ན་ག་སངས་རྒྱལ་བསྟན་དར་ནས་འགྲེལ་པ་ཆ་ཚང་།
བོད་དུ་རིག་གནས་དར་ཚུལ་མདོར་བསྡུས་བཤད་པ། << དམུ་དགེ་བསམ་གཏན་གྱི་བརྩམས།>>
བསྟན་པ་སྔ་དར་གྱི་སྐབས་སུ་བོད་དུ་རིག་གནས་དར་ཚུལ།
བོད་སྤྱི་ལ་དབང་བའི་རྒྱལ་པོའི་ཐོག་མ་གཉའ་ཁྲི་བཙན་པོ་ཡིན་ལ། དེ་ནས་མུ་ཁྲི་བཙན་པོ། དེང་ཁྲི་བཙན་པོ། ཤོ་ཁྲི་བཙན་པོ། (སོ་ཁྲིའང་ཟེར་) མེ་ཁྲི་བཙན་པོ། གདགས་ཁྲི་བཙན་པོ། སྲིབ་ཁྲི་བཙན་པོ་སྟེ་གནམ་གྱི་ཁྲི་བདུན་དུ་གྲགས་པ་འདི་དག་གི་དུས་སུ་རིག་གནས་ སོགས་དར་ཚུལ་གྱི་ལོ་རྒྱུས་མ་མཐོང༌།
དེ་ནས་གྲི་གུམ་བཙན་པོ། རྒྱལ་པོ་འདིས་བློན་པོ་དང་འཐབ་པའི་དུས་སུ་ཁྲབ་བླངས་པས་ཁྲབ་སྤྱོད་པའི་ཐོག་མ་ཡིན་ཟེར། དེ་ནས་སྤུ་དེ་གུང་རྒྱལ། དེའི་བློན་པོ་རུ་ལས་སྐྱེས་ནི་འཕྲུལ་བློན་མཛངས་པའི་མི་བདུན་གྱི་ཐོག་མ་ཡིན་ལ། རྒྱལ་བློན་དེ་གཉིས་ཀྱི་རིང་ལ་ཐོང་གཤོལ་བཟོ་བ་དང་ཞིང་ལ་ཆུ་འདྲེན་པ་སོགས་ཞིང་ ལས་དར་བའི་འགོ་ཚུགས་པ་དང༌། གསེར་དངུལ་ཟངས་ལྕགས་ཀྱི་རྡོའི་གཏེར་ཁ་ཕུད་དེ་བཞུ་ལེན་སོགས་བཟོ་ལས་ཅུང་དར་བ་ དང༌། ཆུ་ལ་ཟམ་འཛུགས་པ་སོགས་འགྲིམ་འགྲུལ་གྱི་ལམ་སོགས་ལའང་ཡར་རྒྱས་ཆེ་ཙམ་བྱུང་བ་ དང༌། ཡང་འདིའི་དུས་བོན་སྒྲུང་ལྡེའུ་གསུམ་བྱུང་བ་རིག་གནས་ཀྱི་གྲངས་སུ་བརྩི། བོན་ནིདགེ་སྒྲུབ་ལྷ་མཆོད་འདྲེ་འདུལ་མོ་རྩིས་སོགས་དང༌། སྒྲུང་ནི། རོ་ལངས་གསེར་སྒྲུབ་ཀྱི་སྒྲུང་དང༌། མ་སངས་སྒྲུང་དང༌། མཆིལ་བའི་སྒྲུང་སོགས་ཉན་བཤད་དང༌། ལྡེའུ་ནི་ཁེད་འཇོག་པ་སྟེ། དཔེར་ན། ཐེམ་གཉེར་ཝ་བ་ཆེ། (སྲང་།) ཅི་ཡིན་ཞེས་འདྲི་བ་ལྟ་བུའོ།།
དེ་ནས་ཨེ་ཤོ་ལེགས། འདིའི་བློན་པོ་ལྷ་བུ་མགོ་དཀར་ནི༑ འཕྲུལ་བློན་མཛངས་མི་བདུན་གྱི་གཉིས་པ་ཡིན། ཞིང་ལ་དོར་ཁ་བརྩིས། འབྲོག་ལ་ཐུར་རྩིས་བྱས། ཕུ་ཆུ་མདའ་རུ་དྲངས་ཏེ་མདའ་ཞིང་ཆུ་མ་རྒྱ་ཆེར་བཟོས། ཨེ་ཤོ་ལེགས། དེ་ནས་དེ་ཤོ་ལེགས། ཐི་ཤོ་ལེགས། གུ་རུ་ལེགས། འབྲོང་ཞི་ལེགས། ཨི་ཤོ་ལེགས་ཏེ་སའི་ལེགས་དྲུག་དང༌། དེ་ནས་ཟ་ནམ་ཟིན་ལྡེ། ལྡེ་འཕྲུལ་ནམ་གཞུང་བཙན། སེ་སྣོལ་ནམ་ལྡེ༑ སེ་སྣོལ་བོ་ལྡེ། ལྡེ་སྣོལ་ནམ། ལྡེ་སྣོལ་བོ། ལྡེ་རྒྱལ་པོ། ལྡེ་སྤྲིན་བཙན་ཏེ་ལྡེ་བརྒྱད་དང༌། དེ་ནས་རྒྱལ་ཏོ་རི་ལོང་བཙན། ཁྲི་བཙན་ནམ། ཁྲི་སྒྲ་དཔུང་བཙན། ཁྲི་ཐོག་རྗེ་བཙན་ཏེ་འོག་གི་བཙན་བཞི། དེ་ནས་ལྷ་ཐོ་ཐོ་རི་ཡིན་ལ། འདིའི་དུས། སྤང་སྐོང་ཕྱག་རྒྱ་བ་དང༌། མདོ་སྡེ་ཟ་མ་ཏོག་གི་གླེགས་བམ་འབྱོར་ཡང་དོན་མ་གོ་བར་གཉན་པོ་གསང་བ་ཞེས་མིང་བཏགས་ནས་ཕྱག་མཆོད་བྱས།།
ཡང་རྒྱལ་པོ་འདིའི་དུས། འཕགས་ཡུལ་གྱི་སྨན་པ་སྙན་གྲགས་ཤིན་ཏུ་ཆེ་བ་སྨན་པ་བྲམ་ཟེ་རྒྱུན་ཤེས་ཞེས་བྱ་བའི་སློབ་མ། རྒྱལ་པོ་རྔ་ཆེན་པོའི་བུ་བི་བྱི་དགའ་བྱེད་དང༌། བྲམ་ཟེ་དྲིལ་བཟོ་མའི་བུ་མོ་བི་ལྷ་དགའ་མཛེས་གཉིས་བོད་ཡུལ་དུ་བྱོན་ཏེ་གསོ་དཔྱད་སྨན་གྱི་རིག་པ་སྤེལ་བས། སྙན་གྲགས་རྒྱས་ཏེ་རྒྱལ་པོ་ལྷ་ཐོ་ཐོ་རིས་གསན་ནས། ཕོ་བྲང་ཡུམ་བུ་བླ་སྒང་དུ་སྤྱན་དྲངས། བསྙེན་བཀུར་ཕུན་སུམ་ཚོགས་པ་བྱས། རྒྱལ་པོའི་བུ་མོ་ལྷ་ལྕམ་ཡིད་ཀྱི་རོལ་ཆ་ཞེས་བྱ་བ། སྨན་པ་བི་བྱི་དགའ་བྱེད་ལ་ཡུམ་དུ་ཕུལ། ལྷ་ལྕམ་ཡིད་ཀྱི་རོལ་ཆ་ལ་སྨན་པ་དུང་གི་ཐོར་ཅོག་ཅན་འཁྲུངས། སྨན་པ་མཁས་པར་གྱུར། སྨན་པ་བི་བྱི་དགའ་བྱེད་དང༌། བི་ལྷ་དགའ་མཛེས་གཉིས་ཀྱིས། རེག་པ་རྩའི་མདོ། འཚོ་བ་ཟས་ཀྱི་མདོ། སྦྱོར་བ་སྨན་གྱི་མདོ། གཏར་སྲེག་དཔྱད་ཀྱི་མདོ། རྨ་ཆས་བཟོའི་མདོ་རྣམས་དང༌། གཞན་ཡང་རྩ་འགྲེལ་འགྲེལ་བཤད་ཁོག་དབུགས་དཔྱད་ལག་ལེན་དང་བཅས་པ་གནང་སྟེ། གསོ་རིག་དར་བར་མཛད་ནས་སླར་རྒྱག་ར་དུ་ཕྱིར་བཞུད།།
སྨན་པ་དེ་གཉིས། རྒྱ་གར་ཤར་ནུབ། རྒྱ་ནག །ལི་ཡུལ། བལ་ཡུལ་རྣམས་སུ་ཕེབས་པའི་རྗེས་སུ། བོད་ཡུལ་དུ་ཕེབས་པར་གཡུ་ཐོག་རྣམ་ཐར་ལས་གསུངས་པས། ཁོང་གཉིས་ཀྱིས་སྐད་ཡིག་མང་པོ་ཞིག་མཁྱེན་པ་འདྲ་ལ། དེ་དུས་བོད་རང་གི་ཡི་གེ་འབྲི་བའི་སྲོལ་མེད་གཤིས། ལེགས་སྦྱར་གྱི་ཡི་གེ་དང༌། ཡིག་རིགས་གཞན་གྱི་སྟེང་ནས་ཀྱང་གསོ་རིག་སྤེལ་བ་ཡིན་འདུག་གོ།
དེ་ནས་ཁྲི་གཉན་གཟུངས་བཙན། སྨན་པ་དུང་གི་ཐོར་ཅོག་ཅན་རྒྱལ་པོ་འདིའི་ཡང་བླ་སྨན་པ་མཛད་དེ་གསོ་རིག་གི་རྒྱུན་འཛིན་སྤེལ་གནང༌། དེ་ནས་འབྲོང་གཉན་ལྡེའུ། རྒྱལ་པོ་འདིའི་སྐུ་ཚེའི་སྨད་ཀྱི་བླ་སྨན་ནི། དུང་གི་ཐོར་ཅོག་གི་སྲས་བློ་གྲོས་ཆེན་པོས་མཛད། དེ་ནས་སྟག་རི་གཉན་གཟིགས། འདི་ཆུང་དུས་དམུས་ལོང་ཡིན་ལ། མིང་ལ་དཀོན་པ་བཀྲ་ཟེར། ཕྱིས་སུ་བོད་ཀྱི་རྒྱལ་ཕྲན་འ་ཞ་ཞེས་པའི་ཁམས་རྒྱལ་འ་ཞ་རྗེ་བྱ་བའི་སྨན་པ་མཁས་པ་ཞིག་ཡོད་པ་བོས་ནས། སྨན་དཔྱད་ཀྱིས་སྤྱན་ལོང་བ་སོས། མིག་ལོང་བ་སོས་ནས་སྟག་མོའི་རི་ལ་རི་དྭགས་གཉན་ཡོད་པ་གཟིགས་པས། སྟག་རི་གཉན་གཟིགས་སུ་གྲགས། དེ་ནས་རྒྱལ་སར་འཁོད་དུས་སྨན་པ་བློ་གྲོས་མཚུངས་མེད་ཀྱི་བུ་བློ་གྲོས་རབ་གསལ་བླ་སྨན་པ་མཛད། འདི་དུས་ཁྲི་ངོར་སྣང་གི་བུས་བློན་བྱས་ཏེ་བྲེ་དང་སྲང་བཅོས། འབྲུ་མར་འཇལ་བྱེད་བཟོས། ལས་སྡེབ་དང་ཚོང་བྱེད་སོགས་དར་རྒྱས་བཏང༌། བློན་འདི་ནི་མཛངས་མི་བདུན་གྱི་གསུམ་པ་ཡིན། དེ་ནས་གནམ་རི་སྲོང་བཙན། འདི་དུས་དཔའ་སྣང་བཞེར་སོགས་ཀྱིས་བློན་བྱས་ཏེ། མི་ཁ་ཤས་རྒྱ་ནག་ཏུ་མངགས་ནས་རྩིས་དང་སྨན་བསླབས། བྱང་གི་ཚྭ་གཏེར་ཕུད། བློ་གྲོས་རབ་གསལ་གྱི་བུ་བློ་གྲོས་རྒྱལ་མཛོད་རྒྱལ་པོ་འདིའི་བླ་སྨན་པ་མཛད། སྨན་རྩིས་ཀྱི་རིག་གནས་དར་རྒྱས་བྱུང་ངོ༌།།
དེ་ནས་སྲོང་བཙན་སྒམ་པོས་རྒྱལ་སྲིད་བཟུང༌། བློ་གྲོས་རྒྱལ་མཛོད་ཀྱི་བུ་བློ་གྲོས་བཤེས་གཉེན་རྒྱལ་པོའི་བླ་སྨན་པ་མཛད། ཐོན་མི་སམ་བྷོ་ཊ་དང༌། སྟག་ལོ་དེ་ཁྲོང་སོགས་མི་བཅུ་དྲུག་ཡི་གེ་སློབ་ཏུ་བཏང༌། དེ་རྣམས་འཕགས་ཡུལ་དུ་སླེབས་ནས། ཐོན་མི་སམ་བྷོ་ཊས་བྲམ་ཟེ་ལི་བྱིན་ཀ་ར་དང་སློབ་དཔོན་ལྷ་རིག་པའི་སེང་གེ་སོགས་པཎྜི་ཏ་མངཔོ་བསྟེན་ནས་སྐད་ཡིག་མང་པོ་དང་སྒྲ་ཚད་སོགས་ཕྱི་ནང་གི་རིག་གནས་མང་པོ་བསླབས། ཕྱིར་བོད་ཡུལ་དུ་ཕེབས་ནས་བོད་ཀྱི་ཡིག་གཟུགས་གསར་བཟོ་གནང་སྟེ། བོད་རང་གི་སྐད་ཀྱི་སྟེང་ནས་ཡི་གེ་འབྲི་བའི་སྲོལ་བཏོད། དབྱངས་གསལ་སྔོན་རྗེས་མགོ་འདོགས་སོགས་ལེགས་པར་གཏན་ལ་ཕབ་སྟེ། བརྡ་སྤྲོད་པའི་གཞུང་བརྒྱད་མཛད་དོ།།
དེ་ནས་བཟུང་སྟེ་ཡོན་ཏན་གྱི་རྩ་བ་བོད་རང་གི་ཡི་གེ་འབྲི་བའི་སྲོལ་ཡོད་པར་གྱུར་ནས། ཡུལ་ཁམས་གཞན་ལ་ཡོད་པའི་རིག་པའི་གནས་དག་བོད་རང་གི་སྐད་ཡིག་ཏུ་བསྒྱུར་བའི་མགོ་བརྩམས་སོ།།
དེ་ནས་རྒྱལ་པོ་ཆེན་པོ་སྲོང་བཙན་གྱིས་གཙུག་ལག་ཁང་མང་པོ་བཞེངས་ནས། ལོ་ཙཱ་བའི་ཐོག་མ་ཐོན་མི་སམ་བྷོ་ཊས་སྤྱན་དྲངས་པའི་ཆོས་དང་རིག་པའི་གནས་མཐའ་དག་བོད་སྐད་ལ་སྒྱུར་ཅིག་གསུངས་པ་བཞིན། རྒྱ་གར་གྱི་སློབདཔོན་ཀུ་ས་ར་དང༌། བྲམ་ཟེ་ཤང་ཀ་ར། སློབ་དཔོན་ལི་བྱིན། བལ་པོའི་སློབ་དཔོན་ཤཱི་ལ་མ ། ཁ་ཆེའི་སློབ་དཔོན་ཏ་ནུཏ་དང༌། གྷ་ནུ་ཏ། རྒྱ་ནག་གི་སློབ་དཔོན་ཧྭ་ཤང་མ་ཧཱ་དེ་བ་ཚེ་རྣམས་སྤྱན་དྲངས་ཏེ། བོད་ཀྱི་ལོ་ཙཱ་བ་ཐོན་མི་སམ་བྷོ་ཊ་དང༌། དེའི་མཆན་བུ་ངྷརྨ་ཀོ་ཤ། །ཨ་ལོ་ཀ །ཡེ་ཤེས་དཔལ་སོགས་ཀྱིས་ལོ་ཙཱ་བྱས། དེ་རྣམས་ལས་རྒྱ་གར་གྱི་སློབ་དཔོན་ཀུ་ས་རའི་ཡོན་བདག་བལ་བཟའ་ཁྲི་བཙུན་གྱིས་བྱས། ལོ་ཙཱ་བ་ཐོན་མིས་བྱས། བྲམ་ཟེ་ཤང་ཀ་རའི་ཡོན་བདག་རྒྱལ་པོས་བྱས། ལོ་ཙཱ་བ་ངྷརྨ་ཀོ་ཤས་བྱས། རྒྱ་ནག་གི་མཁན་པོའི་ཡོན་བདག་རྒྱ་བཟའ་ཀོང་ཇོས་བྱས། ལོ་ཙཱ་བ་ཡང་ཀོང་ཇོ་ཉིདདང་ལྷ་ལུང་རྡོ་རྗེ་དཔལ་གྱིས་བྱས། བལ་པོ་དང་ཁ་ཆེའི་ཡོན་བདག་བལ་བཟའ་ཁྲི་བཙུན་གྱིས་བྱས། ལོ་ཙཱ་བ་ཡང་ཁྲི་བཙུན་ཉིད་དང་ཐོན་མིས་བྱས་སོ།།
རྒྱལ་པོའི་བཀའ་བཞིན། སློབ་དཔོན་ཀུ་ས་རས་མངོན་པའི་སྡེ་དང༌། ཕ་རོལ་ཏུ་ཕྱིན་པའི་སྐོར་བསྒྱུར། བལ་པོའི་སློབ་དཔོན་སོགས་ཀྱིས་མདོ་སྡེའི་སྡེ་དང༌། ཕལ་ཆེན་དང༌། སྤྱན་རས་གཟིགས་ཀྱི་མདོ་རྒྱུད་རྣམས་བསྒྱུར། བྲམ་ཟེ་ཤང་ཀ་རས་འདུལ་བའི་སྡེ་དང་ཀྲི་ཡའི་མདོ་རྒྱུད་རྣམས་བསྒྱུར། རྒྱ་ནག་གི་མཁན་པོས་སྨན་དང་དཔྱད་ལ་སོགས་པ་བསྒྱུར། དེ་དག་གི་སྐབས་སུ་ལོ་པཎ་རྣམས་ལ་གསེར་དངུལ་གྱི་འབུལ་བ་སོགས་བསྙེན་བཀུར་རྨད་དུ་བྱུང་བ་བྱས་སོ།།
སྐྱེ་བོ་བློ་དམན་པ་རྣམས་ལ་ལུང་གི་ཆོས་གོ་བར་བྱ་བའི་ཕྱིར་གཟུངས་ཀྱི་སྙེ་མ་སོགས་སྒྲུང་བསླབས། རིགས་པའི་ཆོས་གོ་བར་བྱ་བའི་ཕྱིར་ལྡེའུ་ (ཁེད།) བསླབས། ཞང་ཞུང་ཡུལ་ནས་བོན་པོ་ཞང་ཞུང་ལྷ་སྡེ་སྤྱན་དྲངས་ནས། བོན་པོ་ཨ་བ་རྣམ་གསལ་ཞེས་བྱ་བ་ལ་སློབ་ཏུ་བཅུག་སྟེ། མོ་རྩིས། ལྷ་གསོལ། འདྲེ་འདུལ་སོགས་ཀྱང་བྱེད་དུ་བཅུག་གོ།
གཞན་ཡང་ཐོན་མིས་དཀོན་མཆོག་སྤྲིན། ཤེར་ཕྱིན་སྟོང་ཕྲག་བརྒྱ་བ་ཡང་བསྒྱུར་བར་བཤད། གཙོ་བོ་ཐུགས་རྗེ་ཆེན་པོའི་མདོ་རྒྱུད་ཉི་ཤུ་རྩ་གཅིག་བསྒྱུར་བ་བཀའ་ཆེམས་ཀྱི་ལོ་རྒྱུས་ཆེན་མོ་ལྟར་ཡིན་ཏེ། ༡ ཟ་མ་ཏོག་བཀོད་པ། ༢ ཕྱག་སྟོང་སྤྱན་སྟོང་གི་གཟུངས། ༣ པདྨའི་སྙིང་པོའི་མདོ། ༤ ཞལ་བཅུ་གཅིག་པའི་མདོ། ༥ བཅུ་གཅིག་ཞལ་གྱི་གཟུངས། ༦ དོན་ཡོད་ཞགས་པ། ༧ དོན་ཞགས་ཕྱི་མ། ༨ པད་མ་མཆོག ༩ དབང་བསྒྱུར་འཁོར་ལོ། ༡༠ ཆོ་ག་སྔགས་ཀྱི་རྒྱུད། ༡༡ ཡིད་བཞིན་ནོར་བུའི་གཟུངས། ༡༢ སྙིང་རྗེ་ཆེན་པོ་མི་གཤོལ་བ། ༡༣ འོད་ཟེར་རྣམ་བཀོད། ༡༤ པད་མ་ཅོད་པན་གྱི་རྒྱུད། ༡༥ ཡི་གེ་དྲུག་པའི་མདོ། ༡༦ དམ་ཆོས་པད་དཀར། ༡༧ པུཎ་ཌ་རཱི་ཀའི་མདོ། ༡༨ ཆུ་ཀླུང་སྣ་ཚོགས་པའི་མདོ། ༡༩ སྣང་བ་རོལ་བའི་མདོ། ༢༠ མཚན་བརྒྱ་རྩ་བརྒྱད་པ། ༢༡ མཚན་རབ་ཡོངས་སུ་བསྟན་པའི་མདོ་རྣམས་སོ།།
འདི་དག་ལས། འོད་ཟེར་རྣམ་བཀོད། ཆུ་ཀླུང་སྣ་ཚོགས། སྣང་བ་རོལ་བ། མཚན་རབ་ཡོངས་སུ་བསྟན་པ་རྣམས་དེང་སང་བཀའ་འགྱུར་ན་མི་སྣང་ལ། གཞན་དོན་ཞགས་ཆོ་ག་ཞིབ་མོ་ལ་ཆོ་ག་སྔགས་ཀྱི་རྒྱུད། ཅེས་པ་ལྟ་བུ་འགྱུར་ཁྱད་མ་གཏོགས་དེང་སང་བཞུགས། ཞེས་དེབ་ཐེར་མཁས་པའི་དགའ་སྟོན་ལས་གསུངས་པ་ལྟར་རོ།།
གཞན་ཡང་རྒྱལ་པོའི་བཀའ་ལྟར་ཐོན་མིས་གཉན་པོ་གསང་བ་ཞེས་པའི་སྒྲོམ་གྱི་ཁ་ཕྱེས་ཏེ། དཔང་སྐོང་ཕྱག་རྒྱ་བ། མདོ་སྡེ་ཟ་མ་ཏོག །ཙིན་ཏ་མ་ཎིའི་གཟུངས། མདོ་སྡེ་ལས་རྣམ་པར་འབྱེད་པའི་གཟུངས་རྣམས་བླངས་ནསབསྒྱུར། དཔང་སྐོང་ཕྱག་རྒྱ་བ་ནི། བཀའ་འགྱུར་སྡེ་དགེའི་པར་གྱི་ཡ་པོད་ཀྱི་ཐོག་མར། དཔང་སྐོང་ཕྱག་རྒྱ་བ་ཐོན་མི་སམ་བྷོ་ཊའི་འགྱུར། ཞེས་དཀར་ཆག་ན་ཡོད་པ་དེ་ཡིན། འོན་ཀྱང་སྲོང་བཙན་གྱི་དུས་མ་ཟད། སྔ་དར་དང་ཕྱི་དར་སྐབས་གང་འགྱུར་ཐམས་ཅད་ད་ལྟ་ཡོད་པའི་ངེས་པ་མེད་དེ། གླང་དར་གྱི་བྱེད་སྤྱོད་ཀྱི་དབང་གིས་བརླགས་སྟོར་དང༌། དེ་མིན་དཔེ་རྒྱུན་སྟོར་ནས་མ་རྙེད་པ་ཡང་དུ་མ་ཞིག་ཡོད་པ་བཀའ་བསྟན་གྱི་དཀར་ཆག་དག་ན་གསལ་ལོ།།
དེ་ནས་རྒྱལ་པོ་སྲོང་བཙན་རང་གིས་ཀྱང་ཡི་གེ་དང་སྒྲ་སྙན་སོགས་རིག་པའི་གནས་དང་ཆོས་ལ་བརྩོན་པ་ཆེར་བསྐྱེད་ནས་སྦྱངས་པ་མཛད་པས་མཁས་པ་ཆེན་པོར་གྱུར་ཏེ་བསྟན་བཅོས་མང་པོ་མཛད། དཔེར་ན། བཀའ་ཆེམས་ཀྱི་ལོ་རྒྱུས་ཆེན་མོ་རྣམས་དང༌། ཐུགས་རྗེ་ཆེན་པོའི་སྒྲུབ་ཐབས་ཆོ་གའི་རིམ་པ་བརྒྱད། མདོ་སྐོར་ལེའུ་སུམ་ཅུ་རྩ་དྲུག་སྒྲུབ་སྐོར་ཆེ་ཕྲན་གཉིས། ཆེན་མོ་ལ་དྲུག་སྐོར་དང་གསུམ་སྐོར་གཉིས། དེ་གཉིས་ཀྱི་བཤད་ཆོས། སྤྱིའི་ཁོག་དབུག་སྒོས་ཀྱི་བཤད་འགྲེལ། ཊཱི་ཀཱ་དང་བསྡུས་དོན་རྣམས། སྒྲུབ་ཕྲན་ལ་རྒྱས་འབྲིང་བསྡུས་གསུམ། གཞན་ཡང༌། ཐོན་མིསམ་བྷོ་ཊ་དང༌། ལོ་ཙཱ་བ་ཨརྱ་ཨ་ལོ་ཀས་ཞུས་པ་སོགས་ཞལ་གདམས་བརྒྱ་དང་ལྔ་བཅུ་ཡོད། འདི་དག་མ་ཎི་བཀའ་འབུམ་དུ་བཞུགས་ལ། ལུགས་ཀྱི་བསྟན་བཅོས་མང་པོ་མཛད་པ་རྒྱལ་རབས་དེབ་ཐེར་སོགས་ན་བཞུགས་སོ།།
ཡོན་ཏན་ཀུན་གྱི་མ་བྲིས་ཀློག་གིས། །
བོད་ཡུལ་རྨོངས་པའི་མུན་པ་ཀུན་བསལ་ཏེ། །
ཆོས་དང་སྲིད་ཀྱི་རྒྱལ་ཁམས་བདེ་བར་མཛད། །
ཅེས་གསུངས་པ་ལྟར། རིག་གནས་དར་བའི་སྟོབས་ཀྱིས། ཆབ་སྲིད་ཀྱི་བྱ་བའང་དར་ཞིང་རྒྱས་ཏེ། བཀའི་བློན་པོ་སུམ་བརྒྱ། དེའི་ནང་དུ་གཙོ་བོ་འཕྲུལ་བློན་དྲུག འཕྲུལ་གྱི་གནའ་ཆེན་རིགས་བཟང་དང༌། ཞང་པོ་རྒྱལ་གྱི་ཁྲོམ་བཟང་སོགས་ནང་བློན་བརྒྱས་ནང་གི་བྱ་བ་བྱས། བྱང་གི་ཁྱུང་བོ་ཕུན་བཟང་བཙན་དང༌། ལམ་ཁྲི་བདེ་བླག་བཙན་སོགས་ཕྱི་བློན་བརྒྱས་ཕྱི་ཡི་བྱ་བ་ཐམས་ཅད་བྱས་ཏེ། ཤར་ཕྱོགས་རྒྱ་དང་མི་ཉག་གི་ཡུལ་ནས་བཟོ་དང་རྩིས་ཀྱི་རིག་པ་བླངས། ནུབ་ཕྱོགས་སྟག་གཟིག་བལ་པོ་སོགས་ནས་ཟས་ནོར་ལོངས་སྤྱོད་དྲངས། བྱང་ཕྱོགས་ཧོར་དང་ཡུ་གུར་ནས་ཁྲིམས་དང་ལས་ཀྱི་དཔེ་རྣམས་བླངས་ཏེ་ཕྱིའི་བྱ་བ་བྱས། མཁས་པ་ཐོན་མི་སམ་བྷོ་ཊ་དང༌། མགར་སྟོང་བཙན་སོགས་བློན་པོ་བརྒྱས། བར་གྱི་ཁོད་སྙོམས་པ་དང་ཆོས་དང་སྲིད་ཁྲིམས་བསྐྱངས། ཐོན་མི་སམ་བྷོ་ཊ་ནི་བོད་ཀྱི་བློན་པོ་མཛངས་མི་བདུན་གྱི་བཞི་པ་ཡིན་ལ། མཛངས་པའི་ལས་བོད་རང་གི་སྐད་ཀྱི་སྟེང་ནས་ཡི་གེ་འབྲི་བའི་སྲོལ་གསར་དུ་བཏོད་པ་སོགས་རིག་གནས་ཀྱི་བྱ་བ་རྒྱ་ཆེར་སྤེལ། ཁྲི་བཟང་ཡང་སྟོན་སྙགས་ཀྱི་བུ་ནི་མཛངས་མི་བདུན་གྱི་ལྔ་པ་ཡིན་ཏེ། མཛངས་པའི་ལུས་སུ། སྔར་བོད་མིའི་ཁང་ཁྱིམ་རི་ལ་ཡོད་པ་ལ། འདིས་ཀླུངས་སུ་ཕབ། མཁར་བརྩིགས་ནས་གྲོང་ཁྱེར་བཅོས་སོ། །གཞན་ཡང་ཁྲིམས་མེད་ན་འབངས་རྣམས་སྡུག་བསྔལ་བར་དགོངས་ནས། བཀའ་ཁྲིམས་ཡིག་ཆེན་པོ་དྲུག་མཛད་པ་དང༌། འཁོས་དྲུག་ཀྱང་མཛད། གཞན་ཡང་བཀའ་གྲོས་ཆེན་པོ་དྲུག ཡིག་ཚང་དྲུག །བཀའི་ཕྱག་རྒྱ་དྲུག རྐྱེན་དྲུག་དཔའ་མཚན་དྲུག དེ་རྣམས་ཀྱི་སྟེང་དུ་ཁྲིམས་ཡིག་དྲུག་པོ་བསྣན་པས་བོད་ཀྱི་འཁོས་སུམ་ཅུ་རྩ་དྲུག་ཅེས་གྲགས་ལ། (འཁོས་ཞེས་པ་ཐབས་ཀྱི་དོན་ནོ།) གཞན་ཡང་མཛད་པ་གསུམ། མི་མཛད་པ་གསུམ། བསྟོད་པ་གསུམ། སྨད་པ་གསུམ། མི་མནར་བ་གསུམ་སྟེ་རྒྱལ་ཁྲིམས་བཅོ་ལྔ༌། ཞེས་པ་ཡང་མཛད།།
སྲོག་མི་གཅོད་པའི་ཁྲིམས་གཤིན་སྟོང་དང་གསོན་སྟོང༌། མ་བྱིན་པར་མི་ལེན་པའི་ཁྲིམས་བརྒྱ་འཇལ་དང་བརྒྱད་ཅུ་འཇལ་དང་བརྒྱད་འཇལ། ལོག་པར་མི་གཡེམ་པའི་ཁྲིམས་སྨད་འཇལ་དང་བྱི་ཆད་(བྱི་ཕྲུག་གསོས་པའི་ཆད་པ།) རྫུན་སྤོང་བའི་ཁྲིམས་ལྷ་སྲུང་དཔང་དུ་བྱས་ནས་མནའ་སྤོབས་པ། ཆང་ལ་ཚོད་ཟིན་པ་དང༌། ཁེང་མི་ལྡོག་པ། (གྱེན་རྒོལ་མི་བྱེད་པ་།) བང་སོ་མི་འབྲུ་བ་སྟེ་ཁྲིམས་ཆེན་བདུན་དང༌། མི་ཆོས་གཙང་མ་བཅུ་དྲུག་གི་ཁྲིམས་གཉིས་བཅས་ཤིང༌། དང་པོ་ནི། མི་དགེ་བ་བཅུ་སྤོང་བའི་སྟེང་དུ། མ་ལ་མར་འཛིན་པ། ཕ་ལ་ཕར་འཛིན་པ། དགེ་སྦྱོང་ལ་དགེ་སྦྱོང་དུ་འཛིན་པ། བྲམ་ཟེ་ལ་བྲམ་ཟེར་འཛིན་པ། (བྲམ་ཟེ་ཞེས་པ་འཕགས་ཡུལ་དུ་རིགས་བཞིའི་ཡ་གྱལ་ལ་གོ་དགོས་ཤིང༌། འདིའི་སྐབས་སུ་ཡོནཏན་ཅན་ལ་ཟེར་བ་ཡིན་ནོ།) རིགས་ཀྱི་རྒན་རབས་ལ་བཀུར་བ། དྲིན་དུ་གཟོ་བ་གཞན་ལ་ངན་གཡོ་སྤང་བ་སྟེ་བཅུ་དྲུག་དང༌།།
ཕྱི་མ་ནི། དཀོན་མཆོག་ལ་གུས་པ། དམ་ཆོས་སྒྲུབ་པ། ཕ་མ་ལ་བཀུར་བ། ཡོན་ཏན་ཅན་ལ་གོང་དུ་བཀུར་བ། རིགས་མཐོ་དང་རྒན་པ་ལ་ཕུ་དུད། (བཀུར་སྟི།) མཛའ་བཤེས་ལ་གཞུང་བསྲིང་བ། ཡུལ་མི་ལ་ཕན་འདོགས་པ། ཡིད་དྲང་བ། མི་ཡ་རབས་ལ་བལྟ་བ། ཟས་ནོར་ལ་སྤྱོད་ཤེས་པ། དྲིན་ཅན་ལ་ཕན་ལན། བྲེ་སྲང་ལ་གཡོ་སྒྱུ་མེད་པ། སྤྱི་སྙོམས་ཆེ་ཞིང་ཕྲག་དོག་མེད་པ། ཚུལ་མིན་བུད་མེད་ཀྱི་ཁ་ལ་མི་ཉན་པ༑ ངག་འཇམ་ཞིང་སྨྲ་མཁས་པ། ཐེག་པ་ཆེ་ཞིང་བློ་ཁོག་ཡངས་པ་སྟེ་བཅུ་དྲུག་གོ །འདི་དག་ནི་སྲིད་ཀྱི་བྱ་བ་ཡིན་མོད། སྤྱི་ཚོགས་དང་རིག་གནས་འཕེལ་བའི་ཚད་ངེས་ཅན་ཞིག་ལ་མ་སླེབས་ན། འདི་ལྟ་བུའི་ཁྲིམས་ཡིག་སོགས་ཀྱང་འབྱུང་མི་སྲིད་པས། འདིར་མདོ་ཙམ་ཞི་གཞར་བྱུང་དུ་གླེང་བའོ།།
སྲོང་བཙན་གྱི་སྲས་གུང་རུ་གུང་བཙན་རྒྱལ་སར་བཞག་ཀྱང་ལོ་བཅོ་བརྒྱད་ཐོག་གཤེགས་པས་སླར་སྲོང་བཙན་ཉིད་རྒྱལ་སར་བཞུགས། སྲོང་བཙན་དགུང་ལོ་གྱ་གཉིས་པ་ལ་གཤེགས་རྗེས། མང་སྲོང་མང་བཙན་གྱིས་སྲིད་བཟུང༌། སྨནཔ་བློ་གྲོས་བཤེས་གཉེན་གྱི་བུ་འདྲེ་རྗེ་བཛྲ་གྱིས་གུང་སོང་གུང་བཙན་དང་མང་སྲོང་མང་བཙན་གཉིས་ཀའི་བླ་སྨན་པ་མཛད།།
དེ་རྗེས་འདུས་སྲོང་མང་རྗེ་རྒྱལ་སར་བཞུགས། སྨན་པ་འདྲེ་རྗེ་བཛྲ་གྱི་བུ་ཁྱུང་པོ་རྡོ་རྗེ་རྒྱལ་པོའི་བླ་སྨན་པ་མཛད། མང་སྲོང་དང་འདུས་སྲོང་གཉིས་ཀའི་དུས་སུ་ཆབ་སྲིད་རིག་གནས་སྔར་བཞིན་དར་ཞིང༌། འདུས་སྲོང་མང་རྗེ་འདིའིདུས་སུ། བོད་དུ་ཇ་འདེབས་པ་དང༌། རོལ་མོའི་རྣམ་གྲངས་མང་པོ་ཞིག་དར་ལ། རྩལ་པོ་ཆེའི་མི་བདུན་བྱུང་སྟེ། རྔོག་རིང་ལ་ནག་པོས་གླང་པོ་ཆེ་ཐེག རྔོག་གླིང་ཁམས་ཀྱིས་གཡག་གྲུས་པོ་ཆེ་ཐེག གནོན་རྒྱལ་མཚན་གྱིས་མདའ་སྟེ་ཁ་མས་བྱ་ཁྲའི་སྐེད་པ་བཅད། སྦས་མདོངས་ཅན་གྱིས་མིག་རྒྱང་གསུམ་ལ་མདའ་རྒྱང་སླེབ། མགོས་གཡག་ཆུང་གིསཤ་བའི་རླིད་བུ་བྱེ་མས་བཀང་སྟེ་ཀླད་ལ་བསྐོར། ཅོག་རོ་འབྲོང་གཤོར་གྱིས་འབྲོང་ཐུར་དུ་རྒྱུག་པ་གྱེན་དུ་འཐེན་ནུས། གནོན་ཁྲི་བདུན་གཡུ་བྱིན་གྱིས་རྟ་བཟང་པོ་གཡང་ལ་མཆོངས་པ་གྱེན་ལ་འདྲེན་ནུས་སོ།།
འདི་དག་ལ་དཔག་ན། རྒྱལ་པོ་འདི་དག་གི་རིང་ལ། གླུ་གར་དང་ཟློས་གར། སྒྱུ་རྩལ་སོགས་དར་རྒྱས་ཆེ་བར་སྣང༌། བློན་པོ་མགར་གྱི་བུ་བཙན་གཉན་ལྡེམ་བུ་དང་དབས་ཏ་ར་ཁོང་ལོད་ཀྱིས་བློན་གཙོ་བོ་བྱས་ཏེ་མཐའ་བཞིདབང་དུ་བསྡུས་ཚུལ་དེབ་དམར་སོགས་ན་གསལ་ལོ།།
དེ་ནས་ཁྲི་ལྡེ་གཙུག་བརྟན་རྒྱལ་སར་འཁོད། སྨ་ར་ཡོད་པ་དང་བགྲེས་ཉམས་ཆེ་བས། རྒྱལ་པོ་མེས་ཨག་ཚོམ་ཞེས་གྲགས། སྨན་པ་ཁྱུང་པོ་རྡོ་རྗེའི་བུ་གཡུ་ཐོག་ཡོན་ཏན་མགོན་པོ་གཞོན་དུས། རྒྱལ་པོ་འདིའི་བླ་སྨན་པ་མཛད། འདིའི་རིང་ལ་ལི་ཡུལ་ནས་རབ་ཏུ་བྱུང་བ་མང་པོ་བྱོན་པ་དང༌། རྒྱ་ནག་ནས་ཀྱང་ཧྭ་ཤང་མང་པོ་བྱོན། ཆོས་འགའ་དང་སྨན་དཔྱད་སོགས་བསྒྱུར། བྲན་ཀ་མུ་ལ་ཀོ་ཤ་དང་གཉགས་ཛྙཱ་ན་ཀུ་མཱ་ར་གཉིས་ཀྱིས་མདོ་སྡེ་ལས་བརྒྱ་པ་དང་གསེར་འོད་དམ་པ་དང་ཀྲི་ཡ་དང༌། སྨན་དཔྱད་སོགས་བསྒྱུར། རྒྱལ་པོས་དེ་དག་བཞུགས་པའི་ལྷ་ཁང་ལྔ་བཞེངས། ཆོསདང་རིག་གནས་སྔར་བཞིན་དར་བར་མཛད། མངའ་ཐང་བླ་ལྷག་ཏུ་འཕེལ་ཏོ།།
དེ་རྗེས་རྒྱལ་པོ་ཁྲི་སྲོང་ལྡེ་བཙན་གྱི་དུས་སུ། གཡུ་ཐོག་ཡོན་ཏན་མགོན་པོ་སྔ་མ། རྒྱལ་པོའི་བླ་སྨན་པ་མཛད། གཡུ་ཐོག་ཡོན་ཏན་མགོན་པོ་རྒྱ་གར་བལ་པོ་རྒྱ་ནག་སོགས་སུ་ལན་དུ་མར་ཕེབས་ཏེ། བོད་ཡུལ་འདིར་གསོ་བ་རིག་པ་དར་ཞིང་རྒྱས་པར་མཛད། བོད་ཀྱི་མཁས་པ་མི་དགུ་ཞེས་པའི་སྨན་པ་མཁས་པ་གྲགས་པ་ཅན་དགུ་བྱུང༌། རྒྱལ་པོ་འདི་གཞོན་དུས་ཡབ་ཀྱིས་སང་ཤི་དང་མི་བཞི་རྒྱ་ནག་ཏུ་ཆོས་སོགས་རིག་པའི་གནས་ལེན་དུ་མངགས། ཡབ་འདས་ནས་ཁྲི་སྲོང་ལྡེ་བཙན་ནར་མ་སོན་པའི་སྐབས་སུ། བློན་པོ་མ་ཞང་གྲོམ་པ་སྐྱེས་དབང་ཆེ་ཞིང་ཆོས་ལ་གནག་པས། རྒྱའི་ཧྭ་ཤང་རྣམས་རང་ཡུལ་དུ་སྤྱུགས་ཏེ། ཆོས་བྱས་མི་ཆོག་པའི་ཁྲིམས་བུ་ཆུང་མང་པོ་ཞིག་བྱས་སྟབས། སང་ཤིས་རྒྱ་ནག་ནས་གླེགས་བམ་བམ་པོ་སྟོང་ལོངས་པ་ཞིག་ཁྱེར་ནས་བོད་ཡུལ་དུ་སླེབས་ཀྱང༌། མ་ཞང་ལ་སྐྲག་ནས་གླེགས་བམ་རྣམས་མཆིམས་ཕུའི་རྫ་གསེབ་ཏུ་སྦས། ཕྱིས་ཁྲི་སྲོང་ནར་སོན་པའི་ཚེ། རྒྱ་ནག་ནས་ཁྱེར་ཡོང་བའི་དགེ་བ་བཅུའི་མདོ་དང༌། རྡོ་རྗེ་གཅོད་པ། ས་ལུ་ལྗང་པའི་མདོ་ལ་སོགས་པ་སང་ཤི་དང་རྒྱ་མེ་མགོ་དང་ཁ་ཆེ་ཨ་ནན་ཏ་རྣམས་ཀྱིས་བསྒྱུར་ཏོ།།
གཞན་ཡང༌། འདི་དུས་རྒྱ་ནག་ནས་ཧྭ་ཤང་ནེ་ལེ་དང༌། དར་ཆེན་ཧྭ་ར་དང༌། ཨི་པ་བྷ་བོ་སོགས་རྒྱ་ནག་གི་མཁས་པ་མང་པོ་བོད་ཡུལ་དུ་བྱོན་ཏེ། བོད་ཀྱི་ལོ་ཙཱ་བ་བྷི་ལ་ཤོང་ཀུན་དང༌། དར་ཆེན་དཔལ་སོགས་ཀྱིས་ལོ་ཙཱ་བྱས་ནས་རྩིས་དང་གསོ་བ་རིག་པ་སོགས་ཀྱི་གཞུང་ལུགས་མང་པོ་བོད་སྐད་དུ་བསྒྱུར། གསོ་བ་རིག་པའི་ཕྱོགས་ལ་དེའི་སྐབས་སུ་བོད་འདིར་ཕྱོགས་རིགས་ཀྱི་སྨན་པ་གྲགས་པ་ཅན་དགུ་ཡོད་དེ། རྒྱ་གར་བ་ཤན་ཏི་གར་བྷ། རྒྱ་ནག་པ་སྟོང་གསུམ་གང་བ། ལི་ཡུལ་བ་མ་ཧཱ་དེ་བ། བལ་པོ་བ་དཱ་ན་ཤི་ལ། ཁ་ཆེ་བ་ཁུ་ན་བཛྲ། སོག་པོ་བ་ན་ལ་ཤན་དིར། དོལ་པོ་བ་ཁྱོམ་རུ་རྩེ། གྲུ་གུ་བ་སེང་གེ་འོད་ཅན། ཁྲོམ་པ་ཤི་ལ་ན་སྟེ་དགུ་ཡོད་ལ། དེ་དག་གིས་རང་རང་གི་ལུགས་ཀྱི་སྨན་དཔྱད་ཀྱི་རི་གནས་རྣམས་སྤེལ་ཞིང༌། གཡུ་ཐོག་པ་ཆེན་པོ་དང༌། བགྲོ་གླེང་བྱས་ཏེ། གཡུ་ཐོག་པ་རྒྱལ་ནས་ཀུན་གྱིས་གཡུ་ཐོག་པ་ལ་བཀུར་བཟོ་ཆེར་བྱས། གཡུ་ཐོག་པ་ཆེན་པོས། ཀོང་པོའི་ཡུལ་དུ་སྨན་ལུང་ཞེས་བྱ་བའི་ས་ཆར་སྨན་སློབ་པའི་དགོན་པ་བཏབ་སྟེ༑ དཔོན་སློབ་སྟོང་ཙམ་དེར་བཞུགས་ནས་རྒྱུད་བཞི་རྩ་འགྲེལ་ཆ་ལག་ཁ་སྐོང་དང་བཅས་པ་དང༌། ཕྱོགས་རིགས་ཀྱི་སྨན་པ་དགུས་བསྒྱུར་བའི་སྨན་གཞུང་རྣམས་དང༌། བོད་ཀྱིས་མཁས་པ་མི་དགུས་མཛད་པའི་སྨན་གཞུང་རྣམས་དང༌། སྨན་དཔྱད་ཟླ་བའི་རྒྱལ་པོ། བདུད་རྩི་བུམ་པ། ཡན་ལག་བརྒྱད་པའི་སྙིང་པོ་བསྡུས་པ། དྲང་སྲོང་སྙན་བརྒྱུད། ཚིག་དོན་ཟླ་ཟེར་ལ་སོགས་པའི་སྨན་གཞུང་རྣམས་ལ་སྦྱངས་པ་དང་སྤེལ་བར་མཛད་པས་གསོ་བ་རིག་པ་འདི་བོད་ཡུལ་དུ་ཆེས་ཆེར་དར་བ་བྱུང་ངོ༌།།
གཞན་ཡང༌། རྒྱ་གར་ནས་སློབ་དཔོན་ཞི་བ་འཚོ་དང༌། པདྨ་འབྱུང་གནས་རྣམ་གཉིས་སྤྱན་དྲངས། བསམ་ཡས་ཀྱི་གཙུག་ལག་ཁང་ཆེན་པོ་བཞེངས། དེ་ནས་སློབ་དཔོན་ཞི་བ་འཚོས་རྒྱ་གར་ནས་དགེ་སློང་བཅུ་གཉིས་གདན་དྲངས། མཆིམས་ཨ་ནུའི་བུ་ཤཱཀྱ་པྲ་བྷ་དང༌། པ་གོར་ཧེ་འདོད་ཀྱི་བུ་བཻ་རོ་ཙ་ན། སྦ་ཁྲི་བཞེར་གྱི་བུ་སྦ་རཏ་ནའམ་སང་ཤི་ཏའམ་ཁྲི་གཟིགས་ཀྱང་ཟེར། ཞང་ཉང་བཟང་གི་བུ་ལྷ་བུ་ལྷ་བསེ་བཙན། ཤུད་པུ་ཁོང་སླེབ། འཁོན་ཀླུའི་དབང་པོ་བསྲུང་བ། ངན་ལམ་རྒྱལ་མཆོག གཙང་ལེགས་གྲུབ། འཇམ་དཔལ་གོ་ཆ། པྲན་ཀ་མུ་ཏིཀ གླང་ཀ་ཏ་ན། རྩངས་དེ་ཝེན་དྲ། རླངས་ཁམས་པ་གོ་ཆ། འཁོན་ན་གེན། རྨ་རིན་ཆེན་མཆོག །ལ་གསུམ་རྒྱལ་བ་བྱང་ཆུབ། སྦ་གསལ་སྣང༌། སྦ་ཁྲི་བཞེར། སྦྲང་རྒྱར་ལེགས་གཟིགས། སེང་གོང་ལྷ་ལུང་གཟིགས། སྣ་ནམ་རྡོ་རྗེ་བདུད་འཇོམས། ཤུད་པུ་དཔལ་གྱི་སེང་གེ །རྩངས་ས་ལེའི་བུ་རིན་ཆེན་ལེགས་གྲུབ་སོགས་ལ་ལེགས་སྦྱར་གྱི་སྐད་ཡིག་དང༌། རྒྱ་ནག་དང་བལ་པོ་ཟ་ཧོར་ཁ་ཆེ་ལི་ཡུལ་སོགས་ཀྱི་སྐད་ཡིག་དང་བརྡ་སྤྲོད་པའི་གཞུང་དང་རིག་པའི་གནས་དུ་མ་བསླབས་པས་ཆེས་མང་ཆེ་བ་མཁས་པ་ཆེན་པོར་གྱུར་ནས་ལོ་ཙཱ་བ་མང་པོ་བྱོན། དེ་དག་ལས་ཐོག་མར་སད་མི་མི་བདུན་རབ་ཏུ་བྱུང་བ་དང༌། དེ་རྗེས་ཡང་རབ་བྱུང་གི་སྡེ་ཆེར་འཕེལ་ཏོ།།
གཞན་ཡང་བོད་རང་དུ་ཀ་ཅོག་ཞང་གསུམ་སོགས་ལོ་ཙཱ་བ་འབོར་ཆེན་བྱུང་སྟེ། བསམ་ཡས་ཀྱི་སྒྲ་བསྒྱུར་ལོ་ཙཱ་གླིང་དུ་ཆོས་བསྒྱུར། འདུད་འདུལ་སྔགས་པ་གླིང་དུ་དབང་བསྐུར། རྣམ་དག་ཁྲིམས་ཁང་གླིང་དུ་སོ་ཐར་གྱི་སྡོམ་ཁྲིམས་འཕོག དགའ་ལྡན་སེམས་བསྐྱེད་གླིང་དུ་བྱང་སྡོམ་འཕོག མི་གཡོ་བསམ་གཏན་གླིང་དུ་རྒྱའི་ཧྭ་ཤང་ལ་སོགས་པས་བསམ་གཏན་བྱེད། བརྡ་སྤྲོད་ཚང་བའི་གླིང་དུ་བརྡ་སྦྱོར། བཻ་རོ་ཙ་ནའི་གླིང་དུ་ཆོས་འཆད། དཀོར་མཛོད་བེ་ཧར་གླིང་དུ་ནོར་བཞག་གོ །རྒྱལ་པོ་འདིའི་རིང་ལ་ཁམས་ཡན་ཆད་དུ་ཆོས་ཀྱི་གྲྭ་ཆེན་པོ་བཅུ་གཉིས་བཙུགས། ཡེར་བདང་མཆིམས་ཕུར་སྒོམ་གྲྭ་བཙུགས། རྒྱའི་ཧྭ་ཤང་མ་ཀོ་ལ་སྤྱན་དྲངས་ནས། སྦ་རཏ་ནས་ཤེས་རབ་འབུམ་པ་ཐོག་མར་བསྒྱུར། བྲན་ཀ་ལེགས། ལྷ་ལུང༌། ཀླུ་གོང༌། དབུས་གོང༌། ཆུང་བོ་རྩེ་སོགས་ཀྱིས་རྒྱ་ནག་པོའི་ལོ་ཙཱ་བྱས་སོ།།
གཞན་ཡང༌། རྒྱ་གར་གྱི་སློབ་དཔོན་བི་མ་ལ་མི་ཏྲ་དང༌། སངས་རྒྱས་གསང་བ་དང༌། ཤཱན་ཏི་གར་བྷ་དང༌། བི་ཤུད་ངྷ་སིང་ཧ་ལ་སོགས་པ་དང༌། བོད་ཀྱི་ལོ་ཙཱ་བ་སད་མི་མི་བདུན་དང༌། ཆོས་ཀྱི་སྣང་བ་དང༌། བན་དེ་ནམ་མཁའ་དང༌། སྒྲོན་རིན་ཆེན་སྡེ། རྣམ་པར་མི་རྟོག་པ། ཤཱཀྱ་འོད་ལ་སོགས་པས་ལོ་ཙཱ་བྱས་ཏེ། རྒྱ་གར་རྒྱ་ནག་ཁ་ཆེ་ཟ་ཧོར་ལི་ཡུལ་སོགས་ནས་བཀའ་དང་བསྟན་བཅོས་ཤིན་ཏུ་མང་པོ་བསྒྱུར། དེ་ནས་ཕོ་བྲང་ལྡན་དཀར་ན་བཞུགས་པའི་སྒྲ་བསྒྱུར་ཀ་བ་དཔལ་བརྩེགས་དང༌། ཀླུའི་དབང་པོ་ལ་སོགས་པས་བོད་ཁམས་སུ་འགྱུར་རོ་འཚལ་གྱི་གཞུང་གི་མཚན་བྱང་བཅོས་ཏེ་དཀར་ཆག་བྲིས་པ་ལ་དཀར་ཆག་ལྡན་དཀར་མ་ཟེར་རོ།།
རྒྱལ་པོ་དང་བློན་འབངས་ལོ་ཙཱ་བ་རྣམས་ཀྱིས་ཀྱང་དམ་པའི་ཆོས་སོགས་རིག་པའི་གནས་ལ་སྦྱང་བ་ཆེར་མཛད་པས་མཁས་པ་ཆེན་པོར་གྱུར་ཏེ། རྒྱལ་པོ་ཁྲི་སྲོང་ལྡེ་བཙན་རང་ཉིད་ཀྱིས། བཀའ་ཡང་དག་པའི་ཚད་མ་བམ་པོ་བདུན། དེའི་མདོར་བསྟན་བམ་པོ་གཅིག དེ་བཞིན་གཤེགས་པའི་སྐད་བརྡ་བམ་པོ་ལྔ། བྱམས་པའི་བསྟོད་ཆེན་བམ་པོ་གཅིག་ལྷག་པ་སོགས་བསྟན་བཅོས་གཞུང་ཚད་ཆེ་བ་དང༌། (འདི་སྡེ་དགེའི་བསྟན་འགྱུར་གྱི་པོ་ཏི་ཅོ་པ་ན་བཞུགས་) གྲུབ་པའི་མཐའ་དགྲོལ་བ། དབུ་མའི་གཟེར་བུ། བསམ་གཏན་གྱི་དོགས་པ་བརྒྱད་བསལ་བ། ལྷ་བཙན་པོས་བཀས་བཅད་སོགས་དང༌། འཕགས་པ་རྣམ་སྣང༌། ཤཱཀྱ་ཐུབ་པ། འཇམ་དཔལ། བྱམས་པ། མི་གཡོ་མགོན། བྱང་ཆུབ་སེམས་དཔའ་བརྒྱ་ལ་བསྟོད་པ་སོགས་གཞུང་ཚད་ཆུང་བའི་བསྟན་བཅོས་དུ་མ་མཛད་དོ། །ཡུམ་སྟོང་ཕྲག་བརྒྱ་པའི་འགྲེལ་བ་འབུམ་རྐྱང་པའི་གནོད་འཇོམས་སུ་གྲགས་པ་ཡང་ཁྲི་སྲོང་གིས་མཛད་པ་དཀར་ཆག་འཕང་ཐང་མར་བཤད་པ་ལྟར་ཡིན་ལ། དཀར་ཆག་མཆིམས་མ་དང་ལྡན་དཀར་མར་བཤད་པའི་ཡུམ་གྱི་འགྲེལ་པ་གནོད་འཇོམས་སུ་གྲགས་པ་རྒྱ་གར་མ་ཡིན་པར་བཤད་པ་དེ་ནི། དཾཥྜ་སེ་ནའམ་ཁ་ཆེ་མཆེ་བའི་སྡེ་ཡང་ཟེར་བ་དེས་བརྩམས་པའི་ཡུམ་གསུམ་གནོད་འཇོམས་ཡིན་ནོ།།
གཞན་ཡང་མུ་ཏིག་བཙན་པོས་མཛད་པའི་དགོངས་པ་ངེས་འགྲེལ་གྱི་འགྲེལ་པ་དང༌། ཇོ་བོ་བྱང་ཆུབ་རྗེའི་སྨོན་ལམ་སོགས་ལྷ་སྲས་དང༌། བཙུན་མོས་མཛད་པ་དང༌། བཻ་རོ་ཙ་ནས་མཛད་པའི་དོན་གསལ་སྒྲོན་མ་ (འདི་ཡང་སྡེ་བསྟན་ཅོ་པར་བཞུགས།) རིགས་པ་དྲུག་ཅུ་པ་ལས་མདོར་བསྡུས་ཏེ་བཤད་པ། སྣང་མཐའི་མཚན་བརྗོད་ལ་སོགས་པ་དང༌། དཔལ་དབྱངས་ཀྱིས་མཛད་པའི་གཅེས་པ་བསྡུས་པའི་ཕྲིན་ཡིག །ཀ་བ་དཔལ་བརྩེགས་ཀྱིས་མཛད་པའི་གསུང་རབ་རིན་པོ་ཆེའི་གཏམ། ཕྱིའི་ཡུལ་དྲན་རྒྱུད་དུ་ཡོད་པར་འདོད་པ་སེལ་བ། མཚན་ཉིད་གསུམ་མདོར་བསྟན། ཆོས་ཀྱི་རྣམ་གྲངས་རྩ་འགྲེལ་གཉིས་ (འདི་སྡེ་བསྟན་སྣ་ཚོགས་སྐོར་དུ་བཞུགས།) ཞང་ཡེ་ཤེས་སྡེས་མཛད་པའི་ལྟ་བའི་ཁྱད་པར། བཟང་སྤྱོད་ཀྱི་འགྲེལ་བ་བཞིའི་དོན་བསྡུས་ (འདི་ཡང་སྡེ་བསྟན་ཆོ་པར་བཞུགས།) འཇིག་རྟེན་ཕ་རོལ་སྒྲུབ་པ་དགོངས་སྡེམ་དགོངས་གཞིའི་བརྗེད་བྱང་རྣམས་དང༌། ཅོག་རོ་ཀླུའི་རྒྱལ་མཚན་གྱིས་མཛད་པའི་དགོངས་པ་ངེས་འགྲེལ་གྱི་རྒྱ་ཆེར་འགྲེལ་ (འདི་ཡང་སྡེ་བསྟན་ཆོ་པར་བཞུགས།) ངེས་པའི་དོན་དབུ་མ། ཤེར་ཕྱིན་མདོར་བསྡུས། ཕྲེང་བའི་རྒྱན། ཆོས་གཏན་ལ་དབབཔ། དཔལ་བརྩེགས་དང་ཀླུའི་རྒྱལ་མཚན་གྱི་བརྒལ་ལན་བཞི་ཕྲུགས། གཞན་ཡང་དཔལ་བརྩེགས་ཀྱིས་མཛད་པའི་ལྟ་བའི་རིམ་པའི་མན་ངག་དང༌། གསུང་རབ་རིན་པོ་ཆེའི་གཏམ་རྒྱུད་དང་ཤཱཀྱའི་རབས་རྒྱུད། (འདི་གཉིས་ཀྱང་སྡེ་བསྟན་དུ་བཞུགས།) སློབ་དཔོན་ཤེས་རབ་སྙིང་པོའི་དགོངས་འགྲེལ་བྱམས་ལེའི་བརྗེད་བྱང༌། པྲ་ཤ་སེ་ནའི་ཤེར་སྙིང་ཊཱི་ཀཱ །སློབ་དཔོན་བཀྲ་ཤིས་ཀྱི་དབུ་མ་རྒྱན་གྱི་བརྗེད་བྱང་དང༌། སྡོམ་པ་ཉི་ཤུ་པའི་འགྲེལ་པ། དཔལ་གྱི་ལྷུན་པོའི་དགེ་སློང་མའི་སོ་ཐར་གྱི་འགྲེལ་པ། ཨ་ཙཱརྱ་ཀ་ལ་ཡ་ན་དང༌། རིན་ཆེན་ཟླ་འབྱུང་དང༌། ཀོང་ཨུད་པལ་ཀོ་ཥ་སོགས་ཀྱི་དྲིས་ལན། ལྕེ་ཁྱི་འབྲུག་གི་སྒྲའི་གནས་བརྒྱད་རྩ་འགྲེལ་དང་ (འདི་ཡང་སྡེ་བསྟན་དུ་བཞུགས།) མ་བྱིན་ལེན་གྱི་སྐབས་ནས་མཁན་པོ་བཞིས་དཔྱད་པ་སོགས་ལོ་ཙཱ་བ་ཆེན་པོ་རྣམས་ཀྱིས་ཀྱང་བསྟན་བཅོས་མང་དུ་མཛད།།
