ཤེས་ཡོན་སློབ་སྦྱོང་གི་བརྒྱུད་རིམ་ནི། རྗོད་བྱེད་ཚིག་གི་སྦྱོར་བ་ལ་བརྟེན་ནས་བརྗོད་བྱའི་དོན་འཁྲུལ་བ་མེད་པར་རྟོགས་པར་བྱེད་པའི་བརྒྱུད་རིམ་ཞིག་ཡིན་པས། གང་བསླབ་པར་བྱ་བའི་དོན་ལ་རང་སྟོབས་ཀྱིས་བརྟགས་ཤིང་དཔྱད་དེ་འཁྲུལ་བ་བསལ་ཆེད། བོད་ཀྱི་སྲོལ་རྒྱུན་ཚད་མ་རིག་པའི་གཞུང་གི་སྔོན་འགྲོ་བསྡུས་གྲྭའི་སྐོར་གཞི་རིམ་བར་མ་ནས་བཟུང་བསླབ་གཞིའི་གཙོ་གྲས་སུ་བཞག་སྟེ་སློབ་གཉེར་བྱེད་པ་དང་འབྲེལ། སློབ་མའི་རིགས་སྟོབས་སྨིན་ཚད་ལ་གཞིགས་ཏེ་རྟེན་འབྲེལ་དང༌། ཕྱི་ནང་གི་ལྟ་གྲུབ། བློ་སྦྱོང། བདག་གཞན་མཉམ་བརྗེ་སྒོམ་པའི་ཉམས་ལེན་སོགས་ནང་དོན་རིག་པའི་བསམ་སྤྱོད་ཀྱི་བསླབ་པ་རྣམས་དང། ཁྱད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ལྟ་གྲུབ་དང་། འཇིག་རྟེན་ཀུན་ཁྱབ་ཀྱི་དོན་ཆེན་ཁུར་དུ་འཁྱེར་བའི་ལྷག་བསམ་དང། སེམས་ཀྱི་དཀའ་ངལ་སེལ་བ་དང་ཞི་བདེ་སྐྲུན་ཐབས་བཀའ་སློབ་ལམ་སྟོན་ཁག་དངོས་ཡོད་འཚོ་བའི་ཁྲོད་སྒོ་གསུམ་གྱི་ཉམས་ལེན་དང་སྦྱར་ནས་སློབ་སྟོན་གནད་སྨིན་ཡོང་ཐབས་བྱ་དགོས། རིགས་ལམ་སློབ་སྦྱོང་དང་སློབ་ཁྲིད་དེ་ཡང་རྩོད་པའི་ཁ་ཤགས་འགྱེད་པ་ཙམ་དང། ནང་ཆོས་སློབ་ཚན་དེ༌དད་པ་དང་ཆོ་ག་ཕྱག་ལེན་ཙམ་མ་ཡིན་པར། ནང་ཆོས་བསླབས་པས་རིགས་ལམ་ལ་དོན་སྙིང་འབྱིན་པ་དང། རིགས་ལམ་ལ་བརྟེན་ནས་ནང་ཆོས་ཀྱི་གོ་བ་རྙེད་ཐབས་བཅས། རིགས་ལམ་དང་ནང་ཆོས་གཉིས་གཅིག་ཕན་གཅིག་གྲོགས་ཀྱི་ཐབས་བྱུས་འཛིན་དགོས་པ་མ་ཟད། རིག་ཚན་གཞན་ལའང་ཐོས་པས་གོ་རྒྱ་བསྐྱེད་པ་དང༌། དཔྱད་པས་བརྡར་ཤ་གཅོད་པ། ལེགས་ཉེས་དབྱེ་འབྱེད་ཀྱི་ཤེས་རབ་བསྐྱེད་པ་དང་། སྒོམ་པའི་ཉམས་ལེན་ལ་བརྟེན་ནས་སེམས་ལ་ཞི་བདེ་ཡོང་ཐབས་བཅས་རིགས་ལམ་སྦྱོང་བརྡར་དང་སློབ་ཚན་འཁྲིད་སྦྱོང་ཡ་མ་བྲལ་བ་བྱ་དགོས། རིགས་ལམ་དང་ནང་ཆོས་སློབ་ཁྲིད་ལ་གཞོགས་འདེགས་དང། སློབ་ཁྲིད་གནད་དུ་སྨིན་པ་ཡོང་ཆེད། སློབ་ཕྲུག་རྣམས་ཉེ་འབྲེལ་དགོན་པ་དང་དགེ་འདུན་པའི་བསྟི་གནས་སུ་ལྟ་བསྐོར་དུ་ཁྲིད་པ་དང། ཉམས་གསོག་དང་ཟུར་ཞུགས། བཅར་འདྲི། བགྲོ་གླེང༌། རྩོད་གྲྭ་སོགས་ཀྱི་ལས་རིམ༌གང་མང་གོ་སྒྲིག་བྱས་ཏེ་རིགས་ལམ་དང་ནང་ཆོས་ཐོག་ཤེས་རྒྱ་བསྐྱེད་དགོས་པ་མ༌ཟད། རང་ཉིད་ཀྱི་ཁོར་ཡུག་ཏུ་སྤྱི་ཚོགས་ཁྲོད་ཉམ་ཐག་ལྟ་སྐྱོང་དང། དང་བླངས་ཞབས་ཞུ། ཁོར་ཡུག་སྲུང་སྐྱོབ། སྲོག་བླུ། སྦྱིན་པ༌ལྟ་བུའི་དགེ་བའི་ལས་ལ༌ཞུགས་པའི་གོ་སྐབས་འདང་ངེས་སྤྲད་དེ། དགེ་བའི་ཕན་ཡོན་དང་སྡིག་པའི་ཉེས་དམིགས་ངོ་འཕྲོད་ཐབས་ཙམ་མ་ཡིན་པར་སེམས་གཏིང་ནས་ཉམས་སུ་མྱོང་ཐུབ་པ་ཞིག་ངེས་པར་བྱ་དགོས། སྦྱངས་འབྲས་རྟོག་ཞིབ་གནང་སྟངས་ཐད། ངག་རྒྱུགས་དང། རྩོད་རྒྱུགས། བྲིས་རྒྱུགས་བཅས་ཀྱི་ཐོག་ཕྲུ་གུའི་རྒྱུན་གཏན་གྱི་སྤྱོད་ལམ་སོགས་ལ་རྟོག་ཞིབ་རྒྱུན་བསྲིང་གི་ལམ་ནས་ཚད་འཇལ་བྱ་རྒྱུ། གཞི་རིམ་གོང་མའི་རིགས་ལམ་དང་ནང་ཆོས་ཀྱི་སློབ་ཚན་ལ་བདུན་ཕྲག་རེར་ཉུང་མཐར་ཚོགས་ཐུན་གཉིས་ལས་མ་ཉུང་བའི་ཐོག་སྔ་དགོང་གི་དུས་ཚོད་བབ་བསྟུན་བེད་སྤྱོད་གཏོང་ཆོག གཞི་རིམ་གོང་མའི་བོད་ཡིག་བསླབ་གཞི་ལས་སྐད་ཡིག་སློབ་ཚན་ནི་བོད་ཡིག་དགེ་རྒན་གྱིས་འཁྲིད་དགོས་པ་དང། རིགས་ལམ་དང་ནང་ཆོས་སློབ་ཚན་གཙོ་བོ་ཆོས་དགེ་རྣམས་ཀྱིས་འཁྲིད་སྟོན་བྱ་དགོས། བོད་ཡིག་རྒྱུགས་སྤྲོད་སྐབས་རིགས་ལམ་དང་ནང་ཆོས་ལ་བརྒྱ་ཆ་༢༠ དང། སྐད་ཡིག་ལ་བརྒྱ་ཆ་༨༠ བཅས་གཏན་འབེབས་བྱས་པ་ཡིན། འཛིན་རིམ་དགུ་པའི་རིགས་ལམ་དང་ནང་ཆོས། རིགས་ལམ། ཀ) བློ་རིག་གི་རྣམ་གཞག། ཁ) བློ་རིག་གི་དབྱེ་བའི་འཕྲོས་བཤད། ནང་ཆོས། ༡) བཤེས་སྤྲིངས། (སྟོད་ཆ) འགོ་ནས་རབ་བྱེད་སུམ་ཅུ་སོ་བཞི་བར། […]

