བསྟན་འཛིན་བདེ་སྐྱིད། བཅུ་པ།
གུ་རུ་པུ་ར་སཾ་བྷོ་ཊ་སློབ་གྲྭ།
༄༅། །ད་ལོའི་ལོ་འདི་བོད་མི་རིགས་ཀྱི་ཆེད་དུ་གལ་ཆེ་བའི་ལོ་ཞིག་རེད། ད་ལོའི་ལོ་འདི་༸གོང་ས་མཆོག་གི་གོ་སྟོན་ཡིན་པའི་རྒྱུ་མཚན་ལ་བརྟེན་ནས་དམིགས་བསལ་གྱི་ལོ་ཞིག་རེད། སྔོན་མ་ནས་ད་ལྟ་བར་དུ་༸གོང་མཆོག་གིས་བོད་ཕྲུག་རྣམས་ལ་ཐུགས་རེ་མང་པོ་ཞིག་བཅངས་གནང་ཡོད། ཁོང་གི་ཐུགས་རེའི་ནང་ནས་ཁ་ཤས་ཤིག་ཞུས་པ་ཡིན་ན།
༸གོང་ས་མཆོག་གིས་བོད་ཕྲུག་རྣམས་ལ་བོད་མི་རིགས་ཀྱི་བླ་སྲོག་སྐད་ཡིག་དང་རིག་གཞུང་སྲུང་སྐྱོབ་བྱེད་དགོས་པའི་ཐུགས་རེ་གནང་གི་ཡོད། ཁོང་གི་གསུངས་པ་ལྟར་ཆོས་དང་རིག་གཞུང་སྲུང་སྐྱོབ་བྱེད་རྒྱུ་དེ་ཧ་ཅང་གལ་ཆེན་པོ་ཞིག་རེད། མ་འོངས་པར་ང་རང་ཚོ་བོད་རང་བཙན་ཐོབ་པའི་སྐབས་སོ་སོའི་མི་རིགས་ཀྱི་གཞི་རྩ་སྐད་ཡིག་དང་། རིག་གཞུང་མེད་པ་ཡིན་ན། མི་རིགས་ཀྱི་ངོ་བོ་བརླགས་པ་རེད། མི་རིགས་གཞན་གྱིས་ང་ཚོ་བོད་མི་རྣམས་ལ་མཐོང་ཆུང་དང་འཕྱ་སྨོད་བྱེད་ཀྱི་རེད། དེར་བརྟེན། ང་ཚོས་སློབ་སྦྱོང་ལ་ཧུར་བཙོན་བྱས་ནས་རང་གི་སྐད་ཡིག་དང་རིག་གཞུང་རྒྱུན་འཛིན་བྱེད་དགོས། དེ་བཞིན་ཕན་ཚུན་བར་དྲང་བདེན་དང་མཐུན་འབྲེལ་བྱེད་དགོས་གསུངས་ཡོད། ཕན་ཚུན་བཀའ་མོལ་གནང་སྐབས་གུས་ཞབས་ལྡན་པའི་ཐོག་ནས་བཤད་དགོས་ གལ་སྲིད་བཞན་ལ་ཕན་ཐོགས་དང་རོགས་རམ་བྱེད་མི་ཐུབ་པ་ཡིན་ན་ཡང་གནོད་རྩ་བ་ནས་བསྐྱལ་རྒྱུ་མེད། དེ་ནི་ཁོང་གི་ཐུགས་རེའི་སྙིང་པོ་ཞིག་རེད། ཁོང་ནི་ང་ཚོའི་བོད་མི་ཚང་མའི་བླ་མ་རྩ་ཆེ་ཤོས་དེ་རེད། ཁོང་གིས་གསུངས་བའི་བཀའ་སློབ་རྣམས་ང་ཚོས་རྒྱུན་དུ་ལག་ལེན་བསྟར་དགོས།
