ཟླ་བ་ཚེ་རིང་།
སྔོན་དུ་གླེང་བའི་གཏམ།
སྤྱིར་གནའ་དེང་གཉིས་ཀྱི་སློབ་ཁྲིད་ཐབས་ལམ་ལ་དགོས་དམིགས་དང་གནས་ལུགས་གང་མང་ཞིག་གི་རྒྱབ་ལྗོངས་ངེས་ཅན་རེ་ཡོད་པས། འདི་ཡག་དང་དེ་བཙོག་པའི་གཏན་འཁེལ་རང་བཞིན་གྱི་རིན་ཐང་འཇལ་བྱེད་ཀྱི་རྒྱ་མ་ཞིག་མེད་པས་ན། གཙོ་བོ་སློབ་ཕྲུག་གི་ཁམས་དང་མོས་པ་ལ་དམིགས་ཏེ་སློབ་ཁྲིད་ཐབས་ལམ་བེད་སྤྱོད་རྒྱུ་ནི་དགེ་རྒན་ཞིག་ཡིན་པའི་ཆ་ནས་ཤེས་དགོས་པའི་གནད་དོན་དང་པོ་དེ་རེད། རྒྱུ་མཚན་ཅིའི་ཕྱིར་ཞེ་ན། ནད་རིགས་འདྲ་མིན་ལ་སྨན་རྫས་སྣ་གཅིག་གིས་རྔོ་མི་ཐོགས་པའི་རྒྱུན་ཤེས་འདིས་སློབ་ཕྲུག་འདྲ་མིན་ལ་ཐབས་ལམ་ཆིག་རྐྱང་ཅན་གྱིས་ཕན་མི་ཐོགས་པ་མཁྱེན་དགོས་ངེས་རེད། དེ་བཞིན་དུ་སྤྱི་སེམས་ཅན་གྱི་དགེ་རྒན་ཞིག་ཡིན་ཚེ་ཁོའི་ལས་འགན་ནི་གནའ་དང་དེང་ཟེར་ནས་སློབ་གསོ་ཕྱོགས་རིས་ཅན་གྱི་རྗེས་སུ་འབྲངས་ཏེ་གང་ཟག་ཕུང་གསུམ་པ་ཞིག་བྱ་རྒྱུ་དེ་མ་ཡིན་པར་གཙོ་བོ་སློབ་ཕྲུག་གི་རྒྱུད་ཀྱི་ཤེས་ཡོན་དང་བཟང་སྤྱོད། བསམ་བློ་དང་ཤེས་རྒྱ། ནུས་པ་དང་འཇོན་ཐང་། བཅས་ཀྱི་ཚོར་ཤེས་སྔོག་འདོན་གྱི་ཆེད་གནའ་དེང་ཟུང་འབྲེལ་གྱི་ཐབས་ལམ་དེ་ཞི་དྲག་གཉིས་ལྡན། འཇམ་རྩུབ་ཟུང་འབྲེལ། མངོན་ལྐོག་དབྱེ་མེད་ཀྱི་དྲང་བདེན་སྤྱད་དེ་རང་ཉིད་ཀྱི་ལས་འགན་ལ་ངོ་གནོངས་མི་དགོས་པ་ཞིག་བྱ་ངེས། གང་ཡིན་ཟེར་ན། དགེ་རྒན་ཚོ་ནི་མི་རིགས་ཤིག་གི་བདེ་སྡུག་ལ་འགྱུར་བཅོས་གཏོང་མཁན་གྱི་ཆེད་ལས་པ་དེ་ཡིན་པས། དགེ་རྒན་ཚོ་ནི་མི་རིགས་ཤིག་གི་རྨོངས་པའི་མུན་པ་སེལ་མཁན་གྱི་སྒྲོན་མེ་དེ་ཡིན་པས། དགེ་རྒན་ཚོ་ནི་མི་རིགས་ཤིག་གི་སོན་རྩ་ཚོའི་མདུན་ལམ་སྟོན་མཁན་གྱི་ལམ་ཁྲིད་དེ་ཡིན་པས་ན། དགེ་རྒན་ཚོས་ཀྱིས་ཀྱང་རང་ངོ་རང་ཟིན་གྱི་ངང་ནས་རང་ཉིད་ཀྱི་ལས་འཁུར་འདི་ལ་བརྩི་མཐོང་དང་ལྷག་བསམ་རྣམ་དག་གིས་ཕྱག་ལས་གནང་རྒྱུ་ནི་མི་རིགས་འདིས་དགེ་རྒན་ཚོར་བཅངས་པའི་རེ་བ་ཡིན་ཟེར་བའི་བསམ་བློ་སྔོན་དུ་སོང་བའོ།།
དང་པོ། རྩོམ་ཡིག་མ་ཁྲིད་སྔོན་གྱི་སྒྲུབ་དགོས་པའི་ཆ་རྐྱེན་འགའ།
སྤྱིར་དགེ་རྒན་ཞིག་ཡིན་པའི་ཆ་ནས་སློབ་ཁྲིད་ལ་གྲ་སྒྲིག་སྤུས་དག་ཅིག་བྱ་རྒྱུ་ནི་དེའི་གཡོལ་དུ་མེད་པའི་ལས་ཁུར་ཡིན་པས། རླབས་ཆེན་གྱིས་དགེ་རྒན་ཚོས་གནང་དང་གནང་བཞིན་ཡིན་པ་སྨོས་མ་དགོས་མོད། འོན་ཏེ། རྩོམ་ཡིག་སློབ་ཁྲིད་ནི་སློབ་ཚན་གཞན་དག་དང་ཅུང་མི་འདྲ་བས་དམིགས་བསལ་གྱིས་དོ་སྣང་ཞིག་གནང་དགོས་ཏེ། རྩོམ་ཡིག་སློབ་ཁྲིད་ནི་འཆད་སྟེགས་སྒང་དུ་རྩོམ་ཡིག་དེའི་འགོ་ནས་མཇུག་བར་གྱི་དོན་རྐྱེན་རྣམས་གནའ་གཏམ་བཞིན་སློབ་ཕྲུག་གི་རྒྱུད་ལ་བཞག་པ་ཙམ་གྱིས་རྩོམ་ཡིག་ཁྲིད་པའི་དགོས་པ་འགྲུབ་མེད། རྒྱུ་མཚན་ཅིའི་ཕྱིར་ཞེ་ན། རྩོམ་ཡིག་སློབ་ཁྲིད་བརྒྱུད་དེ་སློབ་ཕྲུག་གི་བསམ་བློའི་རིག་པ་དང་འཚོལ་དཔྱོད་རིག་པ། བསམ་གཞིག་རིག་པ་དང་མྱོང་ཚོར་རིག་པ། དགག་གཞག་རིག་པ་དང་དོགས་འདྲི་རིག་པ་སོགས་ཀྱི་བློ་སྒོ་འབྱེད་དགོས་པས་ན། དགེ་རྒན་གྱིས་གྲ་སྒྲིག་བྱ་དགོས་པའང་དེ་ལས་མང་བས་སློབ་ཚན་གཞན་དག་དང་མི་འདྲ་ཟེར་དོན་ཡང་དེ་ན་ཡོད་པས། གཤམ་དུ་རེ་རེ་བཞིན་བགྲང་བར་བྱའོ།
- ༡ གང་ལ་ཁྲིད་པ།
༢ ཅི་ཞིག་ཁྲིད་པ།
༣ ཇི་ལྟར་ཁྲིད་པ།
༤ ཅིའི་ཕྱིར་ཁྲིད་པ།
ཟེར་བའི་སློབ་ཁྲིད་ཀྱི་རྩ་དོན་བཞི་གཞི་ལ་བཞག་སྟེ་བསམ་བློའི་སྒྲོམ་གཞི་ཞིག་ཡིག་ཐོག་ཏུ་ཕབ་དགོས་པར་མ་ཟད། ཡང་ནས་ཡང་དུ་བསམ་གཞིག་དང་བསྐྱར་ལྟ་བྱས་ཏེ་སང་ཉིན་ཁྲིད་སྟེགས་སྒང་དུ་ཤར་མར་འགྲོ་ཐུབ་པ་ཞིག་བྱ་དགོས། དཔེར་ན།
དང་པོ། གང་ལ་ཁྲིད་པ། དགེ་རྒན་ཞིག་ཡིན་པའི་ཆ་ནས་ཁྲིད་སའི་ཡུལ་དེའི་སློབ་ཕྲུག་གི་བསམ་བློའི་འཇོན་ནུས་དང་། འདོད་མོས། ཁ་ཕྱོགས་སོགས་ལ་རྒྱུས་མངའ་གཏིང་ཟབ་མོ་ཞིག་རྙེད་དགོས་པ་དེ་རྩོམ་ཡིག་མ་ཁྲིད་སྔོན་གྱི་སྒྲུབ་དགོས་པའི་ལས་ཀ་དང་པོ་དེ་རེད་ལ། ཁྱེད་ཀྱི་སློབ་ཁྲིད་དེ་སྤུས་ཚད་ཡག་པོ་དང་ལས་སླ་བོ་ཡོང་བའི་ལམ་ཁ་དང་པོ་ཡང་དེ་རེད།
གཉིས་པ། ཅི་ཞིག་ཁྲིད་པ། སློབ་ཕྲུག་གི་ཤེས་ནུས་དང་བསྟུན་ཏེ་རྩོམ་ཡིག་གདམ་སྒྲིག་བྱ་དགོས། དཔེར་ན། འཛིན་རིམ་བཅུ་པའི་རྩོམ་ཡིག་ཅིག་འཛིན་རིམ་ལྔ་པར་ཁྲིད་ན་གོ་དཀའ་བ་དང་འཛིན་རིམ་ལྔ་བའི་རྩོམ་ཡིག་ཅིག་འཛིན་རིམ་བཅུ་པར་ཁྲིད་ཚེ་རིན་ཐང་མེད་པ་ཇི་བཞིན་སློབ་ཕྲུག་གི་གནས་བབ་དང་འཇོན་ཚོད་ལ་དཔག་སྟེ་རྩོམ་ཡིག་གདམ་གསེས་ལ་མཁས་དགོས།
གསུམ་པ། ཇི་ལྟར་ཁྲིད་པ། རང་ཉིད་ཀྱིས་གདམ་ཟིན་པའི་རྩོམ་ཡིག་དེའི་འགོ་མཇུག་བར་གསུམ་ལ་རྟོག་ཞིབ་ནན་ཏན་བྱས་ཏེ་ཐོ་འགོད་བྱེད་པའི་གྲ་སྒྲིག་གནང་དགོས། དཔེར་ན།
- ༡ རྩོམ་ཡིག་གི་ནང་དོན་གཙོ་བོ་ཁག་འབྲི་དགོས།
༢ རྩོམ་ཡིག་ནང་གི་བསླབ་བྱ་ཟུར་འདོན་བྱ་དགོས།
༣ རྩོམ་ཡིག་གི་རྒྱབ་ལྗོངས་འཚོལ་དགོས།
༤ རྩོམ་པ་པོས་སྤྱི་ཚོགས་ཀྱི་འགན་ཁུར་དང་གནས་བབ། སློབ་གསོ་དང་རིག་གཞུང་། མི་རིགས་རང་ལུགས་ཀྱི་ཞེན་ཁོག་གི་སྐད་ཆ་གང་ཡོད་ཟུར་འདོན་གྱིས་ཟིན་བྲིས་སུ་ཕབ་དགོས།