དང་པོ། བརྡ་སྤྲོད། ༡། རྟགས་འཇུག རྟགས་འཇུག་གི་རྩ་བ་ལས་མིང་གཞི་དང༌། སྔོན་འཇུག་གི་རྟགས་ཀྱི་དབྱེ་བ་དང། སྔོན་འཇུག་གི་འཇུག་པ། བདག་གཞན་དུས་གསུམ། རྟགས་འཇུག་གི་རྩ་བ་ལས་རྗེས་འཇུག་གི་རྟགས་ཀྱི་དབྱེ་བ་དང་འཇུག་པ། ཁྲིད་གཞིའི་ལམ་སྟོན། སི་ཏུའི་ཞལ་ལུང་། མཛད་པ་པོ། དངུལ་ཆུ་དྷརྨ་བྷ་དྲ། ཤེས་རིག་པར་ཁང་། གཉིས་པ། གོ་རྟོགས་ནུས་རྩལ། བོད་དུ་རིག་གནས་དར་ཚུལ་མདོར་བསྡུས་བཤད་པ། (སྨད་ཆ) གསུམ་པ། ཡིག་རིགས་དང་རྩོམ་འབྲིའི་ཤེས་བྱ། ༡། རྒྱུན་སྤྱོད་ཡིག་རིགས། ལས་བསྡོམས་སྙན་ཐོ་དང༌། སྐྱབས་རྟེན། བསྔོ་རྟེན། རྒྱབ་གཉེར་ཡི་གེ ༢། རྩོམ་འབྲིའི་ཤེས་བྱ། སྒྲུང་ཐུང་འབྲི་ཐབས། སྒྲུང་ཐུང་རྩོམ་ཡིག་འབྲི་དཔེ་ཁག་ལ་སློབ་སྦྱོང་བྱས་པ་བརྒྱུད། སྒྲུང་ཐུང་གི་མི་སྣ་དང༌། ཡུལ་ལྗོངས། དུམ་མཚམས་དབྱེ་སྟངས། སྒྲིག་གཞི་བཀོད་སྒྲིག་བྱེད་སྟངས་བཅས་ལ་རྒྱུས་མངའ་ཡོད་པའི་སྒོ་ནས་གསོན་ཉམས་ལྡན་པའི་སྒྲུང་རྩོམ་ཐུང་ངུ་འབྲི་ཀློག་གི་གོ་སྐབས་མང་ཙམ་སྤྲོད་དགོས། སྒྲུང་ཐུང་དང་དུང་སེམས་མཚོན་པའི་བཅད་ལྷུག་གི་རྩོམ་ཡིག་གང་འཚམས་རེ་བཀོད་དེ་རྩོམ་ཡིག་འབྲི་བའི་ཆུ་ཚད་གོང་མཐོར་གཏོང་རྒྱུ། རྩོམ་རིག་གི་སྒྱུ་རྩལ་ཕུན་སུམ་ཚོགས་ཤིང་སློབ་མའི་གནས་སྟངས་དང་འཚམས་པའི་སྒྱུར་རྩོམ་ཐུང་གྲས་༡ ལས་མི་ཉུང་བར་སློབ་སྦྱོང་བྱ་དགོས། བཞི་པ། རྩོམ་རིག ༡། ལྷུག་རྩོམ། བཅད་ལྷུག་སྤེལ་གསུམ་ཚུན་ཕབ་སྟངས་དང་། བསྟན་དོན་ལ་གོ་རྟོགས་ཡོང་ཆེད། ལེགས་བཤད་རྩ་འགྲེལ་གང་རུང་ཞིག་འདེམས་བཏུས་ཀྱིས་བསླབ་གཞིར་འཇོག་དགོས། ཁྲིད་གཞིའི་ལམ་སྟོན། ༡ བྱ་སྤྲེལ་གཏམ་བརྒྱུད། ༢ ལེགས་བཤད་བློ་གསར་མིག་འབྱེད། ༢། སྙན་ངག སྙན་ངག་མེ་ལོང་གི་དོན་རྒྱན་ལས། གཟུགས་རྒྱན་དང་། བསྡུས་བརྗོད་ཀྱི་རྒྱན། རབ་བཏགས་ཀྱི་རྒྱན་སོགས་རྒྱུན་སྤྱོད་རྒྱན་ཉུང་བསྡུས་ངོ་སྤྲོད་བྱས་པ་བརྒྱུད་སྟབས་བདེའི་བརྗོད་གཞིའི་ཐོག་བཅད་ལྷུག་རྩོམ་ཡིག་འབྲི་ཀློག་གི་སྦྱོང་བརྡར། […]

