ལྷག་པ་དོན་གྲུབ།སྦེལ་ཀོབ་བོད་ཁྱིམ། གཞི་རིམ་གོང་མའི་བོད་དགེ།       སྤྱི་ཚོགས་ཀྱི་སྤུས་ཚད་དང་སྤྱི་ཚོགས་ཡར་རྒྱས་ནི། སྤྱི་ཚོགས་དེ་ནང་ཕྱིའི་མཐུན་རྐྱེན་བཟང་པོ་འཛོམས་མིན་ཁོ་ན་ལ་ཚད་འཇལ་བ་ནི་ཆེས་བླུན་ཞིང་ཡ་མཚན་གྱི་གནས་སུ་མཐོང་། འོན་ཏང་སྤྱི་ཚོགས་ཀྱི་ཁྲོད་དུ་ཤེས་ཡོན་ཅན་གྱི་མིས་རང་དོན་ཁོག་བཅུག་དང་སྤྱི་དོན་ཕྱིར་བྱས་ཀྱི་བསམ་ངན་བཅང་སྟེ་གཡོ་ཁྲམ་དང་། ངག་འཇམ་སོགས་ཐབས་ཤེས་དུ་མས་བྱ་སྤྱོད་སྣ་མིན་སྤེལ་ཏེ་མི་མང་མགོ་བོ་རྨོངས་སུ་བཅུག་པ་ནི་དེ་བས་ཡ་མཚན་ཆེ་བའི་གནས་ཤིག་ཡིན་པས། ཤེས་ཡོན་རྐྱང་པས་སྤྱི་ཚོགས་ཀྱི་སྤུས་ཚད་འཇལ་ན་ཨེ་འགྲིག་སྙམ་པའི་བློ་དྭོགས་རང་བཞིན་གྱིས་འབྱུང་བཞིན་འདུག      དངོས་དོན་དུ་ཤེས་ཡོན་ཅན་གྱི་མི་ནི། སྒེར་པ་ལས་སྤྱི་པ་གཙིགས་ཆེན་དུ་འཛིན་ཞིང་སྤྱི་སེམས་དང་ལྷག་བསམ་ཆེ་བ། སྤྱི་པའི་དོན་དུ་སྒེར་པ་བློས་བཏང་གི་ཆོད་སེམས་བརྟན་པོ་ཡོད་པ། གཞན་ཕན་གྱི་བསམ་བློའི་ཞག་གིས་བརླན་པ་སོགས་ནི་དུས་རབས་ཉེར་གཅིག་གི་ཤེས་ཡོན་ཅན་གྱི་མི་རྣམས་ལ་ངེས་པར་མཁོ་ཞིང་མེད་དུ་མི་རུང་བའི་ཆ་རྐྱེན་གལ་ཆེ་ཞིག་ཏུ་མཐོང་།      དེས་ན་སློབ་གྲྭར་སློབ་ཁྲིད་བྱས་པའི་བརྒྱུད་རིམ་ལས་ཐོབ་པའི་དེབ་ཀྱི་ཤེས་རྒྱ་ཇི་ཙམ་ཆེ་ཡང་སློབ་སྦྱོང་ཐོན་ཏེ་སྤྱི་ཚོགས་ཁྲོད་དུ་ཕྱག་ལས་གནང་སྐབས། ལྷག་བསམ་དང་གཞན་ཕན་དང་སྤྱི་དོན་གྱི་བསམ་པ་སོགས་ཀྱི་མ་འདངས་པའི་དབང་གིས་རང་གཞན་ཀུན་ལ་གནོད་པ་འབའ་ཞིག་ལས་ཕན་པ་མི་འབྱུང་བའི་མིག་དཔེ་རང་རེའི་སྤྱི་ཚོགས་ཁྲོད་དུ་དངོས་གསལ་མཐོང་རྒྱུ་ཡོད་པ་ལགས་ཤིང་། ༸རྒྱལ་དབང་སྐུ་ཕྲེང་སྐུ་ཕྲེང་བཅུ་བཞི་པ་ཆེན་པོ་མཆོག་གི་རླབས་ཆེན་དགོངས་པའི་འོག་སཱི་ཤེས་ཡོན་ངོ་སྤྲོད་གནང་བའི་དགོས་དམིགས་གཙོ་བོ་ཡང་དེར་ཟད་སྙམ།      དུས་རབས་ཀྱི་འགྱུར་འགྲོས་དང་དུས་ཚོད་ཀྱི་དགོས་མཁོ་ལ་བརྟེན་ནས་སློབ་གྲྭར་སློབ་སྦྱོང་སྤྲོད་ཐབས་དང་འཛིན་གྲྭ་སྟངས་འཛིན་གནང་ཕྱོགས་ཐད་འགྱུར་བ་ཆེན་པོ་ཕྱིན་ཟིན་པ་ནི་དགེ་རྒན་རྣམས་ཀྱིས་ངེས་པར་ཁས་ལེན་གནང་དགོས་ཤིང་། རང་ཉིད་ཀྱིས་ཀྱང་དེ་མཚུངས་འགྱུར་བ་གཏོང་དགོས་བཟློག་མེད་ལས་འགན་ཞིག་ཏུའང་མངོན།       སྔ་མོ་ཕྱི་དྲོ་སློབ་གྲྭ་གྲོལ་མཚམས་སློབ་ཕྲུག་རྣམས་ཁང་པའི་ཉེ་འཁྲིས་སྲང་ལམ་ཁག་ཏུ་ཐོན་ཏེ་རྐང་ཤུབས་རྙིང་པ་རྡོག་པོར་བསྒྲིལ་ཏེ་སྤོ་ལོ་བཟོས་ནས་རྐང་རྗེན་དུ་རྐང་སྤོལ་བརྩེས་པ་དང་། རྒྱུག་ཆུ་ཆུང་གྲས་བཀག་སྟེ་རྐྱལ་རྫིང་བཟོས་ནས་ཆུ་བརྐྱལ་པ་དང་། གཅིག་སྟེང་གཅིག་བརྩེགས་ཀྱི་རྡེའུའི་རྩིག་པ་སྤོ་ལོས་གཏོར་ཏེ་བསྐྱར་དུ་བརྩིགས་དགོས་པ་སོགས་ལུས་པོ་ཡར་རྒྱུག་མར་རྒྱུག་གི་རྩེད་མོ་སྣ་ཚོགས་བརྩེས་ཤིང་། སྐབས་དེར་ཕྲུ་གུ་ཕན་ཚུན་གཅིག་གིས་གཅིག་ལ་ཤོད་རེས་དང་འཁྲུག་འཛིང་སོགས་ཀྱིས་ཉམས་མྱོང་འདྲ་མིན་བསགས་ཏེ་འཚར་ལོངས་བྱུང་བས་མི་ཚེའི་དཀའ་ངལ་མང་པོ་ཞིག་གདོང་ལེན་བྱེད་རྒྱུའི་སློབ་སྦྱོང་ཆུང་དུས་རྩེད་མོའི་ཞར་ནས་ཤེས་རྒྱུའི་གོ་སྐབས་བཟང་པོ་ཡོད་རུང་། དེང་དུས་སློབ་ཕྲུག་རྣམས་ཕྱི་དྲོ་འཛིན་གྲྭ་གྲོལ་རྗེས་སྤྱོད་བདེའི་བརྙན་འཕྲིན་དང་ལག་ཐོགས་ཁ་པར་སོགས་སུ་གཅིག་གིས་གཅིག་ལ་གསོད་རེས་དང་རང་རྒྱལ་གཞན་ཕམ་སོགས་ཀྱི་བསམ་ངན་སློབ་པའི་རྩེད་མོ་འབའ་ཞིག་ལ་མགོ་བོ་གཡེངས་ཏེ་ལུས་པོ་འཚར་ལོངས་བྱུང་བ་ལ་འགལ་རྐྱེན་དང་དབང་པོ་འཕྲོ་བརླག་གཏོང་བ་ལ་མཐུན་རྐྱེན། དེ་བཞིན་ཕྲུ་གུ་ཕན་ཚུན་འཁྲུག་འཛིང་སྐབས་གདོང་ལེན་སྣ་མིན་བྱེད་དགོས་སོགས་དངོས་ཡོད་མི་ཚེའི་དཀའ་ངལ་མང་པོར་ཆུང་དུས་ནས་ཉམས་གསོག་གི་གོ་སྐབས་བརླགས་ཏེ་ནར་སོན་ནས་དཀའ་ངལ་ཆུང་རིགས་ལའང་རང་རྒྱལ་གཞན་ཕམ་གྱི་བསམ་བློའི་མེ་ལྕེ་ཆུང་ཡང་རི་བོ་མེར་བསྲེགས་ཀྱི་དཔེ་ལྟར་གནས་ཚུལ་ཆུང་རིགས་ཀྱིས་ཆེན་པོ་བཟོས་པ་ཧ་ཅང་མང་པོ་མཐོང་རྒྱུ་ཡོད་པ་ནི་འཛམ་གླིང་ཡར་རྒྱས་ཀྱི་མིང་ཐོག་ནས་དོན་དངོས་ཉམས་ཆག་ཏུ་བཏང་བ་ཞིག་ཏུ་མཐོང་།       མདོ་དོན་སྤྱི་ཚོགས་དང་དུས་ཀྱི་འགྱུར་འགྲོས་ཀྱིས་བཟོས་པའི་བཅུན་དཀའ་བའི་དུས་རབས་ཉེར་གཅིག་གི་སློབ་ཕྲུག་རྣམས་འཛིན་གྲྭར་འབྱོར་སྐབས་སྟངས་འཛིན་བྱེད་སྟངས་ཀྱང་དུས་ཀྱི་དགོས་མཁོ་དང་བསྟུན་ནས་འགྱུར་བ་དགོས་རྒྱུ་ནི་ཤིན་ཏུ་གནད་ཆེ། དེ་ཡང་འཛིན་གྲྭ་སྟངས་འཛིན་གྱི་ཐོག་ལ་བསམ་ཚུལ་བརྗོད་པའི་སྔ་རོལ་དུ་སློབ་ཕྲུག་རྣམས་དུས་ཐོག་འཛིན་གྲྭར་ཚང་འཛོམས་དགོས་རྒྱུ་ཤིན་ཏུ་གལ་ཆེ་བས་ཐོག་མར་འབྲེལ་ཡོད་དགེ་རྒན་རྣམ་པ་དྲིལ་བུ་བརྡུང་མ་ཐག་ཏུ་འཛིན་ཁང་ཕྱི་རུ་གྲ་སྒྲིག་གིས་དུས་ཐོག་འཛིན་གྲྭར་ཕེབས་ནས་སློབ་ཕྲུག་རྣམས་ལ་མིག་དཔེ་བསྟན་དགོས། འཛིན་གྲྭར་ཞུགས་མ་ཐག་སློབ་ཁྲིད་ཀྱི་བྱ་བར་མ་ཞུགས་པར་མཚམས་སྦྱོར་གྱི་ཚུལ་དུ་སློབ་གྲྭའི་ཁོར་ཡུག་དང་གནམ་གཤིས་སོགས་ཐད་སྐར་མ་གཅིག་ཙམ་བཀའ་མོལ་གནང་ནས་སློབ་ཕྲུག་གི་བློ་ལྷིང་བབས་འཇུག་རྒྱུ་ཤིན་ཏུ་གལ་ཆེ།      