༥ གོ་དཀའ་བའི་ཚིག་ལ་འགྲེལ་བཤད་འབྲི་དགོས།
༦ རྩོམ་ཡིག་ལ་དྲི་བ་ཁག་གཉིས་བཟོ་དགོས། ༡) རྩོམ་ཡིག་གི་ནང་དོན་ལྟར་དྲི་བ་བཟོ་དགོས། ༢) བསམ་གཞིག་གམ་རྒྱབ་ལྗོངས་འཚོལ་བའི་དྲི་བ་བཟོ་དགོས།
༧ རྩོམ་ཡིག་གི་ནང་དོན་གོ་བརྡ་འཕྲོད་པའི་ཆེད་ཁྲིད་ཆས་པར་དང་རི་མོ། དངོས་པོ། རྩོམ་ཡིག་གི་ནང་དོན་དང་འབྲེལ་བ་ཡོད་པའི་བརྙན་ཐུང་དང་མི་སྣའི་དངོས་པར་སོགས་གྲ་སྒྲིག་བྱ་ཐུབ་ན་རབ་ཡིན།
བཞི་པ། ཅིའི་ཕྱིར་ཁྲིད་པ། རྩོམ་ཡིག་འདིའི་སློབ་ཁྲིད་འདི་བརྒྱུད་ནས་འགྲུབ་དགོས་པའི་དམིགས་ཡུལ་འགའ་ཡོད་དེ།
- ༡ སློབ་ཕྲུག་ཚོས་རྩོམ་ཡིག་འདིའི་ཚིག་དོན་ཡན་ཆད་དང་། ནང་དོན་ཞིབ་གསལ་རྟོགས་པའི་དམིགས་ཡུལ་གྱི་ཆེད་དུ་རྩོམ་ཡིག་འདི་ཁྲིད་དགོས།
༢ སློབ་ཕྲུག་ཚོས་རྩོམ་ཡིག་འབྲི་བ་དང་ཀློག་པར་དགའ་མོས་ཡོང་བའི་ཆེད་དང་། ལྷག་དོན་བོད་ཀྱི་སྐད་དང་རིག་གཞུང་ལ་ཞེན་ཁོག་ཡོང་བའི་དམིགས་ཡུལ་གྱི་ཆེད་དུ་རྩོམ་ཡིག་འདི་ཁྲིད་དགོས།
༣ སློབ་ཕྲུག་ཚོའི་བསམ་བློ་དང་ཀུན་སྤྱོད་ལ་ཡར་རྒྱས་ཡོང་བའི་དམིགས་ཡུལ་གྱི་ཆེད་རྩོམ་ཡིག་འདི་ཁྲིད་དགོས།
ཞེས་གོང་གི་དོན་ཚན་འདི་དག་ཇི་བཞིན་གྱིས་གྲ་སྒྲིག་གནང་སྟེ་ལག་བསྟར་བྱ་ཐུབ་ཚེ་རྩོམ་ཡིག་ཇི་འདྲ་ཞིག་གདམ་རུང་སློབ་ཁྲིད་བྱ་བདེ་བོ་དང་གང་ཁྲིད་པ་དེ་སློབ་ཕྲུག་གི་སེམས་རྒྱུད་དུ་ལས་སླ་བོ་སྒོ་ནས་འཇོག་ཐུབ་པའི་ཁེ་ཕན་ཆེ་བར་མ་ཟད། རང་གཞན་ཀུན་གྱི་ཆུ་ཚོད་དེ་དོན་སྙིང་ལྡན་པ་དང་སློབ་ཕྲུག་ཚོ་ཡང་ཚོགས་ཐེངས་འདི་ལ་སྤྲོ་བོ་དང་དགའ་མོས་ཡོང་བའི་ཐབས་ལམ་ཡག་ཤོས་དེ་ཡིན་ནོ།།
གཉིས་པ། རྩོམ་ཡིག་ཁྲིད་སྐབས་ཀྱི་གཟབ་དགོས་པའི་དོན་གནད་འགའ།
དེ་ཡང་འཛིན་རིམ་ལྔ་བ་ནས་བཅུ་བ་བར་གྱི་སློབ་ཕྲུག་ཚོར་དེང་སྐབས་བོད་ཀྱི་སློབ་གྲྭའི་ཁྲིད་སྟེགས་ན་རྒྱུགས་ཆེ་བའི་ཇི་བཞིན་བརྗོད་རྩོམ་དང་གསལ་བཤད་རྩོམ་ཡིག་སོགས་ལ་ཚང་དགོས་པའི་ཆ་རྐྱེན་ནམ་སྒྲིག་གཞི་ངེས་པར་དུ་སྲུང་དགོས་པའི་གུ་དོག་གི་སློབ་ཁྲིད་མི་བྱ་བར་གཙོ་བོ་ཚིག་གི་སྡེབ་སྦྱོར་གྱི་སྒྱུ་རྩལ་དང་ཚིག་གི་ཉམས་འགྱུར་སྟོན་སྟངས་རྩལ་དུ་བཟུང་སྟེ་སློབ་ཁྲིད་བྱ་བར་འབད་བརྩོན་བྱ་དགོས། རྒྱུ་མཚན་ཅིའི་ཕྱིར་ཞེ་ན། སྒྲིག་གཞི་དེ་དག་ཡོད་ན་སློབ་ཁྲིད་གནང་མཁན་གྱི་དགེ་རྒན་ལ་མཚོན་ན་ཁྲིད་བདེ་བོ་དང་སླ་བོ་ཡོང་གི་རེད་མོད། རྩོམ་འབྲི་མཁན་གྱི་སློབ་ཕྲུག་ལ་མཚོན་ན་བསམ་བློ་རྒྱ་བསྐྱེད་ཀྱི་བཀག་རྒྱ་རུ་འགྲོ་ངེས་ཏེ་འདི་ལྟར་བྲིས་ནའང་མི་འགྲིག་པ་ཞིག་ཚོར་གྱི་ཡོད་པ་དང་། དེ་ལྟར་བྲིས་ནའང་ཚང་མེད་པའི་སེམས་བྱུང་ཞིག་གིས་བསམ་བློ་འགུལ་སྐྱོད་ཀྱི་ལམ་ཁ་འགག་འགྲོ་བའི་ཉེན་ཁ་ཡོད། མ་ཟད་སྒྲིག་གཞི་དེ་དག་གཞིར་བཟུང་ནས་བྲིས་ཚེ་སློབ་ཕྲུག་ལྔ་བཅུས་བྲིས་རུང་བསམ་བློ་མི་གཅིག་གི་བསམ་ཚུལ་ལྟར་རྩོམ་ཡིག་གི་ནང་དོན་དང་ཚིག་སྦྱོར་ཧ་ལམ་གཅིག་པ་ཆགས་པའི་ལམ་ཁ་ཞིག་ཡོད་པས་རེད། རྒྱུ་མཚན་དེ་བས་སྒྲིག་གཞི་དེ་དག་ཕལ་པ་རུ་བཞག་སྟེ་ཚིག་གི་སྡེབ་སྦྱོར་དང་ཉམས་འགྱུར་སྟོན་སྟངས་གཙོ་བོ་བཟུང་ནས་སློབ་ཁྲིད་གནང་ཐུབ་ན་ཁེ་ཕན་ཆེ་བས་གཤམ་དུ་རིམ་པ་བཞིན་གླེང་བར་བྱའོ།།
༡ རྗོད་བྱེད་ཀྱི་སྐད་ཆ་ལ་ཉམས་དགོས་པ། མི་གང་འདྲ་ཞིག་ཡིན་རུང་ཉམས་འགྱུར་ལྡན་པའི་སྐད་ཆ་བཤད་སྟངས་ལ་དགའ་བོ་ཡོད་པ་ཇི་བཞིན་སློབ་ཕྲུག་ཚོའང་དེ་ལས་མ་འདས་པས། དགེ་རྒན་གྱི་འཆད་སྟངས་གསོན་ཉམས་ལྡན་པ་དང་ཉམས་འགྱུར་འཛོམས་ཚེ་སློབ་ཕྲུག་ཚོའི་སེམས་ཀྱི་ཤེས་པ་རྩོམ་ཡིག་ཏུ་འགུག་པར་ཁེ་ཕན་ཆེ་བས་སྐད་ཆའི་ཉམས་འགྱུར་གཙོ་བོར་འཛིན་དགོས།
༢ ལུས་སེམས་གཉིས་ལ་ཉམས་འགྱུར་དགོས་པ། དགའ་བའི་འཛུམ་དང་སྤྲོ་བའི་སེམས་ཀྱི་སྒོ་ནས་རྩོམ་ཡིག་གི་ཚིག་སྦྱོར་གྱི་ཚིག་ཉམས་དེ་དག་དགེ་རྒན་གྱིས་ལུས་པོའི་རྣམ་འགྱུར་ལས་སློབ་ཕྲུག་ཚོར་སྟོན་པའི་འབད་བརྩོན་བྱ་དགོས་པས་ན། དགེ་རྒན་ནི་འཁྲབ་སྟོན་པ་ཞིག་ཡིན་ཟེར་བ་ལྟར་ལུས་ཀྱི་ཉམས་འགྱུར་ཧ་ཅང་གལ་ཆེ་བ་དང་། དགེ་རྒན་གྱི་ལུས་ལ་ཉམས་འགྱུར་ལྡན་ན་སློབ་ཕྲུག་གི་མིག་ཟུང་དེ་འཕྲོག་པའི་ནུས་པ་ཡོད་པས། རྩོམ་ཡིག་ཁྲིད་མཁན་གྱི་དགེ་རྒན་ཞིག་ལ་འཛོམས་དགོས་པའི་ཁྱད་ཆོས་ཡིན།
༣ དོན་དངོས་གནད་ལ་འཁེལ་དགོས་པ། རྩོམ་ཡིག་ཁྲིད་སྐབས་གང་བཤད་པའི་སྐད་ཆ་དེ་བརྗོད་བྱའི་གནད་ལ་འཁེལ་དགོས་པར་མ་ཟད། བཤད་པའི་སྐད་ཆ་གོ་རིམ་ལྡན་ཞིང་སྨྲ་ལྕེ་དག་པའི་སྒོ་ནས་དོན་འགྲེལ་གྱི་གནད་ལ་འཁེལ་དགོས། དཔེར་ན། རྩོམ་འགོ་ཇི་ལྟར་བཙུགས་ཡོད་པ་དང་བརྗོད་བྱ་ཇི་ལྟར་གསལ་འབྲི་བྱས་ཡོད་པ། རྩོམ་མཇུག་ཇི་ལྟར་སེམས་མགུལ་རང་བཞིན་གྱིས་བསྡུས་ཡོད་མེད་སོགས་གོ་སླ་བའི་སྒོ་ནས་འཆད་དགོས།
