བཀྲ་ཤིས་འབྲུག་གྲགས། འཛིན་གྲྭ་ལྔ་པ། མེས་དབོན་གཙུག་ལག་དཔེ་སྟོན་སློབ་གྲྭ། ད་ལོའི་སྟོན་ཟླ་བཅུ་པའི་ཕྱི་ཚེས་ ༨ དང་ ༩ ཉིན་གཉིས་རིང་ཨ་མདོའི་དབྱར་སྐྱིད་ཆེན་མོ་བཏང་སོང་། སྐབས་དེར་ང་རང་ཧ་ཅང་སྐྱིད་པོ་བྱུང་སོང་ལ་ངའི་མི་ཚེ་ནང་གི་བརྗེད་དཀའ་བའི་ཉིན་མོ་ཞིག་ཀྱང་ཡིན། ངས་ཨ་མདོའི་དབྱར་སྐྱིད་སྐོར་ལ་རྩོམ་ཡིག་ཅིག་འབྲི་རྒྱུ་ཡིན། འབྲུག་སྒྲ་འུར་འུར་དུ་གྲགས་ཤིང་། ཆར་པ་ཤག་ཤག་ཏུ་འབབ་པའི་ཞོགས་པ་ཞིག་ལ་ང་རང་གཉིད་ལས་སད་སྐབས། ངའི་ཨ་མ་ལགས་སྔ་པོ་ནས་ཡར་ལངས་ཏེ་ཕྱིན་ཚར་འདུག དེ་ནི་ཨ་མ་ལགས་ཉིན་མ་ཁ་ཤས་སྔོན་ནས་ཨ་མདོའི་དབྱར་སྐྱིད་ལ་གྲ་སྒྲིག་བྱེད་དུ་འགྲོ་བཞིན་ཡོད་པ་ངས་ཤེས་ཀྱི་ཡོད། མོ་རང་ཞབས་བྲོ་འཁྲབ་མཁན་ཡང་རེད། ཞོགས་པ་ཆུ་ཚོད་༨པ་ཙམ་ལ་པ་ལགས་དང་གཅུང་མོ་གངས་ཅན་གསེར་བཟང་། ང་ཚོ་གསུམ་མལ་ལས་ལངས་ཏེ་ཨ་མདོའི་དབྱར་སྐྱིད་ལ་འགྲོ་རྒྱུར་གྲ་སྒྲིག་བྱས་པ་ཡིན། དེ་དུས་གནམ་ངོ་ཡང་རིམ་གྱིས་དྭངས་ཏེ་དྷ་རམ་ས་ལའི་རི་ལུང་ཐང་གསུམ་མཛེས་སྡུག་ལྡན་པ་ཞིག་རེད། པ་ལགས་ཀྱི་སྦག་སྦག་རྒྱབ་ཏུ་ང་དང་གཅུང་མོ་གཉིས་བཞོན་ཏེ། ང་ཚོས་ལམ་བར་དུ་སྐད་ཆ་ཅི་འཕྲོས་མོོོལ་འཕྲོས་ཤོད་བཞིན་ཕྱིན་པ་ཡིན། ཨ་མདོའི་དབྱར་སྐྱིད་གཏོང་ས་དེར་ལམ་སེང་སླེབས་སོང་། དེ་ནི་གོ་པལ་པུར་སློབ་གྲྭ་ལ་འགྲོ་སའི་ལམ་ཁ་ཞིག་རེད་འདུག གཞུང་ལམ་གཡོན་ཟུར་དུ་སྤང་ཐང་ཆེན་པོ་ཞིག་འདུག་པ་དང་། སྤང་ཐང་དེའི་མཐའ་འཁོར་དུ་ཤིང་སྡོང་ཡང་མང་པོ་འདུག མི་མང་པོ་སྔ་པོ་ནས་སླེབས་ཚར་འདུག ང་ཚོ་དེར་འབྱོར་སྐབས་མི་རྒན་པ་ཁ་ཤས་ཀྱིས་བསང་གཏོང་གི་འདུག དེ་ནས་ཕར་ཅུང་ཙམ་ཕྱིན་ན་སྒོ་ཆེན་པོ་ཞིག་བཟོས་འདུག་པ་དང་། དེའི་སྟེང་དུ་འཕྲེད་དར་ཞིག་འཐེན་འདུག་པའི་སྟེང་དྷ་སའི་མདོ་སྨད་དབྱར་སྐྱིད་ཆེན་མོ།༽ ཞེས་བྲིས་འདུག་ལ། སྒོའི་གཡས་གཡོན་གཉིས་ལ་བོད་པ་དང་རྒྱ་གར་གྱི་རྒྱལ་དར་རེ་བསྒྲེངས་འདུག