སྤེན་པ་ཚེ་རིང་། བཅུ་གཉིས།
བོན་གཞིས་སཾ་བྷོ་ཊ་དྷོ་ལན་ཇི་ཉིན་སློབ།
འཛམ་གླིང་ཡོངས་ཀྱི་དབུ་ཁྲིད།།
ཞི་བདེའི་དེད་དཔོན་ཆེན་པོ།།
བོད་མི་ཡོངས་ཀྱི་སྐྱབས་མགོན།།
རྒྱལ་དབང་བསྟན་འཛིན་རྒྱ་མཚོ།།
དགུང་ལོ་བཅུ་དྲུག་ནས་བཟུང་།།
འདི་ལོ་དགུ་བཅུའི་བར་དུ།།
བོད་མིའི་རྩ་དོན་ཆེད་དུ།།
སྐུ་ལས་ཚད་མེད་བསྐྱོན་ཡོད།།
ཁོང་གིས་བོད་ཕྲུག་ང་ཚོ།།
ཤེས་ཡོན་ཕོངས་པར་གཟིགས་ནས།།
བཙན་བྱོལ་འབྱོར་མ་ཐག་ཏུ།།
སློབ་གྲྭ་གསར་འཛུགས་གནང་ཡོད།།
བོད་ཕྲུག་ད་ཕྲུག་མང་པོ།།
མ་རིག་མུན་པའི་ཁྲོད་ནས།།
ཤེས་རབ་སྒྲོན་མེ་བཞིན་དུ།།
ཤེས་རིག་འོད་སྣང་བསྐྲུན་ཡོད།།
བོད་ཕྲུག་ང་རང་ལྟ་བུ།།
དབུ་ཁྲིད་ཁོང་གི་འོག་ནས།།
ཤེས་ཡོན་གོ་སྐབས་ཐོབ་པ།།
ཚེ་འདི་སྐལ་བ་བཟང་སོང་།།
༸གོང་ས་ཐམས་ཅད་མཁྱེན་པའི།།
ཐུགས་བསྐྱེད་དམ་བཅའ་བཞི་པོ།།
བོད་ཕྲུག་ན་ཆུང་ང་ཚོས།།
ཤེས་ཡོན་ལམ་ནས་བསྒྲུབ་ཆོག།
བཅས་སེམས་ཚོར་གྱི་ཡིག་འབྲུ་རྣམས་གུས་ཕྱག་དང་བཅས་སྔོན་དུ་ཕུལ་ཏེ། ༸གོང་ས་མཆོག་འདི་ལོ་དགུང་གྲངས་ ༩༠ ཕེབས་པར་སྒོ་གསུམ་གུས་པ་ཆེན་པོའི་འཚམས་འདྲི་གྲངས་མེད་ཞུ་བ་མ་ཟད། ཁོང་གིས་བོད་ཕྲུག་ང་ཚོ་ལ་བཅངས་པའི་ཐུགས་རེ། ཞེས་པའི་བརྗོད་གཞི་ཐོག་རང་ཉིད་ཀྱི་བསམ་པ་དང་ནུས་པ་གང་འོས་ཀྱིས་འབྲི་རྩོམ་གོ་བདེ་ཞིག་འབྲི་བར་འབད་བརྩོན་བྱ་རྒྱུ་ཡིན། ༸གོང་ས་མཆོག་ནི་དུས་དང་རྣམ་པ་ཀུན་ཏུ་བོད་མི་ཙམ་མིན་པར་འགྲོ་བ་སེམས་ཅན་ཀུན་གྱི་བདེ་སྐྱིད་ཀྱི་དོན་དུ་བསམ་པ་རྒྱ་ཆེན་པོ་བཞེས་མཁན་གྱི་སྐྱེ་བོ་ཁྱད་དུ་འཕགས་པ་ཞིག་ཡིན་པ་ཚང་མས་གཡོ་བ་མེད་པར་ངོས་འཛིན་བྱེད་ཀྱི་ཡོད།
