རིག་རྣམ།
དཔེ་སྟོན་སློབ་གྲྭ། འཛིན་གྲྭ་བདུན་པ། ཁ།

ཕྱི་ལོ་ཉིས་སྟོང་དགུ་དང་ཉི་ཤུའི་ལོ་འདི་ནི་ཅི་འདྲའི་ལོ་ནག་ཅིག་རེད་ཨང། རྒྱ་གུང་ཁྲན་གྱིས་མིའི་རིགས་ལ་ནད་ཡམས་འཇིགས་སུ་རུང་བ་ཞིག་བཟོས་ཏེ་ད་ལྟའི་ཆར་གོ་ལ་ཡོངས་ལ་ཁྱབ་གདལ་དུ་འགྲོ་བཞིན་པའི་ནད་ཡམས་འདི་འདྲ་ཞིག་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པ་ཞིག་རེད། གཉན་སྲིན་དེའི་བཟོ་ལྟ་ཏོག་དབྱིབས་སུ་གྲུབ་སྟབས་དེའི་མིང་ལ་ཡང་ཏོག་དབྱིབས་གཉན་སྲིན་ཞེས་གྲགས། ནད་ཡམས་འདི་ནི་ཉེན་ཚབས་ཤིན་ཏུ་ཆེ་བའི་གཉན་སྲིན་ཞིག་ཡིན་ལ་ཁྱབ་གདལ་འགྲོ་ཤིན་ཏུ་མྱུར་བས་ལས་ཁུངས་དང་སློབ་གྲྭ། ཞིང་ལས། ཚོང་ཁང། མདོར་ན་ཐམས་ཅད་སྔར་གྱི་འཚོ་ཐབས་ཚོང་གཉེར་ཆོག་གི་མེད་སྟབས། སློབ་གྲྭ་ཡང་དེ་ལྟར་གནས་སྟངས་འདིའི་འོག་དབུས་གཞུང་གི་ཐེམ་སྤང་བཀའ་རྒྱའི་འོག་རང་ཁྱིམ་དུ་མ་སྡོད་ཀ་མེད་བྱུང། ཐེམ་སྤང་བཀའ་རྒྱའི་དུས་དེར་ང་དང་འདྲ་བའི་སློབ་མ་འབུམ་ཕྲག་མང་པོ་སྔར་རྒྱུན་བཞིན་སློབ་གྲྭར་བསྐྱོད་མ་ཐུབ་པར་ཁྱིམ་དུ་སློབ་སྦྱོང་ལ་འབད་ཁུལ་བྱེད། ང་ལ་མཚོན་ན་དུས་ཚོད་ནི་གསེར་ལས་རིན་ཐང་ཆེ་བར་བརྩིས་ཏེ་ཁྱིམ་སྡོད་སློབ་སྦྱོང་ལ་འབད་འབུངས་བྱེད་ཀྱི་ཡོད་ཅིང། རྣམ་ཀུན་ནས་ཁ་གཡེང་མིག་གཡེང་རྩ་བ་ནས་མི་བྱེད་པར་རྒན་ལགས་རྣམས་ཀྱིས་དྲྭ་ཐོག་ནས་བསྐུར་བའི་ཁྱིམ་སྦྱོང་དང་སློབ་ཁྲིད་ཁག་ནན་ཏན་གྱིས་ཉན་པ་དང་འབྲི་སྦྱོང་བྱེད་ཀྱི་ཡོད་ཀྱང་ཁོ་བོའི་འདུན་པ་བཞིན་སློབ་གཉེར་བྱེད་ཐབས་བྲལ། དེ་ཡང་གཅིག་ནས་རང་གི་གཅེན་གཅུང་རྣམས་རྩེད་འཇོར་རོལ་བའི་སྐད་ཅོར་དང་དགོད་སྒྲ་ཡི་དཀའ་ངལ། གཉིས་ནས་སློབ་སྦྱོང་བྱེད་སྐབས་ཕ་མར་རོགས་རམ་ཞུ་བར་འགྲོ་དགོས་སྟབས་