ཚིག་ཕྲད།

ཚིག་ཕྲད།

དང་པོ། ཕྲད་གཞན་དབང་ཅན་རྣམ་དབྱེ་དང་བཅས་པ་བརྒྱད་བཤད་པ།
༡༽ སླར་བསྡུ།
རྩ་ཚིག
གོ་ངོ་དོ་ནོ་བོ་མོ་འོ། །
རོ་ལོ་སོ་ཏོ་སླར་བསྡུ་ཏེ། །
རྫོགས་ཚིག་ཟླ་སྡུད་ཅེས་ཀྱང་བྱ། །
དྲག་ཡོད་ཏོ་དང་མཐའ་མེད་འོ། །
གཞན་རྣམས་མིང་མཐའི་རྗེས་མཐུན་སྦྱར། །
གོ་དོན།
༡། སྐབས་བབ་ཀྱི་བརྗོད་བྱའི་དོན་དེ་ཙམ་གྱི་རེ་ཞིག་མཇུག་བསྡུ་བར་སྟོན་པའི་ཕྲད་ལ་སླར་བསྡུ་ཟེར།
༢། བཤད་རྒྱུའི་དོན་དེ་ཙམ་གྱིས་རྫོགས་པར་སྟོན་པས་རྫོགས་ཚིག་ཟེར།
༣། སྐབས་ཐོབ་ཀྱི་མིང་ཚིག་གང་ཡིན་གྱི་ཟླ་བོ་སྡུད་པར་སོང་བས་ཟླ་སྡུད་ཟེར།
སླར་བསྡུའི་རེའུ་མིག
སྒྲ་སྦྱོར།

༢༽ ལ་དོན།
རྩ་ཚིག
སུ་ར་རུ་དུ་ན་ལ་ཏུ། །
ལ་དོན་རྣམ་པ་བདུན་ཡིན་ཏེ། །
རྣམ་དབྱེ་གཉིས་བཞི་བདུན་པ་དང་། །
དེ་ཉིད་ཚེ་སྐབས་རྣམས་ལ་འཇུག །
ས་སུ་ག་བ་དྲག་མཐར་ཏུ། །
ང་ད་ན་མ་ར་ལ་དུ། །
འ་དང་མཐའ་མེད་ར་དང་རུ། །
གོ་དོན། སུ་ལ་སོགས་པའི་ཕྲད་བདུན་པོ་དེ་རྣམས་རྣམ་དབྱེར་སྦྱར་བས་བརྗོད་བྱའི་དོན་སྟོན་སྟངས་ཕལ་ཆེར་ལའི་སྒྲ་དང་མཐུན་པ་ན་ལ་དོན་ནམ་ལ་སྒྲ་ཟེར།
ལ་དོན་གྱི་སྒྲ་སྦྱོར་དང་དོན་སྦྱོར་གྱི་རེའུ་མིག

