བསྟན་འཛིན་ཟླ་དཀར། འཛིན་གྲྭ་བརྒྱད་པ། མེས་དབོན་གཙུག་ལག་དཔེ་སྟོན་སློབ་གྲྭ། མི་ལུས་རིན་ཆེན་ཕ་མ་ཁྱེད་ཀྱིས་གནང། ། མི་གྲལ་ཚུད་པའི་སློབ་སྦྱོང་ཁྱེད་ཀྱི་དྲིན། ། ཕ་མས་དྲིན་གྱིས་བསྐྱངས་པའི་བུ་མོ་ངས། ། ནར་སོན་དྲིན་ལན་འཇལ་རྒྱུ་བརྗེད་མི་སྲིད། ། ཕྱི་རོལ་དུ་གྲང་རླུང་འུར་འུར་དུ་ལྡང་ཞིང་སྟོན་དུས་ཀྱི་ལོ་འདབ་སེར་པོ་ས་ལ་ལྷུང་བཞིན་འདུག ང་རང་ཡང་དྲོ་སོབ་ཀྱི་འཛིན་གྲྭའི་ནང་སྔར་རྒྱུན་བཞིན་གྲོགས་མོ་ཚོ་དང་ལྷན་དུ་ལྐོག་གཏམ་བཤད་བཞིན་པའི་སྐབས་གློ་བུར་དུ་རྒན་ལགས་ཕྱག་ཏུ་ཕྱག་དེབ་ཅིག་བསྣམས་ཏེ་བྲེལ་འཚུབ་འཚུབ་ངང་འཛིན་གྲྭའི་ནང་ཕེབས་བྱུང། ཁོང་གིས་རྒྱུན་གཏན་ལྟར་བཀའ་མོལ་མང་པོ་མ་གསུངས་པར་ཅོག་སྟེང་ནས་ས་སྨྱུག་དཀར་པོ་ཞིག་བླངས་ཏེ་ནག་པང་གྲུ་བཞིའི་སྟེང་དུ་(བདག་ལ་བྱམས་བརྩེས་བསྐྱངས་པའི་བཀའ་དྲིན་ཅན། )ཞེས་པའི་རྩོམ་ཡིག་གི་བརྗོད་གཞི་ཞིག་བྲིས་ཏེ་ང་ཚོར་ངེས་པར་དུ་འབྲི་དགོས་པའི་དྲན་སྐུལ་ཞིག་བཏང་བྱུང། བརྗོད་གཞི་འདིའི་ཐོག་ལ་ངས་བསམ་བློ་ཡུན་རིང་བཏང་རྗེས་ངའི་དྲན་པའི་སྣང་ངོར་ངའི་བརྩེ་བའི་ཕ་མ་གཉིས་ཡིད་ལ་དབང་མེད་དུ་དྲན་བྱུང། ངའི་ཕ་མ་གཉིས་ནི་ངའི་མི་ཚེའི་ནང་གི་ལམ་སྟོན་སྒྲོན་མེ་ལྟ་བུ་ཡིན། ངའི་པཱ་ལགས་ནི་སམ་བྷོ་ཊ་སྤྱི་ཁྱབ་ཡིག་ཚང་གི་ལས་བྱེད་ཅིག་ཡིན་པ་དང། ངའི་ཨ་མ་ལགས་ནི་སློབ་ཆུང་སློབ་མའི་དགེ་རྒན་ཞིག་ཡིན། ཁོང་གཉིས་ཀྱིས་ངའི་མ་འོངས་པའི་མདུན་ལམ་གྱི་ཆེད་དུ་སྐུ་ལས་ཚད་མེད་བསྐྱོན་བཞིན་ཡོད། ངའི་ཕ་མ་གཉིས་ཀྱིས་ངའི་ལུས་ལ་གྱོན་ཆས་ལེགས་ཤོས་གཡོགས་གནང་བ་དང། ཞིམ་ཟས་ཚང་མ་ང་ལ་གནང་གི་ཡོད། ཁོང་གཉིས་ཀྱིས་ང་ཤེས་ཡོན་ལྡན་པའི་མི་བཟང་ཞིག་ཏུ་གྱུར་ཆེད་དཔེ་སྟོན་སློབ་གྲྭར་མངགས་བྱུང། དཔེ་སྟོན་སློབ་གྲྭ་ནི་ངའི་ཁྱིམ་གཉིས་པ་ལྟ་བུ་ཡིན། ཁོང་གཉིས་ཀྱིས་ང་དང་ངའི་མིང་སྲིང་ཚོའི་ཆེད་དུ་དཔྲལ་བའི་རྔུལ་ཆུ་ནམ་ཡང་བསྐམས་མ་མྱོང། གལ་སྲིད་དྲིན་ཅན་ཕ་མ་གཉིས་མེད་ན། ང་འཇིག་རྟེན་དེའི་སྟེང་དུ་ཡོད་མི་སྲིད། མཚམས་རེ་ང་རང་ཡིད་ཐང་ཆད་དུས་ཁོང་རྣམ་གཉིས་ཀྱིས་ང་ལ་སེམས་ཁུར་རོགས་རམ་དང་སེམས་ཤུགས་གནང་གི་ཡོད། ཡང་གལ་སྲིད་ང་རང་སློབ་སྦྱོང་གི་ཐོག་ནས་དཀའ་ངལ་འཕྲད་ཚེ། ངའི་ཕ་མ་གཉིས་ཀྱིས་སློབ་རོགས་དང་མཛུབ་སྟོན་གནང་གི་ཡོད། ཨ་མས་ང་ཚོ་མངལ་གྱི་ནང་ཟླ་བ་དགུ་ཙམ་གཅེས་ཉར་གནང་བ་མ་ཟད། རང་ཉིད་ཀྱི་མངལ་ནང་ཡོད་པའི་ཕྲུ་གུར་མ་གནོད་པའི་ཆེད་རང་གིས་དགའ་བའི་ཟས་རིགས་ཁག་ལའང་འཛེམས་གང་ཐུབ་གནང་གི་ཡོད། དེ་བཞིན་པཱ་ལགས་ཀྱིས་ཀྱང་དུས་ནམ་ཡང་ཨ་མའི་མངལ་ནང་ཡོད་པའི་ཕྲུ་གུའི་ཆེད་དུ་ག་དུས་ཡིན་ནའང་ཁྱིམ་གྱི་ལས་ཁུར་ཚང་མ་ལེན་རྒྱུར་འབད་བརྩོན་གནང་གི་ཡོད། དེར་བརྟེན་ཁོང་རྣམས་ཀྱི་བཀའ་དྲིན་དང་བྱམས་བརྩེའི་འོག་ང་ཚོར་ཡངས་ཤིང་མཛེས་པའི་འཇིག་རྟེན་འདི་མཐོང་རྒྱུ་བྱུང་བ་དང། དགའ་དགའ་སྤྲོ་སྤྲོའི་ངང་མི་ཚེ་དོན་དང་ལྡན་པ་ཞིག་སྐྱེལ་རྒྱུ་བྱུང་བ་རེད། དེ་དག་ནི་ཕ་མ་གཉིས་ཀྱི་བཀའ་དྲིན་ཉག་ཅིག་ཡིན། དེ་ལྟར་ཕ་མ་གཉིས་པོས་ང་ལ་ཆུང་བྱིས་དུས་ནས་འགྲོ་འདུག་སྤྱོད་གསུམ་གྱི་བསླབ་བྱ་བཟང་པོ་ཞིག་གནང་ཡོད་ལ། བདག་གི་རྒྱུད་ལ་འཇགས་པའི་བཟང་སྤྱོད་ཅུང་ཟད་དེ་ཡང་ཕ་མ་གཉིས་ཀྱི་བརྟེན་ནས་བྱུང་བ་ཞིག་རེད། དེང་སང་ལས་རྒྱུ་འབྲས་མེད་པའི་ཕྲུ་གུ་ཁ་ཤས་ཀྱིས་རང་གི་ཕྲུ་གུ་ན་སོ་རྒས་དུས་རྒན་གསོ་ཁང་དུ་སྐྱེལ་གྱི་ཡོད། དེ་དངོས་གནས་ནོར་འཁྲུལ་ཆེན་པོ་རེད། ཁོང་རྣམས་ན་སོ་རྒས་དུས་རྒན་སྐྱོང་དང་ཞབས་ཕྱི་ཞུ་རྒྱུ་དེ་ང་ཚོ་བུ་ཕྲུག་ཚོའི་གཞོལ་དུ་མེད་པའི་འོས་འགན་ཞིག་ཡིན། འཇིག་རྟེན་འདིའི་ནང་རང་ཉིད་ལ་བཀའ་དྲིན་ཆེ་ཤོས་ནི་ཕ་མ་གཉིས་རེད། ང་ཚོས་ཕ་མ་གཉིས་ཀྱི་བཀའ་དྲིན་དྲན་ཏེ་མ་འོངས་པར་རང་ཉིད་ཕྲུ་གུ་རྣམས་ཀྱང་བྱམས་དང་བརྩེ་བས་སྐྱོང་རྒྱུ་ཧ་ཅང་གི་གལ་ཆེན་པོ་རེད། ང་ཚོས་རྗེས་ཕྱོགས་སུ་རང་ཉིད་ཀྱི་ཕ་མའི་བཀའ་དྲིན་ངེས་པར་དུ་འཇལ་ཐུབ་པ་བྱ་དགོས། ངའི་ཕ་མ་གཉིས་སྐུ་ཚེ་ཡུན་རིང་བརྟན་ཅིང། ནད་མེད་ཚེ་རིང་ཡོང་བའི་སྨོན་ལམ་ཞུ། །