནི་མི་ཚང་མས་བེད་སྤྱད་པའི་ཆེད་དུ་ཡིན། དེ་ནི་མི་མང་པོས་དཀའ་ལས་བརྒྱབ་ནས་བྱུང་བ་རེད། ཁྱོད་རང་གིས་གཏོར་བཤིག་དེ་འདྲ་བཏང་ན་འགྲིག་གམ་ཞེས་སྐྱོན་བརྗོད་བྱས་བྱུང་བས་ང་ནི་ག་ཤོད་འདི་ཤོད་མེད་པར་གྱུར།
ཡང་གཟའ་ཉི་མ་ཞིག་ལ་ངས་ཁྱིམ་དུ་དཔེ་དེབ་བལྟས་ནས་བསྡད་ཡོད། ཕུར་བུས་རྒྱ་སེ་དམར་པོའི་མེ་ཏོག་ཁོག་མ་ཞིག་འཁྱེར་ནས་ནང་དུ་བསླེབས་བྱུང། ཁོང་གིས་འཛུམ་དམུལ་དམུལ་ངང་མེ་ཏོག་འདི་ངས་བཏབ་པ་ཡིན་པས་ཁྱོད་ལ་སྟེར་ཆོག་ཟེར་གྱི་འདུག།
 
བྱ་ཚིག།
ཕྱིན། འཛུལ། འཐུལ། ལྟ། བཏོག། མཐོང་། སྟོན། དྲིས། བཤད། འཕྲོག བརྒྱབ། བཏང་། བྱས། གྱུར། བསྡད། འཁྱེར། བསླེབས། བཏབ། སྟེར།