རིན་ཆེན་མཁའ་འགྲོ། འཛིན་གྲྭ་དྲུག་པ། སཾ་བྷོ་ཊ་དྷོ་ལན་ཇི། ༄༅། །སློབ་མ་ཞིག་ལ་ཆ་མཚོན་ན་མི་ཚེ་དོན་དང་ལྡན་པ་ཞིག་ཡོང་བ་ལ་དམིགས་ཡུལ་བཟང་པོ་ཞིག་དགོས་གལ་ཆེ། དམིགས་ཡུལ་བཟང་པོ་དེ་སྒྲུབ་པར་བྱེད་པ་ལ་ཡང་སློབ་སྦྱོང་ལ་འབད་བརྩོན་ལྷོད་མེད་དང་དགེ་རྒན། ཕ་མ་དེ་བཞིན་མི་རབ་རྒན་པ་རྣམས་ཀྱི་བསླབ་བྱ་དང་ལམ་སྟོན་རྗེས་སུ་འཇུག་པ་ནི་དམིགས་ཡུལ་བཟང་པོ་དེ་སྒྲུབ་པར་བྱེད་རྒྱུའི་ཐབས་ལམ་གལ་ཆེ་ཤོས་དེ་ཡིན། དེར་བརྟེན་མ་འོངས་པར་མདུན་ལམ་གྱི་དམིགས་ཡུལ་བཟང་པོ་ཞིག་དགོས་པ་ལ་གོང་དུ་ཞུས་པའི་ཆ་རྐྱེན་དེ་དག་མེད་དུ་མི་རུང་བ་ཞིག་ཡིན། ཆུང་བྱིས་པའི་དུས་ནས་རང་ཉིད་ཀྱི་དམིགས་ཡུལ་ནི་སློབ་སྦྱོང་ལ་སྦྱང་བརྩོན་བྱས་ཏེ་བརྩོན་འགྲུས་ཅན་གྱི་རྡོ་ལ་ཨི་ཁུང་འབིགས་ཐུབ་ཞེས་པའི་དཔེ་བཞིན་མ་འོངས་པར་མི་ཡ་རབས་ཞིག་དང་ཚེ་འདི་ཕྱི་གཉིས་ཀྱི་སྐྱབས་གནས་སྤྱི་ནོར་ྋགོང་ས་སྐྱབས་མགོན་ཡིད་བཞིན་ནོར་བུ་ཆེན་པོ་མཆོག་གི་བཀའ་སློབ་ལ་དད་གུས་དང་མིང་དོན་མཚུངས་པའི་མི་སྣ་ཞིག་བྱེད་རྒྱུའི་དམིགས་ཡུལ་བཟང་པོ་དེ་ཡིན། རང་ཉིད་ལ་ཆ་བཞག་ན་རྒྱུན་དུ་དགེ་བའི་བཤེས་གཉེན་རྣམས་ཀྱི་ཞལ་ལ་ཉན་པོ་དང་སློབ་སྦྱོང་བྱེད་པའི་རིང་ལ་ཡང་དམིགས་ཡུལ་དེ་དག་ཡིད་ལ་བཅངས་ཏེ་སློབ་སྦྱོང་ལ་འབད་བརྩོན་བྱེད་བཞིན་ཡོད། གཞན་ཡང་དམིགས་ཡུལ་བཟང་པོ་དེ་དག་བསྒྲུབ་པ་ལ་གྲོགས་བཟང་པོ་དང་མཉམ་དུ་འགྲོ་དགོས་ངེས་ཡིན། དཔེར་ན། བཟང་པོའི་ཞོར་ལ་ཇ་ཆང་དང་ངན་པའི་ཞོར་ལ་རྒྱུགས་བརྡུང་ཟེར་བའི་དཔེ་ལྟར་གྲོགས་བཟང་པོ་དང་ལྷན་དུ་གནས་དགོས་པ་དེ་ཡང་མེད་དུ་མི་རུང་བའི་ཆ་རྐྱེན་ཞིག་ཡིན། དེར་བརྟེན་དམིགས་ཡུལ་ཞིག་དང་ལྷན་གཅིག་སློབ་སྦྱོང་ཡང་དག་པ་ཞིག་བྱེད་དགོས་པ་ནི། ཁོག་པའི་སྙིང་ལྟར་ངེས་པར་དུ་དགོས་པའི་ཆ་རྐྱེན་ཞིག་ཡིན། གཞན་ཡང་སློབ་སྦྱོང་བྱེད་པའི་རིང་ཁྲལ་ཙམ་མ་ཡིན་པར་དོན་དངོས་ཐོག་སློབ་སྦྱོང་ལ་བརྩོན་པ་ལྷོད་མེད་བསྟེན་དགོས་པ་ཡིན། དཔེར་ན་ས་ལེགས་ལས། རིག་པ་ནང་པར་འཆི་ཡང་བསླབ། ཚེ་འདིར་མཁས་པར་མ་གྱུར་ཡང་།། སྐྱེ་བ་ཕྱི་མ་བཅོལ་བ་ཡི།། ནོར་ལ་རང་ཉིད་ལེན་པ་འདྲ། ཞེས་གསུངས་པ་དེར་སང་ཉིན་འཆི་མཁན་གྱི་མི་ཞིག་ཡིན་ན་ཡང་སློབ་སྦྱོང་ལ་འབད་བརྩོན་ལྷོད་མེད་བྱེད་དགོས་པ་བསྟན། ཆུང་དུས་ནས་༸གོང་ས་མཆོག་དང་བོན་བོད་ཁྱིམ་ཁང་གཉིས་ཀྱི་བཀའ་དྲིན་འོག་སློབ་གྲྭའི་ནང་སློབ་ཡོན་ཕྲན་བུ་ཞིག་ལས་སྤྲོད་མི་དགོས་པའི་ཐོག་ཞལ་ལག་དང་སློབ་གྲྭའི་