རིག་འཛིན་རྣམ་རྒྱལ་རྨ་བྱ། འཛིན་གྲྭ་བརྒྱད་པ། མེས་དབོན་གཙུག་ལག་དཔེ་སྟོན་སློབ་གྲྭ། སྤྱིར་མི་མ་ཟད་དུད་འགྲོ་སེམས་ཅན་ལ་ཡང་རང་ལ་བྱམས་བརྩེས་སྐྱོང་མཁན་ཡོད་ཅིང་གལ་ཏེ་ཁྱེད་ལ་བྱམས་བརྩེས་སྐྱོང་བའི་བཀའ་དྲིན་ཅན་ཞིག་མེད་ཚེ་ད་ཆ་ཁྱེད་ཀྱིས་ལས་གོ་ཆོད་པའི་ལས་ཤིག་ཀྱང་སྒྲུབ་རྒྱུ་ཕར་ཞོག་དང་པོ་ཁྱེད་རང་སྡུག་བསྔལ་དང་མུན་གྱིས་བཏུམས་པའི་འཁོར་བ་འདི་ནང་དུ་ཡང་འཚོ་བ་སྐྱེལ་མ་ཐུབ་པར་འཆི་རྒྱུ་ཉག་ཅིག་རེད། ང་ལ་མཚོན་ན་ཁོ་བོའི་དྲན་འཛིན་ཡོལ་བའི་ངོས་སུ་གསལ་ལྷེར་འཆར་བ་ནི་བདག་གི་བརྩེ་བའི་ཕ་མ་གཉིས་དང་ཤེས་ཡོན་ལྷག་བསམ་ལྡན་པའི་དགེ་བའི་བཤེས་གཉེན་གཉིས་དེ་ཡིན། གང་ལགས་ཞེ་ན། ཕ་མ་ཁྱེད་གཉིས་ཀྱིས་ཁོ་བོར་ལུས་སེམས་སྦྱིན་ཞིང་བདག་ལ་སབྱམས་བརྩེ་ཞེས་པ་དེ་བསླབས་ཡོད་པ་མ་ཟད་ཁྱེད་གཉིས་ཀྱིས་ཁོ་བོ་གོ་ལ་འདིའི་སྟེང་དུ་སླེབས་ནས་བཟུང་བརྩེ་བ་ཆེན་པོས་གསོ་སྐྱོང་གང་ལེགས་གནང་ཡོད་པ་དང་དུས་རྟགས་ཏུ་ཁོ་བོ་དང་ཁོ་བོའི་གཅེན་གཅུང་གཉིས་ལ་སློབ་སྦྱོང་ལ་བརྩོན་འགྲུས་ཀྱི་རྟ་ཕོར་བཅིགས་རྒྱུ་དང་མི་ཡ་རབས་སྤྱོད་བཟང་ཞིག་བྱེད་རྒྱུའི་སློབ་གསོ་ཡང་ཡང་གནང་ཡོད། ཕུགས་རྒྱང་རིང་བའི་ཕ་མ་ཁྱེད་གཉིས་ཀྱིས་ཉིན་མཚན་ལྟོས་མེད་གྲོན་ཆུང་བསྲི་ཚགས་ཀྱིས་གསོག་འཇོག་བྱེད་པའི་རྒྱུ་ནོར་ལོངས་སྤྱོད་རྣམས་བེད་སྤྱད་ནས་ང་ཚོར་སློབ་སྦྱོང་གང་མང་གནང་ཐབས་བྱེད་ཡོད་པ་མ་ཟད་ཟུར་ཁྲིད་དགེ་རྒན་དུ་མ་ཞིག་ ཀྱང་ཁྱིམ་དུ་མངགས་ནས་སློབ་སྦྱོང་བྱེད་དུ་བཅུག་མྱོང་ཡོད། ཁོང་གཉིས་ཀྱིས་ང་ཚོར་འཇམ་རྩུབ་གཉིས་ལྡན་གྱིས་མི་སྤྱོད་བཟང་ཞིག་ཏུ་བཅུན་ཡོད་པ་དང་བཀའ་བཀྱོན་གྲངས་ལས་འདས་པ་གནང་མྱོང་ཡོད། ཡིན་ནའང། མཚམས་རེར་ཁོ་བོ་ཕ་མ་གཉིས་ཀྱིས་མི་ལོ་དུ་མ་དཀའ་ངལ་ཁྱད་གསད་བྱས་པའི་ངལ་དུབ་ཀྱི་རྣམ་པ་དེ་མཐོང་དུས་ཁོ་བོའི་སེམས་ནང་སྔར་མེད་ཀྱི་ཟུག་གཟེར་ལངས་པ་དང་སེམས་འགུལ་ཚད་མེད་ཐེབས་ཀྱི་འདུག། ཁོ་བོས་དུས་དེར་ནར་སོན་རྗེས་ཕ་མ་གཉིས་ཀྱི་ལས་ཚེགས་ཁུར་རྒྱུ་ཡིན་ཞེས་ཕ་མ་ལ་ལབ་དུས་ཁོང་གཉིས་ཀྱིས་མ་གྲོས་གཅིག་མཐུན་ངང་བུ་ཁྱེད་རང་འབད་པ་ཆེར་བསྐྱེད་ཀྱིས་སློབ་སྦྱོང་བྱེད་ནས་རང་ཉིད་ཀྱི་ཕུགས་བསམ་མངོན་འགྱུར་ཡོང་བ་དེ་ནི་ང་ཚོའི་དཀའ་སྡུག་སེལ་བ་དང་གཉིས་སུ་མ་འཆིས་པས་དུས་ཚོད་ཆུད་ཟོས་སུ་མ་གཏོང་ཞིག་ཅེས་གསུངས་སོང། དེ་ལྟར་ཁོང་གཉིས་ཀྱིས་ཁོ་བོའི་ཕུགས་བསམ་མངོན་འགྱུར་ཡོང་ཆེད་དཔེ་སྟོན་སློབ་གྲྭར་མངགས་སྟབས་བདག་གིས་ཕ་མའི་རེ་བ་རྡོ་བརྐོས་རི་མི་བཞིན་སེམས་ནང་དམ་པོར་བཅངས་ནས་རང་ནུས་ཅི་ལྕོགས་ཀྱིས་དཀའ་སྤྱད་འབད་བརྩོན་བྱེད་རྒྱུའི་ཁས་ལེན་པ་ཡིན། གུས་པ་ཐོག་མ་སློབ་གྲྭ་རུ་སྦྱོར་ཚེ་སེམས་པ་དུང་ལས་དཀར་ཞིང་ང་ཚོར་ཤེས་ཡོན་ལྷག་བསམ་ལྡན་པའི་རྒན་ལགས་རྣམས་ཀྱིས་ཁོ་བོ་ལྟ་སྐྱོང་གནང་བྱུང། དགེ་བའི་བཤེས་གཉེན་ཁྱེད་རྣམས་ཀྱིས་ང་ཚོ་ཆུང་དུས་ཁ་ལུད་སྣབས་ལུད་འཕྱིས་མ་ཐུབ་པའི་དུས་ནས་བཟུང་བཟང་ངན་དབྱེ་འབྱེད་ཐུབ་པའི་མིག་ཟུང་སྦྱིན་ཞིང་ང་ཚོར་ཀ་ཁའི་དབྱངས་རྟ་སྙན་མོ་གྱེར་སྟངས་སློབ་པ་མ་ཟད་ཁྱེད་རྣམས་ཀྱིས་ང་ཚོའི་ཤེས་ཡོན་དང་སྤྱོད་པ་ད་དུང་འཕྲོད་བསྟེན་ལ་སོགས་གཙིགས་སུ་འཛིན་ནས་ཕྱག་གིས་བསྐྱོར་ཏེ་འབྲི་སློབ་དང་སྣབས་ལུད་འཕྱིས་པ། མ་ཟད་ང་ཚོ་ལ་སྒམ་ཚུགས་ལྡན་པའི་ངང་སློབ་ཕྲུག ཁྱོད་ཚོ་ནི་ང་ཚོ་བོད་པའི་ཤུལ་འཛིན་མཁན་གྱི་སོན་རྩ་རྣམས་ཡིིན་པས་སློབ་སྦྱོང་ལ་དོ་ཁུར་མང་ཙམ་བྱེད་ཅིག་ཅེས་བཀའ་སློབ་ཀྱང་གནང་མྱོང། ད་དུང་ཐེངས་ཤིག་སློབ་གྲྭ་རུ་ཁོ་བོའི་ལག་པར་རྨས་སྐྱོན་ཆུང་ཆུང་ཞིག་ལས་ཕོག་མེད་ཀྱང་རྒན་ལགས་ཁོང་གིས་བརྩེ་བ་ཆེན་པོས་རྨ་དེ་གཙང་མ་བཀྲུས་ཏེ་རྨ་དཀྲིས་དཀྲིས་མྱོང་ཡོད། རྒན་ལགས་ཁྱེད་རྣམས་ནི་ང་དང་ང་འདྲ་བའི་སློབ་ཕྲུག་བགྲང་གི་མི་ལངས་བ་ཞིག་གི་མུན་པ་སེལ་མཁན་གྱི་སྒྲོན་མེ་དེ་ཡིན་ཞིང་ཕ་མ་གཉིས་པ་དང་གཅིག་མཚུངས་ཡིན་པས་གུས་པ་ཁྱེད་ཀྱི་སློབ་ཕྲུག་ཅིག་ཡིན་པའི་ཆ་ནས་ཁྱེད་ལ་དགའ་ཞེན་ཆེ། དེར་བརྟེན་ང་ལ་མཚོན་ན་ཕ་མ་དང་དགེ་རྒན་གཉིས་ཀྱི་བཀའ་དྲིན་ནི་མི་ཚེ་གཅིག་ནང་འཇལ་ཐབས་བྲལ་ཞིང་ང་ཚོ་ཕྲུ་གུ་ཚོས་རང་ཉིད་ལ་བྱམས་བརྩེས་སྐྱོང་མཁན་ཇེ་སྙེད་ཅིག་ཐོབ་པ་དེ་ནི་བསོད་ནམས་ཆེན་པོ་ཡིན་སྙམ་པ་རྟག་ཏུ་ཡིད་ལ་དྲན་དགོས། །