བསྟན་འཛིན་དངོས་གྲུབ། བོད་དགེ།
སཾ་བྷོ་ཊ་ཅན་དྷ་གྷི་རི་ཉིན་སློབ།
སྙིང་དོན།
བརྩམས་སྒྲུང་འདིའི་ནང་དང་པོ། མིའི་མི་ཚེ་ནང་ཟླ་བའི་འཕེལ་གྲིབ་བཞིན་སྐྱིད་པ་སྙན་གྲགས་ཀྱིས་རང་ཉིད་རྒྱལ་ཁ་ཐོབ་སྟེ་ང་མ་གཏོགས་སུའང་མི་འདུག་སྙམ་པའི་དུས་སུ། ང་རྒྱལ་དང་གཞན་གྱི་གདེང་འཇོག་ཆེན་པོའི་ལྟ་སྟངས་རྣམས་ཡིད་དབང་རབ་ཏུ་འཕྲོག་ནའང་རང་མུ་མཐུད་འབད་བརྩོན་ཆུ་བོའི་རྒྱུན་ལྟར་མི་ཞུགས་ཚེ་བསྟོད་བསྔགས་ཐོབ་པའི་མིའི་ཁ་ལས་འཕྱ་དམོད་དང་དམའ་འབེབ་ཀྱང་བྱེད་སྲིད་ཅེས་པའི་གནས་དོན་ཐོག་གླེང་འདུག བཀྲ་རྒྱལ་རང་ཉིད་ཀྱི་ཕ་མའང་དེ་གྲས་སུ་ཚུད་ཡོད།
སློབ་ཆུང་སྐབས་བཀྲ་རྒྱལ་གྱི་སྦྱངས་འབྲས་ཤིན་ཏུ་ལེགས་པས་ཕ་དགྲ་འདུལ་ཁྱིམ་ཚང་གི་ནོར་བུ་གཅིག་པོ་དེ་ཡིན་པས་རྒྱུ་ངོམས་བྱེད་རྒྱུ་མེད་ཀྱང་བུ་ནོར་བུ་འདྲ་ཞིག་ཡོད་ལྟ་བུ་ཚང་མར་ངོམས་ཤིང་བུར། ང་དགྲ་འདུལ་གྱི་བུ་ཡིན་རིན་ཆོག་པ་འདུག་ཅེས་བསྙད། འོན་ཀྱང་སློབ་འབྲིང་སྐབས་བྱ་ཕོ་གདང་ལ་འཛེགས་པའི་ཡར་ལྟའི་ཚུལ་མེད་པར། ཞི་མི་སྐས་ཀ་ནས་བབས་པའི་མར་བལྟ་ཚུལ་བཞིན་ཇེ་ཞན་ཇེ་སྡུག་སོང་ཁར་དགེ་རྒན་ཚོས་སློབ་མ་ཚོར། ཁྱེད་ཚོས་བཀྲ་རྒྱལ་ལ་མིག་ལྟོས་གཏན་ནས་བྱེད་མི་རུང་། ཞེས་སློབ་མ་ཐ་གྲས་ཀྱི་གནས་སུ་འགྱུར་བས་དགྲ་འདུག་ཚང་གི་ནོར་བུ་དེས་ནོར་གཅིན་བཏང་ཟིན་ཟེར།
སྒྲུང་ནང་མི་སྣ་གཙོ་བོ་བཀྲ་རྒྱལ་ཐོག་མ་ཆང་ཁང་ནས་ཐོན་པ་དེ་སྒྲུང་མགོ་མཇུག་སློག་པའི་རྣམ་པ་ཞིག་གི་ངང་གསལ་པོ་བཀོད་འདུག བཀྲ་རྒྱལ་ཆང་རག་ཚོད་མེད་བཏུང་བའི་བརྒྱུད་རིམ་ཇི་ལྟར་ཆགས་ཡིན་མིན་ཐད་རྩོམ་པ་པོ་འབྲི་རྩོམ་གྱི་གོ་རིམ་བསྒྲིགས་འདུག