དེའི་རྗེས་དངོས་གཞི་སློབ་ཁྲིད་སྐབས་སུ་དགེ་རྒན་འགའ་ཞིག་གིས་བསམ་བློ་གུ་ཡངས་ཡིན་མདོག་གིས་སྣོད་ཁ་སྦུབས་པའི་སྐྱོན་འཛིན་གྲྭར་གཉིད་ཁུག་མཁན་སློབ་ཕྲུག་རྣམས་སྣང་མེད་བཞག་པའི་འབྲས་བུར་བསམ་བློའི་གནས་ཚད་མ་སྨིན་པའི་སློབ་ཕྲུག་ཕལ་མོ་ཆེས་ཞྭ་དཔེ་ལྷམ་འགེབས་ཀྱི་དཔེ་ལྟར་གྱུར་ཏེ་ནམ་ཞིག་འཛིན་གྲྭའི་སློབ་ཕྲུག་ཕྱེད་ཙམ་གཉིད་ཁུག་པའི་ཁྲོད་དུ་སློབ་ཁྲིད་བྱ་དགོས་པའི་དཀའ་ངལ་ངེས་པར་བྱུང་ངེས་ཤིང་། དེས་སློབ་ཕྲུག་གི་འདུན་ལམ་ཙམ་མིན་པར་ནམ་ཞིག་མི་རིགས་དང་རྒྱལ་ཁབ་ཀྱི་ཕུགས་དམིགས་ཀྱང་བརླགས་པར་ཐེ་ཚོམ་མེད། དེས་ན་དཀའ་ངལ་དེ་རིགས་ཐོག་མར་འབྱུང་མ་ཐག་ཏུ་སྣང་མེད་མི་འཇོག་པར་འཕྲལ་དུ་གོ་སྐོན་གནང་ནས་སློབ་ཕྲུག་དང་རྒྱལ་ཁབ་མི་རིགས་བཅས་ཀྱི་ཕུགས་དོན་སྒྲུབ་པར་རམ་འདེགས་ཞུ་དགོས། དེ་ལྟར་བྱེད་ན་སློབ་ཕྲུག་རྣམས་ཀྱིས་སྐབས་ཐོབ་མི་དགའ་བ་བྱེད་རྒྱུ་ངེས་ཀྱང་དགེ་རྒན་ལ་འཁྲི་བའི་ལས་འགན་གྱི་བྱ་བར་འཐུས་ཤོར་ཕྱིན་མེད་པས་ནམ་ཞིག་རང་གི་ཐག་ཆོད་ལ་སྤོབས་པ་བྱ་བའི་དུས་ཤིག་ངེས་པར་སླེབས་ངེས་སྙམ།       དེང་དུས་ཀྱི་སློབ་ཕྲུག་ནི་སྤྱི་ཚོགས་དྲ་རྒྱས་གར་ཁྲིད་དུ་གྱུར་པའི་གནས་སྟངས་ལ་གཞིགས་ན་འཛིན་གྲྭ་སྟངས་འཛིན་ནི་དགེ་རྒན་ཚོར་གདོང་ལེན་བྱ་དཀའ་བའི་གནས་ཚུལ་ཆེན་པོ་ཞིག་ཏུ་གྱུར་ཡོད་སྟབས། དགེ་རྒན་རྣམ་པས་ཐབས་ཤེས་གཉིས་ཀྱི་ཐོག་ནས་སློབ་ཕྲུག་བསྐྱང་དགོས་རྒྱུ་ནི་བདེན་པའི་གནས་ཚུལ་རྣལ་མ་ཞིག་ལགས། དེ་ཡང་མཐའ་གཅིག་ཏུ་བྱམས་པོ་འབའ་ཞིག་དང་མཐའ་གཅིག་ཏུ་ཉེས་རྡུང་ཁོ་ནས་མ་ཡིན་པར་སྐབས་ཐོབ་གནས་སྟངས་ལ་གཞིགས་ཏེ་ཐབས་ལམ་བརྟེན་དགོས་རྒྱུ་གལ་ཆེར་མཐོང་། དེ་ཡང་སྐབས་འགར་སློབ་ཕྲུག་གི་སྤྱོད་ཚུལ་མི་མཛེས་པ་ཆུང་ཚགས་རིགས་ལ་མཐོང་ནའང་མ་མཐོང་བའི་ཚུལ་འཛིན་དགོས་ཤིང་། སྐབས་འགར་ངེས་པར་མཇུག་སྣོན་བྱ་དགོས་པའི་གནས་ཚུལ་ཡོང་ངེས་ན། དུས་ནམ་ཡང་སློབ་ཕྲུག་དམངས་ཀྱི་མདུན་སར་མཇུག་སྣོན་འཕྱ་སྨོད་མི་བྱེད་པར་ཟུར་དུ་ཆེད་འགུགས་ཀྱིས་སློབ་གསོ་ལམ་སྟོན་གནང་ཐུབ་ན། སློབ་ཕྲུག་སྒེར་གྱི་རང་མཐོང་ལ་དོ་ཕོག་མི་འགྲོ་བའི་འགན་འཁུར་གྱི་བསམ་པས་ཀུན་ནས་བསླངས་ཐུབ་ན། སློབ་ཕྲུག་དེས་ཀྱང་རང་སྐྱོན་ངོས་ལེན་དང་ཁས་ལེན་སོགས་གསན་འཇོག་གནང་རྒྱུའི་གོ་སྐབས་ཆེ་བར་མཐོང་། དེ་མོན་སྤྱི་དམངས་མདུན་སར་ལེགས་བཅོས་བྱེད་ན་སློབ་ཕྲུག་བྱེ་བྲག་དེའི་རང་མཐོང་ལ་གནོད་དེ་བཟང་སྤྱོད་བྲལ་བའི་སྤྱོད་ཚུལ་བསྟན་ནས་སློབ་དགེ་ལའང་ཁ་ལན་སློག་པ་དང་། སློབ་གསོ་ལམ་སྟོན་ལ་བརྩི་འཇོག་མི་བྱེད་པ་སོགས་ཀྱི་དཀའ་ངལ་དངོས་སུ་འཕྲད་དང་ཕྲད་མུས་ཀྱི་མྱོང་བ་དེང་དུས་ཀྱི་དགེ་རྒན་ཕལ་མོ་ཆེ་ལ་ཡོད་གཤའ་ལགས།       འཛིན་གྲྭ་སྟངས་འཛིན་ཞེས་བརྗོད་དུས། སློབ་ཕྲུག་རྣམས་འཛིན་ཁང་གི་ནང་དུ་ལུས་པོ་འགུལ་སྐྱོད་ཀྱང་མི་ཆོག་ཅིང་། ཞེད་སྣང་དང་དངངས་སྐྲག་གི་སྒོ་ནས་དགོས་ངེས་ཅན་གྱི་བཀའ་མོལ་ཡང་གནས་མི་ཐུབ་པར་ཙོག་པུར་བཞུགས་ནས་གསན་བཞེས་གནང་ན་འཛིན་གྲྭ་སྟངས་འཛིན་ཡག་པོ་ཡོད་པའི་གོ་ན་མིན་སྙམ། འོ་ན་ཅི་འདྲ་ཞིག་ལ་ཟེར་ཞེ་ན། སློབ་ཕྲུག་རྣམས་དགའ་མོས་དང་ལྡན་པའི་ཐོག་ནས་དགེ་རྒན་ལ་གསན་འཇོག་གནང་ཞིང་། དགོས་ངེས་ཅན་གྱི་བཀའ་མོལ་གནང་བར་འཇིགས་སྣང་དང་དངངས་སྐྲག་མེད་པར་སྡོད་རོགས་ལ་བཀའ་མོལ་གནང་པའི་གུ་ཡངས་ཀྱི་རང་དབང་ཡོད་པའི་ཐོག་ནས་སློབ་སྦྱོང་ལ་གསན་བཞེས་གནང་ན་འཛིན་གྲྭ་སྟངས་འཛིན་ལེགས་པོ་ཡོད་པའི་གྲས་སུ་བརྩིས་འཐུས་སྙམ། དེས་ན་སློབ་དགེ་ཚོས་འཛིན་གྲྭའི་ནང་དུ་སློབ་ཕྲུག་རྣམས་ལ་སྡིག་ར་བསྐུལ་ནས་འཇིགས་སྣང་ཅན་གྱི་ཁོར་ཡུག་ཁྲོད་དུ་མིན་པར་དགའ་སྣང་དང་སྤྲོ་སྣང་ལྡན་པའི་ཐོག་ནས་རང་གི་བསམ་ཚུལ་བཟང་ཞན་གང་ཡང་དམངས་ཀྱི་མདུན་སར་གསུང་རྒྱུའི་སྤོབས་པ་སྐྱེས་ཤིང་། དམའ་ཞུམ་གྱི་བསམ་པ་མི་སྐྱེ་བའི་ཁོར་ཡུག་བཟང་པོ་ཞིག་བསྐྲུན་ཐུབ་པ་དགོས་རྒྱུ་ཤིན་ཏུ་གལ་ཆེ།       ང་ཚོས་སློབ་ཁྲིད་བྱེད་སའི་ཡུལ་ནི་གཟུགས་པོ་རིང་ཡང་བསམ་བློའི་གནས་ཚད་མ་སྨིན་པའི་སློབ་ཕྲུག་རྣམས་ཡིན་པས་འཛིན་ཁང་ནང་དུ་ཁོང་དག་གི་ནོར་འཁྲུལ་བཟོ་རྒྱུ་ཐེ་ཚོམ་མེད་སྙམ་པའི་བསམ་པའི་འཁྱེར་སོ་འཛིན་རྒྱུ་ཤིན་ཏུ་གནད། དེ་མིན་སློབ་ཕྲུག་གི་ནོར་འཁྲུལ་བཟོས་པ་ལ་མི་འདོད་ཅིང་སུན་སྣང་གི་བསམ་པས་སློབ་ཕྲུག་བྱེ་བྲག་པར་ཉེས་རྡུང་དང་། དེའི་རྐྱེན་གྱིས་དགེ་རྒན་ཉིད་ཀྱི་སློབ་ཁྲིད་ཀྱི་བྱ་བར་འཐུས་ཤོར་དང་གྲ་སྒྲིག་བྱས་པ་ལྟ་བུའི་སློབ་ཁྲིད་བྱེད་རྒྱའི་གོ་སྐབས་མེད་པའང་ང་ཚོར་ཉམས་མྱོང་མང་དག་བསགས་ཡོད་ངེས། དེས་ན་སློབ་ཕྲུག་ནི་ལོ་ཚད་ལ་དཔག་པའི་ནོར་འཁྲུལ་ཆུང་ཚགས་རིགས་བཟོ་ངེས་སྙམ་པའི་གུ་ཡངས་ཀྱི་བསམ་བློ་གཏོང་ཐུབ་ན་སློབ་ཕྲུག་གི་ནོར་འཁྲུལ་ལ་མི་བཟོད་པའི་བསམ་པ་མི་སྐྱེ་ཞིང་། དེ་ལ་བརྟེན་ནས་ཉེས་རྡུང་གཏང་རྒྱུའི་ཉེན་ཁའང་ཆུང་བ་མ་ཟད། ཉིན་རེའི་སློབ་ཁྲིད་ཀྱི་བྱ་བའང་རང་གིས་འཆར་འགོད་ལྟར་ལག་ལེན་གནད་སྨིན་ཡོང་རྒྱུ་དང་། དེ་ལ་བརྟེན་ནས་སློབ་ཕྲུག་རྣམས་ཀྱིས་ཀྱང་ཉིན་རེའི་སློབ་སྦྱོང་ལ་དོ་འཁུར་ཆེན་པོའི་གསན་བཞེས་གནང་རྒྱུའི་གོ་སྐབས་ཡོད་པའང་ང་ཚོར་མྱོང་བ་ཆེན་པོ་བསགས་ཡོད།      མཐའ་དོན་དགེ་རྒན་རྣམས་ནི་མ་འོངས་སྤྱི་ཚོགས་ཀྱི་ཁ་ཕྱོགས་བཟོ་མཁན་གྱི་གནད་ཡོད་མི་སྣ་ཞིག་ཆགས་ཡོད་པས་རང་གི་སྒོ་གསུམ་གྱི་བྱ་སྤྱོད་མ་འོངས་སོན་རྩ་རྣམས་ཀྱི་མིག་དཔར་གྱུར་པ་ཞིག་དགོས་རྒྱུ་གནད་ཀྱི་སྙིང་པོ་ཡིན་པས་དེ་དོན་དགོངས་འཇགས་ངེས་པར་དགོས་སྙམ་མོ།།