དུས་ཚོད་མང་པོ་ཞིག་འདི་ལྟར་འདས་པ་དང། གསུམ་ནས་དོགས་འདྲི་ཁག་དུས་ཐོག་ཏུ་རྒན་ལགས་ལ་ཞུ་མ་ཐུབ་པའི་དཀའ་ངལ། བཞི་ནས་རྒན་ལགས་ཀྱིས་རྒྱུན་གཏན་བཞིན་སྐུལ་འདེད་གཏོང་མཁན་མེད་སྟབས་མཚམས་རེ་ལེ་ལོའི་དྲྭ་བར་ཚུད་དེ་དལ་འགོར་བྱེད་པ་དང། གང་ལྟར་ཁྱིམ་སྡོད་སློབ་སྦྱོང་བྱེད་སྐབས་བར་ཆད་དབྱར་གྱི་ཆུ་རྒྱུན་བཞིན་རྒྱུན་མ་ཆད་པ་དང་དཀའ་ངལ་གཅིག་རྗེས་གཉིས་མཐུད་ཀྱིས་འཕྲད་དེ་རྫོགས་ཐབས་བྲལ། ཡིན་ནའང་ཁྱིམ་དུ་བསྡད་ནས་སློབ་སྦྱོང་བྱེད་དུས་དགེ་མཚན་མེད་པའང་ག་ལ་སྲིད། ཁྱིམ་སྡོད་སློབ་སྦྱོང་བྱེད་སྐབས་གཅིག་ནས་རང་གི་ཡིད་དབང་འཕྲོག་པའི་དཔེ་དེབ་མང་པོ་ལྟ་ཀློག་ཐུབ་པའི་དུས་ཚོད་ཡོད་པ་དང། དོ་སྣང་བྱེད་ཐུབ་ཀྱི་འདུག གཉིས་ནས་དགེ་བའི་བཤེས་གཉེན་རྣམས་ལ་ཞེད་སྣང་བྱེད་དགོས་མེད། གསུམ་ནས་བཀྲེས་སྐོམ་གྱི་དཀའ་ངལ་མེད་པར་དུས་ཚོད་ངེས་མེད་ལ་ཟས་ཟ་ཆོག བཞི་ནས་ཁྱིམ་སྡོད་སློབ་སྦྱོང་བྱེད་སྐབས་ཕ་མས་སྐུལ་ལྕག་གནང་བ་དང། དོགས་འདྲི་ཡོད་ཚེ་འབྲེལ་ཡོད་མི་དང་ཤེས་ལྡན་སྤུན་མཆེད། གཅེན་པོ་སོགས་ལ་འདྲི་ཆོག་པ་སོགས་ཀྱི་དགེ་མཚན་བརྗོད་ཀྱིས་མི་ལང་བ་ཡོད། སློབ་གྲྭར་འགྲོ་དུས་སློབ་གྲྭས་གཏན་འབེབས་བྱས་པའི་དུས་ཚོད་རེའུ་མིག་བཞིར་བཟུང་ལག་བསྟར་བྱེད་པ་ལས་རང་ལ་རང་དབང་ཞིག་མེད། མ་ཟད་ཁྱིམ་གྱི་གཅེས་ཉར་སྲོག་ཆགས་དང་ལག་ཐོག་ཁ་པར་སོགས་འཁྱེར་མི་ཆོག་པས་སྣང་བ་གཡེང་ས་ཞིག་མེད། སློབ་གྲྭར་སློབ་སྦྱོང་བྱེད་དུས་མཐུན་རྐྱེན་འཛོམས་པོ་དང་རྒན་ལགས་ལ་ཐད་ཀར་དོགས་འདྲི་ཞུ་ཐུབ་པ་མ་ཟད། རང་ཉིད་དགེ་སློབ་དང་མཉམ་དུ་ཡོད་སྟབས་སྤྱི་ཚོགས་ཀྱི་ནང་འབྲེལ་བ་བྱེད་སྟངས་སོགས་ཡར་རྒྱས་འགྲོ་ཡི་ཡོད། རྒན་ལགས་ཀྱིས་བསྐུར་བའི་ཁྱིམ་སྦྱོང་རྣམས་ཁྱིམ་དུ་འབྱོར་རྗེས་ཟུར་ཁྲིད་དགེ་རྒན་གྱི་ལམ་སྟོན་འོག་དུས་ཐོག་ཏུ་བྱེད་ཐུབ་ཀྱི་འདུག