བསྟན་འཛིན་ཚེ་འཕེལ།
འཛིན་རིམ་བརྒྱད་པ། སཾ་བྷོ་ཊ་གུ་རུ་པུ་ར།
བོད་ཀྱི་གནའ་བོའི་ལོ་རྒྱུས་ནང་འཕོ་འགྱུར་ཇི་འདྲ་ཞིག་བྱུང་མིན་ལ་མ་ལྟ་པར་ཕྱི་ལོ་ ༡༩༤༩ ལོར་རྒྱ་ནག་གཞུང་གིས་བོད་ལ་བཙན་འཛུལ་བྱེད་སྐབས་བོད་ཀྱི་ཆབ་སྲིད་གནས་བབ་ནི་རང་བཙན་གཙང་མའི་རྒྱལ་ཁབ་ཅིག་རེད། ཕྱི་ལོ་ ༡༩༡༣ ནས་ ༡༩༥༠ ལོ་བར་བོད་ཀྱི་ཕྱི་འབྲེལ་ལས་དོན་རྣམས་བོད་གཞུང་རང་ནས་ཐག་གཅོད་བྱེད་ཀྱི་ཡོད་པ་དང་། འབྲེལ་བ་བྱེད་ཡུལ་རྒྱལ་ཁབ་གཞན་ཁག་གིས་བོད་དེ་རང་དབང་རང་བཙན་གྱི་རྒྱལ་ཁབ་ཅིག་ལ་ངོས་ལེན་བྱས་ཡོད་པ་གཞུང་འབྲེལ་གྱི་ཡིག་ཆ་ཁག་ནས་རྟོགས་ཐུབ། ཕྱི་ལོ་ ༡༩༤༩ ལོར་རྒྱ་ནག་དམག་དཔུང་གིས་བོད་དུ་བཙན་འཛུལ་བྱེད་སྐབས་བོད་ནི་ཁྲིམས་ཐོག་དང་། དངོས་ཡོད་གནས་ཚུལ་གཉིས་ཐད་ནས་རང་དབང་རང་བཙན་གྱི་རྒྱལ་ཁབ་ཅིག་རེད། བོད་ལ་རྒྱ་ནག་གིས་དྲག་པོའི་བཙན་འཛུལ་བྱས་པ་དེས་བོད་རང་བཅན་གཙང་མའི་རྒྱལ་ཁབ་ཅིག་ཡིན་པ་མཚོན་གྱི་ཡོད། རྒྱ་གཞུང་གིས་བོད་ལ་བཙན་བཟུང་བྱས་པ་དེ་རྒྱལ་སྤྱིའི་ཁྲིམས་ལུགས་དང་འགལ་བ་གསལ་པོ་རེད། ད་ལྟའང་རྒྱ་ནག་གཞུང་གིས་དམག་མི་ཁྲི་ཕྲག་མང་པོ་བཏང་སྟེ་བོད་རྒྱ་ནག་གི་བཙན་དབང་འོག་མུ་མཐུད་བཞག་པ་དེ་རྒྱལ་སྤྱིའི་ཁྲིམས་དང་འགལ་བ་མ་ཟད། བོད་ནང་གི་གཞི་རྩའི་རང་ཐག་རང་གཅོད་ཀྱི་ཐོབ་ཐང་ལ་རྡོག་རོལ་ཏུ་བཏང་བ་ཞིག་མ་ཡིན་ནམ། རྒྱ་ནག་གཞུང་གིས་ཧམ་པ་ཆེན་པོས་བོད་ཀྱི་བདག་དབང་རྒྱ་ནག་གཞུང་ལ་ཡོད་ལུགས་བརྗོད་ཀྱི་ཡོད་ཀྱང་།
བོད་ལ་སོག་པོ། གོར་ཥ། རྒྱ་གར་དབྱིན་གཞུང་བཅས་ཀྱི་དབར་ཆོས་དང་ཚོང་གི་འབྲེལ་བ་སོགས་ཤུགས་རྐྱེན་ཆེ་ཆུང་སྣ་ཚོགས་སླེབས་མྱོང་ཡོད་ཀྱང་རྒྱལ་ཁབ་སུ་ཞིག་གིས་ཀྱང་རྩོད་པ་རྒྱག་གི་མེད། དུས་སྐབས་ཁ་ཤས་ནང་རྒྱ་ནག་གཙོས་པའི་ཁྱིམ་མཚེས་རྒྱལ་ཁབ་འགའ་ཞིག་བོད་ཀྱི་དབང་ཤུགས་འོག་གནས་དགོས་པའང་བྱུང་ཡོད། འཛམ་གླིང་ནང་རྒྱལ་ཁབ་གང་འདྲ་ཞིག་ཡིན་རུང་དེ་ཚོའི་ལོ་རྒྱུས་ནང་རྒྱལ་ཁབ་གཞན་གྱི་དབང་ཤུགས་དང་ཐེ་བྱུས་རྩ་བ་ནས་སླེབས་མ་མྱོང་བ་ནི་ཧ་ཅང་དཀོན་པོ་རེད། བོད་ནང་ཕྱིའི་རྒྱལ་ཁབ་གཞན་གྱི་ཤུགས་རྐྱེན་དང་། ཐེ་བྱུས་བྱུང་བ་དེ་དག་གི་ནུས་ཤུགས་ཧ་ཅང་ཆུང་ལ་དུས་ཚོད་ཀྱང་ཐུང་ངུ་རེད། ཕྱི་ལོ་ ༡༩༡༣ ལོར་རྒྱལ་དབང་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོས་འཛམ་གླིང་རྒྱལ་སྤྱིའི་ནང་བོད་རང་བཙན་གཙང་མ་ཡིན་པའི་གསལ་བསྒྲགས་གནང་ནས་ཕྱི་ལོ་ ༡༩༥༠ ལོ་བར་བོད་དེ་རྒྱལ་ཁབ་ཅིག་གི་ངོ་བོ་ལྡན་པའི་རྒྱལ་སྤྱིའི་ཁྲིམས་དོན་ཐོག་གི་ཆ་རྐྱེན་ཆབ་འབངས་དང་། མངའ་ཁུལ། མངའ་ཁུལ་གྱི་འཛིན་སྐྱོང་བྱེད་མཁན་སྲིད་གཞུང་ཡོངས་རྫོགས་ཚང་ཡོད། བོད་རང་དབང་རང་བཙན་དུ་གནས་པའི་ཁུངས་སྐྱེལ་ཤིན་ཏུ་མང་པོ་ཡོད་པ་དེ་དག་འཛམ་གླིང་ཁྲིམས་དོན་མཁས་པ་དང་བོད་རྒྱའི་སྐོར་ཞིབ་འཇུག་གནང་མཁན་མཁས་པ་ཁག་གིས་ཁས་ལེན་གནང་གི་ཡོད།
བོད་ལ་མཚོན་ན་རྒྱ་ནག་གཞུང་གིས་བོད་ཀྱི་བདག་དབང་ཁོང་ཚོར་ཡོད་པའི་ཁུངས་སྐྱེལ་བཟོ་ཆེད། རྒྱ་ནག་གཞུང་གིས་བོད་ཀྱི་རྒྱལ་རབས་ལོ་རྒྱུས་ལ་འཁྱོག་བཤད་རྫུན་བཟོ་བྱས་དང་བྱེད་བཞིན་ཡོད། བོད་ནི་མི་རིགས་དང་། སྐད་ཡིག རིག་གཞུང་། གོམས་གཤིས་སོགས་ཁྱིམ་མཚེས་རྒྱལ་ཁབ་རྒྱ་གར་དང་རྒྱ་ནག་སོགས་དང་འབྲེལ་མེད་ཐ་དད་རེད། ས་ཆའི་ཆ་ནས་ཀྱང་བོད་ནི་འཛམ་གླིང་གི་རྒྱལ་ཁབ་ཚང་མའི་ནང་ནས་ཡང་ཐོག་གམ་ས་ཆ་མཐོ་ཤོས་ཀྱི་རྒྱལ་ཁབ་ཅིག་རེད། བོད་ནང་ཡོད་པའི་བོད་མི་མང་ཆེ་བ་ནང་པའི་ཆོས་ལ་དད་པ་བྱེད་ཀྱི་ཡོད། བོད་ཀྱི་གདོད་མའི་ཆོས་ལུགས་ནི་བོན་པོ་རེད། བོད་ལ་བོན་པོ་དང་ཁ་ཆེའི་ཆོས་བྱེད་མཁན་ཡང་ཡོད། ཕྱི་ལོ་ ༡༩༥༩ ལོར་བོད་དེ་རྒྱ་ནག་གིས་བཙན་བཟུང་མ་བྱས་གོང་༸རྒྱལ་དབང་སྐུ་ཕྲེང་བཅུ་བཞི་པ་མཆོག་གིས་བོད་ནང་ལོ་དགུའི་རིང་ཆབ་སྲིད་བསྐྱངས་གནང་བ་རེད། ཁོང་ཀི་བཀའ་དྲིན་གྱིས་རྒྱ་ནག་གིས་བོད་བཙན་བཟུང་བྱས་ཀྱང་ད་བར་བོད་ཀྱི་སྐད་ཡིག་དང་ཆོས། རིག་གཞུང་མ་ཉམས་རྒྱུན་འཛིན་དང་ཉམས་པ་སླར་གསོ་བྱས་དང་བྱེད་བཞིན་ཡོད།
ད་བར་དཔྱད་མཆན་མེད།