བཻ་རོ་ཙ་ན། ལྡན་མ་རྩེ་མང༌། ཁ་ཆེ་ཨ་ནན་ཏ་སྟེ་ལོ་ཙཱ་བ་རྒན་གསུམ། གཉགས་ཛྙ་ན་ཀུ་མ་ར། འཁོན་ཀླུའི་དབང་པོ། རྨ་རིན་ཆེན་མཆོག་སྟེ་བར་པ་གསུམ། ཀ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ཞང་ཡེ་ཤེས་སྡེ་སྟེ་གཞོན་གསུམ་བཅས་དགུ་དང༌། ཕྱིས་སུ་བརྒྱ་ཕྲག་ལྷག་བྱུང་ཞིང༌། གཞན་ཡང་སློབ་དཔོན་ཀ་མ་ལ་ཤི་ལ་སོགས་པཎྜི་ཏ་མང་པོ་སྤྱན་དྲངས་ནས་རྒྱ་གར་སོགས་ནས་ནང་དོན་རིག་པ་སོགས་མང་པོ་བསྒྱུར་བས་དམ་པའི་ཆོས་སོགས་རིག་པའི་གནས་དར་ཞིང་རྒྱས་སྟབས་ཆབ་སྲིད་དང་དཔལ་འབྱོར་ཡང་སྔར་ལས་ལྷག་པར་དར་ཏེ་མཐའ་བཞི་དབང་དུ་འདུས་ཚུལ་སོགས་དེབ་ཐེར་རྣམས་སུ་གསལ། བཀའ་གཙིགས་ཀྱི་ཡི་གེ་དང་ཁྲིམས་ཡིག་སོགས་མང་པོ་བཟོས། བློན་ཆེན་མགོས་རྒན་གྱི་བུ་མགོས་ཁྲི་བཟང་ཡབ་ལྷག་གིས། སྔར་ཞལ་ལྕེ་གསོས་ཐང་སྟོང་ཐང་དུ་བཅད་པ་མེད་པ་ལ་ཁྲིམས་སུ་བཅད་ནས་ཁྲིམས་ཡིག་ཆེན་མོ་བཟོས་པས་བློན་པོ་ཕྱི་མ་རྣམས་ལའང་དྲིན་ཆེ་བས། བོད་ཕྲུག་མཛངས་པའི་མི་བདུན་གྱི་དྲུག་པར་འདྲེན་ནོ། །བློན་སྟག་བཙན་གདོང་གཟིགས་གཉེར་གྱི་བུ། གཉེར་སྟག་བཙན་གདོང་གཟིགས་ཀྱིས་ཀྱང༌། འབངས་མི་ཁྱིམ་རེ་ལ་རྟ་གླང་མཛོ་གཡག་སོགས་བགོས་ནས། རྩྭ་སྔོན་དགུན་དུས་སུ་བསྐམ་པ་སོགས་ཀྱི་ལག་རྗེས་བཞག་པས། བོད་ཕྲུག་མཛངས་པའི་མི་བདུན་པ་ཟེར་རོ།།
དེ་རྗེས་ཁྲི་སྲོང་གི་སྲས་ཆེ་བ་མུ་ནེ་བཙན་པོའི་དུས་སུ། ལྷ་ས། ཁྲ་འབྲུག བསམ་ཡས་རྣམས་སུ་མཆོད་པ་ཆེན་པོ་བཙུགས་ཤིང༌། པཎྜི་ཏ་དང་ལོ་ཙཱ་བ་དང་དགེ་འདུན་པ་རྣམས་ལ་བསྙེན་བཀུར་མཛད་དེ་སྔར་བཞིན་དམ་པའི་ཆོས་སོགས་བསྒྱུར་ཞིང་སྤེལ་བར་མཛད། འབངས་ཀྱི་དབུལ་ཕྱུག་སྙོམས་པ་སོགས་མཛད་དོ།།
དེ་རྗེས་ཁྲི་སྲོང་གི་སྲས་ཐ་ཆུང་ཁྲི་ལྡེ་སྲོང་བཙན་སད་ན་ལེགས་མཇིང་ཡོན་དུ་གྲགས་པ་རྒྱལ་སར་འཁོད། གཡུ་ཐོག་ཡོན་ཏན་མགོན་པོའི་སྲས། འབུམ་སེང༌། དཔལ་འབུམ། དགའ་དགའ་གསུམ་གྱིས། མུ་ནེ་བཙན་པོ་དང༌། སད་ན་ལེགས་འདི་གཉིས་ཀའི་བླ་སྨན་པ་མཛད་ཅིང་འཕྲིན་ལས་ཀྱང་ཡབ་ཀྱི་གདན་ས་གནོན་པ་བྱུང༌། འདི་དུས་བློན་པོ་གླང་སྣ་ཅན་གྱིས་བོད་ཀྱི་མཁས་པ་རྣམས་ལ་སྐྱོན་ཕབ། གཡུ་ཐོག་པ་བཙོན་དུ་བཅུག དེ་ནས་ཀློ་ཁ་ཁྲའི་ཡུལ་དུ་སྤྱུགས་པ། རྒྱལ་པོ་སད་ན་ལེགས་འདིས་ཀློ་ཡུལ་ནས་གདན་དྲངས། རྒྱལ་པོའི་ཕོ་བྲང་དུ་ཟ་འོག་དགུ་བརྩེགས་ཀྱི་སྟེང་དུ་སྤྱན་དྲངས་ཏེ། རིན་པོ་ཆེའི་འབུལ་བ་མང་པོ་ཕུལ་ཞིང་བོད་ཀྱི་རྒྱལ་པོ་བརྒྱུད་པ་ནས་བརྒྱུད་པར་གཡུ་ཐོག་བརྒྱུད་པར་བཅས་པ་བླ་སྨན་པ་བྱེད་དགོས་པའི་བཀའ་དང་དཔྱ་ཁྲལ་གྱི་འབུལ་བ་དང་བཅས་པ་ཐག་བཅད། གཡུ་ཐོག་པས་ཀྱང་སྔར་བཞིན་གསོ་བ་རིག་པ་རྒྱ་ཆེར་སྤེལ་ཏེ། གསུང་རྩོམ་ཡང་རིག་གནས་ཕྱི་ནང་ཞེས་པའི་གཞུང་ལེའུ་སོ་གསུམ། རྡེ་སྐོར་ཕྱི་ནང་གསང་གསུམ་ཞེས་པར་ལེའུ་ང་ལྔ། རིག་པའི་གནས་བཅོ་བརྒྱད་ཀྱི་འགྲེལ་བ་ཁ་སྐོང་དང་བཅས་པ། རྒྱུད་འགྲེལ་སྟོང་དང་རྩ་གཅིག་ལ་ལེའུ་སྟོང་དང་སུམ་བརྒྱ། མན་ངག་ཕན་བྱེད་དང་གནོད་བྱེད་ཀྱི་གཞུང་ཕྲན་མང་པོ། དམར་འདེད་ཀྱི་མན་ངག་ལེའུ་བརྒྱ་དང་དགུ་བཅུ། རོ་བཀྲ་འཕྲུལ་གྱི་མེ་ལོང་ལ་ལེའུ་ཉེར་ལྔ། བྱང་ཁོག་གསང་དབྱེ་ལེའུ་བརྒྱད། ཐུར་དཔྱད་གནད་ཀྱི་ལྡེའུ་མིག་ལ་ལེའུ་སོ་ལྔ། མངོན་ཤེས་གནད་ཀྱི་འཕྲུལ་འཁོར་ལ་ལེའུ་བཅོ་ལྔ། གསང་ཐིག་རིན་ཆེན་སྒྲོན་མེ་ལ་ལེའུ་བཅོ་བརྒྱད། ནག་རྩིས་འཁོར་འདས་གཏན་འབེབས་ལ་ལེའུ་བརྒྱ་དང་ཉི་ཤུ། འབྲས་རྩིས་ལ་ལེའུ་ཉེར་ལྔ། དཀར་རྩིས་རི་བོ་རྡུལ་འབེབས་ལ་ལེའུ་དྲུག་ཅུ། རྒྱུད་བཞིའི་ཐེམ་ཡིག གབ་པ་གསལ་བྱེད། ཐོ་བྱང༌། རྒྱུད་ཀྱི་ཁ་སྐོང༌། དཀར་ཆག ཆ་ལག མེ་རྩ་མདོ་ཆོད་ནག་པོ། གཏར་ཁ་ལག་ལེན་འཕྱུགས་མེད། གྱེན་འདྲེན་ལྕགས་ཀྱུས་ཉ་འཛིན། ཐུར་འབེབས་རི་བོ་རྦབ་སྒྲིལ། ཉམས་ཡིག་མཐོང་བ་དོན་ལྡན། ཁྲིད་ཡིག་བརྒྱ་དང་ཉེར་གཅིག ནད་པ་ལ་གཅེས་པ་སྲོག་འཚོ་དཔལ་སྐྱེད་ཀྱི་གདམས་པ། སྨན་པ་ལ་གཅེས་པ་བསྐྲད་པ་ལྔ་ལྡན་གྱི་གདམས་པ་ལ་སོགས་པ་མང་པོ་བརྩམས་སོ།།
བསམ་ཡས་ལ་ཞིག་གསོ་དང༌། བསམ་ཡས་སོགས་ཀྱི་མཆོད་པ་མུ་ནེ་བཙན་པོས་བཙུགས་པ་དེ་བར་སྐབས་སུ་རེ་ཞིག་ཉམས་པ་དེ་སླར་གསོས། སྐྱིད་ཤོད་དུ་དཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། པཎྜི་ཏ་བི་མ་ལ་མི་ཏྲ། ཛྙཱ་ན་སེ་ན། བལ་པོ་ཧཱུྃ་ཀ་ར། པྲ་ཛྙཱ་ངྷརྨ། ཤཱཀྱ་སིང་ཧ། སུ་རེན་དྲ་བོ་ངྷི། ཛི་ན་མི་ཏྲ། དཱ་ན་ཤི་ལ། བུད་ངྷ་སིང་ཧ་སོགས་སྤྱན་དྲངས། སྔར་གྱི་ལོ་ཙཱ་བ་རྣམས་ལའང་བསྙེན་བཀུར་ཆེན་པོ་བྱས་ཏེ། མཚན་ཉིད་དང༌། གསང་སྔགས་ཀྱི་བཀའ་བསྟན་བཅོས་མང་པོ་བསྒྱུར། རྒྱལ་པོ་འདིས་ཡབ་མེས་ཀྱི་དུས་བཞིན་བྱེད་དགོས་པའི་ཐུགས་དམ་བཞེས་ཏེ། དབུ་སྙུང་བོར་ནས། བཀའ་གཙིགས་ཀྱི་ཡི་གེ་སྔ་ཕྱི་ཤོག་གུ་མཐིང་ག་ལ་གསེར་གྱིས་བྲིས་ཏེ། རིན་པོ་ཆེ་ཁྲ་མེན་གྱི་སྒྲོམ་དུ་བཅུག་ནས་བསམ་ཡས་ཀྱི་ཡབ་ཁྲི་སྲོང་གི་བཀའ་གཙིགས་ཆེན་མོའི་འགྲམ་དུ་བཞག་གོ།
དེ་རྗེས་ཁྲི་ལྡེ་སྲོང་བཙན་སད་ན་ལེགས་ཀྱི་སྲས། ཁྲི་གཙུག་ལྡེ་བཙན་རལ་བ་ཅན་གྱིས་རྒྱལ་སྲིད་བཟུང༌། འདིའི་རིང་ལ་འུ་ཤང་རྡོའི་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས། གཙུག་ལག་ཁང་དུ་པཎྜི་ཏ་དང་ལོ་ཙཱ་བ་རྣམས་བཞུགས་ནས། མཚན་ཉིད་དང་རྡོ་རྗེ་ཐེག་པའི་བཀའ་བསྟན་བསྒྱུར་ཅིང་འཆད་རྩོམ་གྱིས་དུས་འདའ་བར་བྱེད། སྔར་ལྷ་སྲས་ཡབ་ཀྱི་རིང་ལ་ཆོས་ཀྱི་བརྡ་བོད་སྐད་ལ་མ་གྲགས་པ་མང་པོ་ཞིག་བྱུང་ཞིང༌། རྒྱ་ནག་དང་ལི་དང་རྒྱ་གར་ཡུལ་དབུས་དང་ཟ་ཧོར་དང་ཁ་ཆེ་སོགས་སྣ་ཚོགས་ནས་བསྒྱུར་པའི་བརྡ་མི་འདྲ་བ་དག་མང་པོ་མི་གོ་ཞིང་བསླབ་དཀའ་བར་གཟིགས་ནས། དྲིན་ཅན་གྱི་ལོ་པཎ་རྣམ་གསུམ་ཞེས་གྲགས་པ་ཛི་ན་མི་ཏྲ་དང༌། དན་ཤཱི་ལ་དང༌། ཞང་ཡེ་ཤེས་སྡེ་གསུམ་སོགས་ལོ་པཎ་རྣམས་ཀྱིས་སྔར་བསྒྱུར་བ་ཐམས་ཅད་དག་པར་བྱས་ཤིང་གསར་བཅད་ཀྱིས་གཏན་ལ་ཕབ་སྟེ་གོ་བདེ་བར་བྱས། གཞུང་ཚད་རྣམས་ཀྱང་བམ་གྲངས་སོགས་ངེས་པར་བྱས་ཏེ། དཀར་ཆག་ཏུ་བསྣན་ནས། སྤྱིར་ཁྲི་སྲོང་གི་དུས་ཀྱི་དཀར་ཆག་ཕོ་བྲང་ལྡན་དཀར་མ་དང༌། ཕྱིས་ཀྱི་མཆིམས་ཕུ་མ་དང་འཕང་ཐང་མ་སྟེ་གསུམ་བྱུང་བ་དཀོར་མཛོད་ཀྱི་ཟླ་ལ་བཞག་གོ །ཡང་སྐད་གསར་བཅད་ཀྱི་སྐབས་ལོ་པཎ་རྣམས་ཀྱིས་བྱེ་བྲག་རྟོག་བྱེད་ཆེ་འབྲིང་ཆུང་གསུམ་མཛད། ཆེན་མོ་དང་འབྲིང་བའམ་སྒྲ་སྦྱོར་བམ་གཉིས་སྡེ་དགེའི་བསྟན་འགྱུར་ཅོ་པའི་ནང་སྣ་ཚོགས་སྐོར་དུ་བཞུགས། ཇི་ལྟར་བརྩམས་ཚུལ་སྒྲ་སྦྱོར་བམ་གཉིས་ཀྱི་དབུར་བཤད་པ་ཡོངས་རྫོགས་འདིར་འདྲེན་པར་བྱ་སྟེ་འདི་ལྟར།།
རྟའི་ལོ་ལ་བཙད་པོ་ཁྲི་ལྡེ་སྲོང་བཙན། (འདི་ཡི་གེ་ནོར་བ་ཡིན་ཏེ། ཁྲི་གཙུག་ལྡེ་བཙན་ཡིན་ནོ།) ཕོ་བྲང་གིའི་འོན་ཅང་རྡོ་ (འུ་ཤང་རྡོ་དང་གཅིག་རེད།) ན་བཞུགས། སྟོད་སྨད་ཀྱི་དམག་རྙིད་རྗེད་དང་རྐུན་ཆེན་བཏུལ། གར་ལོག་གི་ཕོ་ཉས་ཕྱག་བཙལ། བློན་ཆེན་པོ་ཞང་ཁྲི་ཟུར་རམ་ཤག་དང༌། མང་རྗེ་ལྷ་འོད་ལ་སོགས་པས་རྒྱལ་ས་གནད་མང་པོ་བཅད་དེ། རྔ་རྟ་དང་བ་མར་མང་པོ་ཕྱག་ཏུ་ཕུལ། ཞང་བློན་སོ་སོར་བྱ་དགའ་བསྩལ་བའི་ལན་ལ། ཉི་འོག་གི་མཁན་པོ་ཨ་ཙཱརྱ་ཛི་ན་མི་ཏྲ་དང༌། སུ་རེནྡྲར་བོ་ངྷི་དང༌། ཤཱི་ལེན་དྲ་བོ་ངྷི་དང༌། ད་ན་ཤཱི་ལ་དང༌། བོངྷི་མི་ཏྲ་དང༌། བོད་ཀྱི་མཁན་པོ་རཏྣ་ར་ཀྵི་ཏ་དང༌། ངྷརྨ་ཏ་ཤིའ་ལ་དང༌། ལོ་ཙཱ་བ་མཁས་པ་ཆུད་པ་ཛྙཱ་ན་སེ་ན་དང༌། ཛ་ཡ་རཀྵི་ཏ་དང༌། མཉྫུ་ཤྲི་ཝརྨ་དང༌། རཏྣེ་དྲ་ཤིའ་ལ་ལ་སོགས་པས་ཐེག་པ་ཆེ་ཆུང་ལས་འབྱུང་བའི་རྒྱ་གར་གི་སྐད་ལས་བོད་ཀྱི་སྐད་དུ་བསྒྱུར་ཞིང་མིང་དུ་བཏགས་པ་རྣམས་དཀར་ཆག་ཏུ་བྲིས་ཏེ། ནམ་དུ་ཡང་གཞུང་ལུགས་དེ་ལས་མི་བསྒྱུར་ཞིང་ཀུན་གྱིས་བསླབ་ཏུ་རུང་བར་གྱིས་ཤིག་ཅེས་བཀའ་བསྩལ་ནས། སྔོན་ལྷ་སྲས་ཡབ་ཀྱི་རིང་ལ། ཨ་ཙཱརྱ་བོ་ངྷི་ས་ཏྭ་དང༌། ཡེ་ཤེས་དབང་པོ་དང༌། ཞང་རྒྱལ་ཉེན་ཉ་བཟང་དང༌། བློན་ཁྲི་བཞེར་སང་ཤི་དང་། (འདི་ཡང་ཡི་གེ་ནོར་བ་འདྲ་སྟེ། ཁྲི་བཞེར་གྱི་བུ་སང་ཤི་ཏ་ཡིན་ལ། སང་ཤི་ནི་རྒྱ་ཕྲུག་ཡིན་པར་གསུངས།) ལོ་ཙཱ་བ་ཛྙཱ་ན་དེ་བ་ཀོ་ཥ་དང༌། ཁྱི་འབྲུག་དང༌། ལྕེ་བྲམ་ཟེ་ཨ་ནཱན་ཏ་ལ་སོགས་པས་ཆོས་ཀྱི་སྐད་བོད་ལ་མ་གྲགས་པ་ལས་མིང་དུ་བཏགས་པ་མང་དག་ཅིག་མཆིས་པའི་ནང་ནས་ཁ་ཅིག་ཆོས་ཀྱི་གཞུང་དང༌། བྱཱ་ཀ་ར་ཎའི་ལུགས་དང་མི་མཐུན་ཏེ༑ མི་བཅོས་སུ་མི་རུང་བ་རྣམས་ཀྱང་བཅོས། སྐད་ཀྱི་མིང་གཅེས་སོ་འཚལ་གྱིས་ཀྱང་བསྣན་ནས་ཐེག་པ་ཆེ་ཆུང་གི་གཞུང་ལས་ཇི་ལྟར་འབྱུང་བ་དང༌། གནའི་མཁན་པོ་ཆེན་པོ་ནཱ་གཱ་རྫུ་ན་དང༌། བ་སུ་བན་ངྷེ་ལ་སོགས་པས་ཇི་ལྟར་བཤད་པ་དང༌། བྱཱ་ཀ་ར་ཎའི་སྒྲའི་ལུགས་ལས་ཇི་སྐད་དུ་འདྲེན་པ་དང་ཡང་བསྟུན་ཏེ། མཇལ་དཀའ་བ་རྣམས་ཀྱང་ཚིག་སོ་སོར་ཕྲལ་ནས་གཏན་ཚིགས་ཀྱིས་བཤད་དེ་གཞུང་དུ་བྲིས།
སྐད་རྐྱང་པ་བཤད་མི་འཚལ་བ་སྒྲ་བཞིན་དུ་བསྒྱུར་བར་རིགས་པ་རྣམས་ཀྱང་སྒྲ་བཙན་པར་བགྱིས་ཏེ་མིང་དུ་བཏགས། སྐད་ཁ་ཅིག་དོན་བཞིན་དུ་གདགས་པར་རིགས་པ་རྣམས་ཀྱི་དོན་བཙན་པར་བགྱིས་ཏེ་མིང་དུ་བཏགས་ནས། བཙད་པོའི་སྤྱན་སྔར་བན་དེ་ཆེན་པོ་དཔལ་གྱི་ཡོན་ཏན་དང༌། བན་དེ་ཆེན་པོ་ཏིང་ངེ་འཛིན་ལ་སོགས་པ་ཡང་འཚོགས་ཏེ། རྗེ་བློན་གདན་འཛོམས་པ་ལ་ཞུས་ནས་ངྷརྨ་བསྒྱུར་བའི་ཐབས་དང༌། རྒྱ་གར་གྱི་སྐད་ལ་བོད་ཀྱི་སྐད་དུ་མིང་བཏགས་པ་རྣམས་གཏན་ལ་ཕབ་སྟེ། བཀས་བཅད་པ། དམ་པའི་ཆོས་བསྒྱུར་བའི་ལུགས་ནི་དོན་དང་ཡང་མི་འགལ་ལ་བོད་སྐད་ལ་ཡང་གར་བདེ་བར་གྱིས་ཤིག ངྷརྨ་བསྒྱུར་པ་ལ་རྒྱ་གར་གྱི་སྐད་ཀྱི་གོ་རིམ་ལས་མི་བསྣོར་བ་བོད་ཀྱི་སྐད་དུ་བསྒྱུར་ན་དོན་དང་ཚིག་ཏུ་འབྲེལ་ཞིང་བདེ་ན་མ་བསྣོར་བར་སྒྱུར་ཅིག བསྣོར་ན་བདེ་ཞིང་གོ་བ་བསྐྱེད་པ་ཞིག་ཡོད་ན། ཚིགས་བཅད་ལ་ནི་རྩ་བ་བཞི་པའམ། དྲུག་པའང་རུང་སྟེ། ཚིགས་སུ་བཅད་པ་གཅིག་གི་ནང་ན་གང་བདེ་བ་བསྣོར་ཞིང་སྒྱུར་ཅིག
རྐྱང་བ་ལ་ནི་དོན་གང་སྙེགས་པ་ཡན་ཆད་ཀྱི་ཚིག་དང་དོན་གཉིས་ཀ་ལ་གར་བདེ་བར་བསྣོར་ཞིང་སྒྱུར་ཅིག སྐད་གཅིག་ལ་མིང་དུ་མར་འདྲེན་པ་ནི། ལྟག་འོག་དང་བསྟུན་ལ་གར་སྙེགས་པ་བཞིན་དུ་མིང་ཐོགས་ཤིག གཽ་ཏ་མྱ་ལྟ་བུ་གཽའི་སྒྲ་ལས་ཚིག་དང༌། ཕྱོགས་དང༌། ས་དང༌། འོད་དང༌། རྡོ་རྗེ་དང༌། བ་ལང་དང༌། མཐོ་རིས་ལ་སོགས་པ་རྣམ་པ་དུ་མར་སྙེགས་པ་དང༌། ཀཽ་ཤི་ཀ་ལྟ་བུའི་རྩ་ཀུ་ཤ་ཐོགས་པ་དང༌། མཁས་པ་དང༌། པད་མ་ལ་དགའ་བ་དང༌། འུག་པ་དང་། མཛོད་ལྡན་ལ་སོགས་པའི་སྒྲའི་ལུགས་ལས་དྲངས་ཤིང་བསྒྱུར་ན་སྣ་གྲངས་མང་པོ་ཞིག་ཏུ་སྙེགས་ལ། བསྒྱུར་པ་རྣམས་གཅིག་གི་ནང་དུ་ནི་སྣ་གྲངས་དེ་ཀུན་འདུར་ཡང་མི་བཏུབ་སྟེ། གཅིག་ཏུ་ཆད་པར་བྱར་ཡང་གཏན་ཚིགས་ཆེན་པོ་མེད་པ་རྣམས་ནི་མི་བསྒྱུར་བར་རྒྱ་གར་སྐད་སོ་ན་ཞོག་ཅིག གར་ཡང་དྲང་དུ་རུང་བའི་ཚིག་བྱུང་ན། ཕྱོགས་གཅིག་ཏུ་ཆད་པར་མི་བསྒྱུར་པར་སྤྱིར་སྙེགས་སུ་རུང་བར་གྱིས་ཤིག ཡུལ་དང༌། སེམས་ཅན་དང༌། མེ་ཏོག་དང༌། རྩི་ཤིང་ལ་སོགས་པའི་མིང་བསྒྱུར་ན་ཡིད་གོལ་ཞིང་ཚིག་མི་བདེ་བ་དང༌། འོལ་ཕྱིར་བསྒྱུར་དུ་རུང་བ་དོན་དེ་ལྟར་ཡིན་ནམ་མ་ཡིན་གཏོལ་མེད་པ་རྣམས་ལ། མགོ་ལ་ཡུལ་ཞེའམ། མེ་ཏོག་ཅེས་པ་ལ་སོགས་པ་གང་ལ་བྱ་བའི་མིང་གཅིག་བླ་ཐབས་སུ་སྣོན་ལ་རྒྱ་གར་སྐད་སོ་ན་ཞོག་ཅིག གྲངས་ལ་རྒྱ་གར་སྐད་བཞིན་དུ་བསྒྱུར་ན་དགེ་སློང་བརྒྱ་ཕྲག་ཕྱེད་དང་བཅུ་གསུམ་ཞེས་འབྱུང་བ་ལ་སོགས་པ་ནི༑
སྟོང་ཉིས་བརྒྱ་ལྔ་བཅུ་ཐམ་པར་བོད་ཀྱི་སྐད་བཞིན་བསྒྱུར་ན་དོན་དང་མི་འགལ་བ་བོད་ཀྱི་སྐད་ལ་ཡང་བདེ་བས་གྲངས་བསྡོམ་དུ་རུང་བ་རྣམས་བོད་སྐད་ཀྱི་ལུགས་བཞིན་ཐོགས་ཤིག པ་རི་དང༌། སམ་དང༌། ཨུ་བ་ལྟ་བུ་ལ་སོགས་ཏེ། ཚིག་གི་ཕྲད་དང་རྒྱན་ལྟ་བུར་འབྱུང་བ་རྣམས་བསྒྱུར་ན་དོན་དང་མཐུན་ཞིང་འབྱོར་བའི་ཐབས་ནི། ཡོངས་སུ་ཞེའམ། ཡང་དག་པ་ཞེའམ། ཉེ་བ་ཞེས་སྒྲ་བཞིན་དུ་སྒྱུར་ཅིག དོན་ལྷག་པར་སྙེགས་པ་མེད་པ་རྣམས་ནི་ཚིག་གི་ལྷད་ཀྱིས་བསྣན་མི་དགོས་ཀྱིས་དོན་བཞིན་དུ་ཐོགས་ཤིག རྣམ་གྲངས་སུ་གཏོགས་པའི་ཚིག་རྣམས་ནི་མ་འདོམས་ན་མིང་གང་བོད་སྐད་དུ་སྤྱིར་གྲགས་ཤིང་ཚིག་ཏུ་གར་བདེ་བར་གདགས་སོ། །འདོམས་ན་སོ་སོར་བཏགས་པ་བཞིན་དུ་ཐོགས་ཤིག སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་ལ་སོགས་པ་ཞེས་དང་སྐོ་ལོང་གི་ཚིག་གི་རིམ་པ་ནི་སངས་རྒྱས་ལ་ཞེ་སའི་ཚིག་ཏུ་བསྒྱུར། གཞན་ལ་ཚིག་འབྲིང་པོ་མན་ཆད་ཙམ་དུ་བྱས་ཏེ།
སྔོན་ལྷ་སྲས་ཡབ་ཀྱི་སྤྱན་སྔར་མཁན་པོ་དང་ལོ་ཙཱ་བ་མཁས་པ་འཚོགས་ནས། ངྷརྨ་དཀོན་མཆོག་སྤྲིན་དང༌། ལང་ཀར་གཤེགས་པ་བསྒྱུར་ཏེ། གཏན་ལ་ཕབ་པའི་ལུགས་བཞིན་སྒྱུར་ཅིག སྐད་ཀྱི་ལུགས་འདི་ལྟར་བཀས་བཅད་པ་ལས་སོ་སོ་ནས་སུ་ཡང་འཆོས་ཤིང་འོག་ཏུ་མིང་གསར་དུ་འདོགས་སུ་མི་གནང་གིས། བསྒྱུར་བ་དང་འཆད་པའི་གྲྭ་སོ་སོ་ནས་སྐད་གསར་དུ་མིང་གདགས་དགོས་པ་ཞིག་ཡོད་ན་ཡང༌། སོ་སོའི་གྲྭ་གྲྭར་མིང་ཆད་པར་མི་གདགས་པར་ཆོས་ཀྱི་གཞུང་དང་སྒྲའི་ལུགས་ལས་ཇི་སྐད་དུ་འབྱུང་བའི་གཏན་ཚིགས་དང༌། ཆོས་ལ་ཇི་སྐད་དུ་གདགས་པ་དཔྱད་དེ། ཕོ་བྲང་དུ་བཅོམ་ལྡན་འདས་ཀྱི་རིང་ལུགས་ཀྱི་འདུན་ས་དང༌། ངྷརྨ་ཞུ་ཆེན་འཚལ་བའི་གྲྭར་ཕུལ་ལ། སྙན་དུ་ཞུས་ཏེ་བཀས་བཅད་ནས་སྐད་ཀྱི་དཀར་ཆག་གི་དཀྱུས་སུ་བསྣན་ནོ། །གསང་སྔགས་ཀྱི་རྒྱུད་རྣམས་གཞུང་གིས་གསང་བར་བྱ་བ་ཡིན་ཏེ། སྣོད་དུ་མ་གྱུར་པ་རྣམས་ལ་བཤད་ཅིང་བསྟན་དུ་ཡང་མི་རུང་ལ། བར་དུ་བསྒྱུར་ཞིང་སྤྱོད་དུ་གནང་གིས་ཀྱང༌། ལྡེམ་པོ་དག་ཏུ་བཤད་པ་མ་ཁྲོལ་ནས་སྒྲ་ཇི་བཞིན་དུ་འཛིན་ཅིང་ལོག་པར་སྤྱོད་པ་དག་ཀྱང་བྱུང༌། སྔགས་ཀྱི་རྒྱུད་ཀྱི་ནང་ནས་ཐུ་ཞིང་བོད་སྐད་དུ་བསྒྱུར་བ་དག་ཀྱང་བྱུང་ཞེས་གདགས་ཀྱི། ཕྱིན་ཆད་གཟུངས་སྔགས་དང་རྒྱུད་བླ་ནས་བཀའ་བསྩལ་ཏེ། སྒྱུར་དུ་བཅུག་པ་མ་གཏོགས་པ། སྔགས་ཀྱི་རྒྱུད་དང༌། སྔགས་ཀྱི་ཚིག་ཐུ་ཞིང་བསྒྱུར་དུ་མི་གནང་ངོ༌། །སྐད་ཀྱི་མིང་སྔོན་གཏན་ལ་མ་ཕབ་པ་དང་མིང་དུ་མ་ཐོགས་པ་ལས་ཐེག་པ་ཆེ་ཆུང་གི་གཞུང་དང་སྒྲའི་གཞུང་ལས་འབྱུང་བ་སྦྱར་ཏེ་བཤད་པའི་དང་པོའོ། །ཞེས་གསུངས་སོ།
།གོང་གི་མཆན་བུ་དག་བདག་གིས་བཏབ་པ་ཡིན་ལ། བཀས་བཅད་འདི་ལ་དཔག་ན་སྔོན་རིག་གནས་ཇི་ལྟར་དར་བ་ཤེས་པར་འགྱུར་བས། ལུང་ཚིག་འདི་དྲངས་པ་ཡིན་ནོ། །རྒྱལ་པོ་འདིས་བཀས་བཅད་གསུམ་མཛད་དེ། སྐད་གསར་བཅད་ཀྱི་བཀས་བཅད་དང༌། འདུལ་བ་ཐམས་ཅད་ཡོད་པར་སྨྲ་བའི་སྡེ་ལས་གཞན་པའི་སྡེ་པ་དག་གི་སྡེ་སྣོད་མི་བསྒྱུར་བར་བཀས་བཅད། གསང་སྔགས་མ་རྒྱུད་རྣམས་མ་བསྒྱུར་ཅིག་ཅེས་བཀས་བཅད་པ་སྟེ་གསུམ་མོ། །བྲེ་སྲང་སོགས་ཀྱང་རྒྱ་གར་ཡུལ་དབུས་འགྱུར་ཚུལ་དང་མཐུན་པར་བཅོས། བོད་འབངས་ཀྱི་ཁྲིམས་ཡིག་དང༌། ཡིག་ཚང་སོགས་ཞིག་གསོ་དང་ལེགས་བཅོས་མཛད་ཅིང༌། མངའ་ཐང་རབ་ཏུ་རྒྱས་ཏེ་ནུབ་ཕྱོགས་སྟག་གཟིག་ཚུན་ཆོད་དབང་དུ་འདུས། བོད་འབངས་རབ་ཏུ་སྐྱིད་པ་བྱུང་ཟེར་རོ།།
ལྷ་ཐོ་ཐོ་རི་ནས་རྒྱལ་པོ་འདིའི་བར་ལ་སྐྱིད་པའི་གདུང་རབས་ཕྱེད་དང་བཅུ་གསུམ་ཞེས་ཟེར། མུ་ནེ་བཙན་པོ་ཡུན་ཐུང་བས་ཕྱེད་དུ་བརྩིས། མང་སྲོང་མ་བགྲངས་པར་དེ་ལྟར་གྲགས་ལ། མེས་ཨག་ཚོམ་ནས་འདིའི་བར་ལ་ཤིན་ཏུ་སྐྱིད་པའི་གདུང་རབས་ལྔ་ཞེས་སྔ་རབས་ལ་གྲགས་སོ།།
དེ་ནས་བློན་གདུག་པ་ཅན་དབས་སྟག་རྣ་ཅན་སོགས་ཀྱིས། རྒྱལ་པོ་དང༌། བློན་བྲན་ཀ་དཔལ་ཡོན་བཀྲོངས་ནས། གླང་དར་མ་འུ་དུམ་བཙན་རྒྱལ་སར་བཞག འདི་ནི་ཆུང་དུས་ནས་གཟུགས་བ་ལང་གི་ཤ་ཚུགས་དང་འདྲ་ཞིང༌། བློ་རྟུལ་ལ་རྒྱུད་གྱོང་བས། འབངས་རྣམས་ཀྱིས་གླང་དར་མ་ཞེས་བཏགས་གླང་ཕྲུག། མིང་དངོས་ནི། འུ་དུམ་བཙན་ཟེར། རྒྱའི་ལོ་རྒྱུས་རྒྱའི་ལོ་ཙཱ་བ་བ་ཧུ་གྱང་ཇུ་ཟེར་བས་བོད་ཡིག་ཏུ་བསྒྱུར་བ་ལས། རྒྱལ་པོ་འདི་ཆང་ལ་དགའ་ཞིང་སྤྱོད་པ་ངན་པས། བོད་ཀྱི་རྒྱལ་ཁམས་ཐམས་ཅད་འཁྲུགས། སི་ཧ་ཅེའུ་ལ་བོད་དབང་བའི་རི་བརྩིགས་ཡོད་པ་འགྱེལ། ཀླུ་ཆུ་ཞག་གསུམ་གྱེན་ལ་ལོག ལྟས་ངན་བྱུང་ཞིང་རྒྱལ་ཁམས་ཞིག་པ་ཡིན་ནོ། །ཞེས་བཤད་དོ།།
དེ་ནས་གླང་དར་ཁོ་རང་ཡང་བློ་རྨོངས་ཤིང་ཡོན་ཏན་མེད་པར་མ་ཟད། ཡོན་ཏན་ཅན་ལ་སྙིང་ནས་མི་དགའ་བས། ཆོས་བྱས་པ་བཀྲ་མི་ཤིས་ཟེར་ནས། རྨ་རིན་ཆེན་མཆོག་དང་ཉང་ཏིང་འཛིན་སོགས་ལོ་ཙཱ་བ་ཆེན་པོ་མང་པོ་བཀྲོངས། པཎྜིཏ་རྣམས་ས་མཐར་བསྐྲད་པ་དང་ལ་ལ་རང་རང་སོ་སོའི་ཡུལ་དུ་བྲོས། རབ་ཏུ་བྱུང་བ་ལ་ལ་ས་མཐར་བྲོས། མ་ཐར་བ་རྣམས་ཁྱིམ་སར་ཕབ། མི་ཉན་པ་རྣམས་བསད། ལ་ལ་ཁྲིད་ནས་རྒྱལ་བློན་རྣམས་ཀྱིས་རྟ་ལ་འབབ་འཛེག་གི་ཚེ་སྒུར་དུ་བཅུག་ནས་སྟེགས་བྱས། ལ་ལའི་ལག་ཏུ་མདའ་གཞུ་དང་རྔ་གཤང་ (རི་དྭགས་དཀྲོག་བྱེད་རྔ་དང་སི་ལི།) བཞག་སྟེ་རྔོན་པ་བྱེད་དུ་བཅུག །ལྷ་ས་དང༌། བསམ་ཡས་བཤས་ར་བྱས། གཙུག་ལག་ཁང་མང་པོ་བཤིགས། དཔེ་ཆ་རྣམས་མེ་ལ་བསྲེགས་པ་དང་ཆུ་ལ་བསྐུར་བ་དང་ས་འོག་ཏུ་གནོན་པ་སོགས་བྱས། འབངས་རྣམས་ཀྱི་འཚོ་བའང་ཇེ་སྡུག་ཇེ་སྡུག་ལ་སོང༌། བོད་འབངས་རྣམས་སྡུག་བསྔལ་གྱི་གནས་སུ་བཅར་ཏོ།།
དེའི་ཚེ་ལྷ་ལུང་དཔལ་གྱི་རྡོ་རྗེ་ཡེར་བ་བྲག་ལྷ་རི་སྙིང་པོ་ཞེས་བྱ་བ་ན་སྒོམ་གྱིན་ཡོད་པ། ཉིན་གཅིག་སྒོམ་ཁང་ཕྱི་ལ་ཕེབས་ནས་གཟིགས་པས། བཙུན་པའི་མགོ་ལ་བྱ་སྒྲོ་བཙུགས། ལག་ཏུ་རྔ་གཤང་ (རྔ་དང་སི་ལི་རི་དྭགས་སྐྲོག་བྱེད།) ཐོགས་ཏེ་ལིངས་ (རྒྱའམ་རྙི་) བྱེད་པ་མཐོང་བས་རྒྱལ་པོས་བསྟན་པ་བསྣུབས་ཤིང༌། འབངས་རྣམས་སྡུག་བསྔལ་བར་ཤེས་ནས་སྙིང་རྗེ་ཆེན་པོ་སྐྱེས་ཏེ། རྒྱལ་པོ་མ་བསྒྲལ་ན་འབངས་རྣམས་སྡུག་བསྔལ་གྱིས་མནར་ཞིང༌། རྒྱལ་པོ་རང་ཉིད་ཀྱང་ལས་ངན་པ་བསགས་ནས་ཕྱི་མར་དམྱལ་བར་ལྟུང་བར་འགྱུར་སྙམ་ནས། རྟ་བཞོན་མདའ་གཞུ་ཐོགས་ཏེ་རྒྱལ་པོ་གསོད་དུ་ཆས། དེའི་ཚེ་འབངས་ཆེས་མང་པོ་འདུས་ནས་ངུ་འབོད་བྱེད་ཅིང་མྱ་ངན་བྱས། རྒྱལ་པོ་ནུབ་ཕྱོགས་གླ་བའི་ཚལ་ན་མིག་མང་རྩེ་ཞིང་འདུག་པའི་ཐག་ཉེར་སོང་ནས་ངུ་འབོད་བྱས་ཏེ། (ཁྲོམ་སྐོར་རེད།) རྒྱལ་པོ་ཆེན་པོ་ལགས་ཁྱེད་ཀྱིས་ཆོས་བསྣུབས་པ་སོགས་འདི་འདྲ་མཛད་པ་ཤིན་ཏུ་ནས་ཀྱང་མི་རིགས་ཏེ། ཡབ་མེས་ཀྱི་ཡིག་ཚང་དང་དཀོར་མཛོད་ཀྱི་སྒྲོམ་བུ་རྡོ་རིང་གི་ཡི་གེ་ཐམས་ཅད་ལ་གཟིགས་ཤིག་ཅེས་མགྲིན་གཅིག་ཏུ་ངུ་འབོད་ཆེན་པོ་བྱས་པའི་འུར་སྒྲ་རྒྱལ་པོས་ཐོས་ནས་སེམས་མི་བདེ་བར། རྡོ་རིང་གི་རྩར་སོང་ནས་ཡི་གེ་ཀློག་གིན་ཡོད་པའི་སྐབས། ལྷ་ལུང་དཔལ་གྱི་རྡོ་རྗེ་སླེབས་ཏེ། རྒྱལ་པོ་ལ་ཕྱག་འབུལ་ཁུལ་གྱིས་ཕུ་དུང་ནང་ནས་མདའ་གཞུ་བླངས་ཏེ་ལྕགས་ཀྱི་མདའ་འཕངས་ཏེ་རྒྱལ་པོའི་སྙིང་ཁར་ཕོག་ནས་ཚེའི་དུས་བྱས་སོ། །འདིས་རྒྱལ་སྲིད་ལོ་དྲུག་ལ་བཟུང༌། འདི་མན་ནས་བོད་སྤྱི་ལ་དབང་བའི་རྒྱལ་པོ་ཞིག་མ་བྱུང་ཟེར་རོ།།
དེའི་བུ་གནམ་ལྡེ་འོད་སྲུང་དང༌། བུ་རྫུན་མ་རེད་ཟེར་རྒྱུའི་ཁྲི་ཡུམ་བརྟན་ལྡེ་གཉིས་ཡོད་པས་མ་འཆམས་པར་ཡུམ་བརྟན་གྱིས་དབུ་རུ། འོད་སྲུང་གིས་གཡོ་རུ་བཟུང་ནས། སྲིད་ཁག་གཉིས་སུ་གྱེས། ཡབ་གླང་དར་གྱི་བྱེད་སྤྱོད་ལ་འབངས་ཁ་ལོག་པ་དང༌། ཆབ་སྲིད་དང་དཔལ་འབྱོར་གང་ཐད་ནས་ཉམས་དམས་སུ་སོང་བ་ཚོར་ནས། རྒྱལ་བློན་ཀུན་གྱིས་གྲོས་ཐོག་ནས་ཇོ་བོ་རྣམ་གཉིས་དང༌། བྱམས་པ་ཆོས་འཁོར་མ་སོགས་ཁྲི་ཐོག་ཏུ་སྤྱན་དྲངས་ནས་མཆོད་པ་བྱས། ལ་ལ་བཙུན་པ་བྱེད་ཁུལ་བྱས་ཏེ། འཆད་ཉན་གྱི་གཟུགས་བརྙན་ཙམ་རེ་བྱས། འོན་ཀྱང༌། འབངས་རྣམས་ཀྱི་སྙིང་ནད་མ་ཞི་བར་ས་གླང་ལོ་ནས་བཟུང་ཁེང་ལོག་ (གྱེན་ལོག) རྣམས་རིམ་པར་བྱུང༌། དེ་ཡང༌། དང་པོར། དབས་ཁོ་བཞེར་ལེགས་སྟེང་ཟེར་བས་འགོ་ཁྲིད་དེ་མདོ་ཁམས་སྨད་ནས་ཁེང་ལོག་བྱུང༌། དེ་རྗེས་དབས་ལོ་ཕོ་ལོ་ཆུང་གིས་འགོ་ཁྲིད་དེ་དབུ་རུ་ནས་ཁེང་ལོག་བྱུང༌། དེ་རྗེས་གཡོན་རུར་ཞང་རྗེ་གསས་སྣེ་བཙན་གྱིས་དཔོན་གཡུ་སྣེ་བསད། མཆིམས་ཀོང་མི་དྲུག་གིས་འགོ་ཁྲིད་དེ་འོད་འབར་ཁེང་ལྡོག་ (གྱེན་ལོག་) ཏུ་གྲགས་པ་བྱས་པ་སོགས། དེ་ནས་ཁེང་ལོག་ལོ་དགུབ་མེ་བྱ་ལ་ཤུད་པུ་སྟག་རྩེ་སོགས་ཀྱིས་གྲོས་བྱས་ནས་བང་སོ་ (རྒྱལ་དུར་) རྣམས་བགོ་བཤའ་བྱས། གཉགས་ཀྱིས་དོན་མཁར་མདའི་བང་སོ་བྲུས། ཤུད་པུས་སེང་གེ་ཅན་གྱི་བང་སོ་བྲུས། གྲེང་འཕྱོས་ཁུས་འཕྲུལ་རྒྱལ་བང་སོ་བྲུས་པ་སོགས་ཀྱིས། བོད་རྒྱལ་གདུང་རབས་ཀྱི་བང་སོ་ཐམས་ཅད་མེད་པར་བཟོས། དེ་ནས་བོད་སིལ་བུར་འཐོར་བའི་དུས་སྐབས་བྱུང་ངོ༌།།
གླང་དར་སྐབས་བོད་ཀྱི་མཁས་པ་མི་གསུམ་མདོ་སྨད་དུ་བྱོན་ཚུལ་ནི། ཀློང་ཆེན་ཆོས་འབྱུང་ལས། འཇད་པ་གཙང་རབ་གསལ། བོ་དོང་བ་གཡོ་དགེ་འབྱུང༌། སྟོང་ལུངས་པ་དམར་ཤཱཀྱ་མུ་ནེ་དང་གསུམ། དཔལ་ཆུ་བོ་རི་ལ་སྒོམ་ཞིང་ཡོད་པའི་དུས་སུ། བཙུན་པ་ཁྱི་ཁྲིད་རྔ་གཤང་ (རྔ་དང་སི་ལི་) རྡུང་ཞིང་མགོ་ལ་བྱ་སྒྲོ་བཙུགས་ཤམ་ཐབས་སྔ་ལོག་ཕྱི་ལོག་བྱས་ནས་རི་དྭགས་ལ་མདའ་འཕེན་པ་ཐབ་ཁ་བས་མཐོང་བས། མ་བྱན་ (ཇ་མ་) ནས་བན་རྒན་འཁྲུལ་ལམ་བཙུན་པ་སྨྱོ་ཟེར་ཞིང་གཟིགས་པས། མཐོང་བ་བཞིན་སྨྲས་སོ། །སློབ་དཔོན་མ་འཁྲུལ་བཙུན་པ་མ་སྨྱོས། རྒྱལ་པོས་ཆོས་བསྣུབས་པའི་ལོ་རྒྱུས་ཞིབ་ཏུ་བསྙད་པས། འོ་ན་བན་དེ་འདིར་བོས་དང་གསུངས་ནས། གཏམ་དྲིས་པས། ཁྱེད་ལ་བཀའ་ཆད་ཀྱིས་མ་ཐོགས་པ་ཁ་རྗེ་ཆེ་ཟེར་ནས་ཞེས་གསུངས། རྒྱལ་རབས་གསལ་མེ་ལས་ཀྱང་འདི་བཞིན་འབྱུང༌། དེང་སང་འགའ་ཞིག་གིས། མགོ་ལ་བྱ་སྤུ་འཛུགས་པའི་རྒྱུ་མཚན་གྱིས་བོད་མ་ཡིན་ནོ་ཟེར་བ་ནི། བོད་ཀྱི་གནའ་རབས་ཀྱི་ལོ་རྒྱུས་མི་ཤེས་པར་བྱུང་རྒྱལ་དུ་སྨྲ་བའོ།།
དེ་ནས་གཙང་རབ་གསལ། གཡོ་དགེ་འབྱུང༌། དམར་ཤཱཀྱ་མུ་ནེ་གསུམ་གྱིས་འདུལ་མངོན་སོགས་ཀྱི་དཔེ་ཆ་དྲེལ་ཁལ་གཅིག་བཀལ་ནས། ཉིན་ཡིབ་མཚན་འགྲོས་ཀྱིས་བྲོས་ནས་མངའ་རིས་སྟོད་དུ་སླེབས། དེར་ཡང་སྡོད་མ་ནུས་པར་བྱང་ལམ་བརྒྱུད་ཧོར་ཡུལ་ཏུ་བྱོན་ནས། དགེ་བསྙེན་ཤཱཀྱ་ཤེས་རབ་ལ་བརྟེན་ཏེ་རེ་ཞིག་བཞུགས་ཀྱང་སྐད་མི་འདྲ་བས་བསྟན་པ་སྤེལ་མ་ནུས་ལ། དེ་ནས་སླར་མདོ་སྨད་དུ་ཕེབས་ནས་རྨ་ཆུ་དང་ཉེ་བའི་ས་ཆ་རྨ་ལུང་རྡོ་རྗེ་བྲག་ར་ཨན་ཆུང་གནམ་རྫོང། དན་ཏིག་ཤེལ་གྱི་ཡང་དགོན་སོགས་སུ་སྒོམ་གྱིན་བཞུགས། དེ་གསུམ་ལ་བོད་ཀྱི་མཁས་པ་མི་གསུམ་ཟེར་ཞིང་སྙན་གྲགས་བླ་རུ་འཕགས། སྐུ་གདུང་སྔར་ཟི་ལིང་དུ་བཞུགས། དེ་དག་གི་སློབ་མ་བླ་ཆེན་པོ་དགོངས་པ་རབ་གསལ་ནི། བསྟན་པའི་མེ་རོ་སྨད་ནས་གསོ་བ་པོ་ཡིན་ཞེས་སྙན་པ་དབྱར་སྐྱེས་ཀྱི་རྔ་གསང་རབ་ཏུ་ལྡིར་རོ།།
འདི་ཡན་ལ་སྔ་དར་གྱི་སྐབས་སུ་རིག་གནས་ཇི་ལྟར་དར་བའི་ཚུལ་བརྗོད་པ་ཡིན་ལ། ལོ་ཚིགས་སོགས་ལ་དེབ་ཐེར་རྣམས་མི་མཐུན་ས་རེ་ཡོད་མོད། གོང་དུ་བཤད་པ་འདི་དག་ནི་སྤྱིར་བཤད་ན་དེབ་ཐེར་རྣམས་སུ་མི་མཐུན་པ་མེད། དེབ་ཐེར་རྙིང་པའི་བཤད་ཚུལ་གྱི་ཚིག་སྦྱོར་འགའ་ཞིག་དང་བརྡ་རྙིང་འགའ་རེ་སོར་བཞག་བྱས་ཡོད། དེ་ལྟར་མ་བྱས་པར་བརྡ་རྙིང་རྣམས་གཏན་བསྐྱུར་བྱས་ན། ཕྱི་རབས་རྣམས་ཀྱིས་གཏན་ནས་མི་ཤེས་པར་འགྱུར་བས། ཅུང་ཟད་རེ་བེད་སྤྱད་ན་བཟང་སྙམ་པ་ཡིན། སྔ་དར་གྱི་མགོར་མིང་དང་ཚིག་རྣམས་ཀྱི་འབྲི་ལུགས་ལ་དེ་ཙམ་གཏན་ཁེལ་མ་བྱུང་བའི་སྟབས་ཀྱིས། འབྲི་ལུགས་ལ་སྣ་ཚོགས་ཤིག་བྱུང་བ་ཡིན་ཏེ། དཔེར་ན། སྦ་བཞེད་ལ། ས་སྦ་དང་ར་རྦ་དང༌། དཔའ་ཞེས་བྲིས་པ་ཡོད་པ་དང༌། རལ་པ་ཅན་གྱིས་བཞེངས་པའི་གཙུག་ལག་གི་ཕོ་བྲང་ཆེན་པོ་ལ། འུ་ཤང་རྡོ། འོན་ཅང་རྡོ། གཉིས་ཀ་ཡོད་པ་དང༌། གླང་དར་མིང༌། ཨུ་དུམ་བཙན། འུ་དུམ་བཙན་བྲིས་པ་སོགས་མི་འདྲ་བ་མང༌། ཕྱིས་སུ་རིག་གནས་ཕྱི་དར་སྐབས་རིམ་གྱིས་མིང་ཚིག་གི་འབྲི་ལུགས་རྣམས་གཅིག་མཐུན་བྱུང་བ་དང༌། ཁྱད་པར་དུ་རྗེ་ཡབ་སྲས་བྱོན་པའི་སྐབས་སྔ་ཕྱི་ནས། མཁས་ཆེན་མང་དུ་བྱོན་ཞིང་རྩོམ་ལུགས་ཀྱང་བརྡ་སྤྲོད་པའི་གཞུང་དང་མཐུན་ལ་བོད་ཀྱི་སྤྱི་འགྲོས་སྐད་དང་མཐུན་ཞིང༌། ཚིག་སྦྱོར་ལེགས་ལ་གོ་སླ་བ་ཤ་སྟག་བྱུང་བར་མ་ཟད། ཤིང་པར་ཡང་འབོར་ཆེན་དར་སྟབས་མིང་དང་ཚིག་གི་འབྲི་ལུགས་རྩའི་ཐོག་ནས་གཅིག་གྱུར་གཏན་ཁེལ་བྱུང་ངོ༌།།
འོན་ཀྱང་བྲིས་ནོར་ལ་བརྟེན་མ་དག་རྒྱུན་འབྱམས་སུ་སོང་བའང་མང་སྟེ། དཔེར་ན། བུ་སྟོན་ཆོས་འབྱུང་དུ་སད་ན་ལེགས་ཀྱི་མཚན་ལ། ཁྲི་ལྡེ་སྲོང་བཙན་ཟེར་རྒྱུ་ལ། ཁྲི་ལྡེ་བཙན། ཞེས་སྲོང་ཆད་པ་དང༌། རལ་བ་ཅན་གྱི་མཚན་ལ་ཁྲི་གཙུག་ལྡེ་བཙན་ཟེར་རྒྱུ་ལ་ཁྲི་ལྡེ་སྲུང་བཙན་ཞེས་བྲིས་པ་ལྟ་བུ། འདི་ནི་ཡིག་ནོར་ཡིན་ཏེ། གོང་དུ་སྡེ་པར་ཤོག་གྲངས་དགུ་བཅུའི་ཉིན་ལ་བོད་ཀྱི་རྒྱལ་པོ་ཁྲི་གཙུག་ལྡེ་བཙན་རལ་བ་ཅན། ཞེས་ཡོད་པ་ལྟར་ཡིན་ནོ། །ཡང་གོང་དུ་རྦ་ཁྲི་བཞེར། སང་ཤི་ཏ་ཞེས་མི་གཉིས་བྱས་པ་དང༌། འོག་ཏུ། འབའ་ཁྲི་བཞེར་སང་ཤི་ཏ། ཞེས་གཅིག་བྱས་པ་ལྟ་བུས་མཚོན། ཡི་གེ་མ་དག་པ་ཡོད་ལ། ཕྱིས་སུ་འགའ་ཞིག་གིས་ཡི་གེ་དག་མ་དག་མ་དཔྱད་པར། ཀུན་མཁྱེན་བུའི་ཆོས་འབྱུང་གི་ཡིག་ནོར་ལྟར་བྲིས་པ་ཡོད། བདག་གིས་ཀྱང་སྔར་བློ་གསལ་དགའ་སྟོན་རྩོམ་དུས་མ་དཔྱད་པར། ཁྲི་ལྡེ་སྲོང་བཙན་རལ་བ་ཅན་ཞེས་བྲིས་པ་ནི་ནོར་བ་ཡིན། ཁྲི་སྲོང་ལྡེ་བཙན་གྱི་ཡབ་མེས་ཨག་ཚོམ་གྱི་མཚན་ལ། ཁྲི་ལྡེ་གཙུག་བརྟན་དང༌། ཁྲི་སྲོང་ལྡེ་བཙན་གྱི་སྲས་སད་ན་ལེགས་ཀྱི་མཚན་ལ་ཁྲི་ལྡེ་སྲོང་བཙན་དང༌། དེའི་སྲས་རལ་བ་ཅན་གྱི་མཚན་ལ་ཁྲི་ལྡེ་གཙུག་ལྡེ་བཙན་ཟེར་བ་ཡིན་ཏེ། འདི་ནི་བུ་སྟོན་ཆོས་འབྱུང༌། དེབ་དམར། དེབ་སྔོན། མཁས་པའི་དགའ་སྟོན། ས་སྐྱའི་བསྟན་པ་སྤྱིའི་ཆོས་འབྱུང༌། ཀློང་ཆེན་ཆོས་འབྱུང༌། བཀའ་གཙིགས་ཆེན་མོ། རྡོ་རིང་གི་ཡི་གེ། ཏུན་ཧོང་གི་གཏེར་ཡིག་སོགས་གཅིག་མཐུན་རེད་དོ།། །།
བསྟན་པ་ཕྱི་དར་གྱི་སྐབས་སུ་བོད་དུ་རིག་གནས་དར་ཚུལ།