བཀྲ་རྒྱལ་ཐོག་མར་མིག་དཔེ་བལྟ་ས་ནས་རྐང་འདྲེན་པར་འགྱུར་ནས་ཕ་མའི་ཐུགས་རེ་ལྟར་མ་བྱུང་སྟབས། ཐུགས་ཕམ་པ་མ་ཟད། བུ་བཀྲ་རྒྱལ་དེ་ལྟར་འགྱུར་བའི་རྒྱུ་རྐྱེན་དེ་སྤོ་བོ་དང་རྨོ་བོ་ལགས་ཡིན་པ་ཁག་དཀྲིས་ཏེ་འཆམ་མཐུན་དང་དྲོ་སྐྱིད་ལྡན་པའི་ཁྱིམ་ཚང་དེ་དྲག་འཚུབ་རྗེས་ཀྱི་ལྷིང་འཇགས་ལྟར་སྟོང་ལྷང་ལྷང་གྱུར། གང་ལྟར་གཅེས་ལང་སུ་ཡི་རྐྱེན་གྱིས་འགྱུར་མིན་ངེས་པ་མེད་ཀྱང་བུ་བཀྲ་རྒྱལ་མཐའ་མཇུག་དེར་སློབ་གྲྭ་མཐའ་འཁྱོལ་བའི་མི་སྣ་ཞིག་ཆགས་རྒྱུ་མེད་པ་གཏན་འཁེལ་བ་ནི་མཐོ་རིམ་སློབ་འབྲིང་གི་ཡིག་རྒྱུགས་ནང་རྒྱུགས་མ་འཕྲོད་ནས་ཁྱིམ་ལས་དང་ཞིང་ལས་སུ་མི་ཞུགས་ཀ་མེད་གྱུར། རང་ཉིད་ལ་ཤིན་ཏུ་བྱམས་པའི་སྤོ་བོ་ལགས་དང་རྨོ་བོ་ལགས་གཉིས་འདས་གྲོངས་རྗེས་སེམས་ཆགས་ས་མེད་པ་ལྟར་བསམས་ནས། ཕ་ཡུལ་བྲལ་ཏེ་ཡོང་འབབ་བསོག་པར་གྲོང་ཚོའི་ཕོ་གཞོན་གཞན་མཉམ་ཕྱིན། སྐབས་དེར་ལག་ཤེས་མང་པོ་ཞིག་ཤེས་པར་དཀའ་ངལ་མི་ཉུང་བ་ཞིག་འཕྲད་ཀྱང་། བློ་སྙིང་བཅོལ་བའི་དགའ་རོགས་ཤིག་ཐུག་པས་བཀྲ་རྒྱལ་ཁོ་རང་ལ་སེམས་གཏད་ས་གསར་པ་ཞིག་འཕྲད་རྐྱེན་ཁོང་ཡང་ལས་ལ་ཧུར་བརྩོན་དང་ཕུགས་དམིགས་བཟུང་བའི་མི་ཞིག་ཏུ་གྱུར། ཁོང་གཉིས་མཛའ་སེམས་ཀྱི་མདུད་པ་དམ་པོར་འགྱུར་དུས་སྟབས་མ་ལེགས་པ། ཕ་ཡུལ་ལོག་པའི་དུས་ཚོད་འཁེལ་ནས་ལོ་རྗེས་མར་ཐུག་རྒྱུའི་དུས་ཆད་བྱས། འོན་ཀྱང་ཁ་ཆད་བཞིན་ཐུག་འཕྲད་མ་བྱུང་སྐབས་བཀྲ་རྒྱལ་བློ་འཚབ་དང་གང་བྱས་ཆ་མི་འཚལ་བའི་ཐག་སྐུད་ཆད་པའི་ཤོག་བྱ་བཞིན་དུ་གྱུར། མཐར་གྲོགས་པོ་བསྟན་འཛིན་གྱི་གཏམ་ལ་ཉན་ཏེ་གཞིས་ཀ་རྩེར་འཁོར་གསུམ་རྐང་འཁོར་ཞིག་བཏང་སྟེ་ཡུན་རིང་འདུག་རྗེས་གཞུང་ལམ་དུ་འགྲུལ་མི་སྐྱེལ་འདྲེན་སྐབས་གཡང་ལགས་དང་བུ་གཉིས་ཐུག་འཕྲད་དུས་ཁྱེད་གཉིས་གང་དུ་སོང་བ་ཡིན་ཞེས་ཤུགས་ཀྱིས་ངུས་པ་དང་ལྷན་དུ་གཡང་ལགས་རྨི་ལམ་མིན་པ་ཤེས་རྗེས་སེམས་ལ་དགའ་བ་དང་། སྐྱོ་བ། འཁང་ར་དང་སྡུག་ཡུས་སེམས་ངོས་སུ་རླབས་རྒྱུན་བཞིན་འཕྱུར། དེ་རྗེས་བཀྲ་རྒྱལ་གྱི་མི་ཚེ་དྲོ་སྐྱིད་ལྡན་པ་ཞིག་བྱུང་ཡང་གཡང་ལགས་གཤག་བཅོས་སྨན་ཁང་ནས་གསོན་པོ་མི་ལོག་པས་ཁང་པའི་བརྩིག་སྟན་མེད་པར་འགྱུར་བར་སོང་། བཀྲ་རྒྱལ་གྱིས་ངའི་སྙིང་གསོན་པོར་བཏོན་སོང་། དཀོན་མཆོག་གིས་མཁྱེན། ལས་མ་དག་པ་ང་ཡིན་ན། བསོད་བདེ་སྐམ་པོ་ང་ཡིན་ཞེས་རིམ་གྱིས་རྩོམ་འགོ་འཛུགས་པའི་གནས་སྟངས་སུ་འགྱུར་བ་རེད།
གསོན་ཉམས་ལྡན་པའི་བརྗོད་ཚིག
༡) ཕོ་དར་མའི་དུས་ལ་ནམ་འཕངས་གཅོད། ། གནམ་ཁ་ཞེང་ཆེ་ཡང་ཡ་མི་ང་། ། ཁྱུང་དར་མའི་དུས་ལ་ནམ་འཕངས་གཅོད། ། གནམ་ཁ་ཞེང་ཆེ་ཡང་ཡ་མི་ང་། །
༢) རྒྱུགས་ཚར་བའི་རྟ་ཕོ་དང་ཡལ་ཚར་བའི་རྡུལ།
༣) ཨ་མའི་བརྩེ་བ་ཡལ་བའི་བུ་ཆུང་བརླན་གཤེར་དང་བྲལ་བའི་མེ་ཏོག་བཞིན་དུ་བཀྲག་མདངས་ཡལ་སོང་།
༤) ལས་དབང་གིས་རླུང་བུས་འདེད་པའི་མི་རྟག་འཇིག་རྟེན་གྱི་ཁམས་འདི་ཡི་ཐོག་བསམ་ཡུལ་ལས་འདས་པའི་གནས་ཚུལ་གང་དང་ཅི་ཡང་ཐོན་སྲིད་ཅིང་། དགའ་བ་དང་སྐྱོ་བ། མངར་མོ་དང་ཁག་པོ་གང་ཞིག་འཕྲད་ཀྱང་ལས་དབང་གི་ཁ་གཏད་དུ་ལངས་ཏེ་མི་ཚེ་མུ་མཐུད་སྐྱེལ་དགོས།
༥) རིག་པ་ལྕགས་སྐུད་བཞིན་དུ་ཨོ་ལོས་མ་བསྒྲིམ་ཟེར་ན། ལྟོ་གོས་ཕ་མས་སྦྱིན་པའི་ནམ་ཟླའི་དུས་ལས་ཡོལ་སོང་།
༦) རྣ་ལ་མི་སྙན་ཞིང་སྙིང་ལ་ཕོག་ཆེ་བའི་གཏམ་མང་པོ་སྨྲ
༧) རྒྱུན་ཆུ་ཆད་པའི་གྲམ་རྡོ།
༨) གངས་འཁྱགས་ཀྱིས་ཡུན་རིང་མནན་པའི་སྤང་ལྗོངས་དེ་བཞིན་ཚ་ཟེར་ཉི་མའི་འོད་སྣང་འོག་ཕྱིར་མངོན་པ་ལྟར། སེམས་སྡུག་གི་མནར་བའི་བཀྲ་རྒྱལ་གྱི་སེམས་པ་གུ་ཡངས་པོར་གྱུར། ༩) ཆུ་ལམ་བཤངས་པའི་ཆུ་མོ་བཞིན་དུ་རང་རང་གནས་སུ་གྱེས།
མྱོང་ཚོར།
