ཕུར་བུ་ཚེ་དབང་། འཛིན་གྲྭ་བཅུ་གཉིས། མོན་གྷོ་སམ་བྷོ་ཊ་གཏན་ཉིན་སློབ་གྲྭ། སྤྱིར་འཛམ་གླིང་འདིའི་ནང་གི་མི་རེ་ཚང་རང་ཉིད་ལ་བྱམས་བརྩེས་བསྐྱངས་པའི་བཀའ་དྲིན་ཅན་གྱི་མི་ནི་གལ་ཆེན་ཡིན་ཞིང་། མི་སྣ་དེ་འདྲ་རང་ཉིད་ཀྱི་མི་ཚེའི་ནང་མི་ཉུང་བ་ཡོད་ངེས། བདག་ལ་མཚོན་ན་བྱམས་བརྩེས་བསྐྱངས་པའི་མི་ནི་དཀའ་ངལ་གྱི་སྨག་རུམ་ནང་ལྷུང་དུས་རོགས་རམ་གྱི་ཉི་མས་སྐྱོབ་པར་བྱེད་མཁན་གྱི་མི་སྣ་དག་ཡིན། དེ་ཡང་ངའི་མི་ཚེའི་ནང་ཉི་ཟླ་ལྟ་བུས་བྱམས་བརྩེས་སྐྱོང་མཁན་གཙོ་བོ་གཉིས་ཡོད། གཅིག་ནི་བརྩེ་བའི་ཕ་མ་གཉིས་དང་། གཞན་དེ་བཀའ་དྲིན་གཞལ་བར་དཀའ་བའི་དགེ་རྒན་དག་ཡིན། ཕ་མ་དང་དགེ་རྒན་མེད་ན་ངའི་མི་ཚེ་འདི་ཆ་ཚང་བ་ཞིག་ཡོང་མི་ཐུབ། རྒྱུ་མཚན་ནི་ཕ་མ་ནི་གཉིས་ངའི་མི་ཚེའི་ནང་དུས་ནམ་ཡང་མཉམ་དུ་ཡོད་ཅིང་། ང་རང་སེམས་པ་མི་སྐྱིད་པའི་སྐབས་ཁོང་གཉིས་ཀྱིས་སེམས་གསོ་གནང་གི་ཡོད། དགེ་རྒན་ནི་ད་ལྟ་བདག་གིས་རྩོམ་ཡིག་འབྲི་ཐུབ་པ་དང་། ཤེས་ཡོན་ཏོག་ཙམ་ཡོད་པ་དེའི་འབྱུང་ཁུངས་གཅིག་པུ་དེ་རེད། ཕ་མ། ང་རང་ཚོ་འཛམ་བུ་གླིང་འདིའི་ནང་ཡོང་དུ་འཇུག་མཁན་གྱི་ཐབས་ཤེས་གཉིས་ནི་ཕ་མ་ཡིན་ཞིང་། ད་ལྟ་ང་རང་ཚོ་ཇི་འདྲ་ཡོད་པ་དེ་ཡང་ཕ་མའི་བཀའ་དྲིན་ཉག་གཅིག་ལས་བྱུང་བ་རེད། ཕ་མའི་བྱམས་བརྩེ་ལྟ་བུ་མི་གཞན་སུས་ཀྱང་གནང་ཐུབ་རྒྱུ་མ་རེད། བདག་ལ་མཚོན་ན་ཕ་མ་གཉིས་ནི་ཧ་ཅང་རྩ་ཆེན་པོ་ཡིན་ཅིང་ཕ་མའི་བཀའ་དྲིན་ནི་གཞལ་དཀའ་བ་ཞིག་རེད། འོན་ཀྱང་བདག་གིས་མ་འོངས་དྲིན་ལན་གསོ་ཐབས་བྱ་རྒྱུའི་དམ་བཅའ་བཞག་ཡོད། བདག་གི་ཕ་མ་ནི་བདག་གི་ནུས་ཤུགས་ཡིན་ཞིང་ཁོང་གཉིས་བདག་གི་མི་ཚེའི་ཆ་ཤས་གལ་ཆེན་ཞིག་ཡིན། ཕ་མས་བདག་ལ་ཆུང་སྦར་མོ་གང་ནས་བྱམས་སྐྱོང་ཚད་མེད་གནང་པ་མ་ཟད་ངའི་མ་འོངས་པའི་ཆེད་སྐུ་ལས་ཚད་ལས་འདས་པ་གནང་དང་གནང་བཞིན་ཡོད་ཅིང་། ང་སྐྱེས་པའི་ཉིན་ནས་ཉིན་མཚན་ལྟོས་མེད་བདག་གི་བདེ་སྡུག་ཁོ་ན་བསམས་ཞིང་རང་དོན་ཡོངས་རྫོགས་བློས་བཏང་ཡོད། བདག་གི་ཨ་མས་ང་རང་ལོ་ན་གཉིས་མ་ཟིན་བར་མཚན་མོ་གཉིད་མ་ཁུག་པར་ངུས་ནས་དཀའ་ངལ་ཆེན་པོ་སྤྲད་མྱོང་གསུངས། དེ་ནི་བདག་གིས་ཕ་མ་གཉིས་སྡུག་ལ་སྦྱར་བའི་དཔེ་མཚོན་ཆུང་ཆུང་ཞིག་རེད་ཨང་། དགེ་རྒན། རྒྱ་གར་གྱི་མེས་པོ་དམ་པ་གྷན་དྷི་མཆོག་ནས་“ཕྲུ་གུ་སློབ་གྲྭའི་ནང་ནས་ཡང་བསྐྱར་སྐྱེ་གི་ཡོད།”ཅེས་གསུངས་པ་ལྟར། དགེ་རྒན་ནི་ང་ཚོ་འཛམ་གླིང་འདིའི་ནང་ཆ་ཚང་བར་སྐྱེ་འཇུག་མཁན་དེ་རེད། གུས་པ་ང་རང་གིས་ད་ལྟ་སློབ་སྦྱོང་ཏོག་ཙམ་ཤེས་པ་དེ་ཐམས་ཅད་དགེ་རྒན་གྱི་བཀའ་དྲིན་ཁོ་ན་ལ་བརྟེན་ནས་བྱུང་བ་ཡིན། ཁོང་ཚོས་རང་ཉིད་ཀྱི་སློབ་མ་ཚོའི་མདུན་ལམ་ལེགས་པོ་ཞིག་དང་། མི་བཟང་པོ་ཞིག་བཟོ་ཐབས་འབད་བརྩོན་ཕྱོགས་གང་ས་ནས་གནང་གི་ཡོད། ང་རང་གིས་རྒྱུན་དུ་སློབ་ཚན་མ་ཤེས་པ་དང་དོགས་གནས་ཡོད་པ་རྣམས་ཁོང་རྣམས་ལ་བཀའ་འདྲི་ཞུ་གི་ཡོད། ཁོང་རྣམ་པས་ངལ་བ་ཁྱད་བསད་ཀྱིས་དོན་གནད་རྣམས་ལས་སླ་པོའི་ངང་རྟོགས་ཐུབ་པ་བཟོ་གི་འདུག །དེར་བརྟེན་ཁོང་ཚོ་བདག་གི་སེམས་པའི་གཏིང་དུ་བཞད་པའི་མེ་ཏོག་དང་འཇའ་ཚོན་དག་ཡིན་ཞིང་། བདག་གིས་ནམ་ཡང་བརྗེད་མི་སྲིད་ལ། དྲིན་ལན་འཇལ་རྒྱུའི་ཁས་ལེན་ཞུའོ། །