སྐལ་ལྡན།བོད་དགེ། སེ་ལ་ཀུའི་བོད་ཁྱིམ། གོ་དོན།       ནང་སྦྱོང་ཟེར་བ་ནི། ཉིན་རེའི་འཛིན་གྲྭའི་ཚོགས་ཐུན་གྱི་དུས་ཡུན་ལས་འགལ་ཏེ། དུས་ཚོད་ངེས་ཅན་ཞིག་གི་ནང་སློབ་ཕྲུག་ཚོས་ཀློག་རྩལ་དང་། འབྲི་རྩལ། ཉན་རྩལ། དེ་བཞིན་འཆད་རྩལ་སོགས་ཡར་རྒྱས་གཏོང་ཐབས་དང་སྐྱར་སྦྱོང་བྱེད་པའི་བྱེད་སྒོ་ལ་ཟེར། སྤྱིའི་དམིགས་ཡུལ།       སྤྱིར་ནང་སྦྱོང་བཀོད་སྒྲིག་བྱེད་པའི་དམིགས་ཡུལ་ནི། འཛིན་གྲྭའི་ནང་བསླབས་ཟིན་པའི་སློབ་ཚན་སྐྱར་སྦྱོང་བྱེད་པའི་གོ་སྐབས་དང་། འཛིན་གྲྭའི་ནང་བསླབས་ཟིན་པའི་སློབ་ཚན་ལས་གཞི་རྒྱ་ཆེ་ལ་གཏིང་ཟབ་པའི་གནད་དོན་གོ་རྟོགས་ཡོང་བ། སློབ་སྦྱོང་བྱེད་སྐབས་དུས་ཚོད་སྟངས་འཛིན་དང་སྦྱོང་ཐབས་ཀྱི་རྩལ་ནུས་རྒྱས་པ། སློབ་ཚན་གསར་པ་སྦྱོང་བའི་སྟ་གོན་བྱེད་ཐུབ་པ་སོགས་ཀྱི་ཆེད་དུ་ཡིིན་པ་རེད། ནང་སྦྱོང་བཀོད་སྒྲིག་བྱེད་ཐབས།       གཞི་རིམ་སློབ་གྲྭའི་སློབ་ཕྲུག་རྣམས་ལ་ནང་སྦྱོང་བཀོད་སྒྲིག་བྱེད་ཐབས་ལེགས་ཤོས་འདི་རེད་ཅེས་ཁ་མཚོན་གཅོད་ཐབས་བྲལ་ཡང་། ཕན་ནུས་ཆེ་ལ་ནུས་པ་ལྡན་པའི་ནང་སྦྱོང་བཀོད་སྒྲིག་བྱེད་པར་གཤམ་གསལ་ཐབས་ལམ་དང་རྒྱུད་རིམ་རྣམས་ཚུལ་བཞིན་བསྟེན་ཐུབ་ན་ཧ་ཅང་ཕན་ཐོག་ཆེ། དམིགས་ཡུལ་ཁ་གསལ།       ལས་དོན་གང་འདྲ་ཞིག་ཡིན་རུང་དམིགས་ཡུལ་དང་དགོས་པ་ཁ་གསལ་ཆགས་ན། ལས་དོན་དེའི་གྲུབ་འབྲས་སྨིན་པའི་མྱུར་ཚད་དང་སྤུས་ཚད་གང་ཅིར་ཁྱད་པར་ཆེན་པོ་ཡོད། དགེ་རྒན་གྱིས་སློབ་ཕྲུུག་ལ་ནང་སྦྱོང་བཀོད་སྒྲིག་བྱེད་སྐབས་ཀྱང་། དང་ཐོག་ནང་སྦྱོང་དེའི་གལ་གནད་ཀྱིི་རང་བཞིན་དང་། བསླབ་གཞིའི་སློབ་ཚན་དང་ཐད་ཀར་འབྲེལ་བ་ཡོད་ཚུལ། བྱ་སྤྱོད་དངོས་ལ་ཕན་ཐོགས་ཡོད་ཚུལ་སོགས་ཀྱི་དགོས་དམིགས་ཁ་གསལ་འགྲེལ་བརྗོད་བྱེད་ཐུབ་ན་ཧ་ཅང་ལེགས། དཔེར་ན། བརྡ་སྤྲོད་ཀྱི་སློབ་ཚན་ལས། ལ་དོན་གྱི་སྒྲ་སྦྱོར་དང་དོན་སྦྱོར་གྱི་སློབ་ཚན་དང་འབྲེལ་བའི་ནང་སྦྱོང་བཀོད་སྒྲིག་བྱས་པའི་དབང་དུ་བཏང་ན། རྗེས་འཇུག་གང་ཞིག་གི་རྗེས་སུ་ཕྲད་གང་ཞིག་འཇུག་པ་དང་། དེ་ལྟར་འཇུག་ཚུལ་གྱི་དཔེར་བརྗོད་རེ་གཉིས་འབྲི་སྟངས་ཤེས་པ་ཙམ་གྱིས་མི་ཆོག་པར། སྒྲ་དོན་གཉིས་ཀྱི་སྦྱོར་ཚུལ་ཤེས་པ་ལ་བརྟེན་ནས་རྩོམ་ཡིག་འབྲི་བ་དང་། རྒྱུན་གཏན་ཡིག་རིགས་འབྲི་བ། ཡིག་འབྲེལ་བྱེད་པ་སོགས་ཀྱི་སྐབས། ཕྲད་དང་རྣམ་དབྱེ་བཀོལ་སྤྱོད་ཚུལ་བཞིན་བྱེད་ཐུབ་པའི་དགེ་མཚན་ཡོད་ལུགས་དཔེ་མཚོན་དང་འབྲེལ་གསལ་བརྗོད་ཐུབ་པ་དང་། དེ་ལྟར་དམིགས་ཡུལ་ཁ་གསལ་འགྲེལ་ཐུབ་ན་སློབ་ཕྲུག་གིས་འབད་བརྩོན་ཆེ་བ་བྱེད་པ་མ་ཟད་ནང་སྦྱོང་སྤུས་ཚད་ལྡན་པ་ཡོང་ངེས་ཡིན། དངོས་དོན་དང་འབྲེལ་བ།       ནང་སྦྱོང་ཇི་འདྲ་ཞིག་བཀོད་སྒྲིག་བྱས་ཀྱང་། གང་ཐུབ་ཅི་ཐུབ་ཀྱིས་ནང་སྦྱོང་དེ་དོན་དངོས་ཀྱི་བྱ་སྤྱོད་དང་འབྲེལ་བ་ཡོད་པ་ཞིག་དང་། སྤྱི་སྒེར་ལ་ཕན་ཐོགས་ཡོད་པ་ཞིག་ཡིན་ཚུལ་ཁ་གསལ་ར་སྤྲོད་བྱས་ན། སློབ་ཕྲུག་གི་དང་བ་འདྲེན་པའི་ཁྱད་པར་ཆེན་པོ་ཡོད། དགེ་རྒན་གྱིས་ནང་སྦྱོང་དེ་དག་ངེས་པར་དོན་དངོས་དང་མཚམས་སྦྱོར་བྱེད་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཡིན། དཔེར་ན། ལས་དོན་གྱི་སྙན་ཞུ་འབྲི་སྟངས་ཀྱི་ནང་སྦྱོང་བཀོད་སྒྲིག་བྱས་པའི་དབང་དུ་བཏང་ན། གཞུང་འབྲེལ་དང་ཚོགས་སྐྱིད་ཁག་ལ་རང་ཉིད་ཀྱི་ད་ཡོད་དཀའ་སྡུག་དང་རེ་འདུན་དངོས་འབྲི་བཀོད་ཀྱིས་སྙན་ཞུ་འབྲི་འཇུག་པ་དང་། ཡང་ན་ཕྱིས་འབྱུང་རང་ཉིད་མཐོ་སློབ་ཁག་ལ་སློབ་འཇུག་གི་སློབ་ཡོན་ཞུ་ཕྱོགས་ཀྱི་སྙན་ཞུ་འབྲི་བ་ལྟ་བུ། ལག་ལེན་དངོས་དང་འབྲེལ་བའི་ཐོག་ནང་སྦྱོང་བཀོད་སྒྲིག་བྱེད་ཐུབ་ན་ཧ་ཅང་ལེགས། སློབ་ཚན་གཞན་ཡང་དེ་བཞིན་དོན་དངོས་དང་མཚམས་སྦྱོར་ཐུབ་པ་དང་། བྱེད་སྒོའི་རང་བཞིན་ཅན་གྱི་ནང་སྦྱོང་བཀོད་སྒྲིག་གང་མང་བྱེད་ཐུབ་ན་ཕན་ཐོགས་ཆེན་པོ་ཡོད། གོ་བརྡ་འཕྲོད་པོ་དགོས་པ།       སློབ་ཕྲུག་ལ་ནང་སྤྱོང་བཀོད་སྒྲིག་བྱེད་སྐབས་གོ་བརྡ་གསལ་པོ་འཕྲོད་པ་བྱེད་དགོས་པ་ལས། དོགས་པ་དང་སོམ་ཉིའི་གནས་སུ་ནམ་ཡང་ལྷུང་འཇུག་མི་རུང་། སློབ་ཕྲུག་ཚོས་སྒྲུབ་དགོས་པའི་ལས་དོན་གང་ཡིན་དང་། དགེ་རྒན་གྱི་རེ་བ་གང་ཡིན་ཁ་གསལ་གཏིང་གསལ་དགོས་རྒྱུ་ཧ་ཅང་གལ་ཆེན་པོ་ཡིན། ནང་སྦྱོང་གང་ཡིན་གསལ་པོ་མ་ཆགས་པ་དང་ཐེ་ཚོམ་གྱི་རང་བཞིན་ཅན་ནི་དགེ་རྒན་གྱི་ཞན་ཆ་ཆེས་ཆེ་བ་ཞིག་ཡིན་པས་ངེས་པར་ཡིད་གཟབ་དགོས་པ་ཞིག་ཡིན། ཚོགས་ཐུན་རྫོགས་མཚམས་སྐར་མ་རེ་ཟུང་ཞིག་གི་ནང་བྲེལ་ཚུབ་ཆེན་པོས་ནང་སྦྱོང་བཀོད་སྒྲིག་བྱེད་པ་དང་། […]