ཁོང་གིས་དགུང་ལོ་བཅུ་དྲུག་ནས་བོད་རྒྱལ་ཁབ་ཀྱི་ཆབ་སྲིད་ཀྱི་ཐུགས་འགན་བཞེས་ཏེ། འདི་ལོ་དགུང་ལོ་དགུ་བཅུ་བར་བཙན་བྱོལ་ནང་བོད་མིའི་རྩ་དོན་དང་འགྲོ་བ་མིའི་བཟང་སྤྱོད། ཆོས་ལུགས་མཐུན་འབྲེལ། ཁོར་ཡུག་སྲུང་སྐྱོབ་སོགས་ཀྱི་ཐོག་ལ་མཛད་པ་ཧ་ལས་པ་མང་པོ་བསྐྱངས་གནང་ཡོད། ཕྱི་ལོ་ ༡༩༥༩ ལོར་རྒྱ་གར་དུ་འབྱོར་རྗེས། ཁོང་གིས་བོད་མིའི་མངོན་འདོད་གྲུབ་ཆེད་མཛད་པ་མང་པོའི་ནང་ནས་ཐོག་མ་ནི། བོད་ཕྲུག་ཚོར་སྲོལ་རྒྱུན་ཙམ་མིན་པར་དེང་དུས་ཀྱི་ཤེས་ཡོན་ཀྱང་དགོས་མཁོ་ཆེན་པོ་ཡིན་པ་གཟིགས་ཏེ་མ་སུ་རིའི་སློབ་གྲྭ་ཐོག་མ་གསར་འཛུགས་གནང་ཡོད། དེ་ནས། རིམ་བཞིན་བོད་ཕྲུག་མང་པོ་ཞིག་ལ་ཤེས་ཡོན་གྱི་གོ་སྐབས་མ་ཟད། འཛམ་གླིང་ནང་བོད་ཀྱི་གནད་དོན་སྐོར་དོ་སྣང་དང་བོད་ཀྱི་རྩ་དོན་གལ་ཆེན་ཡིན་པའི་བསམ་བློ་དེ་ཤུགས་ཆེ་རུ་ཕྱིན་ཡོད། བོད་ཕྲུག་ཞིག་ཡིན་པའི་ཆ་ནས་བཤད་ན། ཁོང་ནི་ད་ལྟའི་འཆར་དགུང་གྲངས་ ༩༠ ཕེབས་ཡོད་པས་སྐུ་ན་ཤིན་ཏུ་མཐོ་ལ། བོད་ཀྱི་རྩ་དོན་ནི་ད་དུང་མུ་མཐུད་ནས་གནས་དགོས་ཀྱི་ཡོད་པས། ང་ཚོ་བོད་ཕྲུག་ན་ཆུང་ཡོངས་ནས་ཁོང་གིས་ང་ཚོར་བཅངས་པའི་ཐུགས་རེ་ཇི་ཡོད་པ་དེ་དག་ངེས་པར་དུ་བསྒྲུབ་ཐུབ་པ་བྱ་རྒྱུའི་དམ་བཅའ་བརྟན་པོ་འཇོག་པའི་དུས་ལ་སླེབས་ཟིན་པས། ཚང་མས་ཤུགས་རྒྱག་དགོས། ནུས་པ་མཉམ་དུ་སྤུང་དགོས། རྡོག་རྩ་ཅིག་སྒྲིལ་གྱིས་གྲུབ་འབྲས་ཐོན་པ་བྱེད་དགོས།
༸གོང་ས་མཆོག་གིས་བོད་ཕྲུག་ང་ཚོར་བཅངས་པའི་ཐུགས་རེ་བ་མང་པོའི་ནང་ནས་ཐོག་མ་དེ། ཤེས་ཡོན་དང་ལྷག་བསམ་ལྡན་པའི་བོད་ཕྲུག་ཚད་ལྡན་ཞིག་ཡོང་རྒྱུར་དུས་རྟག་ཏུ་ཐུགས་ལ་དགོངས་ཀྱི་ཡོད། གང་ཡིན་ཟེར་ན། བོད་ཀྱི་རྩ་དོན་བསྒྲུབ་དགོས་ན་བོད་མི་ཤེས་ཡོན་ཅན་ངེས་པར་དུ་དགོས་པ་དང་ཤེས་ཡོན་གྱི་ཕོངས་པའི་མི་རིགས་ལ་རང་ཉིད་ཀྱི་རྒྱལ་ཁབ་ཡར་རྒྱས་མ་ཟད། ཆོས་དང་རིག་གཞུང་། སྐད་ཡིག་རྒྱུན་འཛིན་སྤེལ་གསུམ་ལེགས་པོ་ཡོང་མི་ཐུབ་པས་བོད་ཕྲུག་ང་ཚོ་ཤེས་ཡོན་ཚད་ལྡན་ཞིག་ཏུ་ཡོང་ཐབས་ནི་༸གོང་ས་མཆོག་གི་བོད་ཕྲུག་ལ་བཅངས་པའི་ཐུགས་རེ་ཐོག་མ་དེ་ཡིན་པས། ང་ཚོས་དུས་རྟག་ཏུ་ཁོང་གི་བཀའ་དྲིན་སེམས་ལ་བཅངས་ཏེ་ཤེས་ཡོན་དང་ལྷག་བསམ་ལྡན་པའི་བོད་ཕྲུག་བཟང་པོ་ཞིག་བྱེད་དགོས།
གཉིས་པ་ནི། བོད་ཀྱི་རྩ་དོན་ཆེད་དུ་རང་ཉིད་ཀྱི་ནུས་པ་གཟེངས་སུ་སྟོན་ཐུབ་མཁན་ཞིག་ཡོང་ན་ཐུགས་ལ་དགོངས་ཀྱི་ཡོད། གང་ཡིན་ཟེར་ན། ཤེས་ཡོན་ཡོད་པ་ཙམ་གྱི་མི་འགྲིག་པར། ང་ཚོ་ནི་ཆབ་སྲིད་ཀྱི་བཙན་བྱོལ་བ་ཞིག་ཡིན་པས་བོད་ཀྱི་རྩ་དོན་ཆེད་དུ་རང་ཉིད་ཀྱི་ནུས་པ་གང་ཡོད་སྤུངས་ཏེ་བོད་ཕྱི་ནང་གཉིས་ཀྱི་རེ་བ་སྐོང་ཐུབ་ན། ༸གོང་ས་མཆོག་གི་བོད་ཕྲུག་ལ་བཅངས་པའི་ཐུགས་རེ་གཉིས་པ་དེ་བསྒྲུབས་པ་དང་ཁྱད་མེད་ཡིན་པ་བསམ་གྱི་ཡོད།
དེ་ན་བོད་ཕྲུག་ང་ཚོས་ཤེས་ཡོན་དེ་ལག་ཆ་ལྟ་བུར་བེད་སྤྱོད་བྱས་ནས་བོད་ཀྱི་རྩ་དོན་བསྒྲུབ་ཐུབ་པ་ཞིག་ཡོང་ཐབས་སུ་ཤུགས་རྒྱག་དགོས་པ་དེ་གལ་ཆེན་པོ་ཡིན། རང་ཉིད་ཀྱི་རྒྱལ་ཁབ་མེད་པ་གཞན་ཡུལ་དུ་སྡོད་དགོས་ན། མི་ཚེ་ལས་སླ་པོ་ཞིག་མེད་པས་ང་ཚོས་ངེས་པར་དུ་བསམ་བློ་གཏོང་དགོས།
༸གོང་ས་མཆོག་གིས་བོད་ཕྲུག་ལ་བཅངས་པའི་ཐུགས་རེ་གསུམ་པ་ནི། བྱམས་སྙིང་རྗེ་ལྡན་པའི་བོད་ཕྲུག་ཞིག་ཡོང་རྒྱུ་དང་དེའི་བརྒྱུད་ནས་སྤྱི་ཚོགས་ལ་ཕན་པའི་མི་བཟང་པོ་ཞིག་ཡོང་རྒྱུར་ཐུགས་ལ་དགོངས་ཀྱི་ཡོད། གང་ཡིན་