སློབ་སྦྱོང་ལ་དོ་སྣང་མ་བྱེད་མཁན་སློབ་ཕྲུག་རྣམས་ལ་དམིགས་བསལ་རྒན་ལགས་རྣམས་ཀྱིས་དུས་ཐོག་ལ་སྐུལ་འདེད་བཏང་སྟེ། ཁོ་ཚོའི་སློབ་སྦྱོང་ལ་འཐུས་ཤོར་མ་འགྲོ་བའི་དགེ་མཚན་ཡང་ཡོད། གང་ལྟར་སློབ་གྲྭར་སློབ
་སྦྱོང་བྱེད་དུས་དགེ་མཚན་མང་པོ་འདུག འོན་ཀྱང་སློབ་གྲྭའི་ནང་སུན་སྣང་སྐྱེ་དགོས་པའི་རྒྱུ་རྐྱེན་ཡང་མང་པོ་ཡོད། རྒན་ལགས་རྣམས་ཀྱིས་སྐུལ་འདེད་གཅིག་རྗེས་གཉིས་མཐུད་ཀྱིས་བཏང་སྟེ་ལུས་སེམས་ཡིད་ཐང་ཆད་པ་དང། སློབ་ཕྲུག་དབང་ཤེད་ཅན་ཚོས་ཉམ་ཆུང་རྣམས་ལ་དོན་མེད་བརྙས་བཅོས་བཏང་བ། ཉིན་ལྟར་སློབ་གྲྭའི་སྤྱི་སྤྱོད་རླངས་འཁོར་ནང་འགྲིམ་འགྲུལ་བྱེད་དུས་དུས་ཚོད་མང་པོ་ཆུད་ཟོས་སུ་འགྲོ་གི་ཡོད། མཚམས་རེར་རླངས་འཁོར་དུས་ཐོག་མ་འབྱོར་བ་དང། འཚང་ཁ་ཐེབས་པ། དམིགས་བསལ་དབྱར་དུས་སུ་དྷ་སའི་ཁུལ་ལ་དྲག་ཆར་རྒྱུན་ཆད་མེད་པ་བཏང་སྟེ་ལུས་པོ་ཡོངས་ཆར་ཆུས་བརླན་ནས་ཆམ་ནད་ཕོག་པ་དང། དགུན་དུས་གྲང་ངར་ཆེ་བས་ཁྱིམ་དུ་དྲོ་སོབ་སོབ་ངང་སྡོད་རྒྱུའི་རང་དབང་ཡང་མེད། གང་ལྟར་ཕྱོགས་གཉིས་ཀའི་ཐོག་ནས་དགེ་སྐྱོན་སྣ་ཚོགས་འཛོམས་ཡོད་སྟབས་སློབ་ཕྲུག་རྣམས་ཀྱིས་ཁྱིམ་སྡོད་སློབ་སྦྱོང་བྱེད་དུས་རང་སེམས་རང་གིས་བཅུན་ཏེ་རང་འགུལ་ངང་སློབ་སྦྱོང་འཐུས་ཤོར་མ་སོང་བ་བྱེད་རྒྱུ་གལ་ཆེ། རྒན་ལགས་རྣམས་ཀྱིས་ཀྱང་སློབ་ཕྲུག་རྣམས་ལ་ཐད་འབྲེལ་གནང་སྟེ་སྐུལ་དེད་ཡང་སེ་བཏང་དགོས་པར་བསམ་བཞིན་ཡོད། ཞོར་ལ་ཚང་མས་ད་ལྟའི་ཛ་དྲག་གི་དུས་སྐབས་སུ་གཟུགས་གཞི་འཕྲོད་བསྟེན་ཨང་དང་པོར་བརྩིས་ཏེ་གཟབ་ནན་བྱེད་རྒྱུ་གལ་ཆེ།