བསྟན་འཛིན་མཚོ་མོ། འཛིན་གྲྭ་བཞི་པ། བདེ་སླར་སཾ་བྷོ་ཊ་སི་ལྦི་པི་བོད་སློབ། ངའི་མིང་ལ་བསྟན་འཛིན་མཚོ་མོ་ཡིན། ང་འཛིན་གྲྭ་བཞི་པའི་སློབ་མ་ཡིན། ང་མ་འོངས་པ་ཆེན་པོ་ཆགས་དུས་ང་རང་གི་དམིགས་ཡུལ་གཉིས་ཡོད། དམིགས་ཡུལ་དང་པོ་དེ་སྨན་ཞབས་མ་དང་གཉིས་པ་དེ་བོད་ཡིག་དགེ་རྒན་ཡིན། ང་རང་གི་དམིགས་ཡུལ་དང་པོ་སྨན་ཞབས་མ་ང་རང་ཆུང་ཆུང་སྐབས་ནས་བྱ་འདོོད་ཆེན་པོ་ཡོད། སྨན་ཁང་ནང་སྨན་ཞབས་མ་མཐོང་དུས་སེམས་ནང་ཧ་ཅང་དགའ་པོ་ཡོང་གི་འདུག ང་རང་གི་པ་ལགས་ཀྱིས་ག་དུས་ཡིན་ན་ཆེན་པོ་ཆགས་དུས་མི་དང་སེམས་ཅན་ཚང་མ་ལ་ཕན་ཐོགས་པ་བྱེད་དགོས་པའི་བསླབ་བྱ་རྟག་པར་གནང་གི་ཡོད། པ་ལགས་ཀྱི་བསླབ་བྱ་ག་དུས་ཡིན་ན་སེམས་ནང་དྲན་གྱི་འདུག གལ་སྲིད་མ་འོངས་པ་ལ་ང་རང་ཆེན་པོ་ཆགས་ནས་སྨན་ཞབས་མ་ཆགས་ན་མི་དང་སེམས་ཅན་ཚང་མ་ལ་ཕན་ཐོགས་ཡོང་ས་རེད་བསམ་གྱི་འདུག དཔེར་ན། ང་རང་གི་ཨ་ལྕག་སྒྲོལ་དཀར་ཡང་སྨན་ཞབས་མ་ཞིག་རེད། མོ་རང་ད་ཆ་རྒན་གསོ་ཁང་ལ་སྨན་ཞབས་མའི་ལས་ཀ་བྱེད་ཀྱི་ཡོད། ང་རང་ཡང་མཚམས་མཚམས་ཨ་ལྕག་དང་མཉམ་དུ་རྒན་གསོ་ཁང་ལ་འགྲོ་གི་ཡོད། ཨ་ལྕག་གི་སྤོ་སྤོ་དང་རྨོ་རྨོ་དེ་ཚོ་ལ་སྨན་བཅོས་བྱེད་དུས་ང་རང་སྐྱིད་པོ་ཞེ་དྲག་འདུགཨ་ལྕགས་ཀྱིས་ཁྲག་ཤེད་ལྟ་བ་དང་ནད་པ་ལ་སྨན་སྤྲད་པ་དང་རྨ་ལ་སྨན་བྱུག་པ་ངས་མཐོང་བྱུང་། ཁོང་ཚོས་ཨ་ལྕག་ལ་དགའ་པོ་བྱེད་ཀྱི་འདུག ང་རང་ཡང་ཨ་ལྕག་འདྲ་པོ་བྱ་དགོས་པའི་བསམ་བློ་འཁོར་སོང་། ངའི་པ་ལགས་སྨན་ཞབས་པ་མ་རེད། ཡིན་ནའང་བ་ཕྱུགས་དང་ཁྱི་ལ་སྨན་བཅོས་བྱེད་ཀྱི་ཡོད། དེའི་སྐབས་པ་ལགས་ཀྱིས་ང་ལ་སེམས་ཅན་དེ་ཚོ་ཕན་ཐོགས་བྱེད་དགོས་རེད་ལབ་ཀྱི་ཡོད། ཁོང་ཚོ་ན་དུས་ཁ་ནས་སྐད་ཆ་བཤད་ཐུབ་ཀྱི་མ་རེད། དེ་འདྲ་སོང་ཙང་ང་ཚོ་མི་ཚོས་བསམ་བློ་གཏོང་ཐུབ་ཀྱི་ཡོད་ཙང་སེམས་ཅན་ལ་སྙིང་རྗེ་སྐྱེས་ནས་ཁོང་ཚོ་ལ་རོགས་པ་བྱ་དགོས་ལབ་ཀྱི་ཡོད། ང་རང་མ་འོངས་པ་ལ་སྨན་ཞབས་མ་བྱ་རྒྱུའི་བསམ་བློ་གཏོང་གི་ཡོད། མ་འོངས་པར་སྨན་ཞབས་མ་ཡི་སློབ་སྦྱོང་ཐོན་ཚར་བའི་རྗེས་ལ་སོ་སོའི་སྨན་ཁང་ནང་ལས་ཀ་བྱེད་པ་དང་མཉམ་དུ་སོ་སོ་སྡོད་སའི་ལུང་པའི་ནང་། ནད་པ་དང་དཀའ་ངལ་ཡོད་མཁན་མི་རྣམས་ལ་རོགས་པ་བྱེད་ཐུབ་པ་བྱེད་ཀྱི་ཡིན། དཔེར་ན་ཁྲག་ཤེད་ལྟ་བ་དང་ཁབ་རྒྱག་པ་སོགས་སོ་སོ་ལ་ཡང་ན་ཚའི་སྐོར་མང་པོ་ཤེས་པ་དང་། མི་གཞན་ལ་ཡང་འགྲེལ་བཤད་རྒྱག་པ་སོགས་ཕན་ཐོགས་རྒྱ་ཆེན་པོ་བྱེད་ཐུབ་ས་རེད། དེང་སང་ཕྱི་རྒྱལ་ལུང་པ་ཁག་ལ་སྨན་ཞབས་མའི་ལས་ཀ་ལས་སླ་པོ་རག་གི་རེད་ལབ་ཀྱི་འདུག སྨན་ཞབས་མའི་ལས་ཀ་དེ་བརྒྱུད་ནས་སོ་སོ་ཡིས་གཞན་ལ་སེམས་པ་བཟང་པོ་དང་སྙིང་རྗེ་བྱས་པ་ཡིན་ན། སོ་སོ་དང་ནང་མི་སེམས་ཅན་ཚང་མ་ལ་ཕན་ཐོགས་ཡོད་པའི་ལས་ཀ་ཡག་པོ་ཞིག་རེད་དྲན་གྱི་འདུག ལོ་གཅིག་གཉིས་གོང་རྒྱ་ནག་ནས་བྱུང་བའི་ཏོག་དབྱིབས་ནད་རིམས་དེ་འཛམ་བུའི་གླིང་ལ་ཁྱབ་པའི་སྐབས་ལ་སྨན་པ་དང་སྨན་ཞབས་མ་ཚོས་མི་མང་ལ་ཕན་ཐོགས་ཆེན་པོ་བྱུང་ཡོད། གལ་སྲིད་སྨན་ཞབས་མའི་ལས་ཀ་བྱེད་མི་ཐུབ་ན་ང་རང་གི་དམིགས་ཡུལ་གཉིས་པ་དེ་དགེ་རྒན་ཞིག་བྱ་རྒྱུ་དེ་ཡིན། དགེ་རྒན་གྱིས་སྨན་ཞབས་མ་ནང་བཞིན་མི་མང་པོ་ལ་ཕན་ཐོགས་བྱེད་ཐུབ་ཀྱི་རེད། ང་ཚོའི་སློབ་གྲྭའི་ནང་དགེ་རྒན་མང་པོ་ཡོད། རྒན་ལགས་ཚང་མ་སློབ་སྦྱོང་ཡག་པོ་ཡོདལ་པ་དང་སྤྱོད་པ་ཡང་ཡག་པོ་ཡོད་ལ། དུག་ལོག་ཀྱང་གཙང་མ་གྱོན་ནས་སློབ་གྲྭ་ལ་ཕེབས་དུས་ང་རང་གི་སེམས་དགའ་པོ་དང་སྐྱིད་པོ་ཡོང་གི་འདུག རྒན་ལགས་ཚོས་ང་ཚོར་སློབ་སྦྱོང་ཡག་པོ་བསླབ་པ་དང་མཉམ་དུ་བྱམས་སྐྱོང་གནང་གི་འདུག ང་རང་རྒན་ལགས་ཚང་མར་གུས་ཞབས་དང་རྒན་ལགས་ཀྱི་ཁ་ལ་ཉན་པོ་བྱེད་ཀྱི་ཡོད། དང་པོ་ང་རང་སློབ་སྦྱོང་ལ་དོ་སྣང་མེད་པ་དང་རྩེད་མོ་རྩེ་རྒྱུར་དགའ་པོ་ཡོད། རྗེས་སུ་རྒན་ལགས་ཀྱིས་བསླབ་བྱ་གནང་བ་ལ་བརྟེན་ནས་སློབ་སྦྱོང་ལ་དོ་སྣང་དང་ཡར་རྒྱས་འགྲོ་སོང་། ང་ཚོའི་བོད་ཡིག་དགེ་རྒན་བསྟན་འཛིན་སྨིན་སྒྲུབ་ལགས་ཡིན། རྒན་ལགས་ཀྱིས་ང་ཚོར་བོད་ཡིག་འབྲི་སྟངས་དང་ཀློག་སྟངས་ཚིག་སྒྲུབ་བཟོ་སྟངས་སོགས་བྱམས་དང་བརྩེ་བའི་ཐོག་ནས་སློབ་གནང་གི་འདུག