འཇམ་དབྱངས་དོན་གྲུབ།དགེ་རྒན། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་། གླེང་གཞི་མདོར་བསྡུས།       མི་རིགས་ཤིག་ཡར་རྒྱས་འགྲོ་མིན་ནི་ཤེས་ཡོན་ལ་རག་ལས་ཤིང་། ཤེས་ཡོན་ཡག་པོ་ཞིག་ཡོང་མིན་ནི་དགེ་རྒན་ལ་རག་ལས་ཡོད་པ་ནི་འཛམ་གླིང་མཁས་པ་ཡོངས་ཀྱིས་མགྲིན་དབྱངས་གཅིག་གྱུར་གྱིས་ཁས་ལེན་ཞུ་བཞིན་ཡོད། དེ་དང་ཕྱོགས་མཚུངས་ལག་པ་ཡ་གཅིག་གིས་ཐལ་མོ་མི་ཡོང་བས་ལག་ཟུང་མཉམ་དུ་བརྡབ་ན་ད་གཟོད་འབྲུག་སྒྲ་གྲགས་པ་བཞིན་ཐལ་སྒྲ་སྒྲོགས་ཀྱི་ཡོད་པ་བཞིན། དགེ་སློབ་གཉིས་ཟུང་དུ་མ་འབྲེལ་ནས་མཉམ་རུབ་མ་བྱས་ན་སློབ་མའི་སློབ་སྦྱོང་གི་གནས་ཚད་ཡར་རྒྱས་མི་འགྲོ་བ་བརྗོད་མི་དགོས་པ་ཡིན། ལྷག་པར་དུ་བོད་ཀྱི་ཁ་དཔེར། རྟ་གཅིག་བྱུང་ན་རྟེའུ་ནས་བྱུང་། མི་ཞིག་བྱུང་ན་ཆུང་ནས་བྱུང་ཞེས་པ་ལྟར་གཞི་རིམ་སློབ་མ་ཚོ་ནི་མི་རིགས་ཀྱི་སོན་རྩ་དང་འབྱུང་འགྱུར་རྒྱལ་ཁབ་དེའི་བདག་པོ་དང་དབུ་ཁྲིད་ངོ་མ་དེ་ཆགས་ངེས་པས། ཞོགས་པའི་ཉི་གཞོན་དང་འདྲ་བའི་བྱིས་པ་ཚོར་ཤེས་ཡོན་སློབ་སྦྱོང་ལེགས་པོ་ཞིག་སྤྲོད་དགོས་པ་ནི་ཤིན་ཏུ་གལ་ཆེན་པོ་ཡིན།      འོ་ན་གཞི་རིམ་སློབ་མའི་ཤེས་ཡོན་དང་ཀུན་སྤྱོད་ཡར་རྒྱས་འགྲོ་མིན་ནི་གཙོ་བོ་ཕ་མ་དང་དགེ་རྒན་ལ་རག་ལུས་ཡོད་པ་མ་ཟད། ལྷག་པར་དུ་སློབ་མ་ཚོའི་སེམས་གཏིང་ནས་བརྩི་འཇོག་དང་ཡིད་ཆེས་བྱེད་ས་ནི་དགེ་རྒན་ཡིན་པས། དགེ་རྒན་ཚོས་ལྷག་བསམ་རྣམ་དག་དང་སློབ་མ་སྐྱོང་བའི་རྣམ་དཔྱོད་ཀྱི་ཐབས་ཤེས་གཉིས་ཟུང་དུ་དམ་པོར་སྦྲེལ་དགོས་པ་ནི་ཤིན་ཏུ་གལ་ཆེན་པོ་ཡིན། ལས་འགུལ་དེའི་ཆ་ཤས་སུ་གྱུར་བ་གཅིག་ནི། སློབ་མ་རྣམས་ཀྱི་ཤེས་ཡོན་ཡར་རྒྱས་ཆེད་དུ་ནང་སྦྱོང་བསྐུལ་རྒྱུ་དེ་ཡིན་པས། དེ་རིང་འདིར་རང་ཉིད་བོད་ཕྱི་ནང་གཉིས་ནང་མི་ལོ་ཉེར་གསུམ་རིང་སློབ་གྲྭར་བསྐྱོད་པ་དང་། མི་ལོ་བདུན་ལྷག་ཙམ་རིང་དགེ་རྒན་བྱས་པའི་མྱོང་བ་གཞི་ལ་བཞག་ནས་སློབ་མ་ཚོར་ནང་སྦྱོང་ཇི་ལྟར་བསྐུལ་དགོས་མིན་སྐོར་ལ་མདོ་ཙམ་བརྗོད་རྒྱུ་ཡིན་པས། མ་འོངས་པར་གཞི་རིམ་སློབ་གྲྭའི་དགེ་བའི་བཤེས་གཉེན་རྣམ་པ་དག་གིས་སློབ་མ་ཚོར་ནང་སྦྱོང་ཇི་ལྟར་བསྐུལ་དགོས་མིན་ཐད་ཀྱི་དཔྱད་གཞིའི་རྒྱུ་ཆ་ཆུང་ངུ་ཙམ་ཞིག་ཏུ་འགྱུར་ཐུབ་པའི་ཡིད་ཆེས་དང་རེ་བ་ཞུ་རྒྱུ་ཡིན། སློབ་མ་རྣམས་ལ་ནང་སྦྱོང་བསྐུལ་བའི་དགོས་པ་རྒྱུ་མཚན་དང་དམིགས་ཡུལ་སྐོར།       སྤྱིར་ཆོས་དང་འཇིག་རྟེན་གྱི་ལས་དོན་གང་ཞིག་བསྒྲུབ་དགོས་ཀྱང་ཐོག་མར་ལས་དོན་དེ་བསྒྲུབ་དགོས་པའི་དགོས་པ་རྒྱུ་མཚན་དང་དམིགས་ཡུལ་ངེས་ཅན་ཞིག་ངེས་པར་དུ་རྟོགས་དགོས་ཤིང་། དམིགས་ཡུལ་མེད་པའི་ལས་ཀ་ནི་ཁ་ཕྱོགས་མེད་པའི་གྲུ་རྫིངས་བཞིན། ནམ་ཞིག་མཚོ་རླུང་དང་འཕྲད་དེ་འགལ་རྐྱེན་བར་ཆད་འཕྲད་རྒྱུར་གཏན་འཁེལ་བས། ཐོག་མར་དགེ་བའི་བཤེས་གཉེན་རྣམ་པ་ཚོས་སློབ་མ་རྣམས་ལ་ནང་སྦྱོང་བསྐུལ་རྒྱུའི་དགོས་དམིགས་གང་ཡིན་གསལ་པོར་མཁྱེན་དགོས། སློབ་མ་རྣམས་ཞོགས་པ་སྔ་པོ་ནས་ལངས་ཏེ་ཁ་ངོ་གཙང་མར་བཀྲུས་ཤིང་ཞོགས་ཟས་བཟས་རྗེས། དེ་རིང་རྒན་ལགས་ཀྱི་འགྲམ་ནས་ཤེས་བྱ་གསར་པ་ཅི་ཞིག་འཐོབ་ཀྱི་ཡོད་དམ་སྙམ་ནས་མཚར་སྣང་དང་དགའ་སྣང་གཉིས་སྦྲེལ་གྱིས་འཛིན་གྲྭར་བསྐྱོད་ཀྱི་ཡོད་པ་དང་། དེ་དང་ཕྱོགས་མཚུངས་དགེ་རྒན་ཚོའི་ངོས་ནས་ཀྱང་དེ་རིང་སློབ་མ་ཚོར་ཤེས་བྱ་གསར་པ་དང་བློ་བསྐྱེད་གསར་པ་འདི་འདྲ་ཞིག་སྤྲད་དགོས་འདུག་སྙམ་ནས་སྔོན་ཚུད་ནས་གྲ་སྒྲིག་འཐུས་སྒོ་ཚང་བའི་རྨང་གཞིའི་ཐོག་སྤྲོ་སེམས་འཁོལ་བའི་ངང་ནས་འཛིན་གྲྭར་བསྐྱོད་དགོས་ཀྱི་ཡོད། སློབ་ཚན་འགོ་ཚུགས་པ་དང་མཉམ་དུ་སྐར་མ་བཅུ་ཙམ་རིང་ཁ་སང་གི་སློབ་ཚན་ལ་དྲན་གསོ་དང་སྦྲགས་བསྐྱར་ཞིབ་ཏོག་ཙམ་བྱས་རྗེས་གཞི་ནས་སློབ་ཚན་གསར་པ་འཁྲིད་དགོས་ཀྱི་ཡོད་ཅིང་།      ཐོག་མར་སློབ་ཚན་གསར་པ་འདིའི་སྤྱི་བཤད་ངོ་སྤྲོད་དང་དེ་ནས་ས་བཅད་ཁག་རིམ་པ་བཞིན་དུ་དབྱེ་སྟེ། ས་བཅད་སོ་སོའི་ནང་དོན་མདོར་བསྡུས་རེ་སློབ་མ་ཚོར་ངོ་སྤྲོད་བྱེད་དགོས་ཀྱི་ཡོད། དེ་ནས་ས་བཅད་དང་པོ་ནས་འགོ་བཙུགས་ཏེ་རིམ་བཞིན་ཐ་སྙད་གསར་པ་དང་། བྱ་ཚིག་གསར་པ། ཚིག་རྒྱན་གསར་པ་སོགས་ངོ་སྤྲོད་ཞིབ་ཕྲ་བྱེད་དགོས་པ་མ་ཟད། བྱུང་ན་དཔེ་རིས་དང་བརྙན་པར་སོགས་ཀྱི་ལམ་ནས་ངོ་སྤྲོད་བྱེད་པ་དང་། མཚམས་རེར་གློག་བརྙན་དང་སྒྲུང་གཏམ་གྱི་ལམ་ནས་ངོ་སྤྲོད་བྱེད་དགོས་ཀྱི་ཡོད་པས། སློབ་མ་ཚོས་དེ་རིང་གི་འཁྲིད་བྱའི་སློབ་ཚན་དེ་མཐིལ་ཕྱིན་པ་ཤེས་རྟོགས་ཡོང་བའི་ཆེད་དུ་དགེ་རྒན་ཚོས་ཐབས་ལམ་འདྲ་མིན་སྣ་ཚོགས་ཀྱི་ལམ་ནས་སློབ་ཁྲིད་བྱེད་དགོས། དེ་ནས་སློབ་ཚན་གྲོལ་བ་དང་མཉམ་དུ་སློབ་མ་ཚོར་དེ་རིང་གི་སློབ་ཁྲིད་དང་འབྲེ་བའི་ཐོག་ནས་ནང་སྦྱོང་བསྐུལ་དགོས་པ་ལས། དགེ་རྒན་གྱིས་སློབ་ཁྲིད་མ་བྱས་པའི་སློབ་ཚན་གསར་པ་ནང་སྦྱོང་བསྐུལ་ན་སློབ་མ་ཚོར་རྡོག་འཁྲེས་ཆགས་ཀྱི་ཡོད། དེས་ན། ནང་སྦྱོང་བསྐུལ་བའི་དགོས་དམིགས་ནི། དེ་རིང་གི་སློབ་ཁྲིད་དེ་སློབ་མ་ཚོས་ཤེས་ཡོད་མེད་ལྟ་བའི་ཚད་ཐིག་ལྟ་བུ་ཡིན་པ་དེ་ངེས་པར་དུ་མཁྱེན་དགོས། དགེ་རྒན་གྱིས་སློབ་མ་རྣམས་ལ་དུས་རྒྱུན་དུ་ནང་སྦྱོང་བསྐུལ་དགོས་པའི་སྐོར།       