བསྟན་འཛིན་བདེ་ཆེན། བཅུ་གཉིས།
མོན་གྷོ་སཾ་བྷོ་ཊ་གཏན་ཉིན་སློབ་གྲྭ།
སྤྱི་ནོར་༸གོང་ས་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་ནི། ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་བོད་མདོ་སྨད་ཁུལ་གྱི་གྲོང་གསེབ་ཆུང་ཆུང་ལྟག་འཚེར་ཞེས་པའི་ཡུལ་དུ་སྐུ་འཁྲུངས་ཤིང་། ཁོང་ལོ་གཉིས་ལ་ཕེབས་སྐབས་༸གོང་ས་སྐུ་ཕྲེང་བཅུ་གསུམ་པ་ཆེན་པོའི་ཡང་སྲིད་དུ་ངོས་འཛིན་གནང་། དགུང་ལོ་ ༡༦ ཙམ་ལ་ཕེབས་སྐབས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་ནས་བོད་ཡོངས་རྫོགས་འཛིན་སྐྱོང་གནང་བ་རེད། ཟླ་གཅིག་ལོ་གཅིག་སོང་བའི་དུས་ན་རྒྱ་དམར་གཞུང་གིས་བོད་ལ་བཙན་དབང་དྲག་པོས་བོད་ཁ་བ་ཅན་གྱི་ཡུལ་དེ་བཙན་འཕྲོག་བྱས་པ་རེད། ཕྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་གཞུང་ལ་ཤོར་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ཡུལ་དུ་བཙན་བྱོལ་དུ་ཕེབས་གནང་མཛད་ནས་ད་ལྟ་བར་རྒྱ་གར་རྡ་རམ་ས་ལར་བཞུགས་ནས་ཡོད།
ཁོང་རྒྱ་གར་བཙན་བྱོལ་དུ་ཕེབས་ནས་རྒྱ་གར་འཕགས་པའི་ཡུལ་དུ་བོད་མི་རིགས་ཀྱི་སོན་རྩ་རྣམས་ཀྱི་ཆེད་དུ་ས་གནས་མང་པོར་བོད་པའི་སློབ་གྲྭ་དང་བོད་མི་མང་ཆེད་དུ་གཞིས་ཆགས་སོགས་གསར་འཛུགས་གནང་ཐུབ། དེའི་རྐྱེན་གྱིས་ད་ལྟ་བར་དུ་ང་ཚོ་སེམས་པ་ལྷོད་པོ་དང་སྐྱིད་པོའི་ངང་ནང་མི་གཅིག་གི་ལྷན་དུ་ཁང་པ་ཐོག་བརྩེགས་གཅིག་ནང་དུ་བསྡད་རྒྱུ་བྱུང་བ་དེ་ཧ་ཅང་གི་སྐལ་བ་བཟང་པོ་ཡིན་བསམ་གྱི་འདུག།
༸གོང་ས་རྒྱལ་བ་རིན་པོ་ཆེ་ཁོང་བྱམས་སྙིང་རྗེ་དང་བརྩེ་བ་ལྡན་་པའི་གང་ཟག་ཞིག་ཡིན་སྟབས། བོད་པའི་བོད་ཕྲུག་རྣམས་ལ་ཡང་དེའི་གཤིས་ཀ་དེ་འཇགས་ཐུབ་ན་སྙམ་པའི་ཐུགས་རེ་ཆེན་པོ་དང་། ཆབས་ཅིག་མ་འོངས་བོད་ཀྱི་སོན་རྩ་རྣམས་ཀྱིས་བོད་ཀྱི་སྐད་ཡིག་དང་རིག་གཞུང་བདག་གཅེས་ཐུབ་ན་དགོངས་ནས་རྒྱུན་དུ་བཀའ་སློབ་ལམ་སྟོན་གནང་གི་ཡོད་པ་དང་། དེའི་ཆེད་དུ་ཁོང་སྐུ་ཉིད་ནས་ཉིན་མཚན་ལྟོས་མེད་དུ་སྐུ་ལས་བསྐྱོན་གནང་མཛད་དང་མཛད་བཞིན་ཡོད།
