བསྟན་འཛིན་ནོར་འཛོམས། འཛིན་གྲྭ་ལྔ་པ། མོན་གྷོ་སཾ་བྷོ་ཊ་གཞི་འོག་ཡན་ལག་དང་པོའི་སློབ་གྲྭ།
ང་ནི་བོད་གངས་ཅན་པའི་མ་འོངས་སོན་རྩ་ཡིན། ངའི་ཕ་ཡུལ་ནི་གངས་ཅན་ཆོས་ལྡན་གྱི་ཞིང་ཁམས་ཡིན། ང་ཚོའི་བོད་ཀྱི་རྒྱལ་ས་ནི་མཛེས་སྡུག་ལྡན་པའི་ལྷ་ས་ཡིན། དེར་ཡོད་པའི་བརྗིད་ཆགས་ཡིད་འོང་ཕོ་བྲང་པོ་ཏ་ལ་ནི༸་གོང་ས་མཆོག་གི་ཕོ་བྲང་ངམ་བཞུགས་གནས་ཡིན་ཞིང་། ང་ཚོ་བོད་མི་རྣམས་ཀྱི་བློ་ཕུག་གཏད་ས་ཡང་ཡིན། ངའི་ཕ་ཡུལ་བོད་ནི་ཧ་ཅང་རྒྱ་ཆེ་ཞིང་ཁ་རླུང་གཙང་བ་འཛམ་གླིང་ཀུན་གྱི་ཆུ་བོའི་འབྱུང་གནས་ཀྱང་ཡིན། ང་ཚོ་བོད་མི་རྣམས་ཀྱི་སེམས་པ་དཀར་ཞིང་། ཆོས་ལ་དད་པ་ཧ་ཅང་ཆེ་བས་ཞི་བདེ་ལྷིང་འཇགས་ཀྱི་འཚོ་བར་རོལ་བཞིན་ཡོད། འོན་ཀྱང་རྒྱ་དམར་གྱིས་བོད་ལ་བཙོན་འཛུལ་བྱས་པ་ནས་བཟུང་༸གོང་ས་མཆོག་དབུས་བོད་མི་རྣམས་རང་ཡུལ་བཞག་ནས་གཞནཡུལ་དུ་སྐྱབས་བཙོལ་དུ་མི་ཕེབས་ཀ་མེད་བྱུང་། འོན་ཀྱང་གོང་ས་མཆོག་གིས་དབུ་ཁྲིད་འོག་ང་ཚོ་བོད་ཕྲུག་རྣམས་ལ་སློབ་སྦྱོང་གི་གོ་སྐབས་ཧ་ཅང་བཟང་བར་བརྟེན་ང་རང་གོ་སྐབས་དེ་བཟུང་བ་མ་ཟད་བོད་ཀྱི་རྒྱལ་ཁབ་སླར་གསོའི་ཆེད་ནུས་ཤུགས་གང་ཡོད་འདོན་རྒྱུ་ཡིན། ང་ཚོ་བོད་ཀྱི་རིག་གནས་རྣམས་ཉམ་ཆག་སོང་ན་བོད་ཀྱི་རྒྱལ་ཁབ་གསོན་ཐབས་མེད་པས་ངེས་པར་དུ་སློབ་སྦྱོང་ཧུ་ཐག་བྱ་རྒྱུ་དེ་ཡིན། དེ་ནི་ངའི་མའི་རེ་འདུན་ཡིན་པ་མ་ཟད་༸གོང་ས་མཆོག་གི་དགོངས་པ་དང་། མ་འོངས་སོན་རྩའི་ལས་འགན་ཀྱང་རེད། དེ་འདྲ་ཡིན་ཙང་ངས་ཧུར་བཙོན་བྱེད་ཀྱི་ཡིན། ང་ཚོ་བོད་ཀྱི་སྐད་ཡིག་གཉིས་རྨང་གཞིའི་ཐོག་ང་རང་གི་དགའ་ཤོས་དེ་གླུ་གཞས་ཡིན་པས་དེའི་ཐོག་ནུས་པ་རྩལ་འདོན་བྱེད་ཀྱི་ཡིན། བོད་ཀྱི་རིག་གནས་གཙོ་བོ་ནི་བཟང་སྤྱོད་ཡར་རྒྱས་གཏོང་ཐབས་དེ་ཡིན། ང་ཚོའི་མི་རྣམས་སེམས་བཟང་ཅན་དང་ཀུན་སྤྱོད་བཟང་པོ་ཞིག་བཟོ་ཐུབ་ན་དེ་ནི་བོད་ཀྱི་རིག་གནས་ཀྱི་ནུས་ཤུགས་ཡིན། དེ་ང་ཚོས་ཐབས་འདྲ་མིན་སྣ་ཚོགས་བེད་སྤྱོད་བྱས་ནས་མི་རྣམས་སེམས་བཟང་དང་སྤྱོད་བཟང་གི་ལམ་དུ་ཁྲིད་ཐུབ། དཔེར་ན། གཞས་ཚིག་བཟང་བ་དང་སྐད་མདངས་སྙན་པས་ཀུན་གྱི་ཡིད་དབང་འཕྲོག་པ་དང་འཁྲབ་རྩལ་བཟང་བས་ཀུན་གྱི་མིག་དཔེར་འོས་པ་སོགས་ལས། སེམས་བཟང་དང་སྤྱོད་བཟང་གི་ལམ་དུ་འགྲོ་ཐུབ་པ་ཡིན། དེ་རིང་ནས་ངས་འབད་བརྩོན་ཆེན་པོས་རང་ནུས་གང་ཡོད་ཀྱིས་ང་ཚོའི་བོད་ཀྱི་རིག་གཞུང་སྲུང་སྐྱོབ་དང་མ་འོངས་བོད་ཀྱི་སོན་རྩའི་ལས་འགན་ཕྲག་ཏུ་འཁུར་ནས་སློབ་སྦྱོང་ལ་ཧུར་བརྩོན་ཆེན་པོས་རང་ཉིད་ཤིན་ཏུ་དགའ་བའི་གླུ་གཞས་དང་ཟློས་གར་གྱི་ལམ་ནས་བོད་ཀྱི་སྤྱོད་པ་བཟང་པོ་དེ་དག་མི་མང་གི་་མདུན་དུ་ངོམས་ཐུབ་པའི་འབད་བཙོན་བྱེད་པ་དང་། རང་ཉིད་ཀྱི་འགོ་ཁྲིད་ནས་བོད་ཀྱི་སྲོལ་རྒྱུན་གྱི་ཟློས་གར་རྣམས་མི་ཉམས་རྒྱུན་འཛིན་དང་ཉམས་པ་སླར་གསོ་བྱེད་པ་སོགས་རང་ཉིད་ཀྱི་མི་ཚེ་དེ་དོན་སྙིང་ལྡན་པ་ཞིག་དང་། ཕ་མས་གནང་བའི་བསླབ་བྱ་བཟང་པོ་རྣམས་ཆུ་ཟོས་མི་གཏོང་བར་རང་ཉིད་ཀྱི་མི་རབས་རྗེས་མ་རྣམས་ལ་ཡང་ངོ་ཚ་མི་དགོས་པ་ཞིག་བཟོ་དགོས་པ་ནི་ཧ་ཅང་གལ་ཆེན་ཡིན་པས། ངས་དེ་ལྟར་བྱེད་ཐུབ་པའི་རེ་བ་ཡོད་ལ་དམ་བཅའ་ཡང་དེ་ལྟར་འཇོག་གོ།
ད་བར་དཔྱད་མཆན་མེད།