སྒྲིག་ཆས་སོགས་ཐ་ན་སྨྱུ་གུ་དང་དེབ་དེ་བཞིན་སློབ་དེབ་སོགས་སློབ་གྲྭའི་ངོས་ནས་གནང་གི་ཡོད། མདོར་ན། སློབ་གྲྭ་དེ་ཁོ་བོའི་སྲོག་ལས་གཅེས་པའི་ཁྱིམ་ཚང་གཉིས་པ་ལྟ་བུ་ཡིན། ད་ལྟ་ཡིན་ན་འང་ཕྱོགས་བཞི་མཚམས་བརྒྱད་གང་ནས་བལྟས་ཀྱང་ཡོད་ཚད་ནི་སློབ་གྲྭ་དེ་ནས་བྱུང་བ་ཤ་སྟག་ཡིན། དེར་བརྟེན་སྤུན་གྲོགས་ཕོ་གཞོན་མོ་གཞོན་རྣམས་ལ་གོང་དུ་བྲིས་པའི་ཁོ་བོའི་དམིགས་ཡུལ་དེ་བཞིན་ཁྱེད་རྣམས་ཀྱིས་ཀྱང་དེ་ལྟར་ཡིད་ལ་བཅངས། མཐའ་དོན་ྋགོང་ས་སྐྱབས་མགོན་ཆེན་པོ་སྐུ་ཚེ་ཁྲི་ལོར་བརྟན་པ་དང་བོད་དུ་སྐྱིད་པའི་ཉི་མ་མྱུར་དུ་ཤར་བ་དང་། ྋགོང་ས་མཆོག་གིས་མཛད་འཕྲིན་མཐའ་དག་དབྱར་མཚོ་བཞིན་ཕྱོགས་དུས་གང་སར་རྒྱས་འཕེལ་འབྱུང་བའི་སྨོན་འདུན་དང་བཅས།

པདྨ་བདེ་སྐྱིད། འཛིན་གྲྭ་དྲུག་པ། སྦེལ་ཀོབ་སཾ་བྷོ་ཊ་སློབ་གྲྭ། འཇིག་རྟེན་འདི་ཡི་ནང་ལ་ཡོད་པའི་མི་ཚང་མ་ལ་དམིགས་ཡུལ་མི་འདྲ་བ་རེེར་ཡོད། དམིགས་ཡུལ་ཞེས་པ་ནི་ང་ཚོ་མ་འོངས་པ་ཆེན་པོ་ཆགས་པའི་དུས་དེ་ལ་གང་བྱེད་འདོད་ཡོད་པ་དེ་ཡིན། དམིགས་ཡུལ་ལ་ཡག་སྡུག་ཁྱད་པར་ཡོད་མ་རེད། ང་ཚོའི་སོ་སོའི་དམིགས་ཡུལ་སྒྲུབ་པར་སོ་སོའི་རང་གི་དཀའ་ལས་རྒྱག་དགོས། དེ་མ་གཏོགས་མི་གཞན་གྱིས་དཀའ་ལས་རྒྱག་ཐུབ་ཀྱི་མ་རེད། མི་ཚང་མས་དམིགས་ཡུལ་ཆེན་པོ་བཟུང་གི་ཡོད། གང་ཡིན་ཟེར་ན་མ་འོངས་པ་མི་ཚེ་དོན་དང་ལྡན་པ་ཞིག་བྱུང་བའི་ཆེད་དུ་དང། མི་ཚེ་ཡག་པོ་ཞིག་བྱུང་བའི་ཆེད་དུ་ཡིན། ང་ལ་དམིགས་ཡུལ་མང་པོ་ཡོད་ཡིན་ནའང་ངས་མ་འོངས་པའི་དམིགས་ཡུལ་དེ་ནི་དགེ་རྒན་ཡིན། ང་རང་དགེ་རྒན་བྱེད་ཡག་དེ་གལ་ཆེན་པོ་མཐོང་གི་འདུག། གང་ཡིན་ཟེར་ན་དགེ་རྒན་མེད་ན་སློབ་ཕྲུག་ལ་སློབ་སྦྱོང་མི་རགས་པ་དང་མི་ཚེ་ཡག་པོ་སྐྱེལ་ཐུབ་ཀྱི་མ་རེད། མི་ཚང་མ་ལ་དགེ་རྒན་དགོས་གང་ཡིན་ཟེར་མི་ཚེ་དེ་ཡག་པོ་བྱུང་བའི་ཆེད་དུ་ཡིན། དགེ་རྒན་ཞེས་པ་ནི་དགེ་རྒན་གཅིག་པོ་མ་རེད། ང་ཚོའི་ལམ་སྟོན་གནང་མཁན་དང།ཕ་མ་གཉིས་པ་རེད། འཇིག་རྟེན་འདི་ཡི་ནང་དགེ་རྒན་གྲངས་རྩིས་མི་ཐུབ་པར་ཡོད། ཡིན་ན་ཡང་ད་དུང་འཛམ་གླིང་འདི་ཡི་ནང་དགེ་རྒན་མང་པོ་དགོས་ཡོད། ང་རང་དགེ་རྒན་བྱེད་ཡ་ལ་དགའ་པོ་ཡོད་པ་མ་ཟད་ང་རང་མ་འོངས་པར་དགེ་རྒན་བྱེད་པའི་དུས་ལ་དགེ་རྒན་དྲང་པོ་དང་གཤིས་ཀ་འཇམ་པོ་ངང་སློབ་ཕྲུག་ལ་ཡི་གེ་སློབ་ས་རེད། དགེ་རྒན་གྱི་དམིགས་ཡུལ་ནི་ང་རང་ཆུང་དུས་ནས་རྨི་ལམ་ཡིན། དགེ་རྒན་ཞིག་གིས་སློབ་ཕྲུག་ལ་ཡི་གེ་སློབ་པའི་དུས་ལ་ལས་སླ་པོ་མཐོང་གི་འདུག གལ་སྲིད་ཁྱེད་རང་ཚོ་དགེ་རྒན་བྱེད་འདོད་ཡོད་ན་དགེ་རྒན་ལ་དབྱེ་བ་མང་པོ་ཡོད། དཔེར་ན་བོད་ཡིག་དགེ་རྒན། དབྱིན་ཇི་དགེ་རྒན་ལ་སོགས་པ་མང་པོ་ཡོད། ང་ནར་སོན་པའི་སྐབས་བོད་ཡིག་དགེ་རྒན་ཞིག་བྱ་འདོད་ཡོད། གང་ཡིན་ཟེར་ན། ངའི་མཐོང་ཚུལ་ལ་བོད་ཡིག་དེ་ལས་སླ་པོ་ཞིག་དང་གལ་ཆེན་པོ་ཞིག་རེད་བསམ་གྱི་ཡོད། ང་རང་བོད་ཡིག་སློབ་ཚན་ལ་ཧ་ཅང་གི་དགའ་པོ་ཡོད་དེ་མ་ཟད་ང་རང་སློབ་ཚན་ཚང་མ་ནང་ནས་སྒྲུབ་འབྲས་ཡག་ཤོས་ཡང་བོད་ཡིག་སློབ་ཚན་ལ་ལེན་གྱི་ཡོད། ང་སློབ་གྲྭ་ལ་འགྲོ་སྐབས་བོད་ཡིག་དགེ་རྒན་གྱི་ཡི་གེ་སློབ་སྐབས་ང་རང་ཧ་ཅང་སྐྱིད་པོ་དང་བོད་ཡིག་སློབ་ཚན་སྦྱང་འདོད་ཆེན་པོ་ཞིག་་ཡོད། ང་རང་བོད་ཡིག་དགེ་རྒན་ལ་ཧ་ཅང་དགའ་པོ་ཡོད། ཁོ་ཚོའི་སློབ་ཁྲིད་བྱེད་པའི་དུས་ཡག་པོ་བྱེད་གནང་གི་ཡོད། བོད་ཡིག་དགེ་རྒན་ཞིག་གིས་ཡི་གེ་སློབ་སྐབས་ང་རང་སེམས་ལ་ཚོར་བ་སྐྱིད་པོ་ཞིག་འབྱུང་གི་འདུག ང་རང་ཆེན་པོ་ཆགས་ན་ཝ་ར་ཎ་སིར་འགྲོ་ནས་བོད་ཡིག་དགེ་རྒན་ཆེན་པོ་ཞིག་བྱ་འདོད་འདུག དེ་མ་ཚད་ང་རང་ཆེན་པོ་ཚགས་ན་སོ་སོའི་དམིགས་ཡུལ་སྒྲུབ་ཐུབ་པར་བྱེད་པ་དང་རྟག་ཏུ་(ཀ་རུ་ན་) ཕན་བདེ་དགའ་ཚལ་ལ་ཞབས་སྤྱི་ཞུ་ཡག་དེ་ཡང་ངའི་མ་འོངས་པའི་དམིགས་ཡུལ་གཅིག་ཡིན། ང་རང་བོད་ཡིག་དགེ་རྒན་བྱེད་འདོད་ཡོད་པའི་སློབ་སྦྱོང་ཡག་པོ་སྦྱང་པ་དང་སོ་སོའི་དགེ་རྒན་གྱི་དམིགས་ཡུལ་དེ་སྒྲུབ་ཐུབ་པར་བྱེད་ཀྱི་ཡིན། མཐར་ང་རང་མ་འོངས་པ་ཆེན་པོ་ཚགས་ན་བོད་ཡིག་དགེ་རྒན་བྱ་རྩིས་ཡོད། དམིགས་ཡུལ་རང་ལ་ཡོད་དུས། དམིགས་ཡུལ་ནོར་ཉམས་མ་ཚོད། དམིགས་ཡུལ་མི་ལ་ཤོར་དུས། སེམས་པ་སྐྱོ་ནས་སྐྱོ་གྱིས།

བསྟན་འཛིན་འཛོམས་སྐྱིད། འཛིན་གྲྭ་དྲུག་པ། མེས་དབོན་གཙུག་ལག་དཔེ་སྟོན་སློབ་གྲྭ། གནམ་སྔོ་དྭངས་ཤིང་བསིལ་རླུང་དལ་གྱིས་ལྡང་བའི་རེས་གཟའ་མིག་དམར་གྱི་ཞོགས་པ་བོད་ཡིག་རྒན་ལགས་ཀྱིས་འཛུམ་དམུལ་དམུལ་ངང་འཛིན་ཁང་ནང་ཕེབས་ཏེ་སློབ་ཕྲུག་ཚང་མར་ངག་འཇམ་ཞི་དུལ་གྱི་ངང་ནས་ཁྱེད་ཚོས་ངེས་པར་དུ་རང་གི་མ་འོངས་པའི་དམིགས་ཡུལ་ཞིག་གི་ཆེད་དུ་རྩོམ་ཡིག་དོན་སྙིང་ལྡན་པ་ཞིག་འབྲི་དགོས་ཞེས་གསུངས་མ་ཐག ངས་ལམ་སེང་དཔེ་སྒྲོམ་གྱི་ནང་ནས་འབྲི་དེབ་བཏོན་ཏེ་འབྲི་འགོ་བརྩམས་པ་ཡིན། ང་དང་འདྲ་བའི་ན་ཆུང་སློབ་ཕྲུག་ཚང་མར་རང་རང་གི་འདོད་མོས་དང་མཐུན་པའི་དམིགས་ཡུལ་རེ་ཡོད། ཁ་ཤས་སློབ་མཐར་རྗེས་སྨན་པ། གསར་གཏོད་མཁས་པ། དགེ་རྒན། ཁ་ལོ་བ། ཚན་རིག་མཁས་ཅན་སོགས་བྱ་འདོད་ཡོད། ང་ཚོ་སློབ་སྦྱོང་བྱེད་མཁན་ན་ཆུང་སློབ་ཕྲུག་ཚོར་ཆུང་དུས་ནས་དམིགས་ཡུལ་ཞིག་དགོས་རྒྱུ་དེ་ཧ་ཅང་གི་གལ་འགངས་ཆེན་པོ་ཞིག་རེད་བསམ་གྱི་འདུག