རྒྱལ་སྒོ་དེའི་ཕར་ཕྱོགས་སུ་བྱིས་པ་ཚོ་རྩེད་མོ་རྩེ་སའི་གནམ་མཆོང་ལྡིང་ར་གཉིས་བཞག་འདུག་པ་དེར་ང་ཧ་ཅང་དགའ་སོང་། ང་ཚོའི་སློབ་གྲྭའི་ཁྲོམ་འདུས་སྐབས་ཀྱི་རྩེད་མོ་རྩེ་ས་ཚང་མ་འདི་ལ་ཡོད་ན་ཅི་མ་རུང་དྲན་སོང་། སྤང་ཐང་དེའི་དཀྱིལ་དུ་བཀྲ་ཤིས་རྟགས་བརྒྱད་ཀྱི་རི་མོ་ཡོད་པའི་གུར་ཆེན་པོ་ཞིག་ཕུབ་འདུག གུར་ཆེན་པོ་དེའི་མཐའ་རུ་ད་དུང་གུར་ཆུང་ཆུང་ཡང་མང་པོ་ཞིག་ཕུབ་འདུག པ་ལགས་དང་ངེད་གཉིས་གུར་ཡོད་ས་དེར་འབྱོར་མ་ཐག རིན་པོ་ཆེ་ཆིབས་བསྒྱུར་བསྐྱངས་སོང་ཞེས་མི་མང་པོ་ཞིག་གིས་བོད་ཆས་གཙང་མ་གྱོན་ཞིང་། ལག་པར་ཁ་བཏགས་བཟུང་སྟེ་བང་སྒྲིག་བཞིན་འདུག ངས་པ་ལགས་ལ་རིན་པོ་ཆེ་སུ་རེད་ཅེས་འདྲི་སྐབས། ཀིརྟི་རིན་པོ་ཆེ་དང་ཇོ་ནང་རྒྱལ་ཚབ་རིན་པོ་ཆེ་རེད། ཁོང་གཉིས་དེ་རིང་གི་སྐུ་མགྲོན་གཙོ་བོ་རེད་ཟེར། རིན་པོ་ཆེ་རྣམ་གཉིས་བཞུགས་ཁྲིའི་སྟེང་དུ་བཞུགས་རྗེས་དབྱར་སྐྱིད་མཛད་སྒོ་ཚོགས་སོང་། ཤིང་ཏོག་དང་མངར་ཟས་རིགས། ཤིང་ཏོག་ཁུ་བ་སོགས་སྡེར་ཁ་མང་པོ་བསྒྲིགས་འདུག སྐབས་དེར་ཀིརྟི་རིན་པོ་ཆེ་མཆོག་གིས་བཀའ་སློབ་མང་པོ་ཞིག་གནང་སོང་ཡང་། ང་རང་གིས་གོ་བ་ནི་བོད་པ་ཚང་མས་༸རྒྱལ་བ་རིན་པོ་ཆེ་མཆོག་གི་བཀའ་ལ་བརྩི་དགོས་པ་དང་། བོད་ཡིག་བོད་སྐད་དང་བོད་པའི་རིག་གཞུང་ལ་བདག་པོ་རྒྱག་དགོས་པ། བོད་མི་ཚོས་འཆམ་པོ་མཐུན་པོ་གནང་དགོས་པ་སོགས་གསུངས་སོང་། ད་དུང་། དེ་རིང་བོད་ཆས་གྱོན་མཁན་ཚོ་ཡག་པོ་འདུག དབྱར་སྐྱིད་སྐབས་ཨ་རག་མང་པོ་འཐུང་ནས་འཁྲུག་པ་རྒྱག་པ་དང་། ཤོ་དང་རྒྱན་སོགས་རྩེས་ནས་སྤྱོད་པ་མ་རབས་དེ་འདྲ་མ་བྱེད་རོགས་གསུངས་སོང་། དེའི་རྗེས་ལ་ཇོ་ནང་རྒྱལ་ཚབ་རིན་པོ་ཆེ་མཆོག་གིས་ཀྱང་བཀའ་སློབ་མང་པོ་ཞིག་གནང་སོང་ཡང་ང་རང་གིས་ཡག་པོ་ཞིག་གོ་མ་སོང་། རིན་པོ་ཆེ་གཉིས་ཀྱིས་བཀའ་སློབ་གནང་ཚར་རྗེས། གཞས་དང་ཞབས་བྲོ་འཁྲབ་འགོ་བརྩམས་སོང་། ངའི་ཨ་མ་ལགས་ཀྱང་ཞབས་བྲོ་འཁྲབ་མཁན་གྲས་རེད། […]