༤ ཚིག་ཉམས་གཙོར་བཟུང་གིས་ཁྲིད་དགོས། རྩོམ་ཡིག་གི་བཟང་ངན་ཚིག་གིས་ཉམས་འགྱུར་སྟོན་སྟངས་ལ་རག་ལས་བའི་ན། དགེ་རྒན་ཚོས་ཚིག་གི་ཉམས་འགྱུར་དང་ཁྱད་ཚིག་གི་སྦྱོར་ཐབས། བྱ་ཚིག་གི་ནུས་པ་སོགས་དམིགས་སུ་བཀར་ཏེ་སློབ་ཕྲུག་ཚོའི་སེམས་རྒྱུད་ལ་བླུགས་ཐབས་བྱ་དགོས།
༥ མི་སྣའི་བསམ་བློ་སྔོག་འདོན་བྱ་དགོས། རྩོམ་ཡིག་ནང་གི་མི་སྣའི་བྱ་སྤྱོད་དང་གཤིས་ཀ་བལྟས་ནས་མི་སྣ་དེའི་བསམ་བློའི་ཁ་ཕྱོགས་དང་སེམས་ཁམས་ཀྱི་འདོད་ཕྱོགས་བརྒྱུད་དེ་རྩོམ་པ་པོས་བཤད་འདོད་པའི་སྐད་ཆ་སྔོག་འདོན་བྱས་ཏེ་སློབ་ཕྲུག་གི་རྒྱུད་ལ་དོགས་འདྲིའི་ཚུལ་དུ་འཇོག་དགོས།
༦ སློབ་གསོའི་ཆ་ཐེར་འདོན་བྱ་དགོས། རྩོམ་ཡིག་ནང་གི་སློབ་གསོ་རང་བཞིན་དེ་མི་སྣའི་ཡ་རབས་བཟང་སྤྱོད་དང་བྱམས་སྐྱོང་གི་བརྩེ་བ། བཀའ་དྲིན་དྲན་སྟངས་དང་གྲོགས་པོའི་འདུ་ཤེས། གཞན་ཕན་ཁྱེར་སྟངས་དང་དགེ་སེམས་བྱེད་སྟངས། ཡང་ན། བརྩོན་འགྲུས་སམ་དཀའ་ལས་རྒྱག་སྟངས་དང་འབད་བརྩོན་བྱེད་ཚུལ། ད་དུང་། རིགས་ཀྱི་ཞེན་ཁོག་དང་སྐད་ཡིག་གི་ལ་རྒྱ་འཛིན་སྟངས། ལྟ་བུ་སོགས་ཀྱི་སློབ་གསོ་ཡི་ཆ་ཡོད་ཚེ་སློབ་ཕྲུག་གི་སེམས་སུ་གསོན་པོར་འཇོག་ཐབས་བྱ་དགོས། འདི་ལྟ་བུའི་སློབ་གསོ་བརྒྱུད་ནས་སློབ་ཕྲུག་ཚོ་ཡ་རབས་བཟང་སྤྱོད་ལྡན་པའི་བོད་མི་རྣལ་མ་ཞིག་ཆགས་པར་རྔོ་ཐོགས་ཆེ།
༧ ཞིབ་ཚགས་དང་གོ་སླ་དགོས། རྩོམ་ཡིག་གི་དོན་འགྲེལ་སྐབས་བསམ་གཞིག་དང་དབྱེ་ཞིབ་ཀྱིས་ཞིབ་ཚགས་པོ་དང་གོ་སླ་བའི་ཐབས་ལམ་སྤྱད་དགོས། ཇི་ལྟར་གོ་སླ་བ་དང་ཞིབ་ཚགས་པོ་ཡོད་ན། སློབ་ཕྲུག་གི་སེམས་སུ་དགེ་རྒན་གྱི་སྐད་ཆ་གསོན་ཉམས་ལྡན་པ་ཡིན་པས། ཁོང་ཚོ་སྤྲོ་བ་དང་འདོད་པ་སྐྱེས་ངེས་ཡིན།
༨ རྩོམ་ཡིག་ཁྲིད་སྐབས་གཟབ་དགོས་པའི་སྐྱོན་ཆ་འགའ།
- རྩོམ་ཡིག་གི་ནང་དོན་གནའ་གཏམ་ཇི་བཞིན་འཆད་ན་སྐྱོན་ཡིན།
- ཚིག་ཉམས་དང་ཁྱད་ཚིག་ལ་ཞིབ་འགྲེལ་མེད་ན་སྐྱོན་ཡིན།
- ལུས་ཉམས་དང་སྨྲ་ལྕེ་མི་དག་ན་སྐྱོན་ཡིན།
- བརྗོད་བྱ་དང་འབྲེལ་མེད་དོན་གཞན་གླེང་ན་སྐྱོན་ཡིན།
- བསམ་གཞིག་གམ་དབྱེ་ཞིབ་ཀྱི་དྲི་བ་མེད་ན་སྐྱོན་ཡིན།
- རྩོམ་ཡིག་གི་ནང་དོན་བསྡོམས་ཚིག་བརྒྱབ་སྟེ་ཐེ་ཚོམ་གྱི་ས་བོན་མེད་ན་སྐྱོན་ཡིན།
ཞེས་པའི་དོན་ཚན་འདི་དག་ནི་རྩོམ་ཡིག་ཁྲིད་སྐབས་འབྱུང་སླ་བའི་གནད་དོན་ཡིན་པས། རླབས་ཆེན་གྱི་དགེ་རྒན་ཚོས་གཟབ་པར་འཚལ་ལོ།།
- གསུམ་པ། རྩོམ་ཡིག་ཁྲིད་རྗེས་ཀྱི་ལག་བསྟར་གནང་དགོས་པའི་གནད་དོན་འགའ།