བསྟན་པ་ཕྱི་དར་གྱི་སྐབས་སུ་རིག་གནས་དར་ཚུལ་བཤད་པ་ལ། སྤྱིར་སྔ་དར་དང་ཕྱི་དར་ཟེར་བ་ནི། གླང་དར་མས་དབུས་གཙང་དུ་བསྟན་པ་བསྣུབས་པའི་སྔོན་ལ་སྔ་དར་དང༌། དེས་བསྟན་པ་བསྣུབས་ནས་ལོ་བདུན་ཅུ་ཡར་མར་ཞིག་ལ། རིག་གནས་དང་ཆོས་ལ་སྦྱང་བརྩོན་བྱེད་པ་ཆེར་མེད་ལ། སྟོད་མངའ་རིས་ཀྱི་དཔོན་བཙུན་ལྷ་བླ་མ་ཡེ་ཤེས་འོད་ཀྱི་རིང་ཡར་མར་ནས་རིམ་གྱིས་རིག་པའི་གནས་དང་མདོ་རྒྱུད་ཀྱི་བསྟན་པ་ཆེས་ཆེར་དར་བ་མན་ལ་ཕྱི་དར་ཟེར། དེ་ཡང་དབུས་གཙང་དུ་ཡིན་གྱི། མདོ་ཁམས་སོགས་ས་མཐའ་དག་བོད་ཀྱི་རྒྱལ་པོ་དང་ས་ཐག་རྒྱང་གཤིས་རིག་པའི་གནས་དང་མདོ་སྔགས་ཀྱི་བཤད་པ་སོགས་ཀྱང་ནམ་དར་བ་ནས་བཟུང༌། ད་ལྟའི་བར་དུ་བར་མ་ཆད་པར་ཡོད་པ་འདི་ཡིན་སྟབས། དེའི་དུས་སུའང་མདོ་སྨད་དུ་བོད་རྒྱལ་གྱིས་གནོད་འཚེ་བྱེད་མི་ཐུབ་སྟབས། བོད་ཀྱི་མཁས་པ་མི་གསུམ་ཡང་མདོ་ཁམས་སྨད་ཀྱི་གནས་དན་ཏིག་ཏུ་བཞུགས། དེའི་སྐབས་ཙོང་ཁ་བདེ་ཁམས་སུ་མུ་ཟུ་གསར་འབར་ཞེས་བྱ་བའི་བྱིས་པ་རིག་པ་ཅན་ཞིག་འཁྲུངས་པ་ནར་སོན་ནས་ཡིག་རྩིས་སོགས་རིག་པའི་གནས་སྦྱངས་ཏེ་མཁས་པར་གྱུར། ནོན་འཇམ་དཔལ་ཞེས་བྱ་བའི་སློབ་དཔོན་ཞིག་ཡོད་པའི་མདུན་ནས་ཆོས་དང་རིག་པའི་གནས་དུ་མ་ཞིག་གསན། ཁང་རིན་ཆེན་རྡོ་རྗེ་ཞེས་བྱ་བའི་བླ་མ་སྙན་གྲགས་ཅན་ཞིག་ཡོད་པ་དེའི་མདུན་ནས་སེམས་བསྐྱེད་ཞུས། སྐྱི་རྒྱལ་བའི་གཙུག་ཏོར་ཞེས་བྱ་བའི་མཁས་པ་ཆེན་པོ་ཞིག་ཡོད་པ་དེའི་མདུན་ནས་དབུ་མ་དང་ཚད་མའི་གཞུང་སོགས་ལ་སྦྱངས། དེ་ནས་ཕྱུགས་རྫི་ཞིག་གིས་བོད་དབུས་ནས་བྱོན་པའི་སྒོམ་པ་བ་གསུམ་(མཁས་པ་མི་གསུམ་) ཡོད་ཚུལ་བཤད་པས། དེར་བྱོན་ནས་མཇལ་བས་དད་པ་སྐྱེས་ཏེ་རབ་ཏུ་བྱུང༌། མཚན་དགེ་བ་རབ་གསལ་དུ་བཏགས། ཕྱིས་ཐུགས་རབ་ཤིན་ཏུ་ཆེ་བསདགོངས་པ་རབ་གསལ་ཞེས་གྲགས་སོ།།
རབ་ཏུ་བྱུང་བའི་ཕྱི་ལོར་བསྙེན་པར་རྫོགསསྤྱ གྲུམ་ཡེ་ཤེས་རྒྱལ་མཚན་དང༌། སྣུབས་བྱང་ཆུབ་རྒྱལ་མཚན་སོགས་མདོ་ཁམས་པ་མང་པོ་རབ་ཏུ་བྱུང་ཞིང་བསྙེན་པར་རྫོགས་ནས་འདུལ་བ་དང་མངོན་པ་ལ་སོགས་པའི་བཤད་པ་མནོས། བླ་ཆེན་པོ་དགོངས་པ་རབ་གསལ་ཞེས་སྙན་གྲགས་ཀྱིས་བོད་ཡུལ་ཁྱབ།།
དེ་ནས་མདོ་སྨད་དུ་སངས་རྒྱས་ཀྱི་བསྟན་པ་ཡོད་པའི་གཏམ་དེ་དབུས་གཙང་དུ་ཁྱབ་པས། དབུས་གཙང་ནས་མི་བཅུ་སྔ་ཕྱིར་འོངས་ཏེ་བླ་ཆེན་གྱི་མདུན་ནས་བསྙེན་པར་རྫོགས། མི་བཅུ་ནི། དབུས་ནས་ཀླུ་མེས་ཚུལ་ཁྲིམས་ཤེས་རབ། འབྲིང་ཡེ་ཤེས་ཡོན་ཏན། སྦ་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་ཏེ་དབུས་པ་ལྔ། གཙང་གི་མགུར་མོ་རབ་ཁ་བ་ལོ་སྟོན་རྡོ་རྗེ་དབང་ཕྱུག །ཤབ་སྒོ་ལྔའི་ཚོང་བཙུན་ཤེས་རབ་སེང་གེ །བོ་དོང་བ་ཨུ་བ་དེ་དཀར་བ་སྟེ་གཙང་པ་གསུམ། མངའ་རིས་པ་འོད་བརྒྱད་སྤུན་གཉིས་ཏེ་བཅུའོ། །ཀླུ་མེས་ཀྱིས་གྲུམ་ཡེ་ཤེས་རྒྱལ་མཚན་ལས་འདུལ་བ་གསན། གཞན་རྣམས་དབུས་གཙང་དུ་བྱོན། ཕྱི་ལོར་ཀླུ་མེས་ཀྱང་ཡར་བྱོན་ནས་རིམ་གྱིས་གནས་བཟུང་ཞིང༌། དེ་བཞིན་དུ་གཞན་རྣམས་ཀྱིས་ཀྱང་གཙུག་ལག་ཁང་བརྩིགས་ཏེ་དགེ་འདུན་གྱི་སྡེ་སྤེལ། ཕྱི་ནང་གི་རིག་པའི་གནས་དག་ལ་སྦྱང་བའི་སྲོལ་དབུས་གཙང་མངའ་རིས་སོགས་སུ་ཁྱབ་པར་མཛད། བརྒྱུད་པ་འདི་ལ་སྨད་འདུལ་བ་ཞེས་གྲགས་སོ།།
གཞན་ཡང་མངའ་རིས་སྟོད་དུ་ལྷ་བླ་མ་ཡེ་ཤེས་འོད་ཀྱིས་ཐོ་ལིང་གི་དཔེ་མེད་ལྷུན་འགྲུབ་གཙུག་ལག་ཁང་བཞེངས། རྒྱ་གར་ཤར་ཕྱོགས་ནས་པཎྜི་ཏ་ངྷརྨ་པཱ་ལ་དང༌། དེའི་མཁན་བུ་སཱ་ངྷུ་པཱ་ལ་དང༌། གུ་ཎ་པཱ་ལ། པྲ་ཛྙཱ་པཱ་ལ་སྟེ་པཱ་ལ་རྣམ་གསུམ་དུ་གྲགས་པ་དང་བཅས་པ་སྤྱན་དྲངས་ནས་མང་པོ་བསྙེན་པར་རྫོགས། ཞང་ཞུང་བ་རྒྱལ་བའི་ཤེས་རབ་ཀྱིས་པཎྜི་ཏ་མང་པོ་བསྟེན་ཏེ། སྒྲ་དང་སྐད་སོགས་རིག་པའི་གནས་མང་པོ་ལ་སྦྱངས་ནས་མཁས་པ་ཆེན་པོར་གྱུར་པ་དེས་ངྷརྨ་པཱ་ལའི་མདུན་ནས་འདུལ་བ་བསླབས། པྲ་ཛྙཱ་པཱ་ལ་ལས་བསྙེན་པར་རྫོགས། ཕྱིས་སུ་ཡང་ཁོང༌། ནེ་པ་ལ་སྟེ་བལ་ཡུལ་དུ་ཕེབས་ནས་འདུལ་འཛིན་བྲེ་ཏ་ཀ་ར་ལས་འདུལ་བའི་ལག་ལེན་ཐམས་ཅད་བསླབས་ཤིང༌། ཁ་ཆེ་ཛྙཱ་ན་ཤྲི་དང༌། ཁ་ཆེ་པཎ་ཆེན་དུ་གྲགས་པཤྲཱི་སུ་ཏི་ཤནྟི་དང༌། ས་མནྟ་ཤྲཱི་ཛྙཱ་ན་དང༌། ན་ར་མ་དེ་ཝ་རྣམས་ལས་ཀྱང་འདུལ་བ་གསན་ནས་སྤེལ་བ་ལ་སྟོད་འདུལ་བ་ཞེས་གྲགས་སོ།།
གཞན་ཡང་མངའ་རིས་ཀྱི་ལྷ་བླ་མ་ཡེ་ཤེས་འོད་ཀྱིས་རིན་ཆེན་བཟང་པོ་ལ་སོགས་པའི་བྱིས་པ་ཉི་ཤུ་རྩ་གཅིག་རྒྱ་གར་དུ་སློབ་གཉེར་ལ་བཏང་བ་ལས། རིན་ཆེན་བཟང་པོ་དང་ལེགས་པའི་ཤེས་རབ། ལོ་ཆུང་གྲགས་འབྱོར་གསུམ་མ་གཏོགས་གཞན་རྣམས་ས་མ་ཐུབ་པས་ཤི། ལོ་ཙཱ་བ་རིན་ཆེན་བཟང་པོ་ནི་མེ་མཁའ་རྒྱ་མཚོའི་འདས་ལོ་ ༢༢༤ ས་རྟ་ལོ་ (སྤྱི་ལོ་ ༩༥༨) ལ་འཁྲུངས། ཁོང་ཁ་ཆེར་ལན་གསུམ་བྱོན། པཎྜི་ཏ་བདུན་ཅུ་རྩ་ལྔ་བསྟེན། སྔགས་མཚན་ཉིད་ཀྱི་གཞུང་ལུགས་མང་པོ་ལ་སྦྱངས། མཁྱེན་རབ་ཤིན་ཏུ་ཆེ་བས་མདོ་སྔགས་ཀྱི་ཆོས་མང་པོ་བསྒྱུར། འདི་ནས་བཟུང་སྟེ་བསྒྱུར་བའི་སྔགས་ལ་གསང་སྔགས་གསར་མ་ཟེར། གནས་དང་གཙུག་ལག་ཁང་མང་དུ་བཞེངས། གུར་ཤིང་བརྩོན་འགྲུས་ལ་སོགས་པའི་སློབ་མ་མཁས་གྲུབ་མང་པོ་དང༌། ཞུ་ཆེན་ཕེར་བའི་ལོ་ཙཱ་བ་ཡང་བཅུ་ལྷག་བྱུང༌། ཁོང་དགུང་ལོ་གྱ་ལྔ་བཞེས་པའི་དུས། ཇོ་བོ་རྗེ་བོད་དུ་བྱོན། སྤྱིར་ལོ་ཆེན་འདིའི་ཕྱག་རྗེས་གཞན་ལས་ཆེ། དགུང་ལོ་གོ་བརྒྱད་ཐོག་སྐུ་མྱ་ངན་ལས་འདས་སོ། །ལོ་ཆེན་གྱི་སློབ་མ་མཁས་ཆེན་མང་པོ་བྱུང་བ་རྣམས་ཀྱིས་གཞུང་ལུགས་མང་པོ་བསྒྱུར། ཁྱད་པར་དུ་རྨ་དགེ་བའི་བློ་གྲོས་ཀྱིས་ཚད་མ་རྣམ་འགྲེལ་དང༌། དེའི་རང་འགྲེལ་དང༌། ལྷ་དབང་བློའི་འགྲེལ་པ་དང༌། ཤཱཀྱ་བློའི་འགྲེལ་བཤད་ལ་སོགས་པ་མང་དུ་བསྒྱུར་ཅིང༌། འཆད་ཉན་གྱིས་གཏན་ལ་ཕབ། དེ་ལས་མཆེད་ནས་དབུས་གཙང་གི་ཕྱོགས་སུ་ཚད་མའི་འཆད་ཉན་བྱུང་ཞིང༌། དེའི་ཚེ་ཁྱུང་པོ་གྲགས་སེ་ཞེས་བྱ་བ་མཁས་པར་གྲགས་པ་དེས་ཚད་མའི་བཤད་པ་མང་དུ་མཛད། ལོ་དག་ལ་ཚད་མ་རྙིང་མ་ཞེས་ཟེར། ཕྱིས་ལོ་ཙཱ་བ་བློ་ལྡན་ཤེས་རབ་ནས་ཚད་མ་གསར་མར་གྲགས་པ་རྣམས་བྱུང་བར་གྲགས་ལ་ཁྱུང་པོ་དེ་བོ་ཏོ་བ་དང་དུས་མཚུངས་པར་སྣང་གསུངས་སོ།།
ཡང་ལྷ་བླ་མ་ཡེ་ཤེས་འོད་ཀྱི་དུས་སུ་པཎྜི་ཏ་སྨྲྀ་ཏི་དང་ཕྲ་ལ་རིང་བ་བྱ་བ་གཉིས་བལ་པོ་པད་མ་རུ་རྩེ་བ་ཞེས་བྱ་བའི་ལོ་ཙཱ་བ་དེས་གདན་དྲངས་འོངས་པས། ལོ་ཙཱ་བ་བལ་པོར་ཕོ་ལོག་གིས་ཤི་སྟེ། པཎྜི་ཏ་གཉིས་པོས་བོད་སྐད་མི་ཤེས་པས་དབུས་གཙང་ན་མར་འཁྱམས་ཏེ། སྨྲྀ་ཏིས་རྟ་ནག་ཏུ་ལུག་རྫི་་ཛད། ཕྱིས་དཔྱལ་སེ་ཙ་བསོད་ནམས་རྒྱལ་མཚན་གྱིས་སྨན་ལུང་དུ་སྤྱན་དྲངས་ཏེ་ཆོས་ཞུས། ཁམས་སུ་བྱོན་ནས་འདན་ཀློང་ཐང་དུ་མངོན་པ་མཛོད་ཀྱི་བཤད་པ་བཙུགས། ཕྱིས་བོད་སྐད་མཁས་པར་མཁྱེན་ཏེ། གདན་བཞི་དང་འཇམ་དཔལ་གསང་ལྡན་ལ་སོགས་པ་འགྱུར་མང་པོ་མཛད། ཕྱིས་ལིང་ཆུ་གསེར་ཁབ་ཏུ་བྱོན་ཏེ་སྨྲ་སྒོ་མཚོན་ཆ་ཞེས་བྱ་བའི་བརྡ་སྤྲོད་པའི་གཞུང་དེ་བརྩམས། ལོ་ཙཱ་བ་རིན་ཆེན་བཟང་པོ་དགུང་ལོ་ལྔ་བཅུར་ཉེ་བའི་སྐབས་སུ་འབྲོག་མི་དང་སྟག་ལོ་གཞོན་ནུ་བརྩོན་འགྲུས་གཉིས་རྒྱ་གར་དུ་ཆས། དེ་གཉིས་ཀྱིས་བོད་དུ་བི་ཝར་ཏ་ལ་ཅུང་ཟད་ཀྱང་བསླབས། བལ་པོར་ལོ་གཅིག་བཞུགས་ནས་ཤཱནྟི་བའི་སློབ་མ་བལ་པོའི་པཎྜི་ཏ་ཤཱནྟི་བྷ་དྲ་ལས་སྐད་ལེགས་པར་བསླབས། ཁོང་གིས་ཞལ་བརྡ་མཛད་པ་བཞིན་བི་ཀྲ་མ་ལ་ཤཱི་ལའི་མཁས་པ་སྒོ་དྲུག ཤར་ན་ཤཱནྟི་བ། ལྷོ་ན་ངག་གི་དབང་ཕྱུག་གྲགས་པ། ནུབ་ན་ཤེས་རབ་འབྱུང་གནས་བློ་གྲོས། བྱང་ན་ནཱ་རོ་པཎ་ཆེན། དབུས་ན་རིན་ཆེན་རྡོ་རྗེ་དང༌། ཛྙཱ་ན་ཤྲཱི་རྣམས་བཞུགས་པ་ལས། ཤཱནྟི་བ་ལ་གཏུགས་ཤིང་སྟག་ལོ་རྡོ་རྗེ་གདན་དུ་སྐོར་བ་བྱེད་ཅིང་བཞུགས་ཏེ། སློབ་གཉེར་ཆེར་མ་བྱས།
འབྲོག་མིས་པཎྜི་ཏ་མང་པོའི་མདུན་ནས་གཞུང་ལུགས་མང་པོར་སྦྱངས། ལྷོ་བལ་དུ་ལོ་བཅུ་གསུམ་ལ་སློབ་གཉེར་བྱས་ཏེ་སླར་བོད་དུ་ཕེབས། མཁས་པ་ཆེན་པོར་གྱུར་ཡོད་པས་འཆད་སྤེལ་གྱིས་སློབ་མ་ཤིན་ཏུ་མང་པོ་བསྐྱངས་པ་ནི་ས་སྐྱ་འདེབས་པ་པོ་འཁོན་དཀོན་མཆོག་རྒྱལ་པོ་སོགས་སོ།། (ཇོ་བོ་བོད་དུ་ཕེབས་དུས་འབྲོག་མི་ལོ་ལྔ་བཅུ་) མངའ་རིས་ཀྱི་རྗེ་བོ་ལྷ་བླ་མ་ཡེ་ཤེས་འོད་དང་བྱང་ཆུབ་འོད་ཀྱི་རིང་ལ་རྒྱ་གར་ནས་པཎྜི་ཏ་མང་པོ་སྤྱན་དྲངས་ཀྱང་བསྟན་པ་སྤྱི་ལ་དག་ཐེར་མཐའ་ཆོད་པ་ཞིག་བྱེད་མཁན་མ་བྱུང་བས། ལོ་ཙཱ་བ་རྒྱ་བརྩོན་སེང་སོགས་མི་ལྔ་རྒྱ་གར་དུ་མངགས་ནས་བི་ཀྲ་མ་ལ་ཤཱི་ལའི་པཎྜི་ཏ་ཆེན་པོ་ཇོ་བོ་རྗེ་དཔལ་ལྡན་ཨ་ཏི་ཤ་མཚན་དངོས་མར་མེ་མཛད་དཔལ་ཡེ་ཤེས་བྱ་བ་སྤྱན་དྲངས། ཁོང་ནི་རྒྱ་གར་ཤར་ཕྱོགས་བྷང་ག་ལའི་ཡུལ་གྱི་ཟ་ཧོར་རྒྱལ་པོའི་སྲས་སུ་རབ་བྱུང་གོང་གི་ཆུ་རྟ་ (སྤྱི་ལོ་ ༩༨༢) ལ་འཁྲུངས། དགུང་ལོ་ཉེར་གཅིག་ཚུན་ལ་ཐུན་མོང་གི་རིག་གནས་སྒྲ་ཚད་བཟོ་གསོ་ལ་མཁས་པར་གྱུར་ནས་ལོ་བཅོ་ལྔའི་དུས་རྟོག་གེ་བ་མཁས་པ་ཞིག་ཀྱང་རྩོད་པས་ཚར་བཅད།
དེ་རྗེས་རྒྱལ་སྲིད་སྤངས་ནས་མདོ་སྔགས་ཀྱི་གཞུང་ལ་སྦྱངས། རབ་ཏུ་བྱུང་སྟེ་བསྙེན་པར་རྫོགསསྤྱ གསེར་གླིང་བ་སོགས་བླ་མ་མང་པོ་བསྟེན། སྙན་གྲགས་ཀྱིས་འཛམ་གླིང་ཁྱབ་པདེ་ཉིད་ལྷ་བླ་མ་བྱང་ཆུབ་འོད་ཀྱི་རིང་ལ་ནག་ཚོ་ལོ་ཙཱ་བ་ཉེར་བདུན་ཐོག་སླར་རྒྱ་གར་དུ་མངགས་ཏེ་སྤྱན་དྲངས།
བྱང་ཆུབ་འོད་ཀྱིས་བསྐུལ་ངོར་ཆོས་མཛད་ཡོངས་ཀྱི་ལམ་ཡིག་ལྟ་བུའི་བྱང་ཆུབ་ལམ་གྱི་སྒྲོན་མ་མཛད། ཁུ་རྔོག་འབྲོམ་གསུམ་སོགས་སློབ་མ་ཤིན་ཏུ་མང་པོ་བསྐྱངས། གསུང་རྩོམ་ཀྱང་སྨན་དཔྱད་འཚོ་བའི་སྙིང་པོ་དང་དྲི་མ་མེད་པའི་ཕྲིན་ཡིག །སད་པྱད་ལས་རྣམ་འབྱེད། ལམ་སྒྲོན་དཀའ་འགྲེལ། དབུ་མའི་མན་ངག་སོགས་མང་པོ་བརྩམས། དགུང་ལོ་དོན་གསུམ་ཐོག་སྙེ་ཐང་དུ་གཤེགས་ཏེ་སྐུ་གདུང་དེ་གར་བཞུགས། ཇོ་བོ་ལ་བརྟེན་ནས་ལོ་ཆེན་དང་ལོ་ཆུང་གྲགས་འབྱོར་ཤེས་རབ། ནག་ཚོ་ལོ་ཙཱ་བ། ཤཱཀྱ་འོད། ཡོལ་ལྕགས་རྡོ་རྗེ་དབང་ཕྱུག །དགེ་བློ་སོགས་ཀྱིས་གཞུང་ལུགས་མང་པོ་བསྒྱུར་ཏོ༑
༑ཇོ་བོ་རྗེའི་སློབ་མ་གྲགས་ཆེ་བ་ནི། གཙང་ན་འགར་འགོས་ཡོལ་གསུམ། དབུས་ན་ཁུ་རྔོག་འབྲོག་གསུམ་ཟེར། གཙོ་བོ་འབྲོམ་སྟོན་པ་ནི་རྟེན་དགེ་བསྙེན་ཡིན་ལ་རབ་བྱུང་གོང་གི་ཤིང་འབྲུག་ (སྤྱི་ལོ་ ༡༠༠༤) ལ་འཁྲུངས། དགུང་ལོ་བཅུ་དགུའི་ཐོག་ཁམས་འདན་མར་བྱོན་ནས་ཇོ་བོ་སེ་བཙུན་དབང་ཕྱུག་གཞོན་ནུ་ཞེས་པ་ལོ་ཉི་ཤུར་བསྟེན་ནས་གཞུང་ལུགས་མང་པོར་སྦྱངས་ཤིང༌། པཎྜི་ཏ་སྒྲའི་ཚེར་མ་ (སྨྲ་སྒོ་རྩོམ་པ་པོ་སྨྲྀ་ཏིའི་མཚན་གཞན།) ལས་བི་ཝར་ཏ་སོགས་དང་སྒྲ་ལ་སྦྱངས། འདི་བ་ལོ་སོ་དགུའི་ཐོག་ཇོ་བོ་བོད་དུ་ཕེབས་ཟེར། ལོ་ཞེ་གཅིག་གི་སྟེང་ཇོ་བོ་དང་མཇལ། ལོ་བཅུ་གཅིག་གི་བར་དུ་བསྟེན་ཏེ་ཇོ་བོའི་གདམས་པ་མ་ལུས་པ་བུམ་པ་གང་བྱོའི་ཚུལ་དུ་གསན་ནས་ཇོ་བོའི་ཡོན་ཏན་ཐམས་ཅད་རྫོགས་པར་མཁྱེན་པའི་མཁས་པ་ཆེན་པོར་གྱུར། དགུང་གྲངས་ང་བཞིའི་ཐོག རྭ་སྒྲེང་དགོན་བཏབ་སྟེ་སློབ་མ་མང་པོ་བསྐྱངས་པས་བཀའ་གདམས་སྐུ་མཆེད་གསུམ་སོགས་མཁས་པ་ཤིན་ཏུ་མང་པོ་བྱུང་སྟེ་ཇོ་བོ་བཀའ་གདམས་པ་ཞེས་བྱ་བའི་གྲུབ་མཐའ་དེ་བྱུང༌། རེ་གཅིག་ཐོག་རབ་བྱུང་དང་པོའི་ཤིང་འབྲུག་ (སྤྱི་ལོ་ ༡༠༦༤) ལོར་འདས་སོ།
།ཇོ་བོའི་སློབ་མ་ཁུ་སྟོན་བརྩོན་འགྲུས་གཡུང་དྲུང་གིས་ཀྱང་ཐང་པོ་ཆེར་བཞུགས་ནས་སློབ་མ་ཤིན་ཏུ་མང་པོ་བསྐྱངས། རྔོག་ལེགས་པའི་ཤེས་རབ་ཀྱིས་གསང་ཕུ་ནེའུ་ཐོག་གི་དགོན་པ་བཏབ། དེའི་དབོན་པོའམ་ཚ་བུ་ནི་རྔོག་ལོ་བློ་ལྡན་ཤེས་རབ་བོ། །ཇོ་བོའི་སློབ་མ་གཙང་སྨད་རྟ་ནག་གི་འགོས་ལོ་ཙཱ་བ་འགོས་ཁུག་པ་ལྷས་བཙས་ཞེས་གྲགས་པ་དེ་དང་པོར་འབྲོག་མི་དང་ཟུར་ཆེན་ལ་གཏུགས་ཤིང་ཐུགས་ཚིམ་པ་ཞིག་མ་བྱུང་བས་རྒྱ་བལ་དུ་ལན་བཅུ་གཉིས་བྱོན། ལོ་མང་པོར་བཞུགས། པཎྜི་ཏ་བདུན་ཅུ་རྩ་གཉིས་བསྟེན་ཏེ་གདམས་པ་མང་པོ་གསན་ནས་བོད་དུ་བྱོན་ཏེ་འདུས་པ་སོགས་དར་བར་མཛད། སློབ་མ་མདར་སེང་རྒྱན་སོགས་དྲུག་སྟོད་ལུང་གནམ་གྱི་རྫིང་ཁ་བ་དང་ཡོལ་མཆེད་གསུམ་སོགས་མང་ལ། ས་སྐྱ་བ་འཁོན་དཀོན་མཆོག་རྒྱལ་པོས་ཀྱང་བླ་མར་བསྟེན་ཏེ་འདུས་པའི་སྐོར་སོགས་གསན་ནོ།
།བྱང་ཆུབ་འོད་ཀྱི་སྤུན་ཟླ་མངའ་བདག་འོད་སྡེས་པཎྜི་ཏ་སུཎྱཡ་ཤྲཱི་སྤྱན་དྲངས། དེའི་སྲས་རྩེ་ལྡེས་ཁ་ཆེ་ཛྙཱ་ན་ཤྲཱི་སྤྱན་དྲངས་ཏེ། ཁྱུང་པོ་ཆོས་བརྩོན་གྱིས་ལོ་ཙཱ་བྱས་ནས། ཚད་མ་རྣམ་ངེས། དེའི་ཊཱིཀ་ཁོང་ཉིད་ཀྱི་མཛད་པ་ལ་སོགས་པ་མང་པོ་བསྒྱུར། གཞན་ཡང་ཙནྡྲར་རཱ་ཧུ་ལ་སྤྱན་དྲངས་ཏེ་ལོ་ཙཱ་བ་ཏིང་ངེ་འཛིན་བཟང་པོས་ཚད་མ་ཀུན་ལས་བཏུས་པ་ལ་སོགས་བསྒྱུར། གྱི་ཇོ་ཟླ་བའི་འོད་ཟེར་གྱིས་ཀྱང་དུས་འཁོར་སོགས་མང་པོ་བསྒྱུར། ལྷོ་བྲག་མར་པ་ཆོས་ཀྱི་བློ་གྲོས་རྒྱ་གར་དུ་ལན་གསུམ་ཕེབས་ཏེ་ནཱ་རོ། མེ་ཏྲི། ཞི་བ་བཟང་པོ། ཕམ་ཐིང་བ་སོགས་བསྟེན་ནས་མན་ངག་མང་པོ་ཞུས་ཤིང་བསྒྱུར་བས་སློབ་མ་ཀ་ཆེན་བཞི་སོགས་བྱུང་བ་གྲགས་ཆེ། འདི་བ་རབ་བྱུང་དང་པོའི་གོང་གི་ཤིང་བྱི་ (སྤྱི་ལོ་ ༡༠༢༤) ལོར་འཁྲུངས། ཟངས་དཀར་ལོ་ཙཱ་བ་འཕགས་པ་ཤེས་རབ་ཀྱིས་ཀྱང་པཎྜི་ཏ་ཁ་ཆེ་དགོན་པ་བ་དང༌། ཏེ་ཛ་དེ་བ། པ་ར་ཧིཏ་བྷ་དྲ་ལ་སོགས་པ་བསྟེན་ནས་སྤྱོད་འཇུག་གི་འགྲེལ་ཆེན་དང་ཡོ་ག་སོགས་མང་པོ་བསྒྱུར། གཉན་དར་མ་གྲགས་རྒྱག ར་དུ་ལོ་བཅུ་གཉིས་བཞུགས་ཏེ་པཎྜི་ཏ་མ་ཏི་བསྟེན། པཎྜི་ཏ་སུཎྱཡ་ཤྲཱི་སྤྱན་དྲངས་ཏེ་སྤྱོད་འཇུག་འགྲེལ་ཆེན་དང་སྒྲོལ་མ་སོགས་བསྒྱུར། ཁྱེའུ་གད་པ་འཁོར་ལོ་གྲགས་དང༌། སྤང་ཞོ་གསལ་བ་གྲགས། རྩོད་ཀ་མི་ཉག རྩ་མི་སངས་རྒྱས་གྲགས་རྣམས་ཀྱིས་པཎྜི་ཏ་ཨ་བྷ་ཡ་ཀཱ་ར་བསྟེན་ནས་དུས་འཁོར་ཕྲེང་བ་སྐོར་གསུམ། ཐུབ་པ་དགོངས་རྒྱན། མན་ངག་སྙེ་མ་ལ་སོགས་པ་བསྒྱུར། ཀྲེ་བོ་ལོ་ཙཱ་བ་ཤེས་རབ་དཔལ་གྱིས་ཀྱང་ཨ་བྷ་ཡ་ཀཱ་ར་བསྟེན་ནས་གནད་ཀྱི་ཟླ་ཟེར་ལ་སོགས་པ་བསྒྱུར། བ་རི་ལོ་ཙཱ་བ་རིན་ཆེན་གྲགས་ཀྱིས་པཎྜི་ཏ་དོན་ཡོད་རྡོ་རྗེ་སྤྱན་དྲངས་ཏེ་དོན་ཞགས་ལ་སོགས་པ་བསྒྱུར། ཀློག་སྐྱ་ཤེས་རབ་གྲགས་ཀྱིས་མཚན་བརྗོད་དང་དབུ་མ་འཇུག་པ་སོགས་བསྒྱུར་རོ།།