དེ་འདྲ་སོང་ཙང་ང་རང་ཡང་རྒན་ལགས་ནང་བཞིན་བོད་ཡིག་དགེ་རྒན་ཡག་པོ་ཞིག་བྱ་ནས་བོད་པའི་ཕྲུ་གུ་ཚོར་བོད་ཡིག་ཡག་པོ་བསླབ་རྒྱུ་ཡིན། ང་ཚོ་བོད་ནང་ལ་རྒྱ་མིས་བོད་པའི་ཕྲུ་གུ་ལ་བོད་ཡིག་བསླབ་བཅུག་གི་མེད། ཡིན་ནའང་། ང་ཚོ་རྒྱ་གར་རང་བཙན་ལུང་པར་སོ་སོའི་རིག་གཞུང་བདག་པོ་རྒྱག་པ་ལ་བོད་པ་ཚང་མས་བོད་ཡིག་ཤེས་དགོས། དགེ་རྒན་གཅིག་གིས་སློབ་ཕྲུག་མང་པོ་ལ་སློབ་སྦྱོང་སྤྲད་ཐུབ་པ་དང་སློབ་ཕྲུག་ཚོས་མི་མང་པོ་ལ་སློབ་སྦྱོང་སྤྲད་ནས་བོད་མི་ཚང་མ་སློབ་སྦྱོང་ཡོད་པ་ཞིག་བཟོ་ཐུབ་པ་བྱ་རྒྱུ་དེ་ཡིན། ང་རང་གི་དམིགས་ཡུལ་ད་གཉིས་ནས་ག་རེ་བྱེད་ཐུབ་པ་ཡིན་ན་དགའ་པོ་ཡོང་ས་རེད། ང་རང་གི་དམིགས་ཡུལ་འགྲུབ་སོང་ན་མི་ཚང་མ་ལ་ཕན་ཐོགས་པ་ཞིག་བྱ་རྒྱུའི་དམ་བཅའ་བརྟན་པོ་ཡོད།

བསྟན་འཛིན་ནོར་སྒྲོན། འཛིན་གྲྭ་ལྔ་པ། མོན་གྷོ་སཾ་བྷོ་ཊ་གཞི་འོག་ཡན་ལག་དང་པོའི་སློབ་གྲྭ། ང་ཚོ་མི་ཞིག་ཡིན་པའི་ཆ་ནས་དོ་བདག་སོ་སོ་ལ་དམིགས་ཡུལ་ངེས་པར་དུ་དགོས། གལ་སྲིད་མི་ལ་དམིགས་ཡུལ་ཡོད་ན་མི་དེ་མི་ཚེ་དོན་དང་ལྡན་པ་ཞིག་ཡོང་གི་རེད། གལ་སྲིད་མི་ལ་དམིགས་ཡུལ་མེད་ན་མི་དེ་མི་ཚེ་བསྐྱལ་ཁག་པོ་ཆགས་ཀྱི་རེད། དེ་འདྲ་བྱུང་ན་ང་ཚོ་མི་ལུས་ཐོབ་པ་ཆོ་མེད་ཆགས་ཀྱི་རེད། སྤྱིར་བཏང་མི་ལུས་རིན་ཆེན་དེ་གསེར་ལས་དཀོན་ཞེས་བཤད་སྲོལ་ལྟར་ང་ཚོས་དུས་ནམ་ཡང་འཕྲོ་བརླག་གཏོང་རྒྱུ་མེད། ང་ཚོའི་དམིགས་ཡུལ་དེ་འགྲུབ་པར་བྱེད་པར་དཀའ་ངལ་མང་པོ་ཡོང་གི་རེད། དཀའ་ངལ་དེ་དག་ལ་གདོང་ལེན་བྱེད་པ་ལས། ལམ་སང་སེམས་ཤུགས་ཆག་རྒྱུ་མེད། མི་སུ་འདྲ་ཞིག་ཡིན་ཡང་དཀའ་ངལ་མེད་པའི་གྲུབ་འབྲས་ཐོབ་རྒྱུ་ཞིག་མེད། དཔེར་ན། ཚན་རིག་པ་སྐད་གྲགས་ཆེན་པོ་ཞིག་ཡིན་ཡང་། ཁོང་གིས་བརྟག་དཔྱད་གང་འདྲ་ཞིག་བྱས་ཀྱང་དེ་ལ་ཐེངས་གཅིག་ལ་གྲུབ་འབྲས་ཐོབ་པ་དང་། ལས་དོན་འགྲུབ་པ་བྱུང་བ་ཧ་ལམ་མེད་པ་རེད། ཡིན་ན་ཡང་། ཁོང་གིས་དཀའ་ངལ་དེ་ལ་གདོང་ལེན་བྱས་ནས་གྲུབ་འབྲས་ཐོབ་པ་བྱུང་ཡོད། སྤྱིར་བཏང་མི་ཡི་མི་ཚེའི་ནང་དཀའ་ངལ་མང་པོ་འབྱུང་གི་རེད། དེ་ལ་ལམ་སང་གདོང་ལེན་དང་སེམས་ཤུགས་ནམ་ཡང་ཆག་རྒྱུ་མེད། ངའི་དམིགས་ཡུལ་ནི་དགེ་རྒན་ཞིག་ཡིན། གང་ཡིན་ཟེར་ན། མིའི་མི་ཚེའི་མདུན་ལམ་ཆེད་དུ་དགེ་རྒན་ལས་ལྷག་་པ་སུ་ཡང་མེད། དགེ་རྒན་གྱིས་མིའི་མི་ཚེའི་མདུན་ལམ་ལས་སླ་པོའི་ངང་ཡག་པོ་ཅིག་བཟོ་ཡི་ཡོད། ཕྲུ་གུ་ཆུང་དུས་ནས་ཕ་མས་བྱམས་སྐྱོང་དང་བཟང་སྤྱོད་ཀྱི་བསླབ་བྱ་བརྒྱབ་ཀྱི་ཡོད། དེའི་རྗེས་དགེ་རྒན་གྱིས་སློབ་ཕྲུག་ཚོར་སློབ་སྦྱོང་དང་སྤྱོད་པ། ལྷག་བསམ། སྒྲིག་འཛུགས་སོགས་སློབ་ཀྱི་ཡོད། དགེ་རྒན་གྱིས་སློབ་ཕྲུག་ལ་དགའ་སྡུག་གི་དབྱེ་བ་དང་སོ་སོའི་རྣམ་སྤྱོད་བེད་སྤྱོད་བྱེད་སྟངས་བཅས་སློབ་ཀྱི་ཡོད། དགེ་རྒན་གྱིས་སློབ་ཚན་ཁག་པོ་རྣམས་ལས་སླ་པོ་དང་། དངོས་ཡོད་གནས་ཚུལ། འཕྲུལ་ལས་རིག་པ་བེད་སྤྱོད་བྱས་ནས་སློབ་ཀྱི་ཡོད། དགེ་རྒན་གྱིས་སློབ་ཕྲུག་སོ་སོའི་འཇོན་ཐང་ལ་དཔག་པའི་ཡར་རྒྱས་དང་གདེང་ཚོད་སླེབས་སྟངས་ཐོག་བློ་སྟོབས་སྤེལ་བ་བཟོ་ཡི་ཡོད། སྤྱི་ཚོགས་དང་རྒྱལ་ཁབ་ཡར་རྒྱས་འགྲོ་བ་ལ་དགེ་རྒན་ཡག་པོ་ཞིག་དགོས་པ་ཤིན་ཏུ་གལ་ཆེན་པོ་ཡིན། མ་འོངས་པའི་སོན་རྩ་ཡག་པོ་ཞིག་མེད་ན། སྤྱི་ཚོགས་དང་རྒྱལ་ཁབ་ལ་དཀའ་ངལ་འཕྲད་ཀྱི་རེད། ང་རང་དགེ་རྒན་ཞིག་བྱེད་འདོད་ཀྱི་དམིགས་ཡུལ་ནི་མི་གཞན་ལ་སློབ་སྦྱོང་ཡག་པོ་ཞིག་སྤྲོད་རྒྱུའི་ཆེད་ཡིན། མི་གཞན་ལ་སློབ་སྦྱོང་ཡག་པོ་ཞིག་སྤྲོད་ཐུབ་ན་མི་དེ་མི་ཚེ་སྐྱིད་པོ་དང་སྤྱི་ཚོགས་ལ་ཞབས་ཞུ་ཡག་པོ་ཞུ་ཐུབ་མཁན་ཞིག་ཡོང་གི་རེད། དེ་འདྲ་སོང་ཙང་ངའི་དམིགས་ཡུལ་ནི་དགེ་རྒན་བཟང་པོ་ཞིག་བྱ་རྒྱུ་དེ་ཡིན།

བསྟན་འཛིན་དབྱངས་ཅན། འཛིན་གྲྭ་གསུམ་པ། སཾ་བྷོ་ཊ་ཀེ་ལཱཤ་པུ་ར་གཞི་རིམ་འོག་མ། ངའི་མིང་ལ་བསྟན་འཛིན་རྣམ་དཀར་ཟེར་གྱི་ཡོད། གུས་མོ་རང་ལོ་བརྒྱད་ཡིན། འཛིན་རིམ་གསུམ་པ་ཡིན། ངའི་སློབ་གྲྭའི་་མིང་ལ་སཾ་བྷོ་ཀེལཱཤ་པུ་ར་ཡིན། ང་འཛིན་རིམ་དང་པོ་ནས་གཞས་དང་ཞབས་བྲོ་ལ་དགའ་པོ་ཡོད། ངའི་མ་འོངས་པའི་དམིགས་ཡུལ་ནི་ཟློས་གར་དགེ་རྒན་བྱ་རྩིས་ཡོད། གང་ཡིན་ཟེར་ན་བོད་པའི་གཞས་དང་ཞབས་བྲོ་ནི་རིག་གཞུང་གི་ཆ་ཤས་གལ་ཆེན་པོ་ཞིག་ཡིན་དུས། ང་ཚོས་བོད་ཀྱི་རིག་གཞུང་ལ་བདག་གཉེར་བྱ་རྒྱུ་ནི་གལ་ཆེ་ཤོས་ནང་གི་ཆེ་ཤོས་དེ་རེད། ང་རང་ལ་ཆ་མཚོན་ན་གཞས་དང་ཞབས་བྲོ་ལ་ཧ་ཅང་དགའ་པོ་ཡོད། དམིགས་བསལ་གྱིས་རེས་གཟའ་ལྷག་པ་ནམ་ཡིན་ལ་སློབ་གྲྭར་ཞོགས་པ་བསང་གསོལ་དང་ལྷག་དཀར་སྲུང་བརྩི། དེ་བཞིན་སྒོར་གཞས་འཁྲབ་སྲོལ་ཡོད་ཙང་། ང་རང་རེས་གཟའ་བདུན་གྱི་ནང་ནས་རེས་གཟའ་ལྷག་པ་སྐྱིད་ཤོས་ཡིན་པ་ནི་གཞས་འཁྲབ་རྒྱུ་ཡོད་པ་དེའི་