ཟེར་ན། ༸གོང་ས་མཆོག་གིས་དུས་རྟག་ཏུ་གསུངས་པ་ལྟར། བྱམས་སྙིང་རྗེ་དང་བཟང་སྤྱོད་བྲལ་བའི་མི་ཞིག་གིས་སྤྱི་ཚོགས་དང་མི་རིགས་ལ་ཕན་པའི་བྱ་བ་ཞིག་སྒྲུབ་ཐུབ་རྒྱུ་ཁག་པོ་ཡིན་པས། ང་ཚོ་བོད་ཕྲུག་ཡོངས་ཀྱིས་ཁོང་གི་དགོངས་པ་བཞིན་གཞན་ཕན་གྱི་བསམ་པ་ལྡན་པ་ཞིག་ཡོང་ཐབས་ལ་འབད་བརྩོན་བྱེད་དགོས།
༸གོང་ས་མཆོག་གི་བོད་ཕྲུག་ལ་བཅངས་པའི་ཐུགས་རེ་བཞི་པ་ནི། རང་མི་རིགས་ཀྱི་སྐད་ཡིག་དང་རིག་གཞུང་ལ་དོ་སྣང་དང་རྒྱུན་འཛིན་གནང་མཁན་ཞིག་ཡོང་རྒྱུར་ཐུགས་ལ་དགོངས་ཀྱི་ཡོད། གང་ཡིན་ཟེར་ན། སྐད་ཡིག་དང་རིག་གཞུང་ཉམས་སོང་ན། རྒྱལ་ཁབ་ཡོད་ཀྱང་རང་ཉིད་ཀྱི་ངོ་བོ་རྩ་བརླག་ཏུ་འགྲོ་ཉེན་ཆེ་བ་སོང་། སོ་སོའི་ཆོས་དང་རིག་གཞུང་། སྐད་ཡིག་ལ་དོ་སྣང་དང་བདག་གཅེས་བྱེད་རྒྱུ་ཤིན་ཏུ་གལ་ཆེ། དེ་འདྲ་སོང་ཙང་། ང་ཚོ་བོད་ཕྲུག་ཚང་མས་དེང་དུས་ཀྱི་ཤེས་ཡོན་དང་མཉམ་དུ་སོ་སོའི་རྒྱལ་ཁབ་ཀྱི་སྐད་ཡིག་དང་རིག་གཞུང་ལ་དུས་ནས་དུས་སུ་སྦྱོང་ཐབས་ངེས་པར་གནང་དགོས་པ་གལ་ཆེ། ང་ཚོ་བོད་ཕྲུག་ཙམ་མིན་པར་བོད་མི་རྒན་གཞོན་བར་གསུམ་མ་ཟད། ༸གོང་ས་མཆོག་ལ་སྙིང་ནས་དད་གུས་ཡོད་མཁན་གྱི་མི་སུ་འདྲ་ཞིག་ཡིན་ཡང་། ཚང་མས་ཁོང་གི་ཐུགས་བསྐྱེད་དམ་བཅའ་བཞི་པོ་གང་ཡིན་པ་ངོས་འཛིན་ཐུབ་པ་ཞིག་དང་། རང་ཉིད་སྒེར་སོ་སོའི་ངོས་ནས་ཁོང་གི་༸སྐུ་ཚེའི་དམ་བཅའ་བཞི་པོ་རེ་རེ་ལ་བསམ་བློ་བཏང་སྟེ། དེ་དག་སྒྲུབ་ཐུབ་པ་ལ་ཁོང་གིས་དུས་རྒྱུན་དུ་བཀའ་སློབ་ལམ་སྟོན་གང་ཕེབས་པ་རྣམས་སེམས་ལ་བཞག་ནས་ལག་བསྟར་བྱེད་ཐུབ་པ་དགོས། ༸གོང་ས་མཆོག་སྐུ་ཚེ་ཡུན་རིང་བརྟན་པར་ཤོག བོད་རྒྱལ་ལོ།།
ད་བར་དཔྱད་མཆན་མེད།