ང་ཚོ་བོད་པ་ཚོས་༸གོང་ས་མཆོག་མཇལ་བའི་སྐབས་སུ་དད་གུས་ཆེན་པོས་ཕྱག་འཚལ། མིག་ཆུ་བཏང་ནས་ཁོང་གིས་གསུངས་པའི་ཐུགས་རེ་རྣམས་ལག་ལེན་མ་བསྟར་བ་ཡིན་ན་ངོ་ཚ་དགོས། དེང་སང་ཕྱི་ཡི་མི་རྣམས་ཀྱང་ཁོང་ལ་དད་པ་སྐྱེས་ནས་བཀའ་སློབ་རྣམས་ཡང་ཡང་ཉན་ནས་ཉམས་ལེན་བྱེད་ཀྱི་འདུག ༸གོང་ས་མཆོག་ནི་ང་ཚོ་བོད་པ་ཡོངས་ཀྱི་དབུ་ཁྲིད་ཡིན་པ་གང་ཞིག་རྩ་བའི་བླ་མ་ཡང་ཡིན། ཁོང་གི་སྙན་གྲགས་འཛམ་གླིང་ཡོངས་ལ་ཁྱབ་ཡོད། ང་ཚོ་བོད་པ་ཚང་མས་ཁོང་གི་བཀའ་སློབ་ཐུགས་རེ་རྣམས་ལག་བསྟར་བྱེད་དགོས་པ་ནི་ང་ཚོ་བོད་པ་རྩམ་ཟན་པ་ཡོངས་ཀྱི་ལས་འགན་རེད། ང་ཚོ་བོད་ཕྲུག་ཚོས་ཁོང་གིས་གསུངས་བའི་བཀའ་སློབ་དང་ལམ་སྟོན་རྣམས་ཉན་དགོས་པ་མ་ཟད་ལག་ལེན་ཡང་བསྟར་དགོས། ༸གོང་ས་མཆོག་རྒྱ་གར་ལ་བཙན་བྱོལ་ལ་ཕེབས་ནས་བཟུང་བོད་མི་རིགས་ཀྱི་བླ་སྲོག་བོད་ཀྱི་སྐད་ཡིག་མི་ཉམས་རྒྱུན་འཛིན་དང་སྲུང་སྐྱོབ་བྱེད་དགོས་སྐོར་ཡང་ཡང་གསུང་ཀྱིན་ཡོད། ཁོང་གིས་དགོངས་པ་རྒྱ་ཆེན་པོས་བོད་ཕྲུག་ཚོའི་ཆེད་བོད་པའི་སློབ་གྲྭ་ཟུར་དུ་བཙུགས་གནང་བ་རེད། ཁོང་གིས་བོད་ཕྲུག་ཚོར་ཤེས་ཡོན་སློབ་སྦྱོང་གི་མཐུན་རྐྱེན་རྒྱ་གར་ཡུལ་མི་ལས་བཟང་བ་བསྐྲུན་ཡོད། དེ་ཚོ་ང་ཚོ་བོད་ཕྲུག་ཚོས་ཧ་གོ་ནས་ཁོང་གིས་ཐུགས་རེ་གང་དང་གང་བཅངས་བ་རྣམས་བསྒྲུབ་ཐུབ་པ་བྱེད་དགོས།
ཁོང་གི་བཀའ་སློབ་ནང་བོད་རང་དབང་སླར་གསོ་ཡོང་ཆེད་རྒྱ་ནག་དམར་གཞུང་ལ་དམག་བརྒྱག་མི་དགོས་པར་རྒྱ་བོད་གཉིས་དབུ་མའི་ལམ་གྱི་ཐོག་ནས་དཀའ་རྙོག་བསལ་དགོས་པའི་བཀའ་སློབ་ལམ་སྟོན་གནང་ཡོད། ཁོང་གི་དགོངས་པ་ཆེ་བཞེས་ཀྱི་ཐུགས་རེ་དེ་ང་ཚོ་མ་འོངས་བོད་ཀྱི་སོན་རྩ་རྣམས་ཀྱིས་ལག་བསྟར་བྱ་རྒྱུ་ཧ་ཅང་གལ་ཆེན་པོ་རེད་བསམ་གྱི་ཡོད།
༸གོང་ས་མཆོག་གིས་འཛམ་གླིང་ཡོངས་ལ་ལམ་སྟོན་གནང་བའི་སིའི་ཤེས་ཡོན་གྱི་སློབ་གསོ་རྒྱ་ཁྱབ་འགྲོ་བཞིན་འདུག སིའི་ཤེས་ཡོན་གྱི་སློབ་གསོ་འདི་༸གོང་ས་མཆོག་གིས་གསུངས་གནང་བ་རེད། ཚང་མས་མཁྱེན་གསལ་བཞིན་བོད་པའི་སློབ་གྲྭ་ཚང་མའི་ནང་སིའི་ཤེས་ཡོན་སློབ་ཁྲིད་གནང་གི་ཡོད། ང་ཚོའི་སློབ་གྲྭར་བདུན་ཕྲག་གཅིག་གི་ནང་ཚོགས་ཐུན་གཅིག་སིའི་ཤེས་ཡོན་ཆེད་དུ་བཞག་ཡོད། ཚོགས་ཐུན་དེའི་རིང་སིའི་ཤེས་ཡོན་གྱི་བྱེད་སྒོ་སྣ་ཚོགས་བྱེད་ཀྱི་ཡོད། ༸གོང་ས་མཆོག་གིས་བོད་ཕྲུག་ཚོ་ཡ་རབས་སྤྱོད་བཟང་ཤ་སྟག་ཅིག་ཡོང་རྒྱུར་ཐུགས་རེ་གནང་གི་ཡོད་པར་ཐེ་ཚོམ་མེད། ༸གོང་ས་མཆོག་གིས་འགྲོ་བ་མིའི་བཟང་སྤྱོད་ཀྱི་སྐོར་ལ་བོད་ཕྲུག་ཚོར། མི་ཕན་ཚུན་དབར་འཆམ་པོ་དང་མཐུན་པོ་བྱས་ནས་བསྡད་དགོས་པ་དང་། ཕན་ཚུན་དབར་འབྲེལ་བ་བཟང་པོ་ཞིག་བཟོ་རྒྱུའི་ཐབས་ཤེས་བྱ་དགོས་པ་སོགས་སྐོར་བཀའ་སློབ་མང་པོ་གསུངས་ཡོད།
༸གོང་ས་མཆོག་ནི་བོད་མི་རིགས་ཀྱི་བླ་ན་མེད་པའི་དབུ་ཁྲིད་རེད། ཁོང་རྒྱ་གར་དུ་བཙན་བྱོལ་ལ་ཕེབས་སྐབས་ཐོག་མར་བོད་མི་རིགས་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་དང་། སོ་སོའི་སྐད་ཡིག་སྦྱང་རྒྱུ་དེ་གལ་ཆེན་ནང་ནས་དོན་ཆེན་དགོངས་ནས་བོད་ཕྲུག་ཚོར་བོད་པའི་སློབ་གྲྭ་ཟུར་དུ་གསར་བཙུགས་གནང་བ་ནས་སྐད་ཡིག་གལ་ཆེན་པོ་ཡིན་པའི་སྐོར་བཀའ་སློབ་གནང་ཡོད། དེ་ནི་༸གོང་ས་མཆོག་གིས་བོད་ཕྲུག་ཚོར་བཅངས་པའི་ཐོག་མའི་ཐུགས་རེ་ཞིག་རེད། དེེར་བརྟེན། ང་རང་ཚོའི་སོ་སོའི་སྐད་ཡིག་ལ་དོ་སྣང་དང་བརྩོན་འགྲུས་བྱས་ནས་སྦྱང་དགོས། བོད་མི་རིགས་འདི་རྒྱ་མིའི་བཙན་གནོན་འོག་ནས་ཐར་ཐབས་སུ་བོད་ཕྲུག་ཚོས་སོ་སོའི་སྐབས་བབ་ཀྱི་རང་ཁྲིའི་སློབ་སྦྱོང་ལ་དོ་སྣང་བྱས་ནས་སློབ་སྦྱོང་ཡག་པོ་བྱེད་དགོས་པ་ནི་༸གོང་ས་མཆོག་གིས་བོད་ཕྲུག་ཚོར་བཅངས་པའི་ཐུགས་རེ་ཞིག་རེད། གལ་སྲིད་རང་ཉིད་ལ་སློབ་སྦྱོང་མེད་ན་བོད་དོན་ཕར་བཞག་ནས་སོ་སོའི་མི་ཚེའི་དཀའ་ངལ་ཡང་སེལ་མ་ཐུབ་ནས་ལྷག་རྒྱུའི་ཉན་ཁ་ཡོད།
༸གོང་ས་མཆོག་གིས་ཁོར་ཡུག་སྲུང་སྐྱོབ་ལ་ཐུགས་རེ་ཆེན་པོ་གནང་གི་ཡོད་རེད། ཁོར་ཡུག་ཟེར་བ་དེ་ང་རང་ཚོའི་འཚོ་སྡོད་བྱེད་སའི་རང་བྱུང་ཁམས་ཀྱི་དངོས་པོ་ཡོད་ཚད་ལ་ཟེར་བ་རེད། དངོས་པོ་འདི་དག་ཆ་ཚང་ཞིག་གཅིག་ལ་གཅིག་བརྟེན་ནས་གནས་ཡོད། ང་རང་ཚོའི་ཉེ་འཁོར་ཀྱི་ཁོར་ཡུག་རྣམས་སྲུང་སྐྱོབ་བྱེད་སྟངས་ཁ་ཤས་ཞིག་བཤད་ན་ཐོག་མར་རང་ཉིད་ཀྱི་གནས་སའི་ཉེ་འཁོར་དང་སྤྱི་སྤྱོད་ཀྱི་གནས་གཞི་གང་དུའང་གད་སྙིགས་སོགས་མ་གཡུགས་པར་ཤིང་ནག་དང་། མེ་ཏོག་བཅས་འདེབས་འཛུགས་བྱེད་དགོས། དེ་བཞིན་ཤིང་ནག་གཅོད་འབྲེག་དང། གཏེར་ཁ་རྣམས་བསྔོག་འདོན་བྱེད་མི་རུང་། ༸གོང་ས་མཆོག་གི་ཐུགས་རེ་བཞིན། སྐྱེ་འགྲོ་ཐམས་ཅད་ལ་ཞི་བདེ་དང་། ཡིད་དུ་འོང་བའི་ཁོར་ཡུག་ཅིག་བསྐྲུན་དགོས།
༸གོང་ས་མཆོག་གིས་སོ་སོའི་ཉེ་འགྲམ་དུ་ཡོད་པའི་རང་ལས་རྒན་པ། ཆུང་བ། ན་མཉམ་སུ་ཞིག་ཡིན་ནའང་གུས་ཞབས་དང་། མཐུན་ལམ། བྱམས་སྐྱོང་བྱེད་དགོས་པའི་བཀའ་སློབ་གནང་ཡོད། ནམ་རྒྱུན་དུ་མི་གཞན་དང་མཉམ་དུ་བྱམས་པ་དང་བརྩེ་བའི་ངང་ནས་བཀའ་མོལ་གནང་དགོས། མི་གཞན་ལ་བྱམས་པ་དང་བརྩེ་བའི་ངང་ནས་བཀའ་མོལ་གནང་རྒྱུ་དེ་རང་ཉིད་ཀྱི་གཤིས་ཀ་བཟང་པོའི་རྟགས་མཚན་ཞིག་བསྟན་གྱི་ཡོད། གལ་སྲིད་རང་ཉིད་ཀྱི་ངོས་ནས་སྨོན་ལམ་འདེབས་ཀྱི་ཡོད་ནའང་འགྲོ་བ་རིགས་དྲུག་སེམས་ཅད་ཐམས་བཅད་ཆེད་དུ་སྨོན་ལམ་བཏབ་ན་ཡག་པོ་ཡོད། རྟག་པར་སོ་སོ་རང་གི་ཆེད་དུ་སྨོན་ལམ་བཏབ་ན་ཡག་པོ་མེད། གོང་གསལ་དེ་དག་ཚང་མ་༸གོང་ས་མཆོག་གི་ང་ཚོ་བོད་ཕྲུག་ལ་བཅངས་པའི་ཐུགས་རེ་རེད། ང་རང་ཚོ་རྟག་པར་ལས་ཀ་གང་བྱས་པ་ཡིན་ན་ཡང་ཁོང་གི་གསུངས་པའི་བཀའ་སློབ་རྣམས་སེམས་ལ་བཞག་ནས་ཁོང་གི་བཀའ་དྲིན་དྲན་དགོས། ཁོང་དགུང་ལོ་བཅུ་དྲུག་ནས་ད་ལྟ་བར་དུ་བོད་མི་ཚོའི་ཆེད་དུ་སྐུ་ལས་མང་པོ་བསྐྱོན་ཡོད། ཁོང་གི་ཐུགས་རེ་དང་བཀའ་དྲིན་རྣམས་སྙིང་ལ་བཅངས་ནས་ལག་ལེན་དུ་ཡོད་པ་བྱེད་ཀྱི་ཡིན།
ང་ཡི་རྩ་བའི་བླ་མ།།
༸སྐྱབས་མགོན་ཏཱ་ལའི་བླ་མ།།
བྱམས་དང་བརྩེ་བས་སྐྱོང་མཁན།།
ཞི་བདེའི་དེད་དཔོན་ཁྱེད་ཡིན།།
ད་བར་དཔྱད་མཆན་མེད།