རྒྱུ་མཚན་ནི། མ་འོངས་པར་ང་ཚོ་སྤྱི་ཚོགས་ནང་མགོ་བོ་མཐོན་པོར་བསྒྲེངས་ཏེ་ལས་རིགས་གཅིག་གི་ཐོག་ལ་མཁས་པ་བྱེད་དགོས་ཀྱི་ཡོད། དམིགས་ཡུལ་ནི། མ་འོངས་པར་རང་ཉིད་མི་ཚེའི་ནང་ལས་རིགས་གང་ཞིག་བྱ་འདོད་ཡོད་པ་དེ་ལ་དམིགས་ཡུལ་ཟེར་གྱི་རེད། དམིགས་ཡུལ་མེད་པའི་མི་དེ་ཚོ་རང་ཉིད་ནག་ཐུམ་ཐུམ་གྱི་མུན་ནག་ཁྲོད་དུ་གོམ་སྟབས་སྤོས་ཏེ་འགྲོ་བཞིན་པ་དང་གཅིག་མཚུངས་རེད།ཅེས་རྒན་ལགས་ཀྱིས་རྟག་ཏུ་སློབ་ཚན་ཁྲིད་པའི་སྐབས་སུ་གསུང་གི་འདུག ངའི་དམིགས་ཡུལ་ནི་མ་འོངས་པར་འཛམ་གླིང་སྟེང་གི་བདག་མེད་སྲོག་ཆགས་རིགས་སྲུང་སྐྱོབ་བྱེད་མཁན་ཞིག་དང་རུ་ཁག་ཆུང་ཆུང་ཞིག་ཀྱང་འཛུགས་འདོད་ཆེན་པོ་ཡོད། གང་ཡིན་ཟེར་ན། འཛམ་གླིང་ནང་སྲོག་ཆགས་གྲངས་ལས་འདས་པ་བདག་མེད་དུ་ལུས་ཡོད་པ་དང། ཁོ་ཚོར་རྨས་སྐྱོན་ཕོག་པ་དང་ནད་ཀྱིས་མནར་དུས་ལྟ་སྐྱོང་བྱེད་མཁན་ཧ་ཅང་དཀོན་པོ་དང་ཁོ་ཚོར་ནུས་པ་ཡང་མེད།ང་རང་ཡང་ཆུང་དུས་ནས་སེམས་ཅན་དང་ཁྱི་སོགས་ལ་ཧ་ཅང་དགའ་པོ་དང་ཁོ་ཚོ་མཉམ་དུ་རྩེད་མོ་རྩེ་དུས་ཚོར་སྣང་གཞན་དང་མི་འདྲ་ཞིང་སེམས་ལ་བདེ་སྐྱིད་ཐོབ་ཀྱི་འདུག ང་ལ་སེམས་ཅན་རིགས་གསོ་སྐྱོང་དང་ལྟ་རྟོག སྨན་བཅོས་བྱེད་པའི་ལག་རྩལ་དང་མཐུན་རྐྱེན་སོགས་གང་ཡང་མེད་ནའང། ངས་ད་ལྟ་ནས་འབད་བརྩོན་དང་སེམས་ཀྱི་སྐོར་ལ་སློབ་སྦྱོང་བྱེད་པ་མ་ཟད་བདག་ཉར་གསོ་སྐྱོང་བྱེད་སྟངས་སོགས་ལའང་དོ་སྣང་དང་སློབ་སྦྱོང་བྱེད་ཀྱི་ཡིན། མ་གཞི་ནས་སེམས་ཅན་དེ་དག་ང་ཚོ་མི་ནང་བཞིན་བསམ་བློ་བཏང་རྒྱུའི་ནུས་པ་མེད་ཀྱང། ཁོ་ཚོར་བྱམས་སྐྱོང་དང་ལྟ་སྐྱོང་བྱེད་ན་སྐབས་རེ་མི་ལས་ལྷག་པའི་བཀའ་དྲིན་བསམ་ཤེས་དང་དྲིན་ལམ་འཇལ་གྱི་རེད། འོན་ཀྱང་འཛམ་གླིང་འདིའི་ཐོག་སེམས་ཅན་དང་སྡུག་པོ་བཏང་བ་དང། དོན་མེད་སྲོག་བཅད་མཁན་མང་པོ་ཡོད་ཀྱང། ཁོ་ཚོར་སྲུང་སྐྱོབ་བྱེད་མཁན་མང་པོ་མེད། དེར་བརྟེན། ངས་མ་འོངས་པར་བདག་མེད་དུ་ལུས་པའི་སེམས་ཅན་དེ་ཚོའི་ཆེད་དུ་ཚོགས་པ་ཆུང་ཆུང་ཞིག་བཙུགས་པ་དང། ཁོ་ཚོར་ཟས་སྤྲད་པ་མ་ཟད་སྨན་བཅོས་བྱེད་པ་དང། སྙིང་རྗེ་བྱས་ཏེ་སྲུང་སྐྱོབ་བྱེད་ཀྱི་ཡིན། ངས་རང་ཉིད་ཀྱི་དམིགས་ཡུལ་དེ་སྒྲུབ་ཐུབ་ཀྱི་རེད། སྙམ་པའི་ཡིད་ཆེས་བརྟན་པོ་ཡོད།།

