བསྟན་འཛིན་དགྲ་འདུལ། དགུ་པ།
མེས་དབོན་གཙུག་ལག་དཔེ་སྟོན་སློབ་གྲྭ།
བོད་ཕྲུག་ང་ཚོས་བསམ་བློ་རྒྱ་ཆེ་ས་ནས་བཏང་ན་ད་ལྟ་ང་ཚོ་བཙན་བྱོལ་དུ་ཡོད་པ་རེད། བོད་རྒྱལ་ཁབ་དེ་རྒྱ་མིས་བཟུང་ཚར་བ་རེད། འོན་ཀྱང། ༸གོང་ས་མཆོག་གིས་སེམས་ཤུགས་ནམ་ཡང་མ་ཆགས་པར་གང་ཐུབ་ཅི་ཐུབ་ཀྱིས་རྒྱ་གར་ལུང་པར་སློབ་གྲྭ་དང་གཞིས་ཆགས། དགོན་པ། སྨན་ཁང་སོགས་གསར་འཛུགས་གནང་སྟེ། བོད་མི་ཡོངས་ལ་ཕན་པའི་བྱ་བ་ཧ་ཅང་མང་པོ་གནང་ཡོད། བྱས་ཙང་། ང་ཚོས་༸གོང་ས་མཆོག་གིས་བོད་ཕྲུག་ང་ཚོ་ལ་བཅངས་པའི་ཐུགས་རེ་རྣམས་ངེས་པར་དུ་སྒྲུབ་དགོས། དེ་རིང་ངས་༸གོང་ས་མཆོག་གི་ཐུགས་རེ་འགའ་ཤས་ཤིག་གི་སྐོར་ལ་འབྲི་རྒྱུ་ཡིན།
དང་པོ། ཤེས་ཡོན་དང་འཇོན་ཐང་སྐོར་བཤད་ན། ལུང་པའི་ནང་དུ་ཤེས་ཡོན་དང་འཇོན་ཐང་ཅན་གྱི་མི་ཞིག་མེད་ན་ལུང་པ་དེ་ཡར་རྒྱས་འགྲོ་རྒྱུའི་རེ་བ་མེད། གལ་སྲིད། ལུང་པ་དེའི་ནང་ཤེས་ཡོན་དང་འཇོན་ཐང་ཅན་གྱི་མི་ཤིག་ཡོད་པ་ཡིན་ན། ལུང་པ་དེ་ཉིན་རེ་ནས་ཉིན་རེ་ཡར་རྒྱས་འགྲོ་ཐུབ་པའི་རེ་བ་ཆེན་པོ་ཡོད། དེ་ནི་ངས་བརྒྱ་ཆ་བརྒྱ་ནས་བརྒྱ་བཤད་ཐུབ་པའི་བསམ་ཚུལ་ཞིག་རེད། ད་དུང་དེ་ནི་ངའི་བསམ་ཚུལ་གཅིག་པུ་མིན་པར་༸གོང་ས་མཆོག་གིས་ཀྱང་། “སོ་སོའི་ལུང་པ་འཛིན་སྐྱོང་བྱ་རྒྱུ་འདི་ཤེས་ཡོན་དང་འཇོན་ཐང་ལ་བརྟེན་ནས་བྱེད་དགོས་པ་ལས། ལྷག་བསམ་གཅིག་པུས་ལུང་པ་འཛིན་སྐྱོང་ཐུབ་པའི་ངེས་པ་མེད།” ཅེས་གསུངས་ཡོད། ཁོང་གི་ཐུགས་རེ་དེ་ལ་ངས་ཁས་ལེན་བྱེད་ཀྱི་ཡོད།
གཉིས་པ། ཆོས་ལུགས་སྐོར། བ་ཕྱུགས་ཚང་མའི་ཁ་མདོག་མི་འདྲ་བ་རེད། འོན་ཀྱང། བ་ཕྱུགས་ཚང་མའི་སྤྲད་པའི་འོ་མ་དེ་ནི་གཅིག་པ་རེད། དེ་ག་ནང་བཞིན་འཛམ་གླིང་ནང་དུ་ཆོས་ལུགས་ཧ་ཅང་མང་པོ་ཡོད། འོན་ཀྱང། ཆོས་ལུགས་ཚང་མས་དམིགས་ཡུལ་དེ་ནི་སེམས་པ་བཟང་པོ་བྱེད་རྒྱུ་དེ་རེད། བོད་ཕྲུག་ང་ཚོས་སོ་སོའི་ཆོས་ལུགས་གཅིག་པོར་བརྩི་བ་དང་། ཆོས་ལུགས་གཞན་རྣམས་ལ་སྣང་མེད་དང་མི་