པ་ཚབ་ལོ་ཙཱ་བ་ཉི་མ་གྲགས་ཁ་ཆེར་ཕེབས་ནས་ལོ་ཉི་ཤུ་རྩ་གསུམ་ལ་གཞུང་ལུགས་མཐའ་དག་ལ་སྦྱངས། བོད་དུ་ཕེབས་ནས་པཎྜིཏ་ཀ་ན་ཀ་ཝརྨ་སྤྱན་དྲངས་ནས་དབུ་མའི་སྐོར་རྣམས་བསྒྱུར། བཤད་པ་རྒྱ་ཆེར་མཛད་པས་སློབ་མ་པ་ཚབ་བུ་བཞི་ལ་སོགས་པ་བྱུང་ངོ༌།།
འབྲོ་ལོ་ཙཱ་བ་ཤེས་རབ་གྲགས་ཁ་ཆེར་བྱོན་ཏེ་སློབ་གཉེར་མཛད། པཎྜི་ཏ་ཟླ་བ་མགོན་པོ་སྤྱན་དྲངས་ཏེ་དུས་འཁོར་ཆ་ལག་རྒྱས་པ་དང༌། རྡོ་རྗེ་སྙིང་འགྲེལ། ཕྱག་རྡོར་སྟོད་འགྲེལ་ལ་སོགས་པ་བསྒྱུར། བ་རེག་ཐོས་པ་དགའ། རྨ་བན་ཆོས་འབར། མཚུར་ལོ་ཙཱ་བ་རྣམས་ཀྱིས་རྒྱ་གར་ཕྱག་ན་རྡོ་རྗེ་བསྟེན་ནས་ཆོས་མང་པོ་བསྒྱུར། དཔྱལ་ལོ་ཙཱ་བ་ཀུན་དགའ་རྡོ་རྗེས་བལ་པོ་ཧང་དུ་དཀར་པོ་བསྟེན། པཎྜི་ཏ་སྟོང་ཉིད་ཏིང་ངེ་འཛིན་སྤྱན་དྲངས་ཏེ་མན་ངག་མང་པོ་ཞུས་སོ། །རྭ་རྡོ་རྗེ་གྲགས་ཀྱིས་བལ་པོ་བྷ་རོ་བསྟེན། བལ་པོ་ཐུགས་རྗེ་ཆེན་པོ་ཡང་སྤྱན་དྲངས་ཏེ་གཤེད་སྐོར་དང་ཧེ་རུ་ཀ་མངོན་འབྱུང་གི་སྐོར་སོགས་བསྒྱུར། དེའི་དབོན་པོ་ཆོས་རབ་ཀྱིས་པཎྜི་ཏ་ས་མནྟ་ཤྲཱི་སྤྱན་དྲངས་ཏེ་དུས་འཁོར་སོགས་བསྒྱུར། ཞང་ཤེས་རབ་བླ་མས་པཎྜི་ཏ་ཨ་མོ་གྷ་བཛྲ་སྤྱན་དྲངས་ཏེ་ཆོས་མང་པོ་བསྒྱུར། རྒྱུས་ལོ་ཙཱ་བ་སྨོན་ལམ་གྲགས་ཀྱིས་པཎྜིཏ་གཞན་ལ་ཕན་པ་བསྟེན་ཏེ་སྡོམ་འབྱུང་སོགས་བསྒྱུར། ལོ་ཙཱ་བ་ཞ་མ་སེང་རྒྱལ་གྱིས་པཎྜིཏ་ནོར་བཟང་སྲུང་བ་ལ་སོགས་པ་བསྟེན་ནས་ཚད་མ་ཀུན་ལས་བཏུས་པ་རྩ་འགྲེལ་སོགས་བསྒྱུར་རོ།།
རྔོག་ལེགས་པའི་ཤེས་རབ་ཀྱི་དབོན་པོ་རྔོག་ལོ་ཙཱ་བ་བློ་ལྡན་ཤེས་རབ་ནི། ལོ་ཆེན་རིན་ཆེན་བཟང་པོ་ལོ་ལྔ་བཅུ་རྩ་བཞིའི་ཐོག་ནག་ཚོ་ལོ་ཙཱ་བ་འཁྲུངས། ནག་ཚོ་ལོ་བཞི་བཅུ་ཞེ་དགུའི་ཐོག་ (སྤྱི་ལོ་ ༡༠༥༩) རྔོག་ལོ་བློ་ལྡན་ཤེས་རབ་འཁྲུངས་པ་ཡིན་གསུངས། ཁོང་གཞོན་ནུའི་དུས་ནས་ཁུ་བོ་ལེགས་པའི་ཤེས་རབ་ཀྱི་དྲུང་ནས་ཡོན་ཏན་ལ་སྦྱངས། ཁོང་ཤེས་རབ་མཆོག་ཏུ་གྱུར་པ་དེ་ལ་ཁུ་བོ་མཉེས་ནས་ལོ་བཅུ་བདུན་ལོན་ཚེ་ཁ་ཆེར་སློབ་གཉེར་ལ་བརྫངས། དེའི་ཚེ་རྭ་ལོ། གཉན་ལོ། ཁྱུང་པོ་ཆོས་བརྩོན། རྔོ་སྟོན། བཙན་ཁ་བོ་ཆེ་རྣམས་དང་འགྲོགས་ནས་ཁ་ཆེར་བྱོན། པཎྜི་ཏ་དྲུག་ཙམ་བསྟེན་ནས་སློབ་གཉེར་གནང༌། བར་སྐབས་སུ་རྒྱགས་ཆད་ནས་མངའ་རིས་སུ་གསེར་སློང་བའི་ཡི་གེ་བཏང༌། རྩེ་ལྡེའི་སྲས་དབང་ལྡེས་གསེར་མང་པོ་བསྐུར། ཚད་མ་རྒྱན་སྒྱུར་ཅིག་ཅེས་བསྐུལ་བས་པཎྜི་ཏ་སྐལ་ལྡན་རྒྱལ་པོ་དང་ཁོང་གཉིས་ཀྱིས་ལེགས་པར་བསྒྱུར། ཁ་ཆེར་ལོ་བཅུ་བདུན་དུ་ཡང་དག་པར་སྦྱངས་ནས་སླར་བོད་དུ་ཕེབས། བོད་དུ་ཡངཔཎྜི་ཏ་འབུམ་ཕྲག་གསུམ་པ་དང་སུ་མ་ཏི་ཀཱིརྟིཿགཉིས་ལ་ཡང་ཆོས་གསན་ཞིང༌། ཡང་བལ་པོར་བྱོན་ཏེ། ཨ་ཏུ་ལྱ་བཛྲ་དང་བ་རེནྡྲར་རུ་ཙི་ལ་སོགས་པ་ལ་གདམས་པ་མང་པོ་གསན། སླར་བོད་དུ་བྱོན། འགྱུར་མང་པོ་མཛད་པ་ཡང་དག་ཅིང་ཤིན་ཏུ་བཟང༌། འགྱུར་མཛད་པའི་ཚད་ནི་གྲོ་ལུང་བའི་གསུང་ལས། དམ་ཆོས་བསྒྱུར་ལ་མངའ་བརྙེས་པས། །རྒྱལ་ཡུམ་གཉིས་དང་བསྟན་བཅོས་གཞུང༌། །འབུམ་ཕྲག་གཅིག་དང་ཁྲི་ཕྲག་གསུམ། །སྟོང་ཕྲག་བདུན་ནི་ལྷག་བཅས་བསྒྱུར། །ཞེས་པ་ལྟར་རོ། །ཚད་མ། བྱམས་ཆོས། དབུ་མ་སོགས་ཀྱི་རྣམ་བཤད་སོགས་གསུང་རྩོམ་མང༌། སློབ་མ་བུ་ཆེན་བཞི་སོགས་ཤིན་ཏུ་མང༌། བུ་ཆེན་བཞི་ནི། ཞིང་ཚེ་སྤོང་བ་ཆོས་ཀྱི་བླ་མ། ཞིང་གྲོ་ལུང་བ་བློ་གྲོས་འབྱུང་གནས། ཁྱུང་རིན་ཆེན་གྲགས། འབྲི་ཤེས་རབ་འབར་བཞིའོ།།
གྲོ་ལུང་བ་བློ་གྲོས་འབྱུང་གནས་ཀྱི་སློབ་མ་ཆ་བ་ཆོས་ཀྱི་སེང་གེ་ནི་རབ་བྱུང་གཉིས་པའི་ཆུ་མོ་ལུག་ (སྤྱི་ལོ་ ༡༡༠༩) ལ་འཁྲུངས། ཁྱུང་རིན་གྲགས་ཀྱི་སློབ་མ་རྒྱ་དམར་བ་དང་གྲོ་ལུང་བ་ཆེན་པོ་ལ་སོགས་པ་བླ་མ་དུ་མ་བསྟེན། ལུང་རིགས་ཀྱིས་སྒྲོ་འདོགས་བཅད། གཙང་ནེའུ་ཐོག་གི་གདན་ས་ལོ་བཅོ་བརྒྱད་ཀྱི་བར་དུ་མཛད། ཚད་མ་རྣམ་ངེས་ལ་སོགས་པའི་གཞུང་མང་པོ་ལ་འགྲེལ་པ་བརྩམས། མདོ་སྡེ་བའི་རིགས་པ་ལ་བསྟེན་པའི་བསྡུས་གྲྭ་ཞེས་པའི་རིགས་ལམ་གྱི་སྲོལ་འབྱེད་པ་པོ་ཡང་སློབ་དཔོན་འདི་ཡབ་སྲས་ཡིན་ཟེར། ཚད་མའི་བསྡུས་པ་ཡིད་ཀྱི་མུན་སེལ་རྩ་འགྲེལ་ལ་སོགས་པའི་རང་གཞུང་མང་དུ་བརྩམས། སྙན་གྲགས་ཀྱི་གདུགས་དཀར་པོ་བླ་ན་འཁོར་བ་དེའི་སྲས་ཀྱི་གཙོ་བོ་སེང་ཆེན་བརྒྱད་དུ་གྲགས་པ་ནི། གཙང་ནག་པ་བརྩོན་འགྲུས་སེང་གེ། དན་འབག་པ་སྨྲ་བའི་སེང་གེ། འབྲུ་ཤ་བསོད་ནམས་སེང་གེ། རྨ་བྱ་རྩོད་པའི་སེང་གེ། རྩགས་དབང་ཕྱུག་སེང་གེ། ཉིང་བྲན་ཆོས་ཀྱི་སེང་གེ། ལྡན་མ་དཀོན་མཆོག་སེང་གེ། གཉལ་བ་ཡོན་ཏན་སེང་གེ་སྟེ་བརྒྱད། འཁོན་ཇོ་སྲས་ (ས་སྐྱ་དཀར་པོ་རྣམ་གསུམ་གྱི་གཉིས་པ་ས་སྐྱ་སློབ་དཔོན་བསོད་ནམས་རྩེ་མོ་ཡིན་ལ་ཁོང་གཙང་ནེའུ་ཐོག་གི་གྲྭ་སར་ལོ་བཅུ་གཅིག་ལ་བཞུགས་གསུངས་)། རྔོག་ཇོ་སྲས་ར་མོ། ཁུ་ཇོ་སྲས་ནེ་ཙོ། གཉོས་ཇོ་སྲས་དཔལ་ལེ་དང་བཞི་ལ་ཇོ་སྲས་བཞི་ཟེར། (ཇོ་སྲས་རྣམས་གོས་སྦུ་གུ་ཅན་དེ་རབ་བྱུང་མིན་འདུག) འགར་བ་དབང་གྲུབ། ཀོང་པོ་འཇག་ཆུང༌། ལྷོ་བ་སྒོག་ཟན། བར་ཕུ་བ་དང་བཞི་ལ་ཤེས་རབ་ཅན་བཞི་ཟེར། གཞན་ཡང་འཛད་པ་སྟོན་སྐྱབས་དང་རྡོ་རྗེ་འོད་ཟེར་ལ་སོགས་པ་དང༌། ཀརྨ་དུས་གསུམ་མཁྱེན་པ་ཡང་སློབ་མ་ཡིན། ཁོང་ནེའུ་ཐོག་གི་གྲྭ་སར་ལོ་དགུར་བཞུགས། གཞན་ཡང་བླ་མ་ཞང་ཚལ་པ་ལ་སོགས་པ་སློབ་མ་ཤིན་ཏུ་མང་ངོ༌། །ཡང་ཡར་འབྲོག་གི་མར་པ་དོ་བ་ཆོས་ཀྱི་དབང་ཕྱུག་གིས་ཀྱང་གཞུང་མང་པོ་བསྒྱུར། དཔྱལ་ལོ་ཙཱ་བ་ཆོས་ཀྱི་བཟང་པོ་རྒྱ་གར་དུ་ལོ་བཅུར་བཞུགས། བླ་མ་རྡོ་རྗེ་གདན་པ་དང་ཁ་ཆེ་པཎ་ཆེན་སོགས་བསྟེན། ཆོས་མང་པོ་བསྒྱུར། ཁྲོ་ཕུ་ལོ་ཙཱ་བ་བྱམས་པ་དཔལ་གྱིས་སྔ་ཕྱིར་ཤྲིའ་ཛཱ་ག་ཏ་མི་ཏྲ་ཨཱ་ནནྡ་ཞེས་པ་མི་ཏྲ་ཛོ་གི་ཞེས་གྲགས་པ་དང་པཎྜི་ཏ་བུད་དྷ་ཤྲིའ་ཛྙཱ་ན། ཁ་ཆེ་པཎ་ཆེན་ཤཱཀྱ་ཤྲིའ་བྷ་དྲ་རྣམས་སྤྱན་དྲངས་ཏེ་གཞུང་མང་པོ་བསྒྱུར། པཎ་ཆེན་ཤཱཀྱ་ཤྲིའ་ལ་འཁོར་པཎ་ཆུང་བི་བྷུ་ཏི་ཙནྡྲར་དང་ད་ན་ཤིའ་ལ་དང་བལ་པོ་སཾ་གྷ་ཤྲིའ་དང་སུ་ག་ཏ་ཤྲིའ་ལ་སོགས་པ་དགུ་བྱོན་ཏེ། བི་བྷུ་ཏི་དང་ད་ན་ཤིའ་ལ་གཉིས་བོད་དུ་ཡུན་རིང་པོར་བཞུགས། བོད་ཀྱི་སྐད་ཡིག་ལ་ཡང་མཁས་པར་གྱུར་ནས་རང་འགྱུར་ཡང་མཛད་དོ། །ཆག་དགྲ་བཅོམ་དང་དེའི་དབོན་པོ་ཆག་ཆོས་རྗེ་དཔལ་གཉིས་ཀྱང་རྒྱ་གར་དུ་བྱོན་པཎྜི་ཏ་མང་པོ་བསྟེན་ནས་སློབ་གཉེར་གནང༌། གསར་འགྱུར་དང་འགྱུར་བཅོས་མང་པོ་བྱས་སོ།།
གཡུ་ཐོག་གསར་མ་ཡོན་ཏན་མགོན་པོའང་རྒྱ་གར་དུ་ལན་དྲུག་ཕེབས། སྨན་དང་རིག་གནས་སྤེལ་བའི་ལོ་རྒྱུས་ལོགས་སུ་བྲིས་ཡོད་ལ། ཕྱིས་སུ་བྱང་ཟུར་རྣམ་གཉིས་ཀྱིས་ཀྱང་གསོ་རིག་རྒྱ་ཆེར་སྤེལ་བའི་ལོ་རྒྱུས་ལོགས་སུ་འབྲི་འདུན་ཡོད་དོ།།
ས་སྐྱ་པཎ་ཆེན་ནི་རབ་བྱུང་གསུམ་པའི་ཆུ་སྟག་ (སྤྱི་ལོ་ ༡༡༨༩) ལ་འཁྲུངས། ཁ་ཆེ་པཎ་ཆེན་དང་ད་ན་ཤིའ་ལ་ལས་སྒྲ་དང་རྣམ་འགྲེལ་བསླབས་ཏེ་རྣམ་འགྲེལ་ལ་འགྱུར་བཅོས་བྱས། མཁས་པ་ཆེན་པོར་གྱུར་ནས་ཆོས་མ་དག་པ་སུན་ཕྱུང་ངོ༌། །ཁོང་གིས་རིག་གནས་སྦྱངས་པ་ནི། རྣམ་ཐར་ལས། སྡེབ་སྦྱོར་རིན་ཆེན་འབྱུང་གནས་དང༌། །དམར་སེང་དངནི་རྒྱལ་བའི་ལྷ། །བདེ་བར་གཤེགས་པའི་དཔལ་ལ་ཐོས། །རྒྱན་གྱི་བསྟན་བཅོས་དཎྜི་དང༌། །དབྱངས་ཅན་མགུལ་རྒྱན་ལ་སོགས་པ། །དགེ་འདུན་དཔལ་ལ་ལེགས་པར་བསླབས། །མངོན་བརྗོད་བསྟན་བཅོས་འཆི་མེད་མཛོད། །དེ་ཡི་རྒྱ་ཆེར་འགྲེལ་བ་བཅས། །མཁས་པ་གསུམ་ལ་ལེགས་པར་གཏུགས། །ནག་མོ་ཁོལ་གྱི་སྙན་ངག་གསུམ། །བདེ་བར་གཤེགས་པའི་དཔལ་གྱིས་བཤད། །བྱང་ཆུབ་སེམས་དཔའི་སྐྱེ་བའི་རབས། །བདག་ཉིད་ཆེན་པོ་གཉིས་ལས་ཐོས། །ཞེས་སོགས་གསུངས། འདི་དག་གི་གཞུང་ནི་དེ་སྐབས་བོད་དུ་མ་འགྱུར་བས་ལེགས་སྦྱར་གྱི་ཡི་གེའི་སྟེང་ནས་བསླབས་ཏེ་དར་བར་མཛད་ནའང་དེ་དག་གི་གཞུང་ཡོངས་རྫོགས་བསྒྱུར་པ་ནི་མེད་དོ། །ཁོང་གི་གསུང་རིག་གནས་ལ་ཡང་དམ་པའི་ཆོས་ཀྱི་ལམ་སྟོན་པ། ས་སྐྱའི་ལེགས་བཤད། སྒྲ་འཇུག སྒྲ་ཉེ་བར་བསྡུ་བ། སྡེབ་སྦྱོར་མེ་ཏོག་ཆུན་པོ། ཚིག་གཏེར། རོལ་མོའི་བསྟན་བཅོས། ཤེས་རབ་འཕྲོ་བ། ཤེས་རབ་ལ་འཇུག་པ། མཁས་འཇུག སྙན་ངག་མཁས་པའི་ཁ་རྒྱན། ཟློས་གར་རབ་དགའི་འཇུག་པ། སྐུ་གཟུགས་ཀྱི་བསྟན་བཅོས། བཟོའི་བསྟན་བཅོས། ས་བརྟག་པ། བསྟན་རྩིས། སྨན་དཔྱད་བསྡུས་དོན། སྨྲ་སྒོའི་བསྡུས་དོན། ཡི་གེའི་སྦྱོར་བ། བྱིས་འཇུག་འགྲེལ་བ། རིགས་གཏེར་སོགས་དང་གཞན་ཡང་མདོ་སྔགས་ཀྱི་བསྟན་བཅོས་མང་པོ་བརྩམས་སོ།།
ཤོང་ལོ་ཙཱ་བ་རྡོ་རྗེ་རྒྱལ་མཚན་ནི། བལ་ཡུལ་དུ་བྱོན་ནས་པཎྜི་ཏ་མ་ཧེན་དྲ་བྷ་དྲ་ལོ་ལྔར་བསྟེན་ནས་རིག་གནས་ཆུང་བ་ལྔ་ལ་བསླབས། ཁྱད་པར་སྒྲ་རིག་པ་ལ་ཤིན་ཏུ་བྱང་བར་མཛད། པཎྜི་ཏ་ལ་ཥ་ཤྲིའ་སྤྱན་དྲངས་ཏེ་སྙན་ངག་མེ་ལོང༌། དཔག་བསམ་འཁྲི་ཤིང༌། ཀླུ་ཀུན་ཏུ་དགའ་བའི་ཟློས་གར། བསྟོད་པ་བརྒྱ་བ། དུས་འཁོར་སོགས་འགྱུར་དང་འགྱུར་བཅོས་ཀྱང་མཛད་དེ་རིག་པའི་གནས་ཤིན་ཏུ་དར་བར་མཛད། དེའི་གཅུང་པོ་ཤོང་བློ་གྲོས་བརྟན་པས་ཀྱངའགྱུར་དང་འགྱུར་བཅོས་ཀྱང་བྱས། ཡར་ལུང་གྲགས་པ་རྒྱལ་མཚན་གྱིས་བྱ་བ་བསྡུས་པ་ལ་སོགས་པ་བསྒྱུར་ཏོ། །བུ་སྟོན་རིན་པོ་ཆེའི་བླ་མ་ཉི་མ་རྒྱལ་མཚན་བཟང་པོས་བལ་པོར་ལོ་བཅུ་བཞིར་སྦྱངས་པ་མཛད། རིའི་ཀུན་ཏུ་དགའ་བའི་མདོ་ལ་སོགས་པ་ལོ་བཅུ་གསུམ་ཙམ་ལ་པཎྜི་ཏ་ཨཱནནྡ་སྤྱན་དྲངས་ཏེ་བསྒྱུར་བ་དང་གཞན་ཡང་འགྱུར་དང༌། འགྱུར་བཅོས་ཀྱང་མང་པོ་མཛད་དོ།།
ཤོང་ལོའི་སློབ་མ་དཔང་ལོ་ཙཱ་བ་བློ་གྲོས་བརྟན་པ་ནི་རབ་བྱུང་ལྔ་པའི་མེ་བྱི་ (སྤྱི་ལོ་ ༡༢༧༦) ལ་ལ་སྟོད་ལྷོ་རུ་འཁྲུངས། གཞོན་དུས་ནས་སྟག་སྡེ་བ་སོགས་བཤེས་གཉེན་དུ་མ་བསྟེན་ནས་རིག་གནས་དུས་འཁོར་སོགས་ལ་སྦྱངས། ལོ་བཅུ་དགུའི་ཐོག་ལོ་ཙཱ་བ་མཆོག་ལྡན་ལས་སྒྲ་ཀ་ལཱ་པ་དང་ཙན་དྲ་བ་བསླབས། སྙན་ངག་མེ་ལོང་ཡང་གསན། ཨ་ཙ་ར་འཕྲད་ཚད་ལ་འཕྲལ་སྐད་བསླབས། ཡུད་ཙམ་གྱིས་ཞུ་ཆེན་གྱི་ལོ་ཙཱ་བར་གྱུར། བལ་པོར་ལན་གསུམ་བྱོན། རིག་གནས་དང་སྔགས་མཚན་ཉིད་ཀྱི་གཞུང་ཤིན་ཏུ་མང་པོ་ལ་འགྱུར་དང་འགྱུར་བཅོས་མཛད། གཞུང་མང་པོའི་ཊིའཀ་ཡང་མང་དུ་བརྩམས། ཐུགས་རབ་ཤིན་ཏུ་ཆེ་སྟེ་ཁོང་གི་གསུང་ལས། སྔོན་ཚེ་སྦྱངས་པས་སྐྱེ་བ་འདིར། །གཞུང་རྣམས་རྩེད་མོའི་ཞར་ལ་ཤེས། །ཤོང་སྟོན་ལེགས་བཤད་ལྡེ་མིག་བླངས། །ལེགས་སྦྱར་སྐད་ཀྱི་གཏེར་ཁ་ཕྱེ། །སྣ་ཚོགས་གཞུང་ལུགས་རིན་ཆེན་བླངས། །ལེགས་བཤད་དགའ་སྟོན་འབྱེད་ལ་དབང༌། །ཞེས་གསུངས་པ་དང༌། མདོར་ན། ཁོང་ཞལ་བཞུགས་པའི་ཚེ་ཁོང་ལས་མགོ་འཕང་མཐོ་བའི་མཁས་པ་སུ་ཡང་མེད་ཟེར། དེའི་དབོན་པོ་ལོ་ཙཱ་བ་བྱང་ཆུབ་རྩེ་མོས་ཀྱང་བསྒྱུར་བཤད་སོགས་ཀྱིས་ཁུ་བོའི་ལུགས་ལེགས་པར་བསྐྱངས་སོ།།
བུ་སྟོན་རིན་པོ་ཆེ་ནི་རབ་བྱུང་ལྔ་པའི་ལྕགས་སྟག་ (སྤྱི་ལོ་ ༡༢༩༠) ལ་འཁྲུངས། དང་པོར་ཐར་པ་ལོ་ཙཱ་བ་ལས་ཙན་དྲ་བ་བསླབས་ནས་ལོ་ཙཱ་མཁས་པར་མཁྱེན། བླ་མ་རྡོ་རྗེ་རྒྱལ་མཚན་སོགས་ཀྱི་མདུན་ནས་དུས་འཁོར་སོགས་མདོ་རྒྱུད་མཐའ་ཡས་པ་གསན། རྩིས་སོགས་ལའང་ལེགས་པར་སྦྱངས། དབང་མདོར་བསྟན་གྱི་འགྲེལ་བ་སུམ་བརྒྱ་དྲུག་ཅུ་བ་ཡང་བསྒྱུར། དུས་འཁོར་ཤོང་འགྱུར་ལ་འགྱུར་བཅོས་མང་དུ་གནང༌། བོད་དུ་འགྱུར་བའི་གཞུང་མཐའ་དག་ལ་ཞིབ་བརྟག་མཛད། ཆོས་འབྱུང་རིན་པོ་ཆེ་དང་རྩིས་གཞུང་མཁས་པ་དགའ་བསྐྱེད་སོགས་གསུང་རྩོམ་པོད་སུམ་ཅུར་ཉེ་བབ་རྩམས། འདི་བའི་གསུང་འབུམ་གྱི་པར་སྔར་མེད་ལ་རྒྱལ་དབང་བཅུ་གསུམ་པའི་རིང་ལ་རྩེ་པོ་ཏ་ལའི་ཤོད་དུ་པར་གསར་བཞེངས་གནང་སྐབས་དགེ་བཤེས་རིན་པོ་ཆེ་འབྲས་སྒོ་ཤེས་རབ་རྒྱ་མཚོས་ཞུ་ཆེན་མཛད་དོ། །བུའི་སློབ་མ་ལོ་ཙཱ་བ་རིན་ཆེན་རྣམ་རྒྱལ་ (སྒྲ་ཚད་པ་རིན་ཆེན་རྣམ་རྒྱལ་ཡང་ཟེར་) གྱིས་ཀྱང་འགྱུར་དང་འགྱུར་བཅོས་འཆད་སྤེལ་སོགས་ཀྱི་སྒོ་ནས་བུ་རིན་པོ་ཆེའི་རྒྱུན་བསྐྱངས་སོ། །གཞན་ཡང་སྣར་ཐང་ལོ་ཙཱ་བ་སཾ་གྷ་ཤྲིའ། ཞ་ལུ་ལོ་ཆེན་ཆོས་སྐྱོང་བཟང་པོ་ (དག་ཡིག་ཟ་མ་ཏོག་རྩོམ་པ་པོ་)། སྐྱོགས་སྟོན་ལོ་ཙཱ་བ་ངག་དབང་རིན་ཆེན་བཀྲ་ཤིས་ (སྨིན་གྲུབ་ལོ་ཙཱ་བ་ཡང་ཟེར་ལ་ལི་ཤིའི་གུར་ཁང་རྩོམ་པ་པོ་ཡིན)། ལོ་ཆེན་སྐྱབས་མཆོག་དཔལ། སྟག་ལོ་ཤེས་རབ་རིན་ཆེན་སོགས་རིག་གནས་རྒྱ་མཚོའི་ཕྲེང་བ་འཛིན་པའི་ལོ་ཙཱ་བ་དང་མཁས་པ་ཤིན་ཏུ་མང་པོ་བྱུང་མོད་ཐམས་ཅད་བརྗོད་ཀྱིས་མི་ལང་ངོ༌།།