རྣམ་དབྱེ་གཉིས་པ་དང་བཞི་པའི་ཁྱད་པར།
རྣམ་དབྱེ་གཉིས་པ་ནི་བྱ་བའི་ཡུལ་ལ་བྱ་བ་བྱས་པ་ཙམ་སྟོན་པ་ཡིན་ལ། རྣམ་དབྱེ་བཞི་པའི་སྐབས་བྱ་བ་དེ་དགོས་པ་ཞིག་གི་ཆེད་དུ་ཡིན་པ་བསྟན་དགོས།
རྣམ་དབྱེ་གཉིས་པ་དང་དེ་ཉིད་ཀྱི་ཁྱད་པར།
རྣམ་དབྱེ་གཉིས་པའི་སྐབས་བྱ་བའི་ཡུལ་དང་བྱ་བ་གཉིས་སོ་སོར་བསྟན་རྒྱུ་ཡོད་ཀྱང་། དེ་ཉིད་སྐབས་དེ་གཉིས་སོ་སོར་འབྱེད་རྒྱུ་མེད།
རྣམ་དབྱེ་བདུན་པ་རྟེན་གནས་དང་ཚེ་སྐབས་ཀྱི་ཁྱད་པར།
རྣམ་དབྱེ་བདུན་པ་རྟེན་གནས་ནི་རྟེན་སའི་གཞི་ཡུལ་ལ་བརྟེན་པ་དང་། ཚེ་སྐབས་ནི་རྟེན་སའི་གཞི་དུས་ཚོད་ལ་བརྟེན་པ་ཡིན།
༣༽ ཨི་ལྡན།
རྩ་ཚིག
གི་ཀྱི་གྱི་འི་ཡི་ལྔ་པོ། །
རྣམ་དབྱེ་དྲུག་པ་འབྲེལ་སྒྲ་དང། །
དེ་རྣམས་ས་མཐའ་ཅན་ལྔ་ནི། །
རྣམ་དབྱེ་གསུམ་པ་བྱེད་སྒྲ་སྟེ། །
སྦྱོར་ཚུལ་ན་མ་ར་ལ་གྱི། །
ད་བ་ས་ཀྱི་ག་ང་གི། །
འ་དང་མཐའ་མེད་འི་དང་ཡི། །
གོ་དོན། ཨི་ལྡན་ཞེས་པ་ནི་ས་མཐའ་ཡོད་མེད་ལ་མ་ལྟོས་པར་གི་ཀྱི་གྱི་འི་ཡི་ལྔ་པོ་དེ་རྣམས་ལ་དབྱངས་ཨི་སྟེ་གི་གུ་ཞུགས་ཡོད་པས་ཨི་ལྡན་ཟེར།
༡། རྣམ་དབྱེ་གསུམ་པ་བྱེད་སྒྲ། (བྱེད་པ་པོས་ལས་ཀ་ཞིག་བྱེད་པ།)
བྱེད་སྒྲའི་སྒྲ་སྦྱོར་དང་དོན་སྦྱོར་གྱི་རེའུ་མིག

བྱེད་སྒྲ་མིན་པ་འཇུག་ཡུལ་གཞན།
༡། རྗེས་མཐུན་ལ་འཇུག་པ། མཐོ་གང་གིས་རིང་ལྟ་བུ།
༢། རྒྱུ་མཚན་སྟོན་པར་འཇུག་པ། ཉི་མ་ཤར་བས་མུན་པ་ཡལ། དུ་བ་མཐོང་བས་མེ་ཡོད་པར་ཤེས་ལྟ་བུ།
༣། ངང་ཚུལ་སྟོན་པར་འཇུག་པ། ངང་གིས་གྲུབ་ལྟ་བུ།
༤། སྒྲུབ་ཚུལ་གྱི་རྣམ་པ་སྟོན་པར་འཇུག་པ། རིམ་གྱིས་གྲུབ། ལྷུན་གྱིས་གྲུབ། རང་བཞིན་གྱིས་གྲུབ་ལྟ་བུ།
༥། མཐོང་ཚུལ་གྱི་རྣམ་པ་སྟོན་པར་འཇུག་པ། ཁྲ་ལམ་ལམ་གྱིས་མཐོང་ལྟ་བུ།
༦། མྱུར་ཚད་སྟོན་པ། ཡུད་ཀྱིས་སོང་། སྐད་ཅིག་གིས་སོང་ལྟ་བུ།
༧། ཁ་སྐོང་ལ་འཇུག་པ། ནམ་མཁའི་ལམ་ནས་ཆོ་འཕྲུལ་དུ་མ་ཡིས། ། ལྟ་བུ།
༨། སྐུལ་ཚིག་ལ་འཇུག་པ། ཁྲུས་གྱིས། ཚགས་གྱིས། གྲབས་གྱིས་ལྟ་བུ།
༩། ཁྱད་པར་སྟོན་པར་འཇུག་པ། ང་ལས་ཁྱེད་ལོ་གསུམ་གྱིས་རྒན་ལྟ་བུ།
༡༠། ཕྱི་ཚིག་འདྲེན་བྱེད་ཀྱི་ཕྲད་དུ་འཇུག་པ། ངས་བཤད་ཀྱིས་ཁྱོད་ཀྱིས་ཉོན་ལྟ་བུ།
༢། རྣམ་དབྱེ་དྲུག་པ་འབྲེལ་སྒྲ། (མིང་ཚིག་སྔ་ཕྱི་འབྲེལ་བ་ཙམ་སྟོན་པའི་སྒྲ།)
འབྲེལ་སྒྲའི་སྒྲ་སྦྱོར་དང་དོན་སྦྱོར་གྱི་རེའུ་མིག

འབྲེལ་སྒྲ་མིན་པ་འཇུག་ཡུལ་གཞན།
༡། ཁ་སྐོང་ལ་འཇུག་པ། དཔེར་ན། དཔལ་ལྡན་ས་ཡི་དབང་ཕྱུག་ཆེ་ལྟ་བུ།
༢། མི་མཐུན་པའི་ཚིག་རྒྱན་ལ་འཇུག་པ། དཔེར་ན།
འདི་ནི་བདེན་གྱི་གཞན་ནི་རྫུན་ནོ། །འདིར་མ་བྲིས་པ་ཡིན་གྱི་མ་ཤེས་པ་ག་ན་ཡིན་ལྟ་བུ།
༤༽ རྒྱན་སྡུད།
རྩ་ཚིག
ཀྱང་ཡང་འང་གསུམ་རྒྱན་སྡུད་དེ། །
ག་ད་བ་ས་དྲག་མཐར་ཀྱང་། །
ང་ན་མ་ར་ལ་མཐར་ཡང་། །
འ་དང་མཐའ་མེད་འང་དང་ཡང་། །
གོ་དོན། ཕྲད་ཀྱང་ཡང་འང་གསུམ་གྱིས་མཐུན་པ་དང་མི་མཐུན་པའི་ཚིག་རྒྱན་གཉིས་དང་སྡུད་པའི་དོན་སྟོན་པའོ། །
རྒྱན་སྡུད་ཀྱི་སྒྲ་སྦྱོར་དང་དོན་སྦྱོར་གྱི་རེའུ་མིག

འཇུག་ཚུལ་གཞན།
 ཀྱང་ཡང་འང་གསུམ་གྱི་འཇུག་ཚུལ།
༡། སྨོད་པའི་དོན་ལ་འཇུག་པ། རིག་གནས་བསླབ་ཀྱང་རྣམ་དབྱེ་ཚིག་ཕྲད་ཀྱི་ཁྱད་པར་མི་ཤེས་སོ། །
༢། དྲི་བ་ལ་འཇུག་པ། སྦྱིན་པ་བཏང་ན་ལོངས་སྤྱོད་འབྱུང་མོད་དེ་མ་བཏང་ནའང་ལོངས་སྤྱོད་ཨེ་འབྱུང་།
༣། དོགས་པ་ལ་འཇུག་པ། ཤུན་ལྤགས་ཅན་འདི་ཤིང་སྟག་པ་ཡིན། ཡང་ན་ཙན་དན་ཡིན།
༤། སྲིད་པ་ལ་འཇུག་པ། རབ་བྱུང་རྣམས་ཁྱིམ་ལ་འཁྲེན་པ་སྔར་མི་སྲིད་ཀྱང་དེང་དུས་སྲིད།
༥། ཕྱོགས་གཞན་སྟོན་པ་ལ་འཇུག་པ། ཡང་ན་འདི་ལྟར་བཤད་དུ་རུང་སྟེ། ལྟ་བུའོ། །
ཡང་སྒྲའི་འཇུག་ཚུལ།
༡། ཚེ་སྐབས་ལ་འཇུག་པ། ནམ་ཡང་དེ་ལས་ཉམས་མ་གྱུར།
༢། བསྐྱར་བ་ལ་འཇུག་པ། དབྱར་ཁ་གཟུགས་པོ་ཡང་ཡང་བཀྲུ་བ། ཁོང་གི་ནང་དུ་ཡང་ནས་ཡང་དུ་ཕྱིན་པ། ཡང་བསྐྱར་སློབ་སྦྱོང་བྱེད་པ་སོགས་ལྟ་བུ་ཡིན།
༣། བསྣན་པའི་དོན་དུ་འཇུག་པ། དལ་འབྱོར་ཚང་བའི་མིའི་ལུས་རྟེན་འདི་རྙེད་དཀའ་བ་ཡང་ཡིན། དོན་ཆེ་བ་ཡང་ཡིན། འཇིག་སླ་བ་ཡང་ཡིན།
༤། ངེས་བཟུང་ལ་འཇུག་པ། དགེ་སློང་འདི་ཡང་ཚུལ་ཁྲིམས་ཅན་ཡིིན།
༥༽ ལྷག་བཅས།
རྩ་ཚིག
ཏེ་དེ་སྟེ་གསུམ་ལྷག་བཅས་ཏེ། །
ན་ར་ལ་ས་དྲག་མཐར་ཏེ། །
ད་དེ་ག་ང་བ་མ་འ། །
མཐའ་མེད་རྣམས་ལ་ས་སྟེ་འཐོབ། །
གོ་དོན། ཕྲད་སྟེ་དེ་ཏེ་གསུམ་སྦྱར་ནས་བསྟན་བྱའི་དོན་གྱི་ལྷག་མ་ཡོད་པར་སྟོན་པ་ལ་ཟེར།
ལྷག་བཅས་ཀྱི་སྒྲ་སྦྱོར་དང་དོན་སྦྱོར་གྱི་རེའུ་མིག

