བསྟན་འཛིན་དབང་མོ།
དཔེ་སྟོན་སློབ་གྲྭ། འཛིན་གྲྭ་བདུན་པ།
བོད་གངས་ཅན་གྱི་ལྷ་སྐལ་བྱང་ཆུབ་སེམས་པ་ཐུགས་རྗེ་ཆེན་པོའི་བདག་ཉིད་སྤྱན་རས་གཟིགས་ཀྱི་རྣམ་སྤྲུལ་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་མཆོག་བོད་ཤིང་ཕག་ཟླ་༥ཚེས་༥ཕྱི་ལོ་༡༩༣༥ལོར་ཞིང་པའི་ཁྱིམ་ཚང་ཞིག་གི་ནང་སྐུ་བལྟམས་ཤིང་ཡབ་ཡུམ་གཉིས་ཀྱིས་མཚན་ལ་ལྷ་མོ་དོན་གྲུབ་ཅེས་གསོལ། ལྷ་བླ་མའི་བཀའ་ལུང་དང་མཚན་བལྟས་བཟང་པོ་ལ་བརྟེན་ནས་དགུང་ལོ་༢ལ་སོན་སྐབས་ཏཱ་ལའི་བླ་མ་སྐུ་ཕྲེང་བཅུ་གསུམ་པའི་ཡང་སྲིད་དུ་ངོས་འཛིན་ཞུས་ནས་ནང་མི་ལྷན་རྒྱས་ལྷ་ལྡན་རྒྱལ་སར་གདན་དྲངས། ༡༩༤༠ ཟླ་ ༢ ཚེས་ ༢༢ དགུང་ལོ་བཞི་དང་ཕྱེད་ཀའི་ཐོག་གསེར་ཁྲིར་མངའ་གསོལ་ཞིང་མཚན་ལ་བསྟན་འཛིན་རྒྱ་མཚོ་ཞེས་གསོལ། དགུང་ལོ་དྲུག་ལ་སོན་སྐབས་བོད་ཡིག་གི་རྨང་གཞིའི་འབྲི་ཀློག་དང་རིག་པའི་གནས། ནང་པའི་ལྟ་གྲུབ་བཅས་ལ་གསན་སྦྱོང་དབུ་འཛུགས་གནང་བ་རེད།
༡༩༥༡ལོར་རྒྱ་དམར་དམག་དཔུང་གིས་བོད་ལ་བཙན་འཛུལ་བྱས་པ་དང། བོད་ཀྱི་གནས་སྟངས་ཛ་དྲག་གཉན་འཕྲང་དུ་གྱུར། དགུང་ལོ་༡༦ལ་སོན་སྐབས་བཀའ་ཤག་དང་རྒྱལ་ཡོངས་ཚོགས་འདུ་ནས་གསོལ་འདེབས་ཞུས་པ་བཞིན་བོད་ཀྱི་ཆབ་སྲིད་ཐུགས་འགན་བཞེས་དགོས་བྱུང། ༡༩༥༤ལོར་རྒྱ་ནག་ལ་ཆིབས་བསྒྱུར་བསྐྱངས་ཏེ་རྒྱ་ནག་དཔོན་རིགས་ཚོ་དང་ལྷན་དུ་བོད་ཀྱི་གནས་སྟངས་སྐོར་ལ་བཀའ་སྡུར་གནང། ༡༩༥༦ལོར་སྟོན་པ་མྱ་ངན་ལས་འདས་ཏེ་ལོ་ངོ་༢༥༠༠འཁོར་བའི་དུས་དྲན་ལ་རྒྱ་གར་དུ་ཕེབས་ཏེ་རྒྱ་གར་སྲིད་འཛིན་ནེཧ་རུ་དང་མཇལ་འཕྲད་ཞུས། ༡༩༥༩ལོར་བོད་མི་མང་ནས་སྒེར་ལངས་བྱས་པར་རྒྱ་ནག་གིས་དྲག་གནོན་ཚབས་ཆེན་བྱས་ཏེ་བོད་མི་ཁྲི་ཁྲག་མང་པོ་རྐྱེན་འདས་སུ་གྱུར། སྐབས་དེ་དུས་བོད་ནང་ཞི་འཇམ་ཡོང་ཐབས་མེད་སྟབས་༸གོང་ས་མཆོག་ཁོང་གི་རྗེས་སུ་བོད་མི་སྟོང་ཕྲག་མང་པོ་ཧི་མ་ལ་ཡའི་རི་རྒྱུད་བརྒྱུད་དེ་རྒྱ་གར་ནང་བཙན་བྱོལ་དུ་ཕེབས་དགོས་བྱུང།
༡༩༦༠ལོར་༸གོང་ས་མཆོག་བཞུགས་སྒར་དྷ་རམ་ས་ལར་ཕེབས་ཏེ་བཙན་བྱོལ་བོད་གཞུང་གསར་དུ་བཙུགས་གནང་བ་རེད། བོད་གཞུང་ནས་བོད་དོན་སྐོར་མཉམ་འབྲེལ་རྒྱལ་ཚོགས་ལ་སྙན་གསེང་ཞུ་སྐབས། རྒྱ་ནག་མཉམ་འབྲེལ་རྒྱལ་ཚོགས་བདེ་སྲུང་ལྷན་ཁང་གི་ཚོགས་མི་ཡིན་པས་བོད་དོན་གླེང་སློང་བྱེད་རྒྱུར་བཀག་འགོག་བྱས་ཡོད་