ཁྱད་པར་དུ་རྗེ་ཙོང་ཁ་པ་བློ་བཟང་གྲགས་པའི་དཔལ་བྱོན་ནས་མདོ་སྔགས་རིག་གནས་ཀྱི་བཤད་སྒྲུབ་ལྷག་པར་འཕེལ་ཏེ༑ བོད་ཡུལ་འདིར་སློབ་གཉེར་བས་ས་སྟེང་ཁྱབ་པ་བྱུང༌། ཁོང་ཤར་ཕྱོགས་ཙོང་ཁའི་ཡུལ་དུ་རབ་བྱུང་དྲུག་པའི་མེ་བྱ་ (སྤྱི་ལོ་ ༡༣༥༧) ལ་སྐུ་འཁྲུངས། དགུང་ལོ་གསུམ་བཞེས་པ་ན་ཀརྨ་པ་རོལ་བའི་རྡོ་རྗེ་ལས་དགེ་བསྙེན་བསྒྲུབས་ཏེ། མཚན་ཀུན་དགའ་སྙིང་པོར་གསོལ། དགུང་ལོ་བརྒྱད་པའི་དུས་ཤར་ཕྱོགས་རིག་པའི་དཔའ་བོ་ཞེས་གྲགས་པའི་མཁས་པ་ཆེན་པོ་ཆོས་རྗེ་དོན་འགྲུབ་རིན་ཆེན་ལས་རབ་བྱུང་དང་དགེ་ཚུལ་གྱི་སྡོམ་པ་བཞེས་ཏེ་བློ་བཟང་གྲགས་པ་ཞེས་པའི་མཚན་གསོལ། བླ་མ་དེ་ཉིད་ལས་ཀློག་དང་རིག་གནས་མདོ་སྔགས་ཀྱི་གདམས་པ་མང་དུ་གསན་ནས། དགུང་ལོ་བཅུ་དྲུག་གི་ཐོག་བོད་དུ་བྱོན། དམ་པ་ཆེན་པོས་གཞན་དོན་བྱེད་པ་ལ་རིག་གནས་མཐའ་དག་སྦྱང་དགོས་དགོངས་ནས་ཚལ་གུང་ཐང་ནས་ཚེ་ཡི་རིག་བྱེད་པ་དཀོན་མཆོག་སྐྱབས་ལས་གསོ་དཔྱད་ཀྱི་གཞུང་ལ་སྦྱངས་ཤིང༌། ཡན་ལག་བརྒྱད་པ་ཐུགས་ལ་བཟུང༌། ལོ་ཙཱ་བ་ནམ་མཁའ་བཟང་པོ་ལས་སྙན་ངག་མེ་ལོང་སོགས་བསླབས། བོ་དོང་ལོ་ཆེན་ཞམ་བཟང་བ་ལས་སྒྲ་ཀ་ལཱ་པ་དང༌། སྒྲ་ཙནྡྲར་པ་དང༌། སྡེབ་སྦྱོར་སོགས་ལ་སྦྱངས། ས་བཟང་མ་ཏི་པཎ་ཆེན་སོགས་ལས་ཀྱང་བསླབས། ཚལ་པ་རྟོགས་ལྡན་ཡེ་ཤེས་རྒྱལ་མཚན་ལས་རྩིས་ཀྱི་ལག་ལེན་མཐར་ཕྱིན་པར་སྦྱངས་སོ།།
རིག་གནས་ཆེ་བ་ལྔའི་ཡ་གྱལ་ཚད་མ་རིག་པ་ལ་ཐོས་པ་མཛད་ཚུལ་ནི། རྗེ་བཙུན་བླ་མ་དམ་པ་རེད་མདའ་བ་དང༌། ལོ་ཙཱ་བ་དོན་བཟང་ལས་ཚད་མའི་གཞུང་རྣམས་ལེགས་པར་གསན་ཏེ་སྡེ་བདུན་མདོ་དང་བཅས་པ་རྣམས་ལ་གཟིགསརྟོག་མཛད་ཅིང༌། གུང་བསྒྲིགས་ནས་ལེགས་པར་གཏན་ལ་ཕབ། བོད་ཀྱི་བཤད་སྲོལ་ཕལ་ཆེར་འགྲེལ་བ་དང་མི་མཐུན་པར་གཟིགས་ནས། ཚད་མ་ཀུན་ལས་བཏུས་ཀྱི་རང་འགྲེལ་འགྲེལ་བཤད་དང་བཅས་པ་དང༌། རྣམ་འགྲེལ་གྱི་འགྲེལ་བ་ལྷོ་ཤཱཀ་གཉིས་དང༌། བྲམ་ཟེ་གཉིས་ཀྱི་འགྲེལ་པ་དང༌། རྒྱན་གྱི་འགྲེལ་པ་དང༌། དེའི་འགྲེལ་བཤད་གཉིས་དང༌། རྣམ་ངེས་རང་འགྲེལ་དང༌། དེའི་འགྲེལ་བཤད་སོགས་ཆོས་མཆོག་གིས་མཛད་པ་དང༌། རིགས་ཐིགས་ཀྱི་འགྲེལ་པ་ཆོས་མཆོག་གིས་མཛད་པ་སྟེ། འགྲེལ་པ་འགྲེལ་བཤད་གཞུང་ཕྲན་དང་བཅས་པ་ལེགས་པར་གཏན་ལ་ཕབ་ནས་ཐུགས་སྦྱང་མཛད་པསད་པྱིས་ཕྱིན་པར་ཐུགས་སུ་ཆུད་དོ།།
ནང་དོན་རིག་པའི་ནང་ཚན་ཕར་ཕྱིན་ལ་ཐོས་པ་མཛད་ཚུལ་ནི། ཆོས་གྲྭ་ཆེན་པོ་བདེ་བ་ཅན་དུ་བྱོན་ནས། སྙེཐང་པ་བཀྲ་ཤིས་སེང་གེ་དང༌། སློབ་དཔོན་ཡོན་ཏན་རྒྱ་མཚོ། བླ་མ་རིན་པོ་ཆེ་ཨུ་རྒྱན་པ་རྣམས་ལས་མངོན་པར་རྟོགས་པའི་རྒྱན་རྩ་འགྲེལ་དང་བཅས་པ་གསན་པ་དང༌། བླ་མ་འཇམ་རིན་པ་ལས་ཀྱང་བྱམས་ཆོས་རྒྱུད་བླ་མ། མདོ་སྡེ་རྒྱན་དབུས་མཐའ་རྣམ་འབྱེད། ཆོས་ཉིད་རྣམ་འབྱེད་རྣམས་གསན་པ་དང༌། ཉ་དཔོན་ཀུན་དགའ་དཔལ་བའི་དྲུང་ནས་ཕར་ཕྱིན་གྱི་གཟབ་བཤད་ཚར་གཅིག་གསན་པས་ཐུགས་ཡིད་ཤིན་ཏུ་ཚིམ་པ་བྱུང་བ་དང༌། གཞན་ཡང་མངོན་རྟོགས་རྒྱན་གྱི་འགྲེལ་པ་འགྲེལ་བཤད་ཤིན་ཏུ་མང་པོ་ལ་སྦྱངས་པས་མཁས་པའི་མཐར་སོན་ཏེ་འགྲེལ་པ་ལེགས་བཤད་གསེར་གྱི་ཕྲེང་བ་ལྗགས་རྩོམ་མཛད་དོ།།
ནང་དོན་རིག་པའི་གཞུང་དབུ་མ་ལ་སྦྱངས་པ་མཛད་ཚུལ་ནི། རྗེ་བཙུན་རེད་མདའ་བ་སོགས་ཀྱི་མདུན་ནས། ཀླུ་སྒྲུབ་ཀྱི་རིགས་ཚོགས་དྲུག་རྩ་འགྲེལ་དང་བཅས་པ་དང༌། དབུ་མ་བཞི་བརྒྱ་པ་རྩ་འགྲེལ། དབུ་མ་འཇུག་པ་རྩ་འགྲེལ་སོགས་ཀླུ་སྒྲུབ་ལུགས་ཀྱི་གཞུང་མཐའ་དག་ལ་སྦྱངས་པས་དགོངས་པ་མཐར་ཐུག་པ་ཐུགས་སུ་ཆུད་ནས། དབུ་མའི་རྣམ་བཤད་དགོངས་པ་རབ་གསལ། རྩ་ཤེ་ཊིའ་ཀ་ཆེན་དྲང་ངེས་ལེགས་བཤད་སྙིང་པོ་སོགས་མཛད་དོ།།
གཞན་ཡང༌། ནང་དོན་རིག་པའི་སྡེ་སྣོད་འདུལ་མངོན་དང་གསང་སྔགས་ལ་སྦྱངས་ཤིང་ཉམས་སུ་བླངས་པས། མཁྱེན་རྟོགས་ཀྱི་རྒྱ་མཚོ་བརྡོལ། སྙན་གྲགས་ཀྱིས་འཛམ་གླིང་ཁྱབ་སྟེ་རབ་བྱུང་བདུན་པའི་ས་གླང་ (སྤྱི་ལོ་ ༡༤༠༩) ལ་དགའ་ལྡན་རྣམ་པར་རྒྱལ་བའི་གླིང་ཕྱག་འདེབས་མཛད་དོ།
རྗེའི་གདན་ས་དགའ་ལྡན་ནི། རྒྱལ་ཚབ་དར་མ་རིན་ཆེན་ནས་བཟུང་སྟེ། དགའ་ལྡན་ཁྲི་པ་རིམ་བྱོན་གྱིས་བསྐྱངས་པ་ལས། རྗེ་རིན་པོ་ཆེ་ལ་སྤྲུལ་སྐུ་བླུ་བའི་སྲོལ་མ་བྱུང༌། རྗེའི་སློབ་མ་འཇམ་དབྱངས་ཆོས་རྗེས་རབ་བྱུང་བདུན་པའི་མེ་སྤྲེལ་ (སྤྱི་ལོ་ ༡༤༡༦) ལ་འབྲས་སྤུངས་བཏབ། བྱམས་ཆེན་ཆོས་རྗེས་རབ་བྱུང་བདུན་པའི་ས་ཕག་ (སྤྱི་ལོ་ ༡༤༡༩) ལ་སེ་ར་བཏབ། པཎ་ཆེན་དགེ་འདུན་གྲུབ་ཀྱིས་རབ་བྱུང་བརྒྱད་པའི་མེ་ཡོས་ (སྤྱི་ལོ་ ༡༤༤༧) ལ་བཀྲ་ཤིས་ལྷུན་པོ་བཏབ། དགོན་ཆེན་འདི་བཞི་ལ་གདན་ས་ཆེན་པོ་བཞི་ཟེར་རོ།།
པཎ་ཆེན་དགེ་འདུན་གྲུབ་ཀྱི་གདན་ས་བཀྲ་ཤིས་ལྷུན་པོར་ཡང་དེ་སྐབས་སྤྲུལ་སྐུ་བླུ་རྒྱུའི་སྲོལ་མེད་སྟབས། གདན་ས་སྐྱོང་མཁན་པཎ་ཆེན་བཟང་པོ་བཀྲ་ཤིས། པཎ་ཆེན་ལུང་རིགས་རྒྱ་མཚོ། པཎ་ཆེན་ཡེ་ཤེས་རྩེ་མོ་རྣམས་རིམ་པར་བཞུགས། རྒྱལ་བ་དགེ་འདུན་རྒྱ་མཚོ་རབ་བྱུང་བརྒྱད་པའི་མེ་སྤྲེལ་ (སྤྱི་ལོ་ ༡༤༧༦) ལོར་སྐུ་འཁྲུངས། པཎ་ཆེན་ཡེ་ཤེས་རྩེ་མོའི་དུས་སུ། རྒྱལ་བ་དགེ་འདུན་རྒྱ་མཚོ་རྗེ་དགེ་འདུན་གྲུབ་ཀྱི་སྤྲུལ་སྐུ་ཡིན་རྒྱུ་བྱས་ནས་བཀྲ་ཤིས་ལྷུན་པོར་བཞུགས་པ་ལ། པཎ་ཆེན་ཡེ་ཤེས་རྩེ་མོས་ཕྲག་དོག་གི་རྣམ་པ་མཛད་པས་དེར་མ་བཞུགས་པར་འབྲས་སྤུངས་སུ་ཕེབས། མཁས་ཚུལ་ཆེས་ཆེར་བཞེས། འབྲས་སྤུངས་ཐམས་ཅད་མཁྱེན་པ་ཞེས་གྲགས་ཤིང་སྙན་གྲགས་རྒྱས། དེ་ནས་ཆོས་འཁོར་རྒྱལ་གྱི་དགོན་པ་བཏབ་ཅིང་འཕྲིན་ལས་ཤིན་ཏུ་རྒྱས་པའི་སྐབས། པཎ་ཆེན་ཡེ་ཤེས་རྩེ་མོས་ནན་ཏན་མཛད་པ་བཞིན་བྱོན་ནས་བཀྲ་ཤིས་ལྷུན་པོའི་གདན་སར་ལོ་ཁ་ཤས་ལ་བཞུགས། དེ་ནས་ཕྱིར་འབྲས་སྤུངས་སུ་ཕེབས། དགེ་ལུགས་པའི་སྤྲུལ་སྐུའི་ཐོག་མ་འདི་བ་ཡིན་ཟེར། དེ་ནས་བཀྲ་ཤིས་ལྷུན་པོའི་གདན་སར། མངའ་རིས་ཆོས་ལྷ་བཙུན་བསྟན་པའི་ཉི་མ་བཞུགས། དེ་ནས་པཎ་ཆེན་བློ་བཟང་ཆོས་རྒྱན་བར་དུ་གདན་རབས་བཅུ་སོང་ལ། པཎ་ཆེན་བློ་བཟང་ཆོས་ཀྱི་རྒྱལ་མཚན་བཀྲ་ཤིས་ལྷུན་པོའི་གདན་སར་སྐུ་མྱ་ངན་ལས་འདས་རེག་གི་བར་དུ་བཞུགས་པས། དེ་ནས་བཟུང་སྟེ་པཎ་ཆེན་སྐུ་ཕྲེང་རིམ་བྱོན་གྱིས་བཀྲ་ཤིས་ལྷུན་པོའི་གདན་ས་བཟུང་ངོ༌།།
པཎ་ཆེན་བློ་བཟང་ཆོས་རྒྱན་ནི། རབ་བྱུང་བཅུ་པའི་ལྕགས་རྟ་ (སྤྱི་ལོ་ ༡༥༧༠) ལ་འཁྲུངས། དབེན་ས་བ་བློ་བཟང་དོན་འགྲུབ་ཀྱིས་སྤྲུལ་སྐུར་ངོས་འཛིན་བྱས་ནས་བཀྲ་ཤིས་ལྷུན་པོར་སློབ་གཉེར་གནང་སྟེ་གཞོན་དུས་ནས་མཁས་ཆེན་དུ་གྱུར། དབེན་ས་པཎ་ཆེན་ཐམས་ཅད་མཁྱེན་པ་ཞེས་སྙན་གྲགས་ཀྱིས་ས་སྟེང་ཁྱབ། དགེ་ལུགས་པའི་སྤྲུལ་སྐུ་གཉིས་པ་འདི་བ་ཡིན་པར་གྲགས། སྤྱིར་སྤྲུལ་སྐུ་བླུ་བའི་ཐོག་མ་ཀརྨ་པཀྵི་ཆོས་ཀྱི་བླ་མ་ནས་བྱུང་ལ། དགེ་ལུགས་པའི་སྤྲུལ་སྐུའི་ཐོག་མ་རྒྱལ་བ་དགེ་འདུན་རྒྱ་མཚོ་དང༌། དེ་ནས་པཎ་ཆེན་བློ་བཟང་ཆོས་རྒྱན་ཡིན་འདུག་མོད། འོན་ཀྱང་དེ་རྣམ་པ་གཉིས་ཀའང་འབད་པས་བཙལ་ཏེ་ཨང་གྲངས་བསྒྲིགས་ནས་གསེར་བུམ་དཀྲུག་པ་ལྟ་བུ་དེང་དུས་ཀྱི་སྤྲུལ་སྐུ་ངོས་འཛིན་ལྟ་བུ་མིན་ཏེ། རྒྱལ་བ་དགེ་འདུན་རྒྱ་མཚོ་ནི་བྱིས་པའི་དུས་ནས་ལུང་རྟོགས་ཀྱི་ཡོན་ཏན་ཕྱིར་མངོན་པས། ཀུན་གྱིས་རྒྱལ་བ་དགེ་འདུན་གྲུབ་ཀྱི་སྐྱེ་བར་ཡིད་ཆེས་བྱས་པ་དང༌། པཎ་ཆེན་བློ་བཟང་ཆོས་རྒྱན་གྱིས་ཀྱང་བྱིས་པའི་དུས་ནས་ལུང་རྟོགས་ཀྱི་ཡོན་ཏན་ཕྱིར་མངོན་པས། དབེན་ས་བ་སངས་རྒྱས་ཡེ་ཤེས་ཀྱིས་དབེན་ས་བློ་བཟང་དོན་འགྲུབ་ཀྱི་སྐྱེ་བར་ངོས་བཟུང་ནས་སློབ་གཉེར་ལ་མཐུན་རྐྱེན་བསྒྲུབས་པས་ཕྱིས་སུ་མཁས་གྲགས་ཀྱིས་ས་སྟེང་ཁྱབ་པ་བྱུང་བ་གོང་སྨོས་ལྟར་རོ།།
ན་ནིང༌། (༡༩༨༠) ལོར་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་བོད་ལྗོངས་ནི་ཀྲུང་གོའི་ཆ་ཤས་ཤིག་ཡིན་ཞེས་པའི་དཔེ་དེབ་ཀྱི་ཤོག་གྲངས་བརྒྱ་བར་ “ཏཱ་ལའི་བླ་མ་ཡང་སྲིད་ཕེབས་པ་དེ་ན། ཙོང་ཁ་པས་གཏན་ལ་ཕབ་པ་ཞིག་རེད། ཙོང་ཁ་པས་སྲོལ་གཏོད་གནང་བའི་དགེ་ལུགས་པའི་བསྟན་པ་ལྟར་ན་གཉེན་བསྒྲིགས་ནས་བུ་རྒྱུད་སྤེལ་མི་ཆོག་པར་བརྟེན། ཁོང་གིས་སློབ་མ་ཆེན་པོ་གཉིས་ལ་ཡང་སྲིད་ཡོང་སྟེ་ཐེག་ཆེན་གྱི་ཆོས་ལུགས་བཤད་ནས་ཆོས་རྒྱུན་མི་ཆད་པའི་འགན་ལེན་བྱེད་དགོས་པའི་ཞལ་ཆེམས་གནང་ཡོད་པ་རེད།” ཅེས་བྲིས་འདུག །འདི་ནི་ནོར་བ་རེད། དེ་ལྟ་བུའི་ཞལ་ཆེམས་གཏན་ནས་མེད། རྗེ་ཙོང་ཁ་པ་ཡབ་སྲས་ཀྱི་རིང་ལ་དགེ་ལུགས་པར་སྤྲུལ་སྐུ་བླུ་བའི་སྲོལ་མེད། རྗེ་འདས་ནས། རྒྱལ་བ་དགེ་འདུན་རྒྱ་མཚོ་འཁྲུངས་པའི་བར་ལ་ལོ་ངོ་ང་དྲུག་སོང༌། རྗེ་འདས་ནས་པཎ་ཆེན་བློ་བཟང་ཆོས་རྒྱན་འཁྲུངས་པའི་བར་ལ་ལོ་ངོ་བརྒྱ་དང་ལྔ་བཅུ་སོང༌། “ཏཱ་ལའི་བླ་མའི་ཡང་སྲིད་ཕེབས་པ་ཙོང་ཁ་པས་གཏན་ལ་ཕབ་པ་རེད།” ཟེར་མཁན་གྱི་བཤད་ཚུལ་ལ་བལྟས་ན་རྒྱལ་བ་པཎ་ཆེན་གཉིས་རྗེ་ཙོང་ཁ་པའི་སྲས་ཀྱི་ཐུ་བོ་རྒྱལ་ཚབ་རྗེ་དང་མཁས་གྲུབ་རྗེའི་སྤྲུལ་སྐུ་རེད་སྙམ་པ་ཡིན་འདུག །དེ་ལྟ་བུའི་ནོར་འཁྲུལ་གྱི་གཏམ་སྔོན་དུས་ནས་རྒྱའི་ཡིག་ཐོག་ལ་ཡོད་ཟེར་བ་ཐོས་མྱོང༌།།
རྗེ་བདག་ཉིད་ཆེན་པོ་དེའི་སློབ་མ་ནི། བླ་མ་ཆོས་འབྲེལ་གསན་པ་བཞི། སྔ་ཚར་བཞི། འཁོར་དག་པ་རྣམ་བརྒྱད། སྲས་ཀྱི་ཐུ་བོ་གཉིས། འཁོར་ཁྱད་པར་དུ་འཕགས་པ་བཞི། ནང་ཐུགས་ཀྱི་སྲས་གཅིག འཕྲིན་ལས་ནམ་མཁའ་དང་མཉམ་པའི་བུ་ཆེན་བཞི། དབུས་གཙང་བསྟན་པའི་སྒྲོན་མེ་བཅུ། གཞན་དོན་ལྷུན་གྱིས་གྲུབ་པའི་སེམས་དཔའ་དྲུག མི་དབང་གཙུག་ན་མཛེས་པའི་ཏི་ཤྲཱི་གཉིས། རྒྱ་ཆེན་མང་དུ་ཐོས་པའི་དཔོན་སྲས་གཉིས། སྦྱངས་པའི་ཡོན་ཏན་འཛིན་པའི་ཅོག་ཆེ་ཆུང་གཉིས། རྣམ་དཔྱོད་ཕུལ་དུ་བྱུང་བའི་མཁས་པ་གཉིས། བསྟན་པ་ཕྱོགས་མཐར་སྤེལ་བའི་དར་ཆེན་དྲུག སྐད་གཉིས་སྨྲ་བའི་ལོ་ཙཱ་བ་གཉིས། ས་སྐྱོང་ཆོས་རྗེ་དྲུག གསུང་རབ་མང་དུ་མཁྱེན་པའི་བསྟན་འཛིན་བརྒྱད། མདོ་རོང་གི་མཁས་པ་བཞི། མཁའ་སྤྱོད་གྲུབ་པའི་གདུང་རྒྱུད་གཉིས། སྐྱེས་བུ་ཡ་མཚན་ཅན་གཉིས། སྤྱན་སྔ་བརྒྱད། ཁྲི་སྟེང་མཛེས་པའི་བླ་ཆེན་བཞི། ཚོགས་པ་སྐྱོང་བའི་མཁན་པོ་བཞི། སྡེ་དགོན་ཕྲ་མོའི་ཆེན་པོ་ལྔ། ཆོས་སྒོ་བ་གཉིས། འཆད་ཉན་གྱི་རྒྱལ་མཚན་སྒྲེང་བའི་སློབ་དཔོན་བཞི། རིགས་པ་སྨྲ་བའི་དཀའ་བཅུ་བ་བཞི། ཚིག་དོན་འཛིན་པའི་དཀའ་བཞི་བ་བཅུ། རྣམ་པར་དག་པའི་གནས་བརྟན་དྲུག ཚེ་བློས་བཏང་གི་རྟོགས་ལྡན་ལྔ་ལ་སོགས་པ་ལུང་རྟོགས་ཀྱི་ཡོན་ཏན་ལ་མངའ་བརྙེས་པའི་མཁས་པ་ཆེན་པོ་སྙན་གྲགས་ཅན་མཐའ་ཡས་པ་ཡོད་དོ།།
སློབ་མ་དེ་དག་གི་ནང་ནས་ཀྱང་མཁས་གྲུབ་དགེ་ལེགས་དཔལ་བཟང་དང་ཞང་ཞུང་བ་ཆོས་དབང་གྲགས་པ་གཉིས་ནི་སྙན་ངག་གི་ཚིག་རྒྱན་ལ་ཆེད་དུ་མཁས་པར་གྲགས་ཤིང་མཁས་གྲུབ་རྗེས་མཛད་པའི་འཇམ་དབྱངས་སྨྲ་སེང་གི་བསྟོད་པ་ལས། འདི་འདྲའི་སྙན་ངག་མུ་ཏིག་དོ་ཤལ་གང་གི་ཁ་ལས་རབ་འཕྱང་བ། །བདེར་གཤེགས་གསུང་གི་ལེགས་བཤད་ཕྲེང་བས་ལྕེ་རྩེ་རྣམ་པར་བརྒྱན་པ་ནི། །བློ་གྲོས་ཤེས་བྱའི་ཕ་མཐའ་ལ་འགྲན་ཤཱཀྱའི་དགེ་སློབ་དགེ་ལེགས་དཔལ། །བཟང་བོ་ཞེས་བྱ་འཇམ་པའི་རྡོ་རྗེའི་ཞབས་པད་བསྟེན་ལ་མངོན་དགའ་ཡིན། །ཞེས་དང༌། གངས་ཅན་མཁས་པ་ཀུན་གྱི་མགོ་བོ་ལ། །ཚིག་གི་གོམ་པ་འགོད་མཁས་དགེ་ལེགས་དཔལ། །བཟང་པོས་ཚིག་གི་སྦྱོར་བ་སྤངས་ཏེ་སྨྲས། །ཞེས་གསུངས་པ་ལྟར་སྙན་ངག་གི་རྩོམ་ཆེས་མང༌། ཞང་ཞུང་བ་ཆོས་དབང་གྲགས་པས་སྙན་ངག་རཱ་མ་ཎའི་རྟོགས་བརྗོད་སོགས་གཞུང་མང་པོ་བརྩམས་སོ། །དེ་བཞིན་དུ་རྗེའི་སློབ་མ་སློབ་རྒྱུད་དང་བཅས་པས་ནང་དོན་རིག་པ་མ་ཟད་ཐ་སྙད་རིག་གནས་ཀྱང་ཆེས་ཆེར་དར་བར་མཛད་དོ།།
ཇོ་ནང་ཀུན་དགའ་གྲོལ་མཆོག་གི་སྤྲུལ་སྐུ་ཏཱ་ར་ནཱ་ཐ་སྟེ་སྒྲོལ་བའི་མགོན་པོ་ནི་རབ་བྱུང་བཅུ་པའི་ཤིང་ཕག་ (སྤྱི་ལོ་ ༡༥༧༥) ལོར་འཁྲུངས། ཁོང་གིས་ཀྱང་རིག་གནས་སོགས་ཀྱི་བསྟན་བཅོས་མང་པོ་བརྩམས། འཕགས་ཡུལ་ནས་བྱོན་པའི་པཎྜི་ཏ་ཁ་ཤས་བསྟེན་པས། ལེགས་སྦྱར་གྱི་སྐད་དང་སྒྲ་རིག་པ་ལའང་མཁས་པ་ཆེན་པོར་གྱུར། སྒྲ་མདོ་དབྱངས་ཅན་མ་བསྒྱུར་བ་དང༌། འགྲེལ་བ་མཆོག་ཏུ་གསལ་བ། ཞེས་བྱ་བ་བརྩམས་པ་དེ་ལ། ཏཱ་ར་ན་ཐའི་སྒྲ་ཊཱིཀ་ཞེས་གྲགས་ཆེ། གཏེར་བདག་གླིང་པ་འགྱུར་མེད་རྡོ་རྗེ་སྟེ་སྨིན་གླིང་གཏེར་ཆེན་དུ་གྲགས་པའང་ཀུན་གཟིགས་ལྔ་པ་ཆེན་མོས་རིག་གནས་ཀྱི་སློབ་དཔོན་དུ་བསྟེན། རིག་གནས་རྒྱ་མཚོའི་ཕྲེང་བ་འཛིན་པ་སྨོན་གྲོ་བ་ཡབ་སྲས་ཞེས་བསྔགས་བརྗོད་ཆེར་མཛད། ཁྱད་པར་དུ་གཏེར་ཆེན་གྱི་གཅུང་ལོ་ཆེན་ངྷརྨ་ཤྲཱི་བྱ་བ་མདོ་སྔགས་གསར་རྙིང༌། ཐ་སྙད་རིག་གནས་མཐའ་དག་ལ་མཁས་པ་ཞིག་བྱུང་བས་བསྟན་བཅོས་མང་དུ་བརྩམས་སོ།།
རྒྱལ་དབང་ལྔ་པ་ཆེན་པོ་ནི་རབ་བྱུང་བཅུ་བའི་མེ་སྦྲུལ་ (སྤྱི་ལོ་ ༡༦༡༧) ལ་འཁྲུངས། ཁོང་གིས་མདོ་སྔགས་གསར་རྙིང་དང༌། ཐ་སྙད་རིག་གནས་མཐའ་དག་ལ་སྦྱངས་ཏེ་བསྟན་བཅོས་ཆེས་མང་པོ་བརྩམས། སྙན་འགྲེལ་དབྱངས་ཅན་དགྱེས་གླུ་སོགས་ཐ་སྙད་རིག་གནས་ཀྱི་གསུང་རྩོམ་ཡང་མང༌། སྡེ་སྲིད་སངས་རྒྱས་རྒྱ་མཚོས་ཀྱང་བེ་དཀར། བེ་སེར། བེ་སྔོན་སོགས་རིག་གནས་ཀྱི་གཞུང་མང་པོ་བརྩམས། ཁྱད་པར་དུ་སྨན་ལ་མཁས་པར་གྲགས་སོ།།
རྒྱལ་དབང་ལྔ་བའི་དུས་སུ། འདར་ལོ་ངག་དབང་ཕུན་ཚོགས་ལྷུན་འགྲུབ་ཀྱིས། པཎྜི་ཏ་བཱ་ལ་བྷཱ་དྲ་དང༌། དེའི་གཅུང་པཎྜི་ཏ་ཀོ་ཀུ་ལ་ནཱ་ཐ་མི་ཤྲི་གཉིས་ལ་བརྟེན་ནས་ལོ་ཙཱ་བ་ཁོང་དགུང་ལོ་ཉེར་ལྔའི་ཐོག་རབ་བྱུང་བཅུ་གཅིག་པའི་ས་ཁྱི་ (སྤྱི་ལོ་ ༡༦༥༨) ལོ་ལ་དཔལ་ལྡན་འབྲས་སྤུངས་སུ་སྒྲ་པཱ་ཎི་བའི་འགྲེལ་ཆེན་ནོར་གྱི་ཤིང་རྟ་ཞེས་བྱ་བ་བརྩམས། དེ་རྗེས་རྒྱལ་དབང་ལྔ་པའི་བཀའ་བཞིན། པཎྜི་ཏ་སྐུ་མཆེད་དང་ལོ་ཙཱ་གསུམ་རྩེ་ཕོ་བྲང་ཆེན་མོར་བཞུགས་ཏེ། སྒྲ་མདོ་དབྱངས་ཅན་མ་དང་འགྲེལ་པ་གསལ་ལྡན་བསྒྱུར་རོ།།