གུང་ཐང་བསྟན་པའི་སྒྲོན་མེའི་བསླབ་བྱ་ནོར་བུའི་གླིང་དུ་བགྲོད་པའི་ལམ་ཡིག་ལས། ཉིན་རེ་ཟས་ཀྱང་མི་དྲན་རྩོམ་འགྲུས་རྩོམ། །ཞུགས་མ་ཐག་ནས་མཁས་པའི་གོ་འཕང་འདོད། །ཞག་གསུམ་ལོན་ཚེ་རྗེས་མེད་གཡེང་བས་འཁྱེར། །དེ་འདྲ་དེ་ལ་ཅི་ཡང་མི་ཡོང་བས། །བརྩོན་པ་ཆུ་བོའི་རྒྱུན་བཞིན་བསྟེན་ཞིག་ཨང་། །ཞེས་གསུངས་པ་ལྟར། ལས་དོན་གང་དང་གང་ཞིག་སྒྲུབ་དགོས་ཀྱང་ངེས་པར་དུ་རྟག་སྦྱོར་གྱི་བརྩོན་འགྲུས་བསྟེན་དགོས་པ་ལས། ཨ་གསར་རྟ་ལས་མགྱོགས་པ། །གཞུག་གུ་ལུག་ལས་ཐུང་བ། ཞེས་པ་ལྟར་ཉིན་ཤས་རིང་བརྩོན་འགྲུས་རྩོམ་ཞིང་དེ་ནས་དབྱར་གྱི་འཇའ་ཚོན་ཇི་བཞིན་ཡལ་བར་གྱུར་ན་གཏན་ནས་མི་འགྲིགས་པས། སློབ་མ་ཚོར་ནང་སྦྱོང་བསྐུལ་རྒྱུ་དེ་ཡང་དུས་རྟག་ཏུ་ཆད་མེད་བསྐུལ་དགོས་པ་ལས་མཚམས་རེར་བསྐུལ་ཞིང་མཚམས་རེར་མ་བསྐུལ་བར་བཞག་ན་སློབ་མ་ཚོའི་ཤེས་ཡོན་ཡར་རྒྱས་ལ་འགོག་རྐྱེན་འཕྲད་ཀྱི་ཡོད། འདིར་ང་ཚོ་འགྲོ་བ་མིའི་རིགས་ཀྱི་ཉིན་རེའི་འཚོ་བའི་ཁྲོད་ཀྱི་ཞལ་ལག་མཆོད་རྒྱུ་དང་གཟིམ་ཁུག་རྒྱུ་གཉིས་ཀྱི་ཐོག་ནས་དཔེ་མཚོན་ཙམ་ཞིག་ཞུས་ན། ང་ཚོ་ཚང་མ་ཉིན་ཞག་ཕྲུག་གཅིག་གི་ནང་དུས་ཐོག་ལ་ཞལ་ལག་མཆོད་དགོས་པ་ལས་མཚམས་རེར་ཚད་ལས་བརྒལ་བ་མཆོད་པ་དང་། ཡང་མཚམས་རེར་ཉིན་ཤས་ཞལ་ལག་མ་མཆོད་པར་བསྡད་པ་སོགས་བྱས་ན་འཕྲོད་བསྟེན་ལ་གནོད་སྐྱོན་ཡོང་གི་ཡོད་པ་ཡོངས་གྲགས་ཡིན་པས། […]

བྱམས་པ་བཀྲ་ཤིས།འབྲིང་རིམ་བོད་དགེ། ཀོ་ལེ་གྷལ་སཾ་བྷོ་ཊ་ཉིན་སློབ། ཆེད་བརྗོད།       སློབ་ཁྲིད་ཀྱི་བརྒྱུད་རིམ་ཁྲོད་དུ་བསྐྱར་སྦྱོང་དང་དྲན་ཤེས་བརྟན་པོ་ཟེར་བ་ནི་དོན་གནད་ཅིག་རེད། ལྷག་དོན་དུ་དགེ་རྒན་གཅིག་གི་ངོས་ནས་སློབ་ཚན་གང་ཞིག་བསླབས་ཀྱང་དེ་ནི་འདས་མ་ད་གསུམ་གྱི་དུས་རིམ་ཁྲོད་དུ་སྤྱི་ཚོགས་ཀྱི་ཁོར་ཡུག་དང་བསྟུན་མཁས་གནང་ནས་སློབ་ཁྲིད་ཡང་དག་པ་ཞིག་ཡོང་བར་འབད་དགོས། སློབ་ཁྲིད་སྐབས་སུ་བརྗོད་གཞི་གཅིག་ལ་འགྲེལ་བརྗོད་མི་འདྲ་བ་གསུམ་གྱི་སྒོ་ནས་སློབ་ཐབས་དགོས་ངེས་རེད། དེ་ནི་སློབ་མའི་དབང་པོའི་བབ་དང་བསྟུན་བཤེར་བྱས་པའི་རྒྱུན་གཏན་གྱི་སློབ་ཁྲིད་བཟང་པོ་ཞིག་ཡིན།      སློབ་མ་རྣམས་ལ་སློབ་ཁྲིད་མིང་དོན་མཚུངས་པའི་ཐབས་མཁས་ཀྱིས་ཤེས་སུ་མ་བཅུག་ན། ནང་ལས་ཀྱིས་དོན་སྙིང་ལྡན་པའི་ཡར་རྒྱས་དང་དོན་ཐོག་ཏུ་འཁྱོལ་བའི་ལག་ལེན་ཞིག་མི་འོང་བ་ནི་བརྗོད་སླ་བ་ཞིག་མ་རེད་དམ།  ནང་ལས་འབྲི་རུ་བཅུག་པ་ནི་སྦྱོང་བརྡར་ཞིག་དང་བསླབས་ཟིན་པ་རྣམས་རང་རྒྱུད་དུ་གཏན་དུ་མ་ཡལ་བར་ཤེས་བྱ་རིག་གནས་ཀྱི་ས་བོན་བཏབ་པ་དང་ཁྱད་མེད་ཙང་། ནང་ལས་སྐུལ་ཐབས་ལའང་བསམ་གཞིགས་ཀྱི་སྒོ་མོ་ཕྱེ་སྟེ་སློབ་མ་ཚོའི་གནས་ཚད་དང་མཉམ་པ་ཞིག་དགོས་པ་མ་ཟད་ནང་ལས་གང་ཞིག་འབྲི་འདོད་ཀྱི་བློ་ཡོད་པ་ཞིག་སྐུལ་ཐབས་གནང་དགོས། གཞན་ཡང་། སློབ་མ་རྣམས་ལ་ནང་ལས་བསྐུལ་དགོས་ཟེར་བ་ནི་དགེ་རྒན་གྱིས་བསླབས་ཟིན་པའི་སློབ་ཚན་ཁག་གཅིག་པུ་ལ་ངོས་འཛིན་ཐབས་མེད་པ་ཞིག་རེད། འོན་ཀྱང་། དེང་སྐབས་ཕལ་མོ་ཆེས་ནང་ལས་ནི་སློབ་ཚན་གྱི་བསླབ་གཞི་ཙམ་དང་འབྲེལ་བའི་ནང་སྦྱོང་བསྐུལ་བ་ལས་གཞི་རྒྱ་ཆེ་བའི་གནམ་འོག་གི་ཤེས་བྱའི་གཏེར་མཛོད་གཞན་དག་ལ་ལྷོད་གཡེང་ཆེན་པོ་ཤོར་བའི་སྐྱོན་ཆ་ཡོད།       ནང་ལས་ནི་སློབ་ཚན་གྱི་སྦྱོང་ཚན་ཙམ་མིན། ནང་ལས་ནི་སློབ་ཚན་བསྐྱར་སྦྱོང་དང་ཟིན་ཐོ་འགོད་པ་ཙམ་དང་སློབ་ཚན་གྱི་ནང་དོན་ཤེས་པ་ཙམ་ལ་དམིགས་པའི་ནང་སྦྱོང་ཞིག་ག་ལ་ཡིན། འདི་འདྲ་རིགས་རྐྱང་རྐྱང་གིས་མཐའ་ཡས་པའི་ཤེས་བྱའི་ནོར་ལོངས་སྤྱོད་ལ་བྲོ་བ་མྱོང་རྒྱུ་ཕར་ཞོག་དེ་ལས་ལྡོག་སྟེ་སློབ་མའི་རིག་གསར་གྱི་གནས་སྐབས་ཀྱང་ཆུད་ཟོས་གཏོང་བཞིན་ཡོད་པར་ཚོར་དགོས་ངེས་རེད། གཤམ་ལ་དོན་ཚན་མི་འདྲ་བ་ཁ་ཤས་ཀྱིས་གུས་པའི་ནང་སྦྱོང་དང་འབྲེལ་བའི་ཐོག་ཅུང་ཟད་བཤད་འདོད་པ་ནི་འདི་དག་ཡིན། དང་པོ། ནང་སྦྱོང་དང་དགེ་རྒན་བར་གྱི་འབྲེལ་བ།       ནང་ལས་སྦྱོང་ཚན་ཟེར་བ་ནི་རྒྱུན་དུ་དགེ་རྒན་གྱི་སློབ་ཁྲིད་བཟང་ངན་ལ་ཁྱད་པར་ཆེན་པོ་ཡོད། དགེ་རྒན་གྱིས་སློབ་ཚན་རྐྱང་རྐྱང་མ་གཏོགས་དེ་ལས་གཞན་དག་གཞི་རྒྱ་ཆེ་སར་རིག་པའི་སྤྲོ་འཆམ་མ་ཁྲིད་ན།  སློབ་མའི་ནང་སྦྱོང་དེ་ཡང་ཁྲོམ་པའི་ནང་གི་སྦལ་པ་བཞིན་མཐོང་རྒྱ་ཐོས་རྒྱ་གང་ཡང་མེད་མཁན་ཞིག་ཏུ་གསོ་སྐྱོང་བྱེད་ཀྱིན་ཡོད་པ་ཡིན། ནང་སྦྱོང་སྤྲོད་མཁན་དགེ་རྒན་དེ་ནི། རང་ཉིད་ཀྱི་སློབ་ཚན་ལ་རྒྱུས་མངའ་ཆེན་པོ་ཡོད་དགོས་པ་དང་སློབ་ཚན་ལས་འཕྲོས་ནས་ནང་སྦྱོང་ཞིག་སྐུལ་ཐུབ་པ་ཡིན་ན།  