ཚིག་གོ་བདེ་ལ་བརྗོད་ཚིག་སྟབས་བདེ་བའི་ཕྱག་དེབ་ཆུ་མིག་དགུ་སྒྲིལ་གྱི་རྗེས་རྩོམ་པ་པོ་དེ་རང་གིས་བརྩམས་པའི་ཀྱག་ཀྱོག་གི་མི་ཚེ་ཞེས་པའི་བརྩམས་སྒྲུང་འདི་ཉིད་ངས་དཔེ་ཀློག་ཆེད་བདམས་པ་ཡིན། ཁོང་གིས་བརྩམས་པའི་སྒྲུང་འདི་ནང་མི་ཚེ་སྐྱིད་གསུམ་སྡུག་གསུམ་ཞེས་ཡོངས་གྲགས་གསུངས་སྲོལ་བཞིན་མི་ཚེ་དངོས་ཀྱི་འཚོ་བ་དང་འདྲ་བའི་ཆ་མང་པོ་འདུག་པར་སོང་། ངས་ཁོང་གི་བརྩམས་སྒྲུང་འདི་ངོ་མ་ཀློག་པ་པོའི་དོ་སྣང་འདྲེན་པར་ཐུགས་ཕན་གསོས་པ་འདུག་སྙམ།
སྒྲུང་ཀློག་པའི་སྐབས་ཡིག་ནོར་ཧ་ཅང་མང་བ་དག་ཆ་ཡག་པོ་མེད་པ་ཚོར་མགོ་རྨོངས་པ་བྱུང་སྲིད། ནོར་འཛོལ་དེ་དག་ནི་ཕལ་ཆེར་ཡིག་འཇུག་བྱེད་མཁན་ཡག་པོ་མ་བྱུང་བའི་ལན་པ་ཡིན་འགྲོ ང་རང་ལ་ཆ་མཚོན་ན་རྩོམ་པ་པོས་བརྩམས་ཆོས་འབྲིི་པར་ཕྱག་རོགས་གནང་མཁན་ལ་དངོས་གནས་དྲང་གནས་སེམས་འགུལ་ཐེབས་བྱུང་། གང་ལགས་ཞེ་ན། དེང་སང་ལས་བཟང་གྲུབ་དུས་བར་ཆད་འཕྲད་ཅེས་པ་ལྟ་བུ་བར་ཆད་མང་བ་མ་གཏོགས་མཐུན་འགྱུར་དང་ཕྱག་རོགས་གནང་མཁན་སེམས་བཟང་ཅན་དཀོན། རྩོམ་པ་པོ་བསྟན་པ་ཡར་རྒྱས་ལགས་དང་རྒན་པ་སངས་ལྟ་བུ་རྩོམ་ཡིག་ལེགས་བཅོས་གནང་མཁན་རག་པ་དངོས་གནས་བསོད་བདེ་རེད་དྲན་གྱི་འདུག ཡར་རྒྱས་གཏོང་འདོད་ཡོད་ཁར་གསོན་ཤུགས་དང་སྐུལ་ལྕག་གཏོང་མཁན་དེ་ཧ་ཅང་གལ་འགངས་ཆེན་པོ་ཡིན་པ་ཀུན་གྱིས་མཁྱེན་གསལ་ལྟར་ལགས། རྩོམ་པ་པོར་བཟོ་བཅོས་དང་ལམ་སྟོན་གནང་མཁན་ཁོང་གཉིས་ལ་ཡི་རང་ཡོད། དམིགས་བསལ་རྩོམ་པ་པོ་བུ་ཚེ་རིང་རྒན་པས་དཀའ་བ་ཁྱད་དུ་བསད་དེ་བརྩམས་སྒྲུང་ལེགས་པོ་ཞིག་བྲིས་འདུག་པ་ཐུགས་རྗེ་ཆེ་ཞུ་བ་དང་། འབྱུང་འགྱུར་སྐུ་ཉིད་ཀྱི་འབྲི་རྩོམ་དབྱར་ཆུ་རྒྱས་པ་བཞིན་གོང་ནས་གོང་དུ་འཕེལ་བའི་སྨོན་འདུན་ཤུགས་དྲག་དང་བཅས།
ཚིག་གསར། ལྡིང་འགྱོགས། གཡུལ་འདོན་རྒྱུ། ཁྲི་གདུགས་ཉི་མ།
ད་བར་དཔྱད་མཆན་མེད།