ྋརྒྱལ་དབང་ལྔ་པའི་དངོས་སློབ་ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་ནི་རབ་བྱུང་བཅུ་གཅིག་པའི་ས་བྱི་ (སྤྱི་ལོ་ ༡༦༤༨) ལ་སྐུ་བལྟམས། ཁོང་གིས་མདོ་སྔགས་ཐ་སྙད་རིག་གནས་དང་བཅས་པའི་གཞུང་མང་དུ་བརྩམས་ཤིང༌། མདོ་སྨད་ལྷོ་རྒྱུད་དུ་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་ཞེས་ཡོངས་སུ་གྲགས་པ་དེ་ཉིད་བཏབ། ཆོས་སྡེ་འདི་ཉིད་དར་ཞིང་རྒྱས་ཏེ་བོད་གངས་ཅན་གྱི་བཅུ་ཕྲག་རིག་པའི་གནས་ཀྱི་ལྟེ་གནས་སུ་གྱུར། བདག་གིས་ཀྱང་ཆོས་སྡེ་ཆེན་པོ་དེའི་མཐུ་ལ་བརྟེན་ནས་ཕྱི་ནང་གི་རིག་པའི་གནས་དག་ལ་བག་ཆགས་ཅུང་ཟད་ཅིག་འཇོག་ཐུབ་པའི་སྐལ་བ་ཐོབ། ྋརྒྱལ་དབང་བདུན་པའི་དུས་སུ། ཁམས་སྡེ་དགེར་སི་ཏུ་གཙུག་ལག་ཆོས་ཀྱི་སྣང་བ་བྱོན་ཏེ་དཔལ་སྤུངས་དགོན་བཏབ། སྒྲ་དང་སྙན་ངག་སྡེབ་སྦྱོར་སོགས་ཀྱི་གཞུང་གསར་འགྱུར་དང་འགྱུར་བཅོས་ཡང་མང་དུ་མཛད། སློབ་མ་མཁས་པ་མང་པོ་བྱོན།།
འཇམ་དབྱངས་བཞད་པའི་ཡང་སྤྲུལ་ཀུན་མཁྱེན་འཇིགས་མེད་དབང་པོས་མདོ་དབུས་ཀུན་ནས་སློབ་དཔོན་མང་པོ་བསྟེན་ཏེ་གསན་སྦྱངས་མཛད་པས་མཁས་གྲགས་ཀྱིས་ས་སྟེང་ཁྱབ། ཀུན་མཁྱེན་འཇམ་དབྱངས་བཞད་པའི་དངོས་སློབ་དབྱིག་གྱ་པཎྜི་ཏ་དང༌། བྲ་ཏི་རིན་ཆེན་དོན་འགྲུབ་ཀྱི་དངོས་སློབ་དགེ་བཤེས་བློ་བཟང་དགེ་ལེགས་སི་ཏུའི་དངོས་སློབ་ཀུན་དགའ་སངས་རྒྱས་ལས་ཀྱང་གསན་ཏེ་ཐ་སྙད་རིག་གནས་ཀྱང་དར་སྤེལ་མཛད་པས། མདོ་སྨད་ལྷོ་བྱང་སོགས་ས་ཕྱོགས་ཀུན་ཏུ་འདི་བའི་ཁྲིད་རྒྱུན་དང་ཞལ་རྒྱུན་གྱི་རིག་པའི་གནས་ཀྱི་མེ་ཏོག་དགེ་མཚན་གྱི་དྲི་བསུང་འཐུལ་བ་ད་ལྟའི་བར་དུ་གནས་པ་འདི་བཞིན་ལགས་སོ། །དུས་ཕྱིས་ཁམས་སྡེ་དགེ་ཕྱོགས་སུའང་མཁས་པ་ཆེན་པོ་འགའ་ཞིག་བྱོན་ཏེ། རྫོགས་ཆེན་དཔལ་སྤྲུལ། འཇམ་དབྱངས་མཁྱེན་བརྩེའི་དབང་པོ། ཀོང་སྤྲུལ་ཡོན་ཏན་རྒྱ་མཚོ། འཇུ་མི་ཕམ་སོགས་བྱོན་ཏེ་ཕྱི་ནང་རིག་པའི་གནས་ཀྱི་ལེགས་བཤད་ཀྱི་བདུད་རྩིས་སྐལ་བ་དང་ལྡན་པ་དག་ཚིམ་པར་བྱས་སོ། །འདི་དག་ནི་ཆེ་རགས་ཙམ་བཤད་པ་ཡིན་གྱི་རྒྱས་པར་ནི། རྒྱལ་རབས་དེབ་ཐེར་རྣམས་དང༌། མཁས་པ་རང་རང་གི་རྣམ་ཐར་ལས་ཤེས་པར་བྱའོ།།
བོད་ཀྱི་རིག་གནས་རྒྱ་ཡུལ་དུ་དར་ཚུལ།
བོད་ཀྱི་རིག་གནས་རྒྱ་ཡུལ་དུ་དར་ཚུལ་ནི། ཆོས་རྒྱལ་མེས་དབོན་གྱི་སྐུ་རིང་ལ། རྒྱ་ནག་གི་བཙུན་པ་དང༌། རིག་པའི་གནས་ལ་མཁས་པ་མང་པོ་བོད་ཡུལ་དུ་བྱོན་ནས། ཆོས་དང་རིག་གནས་སྤེལ་བའི་མཛད་རྗེས་རླབས་ཆེ་ལ། དུས་རབས་ཉི་ཤུ་པའི་འགོ་ཙམ་ནས་བོད་ཀྱི་རིག་གནས་རྒྱ་ཡུལ་དུ་དར་བའི་འགོ་བརྩམས། འཇམ་དབྱངས་བཞད་པ་སྐུ་ཕྲེང་ལྔ་པའི་ཡོངས་འཛིན་གཙང་པ་ཡོངས་འཛིན་ཞེས་གྲགས་པའི་མཁས་པ་ཆེན་པོ་དེ་རྒྱ་ནག་ཏུ་ཕེབས་ཏེ་བྱང་ཆུབ་ཆོས་ཚོགས་ཞེས་པའི་ཚོགས་པ་བཙུགས། ཚོགས་པ་དེ་ལྷོ་ཧྲང་ཧེ་ནས་ཁྲུང་ཆིང་དང་ཁྲིན་ཏུ་བར་དང༌། བྱང་པེ་ཅིན་ནས་ལན་གྲུ་བར་དུ་དར་ཞིང་རྒྱས་ཏེ། ཚོགས་མི་མང་ཆེ་བས་བོད་ཡིག་དང་བོད་ཀྱི་སུམ་རྟགས་སོགས་རིག་གནས་ལ་སྦྱངས། རྒྱའི་བཙུན་པ་དང་མཁས་པ་མང་པོ་དབུས་གཙང་གི་སེ་འབྲས་དང༌། མདོ་སྨད་ཀྱི་བླ་བྲང་སྐུ་འབུམ་སོགས་སུ་ཕེབས་ནས་བོད་ཀྱི་རིག་གནས་ལ་སྦྱངས། དཔེར་ན་བློ་བཟང་ཆོས་འཕགས་ཆོས་ཀྱི་བླ་མ་ཞེས་བྱ་བའི་ལོ་ཙཱ་བ་ཆེན་པོ་དེ་ཉིད་ ༡༩༠༢ ལོར་པེ་ཅིན་གྲོང་ཁྱེར་ཉེ་འདབས་སུ་སྐུ་འཁྲུངས། ཆུང་དུས་ནས་ཡི་གེར་སྦྱངས། དགུང་ལོ་ཉི་ཤུའི་སྐབས་པེ་ཅིན་ཧཕ་ཡོན་དགོན་དུ་བཞུགས། དེ་རྗེས་ཨུ་ཧན་ནང་བསྟན་སློབ་གྲྭར་ཞུགས། དེ་རྗེས་བོད་ཡུལ་ཁམས་སུ་བྱོན་ནས་ལོ་ཤས་ལ་བོད་ཀྱི་སྐད་ཡིག་སྦྱངས། དེ་རྗེས་དབུས་གཙང་དུ་ཕེབས་ཏེ་འབྲས་སྤུངས་སོགས་སུ་བཞུགས། བྲག་དཀར་དགེ་བཤེས་བླ་མར་བསྟེན་ཏེ་བོད་ཀྱི་རིག་པའི་གནས་མང་པོར་སྦྱངས། བསྟན་བཅོས་མངོན་རྟོགས་རྒྱན། ལམ་རིམ་ཆེན་མོ། དྲང་ངེས་རྣམ་འབྱེད་རྒྱ་ཡིག་ཏུ་བསྒྱུར། བོད་རིགས་ཀྱི་ཆོས་སྲིད་ལོ་རྒྱུས་ཞེས་པ་དང་ང་འགྲོ་སའི་བོད་ཡུལ་ཞེས་པ་བརྩམས། ལོ་ངོ་བཅུ་ཕྲག་ལྷག་ལ་བོད་ཡུལ་དུ་བཞུགས། དེ་རྗེས་རྒྱ་ཡུལ་དུ་ཕེབས། ཁྲུང་ཆིང་རྒྱ་བོད་གཞུང་ལུགས་སློབ་གྲྭ་ཆེན་མོ་བཙུགས། སྔ་ཕྱིར་རྣམ་བཤད་དགོངས་པ་རབ་གསལ། སྔགས་རིམ་ཆེན་མོ། རིམ་ལྔ་གསལ་སྒྲོན་སོགས་རྗེའི་གསུང་མང་པོ་དང་དབུ་མ་བཞི་བརྒྱ་བ་སོགས་བསྒྱུར། ཀློང་ཆེན་མཛོད་བདུན་ཡང་བསྒྱུར། དེ་རྗེས་པེ་ཅིན་དུ་ཕེབས་ནས་བཞུགས། བྱེ་བྲག་བཤད་མཛོད་ཆེན་མོ་བམ་པོ་ཉིས་བརྒྱ་རྒྱ་ཡིག་ནས་བོད་ཡིག་ཏུ་བསྒྱུར་ཉེ་ཆར་ ༡༩༧༩ ལོ་དང་ ༡༩༨༠ ལོ་གཉིས་རིང་ཚད་མ་རྣམ་འགྲེལ་དང་སྤྱི་དོན་རིགས་རྒྱན་ཡང་བསྒྱུར། ཁོང་ལོ་ཙཱ་བ་ཕྱག་རྗེས་ཅན་ཞིག་རེད། ན་ནིང་ (༡༩༨༠) ལོའི་ཟླ་༡༢ པའི་ཚེས་༡༤ ལ་སྐུ་འདས། བཙུན་པ་ཀོང་ཁུང་ཞེས་པའང་བོད་ཡུལ་དུ་ལོ་མང་པོར་སྦྱངས་ནས་ཉེ་ཆར་ ༡༩༧༩ དང་ ༡༩༨༠ ལོ་གཉིས་རིང་ལ་རྒྱའི་སློབ་དཔོན་ཝེན་ཚེགས་ཀྱིས་མཛད་པའི་མདོ་དགོངས་འགྲེལ་གྱི་འགྲེལ་བ་རྒྱ་ཡིག་ཏུ་མི་ཚང་བ་བོད་ཡིག་གི་ཐོག་ནས་བསྒྱུར་ཏེ་ཁབ་སྐངས། ལོ་ཙཱ་བ་དེ་ད་ལྟ་པེ་ཅིན་དུ་ཀྲུང་གོ་ནང་བསྟན་སློབ་གྲྭ་ཆེན་མོའི་སློབ་དཔོན་དུ་བཞུགས་ཡོད། གཞན་ཡང༌། ཀྲང་ཡིས་སུན་ཞེས་པའི་དགེ་རྒན་ཆེན་མོ་དེས། བོད་རྒྱ་ཚིག་མཛོད་ཆེན་མོའི་རྨང་དང་བོད་རྒྱ་ཤན་སྦྱར་དང༌། རྒྱ་བོད་སྐད་ཚོགས་རྣམས་སྐད་གཉིས་ཤན་སྦྱར་དུ་བསྒྲིག་རྩོམ་མཛད། ཐུའུ་བཀྭན་གྲུབ་མཐའི་དུམ་གཅིག་ཀྱང་རྒྱ་ཡིག་ཏུ་བསྒྱུར། ཁོང་ད་ལྟ་དགུང་ལོ་གྱ་བརྒྱད་རེད། ལིའུ་ལི་ཆན་གྱིས་མི་ལ་རས་པའི་རྣམ་ཐར་དང༌། ཐུའུ་བཀྭན་གྲུབ་མཐའ། རྒྱལ་རབས་གསལ་བའི་མེ་ལོང་རྣམས་བསྒྱུར། ཁོང་ད་ལྟ་ཁྲིན་ཏུར་ངལ་གསོས་ནས་བཞུགས་ཡོད། གཞན་ཡང་ཁྲིན་ཏུ་དང༌། དར་མདོ། མཚོ་སྔོན། བླ་བྲང་སོགས་སུ་རྒྱའི་མཁས་པ་མང་པོས་བོད་ཡིག་དང་བོད་ཀྱི་རིག་གནས་སྦྱངས་སོ། །ད་ལྟ་བོད་ཡུལ་ཡོངས་ཁྱབ་ཏུ་སློབ་གྲྭ་བཙུགས་ཏེ་རྒྱ་ཡིག་སློབ་བཞིན་པ་ཡིན་པས། རྒྱའི་རིག་གནས་མཐའ་དག་བོད་ཡུལ་དུ་དར་བའི་འགོ་ཚུགས་ཡོད་དོ།།
སོག་ཡུལ་དུ་བོད་ཀྱི་རིག་གནས་དར་ཚུལ།
སོག་ཡུལ་དུ་བོད་ཀྱི་རིག་གནས་དར་ཚུལ་ནི། རབ་བྱུང་བཞི་པའི་མེ་ཡོས་ལོར། སོག་རྒྱལ་སྟོབས་ལྡན་ཆིངགི་ སི་བོད་དུ་བྱོན་ནས་སྟོད་མངའ་རིས་སྐོར་གསུམ། དབུས་གཙང་རུ་བཞི། ལྷོ་ཁམས་སྒང་གསུམ་ཐམས་ཅད་དབང་དུ་བསྡུས། ས་ཆེན་ཀུན་དགའ་སྙིང་པོ་དང་ཡོན་མཆོད་དུ་གྱུར། དེ་རྗེས་ཆིང་གི་སིའི་ཚ་བོ་གུ་ཡུག་དང་གོ་ཏན་གཉིས་ཀྱིས་ལང་ཀྲུའུ་སོགས་ཁམས་ཀྱི་རྒྱལ་པོ་བྱེད་སྐབས་གོ་ཏན་གྱིས་ས་སྐྱ་པཎ་ཆེན་གྱི་སྙན་གྲགས་ཐོས་ནས། མི་སྣ་བཏང་སྟེ་ས་སྐྱ་པཎ་ཆེན་སོག་ཡུལ་དུ་གདན་དྲངས། དེ་ཡན་ཆད་སོག་པོ་ལ་ཡི་གེ་མེད་པས། ས་པཎ་གྱིས་ཡི་གེ་གསར་པ་བཟོ་བར་བཞེད་པ་ན་བུད་མེད་ཅིག་གིས་པགས་པ་མཉེས་པའི་ཤིང་སོག་ལེའི་ཁ་ལྟ་བུ་ཞིག་ཐོགས་པ་གཟིགས་ནས་སོག་ཡིག་དེའི་དབྱིབས་ཅན་བཟོས་ཏེ། ཨ་ཨེ་ཨོ། ན་ནེ་ནི། ས་སེ་སི། ཧ་ཀེ་ཁི། གྷ་གྷེ་གྷི། མ་མེ་མི། ལ་ལེ་ལི། ར་རེ་རི། འ་འེ་འི། ཏ་ཏེ་ཏི། ཐ་ཐེ་ཐི། ཙ་ཙེ་ཙི། ཚ་ཚེ་ཚི། ཡ་ཡེ་ཡི། ཝ་ཝེ་ཝི། རྣམས་ཕོ་མོ་མ་ནིང་ངམ་གྲིམ་ལྷོད་ཞན་གསུམ་དུ་བསྡུས་ནས་ཀློག་པའི་སྲོལ་བཏོད། དེ་རྗེས་རབ་བྱུང་ལྔ་པའི་ས་རྟ་ལོར་ཆོས་རྒྱལ་འཕགས་པས་སོག་ཡིག་འཁོར་མ་གྲུ་བཞི་མ་བཟོས། འོན་ཀྱང་འདི་ཐམ་ཀའི་ངོས་ལ་བེད་སྤྱོད་པ་ལས་སོག་ཡིག་དངོས་ནི་ས་པཎ་གྱིས་བཟོས་པའི་པགས་ཤད་ཀྱི་སོ་དབྱིབས་ཅན་དེང་སང་གི་བར་བེད་སྤྱོད་བཞིན་པ་དེ་རེད། དེ་རྗེས་ས་སྐྱ་པ་ཆོས་སྐུ་འོད་ཟེར་སོག་ཡུལ་དུ་བྱོན་ནས་སྔར་ས་པཎ་གྱིས་བཟོས་པའི་ཡི་གེ་ལ་ཡི་གེ་མཇུག་མ་ཅན་མང་པོ་བསྣན་ནས་བོད་ཡིག་གི་ཐོག་ནས་གཞུང་ལུགས་སོག་ཡིག་ཏུ་བསྒྱུར་བའི་འགོ་ཚུགས། དེ་རྗེས་ཤི་རེ་ཐུ་གུ་ཤྲཱིས་ཡུམ་གསུམ་བོད་ཡིག་ལས་སོག་སྐད་དུ་བསྒྱུར། ཆ་ཧར་ལེགས་ལྡན་ཧོ་ཐོག་ཐུའི་དུས་སུ། ཀུན་དགའ་འོད་ཟེར་གཙོ་བྱས་པའི་ལོ་ཙཱ་བ་མང་པོས་བཀའ་འགྱུར་ཡོངས་རྫོགས་སོག་སྐད་དུ་བསྒྱུར། ཁང་ཤི་བདེ་སྐྱིད་རྒྱལ་པོའི་དུས་སོག་ཡིག་གི་བཀའ་འགྱུར་ཞུ་དག་མཛད་ནས་པར་དུ་བསྒྲུབས། གོང་མ་ཆེན་ལུང་རྒྱལ་པོའི་དུས་བསྟན་འགྱུར་ཡོངས་སུ་རྫོགས་པ་སོག་སྐད་དུ་བསྒྱུར་ནས་པར་དུ་བསྐྲུན། འདི་དུས་ལྕང་སྐྱ་རོལ་བའི་རྡོ་རྗེས་སོག་སྐད་དུ་བསྒྱུར་ལ་མེད་མི་རུང་གི་དག་ཡིག་མཁས་པའི་འབྱུང་གནས་ཞེས་བྱ་བ་བོད་སོག་ཤན་སྦྱར་གྱི་མིང་མཛོད་དེ་བརྩམས་སོ། །འོན་ཀྱང་སོག་ཡུལ་དུ་མཚན་ཉིད་ཀྱི་གཞུང་བཀའ་པོད་ཆེན་པོ་ལྔ་དང༌། རྒྱུད་སྡེ་བཞི། སྒྲ་རིག སྨན་རིག སྐར་རྩིས། སྙན་ངག ཟློས་གར་སོགས་བོད་ཡིག་གི་ཐོག་ནས་སློབ་སྦྱོང་བྱེད་པར་མ་ཟད། སུའུ་ལེན་གྱི་མངའ་ཁོངས་པུ་རད་སོགས་སུ་བོད་ཡིག་གི་ཤིང་པར་འབོར་ཆེན་དར་ཏེ། ཧལ་ཧ་རྗེ་བཙུན་དམ་པའི་དགོན་པར་བཀའ་འགྱུར་སོགས་ཀྱི་ཤིང་པར་འབོར་ཆེན་ཡོད་པ་དང༌། དེ་བཞིན་ནང་སོག་མཁར་སྔོན་པོ་སོགས་སོག་ཡུལ་དུ་བོད་ཡིག་གི་རིག་གཞུང་མང་པོའི་ཤིང་པར་ཡོད། སོག་པོའི་མཚན་ཉིད་སོགས་རིག་པའི་གནས་སློབ་འདོད་ཀྱི་བཙུན་པ་ཆེས་མང་པོ་དབུས་གཙང་དང༌། བླ་བྲང༌། སྐུ་འབུམ་སོགས་སུ་བྱོན་ནས་སློབ་གཉེར་བྱས་ཏེ་སླར་རང་ཡུལ་དུ་ལོག་ནས་འཆད་ཉན་སྤེལ་བ་ད་ལྟའི་བར་དུ་ཡོད། དེ་ལྟར་སོག་པོ་ལ་རང་གི་ཡི་གེ་ཡོད་མོད། དེ་སྔོན་རིག་གནས་སྣ་ཚོགས་ཀྱི་རྨང་གཞིའི་ཡི་གེ་ནི་བོད་ཡིག་རང་ཡིན་ནོ།།
དེ་བཞིན་དུ་འབྲུག་ཡུལ་ཡང་རྩའི་ཐོག་བོད་རིགས་ཡིན་གཤིས། ཡི་གེ་ཡང་རྩའི་ཐོག་བོད་ཡིག་རེད། འབྲས་ལྗོངས་ཡང་སྔར་བོད་རིགས་ཡིན་གཤིས་སྐད་ཡིག་ཀྱང་བོད་ཀྱི་སྐད་ཡིག་ཡིན་མོད། ད་ལྟ་ཅི་ཡིན་མ་ཤེས། རི་པིན་སོགས་ཡ་གླིང་གི་རྒྱལ་ཁབ་སྟོབས་ལྡན་རྣམས་དང༌། ནུབ་ཕྱོགས་ཀྱི་རྒྱལ་ཁབ་རྣམས་སུའང་བོད་ཀྱི་རིག་གནས་ལ་ཞིབ་འཇུག་བྱེད་པའི་གྲྭ་མང་པོ་བཙུགས་ཏེ་དར་རྒྱས་འབྱུང་བཞིན་པར་འདུག །དེས་ན་བོད་རང་ལ། ལེགས་སྦྱར་དང་སུམ་རྟགས་རྩ་བར་བཟུང་བའི་སྒྲ་རིག་པ་ཕུལ་བྱུང་ཆ་ཚང་རང་ཚུགས་ཐུབ་པ་ཞིག་ཡོད། ཚད་མ་རིག་པའང་སློབ་དཔོན་ཆོས་གྲགས་ཡབ་སྲས་ཀྱི་ཚད་མ་རིག་པ་རྩ་བར་བཟུང་བའི་སྟེང་དུ། བོད་རང་གི་མཁས་པ་རྣམས་ཀྱིས་གསར་བསྐྲུན་གྱི་རིག་པ་བསྡུས་གྲྭ་ལྟ་བུས་ཕུན་སུམ་ཚོགས་པར་བྱས་ཏེ་དར་ཞིང་རྒྱས་ནས་རྒྱལ་ཁབ་གཞན་དང་མི་རིགས་གཞན་ལ་མེད་པའི་ཕུན་སུམ་ཚོགས་པ་ཞིག་ཡོད། གསོ་རིག་ཀྱང་ཕྱིའི་གསོ་རིག་དག་གི་ཁར་རང་གི་ཉམས་མྱོང་བསགས་པའི་སྨན་དཔྱད་ལག་རྩལ་བླ་ན་མེད་པ་ཞིག་ཡོད། བར་སྐབས་སུ་ཉམས་མོད། འོན་ཀྱང་ད་ལྟའང་རྨང་འཐུག་པོ་ཡོད། བཟོ་རིག་སྐོར་ལ་བསྟན་འགྱུར་ཁྲོད་ཀྱི་བཟོ་པ་ཊ་དང་མི་ཕམ་གྱིས་མཛད་པའི་བཟོ་པ་ཊ་སོགས་གཞུང་མང་པོ་ཡོད་སྟབས། རྡོ་བཟོ། ཤིང་བཟོ། ལྕགས་བཟོ། དངུལ་བཟོ། གསེར་བཟོ། ལྷ་བཟོ། གོས་ལྷམ་བཟོ་བ། སྣམ་ཕྲུག ས་གདན། ཕྱིང་འཇོག པར་རྐོ། རྡོ་རྐོ། ཤིང་རྐོ་མཁན་སོགས་ལག་ཤེས་བཟོ་ལས་སྣ་ཚོགས་ཡོད། དེ་དག་དེང་དུས་ཀྱི་འཕྲུལ་འཁོར་གྱི་བཟོ་ལས་ལ་བལྟས་ན་རྗེས་ལུས་ཡིན་མོད། མང་ཚོགས་ཀྱི་འཚོ་བའི་ཐད་ལ་འདང་བརྒྱབ་ན་མཐོང་ཆེན་བྱེད་རིན་ཡོད་པ་ཞིག་རེད། ནང་དོན་རིག་པ་རྒྱུད་སྡེ་བཞི་དང་སྡེ་སྣོད་གསུམ་གྱི་འཆད་ཉན་སོགས་དེང་དུས་འཛམ་གླིང་གི་མི་རིགས་གཞན་ལས་ལྷག་པ་ཞིག་ཡོད། དེ་དག་ནི་རིག་གནས་ཆེ་བ་ལྔ་ཡིན་ལ། ཆུང་བ་ལྔའི་སྙན་ངག་ནི། སློབ་དཔོན་དབྱུག་པ་ཅན་གྱི་མེ་ལོང་མའི་ཐོག་ཏུ་བོད་རང་གི་བློ་གྲོས་ཀྱི་ནོར་བསགས་པས་ཕུན་སུམ་ཚོགས་པ་ཞིག་ཡོད། མངོན་བརྗོད་ལ་ནི། འཆི་མེད་མཛོད་དང༌། བོད་རང་གིས་བརྩམས་པའི་མཁས་པའི་རྣ་རྒྱན་སོགས་དགེ་མཚན་ཅན་ཞིག་ཡོད། སྡེབ་སྦྱོར་ནི་རིན་ཆེན་འབྱུང་གནས་ལྟར་ལེགས་སྦྱར་གྱི་སྟེང་ནས་བསྒྲིགས་པ་དང༌། བོད་རང་གི་ཚིག་སྣ་ཚོགས་སྒྲིག་ཚུལ་འཇེབས་ཤིང་ཆ་ཚང་བ་ཞིག་ཡོད། སྐར་རྩིས་ནི། དུས་འཁོར་རྒྱུད་དང་རྒྱ་ནག་གི་རྩིས་རྙིང་དང་རྩིས་གསར་གྱི་སྟེང་དུ་རང་གིས་ཚན་རིག་པའི་དཔྱད་པ་སྣ་ཚོགས་ཀྱི་འབྲས་བུ་བསྣན་པའི་རྩིས་རིག་སྔོན་ཐོན་ཞིག་ཡོད། ཟློས་གར་ནི། དེང་དུས་འཆམ་བཞིན་པའི་ཟློས་གར་ཆེན་པོ་བརྒྱད་གཙོར་བྱས་པའི་སྣ་ཚོགས་ཤིག་དང་གླུ་གར་ཡང་ཀུན་གྱི་རྣ་ལམ་དང་སྤྱན་ལམ་དུ་གྱུར་པ་འདི་བཞིན་ནོ། །དེ་དག་ནི་རིག་གནས་ཆུང་བའོ།།
བོད་དུ་དེང་རབས་ཅན་གྱི་ཚན་རིག་ལག་རྩལ་རྗེས་ལུས་ཡིན་པ་སྨོས་མི་དགོས་མོད། དེ་དག་རྗེས་ལུས་ཡིན་པས་སྔར་གྱི་རྨང་གཞིའི་རིག་གནས་དག་རྒྱང་བསྐྱུར་བྱས་ན། གསར་པ་ཡང་འཛུགས་མི་ནུས་ཏེ་སྔར་ལོ་འགའི་རིང་ལ་བོད་རང་གི་སྐད་ཡིག་རྒྱང་བསྐྱུར་བྱས་ནས་རྒྱ་ཡིག་གི་ཐོག་ནས་རིག་གནས་བསླབས་པ་ཡིན་ཏེ། གྲུབ་འབྲས་རེ་ལོས་ཡོད་མོད་དེ། བུལ་ལ་འབུར་དུ་ཐོན་མི་ཐུབ་པ་འདི་འདྲའོ། །དེས་ན་བོད་རང་གི་སྐད་ཡིག་གི་རྨང་ཡོད་པའི་ཐོག་ནས་གསར་པ་བསླབས་ན་སྐྱེད་ཐོན་ཞིང་སྐྱེད་ཐོན་པ་ཅུང་ཟད་མྱུར་བར་འདུག་སྙམ་པས། རྣམ་པར་དཔྱོད་པའི་བློ་གྲོས་ཀྱི་འཇུག་པ་ཡངས་པ་རྣམས་ཀྱིས་དཔྱད་པར་མཛོད་ཅིག།
ཅེས་པའང་བསམ་གཏན་རྒྱ་མཚོ་མི་འཇིགས་དབྱངས་ཅན་དགའ་བའི་བློ་གྲོས་སུ་འབོད་པས་རབ་རྒྱལ་ལྕགས་བྱ་ (སྤྱི་ལོ་ ༡༩༨༡) ལོའི་དཔྱིད་ཀར་སུག་ལས་བགྱིས་པ་ཛ་ཡནྟུ།། །།