དེའི་དགེ་མཚན་གྱིས་སློབ་མར་བློ་མིག་གསལ་དུ་འགྲོ་རྒྱུ་དང་སློབ་བུའི་སེམས་རྒྱུད་དུ་རིན་ཐང་བྲལ་བའི་ལེགས་བཤད་གསར་པ་ཞིག་སྦྱིན་ནུས་སྙམ་པའི་བློ་སྟོབས་ཀྱང་དགོས་ངེས་རེད། མ་ཟད་དགེ་རྒན་གྱིས་སློབ་མའི་ནང་སྦྱོང་ལ་ཞུ་དག་བྱེད་བདེ་པོ་དང་སྟབས་བདེ་པོ་ཡོང་སླད་ལ་མ་བསམ་པར་གཙོ་བོ་ཀུན་སློང་བཟང་པོ་ཞིག་གིས་སྒོ་ནས་ནང་སྦྱོང་གིས་རྒྱུད་ནས་མ་འོངས་པར་ཕུགས་མདུན་ལ་ཕན་ཐོགས་ཆེན་པོ་ཡོང་བ་རིགས་སྐུལ་ཐབས་དགོས།  དཔེར་ན། རྩོམ་རིག་གང་མང་འབྲི་རུ་བཅུག་པ་དང་ཤེས་བྱའི་གནས་སྟངས་རིགས་མི་འདྲ་བ་མང་པོ་ཞིག་དང་མྱོང་བ་ཆེན་པོའི་སྒོ་ནས་རྒྱུས་མངའ་ཡོང་བ་ཞིག་ལ་རྩེ་གཅིག་ཏུ་སེམས་གཏད་དགོས།ནང་ལས་ཀྱིས་རྒྱུད་ནས་རྩོལ་བའི་ནུས་སྟོོབས་གོང་འཕེལ་དང་རྩོན་པ་ཧུར་ལེན་གྱི་གོམས་གཤིས་བསྐྲུན་ཐབས་བྱེད་དགོས། དེ་འདྲ་བྱ་ན། ནང་ལས་ནང་སྦྱོང་འབྲི་པ་པོལའང་གོ་ཆོད་པ་རེད། གཉིས་པ། ནང་སྦྱོང་འབྲི་བར་དགེ་རྒན་གྱི་ཀུན་སྤྱོད་དང་འབྲེལ་བ་གཏིང་ཟབ་ཡོད།       དགེ་རྒན་རང་ཉིད་ནང་སྦྱོང་བྱེད་རྒྱུ་དང་རྒྱུན་དུ་སློབ་མའི་མིག་གཤམ་དུ་སློབ་སྦྱོང་ལ་དོན་གཉེར་ཆེན་པོ་ཡོད་པ་ཞིག་ར་སྤྲོད་བྱེད་དགོས་མ་ཟད། དུས་ཁོམ་བྱུང་ཚེ་དཔེ་ཀློག་དང་ཤེས་བྱ་རིག་གནས་ལ་དགའ་ཞེན་ཆེན་པོ་ཡོད་པའི་རྣམ་དཔྱོད་ཀྱི་རྩལ་ཡང་ངོམ་དགོས། དགེ་རྒན་གྱི་གནས་ཚད་དང་ལྗིད་མི་མཉམ་པའི་སློབ་ཁྲིད་པ་ཞིག་གིས་ཤེས་བྱའི་བང་མཛོད་ལ་སྤྲོ་བ་སྟེར་རྒྱུའི་ཚབ་ལས་རིན་ཐང་ལྡན་པའི་དམིགས་སྟོན་གྱི་ཁྱད་ཆོས་ལ་གཏོར་བརླག་བཏང་བ་དང་ཁྱད་ག་ལ་ཡོད། དེའི་རྐྱེན་གྱིས་སློབ་མའི་སྦྱང་ཤེས་ཀྱི་སེམས་ཁུར་ལ་དོ་ཕོག་ཆེན་པོ་གཏོང་སྲིད། དེར་བརྟེན་ནང་སྦྱོང་སྤྲོད་མཁན་ནམ་སློབ་སྟོན་བྱས་ཏེ་རང་ཉིད་ཀྱིས་འགན་དབང་དང་རང་དབང་ཆེན་པོ་བེད་སྤྱད་ནས་རང་སྦྱོང་བྱེད་མཁན་ཞིག་ལ་མཚོན་ན་སྤྲོ་བ་གཏད་མཁན་ཞིག་དགོས་ངེས་རེད། དགེ་རྒན་གྱི་ཀུན་སྤྱོད་ནི་སློབ་མ་ཚོའི་མེ་ལོང་ལྟ་བུ་རེད། མེ་ལོང་ནང་དུ་བྱད་གཟུགས་མཛེས་པོ་ཞིག་མཐོང་ན་དེ་ལ་དགའ་མོས་དང་སྤྲོ་སྣང་སྤྲོད་ཐུབ། དེ་བཞིན་དགེ་རྒན་བཟང་པོ་དང་ལྷག་བསམ་རྣམ་དག་གིས་སློབ་མའི་སྦྱང་བརྩོན་ལ་སྤྲོ་བ་སྟེར་ཐུབ་དང་ནང་ལས་ཀྱང་ཁོང་གིས་སྐུལ་བ་བཞིན་བཀའ་གསུང་ཅི་སྒྲུབ་ཞུ་ཡི་རེད། དཔེར་ན། སློབ་མ་ཁག་གཅིག་གིས་རྒན་དེ་ལ་དགའ་བོ་ཡོད་ཙང་ཁོང་གི་སློབ་ཚན་ལའང་དགའ་བོ་གནང་གི་རེད། དེ་ནི་སློབ་ཚན་ནང་གི་ཉི་དགའ་མེ་ཏོག་ཞེས་པའི་བསྡུས་བརྗོད་ཀྱི་རྩོམ་ཡིག་དང་དོན་སྙིང་གཅིག་པ་རེད། ལྷག་བསམ་དུང་ལྟར་དཀར་བ་མ་ཟད་འདམ་གྱི་དྲི་མ་དང་བྲལ་བའི་མེ་ཏོག་པདྨ་བཞིན་ཀུན་གྱིས་དགའ་བ་འགྱུར། སློབ་མའི་བློ་འགུགས་ཐབས་ནི་གལ་གནད་དོན་ཆེན་ཞིག་ཡིན་པ་དང་སློབ་ཁྲིད་པའི་ཆ་རྐྱེན་གལ་ཆེ་ཤོས་ཡིན་པ་རེད། གལ་ཏེ་རང་ཉིད་དེ་དག་གི་ཆ་རྐྱེན་ཚང་གིན་མེད་ན་ཚང་བར་བྱ་རྒྱུ་ནི་འདོར་དུ་མེད་པའི་འོས་འགན་ཞིག་ཡིན་པ་སྨོས་དགོས་དོན་མེད། གསུམ་པ། ནང་སྦྱོང་གི་རང་བཞིན་འདི་འདྲ་ཞིག་དགོས་པ་སྙམ།       སྦྱང་ཤེས་ཕྲན་ཙམ་གྱིས་འདོད་བློ་ཁེངས་པའི་ཡོན་ཏན་འཐོབ་པར་དཀའ་བར་མ་ཟད་ཁུངས་འཁྱོལ་བ་ཞིག་ཀྱང་གཏན་ནས་མིན། སློབ་ཁང་དུ་སྦྱང་ཤེས་ཕྲན་ཙམ་བྱས་པའི་རྨང་གཞིའི་ཐོག་འཚོལ་སྒྲུག་གི་གོམས་གཤིས་ལྷན་སྐྱེས་སུ་འབྱར་ཐུབ་པ་ཡིན་ན། གསར་གཏོད་དང་བློ་སྐྱེད་ཅིག་འཐོབ་ངེས་པ་ཞིག་རེད། དེ་ནས་རང་གི་ནང་སྦྱོང་གི་གནད་དོན་ངོ་མ་ཤེས་ཐུབ་པར་མ་ཟད་ཡང་དག་པའི་སློབ་སྦྱོང་གི་དགོས་མཁོ་ཡང་སྒྲུབ་ཐུབ་ཀྱི་ཡོད། སྦྱང་ཤེས་ནི་བྱ་དངོས་ཀྱི་རང་བཞིན་ལྡན་པའི་ཤེས་བྱ་སྣ་མང་གི་རང་བཞིན་དང་ངོ་བོ་སོགས་དང་འབྲེལ་བ་གཏིང་ཟབ་ཡོད་ཙང་། བྱ་བྱེད་གང་དང་དེའི་རྟེན་གཞིར་སྡུད་པའི་རྣམ་གྲངས་དུ་མའི་མཚན་ཉིད་ལྡན་པའི་ཤེས་བྱའི་ཁ་གྲངས་མི་ཉུང་བ་ཞིག་ལ་ལག་གིས་སྙོབ་པར་བྱེད་དགོས། དེ་ནི་འཚོལ་སྒྲུབ་རང་བཞིན་ལ་ཐུག་ཡོད་ཅིང་། འཚོལ་སྒྲུབ་ཀྱི་སྤོབས་པ་དང་གོམས་གཤིས་སུ་འཇགས་མ་ཐུབ་ན་ཤེས་ཡོན་གོང་མཐོ་དང་གནད་ལ་ཁེལ་བའི་སྦྱངས་འབྲས་ཤིག་རྒྱུན་འཁྱོང་ཡོང་བར་དཀའ་ལས་ཁག་པོ་རེད་སྙམ། […]

འགྱུར་མེད་ཚེ་རིང་།བོད་དགེ། ལ་དྭགས་བོད་ཁྱིམ། ཐ་སྙད་ལ་བསམ་པ།       རང་རེའི་བོད་ཕྱི་ནང་གཉིས་ཀྱི་སྤྱི་ཚོགས་ནང་སྐབས་དོན་གང་གླེང་བར་བྱ་བའི་དོན་གང་དེར་མཚོན་བྱེད་ཐ་སྙད་འབོད་སྲོལ་གཅིག་ཏུ་སོང་བ་ཞིག་མི་འདུག གཞིས་ཀྱི་སློབ་གྲྭའི་སྤྱི་ཚོགས་ཕལ་ཆེ་བས་སྦྱོང་ཚན་ཞེས་ཡོངས་ཁྱབ་སྤྱོད་སྲོལ་ཆགས་ཡོད་འདུག་ནའང་། རང་རེའི་བྱེས་འབྱོར་བོད་ཕྲུག་རྣམས་ཀྱི་སློབ་གྲྭའི་སྤྱི་ཚོགས་ནང་། སྔོན་ཆད་ནང་ལས་ཞེས་དང་། དེང་ནང་སྦྱོང་ཞེས་ཐ་སྙད་སྤྱོད་ཕྱོགས་ཐད་ངེས་གཏན་ཆགས་མ་ཐུབ་པའི་འཕོ་འགྱུར་གྱི་རིམ་པ་ཞིག་བརྒྱུད་དགོས་བྱུང་བའི་རྣམ་པ་ཞིག་སྣང་རྒྱུ་འདུག ནང་ལས་ནི་ཨིན་ཇིའི་ཐ་སྙད་(Home Work)ཞེས་པ་དེ་ཐད་བསྒྱུར་གནང་བའི་རྣམ་པ་མངོན་པས། དེས་བརྗོད་བྱའི་དོན་མཚོན་པའི་ནུས་པ་གའུ་ཁ་སྦྱོར་ལྟ་བུ་བྱུང་ཡོད་མེད་ཀྱི་གནས་སྟངས་རིམ་པར་ཉམས་མྱོང་ལག་བསྟར་ལས་ཤེས་རྟོགས་བྱུང་རྗེས། གུས་རང་ཉིད་ཚུད་པའི་ལས་རོགས་མང་པོས་ནང་ལས་ལས་ནང་སྦྱོང་ཞེས་པའི་ཐ་སྙད་འདི་བློར་འཐད་པ་དང་སྤྱོད་སྙིང་གི་འདུན་པས། མདུན་གྱི་སློབ་མ་རྣམས་ལ་ནང་སྦྱོང་ཞེས་པའི་ཐ་སྙད་འདི་འཇགས་ཐབས་གཙོ་འདོན་བྱེད་འདུག རང་རེའི་བྱེས་འབྱོར་བོད་མིའི་སློབ་གྲྭའི་ནང་སྦྱོང་ཚན་ནི། སློབ་དེབ་ཀྱི་སློབ་ཚན་རེ་རེ་རྫོགས་མཚམས། སློབ་ཚན་གྱི་བརྗོད་བྱ་དང་རྗོད་བྱེད་གཉིས་ལས་གཙོ་བོ་བརྗོད་བྱ་གཞི་རྩར་བཟུང་ནས་བསྒྲིགས་པའི་དྲི་བའི་རྣམ་གྲངས་ཇི་སྙེད་ཅིག་ཡོད་པ་དེ་དག་ལ་གོ་བ་དང་། ནང་སྦྱོང་ནི་ཉིན་མོའི་སློབ་ཕྲུག་ཅིག་ལ་མཚོན་ན་ཕ་མའི་ཁྱིམ་དང་། གཏན་སློབ་ཀྱི་སློབ་མ་ཞིག་ལ་མཚོན་ན་སྡོད་ཁང་སོགས་ཀྱི་ནང་ལ་བྱ་རྒྱུའི་སློབ་ཚན་དང་འབྲེལ་བའི་ལས་བྱ་རྣམས་ལ་གོ་དགོས། གཞི་རིམ་བར་མ་བར་གྱི་སློབ་མ་རྣམས་ལ་ནང་སྦྱོང་སྐུལ་མཁན་གཙོ་བོ་དགེ་རྒན་ཡིན་དགོས་ཀྱང་། གཞི་རིམ་བར་མ་རྗེས་ཀྱི་སློབ་མ་ཚོས་རང་གིས་རང་ལ་སྐུལ་ནས་སློབ་ཚན་གྱི་ནང་སྦྱོང་གཞན་ནས་བཙལ་ཏེ་བྲི་རྒྱུའི་གོམས་གཤིས་འགོ་འཛུགས་དགོས་པ་ཡིན། སྤྱིར་ནང་སྦྱོང་ནི་སློབ་ཕྲུག་གིས་སློབ་སྦྱོང་གི་འདུན་པ་རྒྱུན་བསྲིངས་ཐུབ་ཐབས་ལ་དམིགས་ནས་སྐུལ་གྱི་ཡོད།།      ནང་སྦྱོང་ཇི་ལྟར་སྐུལ་དགོས་སམ། མདོར་བསྡུས་ནས་བཤད་ན། སློབ་མར་ནང་སྦྱོང་སྐུལ་བའི་དུས་ནི་གཉིས་ཏེ། སློབ་དུས་ཀྱི་སྐབས་དང་། སློབ་དུས་མ་ཡིན་པའི་དབྱར་གནང་དང་དགུན་གནང་གི་སྐབས་གཉིས་ཡིན། དབྱར་གནང་དང་དགུན་གནང་གཉིས་སུ་སློབ་མར་གུང་སེང་གི་དུས་ཡུན་ཅུང་རིང་བས། ཐད་ཀར་བསླབ་རྒྱུའི་སློབ་ཚན་དང་འབྲེལ་བ་ཡོད་པའི་ནང་སྦྱོང་སྐུལ་ན་ཆོག་ལ་ཐད་ཀར་འབྲེལ་བ་མེད་པའི་སྤྱིར་བཏང་གི་ཤེས་བྱ་དང་། སྐད་ཡིག་གི་ཆུ་ཚད་ཡར་རྒྱས་ལ་དམིགས་པའི་ནང་སྦྱོང་སྐུལ་ནའང་མ་འཚམ་པ་མི་འདུག །      སློབ་དུས་ཀྱི་སྐབས་སུ་དགེ་རྒན་གྱིས་རང་གི་སློབ་མར་སྐུལ་བའི་ནང་སྦྱོང་དེ་ངེས་པར་བསླབས་ཟིན་སློབ་ཚན་གྱི་ནང་དོན་དང་འབྲེལ་བ་ཡོད་ཐོག བསླབས་ཟིན་སློབ་ཚན་གྱི་བརྗོད་བྱ་རྗོད་བྱེད་གཉིས་ལ་གོ་རྟོགས་རྒྱ་བསྐྱེད་གཏང་རྒྱུ་དང་། གཏིང་ཟབ་ཏུ་གཏང་རྒྱུར་ཕན་ཐོགས་ཡོད་པ་ཞིག་ཡིན་དགོས། དེ་ལྟ་བུ་ཞིག་མེད་ཚེ་ནང་སྦྱོང་མ་སྐུལ་ནའང་ཆོག ཡང་ཅི་ནས་ཀྱང་མནོ་བསམ་བྱ་དགོས་པ་གཞན་ཞིག་ལ། ཁྱེད་ཉིད་འཛིན་རིམ་བརྒྱད་པའི་འཛིན་ཁང་སྡེ་ཚན་བཞི་ཡོད་པ་དེ་དག་ཐམས་ཅད་ལ་བོད་ཡིག་སློབ་ཁྲིད་བྱེད་མཁན་གྱི་དགེ་རྒན་ཞིག་ཡིན་ན། འཛིན་གྲྭ་སོ་སོའི་རྣམ་དཔྱོད་དང་འཇོན་ནུས་ལ་གཞིགས་ནས་ནང་སྦྱོང་སྐུལ་ཐུབ་ན་དགེ་མཚན་ཆེ། དེ་ཡང་དགེ་མཚན་ཅི་དང་གང་ཞིག་ཡོད་དམ་ཞེ་ན། སློབ་མ་ནང་ཕན་ཚུན་བར་ནང་སྦྱོང་ལེབ་བཤུས་བྱེད་པའི་གནས་ཚུལ་ཡང་ཡང་ཡོང་གི་ཡོད་པ་རྣམས་ཉུང་དུ་གཏོང་ཐུབ་པ་མ་ཟད། སྐབས་རེར་ཕན་ཚུན་ལེབ་བཤུས་བྱས་ནའང་། དགེ་རྒན་གྱིས་རྟོག་ཞིབ་གནང་སྐབས་ངོས་འཛིན་ལམ་སེང་ཐུབ་ཀྱི་མེད་སྟབས། འཛིན་གྲྭ་སོ་སོར་ནང་སྦྱོང་མི་གཅིག་སྣ་ཚོགས་བསྐུལ་ན་དཀའ་ངལ་དེ་ཡང་ཉུང་དུ་གཏོང་ཐུབ་པའི་དགེ་མཚན་ཡོད། དེ་དང་ཕྱོགས་མཚུངས་དགེ་མཚན་གཞན་ཞིག་ལ། སློབ་ཕྲུག་དོ་བདག་སོ་སོར་མཚོན་ན། ནང་སྦྱོང་བྱ་རྒྱུར་སྤྲོ་སྣང་འཕེལ་བ་དང་། གང་བྱས་པའི་ནང་སྦྱོང་གི་བརྒྱུད་ནས། སློབ་མའི་གོ་རྟོགས་ཀྱི་ཆུ་ཚད་དང་། ཡར་རྒྱས་ཀྱི་ཕྱོགས་གང་ཡིན་གསལ་རྟོགས་ཐུབ་ངེས་ཡིན། །      ནང་སྦྱོང་སློབ་མའི་ཁུར་བོར་འགྱུར་མི་ཆོག སློབ་མར་ནང་སྦྱོང་མང་དྲགས་ན། སློབ་སྦྱོང་ལ་སྤྲོ་སྣང་བརླག་ཉེན་ཡོད། མང་ཉུང་འོས་འཚམ་ཅན་ཞིག་དང་། སློབ་མའི་སློབ་སྦྱོང་ཕྱོགས་ཀྱི་སྤྲོ་སྣང་མི་བརླག་པའི་ནང་སྦྱོང་ཞིག་ཡོང་ཐབས་སུ་སློབ་ཁྲིད་བྱེད་མཁན་གྱི་དགེ་རྒན་རྣམས་འབྲེལ་བ་བཟང་པོ་དགོས། སློབ་ཚན་བྱེ་བྲག་གཅིག་གི་ནང་སྦྱོང་མང་པོ་ཆགས་ཀྱི་ཡོད་ན། འབྲེལ་ཡོད་དགེ་རྒན་དེས་དགེ་རྒན་གཞན་རྣམས་ལ་ཐད་ཀར་འབྲེལ་བ་བྱས་ནས། སློབ་ཚན་གཞན་དང་གཞན་གྱིས་ནང་སྦྱོང་མི་བསྐུལ་རྒྱུའི་འབོད་སྐུལ་བྱེད་དགོས། མ་གཞི་ནས་དགེ་རྒན་རྣམས་ཀྱིས་སློབ་མར་ནང་སྦྱོང་སྐུལ་སྐབས། […]