བསྟན་འཛིན་དཔལ་མོ། འཛིན་གྲྭ་དྲུག་པ། གུ་རུ་པུ་ར་སཾ་བྷོ་ཊ་ཉིན་སློབ། ༄༅།  །ངའི་མ་འོངས་པའི་དམིགས་ཡུལ་ནི་ཚན་རིག་པ་ཞིག་བྱ་རྒྱུའི་འདོད་པ་ཡོད། གང་ཡིན་ཞེ་ན། དེང་དུས་རང་ཅག་བོད་མི་རིགས་ཀྱི་བསམ་བློ་གཏོང་སྟངས་ནི།  རང་གི་མི་ཚེ་ནང་སོ་སོའི་ཁྱིམ་ཚང་གི་དཔལ་འབྱོར་ཡར་རྒྱས་ཁོ་ནར་དམིགས་པ་མ་གཏོགས་དེ་ལས་གཞན་པའི་བོད་མི་རིགས་དང་།  ཆོས་དང་རིག་གཞུང་། ཆབ་སྲིད།རང་གི་རྒྱལ་ཁབ་འཛུགས་སྐྲུན་སོགས་ལ་དོ་སྣང་མེད་པ་ཆགས་གྲབས་བྱེད་ཀྱི་ཡོད་པ་མངོན་གསལ་རེད།  དེའི་རྒྱུ་མཚན་ནི་མི་ཞིག་གིས་འགན་བླངས་ནས་བྱེད་གྲབས་བྱེད་སྐབས། ནང་མི་དང་གྲོགས་པོ་སོགས་གང་ཟག་གཞན་ཞིག་གིས་དཔལ་འབྱོར་དང་སེམས་ཤུགས་ཀྱི་རྒྱབ་སྐྱོར་མེད་པའི་རྐྱེན་གྱིས་དམིགས་ཡུལ་དེ་འགྱུར་བ་ཕྱིན་ནས་བོད་མི་རིགས་དང་།  ཆོས་དང་རིག་གཞུང་། ཆབ་སྲིད།  རང་གི་རྒྱལ་ཁབ་འཛུགས་སྐྲུན་སོགས་སོགས་མཐུས་ཤོར་འགྲོ་ཡི་ཡོད་པ་ཀུན་གྱིས་མཁྱེན་གསལ་རེད།  དེར་མ་ཟད་བོད་མི་རིགས་ལ་བཅངས་པའི་སེམས་ཤུགས་དང་བརྩོན་འགྲུས་ཟེར་བའི་ཚིག་དེ་ཐག་རིང་དུ་གྱུར་གྲབས་བྱེད་ཀྱི་འདུག དེར་རྟེན་ངས་བོད་མི་རིགས་ཀྱི་རྒྱལ་ཁབ་འཛུགས་སྐྲུན་ལ་དམིགས་ནས་སེམས་ཤུགས་དང་བརྩོན་འགྲུས་བྱས་ཏེ་མ་འོངས་པར་ཚན་རིག་པ་མཁས་ཅན་ཞིག་བྱས་པ་ཡིན་ན། རྒྱལ་ཁབ་གཞན་གྱིས་བོད་མི་རིགས་ལ་དོ་སྣང་དང་མཐོང་ཆེན་བྱེད་པ་མ་ཟད།  ང་ཚོའི་དཔྲལ་པའི་མིག་དང་ཁོག་པའི་སྙིང་ལྟ་བུའི་རྩ་བའི་བླ་མ་སྤྱི་ནོར་༸ གོང་ས་སྐྱབས་མགོན་ཆེན་པོ་མཆོག་ཐུགས་དགྱེས་པ་དང་།  ཐུགས་ཀྱི་བཞེད་དགོངས་ཐམས་ཅད་འགྲུབ་ཐུབ་པའི་རེ་བ་དང་། སོ་སོའི་དྲིན་ཆེན་ཕ་མའི་རེ་འདོད་ཆ་ཚང་བསྒྲུབ་ཐུབ་ཀྱི་ཡོད། ཕྱོགས་གཞན་ཞིག་ནས་བལྟས་པ་ཡིན་པ་ན་རང་གི་མི་ཚེའི་ནང་དཀའ་ངལ་མི་འཕྲད་པ་མ་ཟད།  ལོ་ན་རྒས་པ་ཡིན་ན་དུས་ཚོད་མི་འཁྱོལ་པའི་དཀའ་ངལ་དང་སེམས་ཀྱི་ཀའ་ངལ་འཕྲད་མི་སྲིད། བྱས་ཙང་ང་ནང་བཞིན་མ་འོངས་པའི་དམིགས་ཡུལ་ཚན་རིག་པ་བྱེད་མཁན་ཡོད་པ་ཡིན་ན། རང་གི་རྒྱལ་ཁབ་འཛུགས་སྐྲུན་དང་།  ཚན་རིག་པའི་སྤོབས་པ།  རང་ལ་ཡོན་ཏན་ཚད་དང་ལྡན་པ་དགོས།  དེ་ཡང་ཐོག་མར་འཛིན་གྲྭ་བཅུ་པ་དང་བཅུ་གཉིས་ཐོན། དེའི་རྗེས་ཉེ་བའི་གཙུག་ལག་རབ་འབྱམས་པ་དང་།  