༦༽ འབྱེད་སྡུད།
རྩ་ཚིག
གམ་ངམ་དམ་ནམ་བམ་མམ་འམ། །
རམ་ལམ་སམ་ཏམ་འབྱེད་སྡུད་ཏེ། །
སྦྱོར་ཚུལ་སླར་བསྡུའི་སྐབས་དང་མཚུངས། །
གོ་དོན། ཚིག་ཕྲད་གམ་སོགས་ཀྱིས་དབྱེ་གཞི་གཅིག་ལས་དབྱེ་བ་དུ་མ་སོ་སོར་འབྱེད་ཅིང་དེ་རྣམས་དབྱེ་གཞི་གཅིག་ཏུ་སྡུད་པའི་དོན་ཅན་ཞིག་ལ་ཟེར།
འབྱེད་སྡུད་ཀྱིས་སྒྲ་སྦྱོར་དང་དོན་སྦྱོར་གྱི་རེའུ་མིག

༧༽ འབྱུང་ཁུངས།
རྩ་ཚིག
ནས་ལས་འབྱུང་ཁུངས་དགར་སྡུད་དེ། །
འབྱུང་ཁུངས་དངོས་ལ་གང་སྦྱར་འཐུས། །
རིགས་མཐུན་དགར་ནས་མི་མཐུན་ལས། །
སྡུད་ལ་ནས་སྒྲ་ཁོ་ནས་འཇུག །
གོ་དོན། གང་ཞིག་གང་ལས་འབྱུང་བའི་ཁུངས་གཙོ་བོར་སྟོན་པའི་ནས་ལས་ཀྱི་ཕྲད་དང་ལྡན་པ་ལ་ཟེར།
འབྱུང་ཁུངས་ཀྱི་སྒྲ་སྦྱོར་དང་དོན་སྦྱོར།

འཇུག་ཚུལ་གཞན།
༡། ནས་སྒྲ་མཚམས་སྦྱོར་ལྷག་བཅས་ལ་འཇུག་པ། དཔེར་ན། སློབ་སྦྱོང་བྱས་ནས་མ་རབས་སྤོང་།
༢། ལས་སྒྲ་རྒྱུ་མཚན་ལ་འཇུག་པ། དཔེར་ན། ཆུ་སྐྱར་ལས་ཆུ་ཡོད་པར་ཤེས།
༨༽ འབོད་སྒྲ།
རྩ་ཚིག
ཀྱེ་དང་ཀྭ་ཡེ་འབོད་སྒྲ་སྟེ། །
ཕལ་ཆེལ་མིང་གི་ཐོག་མར་སྦྱོར། །
འབོད་སྒྲ། ཀྱེ་དང་ཀྭ་ཡེ། ཝ་ཡེ་གསུམ་རང་ལ་བལྟོས་ནས་ཡུལ་མཆོག་དམན་བར་གསུམ་འབོད་པ་ཞིག་ལ་འབོད་སྒྲ་ཟེར།
འབོད་སྒྲ་སྦྱོར་ཚུལ་གྱི་རེའུ་མིག

གཉིས་པ། ཕྲད་རང་དབང་ཅན་དྲུག་བཤད་པ།
༡༽ ནི་སྒྲ།
རྩ་ཚིག
ནི་ནི་དགར་དང་བརྣན་པའི་སྒྲ། །
གོ་དོན། ནི་ཞེས་པའི་ཕྲད་འདི་གང་ཞིག་གང་ལས་དགར་བ་དང་། དོན་གང་ཞིག་ལ་ནན་ཏན་ནམ་ངེས་ངེས་བྱེད་པ་བརྣན་པའི་དོན་ལའང་འཇུག་པའོ། །
ནི་སྒྲའི་དོན་སྦྱོར་གྱི་རེའུ་མིག

༢༽ དང་སྒྲ།
རྩ་ཚིག
དང་ནི་སྡུད་འབྱེད་རྒྱུ་མཚན་དང། །
ཚེ་སྐབས་གདམས་ངག་ལྔ་ལ་འཇུག །
གོ་དོན། དང་ཞེས་པའི་ཕྲད་འདི་མིང་ཚིག་གང་ཡང་རུང་བའི་བར་མཚམས་སུ་སྦྱར་བས་སྡུད་པ་དང། འབྱེད་པ། རྒྱུ་མཚན། ཚེ་སྐབས། གདམས་ངག་བཅས་ལྔ་སྟོན་པའི་དོན་ལ་འཇུག་པའོ། །

༣༽ དེ་སྒྲ།
རྩ་ཚིག
མིང་གི་ཐོག་མའི་དེ་སྒྲ་ནི། །
ཐ་སྙད་འདས་མ་ཐག་པ་དང་། །
རྣམ་གྲངས་གཞན་ཅན་གཉིས་ལ་འཇུག །
གོ་དོན། དེ་ཞེས་པའི་ཕྲད་འདི་མིང་གང་ཡང་རུང་བའི་ཐོག་མར་སྦྱར་བས་ཐ་སྙད་དབང་དུ་གསུམ་དང་། དངོས་པོའི་དབང་དུ་བཞི། དུས་ཀྱི་དབང་དུ་གཉིས་བཅས་དགུ་ལ་འཇུག་གོ། །

༤༽ གང་སྒྲ།
རྩ་ཚིག
ཅི་ཇི་སུ་གང་སྤྱི་སྒྲ་སྟེ། །
ཞིག་སྟེ་སླད་འདྲ་ཕྱིར་ལ་ཅི། །
སྙེད་སྲིད་ལྟར་བཞིན་སྐད་ལ་ཇི། །
སུ་ནི་གང་ཟག་གང་ཀུན་ལའོ། །
གོ་དོན། གང་ཞེས་པའི་ཕྲད་འདི་དོན་དེ་བྱེ་བྲག་དམིགས་སུ་མི་འཛིན་པ་སྤྱི་ལ་ཁྱབ་པའི་དོན་ཅན་ཞིག་ལ་ཟེར།

༥༽ བདག་སྒྲ།
རྩ་ཚིག
ན་རོ་ཡོད་མེད་པ་བ་མ། །
བདག་པོའི་སྒྲ་སྟེ་ག་ད་ན། །
བ་མ་ས་དང་དྲག་མཐར་པ། །
ང་འ་ར་ལ་མཐའ་མེད་ལ། །
བདག་སྒྲ་ཡར་གྱུར་བ་དང་ནི། །
ཆ་ལ་པ་ཉིད་སྦྱོར་བ་ལེགས། །
མིང་མཐའི་པ་བའང་ཕལ་ཆེར་འདྲ། །
གོ་དོན། པ་བ་མ་གསུམ་དང་དེ་དག་ལ་ན་རོ་སྦྱར་བ་པོ་བོ་མོ་གསུམ་ནི་སྔར་མིང་གི་ཆ་ཤས་སུ་མེད་པ་ཞིག་ལ་གསར་དུ་སྦྱར་ན་བདག་པོའམ་གང་ཟག་སྟོན་གྱི་ཡོད་པས་བདག་སྒྲ་ཞེས་བརྗོད་དོ། །