པ་རེད། ༸གོང་ས་མཆོག་གིས་བཙན་བྱོལ་ནང་བོད་མི་རིགས་ཀྱི་རིག་གཞུང་དང་བོད་པའི་ངོ་བོ་འཚོ་གནས་ཐུབ་ཆེད་བོད་མིའིི་གཞིས་ཆགས་དང་ཆོས་སློབ་གཉེར་བྱེད་སའི་དགོན་སྡེ། མ་འོངས་པའི་སོན་རྩ་བོད་ཕྲུག་ཚོ་སློབ་སྦྱོང་བྱེད་སའི་བོད་པའི་སློབ་གྲྭ་ཟུར་དུ་གསར་འཛུུགས་གནང་ཐུབ་པ་བྱུང་ཡོད། ༸གོང་ས་མཆོག་ནི་དམིགས་བསལ་ང་ཚོ་བོད་མི་ཚོར་བཀའ་དྲིན་རྒྱ་མཚོ་ལས་གཏིང་ཟབ་པ་ཡིན། ཁོང་གི་བཀའ་དྲིན་ལ་བརྟེན་ནས་ང་ཚོ་བོད་མི་ཚོ་རྒྱ་གར་ནང་བདེ་ཞིང་སྐྱིད་པའི་ངང་འཚོ་བ་སྐྱེལ་རྒྱུ་བྱུང་བ་དང། བོད་ཕྲུག་ཚོར་སློབ་སྦྱོང་བྱེད་རྒྱུའི་གོ་སྐབས་བྱུང། ༸གོང་ས་མཆོག་ནི་ང་ཚོའི་རྩ་བའི་བླ་མ་ཡིན་པ་མ་ཟད་དགེ་བའི་བཤེས་གཉེན་ཡང་ཡིན། དེང་སྐབས་ཏོག་དབྱིབས་ནད་ཡམས་རྐྱེན་གྱིས་ང་ཚོ་གཙུག་ལག་ཁང་གི་མདུན་ཐང་དུ་༸གོང་ས་མཆོག་གི་གསུང་ཆོས་ཞུ་རྒྱུའི་གོ་སྐབས་མེད་ཀྱང་། ཁོང་གིས་ང་ཚོ་དང་འཛམ་གླིང་ཡོངས་ཀྱི་དད་ལྡན་པ་ཚོའི་ཆེད་དུ་དྲྭ་ཐོག་ནས་སྐུ་ངལ་འཛེམས་མེད་ཀྱིས་གསུང་ཆོས་གནང་སྟེ་ཐད་གཏོང་གནང་བ་དང་། ང་ཚོས་ཁོང་གི་གསུང་ཐོས་པ་དང་ཞལ་རས་ཀྱང་མཇལ་ཐུབ་ཀྱི་ཡོད། ༸གོང་ས་མཆོག་གིས་ཉིན་ལྟར་སེམས་སྐྱིད་པོའི་ངང་སྡོད་དགོས་པ་དང། ཉམ་ཐག་རྣམས་ལ་རོགས་རམ་བྱེད་པ། སེམས་བཟང་པོ་བྱེད་རྒྱུ་བཅས་ནི་ཆོས་ཀྱི་རྩ་བ་ཡིན་ཞེས་གསུང་གི་འདུག འཛམ་གླིང་ཡོངས་ཀྱི་མི་རྣམས་ཀྱིས་༸གོང་ས་མཆོག་ལ་དད་གུས་ཆེན་པོ་བྱེེད་པ་དང། ཕྱི་རྒྱལ་སོགས་ས་ཐག་རིང་པོ་ནས་དད་ལྡན་ཆོས་ཞུ་བ་མང་པོ་རྒྱ་གར་དུ་ཁོང་གི་ཞལ་རས་མཇལ་བ་དང་བཀའ་སློབ་ཞུ་བར་ཡོང་གི་ཡོད། ༸གོང་ས་མཆོག་གི་དགའ་ལྡན་ཕོ་བྲང་ནས་དུས་རྒྱུན་དུ་འཚོ་བར་དཀའ་ངལ་ཡོད་མཁན་རྣམས་ལ་རོགས་རམ་གནང་གི་ཡོད། ༸གོང་ས་མཆོག་ནི་འཛམ་གླིང་ནང་ནས་སེམས་བཟང་ཤོས་དང་གཞན་ལ་ཕན་ཐོགས་སྒྲུབ་མཁན་གྱི་དབུ་ཁྲིད་བཟང་པོ་ཞིག་རེད། ཁོང་གིས་རྟག་ཏུ་འཛམ་གླིང་ཞི་བདེའི་ཆེད་དུ་སྐུ་ལས་མང་པོ་སྐྱོན་སྟབས་༡༩༨༩ལོར་འཛམ་གླིང་ནང་གི་གཟེངས་རྟགས་ཆེ་ཤོས་ནོར་བྷེལ་ཞི་བདེའི་གཟེངས་རྟགས་ཕུལ་གནང་བ་རེད། ཁོང་གིས་འཛམ་གླིང་ཡོངས་ལ་ཕེབས་ཏེ་དད་ལྡན་ཆོས་ཞུ་བ་དང། མི་དམངས་རྣམས་ལ་བྱམས་སྙིང་རྗེ་ནི་ཆོས་ལུགས་ཐམས་ཅད་ཀྱི་རྩ་བ་དང། ཆོས་ལུགས་ནང་ཁུལ་མཐུན་སྒྲིལ་དགོས་སྐོར་བཀའ་སློབ་གནང་མུས་ཡིན།