གཙུག་ལག་རབ་འབྱམས་ཐོན་པ་སོགས་ཤེས་བྱ་ཡོན་ཏན་རྒྱ་ཆེན་པོ་སྦྱངས་དགོས་ཀྱི་ཡོད། དེ་དང་འབྲེལ་ཞིང་ཚན་རིག་པ་ཞིག་བྱེད་ཀྱི་ཡིན་ཞེས་པ་དེ་ལ་ཡང་ནང་གསེས་དབྱེ་བ་མང་པོ་ཡོད་ཙང་། ངའི་རང་གི་དམིགས་ཡུལ་དང་་འབད་བརྩོན་ནི་གཟའ་སྐར་དཔྱད་རིག་པ་ཞིག་བྱེད་རྩིས་ཡོད། གང་ཡིན་ཞེ་ན་དེ་ནི་འཇིགས་རྟེན་འདིའི་ནང་གི་གཟའ་སྐར་དང་འབྲེལ་བའི་གནས་ཚུལ་མང་པོ་ཞིག་ཚན་རིག་མཁས་ཅན་ཚོས་སློབ་སྦྱོང་བྱས་པ་ལས་ད་དུང་ལྐོག་འགྱུར་གྱི་གནས་ཚུལ་མང་པོ་ཤེས་རྒྱུ་ལྷག་ཡོད་ཙང་ངས་དེའི་སྐོར་སློབ་སྦྱོང་བྱ་འདོད་ཆེན་པོ་ཡོད། ང་རང་གཟའ་སྐར་གྱི་སློབ་སྦྱོང་མང་པོ་གསར་དུ་ཤེས་པ་བྱས་ནས་འཛམ་གླིང་ཡོངས་ལ་གསལ་བཤད་དང་།  ལམ་སྟོན་བྱེད་ཡ་གོ་སྐབས་རག་གི་རེད་བསམ་གྱི་འདུག  གོང་གསལ་རྒྱུ་མཚན་དེ་དག་ལ་བརྟེན་ནས་ང་ཚན་རིག་པའི་གཟའ་སྐར་དཔྱད་རིག་པའི་ཚན་རིག་མཁན་ཞིག་བྱེད་འདོད་ཆེན་པོ་ཡོད།

བསྟན་འཛིན་ཆོས་སྐྱིད། འཛིན་གྲྭ་དྲུག་པ། མེས་དབོན་གཙུག་ལག་དཔེ་སྟོན་སློབ་གྲྭ ཉི་མ་ཚ་ལམ་ལམ་དུ་ཤར་བའི་རེས་གཟའ་མིག་དམར་གྱི་ཉིན་ངས་རྩོམ་ཞིག་འབྲི་རྒྱུའི་བསམ་བློ་ཞིག་འཁོར་བྱུང་། སྤྱིར་བཏང་མི་ཚང་མར་སོ་སོའི་དམིགས་ཡུལ་གཅིག་ཡོད། དམིགས་ཡུལ་ནི་མ་འོངས་པ་སློབ་སྦྱོང་སྦྱོང་ཚར་བའི་རྗེས་སོ་སོའི་མི་ཚེ་ནང་གང་ཆགས་འདོད་ཡོད་པ་དང་ལས་ཀ་གང་བྱེད་འདོད་ཡོད་པ་ལ་དམིགས་ཡུལ་ཟེར། ངའི་དམིགས་ཡུལ་ནི་སྨན་པ་བཟང་པོ་ཞིག་ཆགས་རྒྱུ་དེ་ཡིན། སྨན་པ་ནི་མིའི་ཚེ་སྲོག་སྐྱོབ་མཁན་ཞིག་ཡིན་པ་སོང་ཙང་སྨན་པའི་ལས་ཀ་དེ་ནི་ལས་ཀའི་ནང་ནས་རྩེ་ཕུད་ཞིག་ཡིན་པར་བསམ་གྱི་ཡོད། ནམ་རྒྱུན་དུ་ང་རང་མི་གཞན་ལ་རོགས་པ་བྱེད་རྒྱུ་དགའ་པོ་ཡོད་ཙང་སྨན་པ་ཞིག་བྱེད་འདོད་ཡོད། ང་སྨན་པ་ཆགས་ནས་མི་རྣམས་ལ་རོགས་པ་བྱེད་འདོད་ཡོད།ཆུང་དུས་ང་རང་གི་དམིགས་ཡུལ་ནི་དགེ་རྒན་ཞིག་ཡིན།དགེ་རྒན་ནི་ཕྲུ་གུ་རྣམས་ལ་སློབ་སྦྱོང་སྤྲོད་མཁན་ཙམ་མ་ཟད་མ་འོངས་མདུན་ལམ་བཟོས་མཁན་ཞིག་ཀྱང་རེད། ཡིན་ཡང་ཕྱི་ལོ་༢༠༡༩མཇུག་ཙམ་ནས་འཛམ་གླིང་ཡོངས་ལ་ཏོག་དབྱིབས་ནད་ཡམས་ཁྱབ་ནས་མི་མང་པོ་ན་ཚ་དེ་ན་བ་དང་མང་པོ་ཞིག་འདས་གྲོངས་ཀྱང་ཕྱིན་ཡོད། དེ་དུས་ང་ཚོའི་སློབ་གྲྭ་སྒོ་རྒྱག་དགོས་བྱུང་ཡོད་པ་དང་ང་ཚོ་ཚང་མ་ནང་ལ་བསྡད་དགོས་བྱུང་སོང་།སྐབས་དེ་དུས་མི་ཚང་མར་ཞེད་སྣང་དང་དངངས་སྐྲག་གིས་ཕྱི་ལ་ཡང་ཐོན་གྱི་མེད་པ་རེད། ཐེངས་གཅིག་ངས་བརྙན་འཕྲིན་ནང་དུ་མི་རྣམས་ནད་ཡམས་དེའི་རྐྱེན་གྱིས་མང་པོ་གྲོངས་པ་མཐོང་དུས་ཨ་ཙི་གལ་སྲིད་ང་ཡང་སྨན་པ་ཞིག་ཡིན་ན་བསམ་བྱུང་། བྱས་ཙང་ང་སྨན་པ་ཞིག་ཆགས་རྒྱུའི་འདོད་པ་དེ་ནི་ཏོག་དབྱིབས་ནད་ཡམས་སྐབས་ནས་སླེབས་བྱུང་། སྨན་པ་ནི་འཛམ་བུ་གླིང་གི་ནང་དུ་མི་རྣམས་ཀྱིས་ལྷ་དང་གཅིག་པ་བརྩི་ཡི་ཡོད་གང་ཡིན་ཟེར་ན་ཁོང་ཚོས་མི་རྣམས་ཀྱི་ཚེ་སྲོག་སྐྱོབ་ཀྱི་ཡོད། མ་འོངས་པ་ང་ཡང་སྨན་པ་ཞིག་བྱེད་ནས་མི་སྐྱོ་པོ་རྣམས་ལ་རིན་མེད་ཐོག་ནས་བརྟག་དཔྱད་བྱེད་རྒྱུ་ཡིན། མི་ཚང་མར་སྨན་པ་བྱེད་རྒྱུའི་རྒྱུ་མཚན་མི་འདྲ་བ་ཡོད་ཀྱང་ཕལ་ཆེ་བའི་གཞན་ལ་རོགས་པ་བྱེད་རྒྱུའི་བསམ་བློ་བཏང་ནས་སྨན་པ་བྱེད་ཀྱི་ཡོད། ངའི་བསམ་པར་སྨན་པ་ཡིན་པ་ཙམ་མ་ཟད་སྨན་པ་སེམས་བཟང་པོ་དང་ཁ་འཇམ་པོ་བྱེད་རྒྱུ་དེ་ཡང་གལ་ཆེན་པོ་མཐོང་གི་འདུག སྐབས་རེ་ངའི་རྨོ་མོ་ལགས་སྨན་ཁང་དུ་ཕེབས་ནས་ཚུར་ལོག་དུས་ཨེམ་རྗེ་དེ་ཁ་འཇམ་པོ་ཞེ་པོ་འདུག་གསུངས་པ་དང་སྐབས་རེ་ཨེམ་རྗེ་དེ་རླུང་ཚ་པོ་འདུག་གསུངས་པ་དེ་འདྲ་གོ་མྱོང་ཡོད།དེ་ཡི་རྐྱེན་གྱིས་ནད་པའི་སེམས་ལ་ཕན་ཐོགས་པ་དང་སྐབས་རེ་གནོད་པ་ཡང་བསྐྱལ་སྲིད། དེ་འདྲ་སོང་ཙང་ང་རང་མ་འོངས་པ་སྨན་པ་བཟང་པོ་ཞིག་དང་ཁ་འཇམ་པོ་ཞིག་བྱེད་འདོད་ཡོད། མ་ཟད་སྨན་པ་ཁ་ཤས་ཀྱིས་ནད་པ་རྣམས་ལ་དབུལ་ཕྱུག་དང་གོ་གནས་ཀྱི་ཐོག་ནས་དབྱེ་འབྱེད་བྱས་ཏེ་སྨན་བཅོས་དང་བརྟག་དཔྱད་བྱེད་སྟངས་ཐོག་ནས་མི་འདྲ་བ་བྱས་ཏེ་མིའི་ཚེ་སྲོག་ལ་ལག་རྩེད་རྩེ་མཁན་ཡང་ཡོད།འོན་ཀྱང་ངས་ཚང་མར་ལྟ་སྟངས་གཅིག་མཚུངས་བྱེད་ཀྱི་ཡིན།

བསྟན་འཛིན་ཉི་མ། འཛིན་གྲྭ་བརྒྱད་པ། མེས་དབོན་གཙུག་ལག་དཔེ་སྟོན་སློབ་གྲྭ། དེ་ཡང་སྤྱིར་བཏང་ཡངས་ཤིང་རྒྱ་ཆེ་བའི་འཛམ་གླིང་འདིིའི་ནང་སྐྱེ་བོ་ཇི་ཙམ་ཡོད་པ་ཚང་མ་རང་ཉིད་ཀྱི་དམིགས་ཡུལ་ཞིག་ཡོད། དེར་བརྟེན་བུ་མོ་ང་ཡང་རང་ཉིད་ཀྱི་དམིགས་ཡུལ་སྐོར་ལ་རྩོམ་ཡིག་ཅིག་འབྲི་འདོད་ཆེན་པོ་བྱུང། ང་རང་ལ་ཆ་མཚོན་ན་དམིགས་ཡུལ་ངེས་ཅན་གསུམ་ཡོད། ངས་དམིགས་ཡུལ་དེ་དག་འཛིན་དགོས་པའི་རྒྱུ་མཚན་ཡང་དག་བཤད་རྒྱུ་ཡོད། ངས་དམིགས་ཡུལ་དེ་དག་མི་ཚེའི་ནང་ཉམས་ལེན་དང་ངེས་པར་དུ་སྒྲུབ་ཐུབ་པའི་འབད་བརྩོན་ཧུར་ཐག་བྱེད་ཀྱི་ཡིན། མ་འོངས་པར་ཡང་དམིགས་ཡུལ་དེ་བསྒྲུབས་ཏེ་བོད་མིའི་སྤྱི་ཚོགས་ནང་ཞབས་འདེགས་སྒྲུབ་པའི་འདུན་པ་མེ་ལྟར་འབར་བཞིན་ཡོད།ང་ལ་དམིགས་ཡུལ་གསུམ་ཡོད་པའི་ནང་ནས་དང་པོ་ནི་བོད་མིའི་རྩ་བ་བླ་མ་༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་དེ་དག་སྣང་མེད་དུ་མ་བཏང་བར་བློ་རྩེ་གཅིག་སྒྲིམ་གྱིས་བསམ་གཞིག་དང་ལག་བསྟར་བྱེད་ཀྱི་ཡིན། དེ་ཡང་ང་ཚོ་ནི་བོད་མི་ཞིག་དང་ཁོང་གི་རྗེས་འབྲངས་པ་ཞིག་ཡིན་ཞེས་བཤད་ཀྱང་དོན་དངོས་ཐོག་ང་ཚོས་ཁོང་གི་བཀའ་དགོངས་ཅི་སྒྲུབ་མ་ཞུས་ན་ག་ལ་འགྲིག ང་ཚོས་ཁོང་གི་བཀའ་སློབ་མ་ཉན་པ་དང་ཁོང་གི་བཀའ་ལ་རྒྱབ་གཏོད་བྱེད་ན་ལས་རྒྱུ་འབྲས་མི་འགྲོ་བ་དང་བོད་མིའི་རྐང་འདྲེན་པ་ཞིག་ཏུ་འགྱུར་རྒྱུ་ཉག་ཅིག་རེད། དེར་བརྟེན་ང་ལ་ཁོང་གི་བཀའ་གསུང་ཅི་སྒྲུབ་ཞུ་རྒྱུའི་ཆོད་སེམས་བརྟན་པོ་ཞིག་ཡོད། ངའི་དམིགས་ཡུལ་གཉིས་པ་ནི། རང་ཉིད་བརྩེ་བའི་ཕ་མ་གཉིས་ཀྱི་དྲིན་ལན་འཇལ་རྒྱུ་དང་ཁོང་རྣམ་གཉིས་ཚེ་གང་བདེ་སྐྱིད་ལྡན་པའི་འཚོ་བ་ཞིག་སྐྱེལ་ཐུབ་པའི་འབད་བརྩོན་བྱེད་ཀྱི་ཡིན། གང་ཡིན་ཟེར་ན། ཁོང་རྣམ་གཉིས་ཀྱི་བླ་ན་མེད་པའི་ཐུགས་རྗེའི་བཀའ་དྲིན་འོག་བུ་མོ་ང་རང་བདེ་པོ་ཐང་པོའི་ངང་འཚར་ལོངས་བྱུང་བ་དང། བུ་མོ་ང་ཡི་མདུན་ལམ་ཆེད་དུ་ཁོང་གཉིས་ཀྱིས་ད་བར་ཡོད་ཚད་བློས་བཏང་གནང་བ་རེད། གལ་སྲིད་དྲིན་ཅན་ཕ་མ་གཉིས་མེད་ན་ང་འཇིག་རྟེན་འདིའི་སྟེང་དུ་མི་ལུས་ལེན་མི་སྲིད། ཁོང་རྣམ་གཉིས་ཀྱི་སྐུ་དྲིན་ལ་བརྟེན་ནས་ངས་སྤྱི་ཚོགས་ཀྱི་རྗེས་ཟིན་ཐུབ་པ་དང། འདབ་གཤོག་གཉིས་ལྡན་གྱི་ཤེས་ཡོན་ཅན་ཞིག་ཏུ་གྱུར་ག་ལ་སྲིད། དེ་ཙང་མ་ཕ་མ་གཉིས་ཀྱི་སྐུ་དྲིན་ཡིན་པས། ཕ་མ་གཉིས་ཐུགས་ལྷོད་ལྷོད་དང་བདེ་ཞིང་སྐྱིད་པའི་ཚེ་འཇུག་ལ་རོལ་ཐུབ་པའི་འབད་བརྩོན་ཞུ་རྒྱུ་ཡིན། སླད་མ་འོངས་པར་ངས་འཇིག་རྟེན་འདིའི་སྟེང་གི་བདེ་སྐྱིད་ལོངས་སྤྱོད་ཚང་མ་ཕ་མ་གཉིས་ལ་སྤྲོད་ཐུབ་པ་བྱེད་ཀྱི་ཡིན། ངའི་དམིགས་ཡུལ་གཙོ་བོ་གསུམ་པ་ནི། འབྱུང་འགྱུར་འགྲན་ཟླ་བྲལ་བའི་ཚན་རིག་པ་ཞིག་བྱ་རྒྱུ་དེ་ཡིན། ང་རང་ཆུང་དུས་ནས་ཀྱི་ནང་དོགས་འདྲི་ཡིས་ཁེངས་པ་དང་དོགས་སློང་སྙིང་སྟོབས་ཤུགས་ཆེ་ལྡན་ཡོད། ངས་མ་འོངས་པར་ཚན་རིག་པ་མཁས་ཅན་ཞིག་བྱས་ཏེ་འགྲོ་བ་མིའི་རིགས་ཀྱི་འཚོ་བའི་ནང་ཕན་ཐོགས་ཡོད་པའི་འཕྲུལ་ཆས་གསར་པ་མང་པོ་གསར་གཏོད་དང་འཛམ་གླིང་གི་ཁོར་ཡུག་དེ་སྲུང་སྐྱོབ་བྱེད་ཀྱི་ཡིན། གལ་སྲིད་ངས་ཚན་རིག་པ་ཞིག་བྱས་ཏེ་འཛམ་གླིང་གི་ཁོར་ཡུག་སྲུང་སྐྱོབ་མ་བྱེད་ན་འབྱུང་འགྱུར་མི་རབས་གསར་པ་རྣམས་ལ་འཚོ་གནས་ཀྱི་དཀའ་ངལ་ཆེན་པོ་ཞིག་འཕྲད་རྒྱུ་ཉག་ཅིག་རེད་ལ། ༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་ཐུགས་རྒྱུད་དགོངས་པ་ཞིག་ཀྱང་ཡིན། མཐའ་མེད་མུན་ནག་ཁྲོད་དུ།། ཁྱར་ཁྱོར་གོམ་སྟབས་སྤོ་སྐབས།། བྱམས་བརྩེ་ལྡན་པའི་ཕ་མས།། ལམ་སྟོན་སྒྲོན་མེ་སྤར་བྱུང།།ཤེས་ཡོན་གནས་ལ་བརྩོན་སྐབས།། ཕུགས་འདུན་ཡིད་ལ་འཆར་བྱུང།། དམིགས་ཡུལ་སྒྲུབ་རྒྱུའི་ཆེད་དུ།། ཤེས་ཡོན་གནས་ལ་འབད་དགོས།།