སྤྱིར་དགེ་རྒན་གྱི་དུས་ཚོད་མང་ཆེ་བ་ནི་སློབ་ཕྲུག་ཚོའི་ཤེས་ཡོན་དང་ཁྲིད་གཞིའི་སློབ་ཚན་གྱི་སྟེང་ན་ལ་ཁའི་ཉི་མ་བཞིན་རྫོགས་ནས་འགྲོ་བཞིན་ཡོད་ནའང་། རྩོམ་ཡིག་ཁྲིད་མཁན་གྱི་དགེ་རྒན་ཚོས་དེ་ལས་དུས་ཚོད་མང་ཙམ་ཞིག་དང་འཆར་གཞི་གཏིང་རིང་པོ་ཞིག་འདིང་དགོས་པ་ཇི་བཞིན་དུ་རྩོམ་ཡིག་སློབ་ཚན་འདི་ནི་སློབ་ཚན་གཞན་དག་དང་མི་འདྲ་སྟེ། སློབ་ཚན་གཞན་དག་ནི་ཁྲིད་ཚར་རྗེས་དྲི་བ་འགའ་ལ་སྐྱབས་བཅོལ་ཏེ་ལས་འགན་རྫོགས་སུ་བཅུག་ན་འགྲིག་གི་ཡོད་མོད། འོན་ཏེ། རྩོམ་ཡིག་སློབ་ཚན་ལ་དེ་ལྟར་བྱས་ན་མི་འགྲིག་སྟེ་རྩོམ་ཡིག་ཁྲིད་ཚར་རྗེས་ད་དུང་རྩ་ཆེན་གྱི་ལས་ཀ་མང་པོ་ཞིག་གམ་སློབ་མའི་བློ་སྒོ་འབྱེད་པའི་ལྡེ་མིག་ལྷག་བསྡད་ཡོད་པས་ན། རྩོམ་ཡིག་ཁྲིད་མཁན་གྱི་དགེ་རྒན་ཚོས་ངེས་པར་དུ་སློབ་ཕྲུག་ཚོའི་བསམ་བློ་དེའི་ཆེད་དུ་ལག་བསྟར་གནང་དགོས་པས། གཤམ་དུ་རེ་རེ་བཞིན་འཆད་པར་བྱའོ།
༡ བགྲོ་གླེང་བྱ་དགོས། བརྗོད་གཞི་གང་ཡིན་པ་དེ་ལ་བགྲོ་གླེང་གི་སྡིངས་ཆ་བསྐྲུན་ཏེ་དགེ་སློབ་མཉམ་ཞུགས་ཀྱིས་སོ་སོའི་མྱོང་ཚོར་དང་བསམ་ཚུལ་བཤད་དུ་འཇུག་དགོས། དཔེར་ན། མི་སྣའི་གཤིས་ཀའི་བཟང་ངན་དང་སྤྱི་ཚོགས་འཚོ་བའི་རྒྱབ་ལྗོངས། ཚིག་སྦྱོར་གྱི་སྒྱུ་རྩལ་དང་རྩོམ་ཡིག་གི་རིན་ཐང་། སློབ་གསོ་ཡི་གནས་བབ་དང་རིག་གཞུང་གི་འགན་ཁུར། ད་དུང་རྩོམ་པ་པོའི་བསམ་བློའི་བཟང་ཆ་དང་རྩོམ་པ་པོའི་བསམ་བློའི་ངན་ཆ་ཡང་གླེང་ན་ཆོག
༢ འཆད་སྟེགས་བསྐྲུན་དགོས། སློབ་ཕྲུག་ཚོར་རྩོམ་ཡིག་ཁྲིད་རྗེས་ཀྱི་མྱོང་ཚོར་བཤད་དུ་འཇུག་དགོས། དཔེར་ན། རྩོམ་ཡིག་ཁྲིད་རྗེས་དགའ་སྐྱོ་ཆགས་སྡང་གི་ཚོར་བ། བསམ་བློ་ཡར་རྒྱས་ཀྱི་ཚོར་བ། སེམས་ཤུགས་འཕེལ་བའི་ཚོར་བ། རིགས་ཞེན་གྱི་ཚོར་བ་སོགས་གང་འདོད་དུ་གླེང་དུ་འཇུག་དགོས།
༣ དྲི་བའི་སྡིངས་ཆ་བཟོ་དགོས། སློབ་ཕྲུག་ནང་ཁུལ་སྡེ་ཚན་བཟོས་ཏེ་དྲི་བའི་སྒོ་ནས་རྩོམ་ཡིག་གི་ནང་དོན་རྟོགས་ཡོད་མེད་བརྟག་དཔྱད་བྱ་དགོས། དཔེར་ན། རྩོམ་ཡིག་གི་ནང་དོན་གྱི་སྐོར། སེམས་འགུལ་ཐེབས་པའི་ཚིག་ཉམས་ཀྱི་སྐོར། རྩོམ་པ་པོའི་བསམ་བློའམ་རྩོམ་ཡིག་གི་རྒྱབ་ལྗོངས་ཀྱི་སྐོར། དྲི་བའི་སྒོ་ནས་བརྟག་དཔྱད་བྱ་དགོས།
༤ མྱོང་ཚོར་འབྲི་རྩོམ་གྱི་སྡིངས་ཆ་བཟོ་དགོས། རྩོམ་ཡིག་ཁྲིད་རྗེས་སློབ་ཕྲུག་ཚོར་མྱོང་ཚོར་འབྲི་རུ་འཇུག་དགོས། བྲིས་པའི་རྩོམ་ཡིག་རྣམས་འཛིན་གྲྭའི་སྦྱར་པང་ངོས་སུ་སྦྱར་ཏེ་དགེ་རྒན་གྱིས་བཟང་བསྟོད་ཀྱི་བྱ་འགུལ་སྤེལ་ཏེ་སློབ་ཕྲུག་ཚོར་སེམས་ཤུགས་སྤར་དགོས།
