བློ་བཟང་ཡར་འཕེལ། ཅོན་ཏཱ་ར་བོད་ཁྱིམ། འཛིན་གྲྭ་དྲུག་པ། བུམ་པ། ཕྱི་ལོ་༢༠༢༠ ལོའི་འགོ་སྟོད་ཙམ་ནས་བཟུང་༢༠༢༡ གི་ནང་དུ་འཛམ་གླིང་འདི་ཡི་སྟེང་དུ་དངོས་པོ་ཧ་ཅང་མང་པོ་ཡོད་ཀྱང་སྐད་གྲགས་ཆེ་ཤོས་དེ་ནི་ཁ་རས་རེད། རྒྱུ་མཚན་ནི་ནད་གང་ཞིག་ཡིན་ཡང་ཁ་རས་ཀྱི་སྲུང་སྐྱོབ་བྱེད་ཐུབ། དམིགས་བསལ་གྱི་ཁ་རས་དེས་ཏོག་དབྱིབས་ནད་ཡམས་འདི་སྲུང་སྐྱོབ་བྱེད་ཐུབ་པ་མ་ཟད་ན་ཚ་དེ་མ་འགོད་པར་ཕན་ཐོགས་ཆེན་པོ་ཡོད་པ་རེད་ལབ་ནས་འཛམ་གླིང་མི་དམངས་ཀུན་གྱི་ཁ་རས་གྱོན་དང་གྱོན་བཞིན་པ་རེད། དེ་ཡང་སྔོན་ཉིས་སྟོང་ཉི་ཤུ་ལ་ཏོག་དབྱིབས་ནད་ཡམས་ཞེས་པའི་ནད་རིགས་གསར་བ་ཞིག་བྱུང་པ་དེ་ཁ་རས་ཀྱིས་སྲུང་སྐྱོབ་གཙོ་བོ་བྱེད་ཀྱི་ཡོད་པས་མི་ཚང་མ་ཁ་རས་ལ་དོ་སྣང་ཆེན་པོ་ཡོད། བྱས་ཙང་ཁ་རས་ཟེར་བ་དེ་འཛམ་གླིང་ནང་སྐད་གྲགས་ཆེན་པོ་ཆགས་ཡོད། ང་ཚོ་སློབ་གྲྭའི་ནང་ལ་ཡང་དགེ་རྒན་དང་སློབ་ཕྲུག ཁྱིམ་ཚང་མ་ཚབ། དེ་བཞིན་ཡིག་ཚང་ལས་བྱེད་ཆ་ཚང་གི་ང་ཚོ་ལ་ཁ་རས་གྱོན་ལབ་ཀྱི་འདུག འོན་ཀྱང་ཕྲུ་གུ་ཚོས་ཁ་རས་གྱོན་གྱི་མི་འདུག་པས། ང་ཚོ་སློབ་གྲྭའི་སྒྲིག་འཛུགས་དགེ་རྒན་དང་རྒན་བདག་སོགས་སླེབས་དུས་ཕྲུ་གུ་དེ་ཚོ་ཞེད་ཐག་ཆོད་ནས་ཁ་རས་གྱོན་གྱི་འདུག དང་པོ་ང་ཡང་ཁ་རས་གྱོན་པའི་དུས་སུ་ཁ་ལ་བདེ་པོ་མི་འདུག ངའི་ཕ་མ་གཉིས་ཀྱིས་ང་ལ་ཁ་པར་སླེབས་དུས་ག་དུས་ཡིན་ཡང་ཕ་མའི་ང་ལ་ཁ་རས་གྱོན་ལབ་ཀྱི་འདུག བྱས་ཙང་ངས་གང་ཐུབ་ཐུབ་ཁ་རས་གྱོན་པའི་ཐབས་ཤེས་བྱེད་ཀྱི་ཡོད། ཁ་རས་ནི་ཧ་ཅང་ཕན་ཐོགས་ཆེན་པོ་ཡོད་པའི་དངོས་པོ་ཞིག་ཡིན། གང་ཡིན་ཟེར་ན་ཏོག་དབྱིབས་ནད་ཡམས་དེ་ནི་ཁ་དང་སྣའི་ནང་དུ་འཛུལ་གྱི་ཡོད། གལ་སྲིད་སོ་སོ་དང་མི་གཞན་ཞིག་ལ་ན་ཚ་དེ་ཡོད་ན་མི་གཞན་ལ་འགོས་ཀྱི་རེད། བྱས་ཙང་ཁ་རས་ཀྱི་དེ་ཚོ་ཚང་མ་སྲུང་སྐྱོབ་བྱེད་ཀྱི་རེད། ཁ་རས་ལ་ཡང་ཚོན་མདོག་ཧ་ཅང་མང་པོ་ཡོད། དཔེར་ན། སེར་པོ། ལྗང་ཁུ། དཀར་པོ། ནག་པོ། ཁྲ་ཁྲ། སྔོན་པོ་སོགས་འདྲ་མིན་སྣ་ཚོགས་ཡོད་ཀྱང་། བདག་གི་ཁ་རས་ཀྱི་ཚོན་མདོག་དགའ་ཤོས་ནི་ལྗང་ཁུ་ཡིན། ང་ཚོའི་སློབ་གྲྭའི་ནང་ལ་ཡང་སློབ་མ་ཚོས་ཁ་རས་ཚོན་མདོག་འདྲ་མིན་སྣ་ཚོགས་གྱོན་གྱི་རེད། གཞན་ཡང་ཁ་རས་ལ་གོང་ཚད་འདྲ་མིན་སྣ་ཚོགས་ཡོད། ང་ཚོའི་སློབ་གྲྭའི་སློབ་མ་ཁག་གཅིག་གིས་ཁ་རས་ལ་གོང་ཆེན་པོ་སྤྲད་ནས་ཉོས་འདུག དེ་བཞིན་དུ་དགེ་རྒན་དང་ཁྱིམ་ཚང་མ་ཚབ་སོགས་ནས་ཀྱང་ཁ་རས་གོང་ཆེན་དེ་འདྲ་གྱོན་ནས་འཛིན་གྲྭ་ལ་ཕེབས་ཀྱི་འདུག ང་ཚོའི་སློབ་གྲྭའི་བཀའ་དྲིན་ལ་བརྟེན་ནས་ཁྱིམ་ཚང་ཨ་མ་ལགས་མང་པོ་ཞིག་གིས་ཁ་རས་བཙེམ་ནས་སློབ་མ་རྣམས་ལ་སྤྲད་ཀྱི་འདུག དེ་བཞིན་སློབ་གྲྭ་ལ་སྦྱིན་བདག་ཁག་དང་ཚོགས་པ་ཁག སྒེར་པ་ཁག་ཅིག་གིས་ང་ཚོའི་སློབ་གྲྭ་ལ་ཁ་རས་ཞལ་འདེབས་ཧ་ཅང་མང་པོ་བརྒྱབ་ཡོད་པའི་བཀའ་དྲིན་གྱིས་ང་ཚོའི་སློབ་གྲྭ་ལ་ཁ་རས་ཀྱི་དཀའ་ངལ་འཕྲད་ཀྱི་མི་འདུག ཞལ་འདེབས་གནང་པའི་ཁ་རས་དེ་ཡང་གོང་ཚད་འདྲ་མིན་སྣ་ཚོགས་འདུག ང་ཚོ་སློབ་གྲྭའི་ཨ་མ་ལགས་མང་པོ་ཞིག་གིས་བཙེམ་གནང་པའི་ཁ་རས་ཀྱི་རྒྱུ་ཆ་ནི་རས་རེད། སློབ་ཕྲུག་མང་ཆེ་བས་རས་ཀྱི་ཁ་རས་བེད་སྤྱོད་བྱེད་ཀྱི་ཡོད་རེད། ཁ་རས་ཁ་ཤས་ནི་སྤྲིན་བལ་དང་འགྱིག་གི་བཟོས་པའི་ཁ་རས་ཀྱང་ཡོད། ཞལ་འདེབས་གནང་པའི་ཁ་རས་ནི་རྒྱུ་ཆ་ཡག་པོ་དང་གྱོན་ན་ཚ་བ་དེ་ཙམ་འཚིག་གི་མི་འདུག གལ་སྲིད་ང་ཚོ་སློབ་ཕྲུག་ཚོས་ཁ་རས་བརླག་པ་དང་ཆད་པ་སོགས་བྱུང་སྐབས་ག་དུས་ཡིན་ཡང་ང་ཚོའི་སློབ་གྲྭའི་སྨན་ཁང་དུ་འགྲོ་ན་སྤྲད་ཀྱི་རེད། ཐེངས་ཤིག་ངའི་ཁ་རས་བརླག་སོང་བས་སྨན་ཁང་ནས་བདག་ལ་ཁ་རས་ཚོན་མདོག་སེར་པོ་ཞིག་སྤྲད་བྱུང་། ། ང་ཚོའི་སློབ་གྲྭའི་ནང་དུ་ཕ་མ་སྤུན་མཆེད་སུ་འདྲ་ཞིག་སླེབས་ཀྱང་ཁ་རས་མ་གྱོན་པར་ཡོང་ཆོག་གི་མ་རེད། སོང་ཙང་ཁ་རས་ནི་མི་ཚང་མ་ལ་གལ་ཆེན་པོ་ཞིག་དང་མེད་ན་མེད་ཐབས་ཅན་ཞིག་ཆགས་ཡོད་པས། ད་ལྟའི་སྐབས་ལ་འཛམ་གླིང་ནང་དུ་སྐད་གྲགས་ཆེ་ཤོས་ནི་ཁ་རས་ཡིན།