ཅན་ལྡན་མཁན་གསུམ་བདག་སྒྲ་ལ་འཇུག་པ།
༡། པོ་དང་མཁན་གྱི་སྦྱོར་ཚུལ། པོ་དང་མཁན་གཉིས་བྱ་བ་འབའ་ཞིག་གི་རྗེས་སུ་འཇུག་པ།

༣། ཅན་དང་ལྡན་གཉིས་ཀྱི་སྦྱོར་ཚུལ། ཅན་དང་ལྡན་གཉིས་རྫས་དང་ཡོན་ཏན། ཁྱད་ཆོས་སོགས་ཀྱི་ལྷན་དུ་འཇུག་ཅིང་ཡོད་པའི་དོན་ལ་འཇུག

བདག་སྒྲ་མ་ཡིན་པ།
མིང་མཐའི་པ་བ་མ་ཡིན་ཚད་བདག་སྒྲ་མ་ཡིན་ཏེ། རྒྱུ་མཚན་ནི་རྟག་པ་དང་། གྲོད་པ། གཅིན་པ། སྐམ་པོ། དགའ་བ། མཐོང་བ། བུང་བ། གཏན་འཁེལ་བ་སོགས་ནི་མིང་མཐའི་པ་བ་ཡིན་པ་ལས་བདག་སྒྲའི་པ་བ་མ་ཡིན་པས་སོ། །
༦༽ དགག་སྒྲ།
རྩ་ཚིག
མ་མི་མིན་མེད་དགག་སྒྲ་སྟེ། །
མ་མི་ཐོག་མ་མིན་མེད་མཇུག །
མ་ནི་བར་གྱི་གསལ་བྱེད་ལའང་། །
གོ་དོན། མ་མི་མིན་མེད་ཀྱི་ཕྲད་བཞི་པོ་དེ་མིང་ཚིག་གང་ཞིག་ལ་སྦྱར་རུང་སྦྱོར་ཡུལ་གྱི་དོན་དེ་མ་ཡིན་པའམ་མེད་པ། མིན་པ་སོགས་ཀྱི་དོན་སྟོན་གྱི་ཡོད་པས་དགག་སྒྲ་ཞེས་བརྗོད་དོ། །

དགག་སྒྲ་མ་ཡིན་པ།
མིང་གི་ཆ་ཤས་སུ་གྱུར་བའི་མ་ཡིག་དང་མི་ཡིག་གཉིས་ནི་ཐོག་མཐའ་བར་གསུམ་གང་དུ་ཡོད་ཀྱང་དགག་སྒྲ་མིན་པ་མཁྱེན་པར་མཛོད།
དཔེར་ན། མ་བྱན་དང་མ་མ་ལྟ་བུའི་མ་ཡིག་སྔོན་དུ་ཡོད་པ་དང་། བོད་ཀྱི་མི་རིགས་དང་མི་ལོ་ལྟ་བུའི་མི་ཡིག་སྔོན་དུ་ཡོད་པ་སོགས་ནི་དགག་སྒྲ་གཏན་ནས་མིན།
ཚིག་ཕྲད་ཞིང་སོགས།
རྩ་ཚིག
ཚིག་ཕྲད་ཞིང་སོགས་ང་ན་མ། །
འ་དང་ར་ལ་མཐའ་མེད་མཐར། །
ཞིང་ཞེས་ཞེ་འོ་ཞེ་ན་ཞིག །
ག་ད་བ་དང་ད་དྲག་མཐར། །
ཅིང་ཅེས་ཅེའོ་ཅེ་ན་ཅིག །
ས་མཐར་དམིགས་བསལ་ཞེས་མ་གཏོགས། །
ཤིང་ཤིག་ཤེའོ་ཤེ་ན་འཐོབ། །