དང་པོ། བརྡ་སྤྲོད། རྒྱུན་སྤྱོད་བྱ་ཚིག་ཁག་ཅིག་ཟུར་བཀོལ་གྱིས། དུས་གསུམ་སྤྱི་དང། བྱེ་བྲག ཐོར་བུ། ཁྱབ་མཉམ་བཅས་ངོ་སྤྲོད་བྱ་རྒྱུ། ཁྲིད་གཞིའི་ལམ་སྟོན། ༡ སི་ཏུའི་ཞལ་ལུང་། མཛད་པ་པོ། དངུལ་ཆུ་དྷརྨ་བྷ་དྲ། ཤེས་རིག་པར་ཁང་། ༢ ཐུབ་བསྟན་མཆོག་སྒྲུབ་ཀྱིས་བརྩམས་པའི་བྱ་ཚིག་ལ་དཔྱོད་པ། གཉིས་པ། གོ་རྟོགས་ནུས་རྩལ། བོད་དུ་རིག་གནས་དར་ཚུལ་མདོར་བསྡུས་བཤད་པ། (སྟོད་ཆ། ) གསུམ་པ། ཡིག་རིགས་དང་རྩོམ་འབྲིའི་ཤེས་བྱ། ༡། རྒྱུན་སྤྱོད་ཡིག་རིགས། གན་རྒྱ། སྙན་ཞུ། ཤོག་ཆག་སོགས་ལ་ཁ་བྱང་འབྲི་སྟངས། ཚོགས་འདུའི་ཚིག་ཐོ་འགོད་སྟངས་སོགས་བསླབ་རྒྱུ། ༢། རྩོམ་འབྲིའི་ཤེས་བྱ། དགག་སྒྲུབ་རྩོམ་ཡིག་འབྲི་དཔེ་ཁག་ལ་སློབ་སྦྱོང་བྱས་པ་བརྒྱུད། དགག་སྒྲུབ་རྩོམ་ཡིག་བསྒྲུབ་བྱ་དང་སྒྲུབ་བྱེད། སྒྲུབ་རིམ་སོ་སོར་ངོས་འཛིན་གྱིས་རྩོམ་འབྲིའི་སྦྱོང་བརྡར་བྱ་དགོས། བཞི་པ། རྩོམ་རིག ༡། ལྷུག་རྩོམ། བཅད་ལྷུག་སྤེལ་གསུམ་ཚུན་ཕབ་སྟངས་དང་། བསྟན་དོན་ལ་གོ་རྟོགས་ཡོང་ཆེད། ལེགས་བཤད་རྩ་འགྲེལ་གང་རུང་ཞིག་འདེམས་བཏུས་ཀྱིས་བསླབ་གཞིར་འཇོག་དགོས། ཁྲིད་གཞིའི་ལམ་སྟོན། བསླབ་བྱ་མུ་ཐི་ལའི་ཕྲེང་བ། ༢། ཟློས་གར། མི་སྣ་དང་། ཁོར་ཡུག གཏམ་གླེང་སོགས་གསར་བཟོའི་ལམ་ནས་སྒྲུང་གཏམ་དང་ཟློས་གར་འབྲི་ཐབས་ཀྱི་ཤེས་རྩལ་གོང་མཐོར་ཡོང་ཆེད། བོད་ཀྱི་གནའ་རབས་གཏམ་རྒྱུད་དང༌། ཟློས་གར་རྩོམ་རིག་གང་རུང་སློབ་ཚན་དུ་བཀོད་དེ། བརྗོད་བྱ་དང་རྗོད་བྱེད་གཉིས་ཀར་ངེས་སྦྱོང་བྱ་དགོས། ཁྲིད་གཞིའི་ལམ་སྟོན། གཏམ་པདྨའི་ཚལ་གྱི་ཟློས་གར། མཛད་པ་པོ། རྫ་དཔལ་སྤྲུལ་རིན་པོ་ཆེ། ཤེས་རིག་པར་ཁང། […]

དང་པོ། བརྡ་སྤྲོད། ༡། སུམ་ཅུ་པ། སུམ་ཅུ་པའི་རྩ་བ་ལས་རྗེས་འཇུག་ལ་མ་ལྟོས་པའི་ཕྲད་རང་དབང་ཅན་བཤད་པ། སུམ་ཅུ་པའི་རྩ་བ་ལས་ཚིགས་བཅད་འགྲོལ་ཚུལ་དང་སུམ་ཅུ་པ་སྦྱངས་པའི་དགོས་པ་དང་མ་སྦྱངས་བའི་ཉེས་དམིགས། ཉན་པོ་སྣོད་རུང་བ་བཅས་ངོ་སྤྲོད་བྱ་རྒྱུ། རྟགས་འཇུག་གི་རྩ་བ་བློ་འཛིན་བྱ་རྒྱུ། ཁྲིད་གཞིའི་ལམ་སྟོན། ༡ སི་ཏུའི་ཞལ་ལུང་། མཛད་པ་པོ། དངུལ་ཆུ་དྷརྨ་བྷ་དྲ། ཤེས་རིག་པར་ཁང་། ༢ རྟགས་འཇུག་གི་རྩ་བ། མཛད་པ་པོ། ཐོན་མི་སམ་བྷོ་ཊ། ༢། དག་ཡིག མངོན་བརྗོད་རྒྱ་མཚོའི་ཆུ་ཐིགས། མངོན་བརྗོད་རིག་པའི་ཤེས་བྱ། ཁྲིད་གཞིའི་ལམ་སྟོན། ༡། གངས་ལྗོངས་བརྡ་དག་ཀུན་འདུས། ཤེས་རིག་ལས་ཁུངས་ཀྱིས་དཔར་འགྲེམས་བྱས། གཉིས་པ། གོ་རྟོགས་ནུས་རྩལ། སྒྲུང་ཐུང་སྣ་ཚོགས་དང་། དངོས་བསྐྱོད་ཟིན་ཐོ། དངོས་བྱུང་གཏམ་བརྒྱུད་བཅས་ལས་ཚན་པ་གཅིག་ཟུར་འདོན་གྱི་འགོད་པའམ། ཡང་ན་སྒྲུང་ཐུང་རིགས་ཡིན་ན་ཆ་ཚང་སློབ་ཚན་སྟོད་སྨད་ཀྱིས་འགོད་པ། དེ་མིན་སྐད་ཡིག་གཞན་ལས་བསྒྱུར་ཏེ་འགོད་པ་སོགས་ཅི་རིགས་ཀྱི་ལམ་ནས་འདེམས་སྒྲིག་གིས་འགོད་དགོས། གསུམ་པ། ཡིག་རིགས་དང་རྩོམ་འབྲིའི་ཤེས་བྱ། ༡། རྒྱུན་སྤྱོད་ཡིག་རིགས། རྒྱུན་སྤྱོད་ཡིག་རིགས་ལས་བསྐུར་ཡིག་འབྲི་སྟངས་བསླབ་དགོས་ཤིང་། དེའང་སྒྲིག་གཞི་ཡོད་མེད་གཉིས་ཀྱི་བསྐུར་ཡིག་གི་དཔེ་མཚོན་དང་བཅས་འགོད་དགོས། དཔེར་ན། མངགས་ཉོ་དང། མགྲོན་ཤོག ཚགས་པར་དང་དུས་དེབ་ཀྱི་རྩོམ་སྒྲིག་པར་གནད་དོན་ཞིག་གི་སྟེང་འཕྲིན་ཡིག་བསྐུར་བ། ཁྲིད་གཞིའི་ལམ་སྟོན། བོད་ཀྱི་ཡིག་བསྐུར་རྣམ་གཞག ཤེས་རིག་དཔར་ཁང། ༢། རྩོམ་འབྲིའི་ཤེས་བྱ། གསལ་བཤད་རྩོམ་ཡིག་འབྲི་སྟངས་ངོ་སྤྲོད་དང༌། བརྗོད་དོན་གཙོ་བོ་གསལ་བཤད་བྱེད་ཐབས་སོགས་གཞི་རྩའི་ནུས་པ་བསྐྱེད་སྲིང་བྱ་རྒྱུ། ཁྲིད་གཞིའི་ལམ་སྟོན། བོད་ཕྱི་ནང་གི་རྩོམ་རིག་གི་དཔེ་དེབ་ཚད་ལྡན་ཁག་དང་། སྐད་ཡིག་གཞན་ལས་བསྒྱུར་འགོད་བྱ་རྒྱུ། བཞི་པ། རྩོམ་རིག […]

དང་པོ། བརྡ་སྤྲོད། ༡། སུམ་ཅུ་པ། སུམ་ཅུ་པའི་རྩ་བ་ལས་སྦྱར་བྱ་ཡི་གེའི་རྣམ་གཞག་དང་། ཕྲད་གཞན་དབང་ཅན་རྣམ་དབྱེ་དང་བཅས་པ། མིང་དང་ཁྱད་ཚིག བྱ་ཚིག རྒྱན་ཚིག་ངོ་སྤྲོད་བྱ་རྒྱུ། སུམ་ཅུ་པའི་རྩ་བ་བློ་འཛིན་བྱ་རྒྱུ། ཁྲིད་གཞིའི་ལམ་སྟོན། ༡ སི་ཏུའི་ཞལ་ལུང་། མཛད་པ་པོ། དངུལ་ཆུ་དྷརྨ་བྷ་དྲ། ཤེས་རིག་པར་ཁང་། ༢ སུམ་ཅུ་པའི་རྩ་བ། མཛད་པ་པོ། ཐོན་མི་སམ་བྷོ་ཊ། ༢། དག་ཡིག དག་ཡིག་ལས་འཕུལ་དང་མཐའ་རྟེན། མགོ་ཅན་གསུམ་གྱི་སྦྱོར་ཚུལ་དང། གདམ་ང་ཅན་གྱི་དག་ཆ། མཛད་པ་པོ། དཔལ་ཁང་ལོ་ཙཱ་བ། གཉིས་པ། གོ་རྟོགས་ནུས་རྩལ། སྒྲུང་ཐུང་སྣ་ཚོགས་དང་། དངོས་བསྐྱོད་ཟིན་ཐོ། དངོས་བྱུང་གཏམ་བརྒྱུད་བཅས་ལས་ཚན་པ་གཅིག་ཟུར་འདོན་གྱི་འགོད་པའམ། ཡང་ན་སྒྲུང་ཐུང་རིགས་ཡིན་ན་ཆ་ཚང་སློབ་ཚན་སྟོད་སྨད་ཀྱིས་འགོད་པ། དེ་མིན་སྐད་ཡིག་གཞན་ལས་བསྒྱུར་ཏེ་འགོད་པ་སོགས་ཅི་རིགས་ཀྱི་ལམ་ནས་འདེམས་སྒྲིག་གིས་འགོད་དགོས། གསུམ་པ། ཡིག་རིགས་དང་རྩོམ་འབྲིའི་ཤེས་བྱ། ༡། རྒྱུན་སྤྱོད་ཡིག་རིགས། རྒྱུན་སྤྱོད་ཡིག་རིགས་ལས་ཕ་མ་དང་སྤུན་མཆེད། གྲོགས་པོ་སོགས་ལ་གཏོང་ཡིག་འབྲི་སྟངས་དང། གསལ་བསྒྲགས་དང་ཟིན་བྲིས། ཉིན་ཐོ་འབྲི་སྟངས་བསླབ་རྒྱུ་དང། དེ་དག་གི་དཔེ་མཚོན་བཅས་འགོད་དགོས། ཁྲིད་གཞིའི་ལམ་སྟོན། བོད་ཀྱི་ཡིག་བསྐུར་རྣམ་གཞག སྐད་ཡིག་གཞན་ནས་བསྒྱུར་འགོད་བྱས་ཀྱང་ཆོག ༢། རྩོམ་འབྲིའི་ཤེས་བྱ། ལྗོངས་རྣམ་དང་། དངོས་རྣམ། མི་སྣ་འབྲི་ཚུལ། སྲོག་ཆགས་འབྲི་ཚུལ། བྱ་བ་འབྲི་ཚུལ་བཅས་ཀྱི་རྩོམ་ཐབས་ངོ་སྤྲོད་བྱ་རྒྱུ། བཞི་པ། རྩོམ་རིག […]

༢་༡ སྐད་ཡིག་གི་བསླབ་གཞིའི་གཞི་རྩའི་ལམ་སྟོན། ༢༌༡་༡ སྐད་ཡིག་སློབ་སྦྱོང་གི་ཆོས་ཉིད། ཀ) སྐད་ཡིག་ནི་སྒྲིག་གཞི་ཡོད་པའི་མ་ལག་ཅིག་ཡིན། སྐད་ཡིག་ཞིབ་འཇུག་པ་ཚོས་སྐད་ཡིག་གི་གྲུབ་ཚུལ་སྐོར་ཚན་རིག་དང་མཐུན་པར་ཞིབ་འཇུག་བྱས་ཤིང། སྐད་ཡིག་ལས་བརྡ་སྤྲོད་རིག་པ་ཟུར་འདོན་གྱིས་དེའི་གྲུབ་ཚུལ་གྱི་ནང་གསེས་མ་ལག་མང་པོར་དབྱེ་ཡོད། སྒྲ་གདངས་ལྟ་བུ་ལ་མཚོན་ན་འཛམ་གླིང་འདིའི་སྐད་ཡིག་མང་ཆེ་བ་སྒྲའི་དབྱངས་རྟ་དང་སྒྲ་དྲག་ཞན་ལ་བརྟེན་ནས་སྒྲའི་འགྱུར་ཁུག་དང་སྙན་ལོས་སོགས་དབྱེ་བ་འབྱེད་པ་ཡིན། ཨིན་ཇི་ལྟ་བུར་མཚོན་ན་བརྗོད་པའི་སྒྲའི