བརྩི་བ་བྱས་པ་ཡིན་ན། མི་ལེགས་པའི་བྱ་བ་ཞིག་རེད། དེ་ནི་༸གོང་ས་མཆོག་གིས་གསུངས་པ་ལྟར། “ང་ཚོ་ནང་པའི་ངོས་ནས་ཆོས་ལུགས་གཞན་དག་ཚང་མར་དོ་སྣང་དང་གུས་ཞབས་བྱ་རྒྱུ་གལ་ཆེན་པོ་ཡིན་ཞེས་ངོས་ནས་རྒྱུན་དུ་འབོད་སྐུལ་བྱེད་ཀྱི་ཡོད་ལ། ངོས་རང་ནས་ཀྱང་དེ་ལྟར་བྱེད་ཀྱི་ཡོད།” ཅེས་བཀའ་སྩལ་བ་བཞིན་ངས་ཀྱང་ཁོང་གི་ཐུགས་རེ་བཞིན་ཆོས་ལུགས་གཞན་ལ་གུས་ཞབས་བྱེད་ཀྱི་ཡོད།
གསུམ་པ། ཡ་རབས་བཟང་སྤྱོད། “ཀུ་ཤུ་མང་པོའི་ནང་ནས་ཀུ་ཤུ་གཅིག་རུལ་པ་ཡིན་ན། ག་ལེར་ཀུ་ཤུ་གཞན་རྣམས་ཀྱང་རུལ་གྱི་ཡོད།” ཅེས་རྒྱ་གར་གྱི་རྩོམ་འབྲི་མཁན་མཁས་པ་ཞིག་གིས་གསུངས་ཡོད། དེ་ལྟར་མི་མང་པོ་ཡོད་པའི་ནང་ནས་མི་གཅིག་སྡུག་ཅག་དང་། སེམས་གནག་ཅན་གྱི་མི་ཞིག་ཡིན་ན། ག་ལེར་མི་གཞན་རྣམས་ཀྱང་སེམས་གནག་ཅན་ཞིག་ཆགས་སྲིད། ༸གོང་ས་མཆོག་གིས་གསུངས་པ་ལྟར། “ཡ་རབས་སྤྱོད་བཟང་གི་མི་བརྒྱ་ཐམ་པ་ཡོད་ཀྱང་ཉུང་གྲགས་པ་རེད། སེམས་གནག་ཅན་གྱི་མི་གཅིག་ཡོད་ན་མང་གྲགས་པ་རེད།” ཅེས་གསུངས་ཡོད། གང་ལྟར། མདོར་བསྡུས་ནས་བཤད་ན། ༸གོང་ས་མཆོག་གིས་འཛམ་གླིང་ནང་དུ་ཡོད་པའི་མི་ཚང་མ་ཡ་རབས་བཟང་སྤྱོད་ལྡན་པའི་མི་ཞིག་བྱུང་ན་དགོངས་ཡོད། ཁོང་གིས་གསུངས་པ་དེ་ང་ཚོ་བོད་མི་གཅིག་པུ་མིན་པར་སྨྲ་ཤེས་དོན་གོ་བའི་མི་ཚང་མ་ལ་གསུངས་ཡོད། དམིགས་བསལ་གྱིས་ད་ལྟ་ཡོང་བཞིན་པའི་མ་འོངས་བོད་ཀྱི་སོན་རྩ་རྣམས་ལ་གསུངས་ཡོད། བྱས་ཙང་། བོད་ཕྲུག་ང་ཚོས་༸གོང་ས་མཆོག་གི་ཐུགས་རེ་རྣམས་ངེས་པར་དུ་སྒྲུབ་དགོས་པ་དང་། སློབ་ལ་འབད་བརྩོན་ཧུར་དག་བྱས་ཏེ། ནར་སོན་སྐབས་འཛམ་གླིང་ཡོངས་ལ་ཕན་ཐོགས་པའི་མི་ཞིག་ཆགས་དགོས། དེ་ནི་༸གོང་ས་མཆོག་གིས་བོད་ཕྲུག་རྣམས་ལ་བཅངས་པའི་ཐུགས་རེ་རེད། དེ་ནས་ང་ཚོས་གཟི་བརྗིད་ཆེན་པོས་བོད་རྒྱལ་ཁབ་དེ་རྒྱ་མིའི་ལག་ནས་ཚུར་ལེན་ཏེ་མྱུར་དུ་བོད་ལ་སྐྱིད་པའི་ཉི་མ་ཤར་ཐུབ་པ་བྱེད་དགོས། ཐུགས་རྗེ་ཆེ།
ད་བར་དཔྱད་མཆན་མེད།