རྐྱེན་གྱིས་རེད། དེ་འདྲ་སོང་ཙང་ང་རང་ཟློས་གར་དགེ་རྒན་བྱེད་འདོད་ཡོད། ང་རང་སེམས་སྐྱིད་པོ་ཡོང་བའི་ཆེད་དུ་གཞས་གཏོང་བ་དང་ཞབས་བྲོ་འཁྲབ་པ་སོགས་བྱེད་ཀྱི་ཡོད། ཟློས་གར་གྱི་དམིགས་བསལ་ཁྱད་ཆོས་ཤིག་ནི་སོ་སོ་སྐྱིད་པོ་ཡོང་བ་མ་ཟད་མི་གཞན་མང་པོ་ཞིག་ཀྱང་སྐྱིད་པོ་བཟོ་ཐུབ་ཀྱི་ཡོད། དེ་ཡང་ཆོས་རེད་དྲན་གྱི་འདུག ང་རང་ཉིད་ཀྱིས་དོ་སྣང་ལ་ཟློས་གར་དགའ་པོ་ཡོད་མཁན་གྱི་མི་དེ་ནི་ནམ་རྒྱུན་ནས་སེམས་སྐྱིད་པ་དང་། རྒས་རྒྱུ་ཞེ་དྲགས་མེད་པ། མི་གཞན་དང་མཐུན་པོ་ཡོད་མཁན་འདྲ་པོ་མཐོང་བྱུང་། དེ་ནི་ངའི་བསམ་ཚུལ་ཡིན། མི་སུ་འདྲ་ཞིག་ཡིན་རུང་རང་ཉིད་སོ་སོར་མ་འོངས་པར་དམིགས་ཡུལ་དགོས་པ་ནི་ཧ་ཅང་གལ་ཆེན་པོ་ཞིག་རེད། དམིགས་ཡུལ་མེད་པའི་མི་ཞིག་ཡིན་ན་མུན་པའི་ནང་དུ་འཁྱམས་བཞིན་པ་ལྟ་བུ་ཆགས་ཀྱི་རེད། དེ་སོང་ཙང་དམིགས་ཡུལ་རེ་ཟུང་བཟུང་ནས་དེའི་ཐོག་རྒྱུན་དུ་འབད་བརྩོན་བྱ་རྒྱུ་ནི་མིའི་མི་ཚེའི་ནང་ཧ་ཅང་གལ་ཆེན་པོ་ཆགས་ཡོད། ང་ཟློས་གར་དགེ་རྒན་བྱས་ན་ང་ཚོའི་བོད་པའི་སློབ་ཕྲུག་ལ་གཞས་དང་ཞབས་བྲོ། རོལ་ཆ་ཡག་པོ་སློབ་ཀྱི་ཡིན། གཞས་ནི་རིག་གནས་གཞན་དང་གཅིག་མཚུངས་ཀྱིས་གལ་ཆེན་པོ་ཆགས་ཡོད། མི་ཞིག་ལ་སྒྱུ་རྩལ་གང་ཙམ་མང་བ་ཡོད་ན་བཟང་བས། ཟློས་གར་ནི་མིའི་མིི་ཚེའི་བརྒྱུད་ལམ་དུ་ཧ་ཅང་གལ་ཆེ་བའི་སྒྱུ་རྩལ་ཞིག་རེད། ང་ཚོ་སློབ་གྲྭ་སཾ་བྷོ་ཀེལཱཤ་པུ་རའི་ཟློས་གར་རྒན་ལགས་ཀྱིས་གཞས་དང་ཞབས་བྲོ་དཔེ་ཡག་པོ་སློབ་ཀྱི་རེད། ཁོང་ལ་མིག་དཔེ་བལྟས་ནས་ང་མ་འོངས་པ་ཟློས་དགེ་བྱ་འདོད་ཡོད། ངའི་དམིགས་ཡུལ་འདིའི་ཐོག་འབད་བརྩོན་ཡག་པོ་བྱ་རྒྱུ་ཡིན།

བསྟན་འཛིན་མི་དབང་། འཛིན་གྲྭ་ལྔ་པ། མེས་དབོན་གཙུག་ལག་དཔེ་སྟོན་སློབ་གྲྭ། དམིགས་ཡུལ་ནི་མིའི་མི་ཚེའི་ནང་ཧ་ཅང་གལ་ཆེན་པོ་རེད། ལས་ཀ་དང་སློབ་སྦྱོང་གང་འདྲ་ཞིག་བྱས་ཀྱང་དམིགས་ཡུལ་ནི་ངེས་པར་དུ་ཡོད་དགོས་པ་རེད། གལ་སྲིད་དམིགས་ཡུལ་མེད་པར་ལས་ཀ་དང་སློབ་སྦྱོང་གང་འདྲ་ཞིག་བྱས་ཀྱང་འབྲས་བུ་ཡག་པོ་ཞིག་འགྲུབ་མི་སྲིད། ང་ཚོ་སློབ་ཕྲུག་ཚང་མས་དམིགས་ཡུལ་འདྲ་མིན་སྣ་ཚོགས་ཤིག་སོ་སོའི་སེམས་ལ་བཅངས་ཡོད། དཔེར་ན། སློབ་ཕྲུག་ཁ་ཤས་ནི་ཆེན་པོ་ཆགས་རྗེས་དགེ་རྒན་བྱ་རྒྱུའི་དམིགས་ཡུལ་དང་། ཁ་ཤས་ནི་སྨན་པ། ཁ་ཤས་ནི་ཆབ་སྲིད་པ། ཁ་ཤས་ནི་གཞུང་ཞབས་པ། ཁ་ཤས་ནི་ཚན་རིག་པ་སོགས་ཧ་ཅང་མང་པོ་ཡོད། བྱས་ཙང་ངས་ད་ལྟ་ནས་དམིགས་ཡུལ་བརྟན་པོ་ཞིག་བཟུང་སྟེ་སློབ་སྦྱོང་ལ་འབད་བརྩོན་བྱེད་ཀྱི་ཡོད། ངའི་མ་འོངས་པའི་དམིགས་ཡུལ་ནི་ང་མ་འོངས་པར་ཆེན་པོ་ཆགས་དུས་ཨར་ལས་འཆར་འགོད་པ་ཞིག་བྱ་རྒྱུ་ཡིན། དམིགས་ཡུལ་དེེ་སྒྲུབ་ཆེད་ངའི་པ་ལགས་ཀྱིས་འཆར་འགོད་གནང་བའི་ཁང་པའི་རི་མོ་འདྲ་མིན་ཁག་ལ་བལྟས་ནས་ཉམས་མྱོང་གསོག་རྒྱུ་དང་། རྒྱ་གར་ཨར་ལས་འཆར་འགོད་པ་མང་པོས་བརྩམས་པའི་དེབ་ནས་སློབ་སྦྱོང་བྱ་རྒྱུ་ཡིན། ལྷག་པར་དུ་ང་བོད་པའི་དགོན་པ་དང་ལྷ་ཁང་སོགས་ཀྱི་སྐོར་ལ་འཆར་འགོད་བྱ་རྒྱུའི་འདོད་པ་ཆེན་པོ་ཡོད། ངས་ཨར་ལས་འཆར་འགོད་པ་བྱེད་རྒྱུའི་དམིགས་ཡུལ་དེ་འདེམས་དགོས་པའི་རྒྱུ་ཚན་ནི། དང་པོ་ངའི་པ་ལགས་ཀྱང་ཨར་ལས་འཆར་འགོད་པ་ཞིག་རེད། གཉིས་པ་ནི་ང་ནམ་རྒྱུན་དུ་རི་མོ་འབྲི་རྒྱུར་ཧ་ཅང་དགའ་པོ་ཡོད། གསུམ་ནི་ང་ཁང་པའི་རི་མོ་འབྲི་འདོད་ཆེན་པོ་ཡོད། བཞི་པ་ནི་ངའི་པ་ལགས་ཀྱིས་ཀྱང་ང་ལ་དུས་རྟག་ཏུ་ཨར་ལས་འཆར་འགོད་པའི་ལས་ཀ་དེ་ཧ་ཅང་ཡག་པོ་ཡོད་པའི་སྐོར་མང་པོ་གསུངས་གནང་གི་འདུག། དེར་བརྟེན་ངས་ཨར་ལས་འཆར་འགོད་པ་བྱེད་རྒྱུའི་དམིགས་ཡུལ་དེ་བཟུང་པ་ཡིན། ངས་སློབ་སྦྱོང་ལ་འབད་བརྩོན་ཧུར་ཐག་བྱས་ཏེ་དམིགས་ཡུལ་དེ་སྒྲུབ་ཐུབ་པ་བྱེད་ཀྱི་ཡིན།

བསྟན་འཛིན་དཔུང་རྒྱན། འཛིན་གྲྭ་ལྔ་པ། མོན་གྷོ་སཾ་བྷོ་ཊ་གཞི་འོག་ཡན་ལག་དང་པོའི་སློབ་གྲྭ། ངའི་མིང་ལ་བསྟན་འཛིན་དཔུང་རྒྱན་ཟེར། ང་ད་ལྟ་འཛིན་རིམ་ལྔ་པའི་ནང་སློབ་སྦྱོང་བྱེད་བཞིན་ཡོད། ང་ཚོའི་མི་ཚེའི་ནང་ལ་དམིགས་ཡུལ་དགོས་རྒྱུ་གལ་ཆེན་པོ་ཡིན། ངའི་མ་འོངས་པའི་དམིགས་ཡུལ་ནི་གནམ་གྲུའི་ཁ་ལོ་བ་བྱ་རྒྱུ་ཡིན། རྒྱུ་མཚན་ནི་གནམ་གྲུའི་ཁ་ལོ་བ་བྱས་ན་ང་རང་ས་ཆ་གང་སར་འགྲོ་ཡ་རག་པ་མ་ཟད། ལུང་པ་འདྲ་མིན་སྣ་ཚོགས་ཀྱི་རིག་གཞུང་དང་སྐད་ཡིག་སོགས་ཀྱི་སྐོར་ལ་སྦྱོང་བརྡར་རག་པ་མ་ཟད། གནམ་གྲུའི་ཁ་ལོ་བ་རྣམས་ལ་གླ་ཆ་ཡང་ཡག་པོ་ཡོད། ང་ཆུང་དུས་གནམ་གྲུའི་རྩེད་མོ་རྩེད་རྒྱུ་དང་། གནམ་གྲུ་དང་འབྲེལ་བའི་ལྟད་མོ་ལ་ཧ་ཅང་དགའ་པོ་ཡོད། ང་རང་གནམ་གྲུའི་ནང་འགྲོ་རྒྱུར་ཡང་དགའ་པོ་ཡོད། གནམ་གྲུའི་སྒེའུ་ཁུང་ནས་ཕྱིར་ལྟ་དུས་སྤྲིན་པ་དང་ས་ཆ་ཚང་མ་སྙིང་རྗེ་མོ་མང་པོ་མཐོང་རྒྱུ་ཡོད། གནམ་གྲུའི་ཁ་ལོ་བ་བྱེད་པའི་ཆེད་དུ་ད་ལྟ་ནས་སློབ་སྦྱོང་ཡག་པོ་བྱེད་དགོས། ང་རང་གནམ་གྲུའི་ཁ་ལོ་བ་བྱེད་ཐུབ་ན་མི་གཞན་ལ་ཕན་ཐོགས་ཀྱི་རེད་བསམ་གྱི་འདུག། གནམ་གྲུའི་ཁ་ལོ་བའི་ཆེད་དུ་འཛིན་རིམ་བཅུ་གཉིས་ཐོན་ནས་མཐོ་རིམ་སློབ་གྲྭར་ལོ་ཁ་ཤས་རིང་སློབ་སྦྱོང་བྱེད་དགོས། ང་གནམ་གྲུ་གཏོང་མཁན་བྱེད་མ་ཐུབ་ན། ངའི་མ་འོངས་པའི་དམིགས་ཡུལ་ནི་ཉེན་རྟོག་པ་བྱ་འདོད་ཡོད། ཉེན་རྟོག་པ་བྱས་ན་སྤྱི་ཚོགས་ནང་ཕན་ཐོགས་པའི་ལས་ཀ་བྱེད་ཐུབ་ཀྱི་རེད། གལ་སྲིད་སྤྱི་ཚོགས་ནང་ལས་ཀ་སྡུག་ཅག་ དཔེར་ན། རྐུ་མ་རྒྱག་པ་དང་མི་གསོད་པ་ལ་སོགས་པ་བཀག་འགོག་ཐུབ་ཀྱི་རེད། ཉེན་རྟོག་པས་སོ་སོའི་རྒྱལ་ཁབ་སྲུང་ཐུབ་ཀྱི་རེད། ང་ཉེན་རྟོག་པ་རྣམས་ལ་སྐད་ཆ་ཤོད་རྒྱུར་དགའ་པོ་ཡོད། ཉེན་རྟོག་པ་བྱེད་པའི་དོན་དུ་སློབ་སྦྱོང་ཙམ་མ་ཡིན་པར་ལུས་སེམས་ཡང་བདེ་པོ་དགོས། ཉེན་རྟོག་པ་རྣམས་ཀྱིས་སོ་སོའི་རྒྱལ་ཁབ་ཀྱི་ཆེད་དུ་སྲོག་ཡང་སྤྲོད་ཐུབ་ཀྱི་རེད། ཉེན་རྟོག་པ་རྣམས་ས་གནས་གང་སར་གནས་སྤོས་གཏོང་གི་ཡོད། རྒྱལ་ཁབ་ཚང་མར་སོ་སོའི་ཉེན་རྟོག་པ་མང་པོ་ཡོད། རྒྱ་གར་ནང་ལ་ཡང་ཉེན་རྟོག་པ་ཧ་ཅང་མང་པོ་ཡོད། ཉེན་རྟོག་པའི་ལས་དོན་གཙོ་བོ་ནི་མི་མང་ལ་སྲུང་སྐྱོབ་བྱ་རྒྱུ་དེ་ཡིན། ངས་ཉེན་རྟོག་པ་ལ་ཧ་ཅང་གུས་ཞབས་དང་བརྩེ་བཀུར་བྱེད་ཀྱི་ཡོད། གལ་སྲིད་མ་འོངས་པར་ང་རང་ཉེན་རྟོག་པ་ཆགས་ན་ང་རང་རྒྱལ་ཁབ་ཀྱི་ཆེད་དུ་ཞབས་ཕྱི་ཞུ་ཐུབ་པའི་རེ་བ་ཡོད།

བསྟན་འཛིན་རྒྱལ་སྲས། འཛིན་གྲྭ་ལྔ་པ། སཾ་བྷོ་ཊ་གྷོ་ཊན་གའུ། ངའི་མ་འོངས་པའི་དམིགས་ཡུལ་གཙོ་བོ་ནི་མི་ཡག་པོ་ཞིག་ཆགས་ཐུབ་པའི་རེ་བ་བྱེད་ཀྱི་ཡོད། མི་ཡག་པོ་ཞིག་ཆགས་ཐུབ་པ་ལ་ཆུང་དུས་ནས་སློབ་གྲྭའི་སྐབས་སློབ་སྦྱོང་ཡག་པོ་བྱེད་དགོས་པ་དང་ཕ་མ་སྤུན་མཆེད་དང་གྲོགས་པོ་གྲོགས་མོ་མཉམ་དུ་མཐུན་ལམ་ཡག་པོ་བྱེད་དགོས། ད་དུང་མི་གཞན་ལ་རོགས་པ་གང་ཐུབ་བྱེད་དགོས། རྒྱུ་མཚན་ནི་མི་ཡག་པོ་ཞིག་ཆགས་ཐུབ་ན་རང་དང་གཞན་གཉིས་ཀ་སྐྱིད་པོ་ཡོང་གི་རེད། དེ་མ་ཟད་རྒྱལ་ཁབ་ཕན་ཚུན་ཡང་ཞི་བདེ་ཡོང་གི་རེད། མཐའ་ན་སེམས་ཅན་འབུ་སྲིན་ཡན་ཆད་ལ་ཡང་ཞི་བདེ་དང་སྐྱིད་པོ་ཡོང་གི་རེད། ང་ཚོའི་རྩ་བའི་བླ་མ་རྒྱལ་བ་རིན་པོ་ཆེའི་བཀའ་སློབ་ནང་མི་བཟང་པོ་དང་ཡག་པོ་བྱེད་དགོས་པའི་སྐོར་ཡང་ཡང་གནང་གི་ཡོད། དེ་མ་ཟད་ནམ་རྒྱུན་དུ་མི་ལ་རོགས་པ་བྱེད་དགོས་པ་དང་དམིགས་བསལ་གྱིས་མི་སྐྱོ་བོ་རྣམས་ལ་རོགས་པ་གང་ཐུབ་བྱེད་དགོས་པའི་བཀའ་སློབ་ཡང་ཡང་གནང་གི་ཡོད། མ་འོངས་པར་ང་རང་ཁོང་གི་བཀའ་སློབ་རྣམས་སེམས་ལ་བཞག་ནས་ལས་ཀ་བྱེད་ཀྱི་ཡིན། མ་འོངས་པར་ང་རང་དམིགས་ཡུལ་དེ་འགྲུབ་པའི་ཆེད་དུ་ད་ལྟ་ནས་སློབ་སྦྱོང་ཡག་པོ་བྱེད་ཀྱི་ཡིན། ནམ་རྒྱུན་དུ་ངའི་ཕ་མ་གཉིས་ནས་ཀྱང་མི་ཡག་པོ་དང་སེམས་པ་བཟང་པོ་བྱ་དགོས་པ་ཉིན་ལྟར་བསླབ་བྱ་གནང་གི་ཡོད། དེ་མ་ཟད་སློབ་ཕྲུག་གཞན་ལ་ཡང་རོགས་པ་བྱ་དགོས་པ་དང་འཁྲུག་པ་མ་རྒྱག་ཅེས་གསུང་གི་འདུག གལ་སྲིད་ང་ཚོའི་འཛམ་གླིང་ནང་གི་མི་ཚང་མ་སེམས་པ་བཟང་པོ་དང་མི་གཅིག་གིས་གཅིག་ལ་ཕན་ཚུན་བསམ་ཤེས་དང་རོགས་རམ་བྱེད་ཐུབ་པ་ཡིན་ན་ང་ཚོའི་སྤྱི་ཚོགས་དེ་ཧ་ཅང་གི་ཞི་བདེ་དང་སྣང་བ་སྐྱིད་པོ་ཞིག་ཡོང་གི་རེད། འཛམ་གླིང་ནང་གི་སྙན་གྲགས་ཅན་གྱི་མི་སྣ་ཚང་མས་སྤྱི་ཚོགས་ལྷིང་འཇགས་དང་བདེ་སྐྱིད་ལྡན་པ་ཞིག་ཡོང་བའི་ཆེད་དུ་སྐུ་ལས་མང་པོ་བསྐྱོན་པ་དང་ད་དུང་དུས་རྒྱུན་དུ་ང་ཚོ་ལ་མིག་དཔེ་བཟང་པོ་ཞིག་བསྟན་གནང་གི་ཡོད་པ་རེད། ང་རང་ཡང་གཙོ་བོ་༧གོང་ས་མཆོག་གཙོས་པའི་སྙན་གྲགས་ཅན་གྱི་མི་སྣ་རྣམས་ལ་མིག་དཔེ་བལྟས་ནས་མི་ཡག་པོ་དང་སེམས་པ་བཟང་པོ་ཞིག་ཆགས་རྒྱུའི་ཆེད་དུ་འབད་བརྩོན་ཧུར་ཐག་བྱ་རྒྱུའི་དམིགས་ཡུལ་སེམས་ལ་བཅངས་པ་མ་ཟད། གལ་ཏེ་མི་ཡག་པོ་ཞིག་ཆགས་ཐུབ་པ་ཡིན་ན་དགེ་རྒན་དང་མི་རྒན་པ་རྣམས་ལ་གུས་ཞབས་བྱེད་ཀྱི་ཡིན། ལྷག་པར་དུ་མི་ཡག་པོ་ཆགས་མ་ཆགས་གཙོ་བོ་རང་ཉིད་ཀྱི་གྲོགས་པོ་ལ་ཡང་རག་ལས་ཀྱི་ཡོད་པས། ང་རང་མི་ཚེའི་ནང་ལ་གྲོགས་པོ་བཟང་པོ་ཚོ་དང་མཉམ་དུ་འགྲོ་རྒྱུ་མ་ཟད་མི་ཡག་པོ་ཞིག་ཆགས་ན་ཐ་མག་དང་ཆང་བཏུང་གི་མིན།