་མཐོ་དམན་གྱི་དབྱངས་རྟ་འཐེན་ཚུལ་བོད་སྐད་དང་མི་མཚུངས་ལ། བོད་སྐད་ལའང་སྙན་ངག་ཏུ་དཔའ་བའི་ཉམས་དང། དྲག་པོའི་ཉམས། སྙིང་རྗེའི་ཉམས་ལ་སོགས་བརྗོད་ཚིག་སྦྱོར་ཚུལ་གཞན་དང་མི་འདྲ་བར་ཡོད། དེ་བཞིན་སྐད་ཡིག་ལ་བྱེད་པ་པོའམ་མིང་དང། བྱ་ཚིག བྱ་བའི་ཡུལ་བཅས་བརྗོད་པའི་གོ་རིམ་སྒྲིག་ཚུལ་འདྲ་མིན་སྣ་ཚོགས་ཡོད། སྐད་ཡིག་སོ་སོའི་ཐུན་མོང་མ་ཡིན་པའི་སྐད་གཤིས་ལ་སྣང་མེད་ཀྱིས་བེད་སྤྱོད་གཏོང་ཐལ་བྱུང་ཚེ། མ་སྐད་དང་སྐད་ཡིག་གཉིས་པ་གཉིས་ཀར་དོ་ཕོག་གམ་གནོད་སྐྱོན་འབྱུང་ཞིང། སྤྱི་ཚོགས་ཁྲོད་སྐད་ཡིག་མ་དག་རྒྱུན་འབྱམས་ཡོང་བའི་གཞི་རྩ་གཙོ་བོ་ཞིག་སློབ་གྲྭའི་སྐད་ཡིག་སློབ་ཁྲིད་ལ་རག་ལས་ཡོད་པས། སྤྱི་ཚོགས་སྤྱི་དང་ཁྱད་པར་ཆགས་འཇིག་གི་སོ་མཚམས་སུ་ཡོད་པའི་བོད་མི་རིགས་ལ་གྱོང་གུད་ཚབས་ཆེན་འཕོག་གཞིར་སོང་དགེ་རྒན་དང་འབྲེལ་ཡོད་ཚང་མས་མཐོང་ཆེན་དང་ཐུགས་ཁུར་གནང་སྟེ། གཞི་རིམ་སློབ་མའི་སྐད་ཡིག་སློབ་ཁྲིད་ཀྱི་བརྒྱུད་རིམ་ཁྲོད་དགེ་རྒན་གྱིས་སློབ་ཕྲུག་གི་སྐད་ཆ་བཤད་སྐབས་གཟབ་ནན་གྱིས་ཉན་ཏེ་སྐད་ཡིག་སོ་སོའི་གྲུབ་ཚུལ་དང་གོ་རིམ་གཤིབ་བསྡུར་གྱི་སྒོ་ནས་གསལ་སྟོན་གནང་དགོས་པ་མ༌ཟད། སྐད་ཡིག་བཀོལ་སྤྱོད་ཀྱི་བརྒྱུད་རིམ་ཁྲོད་གསལ་དག་སྙན་གསུམ་གྱི་སྤུས་ཚད་དམ་འཛིན་ཡོང་ཐབས་སླད་དམིགས་བསལ་ཐུགས་སྣང་གནང་དགོས། ཁ) ཁ་སྐད་དང་ཡིག་སྐད། སྐད་དང་ཡི་གེ་གཉིས་ནི། འགྲོ་བ་མིའི་བརྡ་སྦྱོར་གྱི་བརྒྱུད་ལམ་མམ་རྣམ་པ་མི་འདྲ་བ་གཉིས་ཡིན། མིའི་སྤྱི་ཚོགས་ཀྱི་འཕེལ་རིམ༌ཁྲོད་ཡི་གེ་ནི་སྐད་ལ་བརྟེན་ནས་བྱུང་ཞིང། སྤྱི་ཚོགས་ཀྱི་འཕེལ་འགྲོས་དབང་གིས་སྐད་དང་ཡི་གེ་གཉིས་ཀར་འཕོ་འགྱུར་འབྱུང་བཞིན་ཡོད༌པས། སྐད་ཡིག་གཉིས་ལས་གང་ཞིག་གཙོ་བོར་འཛིན་རྒྱུ་དང། གང་ཞིག་གང་གི་རྗེས་སུ་འབྲང་དགོས་མིན་ཐད་གནའ་དེང་གི་མཁས་པ༌རྣམས་ཀྱི་བཞེད་ཚུལ་མི་འདྲ་ཞིང། དེ་གཉིས་སོ་སོར་དགེ་སྐྱོན་གྱི་ཆ་མི་འདྲ་བ༌འབྱུང་བས་གདམ་ག་མ་ནོར་བ་བྱ་གལ་ཆེ། ཡི་གེ་སྐད་ཀྱི་རྗེས་སུ་འབྲངས་པ་ཨིན་ཇི་དང་རྒྱ་ཡིག་ལྟ་བུར། གནའ་བོའི་ཤུལ་བཞག་རིག་གནས་སྦྱོང་གོམས་ཐད་དཀའ་ངལ་འཕྲད་བཞིན་ཡོད་པ༌དང། སྐད་ཡི་གེའི་རྗེས་སུ་འབྲང་བ་བོད་ཡིག་ལྟ་བུར་མཚོན་ན། ལོ་ངོ་སྟོང་ཕྲག་རིང་གི་ཤུལ་བཞག་རིག་གནས་སྦྱོང་གོམས་ཐད་དཀའ་ངལ་དེ་ཙམ་མ་མཆིས་ཀྱང། ཁ་སྐད་དང་ཡིག་སྐད་ཀྱི་བར་ཐག་གང་ཙམ་ཆེན་པོ་ཡོད་པས་ཡི་གེ་བཀོལ་སྤྱོད་ཐད་དཀའ་ངལ་འཕྲད་བཞིན་ཡོད། སྤྱིར་བཏང་ཡིག་སྐད་ཅེས་པ་བྲིས་རྩོམ་སྐད་ཡིག་ལ་ཟེར་ཞིང། དེ་ནི་བརྡ་དག་གི་སྒྲིག་ཁྲིམས་ཀྱི་རྒྱ་ལས་མ་བརྒལ་བར་ཞིབ་མོར་བརྟགས་ནས་བྲིས་པ་ཞིག་ཡིན་པས་དུས་ཡུན་རིང་པོར་ཉར་ཚགས་ཐུབ་པའི་དགེ་མཚན་ལྡན། ཁ་སྐད་དམ་ཁ་བཤད་སྐད་ཡིག་ནི། ཡུལ་དུས་གནས་སྟངས་ཀྱི་རྒྱུ་རྐྱེན་དབང་གིས་ (ཡིག་སྐད་དང་བསྡུར་ན་) དུས་ཡུན་ཐུང་ངུའི་ནང་འགྱུར་བའི་བདག་ཉིད་ཅན་ཞིག་ཡིན། བོད་ནི་ས་རྒྱ་ཆེ་ཞིང་ལོ་རྒྱུས་ཡུན་རིང་ལྡན་པ། ས་གནས་སོ་སོའི་ཁོར་ཡུག་དང་དམིགས་བསལ་རང་བཞིན་ལ་བརྟེན་ནས་ཁ་སྐད་ཀྱི་རིགས་མང་དག་ཅིག་གྲུབ་ཡོད། འོན་ཀྱང། ཡིག་སྐད་དམ་བྲིས་རྩོམ་སྐད་ཡིག་ནི་གཅིག་གྱུར་ཡིན་པ་མ་ཟད། ལོ་ངོ་སྟོང་ལྷག་རིང་བརྒྱུད་འཛིན་དང་བདག་གཅེས་གང་ལེགས་བྱུང་ཡོད། བོད་ཀྱི་ཁ་སྐད་རྣམས་གཞི་རྒྱ་ཆེ་བའི་སྒོ་ནས་མདོ་དབུས་ཁམས་གསུམ་གྱི་སྐད་ལུགས་གསུམ་དུ་བསྡུས་ཆོག གོང་དུ་བརྗོད་པ་བཞིན། ཁ་སྐད་དང་ཡིག་སྐད་གཉིས་ཕན་ཚུན་གཅིག་ཕན་གཅིག་གྲོགས་ཡིན་པར་བརྟེན། ཕྱོགས་གཅིག་ནས་ཁ་སྐད་ལས་བྱུང་བའི་མིང་བརྡ་དང། རྩོམ་རིག༌རིག་གནས་ཀྱི་ལེགས་ཆ་བསྡུ་ལེན་གྱིས༌ཡིག་སྐད་ཀྱི་ནང་དོན་དང། བཀོལ་སྤྱོད། ཁྱབ༌ཁོངས་བཅས་རྒྱ་བསྐྱེད་བྱེད་པ་དང་ཆབས་ཅིག ཡིག་སྐད་ལ་སློབ་སྦྱོང་དང་བཀོལ་སྤྱོད་ཀྱི་སྤུས་ཚད་གོང་མཐོར་བཏང་བ་བརྒྱུད་ཁ་སྐད་ལ་སྣེ་ཁྲིད་དང་གཞོགས་འདེགས་བྱ་དགོས། […]