༥ མི་སྣའི་གཏམ་བརྗོད་འཁྲབ་སའི་གར་སྟེགས་བསྐྲུན་དགོས། རྩོམ་ཡིག་ནང་གི་མི་སྣའི་གཤིས་ཀ་དང་ཚིག་ཉམས་ཀྱི་ཉམས་འགྱུར། སྐད་ཆའི་སྒྱུ་རྩལ་རྣམས་སློབ་ཕྲུག་ཚོར་འཁྲབ་ཏུ་འཇུག་དགོས། དཔེར་ན། སློབ་ཕྲུག་ཀ་བ། ཁྱོད་རྩོམ་ཡིག་ནང་གི་མི་སྣ་དོན་འགྲུབ་ཀྱི་སྐད་ཆའི་སྒྱུ་རྩལ་དེ་ལད་ཟློས་བྱེད་རོགས། ལྟ་བུའོ། །
གོང་གི་བྱེད་ཐབས་འདི་དག་ནི་སློབ་ཕྲུག་ཚོས་རྩོམ་ཡིག་ཤེས་ཡོད་མེད་ཀྱི་བརྟག་ཐབས་སམ་ཉམས་ཞིབ་བྱེད་སྟངས་ཡིན་པར་མ་ཟད། སློབ་ཕྲུག་ཚོས་རྩོམ་ཡིག་སྦྱངས་པར་འདོད་པ་བསླངས་པའི་ཐབས་ལམ་ཉག་གཅིག་དེ་ཡིན་པས། རྩོམ་རིག་དགེ་རྒན་ཚོས་ངེས་པར་དུ་ལག་བསྟར་གནང་དགོས་པར་མཐོང་ངོ།།
བཞི་པ། འབྲི་རྩོམ་གྱི་ནང་ལས་བཀོད་སྟངས།
བོད་ཀྱིི་སློབ་གྲྭ་ཁག་ཏུ་རྩོམ་ཡིག་གི་ནང་ལས་སྤྲོད་སྐབས་རྩོམ་བྱང་ཞིག་བྲིས་ཏེ། འདིའི་ཐོག་ཏུ་རྩོམ་ཡིག་ཚིག་འབྲུ་འདི་དང་འདི་ཕྲིས་ཤོག ཅེས་རྩོམ་ཡིག་གི་ནང་ལས་བཀོད་སྟངས་ཀྱི་གོམས་གཤིས་ངན་པ་ཞིག་ཡོད་པས། ལམ་ཁ་འདིས་སློབ་ཕྲུག་གང་མང་ཞིག་གི་སེམས་སུ་དཀའ་ངལ་འཕྲད་དེ་རྩོམ་ཡིག་འབྲི་བའི་འདོད་པ་བརླག་ཏུ་བཅུག་ཡོད་པས་ན། རྩོམ་རིག་དགེ་རྒན་ཚོས་གོམས་གཤིས་འདི་སྤང་དགོས་པར་མཐོང་། གང་ཡིན་ཞེ་ན། སློབ་ཕྲུག་ལ་རིགས་འདྲ་མིན་ཞིག་ཡོད་དུས་ཁ་ཤས་ཀྱིས་རྩོམ་བྱང་མིང་རྐྱང་གཅིག་གི་སྟེང་དུ་བསམ་བློའི་འཆར་གཞི་འདིང་དཀའ་བ་ཡོད་ལ། གལ་སྲིད་སློབ་ཕྲུག་གིས་བསམ་བློ་བཏང་སྟེ་བྲིས་པའི་རྩོམ་ཡིག་དེ་ཡང་འགོ་སྔ་མི་ཚང་བའི་སྐྱོོན་དང་བརྗོད་བྱ་ཁ་མི་གསལ་བའི་སྐྱོན་ཡོད་པས། ནང་ལས་བསྐུལ་ཡང་བསྐུལ་གོ་མ་ཆོད་པའི་གནས་སྟངས་ཤིག་དགེ་སློབ་གཉིས་ལ་ཕྲད་དང་འཕྲད་བཞིན་པའི་ལམ་ཁ་འདི་ལས་ལྡོག་པའི་ཐབས་ལམ་ཞིག་བསྟན་པར་བྱའོ།།
- དཔེར་ན། རྩོམ་བྱང་<<༸གོང་ས་མཆོག་གི་བཀའ་དྲིན་རྗེས་དྲན་>>ཞེས་པ་ཞིག་ལ་མཚོན་ན། འདི་དང་དེ་འབྲི་དགོས་ཟེར་ནས་བཀའ་བཏང་ན་སློབ་ཕྲུག་གི་བསམ་བློ་རྐྱང་པ་ཞིག་ཡོང་མི་ཐུབ་པས།དེ་ལས་འདི་འདྲ་བྲིས་ན་ཡག་པོ་འདུག་ཟེར་ནས་བསམ་བློའི་དབང་ཆ་སློབ་ཕྲུག་རང་ལ་སྤྲད་དགོས་པས་ཐུགས་འཇགས་གནང་དགོས།
<<༸གོང་ས་མཆོག་གི་བཀའ་དྲིན་རྗེས་དྲན།>>
རྩོམ་ཡིག་ནང་དུ་དོ་སྣང་སྤྲོད་དགོས་པའི་ཆ་རྐྱེན།
- ༡། དུམ་མཚམས་དང་པོའི་ནང་དུ་༸གོང་ས་མཆོག་གིས་བཙན་བྱོལ་མི་དམངས་ལ་མང་གཙོ་གསོ་རས་གནང་སྟངས་དང་དེའི་རྒྱབ་ལྗོངས་སྐོར་ལ་འབྲི་ཐུབ་ན་བཟང་།