བོད་པའི་བོད་ཕྲུག་རྣམས་ཕན་ཚུན་གཅིག་ཕན་གཅིག་གྲོགས་དང་མཐུན་པོ་དགོས་པ་མ་ཟད། ཆོལ་ཁ་གསུམ་ཡོད་པ་ཆ་ཚང་ལྡོག་རྩ་གཅིག་སྒྲིལ་ལམ་ནས་རྒྱལ་ཁབ་གཞན་གྱི་མི་རིགས་ལྷན་དུ་དམག་འཁྲུག་གམ་མི་གཅིག་ལ་ཡང་གནོད་པ་མ་སྐྱེལ་བར་ཕན་ཚུན་སྤུན་མཆེད་ལྟར་འཆམ་པོ་བྱེད་དགོས།
ཁོང་གི་གསུངས་པ་བཞིན། གལ་ཏེ་ཁྱེད་རང་མི་གཞན་ལ་ཕན་ཐོགས་པའི་བྱ་བ་བྱེད་མ་ཐུབ་ནའང་། ནམ་ཡང་གནོད་པའི་བྱ་བ་རྩ་བ་ནས་བྱེད་མིང་རུང་། དེང་དུས་བོད་པའི་སྤྱི་ཚོགས་ནང་དུ་ཡང་དར་སྲོལ་ལྟར་སོ་སོ་བོད་པའི་གཞིས་ཆགས་ནང་འཚར་ལོངས་བྱུང་ཞིང་། བོད་པའི་སྤྱི་ཚོགས་དང་སློབ་གྲྭ་ཁག་ནས་སྦྱངས་པའི་ལེགས་བྱ་དང་རིག་གཞུང་། སྐད་ཡིག་སོགས་ཚང་མ་ཤེས་ཀྱི་ཡོད་ཀྱང་། ཕྱིའི་རྒྱལ་ཁབ་ནང་དུ་མི་ཡི་གཡོག་པོ་བྱེད་པར་སོང་སྟེ་སོ་སོའི་སྐད་མ་བཤད་པར་ཡུལ་ལུང་གཞན་གྱི་སྐད་ཡིག་སྦྱངས་ནས་ཨིན་སྐད་སོགས་ལ་དང་འདོད་བྱས་ནས་བོད་མི་འདུ་འཛོམས་སོགས་ལ་ཡང་མི་རིགས་གཞན་གྱི་སྐད་ཡིག་སྤྱོད་ཀྱི་ཡོད་པ་དེ་ཐབས་སྐྱོ་པོ་རེད། དེ་བཞིན་དེང་དུས་བོད་མི་མང་པོས་རང་གི་རིག་གཞུང་བཟང་པོ་དོར་ནས། ཕྱིའི་མི་རིགས་ཀྱི་ལུགས་སྲོལ་དེང་དུས་ཡིན་ཟེར་ནས་དེ་དག་ལ་ཧེབ་ལངས་པའམ་དང་འདོད་ལྟ་བུས་ལད་ཟློས་བྱེད་ཀྱི་ཡོད། དེར་བརྟེན། སོ་སོའི་མི་རིགས་ཀྱི་སྐད་ཡིག་དེ་ལྟར་ཉམས་བཞིན་པ་དང་བརླག་བཞིན་པ་ཤེས་པའི་ཐོག་ནས་དེ་དག་བསྐྱར་གསོ་བྱེད་རྒྱུའི་འོས་འགན་ནི་ང་ཚོ་བོད་ཕྲུག་ཚང་མའི་མགོ་ལ་བབས་ཡོད། ཁོང་གིས་ང་ཚོ་ལ་རིན་གོང་ཆེ་བའི་ཅ་ལག་སོགས་འབུལ་རྒྱུའི་ཐུགས་རེ་མི་གནང་བར། ཡ་རབས་བཟང་སྤྱོད་ཀྱི་གོ་ལ་ཧྲིལ་པོར་མིག་དཔེ་སྟོན་མཁན་ཞིག་གྱུར་ན་དགོངས་ཀྱི་ཡོད། ང་ཚོས་སེམས་ནང་བྱང་ཆུབ་སེམས་སྒོམ་ཐུབ་པ་ཙམ་གྱི་ཁྱད་པར་ཆེན་པོ་འགྱུར་གྱི་ཡོད་དུས། རྒྱུན་དུ་ང་ཚོ་བོད་ཕྲུག་རྣམས་མ་རབས་མ་བྱས་ནས་ཡ་རབས་ངང་འགྲོ་དྲུག་སེམས་ཅན་ཐམས་ཅད་ལ་ཕན་ཐོགས་པའི་མི་ཞིག་ཆགས་ཐུབ་པ་བྱེད་དགོས། ༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་དེ་སེམས་ལ་བཅངས་ནས། དེ་དག་བསྒྲུབ་རྒྱུར་གང་མང་འབད་བརྩོན་བྱེད་དགོས། ཁོང་གི་ཐུགས་བསྐྱེད་དམ་བཅའ་བཞི་དང་མཐུན་པར་ང་ཚོ་བོད་ཕྲུག་ཚོས་གཤམ་གསལ་ལྟར་བྱེད་དགོས།
