བསྟན་འཛིན་མཚུངས་མེད། འཛིན་གྲྭ་བདུན་པ། སྦེལ་ཀོབ་སཾ་བྷོ་ཊ། གངས་ཅན་བོད་ཀྱི་ལྷ་སྐལ་འཛམ་གླིང་ཞི་བདེའི་དེད་དཔོན་ཆེན་པོ་༸གོང་ས་ཡིད་བཞིན་ནོར་བུ་མཆོག་ལ་གུས་ཕྱག་དང་བཅས་གུས་པར་༸གོང་ས་༸སྦྱབས་མགོན་ཆེན་པོ་མཆོག་བཀའ་དྲིན་ཆེན་པོ་ཡིན་པའི་སྐོར་ས་བཅད་ལྔ་ཡི་འགོ་ནས་ཞུ་རྒྱུ་ཡིན། དང་པོ། བྱམས་བརྩེས་སྐྱོང་ཚུལ་ནི། གུས་པ་རང་ཉིད་སྐྱེས་པ་ནས་ད་ལྟ་བར་ཕ་མ་གཉིས་ཀྱིས་གཙོ་བོ་འགན་འཁུར་བའི་སྒང་ལ་སྤོ་སྤོ་དང་། རྨོ་མོ། ཨ་ཞང་། སྲུ་མོ། གྲོང་པ་ཁྱིམ་མཚེས་བཅས་ནས་ང་ལ་བྱམས་པོ་དང། བརྩེ་བ་ཆེན་པོའི་འགོ་ནས་གསོ་སྐྱོང་གནང་བྱུང་བ་དེ་ཚང་མ་༸གོང་ས་མཆོག་གི་བྱིན་རླབས་ལ་བརྟེན་ནས་བྱུང་བ་རེད། གཉིས་པ། ཤེས་ཡོན་སློབ་སྦྱོང་གནང་བ། ང་རང་ལོ་ལྔ་ཙམ་ནས་ད་བར་སློབ་གྲྭར་ཕྱིན་ནས་ཤེས་ཡོན་གང་ལ་གང་མཚམས་ཞིག་ཐོབ་ཡོད། དེ་དག་ཀྱང་༸གོང་ས་མཆོག་གིས་ཐོག་མར་སློབ་གྲྭ་འཛུགས་རྒྱུ་དང། དགེ་རྒན་ཚད་ལྡན་གོ་སྒྲིག་གནང་རྒྱུ། ཡང་ཡང་རྒྱ་ཆེ་བའི་བཀའ་སློབ་ལམ་སྟོན་གནང་རྒྱུ་ལ་སོགས་པ་ལས་བྱུང་བ་ཞིག་ཡིན། གསུམ་པ། དཔལ་འབྱོར་མཐུན་རྐྱེན་འཛོམས་པ། གུས་པ་སློབ་སྦྱོང་བྱེད་པའི་བརྒྱུད་རིམ་ནང་༸གོང་ས་མཆོག་དང་། ཁོང་གིས་བཙུགས་གནང་བའི་བཙན་བྱོལ་བོད་གཞུང། དེ་བཞིན་དྲིན་ཅན་ཕ་མ་བཅས་ཀྱི་བཀའ་དྲིན་ལ་བརྟེན་ནས་སློབ་སྦྱོང་བྱེད་པའི་སྐབས་ངེས་པར་དུ་ཚང་དགོས་པའི་ཆ་རྐྱེན་དག་ནི། ་འཛིན་ཁང་དང། ཁོར་ཡུག་གཙང་ལ་ཡིད་དུ་འོང་བའི་སློབ་གྲྭ། བྱམས་བརྩེ་དང་ལྷག་བསམ་གྱིས་ཕྱུག་པའི་དགེ་རྒན། ལྟ་སྐྱོང་གནང་མཁན་གྱི་མ་མ་ལ་སོགས་པ་དང། དེ་བཞིན་སྨྱུ་གུ་དང། འབྲི་དེབ། སློབ་དེབ་སོགས་མཐུན་རྐྱེན་ཆ་ཚང་བ་འཛོམས་ཡོད་པ་དག་ཀྱང་མཐར་ཐུག་༸གོང་ས་མཆོག་གི་བཀའ་དྲིན་ཉག་ཅིག་ལས་བྱུང་བ་ཡིན། བཞི་པ། འཕྲོད་བསྟེན། སེམས་ཅན་ཞིག་ཡིན་ཕྱིན་ཆད་སྐྱེས་པ་ནས་མ་འཆི་བར་མ་ན་བར་བདེ་ཐང་ངང་གནས་ཐུབ་ཐབས་ཤིན་ཏུ་ཁག མི་སུ་ཡིན་ཡང་ན་བའི་རྗེས་ལ་སྨན་ཁང་དུ་འགྲོ་དགོས་ཀྱི་ཡོད། དེར་བརྟེན་གུས་པ་དང་། གུས་པའི་འཛིན་གྲོགས་རྣམ་པ། ཕ་མ་སྤུན་མཆེད་བཅས་ཆམ་པ་ལ་སོགས་པ་ནད་ཆུང་ཆུང་ཞིག་ན་སྐབས་སེམས་ཁྲལ་མེད་པར་སྨན་ཁང་སྤྱི་དང། ལྷག་པར་དུ་བོད་གཞུང་འཕྲོད་བསྟེན་སྨན་ཁང། སྨན་རྩིས་ཁང་བཅས་སོ་སོའི་འདོད་པ་ལྟར་བསྟེན་ཆོག་ཡོད་པ་དེ་ཡང་༸གོང་ས་མཆོག་གི་ཐུགས་རྗེའི་འོད་ཟེར་ལས་བྱུང་བ་ཞིག་ཡིན། ལྔ་པ། སྡོད་གནས་ཀྱི་སྐོར། རང་གི་ལུང་པ་དགྲ་ལག་ཏུ་ཤོར་ཡང། མི་ཡུལ་དུ་རང་ཡུལ་དུ་ཡོད་པ་ལྟར་རང་ལ་དག་པའི་ནང་དང་ཞིང་ཁ་ཡོད་པ། ད་དུང་དགོན་པ་མཇལ་རྒྱུ་ཡོད་པ། གང་ལྟར་རྒྱུན་གཏན་གྱི་འཚོ་གནས་བྱེད་པའི་ཁོར་ཡུག་མཛེས་ཤིང་ཡིད་དུ་འོང་བ་དེ་འདྲ་ཞིག་གི་ནང་དུ་ང་རང་འཚོ་གནས་བྱེད་རྒྱུ་ཡོད་པ་ནི་༸གོང་ས་མཆོག་གི་བཀའ་དྲིིན་ཉག་ཅིག་གོ། ། མདོར་ན་གོང་གི་ས་བཅད་ལྔ་པོ་དེ་དག་གཙོ་བོ་ཆུ་མགོ་གངས་ལ་ཐུག་པ་ལྟར། ༸གོང་ས་མཆོག་གི་ཐུགས་རྗེའི་འོད་ཟེར་ལ་བརྟེན་ནས་འབྱུང་བས། ༸གོང་ས་༸རྒྱལ་བ་རིན་པོ་ཆེ་མཆོག་དང་། དེ་བཞིན་གཞུང་ཞབས་ལས་བྱེད་རྣམ་པ། དགེན་ལགས་རྣམ་པ། དྲིན་ཆེན་གྱི་ཕ་མ་སྤུན་མཆེད་བཅས་ལ་ཐུགས་རྗེ་ཆེ་ཞུ། མཐར་༸གོང་ས་མཆོག་གི་སྐུ་ཚེ་བསྐལ་བརྒྱའི་བར་དུ་བརྟན་པ་དང། མཛད་པ་འཕྲིན་ལས་གོང་ནས་གོང་དུ་འཕེལ་བའི་གསོལ་བ་སྨོན་ལམ་འདེབས་སོ། །