བདེ་ཆེན་རྡོ་རྗེ།གཞི་རིམ་བར་མའི་བོད་དགེ། སྦེལ་ཀོབ་སཾ་བྷོ་ཊ་བོད་སློབ། རློམ་སེམས་རིང་དོར་མཁས་མང་ཞབས་གཏུགས་ནས། །ངང་རིང་གཞུང་དྲང་དཀའ་བ་དང་ལེན་གྱིས། །དབྱངས་གསལ་རི་མོར་བཀོད་མཛད་སཾ་བྷོ་ཊ། །ཁ་བའི་ལྗོངས་ཀྱི་དགེ་རྒན་དང་པོར་འདུད། །       དགེ་རྒན་ཞིག་ཡིན་པའི་ཆ་ནས་འཛིན་གྲྭ་སྟངས་འཛིན་བྱེད་སྟངས་མི་ཤེས་ཚེ་ཉ་པས་ཉ་འཛིན་སྟངས་མི་ཤེས་པ་དང། ཞིང་པས་ཞིང་འདེབས་སྟངས་མི་ཤེས་པ་ལྟར་རང་གི་དམིགས་ཡུལ་སྒྲུབ་ཐུབ་ཐབས་མེད་པ་སྟེ། ལག་རྡུམ་བྲག་ལ་འཛེགས་པ་ལྟར་དགེ་རྒན་ཞིག་གིས་སློབ་ཁྲིད་ཡོ་བྱད་ཇི་ཙམ་མཁོ་སྒྲུབ་བྱས་ཡོད་ནའང་འདྲ། སློབ་ཁྲིད་བྱེད་པའི་ཀུན་སློང་ཇི་འདྲའི་བཟང་ཡང་རུང། སློབ་ཁྲིད་ཐབས་ལམ་དང་འཆར་འགོད་ཇི་འདྲ་ཞིག་གྲ་སྒྲིག་གནང་ཡོད་ནའང་འདྲ། འཛིན་གྲྭ་སྟངས་འཛིན་བྱེད་མི་ཐུབ་ཚེ་དོན་དངོས་ཀྱི་ལག་ལེན་ལ་རྨོངས་བ་ཡིན་པས་འདོད་བློ་ཁེངས་པའི་གྲུབ་འབྲས་ཤིག་སྨིན་ཐབས་བྲལ། དེར་བརྟེན་འཛིན་གྲྭ་སྟངས་འཛིན་ནི། ཤེས་ཡོན་སྤྲོད་ལེན་གྱི་བརྒྱུད་རིམ་ཁྲོད་ཤིན་ཏུ་ནས་གལ་འགངས་ཆེ་བའི་རིམ་པ་ཞིག་ཡིན།        དགེ་རྒན་ཞིག་གིས་འཛིན་གྲྭ་འཁྲིད་སྐབས་དམིགས་ཡུལ་ནི་སློབ་ཕྲུག་ལ་ཤེས་ཡོན་སྤྲོད་རྒྱུ་དེ་ཡིན་པས། འཛིན་གྲྭ་སྟངས་འཛིན་བྱེད་མི་ཐུབ་ཚེ་སློབ་ཕྲུག་ཚོར་ཤེས་ཡོན་སྤྲོད་མི་ཐུབ་པའི་སྟེང་དགེ་སློབ་གཉིས་ཀར་སེམས་ངལ་འཕར་མ་ཐོབ་རྒྱུ་དང་། རིམ་པས་ཕ་མ་དང་འཛིན་སྐྱོང་བཅས་ལའང་དཀའ་ངལ་འཕྲད་ངེས་རེད། དེ་ལས་ལྡོག་སྟེ་འཛིན་གྲྭ་སྟངས་འཛིན་བྱེད་སྟངས་ཤེས་ཚེ་རང་གིས་སློབ་ཕྲུག་ཚོར་ཤེས་ཡོན་གང་སློབ་འདོད་ཡོད་པ་དག་སློབ་ཕྲུག་ཚོས་ཤེས་པ་དང་། དེ་ལ་བརྟེན་ནས་སློབ་ཕྲུག་ཚོའི་བསམ་བློའི་ཆུ་ཚད་དང་། སྒོ་གསུམ་གྱི་ཀུན་སྤྱོད་ཚད་མཐོར་ཕྱིན་པ་དངོས་སུ་མཐོང་བས་སློབ་ཁྲིད་བྱེད་པར་སྔར་བས་ལྷག་པའི་དོ་དབྱིངས་ཆེ་རུ་ཕྱིན་པ་དང་། རང་ཉིད་གནས་སའི་སྤྱི་ཚོགས་དང་ཁོར་ཡུག་ནང་དགེ་རྒན་གྱི་ལས་རིགས་ལ་ཆེ་མཐོང་ཡོད་ཀྱང་རུང་མེད་ཀྱང་རུང་རང་ཉིད་དགེ་རྒན་ཞིག་ཡིན་པར་སྤོབས་སེམས་དང་ཡིད་བློ་ཚིམ་པའི་ཚོར་སྣང་ཤུགས་ཆེན་པོ་ཞིག་ཐོབ་ངེས་ལ། རིམ་པས་དགེ་ལས་གཞན་དང་དེ་བཞིན་ནང་མི་ལྷན་འབྲེལ་བ་ཡང་བཟང་པོ་ཞིག་བསྐྲུན་ཐུབ་ནས་སློབ་ཁྲིད་དང་འབྲེལ་བའི་བྱེད་སྒོ་གང་ཞིག་སྤེལ་དགོས་ཀྱང་དེ་ལ་སུན་སྣང་དང་ངལ་གདུབ་མེད་པ་ཞིག་ཡོང་ཐུབ།        སྐབས་དོན་དངོས་འཛིན་གྲྭ་སྟངས་འཛིན་བྱེད་སྟངས་ནི། སྤྱིར་མིའི་སེམས་ནི་རྣམ་གྲངས་ཧ་ཅང་མང་བས་དེ་ལ་ཚོད་འཛིན་དཀའ་བས་འཛིན་གྲྭ་སྟངས་འཛིན་བྱེད་སྐབས་ཀྱང་སེམས་ལྡན་གྱི་སློབ་ཕྲུག་དང་འབྲེལ་བ་ཡོད་སྟབས། འདིར་འཁོད་ཀྱི་ཐབས་ལམ་དག་སྐབས་འགའ་རེར་ནུས་པ་ཐོན་ཀྱང་འགའ་རེར་མི་ཐོན་པ་བྱུང་སྲིད། དེ་བཞིན་འཛིན་གྲྭ་སྟངས་འཛིན་བྱེད་སྟངས་ཀྱི་ཐབས་ལམ་ལའང་གྲངས་ངེས་ཅན་ཞིག་ཡོད་མི་དགོས་ལ། དུས་ཀྱི་འགྱུར་བ་དང་མཉམ་དུ་ཐབས་ལམ་གསར་པ་ཁ་སྣོན་བྱེད་བཞིན་མདུན་བསྐྱོད་བྱེད་པ་ནི་ཡར་རྒྱས་ཀྱི་རྩ་བ་ཡིན།       འཛིན་གྲྭ་སྟངས་འཛིན་ཡང་དག་པ་ཞིག་བྱེད་ཐུབ་པར་ཀུན་གྱིས་མཁྱེན་གསལ་ལྟར་སློབ་ཕྲུག་གི་སེམས་ཁམས་དང་མཐུན་པའི་སློབ་ཚན་འཆར་འགོད་(Lesson Plan)ཞིག་ཡོད་དགོས་ལ། ཡང་དེའི་སྟེང་དུ་སློབ་ཁྲིད་འཆར་འགོད་(Teaching Plan)ཚད་ལྡན་ཞིག་ཀྱང་ཡོད་དགོས། དགེ་རྒན་གྱི་ཉིན་ཐོའི་(Teacher’s Diary)ནང་དུ་སློབ་ཚན་འཆར་འགོད་ཡོད་ཀྱང་ཉིན་རེའི་འཛིན་གྲྭའི་ནང་གི་སློབ་ཁྲིད་འཆར་འགོད་ཞིབ་ཕྲ་འགོད་ཐབས་མེད་པས། ཡིག་ཐོག་ཏུ་མེད་ནའང་བློ་ཐོག་ཏུ་ཚོགས་ཐུན་གཅིག་གི་ནང་དུ་སློབ་ཚན་གྱི་ཚན་པ་གང་སློབ་རྒྱུ་ཡིན་པ་དང། ཐབས་ལམ་ཇི་ལྟར་སློབ་རྒྱུ་ཡིན་པ། དྲི་བ་གང་འདྲི་རྒྱུ་ཡིན་པ། འགྲེལ་བརྗོད་སྐར་མ་ག་ཚོད་བྱ་རྒྱུ་ཡིན་པ། བྱེད་སྒོ་གང་བྱ་རྒྱུ་ཡིན་པ། གལ་ཏེ་སྐར་མ་བཅུ་རིང་གི་འཛིན་རྒྱུགས་བཏང་རྒྱུ་ཡིན་ཚེ་དྲི་ཤོག་དཔར་ལོག་སྔ་ས་ནས་བྱས་པ་ལ་སོགས་པའི་གྲ་སྒྲིག་ཨང་གསར་སྔ་ས་ནས་གནང་རྒྱུ་དེ་རེད།       སྐར་མ་བཞི་བཅུའི་ཚོགས་ཐུན་ཡིན་ཚེ་སྐར་མ་བཞི་བཅུའི་རིང་སློབ་ཕྲུག་རྣམས་ཀྱི་དོ་སྣང་གང་སློབ་ཁྲིད་གནང་བཞིན་པའི་སྟེང་གནས་ཐུབ་ཐབས་བྱེད་པ་ལ་འཛིན་གྲྭ་སྟངས་འཛིན་བྱེད་པ་ཟེར་དགོས་པས། སྐར་མ་བཞི་བཅུའི་རིང་དགེ་རྒན་གྱི་ངོས་ནས་སློབ་ཕྲུག་རྣམས་ཉོབ་སྣང་མི་བསྐྱེད་པའི་ཆེད་ངང་ངམ་ཤུགས་ཀྱིས་དོ་སྣང་བྱེད་ཤོར་བའི་ཡིད་བློ་མགུ་ནུས་པའི་སློབ་ཁྲིད་འཆར་འགོད་གྲ་སྒྲིག་བྱེད་པར་འབད་དགོས། ཡང་དམིགས་ཡུལ་དེ་འདྲ་སྒྲུབ་ཐུབ་པར་འཁྲིད་བྱའི་སློབ་ཚན་ལ་གཞིགས་པའི་བྱེད་སྒོ་སྟེ། མཚུངས་བསྡུར་བྱེད་པའི་བྱེད་སྒོ། རྣམ་དཔྱོད་གོང་སྤེལ་གྱི་བྱེད་སྒོ། དྲན་ཤེས་གོང་སྤེལ་གྱི་བྱེད་སྒོ། དཀའ་ངལ་བསལ་ཐབས་ཀྱི་བྱེད་སྒོ། དག་ཆ་ཡར་རྒྱས་ཀྱི་བྱེད་སྒོ་ལ་སོགས་པ་ལས་གང་འོས་བདམ་པ་དང་། བྱེད་སྒོ་ལའང་སློབ་ཕྲུག་རང་ཉིད་གཅིག་པུས་བྱེད་དགོས་པའི་བྱེད་སྒོ་དང། སློབ་ཕྲུག་གཞན་དང་མཉམ་དུ་བྱེད་དགོས་པའི་བྱེད་སྒོ་ཡོད་པས་སྐབས་ཐོག་གང་འོས་པ་བདམ་གནང་དགོས། སྐར་མ་བཞི་བཅུའི་ནང་དུ་དུས་ཚོད་ཆ་བགོས་ཀྱིས་སློབ་ཚན་གྱི་འགྲེལ་བརྗོད་དང་། དྲི་བ་དྲིས་ལན། འབྲི་རྩལ། བྱེད་སྒོ་བཅས་སྐབས་བབ་དང་བསྟུན་ནས་གནང་ཐུབ་ཚེ་ཚོགས་ཐུན་གྱི་དུས་ཡུན་སྐར་མ་གཅིག་ཀྱང་ཆུད་ཟོས་སུ་མ་ཕྱིན་པ་དང། སློབ་ཕྲུག་རྣམས་ཀྱི་དོ་དབྱིངས་མུ་མཐུད་ནས་གནས་ཐུབ་པ། […]