༡། བྱམས་བརྩེའི་ནུས་སྟོབས་གོང་སྤེལ་མཛད་པ། ང་ཚོ་བོད་ཕྲུག་རྣམས་ནང་པ་ཡིན་པ་དང་སོ་སོའི་རྒྱུད་ལ་བྱམས་དང་སྙིང་རྗེ་ལྡན་ཡོད་པས་ནུས་སྟོབས་ཆེན་པོ་གོང་སྤེལ་གཏོང་ཐུབ་ངེས་ཡིན།
༢། ཆོས་ལུགས་མཐུན་སྒྲིལ་དང་གོང་འཕེལ་མཛད་པ། ང་ཚོ་བོད་ཆོལ་ཁ་གསུམ་ཕན་ཚུན་མཐུན་སྒྲིལ་དང་ལྡོག་རྩ་གཅིག་སྒྲིལ་བྱེད་དགོས་པ་ངེས་པར་ཤེས་དགོས།
༣། བོད་ཀྱི་ཆོས་དང་རིག་གཞུང་སྲུང་སྐྱོབ་དང་གོང་སྤེལ་མཛད་པ། གནའ་སྔ་མོར་བོད་ནང་དུ་དར་བའི་རིག་གཞུང་རྣམས་ད་ལྟའི་དུས་ལ་ཉམས་ཆགས་འགྲོ་གི་ཡོད་པས། ང་ཚོ་བོད་ཀྱི་སོན་རྩ་རྣམས་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་དགོས་པ་མ་ཟད། དར་སྤེལ་ཡང་གཏོང་དགོས།
༤། དཔལ་ན་ལེནྡྲ་ནས་བརྒྱུད་པའི་རྒྱ་གར་གྱི་གནའ་བོའི་རིག་གཞུང་བསྐྱར་གསོ་མཛད་པའི་སྐོར། གནའ་དུས་སུ་རྒྱ་གར་མཁས་པ་མང་པོ་བོད་ནང་དུ་ཕེབས་ནས་བོད་ཀྱི་དྲིན་ཆེན་ལོ་ཙཱ་བ་རྣམས་དང་ལྷན་དཔལ་ན་ལེནྡྲ་ནས་བརྒྱུད་པའི་རིག་གཞུང་བོད་དུ་དར་བར་མཛད་པ། དེ་ཉིད་རྒྱ་གར་གྱི་གནའ་བོའི་རིག་གཞུང་ཡིན་གཤིས། ང་ཚོས་དེ་དག་ལེགས་པར་སྦྱངས་ནས་རྒྱ་གར་གཙོ་བོར་འགྱུར་པའི་འཛམ་གླིང་ཡོངས་ལ་དར་ཁྱབ་ཐུབ་པ་བྱེད་དགོས།
ན་ཆུང་བོད་པའི་སོན་རྩ་ང་ཚོ་ཁོང་གི་ཐུགས་བསྐྱེད་དམ་བཅའ་བཞི་དེ་དག་ལེགས་པོའི་ངང་བསྒྲུབ་མི་ཐུབ་ནའང་། ཐབས་ཤེས་དང་སོ་སོའི་ངོས་ནས་ཉིན་ལྟར་བོད་ཆས་སྤུས་ལེགས་གྱོན་པ་དང་། ནམ་བཞག་རྒྱུན་དུ་ཕན་ཚུན་བཀའ་མོལ་ཡང་ན་བགྲོ་གླེང་བྱེད་པའི་སྐབས་བོད་སྐད་གཙང་མ་རྒྱག་ཐུབ་པའི་འབད་བརྩོན་དང་ཧུར་བརྩོན་བྱེད་དགོས་པ་དེ་སེམས་ལ་གཞག་དགོས་།
མཐའ་དོན། སྤྱི་ནོར་༸གོང་ས་ཆེན་པོ་བསྟན་འཛིན་རྒྱ་མཚོ་མཆོག་དགུང་ལོ་དགུ་བཅུར་ཕེབས་པའི་གོ་སྟོན་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། ཁོང་སྐུ་ཚེ་ཞབས་པད་སྐལ་བརྒྱའི་བར་དུ་བརྟན་པའི་སྨོན་འདུན་ཞུའོ།།
ད་བར་དཔྱད་མཆན་མེད།