བསྟན་འཛིན་ཆོས་བཟང་། འཛིན་གྲྭ་བརྒྱད་པ།
གུ་རུ་པུ་ར་སཾ་བྷོ་ཊ་སློབ་གྲྭ།
༄༅། །༸གོང་ས་མཆོག་གིས་ང་ཚོ་ལ་ལམ་སྟོན་ཧ་ཅང་མང་པོ་གནང་ཡོད། ༸གོང་ས་མཆོག་ནི་ང་ཚོ་བོད་པའི་དབུ་ཁྲིད་རེད། ༸གོང་ས་མཆོག་གིས་ནམ་རྒྱུན་དུ་བོད་ཕྲུག་ལ་བོད་ཀྱི་སྐད་ཡིག་སྦྱོངས་གསུང་གི་ཡོད། ང་ཚོ་བོད་པ་ཡིན་པར་བརྟེན་བོད་ཀྱི་སྐད་ཡིག་ཤེས་དགོས། གལ་སྲིད་བོད་པས་བོད་ཀྱི་སྐད་ཡིག་མ་ཤེས་པ་ཡིན་ན་ང་ཚོ་ངོ་ཚ་དགོས་ཀྱི་རེད། ༸གོང་ས་མཆོག་གིས་ང་ཚོ་བོད་ཕྲུག་ཚོ་ལ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་བྱས་ནས་ཉར་དགོས་གསུངས་ཀྱི་ཡོད། ད་ལྟ་བོད་པའི་ཕྲུ་གུ་ཆུང་ཆུང་དེ་ཚོ་ནི་མ་འོངས་བོད་ཀྱི་སོན་རྩ་རེད་གསུང་གི་ཡོད། དེ་འདྲ་སོང་ཙང་། བོད་ཕྲུག་དེ་ཚོ་བོད་ཀྱི་ཆོས་དང་རིག་གཞུང་ཡག་པོ་སྦྱོང་དགོས། བོད་ལ་ཡོད་པའི་བོད་ཕྲུག་ཚོ་བོད་ཀྱི་ཆོས་དང་རིག་གཞུང་སྦྱང་རྒྱུའི་འདོད་པ་ཡོད་ན་ཡང་གོ་སྐབས་མེད་པ་རེད། བཙན་བྱོལ་རང་དབང་ལུང་པར་ཡོད་པའི་བོད་ཕྲུག་ཚོར་བོད་ཀྱི་སྐད་ཡིག་དང་རིག་གཞུང་སྦྱང་རྒྱུའི་གོ་སྐབས་ཡོད་ཀྱང་དོ་སྣང་དེ་ཙམ་བྱེད་ཀྱི་མི་འདུག
༸གོང་ས་མཆོག་གིས་ལམ་སྟོན་གནང་བ་བཞིན། སོ་སོ་འགྲོ་བ་མི་ཡིན་པའི་ཆ་ནས་སེམས་པ་བཟང་པོ་བྱེད་དགོས། ཆོས་ལུགས་དང་རིག་གཞུང་སོགས་ཀྱི་སྒོ་ནས་གཞན་ལ་དབྱེ་བ་མ་བྱེད། ༸གོང་ས་མཆོག་གིས་སཱི་ཤོས་ཡོན་གྱི་སློབ་གསོ་ལམ་སྟོན་གནང་བ་དེ་དག་ང་ཚོ་བཙན་བྱོལ་སློབ་གྲྭ་ཁག་གི་ནང་སློབ་ཁྲིད་བྱེད་ཀྱི་ཡོད། ཆོས་ལ་ཡིད་ཆེས་མེད་ན་ཡང་སེམས་པ་བཟང་པོ་དང་། གཞན་ཕན་བྱེད་རྒྱུ་དེ་གལ་ཆེན་པོ་རེད། ༸གོང་ས