༢། དུམ་མཚམས་གཉིས་པའི་ནང་དུ་༸གོང་ས་མཆོག་གིས་འཛམ་གླིང་ཞི་བདེ་གཟེངས་རྟགས་བཞེས་ཚུལ་དང་དེ་བཞེས་དགོས་པའི་རྒྱུ་མཚན་གྱི་སྐོར་ལ་འབྲི་ཐུབ་ན་བཟང་།
༣། དུམ་མཚམས་གསུམ་པའི་ནང་དུ་༸གོང་ས་མཆོག་གིས་ཚན་རིག་དང་ནང་ཆོས་བར་ལ་བགྲོ་གླེང་གི་ཟམ་ཆེན་བཙུགས་ཏེ་བོད་ཀྱི་ནང་ཆོས་འདི་འཛམ་གླིང་ཚན་རིག་རིག་གནས་དང་དཔུང་པ་མཉམ་གཤིབ་ཀྱི་སྐྱོད་ཐུབ་ཡོད་པའི་མཛད་རྗེས་དང་བྱ་བཞག་སྐོར་ལ་འབྲི་ཐུབ་ན་བཟང་།
༤། དུམ་མཚམས་བཞི་བའི་ནང་དུ་༸གོང་ས་མཆོག་གིས་འཛམ་གླིང་ཡོངས་ཀྱི་ཆོས་ལུགས་ཚང་མའི་ཕུགས་ཀྱི་ལྟ་བ་གཅིག་མཚུངས་ཡིན་པའི་རླབས་ཆེན་གྱི་གསར་གཏོད་བསམ་བློའི་སྐོར་ལ་འབྲི་ཐུབ་ན་བཟང་།
༥། དུམ་མཚམས་ལྔ་བ་སྟེ་མཐའ་མའི་ནང་དུ་སོ་སོས་སྤྱི་ནོར༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཡུན་རིང་བརྟན་པ་དང་། ཐུགས་ཀྱི་དགོངས་པ་ཇི་བཞིན་འགྲུབ་པར་སྨོན་ལམ་མམ་གསོལ་འདེབས་ཞུ་བའི་སྐོར་ལ་འབྲི་ཐུབ་ན་བཟང་།
ཞེས་གོང་གི་དུམ་མཚམས་འདི་བཞིན་དགེ་རྒན་ཚོས་རྩོམ་བྱང་དང་མཉམ་དུ་ནག་པང་དུ་བྲིས་ཏེ་སློབ་ཕྲུག་ཚོར་རྩོམ་ཡིག་ནང་ལས་འདི་ལྟར་བཀོད་ཐུབ་ཚེ་སློབ་ཕྲུག་ཚོའི་བསམ་བློ་རུ་གཞི་རྩ་འཛིན་སའི་ལྷུ་ལག་ཅིག་སེམས་སུ་ཤར་རྒྱུ་ཡོད་པས་ན། སློབ་ཕྲུག་ཚོས་རྩོམ་ཡིག་འབྲི་བདེ་བོའམ་ལས་སླ་བོ་ཡོང་བར་བསམ་བློའི་རོགས་འདེགས་ཤུགས་ཆེན་སྒྲུབ་པའི་ཕན་ཐོགས་ཡོད་པ་ཇི་བཞིན་རྩོམ་རིག་དགེ་རྒན་ཚོས་བརྟག་དཔྱད་ཐེངས་གཅིག་གནང་རྒྱུ་གལ་ཆེའོ།།
ལྔ་པ། སེམས་ཀྱི་སྐད་ཆ་དང་འབྲེལ་ནས་མཇུག་གི་གཏམ།
སྤྱིར་དགེ་རྒན་གྱི་ལས་ཁུར་འདི་དཀའ་སྡུག་ཆེ་བའི་ཚོད་ཀྱིས་གཞུང་དམངས་གཉིས་ཀྱི་མིག་ཟུང་ན་ལས་ཁུར་གཞན་དག་ལྟར་རིན་ཐང་ལྡན་པ་ཞིག་དང་བརྩི་འཇོག་ལྡན་པ་ཞིག་མེད་ནའང་། རླབས་ཆེན་གྱི་དགེ་རྒན་ཚོས་ད་དུང་ཡང་རང་ནུས་གང་ལྕོགས་ཀྱིས་རང་གི་མི་ཚེ་འདི་འཛིན་ཁང་གི་སྒོ་ཐེམ་བར་ན་སློབ་ཕྲུག་ཚོ་དང་མཉམ་དུ་རྫོགས་ཀྱི་ཡོད་པ་འདི་ནི་ཇི་འདྲའི་རླབས་ཆེ་ཞིང་གཟི་བརྗིད་ལྡན་པ་ཞིག་རེད་ཨང་། རྒྱུ་མཚན་དེ་བས་ངས་ཐེངས་འདིས་གོ་སྐབས་འདི་བརྒྱུད་དེ་དགེ་རྒན་གྱི་ལས་སྣེ་རུ་ཕྱག་ལས་གནང་དང་གནང་བཞིན་པའི་མུན་སེལ་སྒྲོན་མེ་རྣམས་ལ་བཀའ་དྲིན་ཆེ་ཞུ་འདོད་བྱུང་བ་དེ་མཇུག་གཏམ་དུ་བཤད་འདོད་པའི་སྐད་ཆ་དེའོ།།