་མཆོག་གིས་འཛམ་གླིང་ཞི་བདེ་ཡོང་ཐབས་ལ་བཀའ་སློབ་ལམ་སྟོན་མང་པོ་གནང་གི་ཡོད། ཆུང་ས་ཁྱིམ་ཚང་ནས་ཆེ་ས་རྒྱལ་ཁབ་བར་འཆམ་མཐུན་བྱེད་དགོས། སྲིད་བློན་མོ་ཏི་དང་། སྲིད་འཛིན་ཊོ་ནལ་ཊོམ་སུ་ཡིན་ན་ཡང་སྤྱི་ཚོགས་ལ་ཕན་མ་ཐོགས་པ་ཡིན་ན་ཆོ་མེད་རེད། དམག་བརྒྱག་རྒྱུ་དེ་ཕྱོགས་གཉིས་ཀར་ཕན་ཐོགས་མེད་པ་དང་ཉེན་ཁ་རེད། དམག་བརྒྱག་རྒྱུ་དེ་ཐབས་ལམ་མ་རེད། མཐུན་ལམ་ནི་ཞི་བདེའི་ཐབས་ལམ་རེད། ཞི་བདེ་ནི་རང་གཞན་ཀུན་ལ་གལ་ཆེན་པོ་རེད། དེ་འདྲ་སོང་ཙང་། ༸གོང་ས་མཆོག་གི་བཀའ་དགོངས་བཞིན་ཞི་བདེ་ཡོང་ཐབས་དེ་འབད་བརྩོན་དང་ལག་ལེན་བསྟར་དགོས། སོ་སོས་གཞན་ལ་ཕན་མ་ཐོགས་ན་ཡང་གནོད་མ་སྐྱེལ་གསུངས་ཡོད། ཞི་བདེ་ཡོང་བར་བཟོད་སྒོམ་བྱེད་དགོས། བཟོད་སྒོམ་བྱས་ན་ཞི་བདེ་ལྷིང་འཇགས་ཡོང་གི་རེད། ཞི་བདེ་ལྷིང་འཇགས་ཡོད་ན་སྤྱི་ཚོགས་ལ་ཕན་ཐོགས་ཡོད། བཟོད་སྒོམ་གྱིས་སོ་སོ་ལ་ཕན་ཐོགས་ཀྱི་རེད།
༸གོང་ས་མཆོག་གིས་ཁ་ཡི་ལྕེ་བདེ་བོ་མེད་བ་དེ་ཚོ་ཨོཾ་ཨ་ར་པ་ཙ་ན་དྷི་ཡང་ཡང་སྐྱོར་འདོན་བྱེད་དགོས་གསུངས་ཡོད། བྱམས་བརྩེ་དང་སྙིང་རྗེ་ལག་བསྟར་བྱས་ན་སོ་སོ་ལ་ཞི་བདེ་དང་བདེ་སྐྱིད་ཐོབ་ཀྱི་རེད། གཞན་ལ་རོགས་པ་བྱེད་དུས་སོ་སོ་ལ་ཁེ་བཟང་ཐོབ་ཀྱི་རེད་བསམས་ནས་རོགས་པ་བྱེད་རྒྱུ་ཡོད་མ་རེད། རྫུན་མ་མ་བཤད་དྲང་པོ་བྱོས། སོ་སོའི་ཁོང་ཁྲོ་ནི་སོ་སོའི་དགྲ་རེད། སོ་སོའི་ཁོང་ཁྲོ་ནི་སོ་སོའི་ཞན་ཆའི་རྟགས་རེད། སོ་སོ་ནམ་རྒྱུན་དུ་ཁོང་ཁྲོ་བྱས་ན་སོ་སོའི་སེམས་ཁམས་འཕྲོད་བསྟེན་ལ་ཡག་པོ་མེད། སོ་སོ་ལ་གྱོང་རགས་ཀྱི་རེད། ཁ་ནས་གཞན་ཕན་དང་སྙིང་རྗེ་གཅིག་པོ་ལབ་ན་ཕན་ཐོགས་མེད། སྙིང་རྗེ་ཡོད་ན་དངོས་སུ་གཞན་ལ་རོགས་པ་བྱེད་དགོས་གསུངས་ཡོད།
༸གོང་ས་མཆོག་མཆོག་གི་བཀའ་སློབ་ལམ་སྟོན་ལ་བོད་མི་མཚན་ཉིད་ཚང་བ་ཞིག་བྱེད་དགོས་གསུངས་ཡོད། ༸གོང་ས་མཆོག་བཙན་བྱོལ་ལ་འབྱོར་སྐབས། རྒྱ་གར་གྱི་སྲིད་བློན་ནེ་རུ་མཆོག་ལ་བོད་པའི་ཕྲུ་གུའི་ཆེད་དུ་བོད་པའི་སློབ་གྲྭ་ཟུར་དུ་དགོས་ཞེས་ཞུས་པ་བཞིན། བོད་ཕྲུག་ཚོ་ལ་བོད་པའི་སྐད་ཡིག་དང་རིག་གཞུང་སྦྱོང་སའི་སློབ་གྲྭ་བཙུགས་ཏེ་གོ་སྐབས་བཟང་པོ་ཞིག་གནང་ཡོད། དེ་ནས་རིམ་བཞིན་དགོན་པ་དང་སྨན་ཁང་། སློབ་གྲྭ། གཞིས་ཆགས་སོགས་འཛུགས་བསྐྲུན་མང་པོ་གནང་ཡོད། མི་ཚེ་ནང་གི་དུས་ཚོད་རྩ་ཆེ་ཤོས་དེ་ཤེས་ཡོན་སློབ་སྦྱོང་བྱེད་པའི་དུས་ཚོད་དེ་རེད། ༸གོང་ས་མཆོག་གིས་ས་སྟེང་མ་རབས་ཀྱིས་ཁེངས་ན་ཡང་རང་ཉིད་ཡ་རབས་བྱེད་དགོས་གསུངས་ཡོད། སོ་སོ་གྲོགས་པོ་ཡ་རབས་མཉམ་དུ་བསྡད་ན་སོ་སོ་ཡང་ཡ་རབས་ཆགས་ཀྱི་རེད། གལ་སྲིད་གྲོགས་པོ་སྡུག་ཆགས་མཉམ་དུ་བསྡད་ནས་སོ་སོ་ཡང་སྡུག་ཆགས་མ་ཆགས་པ་བྱེད་དགོས།
དེ་བཞིན་༸གོང་ས་མཆོག་གིས་སེམས་པ་བཟང་པོ་བྱེད་དགོས་གསུངས་ཡོད། སོ་སོས་འཛིན་གྲྭའི་ནང་གང་ཡག་པོ་ཤེས་པ་དེ་ཚོ་སེམས་པ་བཟང་པོས་གཞན་ལ་བསླབས་ན་གཞན་ལ་ཕན་པ་དང་སོ་སོ་ཡིན་ནའང་ཡག་པོ་ཤེས་ཀྱི་རེད། རྒྱུན་དུ་སྨོན་ལམ་དང་བསམ་བློ་གཏོང་བ་གཅིག་པོ་མ་བྱས་པར་ལག་ལེན་བསྟར་རྒྱུ་དེ་གལ་ཆེན་པོ་རེད། མི་ཚེའི་ནང་ལ་དཀའ་ངལ་ག་ཚོད་འཕྲད་ན་ཡང་གདོང་ལེན་བྱེད་དགོས། དེ་ནི་༸གོང་ས་མཆོག་གི་ལམ་སྟོན་རེད། ཁྱེད་རང་ཁོང་ཁྲོ་དང་ཞེ་སྡང་སོགས་ནས་བརྒལ་ན་དཔའ་བོ་ངོ་མ་རེད།
ད་བར་དཔྱད་མཆན་མེད།